xsr-x-shyarpa_reg/63-1JN.usfm

\id 1JN
\ide UTF-8
\h यूहन्नाकि टिबु टिवा थाल्मा
\toc1 यूहन्नाकि टिबु टिवा थाल्मा
\toc2 यूहन्नाकि टिबु टिवा थाल्मा
\toc3 1jn
\mt यूहन्नाकि टिबु टिवा थाल्मा
\c 1
\cl लिउ १
\p
\v 1 तङ्नेराङ वतुप् मिजिकि सुङ् ति अरेकि ङेनि वे अरेकि राङि मिगिराङ् थोङ्नि वे राङिराङ् ल्हानि वे राङि लाक्पि रेङ्नि वे।
\v 2 ति मिजि छार्सुङ् तेमे अरेकि ति थोङ्सुङ तेमेम तिकि ताम ति लाप्क्यु तेमे तिवाला नाम्लाङ् मिसिन्बु मिजि लाप्क्यु ति दि पापा ताङ नक् तेमे ओरुङ्ला छ्यार्सुङ।
\v 3 चुका ति अरेकि थोङ्नि ताङ् ङेनि वे तिदि ङेराङ् खिराङ्ला साङ श्येक्यु तेमे ङेराङ् ताङ खिरे छक्पा हुङ्सित् । तेमे हुतुङ्रङ छक्पा ति पापा ताङ खोकि पुज्युङ चावा येसु ताङ गिउइ।
\v 4 खिराङ्ला लो दिम्सित् सिनि ङेराङ दि ताम तिवा खिराङ्ला टिगु।
\p
\v 5 ङेरेकि खो नेसुर् थोबु सुङ दिराङ हिन तेमे ङेराङ् खिराङ्ला श्येक्यु दि कन्ज्यककि ठा छ्यालि हिन् तिला दि चोजिगाङ नाक चुमि मेङुइ।
\v 6 अरेकि खो ताङ छक्पा किउइ सिनि सिउ हिन्सिराङ नाक् चुबिला युसिन् क्यासिया ङेराङ् जुनाक ज्वप् तिवा दगेराङ गिउइ टेङ्मु लाम्ला मोडोउइ।
\v 7 हिन्सिराङ खोकि ठाछ्यालिला वतुप् दगेराङ् ओरुङ्साङ ठाछ्यालिला युसिन् ङेराङ्ताङ खिराङ् छ्वकुप् किउइ खोकि पुज्युङ येसुकि ठागि थिवाकि अरे तेरिक दिक्पा ने ता जिक्यु।
\v 8 ओरुङ्तानि दिक्पा मेत् सिनि सिक्यासिया राङि राङ राङ्ला जुनाक जेउइ तेमे ओरुङ् टेङ्बु मेङुउइ।
\v 9 हिन्सिराङ ओरेकि राङि दिक्पा तिवा सेम्ला लासिन क्यासिन् अरे दिक्पा तिवा ताजितुप्ताङ् तेरिक् मेचेङि लाका ने चेङि ज्वप्ला खोति मोवा किरुप् ताङ दिक्पा मतुप् हिन्।
\v 10 अरेकि दिक्पा माक्यावा वे सिनि सिसिया अरेकि खोला मेलेवा सिउइ खोकि सुङ् ति ओरुङ्तानि मेङुउइ ।
\c 2
\cl लिउ २
\p
\v 1 ङे ङिङ्ज्येबु आङा तिवा खिराङ् दिक्पा माकि सिनि दि ताम ति टिगिन् वे हिन्सिनाङ खिराङ् सिसिाङ दिक्पा क्यासिन् अरे छ्याला ताम क्या तेरुप् मेरा चिक् दिक्पा मेतुप् चावा येसु वे ।
\v 2 खो ति अरे दिक्पातिवाला सेम ग्युरुप् किरुप् वे, ङेरेति क्याजिक् मिन्, लु्ङ्बाला वतुप् तेरिक तिवाला हिन्।
\p
\v 3 वेरेकि खोकि का ङेन्नक क्यासिन् दिगिराङ् अरे छ्या ङेक्यु कि अरे खोला ङो श्येक्यु।
