cnw_reg/27-DAN.usfm

\id DAN
\ide UTF-8
\rem The text in this file was extracted from C:/DCS/Chin, Ngawn/WORD/27. DANIEL. docx.
\mt Danial
\h Danial
\mt Danial
\toc1 Danial
\toc2 Danial
\toc3 dan
\s Babilon ngam sungah Daniel cihthiam a zilnak
\c 1
\p
\v 1 Judah kumpi Jehoiakim uknak kum thum ten, Babilon kumpi Nebuchadnezzar cu Jerusalem khuapi ngaldo tuk in kiilcih hi.
\v 2 Pathian in Judah kumpi Jehoiakim penpan biakinn sung van a hek khat te Nebuchanezzar khut sungah ap in, mahmi van te cu Nebuchadnezzar kumpi in Shinar sungah a um a pathian cu biakinn sungah a lak cengten, sui innpi sungah koih hi.
\v 3 Mah ten kumpi in numei uktu Ashpenaz cu sam in,
\v 4 Sonsiat nak um ngawl a mawi mi mel tuah a dim hang, a pha mi theihnak tuah a lamdang mi cihthiam nak zil in, kumpi inn ah na dek tuk in thil tih theih nak a nei mi tangval hempoh Isarel kumpi miphun kumpi catei sung pen teng in, Chaldean lai thiam nak zil hen tin, thupiak mi um hi.
\v 5 Kumpi an eih cabuai pen an uuk zet le cabit tui nisial pia in, kum thum sung a cawm cengten na deh tuk in thupia hi.
\v 6 A muhtei sung pen Judah miphun Daniel, Hananiah, Mishael te tel haw hi.
\v 7 Numei uktu in mahmi a muhte cu a min thak in Daniel cu Belteshazzar, Hananiah cu Shadrach, Mishael cu Meshach tin a tuam tuk tek in a min pia hi.
\p
\v 8 Daniel cu kumpi an eih cabuai pen a uuk zet mi an le cabit tui in ngawl in a bal mi cu pial tuk in a ngaihsut hang, a mah cu bal tik tuk ngawl thu numei uktu pa cu ngen hi.
\v 9 Pathian bawlnak hang numei uktu in Daniel cu it zet naven,
\v 10 Ka topa zo tik tuk in numei uktu a piak mi pa cu lau hi. Nang muhtei an in le eih tuk bawl zo ing. Nang muhtei mitmai cu tangval khangkhiak mitmai bang a mawi ngawl mi cu a muhten, nang muhtei ca kei cu thihnak co tak in nunnak pen luat tuk ma hitin, Daniel hilh hi.
\v 11 Mah ten Daniel, Hananiah, Mishael, Azeriah te zo tik tuk in numei uktu a piak mipa cu Daniel in,
\v 12 Kei muhtei ei tuk in an ceh le tui bek nisawm sung pia teh in hi.
\v 13 Mah cengten kei muhtei mitmai le puai bawl ten a tang mi an a ei tu tangval tei mitmai cu topai mai pen cek hen. Nangmah loli na muhten, kei muhte cu thukhen in hitin a hilh ten,
\v 14 Numei uktu ten lungkim in nisawm sung cul teh hi.
\v 15 Nisawm a kim ten a muhtei mitmai cu puai bawl ten a tang an a ei tu tangval hempoh tei mitmai sang mawi saw, thau in um haw hi.
\v 16 Uktu Melzar in a muhtei sa le in tuk cabit tui la in an ceh cu pia hi.
\p
\v 17 Pathian in mahmi tangval pali te cu a lamdang cuang mi cihthiam nak te thei tuk in pia hi. Daniel vang muhnak le mang leh thiamnak a nei mi cihnak tuah dim hi.
\v 18 Kumpi inn sungah um tik tuk in huncan a kim ten, numei uktu pan tangval te sam in kumpi innsung ah koih hi.
\v 19 Kumpi pan mahmi tangval te tuah thu a dot cengten, Daniel, Hananiah, Mishael, Araziah te tuah a bang ve mihing pakhat no hei a um ngawl hang, a mun a ma nelah na deh nak thu co haw hi.
\v 20 Kumpi thu dot mi cih thiam nak hempoh, mahmi tangval ten uknak ngam sungah a um micip, khutlam a zo thei mite sang a letsawm in cihnak a theih saw mi cu mu hi.
\v 21 Daniel in Cyrus kumpi uknak kumkhat tian um hi.
\s Nebuchadnezzar mang
\c 2
\p
\v 1 Nebuchadnezzar kumpi uknak kumnih ten, mang man in a launak thinlung hang hihbu ngam ngawl in,
\v 2 A mang let tik tuk in cihnak a nei khutlam a zo thiam, dawih a thiam saza, Chaldean saza te sam hen tin thupiak nak a um bang, a muhtei nelah a hen haw ten,
\v 3 Kumpi in, keiman mangman ing hi. Mahmi mang cu thei ma, theih thiam ngawl hang thinnop nak um ma hitin, ti hi.
\v 4 Chaldean cih thiamnak a nei tuten kumpi pa aw, na nunkhua sau ta hen. Kohtei lakah mang cu hilh in. Keimun a sullam a tihnop nak hilh tuk ung hitin, Syria awn tuah in hilh haw hi.
\v 5 Kumpi pan ka thupiak nak um zo hi. Ka mang a sullam a tihnop nak nohten na hilh thei ma ta le nang muhte sat cen tung hi. Nang muhtei inn te vang buak sehnak mun in cang tik tung hi.
\v 6 Mang a sullam a tihnop nak hilh thei tale laksawng tampi, minthan nak te keiman pia tung. Mah hang, mang a sullam a tihnop nak cu ka nelah hilh un hitin, Chaldean cihnak a nei mite cu thupia hi.
\v 7 Mahmi a mun kumpi pai mat mi a mang cu hilh in. Kohten a tihnop nak hilh tuk ung hitin a hilh leh haw ten,
\v 8 Kumpi in ka thupiak nak a um sa zo hang, nohten huncan ngei tik tuk in thawn nuam uh ci tih cu keiman thei ing.
\v 9 Mang cu ka nelah hilh ma tale nohten ngaihsut nak pakhat bek a um hang, huncan a thek tian in ka mai pen mualpho nak zol thu awnkam bawl ham haw zo hi. Mang thu cu hilh un. Mah tihcun hilh tale mang a tihnop nak hilh thei tuk hi tih cu keiman thei tung hitin, hilh leh hi.
\v 10 Chaldean saza ten kumpi pai thu hilh thei tu hi leihum ah mihing pakhat no hei um tuk ma hi. A kua a bang kumpi in minthan nak a nei ta vang, cihnak a nei mi khutlam a zo thiam, Chaldean saza ten mah tihbang thudot nak um ma hi.
\v 11 Kumpi thu dot mi thu cu a haksa mi thu hi. Mihing hihnak tuah a seng ngawl mi Pathian sial ngawl a kuamah in Pathian mai pen pholhsuah thei tuk ma hitin, don leh haw.
\v 12 Mahmi awnkam thu a zak ten nasezet thinuuk in, Babilon khuapi sungah a um cihnak a nei tu hempoh te that ta un hitin, thupia hi.
\v 13 Mahmi thupiak nak cu hilh saw lawn in Daniel le a ngualcam hempoh te that tik tuk a zeih haw ten,
\v 14-15 Daniel in, kumpi thupiak cu ita hizah loli in man lang hum tin, Babilon micip te that tukin a hawh mi pumpi cing tu ngalbawi Arioch cu cihthiam nak tuah dong in Arioch in mahmi thu a hilh ten,
\v 16 Daniel in kumpi inn sungah lut tum in mang lehnak ni huncan a piak tuk thu hehpih nak a kut cengten,
\v 17 A inn ah pin leh in mahmi thu cu a ngualcam Hananiah, Mishael, Azariah te hilh hi.
\v 18 Kohten a dang Babilon cihnak a nei mite tuah thi tik tuk ngawl in, hi thuthup sungah a hehpih nak co tuk in vanhum Topa Pathian cu thungen tuk hung hitin, hilh hi.
\v 19 Zan huncan ten thuphuan hang, mahmi thuthup cu Daniel nelah Pathian in hilh hi.
\v 20 Mah ten Daniel in vanhum Topa Pathian nelah lungdam thu hilh in, Pathian min cu kumkhua um ta hen. Cihnak hei hihen, thazang ngilnak tuah dim hi.
\q
\v 21 Hun le can, ni khua thek tik hi. Kumpi te vang khiasuk, khaisang hi. Cihnak a nei mitei lakah cihnak pia hi. Theihnak a nei mite cu a hehpih nak tuah bek in theihnak nei thei haw hi.
\q
\v 22 Thuthup theih hak mi thu vang ciangzet in hilh thei hi. Khuathim sung a um mi hempoh thei in vaknak mun hi ci.
\q
\v 23 Ka pu le pa tei Pathian ka nelah cihthiam nak, thazang ngilnak a piak hang kohtei thunget nak bang kumpi mang a lak tu lungdam thangphat nak nei ing hitin Daniel in a hilh cengten,
\s Mang a sullam a tihnop nak cu Daniel pholh suahnak
\v 24 Babilon micip te that tik tuk in, kumpi pai piak mi Arioch nelah hawh in Babilon micip te cu that pah sin. Keimah cu a ma nelah sam in. Keiman na mang a tihnop nak cu hilh tung hitin, ti hi.
\p
\v 25 Mah te Arioch in Daniel nelah a manlang a sam cengten, mang tuah a seng mi a tihnop cu kumpi nelah a hilh thei tu Judah miphun tei sung pen keiman mu zo ing hitin, ti hi.
\v 26 Kumpi in, ka mang mat mi cu hilh in a tihnop nak hilh thei ni cim, Belteshsazzar min a nei mi Daniel a dot ten,
\v 27 Daniel in kumpi thu dot mi thu cu cihnak a nei mi khut lam a zo thiam, micip saza, kamsang saza ten kumpi pa cu hilh tuk in tih theihnak nei haw ma hi.
\v 28 Thuthup a haksa mite hilh in a heng tuk mi thu te Nebuchadnezzar kumpi nelah a hilh tu Pathian pakhat cu vanhum ah um hi.
\v 29 Kumpi pa aw, a heng tuk laih mi thu te cu nangma nelah hilh ing.
\v 30 Hi thuthup haksa mi thu a dang a nung mi hempoh te keimah sang in cihnak a nei saw hang, kei cu Pathian hilh ma hi. Na thinlung ngaihsut nak thei tuk in mahmi a tihnop nak cu ka nelah hilh tukin Pathian lak hi.
