cnw_reg/38-ZEC.usfm

\id ZEC
\ide UTF-8
\rem The text in this file was extracted from C:/DCS/Chin, Ngawn/WORD/38. ZAKHARIAH. docx.
\mt Zakhariah
\h Zakhariah
\mt Zakhariah
\toc1 Zakhariah
\toc2 Zakhariah
\toc3 zec
\s Pathian nelah pin leh tuk a samnak
\c 1
\p
\v 1 Darius kumpi uknak kumnih, ha liat ha, Iddo tupa Berichiah capa kamsang Zakhariah nelah a heng mi Pathian awnkam thu cu,
\v 2 Pathian in na pu le pa te a thinuuk zet zo hi.
\v 3 Mah naven, vancung ngalkap Topa Pathian thupiak a muhte na hilh tuk mi cu ka nelah pin leh un hitin, vancung ngalkap Topa Pathian in thupia hi. Keimah vang nang muhtei um nakah hung leh tung hitin, vancung ngalkap Topa Pathian in thupia hi.
\v 4 Tang laih kamsang ten, nohten a pha ngawl mi lamzin a pha ngawl mi nuncan te a tu in pial ta un hitin, vancung ngalkap Topa Pathian thupiak mi cu hilh in au naven beng in thu za ma, ka awnkam thu a ngai ngawl tu nohtei pu le pa te bang bawl pah sun hitin, Pathian in thupia hi.
\v 5 Pu le pa te i lai ah um haw hum? Kamsang te a cat ngawl in nung thei haw maw.
\v 6 Ka sila kamsang tei sungah ka thucah mi dan thukham awnkam te nohtei pu le pa ten pha zo ma uh cim maw. A muhte phawk in kohtei nundan huai hek bang vancung ngalkap Topa Pathian in kohtei sungah thukhen tuk hitin, ngaihsut nak a um bang thukhen zo hitin hilh zo hima maw tin, thupia hi.
\s Myrtle thingkung lak lawh pen mihing
\p
\v 7 Darius kumpi uknak kumnih, ha heikhat ha tihmi sebat ha, ni kualluanli ni in Pathian awnkam thu cu Iddo capa a himi Berichiah capa kamsang Zakhariah nelah heng in,
\v 8 Zan huncan ten a muh mi cipuh san a khung tu mihing pakhat lang in, mual luam lak sungah a um mi myrtle thingkung laklawh ah ding hi. A nungpen cipuh san, cipuh hang, cipuh ngo te um hi.
\v 9 Keiman Topa aw, a muhte cu a kua te hum tin ka dot ten, keimah tuah otpih tu vancung mi in a muhte a kua hum tih mi cu keiman lak tung hitin a hilh cengten,
\v 10 Mytle thingkung laklawh ah a ding tupan, a muhte cu leihum hempoh ah vak kawkawi hawh tik tuk in Pathian hah mite haw hitin, don leh hi.
\v 11 A mun, kohte cu leihum hempoh ah vak kawkawi in hawh zo ung. Leihum hempoh cu sual um ma hi, dai den no um hitin mytle thinkung lak lawh pen a ding tu Pathian vancung mi nelah don leh haw hi.
\p
\v 12 Mah cengten Pathian vancung mi in vancung ngalkap Topa Pathian aw, nang cu kum sawmsalih sung thinuuk mi Jerusalem khuapi le Judah khuapi te ituk tian hehpih ngawl in um tuk hum tin a dot ten,
\v 13 Pathian in keimah tuah a otpih tu vancung mi nelah a pha mi awnkam nepnak tuah don leh hi.
\p
\v 14 Keimah tuah otpih tu vancung mi in, vancung ngalkap Topa Pathian thupiak mi hilh in au mi thu cu keiman Jerusalem khuapi le Zion mual ca hehpih nak ngengpi nei ing.
\v 15 Dai den no a um mi ngamdang miphun ten a thinuuk zet hi. Itahum titale, keiman Jerusalem khuapi cu dawm laih no ka thinuuk ten, a mun bawm dun in bawlsiat haw zo hi.
\v 16 Mah hang, Pathian thupiak mi cu hehpih bawl nuamnak thinlung tuah Jerusalem khuapi ah kei cu pin leh zo ing. Hi khuapi sungah ka inn sa tuk hi. Khuapi vang teh tuk hitin, vangcung ngalkap Topa Pathian in ti hi.
\v 17 Vancung ngalkap Topa Pathian thuipiak leh mi hilh in a au tuk mi cu ka khuapi le khua no te mun hempoh ah dim in khangto haw tuk hi. Pathian Zion cate nem tik tung. Jerusalem khua mite teng leh tung hitin, thupia hi.
\s Ki pali le lettama khut thiam pali
\p
\v 18 Mah cengten keiman zo leh in ki pali mu ing.
\v 19 Keimah tuah otpih tu vancug mi in mahmi ki te cu itihbang hum hitin a dot ten, mahmi ki te cu Judah ngam, Isarel ngam, Jerusalem khuapi te mun hempoh ah a khen kek mi ki in cang hitin, don leh hi.
\v 20 Pathian in lettama khut thiam pali cu lak hi.
\v 21 Keiman a mun i na bawl tukin hung kaw tin a dot ten vancung mi in, mahmi ki te cu a kuamah in zo ngam tuk ngawl in Judah ngam miphun te a khen kek tik tu ki te hi. Hi lettama te cu Judah ngam miphun te khen kek tik in a do tu mahmi ki te lau tik tuk in ngamdang miphun tei ki te a zawt dem tute hi haw hitin, don leh hi.
\s Tehnak tuk khau le mihing
\c 2
\p
\v 1 Mah cengten ka zo le tehnak tuk khau a keng tu mihing pakhat ka muhten,
\v 2 A lai mun ah hawh tuk cim tin a mah ka dot ten, Jerusalem khuapi a sau lam le a zal lam thei nuam in khuapi teh tuk hawh hitin, don leh hi.
\v 3 Keimah tuah otpih tu vancung mi a hawh ten a dang vancung mi in muak in,
\v 4 Nang cu tai in mahmi tangval na hilh tuk mi Jerusalem khua mihing le nganhing hempoh a tam leita hang, khua sungah um haw tuk hi.
