ilo_udb/17-EST.usfm

\id EST
\ide UTF-8
\h Ester
\toc1 Ester
\toc2 Ester
\toc3 est
\mt Ester

\s5
\c 1
\p
\v 1 Inturayan ni Ari Ahasuero ti dakkel unay nga emperio nga addaan iti 127 a probinsia. Dimmanun daytoy ti India agingga iti laud ti Etopia.
\v 2 Inturayanna ti emperio kabayatan nga agnanaed isuna iti kabibilegan a paset ti siudad ti Susa.

\s5
\v 3 Kabayatan ti maikatlo a tawen kalpasan a nagbalin isuna nga ari, inawisna dagiti amin nga agturturay ken dadduma nga opisialna iti maysa a padaya. Inawisna a dumar-ay iti padaya dagiti armada ti Persia ken Media. Inawisna met dagiti gobernador ken dagiti dadduma a mangidadaulo kadagiti probinsia.
\v 4 Nagpaut ti ramrambak iti las-ud iti 180 nga aldaw. Iti dayta a tiempo impakita ti ari kadagiti sangaili ti amin a kinabaknangna ken dagiti dadduma a banbanag a namagbalin iti pagarianna a nabileg.

\s5
\v 5 Iti panagleppas ti padaya, inawis ti ari dagiti tattao iti sabali a parambak. Inawisna iti padaya amin a tattao nga agtrabtrabaho iti palasio, pakairamanan dagiti tattao nga agar-aramid kadagiti napapateg a trabaho ken kadagidiay agar-aramid kadagiti saan unay a napateg a trabaho. Nagpaot daytoy a parambak iti las-ud iti pito nga aldaw. Naangay daytoy idiay paraangan a paset ti minuyungan ti palasio.
\v 6 Ti minuyungan ti paraangan ket naarkusan iti kurtina a puraw a lupot ken lila, nga addaan iti nalammuyot a tali a lino ken lila, a nakabitin kadagiti singsing a pirak a nakasab-it kadagiti adigi a marmol. Adda dagiti pagtugawan a balitok ken pirak a naurnos idiay nabaldusaan a pagbaddekan a naaramid manipud iti porfery, marmol, balay ti perlas, ken adda marisna a batbato.

\s5
\v 7 Imminum dagiti sangaili manipud kadagiti balitok a kopa. Tunggal kopa ket addaan ti naduma-duma a naiyarkus iti daytoy. Manangited ti ari iti arak, ket addaanda iti adu a mainum.
\v 8 Adda ti adu nga arak, gapu ta kayat ti ari nga uminum dagiti sangaili agingga a kayatda, ngem ti paglintegan ket, "Awan ti siasinoman a mapilit nga uminom."

\s5
\v 9 Inawis ni Reyna Vasti dagiti babbai iti padaya a naangay iti sabali a paset iti palasio.
\v 10 Iti maikapito nga aldaw dagidiay a padaya, idin a saan unay a nabartek ni Ari Ahasuero iti panaginumna iti arak, kinasaona da Mehuman, Bizta, Harbona, Bigta, Abagta, Zetar, ken Carcas (dagitoy dagiti pito nga adipen a mangipapaay kadagiti kasapulan ken tarigagayna).
\v 11 Imbagana kadakuada nga iyegda kenkuana ni Reyna Vasti, a nakakorona. Kayatna a makita dagiti sangailina no kasano kapintas ti reyna.

\s5
\v 12 Ngem nagkedked ni Reyna Vasti a mapan iti ari. Nagkedked isuna nga agtulnog iti bilin ti ari nga imbaga kenkuana dagiti adipen. Nakapungtot unay ti ari gapu iti daytoy.

\s5
\v 13 Kinatungtong ngarud ti ari dagiti mabigbigbig a mamasirib, a makaawat kadagiti banbanag a mapaspasamak kadagiti biagda ken kadagiti linteg maipanggep kadagitoy a banag.
\v 14 Ita dagiti nasinged kenkuana ket da Carsena, Setar, Admata, Tarsis, Meres, Marsena, ken Memucan, pito a prinsipe iti Persia ken Media. Iggemda dagiti kangangatoan nga akem iti pagarianna, ken dengdenggen ida ti ari no agsaoda.
\v 15 Kinuna ti ari kadakuada, "Nagkedked nga agtulnog ni Reyna Vasti kaniak idi imbaonko dagiti adipenko a mangibaga kenkuana nga umay isuna ditoy. Ania ti ibagbaga ti lintegtayo a rumbeng a maaramid iti siasinoman a mangaramid iti kas iti daytoy?"

\s5
\v 16 Kabayatan nga adda dagiti dadduma nga opisial, kinuna ni Memucan iti ari, "Natan-ok nga ari, pinabainannaka ni Reyna Vasti, ken pinabainanna dagiti amin nga opisial ken amin a tattao kadagiti amin a probinsiam, Natan-ok nga ari.
\v 17 Mangngegto dagiti amin a babbai iti entero nga emperio no ania ti inaramidna, ket kunaendanto, 'Binilin ti ari ni Reyna Vasti a mapan kenkuana, ket nagkedked isuna.' Isu a saandanto a suroten dagiti assawada, ken ipakitadanto ti saanda a panangraem kadakuada.
\v 18 Sakbay nga agleppas daytoy nga aldaw, maamoanto amin dagiti assawa dagiti opisial iti Persia ken Media no ania ti inaramid ti reyna, ket ibagadanto ti imbaga ti reyna kadagiti amin nga opisialmo, Natan-ok nga ari. Kagura ken kaungetdanto dagiti amin a lallaki.

\s5
\v 19 Isu a no makaay-ayo daytoy kenka Natan-ok nga ari, rumbeng a mangisuratka iti linteg, kas kadagiti amin a linteg iti Persia ken Media, nga agbalin a linteg nga awan ti siasinoman a mabalin a mangbaliw. Ibaga daytoy a linteg a saanen a pulos a mapalubusan ni Reyna Vasti a mangkita manen kenka, ken mangpilikanto iti sabali a babai nga agbalin a reyna, maysa a babai a maikari nga agbalin a reyna nga ad-adda a maikari ngem isuna.
\v 20 Inton maamoan iti tumunggal maysa iti emperiom ti imbilinmo, amin dagiti assawa a babbai, dagidiay a napapateg ken saan a napapateg, ket raemendanto dagiti assawada."

