nyj_reg/59-HEB.usfm

\id HEB
\ide UTF-8
\h Baebrania
\toc1 Baebrania
\toc2 Baebrania
\toc3 heb
\mt Baebrania
\c 1
\cl Chunda 1
\p
\v 1 Kuruma na mpo karekare, mungendo ningi na mubhususe bwingi, webhanga na bhatita iyetir'ebhatahwa.
\v 2 Ongo, mosentambi nsi s'ekwende, warebha n'itu iyetire musikewe, ingw'aresimanikae mine mwandu w'e bhikai bhiti, iyetire we hotu waronjang'echuo.
\v 3 Nangi, washea eritatwa rae n'ensusanya yae, n'ibhereresha kinsi kikai mo kinwa chae kinkangwe waronja erikoma r'ebiti n'erika ekwabhume kw'ebhukakare bw'ekiongo mo bhutaka mbu bhuri ekwiyo nguru.
\p
\v 4 Mw'ibhesae mukakare w'esangashani nsi iwe ngw'erisierwato mu rina rareng'eabho.
\v 5 Bhushe mo sengashani Ongo utangebhanga: ongo musikyani nakukubhuta rinotu? Na kuruma nampo: Nisebhesa kuriwe ishe, nae usebhesa ekury'ani musiky'ani?
\p
\v 6 Na warekiya wakimiya mo chuo entangi, weba: esangashani siti sa Ongo simutatange!
\p
\v 7 Nampo tu, webha mo sengashani: iwe ngwaronja esangashani sae eyuhu, na mo bhakori bhae omini rwa kasha.
\p
\v 8 Ina webha kuri musiky'ae: E kitumbi chabhe ch'ebhubhake e Ongo, ch'ematu ati n'eati; Enkoma y'ebhubhake bwabhe, nkoma y'irengekanya;
\q
\v 9 Ureshima erobhansa, n'iyongw'ebhubhi; ngy'asingwa, e Ongo, Ongo wabhe wakutira rungo rwa ngowa habhasirwa n'ebharengeke nabhe.
\p
\v 10 Nampo tu: Ongo, Nyerekuritu, uronjang'erisondori echuo, n'ekwiyo ibyo murimo w'emine yabhe;
\q
\v 11 Bhiseshirirayo, ina Ongo ukubha ho, bhisekunguhayo ebhiti bhuri ngombe,
\q
\v 12 Ukwondondayobyo bhuri nshangi na bhisebhundukayo, Ina oongo usiya bhubho-bhubho, N'ebhindi byabhe bhitasiriyo.
\p
\v 13 Na muncho mo sangashani utangebhanga: rika mo kwabhume kwani, Iya mo kashangi kaseronjie ani e bharenda bhabhe kinantiro ch'emindy'abhe?
\p
\v 14 Emitima iti nti ikorengi Ongo, bhashishiwa bhendi kakora mo murimo mw'ikore bhis'emwandu w'enchukayo?
\c 2
\cl Chunda 2
\p
\v 1 Bhushe na'cha twemine nguru mo bhikai mbi byarekind'iyerikira bhate, mw'esubhaha tutarianyiwingi kore nabyo.
\v 2 Bhushe amabhes'ekinwa chaturwa n'esangashani chabhesenga na murimo na amabhese kinsi ebhisha myomba na kinsi ikemwa raninkwa obansa ndu rwakomenwaro,
\v 3 Bhuni bhuseramayo bhate, mw'inena nshukayo nkiri, ngi yaturwa kasa na nyerekuritu, twaberereshiwayo nambi bherikirangayo,
\v 4 Ongo wasimirana n'erikora rabho mu twengeko, mubhishisharo, na tushingishiro twingi, na mo mihango y'emutima-wakonda yabanyiwa nae mw'isasa rae.
\p
\v 5 Nampo, nti mo sangashani ngi mwakia Ongo waterek'echuo kisiyayo inchi chebanga bhate,
\v 6 Nakubha hari uma ngu wareronja mw'otuko ruma ereira ndo. emwea inye wiye mwemusubhukiya, ari emwan'emwea wiye mwemubhumbutisa?
\q
\v 7 Umuhichanga mu kashangi kakeke kumbo n'esangani, umutereka mo kembo k'itatwa n'osubhahwa.
\q
\v 8 Ureriya kinsi kikai hasikw' emind' yae, Nampo, mwemutereke kinsi kikai, Ongo ntwaresia kikai nchi nti chaterekerwae. Ina, ntitwasunga neki kano kashangi mbu kinsi kikai wamaninkwa cho.
\v 9 Ina ingu wahichiwanga mu kashangi kakeke kumbo n'esangashani, Yesu, twamusunga waninkwa kembo k'itatwa n'osubhahwa bushe n'eroku rwanubhanga moe, kongo mo nsasi sa Ongo, wanubha mo roku bhush'ebhati.
\p
\v 10 Rarengekana, impo, mbu kinsi bhushe nae na iyetire we ebhikai bhiti bhiri ho, imbi abhesenga byahuna etindikiya m'oritatwa nguru r'emwana, rasimanya iya hende n'eminubho y'enchukayo yabho.
\v 11 Bhushe ngo shuururange nambo ebharekind'eshuururwa ebhati bhatukire mu uma. Bhushe nancho usira nkene s'ebhikira bo bhasike bhitu.
\v 12 Mor' iebha we mbu: niseturayo erina rabhe kuri bhanakitu, nsekutata munkati n' enkumanano.
\p
\v 13 Na kuruma tu: Neriya ekuri ongo. Na kuruma tu: Nisunge ani n' ebhana bharembese oongo.
\p
\v 14 Muncho, bhushwa ebhana bhabhesa mo nchama na mo nyama waribhesa mubyo hotu wesine, kongo ietere eroku, wahundisa ingu uri n'ebhunkangwe bwe'roku ngi mushumbu.
\v 15 Nangi wobhora ebhati mbi bh' e bhobha bw'eroku, abhesenga mo matu abho ati nti bhakobhe mo bhobha bwaro.
\v 16 Bhushwa mo r' eira nti ngashani ngiseya kasake we eina e mbuto ya Ibrahimu.
\v 17 Hasume cho, rarengeka wasusane n' ebhiti bya bhanachabho, kongo wabhese mukungu mukwakare wa'bho na w'eira mo murimo wa Ongo, mor' itua ebhubhi bw' ebhea.