\p
\v 31 Kumpi aw, mang na mat mi muhnak cu nangman zo in zuk milim ngeng zet mu ci. Huham nei in a vak zet mi hi zuk mi lim cu na mai ah ding in a mel cu a lau huai mi hi.
\v 32 A lu cu sui a ngek hi. A awm le a khut a lang nih cu ngun hi.
\v 33 A von le a kawng panih cu kahpa thik hi. A kephalh le a ke nuai cu thik a langkhen, taklei a langkhen hi.
\v 34 Na zoh laih tak khut tuah a suk ngawl a ma thu in a cang mi suang pakhat cu thik tuah taklei a cang mi zuk milim ke cu khengkha in a hem a um mi cu,
\v 35 Kahpa thik, taklei, dal, ngun, sui te cu tamkeh in khal huncan ten cangcil nak leivul bang a hih hang, huih in theu vawk a muhtei umnak um ngawl in tham hi. Zuk milim a khengkha mi suang cu khangin mualpi a cang ten leihum hempoh khuh hitin, mangman ci.
\p
\v 36 A tuin mang a tihnop nak cu lak in hilh tung hi.
\v 37 Kumpi pa aw, nang cu kumpi hempoh tei kumpi hi ci. Vanhum Topa Pathian cu uknak ngam tuah a huham thazang ngilnak, minthan nak cu nangmah pia zo hi.
\v 38 Mihing umnak hempoh te le leihum ngamsa, vanhum vano te na khut sungah ap in na nelah ihempoh uknak thu um hi. Nang cu zuk milim lu hi ci.
\v 39 Na nungpen na uknak ngam bang a sunglawi ngawl mi uknak ngam pakhat din tuk ci. Mah cengten leihum hempoh uktu dal uknak ngam a himi ngam pathum uknak ngam din tuk ci.
\v 40 Uknak ngam pali nak cu kahpa thik bang a kho mi ngam in cang tuk hi. Kahpa thik cu a dan subal a neh bang, uknak ngam pali cu suhem in bawlsiat tuk hi.
\v 41 Zuk milim ke le ke zung te cu taklei a langkhen, kahpa thik a langkhen a muh mi bang, pakhat le pakhat a khenkek mi ngam in cang tuk hi. Mah naven hal mi taklei le kahpa thik a tokhel mi cu na muh hang, kahpa thik cu khoh zet in ngalhang tuk hi.
\v 42 A ke zung te cu kahpa thik a langkhen, taklei a langkhen a hih hang mahmi ngam cu a kho mi tuah in hihen, a them kehnak tuah in hihen pehtuah tuk hi.
\v 43 A hal mi taklei le kahpa thik a tawkhel a muh mi bang, uknak ngam miphun te cu a dang miphun te tuah kom haw tuk hi. Mah naven, tak lei le thik a tokhel theih ngawl bang a mun pakhat le pakhat kom thei haw tuk ma hi.
\v 44-45 Khut tuah su ngawl in suang pakhat cu mual hum pen a ma thu keh in thik, dal, taklei, ngun, sui te a suk bal a muhnak thu, siatnak ah a heng thei ngawl mi ngam pakhat cu mahmi kumpi tei khut sung pen vanhum Topa Pathian in din tuk hi. Mahmi ngam cu miphun dang tei khut sungah heng ngawl in, a hum pen son sa mi ngam hempoh te subal siatsuah in a cat ngawl kho tuk hi. Mah tihcun a heng tuk laih mi thu te a thawmngeng Pathian in kumpi pai nelah hilh hi. Mang mat mi cu thawnnak um ma hi. A sullam a tihnop nak vang man hitin, Daniel a nelah hilh hi.
\p
\v 46 Mah ten Nebuchadnezzar kumpi in bopkhup in Daniel cu a biak cengten, biakpiak nak bawl tuk in hihen, ngimnam tui meihal apnak nei tuk in hihen thu a piak hang,
\v 47 Nang man hi thuthup a haksa mi thu na hilh theih hang, a thungai in na Pathian cu pathian hempoh tei Pathian, kumpi hempoh tei kumpi, thuthup hak sa mi thu a lak tu Topa hitin thu a piak hang,
\v 48 Daniel cu khaisang laksawng tampi pia in Babilon ngam pen uktu hihnak ah hei hihen, Babilon cihnak a nei mite uktu bawi hihnak ah hei hihen, pia hi.
\v 49 Mah ten Daniel nelah a nget mi kumpi in Shadrach, Meshach, Abednego te Babilon khuapi uk tik tuk pia in, Daniel cu kumpi kongka bulah um hi.
\s Sui zuk milim le a lauhaui mi meikam
\c 3
\p
\v 1 Nebuchadnezzar kumpi in a sang lam tong sawmluk, a vang a zal lam tong sawmluk a um sui zuk milim a bawl cengten, Babilon khua no Dura munlawn ah koih hi.
\v 2 Uktu, khuapi uktu, ngalkap bawi, thukhen tu, siahkhon tu bawi, thuvai siampih bawi Upa, khuapi lai ngan tu, ngam uktu Upa hempoh ten kumpi koih mi zuk milim apnak puai ah hulawmkhawm tik tuk in thupiak nak a um hang,
\v 3 Uktu, khuapi uktu, ngalkap bawi, thukhen tu, siahkhon tu bawi, thuvai siampih bawi Upa, khuapi lai ngan tu, ngam uktu Upa hempoh te hulawmkhawm heng in a koih mi zuk milim mai ah ding haw.
\v 4 Mah ten thuthang puak tu pakhat in ngingzet au in, awnkam a tuamtuam a awn mi miphun hempoh te aw,
\v 5 Lemle, philit, phaidak, pheveu, tazaw, khuang a nging thei tumnak aw a zak ten, Nebuchadnezzar koih mi sui zuk milim cu bia haw tuk hi.
\v 6 Bopkhup ngawl, a bia ngawl in a um tu hempoh mei alh meikam pi sungah vawk cih paih tuk tin a thupiak mi sunglawi um hitin, au hi.
\v 7 Mah hang mi hempoh ten lemle, philit, phaidak, pheveu, tazaw, khuang a nging thei tumnak aw a zak ten, awnkam a tuamtuam awn miphun hempoh ten bopkhup in, Nebuchadnezzar kumpi koih mi sui zuk milim cu bia haw tuk hi.
\p
\v 8 Mah ten Chaldean miphun hek khat ten Nebuchadnezzar kumpi nelah nek in,
\v 9 Kumpi pa aw, nunkhua sau ta hen.
\v 10 Lemle, philit, phaidak, pheveu, tazaw, khuang a nging thei tumnging te tum nak aw a zaa tu hempoh ten, sui zuk milim cu bopkhup in bia haw tuk hi.
\v 11 Bopkhup bia ngawl in a um tu hempoh mei alh in a um mi meikam pi sungah vawk tuk hitin, a thupiak sunglawi um hi.
\v 12 Kumpi a mah loli in Babilon uknak ngam sung pen uktu hihnak ah a piak mi Judah miphun Shadrach, Mashach, Abednego min a nei tuten a thuneih nak cu imah sumsial ma hi. Kumpi pathian te cu bia ma hi. Sui zuk milim koih cu bia ma hitin, Judah miphun te mawhsiat in hilh haw hi.
\p
\v 13 Mah ten Nebuchadnezzar kumpi in nasezet a thinuuk in Shadrach, Mashach, Abednego te sam ta un hitin a thupiak bang a mun a nelah a hen ten,
\v 14 Shadrach, Mashach, Abednego te aw, ka pathian te bia ma uh cim maw? Ka koih mi sui zuk milim bia ngawl in um uh cim?
\v 15 A tu in lemle, philit, phaidak, pheveu, tazaw, khuang a nging thei tum nging aw zak ten, ka bawl mi sui zuk milim bia tuk in um un. Mah ahima tale meialh a um li mi meikam pi sungah vawk cih paih tuk hi. Ka khut pen a pan thei tu Pathian cu ai Pathian um laih hum tin, thupia hi.
\v 16 Shadrach, Mashach, Abednego ten kumpi Nebuchadnezzar kohten hi thu sungah don leh theih nak a thu um ma hi.
\v 17 Kohtei biak mi Pathian cu mei alh in a um mi meikam pi sung pen kohte cu pan thei hi. Na khut sung pen vang pan tuk hi.
\v 18 Mah tihcun pan ma naven kumpi aw, na Pathian te kohten bia tuk ma ung. Na koih mi sui zuk milim te bia tuk ma ung hitin, don leh haw hi.
\p
\v 19 Mah ten Nebuchadnezzar kumpi in nasezet a thinuuk hang Shadrach, Mashach, Abednego te a zoh ten a mitmai sia in, meikam cu a masa sang ngawlin let salih sa tik tuk in hihen,
\v 20 Thazang ngilnak a nei ngalkap ten Shadrach, Mashach, Abednego te ken in mei alh in a um mi mei pi sungah vawk tuk in hihen, thupiak a um bang,
\v 21 Mah mihing pathum te cu bawngbi, angki, a puan te tuah kencih in mei alh a um mi mei pi sungah a vawk haw ten,
\v 22 Kumpi thupiak nak nasezet in mei pi cu a sa zet hang Shadrach, Mashach, Abednego a dok tute cu mei alh a tha nasia hang thi haw hi.
\v 23 Mahmi a mu pathum te cu ken cih in nasezet a alh mi mei pi sungah heng hi.
\p
\v 24 Mah ten Nebuchnezzar kumpi in thasiah amthong in khawma no a thawh ten, mihing pathum te cu kencih in mei pi sungah vawk hima maw tin, thuvai siampih Upa te dong hi. Bawi Upa ten, a man mi hi pathian tin a don leh haw ten,
\v 25 Kumpi in, mihing pali cu ken ngawl in mei sung pen vak kawkawi in haksat nak pen a luat mi cu keiman mu ing. A pali nak pa cu Pathian capa mel um hitin a tih hang,
\v 26 Mei alh in a um mei pi bul elah a nek ten a sang bel ah a um mi Pathian sila, Sharach, Mashach, Abednego ten suah tul un hitin, a thupiak mi bang a muhte meipi sung pen tul haw hi.
\v 27 Uktu bawi, khuapi uktu, ngawlkap bawi, lai ngan tu bawi ten mei a kang thei ngawl mi a muhte cu kil in zo haw hi. A muhtei samzang pakhat no hei kang ma, a puan silh te vang a lamdang nak um ma, meikang nak a ngim hei nam ma hi.