\s5
\v 21 Nagustoan ti ari ken dagiti dadduma nga opisial ti insingasing ni Memucan, ket inaramid ti ari daytoy.
\v 22 Ket nangipatulod isuna iti surat kadagiti amin a probinsia, a mangibagbaga nga amin a lallaki ket rumbeng a maaddaan iti naan-anay a turay kadagiti assawa ken annakda. Insuratna dagiti surat kadagiti amin a pagsasao ken insuratna daytoy iti amin a naidumduma nga alphabeto a naisurat iti amin a probinsia.

\s5
\c 2
\p
\v 1 Kalpasan iti sumagmamano a panawen, idi bimmaawen ti unget ni Ari Ahasuero, nalagipna ni Vasti. Napanunotna pay ti linteg nga inaramidna gapu iti naaramid ni Vasti.
\v 2 Isu nga imbaga ti adipenna kenkuana, "Natan-ok nga Ari, masapul a mangibaonka kadagiti lallaki a mangbirok kadagiti napipintas a birhen a babbalasang para iti ari.

\s5
\v 3 Kalpasan a makabirokda, mabalinmo ti mangdutok kadagiti opisial iti tunggal probinsia a mangiyeg kadakuada iti lugar a pagnanaedan dagiti assawam ditoy Susa. Maaywananda babaen kenni Hegai (ti eunoko ti ari) nga isu ti mangsalsaknib ken mangay-aywan kadagitoy a babbai, kabaelanna nga asikaswen dagiti pagpapintasda.
\v 4 Ket ti balasang a makaay-ayo unay kenka ti agbalin a reyna iti saad ni Vasti." Nagustuan ti ari ti insingasingda, isu nga inaramidna daytoy.

\s5
\v 5 Iti dayta a tiempo adda Judio a managan Mardokeo nga agnanaed iti siudad ti Susa. Isuna ti putot a lalaki ni Jair a putot a lalaki ni Simei, a putot a lalaki ni Kis, ket kameng isuna iti tribu ti Benjamin.
\v 6 Adu a tawtawen sakbay dayta, ni Nebucadnesar nga ari iti Babilonia, ket innalana ni Mardokeo manipud Jerusalem ken impanna isuna idiay Babilonia. Dayta met laeng ti tiempo nga inkuyogna ni Ari Jehoiakin ken dadduma pay manipud idiay Juda.

\s5
\v 7 Ay-aywanan ni Mardokeo ti kasinsinna, a ti naganna iti Hebreo ket Hadassa. Addaan isuna iti napintas a rupa ken makaay-ayo a langa ken naawagan isuna iti Ester. Kalpasan a natay ti ama ken inana, inaywanan isuna ni Mardokeo a kasla bukodna a putot a babai.

\s5
\v 8 Kalpasan nga imbilin ti ari nga agbirokda kadagiti napipintas a babbai, impan dagiti adipen idiay Susa iti palasio ti ari da Ester ken dagiti adu pay a babbalasang, ket impaaywanda isuda kenni Hegai.
\v 9 Naay-ayo ni Hegai kenni Ester. Dagus nga impaayna kenkuana dagiti pagpapintas a kayatna, ken insaganana ti naisangsangayan a taraon a maited kenkuana. Nangdutok isuna kadagiti adipen a babbai manipud iti palasio ti ari ken insaganana dagiti kasasayatan a siled a pagyananna a paset ti palasio para kadagiti babbai.

\s5
\v 10 Awan nangibagbagaan ni Ester nga isuna ket Judio, wenno aniaman a banag a maipanggep kadagiti kakabagianna, gapu ta imbaga ni Mardokeo kenkuana a saanna nga ibagbaga iti siasinoman.
\v 11 Inaldaw nga agpagna-pagna ni Mardokeo ti paraangan a pagnanaedan dagiti babbalasang. Agtakder isuna iti paraangan a mangnamnama a maammoanna no ania iti mapaspasamak kenni Ester.

\s5
\v 12 Sakbay a maiyeg dagitoy a babbai iti ayan ti ari, iti sangapulo ket dua a bulan ti pannakapapintasda, ken innem a bulan a masapsapuanda iti lana ti olibo a nalaukan iti mira.
\v 13 Inton maysa kadagitoy a babbalasang ket mapaayaban a mapan iti ayan ti ari, mapalubosan isuna a mangala iti aniaman a kalikagumanna nga itugot manipud iti balay dagiti babbalasang, inton mapan isuna iti palasion ti ari.

\s5
\v 14 Iti rabii, mapan isuna iti ayan ti ari, ken iti kabigatanna ket agsublinto isuna iti maikadua a balay dagiti babbai, ken iti aywan ni Saasgaz, ti opisial ti ari a mangay-aywan kadagiti babbai ti ari. Saan a mabalin nga agsubli manen isuna iti ayan ti ari, malaksid no kayat ti ari isuna ken ayabanna ti naganna.

\s5
\v 15 Idi dimtengen ti batang ni Ester (ti putot ni Abihail, nga uliteg ni Mardokeo) a mapan iti ayan ti ari, saan isuna a dimmawat iti aniaman a banag nga itugotna manipud iti balay dagiti babbai, no di laeng ti insingasing ni Hegai, ti opisial ti ari a mangay-aywan kadagiti babbai. Naay-ayo ni Ester ti tunggal maysa a nakakita kenkuana.
\v 16 Naiyeg ni Ester kenni Ari Ahasuero idiay pagnanaedan iti maikasangapulo a bulan, (a bulan ti Tebet), iti maikapito a tawen ti panagturayna.

\s5
\v 17 Inayat ti ari ni Ester iti nalablabes ngem kadagiti dadduma a babbai nga inyegda kenkuana. Inkabilna ngarud iti ulo ni Ester ti korona ti reyna ken impakaammona a ni Ester ti agbalin a reyna imbes a ni Vasti.
\v 18 Kas panangrambak iti panagbalinna a reyna, nangangay ti ari iti dakkel a padaya kas panangpadayawna kenni Ester, nga insaganana para iti amin nga opisialna ken adipenna. Nangipaay met isuna iti tulong kadagiti amin a probinsia manipud kadagiti buis a naibayad ken nangited isuna kadagiti nangina a sagsagut kadagiti amin a tattao nga addaan iti kawadwadanna a ti ari laeng ti mabalin a makaited.