\v 18 Bhushwa, mor' ierekwa wesine munchi chanubhe we, wamusake mbi bhari mo myereko.
\c 3
\cl Chunda 3
\p
\v 1 Ngy' asingwa, bhanakitu 'mbi mushuururwa, imbi bhari na muhango mo mbusha s' e kwiyo, musibhirire e ntumwa n' e mukungu mukakare w' eresimira ing' uturange bhate,
\v 2 Yesu, ngw' abhesa w'eira m' ungu wamusimikanga, imbw' abhesanga Musa mo murimo wae uti.
\v 3 Bhushwa wansirwa wakomenwa bhusime bhukiri irenga bwa Musa, bhubheseng' emwimbi w'enumba uri n' itatwa rareng' enumba.
\v 4 Kinsi numba iri nangu wimbangayo, eina ingu warimba e bhikai bhiti ngi Ongo.
\v 5 Kuri Musa, wabhesa w'eira mo numba iti ya Ongo, bhuri mukori, mw' ishea imbi byakomemw' eturwa.
\v 6 Eina Kirisitu uri muro bhuri mwana mo mwae, n'enumbae, ngi bhate, ribhese nti tw'etingire iya hende n'er'imusibha 'shu n'emwenyihiro ngu w'itate bhate.
\p
\v 7 Ngy' asingwa, etukana n'ebwebha e Mutima wakonda: rinotu, mumorukir' emurengy' ae,
\v 8 Kiro musumya emitima yinu, bwabhesenga ro erotu rw' emwereko mo bweru.
\v 9 Himpo, bhaso bhan' ereka mw'enituna na bhasung' emikorere yani mu myaka makumi anye.
\p
\v 10 Hotu nasue ind' obhuto, na n' eba: Bhari ematu ati na mitima y'ihabhuka. Nti bhariteerera e sanse sani.
\p
\v 11 Nasere mo bhusubhuke bwani: Bhatakimiyo kumunda n'ereruhuko rani.
\p
\v 12 Mukohyanga, bhanakitu, uma mu bhanu utabhesingi na mutim' ema w' etin' esimira, iya m'oero rw' etina Ongo ng' uri ho.
\v 13 Eina muhanane bima mu bampe kinsi otu mukoch' iebha: ya mu ntambi mwamebha: Runotu! kongo anga n' uma mu bhanu wasuma mor' isheereshiwa n' ebhubhi.
\v 14 Bhusha twamakind' ebhunduke bhima na Kirisitu, ribhese nti twerukira nguru iya hende n' emwenyihiro ngu wabhesenga n'itu mo ntangiro.
\v 15 Nanti rarebwa: Runotu, mumorukir' emurengy' ae, angi musumya e mitima yinu, bhuri entambi y' erisubhuka.
\p
\v 16 Bhanye'mbo bhasubhukanga, kuruma n' erimorukira kubha nty' ebhati mbi bhatukanga ku Misiri bhenjiwange na Musa?
\v 17 Na bhushe na bhanye ngy' asingwanga Ongo wasibhuka myaka makumi anye, kubha nti bhushe nambi bharonjang' ebhubhi, na ng' ebhinda byabo byasianga mo bweru?
\v 18 Na kuri bhanye ngi bhaserenga moe mbu bhatakimiyo mor' eruhuko rae, kubha nt' imbo ebhakemwanga?
\v 19 Hotu twasunga nti ngi bhakochang' ekime ko bhushwa n' eritin' esimira rabho.
\c 4
\cl Chunda 4
\p
\v 1 Tusubhahe ki, mor' ibhesa endani y'erikime mo reruhuko rae ikiri ho, anga uma mu bhanu wasungwe ntw' ameya kuruma.
\v 2 Bhushwa e mwasi wakonda uno waturwa kuri bhate bhuri hotu ng'wabhesanga'o ekuribho; eina ekinwa nchi chaturirwanga bho, nti chasake bho kikai, bhushwa nti chasheenga esimira kuri bho mbi bhorukiranga cho.
\v 3 Mu bhate mbi twaresimira, twakime mor' eruhuko, etukana n' ebwebha e: Bhatakimiyo mor' eruhuko rani! Webha ncho nakiro mbu e murimo wae abhesenga wamasira etukir' echuo ibha ho.
\v 4 Bhushwa warebha hampe bhumbo mor' otu rw'e arinda Ongo waruhuka kuruma n'emirimo yae er'otu rw' e arinda.
\p
\v 5 Na hano hotu: Bhatakimiyo mor' eruhuko rani!
\p
\v 6 Bhushwa kukiri kwabhikirwa mubhima ekime ko, na mumbi bhasingwanga kasa endani yaronjiwa nti bhakimenga bhushwa n' ebhukwemi bwabho.
\v 7 Ongo watereka tu otu ruma, runotu webha kumunda na Daudi mu matu mingi kuruma: Runotu, mumerukir' e murenge wae, angi musumya e mitima yinu.
\p
\v 8 Bhushwa Yoshua wamuruhuchange bo, utamebha tu kuruma nampo bhushe narumpe otu.
\v 9 Kuri eruhuko rw'erotu rw'eriruhuka rwabhikirwa ebhea bha Ongo.
\v 10 Bhushwa ing' wakime mor' eruhuko ra Ongo nt' waruhuka mo mirimo yae, bwakianga Ongo waruhuk' eyae.
\p
\v 11 Twesumye ki mw'ekime mor' eruhuko ndo, kongo kutabhesingi mwea wahuka mweninkana ebhususe bhubho bw' ebhukwemi.
\v 12 Bhushwa e kinwa cha Ongo kiri ho na chakoma, chatwa irenga obhasi rwa mai abhi, chakime iya mw' esianya emwanikire n'emutima, emasungo n'emwisongo; kikerange obhansa rw' erishima n' emihake y' e mutima.
\v 13 Kusira chamubhisama bhusondori nae, eina ebhiti bhiti bwansu na by' esungwa mo meso angu kuri we twakomenwa erisha ebhiti.
\p
\v 14 Bhushwa tukwengi mukungu mukakare mukiri ingu watianyaang' embingu, Yesu, Musike wa Ongo, turike nti twesimike mor' esimira ndi riturange bhate.
