weu_reg/53-1TH.txt

\rem The text in this file was extracted from C:/DCS/Chin, Rawngtu/WORD.10.24.24/53. I Thessalonians.docx.

I THESSALONIKA

THESSALONIKA
KHOHLANG NAMME DЁNNAK PAUL LE
CA CAWN PAKHAT NAK

Ca rëpüng:	:Paul
Cacawn :	:Thessalonika Khrihcabu
Ca rëkum:	:AD-51
Tünnak Awl
Thangthäl Paul lennak Timoti a hlarpnii nah Yin ancë vëngah Paul nünah Macedonia ramme ärlla hramnak haw dangsha nennak Troas ah a hmü (Thangt 16:6-11). Kha nennak haw Aegean tuili haw kat nien thangthäl awl rök-e khüila Macedonia ramla haw ancë. Khii ah krëknak hëyert aiye lakah Philippi kho ah Khrihcabu an va ngüishah (2:2), Thangt 16:12-40. Khaphöi ah kho mawp lam ennak tuicum lammah ci nien Macedonia kholen a nipüng Thessalonika kho ah an nalo.
Khalang kholen ka, tuili këng ennak Rom kho-e a mawpnak lam a pëkkunak lampüi kawk ah a awmpüng kholen nukuk a ni. Kun a kuh nampüng nünah dëkvan kho tüküp ennak am paa vëngnak kholen a ni. Pacim nünah Thessalonika hlang a ngen haw kham hëi-en thangthën awl nünah am hringnak haw a tangkë la thungpë hëi-en khalang am yümnak thangthën awlka, am ram a liuhou dök ni kawlla am tui ah kho a kёng a vai hrillah a thanghou (1:8, 4:10).
Thessalonika khohlang namme am kulung thungnak hë a yöipet cala a va tangpüng ni-ün (Thangt 17:1-10). Thangthën awl rök nampüng nünah Jew hlangnam haw yerlnin kho ninthum hrillah tuhcang kunak immah am tuhcangnak hril lennak a va tünnak a ni. Nazareth khohlang Jesu ka, awlphüngnak a bësha ne kawnghaw a thümsha hëi. Jew hlang a ngen nam nünah am yümdök ni kawlla Gentel hlangnam me vannak thangthën awlle bit a bitnak haw ngai tumhmang ta-ö la a awm (2:14). Khati töng nenphë a yüm hüm-ü püngnam Jew hlang a ngennam nünah khii krëknak hëyert-ai a awm. Khane dawkah thangthën awl rök nampüng nünak ampök ne thah ah a rang ngaila Thessalonika kho haw cëshën pala am hüm (15:16).
Khabang lahaw Thessalonika kho-e yümpüng namka, a khah ne kawkah cëshenhëi pala a cangne dawkah tanbang lale kho am shakpa, tien Paul nünah ngai khokhawk nennak a awm. Khane dawkah phrë hëi-en a awm pölök ah am yümnak celsha-e khüila Timoti haw a tärlphëi a ni (3:1.2). Thessalonika kho-e yümpüng nam nünah Böilen ne a hüm bangla am hringnak haw Tomoti nünah Paul haw a rökpë (3:6), khalang thangthën awl a thüm pölök AD-51 ah Paul nü nah Thessalonika cacawn haw a rë a ni.
Pacim nünah Paul le kulung bongshin kawkah bit bien khiikrëk nak a kham nampüng yümca hlangnam me dënla hëlang cacawn hë a rë shah.Hëlang cacawn nünak hë “A ma-e pöngnak kawk ennak a lenshai nak kawkah” i khöu hëi püng Pacim tommah a kökah kawila im hringne khüila, a bou yap-ü khüla tha i pëhëi a ni (2:12).


1 THESSLONIKA 1

Tawiku Nak
1.Pual,Silas ennak Timoti, ti namka, Pa pacim ennak Böilen Jesu ah awmnam püng Thesalonika kho-e Khrihcabu namme dёnla, ca ka nancawnhёi.A rёn nennak ngainim naka, nangmi ah awmsheh.