\v 4 सिकि ङा कन्ज्यकला ङो श्येक्यु सिउइ हिन्सिराङ खोकि का तिवा मेङेन्सिन तिकि जुनाक् जोबु हिन्।
\v 5 हिन्सिराङ सिकि खोकि सुङ ङेन्ग्यि हुतुङ्राङ तिमि ताङ कन्ज्यककि ङिङ्ज्ये चेङि गिउइ तेमे ओरुङ् खो तानि गिउइ।
\v 6 कन्ज्यक तानि देक्यु सिरुप् मि ति चावा येसु थारुप् दगेराङ् थार्गोक्यु।
\p
\v 7 ङे ङिङ्ज्येबु तिवा ङेकि खिराङ्ला का साम्बा टिबु मिन् खिराङ् तानि तङ्नेराङ वतुप् ङिङ्बा काराङ हिन् खिरे ङेन्दुप् सुङ राङ् तङि का हिन्।
\v 8 हिन्सिनाङ ङा खिराङ्ला साम्बा का टिगिन वे दिति चावाला खिराङ्ला वतुप् ताम हिन् चेला सिसिन् नाक्चुबि तोरिन वे तेमे ठाछालि तङ्नेराङ वारिन् वे।
\v 9 सिकि ठाछालि वे सिनि सि तेमे राङि नुक्ला ति ङिङ्मारकि तिदि हारुङ नाक चुबिलाराङ वे।
\v 10 सिकि राङि नुप्ला ङिङ्ज्येकि ति ठा छ्यालिला देक्यु तिला डिलुप् काङ् ज्यिगाङ जिवा मेङु।
\v 11 हिन्सिनाङ सिकि राङि नुक्ला ङिङ्मार किउइ ति तारुङ् नाक् चुबिलाराङ युग्यु तिदि क्येनि डोइ वे सिनि तिला छ्या मेङु चिला सिसिन नाक् चुबिकि किसा तिला मिक् मोथोङु जोनि वे।
\p
\v 12 ङे ङिङ्ज येबु आङा तिवा ङा खिराङ्ला टिगिन् वे चिला सिसिन् खिरेकि दिक्पा चावाकि मिन्कि सिनि ता चिसुङ।
\v 13 पापि टेङ्रि वे ङा खिराङ्ला टिगिन् वे चिला सिसिन् तङ्नेराङ वतुप् तिवाला खिराङ् ङो श्येक्यु। ज्यादा नाज्युङ्मा तिवा ङा खिराङ्ला टिगिन् वे चिला सिसिन् खिरेकि डेला ग्याल्नि वे। आङा टिक्पे तिवा ङा खिराङ्ला टिगिन् वे चिला सिसिन् खिरेकि पापाला ङो श्येक्यु।
\v 14 पापा तिवा ङे खिराङ्ला टिगिन वे चिला सिसिन खिरेकि तङ्नेसुर राङ वतुप् तिला ङो श्येक्यु । ज्यान्दा नाज्युङ्मा तिवा ङ‍ा खिराङ्ला टिगिन वे चिला सिसिन् खिराङ राम्बु वे तेमे कन्ज्यककि खिरे सेम्गि नाङ्ला देक्यु तेमे खिराङ् डे खाला ग्याल्नि वे।
\p
\v 15 जाम्बु लिङ्ला ङिङ्ज्ये माकि ना दि लुङ्ला वतुप् ताम तिवाला राङ सिकि दि लुङ्ला ङिङ्ज्येकि तिकि सेम्गि नाङ्ला पापि ङिङ्ज्ये मेङु।
\v 16 चिला सिसिन दि लुङ्बाला वतुप् तेरिक ताम तिवा जुबुकि हाम्बा मिकि थोङ्गुप् ताम तिवा पापा नेसुर लेबु मिन् दिदि लुङ्बा नेसुर् लेबु हिन्।
\v 17 लुङ्बा ताङ दि हाम्बा तोर्नि डिउइ। हिन्सिनाङ सिकि कन्ज्यककि सेम ज्यक्यु तिदि नाम्लाङ देक्यु।
\p
