cnw_reg/49-GAL.usfm

\id GAL
\ide UTF-8
\rem The text in this file was extracted from C:/DCS/Chin, Ngawn/WORD/48. CALATIANS. docx.
\mt Kalati
\h Kalati
\mt Kalati
\toc1 Kalati
\toc2 Kalati
\toc3 gal
\s Awnkam tuah otpih nak
\c 1
\p
\v 1 Mihing tei lakpen a heng ngawl, mihing thuneih nak um ngawl Zisuh Khrih thu neih nak in hihen, mahmi Topa cu thihnak pen tho leh tik tu a Pa Pathian thuneih nak hei hihen, a nungzui tu kei mah Paul pen pan;
\v 2 Ka nelah a um U le nau hempoh Kalati ngam sungah a um kohhran tei lakah thu thei tik ing.
\p
\v 3 Topa Zisuh Khrih le a Pa Pathian nelpen hehpih nak le daihnak cu nohtei lakah um ta hen.
\v 4 Topan ohtei pa a himi Pathian deihnak bang a siasuak mi a tu huncan nunnak pen ohte nunpan tuk in, ohtei sualnak hang a mah le mah pia hi.
\v 5 Pathian min cu kumkhua thangphat nak um ta hen. Amen.
\s A dang a sunglawi mi thuthangpha um ma
\p
\v 6 Khrih hehpih nak hang nohte a sam tupa le hi tih loli a manlang khen in, nohten thuthangpha a dang co nak na neih uh hang lamdang sa zet ing.
\v 7 Mahmi thuthangpha cu thuthangpha hima hi. Nang muhte noksak pia in Khrih thuthangpha cu lumlet nuam mi hek khat um haw hi.
\v 8 Mah naven, nohtei lakah kohtei hilh mi thuthangpha sial ngawl, thuthangpha a dang kohten phuannak hei hihen, vanhum pen a heng mi vancung mite heng suk in phuannak hei hihen, phuannak nei mipa cu tamsiat nak co ta hen.
\v 9 Veikhat cu nohtei co sa mi thuthangpha sial ngawl, thuthangpha a dang mi pakhat in a phuang tale a mah cu tamsiat nak co hen hitin kohtei tihmi bang a tu hei in ti bet laih ing.
\v 10 Itahum titale, a tuin kei cu mihing tei deihnak ah zui ing maw? Pathian deihnak ah zui ing kaw? Mihing tei thinlung nem tik tuk in zei ing maw? Mihing tei thinlung nem tik tuk in zei li laih ka hi tale Khrih sila na deh tu hima laih ing.
\s A nungzui tu dangten Paul a sam nak
\p
\v 11 U le nau te aw, thuthangpha phuannak ka neih mi thu cu mihing tei thu hima hi.
\v 12 Mihing tei lakpen co mi nei mang. Zisuh Khrih phuan mi sial ngawl dan thu dang ka co ngawlnak thu nohtei lakah thei tik nuam ing.
\v 13 Itahum titale, kei cu Judah tei nundan bang ka nun laih kei cu Pathian kohhran te bawlsiat nuam hei in hihen;
\v 14 Pu le pa tei khut sung pen conak ka neih mi dan pen thinlung so cuang in, ka miphun tei lakpen ka ngaulcam pih te sang Judah dan thu tuah ngamtat thu hei hihen, nohten thei zo uh ci.
\v 15 Mah naven, ka nui pum sung pen pan tensa hihnak a hehpih nak tuah a sam tu Pathian cu;
\v 16 A capa ii thuthangpha cu miphun dang tei lakah phuang tuk in a deihnak bang a capa cu ka nelah a lang suk ten, kei cu thi le sa tuah thu vaisiam nak bawl mang hi.
\v 17 A nungzui nak a nei masa tutei umnak Jerusalem khuapi ah hei hawh mang, Arab ngam ah hawhvawk in Damaska khua ah kik leh ing.
\p
\v 18 Mah ten kumthum nung ten Pita cu tawk tuk Jerusalem khua ah hawh in a mah tuah ni heinga um ing.