\p
\v 5 Pathian thupiak mi keimah cu khuapi kham tu mei khuapi khantian in cang tuk hi. Khuapi a laizang pen keimah cu khuapi minthan nak in cang tuk hi.
\p
\v 6 Ngualcam te aw, ngualcam te aw, sak lam umnak mun pen tai in hung un hitin, Pathian in thupia hi. Vanhang nuai umnak mun li ah nang muhte keiman pungzai tik tung hitin, Pathian in thupia hi.
\p
\v 7 Babilon khuapi canu tei lakah a um Zion canu te aw, luat tuk in tai in.
\p
\v 8 Vancung ngalkap Topa Pathian thupiak mi cu nang muhte a siatsuah tu miphun tei umnak mun ah minthan nak a lang cengten keimah hah hi. Nang muhte a tohkha tupa cu a mitcang tokkha tupa hi.
\v 9 A muhte keiman that in a muhtei sila te siatsuah tuk hi. Vancung ngalkap Topa Pathian in, keimah a hah mi cu nohten thei tuk uh ci.
\p
\v 10 Zion canu te aw, lasa in lungdam un. Keimah hung in na mai ah um ing hitin, Pathian in thupia hi.
\v 11 Mahmi huncan ten miphun hempoh ten, Pathian sungah lut tum in ka miphun in cang haw tuk hi. Na mai ah keimah um tung. Vancung ngalkap Topa Pathian in na nelah keimah a hahnak thu cu nangman thei tuk ci.
\p
\v 12 Pathian cu a thiangtho mi ngam sungah a ma ca Judah ngam lo co in Jerusalem khuapi teng leh tuk hi.
\v 13 Nunnak a nei mihing hempoh te aw, Pathian mai pen daiden no um un. A thiangtho mi umnak pen tho zo hi.
\s Thiampi ngeng ca tuk a thiangtho mi puan
\c 3
\p
\v 1 Thiampi ngeng Joshua in Pathian vancung mai pen a dinnak hei hihen, Satan in donak bawl in a taklam ah a dinnak hei hihen, ka nelah lak hi.
\v 2 Pathian vancung mi in Satan aw, Pathian in nangmah thu hilh ta hen. Jerusalem khuapi cu a tensa mi Pathian in nangmah thu hilh ta hen. Hi pa cu mei sung pen dawh mi thingthu mawk hima maw tin, Satan cu ti hi.
\v 3 Joshua in a bal mi puan silh in vancung mai pen a din hang,
\v 4 Vancung mi in a bal mi puan cu duuk un hitin a mai ah a ding mi dang mitei lakah ti hi. Joshua in na sualnak cu keiman son sak zo ing. A mawi mi puan silh tuk ci tin, ti hi.
\v 5 Keiman a thiangtho mi hempoh a ma lu hum ah koih haw hen hitin a tih bang, a thiangtho mite cu a luhum ah koih in puan silh tik haw hi. Pathian vancung mi cu a bulah ding hi.
\p
\v 6 Mah cengten Pathian vancung mi in vancung ngalkap Topa Pathian thupiak mi hilh in Joshua nelah thukham a piak mi cu,
\v 7 Nang cu ka lamzin ah zui in ka dan thukham na cingkem tale ka inn cu thukhen nak thu, ka thukhen nak thu te cingkep nak thu um tuk hi. Na mai ah a ding mi hekkhat te lamhoih nak thu keiman pia tung.
\v 8 Thiampi ngeng Joshua aw, na mai ah a um mi hempoh te tuah ngai un. A muhte cu mangbangza tuah a seng mite hi. Ka sila tih mi a zikdawn cu keiman heng tik tung.
\v 9 Joshua mai ah ka koih mi suang cu zo in. Mahmi suang pakhat cu mitcang salih tuah um tuk hi. Mahmi suang vang keiman supek in bawl tung. Nikhat sung in hi ngam tei sual cu keiman vawk tung hitin, vancung ngalkap Topa Pathian thupia hi.
\v 10 Mahmi ni in nohten nang muhtei inn nel pih pakhat le pakhat cabit kung nuai, theipi kung nuai sam tuk uh ci tin, vancung ngalkap Topa Pathian in thupia hi.
\s Sui mei khung le olive kung panih
\c 4
\p
\v 1 Keimah tuah otpih tu vancung mi cu hung leh in hihbu mite a khanglo bang keimah cu khanglo ing.
\v 2 Nangman i mu cim tin a dot ten, keiman zo in sui tuah bawl mi sathau meikhuat khung mu ing. Meikhung khuam a lek ah sathau bel pakhat, meikhuat salih, sathau bel le meikhuat salih a peh mi a vangawng salih um hi.
\v 3 Sathau bel taklam pen olive thingkung pakhat, a veilam khut ah kung khat, mei khung a khuh tu olive kung panih um hitin a son cengten,
\v 4 Keimah tuah otpih tu vancung mi cu ka Topa, hi thu te ithu hum tin a dot ten,
\v 5 Keimah tuah otpih tu vancung mi in hi thu te cu ithu hum tih thei ma cim maw tin a dot ten, keiman thei mang hi Topa aw tin, ti ing.
\v 6 Vancung mi in Zerubabel nelah a heng mi Pathian awnkam thu cu ngalkap hang hima, thuneih nak hang hi ngawlin ka hawvang hang in cang tuk hitin, vancung ngalkap Topa Pathian in thupia hi.
\v 7 Mualpi aw, nang cu itih bang cim? Zerubabel mai pen a bang ve mi mun in cang tuk hi. Mihing tampi ten a hehpih nak um ta hen. A hehpih nak um hen hitin au in mahmi kumpi in inn ning khuam suang cu koih tuk hi.
\p
\v 8 Mah cengten Pathian awnkam ka nelah a heng mi thu cu,
\v 9 Zerubabel in hi inn cu a tawphah nak bawl zo. A man sa ceng tuk hi. Vangcung ngalkap Topa Pathian in keimah cu nang muhtei umnak mun ah a hahnak thu nohten thei tuk uh ci.