Üm Yёrlnak Thangthёn Awl
2.Kёimi ka nangmi namhlӓm me hamla Pa pacim haw a yunya kam ümyёrl na-en kёimi-e kam shawshang nak kawkah haw nangmi namhaw ka nanpök hёita.
3. Nangmi-e nam yümnak hrillen nak nam bitnam, shincik nennak nam panki nak nam ennak, mingmi-e Böilen Jesu Khrih haw ngai-u nak hrillen nak ngaithёn nak namhaw impa a nipüng Pa pacim me hmai ah a yun a ya kam pökkhürp ta.
4. Pa pacim a shincik nakpüng köinau nam, nangmi haw rüknak nam khamne kawnghaw kёimi kam thümta.
5. A kawngka, kёi mi-e kam rök-e thangthёn awl dök hrillen nak, ni kawlla a lenshai nak hrillen nak phё nisheh, a cimpüng müihla hrillen nak phё nisheh, a küp a bёpüng ngairep nak hrillen nak phё nisheh,nangmi-e dёnla kam vathou.Kёimi haw nangmi tommah im awmhmai pölök ah nang mi-e hamla ta-ngan bangle hlang kam nita tihaw nangmi nünak nam thümta.
6.Nangmi hawphë,üivat lёktham hёyet aiye kawkah cimpüng müihla lamme,ümyёrlnak hrillen nak, a awlhaw nam dou-en, kёimi tommah Böilen pacim haw a yüm nampüng la im tang.
7.Kha a tangne dawkah, Macedonia ram ennak Achaia ramme a awm nampüng nge am hamla phë cakcë la a tang.
8.Tannak le ti ahka,nangmi-e dën lammah Böilen Pacim me a awlthang haw Macedonia ram ennak Achaia rammah a thangdök ni kawlla,Nangmi-e Pa pacim nam yümnak awlthang haw kho tüküp ah a thanghou.Khane dawkah mingmi ka muk-at pai rökpa a kawng awm-ün.
9.Kёmi nünak nangmi-e kawkah ta-ngan bangla kam va-el ti-e a kawng a lamhaw am mingmi nünah am yah.Hring nennak bё-en, a düngpüng Pa pacim me a bitbit haw, nangmi nünnak nam bitbit la phё nisheh,
10.A va tiku papüng khah mapnak ennak mingmi i tlanhёi püng im Böilen Jesu-e a shii nennak Pa pacim me a thoosha tlai a caka, vankho ennak a va krumnak pahaw vatöpala phё nisheh, a rup a rang namhaw vitah tawng hou-en, Pa pacim me dёnla am hlӓtku nak hou-e a kawng a lam namhaw am mingmi nünak am rök.



1 THESSALONIKA 2
Paul le A Bitbit Nak

1. Köinau ti, nam dёnla,këimi kam mathou naka, a tongmai a ni-ü nekawng namma nünak nam thümta.
2.Nangmi nünah namthüm a töngah, këimi ka,Philipi kho ah,üivat lёktham nak, shëkha nak,kam kham phöi-ah, Pa Pacim üp nennak, a lenkök le rarltuk nennak, Pa pacim me thangthën awlhaw krii kawlla kan rök bëhëi.
3. Këimi nünak,thawlhma nak,a shё a hru, bëlim nak ennak, nangmi haw kan hrü ah cou hëi-en kan yöhhёi ni-ün.
4.Thangthën awl,rökpala,këimi haw,Pa pacim nünak i tahhëi a töngah,hlangnge a thahüm bang ni kawlla,këimi-e kulung bongshin a thümpüng,Pa pacim me a thahüm bangla,kam rök ta.
5.Tannak kawngle ti ahka, nangmi nünah nam thüm a töngah këimi ka,hläpnak awl, hlarp-at pai kam rök-ün, rawkah daanak, hüm pankinak nam, a awm-ü haw, Pa pacim ka, këimi-e kam cakcë nita.
6.Khaphöi ballah,Jesu Khrih-e thangthӓl hlang kani bangla,hmünrii kan phӓrlshahёi nenphё hlangnge i pёhёi huham haw nangmi-e kawkah kam yӓp-ün, a köu namme dёnnak phё yӓp kawlla, nangmi-e dёnnak a düm cala kam bit.
7. Nangmi haw kan shincik nak hёi ne dawkah a nu nünak a cahaw a hlöm a dan bangla,
8 Kёimi nünak nangmi haw kan panaw sha hёi-en, Pa pacim me a thangthёn awldök a ni kawlla kam hürt hringnak hawphё, pё pala kulung awmta.
9.Köinau ti,këimi nünak üivat nennak kam bi-en,kam panki ne kawnghaw nangmi nünak nam thümta.Nangmi-e kawkah pakhat pai shukah vamsha kawlla kёimi nünak khomёng khodёi kam bi-en Pa pacim me a thangthёn awl haw nangmi kan rök pёhёi.
10.Kёimi nünak,yümpüng nangmi namme kawkah haw cimcai nennak a düngla kam bien tӓlpa a awm-ü khüla kam awmmah ngap haw nangmi ennak Pa pacim haw kёi mi-e cakcё la kam awm.
11.Nangmi nünak nam thüm a töngla a pa nünak a ca nau namme vannak a bit bangla kёimi nünak phё nangmi-e vannak kam bi-en,
12.A pöng nennak a huham lenshai nak kawkah nangmi i khöuhёi püng Pa pacim ennak a thök tanla nam khoshak hringpala nangmi pakhat ci haw kan hrü ah cou hёi-en tha kan pёhёi.

