ilo_udb/25-LAM.usfm

\id LAM
\ide UTF-8
\h Un-unnoy
\toc1 Un-unnoy
\toc2 Un-unnoy
\toc3 lam
\mt Un-unnoy

\s5
\c 1
\p
\v 1 Nakaad-adu idi iti tattao iti Jerusalem, ngem ita ket naan-anayen a nabaybay-an. Maysa idi daytoy a nabileg a nasion, ngem agmaymaysa itan a kasla balo. Raraemen idi daytoy dagiti amin nga adda iti lubong a kasla iti panagraemda iti babai nga anak ti ari, ngem kasla maysa a tagabu itan.
\v 2 Dakami amin nga adda iti siudad ket rinabii nga agan-anug-og iti agpatpatnag, nga agar-arubos dagiti luami kadagiti pingpingmi. Saankami a nagtalek kenni Yahweh tapno tulongannakami, ken saannakami a natulongan dagiti bunggoy dagiti tattao a nagtalkanmi; awan kadagidiay a tattao ti mangliwliwa ita kadakami. Liniputannakami dagiti amin a bunggoy dagiti tattao a gagayyemmi; kabusormi ida amin itan.

\s5
\v 3 Dakami amin a tattao ti Juda ket nagbalin a nakurapay ken nagsagaba iti kasta unay; kaaduan kadagiti tattaomi ket nagbalin a tagabu kadagiti dadduma a lugar. Agnanaeddan ita kadagiti dadduma a lugar ket awan iti talnada. Tiniliwdakami amin dagiti kabusormi; awan a pulos iti pamuspusan tapno makalibaskami.

\s5
\v 4 Awan tattao kadagiti dalan a mapan iti Bantay Sion gapu ta awanen a pulos ti um-umay ditoy a mangrambak kadagiti nasagradoan a fiesta. Awanen a pulos dagiti panglakayen ken mangidadaulo nga agsasarita kadagiti ruangan ti siudad, ken agas-asug gapu iti ladingit dagiti padi ti Jerusalem. Agsangsangit dagiti babbalasang a nabati idiay Jerusalem gapu ta kasta unay ti panagsagsagabada.
\v 5 Dagiti kabusormi ti agturturay itan iti siudadmi, ket rumangrang-ayda. Dinusanakami ni Yahweh, dakami a tattao ti Jerusalem, gapu kadagiti amin a basbasol nga inaramidmi. Innala dagiti kabusormi dagiti amin nga annakmi ket impanda ida kadagiti dadduma a pagilian.

\s5
\v 6 Napintas idi a siudad ti Jerusalem, ngem ita ket saanen. Dagiti mangidadaulo iti siudadmi ket kasla kadagiti ugsa a mabisbisinan gapu ta saanda a makasapul iti ruot a kanenda. Agkakapsutda unay ken saanda a maitarayan dagiti kabusormi.

\s5
\v 7 Dakami a tattao ti Jerusalem ket malmalday ken awananen kadagiti balay a pagnaedan; panpanunotenmi dagiti nakaskasdaaw a banbanag a nangpunno idi iti siudadmi. Ngem sinakup itan dagiti kabusormi ti siudad, ket awan ti mangtulong kadakami. Dinadael dagiti kabusormi ti siudadmi ket nagkakatawada kabayatan nga ar-aramidenda daytoy.

\s5
\v 8 Dakami a tattao ti Jerusalem ket nagbasol iti kasta unay; nagbalin a kasla nisnis ti siudadmi. Um-umsien itan dagiti amin a nangraraem idi iti siudadmi; kaslada tattao a nanglabus iti maysa a babai sada linalais. Umas-asugkami itan iti siudad; kaslakami maysa a babai a lamo-lamo a mangab-abbung iti bagina babaen laeng kadagiti imana.
\v 9 Nagbalinen a kasla makarimon ti siudadmi gapu ta nagbasolkami iti kasta unay; saanmi a pinanunot no kasanonakaminto a dusaen ti Dios. Saanmi a pinanunot no kasanokaminto nga agsagaba; awan ti mangliwliwa kadakami. Umaw-awagkami amin iti Dios, "O Yahweh, kitaem ti panagsagsagabami gapu ta pinarmeknakami dagiti kabusormi!

\s5
\v 10 Innala dagiti kabusormi dagiti amin a napateg a gamengmi, dagiti amin a napateg a banbanag a kukuami. Nakitami dagiti soldado manipud kadagiti dadduma a nasion, O Yahweh, simrek dagiti tattao a saan nga agdaydayaw kenka iti nasagradoan a templomi, nga imbagam nga awan ti mapmapan a ganggannaet."