\p
\v 28 Nebuchadnezzar kumpi in Shadrach, Mashach, Abednego tei Pathian cu thupha um ta hen. A muhtei Pathian sial ngawl a dang Pathian bia tuk ngawl in Pathian muannak tuah kumpi thupiak cu do in, a muh loli in ap nak neih mi ka umnak mun ah Pathian in vancung mi hah in pan zo hi.
\v 29 Mah hang um nak mun hempoh ah a um awnphun nam kim awn tu miphun hempoh sung pen mihing pakhat a himi a muhten Shadrach, Mashach, Abednego tei Pathian cu sualnak awnkam son tale a mah cu sat cen hen. A inn vang buak sehnak in cang hen hitin, ka thupiak nak um hi. Itahum titale, hizah tian nunpat nak cu mahmi Pathian sial ngawl a dang pathian in bawl thei ma hitin a hilh cengten,
\v 30 Babilon ngam sung pen Shadrach, Mashach, Abednego te cu khaisang hi.
\s Thingkung pakhat cu Nebuchadnezzar kumpi mangmat nak
\c 4
\p
\v 1 Nebuchadnezzar kumpi keiman thucah ing. Leihum hempoh ah um in awnkam a tuam tuam awn tu miphun hempoh te aw, nohtei sungah daihnak tampi um ta hen.
\p
\v 2 A sunglawi mi Pathian cu ka nelah a bawl mi thasiah huai, mangbangza te nang muhtei lakah a hilh mi cu pha hitin, keiman lungkim ing.
\q
\v 3 Mahmi thasiah huai cu nasezet in ngeng hi. Mangbangza thu vang a huham tuah dim hi. Pathian uknak ngam cu kumkhua uknak ngam hi. A thuneih nak vang a kumkhua kho hi.
\p
\v 4 Keimah Nebuchadnezzar cu kumpi inn sung pen daihnak tuah um in hauhsak nak a tam ten,
\v 5 A lauhuai mi mang cu mu in ihkhun zaunak nop hum ah zau in, thinlung sung ngaihsut mi muhnak hang hingtawtok in kei cu um ing.
\v 6 Mah hang, mang muhnak a sullam a tihnop nak keimah thei tik tuk in, Babilon cihnak a nei mi hempoh ka nelah hilh hen tin thupiak nak,
\v 7 Cihnak a nei mi khutlam zo thiam Chaldean saza, kamsang saza ten a tum haw ten, ka muh mi mang cu a muhtei lakah hilh naven, a mun a sullam a tihnop nak hilh thei haw ma hi.
\v 8 Mah cengten ka biak mi Pathian min tuah Belteshazzar tin sam in, Pathian hawvang thiangtho tuah a dim mi Daniel cu ka nelah a lut tum tale,
\v 9 Ngualcam saza cihnak a ngeng bel Belteshazzar, nang cu Pathian hawvang tuah a dim hi tih hei in hihen, thuthup haksa hempoh a hilh theihnak thu hei hihen keiman thei ing. Mah hang, ka muh mi mang a tihnop nak hilh in hi.
\v 10 Ka hihbu laih tak mat mi mang cu ka zo le leihum a laizang pen a ding sang a mawi zet mi thingkung pakhat um hi.
\v 11 Mahmi thingkung cu khang in khohkhah zet um hi. Vanhum ah khong in leihum hempoh lang hi.
\v 12 A ceh vang mawi hi. Ngamsa hempoh ten ei in a ngah tampi tuah dim hi. Nganhing ten mahmi thingkung a lim bel haw hi. A kangkak ah vano te kop in cawl haw hi.
\v 13 Hihbuh laihtak muh mi cu ka zoh leh ten, thingkung cing tu tihmi mi thiangtho pakhat vanhum pen tolh suk in,
\v 14 Thingkung cu phuk in. A kangkak te phuk in. A ceh te vang heuh in. Nganhing te cu thingkung nuai pen tul in vano te vang, a kangkak pen hawh haw ta hen.
\v 15 Mah naven, lei sungah a zung man tuah thingbul cu thik khau, dal khau tuah ken mi bang hampa nem sungah um tik in. Kum salih sung nguahzu thuak, nganhing te tuah phial in hampa ei hen.
\v 16 Mihing thinlung pai in nganhing lungmu tuah dim tik in hi.
\v 17 Itahum titale, a sang bel mi Pathian in leihum uknak ngam a uk hang in hihen, a piak nuam mitei lakah a piak mi hei hihen, mipha ngawl te khaisang in ngam uknak a ap hang in hihen, nganhing tei theihnak thu um tik tuk in thingkung cing tuten mah tihcun thukhen haw zo hi. Mi thiangtho ten thupia haw zo hitin, au haw hi.
\v 18 Mah tihcun Nebuchadnezzar kumpi in mangman zo hi. A tu in ngualcam Belteshazzar, ka muhmi mang cu a tihnop nak hilh in. Ka uknak ngam sung pen cihnak a nei mi hempoh ten a tihnop nak cu keimah hilh theih ngawl ta vang, nang cu a thiangtho mi hawvang tuah a dim hang hilh thei ci tin, ka muh mi mang cu Daniel in hilh leh hi.
\s Mang a sullam a tihnop nak cu Daniel hilhnak
\p
\v 19 Mah ten Belteshazzar min a nei mi Daniel in nazi pakhat sung amthong a thinkham in um hi. Kumpi in ngualcam Belteshazzar aw, mang a sullam a tihnop nak hang thinkham in um pah sin hitin, thupia hi. Belteshazzar in ka topa aw, na huat mi ngal tei hum ah na mang a sullam a tihnop nak cu heng ta hen.
\v 20 Na mang muh mi thingkung pi cu khang in a khohkhah mi vanhum ah khong in leihum hempoh langin,
\v 21 A ceh mawi zet nganhing hempoh ten ei in a ngah tampi tuah dim hi. Ngamsa te a nuai ah a um hang, a kangkak pen vanhum vano tei colhnak mun a himi thingkung cu,
\v 22 Kumpi pa aw, nangmah hi ci. Nangmah cu khang to in thazang ngilnak tuah dim ci. Hauhsak nak vang sang in vanhum khong hi. Uknak vang, leipi mawk tian heng hi.
\v 23 Thingkung cing tu mi thiangtho pakhat cu vanhum pen tolhsuk thingkung phuk in siatsuah in. Mah naven leihum ah a man mi a zung thingbul cu thik khau, dal khau tuah ken in hampa nem sungah um tik in. Kum salih sung nguah zu lak ah um in nganhing te tuah hampa ei hen,
\v 24 A sang belah a um tu Pathian thukhen nak cu kumpi pai hum ah a heng tuk mang mat mi a sullam a tihnop nak cu,
\v 25 Nangmah cu mi honpi lak pen hawl vawk nganhing te tuah langkhat in um tuk uh ci. A sang bel ah a um tu Pathian in lei hum hempoh uk in, a piak nuam mitei lakah a piak mi thu cu na theih ngawl mi huncan, kum salih sung khui te bang hampa ei nguah zu thuak in um tuk ci.
\v 26 Thingzung, thingbul te tang tik tuk in a thukhen haw mi thu vanhum uknak thu na theih cengten, uknak ngam cu na khut sung pen thawn ngawl in kho tuk hi.
\v 27 Mah hang kumpi pa aw, ka awnkam thungai in. A dik aman mi thu bawlnak, mizawng haksa mite hehpih nak tuah sual a bawl tute that in. Mah tihcun na bawl tale daihnak ngah hei ngah thei tuk ci tin, Daniel in hilh hi.
\s Mang a kimnak
\p
\v 28 Mahmi thu hempoh te Nebuchadnezzar kumpi hum ah a heng mi thu cu,
\v 29 Ha heinih a bo ten Babilon kumpi inn hum lamzin ah hawh in,
\v 30 Hi khuapi cu ka ngam umnak mun, ka sui minthan khaisan nak ca tuk ka huham tuah bawl mi Babilon khuapi hima maw tin, hilh hi.
\v 31 Mahmi awnkam a son laih tak vanhum pen a heng mi aw cu Nebuchadnezzar kumpi aw ngai in. Uknak ngam cu na khut sung pen thawn zo hi.
\v 32 Nangmah cu mihon pi sung pen hawlvawk in nganhing te tuah um tuk uh ci. A sang bel mi Pathian leihum ngam uk in a piak nuam mitei lakah a piak mi cu kumpi a theih ngawl laih huncan, kum salih sung khui bang hampa ei tuk ci tih mi aw hi.
\v 33 Mahmi awnkam bang Nebuchadnezzar nelah zahcak nak a hih hang, mihon pi sung pen hawlvawk tale a man khui bang hampa ei in nguah zu a thuak hang, a khut le ke tin te cu vano ketin bang hi.
\p
\v 34 Huncan a kim ten keimah Nebuchadnezzar in vanhum cu zo in a phawh leh ten, a sang bel mi Pathian cu thupha pia in a nung mi Pathian thangphat hi. A thuneih nak cu kumkhua hi. Uknak ngam cu a kumkhua kho tuk hi.
\q
\v 35 Leihum mihing hempoh tei mai pen imah a hi ngawl mite hung hi. Vanhum ngalkap tei lakpen hei hihen, leihum mihing tei lak pen hei hihen, a deihnak bang thukhen hi. A khut cu a kuamah in kham thei ma hi. A kon bawl hum hitin nangmah a son thei tu um tuk ma hi.
\p
\v 36 Mah ten ka thinlung cu a dan kel cang leh in, ka uknak ngam minthan nak cu zansun bang in a mawi nak tuah a dim hang, thuvai siampih bawi Upa hempoh ten thuvai siamkhawm nak a nei ta le ka thu neihnak ngam cu kho tuk hi. Ka minthan nak vang a masa sang in khangto saw hi.
\v 37 A tuin keimah Nebuchadnezzar in vanhum Topa Pathian thangphat nak bawl ing. A bawl mi hempoh muantaak nak tuah a dim hang, a dik aman mi thu tuah bang ve hi. Pualthau ngalnak a nei mite cu khiasuk tukin thil tih theihnak nei hitin, a thupiak mi cu mun hempoh ah thang tik hi.
\s Pang hum ah ngat mi lai
\c 5
\p
\v 1 Belshazzar kumpi in bawi Upa thawngkhat (1,000) sam in, puai pi nasezet bawl in bawi Upa thawngkhat (1,000) tuah cabit tui in haw hi.