Pacim Me Awl Am Yümnak
13.Nangmi nünak kёiye dёnnak nam yah-e Pacim me awlphüng haw namyüm len naka hlangnge a awl ni kawlla a tangkё le Pacim awl a ni bangla a yümpüng nangmi kawkah, a nerl a tat püng Pa pacim me a phungawl namyüm ne dawkah kёimi nünak Pa pacim haw a yunya kam thangthёn shah.
14.Köinau ti nangmi nünak Khrih Jesu ah a awmpüng Pa pacim me a Khrih cabu nam a louku nampüng la nam tangta.A kawngka am mingmi nünak Jew mipün namme kut dawkah, üivat lёktham, nam kham bangla nangmi hawphё nam miphün namme kut dawkah a ma bangla nam khampa.
15. Jew miphün nam nünak Böilen ennak prophet namhaw ngawn hёi-en, kёimi hawphё i tut ah vai hёi-en, i thukah thёuhёi. Am mingmi nünak Pa pacim haw thahüm kawlla hlanghlӓm nam haw rarlnak hёita.
16. Miphün köunam khamnak am manne khüila, kёimi-e kam phungrök haw i khau pёhёi-en am thawlla hmanak namhaw a yunya am bёshah.Khane dawkah a shinne nak haw am mingmi-e vannak a hlӓmböng la a thou.
Pawl le Yüm Nampüng
A Hmühüm Nak Kulung
17.Köinau ti, kёimi nünak kulung bongshin kawk lammah ni kawlla hlangpüm lammah nangmi ennak a shöng im phrёku nenphё nangmi-e nam mik-hmai hmutlai ye khüila kam thahüm ai-en kam panki ta.
18. Khane dawkah kёimi ka nangmi dёnnak valo pala kam thahüm.Kёi Paul nünak hlap-at dök ni kawlla hlarpnii hrilla a tangkёla kam panki nenphё shetang nünak kёimi haw i khau hёi.
19. Mingmi-e im Böi Jesu a vakrum lani a tangah ka Böilen ne a hmai kawkah mingmi-e im ngai-u pa-e kawng, yёrlnak pa-e a kawng ennak hӓmma hёnak khömök la a tangpa püngka ha-u le ? Nangmi nam ni-ü bang ?
20.Tannak le ti ahka, nangmi nünak kёimi-e kam huham lenshai nennak kam ümma yёrlnak haw a ni.