\s5
\v 11 Agas-asugkami iti siudad kabayatan nga agsapsapulkami iti taraon; intedmi dagiti kapapatgan a banbanag nga adda kadakami tapno makaalakami iti taraon a kanenmi tapno pumigsakami. Kunami, "O Yahweh, kitaennakami, kitaem ti panangum-umsi kadakami dagiti kabusormi!"
\v 12 Dakayo a tattao a lumablabas, kasla awan aniamanna kadakayo ti napasamak kadakami. Kumitakayo iti aglawlaw ket makitayo nga awan iti sabali a tattao nga agsagsagaba a kas iti panagsagsagabami. Pinagsagabanakami ni Yahweh gapu ta nakaro ti pungtotna kadakami.

\s5
\v 13 Kasla nangipatulod isuna iti apuy manipud langit a nanguram kadagiti tultulangmi; kasla nangikabil isuna iti silo a mangsilo kadagiti saksakami, ken nanglapped kadakami nga umadayo. Pinanawannakami; inaldaw nga agkakapuy ken agmaymaysakami; iti agmalmalem.
\v 14 Pinagbalinna a nadagsen nga awit a bagkatenmi dagiti basbasol nga inaramidmi; kasla inggalotna daytoy kadagiti tengngedmi. Napigsakami idi, ngem pinakapuynakami. Intulokna a tiliwendakami dagiti kabusormi, ket awan pulos iti mabaelanmi nga aramiden tapno mallappedan ida.

\s5
\v 15 Kimmita ti Apo kadagiti nabileg a soldadomi, kinatkatawaanna ida sana impurwak. Nangayab isuna iti nakaad-adu a soldado nga umay ket rumekenda dagiti napigsa nga agtutubo a soldadomi. Kasla impayatpayatnakami ti Apo, dakami a tattao ti Juda a kas kadagiti tattao a mangpayatpayat kadagiti ubas iti maysa nga abut tapno mapataud ti tubbogna.

\s5
\v 16 Agsangsangitkami gapu kadagidiay a banbanag; napno iti lulua dagiti matami. Awan ti mangliwliwa kadakami; adayo dagiti mabalin koma a mangpakired kadakami. Pinarmekdakami dagiti kabusormi, isu nga awan iti nasayaat a manamnama dagiti annakmi.
\v 17 Dakami a tattao ti Jerusalem, iyunnatmi dagiti imami tapno agpatulongkami, ngem awan ti mangliwliwa kadakami. Inkeddeng ni Yahweh ti maipapan kadakami a kaputotan ni Jacob, nga agbalin a kabusormi dagiti tattao kadagiti kabangibang a pagilian; isu nga imbilangda a nagbalin a makarimon kadakuada ti Jerusalem.

\s5
\v 18 Ngem maiparbeng ti inaramid ni Yahweh kadakami, gapu ta saankami a nagtulnog iti imbagana kadakami nga aramidenmi. Dakayo a tattao iti sadinoman, dumngegkayo kadakami; kitaenyo a kasta unay ti panagsagsagabami. Adu idi dagiti annakmi a lallaki ken babbai, ngem innala ida amin dagiti kabusormi ket impanda ida kadagiti adayo a luglugar.
\v 19 Nagpakaasikami kadagiti kakaduami, a nagtalkanmi a mangtulong kadakami, ngem nagkedkedda amin, kas kadagiti lallaki nga agkedked a mangtulong kadagiti balangkantis a kinaiddada. Natay dagiti padi ken mangidadaulo kadakami iti siudad kabayatan nga agsapsapulda iti taraon a kanenda tapno agbiagda.

\s5
\v 20 O Yahweh, makitkitam nga agsagsagabakami iti kasta unay. Kasla mapupuoran dagiti akin-uneg a paset dagiti bagimi. Malidlidayankami gapu ta nagsukirkami kenka. Patpatayen dagiti kabusormi dagiti tattao kadagiti kalsada babaen kadagiti kampilanda, iti pagtaengan ket kasla sheol a lubong dagiti natay.

\s5
\v 21 Nangngegdakami dagiti tattao kabayatan iti panagas-asugmi, ngem awan ti immay a mangliwliwa kadakami. Ammo dagiti amin a kabusormi ti napasamak kadakami; naragsakanda amin a nakangngeg iti daytoy. Pangngaasim ta aramidem iti mabiit ti inkarim nga aramiden, inton agsagaba dagiti kabusormi kas iti panagsagabami!
\v 22 O Yahweh, kitaem met kadi a dagiti amin a dakes nga inaramidda. Dusaem ida kas iti panangdusam kadakami gapu kadagiti amin a basol nga inaramidmi. Ibagbagami daytoy kenka gapu ta agsagsagaba ken agas-asugkami iti kasta unay, ken malidlidayankami.