\p
\v 10 A thu neu a bawl mi ni cu a kon sum sial ngawlnak bawl hum? Taicin thikhau Zerubabel khut sungah a um mi salih ten a muh hang lungdam haw hi. Mahmi salih te cu leihum hempoh sak le hanglam ah a tai thei mi Pathian mitcang hitin, thupia hi.
\p
\v 11 Keiman mei khung taklam, veilam ah a um mi olive kung panih cu a kua hum tih hei in hihen,
\v 12 Sathau zetnak sui cet panih tuah a muhtei sathau buak mi olive kangkak panih cu a kua hum tih hei in ka dot ten,
\v 13 Vancung mi in mahmi thingkang kak te thei ma cim maw tin a dot ten, keiman thei mang hi Topa aw tin, ti ing.
\p
\v 14 Vancung mi in mahmi a kangkak te cu leihum hempoh uktu Topa mai ah a ding sathau a noih co mi panih hitin, ti hi.
\s A leng li in a um mi laizial
\c 5
\p
\v 1 Mah cengten ka zo le a leng li in a um mi laizial mu ing.
\v 2 Vancung mi in nang cu i mu nge cim tin a dot ten a leng in a um li mi laizial mu ing. A sau lam tong kul, a zal lam tong sawm um hitin, ti hi.
\v 3 Vancung mi in mahmi laizial cu ngam sung hempoh ah a dim mi tamsiat nak hi. Nguca thei mi hempoh ten mahmi laizial sungah a tel mi bang siatsuah co haw tuk. Tamsiat a ngam tu hempoh ten mahmi laizial a langlam ah a um mi bang thahnak thuak haw tuk hi.
\v 4 Vancung ngalkap Topa Pathian thupiak mi laizial cu keiman pholh tung. Nguca thei mipai inn sungah hei hihen, ka min sal in a man ngawl mi tamsiat nak a bawl tu pai inn sungah hei hihen, lut tum in a um hang thingta te, suan te tuah mahmi inn cu sia tuk hitin, thupia hi.
\s Bawm sung pen numei nu
\p
\v 5 Mah cengten keimah otpih tu vancung mi cu tul in a tu in a suak tul mi cu zo in hitin ka nelah a tih ten,
\v 6 Mahmi thu cu i thu hum tin ka zoh ten, a hawh tul mi bawm hitin, ti hi.
\v 7 Suan cuai zakhat, a hum lam ah dang in numei nu pakhat bawm sungah a khung mi cu keiman mu ing.
\v 8 Vancung mi in mahmi numei nu cu a bawl sual mi sualnak hitin tiin, bawm sungah a mah koih in bawm sungah suan pheng cu koih hi.
\v 9 Mah cengten ka zo le kawl mu ha bang a nei mi numei panih cu a ha sungah hawvang tuah hawh tulin mahmi bawm cu leipi le vanhum lak lawh ah thiak haw hi.
\v 10 Mahmi bawm cu itihbang thiak haw hum tin, keimah tuah otpih tu vancung mi cu ka dot ten,
\v 11 Shinar ngam pen bawm ca inn sa tuk in thiak haw hi. Mahmi ngam sung a ma khung hum ah koih in um haw tuk hitin, ti hi.
\s Cipuh leng pali
\c 6
\p
\v 1 Mah cengten ka zo le dal tuah bawl mi mual panih laklawh pen leng pali a khung mi cu tul hi.
\v 2 A masa bel leng sung pen cipuh san, a panih nak leng cu cipuh a hang,
\v 3 A pathum nak leng cu cipuh a ngo, a pali nak leng cu thazang ngilnak a nei mi cipuh a can te dawk in um hi.
\v 4 Ka Topa aw, mahmi leng te cu i tuk hum tin keimah tuah otpih tu vancung mi nelah ka dot ten,
\v 5 Vancung mi in mahmi leng te cu leihum hempoh uktu Topai mai a din nak mun pen a hawh mi vanhum huih pali te hi.
\v 6 A dawk mi cipuh a hang te cu saklam ngam ah hawh hi. Cipuh a ngo te cu cipuh a hang nungah zui haw. Cipuh a can te cu hanglam ah hawh haw hitin, ti hi.
\v 7 Thazang ngilnak a nei mi cipuh tul in leihum hanglam le saklam ah vak kaw kawi tuk in thasuah haw hi. Vancung mi cu hawh in leihum pen hanglam le saklam ah hawh in vak kawkawi haw hitin a tih mi bang, a mun leihum pen hanglam le saklam ah vak kawkawi haw hi.
\v 8 Vancung mi in keimah sam zo hi. Saklam ngam ah a hawh mi cipuh te, ka thinuuk nak cu saklam ngam ah um tik zo hitin, ti hi.
\s Joshua ca sui lukhu
\p
\v 9 Mah cengten Pathian awnkam thu ka nelah a heng mi cu,
\v 10 A masa in matnak a co hang a tu in Babilon khuapi pen a pin leh Heldai miphun, Tobijah miphun, Jedaiah miphun hek khat te sam in, nikhat sung Zafaniah capa Josiah inn ah a hawh ten,
\v 11 Sui le ngun te keng sui lukhu a bawl cengten, Josadech capa thiampi ngeng Joshua luhum ah koih in hi.
\v 12 Vancung ngalkap Topa Pathian thupiak a ma nelah hilh tuk mi a zikdawn min a nei tupa cu zo un. A ma umnak mun pen po in Pathian biakinn sa tuk hi.
\v 13 Pathian biakinn a sak cengten a thawmngeng in a kumpi tohkham khun nak hum ah khung in uk tuk hi. Kumpi tohkham khun nak hum ah thiampi vang a hih hang, mahmi panih te cu pawlkom nak thukhaam bawl haw tuk hi.
\v 14 Mahmi sui lukhu cu Helem, Tobijah, Jedaiah, Zefaniah capa Hen tei ca tuk Pathian biakinn sung pen theihpih nak thu in cang tuk hi.
\v 15 Ngam khuala pen hung haw in Pathian biakinn sa haw tuk hi. Vancung ngalkap Topa Pathian in, kei cu nang muhtei umnak mun ah a hah mi nohten thei tuk uh ci. Nohten nang muhtei Topa Pathian thupiak mi pha zet ngai tale hih tihbang in cang tuk hitin, thupia hi.