\v 2 Cabit tui cu a tep teh ten, Jerusalem khuapi biakinn sung pen a pa Nebuchadnezzar lon mi sui khuathai, ngun khuathai te tuah nangmah penpan kumpi capa, kumpi nu, a zi no tei in tuk mahmi khuathai te keng tuk uh ci tin thupiak a um mi bang,
\v 3 Jerusalem khuapi sungah a um Pathian biakinn pi sung pen a lonsak mi sui khuaithai te keng in kumpi, kumpi capa, kumpi nu, a zi no ten mahmi khuathai tuah in haw hi.
\v 4 Cabit tui in in sui pathian, ngun pathian, suang pathian te thangphat haw.
\p
\v 5 Mahmi huncan nazi cu mihing tei khut lek ah heng in meikhung a hum lam, kumpi inn pang taklei mat nak ah lai a ngat mi khut lek cu kumpi in a muhten,
\v 6 A mitmai sia thinkham a el nguh pel a khuk le khuk khengkha in a um ten,
\v 7 Khutlam zo thiam, Chaldean saza, kamsang te sam ta un hitin a au cengten mahmi lai cu sial in a sullam a thihnop nak a hilh thei tupa cu mepian puan a zawng silh a longah sui longok in, ngam uknak sung pen kumpi a pathum nak dek hen tin, Babilon cihnak a nei mitei lakah a thupiak nak a um hang,
\v 8 Cihnak a nei mi saza hempoh heng haw naven, mahmi lai cu sial thei haw ma hi. A sullam a tihnop nak kumpi nelah a hilh theih ngawl hang,
\v 9 Belshazzar kumpi a thinkham a mitmai siat hang, bawi Upa hempoh ten amthong in um haw hi.
\p
\v 10 Mah ten kumpi a nu in kumpi awnkam, bawi U pa tei awnkam a zak ten puainak sungah lut tum in kumpi pa aw, nunkhua sau ta hen. Thinkham nak um ma hen. Mitmai siat nak um ma hen.
\v 11 A thiangtho mi Pathian hawvang tuah a dim mi mihing pakhat cu uknak ngam sungah um hi. Pa Pathian khut sung pen a ma sungah Pathian cihnak tuah a bang ve mi theihnak tuah lang zet in um hi. Mah mipa cu a pa pathian Nebuchadnezzar kumpi in cihnak a nei khutlam zo thiam, Chaldean saza, kamsang saza tei hum pen saza uk tu hihnak ah pia hi.
\v 12 Itahum titale, mang a sullam a sialnak, thuthup haksa te a lak nak, a thudot mite hilh tuk in tih theih nak a neih mi cihnak tuah a lamdang mi thinlung hawvang cu Daniel min a nei mi a ma sungah lang zet in um hi. Belshazzar tihmi minthan nak vang kumpi in pia hi. Mahmi Daniel cu sam in a sullam a tihnop nak cu hilh tuk hitin a hilh ten,
\v 13 Daniel cu a nelah sam tum hi. Kumpi in ka pa Pathian cu Judah ngam pen lon sak in Judah miphun sungah a tel mi Daniel a man mi hi cim?
\v 14 Nang cu Pathian hawvang tuah hei hihen, a lamdang mi cihthiam nak tuah hei hihen, cangkim hitin na thu cu keiman za ing.
\v 15 Mahmi lai sial in a sullam a tihnop nak ka nelah hilh tik tuk in, khutlam thiamnak micip hempoh ka nelah sam haw naven, a mun a sullam a tihnop nak hilh thei haw ma hi.
\v 16 Nang man a sullam a tihnop nak hilh in thu dot nak hempoh hilh thei hitin zaknak ka neih mi bang, mahmi lai cu sial in a sullam a tihnop nak ka nelah na hilh thei tale mepian zawng puan silh na longah sui longok tik in, ngam uk tu pathum nak kumpi in cang tuk citin, thupia hi.
\p
\v 17 Daniel in laksawng te na nelah um ta poh hen. Na piak nuam mi midang te pia in. Mah naven, na maipen mahmi lai cu sial in a sullam a tihnop nak hilh tung hi.
\v 18 Kumpi pa aw, a sang bel mi Pathian in Nebuchadnezzar kumpi nelah uknak ngam tuah sui minthan nak sunglawi, minthan nak pia hi.
\v 19 A piak mi sui minthan nak hang mun hempoh ah um awnkam a tuamtuam awntu miphun hempoh in, na mai pen launak hing tawtok in um haw hi. A thah nuam mite that hi. A nung nuam mite cu nung tik hi. Khaisan a nuam mite cu khaisang hi. A khiasuk nuam mite cu khiasuk hi.
\v 20 Pualthau ngalnak a um ten, a huham pai in kumpi inn pen vawksak hi.
\v 21 Mihing hihnak pen hawlvawk thuak in ngamsa thinlung tuah dim hi. A sang bel mi Pathian in leihum uknak ngam uk in, a deihnak a um a muhtei lakah a ap mi cu a theih laih ngawl tian laak ngilo te tuah phial khui bang hampa ei in, nguah zu thuak in um hi.
\v 22 Kumpi capa Belshazzar nangman hi thu hempoh thei naven thinlung niamkhiat ngawl in,
\v 23 Vahum Topa do in biakinn khuathai te a mai ah keng tik in nangmah penpan bawi U pa, kumpi nu, a zi no ten mahmi khuathai tuah cabit tui in haw hi. Khua mu ngawl, bengbul, imah thu theihnak nei ngawl mi ngun pathian, sui pathian, dal pathian, thik pathian, thing pathian, suang pathian te thangphat in na nunnak Topa a himi na thu hempoh thukhen nak a nei tu Pathian thangphat ngawl in um hima cim maw?
\v 24 Mah hang a khutlek cu hahin, mahmi lai cu ngan tik hi.
\p
\v 25 A laingat mi thu cu MENE, MENE, TEKEL, UPHAR’SIN tin lai ngat mi um hi.
\p
\v 26 MENE hi a sullam a tihnop nak, na uknak ngam cu Pathian sila in bo tik zo hi.
\p
\v 27 TEKEL hi a sullam a tihnop nak nangmah cu cuai tuah teh in a kiam nak thu mu hi.
\p
\v 28 PE’RES a sullam a tihnop nak cu uknak ngam sem in Medes miphun, Persia miphun tei lakah ap hitin a tihnop nak hitin, Daniel in a nelah hilh leh hi.
\p
\v 29 Mah ten Belteshazzar kumpi thupiak mi bang, Daniel cu mepian puan silh tik in a longah sui longawh a ok cengten, uknak ngam sungah kumpi pathum nak in cang hitin khuapi sungah vak kawkawi in au haw hi.
\v 30 Mahmi zan in Chaldean kumpi Belteshazzar kumpi thi in,
\v 31 Medes miphun Darius kumpi cu a kum sawm luk le kumnih ten uknak ngam long hi.
\s Pawpi kua sungah a heng mi Daniel
\c 6
\p
\v 1 Darius kumpi in uknak ngam thu a khen mi khuapi bawi Upa za le kul te hei hihen,
\v 2 A phatnak kiam tik tuk ngawl in mahmi khuapi bawi Upa hempoh uktu a cek tu, uktu bawi Upa pathum hei hihen, a deihnak bang pia hi. Mahmi uktu pathum sung pen Daniel cu uktu bawi hihnak ah bek sial ngawl in,
\v 3 A lamdang mi cihthiam theih nak tuah dim in khuapi uktu bawi Upa hempoh, uktu bawi Upa hempoh te sang a theih saw hang ngam sung hempoh uktu hihnak ah pia tuk in kumpi in ngaisung hi.
\p
\v 4 Mah ten uktu le khuapi uktu ten Daniel cu mawhsiat nak zei in, uknak thu hempoh te dongkan in zei haw hi. Daniel cu muantak nak tuah a dim hang, pakhat no hei um ngawl mawhsiat nak thu zei in a muh haw ngawl ten,
\v 5 Pathian biaknak thu lam sial ngawl a dang thu Daniel nelah mawhsiat nak thu, kohten mu ma ung hitin a hilh cengten,
\v 6 A nelah hung in hulopkhawm nak a nei haw ten kumpi Darius aw, na nunkhua sau ta hen.
\v 7 A sunglawi mi nangmah sial ngawl a dang mihing hei hihen, Pathian hei hihen, ni sawmthum sung thungen tu pa cu pawpi khumnak khuk sungah vawk tuk hitin khelh leh theih ngawl mi a sunglawi thupiak mi thu suak tik tuk in ngam uktu bawi Upa, khuapi bawi Upa, thuvai siampih bawi Upa, ngalkap hempoh ten thinkhat lungcun in thusiam khawm haw zo hi.
\v 8 Mah hang kumpi pa aw, thupiak nak nei in. A thek thei ngawl mi Medes, Persia dan thu bang thupia tik tuk in, tacik khen in hitin a nget haw ten,
\v 9 Darius kumpi thupiak mi cu tacik khen hi.
\p
\v 10 A thupiak mi suah in tacik khen zo tih cu Daniel in za naven, a inn ah hawh in Jerusalem khuapi lam hek a hum ta khan tukvelh hong leng napi in, a hum pen bawlnak a neih mi bang nikhat ah veithum khukdin Pathian nelah thungen in lungdam thangphat hi.
\v 11 Mah tihcun Pathian cu thungen in a um mi bawi Upa ten hulawmkhawm in a muh haw ten,
\v 12 A nelah lut tum in kumpi pa aw, a sunglawi mi nangmah sial ngawl a dang mihing hei hihen, Pathian hei hihen, ni sawmthum sung thungen tupa cu pawpi khumnak khuk sungah vawk hen tin thupiak tacik khet mi um hima maw tin, thupiak mi thu cu dong haw hi. Kumpi in a thek thei ngawl mi Medes, Persia dan thu bang a man mi hitin, thupia hi.
\v 13 Bawi Upa hempoh ten kumpi pa aw, Judah ngam pen mat mi Judah miphun Daniel in thuneih nak cu imah sum sial ngawl tacik khet mi thupiak nak do in nikhat veithum tian thungen in um hitin, hilh haw hi.
\v 14 Mahmi thu a zaak ten kumpi in a sual nasezet sik in Daniel cu hah tuk in ngaihsut nak tuah luatnak tuk thu, nitum tian zuamnak tuah zei hi.