\s5
\c 2
\p
\v 1 Nakaunget unay ni Yahweh kadakami; kasla inabbonganna ti Jerusalem iti napuskol nga ulep. Napintas idi daytoy a siudad, ngem dinadaelna daytoy. Iti tiempo a dinusana ti Israel, binaybay-anna pay ti templona idiay Jerusalem.
\v 2 Dinadael ti Apo dagiti pagtaengan dagiti tattao ti Juda; saan isuna a naasian. Gapu ta nakaunget unay isuna, rinebbana dagiti sarikedked ti Juda. Inaramidna ti pagarianmi a nakakaasi, ken inaramidna a saan a pulos a mararaem dagiti mangiturturay kadakami.

\s5
\v 3 Gapu ta nakaunget unay isuna, pulos a saannan a pinabileg ti Israel. Saannakami a tinulungan idi rinautdakami dagiti kabusormi. Dinadaelna ti Israel a kasla iti gumulgil-ayab nga apuy a mangdadael iti amin a banag.
\v 4 Nagsagana idi isuna a mangpapatay kadakami a tattaona, a kasla kabusornakami. Nagsagana isuna a mangpapatay kadagiti tattao nga ay-ayatenmi unay nga isu dagiti kameng dagiti bukodmi a pamilia. Nakaro ti ungetna kadakami a tattao ti Jerusalem; ti ungetna ket kasla apuy.

\s5
\v 5 Nagbalin ti Apo a kasla kabusormi nga Israelita; dinadaelnakami; dinadaelna dagiti palasiomi ken dagiti sarikedkedmi. Pinapatayna ti adu a tattao idiay Jerusalem, ken pinagladingit ken pinagsangitnakami gapu kadagiti napapatay.
\v 6 Inaramidna a nalaka a rinebba dagiti kabusormi ti templona a kasla daytoy ket maysa a kalapaw iti minuyongan. Inaramidna a dakami amin a tattaona ket malipatanmi dagiti nasagradoan a fiesta ken dagiti aldaw a Panaginana. Ginurana dagiti ari ken papadimi gapu ta nakaro ti ungetna kadakuada.

\s5
\v 7 Linaksid ni Yahweh ti mismo nga altar a nangidatonanmi kenkuana kadagiti ayup; binaybay-anna ti templona. Intulokna a rebbaen dagiti kabusormi dagiti pader ti templo ken dagiti palasiomi. Agpukkawda a sibaballigi iti uneg ti templo ni Yahweh, a kasla iti panagpukpukkawmi idi bayat kadagiti nasagradoan a fiestami.

\s5
\v 8 Inkeddeng ni Yahweh a rebbaen dagiti kabusormi ti pader ti siudadmi. Kasla rinukodna nga immuna dagiti pader kalpasanna ket dinadaelna a naan-anay dagitoy. Kasla pinagdung-awna dagiti tore ken pader gapu ta nadadaelen dagitoy.
\v 9 Narpuog dagiti ruangan ti siudad; tinukkol ti kabusor dagiti balunet a nangirekep kadagiti ruangan. Napagtalaw ti ari ken dagiti opisialna kadagiti dadduma a pagilian nga awan ti mangisursuro kadagiti linteg nga inted ti Dios kenni Moises. Saanen a makaaw-awat dagiti profeta kadagiti sirmata gapu ta awanen ti it-ited ni Yahweh kadakuada.

\s5
\v 10 Agtutugaw iti daga dagiti lallakay ti Jerusalem ken saanda ng agsasao. Malidlidayanda unay ta agkawesda pay iti nakirsang a lupot ken warakiwakanda iti tapuk dagiti uloda. Silaladingit nga agpakleb iti daga dagiti babbalasitang ti Jerusalem.

\s5
\v 11 Nabannog unayen dagiti matak gapu kadagiti luak; kasta unay ti ladingit ti kaunggak. Gapu ta adu unay kadagiti tattaok ti natay, agladladingit ti kaunggak ken agkakapsutak. Uray dagiti ubbing ken maladaga ket mataltalimudaw ken matmatay kadagiti kalsada gapu ta awan iti taraonda.
\v 12 Iyasugda kadagiti innada, "Masapulmi ti makan ken mainom!" Matumbada kadagiti kalsada ti siudad a kasla nasugatan a tattao. In-inutda a matay iti takiag dagiti innada.