\s Thudik thu le hehpih nak
\c 7
\p
\v 1 Daruis kumpi uknak kumli, chisleu tih mi ha kuah ha ni li ni in,
\v 2 Pathian mai pen thungen tuk in hihen,
\v 3 Kum tampi a bawl bang ha nga ha ten kap in nung hen tin, vancung ngalkap Topa Pathian inn sungah a um mi thiampi le kamsang te dong tuk in hihen, Sharezer, Regem-melech le a miphun ten Pathian inn ah a hah haw ten,
\v 4 Vancung ngalkap Topa Pathian awnkam thu cu keimah Zakhariah nelah heng in,
\v 5 Thiampi le ngam sung miphun hempoh tei lakah na hilh tuk mi cu kum sawm salih sung nohten ha nga ha le ha salih ha ten ancang kap in a um ten, a thungai in ka deih nak a um bang ka nelah ancang uh cim maw?
\v 6 An ei in a um ten a deih nak bang an ei hima maw?
\v 7 Jerusalem khuapi sia ma, khangto in a elkim ah a um mi khuapi le khuano hanglam umnak le munlawn umnak mun pen mihing tampi a phat laih tak in, tang laih kamsang te tuah Pathian au mi thu cangkim zo hima maw tin, thupia hi.
\v 8 Mah ten Pathian awnkam thu Zakhariah nelah a heng mi,
\v 9 Thu buai cu a dik nak tuah thukhen un. Hehpih nak thinlung tuah pakhat le pakhat hehpih dun ta un.
\v 10 Nu le pa a nei ngawl mi meivong, tuikulh ngam dang miphun mizawng haksa te bawl siat pah sun. Pakhat le pakhat a pha ngawl mi ngaihsut nak ngaisung haw ma hen tin, vancung ngalkap Topa Pathian in thupia naven,
\v 11 A mun thungai ngawl luat tukin zuam haw tuk hi. Za tik tuk ngawl in a beng hup haw tuk hi.
\v 12 Thudik awnkam hei hihen, vancung ngalkap Topai hawvang cu tang laih kamsang tei hang a koih mi awnkam hei hihen, a mun zaa tik tuk ngawl in hihen, a muhtei thinlung cu diamond suang bang cang tik haw hi. Mah hang vancung ngalkap Topa Pathian a thinuuk zet hi.
\v 13 Keiman sam in a mun ngai ngawl bang a muhte sam leh in keiman ngai ma zo hitin, vancung ngalkap Topa Pathian in thupia hi.
\v 14 A muhtei theih ngawl miphun hempoh sung pen simpei huih theu in, keimah cu tai vawk tik zo hi. Mah hang a muhtei ngam cu mi thawmveng in a um hang, a kuamah a hawh um ma hi. A nop mi ngam cu siatsuah nak mun in cang zo hitin, thupia hi.
\s Jerusalem khuapi cu thupha pia tukin Pathian thukam bawlnak
\c 8
\p
\v 1 Vancung ngalkap Topa Pathian thupiak mi cu ka nelah heng in,
\v 2 Vangcung ngalkap Topa Pathian thupiak mi kei cu Zion mual ca in ka thinlung so zet hi. A ma ca in thinuuk nak nasezet suak zo hi.
\v 3 Vancung ngalkap Topa Pathian mual cu a thiangtho mi mual tih hei in hihen sam haw tuk hi.
\v 4 Vangcung ngalkap Topa Pathian thupiak mi cu pu tek, pi tek, kum U ham thiangkhut a khun tu hempoh ten, Jerusalem khuapi lamzin ah um haw tuk hi.
\v 5 Khuapi lamzin te cu ummai naupang pano le numei a dim in um haw.
\p
\v 6 A thupiak leh mi thu a tu huncan in a tang mi miphun tei mai pen thasiah huai hi naven, ka mai pen thasiah huai mi hima maw tin, vancung ngalkap Pathian in thupia hi.
\p
\v 7 Vancung ngalkap Topa Pathian thupiak mi cu ka miphun ten nisuah nak ngam pen in hihen, nitum nak ngam pen in hihen, keiman pan in,
\v 8 A pui hang, a muhte Jerusalem khuapi sungah um haw tuk hi. Thudik thu le dikcang nak thu tuah a muhte cu ka mihing a hih hang, keimah vang a muhtei Pathian hi tung.
\p
\v 9 Vancung ngalkap Topa Pathian thupiak mi cu biakinn sa tuk in, vangcung ngalkap Topa Pathian inn tawphah koih mi huncan sungah a um kamsang tei phuan mi hi awnkam cu a tu huncan in a za tute aw, nang muhtei khut cu thazang nei tik haw hen.
\v 10 Mahmi huncan a hum pen mihing thuak mi cu a phat nak um ma hi. Nganhing thuak mi a phat nak um ma hi. A suak le a tum mi hempoh ngal a um hang, daihnak co haw ma hi. Keiman mi hempoh te pakhat le pakhat do un tik ing.
\v 11 A tu in, a tang mi hi miphun sungah keiman a masa bang bawl ngawl in, vancung ngalkap Topa Pathian in thupia hi.
\v 12 Anci cu daihnak tuah vawh tuk hi. Cabit kung cu Cabit kung in a ngah hei hihen, lei pi in a ma khanto nak hei hihen, vanhum in dai nguah tui hei hihen pia tuk hi. A tang mi miphun ten hi thu hempoh te ngah thei tuk in keiman bawl tung.
\v 13 Judah miphun le Isarel miphun te aw, nohten ngam dang miphun sung pen tamsiat nak mun, a cang awng mi bang thupha conak mun cang tik tukin keiman pan tung. Lau ngawl in khut thazang ngilnak nei ta un.
\p
\v 14 Vancung ngalkap Topa Pathian thupiak mi cu nohtei pu le pa ten ka thinuuk nak a soh suah haw ten sual bawl tuk hitin, keiman sih nak nei ngawl ngaihsut mi bang,
\v 15 Mah cengten a tu huncan Jerusalem khuapi le Judah miphun cu hehpih tung hitin, keiman ngaisung leh ing. Lau pah sun hitin, vancung ngalkap Topa Pathian in thupia hi.