\v 15 Bawi Upa hempoh ten a nelah hulawmkhawm leh in kumpi pa aw, veikhat suahsa thu cu sia thei ma hitin Medes, Persia dan thu sungah a tel mi thu cu ngalling un hitin a tih haw ten,
\v 16 Kumpi thupiak nak bang Daniel cu sam in pawpi khuk sungah vawk haw hi. Kumpi vang in a cat ngawl in na biak mi Pathian in nangmah pan hen tin, Daniel cu thupia hi.
\v 17 Suangpek vang keng in khuk cu a khah cengten, Daniel thu a khennak cu khan tuak kiam tuak tik tuk ngawl in, kumpi tacik le bawi Upa tei tacik khen hi.
\v 18 Mah cengten kumpi in, kumpi inn ah pin leh in zan khua an eihnak sam ngawl in lam thiamnak van te cu a nelah um tik ngawl hihbu thei ngawl in um hi.
\p
\v 19 Zing khaw ma no tho in pawpi khuk sungah a man lang in hawh hi.
\v 20 A hen ten, kahnak aw tuah Daniel cu sam in a nung mi Pathian sila Daniel, a cat ngawl in na biak mi Pathian in nangmah cu pawpi haksat nak pen pan thei maw tin, dong hi.
\v 21 Daniel in kumpi pa aw, na nunkhua sau ta hen.
\v 22 Ka Pathian in vancung mi cu hah in pawpi kam a hupsak hang, kei cu pawpi kam pen luat ing. Itahum titale, Pathian mai pen kei cu sual pen luat ing. A sunglawi mi nangmah vang sual bawl mi hihim um ma hitin, don leh hi.
\v 23 Mah ten kumpi cu nasezet lungdam in, Daniel cu khuk sung pen suah hen tin a thupiak mi bang, Daniel cu khuk sung pen suah in Pathian cu a up hang a ma nelah a khengkha a liam pakhat no hei um ma hi.
\p
\v 24 Mah cengten, Daniel a sonsiat tu hempoh te a thupiak nak tuah sam in a zi le cate tuah pawpi khuk sungah a vawk haw ten, lei ah a hen laih ngawl pawpi ten neh in a muhtei nguh hempoh bot kek haw hi.
\v 25 Mah ten leihum mun hempoh ah um in awnkam a tuamtuam awn mi miphun te, miphun hempoh tei umnak mun ah a thupiak nak lai tuah in hah tik hi. Lai sungah a tel mi thu cu nohtei sungah daihnak tampi um ta hen.
\p
\v 26 Ka uknak ngam sung hempoh ah a um mi nohten Daniel Pathian cu Upat launak nei ta un hitin, ka thupiak mi um hi. Itahum titale, mahmi Pathian cu a nung mi Pathian, kumkhua a kho mi Pathian hi. A uknak ngam cu siatnak ah heng tuk ma hi. A thuneih nak vang kumkhua kho tuk hi.
\q
\v 27 Nunpat a hehpih nak bawl hi. Vanhum, leihum pen thasiah huai mangbangza te cang tik hi. Daniel cu pawpi khut sung pen a pan tu Pathian, mah tihbang mi Pathian hitin, thupiak um hi.
\p
\v 28 Mah tihcun Daniel in Darius kumpi khut sungah hei hihen, Persia miphun Cyrus kumpi khut sung pen in hihen, hauhsak nak tuah um hi.
\s Daniel muh mi sahang pali
\c 7
\p
\v 1 Babilon kumpi Belshazzar uknak kum khat ten, Danial a hihbuh laih takin mang a muh mi a thinlung sung pen ngaisung in mang a mat mi cu ngan in thu hempoh hilh hi.
\v 2 Keimah Daniel in zan huncan ten vanhum kil li pen huih cu tuipi thuanthum humpen pakhat le pakhat a do dun haw ten,
\v 3 Mel a bang ve ngawl mi sahang pali cu tuipi thuanthum sung pen tul haw hi. Pakhat nak sahang cu pawpi tuah bang ve hi. Muvanlai ha bang nei hi.
\v 4 Ka zoh laih tak a ha bot haw. Lei pen a pumpi dang to mihing bang ke tuah ding in, mihing lungmu vang nei hi. A panih nak sahang cu vom tuah bang ve hi.
\v 5 A langlam pen a mah le mah ding to hi. A kam pen naknguh pathum cu pet in um hi. Tho in. Taksa te pet in ei in hitin, a ma nelah hilh haw.
\v 6 Mah ceng ka zoh leh ten tavang a can tuah a bang ve mi sahang pakhat lang hi. A ngum ah vano ha pali um hi. Lu pali tuah dim hi. Uktu thuneih nak vang nei hi.
\v 7 Mahmi zan huncan in ka ngaihsut laih tak, thazang ngilnak tuah dim in nasezet a lauhuai mi sahang pali nak lang hi. A ngengzet mi thik ha vang nei hi. Pet keh in a tang mi cu a ke tuah in cil pek hi. A mah cu a masa sahang te sang lamdang hi. Ki sawmkhat vang nei hi.
\v 8 Mahmi ki te ka zoh laih tak ki tampi a laizang pen ki a neu pakhat po leh hi. Mahmi ki a neu mai pen a masa ki pathum cu a zung te tuah bot hi. Mahmi a ki neu cu mihing mit bang a himi mit tuah in hihen, nasezet ot theih nak kam tuah hei in dim hi.
\p
\v 9 Mah ten ka zoh laih tak tohkham khunnak te koih in kumpi Upa pakhat cu khung hi. A puan cu vukpak bang ngo hi. A sam cu tuu mul bang ngo hi. A tohkham khunnak cu meialh pi hi. Tohkham khunnak nuai ah meicet lengke um hi.
\q
\v 10 A mit mai cu mei zawng a al suak hi. Sonzawh ngawl in a tam miten na deh in, mihing thawng tampi ten a mai pen na dek in um haw. Thukhen tuk in a bawl mi laibu cu phalh hi.
\p
\v 11 Mah ten ki a neu ot mi awnkam pi aw ka zoh laih tak, mahmi sahang nunnak a thah cengten a pumpi cu meihal in siatsuah haw.
\v 12 A dang sahang te cu uknak huham sung naven, a tiap mi huncan hempoh sungah nung haw hi.
\p
\v 13 Mahmi zan huncan ten keiman ngaisung in mihing tuah a bang ve mi pakhat meingo khung in, kum U pa pai nelah heng hi. Mahmi pa cu a nelah khum tum haw hi.
\q
\v 14 Mun hempoh ah a um awnkam a tuam tuam a awn mi miphun hempoh te uk tik tuk in, a man a uknak ngam tuah uknak huham thu nei hi. A uknak cu kumkhua kho hi. A uknak ngam cu siatnak ah heng tuk ma hi.
\s Mang muhnak a sullam a tihnop mi a hilhnak
\p
\v 15 Keimah Daniel cu pumpi hing in mahmi muhnak hang thinkham nak um tale,
\v 16 A bulah a ding tu mihing pakhat nelah hawh in, a tu in na muh mi hempoh a tihnop nak i hum tin a dot ten,
\v 17 A man, hi sahang pali te cu leihum pen a heng tuk laih mi uknak ngam pali hi.
\v 18 Mah naven, a sang bel Pathian mi thiangtho ten uknak ngam long in a kumkhua co haw tuk hitin, a sullam a tihnop nak hilh hi.
\v 19 Mah ten a dang sahang te sang a lamdang a lauhuai zet mi a hih hang thik ha tuah in hihen, dal khut tin, khut tin tuah a dim hang, pet keh in a tang mi hempoh a ke tuah a cil pek thei mi sahang pali cu i tihbang a tihnop nak hei hihen,
\v 20 A lu ah a um mi ki sawmkhat a tihnop nak ai hum tih hei in hihen, po leh in a masa ki pathum cu bot in nasezet awn thei mi kam le mit a neih hang, a ngualcam te sang ngalhan nak mitmai a nei mi ki pakhat cu itihbang a tihnop nak hei hihen, theihnak nei tuk in keiman deih ing.
\v 21-22 Ka zoh laih tak ni dang laih huncan Topa a hen ten, a sang bel Pathian a thiangtho mitei lakah thukhen nak pia in, a muhte cu uknak ngam sungah lut tum in huncan a hen tian mahmi ki in a thiangtho mite do in neh hi.
\p
\v 23 Mah mipan a pili nak sahang cu leihum pen a dang uknak ngam te sang a lamdang mi uknak ngam pali nak hi. Mah ngam cu leipi a um mi hempoh pet keh in a ke tuah cil pek tuk hi.
\q
\v 24 Mahmi ngam sungah a po mi ki sawmkhat cu a heng tuk mi kumpi sawmkhat hi. A muhtei nungpen a dang kumpi heng tuk hi. A masa kumpi sang a lamdang cuang in pathum te cu neh tuk hi.
\q
\v 25 A sang bel Pathian cu do in nasezet awnkam tuah awn tuk hi. A sang bel Pathian mi thiangtho te bawlsiat tuk hi. Hun le can tuah dan thukham te thek tik tuk in ngaisung tuk hi. Huncan khat, huncan nih, huncan a langkhen sung hempoh a khut sungah pia tuk hi.
\q
\v 26 Mah cengten thukhen nak cang tuk hi. Mah ten a huham thuneih nak laksak in that haw tuk hi.
\q
\v 27 Vanhum nuai uknak ngam tuah a uknak huham hempoh te a sang bel ah um tu Pathian mi thiangtho ten co haw tuk hi. Mahmi Pathian uknak ngam cu kumkhua uknak ngam hi. Kumpi hempoh ten nawk tum in sila thuak haw tuk hi.
\p
\v 28 Hi thu cu a sullam a tihnop hitin, ti hi. Keimah Daniel cu thinkham nak ah heng in thasiat nak mitmai nei ing. Mah naven, a muh mi mang cu a thinlung sungah khawl hi.
\s Daniel muh mi tuu pakhat le kel pakhat
\c 8
\p
\v 1 Belshazzar kumpi uknak kum thum ten, keimah Daniel in a masa muhnak ka muh cengten ka muh leh mi mang thu cu,
\v 2 Elam ngam, Shushan khuapi pen Ulai ngun tuipi ah ka um laih tak muh nak a lang in,
\v 3 Ka zoh ten a sau mi ki panih a nei tuu pakhat cu ngun tui ngalkhat lam ah ding hi. Mahmi ki pa nih cu bang ve ma, pakhat cu sau saw hi. A sau saw mi ki cu a dawl ta in a po mi hi.