\s5
\v 13 Dakayo a tattao ti Jerusalem, awan ti maibagak tapno matulungankayo. Awan pay tattao a nagsagaba a kas iti panagsagsagabayo; saanko nga ammo no ania ti mabalinko nga aramiden tapno maliwliwakayo. Adayo ti nakatnaganyo a kasla limnedkayo iti taaw; awan ti siasinoman a makaisubli iti sigud idi a langa ti siudadyo.
\v 14 Kunkuna idi dagiti profeta nga adda kadakayo a nakakitada kadagiti sirmata a naggapu kenni Yahweh, ngem inuulbod ken awan serserbina dagiti imbagbagada. Saanda a nagtrabaho tapno isalakandakayo manipud kadagiti kabusoryo; saanda nga imbaga kadakayo a nagbasolkayo. Ngem ketdi, impakaammoda kadakayo dagiti banbanag a kinunada nga imbaga ni Yahweh kadakuada; sinulisogdakayo tapno patienyo ida, ket isu met ti inaramidyo.

\s5
\v 15 Pagang-angawandakayo dagiti manglablabas kadakayo babaen iti panangipalakpakda kadagiti imada; agwingiwingda ken agsakuntipda kadakayo; kunaenda, "Daytoy kadi ti nabileg a siudad ti Jerusalem? Daytoy kadi ti siudad nga imbaga dagiti tattao a kapipintasan a siudad iti lubong, ti siudad a mangparparag-o kadagiti amin a tattao iti rabaw ti daga?"
\v 16 Katkatawaandakayo itan dagiti kabusoryo; kagurguradakayo unay ken agsakuntip ken pagngaretngetenda dagiti ngipenda kadakayo. Kunaenda, "Dinadaelmi ti Israel! Daytoy ti kinalkalikagumanmi, ket napasamaken!"

\s5
\v 17 Inaramid ni Yahweh ti plinanona; nabayag a panawen ti napalabas, impangtana a dadaelennakayo, ket ita inaramidnan. Dinadaelna ti siudadyo a saannakayo a kinaasian; isuna ti namagbalin nga agragsak dagiti kabusoryo maipanggep iti panangparmekda kadakayo; isuna ti namagbalin a pumigpigpigsa a pumigpigsa dagiti kabusoryo.

\s5
\v 18 Makasao koma dagiti pader ti siudad a kasla kadagiti tattao nga umaw-awag kenni Yahweh! Ibagak kadagiti pader, "Umawagkayo iti tulong kenni Yahweh! Pagarubusenyo dagiti luayo iti aldaw ken rabii! Pagayusenyo dagitoy a kas kadagiti karayan. Saankayo nga agsardeng nga agladladingit; saankayo nga agsardeng nga agsangsangit."
\v 19 Rinabii a bumangonkayo ket umawagkayo; ibagayo kenni Yahweh ti marikriknayo iti kaungganyo. Itag-ayyo dagiti imayo nga agpakaasi kenkuana a maasi isuna tapno malappedan a matay dagiti annaktayo; mataltalimudawda kadagiti suli ti kalsada gapu ta awananda iti taraon a kanenda.

\s5
\v 20 O Yahweh, kitaem dagiti tattaom ket kaasiannakami. Pinagsagabam kadin idi dagiti tattaom a kas iti daytoy? Pudno a saan a maiparbeng a kanen dagiti inna ti lasag dagiti bukodda nga annak, dagiti annak a kankanayonda nga inay-aywanan. Saan a maiparbeng a patpatayen dagiti kabusormi dagiti padi ken profeta iti bukodmo a templo!

\s5
\v 21 Dagiti bangkay dagiti amin a tattao iti amin a tawen ket naiwalang kadagiti kalsada; adda pay dagiti bangkay dagiti babbaro ken babbalasitang a pinatay dagiti kabusormi babaen kadagiti kampilanda. Gapu ta nakaungetka unay, pinapataymo ida; pinapataymo ida a saanka a pulos a naasian kadakuada.
\v 22 Inayabam dagiti kabusormi tapno rautendakami iti amin a suli ti daga, a kasla inayabam ida nga umay iti maysa a padaya. Iti dayta a tiempo, impakitam a nakaungetka unay, ket awan uray maysa a nakalibas. Pinapatay dagiti kabusormi dagiti ubbing nga annakmi nga inay-aywanan ken pinadpadakkelmi.

\s5
\c 3
\p
\v 1 Siak, a mangisursurat iti daytoy ket maysa a tao a pinagsagaba ni Yahweh, gapu ta nakapungtot isuna.
\v 2 Kasla pinapagnanak iti nasipnget unay a lugar nga awan a pulos ti silawna.
\v 3 Namin-adunak a dinusa, adu a daras iti inaldaw.
\v 4 Pinagkuretretna ti kudil ken lasagko. Tinuktukkolna dagiti tultulangko.