\v 19 A mah le Zisuh nau Jeim sial ngawl a nungzui tu dang te pakhat no hei tawk mang hi.
\v 20 Mah tihcun nohtei lakah laikuat ka ngat nak thu ah mizol nak awnkam man mi um ma hitin, Pathian mai ah ti ing hi.
\v 21 Mah cengten Syria ngam le Cili’cia ngam ah hawh ing.
\v 22 Judah ngam ah Khrih a bia tu kohhran te cu ka mitmai hei thei ngawl in um hi.
\v 23 Kei muhte bawlsiat awngnak a nei tupa cu tu a bosa hun in siatsuah nak a neih mi upnak thu cu a tuin a mah loli in hilh hi tin, a muhtei theihnak bek tuah thei ung hi.
\v 24 Kei ma thu hang a mun Pathian thangphat haw hi.
\s Thuhilh nak a neih mi a sunglawi thuthangpha Paul i sonnak
\c 2
\p
\v 1 Mah ceng kum heili nungten Titu cu sam in Barnabas tuah Jerusalem ah hawh leh ung.
\v 2 Hi thu cu thuphuan nak bang hawh mi a hih hang, miphun dang tei lakah phuan mi thuthangpha cu mah ten son ing. Mah tin son ten na ka deh awng mi le tu nungten deh tuk laih mi na cu a thawnthong cang tuk ngawl in, U pat taak minthang mite bek a tuam tum no in hilh ing.
\v 3 Mah naven, kei mah tuah hawh langkhat tu Grik miphun Titu cu vun lek talhnak co tik haw ma hi.
\v 4 Zisuh hang kohtei co mi luatnak thu zo tuk in kohte cu sila na dek tu tuk ngaihsut nak, dupdelh mizol nak tuah mi dang te khum tum in kohtei sungah luttum tu U le nau hihnak tiamhem in a muhtei thu hang mah tihbang in bawl hi.
\v 5 A dik a man mi thuthangpha cu nohtei lakah kho leng tuk in, kohten a muhtei donak te dawmlaih no hei lungkim ma ung.
\v 6 Upat taak minthang miten a bosa hun laih itihbang mi hei hi ta hen kei mah tuah a seng mi um ma hi. Pathian in mihing tei mitmai zo ma hi. A muhte le kei mah phialdun in a lamdang mi thu thuak nak a um ngawl bek sial ngawl;
\v 7 Vun lek talh nak a co mitei lak pen Pita cu nungzui tu cang tuk in, Pita bawlphat nak a nei tu cu miphun dang tei lak pen kei mah cu nungzui tuk in kei ma nelah vang bawlphat nak a hih hang, vun lek talhnak tuah a seng mi thuthangpha cu Pita hum ah apnak a piak mi bang, vun lek talhnak tuah a seng ngawl mi thuthangpha cu kei ma nelah apnak a piak mi thu a mun thei haw hi.
\v 8 Itahum titale, vun lek talhnak a nei tu a muhtei nungzui cang tuk in Pita sungah ngaihsut na deh a nei tupa cu miphun dang tei nungzui tu cang tuk in, kei ma sungah ngaihsut na dehnak bawl hi.
\v 9 Mah tihcun lungkim nak neih mi hitin ngaihsut nak a nei tu Jeim, Ce’phas le Johan te ka piak mi hehpih nak a theih haw ten, a mun vun lek talhnak a nei mitei lakah hawh tuk mi thu le kohte cu miphun dang tei lakah hawh tuk mi thu cu khut taklam ah a co mi kei mah le Barnabas pia haw hi.
\v 10 Kohten haksa mite phawk ngil tuk ngawl in a mun deihnak pakhat bek a neih mi um hi. Mahmi na cu bawl tukin zuam ing.
\s Dan thukham pen luatnak
\p
\v 11 Mah cengten Pita cu Antiok khua ah a hen ten, a mah cu sonsiat tuk thu a neih hang kei man a mah cu a maicang loli ah ding in kham ing.