\v 16 Nohtei zui tuk mi nun cu nohtei venghawng in pakhat le pakhat a man mi awnkam son un. Khuapi kongka bul pen dikcang nak tuah thukhen in, thubuai dai tik tukin thukhen cat un.
\v 17 Pakhat le pakhat a kuamah in a pha ngawl mi ngaihsut nak ngai sung pah sun. A man ngawl mi thukam nak deih pah sun. Mah tihbang mi thu hempoh te keiman hua ing hitin, Pathian in thupia hi.
\p
\v 18 Vancung ngalkap Topa Pathian thu ka nelah ah heng leh mi,
\v 19 Vancung ngalkap Topa Pathian thupiak mi cu hali ha ten ancan nak, ha nga ha ten ancan nak, ha salih ha ten ancan nak, ha sawm ha ten ancan nak te Judah miphun lungdam puai bawlnak huncan in cang tuk hi. Dikcang nak thu, daihnak thudik cu deih haw tuk hi.
\p
\v 20 Vancung ngalkap Topa Pathian thupiak mi cu khuapi le khua no tampi miphun hempoh hung haw tuk hi.
\v 21 Khuapi pakhat sungah a um mipan a dang khuapi pakhat ah a um tu tei lakah hawh in Pathian mai pen thungen tuk in hihen, vancung ngalkap Topa Pathian cu zei tuk in hihen, a thungai in hawh tung. Keimah vang hawh tung hitin, sam haw tuk hi.
\v 22 Uknak ngam ngeng miphun, miphun hempoh ten vancung ngalkap Topa Pathian cu Jerusalem khuapi sungah zei in Pathian mai ah thungen tuk in hawh haw tuk hi.
\p
\v 23 Mahmi huncan ten awnkam a tuam tuam a awn thei mi miphun hempoh tei sung pen, mihing sawm ten Judah miphun a himi pai puancep len in, Pathian cu nangmah tuah um hitin kohtei theih hang a muhte tuah zui tuk ung tin son haw tuk hitin, vancung ngalkap Topa Pathian in thupia hi.
\s Isarel miphun tei ngal te thukhen nak
\c 9
\p
\v 1 Pathian awnkam thu Harach ngam le Damascus khuapi ah heng hi. Pathian miphun hei hihen, Isarel miphun hinnam te hei hihen zo in um hi.
\q
\v 2 Mahmi ngam tuah a nek mi Hamath ngam sungah hei hihen, Tyre khuapi cu a cih hang mahmi khuapi le Zidon khuapi sungah hei hihen heng tuk hi.
\q
\v 3 Tyre khuapi in a ma ca innpi sa in ngun cu leivul bang in hihen, sui a ngek cu lamzin ah a um mi cinciak bang a seh ta vang,
\v 4 Pathian in midang khut sungah ap in a thazang ngilnak cu tuipi sungah a vawk hang, khuapi cu mei tuah kang tuk hi.
\q
\v 5 Mahmi thu cu Ashkelon khuapi ten mu in lau haw tuk hi. Gaza khuapi ten mu in hing tawtok tuk hi. Ekron khuapi vang in muang in a mualpho hang mah bang in cang tuk hi. Gaza kumpi cu thi tuk hi. Ashkelon khuapi vang uk tuk ma hi.
\q
\v 6 Ashdod khuapi pen tui kulh ngam miphun te um haw tuk hi. Philistine miphun tei ngalnak vang keiman ektuah tung.
\q
\v 7 A eih mi thisan cu a kam pen in hihen, a nawngkai a peh mite cu a ha laklawh ah hei hihen, keiman hong tung. A tang mipa cu kohtei Pathian ca tang in Judah ngam sungah kumpi bang cang tuk hi. Ashdod khua mite vang Jebus miphun bang cang tuk hi.
\q
\v 8 Itihbang ngal hei hihen suak le tum tik tuk ngawl in ka inn elkim ah ngalkap bu koih tuk hi. Bawlsiat mipan ka miphun te bawlsiat tu um tuk ma hi. Itahum titale, keimah loli a tu in mu zo ing.
\s Zion khuapi tei kumpi a hunnak
\q
\v 9 Zion canu aw, lungdam in. Jerusalem khuapi canu aw, au un. Thudik tuah thukhen in nunpat nak ah a heng mi Topa, na kumpi pa cu laak nu le laak no khung in lungnem nak thinlung tuah na umnak mun ah a hung li mi cu zo in.
\q
\v 10 Keiman Epharaim ngam pen leng hei hihen, Jerusalem khuapi pen cipuh hei hihen siatsuah tung. Ngal tei thalcang vang siatsuah tung. Ngam dang miphun ten ngal lemnak thu cu Topan thupia tuk hi. Thu neihnak vang tuipi langlam pen tuipi a langlam tian hei hihen, ngun tuipi pen leipi mawk tian hei kho tuk hi.
\q
\v 11 Na thu buai cu kol bulh in a um mi na miphun te tui a um ngawl mi leikua sung pen, nangmah tuah bawl mi thukhaam thisan hang keiman pan tung.
\q
\v 12 Kol tang in muansan mite aw, innpi ah pin leh un. Kei cu hehpih nak a letnih lak tung hitin, tuni in hilh hi.
\q
\v 13 Judah thalcang cu keiman koih in Ephraim thalcang hup in, Zion cate cu Grik miphun tei a langlam pen sosuah in, nangmah cu ngalpha mitei nam bang cang tik tung hi.
\s Pathian heng tuk hi
\q
\v 14 Pathian cu a muhtei hum ah lang in thalcang cu khuaphelep bang leng tuk hi. Topa Pathian in lemle tum in hanglam simpei huih te tuah heng tuk hi.
\q
\v 15 Vancung ngalkap Topa Pathian in a muhte a hup hang, a mun pet in a khut tuah vawk mi suang te sik pek haw tuk hi. A in celhten cabit tui kham bang au haw tuk hi. Kuangkum bang in hihen, biakpiak nak taitan a ning bang dim haw tuk hi.
\q
\v 16 Mahmi ni in a muhtei Topa Pathian in a miphun tuu hon bang pan tuk hi. A muhte cu lei ngam pen a lang mi sui lukhu bang um haw tuk hi.