\s5
\v 19 Saan a nagbayag naguummong manen dagiti babbalasang. Iti dayta a tiempo nakatugaw ni Mardokeo iti ruangan ti ari, nga ayan ti pangukoman ken pagur-unusan dagiti panglakayen ken mangidadaulo, kadagiti riri iti pagarian.
\v 20 Ngem saan latta nga imbaga ni Ester iti siasinoman ti maipanggep iti pamiliana, wenno maipanggep kadagiti tattaona, dagiti Judio. Intultuloyna nga inaramid ti imbaga ni Mardokeo nga aramidenna; intultuloyna a renispeto ken rinaem ni Mardokeo babaen iti panang-aramidna no ania iti imbagana.
\v 21 Maysa nga aldaw idi adda ni Mardokeo iti ruangan ti ari, adda idiay ti dua kadagiti opisial ti ari. Dagiti naganda ket Bigtana ken Teres. Isuda dagiti bantay a mangsalsalaknib iti ari, isuda dagiti agtaktakder iti ruar kadagiti mismo a siled ti ari. Nakaungetda iti ari, ket pangpanggependa no kasanoda a dangran ti ari iti kasta unay.

\s5
\v 22 Ngem nangngeg ni Mardokeo ti pangpanggependa, ket imbagana kenni Reyna Ester. Ket imbaga ni Ester iti ari, ken imbagana iti ari, a ni Mardokeo iti naggappoan dayta a damag, inawaganna ti naganna.
\v 23 Sinukimat ti ari daytoy ket napasingkedan a pudno. Isu nga imbilin ti ari a mabitay dagidiay a dua a lallaki iti pagbitayan. Idi naaramid dayta, insurat ti opisial dayta a damag iti libro a naawagan Ti Pakasaritaan ti Ari.

\s5
\c 3
\p
\v 1 Kalpasan a napasamak dagitoy a banbanag, impangato ni Ari Ahasuero ti saad ni Haman, nga Agagita nga anak ni Hammedata, a kangangatoan kadagiti amin nga opisial ken impalawagna a ni Haman ti kangatoan kadagiti amin nga agserserbi kenkuana.
\v 2 Nagrukob dagiti amin nga opisial iti sangoanan ni Haman a kas panagraemda kenkuana, ken rinaemda unay isuna, kas imbilin ti ari a nasken nga aramidenda. Ngem nagkedked ni Mardokeo nga agrukob iti sangoanan ni Haman wenno mangipaay kenkuana iti dayta a kita ti panagraem.

\s5
\v 3 Nakita dagiti dadduma nga opisial dayta, ket sinaludsodda ni Mardokeo, "Apay a saanka nga agtulnog iti bilin ti ari?"
\v 4 Inaldaw a nakisasaoda kenkuana ngem saanna nga ar-aramiden ti imbagada, wenno sungsungbatan isuda. Impakaammoda ngarud kenni Haman tapno makitada no pabus-uyanna dagiti aramid ni Mardokeo, ta imbaga ni Mardokeo kadakuada a Judio isuna.

\s5
\v 5 Idi naamoan ni Haman a nagkedked ni Mardokeo nga agprarintumeng wenno agpakleb iti sangoananna, nakaunget unay isuna.
\v 6 Nangato unay isuna nga agtarigagay a ni Mardokeo laeng ti madusa. Gapu ta impakaamo dagiti adipen ti ari a Judio ni Mardokeo, kayat ni Haman a mapapatay dagiti amin a Judio. Isu a nagbalin a gundaway daytoy a banag a mangpapatay kadagiti amin a Judio iti sadinoman iti pagarian ni Ahasuero.

\s5
\v 7 Iti umuna a bulan (ti bulan ti Nisan), iti maikasangapulo ket dua a tawen iti panagturay ni Ahasuero, iti sangoanan ni Haman nangangayda iti Pur (dayta ket, nangipuruakda iti batbato). Kayatda a mangpili ti bulan ken aldaw iti panangipatungpalda iti dayta a panggep. Nangipuruakda ti babbato kadagiti bulbulan ken al-aldaw inggana a naikeddengda iti maikasangapulo ket dua a bulan, ti bulan ti Adar.

\s5
\v 8 Napan ngarud ni Haman iti ari ket kinunana kenkuana, "Madaydayaw", adda iti maysa a bunggoy dagiti tattao nga agnanaed kadagiti adu a paset iti emperiom a sabali ti lintegda iti lintegtayo. Agkedkedda pay nga agtulnog kadagiti lintegmo. Nasken a saanmo ida a pagtalinaeden, ngem ketdi papanawem ida.
\v 9 No makaay-ayo daytoy kenka, ibilinmo a masapul a mapapatayda amin. Ket no aramidem dayta, mangitedak iti 340 metrik a tonelada iti pirak a maikilo ken maited kadagiti mangay-aywan kadagiti pangiduldulinam ti kinabaknangmo."

\s5
\v 10 Nagustoan ti ari ti imbaga ni Haman, isu nga intedna ti singsing a pangtatak kenni Haman, ti Agagita, ti manggurgura kadagiti Judio, a mangpasingked ti inkeddengna.
\v 11 Imbaga ti ari kenni Haman, "Isublik ti kuarta kenka ken kadagiti tattaom. Aramidem ti pagayatam.”

\s5
\v 12 Ket naayaban a sangsangkamaysa dagiti eskriba ti ari, iti maikasangapulo ket tallo nga aldaw iti umuna a bulan. Iti dayta nga aldaw, naisurat ti tunggal bilin nga imbilin ni Haman. Naipatulod ti bilin kadagiti gobernador ti probinsia ti ari-nga adda kadagiti amin a probinsia, kadagiti gobernador dagiti nadumaduma a tattao nga agnanaed iti pagarian, ken kadagiti opisial ti amin a tattao. Naisurat ti bilin iti tunggal pagsasao ken iti pannurat kadagidiay a pagsasao tapno mabalinda a mabasa ken maawatan. Naisurat daytoy babaen iti nagan ni Ari Ahasuero ken natatakan iti bukodna a singsing, intedna daytoy kenni Haman tapno mausar.
\v 13 Inwaras dagiti mensahero ti bilin iti tunggal probinsia iti pagarian. Ti bilin ket isu ti panangpatay iti tunggal Judio, papatayen isuda amin, ken tapno madadael dagiti Judio, manipud iti kaubingan inggana iti nataengan, annak ken babbai. Maaramid daytoy iti maysa nga aldaw-iti maikasangapulo ket tallo nga aldaw iti maikasangapulo ket dua a bulan (bulan ti Adar) Inton matay dagiti Judio, mapalubusanto dagiti nabatbati a tattao a mangala kadagiti sanikuada.

\s5
\v 14 Ti kopya ti surat ket naaramid a linteg, babaen iti bilin ti ari, iti tunggal probinsia. Naammoan dagiti amin a tattao iti tunggal probinsia a nasken a saganaanda dayta nga aldaw.
\v 15 Ket, sigun iti imbilin ti ari, intulod a dagus dagiti lallaki a nakakabalio ti tunggal surat iti tunggal probinsia ti pagarian. Ket naibasa iti napigsa ti maysa kadagiti surat kadagiti tattao nga agnanaed ken agtrabtrabaho iti palasio iti Susa. Kalpasanna, nagtugaw ti ari ken ni Haman tapno aginumda, ngem mariribukanda unay dagiti tattao ti siudad ti Susa.