\v 12 Itahum titale, mi hekkhat ten Jeim nelah a hen haw laih ngawl in Pita cu miphun dang te tuah an ei langkhat hi. A muhtei hen cengten, Pita in vun lek a talh mitei mitmai zo in miphun dang te tuah phialdun ngam ngawl a mah vo a tuam tum in um hi.
\v 13 A tang laih mi Judah te Pita tuah mipha tiamhem nak a neih haw hang, Barnabas poh cawm in a muhtei mipha tiamhem nak ah zui hi.
\v 14 A muhte cu a dik mi thuthangpha bang in dikcang nak tuah a zui ngawl nak thu ka muh ten, a muhtei mai pen Pita nelah ka tih mi nang cu Judah hi napi in Judah dan thukham bang zui ngawl in, miphun dang tei dan bang in na zui tale miphun dang te Judah dan bang zui tukin ita a muhte nehsiah nak tuah bawl thei cim?
\v 15 Mihing ten dan thukham a zui hang dikcang nak ah heng ma hi.
\v 16 Zisuh Khrih cu upnak hang dikcang nak ah heng haw hi tih cu sual nak a lang mi miphun dang te hi ngawl in, thi le sa hihnak hang Judah mi kohte cu a man mi theihnak bang in dan thukham a zui hang, dikcang nak ah heng ma hi. Khrih cu upnak hang dikcang nakah heng tuk in kohten Zisuh um zo ung. Itahum titale, dan thukham a zui hang a kua mah dikcang nak ah heng thei ma hi.
\v 17 Khrih hang dikcang nak ah heng tuk in kohten zuam napi in sualnak a lang mi a hi laih uh tale, Khrih cu sual thu i na dehnak a nei tupa hima maw? Mah kha awn naisai ma hi.
\v 18 Itahum titale, ka sukbal mi nate cu sak leh nak ka nei tale sualnak ka neih mi cu langzet tuk hi.
\v 19 Mah bek sial ngawl, kei cu Pathian tuah a seng mi thu ah nung tuk in dan thukham tuah a seng mi thu cu dan thukham hang thi zo ing.
\v 20 Kei cu Khrih tuah thinglamteh humah thi zo ing. Mah naven, kei cu nung laih ing. Mah tin ka son ten, kei cu kei mah loli nung hi ngawl in Khrih cu kei mah tuah nung hi. Pumpi taksa ah a tuin ka nunnak cu Pathian capa upnak hang nung ing. Capa in kei mah cu it in kei ma ca a nunnak pia hi.
\v 21 Pathian hehpih nak cu vawk mang hi. Dan thukham cu suang in dikcang nak ah heng thei tale Khrih i thihnak cu a thawnthong tuk hi.
\s Upnak hang dikcang hi tih mi lungkim nak
\c 3
\p
\v 1 Kalati khua a um misil te aw, thinglamteh hum ah thihnak a thuak tu Zisuh cu nohtei mai ah lang ciang zet laknak a neih zo hang, thudik thu ngai nuam tuk ngawl in a kon nang muhte zialin thon hum?
\v 2 Dan thukham a zuinak hang hawvang thiangtho co uh cim maw? Mah ahima tale zaknak nei in upnak hang co mi hi uh cim maw tihmi thu pakhat no cu nohtei lakpen thei nuam ing.
\v 3 Hi tihzah loli tian thei ma uh cim maw? Hawvang thiangtho co cengten a tuin thi le sa hihnak tuah tawp nuam uh cim maw?
\v 4 Hi tihzah loli tian haksat cimnak cu a thawnthong in thuak tuk uh cim maw? A thawnthong loli ta si maw?
\v 5 Mah bek sial ngawl hawvang thiangtho cu nohte pia in, nohtei lakah huham thawmngeng nak a lak tu cu dan thukham a zuinak hang lak mi maw? Upnak thu cu zaknak hang lak mi hum?