\q
\v 17 A hehpih nak cu ngeng leita hi. A minthan nak cu ngeng zet hi. Cang cu tangval te hei in hihen, cabit tui a thak cu khanglai te hei in hihen tampi khangto tik tuk hi.
\s Judah miphun tei lakah Pathian in hehpih tuk hi
\c 10
\p
\v 1 Dawlta nguah zu huncan ten nguah zu tik tukin Pathian nelah thungen un. Pathian in khuaphelep bawl in nguah tampi a zuk hang, mi hempoh tei ca lo sungah thingkung po tik tuk hi.
\q
\v 2 Terah zuk milim te cu a thupi ngawl awnkam son haw zo. Kamsang bawl tuten zol thu umnak mun mu in a man ngawl mi mang thu phuang haw zo. A thupi ngawl in nem haw. Mah hang tuu hon bang vakvai in tuu khal tu um ngawl in haksat nak thuak haw.
\q
\v 3 Tuu khal tute cu ka thinuuk in kelcang te cek in, vancung ngalkap Topa Pathian in a tuu hon Judah miphun zo tuk hung in, minthan nak a keng ngal do tu cipuh bang cang tuk hi.
\q
\v 4 Mahmi miphun sung pen inn tawphah a ning khuam suang, tungtul, ngal donak thalcang, uktu a himi hempoh tul haw tuk hi.
\q
\v 5 A mun ngal a do ten lamzin sungah a um mi cinciak a sik tu ngalkap ngalhang pa bang tuk hi. Pathian hehpih nak a co hang, ngal do in cipuh khung ngalkap ngal hang te mualpho haw tuk hi.
\q
\v 6 Judah miphun vang keiman kho tik tung. Josep miphun vang keiman pan tung. A muhte a lainat hang umnak pia tuk hi. A mun hawlvawk co awng ngawl bang um haw tuk hi. A muhtei Pathian ka hih hang, a muhtei awnkam ngai tung.
\q
\v 7 Ephraim miphun te cu ngalhang pa bang a hih hang, cabit tui kham bang lungdam haw tuk hi. A tu le canawn ten mu in lungdam nak tuah Pathian suang in lungdam haw tuk hi.
\q
\v 8 A muhte keiman sosuah in hulawm tik tung. A muhte ka tennak a co hang, a masa tampi bang tampi leh haw tuk hi.
\q
\v 9 A muhte cu ngam dang miphun tei anci bang ka vawh hang, a khuala mi ngam pen keimah cu phawk in a tu le canawn te nung in pin leh haw tuk hi.
\q
\v 10 A muhte cu Izip ngam pen keiman pui leh tung. Assyria ngam pen sam in hulawm tik tung. Gilead ngam le Lebanon ngam ah ka pui leh hang, a muhtei umnak tuk lei ngam tham ma hi.
\q
\v 11 Tuipi a laizang ah hawh in a bawl siat hang, tuipi lumlet te dan tat tuk hi. Ngun tuipi a thukzet mi mun hempoh te hei kang haw tuk hi. Assyria ngam tei ngalnak cu nempek in Izip ngam thuneih vang tham tuk hi.
\q
\v 12 A muhte cu Pathian hang, keiman kho tik tung. A min suang in vak kawkawi haw tuk hitin, Pathian in thupia hi.
\c 11
\p
\v 1 Lebanon mual aw, na cedar thingkung te meikang tik tukin na kongka te hong in.
\q
\v 2 Cak thingkung aw, cedar thingkung a phuh hang kap in. A sunglawi mi thingkung te siatsuah haw zo. Bashan thingkung te aw, a kho mi ngam lak thingkung te phuh hang kap ta un.
\q
\v 3 Tuu khal tuten a muhtei minphat ngawlnak hang, a kahnak aw bawl haw. Jodan ngun tuipi a minsiat nak hang, pawpi la a hawk mi aw cu za ing.
\s Tuu khal panih
\p
\v 4 Ka Topa Pathian thupiak cu thah tuk a koih mi hi tuu hon cawm in.
\v 5 A nei tute that in a sualnak a um lam hei thei haw ma. Zuak in a ei tuten co ngah thei mi ka hih hang Pathian cu thupha um ta hen hitin, son haw. Tuu khal tuten hehpih lainat nak nei haw ma hi.
\v 6 Pathian thupiak mi cu keiman ngam sung miphun te lainat nak um leh ma, sahelh ma, miphun hempoh te inn nel tei khut sungah hei hihen, kumpi khut sungah hei a ap hang a mun ngam sung hempoh bawl siat haw tuk. A muhtei khut pen keiman pan ngawl in um tung hitin, thupia hi.
\p
\v 7 Mah tihcun thah tuk a koih mi tuu hon tihmi a haksa mi tuu te cu keiman cawm tung. Tuukhal tu thiangkhut panih keng in pakhat cu hehpih nak tih hei in hihen, pakhat cu a phoih tih hei sam in tu hon cu cawm hi.
\v 8 Tuukhal tu pathum te vang hakhat sung keiman siatsiah tung. A muhtei hang ka thinlung in ciat zet zo. Amun keimah hua haw.
\v 9 Mah cengten a muhte cu keiman cawm mang hi. A thi mite cu thi ta poh hen. Thah a co mite cu thuak ta poh hen. A tang mi a luang te cu pakhat le pakhat ei haw ta hen hitin keiman tiin,
\v 10 Miphun hempoh te tuah a masa bawl mi dan thukhaam siatsuah nuam in hehpih min a nei mi ka thiangkhut la in ek tuah hi.
\v 11 Mahmi dan thukhaam cu mahmi ni in a siat hang, keimah a muang tu tuu hon sung pen haksa miten Pathian thu thei haw tuk hi.
\v 12 Mah cengten keiman ka co taak mi thaman pia tuk in nohten deihnak a um tale pia un. Deihnak a um ma tale pia pah sun hitin a tih ten, a mun ka nelah thaman pia tuk in ngun tangka sawmthum cu cuai teh haw hi.