1 THESSALONIKA 3

Timoti Haw A Tӓrlnak
1. Khane dawkah kёimi nünnak a hlarpbё kam-ü kuyap vӓrl ü-en kamma dökhaw Ethen kho ah awmshut pala kam ti-en,
2.Khrih-e a thёnpüng thangthёn awllah Pacim me bitbit püihöi a nipüng kёimi-e kam nau Timoti haw ka mantӓrl.A ning kaman tӓrlne kawngka nangmi-e nam yümne kawng ennak pёngku-en nangmi kan hrü ah cou hёi-en, namcёk ah khöngne khüila,
3. Hёlang üivat lёktham ne kawngah, ha-u pai koi ah bawngyap ü-e khüila a ni.A kawngka hё bangla üivat lёktham khamne khüila kёimi i tah hёi tihaw nangmi nünak nam thümta.
4.Tannak le ti ahka, nangmi tommah im awmhmai vёng nawnnak kёimi nünak üivat lёktham kam kham pata tihaw nangmi haw, lammala kan rökpё tёhёi nien, a mabang töngla a vatang haw nangmi nünak nam thümta.
5. Khane dawkah, bёlimpüng hlangka muk-at lammah nangmi haw i bёlim nak hёi-en kёimi-e kam panki bitbit nak haw a tongmai la a tangpahaw lühёi-en kёi nünak a hlarpbё ka-ü yap vӓrl-ü ne dawkah nangmi-e nam yümnak haw thüm yap-e khüila a ninghaw ka vantӓrl.

Timoti-e A Bitbit A Röknak
6.Khati nenphë, tuhrangah Timoti nünah nangmi dën ennak valat-en, nangmi-e nam yümnak ennak shincik kunak pёngku püng yërlnak thangthёn awlhaw kёimi i rökpё hёi.Khaphöi balla nangmi nünak kёimi haw a yunya a thёnla nan pökpё hёi-en, kёimi nünak nangmihaw kanhmü hüm münhёi bangla nangmi naphё kёimi haw nan hmühüm hёita tila a rök.
7. Kha a tangne dawkah,köinau ti këimi nünak, khah map nennak,khodëng lungma nak a tüküp kam hrum vëngah, nangmi-e nam yümne dawkah nangmi nam ennak pëngku-en kulung ngainim nak haw kam hmüta.
8.Nangmi nünak Böi JesuKhrih ah nam cëkkhöng lani a tangah ka,tuhrangah mingmi im hringta.
9.ImPa pacim me a hmai ah, nangmi-e kawkah kamhmü kam manne hëlang ümyërlnak a hläm bönghaw kampök-en,nangmi-e hamla Pa pacim haw ta-ngan bangla le a rënnak hë kam rök tlai yappa.
10.Këimi ka, nangmi tommah hmüku yappa ennak nangmi-e nam yümnak haw a hüm a vӓtnam püng bёsha pa-e khüila khomëng khodëi panki ne kulung ennak shaw kamshang.

Khrihca Bu -e Hamla Hüithü Nak
11. Im Pa a nipüng Pacim a ma ennak im Böi Jesu Khrih nünah nam dënla kamma lo nakpa lam haw kho i va khangpë hëisheh.
12.Këimi nünah nangmi haw kan shincik nak hëi bangla,nangmi phë namma pakhat ennak pa khat haw shincik kunak phë nishëh,hlanghläm shincik nak phë nishëh,töu-ah hrang nennak nam bё pala phё nisheh, Pacim nünah bit va bishëh.
13. Khaphöi balla im Böi Jesu Khrih nünah a me a cimcai hlangnam tommah am vakrum ahka, im Pa pacim me a hmai ah nam kulung bongshin namhaw a düt a cimcai böipüng ennak täl-ü pala vacёkah khöngsheh.Amen.