\v 18 टिक्पे आङा तिवा दि तिङि तुज्ये हिन् खिरेकि चावा खाला लाङ्गुप् तिवा हुङिन वे सिनि थोङिन् वे दजोला चावा खाला लाङ्गुप् तिवा वानि वे दुक्राङ क्यानि दिदि तिङि तुज्ये हिन् सिनि हाक कोत् ।
\v 19 तिवा ङेराङ् नेसुर् थेनि गाल्सुङ हिन्सिनाङ तिवा हर्ति मिन्। तिवा अर्ति हिन्सिया तिवा ओरुङ तानिराङ देक्यु हिन्सिनाङ तिवा अर्ति मिन् सिनि छ्या ङेतुप्ला गाल्सुङ।
\v 20 हिन्सिराङ खिराङ् ताङ कन्ज्यक नेसुर् कि ओङ् वे तेमे खिराङ्हिन्दुप् ताम श्येक्यु।
\v 21 खिरेकि मिन्दुप् ताम क्याबु हिन् सिनि हिन्सिन ङेकि टिबु मिन् हिन्सिनाङ चिनक् ताम साङ मेलेवा नेसुर् लेमे ताम मेङु सिनि खिरेकि श्येवा किसित् सिनि ङेकि खिराङ्ला टिबु हिन्।
\v 22 जुनाक् ज्वप् ति सु हिन्? जुनाक् ज्वप् ति ति हिन् सिकि येसुराङ चावा हिन सिरुप ताम ति सेम्ला मज्यगु। ति मि तिराङ येसुला सेम्ला मालाङु मि हिन् चिला सिसिन् तिकि पापा ताङ पुज्युङ्ला सेम्ला मिलिङु।
\v 23 पुज्युङ्ला सेम्ला मिलिङु सुताङ्साङ पापा मेदेउइ पुज्युङ्ला सेम्ला लिङ्गुप् ताङ पापा गिउइ।
\v 24 खिरेकि तङ्ने ङेन्दुप् ताम खिराङ् तानि हुङ्सित् खिरे तङ्ने ङेन्दुप् ताम तिवा खिराङ तानि गिउ सिसिन् खिराङ् साङ पापा पुज्युङ् ताङनि गिउइ।
\v 25 खोकि ओरुङ्ला ना क्यालु ताम ति दि राङ हिन् मिसिन्बु मिजि हिन्।
\p
\v 26 खिरे सेम ना तोङ्गुप् तिवा ला ङेकि दि ताम टिबु हिन्।
\v 27 खिरेकि खोनेसुर् ङेतुप् ओङ् खिराङ् तानि देक्यु तेमे खिराङ्ला लोप् मोगोउइ। हिन्सिनाङ खोकि ओङ्किराङ तेरोक ताम तिवा लोप् गोक्यु ति ओङ् वतुप् ताम हिन्। तिकि खिराङला लापुप् दगेराङ् खोतानि देत् ।
\p
\v 28 ता ङिङ्ज्येबु आङा तिवा खोतानि राङ देत् तेमे छ्यार्सिन् ओरुङ्तनि राम्बु मोबा हुङ्सित् सिनि तेमे खो हुङ्जि खोकि दङ्ला ङछा मालाङ्सित्।
\v 29 खिरेकि खो दिक्पा मेतुप् हिन सिनि छ्या वसिन् दिक्पा मेतुप् मि तिवा तेरिक खो नेसुर् हिन सिनि खिरेकि श्याक्यु।
\c 3
\cl लिउ ३
\p
\v 1 ल्हो पापिकि ओरुङ्ला चो ङिङ्ज्ये बिनि वे ओरुङ्ला कन्ज्यककि गिपा सिक्यासुङ हुतुङ्राङ ओरुङ् तिनक् वे तुक किसा दि लुङ्बि मि तिवि ओरुङ्ला ङो माश्ये।
\v 2 ङिङ्ज्येबु वे दजोला ओरुङ् कन्ज्यककि गिपा तिवा हिन् तेमे ओरुङ् काङ् हिन् सिनि हारुङ साक चा मातेना वे । ओरुङ्ला छ्या वे तजोला चावा येसु ओरे दाङ्ला थोङ्नि ओरुङ् साङ तिनक् राङ थोङु चिला सिसिन् खो चिनक् वे तिनक् राङ खोला थोङु।