\v 6 Mah bang bok, “Abraham in Pathian cu a upnak hang, a upnak cu mi dikcang hihnak in ngaisung hi.
\v 7 Upnak a nei tu cu Abraham i capa le canu hitin, thei ta un.
\v 8 Pathian cu upnak hang, miphun dang te dikcang nak co haw tuk hitin Laithiangtho thei in Abraham nelah thupiak nak um in, “Nangma hang miphun hempoh thupha muicu co haw tuk hi” tin, thuthangpha hilh ham zo hi.
\v 9 Mah a hih hang, upnak a nei tu hempoh ten upnak a nei mi Abraham tuah thupha mui cu co haw tuk hi.
\s Dan thukham le thukam
\v 10 “Dan thukham zui nak a nei mi hempoh te tamsiat nak tuah seng hi. Itahum titale, dan thukham Laithiangtho sungah a tel mi awnkam hempoh a zui le leng thei ngawl mi hempoh tamsiat nak co ta hen hi” tin, Laithiangtho in ti hi.
\v 11 Dikcang nak cu upnak hang nung tuk hi.
\v 12 Dan thukham cu upnak tuah seng ma hi. “Dan thukham a zui tupa cu dan thukham a zui hang nung tuk hi” tin, ti hi.
\v 13 Mah hang, Pathian mai ah dan thukham hang a kua mah dikcang nak heng thei ma hitin ciangzet in lang hi. “Thing hum ah taak mi hempoh tamsiat nak a thuak tute hi” tin Laithiangtho sungah a ngat mi bang, Khrih cu ohtei ca tamsiat nak a thuak tupa a hih hang, ohte cu dan thukham i tamsiat nak pen tan zo hi.
\v 14 Itahum titale, Abraham co mi mui cu thupha cu Zisuh Khrih hang miphun dang tei lakah heng zo a hih hang, ohten thukam tuah a seng mi hawvang thiangtho cu upnak tuah co tuk mi hi.
\p
\v 15 U le nau te aw, lei hum awnkam tuah hilh tung hi. Mihing te hei in lungkim nak lai a bawl cengten, a kua mah in vawk ma hi. Awnkam bet leh in khum nak vang um ma hi.
\v 16 Pathian in Abraham le a miphun tei lakah thukam nak a piak mi cu ci le ham tampi tin a tihnop nak hi ngawl in pakhat bek a tihnop mi cu, “Na ci le ham” tin, ti hi. Mahmi pakhat cu Khrih hi.
\v 17 Hi thu te sonnak ka neih mi cu Khrih a tihnop nak a hih hang, Pathian in kho tik tuk a ngaihsut ham mi thukhaam cu kum zali le sawmthum nungten, dawlta a heng mi dan thukham cu vawk theih ma hi. Thukam cu a thawnthong in cang tik thei ma hi.
\v 18 Mah bek sial ngawl lo cu dan thukham tuah a seng tale thukam tuah seng kha ma hi. Pathian in thukam tuah Abraham nelah mahmi lo cu pia zo hi.
\s Dan thukham i tuptah ngaihsut nak
\v 19 Mah a hih hang, dan thukham cu i nemcuam nak um hum tih mi cu thukam nak a co mi ci le ham a hih laih ngawl sung hempoh sual bawlnak hang, mahmi thu cu a piak bet mi hi. Mahmi thukam cu vancung mi tampi te tuah lemnak bawl tupai khutsungah pia haw hi.
\v 20 Lemnak a bawl tupa cu a langkhat lam bek tuah seng ma hi. Pathian cu pakhat bek um hi.
\v 21 Mah a hih hang, dan thukham cu Pathian thukam tuah a kalhdun nak um maw? I mah um ma hi. Itahum titale, a piak mi dan thukham cu nunnak a pia thei a hitale, dikcang nak cu mahmi dan thukham tuah a thungai a man mi cu co ngah tuk uh ci.
\v 22 Mah naven, Zisuh Khrih upnak tuah a seng mi thukam cu um tutei lakah pia tuk in, Laithiangtho cu mi hempoh sual i khut nuai ah kelen hi.