1 THESSALONIKA 4

Kulung Cimcai Nak
1. A bounah awl karök hümka, köinau ti nangmi nünah tanbang la nam awm-ii pa, Pa Ppcim me a hüm bangla tan bala awmpa tihaw kam dënnak nam cangku bangla,töu ah hrang nennak küpah bë-e khüila, Böilen Jesu hrillen nak këimi nünah kan hüithü hëi-en, kan hrü ah cou hëita.
2.Ta-ngan bangle ka-awl namhaw phё Böilen Jesu-e hrillen nak këimi nünah kan ap-hëi tihaw nangmi nünah nam thümta.
3. Pa pacim me a hüm pankinak ka, nangmi nam nünah cimcai nennak nam awmpa a ni.Muk-at lamma ka nangmi nünah,nuta tawngpa thawl bitnak haw kёngshen-u laka,
4. Pa pacim a thüm-ü püng hlangnam nünah hüm panki nak a lenla tapüng bangni kawlla,
5. nangmi nam nünah cimcai nak, a thën cala ma ennak ma awmming pala phë ni shëh,
6. hëlang nge kawkah nam thawlla hma-en, köinau tihaw limma mawnak lam ennak thawlhma-ü nak pala phё a panki nak awmta.Këimi nünak kam rök-en a düng a lawngla kam bittё bangla Pa pacim nünah khabang le thawlnak namhaw kham ma-e hlang a hlӓmme bennak bëkhin pata.
7. Pa pacim nünak a shё a hrula mingmi haw i khöuhëi ni-ün,cimcai sha-e khüi la i khöuhëi.
8.Kha a tangne dawkah, mingmi i hnärt hëipüng ka, hlangdök hnärt ni kawlla Böilen ne cimpüng müihla haw mingmi i pëhëi püng,Pa pacim haw am hnärt a ni.
Shincik Kunak Hrillen Nak
Bitbit Nak
9. Köinau shincik kunak pa a kawng,nangmi haw ka rë-en kanpë hëipa awm-ün, tanne kawngah le ti ahka,nangmi nünak pakhat ennak pakhat nam shincik ku-e khüila, Pa pacim nünah i tuhcang hëi hlang nam nita.
10.Khadök ni kawlla, Macedonia ram hmün tüküp ah awmpüng köinau ti nünah khabang la bihëi ta,khati nenphë köinau ti nangmi nünah töu-ah pӓrlle küpah bëne khüila,
11. a köu hlangnam me hmai ah a thënla awm-ii ta-ngan pai a hüm kawlla,
12.këimi nünah a cükah kan ünhëi bangla,a düm cala awmme, ma-e bit haw bit-e ma-e kut ennak bit-e khüila,kulung thёn nennak nam tha-ü pala këimi nünah kan hrü ah cou hëita.
Khrih A Valo Tlai Nakpa-E Kawng
13.Köinau ti ngai-u nak a ta-ü nampüng hlangköu namme am rënku bangla, nangmi nünak nam cik-rën ku-ü pala, a ip nampüng nge am awm-ii haw thüm kawlla awmme khüila haw kёimi nünak kam thahüm-ün.
14.Jesu ka shii nennak thoutlai ta tihaw mingmi nünak im yümma ka, khabang vanla,Jesu ah a ip nampüng ka khalang Böi tommah khöuhmai hёi pata.
15 Pa pacim me awl hril lennak nangmi haw kan rökpё hümhёi ka, Böilen Pacim a vakrum tlai lennak haw,a hringhun nampüng mingmi namka, a ip khön nampüng nge thah ah im lamma pata tihaw ni-ün,
16.A kawngka, ärla hram nennak,vanhlang namme am Böi awl yah nak,Pa pacim me mawngkai tum awl lennak, vanlam ennak a mahaw vakrum vёi, Böi Khrih ah a shitё nampüng haw, lamma la thouhë pata.
17.Khalen naka,a hringhun nampüng mingmi ka , vankho ah Böilen Pacim me dёnnak thou-e khüila khalang hlangnam tommah mёimaw vannak i thüknak hёi hrillen nak, Böilen tommah a yunya im awmhmai pa.
18.Kha a tangne dawkah,hëlang awlnam hrillen nak pakhat ennak pakhat haw kulung ngainim nak va pёku-u ma.