\v 13 Pathian in mahmi ngun cu bel bawl tu mai pen vawk in hi. Keimah cu a man talh in ngun tampi hima maw tin thupiak mi bang, mahmi ngun sawmthum cu keiman la in Pathian biakinn sung bel bawl tupai mai ah vawk ing.
\v 14 Mah ten Judah miphun le Isarel miphun tei bawl mi pawlkom nak cu siatsuah nuam in a phuaih tin min a nei mi a dang thiangkhut cu keiman ektuah ing.
\p
\v 15 Mah cengten Pathian in misil tuu khal tutei van hempoh lak sak in.
\v 16 Itahum titale, hi ngam sungah tuukhal tu pakhat cu keiman heng tik tung. A man thah nak a thuak mi nganhing luang te zo kha ma hi. Lamzin a pial mite zei ma, tidam ngawl mite dam tik tuk in bawl ma, a ding mite bawm ma, a thau mite cu ei haw tuk hi. A muhtei ketin te vang bot bal tuk hi.
\q
\v 17 Tuu hon a zamsan tu a thupi ngawl in tuu khal tupa cu thupha um ma hi. A khut thawmlian tuah a taklam mit pen nam haksat nak heng tuk hi. A khut thawmlian cu a venghawng in ko tuk hi. A taklam mit cu a venghawng in thim tuk hitin, thupia hi.
\s Jerusalem ngal te siatsuah tuk thuphuan nak
\c 12
\p
\v 1 Pathian thuphuan awnkam thu tih mi vanhum cu khuh in leipi a tawphah a koih tu, mihing sung pen mihing hawvang a bawl tu Pathian in Isarel miphun camcawh in thu a piak mi cu,
\v 2 Keiman Jerusalem khuapi elkim ah a um miphun hempoh tei lakah a hing tik tu khuat in cang tik tuk hi. Jerusalem khuapi a kilhcih haw laih tak in, Judah ngam vang mah tihbang bok in cang tuk hi.
\v 3 Mahmi huncan ten mahmi khuapi cu miphun hempoh tei lakah a ngit mi suangin cang tik tuk hi. Mahmi suang a thiak tu hempoh te keh khawng haw tuk hi. Leihum miphun hempoh ten Jerusalem khuapi a langlam pen hulawmkhawm haw tuk hi.
\v 4 Pathian thupiak mi huncan sungah a um tu kumpi hempoh te amthong tik tuk in hihen, cipuh khung ngalhang hempoh te sil tik tuk in hihen, keiman dan tat tung. Judah miphun cu keiman zo in namdang miphun tei sungah a um mi cipuh hempoh te a mitcaw tik tuk in dan tat tung.
\v 5 Judah kumpi te vang Jerusalem khua mitei Pathian vancung ngalkap Topa Pathian hang, a muhte cu ka thazang ngilnak in cang haw hitin, a thinlung sung pen son haw tuk hi.
\v 6 Mahmi huncan ten keiman Judah kumpi te cu thing seh meipual pi bang in hihen, cangtel mei noih bang a hih hang vei le taklam elkim ah a um miphun hempoh te meikang tuk hi. Jerusalem khuapi cu khuapi a lun sungah kho tuk hi.
\p
\v 7 Judah deubuk te a masa in nunpan tuk hi. Mah hang David miphun tei minthan nak le Jerusalem khua mitei minthan nak, Judah ngam a langlam pen tuangkhawng ma hen.
\v 8 Mahmi huncan ten Pathian in Jerusalem khua mite a hup le pat hang, thanem mipan mahmi huncan ten David kumpi bang in hihen, David miphun in Pathian bang in hihen, a muhtei mai pen Pathian vancung mi bang tuk hi.
\v 9 Mahmi huncan ten Jerusalem khuapi a do tu miphun hempoh te siatsuah tuk in keiman thasuah tung hi.
\s A muhtei ca a kahnak
\p
\v 10 A hehpih nak co mi lungmu, thunget nak a bawl mi lungmu cu David kumpi miphun, Jerusalem miphun tei hum ah ka buak hang, a muhtei vih let mi keimah cu mu haw tuk hi. Capa a neih calam ca in a pa cu a kah bang a ma ca in kap tuk hi. Capa U pa bel ca a pai thuak mi bang thuak bok tuk hi.
\v 11 Me-giddon mual luam Hadadrim’mom khuapi pen a kah bang, mahmi huncan ten Jerusalem khuapi pen nasezet kah nak um tuk hi.
\v 12 Ngam sung hempoh miphun hinnam a tuam tum tek in kap haw tuk hi. David miphun hinnam a dang, a numei te a dang, Natan hinnam a dang, a numei te a dang,
\v 13 Levi miphun hinnam a dang, a numei te a dang, Shimei miphun hinnam a dang, a numei te a dang,
\v 14 A tang mi miphun hinnam hempoh ten miphun hinnam dang pakhat tek in, a numei ten a dang tek in kap haw tuk hi.
\s Sualnak pen thianlim nak
\c 13
\p
\v 1 Mahmi huncan ten David miphun le Jerusalem khua mitei sual a bal somnak tuk ciktui khuk hong in um tuk hi.
\v 2 Vancung ngalkap Topa Pathian thupiak mi cu ngam sungah a um mi zuk milim tei min te a kuamah in phawh leh tuk ngawl in, mahmi huncan ten keiman that tung. Kamsang a bawl tu hempoh te hei hihen, a thiangtho ngawl mi hawvang hei hihen ngam sung pen hawl vawk tuk hi.
\v 3 Mihing pakhat in kamsang a bawl laih tale a hing tu nu le pa ten, nangmah cu Pathian min suang in zol thu awnkam a phuan hang thi tuk hitin tiin, kamsang a bawl laih hei in a nu le pa ten a mah cu paihlet in sun khil haw tuk hi.
\v 4 Mahmi huncan in kamsang a phuan ten a muh mi muhnak hang mualpho tuk hi. Midang zol tukin ngaisut nak tuah a ham mi puan silh tuk ma hi.
\v 5 Kei cu kamsang hima, lo bung pa ing. Naupang laih penpan midang tei sila ing hitin, phuang tuk hi.
\v 6 Midang ten na khut ah a lang mi liam ma cu itihbang hum tin a dot ten, hi liam ma cu ka ngualcam tei inn ah co mi liam ma hitin, don leh tuk hi.