\v 3 चुकै खो ति चेङि वे तिनक् ताङ खोला रेवा ज्यकुप् तिवा तेरिककि राङ्ला चेङि ज्यकुउइ।
\v 4 दिक्पा किरुप् तेरिक कि ठिमकि का मेङेन्बु तिराङ् दिक्पा हिन्।
\v 5 दिक्पा ता ज्यितुप्ला राङ चावा छ्यार्सुङ् सिरुप् ताम छ्याराङ वे तेमे खोला ति दि दिक्पाराङ मेत्।
\v 6 खोताङ देतुप् तिवि दिक्पा मिकिउइ। दिक्पा किरुप् तिवि ना खोला थोङु ना खोला ङो श्येक्यु।
\v 7 ङिङ्ज्येबु तिवा खिराङ्ला सेम थारा थोरि मोजोसित्। चुकै चावा दुक्पा मेतुप् हिन तिनक् राङ दिक्पा मेतुप् लाका किरुप् तिराङ दिक्पा मेतुप् हिन्।
\v 8 सिकि दिक्पा कि तिदि सैतान ति हिन् चिला सिसिन सैतान ति तङ्नेसुर राङ दिक्पा क्यानि वे। सैतानको लाका तिवि खाला ग्यालुप्ला कन्ज्यककि पुज्युङ छ्यार्सुङ।
\v 9 सु कन्ज्यककि कन्ज्यक ने क्यानि वे तिकि दिक्पा मिकिउइ चिला सिसिन् कन्ज्यक चुकै वे तिनक् राङ तिसाङ गिउइ तिकि दिक्पा कि मुथुबु चिला सिसिन् दि कन्ज्यक नेसुर् क्याबु हिन् ।
\v 10 दिला राङ कन्ज्यककि गिपा ताङ सैतानकि गिपा ल्यामु क्यनि ङो श्येक्यु। सिकि दिक्पा वतुप् लाका किउइ तिदि कन्ज्यकति मिन् तेमे सिकि राङ्ङि नुक्ला ङिङ्ज्ये मिकिउइ ति दिङ कन्ज्यककि मिन।
\p
\v 11 खिरे गमा ने ङेन्दुप लेन ति दिराङ हिन् हरे ति चिकि चिक्ला ङिङ्ज्ये कि गोक्यु।
\v 12 ओरुङ काइन दगे हुङ्गुप् मेङु सुति डे ति हिन् तेमे तिकि राङि नक् ला सेसुङ। तेमे तिकि राङि नुक्ला चिले सेसुङ? चिला सिसिन् तिकि लाका तिवा मेलेवा नक् हिन्सोनाङ तिकि नुगि लाका ति लेमु नक्।
\v 13 ङे नक् तिवा दि लुङ्बि खिराङ्ला ङिङ्मार क्यासिन खिराङ यामछेन माकि।
\v 14 ओरुङ्ला छ्या वे ओरुङ् श्येप् नेसुर् मिजिला गाल्नि वे चिला सिसिन् अरेकि उज्यु नुक्ला ङिङ्ज्ये क्यानि वे सिकि ङिङ्ज्ये मिकि तिदि श्यिनि वे।
\v 15 सिकि राङि नक्ला ङिङ्मार कि तिदि मि सेतुप् मि हिन्। तेमे खिराङ्ला छ्या वे मे सेतुप् मि ताङ नाम्लाङ मिसिन्बु मिजि मेङु।
\v 16 दुक् राङ क्यानि ओरुङ ङिङ्ज्ये छ्या ङेक्यु चिला सिसिन चावा ओरुङ्ला सिनि राङि मिजि बिन्सुङ अरेकिसाङ अरे उज्यु मुक तिवाला राङि मिजि तेर् गोक्यु।
\v 17 हिन्सिनाङ सुताङ दि लुङ्बि ताम तिवा गिउइ तिकि राङि नुकति गोवा ला वतुप् थोङ्निसाङ मेतेरु तिला ङिङ्ज्ये मिकिसित् चुक क्यानि ति ताङ कन्ज्यककि ङिङ्ज्ये गि?