\s5
\v 5 Pinalawlawannak kadagiti banbanag a mangpasagaba kaniak iti kasta unay a kinasaem.
\v 6 Arigna nga intanemnak iti nasipnget a disso a kas kadagidi natayen iti nabayagen a panawen.
\v 7 Kasla nangbangon isuna iti pader ti pagbaludan iti aglawlawko, ken kasla la nga kinawarannak iti nadadagsen a kawar tapno saanak a makalibas.
\v 8 Uray no pumanukkawak nga agpaarayat kenkuana, saannak latta nga ikaskaso.

\s5
\v 9 Arigna a sinerraanna ti dalanko iti nangato a pader a naaramid iti batbato ken kasla la pinagsawarnak a mangsapul iti mabalinko a pagruaran.
\v 10 Pinadpadaanannak tapno darupennak a kas iti oso wenno leon a mangpadpadaan iti darupenda a tao.
\v 11 Kaslanak la imparangguyod ti maysa nga oso sanak dinangran, ket kalpasanna, pinanawannak.

\s5
\v 12 Arigna nga inbiatna ti baina sana impaturong kaniak.
\v 13 Kasla impuntana ti panana iti kaunggan ti bagik.
\v 14 Katkatawaandak dagiti amin a kakabagiak; inaldaw nga agkankantada kadagiti kankanta a mangsursuron kaniak.
\v 15 Pinagsagabanak ni Yahweh iti kasta unay, kas iti maysa a tao nga agsagsagaba kalpasan ti pananginumna iti nakapapait a mainum.

\s5
\v 16 Arigna a pinagngalngalnak iti batbato a nakaigapuan ti pannakapusi dagiti ngipenko; kasla indumudomnak iti daga.
\v 17 Awanen ti nasasayaat a banbanag kaniak; saankon a malagip ti kinarang-ay.
\v 18 Intultuloyko nga ibagbaga iti bagik, "Saanak unay a napigsa a mangibtur iti ania pay a rigrigat. Saankon a namnamaen nga ispalennak ni Yahweh."

\s5
\v 19 Tunggal malaglagipko no kasano ti panagsagsagabak ken panagalla-allak iti adayo manipud iti pagtaengak, kaiyariganna iti panaginum iti napait a mainum.
\v 20 Diakto malipatan daytoy a kanito a marigrigatanak.
\v 21 Nupay kasta, namnamaek nga agaramid manen ni Yahweh kaniak iti naimbag, ken lagipek daytoy:

\s5
\v 22 Saan nga agsarsardeng ni Yahweh a mangay-ayat kadatayo iti sipupudno, isu a saantayo a naan-anay a natay. Saan isuna nga agsarsardeng nga agar-aramid iti naimbag kadatayo.
\v 23 Binigat nga ipakpakitana ti asina kadatayo. Isuna ti mabalintayo a pagtalkan a kanayon.
\v 24 Isu a sipupudno a kunak iti bagik,"Ipapaay kaniak ni Yahweh dagiti kasapulak; sinanama nga urayek nga agaramid isuna kadagiti nasasayaat a banbanag para kaniak."

\s5
\v 25 Naimbag ni Yahweh kadagiti amin nga agtalek kenkuana, kadagiti agkiddaw kenkuana a tulonganna ida.
\v 26 Isu a nasayaat a siuulimek nga urayentayo ni Yahweh a mangisalakan kadatayo.
\v 27 Ken nasayaat a siaanustayo nga agsagaba kabayatan nga agtutubotayo pay laeng.
\v 28 Dagiti agpatulong kenkuana ket rumbeng nga agtugawda ket saanda nga agriri, gapu ta ammoda a ni Yahweh ti nangipalubos nga agsagabada.
\v 29 Rumbeng nga agpaklebda iti katapukan, a nakadekket ti rupada iti daga, gapu ta mabalinda latta ti mangnamnama a tulongan ida ni Yahweh.

\s5
\v 30 No adda mangtungpa iti bangir a pingpingtayo, ipatungpatayo pay koma ti maysa a bangirna iti dayta a tao, ken awatentayo dagiti pananglais dagiti dadduma a tattao kadatayo.
\v 31 Saan nga agnanayon a baybay-annatayo ni Yahweh, datayo a tattaona.
\v 32 No maminsan ket pagsagabaennatayo, ngem agar-aramid met iti agkakaimbag kadatayo gapu ta agtultuloy nga ay-ayatennatayo iti napudno.
\v 33 Ken saanna a pakaragsakan ti mangpaspasagaba wenno mangpalpaliday kadagiti tattaona.

\s5
\v 34 No adda mangidaddadanes kadagiti amin a balud,
\v 35 wenno no sukirenda ti Dios babaen iti saanda a panangaramid iti nalinteg kadagiti padada a tao,
\v 36 wenno no isuda ti makagapu a saan a nalinteg ti panangikeddeng dagiti ukom, sigurado a makitkita amin ti Dios dayta.