\s5
\c 4
\p
\v 1 Idi naammoan ni Mardokeo ti maipanggep kadagidiay a sursurat, nagleddaang unay isuna ket rinay-abna ti kawesna ken nangisuot iti kawes a pangladingit—nakirsang a lupot— ken nagtugaw isuna kadagiti dapo, a mangipakita a mariribukan isuna. Ket napan isuna iti siudad, nagsangit isuna iti nakapigpigsa nga addaan iti saem ken ladingit.
\v 2 Nagtakder isuna iti ruar ti ruangan ti palasio ti ari, saan isuna a mapalubusan a sumrek iti palasio, gapu ta iparit ti linteg a sumrek iti ruangan ti palasio ti ari ti siasinoman a nakakawes iti nakirsang a lupot.
\v 3 Kadagiti amin a probinsia ti imperio, idi naibasa kadagiti Judio ti surat a naggapu iti ari, nagsangit ken nagladingitda. Nagayunar ken nagdung-awda iti napigsa, ket napnoanda iti ladingit. Adu kadakuada ti nagidda, a nakakawes iti nakirsang a lupot ken nagtugaw a kadagiti dapo.

\s5
\v 4 Idi napan kenni Ester dagiti babbai ken dagiti lallaki nga adipenna ken imbagada ti maipanggep iti bilin ti ari ken ti umay a peggad, nariribukan unay isuna. Pinatulodanna ngarud ni Mardokeo iti nasasayaat a kawes tapno ussubenna ti nakirsang a lupot, ngem nagkedked ni Mardokeo a nangawat kadagitoy.
\v 5 Ket pinaayaban ni Ester ni Hatak, maysa kadagiti opisial ti ari, a dinutukan ti ari nga agserbi ken mangsalaknib kenkuana. Imbagana a rumuar isuna ket makitungtong kenni Mardokeo tapno ammoenna no ania iti pakariribukanna.

\s5
\v 6 Napan ni Hatak kenni Mardokeo iti plasa ti siudad iti sangoanan ti ruangan nga agturong idiay palasio ti ari.
\v 7 Imbaga ni Mardokeo kenkuana ti amin a napasamak. Imbagana kenkuana no mano a pirak ti inkari ni Haman nga itedna iti pangiduldulinan ti kinabaknang ti ari tapno mapapatay dagiti Judio.
\v 8 Nangited pay ni Mardokeo iti kopya ti linteg a naipaulog idiay Susa, tapno maipakitana daytoy kenni Ester. Kayat nga ibaun ni Mardokeo ni Ester a mangaramid iti addang a mainaig iti daytoy a bilin a naggapu iti ari ken tapno agpakpakaasi ni Ester iti ari. Kayatna a mapan ni Ester iti ari ket padasenna a tulungan dagiti Judio.

\s5
\v 9 Napan ngarud ni Hatak kenni Ester ket imbagana kenkuana ti imbaga ni Mardokeo.
\v 10 Ket binilin ni Ester ni Hatak nga asubli kenni Mardokeo, ket ibagana kenkuana daytoy:
\v 11 "Ammo dagiti amin nga adipen ti ari ken dagiti tattao iti probinsia ti ari nga awan ti mabalin a mapan iti ayan ti ari malaksid no inawis isuna ti ari. Adda laeng ti maymaysa a pagbanagan iti pananglabsing iti daytoy a linteg: ti tao ket mapapatay. Malaksid laeng no ipaturong ti ari ti balitok a setrona iti siasinoman a mapan kenkuana, dayta iti pagilasinan a palubusan ti ari nga agbiag dayta a tao. Maipapan iti panakisangok iti ari, saanak pay a napaayaban iti tallo-pulo nga aldaw."
\v 12 Nagsubli ngarud ni Hatak kenni Mardokeo ket imbagana kenkuana no ania iti imbaga ni Ester.

\s5
\v 13 Imbaga ni Mardokeo kenni Hatak nga ibagana kenni Ester daytoy: "Saanmo a panunoten a gapu ta agnanaedka dita palasio, ket makalibaskanto inton matay amin dagiti Judio.
\v 14 No agtalinaedka a naulimek iti daytoy a kanito, adda iti mangispal kadagiti Judio iti sabali a wagas, ngem sika ken ti pamilia ti amam ket matayto. Siasino ti makaammo, nalabit a para laeng iti kastoy a kanito a naisaadka a reyna."

\s5
\v 15 Ket impatulod ni Ester daytoy a mensahe kenni Mardokeo,
\v 16 "Mapanka ket ummongem dagiti amin a Judio ditoy Susa, ket ibagam kadakuada nga agayunarda para kaniak. Saankayo a mangan wenno uminun iti tallo nga aldaw, uray iti rabii wenno aldaw. Dagiti babbalasitangko ken siak ket agayunar iti kasta met laeng a wagas. Kalpasanna, mapanakto iti ayan ti ari, uray no ammok a maibusor daytoy iti linteg. Ket no matayak, matayak."
\v 17 Napan ni Mardokeo ket inaramidna ti imbaga ni Ester nga aramidenna.

\s5
\c 5
\p
\v 1 Kalpasan iti tallo nga aldaw, inkawes ni Ester ti kawesna kas reyna. Ket napan isuna nagtakder iti akin uneg a paraangan iti palasio ti ari, iti sangoanan ti balay ti ari. Iti dayta a kanito, agtugtugaw ti ari iti tronona iti balayna, a nakasango iti pagserrekan nga agturong iti balay.
\v 2 Idi nakita ti ari nga agtaktakder ni reyna Ester iti paraangan, naragsakan ti ari ket pinasangbayna isuna. Impaturongna kenni Ester ti balitok a setro nga iggemna. Immasideg ngarud ni Ester iti ari ket sinagidna ti murdong ti setro.

\s5
\v 3 Ket kinuna ti ari kenkuana, "Ania iti kayatmo Reyna Ester? Ania ti kiddawmo? Itedko kenka ti agingga iti kagudua ti pagariak, no dayta ti kiddawem."
\v 4 Simmungbat ni Ester, "Natan-ok nga Ari, no makaay-ayo kenka, mabalin kadi nga umaykayo kenni Haman iti padaya nga insaganak para kadakayo?"