\v 15 Bhushwa tusira mukungu mukakare ingu wamutusake mo bhutetera bwitu, wataronji bhubhi.
\v 16 Twiye kwihi na mwenyihiro mo kitumbi ch' e bhubhake ch' enchumo, kongo twaninkwa musasiro n' ishee nsasi, mwisakirwa mo mirao yitu.
\c 5
\cl Chunda 5
\p
\v 1 Nampo, mukungu mukakare uti watukire mo bhea usimikwanga bhushwa n' ebhea mo murimo wa Ongo, mw' ishea ohembo na bhikai bya mpero bhushwa n'e bhubhi.
\v 2 Wamukoch' iorukir' e ntibhasi kikai nambi bharimina, bhushwa ebhutetera nae hotu usi bho.
\v 3 Na bhushwa nambo bhutetera wakomenwa isibhura ohembo rw' ebhubhi bwae, bhuri mbu bw' ebhea.
\v 4 Kusira wamwenink' er'otunda ndo, amabhese nti wabikirwa na Ongo, ebwabhesenga Aroni.
\v 5 Na Kirisitu nt' warikwenink' eritatwa r'eribhunduke mukungu mukakare, eina watunja ro kuringu wamwerenga: ongo mwan' ani, nakukubhuta runotu!
\p
\v 6 Bhuri ebwebha hotu we hampe: ongo mukungu e matu ati, etukana na Melkisedeki.
\p
\v 7 Iwe ngi, mo matu ae emubhi, washea mu murenge mukiri hima na mahemo a kiro na kw'itondoora mungo wamumoshukayange n'eroku, na worukirwa bhushwa n' erishuururwa rae.
\v 8 Watinge, na kiro mbw' abhesenga mwana, erikwehicha mo bhikai mbi byamunubyanga.
\v 9 Kuruma n' er' erierwae 'kwiyo, mo bati mbi bhamusimira wabhunduke ntangiro ya nchukaro y' ematu ati n' eati.
\v 10 Ongo wamutiko mukungu mukakare etukana na Melkisedeki.
\p
\v 11 Turi na bhingi by' iyebha mumbyo, na byasuma insonsomora, bhushwa bhanu mumabhunduke bhatetera b' iyorukira.
\v 12 Bhanu, ngy' etukire kare mumukomenwang' ibhesa bhahani, bhanu mukiri hotu na murao mbu muhanwe esankorwankorwa saroso s' e myasi ya Ongo, mw' eya muncho ibesa muraa mu mabhere eina nti bhiyo byasuma.
\v 13 Na nti, kinsi ngu uri mo mabhere nti nt' ukwengi isibhirira 'shu by' ekinwa ch' er' eira; bhushwa nt' ukiri mwana.
\v 14 Eina e bhiyo byasuma by' ebhea bhakakare, mumbi bhamakind' esisiriswa nti bhakocha iteerera ebhongo n'e bhubhi.
\c 6
\cl Chunda 6
\p
\v 1 Ngy' asingwa, mor' esiya ebhikai byaroso by' ekinwa cha Kirisitu, twenderi mumbi byarengekana, mw' ang' itereka tu ntangiro impe mw' etina emikorere nji yakwire.
\v 2 Mor' esimira kuri Ongo, mo mwenjo w' er' erubikwa, mor' iterekw' emine, mor' efuka r' ebhakwi, n' erw' erobhansa rw' ematu ati n'ebhati.
\v 3 Ngi chakora bhate, amabhesa Ongo wasimira cho.
\v 4 Bhushwa ritamukocheka mumbi bhamakindanga ibhesa mo chaka, imbi bhamaroranga mo mihango y' ekwiyo, imbi bhamabhesanga muhango w'e Mutima wakonda.
\v 5 Imbi bhamaroranga ekinwa chakonda cha Ongo n'e bhunkangwe bw' ekiranga cheyange,
\v 6 Na bharihuka, bhatamuronjiwa tu bhashasha n' ikoch' ebhunduka, bhushwa bhashura kuri bho Musike wa Ongo n' isingwa wakambwe.
\v 7 Amabhese eroto romongi mecha a mbura inji ikengi ngendo ningi muro, nti rwabuta bhisu byakonda bhushwa nangu wasingwa rwahingwa nt' waabhese mo mukisa wa Ongo;
\v 8 Eina, amabhesa nti rwabhuta menke n'onsakansaka. nti rwakwa bhusa n' ibhesa bhusondori n'otaki, n' ekinda mw' eriya ho kasha.
\p
\v 9 Nakiro twebhange mbo, bhira bhitu, twarindire, munchi chabhukae, bhikai byakonda na byakomenwa enchukaro.
\v 10 Bhushwa Ongo nti mwea usir' eira, mbu wobye e murimo winu n' e nchime inji yarishea bhanu mo rina rae, warekind' ikora n' ukiri ukorange mirimo mo bhashuururwa.
\v 11 Tusondekanyange kinsi uma mu bhanu washee nchime iya iya mw' irangana iya hende emwenyihiro uti.
\v 12 Iya m' oero rw' angi mureke, na musianye mbi mor' isimira n' ekemine, bhabhese na mwandu w' esendani.
\p
\v 13 Ongo warekia waronja e ndani na Iburahimu, nt' utamusere mu mukakar' ekuriwe, wasere kuriwe wesine.
\v 14 Webha: Mor' eira nisekukasaneyo na naongerereyo e mbuto yabhe.
\v 15 Nang' wakianga Iburahimu mo kemine waninkwa echarawanga we.
\v 16 E bhea bhaserenga mo mukakare ekuri bho, n' ensererwa ng' yakindanya ebhuhaka bwabo buti.
\v 17 Ngy' asingwa Ongo, mor' ishea we hima n' eira mo bhis' emwandu w' erirai rae ndi nti rebhundukana watereka ho nsererwa.
\v 18 Kongo mo bhikai bhibhi nti byebhunduka, mubyo ritamukochekana Ongo washukeshuke, twashee bhunkangwe bukiri, bhate mbi e mabhekero itu mima abhesa nty' etingirira e mwenyihiro wareninkwa bhate.
\v 19 Uno mwenyihiro, twabhika o bhuri nsimiko y' emutima, eira na yandira; yakundukanya kubhasirwa na Kirisitu.
\v 20 Himpo hakianga Yesu watukimire buri musondori, mor' ironjiwa mukungu mukakare ematu ati etukana na Melkisedeki.