\v 18 ङे ङिङ्ज्येबु आङा तिवा ओरुङ छिक् ताङ खे क्याजिक् ङिङ्ज्ये मिकिउइ हिन्सिनाङ लाका ने ताङ हिन्दुप् ताम ने ङिङ्ज्ये किरुप् नक्।
\p
\v 19 दि नेसुर् राङ अरे छ्या ङेक्यु ओरुङ वतुप् ताम कि कन्ज्यक चाला अरे सेम्ति चेङि ज्यक तुप्क्यु।
\v 20 ङिङ्ज्येबु तिवा दुक क्यानि अरे सेम्गि ओरुङ्ला क्येन बिन्सुङ क्यासिन् कन्ज्यक अरे सेम सिनाङ् छ्ये हिन् तेमे खोकि तेरिक् श्येक्यु।
\v 21 ङिङ्ज्येबु तिवा दुक क्यानि अरे सेम्गि ओरुङ्ला क्येन मोतोङ्सियाङ ओरुङ् कन्ज्यककि दङ्ला चेङि मेङु।
\v 22 तेमे अरेकि काङ लाङ्सुङ ति दि खो नेसुर् ओरुङ्ला ङेक्यु चिला सिसिन अरेकि खोकि का तिवा ङेन्ग्यु तेमे खोला गा लाङ्गुप् लाका तिवा किउइ।
\v 23 तेमे खोकि का ति दिराङ हिन् खोकि ओरुङ्ला बिन्दुप् का तिवा खोकि पुज्युङ चावा येसुला मोवा कितुप् ताङ् चिगि चिक्ला ङिङ्ज्ये कि गोक्यु।
\v 24 सिकि कन्ज्यककि का ङेन्ग्यु ति कन्ज्यिक तानि देक्यु तेमे कन्ज्यक ति तिनि देक्यु तेमे ति नेसुर् राङ ओरुङ्ला छ्या गिउइ खोकि ओरुङ्ला बिन्दुप् थु चेङिकि किसा कन्ज्यक ओरुङ तानि देक्यु।
\c 4
\cl लिउ ४
\p
\v 1 ङिङ्ज्येबु वे तिरिक थु तिवाला मोवा माकि हिन्सिनाङ ति थु तिवा कन्ज्यक नेसुर् हिन्ते मिनते सिनि लेमु क्यानो ल्हो चोला सिसिन् आला जुनाक् ज्वप् लोमा तिवा दि लुङ्ला वानि वे।
\v 2 दि नेसुर् खिरेकि कन्ज्यककि थुला ङो श्येक्यु चावा येसु जुबुला वबु हिन् सिरुप् तेरिक थु कन्ज्यक नेसुर् वबु हिन्।
\v 3 तेमे येसुला मोवा मिकिबु तेरिक थु कन्ज्यक ति मिन्। चावा येसु खाला लाङ्गुप् थु हिन् चुकै ति खिरेकि दि लुङ्बाला गिउइ सिनि ङेनि वे तिदि लुङ्बाला वानि वे।
\p
\v 4 ङे ङिङ्ज्येबु आङा तिवा खिराङ क्न्ज्यक ति हिन् तेमे खिरे तिला ग्याल्नि वे चिला सिसिन् खिराङ् ताङ सु वे खोति दि लुङ्ला वतुप् ति सिना छ्ये हिन्।
\v 5 तिवा दि लुङ्बि ति हिन् तुक किसा तिवि सिक्याबु ताम तिवा तिवा ति लुङ्बि तिराङ हिन् तेमे दि लुङ्बिकि तिवि ताम ङेन्ग्यु।
\v 6 ओरुङ् कन्ज्यक ति हिन्। सिकि कन्ज्यकला ङो श्येक्यु तिकि अरे ताम ङो श्येक्यु सु कन्ज्यक ति मिन् तिकि अरे ताम मेङेन्दु। दि नेसुर् राङ हिन्दुप् ताम ताङ मिन्दुप् ताम हाक् कोक्यु।
\p
\v 7 ङिङ्ज्येबु तिवा वे चिकि चिक्ला ङिङ्ज्ये किरुप् चिला सिसिन ङिङ्ज्ये ति कन्ज्यक ति हिन् तेमे तेरिक सिकि ङिङ्जे किउइ ति कन्ज्यक नेसुर् क्याबु हिन् तेमे तिकि कन्ज्यकला ङो श्येक्यु।
\v 8 सिकि ङिङ्ज्ये मिकिउइ तिकि कन्ज्यकला ङो मेश्येउइ चिला सिसिन कन्ज्यक राङ ङिङ्ज्ये हिन्।