\s5
\v 5 Kinunana ti ari kadagiti adipenna, "Mapankayo ket ibagayo kenni Haman nga umay a dagus ket aramidenna ti imbaga ni Ester!" Napan ngarud ti ari ken ni Haman iti padaya nga insagana ni Ester.
\v 6 Idi a naidasaren ti arak para iti padaya, kinuna ti ari kenni Ester "Ania ti dawatem? Maipaayto kenka. Ania ti kiddawem? Itedko kenka ti agingga iti kagudua ti pagariak, no dayta ti kiddawem."

\s5
\v 7 Simmungbat ni Ester, "Ti dawat ken kiddawko ket daytoy,
\v 8 no maay-ayoka kaniak, no situtulokka a mangaramid iti daytoy para kaniak: mabalin kadi nga umaykayo kenni Haman iti maysa pay a padaya nga isaganak inton bigat para kadakayo. Iti dayta a tiempo, sungbatakto ti saludsodmo."

\s5
\v 9 Naragsakan unay ni Haman idi pimmanaw isuna iti padaya. Ngem nakitana ni Mardokeo a nakatugaw iti ruangan ti palasio, ket maminsan manen, saan a timmakder wenno nagpigerger iti buteng ni Mardokeo iti sangngoananna. Isu a kasta unay ti ungetna kenni Mardokeo.
\v 10 Nupay kasta, awan ti inaramidna a mangipakita a makaung-unget isuna. Nagawid isuna iti balayna ket inummongna dagiti gagayemna. Inayabanna met ti asawana a ni Zeres.
\v 11 Imbaga ni Haman kadakuada amin a maipanggep iti dakkel a kinabaknang a naurnongna. Imbagana ti maipanggep kadagiti adu a putotna a lallaki, ken no kasano nga ad-adu ti nagun-odna ngem kadagiti dadduma nga opisial ken adipen ti ari.

\s5
\v 12 Ket innayon pay ni Haman, "Uray no dua kami laeng nga inawis ni Reyna Ester ket, siak ken ti ari, iti padaya nga insaganana para kadakami ita nga aldaw. Ken aw-awisennakami manen a dua iti maysa pay a padaya nga angayenna para kadakami inton bigat!"
\v 13 Ket kinuna ni Haman, "Ngem awan serserbina dagitoy kaniak agingga a makitkitak a nakatugaw ti Judio a ni Mardokeo iti ruangan iti palasio ti ari!"

\s5
\v 14 Ket kinuna ni Zeres nga asawana kenni Haman ken kadagiti amin a gagayyemna, "Apay a saanyo nga iyapura ti mangaramid iti pagbitayan? Aramidenyo a duapulo ket tallo a metro iti kangatona. Ket inton bigat katungtongenyo ti ari nga bitayenda ni Mardokeo iti daytoy. Kalpasan dayta, mabalinmon ti mapan iti padaya a kaduam ti ari ket agragsakka." Nagustoan ni Haman dayta a kapanunotan, ket impaisaganana ti pagbitayan.

\s5
\c 6
\p
\v 1 Saan a makaturog ti ari iti dayta a rabii, isu nga inayabanna ti maysa nga adipen ken imbagana kenkuana nga iyegna ti libro ti pakasaritaan ti amin a napasamak bayat iti tiempo nga isuna ti ari. Isu nga inyeg ti adipen dagiti nakaisuratan ket binasana daytoy iti napigsa iti ari.
\v 2 Binasa ti adipen ti maipanggep kada Bigtana ken Teres, dagiti dua nga opisial a nagbantay iti pagserrekan iti siled ti ari. Binasana ti pakasaritaan idi naduktalan ni Mardokeo a pinanggepda a papatayen ni Ari Ahasuero ket imbagana iti ari ti maipanggep iti daytoy.
\v 3 Sinaludsod ti ari, "Ania ti naaramid a panangpadayaw kenni Mardokeo gapu iti inaramidna?" Simmungbat dagiti agtutubo nga agserserbi iti ari, "Awan ti naaramid para kenkuana."

\s5
\v 4 Kinuna ti ari, "Adda kadi ti tao iti paraangan?" Iti dayta a kanito, simrek ni Haman iti akinruar a paraangan ti palasio. Kayatna ti makisarita iti ari maipanggep iti panangibitin kenni Mardokeo iti pagbitayan a kaipatpatakderna.
\v 5 Simmungbat dagiti adipenna, "Adda ni Haman iti paraangan." Kinuna ti ari, "Pastrekenyo isuna."
\v 6 Idi simrek ni Haman, sinaludsod ti ari kenkuana, "Ania ti rumbeng nga aramidek iti maysa a tao a kayatko a padayawan?" Ita, kinuna ni Haman iti bagina, "Asino ti kayat ti ari a padayawan a nangnangruna ngem iti siak?"

\s5
\v 7 Isu a simmungbat isuna iti ari, "Para iti tao a kayatmo a padayawan,
\v 8 ibagam kadagiti adipenmo a mangiruarda kadagiti kagay a nausarmon, ken mangiruarda ti maysa kadagiti kabalio a nagluganamon ken addaan guarnasion iti ulona.
\v 9 Ket ibagam iti maysa kadagiti kapapatgan nga opisialmo a kagayanna dayta a tao, ken iturongna ti kabalio kadagiti dalan ti siudad. Bayat ti ipapanna, ipukkawto dagiti dadduma nga adipen, 'Daytoy ti mapasamak no kayat ti ari a padayawan ti maysa a tao!'"

\s5
\v 10 Simmungbat ti ari kenni Haman, "Darasem, alaem dagiti kagay ken ti kabalio, kas ti kunam, ket aramidem daytoy kenni Mardokeo a Judio nga agtugtugaw iti ruangan ti balay ti ari! Saanmo a liplipatan ti aniaman kadagiti imbagam!"
\v 11 Isu nga innala ni Haman ti kagay ken ti kabalio. Insuotna ti kagay kenni Mardokeo, ken imparadana isuna a nakasakay iti kabalio kadagiti dalan ti siudad ket ipukpukkawna, "Daytoy ti maaramid iti tao no kayat isuna a padayawan ti ari!"

\s5
\v 12 Kalpasanna, nagsubli ni Mardokeo iti ruangan ti ari. Ngem nagdardardaras a nagawid ni Haman. Nagsangsangsangit isuna ken inabbonganna ti rupana.
\v 13 Imbaga ni Haman kenni Zeres nga asawana ken kadagiti amin a gagayyemna ti amin a napasamak kenkuana. Ket kinuna dagiti lallaki a gagayyemna a mabigbigbig gapu iti kinasiribda, ken ni Zeres nga asawana kenkuana, "No ni Mardokeo ket Judio, ken no naibabainka iti imatangna, saanmonto a kabaelan nga abaken isuna. Awan duadua nga abakennaka."
\v 14 Kabayatan ti panagtutungtongda, sumagmamano kadagiti opisial ti ari ti simmangpet tapno dagus nga ipanda ni Haman iti padaya nga insagana ni Ester.