\c 7
\cl Chunda 7
\p
\v 1 Melkisedeki uno wabhesenga mubake waku Salemu, mukungu wa Ongo w' Ekwiyo nguru; w'endanga kubhusondori na Iburahimu wabhesanga ukurukange ekwahimenga w'ebhabhake, wamukasanyie,
\v 2 Na Iburahimu wamuninka e nima y' er' ekumi y'e bhiti; iwe kasa mubhake w' er' eira, etukana n'ebwebh' erina rae, kuruma mubhake wa ku Salemu, nger' iebha mbu mubake wa bhuhoro.
\v 3 Usira ishe, anga nina, ang' obhuto, usira ntangiro ya matu ari hende n' ebhuingo, eina wasusanyiwa n'e Mwana wa Ongo; uno Melkisedeki wabhesa mukungu e matu ati.
\p
\v 4 Kae ngendo singa wabhesa mukiri Tita mukakare Iburahimu wamuninka e nima y' er' ekumi r' e mushokoro.
\v 5 Imbi bh' ebhana bha Rawi bhakoranga mo kibhimbi, bari, etukana n'e myomba na kinwa ch' ikongora e nima y' er' ekumi mo bhea; ng' iebha mbu kuri bhanachabho, nakubha nabo nti bhatuka mor' obhuto rwa Iburahimu.
\v 6 Nawe ngu nti bhakwengi nae ntangiro nima, watunja nima y'ekumi kuri Iburahimu, na wakasanyie ing' wabhesenga uri n'emarai.
\v 7 Nti hasira bhuhaka e mwanunke ng' ukasanyiwanga n'e mukakare.
\v 8 Nasunga, imbi bhakongoranga e nima y' er' ekumi bhea bhikwa; eina hiha iwe ng' watikurwa mbu uri ho.
\v 9 Ituka mpo, Rawi ng' ukongorang' enima y' er' ekumi wamutua yo, ng' iyebha mbu, Iburahimu;
\v 10 Bhushwa abhesenga ukiri mor' obuto rw' ishe, Melkisadeki warekia wabhese kubhusondori na Iburahimu.
\p
\v 11 Amabhese er'ibhererera rakochaka iyetir' e mpero y' ebhukungu, bhushwa iyetire mpero ngi mury'e myomba yaninkw' ebhea, ramurengekanange tu kusae umpe mukungu watukana na Melkisedeki, na nti watukana na Aroni?
\v 12 Bhushwa e mpero mor' ebhunduranya yo, rakomenwa hotu ibhundurany'e myomba.
\v 13 Kuringo watikurirwa imbyo bhikai wa rumpe owanda, anga n' uma muro wamakianga e murimo w' er' irango;
\v 14 Bhushwa r' isibhirwe mbu Nyerekuritu watukire m'owanda rwa Yuda, owanda ndu Musa nt' warebha kikai muro mo byakae' mpero.
\v 15 Kicha chabhese tu eira nguru, kwakiya k' wasaa umpe mukungu ususene na Melkisedeki,
\v 16 Wasimikwa, nti etukana n'emyomba y'emubi; eina etukana n' ebhunkangwe bwa bhuingo bhusir'ebhiha;
\v 17 Bhushwa waninkw' er' eirando: ongo mukungu e matu ati, etukana na Melkisedeki.
\p
\v 18 Habhesa iriribanyiwa r' e momba waroso, bhushwa n' eriruka o maa n' eribesa o wabhusa.
\v 19 Bhushwa e myomba nt' yarerisha kikai mor' ibhereresha, n' erisha mwenyihiro wakonda, ingu waturisha kwihi na Ongo.
\p
\v 20 Nango nt' warebhese anga isere;
\v 21 Bhushwa ebharawi bharibhunduke bhakungu anga nsererwa, eina Yesu waribhunduke we hima na nsererwa iyetire ng' wa muterekanga: Mukota wamasere, n' otabhundukiyo: ongo mukungu e matu ati, etukire Melkisedeki.
\p
\v 22 Yesu wabhesa muncho e mwimanga w'ekihango inchi charengeresha.
\p
\v 23 Etuka mpo, kwabhesenga bhakungu bhingi, bhushwa eroku abhesenga ruhangisa ngebho ibha ho e matu ati.
\v 24 Eina iwe, bhushwa uriho e matu ati n' eati, uri na mpero nti y' esierane.
\v 25 Bhushwa nancho hotu chasingwa wakoch' ioshukaya n' eruti imbi bheyange kwihi na Ongo ietere kurie uri ho e matu ati mw' iheme bo.
\p
\v 26 Abhesenga rarengekana kuri bhate, ibhesa na mukungu mukakare bhuriwe, wakonda, anga kishama, wasiana n' ebhabhi, na urikwiyo n'e mbingu,
\v 27 Usira murao, bhuri ebhakungu bhakakare, mw'isubhura kinsi otu ohembo, raroso bhushwa n'ebhubhi bwae wesine, kuruma nampo: rw' ebhea, bhushwa incho warekia cho rima n' eruti mor' ikwesibhura wesine.
\v 28 Himpo, e momba wasimika bhakungu bhakiri bhea ntangiro ya bhutetera; eina e kinwa ch' ensererwa echaronjiwanga kuruma n'e myomba chasimika e mwana, ngu warengekana e matu ati n'eati.
\c 8
\cl Chunda 8
\p
\v 1 E kinwa kikiri mu 'mbi byamakind' iebwa, turi na mukungu mukakare, ng' warika kwabhume kw' ekitumbi ch'e bhubhake mo bhukakare bw' e Ongo mo mbingu.
\v 2 Bhuri mukori w' er' irango na w' er' irameso r' er' eira, indi raronjiwanga na Nyerekuritu nti na mwea.
\p
\v 3 Kinsi mukungu mukakare uti uterekwanga mw' ishea nkembo na bhinsinso; rarengekana uno nae wabese hotu na kikai ch' ishea.
\v 4 Wamubesange mo chuo, utamubhesange nakubha mukungu, bhushwa himpo habhesenga 'mbi bhaseshea esa nkembo iyemisanya n'e myomba,
\v 5 Nti bharonja kibhimbi, nsusanya na kirimirimi cha bhikai bya mo mbingu, bhuri Musa wasubhukiwa cho na Ongo warekia wendange kimb' er' irameso. Washishiwa mbu ukaenga 'shu, mw' ironja ebiti etukana n' e bhususe bwasheiwanga ongo kubhasirw' er' ou.