\s5
\v 37 Awan ti makabael a mangpaadda iti aniaman a banag malaksid no inkeddengen ni Yahweh a mapasamak dayta.
\v 38 Ti Dios iti langit ti mangpapaadda kadagiti didigra, ken isuna ti mangpapaadda kadagiti agkakaimbag a paspasamak.
\v 39 Isu a saan a rumbeng nga agreklamotayo, datayo a tattao ditoy daga, tunggal dusaennatayo kadagiti basbasol nga inar-aramidtayo.

\s5
\v 40 Ngem ketdi, rumbeng a lagipentayo a naimbag dagiti tigtignaytayo; rumbeng nga agsublitayo kenni Yahweh.
\v 41 Rumbeng nga agkararagtayo a sipupudno ken itag-aytayo dagiti imatayo iti Dios sadi langit, ket kunaentayo,
\v 42 "Nagbasolkami ken nagsukirkami kenka, ket saannakami a pinakawan.
\v 43 Nakaungetka unay ket kinamkamatnakami. Ken awan asi a pinapataynakami.

\s5
\v 44 Naglemmengka, a kasla addaka iti ulep, tapno saannakami a mangngeg tunggal agkararagkami.
\v 45 Pinagnaednakami iti ayan dagiti ganggannaet, ket kaslakami la basura iti panagkunada.
\v 46 Inin-insultodakami dagiti kabusormi.
\v 47 Kankanayonkami a mabutbuteng a palab-ogandakami dagiti tattao, gapu ta adun ti linaklak-ammi a pannakadidigra ken pannakadadael.

\s5
\v 48 Adu a lua ti agarubos kadagiti matak gapu ta nadadaelen dagiti tattaok.
\v 49 Agtultuloy nga agar-arubos dagiti luluak, saan nga agsardeng dagitoy
\v 50 agingga a tuman-aw ni Yahweh manipud langit ket kitaennakami.

\s5
\v 51 Maladladingitannak unay gapu iti napasamak kadagiti babbai iti siudadko.
\v 52 Inan-anupdak dagiti kabusorko a kaslada la tay tattao a mangan-anup iti billit uray no awan rason nga aramidenda dayta.
\v 53 Impurruakdak iti maysa nga abut tapno mapataydak, sada pinandagan iti dakkel a bato.
\v 54 Lipusennakon ti danum iti abut, ket kinunak iti bagik, "Matayakon!"

\s5
\v 55 Ngem manipud iti uneg ti abut ket immawagak kenka, "O Yahweh, tulongannak koma!"
\v 56 Impakpakaasik kenka, "Denggennak koma no umawagak kenka!"
\v 57 Ket sinungbatannak ket kinunam, "Dika agbuteng!"

\s5
\v 58 O Yahweh, inkalintegannak idi kayatdak nga ukomen ken patayen dagiti tattao; saanmo nga impalubos a matayak.
\v 59 Ita, O Yahweh, nakitam dagiti agkakadakes nga inaramid kaniak dagiti kabusorko, ukomem ngarud ti kasok ket ipakitam nga awan biddut nga inaramidko.
\v 60 Ammom dagiti agkakadakes a pangpanggependa nga aramiden kaniak.
\v 61 O Yahweh, nangngegmo nga in-insultoendak, nangngegmo dagiti pangpanggependa nga aramiden kaniak.

\s5
\v 62 Inaldaw nga agiyar-arasaas ken agibagbagada kadagiti banbanag maipanggep kaniak. Agmalmalem nga ar-aramidenda dayta.
\v 63 Kitaem kadi ida! Iti daytoy a mismo a kanito ket pagang-angawandak babaen kadagiti ikankantada.

\s5
\v 64 O Yahweh, pagsagabaem koma ida kas supapak ti panangpasagabada kaniak!
\v 65 Ilunodmo ida ken pagbutngem ida kenka iti kasta unay.
\v 66 Gapu ta kaungetmo ida, darupem ida ket patayem ida, agingga nga awan mabati kadakuada iti rabaw ti daga.

\s5
\c 4
\p
\v 1 Maiyarig idi iti puro a balitok dagiti tattaotayo, ngem itan ket awanen ti serserbida. Kas iti panangiwarawara dagiti kabusortayo kadagiti nasagradoan a batbato iti templo, kasta met ti panangiwara-warada kadagiti lallaki nga agtutubotayo.
\v 2 Kas kapateg idi ti adu a balitok ti kapateg dagiti lallaki nga agtutubotayo, ngem ti panagkitkita itan kadakuada dagiti tattao ket awan serserbida a kas iti kadawyan laengen a banga.