\v 9 दिला राङ कन्ज्यककि ङिङ्ज्ये अरे पार्ला छ्यार्नि वे कन्ज्यककि दि लुङ्बाला खोकि चिक पुज्युङ तिङ ताङ्सुङ तेमे पुज्युङ नेसुर ओरुङ थार्थुप्सित् सिनि।
\v 10 दिला राङ खोकि ङिङ्ज्ये वे अरेकि कन्ज्यकला ङिङ्ज्ये क्याबु मिन् हिन्सिराङ हरे दिक्पा नेसुर् सेम ग्युरुप् जिन्वा किरुप्ला खोकि पुज्युङ ताङ्सुङ।
\v 11 ङिङ्ज्येबु वे कन्ज्यककि ओरुङला दजो आला ङिङ्ज्ये क्यासुङ सिसिन अरे साङ चिकि चिक्ला ङिङ्ज्ये कि गोक्यु।
\p
\v 12 कन्ज्यकला नाम्लाङ सिकिसाङ तोङु मेत् ओरुङ चिगि चिक्ला ङिङ्ज्ये क्यासिन् अरे पार्ला कनज्यक राङ गिउइ तेमे खोकि चेङि ङिङ्ज्ये किउइ ।
\v 13 दुक राङ क्यानि ओरुङ्ला छ्या गिउइ ओरुङ खोताङ देक्यु तेमे खो ओरुङ तानि देक्यु चिला सिसिन ओरुङ्ला खोकि थु बिनि वे ।
\v 14 तेमे ङेरेकि थोङ्नि तेमे श्येनि वे पापिकि लुङ्बाला थार्वा तेरुप्ला पुज्युङ् ताङ्नि वे।
\v 15 सिकि चावा येसुकि पुज्युङ हिन सिनि मोवा किउइ ति तानि ति कन्ज्यक गिउइ।
\v 16 तेमे ओरुङ्ला कन्ज्यककि क्याबु ङिङ्ज्ये छ्या वे तेमे मोवा क्याानि वे ङिङ्ज्ये राङ कन्ज्यककि हिन तेमे सु ङिङ्ज्येला देकि ति कन्ज्यक तानि देक्यु तेमे कन्ज्यकि तिङ तितानि देक्यु ।
\v 17 ठिम किरुप् ङिमाला ओरुङ मोवा किरुप सिनि दिला राङ् ङिङ्ज्ये चेङिु गाल्नि वे चिला सिसिन खो चिनक्वे तुक राङ क्यानि ओरुङाङ दि लुङ्बाला वे।
\v 18 ङिङ्ज्येला काङ ज्यिगाङ् जिवा मेङु । हिन्सिनाङ् ङिङ्ज्ये चेङि कि जिवाला तोर्जिक्यु चिला सिसिन् छ्यार्पा वासाला जिवा गिउइ । हिन्सिनाङ सु जिवा किउइ ति ङिङ्ज्येला चेङि मागाला वे ।
\v 19 ओरुङ् ङिङ्ज्ये किउइ चिला सिसिन कन्ज्यककि गमाला ङिङ्ज्ये क्यासुङ।
\v 20 सिकि ङा कन्ज्यका ला ङिङ्ज्ये किउइ सिनि सिउइ तेमे राङि नुक्ला ति ङिङ्मार किउइ तिकि जुनाक जोबु हिन् चिला सिसिन तिकि थोङ्गुप् नुक्ला साङ ङिङ्ज्ये मिकिउइ सिसिन मोथोङु कन्ज्यकला च्यक क्यानि ङिङ्ज्ये किउइ ।
\v 21 तेमे खोकि दि का ओरुङ् तानि वे सिकि कन्ज्यक ला ङिङ्ज्ये किउइ तिकि राङि नुक्लाङ् ङिङ्ज्ये कि गोक्यु।
\c 5
\cl लिउ ५
\p
\v 1 येसु राङ चावा हिन सिनि मोवा किरुप् तरिक् कन्ज्यक नेसुर् केबु हिन्। सिकि पापाला ङिङ्ज्ये कि तिकि खो नेसुर् केबुलाङ ङिङ्ज्ये किउइ।
\v 2 तेमे ओरुङ् कन्ज्यकला ङिङ्ज्ये किउइ खोकि का तिवा ङेन्ग्यु दि ने राङ् ओरुङ् कन्ज्यककि गिपा तिवाला ङिङ्ज्ये किउइ सिनि छ्या ङेक्यु।
\v 3 कन्ज्यककि ङिङ्ज्ये दिराङ हिन्कि ओरुङ् खोकि का तिराङ् ङेन्ग्यु तेमे खोकि का ति च्येन्दि मेत्।