\p
\v 23 Upnak thu a hen laih ngawl dan thukham zui nak hang, ohte cu tu nungten upnak thu phuansuah nak a hen tian hetcip nak thuak hung.
\v 24 Mah hang, kohten upnak thu tuah dikcang nak ah heng tuk in dan thukham cu Khrih nelah ohte lamhuai in kelen tupa hi.
\v 25 Upnak thu a hen ten, ohte cu kelen tupai khut sungah um leh ma zo hi.
\v 26 Itahum titale, nohtei venghawng in Zisuh Khrih upnak hang Pathian ii ca te hi zo uh ci.
\v 27 Khrih sungah baptisma a co tu hempoh cu Khrih thuam a silh tute hi.
\v 28 Zisuh Khrih sungah Judah, Grik, sila, mi luat tih um ngawl in pa no, numei tih um ma, Topa ah nohtei venghawng pumkhat hi uh ci.
\v 29 Khrih tuah a seng mi na hi tale Abraham ci le ham na hih hang, thukam nak bang lo co tute hi uh ci.
\c 4
\p
\v 1 Lo co tih mi cu neihnak hempoh a co taak mi hi naven, kum a kim ngawl laih sung hempoh cu sila tuah na bang ve hi.
\v 2 A pai hun a tek mi a hen laih ngawl sung hempoh cingkep kelet nak a nei tupai khutnuai ah um hi.
\v 3 Mah bang bok ohten kum a kim laih uh ngawl cu leihum dan thu nuai ah sila thuak hung.
\v 4 Mah naven huncan a kim ten ohte capa hihnak co tuk mi thu cu;
\v 5 Dan thukham khut nuai sungah a um mi ohtei luang tan tuk in numei pum sungah ca pai in dan thukham nuai ah hinnak a nei tu capa cu Pathian in hah suk hi.
\v 6 Mah tihbang in nohte cu canu capa na hih uh hang, Aba’ba ka pa tin sam theih nak a neih mi capa i hawvang cu nohtei thinlung sungah Pathian in hah suk zo hi.
\v 7 Mah a hih hang, nohte cu na dehnak a nei tu sila hi leh ngawl toh in cate na hi zo uh ci. Ca na hi uh tale Khrih hang lo co tute hi uh ci.
\s Kalati ngam mite Paul i sunsak nak
\p
\v 8 Mah naven a bosa hun in nohten Pathian theihnak na neih uh hang, thi le sa hihnak tuah Pathian a hi ngawl mitei na dek uh ci.
\v 9 A tuin, nohten Pathian thei zo ing hi tin ti ma uh ci. Pathian in nohte cu theihnak a neih cengten, thanem nak, daihnak pia thei ngawl mi thu ah ita hek kik leh in um thei uh cim? Hi leihum thu ah sila nuam leh zo ta uh cim maw?
\v 10 Kum, ha, ni, hun le can te zui tuk in ngaisung uh cim maw?
\v 11 Nohtei ca zuamnak tuah ka bawl mite nohtei thu hang, a thawnthong in cang zo ta maw tin kei man lau ing.
\p
\v 12 U le nau te aw, kei mah bang in um ta un hitin nohtei lakah hehpih kun ing. Nohten ka hum ah sual bawl mi imah nei ma uh ci.
\v 13 Kei cu tidam ngawlnak tuah a sunglawi mi thuthangpha cu a bosa hun in nohtei lakah ka phuan mi thu cu nohten thei zo uh ci.
\v 14 Pumpi taksa hum ah thuaknak ka neih mi culnak cu nohten i mah poisa ngawl in le nawngkai ti ngawl in Pathian vancung mite bang in hihen, Khrih Zisuh bang in hihen, kei mah cu sang in cawm uh ci.
\v 15 Mah tihbang napi in nohtei co tuk mi mui cu thupha cu itihbang mi mui cu thupha hum? Nohten a cang thei tale nohtei mit hei pholh in kei mah cu pia tuk uh ci tin, nohtei deih mi um hitin theihpih nak tetti nei ing.