\s5
\v 3 Uray dagiti kabaian nga atap nga aso ket pasusoenda dagiti ukenda, ngem rangranggasan dagiti tattaok dagiti mismo nga annakda; dagiti innada ket kas kadagiti abestrus iti disierto a panpanawanda dagiti itlogda.

\s5
\v 4 Dagiti dila dagiti maladaga nga annak dagiti tattaok ket dumdumket kadagiti ngangawda gapu iti kasta unay a pannakawawda; dumawdawat dagiti ubbing iti taraon, ngem awan mangted kadakuada.
\v 5 Dagiti tattao a sigud a mangmangan iti agkakaimas a taraon ket mabisbisinanen kadagiti kalkalsada; dagiti sigud a napapateg a tattao a nakakawes iti agkapipintas a kawes ket agkalkalkal itan iti basuraan tapno adda kanenda.

\s5
\v 6 Natay a dagus dagiti tattao iti Sodoma gapu iti didigra, ken awan ti uray maysa a mangispal kadakuada; ngem dinusa ti Dios dagiti tattaok iti nalablabes ngem iti panangdusana idi iti Sodoma.

\s5
\v 7 Nasayaat idi a kitkitaen dagiti mgangidadaulo kadakami, napudpudaw ken nasilsilengda ngem iti niebe ken gatas; nalablabaga dagiti bagbagida ngem iti nalabaga a bato nga alahas; napigpigsada ken nasalsalun-atda idi.
\v 8 Ngem nangisngisiten ita dagiti rupada ngem iti uging, awan makabigbig kadakuada kadagiti kalkalsada. Kimpet dagiti kudilda kadagiti tultulangda, nagangodan a kas iti ruting.

\s5
\v 9 Nasaysayaat ti matay iti paggugubatan ngem ti matay iti bisin. Awan taraon a maapit kadagiti kataltalonan, isu nga in-inut a nagbisin dagiti tattao agingga a natayda.
\v 10 Dagiti babbai a sigud a nagiimbag ket pinapataydan dagiti annakda sada inluto; kinnanda dagitoy idi awanen ti taraonda, idi pinalawlawan dagiti soldado a kabusorda ti Jerusalem.

\s5
\v 11 Impakita ni Yahweh a nakapungtot unay isuna; a kasla nangpasged isuna idiay Jerusalem nga isu ti nanguram iti amin agingga a dimmapu dagitoy.

\s5
\v 12 Awan kadagiti ari iti daga wenno sisianoman ti namati a makastrek dagiti kabusormi kadagiti ruangan ti Jerusalem.
\v 13 Ngem kasta ti napasamak gapu ta nagbasol dagiti profeta; gapu ta nagbasol met dagiti papadi babaen iti panangitulokda a mapapatay dagiti inosente a tattao.

\s5
\v 14 Agalla-alla dagiti profeta ken papadi kadagiti kalkalsada a kasla da la tay bulsek. Awan ti makaitured a mangsagid kadakuada gapu ta dagiti kawesda ket namantsaan iti dara dagiti inosente a tattao.
\v 15 Ipukpukkaw dagiti propeta ken papadi ti, "Adaywandakami! Saandakami a sagsagiden!" Isu a pimmanaw idiay Israel dagiti profeta ken papadi, ket nagkatangkatangda kadagiti pagilian, ngem kunkuna latta kadakuada dagiti tattao kadagita a pagilian a, "Saan a mabalin nga agiankayo ditoy!"

\s5
\v 16 Ni Yahweh a mismo ti nangiwarawara kadakuada; saanna idan a kailalaan. Saanen a paspasangbayen dagiti tattao dagiti papadimi, ken saandan a kailalaan dagiti panglakayen.

\s5
\v 17 Mangbirbirokkami latta iti mangtulong kadakami sakbay a maladaw ti amin, ngem awan latta ti mabirukanmi. Kinitkitami latta no adda kadagiti kaalyadomi ti mangisalakan kadakami, ngem awan pulos makitami kadagiti pagilian nga ur-urayenmi ti naayat a tumulong kadakami.
\v 18 Kamkamatendakami dagiti kabusormi, isu a saankami pay a makapagna kadagiti kalsadami ta amangan no tiliwendakami. Umadanin ti panangtiliw kadakami dagiti kabusormi, panawenen a papatayendakami.

\s5
\v 19 Dagiti mangkamkamat kadakami ket naparpartakda pay ngem iti panagtayab dagiti agila iti tangatang. Uray no agkamangkami kadagiti banbantay wenno aglemmengkami iti disierto, immun-unadan sadiay ket padpadaanandakamin.
\v 20 Ti arimi a dinutokan ni Yahweh, ti ari a nangted iti kabaelanmi nga agbiag, ti ari a nagtalkanmi a mangsalaknib kadakami idi masapul nga agnaedkami kadagiti dadduma a pagilian kas tagabu - ket tiniliwen dagiti kabusor, kas iti panangtiliwmo iti maysa nga ayup babaen iti palab-og.