\v 4 चिला सिसिन कन्ज्यक नेसुर् तेरिक लुङ्बाला ग्याल्ग्यु तेमे लुङ्बाला ग्यालुप् राङ अरे मोवा हिन्।
\v 5 लुङ्बाला ग्यालुप् ति सु हिन्? तिराङ् हिन् सिकि येसुराङ कन्ज्यक हिन् सिनि मोवा कि।
\p
\v 6 खोति देराङ वे सुति छ्यु ताङ् ठाक नेसुर् लेसुङ् चावा येसु खो छ्यु नेसुर् क्याजिक् मिन् हिन्सिराङ् छ्यु ताङ् ठाक नेसुर् लेसुङ्।
\v 7 चिला सिसिन सेतुप तिवा तिवा राङ हिन्।
\v 8 थु छ्यु ताङ् ठाक दिसुङ्राङ डिङ्नि वे।
\v 9 अरेकि मितिविकि श्येतुप् ताम ङेन्ग्यु सिसिन् कन्ज्यककि श्येतुप् ताम ज्येन् यार गिउइ। चिला सिसिन् कन्ज्यककि श्येतुप् ताम ति दिराङ् हिन् राङि पुज्युङ्कि ताम श्येनि वे।
\v 10 सिकि कन्ज्यककि पुज्युङ्ला मोवा किउइ ति तानि राङ श्येतुप् ताम गिउइ। सिकि कन्ज्यक्ला मोवा मिकिउइ तिकि खोला जुनाक् जोबु हिन् चिला सिसिन ति कन्ज्यककि पुज्युङ्कि श्येतुप् ताम्ला मोवा माक्याबा वे।
\v 11 तेमे श्येतुप् ताम ति दिराङ् हिन् कन्ज्यककि ओरुङ्ला नाम्लाङ् मिसिन्बु मिजि बिनि वे तेमे दि मिजि खोकि पुज्युङ् तानि वे ।
\v 12 सुताङ् पुज्युङ् वे ति तानि मिजि वे सुताङ् कन्ज्यककि पुज्युङ् मेत ति तानि मिजि मेत्।
\p
\v 13 ङेदि दि ताम कन्ज्यककि पुज्युङ्कि मिन्ला मोवा कितुप् खिराङ्ला टिबु हिन् तेमे खिराङ् ताङ् नाम्लाङ् मिसिन्दुप् मिजि वे सिनि छ्या ङेत्।
\v 14 कन्ज्यककि दाङ्ला अरे मोवा तिदि दि राङ वेकि अरेकि खोकि सेम्नेसुर् काङ ताम तिवा लाङ्सिन् खोकि ङेन्ग्यु ।
\v 15 तेमे अरेकि खोताङ काङ् लाङ्सिन् खोकि अरे मोपार ङेन्ग्यु सिनि छ्या वसित् खोताङ् लाङ्नि वतुप् ताम ङेनि वे सिनि छ्या वे।
\p
\v 16 सिसिाङ् राङि नुगि सिमिजिम् दिक्पा किइ किरुप् थोङ्सुङ क्यासिन् तिदि मोपार किगोक्यु सोमिजि दिक्पा किरुप् नुक्ला कन्ज्यककि थार्वा तेर्क्यु । सि जितुप् दिक्पा साङ गिउइ तिला सिसाङ मोपार कि गोक्यु सिनि ङा मिसिउइ।
\v 17 तेरिक मेलेवा लाका तिवा दिक्पा हिन् हिन्सिनाङ् श्यि मिजिबु दिक्पा साङ वे।
\v 18 ओरुङ्ला छ्या वे कि सु कन्ज्यक नेसुर् केनि वे तिकि दिक्पा मिकिउइ हिन्सिनाङ सु कन्ज्यक नेसुर् केबु तिवाला कन्ज्यककि तिवाला ल्यामु क्यानि ज्यगु तेमे डेकि तिवाला मेरेगु।
\v 19 ओरुङ्ला छ्या वे ओरुङ् कन्ज्यक ति हिन् दि लुङ्बाला लाक्ला लानि वे।
\v 20 हिन्सिनाङ ओरुङ्ला छ्या वे कन्ज्यककि पुज्युङ वानि वे तेमे ओरुङ्ला रिक्पा टेमु बिनि वे सुति टेङ्बु कन्ज्यकला वे खो ति टेङ्बु कन्ज्यक ताङ नाम्लाङ् मिसिन्दुप् मिजि हिन्।
\p
\v 21 ङिङ्ज्येबु आङा तिवा खिरेकि राङि राङ् राङ्ला कु नेसुर् थारे राङ् ज्यक्।