\v 6 Eina enompena waninkwa murimo warenga, iwe nge mukumanya w' e bhununsane bwakonda nguru rarenga, inji yareterekwa mu ndani sarengekana.
\p
\v 7 Nampo amabhesa e ndani yaroso yabhesanga isira bhubhi, kutamubhesange ch' ebhundura yo ra met' abhi, yaroso yabhesanga
\v 8 Bhushwa, hima na mwebhe w' efina ngi mw' ebha Nyerekuri n' ebhaisiraeri: Sung' e matu eya, ng' webha Nyerekuritu, nseronja hima n' enumba ya Isiraeri n' e numba ya Yuda ndani nshasha.
\q
\v 9 Nti bhuri bhununsane bwakiang' ani hima na bhishe, er' otu ndo rwatingenga 'ni bho mo mwine mwetunja bho mo chuo cha ku Misiri, bhushwa nti bhasimananga mo bhununsane bw' ani, n' ani nti naraa mubho, ng' webha Nyerekuritu.
\q
\v 10 Eina sung' ebhununsane bhusekiyayo ani hima n' enumba ya Isiraeri, kuruma n' ematu ngo, ng' webhange Nyerekuritu: Nseriayo e myomba 'ni kumund'e mutima wabho, Nsandikayo yo kumund' emutima abo, na nsebhesayo Ongo wabho, na bhasebhesayo bhea bh' ani.
\q
\v 11 Kusira mwea wasehanayo tu bhunachabho ari mwea na munachabho, mw' iebha: Sibhirira Nyerekuritu! Bhushwa ebhati bhasensibhayo, etukire mo mukeke iya mo mukakare munkati nabho.
\q
\v 12 Bhushwa nsesasirayo ebubi bwabho, na nt' esubhukiiyo tu bhibhi byabho.
\p
\v 13 Mw' iebha: bhununsane bhushasha, watiko bwakarekare ebwaroso; na nti ebwakare, e bwakunguha, nti bwarindir' erimina.
\c 9
\cl Chunda 9
\p
\v 1 Ebhununsane bwa roso bwabhesanga na myomba yatukana n' e kibhimbi, n' irango ra chuo.
\v 2 Nampo, irango r' imbwa. Mo chunda cha kumunda, inchi chabhikirwa mbu bhuari bwashuururwa, mwabhesanga muri katara k' eriya mo tusuku, katara, n' etumbosa tw' er' ohembo kuri Ongo.
\v 3 Kuruma n' engombe y' emet' abi nti kurikire e chunda ch' er' irango chabhikirwa mbu chashuururwa ch' echachashuururwa.
\v 4 Nti murikir' erosara rw' e noro rwe rungo, n' esanduku y' er'irai, eiti yabhumbirwa na noro. Kumund' esanduku y' er'irai kw' abhesenga osara rwa noro nti rurikire mw' etumbosa, e nkoma ya Haruni, inji yashukang' esantondo, n' etutara tw'e ndani.
\v 5 Hambasiro n' esanduku nti hari ngashani s' ebwime, sabhumbe n' ekirimirimi chabho ehatunjirwanga ebinsinso. Nti neki kashangi kano kiebha ebhiti mo bhore bwa byo.
\p
\v 6 Ebhikai byabhesanga byariarwa mo mbo, ebhakungu bh' er' ikor'e murimo, bhakimenga mu kinsi ntambi mo chunda charoso ch' er' irango.
\v 7 Na mo ch' emet' abhi, e mukungu mukwakare wesine ekime r' ima mo mwaka, nty' ebhura 'mb' usira nchama yatunja we bhushe iwe wesina na mo bhibhi by' ebhea.
\v 8 E mutima wakonda ntusheange mpo 'mbu ense y'e hashuururwa nguru yabhesanga neki nti yobhorwa, kubha er' irirango raroso r' ikiri ho.
\v 9 Ibho bhususe bw' ekashangi kano; rashea mbu e mihango n'e bhinsinso byatunjiwanga bhitamukoch' ishuurura e mwanikire wa 'ng' ukiyang' ekibhimbi.
\v 10 Bhabhesanga, bhari n'e bhiyo, n' eby' er' iyomo na bhikanga bhingi, myomba ya mubhi y' emima ho iya mo kiranga ch' er' ibhunduranya.
\p
\v 11 Eina Kirisitu wareya wa bhikai bhiseyayo; waretianyaa er' irango r' ikiri nguru na risira bhibhi, indi nti r' imbwa mu mine ya mwea, ng' er' iebha mbu nti ra r' ino ironjiwa.
\v 12 Na wakime rima n' eruti mo bhuari bwashuurwa nguru, anga na nshama ya maharwa na byana bya nkambu wamashee er' ekurure r' e matu ati n' eati.
\v 13 Bhushwa enshama y' esankambu na y' emaharwa, n'e mote w'e nkambu wansanswa mu bhirikire na mikonsi bhushuururange n' erisha eshuururwa ra mubhi.
\v 14 Met' anga e nshama ya Kirisitu mo Mutima w'e matu ati n' eati, w' esibhura w' esine anga bhubhi kuri Ongo, useshua e mwanikiri winu w'e mikorere y' er' ikwa, kongo mukore Ongo 'ng' uri ho!
\p
\v 15 Nabhushe nancho wabhesa emukumanyi w'e bhununsane bhushasha, kongo mor' ekime 'r' oku mor' ekurure 'bhubhisha waronjiwanga mo bhununsane bwa roso, imbi bharbikirwa bhaninkwe 'mwandu w' e matu ati n'e ati ing' warebhikirwa bho.
\v 16 Bhushwa impi har' irai rakomenwa er' oku rw' euninkanang' er' irai rubhesi.
\v 17 Er' irai r' asimirwa nty' amabesa oku, bushe r' isir anga na maa amabhesa mine 'r' irai ukiriho.
\v 18 Sunga ngy' asingwa hima na nshama hotu ebhununsane bwaroso bwabhesa.
\v 19 Musa kuruma n' er' iyebha 'bhusondori n' ebhea bhati e myomba, wating' enchama y'e byana by'e sankambu n'e maharwa, hima na mecha, ehariri yasana bhuri nchama, na hisopo; wansansebyo mo karisi k' esine na mo bhea bhati w' ebha.