\v 4 Mahmi tuu cu nitum nak, hanglam, saklam, mitmai pathum ah a sik hang ngamsa hempoh ten thuak zo ma, a kuamah khut sung pen a pat theih ngawl hang, a deihnak bang bawl in nasezet a huham heng hi.
\p
\v 5 Mahmi thu cu ngaisung in a um laih tak a mit panih lak lawh pen a lamdang ki pakhat a um mi kel cu nitum nak lam pen heng in, leihum siik ngawl in leihum hempoh kal hi.
\v 6 Ki panih tuah ngun tuipi ngalkhat lam ah a lang mi tuu umnak mun ah nasezet a thum tai in,
\v 7 A bulah a hen ten nasezet a thinuuk suak hang, tuu cu si in tuu ki panih cu keh hi. Tuu in a thuak theih nak a neih ngawl hang, kel in a mah cu lei ah lum tik in cil pek hi. A khut sung pen tuu cu pan thei ma hi.
\v 8 Mah hang, mahmi kel cu nasezet ngeng hi. Thazang ngilnak a neih ten a ki pi cu keh hi. Mahmi ki hihnak pen a lamdang mi ki pali po in vanhum mitmai pali hek in um haw hi.
\p
\v 9 Mahmi pali cu pakhat sung pen a dang ki pakhat a po leh hang, hanglam ah hei hihen, nisuah nak lam ah hei hihen, a nop mi ngam ah hei hihen, mitmai hekin nasezet ngeng in um hi.
\v 10 Vancung ngalkap tian ngeng in mahmi vancung ngalkap a hekkhat sung pen aksi a hekkhat te cu lei ah cak in cil pek hi.
\v 11 Mah bek sialngawl vancung ngalkap Topa Pathian tian hei ngalnak bawlin, ni sial a cat ngawl biakpiak nak a bawl mi na cu vawk in a thiangtho mi umnak mun zawt dem hi.
\v 12 Sual a tam hang, ni sial in bawl mi biakpiak nak na te tuah vancung ngalkap in mahmi ki cu ngah in thudik thu cu leihum ah khiasuk hi. Mah tihcun a bawl hang nehnak ah heng hi.
\v 13 Mah ten mi thiangtho pakhat awnkam aw keiman za ing. Mi thiangtho pakhat in a masa hilh mipa cu au in a thiangtho mi umnak mun le vancung ngalkap cil pek tuk in ni sial bawl mi biakpiak nak vawk tuk in hihen, siatsuah theih mi sual palcat nak tuah a seng mi mang muh nak cu ituk huncan tian kho tuk hum tin a dot ten,
\v 14 A masa a hilh tupan ni thawngnih le zathum (2,300) kho tuk hi. Mah cengten a thiangtho mi umnak mun cu som leh haw tuk hitin, hilh hi.
\s Muhnak a sullam a tihnop a hilhnak
\p
\v 15 Keimah Daniel in mahmi muhnak mu in a tihnop nak zeih ten, mihing mel bang a nei mi pakhat cu ka mai ah ding hi.
\v 16 Mi dang pakhat in Gabriel aw, a man a tu in a muh mi a mang cu thei tik tuk in a tihnop nak hilh in hitin, Ulai ngun tuipi lak lawh pen mihing aw tuah au in a hilh mi cu keiman za ing.
\v 17 A mah cu ka dinnak a bulah a hun ten ka lau hang bopkhup in um ing. A man ngualcam mihing pa aw, thei in hi. Hi muhnak mang cu huncan a tawpnak tuk thu tuah a seng mi hitin, ka nelah hilh hi.
\v 18 Mah tihcun a hilh ten kei cu leihum ah bopkhup amthong in um ing. A man ka khut zen in a masa umnak mun ah a din leh tik hang,
\v 19 A thinuuk a tawp ten a heng tuk mi thu cu keman hilh hih tung hi. A tiap mi huncan ten ceng tuk hi.
\v 20 Ki panih tuah a heng mi tuu cu Medes kumpi, Persia kumpi hi.
\v 21 A mulham mi kel cu Grik kumpi hi. Mit panih lak lawh ah a um mi ki pi cu a masa bel kumpi hi.
\v 22 Mahmi ki cu keh in a ma hihnak ah ki pali a po mi cu a masa uknak ngam pen uknak ngam pali din tuk hi. A masa uknak ngam cu huham tuah dim ma hi.
\v 23 Mahmi ngam uktu tei a dawl tawp mi huncan, sual palcat tutei sual a dim ten ngalhan nak mitmai a um hang, zol thu a thei thiam tu kumpi pakhat heng tuk hi.
\v 24 Mahmi kumpi cu a huham nei ngawlin a huham ngeng tuk hi. A cuang in a siatsuah hang khangto in pitung tuk hi. Thazang ngilnak a nei mi phun, a thiangtho miphun hei siatsuah tuk hi.
\v 25 A phat ngawl nak tuah zol thu vang pitung tuk hi. Pualthau ngalnak thinlung tuah pawlkom nak hang, mihing tampi te siatsuah in to hempoh tei Topa cu do tuk hi. Mah naven mihing khut tuah dantat ngawl in siatnak ah heng tuk hi.
\v 26 Zan huncan le zinglam a lak mi mangmuh nak awnkam a man mi a hih hang, mahmi awnkam cu tacik khen in hi. A heng tuk laih ni tampi sungah a cang tuk mi thu a tihnop nak hi.
\v 27 Mah ten keimah Daniel cawl hang tidam ngawl in um ing. Ka dam leh ten kumpi na cu dek ing. Muh sa mi mang cu keiman thasiah naven, mahmi thu cu a kuamah in thei haw ma hi.
\s Daniel thunget nak
\c 9
\p
\v 1 Jerusalem khuapi siatsuah in kum sawm salih bo tik tuk tin,
\v 2 Pathian thuphuan cu kamsang Jerimiah in a thuak awng zo hang, Chaldean uknak ngam cu uktu Mede miphun, Ahasuerus capa Darius uknak kumkhat kum in, keimah Daniel in mahmi kum sial cu Laithiangtho tuah theihnak hang,
\v 3 Ancang thangkhau puan silh vut bualin Topa Pathian nelah nekin thungen ing.
\v 4 Mah tihcun a sual phuan tuk nget nak hang, ka biak mi Topa Pathian nelah thu ka nget mi cu nangmah it in dan thukham a cingkem tuten thukam siatsuah ma, a hehpih nak a cingkem tu huham thawmngeng a lauhuai mi Topa Pathian,
\v 5 Kohten sual zo ung. Sual bawl zo ung. Phat ngawlnak tuah nung zo ung. A bawl mi dan thukham lamzin pen pial kha zo.
\v 6 Kohtei kumpi, kumpi capa, kum Upa pen pan ngam sung miphun hempoh nangma thu tuah phuan mi na sila kamsang tei lakpen awnkam te kohten ngai ngawl in um zo ung.
\v 7 Pathian aw, nang cu a dik mi thu tuah seng hi. Nangmah sual bawlnak hang hawlvawk in a nai nak ngam, a khuala nak ngam, mun hempoh ah a um Judah miphun, Jerusalem khua mite pen pan kohten mitmai phat ngawlnak tuah seng ung.
\v 8 Pathian aw, nangmah sual bawlnak hang kohtei kumpi, kumpi capa, kum Upa penpan in kohten mitmai phat ngawlnak tuah seng ung.
\v 9 Kohten nangmah do naven kohtei Topa Pathian in a hehpih lak nak, sual ngaihdam nak tuah seng hi.
\v 10 Kohtei Topa Pathian in sila kamsang te tuah kohtei sungah a koih mi dan thukham lamzin ah zui tukin, thuphuan nak aw cu kohten a thungai ngawl in um zo ung.
\v 11 A thungai in Isarel miphun hempoh ten thuphuan nak aw ngai ngawl, lamzin pial in dan thukham te palcat haw zo. Mah hang, nangmah sual a bawlnak ten tamsiat nak tih mi Pathian sila Mosi dan thukham sungah sialsiah mi tamsiat nak cu kohtei hum ah buak hi.
\v 12 Kei muhtei a langlam, kei muhte ukin thukhen tutei a langlam pen a thupiak mi awnkam kho tik tuk in, kohtei hum ah nasezet haksat nak heng tik zo hi. Itahum titale, Jerusalem khuapi ah haksat nak a hen mi bang, van hang nuai imah lai mun ah heng awng ma hi.
\v 13 Mosi thukham Laithiangtho sungah a sial siah mi bang, hi haksat nak hempoh kei muhtei hum ah heng zo. Kohten sual bawlnak te pial thudik thu thei tuk in, kohtei Topa Pathian nelah hehpih kut nak nei ngawl in um zo ung.
\v 14 Mah hang, Pathian in haksat nak cu ngak in kohtei hum ah heng tik zo hi. Kohtei Topa Pathian bawl mi hempoh sungah dikcang nak um hi. Kohten thuphuan nak aw ngai ngawl in um zo ung.
\v 15 A thawmngeng khut tuah na miphun te Izip ngam pen pui in tuni a um mi bang, minthan nak a lang tik tu kohtei Topa Pathian, kohten sual bawl kha zo ung. Phat ngawl nak tuah sual bawl kha zo ung.
\v 16 Topa aw, dikcang nak thu a um hempoh bang a thiangtho mual a himi na Jerusalem khuapi pen pan nasezet thinuuk nak pen pial in hitin, keiman ngen ing. Itahum titale, kohtei sual bawl tam zet in pu le pai sual bawl a tam hang, Jerusalem khuapi le na miphun tei elkim ah a um mitei sung pen mawhsiat nak thu in cang hi.
\v 17 A tu in, kohtei Pathian na sila thunget nak awnkam ngai in. Mi thawmveng in a um a thiangtho umnak mun cu Pathian phat nak hang, na mitmai a vak al tik in.
\v 18 Ka Pathian beng hek in ngai in. Mit hak in kohtei siatnak te hei hihen, na min tuah sak mi khuapi hei hihen zo in. Kohten deh le bawlphat nak suang ma ung. A hehpih nak bek muang in thunget nak awnkam cu na mai ah ap ing.
\v 19 Pathian aw, ngai in. Pathian aw, sual ngaihdam in. Pathian aw, ngai in bawl in. Ka Pathian, na ca in zuancum pah sin. Na khuapi, na miphun ten na min tuah samnak um hitin, thunget nak bawl hi.