\s5
\v 21 Dakayo a tattao iti Edom ken Us, agragsakkayo latta agingga a mabalinyo ti agragsak, ngem dusaennakayonto met ni Yahweh. Mabartekkayonto nga urayyo la ussoben dagiti kawesyo.
\v 22 Dakayo a tattao iti Jerusalem, agpatingganto ti tiempo a panangdusdusa ni Yahweh kadakayo; saanna nga ipalubos a kankanayonkayo lattan a nakabalud. Ngem dakayo a tattao iti Edom, dusaennakayonto ni Yahweh; ibutaktaknanto dagiti agkakadakes nga inar-aramidyo.

\s5
\c 5
\p
\v 1 O Yahweh, lagipem koma dagiti napaspasamak kadakami. Kitaem koma ti saanmin a pannakararaem.
\v 2 Sinamsam dagiti ganggannaet dagiti sanikuami, ken agnanaeddan ita kadagiti pagtaenganmi.
\v 3 Pinatayen dagiti kabusormi dagiti ammami, ket pinagbalindan a balo dagiti innami.
\v 4 Itan ket pagbaybayadendakami kadagiti danum nga inumenmi, ken kadagiti kayo a pagsungsungrodmi.

\s5
\v 5 Kamkamatendakami dagiti kabusormi ket asidegdan kadakami; nabanbannogkamin, ngem saandakami a paginanaen.
\v 6 Tapno laeng adda kanenmi tapno agpaut pay ti biagmi, nagpakpakaasikami idiay Egipto ken Asiria a tulongandakami.
\v 7 Nagbasol dagiti kapuonanmi, ket nataydan, ngem dakami ti madusdusa gapu kadagiti basol nga inar-aramidda.

\s5
\v 8 Ita, dagiti tattao a nangiturturay kadakami ket tagabun kadagiti bukodda nga amo idiay Babilonia. Awanen ti siasinoman a makaispal kadakami manipud iti panangiturayda.
\v 9 Adayon ti nadandanunmi iti panagbirbirokmi iti taraon, ngem agpeggad ti biagmi tunggal aramidenmi dayta, gapu kadagiti agtatakaw nga agigian iti let-ang.
\v 10 Pumudot dagiti kudilmi a kas iti kapudot ti pogon, ken uraykami la aggurigor gapu iti nakaro a bisinmi.

\s5
\v 11 Ginunggundawayan dagiti kabusormi dagiti babbai idiay Jerusalem, ken inaramidda dayta kadagiti babbalasang kadagiti amin nga ili ti Juda.
\v 12 Binitay dagiti kabusormi dagiti papangulomi, ken saandan a rinaem dagiti panglakayenmi.

\s5
\v 13 Pinilitda dagiti babbaromi nga agtrabaho iti paggilingan iti arina, ken uray la maiparparusisi dagiti lallaki nga agtutubomi kabayatan ti pannakapilitda nga agbaklay kadagiti nadadagsen a kaykayo a pagsungrod.
\v 14 Saanen nga agtugtugaw dagiti panglakayenmi kadagiti ruangan ti siudad tapno mangngeddeng kadagiti agkakapateg a banbanag, saan metten nga agtuktukar dagiti lallaki nga agtutubomi.

\s5
\v 15 Saankamin a naragsak; imbes nga agrag-okami ket agdung-awkami ketdi.
\v 16 Ti korona a naaramid iti sabsabong ket natinnagen manipud kadagiti ulomi. Nakaal-alinggaget dagiti napaspasamak kadakami gapu kadagiti basbasol nga inar-aramidmi.

\s5
\v 17 Nabanbannogkamin ken naupaykamin, ken saankamin a makakita a nasayaat gapu iti lua nga agarubos manipud kadagiti matami.
\v 18 Awanen a pulos ti agnanaed idiay Jerusalem, ket agdakdakiwasen dagiti atap nga aso iti aglawlawna.

\s5
\v 19 Ngem, O Yahweh, agturayka iti agnanayon! Agturturayka a kanayon iti tunggal henerasion.
\v 20 Isu nga apay a linipatnakami? Agnanayon kadi a baybay-annakami?
\v 21 Pangngaasim ta pagsubliennakami kenka, ken parang-ayennakami a kas iti inaramidmi iti kallabes.
\v 22 Pangngaasim ta aramidem dayta, wenno, pudno kadi a laksidennakamin iti agnanayon? Pudno kadi a kapungtotnakamin iti agnanayon?