\v 20 Eina ng'e nchama y' ebhununsane yakubhuninka Ongo.
\v 21 Wakiya na 'mbo insansa n' enchama hambasiro n' er' irango na mo bhikai bhiti by' e kibimbi.
\v 22 Na karibw' e bhiti, etukana n' e myomba, byashuururwa hima na nshama, n' ang' ekubhura nshama kusira musasiro.
\p
\v 23 Rabhesanga nti rakomenwa, bhushe 'bhirimirimi by' ebhikai bh'iri mo mbingu bya mushuururwange mu 'mbo bhususe, kuri ebhikai. By' embingu by' esine bh' ibhese 'mbo mubinsinso byakonda nguru irenga 'mbyo.
\v 24 Bhushwa Kirisitu ntwarekime mw' irango r' aronjiwa na mine ya mwea, mw' esianya r' er' eira, eina warekime na mo mbingu, bhushwa n' itwebhere habhusondori embaso ya Ongo.
\v 25 Na nti bhushwa kw'esibhura wesine ngendo ningi ngy' akimenga we ko, bhuri e mukungu mukakare ekime mor' irango kinsi mwaka eina mw' isibura impe nshama nty' e yae.
\v 26 Nti 'mbo ramurengekanange wamunubhiwange ngendo ningi etuk' echuo charonjiwa; ein' enompana, kwende n' ebhiranga, waresungwa rima ho mor' eriribhany'ebhibhi mo kinsinso chae.
\v 27 N'e bhuri 'mbu bwabhikirw' ebhea ikwa r' ima ho, kuruma 'mpo er' obhans' iya.
\v 28 Ng' ebhumbo Kirisitu warekwesibhura r' ima ho mor' er' iya bhibhi bya bhea bhingi, wasesungwayo nt' usira bhibhi r' esangando sibhi mu 'mbi bhamurinde mo nshukaro yabho.
\c 10
\cl Chunda 10
\p
\v 1 E myomba 'nji 'kwengi kirimirimi ch' ebhikai bhiseya, na nti y' er' eira r' er' isheiwa 'mbyo bhikai, itamukocha, mo kinsinso kima kima ch' er' etunj' ematu ati kinsi mwaka; ekindanyie ebhakorerwange.
\v 2 Nti 'mbo, bhamukochang' ireke mor' esibhura byo bhushe imbi bhakiang' encho kibhimbi, mor' isasirwa rabho, bhatamubhesange tu anga na mwanikiri w' ebhibhi by' abho.
\v 3 Eina ensubhukiyo y' ebhibhi ikurukirwange kinsi mwaka mu 'mbyo bhinsinso.
\v 4 Bhushwa ritamukocheka e nchama y'e sankambu n'e maharwa y' atunj' ebhibhi.
\p
\v 5 Ngy' asingwa Kirisitu mor' ekime mo chuo, w' eba: Nturesonda ari kinsinso ari ohembo, eina unironjie mubi;
\q
\v 6 Nt' uresimira ari kinsinso ch' eshika, ari kinsinso bushwa n' e bhibhi.
\q
\v 7 Nampo n' ebha: sunga neyange mo mubhungobhungo we karisi chankae mw' ironja, e Ongo, er' isasa r' abhe.
\p
\v 8 Kuruma n' er' iebha kasa: Nt' urihuna na nturisimira ari kinsinso ari ohembo ari kinsinso ch' eshika ari kinsinso mo bhibhi,
\v 9 Inchi chasibhurwa etukana n'e myomba w' ebha kuruma: sunga n' eya mw' ironj' er' isasa r' abhe. Bhumbo wariribany' eraroso mw' itereka r' emet' abi.
\v 10 Mundo isasa ngi mwareshuururwa bhate, mor' ohembo rw' e mubhi wa Yesu Kirisitu, r' ima n' er' uti.
\p
\v 11 Na kinsi mukungu uronjanga kinsi otu e murimo n' esibhura ngendo ningi ebhinsinso bhimbyo bhimbyo, ebhitamukoch' etunj' ebhibhi,
\v 12 Iwe, kuruma n' esibhura kinsinso kima ho bhushe 'bhibhi, warerik' ematu ati mo kwabhume kwa Ongo.
\v 13 Warindire etuka 'mpo ebharenda bhae bhabhunduki bhinantiro byae.
\v 14 Bhushwa mu ohembo r' uma wakoch' erisha ematu ati 'mbi bhar' eshuururwa.
\v 15 Ngi chatwire 'Mutima wakonda hotu; bhushwa, kuruma n' er' iebha;
\q
\v 16 Sung' ebhununsane bhuseronjayo ani n' abho, kurum' ematu ngo, Nyerekuritu ng' webha: Nseriyayo e myomb' ani kumund' emutima 'bho, na nsetiranyayo yo mo mutima 'bho, waongerere:
\p
\v 17 Na nt' esubhukiiyo tu n' ebhibhi byabho arin' ebhubhisha bwabho.
\p
\v 18 Nampo eharikire musasiro w' ebhibhi, nty' asira tu ohembo bhushe n' ebhibhi.
\p
\v 19 Bhumbo kwe, bhanakitu, turikire iyetire 'nchama ya Yesu, ekime ra bhusa mor' ir' irango.
\v 20 Mo 'nse nshasha n' ishere yarobhora we bhushwa bhate iyetir' ekirindiko, ng' er' iyebha mbu ch' emubhi wae,
\v 21 Na turi na mukungu mukakare wabhinsinso waterekwa mo numba ya Ongo.
\v 22 Twiye kwihi hima na mutima w' eira munkati n' er' esimira, emitima yashuururwa n' emwanikiri w' ema, n' emubhi washuwa mu mecha akoma.
\v 23 Tutingi nguru e murimo w' e mwenyihiro witu, bhushwa 'ngu waronj' e ndani w' eira.
\v 24 Tukohye e bhima n'e bhampe, mu kw' eninka maa mo nchime na mo mikorere yakonda.
\v 25 Angi twasia er' ikumanana, bhuri e mutondeko wabhima; eina tuhanane na 'mpo etukana n' ebwey' er' otu.