\s Pi sawm salih
\p
\v 20 Mah tihcun thunget nak bawl in ka sualnak hei hihen, na miphun pih Isarel miphun tei sualnak hei hihen phuansuah nak nei in, ka biak mi Pathian a thiangtho mual hum ca ka thunget nak aw cu ka Topa Pathian mai pen ap ing.
\v 21 Thunget celh laih ngawl a phuat lih laih a masa mang a muhnak pen a lang mipa, Gabriel cu manlang zet leng in a hun hang, zanlam biakpiak nak huncan ten ka umnak mun ah heng in,
\v 22 Otpih in ngualcam pa Daniel aw, keiman na nelah cihthiam nak khang tik tuk thu heng zo hi.
\v 23 Thunget nak na pat ten thupiak nak a um hang, na nelah hilh tuk in keimah heng zo ing. Nang cu a deih zet mipa hi ci. Mah hang na mang muhnak thu ngaisung leh in theihnak thu um hi.
\p
\v 24 Sual palcat nak thu cu kham sak in sual cu tacik khen tuk in hihen, sual bawl nak cu sonsak in kumkhua phat nak sungah heng tuk in hihen, mangmuh nak le kamsang thuphuan mite tacik khen in a thiangtho bel mi umnak mun ah sathau noih tuk in hihen, pi sawm salih cu na miphun pih ca tuk in le a thiangtho mi na khuapi ca thukhen cat nak um hi.
\v 25 Mah hang, Jerusalem khuapi din suah leh tukin thupiak a um mi ni penpan Topa Khrih khut sung tian, pi salih le pi sawmluk le pinih ngei tuk hitin, theihnak tuah sialsiah in. Noksak nak huncan a thuaknak pen khuapi lamzin bawl leh tuk hitin, thukhen nak um hi.
\v 26 Mahmi pi sawmluk le pinih a bo ten Khrih cu thah nak thuak tuk hi. Mah cengten a heng mi Topai mihing te khuapi sungah hei hihen, a thiangtho mi umnak mun ah hei hihen subal in siatsuah haw tuk hi. Tuipi in a khuh hang sung tuk hi. A tawp tian ngaldo nak, siatsuah nak thu tuah a seng mi thukhen cat nak um tuk hi.
\v 27 Pikhat sung mihing tampi te tuah thukhaam bawl in, mahmi pikhat a langkhen in biakpiak nak le apnak cu tham tik tuk hi. A nawngkai mi thu tei a sang bel hum pen, siatsuah tupa cu heng in thukhen cat mi thahnak, siatsuah tuk mi hempoh a khuh khawng laih ngawl in, mahtih cun cang tuk hitin, hilh hi.
\s Daniel muhnak sung pen mihing pakhat a muhnak
\c 10
\p
\v 1 Persia kumpi Cyrus uknak kumthum ten, Belteshazzar min tuah sam mi Daniel in muhnak co hi. Mahmi muhnak awnkam thu cu man hi. Nasezet ngaldo nak tuah a seng mi hi. A man mahmi awnkham thu cu thei hi. A muhmi muhnak thu vang thei hi.
\v 2 Mahmi huncan ten keimah Daniel in ni kulluankhat sung kap in um ing.
\v 3 Ni kul luankhat a kim laih ngawl in a uuk mi moh ei ma, sa le cabit tui tep ma. Sathau noihnak vang bawl hihim mang hi.
\v 4 Ha khat ha ni heili ni in kei cu Heddikel ngun tui pi bul ah um laih tak,
\v 5 Zo in puan nem le Uphaz sui a ngek taipom het in a um mihing pakhat mu ing.
\v 6 A pumpi cu beryl suang bang hi. A mit mai cu khuaphelep bang hi. A mitcang cu meikhuat bang hi. A ke te cu dal nawhnak a zawng um hi. A awnkam aw cu mihing tampi aw tuah bang ve hi.
\v 7 Mahmi muhnak mang cu keimah Daniel pakhat bek in mu ing. Keimah tuah a um miten mu haw ma hi. A mun nasezet launak tuah hing tawtok ngelh in tai haw hi.
\v 8 Keimah pakhat bek tang in mah a nasezet mi muhnak muhten, thazang ngilnak kiam mitmai sia in thazang ngilnak imah um ma hi.
\v 9 Mah naven, a ma awnkam aw cu keiman za ing. Ka zak ten, leihum ah bopkhup amthong in um ing.
\p
\v 10 Mah ten a khut langkhat in keimah zen in khuk le khutphalh hum ah koih hi.
\v 11 A man ka ihzet mipa Daniel, ka awnkam thu thei tukin ding in. Na umnak mun ah keimah a hah hang, a tuin keimah hung ing hitin a tih ten, kei cu can tawtok in ding ing.
\v 12 Mah ten a man ngualcam pa Daniel aw, lau pah sin. Nangman thei tuk in hihen, na Pathian mai pen nangmah le nagmah thuhilh tuk in hihen, thinlung ngaihsut nak a bawl mi nikhat ni penpan na awnkam thei zo hi. Mahmi awnkam thu hang kei cu hung ing.
\v 13 Persia ngam uktu kumpi in ni kul luankhat sung keimah kham hi. Mah cengten veikhat cu a sunglawi bel kumpi tampi sung pen Michael in keimah bawm heng in, keimah vang mah lai umnak mun pen Persia kumpi te ngak in um ing.
\v 14 A tu in, tunung ten na miphun pih tei sung pen a cang tuk mi thu hempoh nangman thei tukin kei cu heng zo ing. Hi muhnak mang cu a ngeizet mi huncan tuah seng hitin, ka nelah hilh hi.
\v 15 Mah tihcun a hilh cengten, kei cu lukun bopkhup awn thei ngawl in um ing.
\v 16 Mah ten mihing mel bang a um mi pakhat in ka kam cu a khut tuah a zen ten, keiman ka kam kau in thuson theihnak ka ngah cengten ka Topa aw, mangmuh nak ka muh hang kei cu nasezet haksat nak thuak in thazang ngilnak nei him mang hi.
\v 17 Na sila in na Topa tuah itihbang otpih thei hum? A tu in ka taksa pumpi ah thazang ngilnak um hihim ma hi. Ka nunnak vang bo zo hitin ka mai pen a ding tupai nelah keiman hilh ing.
\p
\v 18 Mah cengten mihing mel bang a um mipa hung in, keimah cu a khut tuah zen in thazang a piak cengten,
\v 19 Ka ihzet mipa aw, lau pah sin. Daihnak um ta hen. Thazang ngilnak nei in. Thazang ngilnak tuah dim in hitin, ti zo hi. Mah tihcun a hilh cengten thazang ngilnak keiman co in ka Topa aw, thupia in hi. Kei cu thazang ngilnak pia zo hitin, ti hi.
\v 20 A man kei cu na umnak mun ah hunnak thu thei a cim? Persia kumpi in ngaldo tuk a tu in kei cu hung leh tung hi. Ka hawh cengten, Grik kumpi cu hung leh tuk hi.
\v 21 Mah naven Laithiangtho sungah sialsiah mi thu cu keiman lak tuk laih ing. Hi thu hempoh te nang muhtei kumpi Michael sial ngawl keima lam ah a um tu um ma hi.
\c 11
\p
\v 1 Keiman Mede miphun, Darius kumpi uknak kumkhat ten, a mah cu sosuah in a cat ngawl kho tukin zuam hi.
\s Saklam, hanglam kumpi te
\v 2 A tuin, a man mi thu keiman lak tung. Persia ngam uktu kumpi pathum heng tuk laih hi. Kumpi a pali nak cu a um mi hempoh te sang sum ngah thei saw tuk hi. Mah tihcun ngah in thazang a neih hang, Grik ngam do tuk in mi hempoh te sosuah tuk hi.
\v 3 Mah ten huham a nei mi kumpi pakhat vang heng tuk. A thu neihnak huham tuah a uk hang, a deihnak a um mi bang bawl tuk hi.
\v 4 A mah a hen cengten uknak keh in, midang ten vanhum kil li sung pen sem haw tuk hi. Mah naven uktu ten miphun hinnam hima, thu neihnak tuah uk ngah ma, uknak ngam laksak in miphun hinnam sial ngawl midang ten ngah haw tuk hi.
\p
\v 5 Mah ten hanglam kumpi cu huham ngeng tuk hi. Kumpi tampi sung pen kumpi pakhat cu a mah sang huham ngeng saw in thuneih nak kho tuk hi. A thu neih nak vang zal zet tuk hi.
\v 6 Hun can a bo ten a mun ngualcam in bawl haw tuk hi. A lem no um tukin hanglam kumpi canu cu saklam kumpi nelah heng tuk hi. Mah naven, kumpi canu thuneih nak kho tuk ma hi. Mahmi kumpi te le a miphun hinam te vang kho tuk ma hi. Kumpi canu hei hihen, a pui mite hei hihen, a capa hei hihen, mahmi huncan sungah a mah a bawm tu hei hihen, siatnak ah ap tuk hi.
\p
\v 7 Mah kumpi canu miphun hinnam a himi pakhat in a pai hihnak cu ngah in ngaldo nak tuah hung hi. Saklam kumpi ah a hen ten khua sung mite do in neh tuk hi.
\v 8 A muhtei pathian te, a buak mi zuk milim te, man a nei mi ngun khuathai, sui khuathai te Izip ngam ah laksak tuk hi. A mah vang saklam kumpi sang a nunsau tuk hi.
\v 9 Saklam kumpi cu hanglam kumpi uknak ah lut tum naven, a ngam ah pin kik leh tuk hi.
\p
\v 10 A cate cu tho leh in mihing tampi hulawmkhawm haw tuk hi. A capa pakhat vang hung bet khuh cih in cil pek tuk hi. Hung kik leh in a khuapi tian that haw tuk hi.
\v 11 Hanglam kumpi a thinuuk suak in saklam kumpi cu muak in do tuk hi. Saklam kumpi cu ngalkap bu tampi naven, hanglam kumpi in a venghawng laksak tuk hi.
\v 12 Mahmi ngalkap bu tampi te a siatsuah cengten, pualthau nak thinlung po in a thawng tampi bek sial ngawl mihing tampi that naven a thuneih nak kho tuk ma hi.
\v 13 Itahum titale, saklam kumpi pakhat heng leh in a masa ngalkap bu tampi te sang a bawl cengten, hun ngeipi a bo ten ngalkap van te, hauhsak nak te tuah hung bet tuk hi.
\v 14 Mahmi huncan ten hanglam kumpi a do tu tampi haw tuk hi. Na miphun pih a himi ten a do tute, mangmuh nak thu kim tik tuk tho in siatnak ah heng haw tuk hi.