\s5
\c 7
\p
\v 1 Simmangbay ngarud ti ari ken ni Haman iti maikadua a padaya nga insagana ni Reyna Ester.
\v 2 Iti maikadua nga aldaw iti padaya, kabayatan nga idasdasar dagiti adipen ti arak, kinuna ti ari kenni Ester, "Ania ti dawatmo, Reyna Ester? Itedko kenka aniaman a dawatem. Ania ti kayatmo? Itedko kenka uray agingga iti kagudua ti pagariak."

\s5
\v 3 Simmungbat ni Ester, "No naay-ayoka kaniak, apok nga ari, ken no pagayatam nga aramiden ti dawatko, isalakanmo koma ti biagko! Ken isalakanmo koma ti biag dagiti tattaok.
\v 4 Ta siak ken dagiti tattaok ket naukom a madadael babaen iti naipaulog a bilin. Siak ken dagiti tattaok, dakami ket naiyawat tapno mapukaw—tapno mapapatay ken madadael. No nailakokami laeng koma a kas tagabu, agulimekak latta koman, ta dayta a kita ti riribuk ket saan a maikari a mairengreng kenka."
\v 5 Ket kinuna ni Ari Ahasuero kenni Reyna Ester, "Siasino ti tao a nangaramid iti daytoy? Sadino ti ayan ti tao a napnoan ti pusona iti kastoy a kita ti kinadakes?"

\s5
\v 6 Simmungbat ni Ester, "Ti tao a kabusormi ket ti managdakdakes a ni Haman!" Ket kasta unay ti buteng ni Haman iti sangoanan ti ari ken ti reyna.
\v 7 Timmakder ti ari a sipupungtot. Imbatina ti arakna ket rimmuar a napan iti minuyongan ti palasio tapno mangngeddeng no ania ti aramidenna. Ngem nagtalinaed ni Haman tapno agpakaasi kenni Reyna Ester, a bumallaet tapno maisalakan ti biagna. Ammona nga inkeddengen ti ari a papatayenna isuna.

\s5
\v 8 Ket nagsubli ti ari manipud iti minuyongan ti palasio ken napan iti lugar a pangidasdasaranda iti arak. Nairana met a kapakpakleb ni Haman iti sofa nga ayan ni Ester. Kinuna ti ari, "Dangranna kadi ti reyna iti bukodko a balay, nga addaak a sitatakder?" Apaman a naibagana daytoy, inabbungan dagiti adipen iti lupot ti rupa ni Haman.

\s5
\v 9 Kalpasanna, kinuna ni Harbona a maysa kadagiti opisial nga agserserbi iti ari, "Idiay ruar, iti asideg ti balay ni Haman ket adda iti pagbitayan. Duapulo ket tallo a metro ti kangatona. Inaramid ni Haman daytoy para kenni Mardokeo, ti nagsao tapno masalakniban ti ari!" Kinuna ti ari, "Bitayenyo isuna sadiay."
\v 10 Isu nga imbitinda ni Haman iti pagbitayan nga insaganana para kenni Mardokeo. Ket bimmaaw ti unget ti ari.

\s5
\c 8
\p
\v 1 Saan a nagbayag iti dayta met la nga aldaw, inted ni Ari Ahasuero kenni Reyna Ester dagiti amin a sanikua ni Haman, a kabusor dagiti Judio. Nagserbi ni Mardokeo iti ari gapu ta imbagan ni Ester no ania ti pakainaiganna kenkuana.
\v 2 Idi simrek ni Mardokeo, inuksot ti ari ti singsing nga adda pagseliona, ti singsing a binabawina manipud kenni Haman, ket intedna daytoy kenni Mardokeo. Dinutokan ni Ester ni Mardokeo a mangimaton kadagiti sanikua ni Haman.

\s5
\v 3 Nagsubli manen ni Ester tapno makisarita iti ari. Nagpakleb isuna iti sakaananna ket nagpakpakaasi kenkuana nga aglulua. Kiniddawna iti ari a maisardeng ti dakes a panggep nga inaramid ni Haman tapno mapapatay dagiti Judio.
\v 4 Inturong ti ari ti setro a balitok kenni Ester, isu a bimmangon ni Ester ket timmakder iti sango ti ari.

\s5
\v 5 Kinunana, "Natan-ok nga Ari, no makaay-ayo daytoy kenka, ken no kayatnak a paraburan, mangaramidka iti baro a linteg a mangwaswas ti imbilin ni Haman a putot ni Hamadata, a kaputotan ti Agag, a masapul a mapapatay amin dagiti Judio iti amin a probinsia iti imperiom.
\v 6 Kasano a maituredko a kitaen ti didigra nga umay kadagiti tattaok? Kasano a maibturak a kitaen ti pannakadadael dagiti kakabagiak?"

\s5
\v 7 Simmungbat ni Ari Ahasuero kenni Reyna Ester ken ni Mardokeo a Judio, "Gapu ta pinadas a pukawen ni Haman dagiti amin a Judio, intedkon kenni Ester ti amin a kukua ni Haman, ken imbitindan isuna iti pagbitayan.
\v 8 Palubosanka pay ngarud ita a mangisurat iti sabali a surat nga addaan iti baro a bilin a maipaulog iti nagan ti ari, tapno maisalakan dagiti tattaom. Mabalinyo nga ikabil ti naganko kadagiti surat ken usarenyo ti singsingko a mangselio kadagitoy. Gapu ta awan ti surat nga addaan iti naganko ken nadeppelan iti singsingko ti mabalin a mawaswas."

\s5
\v 9 Ket naayaban dagiti eskriba iti dayta a gundaway (iti maikatallo a bulan, nga isu ti bulan ti Sivan, iti maika-23 nga aldaw ti bulan). Imbaga ni Mardokeo kadakuada ti baro a bilin a naipaulog iti nagan ti ari tapno masalakniban dagiti Judio. Naisurat daytoy kadagiti gobernador ti probinsia, kadagiti gobernador ken kadagiti opisial dagiti probinsia manipud iti India agingga idiay Etiopia, ti dagupna ket 127 amin a probinsia. Ti surat ket para iti tunggal probinsia iti pagsasao a maawatan dagiti tattao. Naisurat pay daytoy kadagiti Judio iti bukodda a panagsurat ken pagsasao.