\s Tuukhal te that in tuu te a tham keknak
\q
\v 7 Vancung ngalkap Topa Pathian thupiak mi cu nam aw, ka tuukhal tu pai a langlam pen ka ngualcam a himi a langlam pen tho in. Tuukhal pa cu that in. Mah tihcun tuukhal tute tham kek haw tuk hi. Tuu no tei hum ah hei in keiman ka khut nga tung.
\q
\v 8 Pathian thupiak mi ngamsung sehthum suah sehnih a thah hang, sehkhat bek tang tuk hi.
\v 9 Mahmi sehkhat cu mei a laizang ah keiman hawh tik tung. Ngun ek a vawk bang vawk tuk hi. Sui cu mei tuah a hal bang hal tuk hi. A mun ka min tuah a sam ten keiman ngai tung. A muhte cu ka miphun tin keiman sam tung. A muhte vang Pathian in kohtei Pathian hitin, phuang haw tuk hi.
\s Pathian tolhsuk in uk tuk hi
\c 14
\p
\v 1 Zo in, na Topa Pathian ni heng na neihnak lonsak in na mai pen sem haw tuk hi.
\v 2 Jerusalem khuapi do tuk in, miphun hempoh cu keiman hulawm tik tung. Khuapi a do cengten in te cuhdun long in numei te sual pih haw tuk hi. Khuapi miphun a langkhen man in a langkhen tang tuk hi.
\v 3 Pathian in ngaldo nak huncan ten a do mi bang mahmi miphun hempoh te do tuk hi.
\v 4 Mahmi ni in a ke cu Jerusalem khuapi nisuah nak, olive mual hum ah ding in olive mual cu nisuah nak pen nitum nak tian a laizang pen a keh hang, a nasia zet mi hawkluam in cang tuk hi. Mual a langkhen cu saklam ah hei hihen, a langkhen cu hanglam ah hei hihen thawn tuk hi.
\v 5 Nohte cu ka mual lak lawh mual luam lamzin pen tai tuk uh ci. Mahmi hawkluam cu Aijalon khuapi tian khong tuk hi. Judah kumpi Uzziah khut sung leipi hing in nang muhtei tai bang tai leh haw tuk hi. Ka Topa Pathian cu tolhsuk in a mi thiangtho hempoh tel haw tuk hi.
\v 6 Mahmi ni cu vaknak um ma hi. A sunglawi mite cu sia tuk hi.
\v 7 Sun hi ngawl, zan hi ngawl Pathian theih mi ni nikhat a hih hang, zan huncan a hen ten vak tuk hi.
\v 8 Mahmi ni in nunnak tui cu Jerusalem khuapi pen tulin khuakhal hei hihen, phalbi hei hihen, nisuah nak tuipi ah a langkhen, nitum nak lam tuipi ah a langkhen luang tuk hi.
\p
\v 9 Pathian ngam sungah kumpi in cang tuk hi. Mahmi ni ten Pathian pakhat, min pakhat bek cang tuk hi.
\v 10 Geba khuapi pen Jerusalem khuapi hanglam, Rimmon khuapi tian ngam sung hempoh hawkluam bang, bang ten in cang tuk hi. Khuapi vang Benjamin kongka pi pen a masa kongka pi umnak, khuapi a ning kongka pi bul tian hei hihen, Hanan innpi pen cabit ngawi nak van tian hei hihen, khaisan nak co in khuapi a lun hihnak sungah um leh tuk hi.
\v 11 Mah cengten Jerusalem khuapi cu tamsiat haksat nak thuak ngawl in khua sung mipi ten umnak co in lauthawm nak um haw tuk ma hi.
\p
\v 12 Jerusalem khuapi a do tu miphun hempoh sung pen Pathian piak mi haksat nak cu ke tuah ding na pi in a muhtei taksa kiam tuk hi. Mitbu sung pen mit kiam tuk hi. Lei vang a kam sung pen kiam tuk hi.
\v 13 Mahmi ni in Pathian huham hang a mun nasezet buainak bawl in pakhat le pakhat a khut phalh vat hei in hihen, pakhat le pakhat do in that haw tuk hi.
\v 14 Judah miphun te vang Jerusalem khuapi sung pen do haw tuk hi. A elkim ah a um mi ngam dang miphun tei neihnak a tam zet mi sui le ngun van hulokhawm nak nei haw tuk hi.
\v 15 Cipuh, laa, kalauk, laak pen pan ngal tei ngalkap bu sung a um mi nganhing hempoh sung pen, haksat dan tat nak cu a hum pen a son mi haksat dan tat nak tuah bang ve tuk hi.
\p
\v 16 Jerusalem khuapi a do tu miphun hempoh sung pen a tang mi hempoh vancung ngalkap Topa Pathian tih mi kumpi cu bia in deubuk puai bawl tuk in khuapi sungah kum sial in hawh haw tuk hi.
\v 17 Vancung ngalkap Topa Pathian tihmi kumpi bia tukin, khuapi ah kai in a hung ngawl mi leihum miphun hinnam hempoh tei hum ah nguah zu ma hi.
\v 18 Izip ngam miphun a hawh ma tale nguahzu ngawl a um hang, deubuk puai bawl hawh tuk in a hung ngawl miphun sung pen Pathian piak mi haksat nak dan a mun thuak tuk hi.
\v 19 Hi thu cu deubuk puai bawl tukin a hawh ngawl mi Izip miphun ngam dang miphun hempoh tei bawl mi sual hi.
\v 20 Mahmi ni huncan ten Pathian thianlim nak hitin, cipuh dawk mi hum ah hei laingan tuk hi. Pathian inn sungah bel te cu biakpiak nak taitan mai ah a um mi khuathai bang cang tuk hi.
\v 21 Mah bek sial ngawl Jerusalem khuapi penpan Judah ngam sung hempoh ah a um mi bel te cu vancung ngalkap Topa Pathian nelpen thiangtho tuk hi. Biakpiak nak a nei tu hempoh hung in, mahmi bel hempoh te a lak cengten huan haw tuk hi. Mahmi ni pen pan vancung ngalkap Topa Pathian inn sungah Kanaan miphun um ma hi.