\v 15 Saklam kumpi cu hung in khuapi khantian a sak cengten, a kho mi khuapi te siatsuah tuk hi. Hanglam kumpi ngalhiam nam te, a ten mi miphun te kham tuk in thazang ngilnak a neih ngawl hang, kham thei haw ma hi.
\v 16 A do tupa cu a ma deihnak bang bawl in a mai ah a kuamah ding thei ngawl in, a nop mi ngam cu a pal cengten cangkim tuk hi.
\v 17 Midik cang miten zui in, mahmi kumpi in a ngam sungah a um tu hempoh te tuah lut tum tuk in, zuam in numei no te tuah siatsuah tuk in pia tuk hi. Mah naven, a mah cu a ngaihsut nak pitung ma, nemcuam nak um ngawl in um tuk hi.
\v 18 Mah cengten tuipi kulhnak lam ah hek in tuipi kulh miphun te that haw tuk hi. Mah naven ngalkap bawi pakhat in a co mi minsiat nak a ma nelpen vawkin, mahmi minsiat nak a do tu kumpi hum ah heng leh tik tuk hi.
\v 19 Mahmi kumpi pa vang a ma umnak khuapi ah a pin leh cengten khengkha a lup hang thi tuk hi.
\p
\v 20 Mahmi kumpi hihnak sungah hauhsak uknak ngam a co tu ngun khuai tupa heng in, dawm laih no bek um in a thinuuk nak um ma, ngaldo nak um ngawl in siatnak ah heng tuk hi.
\v 21 Mah mipai hihnak ah vang kumpi hauhsak nak a co tak mipa hima siatnak heng tuk hi. A man nehsiah nak bawl ma, mipolh thiam nak tuah uknak ngam co tuk hi.
\v 22 Ngalhiam nam tuah a dim mi cu a mai ah phum in sung tuk hi. Pawlkom nak a co tu kumpi vang sung tuk hi.
\v 23 Itahum titale, pawlkom nak a bawl tu kumpi cu thukam a siatsuah hang kai in mihing dawm laih no um naven a huham ngeng tuk hi.
\v 24 Ankung a tam mi ngam cu nehsiah nak bawl in lut tum tuk hi. A lonsak neihnak van, hauhsak nak te pia in a pu le pa tei bawl awng ngawl mi thu bawl tuk hi. A kho mi khuapi te co tuk in ngeipi ngaisung tuk hi.
\v 25 Thazang a nei mi tampi te tuah hanglam kumpi do tuk bawlin a thazang ngilnak sosuah tuk hi. Hanglam kumpi vang thazang tampi te tuah do tuk in sosuah ten thuak zo ma hi. Itahum titale, a langlam pen a pha ngawl mi ngaihsut nak cu ngai sung haw tuk hi.
\v 26 Mah tihcun a cawm nak a co tute vang a phat nak a siatsuah hang, a ngalkap te thi khawng haw tuk hi.
\v 27 Mahmi kumpi panih ten a pha ngawl mi ngaihsut nak ngaisung in, cabuai pakhat bek pen zol thu awnkam son haw tuk hi. Mah naven a ngaihsut nak pi tung ma hi. A tiap mi huncan ten thi tuk hi.
\p
\v 28 Mah cengten saklam kumpi cu hauhsak nak tampi keng a ngam ah pin leh a hawh laih tak, a thiangtho mi dan thukhaam iksih nak thinlung a neih mi bangin a bawl cengten a ngam ah pin leh tuk hi.
\v 29 A tiap mi huncan ten hanglam ah veikhat do leh tuk hi. Mah naven a masa a cang mi bang cang leh tuk ma hi.
\v 30 Itahum titale, Chittim tembaw ten a mah cu kham haw tuk hi. A thin na pin leh in a thiangtho mi dan thukhaam cu a thinuuk in, a thiangtho mi dan thukhaam a vawk mite tuah ngualcam bawl leh tuk hi.
\v 31 Mahmi kumpi lakpen ngalvan te a hen hang, huham a nei mi a thiangtho umnak bal tik in nisial biakpiak nak bawl mi cu vawk haw tuk hi. Siatsuah thei a nawngkai mite vang koih haw tuk hi.
\v 32 Dan thukhaam a sual tu hempoh ten mipolh thiamnak ah zui in sia tik haw tuk hi. Mah naven a muhtei Pathian a thei tute cu thazang ngilnak nasezet tuah a mah cu liplet haw tuk hi.
\v 33 Mihing tampi sung pen cihnak a nei miten, mihing tampi hilh haw tuk hi. A mun nam tuah thah nak, meihal nak, man in kolbulh nak, long in cuhdun nak tuah huncan ngei pi sung bah haw tuk hi.
\v 34 Lum in a bah haw ten bopnak dawm no co leh haw tuk hi. Dikcang nak tampi a nei ngawl tuten, mipolh kamthiam nungah zui in zei haw tuk hi.
\v 35 A tawp tian thiangtho tuk in cihnak a nei mi hekkhat ten culnak thuak in bah haw tuk hi. Mahmi thu cu a tiap mi huncan tian tuk hi.
\s A mah le mah a khaisang mi kumpi
\p
\v 36 Kumpi pakhat in a lungmu deihnak tuah bawl in pathian hempoh sang a mah le mah khaisang in, pathian tei Pathian do in mangbangza awnkam hilh tuk hi. Thinuuk nak huncan a kim tian phatnak co tuk hi. A thukhen cat hempoh bangin cang tuk hi.
\v 37 Mahmi kumpi in pu le pa tei biak mi Pathian hei hihen, numei hawzak nak ah hei hihen, ngam dang pathian te hei hihen sumsial ma hi. Midang hempoh te sang a mah le mah cu khaisang tuk hi.
\v 38 Mahmi pathian hihnak sungah innpi tei pathian le pu le pa tei theih ngawl mi pathian cu khaisang in sui, ngun, suangman pha, deihawh huai mi van te pia tuk hi.
\v 39 A kho mi innpi te hei hihen, a lungkim mi ngam dang miphun te hei hihen bawl in minthan nak khang tik tuk hi. Mihing tampi tei humah uknak thu a piak hang, khangto tuk in lei ngam cu sem tuk hi.
\p
\v 40 A thubuai a bo mi huncan ten hanglam kumpi in mahmi kumpi do tuk hi. Saklam kumpi in leng tampi, cipuh khung tampi, tembaw tampi tuah huih simpei bang theu in, mahmi ngam sungah lut tum in cil pek in uk tuk hi.
\v 41 A nop mi ngam vang lut tum in ngam tampi te sung haw tuk hi. Mah naven a khut pen a luat tupa cu Edom ngam, Moab ngam, Ammon miphun Upa hempoh te luat haw tuk hi.
\v 42 Mahmi kumpi in ngam hempoh te nehnak co tuk hi. Izip ngam vang luat tuk ma hi.
\v 43 Mahmi ngam ah a um tu sui van, ngun van, man a nei mi neihnak tampi co tuk hi. Libia miphun le Ethopia miphun ten a nungah zui haw tuk hi.
\v 44 Mah naven a man nisuah nak saklam pen thuthang za in thinkham nak hang, mihing tampi siatsuah tuk in nasezet thinuuk nak suak in tul tuk hi.
\v 45 Tuipi lak lawh pen minthan nak hang, a thiangtho mi mual hum pen umnak inn a sak cengten bawm tu a kuamah um ma hi. Siatnak ah heng tuk hi.
\s A dawl bel hun le can te
\c 12
\p
\v 1 Mahmi huncan ten na miphun pih tei thu a cing tu kumpi Michael cu heng tuk hi. Miphun pakhat a hihnak penpan mahmi huncan tian a cang awng ngawl mi haksat cimnak heng tuk hi. Mahmi huncan ten, laibu sungah cazin a lut hempoh na miphun pih te luatnak ah heng haw tuk hi.
\v 2 Mahmi huncan ten leivul sungah hihbu tute khang haw tuk hi. A hek khat te kumkhua nunnak tuah hei in hihen, a hek khat te zahcak nak, kumkhua siatnak tuah in hihen, khang haw tuk hi.
\v 3 Cihnak a nei mite vang vanhum a phalh mi a zawng aile bang in hihen, mihing tampi te dikcang nak lamzin sungah a khum tu a muhte vang aksi te bang in hihen a cat ngawlin vak tuk hi.
\v 4 Daniel nang cu a thu bo huncan tian, hi awnkam thu khak in laibu cu tacik khen in. Mihing tampi ten mahmi laibu a zoh ten cihnak khang tuk hitin, hilh hi.
\p
\v 5 Mah ten keimah Daniel in ka zo ten, a dang mihing panih cu ngun tuipi mawk lam pen a lang le langah ding haw.
\v 6 A dang pakhat in mangbangza mi hi thu hempoh a bo laih ngawl, i can ngei tuk hum tin puannem silh in ngun tuipi hum ah a um mihing cu dong hi.
\v 7 Puanthan a nem silh in ngun tuipi hum ah a um tu mihing in huncan pakhat, huncan panih, huncan a khenlang hempoh cang tuk hi. Mi thiangtho tei thazang ngilnak cu mun hempoh ah a theh keh mi thu a celhten, mahmi thu hempoh bo tuk hitin a khut panih cu vanhum ah dang kumkhua a nung mi Pathian sal in thukam a bawl mi cu keiman za ing.
\v 8 Mahmi awnkam keiman za in theih ngawl ten Pathian aw, hi thu te itihbang in bo tuk hum tin a dot ten,
\v 9 A man Daniel nang cu hawh ten. Mahmi thu a bo tuk huncan tian khak in tacik khet sa in um hi.
\v 10 Mihing tampi thianlim nak ah heng in culnak cu thuak haw tuk hi. Mipha ngawl miten phat ngawl nak tuah bawl in pakhat no hei thei ma hi. Cihnak a nei tuten thei haw tuk hi.
\v 11 Nisial biakpiak nak bawl mi vawkin siatsuah thei a nawngkai mi thu a hen cengten, ni thawngkhat le zanih le sawmkuah (1,290) ngei tuk hi.
\v 12 Ni thawngkhat le zathum le sawmthum le panga 1,335) a kim tian ngak in a hen tian thupha um hi.
\v 13 Nang cu a dawl tawp laih ngawl tian hawh in. Daihnak tuah um tuk ci. Ni le huncan a bo cengten, a ma hihnak co in heng tuk hitin, ti hi.