\s5
\v 10 Insurat ni Mardokeo ti bilin a naipaulog iti nagan ni Ari Ahasuero ken sinelioanna daytoy babaen iti singsing ti ari. Impatulodna dagiti sursurat babaen kadagiti para itulod kadagiti surat nga agluglugan kadagiti napapartak a kabalio a maus-usar para iti panagserbi iti ari, a naiyanak iti kuadra ti ari.
\v 11 Inikkan ti ari iti pammalubos dagiti Judio nga agnanaed iti siudad nga agummong ken makiranget a sangsangkamaysa tapno salakniban dagiti biagda. Pinalubosanna ida a papatayen ti asinoman nga armada iti tunggal probinsia, a karaman ti aniaman a bunggoy dagiti tattao, a mangpadas a mangdarup kadakuada wenno kadagiti pamiliada, wenno mangpadas a mangala kadagiti sanikuada.
\v 12 Maipatungpal daytoy kadagiti amin a probinsia ni Ari Ahasureo, iti maika-13 nga aldaw iti maika-12 a bulan, nga isu ti bulan ti Adar.

\s5
\v 13 Imbilin ti ari kadakuada a mangaramidda kadagiti kopia iti daytoy a bilin a naipaulog iti nagan ti ari ken ipakita daytoy kadagiti amin a bunggoy dagiti tattao. Babaen iti daytoy a naipaulog a bilin, impalubosna nga agsagana nga agibales dagiti Judio kadagiti kabusorda.
\v 14 Binilin ti ari dagiti lallaki a mangitulod kadagitoy a sursurat nga agluganda a sidadaras kadagiti kabalio ti ari a mapan kadagiti amin a probinsia. Ken adu a kopia ti surat ti naipaskil ken naibasa kadagiti tattao nga agnanaed ken agtartrabaho iti palasio idiay Susa.

\s5
\v 15 Pinanawan ni Mardokeo ti palasio a nakakawes iti asul ken puraw a kagay ken dakkel a korona a balitok nga inted ti ari kenkuana. Nakakagay pay kenkuana ti maris-ube a kasasayaatan a lupot. Idi nangeg dagiti tattao ti Susa daytoy a baro a linteg, nagpukkaw ken nagragragsakda amin.
\v 16 Naragsak itan dagiti Judio idiay Susa, imbes koma nga agbutengda. Narag-oda imbes koma nga agbubuteng, ken pinadayawan isuda dagiti dadduma a tattao.
\v 17 Idi nakadanon ti baro a bilin kadagiti amin a siudad ken probinsia, nagrambak sadiay dagiti Judio ken nangisaganada iti padaya ket kasta unay ti rag-oda. Ken adu a tattao iti entero nga imperio ti nagbalin a Judio, gapu ta nagbutengda iti kasta unay kadagiti Judio.

\s5
\c 9
\p
\v 1 Iti maika-12 a bulan, ti bulan ti Adar, iti maika-13 nga aldaw, a ninamnama dagiti kabusor dagiti Judio a madadaelda ida a naan-anay. Masapul a surotenda ti bilin nga impaulog ti ari. Nupay kasta, nagbaliw ti amin, gapu ta naparmek dagiti Judio dagiti kabusorda.
\v 2 Naguummong dagiti Judio kadagiti siudadda kadagiti amin a probinsia ni Ari Ahasuero tapno rautenda dagiti manggandat a mangdangran kadakuada. Awan ti makabael a makiranget kadagiti Judio, gapu ta mabuteng kadakuada dagiti amin a tattao kadagita a disso.

\s5
\v 3 Tinulongan dagiti amin nga opisial ti ari iti amin a disso dagiti Judio, gapu ta nagbutengda kenni Mardokeo ken ti pannakabalin nga inted ti ari kenkuana.
\v 4 Ni Mardokeo itan ti kapapatgan nga opisial ti ari iti palasio, ken agwarwaras ti nasayaat a pakasaritaanna iti entero a probinsia gapu ta bumilbileg a bumilbileg isuna.
\v 5 Isu a rinaut ken pinapatay dagiti Judio dagiti kabusorda. Pinarmekda amin dagiti kabusorda, ket nagballigida a naan-anay.

\s5
\v 6 Iti Susa laeng, ti nasarikedkedan a siudad, napapatayda ti limagasut a lallaki.
\v 7 Karaman kadagidiay a napapatayda ket dagiti sangapulo a putot a lallaki ni Haman. Dagitoy dagiti karaman kadagiti napapatay: ni Parsandata, Dalfon, Asfata,
\v 8 Porata, Adalia, Aridata,
\v 9 Parmasta, Arisai, Aridai, Vaizata.
\v 10 Ken dagiti sangapulo nga appoko ni Hamadata, ti putot a lalaki ni Haman—ti kabusor dagiti Judio. Pinapatay dagiti Judio ida, ngem saanda nga innala dagiti sanikuada.

\s5
\v 11 Iti pagleppasan ti dayta nga aldaw, impadamag ti maysa a tao iti ari ti bilang dagiti tattao a napapatay dagiti Judio idiay Susa, ti nasarikedkedan a siudad.
\v 12 Kalpasanna, kinuna ti ari kenni Reyna Ester, "Pinapatay dagiti Judio dagiti limagasut a tattao ditoy Susa, agraman dagiti sangapulo a putot a lallaki ni Haman! Ania pay ngata ti naaramidda kadagiti dadduma a probinsiak? Ita, ania pay ti kayatmo a dawaten nga aramidek para kenka? Ibagam kaniak. Ania pay ti kayatmo? Ket aramidek daytoy."

\s5
\v 13 Simmungbat ni Ester, "No makaay-ayo kenka, palubosam dagiti Judio ditoy Susa nga aramidenda manen inton bigat no ania ti imbilinmo kadakuada nga aramidenda ita nga aldaw. Ken ibilinmo pay a maibitin dagiti bagi dagiti sangapulo a putot a lallaki ni Haman iti pagbitayan."
\v 14 Isu nga imbilin ti ari a mapalubosan dagiti Judio a mangpapatay pay iti ad-adu kadagiti kabusorda iti sumaruno nga aldaw. Kalpasan nga impaulogna ti maysa pay a bilin idiay Susa, naibitin dagiti bagi ti sangapulo a putot a lallaki ni Haman.