\p
\v 26 Bhushwa, twamabhisha n' isasa kuruma n' er' ininkwa ebwenge bw' er' eira, nti kusira tu kinsinso ch' ebhibhi.
\v 27 Eina murindiro wasuma w' er' obhansa n' ekasha kasuma k' ererisa ebhatengu.
\v 28 Ing' waretin' e myomba ya Musa ntwakwa anga bonso, etukana na kariho ka bhea bhabhi ari bhashatu;
\v 29 Mwanikira bhususe 'nki bw' ehumbwa ng' ibhusebhesa e robhansa rwakomenwa 'ngu wasenyenshaa Musike wa Ongo, ing' wasetinge buri nty' araisha enshama y'e bhununsane, mu 'yo ngi mwareshuururwa mo 'we na wakamba e Mutima w' e nchumo?
\v 30 Bhushwa tusi 'ng' waareba: Ani ngi werikwane, ani ngi natuwayo, hotu: Nyerekuritu waakerayo erobhansa rw'e bhea bhae.
\v 31 Kikai chasuma erisiruke mo mine ya Ongo 'ng' uri ho.
\p
\v 32 Mw' esubhukie n' e matu ano aroso, murekia mumabhesa mo chaka, musumy' e mutima mu bhita bhikiri munkaty' eminubho.
\v 33 Mw' oharo ruma, bhuri mu nkambao na mu minubho, na mor' umpe musakani na 'mbi bhakorerwange bhisusene na 'mbyo.
\v 34 Nampo, mubese na bhonso mo bhaminwa, na musimire na ngoa etunjiw' ebhinu, mor' esibha mbu bhanu mukwengi bhikai byakonda na by' ematu ati.
\v 35 Anga musie emwenyihiro winu, muo ngi muri ohembo rukiri.
\v 36 Bhushwa bhanu muri na murao wa murindiro, kongo kuruma n' ibhereresha erisasa ra Ongo, muninkwe ebyarairwa bhanu.
\v 37 Rikeke tu, mu kashangi kakeke ing' wakomenwa iya, useyayo, na utasii.
\q
\v 38 Na w' ereira wasebhesa ho mor' isimira, wamakuruka kuruma e Mutim' ani usira ngoa kuri we.
\p
\v 39 Bhate, nti turi mu 'mbi bhakurukange kuruma mw' erimina, eina mu mbi bhari n' erisimira mor' iyoshukara r' emitim' abho.
\c 11
\cl Chunda 11
\p
\v 1 E nsimiro mwenyihiro wasuma w' ebhikai nti bhisibhirwe, esungwa r' ambi bhitangasungwa.
\v 2 Mor' ibhesa naro ebhakungu bharishee kariho karengeka.
\v 3 Mor' isimira ngi mwasibhire bhate mbu echuo charonjiwanga mu kinwa cha Ongo, nambi bhisungwange nti byaronjiwa mu bhikai bhisungwange w'eira.
\p
\v 4 Mor' isimira Aberi wasibhura kinsinso chakonda nguru irenga cha Kaini; mucho ngi mwatikurwae w' eira Ongo. wasimira esankembo sae; na muto ngi mukiri m' webherengi we, nakiro 'mbu wakwire:
\p
\v 5 Mor' isimira ngi mwakianga Enoke wakukumw' ekwiyo utasunging' ikwa, n' otasungwi tu bushwa Ongo wamukukumanga; bhushwa, bhusondori erikukumwa rae, wabhesanga ntwamaninkwa e kariho kae nti karengekana kuri Ongo.
\v 6 Kuti kusir' esimira ritamukochaka ikokomesha ekuri we, bhushwa rakomenwa mu 'ngu wehie Ongo wabhese n' isimira 'mbu Ongo 'ri ko, na nge mutui wa 'mbi bhamusondange.
\p
\v 7 Mor' isimira ngi mwabhesenga Noa, mor' esubhukiwae na Ongo mu bhikai bhitangasungwa neki, watingirwa na bhobha bw' osubhahwa, wimba bwato mw' ioshukaya e numbae; muro ngi mwakere we echuo obhansa, n' ebhunduke mine mwandu w' er' eira rashekana mor' esimira.
\p
\v 8 Mor' isimira Iburahimu, warekiya wabhikirwa, wasimira na w' enda mu bhutaka bwakomenwang' eninkwa we mu mwandu, na wenda nti nt' usi wendange kuni.
\v 9 Mor' isimira ngi mweyangae karika mo chuo ch' erirai bhuri chuo cha bweni, warika kumunda na mahema, hotu Isake na Yakobo, bhis' emwandu wa 'ndo irai.
\v 10 Bhushwa wabhesanga urindirengi erobhungu r' uri n' entangiro na ng' emumbi.
\v 11 Mor' isimira Sara wesine, nakiro e myakae yabhesanga yamareha, waninkwa kara k'ibhesa n' obhuto, bhushwa wasimirang' er' eira rangu wamuninkang' erirai.
\v 12 Ngy' asingwa mu mwea, wamakind' eruha emubi, wabhuta obhuto rwingi bhuri nkekeni sa mo mbingu, bhuri misie irikire mo kirindo ch' enyansa n' etamwanswa.
\p
\v 13 Mor' isimira ebhati bhakwa nti bhatanganinkwanga ebhikai byarawanga bho, eina bhasunga byo n' ikokome byo kore, mor' esibhirira bho mbu bheni na bhendendi mo chuo.
\v 14 Ebhebhange 'mbo bhashea 'mbu bhasondange chuo.
\v 15 Bhamubhesange bharaa mu 'ncho chatukanga mo bho, bhamushee ngi kashangi k' ekuruke cho.
\v 16 Eina enompena bhanikirengi 'nchi chakonda nguru, ng' eriebha mbu cha mo mbingu, ngi chasingwa Ongo usira nkene s' ebhikirwa Ongo wabo, bhushwa waretunganyie bho obhungu.
\p
\v 17 Mor' isimira Ibrahimu wasibhura Isake warekiya wamerekwa, na wasibhura e mwanae uma, iwe ng' waninkwang' erirai,
\v 18 N' ekuri we kw' ebwa: kuri Isaka, ukubhesa na mbuto yabhikirwa mo rina rabe.
\v 19 Wabhesanga usi mbu Ongo munkangwe, nakiro mor' efura ehbakwi; hotu, washee musike we, ng' er' ishea ebhiseyayo.