\v 16 A tuin, kei cu thudik thu nohtei lakah phuannak ka neih hang nohtei ngal in cang zo ta ing maw?
\v 17 Nohtei hum ah thupi zet bawlnak na neih uh mi a muhte cu a pha mi ngaihsut nak hang hi ngawl in, a muhte itnak nei tukin a mun nang muhte vawk tuk in deih haw hi.
\v 18 Mah naven, nang muhte tuah um kawm laih bek in a pha mi nate cu itnak bang neih mi hima hi. A cat ngawl itnak hi.
\v 19 Khrih cu nohtei sung pen a langtul tian nohtei ca nau hinnak cu thuaknak ka neih leh mi ka canu capa te aw;
\v 20 Nohte cu muanmawh ka neih hang a tuin nang muhte pumpi loli tawk in a sunglawi cuang mi awnkam te son nuam ing.
\s Sarah le Hagar – Thukhaam panih
\p
\v 21 Dan thukham nuai ah a um nuam mite aw, nohten dan thukham thei ma uh cim maw?
\v 22 Dan thukham Laithiangtho a heng mi cu, “Abraham in capa panih nei hi. A capa pakhat cu sila nui ca hi. Pakhat cu sila a hi ngawl mi numei nui ca hi” tin, heng hi.
\v 23 Sila nui ca cu thi le sa tuah hin mi capa hi. Sila hi ngawl mi ca cu thukam tuah hin mi capa hi.
\v 24 Mahmi thu cu tehkip nak tuah son tale mah numei panih te cu thukhaam panih a tihnop nak hi. Hagar tih mi numei nu cu dan thukhaam thu, pakhat cu Sinai mual hum pen a hih hang sila tampi hing thei mi thu hi.
\v 25 Itahum titale, Hagar cu Arab ngam ah a um mi Sinai mual hi. A tuin a um mi Jerusalem khua tuah bang ve hi. A cate tuah sila in um haw hi.
\v 26 Mah naven, a hum ah um mi Jerusalem khuapi cu ihempoh kohtei nu tih mi sila hi ngawl numei nu hi.
\v 27 Laithiangtho a heng mi bang ca hinnak a nei thei ngawl miciing nu lungdam in. Nau hinthuak nak a nei laih ngawl numei nu nging zet au in. Itahum titale, zamsa mi numei nui canu capa te cu pasal nei mi numei nui canu capa te sang tam saw haw tuk hi” tin, ngan hi.
\p
\v 28 U le nau te aw, ohten Isak bang thukam tuah a seng mi canu capa te hung hi.
\v 29 Mah laih tak thi le sa tuah hinnak a nei mi capa in hawvang tuah hin mi capa cu bawlsiat mi bang, a tu hei in na heng hi.
\v 30 Mah naven Laithiangtho sungah itihbang in heng hum tih mi sila numei nu le a capa cu hawlvawk in. Sila nui capa cu sila a hi ngawl numei nui capa tuah lo co thei ma hi” tin, ti hi.
\v 31 A tuin U le nau te aw, ohte cu sila nui ca hima hung. Sila a hi ngawl numei nui cate hung hi.
\s Khrih sungah luatnak
\c 5
\p
\v 1 Khrih in luatnak co tuk in ohte cu luat tik zo. Mah hang khozet sila kolhak pua in hetcip nak thuak leh toh pah sun.
\p
\v 2 Kei mah Paul in, nohten vunlek talh nak na nei uh tale Khrih cu nohtei ca nemcuam nak imah um tuk ma hi.
\v 3 Vun lek talhnak a nei tu mi hempoh theihpih nak tetti ka neih leh tik mi cu mah tihbang mi pa in a mah cu dan thukham zui khawng tuk in leibat nei mipa hi.
\v 4 Dan thukham hang dikcang nak ah a heng mi nohte cu Khrih tuah khen in, hehpih nak sungah kho ngawl in siatnak ah heng zo uh ci.