1 THESSALONIKA 5

Böilen Pacim Me a Nin
1. Khati nenphë köinau ti,khalang a cük namme kawnghaw nam dënla ka van rëpa hümpa-ün.
2. Tannak le ti ahka, a ru hümpüng nünak mëngah a valo bangla, Böilen Pacim me a cük ka a vathou pa ti-e a ninhaw nangmi nünak a cëkha la namthüm ta.
3. Düpdel nak awmta, këah rarl ennak im lawtta am tivëngah, a ca raipüng nuta-e dawkah ca thang üivat nak a thou bangla,am mingmi-e püm vannak pramnak thouvёi lawtnak manhёi pa-ün.
4.Khati nenphë, köinau ti khalang ninka, a ru-ah raipüng bangla nangmi-e dёnnak a va thoupa. Nangmi ka a hmüpnak kawkah awmpüng nam ni-ün.
5.A kawngka,nangmi a hlӓm namhё,a dёiye ca, a nin ne ca, nam nita.Mёngnge ca,a hmüp-e ca nam ni-ün.
6. Khane dawkah, hlangköu nam bangla ii kawlla raring ku nennak im tӓt len.
7.A kawngka, a ip nampüng nünah, khomëng ah ip thëihëi ta,yu ah tainam ennak a rui ah vaa nampüng phë mëngah rui ah vaa hëita.
8.A dёiye a ca nipüng mingmi namka im raring kuvёi tinak im awm. Yümnak, shincik kunak ti-e krang ӓrtnak shapho hawphё im büngah nak vёi, khamnah, thouku pata ti-e ngai-u nak shi khömök haw phё im büngvёi, raring ku nennak im awmpa.
9.A kawngka, Pa pacim nünah mingmi namhaw i shinne nak hëi pala a pöktawk ni kawlla, mingmi-e im Böi Jesu khrih hrillen nak khamnak manne khüila i tah hёi a ni.
10.Mingmi ka, imma let ahphë nishëh, im ii ah phë nishëh, khalang Böilen tommah im hring hmai pala, Böilen ka, mingmi hamla shiinak a kham.
11.Kha a tangne dawkah,tu hrangah nambit bang töngla, nangmi nünak tuhrangah nambit bangla pakhat ennak pakhat hrücou ku-u laka, pakhat ennak pakhat haw bomma bil ku-u.

Hrü ah Cou Nennak Hrilham Pënak
12.Köinau ti,nangmi-e kawkah yungah thala Böilen Pacim mahaw i uk hёi-en raring kunak pala i tuhbӓrl namhёi pünghaw amshak namtawk pala phё nisheh,
13.Am mingmi-e ambit namme dawkah shincik kunak kulung ennak am mingmi haw shella hlangla namtah pala phё nisheh nangmi haw kan hüithü hёi.Nangmi pakhat ennak pakhat a rӓp a rüila awm-u ma.
14.Köinau ti, nangmi haw këimi nünah kan hrü ah cou hümhëi ka,a hüm a thüah awm nampüng haw raring kunak pala tuhbӓrl-u ma.A kulung cikah rёnku nampüng haw kulung tha vapё-u.A vӓt a vai nampüng haw vabom mabil-u ma. Hlang a hläm me vannak kulung shaunak ta-u ma.
15.Ha-u pai nünak hlangnge vannak a shert haw a shert ennak nam thungtlai-ü ne khüila,raring ku-u ma. Namma nam hawphë nishëh,hlangnam me hamla phë nishëh, a thёn nakdök haw yunya panki nennak bi-u ma.
16. A yunya ümmah yërl-u ma.
17. A yunya bät kawlla hüithü shawshang-u ma.
18. A tüküp ah a rënnak haw thangthën sha-u. A kawngka, nangmi nünak khabang la nambit pala Jesu Khrih ah Pa pacim nünah a panki nak awmta.
19. Cimpüng müihla-e huham haw düpsha bel-u.
20. Prophet-e a awlrök haw va shëkha nak bel-u.
21. Khati nenphë a tüküp haw dӓrtah kan-u laka a thёnpüng haw nam kulungah ta-u ma.
22. A then-ü püng nambäm haw këngshën-u ma.
23. Ngainim nak Böi,Pacim a ma nünak nangmi haw a hlämla i cimcai shahëi sheh, im Böi Jesu Khrih a vakrum lani a tangah ka, nangmi-e nam müihla kulung bongshin, nam pümhaw,tälpa a lawt-e khüila raring kunak vata-u ma.
24. Nangmi i khöuhëi püng Böi ka, düng nennak a küppüng nien, khabang la bi pata .
25. Köinau ti, këimi-e hamla phë i hüithü pё-u ma.
26.Im köinau ti a hlӓmböng haw,a cimpüng hnimku nenak va tawiah kan-u ma.
27.Hëlang cahaw köinau nam, am hlämme hmai ah nam khëpёhёi pala Böilen ming ennak nang mihaw a bёpila kan rökpё hëi.
28.Mingmi-e im Böi Jesu Khrih-e a rënnak ka, nangmi tommah awmhmai sheh.