\s5
\v 15 Naguummong dagiti Judio iti Susa ken pinapatayda ti tallogasut pay a tattao. Ngem saanda latta nga innala ti aniaman kadagiti sanikuada.
\v 16 Napasamak dayta idi maika-14 nga aldaw iti bulan ti Adar. Iti sumaruno nga aldaw, naginana ken nagrambak dagiti Judio iti Susa. Iti amin kadagiti dadduma a probinsia, naguummong dagiti Judio tapno salaknibanda dagiti bagida, ket napapatayda iti 75,000 a tattao a kabusorda, ngem awan manen ti innalada kadagiti sanikuada.

\s5
\v 17 Iti maika-13 nga aldaw iti bulan ti Adar, ken iti maika-14 nga aldaw, naginanada ken inaramidda dayta nga aldaw a piesta ken panagrambak.
\v 18 Ngem sangsangkamaysa dagiti Judio nga adda iti Susa nga immay iti maika-13 ken iti maika-14 nga aldaw tapno makiranget, ngem iti maika-15 nga aldaw, naginanada ken inaramidda daytoy nga aldaw a piesta ken panagrambak.
\v 19 Dayta ti gapuna a ngilinen dagiti Judio kadagiti bario, dagiti Judio nga agnanaed kadagiti ili ti maika-14 nga aldaw iti bulan ti Adar a kas aldaw ti ragragsak ken panagrambak, tiempo nga agipatulodda kadagiti sagut a makmakan iti tunggal maysa.

\s5
\v 20 Insurat ni Mardokeo dagiti amin a napasamak. Ket impatulodna dagitoy a sursurat kadagiti Judio nga agnanaed iti entero nga imperio ni Ari Ahasuero.
\v 21 Binilinna ida a ngilinenda ti maika-14 ken ti maika-15 nga aldaw ti Adar iti tinawen,
\v 22 gapu ta dagitoy dagiti aldaw a nagballigi dagiti Judio kadagiti kabusorda. Imbagana pay kadakuada a rumbeng nga agrambaka kadagidiay nga aldaw babaen iti piesta ken panangted kadagiti sagsagut a makan iti tunggal maysa ken kangrunaanna kadagiti marigrigat a tattao. Masapul a laglagipendanto daytoy a kas ti bulan a no sadino ket nabaliwan ti panagladingitda iti tiempo ti napalalo a rag-o. Manipud iti panagladingit a nasukatan iti panagramrambak.

\s5
\v 23 Isu a nagnunummoan dagiti Judio nga aramiden no ania ti insurat ni Mardokeo. Nagnunummoanda a rambakan dagidiay nga aldaw a tinawen.
\v 24 Malagipda no kasano a nagbalin ni Haman a putot ni Hamadata, ti kaputotan ni Agag a kabusor dagiti amin a Judio. Malagipda no kasano a nagaramid isuna iti dakes a panggep tapno papatayen dagiti Judio, a nagpabinnunot tapno ammoenna ti aldaw a panangparmek ken panangdadael kadagiti Judio.
\v 25 Malagipda nga idi imbaga ni Ester iti ari ti maipapan iti panggep ni Haman, pinagbalin ti ari a ti panggep ni Haman a panangpapatay kadagiti Judio ket maiballatek kenkuana, nga isuna ti mapapatay imbes a dagiti Judio, ket maibitin isuna ken dagiti putotna a lallaki.

\s5
\v 26 Isu nga inawaganda dagitoy nga aldaw a Purim, a nagtaud manipud iti nagan a Pur (ti binnunotan nga impurruakda). Dayta ngarud ti nailanad iti daytoy a surat, dagiti nakitada, ken dagiti napasamak kadakuada.
\v 27 Immananmong nga agrambak dagiti Judio iti entero nga imperio iti kasta a wagas iti dua nga aldaw iti tinawen. Kinunada nga ibagada daytoy kadagiti kaputotanda ken iti asinoman a nagbalin a Judio a rambakanda daytoy a piesta a tinawen. Rumbeng a rambakanda a kas imbaga ni Mardokeo kadakuada idiay suratna.
\v 28 Imbagada a masapul a laglagipen ken rambakanda kadagidiay a dua nga aldaw iti tinawen, ngilinen dagiti amin a kaputotanda, iti tunggal pamilia, iti amin a siudad, ken iti amin a probinsia. Sipapasnekda nga impablaak nga isuda ken dagiti kaputotanda ket saan nga agsarday a manglaglagip ken mangramrambak dagitoy nga aldaw a naawagan iti Purim.

\s5
\v 29 Kalpasanna, nagsurat ni Mardokeo ken ni Reyna Ester, nga anak a babai ni Abihail, ti maikadua a surat maipanggep iti piesta ti Purim. Inusar ni Ester ti turayna a kas reyna tapno pasingkedan a pudno ti immuna a surat ni Mardokeo.

\s5
\v 30 Dagitoy a surat a mangpasingked ket naipatulod kadagiti amin a Judio, iti 127 a probinsia iti pagarian ni Ahasuero, a napakuyogan kadagiti sasao a tartartarigagayanna a maaddaanda ti kinatalged ken kinapudno.
\v 31 Pinasingkedan dagitoy a surat dagiti aldaw ti Purim kadagiti naidutok a tiempoda, a kas imbilin ni Mardokeo a Judio ken ni Reyna Ester kadakuada ken kadagiti kaputotanda a panangrambakda iti Purim, a kas iti panangawatda ti pagrebbengan nga agayunar ken agladingit iti sabali a tiempo.
\v 32 Pinasingkedan ti bilin ni Ester dagitoy nga annuroten maipanggep iti wagas no kasano ti rumbeng a panagrambakda iti piesta ti Purim, ket naisurat amin dagitoy iti daytoy a libro.

\s5
\c 10
\p
\v 1 Pinagbuis ni Ari Ahasuero dagiti tattao nga agnanaed iti daga ken agraman dagiti adda iti igid ti baybay.
\v 2 Ken amin dagiti naindaklan a banbanag nga inaramid ni Ari Ahasuero gapu iti pannakabalinna ket naisurat iti Libro ti Cronicas dagiti Ari ti Media ken Persia. Naisurat pay sadiay ti pakasaritaan dagiti naindaklan nga inaramid ni Mardokeo, ken ti pammadayaw nga inted ti ari kenkuana.

\s5
\v 3 Sumaruno ni Mardokeo a Judio iti saad ni Ari Ahasuero, ken imbilang pay isuna dagiti amin a Judio a maysa a naindaklan a tao. Rinaraem isuna dagiti kakabsatna a Judio, lallaki ken babbai, ta kinalikagumanna ti pagsayaatan dagiti tattaona, ken nagsao isuna tapno magun-og ti kinatalged para kadakuada amin.