\v 5 Kohten, upnak tuah dikcang nak ah heng tuk ung hitin muansan nak a nei mi hehpih nak hi.
\v 6 Zisuh Khrih sungah vun lek talhnak cu a nemcuam nak imah um ma hi. Vun lek a talh ngawl vang nemcuam nak um ma hi. Hehpih itnak tuah bawlnak a nei tu upnak bek thupi hi.
\v 7 A bosa hun laih in nohte cu phazet no tai zo uh ci. Mah a hih hang, thudik thu ngai tuk ngawl in a kon kham hum?
\v 8 Hi sualsoh nak cu nang muhte samnak a nei tu Pathian nelpen a heng mi hima hi.
\v 9 Naman dawm laih no cu mohvam ngawi bungkhat sungah polh let tik thei hi.
\v 10 Nohten theihnak a dang te pakhat no hei um ngawl in vawk khawng tuk uh ci” tin, Pathian sungah nohten ngaisung uh ci. Nang muhte noksak a bawl tute cu sual dantat nak co tuk hi.
\v 11 U le nau te aw, kei cu vun lek talh thu hilhnak ka nei laih tale ita bawlsiat nak thuak laih hing ngim? Mah tihbang hilhnak a nei tale thinglamteh thu donak um tuk ma hi.
\v 12 Nang muhte a lumlet tute cu hawlvawk tuk deih ing.
\p
\v 13 U le nau te aw, nohte cu luatnak a co mite hi uh ci. Mah naven, thi le sa deih nak pia in mahmi luatnak cu mang pah sun. Pakhat le pakhat itnak tuah na dek un.
\v 14 Itahum titale, na pumpi na ih bang bok in na inn nel te na it in hi tih mi thukham pakhat na zui tale, dan thukham sung a um mi hempoh a venghawng zui hi.
\v 15 Mah ahima tale, pakhat le pakhat pet tek in eihnak a nei uh tale pakhat le pakhat siatnak ah heng tuk hi tih cu launak hang in ngalling ta un.
\s Hawvang thiangtho le thi le sa nunnak
\p
\v 16 Ka thukham cu hawvang thiangtho tuah nung in kalsuan ta un. Mah tihbang in na zui uh tale lei thi le sa deihnak in nung tuk ma uh ci.
\v 17 Itahum titale, lei thisa nunnak le hawvang thiangtho nunnak cu pakhat le pakhat do un nak a neih hang, nohtei zui nuam mite cu zui thei ma uh ci.
\v 18 Mah naven, hawvang thiangtho deihnak ah zui tale dan thukham pen luat uh ci.
\v 19 Lei thi le sa tuah nun cu ciangzet in lang hi. Mahmi nunnak te cu nu le pa sualnak, nu mei dang te tuah sualnak, a nawngkai in nunnak, huknak hang sualnak;
\v 20 Milim biak nak, midang te aizialh nak, hauhdun nak, huatdun nak, demdun nak, thinuuk nak, eldun nak, pawlkhen kek nak, pakhat le pakhat khendun nak;
\v 21 Mi thil hazak nak, mi thahnak, ngui thei phunkim in nak, puai bawl nak pen pan mah tihbang mi nunnak hi. Mah tihbang mi nunnak a nei tute cu Pathian uknak ngam lo co haw tuk ma hitin, a bosa hun can laih hilhnak ka neih zo mi bang, a tu hei in hilh ham ing.
\v 22 Hawvang thiangtho a ngah te cu itnak, lungdam nak, daihnak, thinsau nak, hehpih nak, phatnak, muantaak nak,
\v 23 Lungnem nak, mah le mah pumpi kep zawh nak hi. Hi thu te cu a donak thu imah um ma hi.
\v 24 Khrih Zisuh tuah a seng mite cu thi le sa deihnak in hihen, thi le sa deihnak thinlung te hei hihen, thinglamteh hum ah khencih haw zo hi.
\p
\v 25 Mah a hih hang ohten hawvang thiangtho tuah a nung uh tale hawvang thiangtho deihnak tuah nung tuk hung hi.
\v 26 A thawnthong minthan huamhap nak, pakhat le pakhat huatdun nak, pakhat le pakhat iksik in sonsiat nak te pial in um tuk hung hi.
\s Pakhat le pakhat puak mi van cu bawmdun puak nak
\c 6
\p
\v 1 U le nau te aw, mihing pakhat in sualnak pakhat a bawl tale hawvang thiangtho laksawng co mi nohten sualsoh nakpen luat tuk in, mah le mah ngalling in lungnem nak thinlung tuah a mah cu huh le bop nak tuah a umnak mun kel ah kho zet um leh tik ta un.
\v 2 Pakhat le pakhat puak mi van te pakhat le pakhat bawmdun pua in Khrih i thu zui ta un.
\v 3 Mi pakhat in imah thu hi ngawl napi in a mah le mah thupi sa cop zet in a ngaisung tale a mah le mah cu zolcop hi.
\v 4 Mi hempoh in a bawl mi nate cek ta hen. Mah tin a bawl tale mi dang te son ngawl in mah le mah no in lungdam nak thu um tuk hi.
\v 5 Itahum titale, mi hempoh ten a muhtei na tek dek haw tuk hi.
\p
\v 6 Pathian thu a zil tupa cu a ziltu tei lakah a pha mi na hempoh hilhnak nei ta hen.
\v 7 Zolthu sang pah sun. Pathian cu cekpan zotsak bawlnak deih ma hi. Itahum titale mihing ten anci a vawh bang in at leh tuk hi.
\v 8 A thi le sa tuah anci vawh tupa cu thi le sa siatnak ancang at leh tuk hi. Hawvang thiangtho tuah anci a vawh tupa cu hawvang thiangtho hang, kumkhua nunnak ancang at leh tuk hi.
\v 9 Ohten thinkiam ngawlin a pha mi nuncak nak nei tuk hung hi. Itahum titale, mah tihbang in nuncak nak a nei uh tale huncan a kim ten ancang te at leh tuk hung hi.
\v 10 Mah hang, kohten a mansa hihnak bang um tutei innsung sang hempoh ah a cuang in hehpih bawl in, a muhtei innkua hum ah a pha mi na bawl tuk hung.
\s A dawl bel thazang sosuah nak
\p
\v 11 Izahtak in a ngeng mi lai hum tih cu ka khut tuah nohtei lakah ka ngat mi nohten mu zo uh ci.
\v 12 A pumpi thi le sa mawi tik nuam mi hempoh ten Khrih i thinglamteh hum ah a thuaknak, bawlsiat nak le nang muhte luat tik nuam in nohten vun lek talh tuk nehsiah in sosuah thei uh ci.
\v 13 Vun lek talh nak a nei tu hempoh te dan thukham a mah loli in zui nak a neih ngawl hang, nohten nang muhtei thi le sa ultun nuamnak tuah nohten vun lek talh uh ci.
\v 14 Ka ca in ohtei Topa Zisuh Khrih i thinglamteh sial ngawl thudang imah ultun tuangkhawng pah sun. Mahmi thinglamteh humah leihum cu kei ma ca khencih um zo. Kei man hi leihum ca khetcih nak thuak zo ing.
\v 15 Itahum titale, Zisuh Khrih sungah vun lek talhnak cu a thupi nak um ma hi. Talh ngawl vang a thupi nak um ma hi. Semsuah thak hihnak bek thupi hi.
\v 16 Hi dan thu bang a nung tu hempoh tei humah hei hihen, Pathian Isarel miphun tei hum ah hei hihen, daihnak le hehpih nak um ta hen.
\p
\v 17 A tu penpan a kua mah in kei mah noksak nak bawl ma hen. Ka pumpi taksa ah Topa Zisuh i maliam vei nak keng ing.
\p
\v 18 U le nau te aw, ohtei Topa Zisuh Khrih a hehpih nak cu nohtei thinlung sungah um ta hen. Amen.