\p
\v 20 Mor' isimira ngi mwakianga Isake wakasanyie Yakobo na Esau, mu bhikai bh' iseyayo.
\p
\v 21 Mor' isimira Yakobo mor' ikwa wakosanyie kinsi uma mo bhana bha Yosefu na wakia mpero nt' wiseke mo nkomae.
\v 22 Mor' isimira Yosefu mor' ikwa, watiko erituka r' ebhana bha Isiraeri, na waninkana rwanko mo byakae 'makua e.
\p
\v 23 Mor' isimira Musa wabhiswa mu myeri 'shatu n' ebhabhuti bhae bhushwa bhasunga e mwana nt' wakonda, na bhatasubahi e momba w' emubhake.
\v 24 Mor' isimira Musa, mw' ibhesae mukakare, watina ebhikirwa 'mbu musiky' a mwisi wa Farao;
\v 25 Warondora enubhiwa n' ebhea bha Ongo erekiya wabhesa na ngoa mukashangi kakeke mo bibi.
\v 26 Wasung' erinenwa ra Kirisitu bhuri bhutumba bhukiri ireng' etutiri twa ku Misiri, bhushwa wabhesanga wasumye meso mor' ohembo.
\v 27 Mor' isimira ng' iratukanga mo we ku Misiri, ntwasubhaha ebhusubhuke nbw' e mubhake; bhushwa w' ishea nti nt' watetera, bhuri usungange 'ngu wabhesanga nt' utangasungwa.
\v 28 Mor' isimira ngi mwasibhurangawe e Pasaka n' insansa enchama, kongo emushirii utaturaningi mosantangi s' ebhaisiraeri.
\p
\v 29 Mor' isimira ngi mwasokanga bho e nyansa, bhuri hakama, ina bhisa ku Misiri barekiya bhasond' iyeta bhaminwa.
\p
\v 30 Mor' isimira ngi mwendukanga e muruta wa ku Yeriko, kuruma n' eritimbao mu matu arinda.
\p
\v 31 Mor' isimira ngi mwakianga Rahabu e kihanga utakwi n' ebhatengu, bhushwa wakokenga esansoni mu bhuhoro.
\p
\v 32 Na nebhe tu 'nki? bhushwa naruke ntambi y' er' iebha kuri Gideoni, kuri Baraka, kuri Samsoni, kuri Yefta, kuri Samwere, n' ebhatahwa,
\v 33 Imbi, mor' isimira bhahima mabhake, bharonje eira, bhaninkwa marai bhamina e monu esantare,
\v 34 Bharimya emaa e kasha, bhoswa n'e bhui bw' erobhasi, bharama e makoni abho, bhabhese bharai mo bhita, bhahenseranya bhashirikani bha bheni.
\v 35 Bhomina bhashee bhakwi bhabho mw' efuka; bhampe bharierwa mu minubho, bhatina ireke kongo bhaninkwa efuka rakonda;
\v 36 Bhampe bhasewa n' ehumbwa, burebure n' eminwa;
\v 37 Bhampe bhashurwa mu mukera, ikamwa; bhampe bhashurwange mu mwere; bhenda 'nku na 'nku bhambara bhihu bya mburi na bhihu bya mpene, bhasene, bhanubhiwa n' ikorerwa bhubhi,
\v 38 Ibo, echuo chabhesanga nti chakomenwa ibhesa nabo, bhakiikii mo bweru na mo sangu, kumund' esankunda na mo bhiribhu mo r' oto.
\p
\v 39 E bhati mbi bhatikurwa bhushwa n' eresimira r' abho, nti bhareninkwa ebhiti bya rawanga bho.
\v 40 Ongo mor' esunga we watubhike byakonda nguru, kongo watabherereshi byo hasira bhate.
\c 12
\cl Chunda 12
\p
\v 1 Na bhate hotu, bhushwa twatimbwa n' eimba rikiri ra turiho, turekere kinsi murio, n' ebhibhi byakandwa mo bhate tete na tubhese na mucho w'ikanyaha mo muho warobhorerwa bhate.
\v 2 Tubhesi twasindera kuri Yesu, ng' usereengi er' esimira ritu n' ekuya ro; mw' iengany' esangoa sabhikirwa we, wanuba mor' iyango, inenwa mo sankene na warika mo kwabume kw' e kitumbi ch' e bhubhake cha Ongo.
\p
\v 3 Mumwanikire ing' wasimiranga etinwa n' ebhabhi, kogo muturekingi, emutima eruha.
\v 4 Nti neki muhimana iya moero rwa nshama, mor' ikwany' ebhibhi.
\v 5 Na murobya e mahano aninkwanga bhanu bhuri mu bhana: Mwana 'ni ang' etina ebhihumbo bya Nyerekuritu, n' ang' iruka wamakukuruke;
\q
\v 6 Bhushwa Nyerekuritu uhumbanga ing' washima we, n' osundanga tushushu ebhati 'mbi bhasiwe bhuri bhanabhae.
\p
\v 7 Simir' erihumbwa: bhuri bhana ngi bhubhukorengi Ongo, bhushwa, inye mwana ng' watamuhumbwa n' ishe?
\v 8 Eina mumabhesa nti musirwa bhihumbo e bhirikire mo bhati, bhanu bhana bhasira ishe wabho, na nti nti bhanu bhana.
\v 9 Bhushe bhatita mo mubhi bhatuhumbanga, na twaninka bho osubhahwa, nti twaakomenwa nguru rarenga kwehicha kuri Tita w'e mitima, mw' eninkwa karamo?
\v 10 Bhatita bhatuhumbanga mu matu makeke, bhuri bwasunga bhoro 'shu; eina Ongo utuhumbanga mo 'shu y' itu, kongo twabhesa mor' eshuururwa rae.
\v 11 Mor' eira kinsi bhihumbo bhiri na bhususe bwa bhonso, na nti bwa ngoa, eina bhibhutanga kuruma mu 'mbi bhakukorerwa mbo, bhabhutange byuma byakonda by' eira.
\p
\v 12 Munink' emine yinu maa yaruha n' emaru inu atetera;
\v 13 Na mwemise n' emindi yinu inse satunganana, kongo ewaneka utahabhukingi, eina ubhe na maa.
\v 14 Musondekanye bhuhoro mo bhati n' er' eshuururwa, kusira ndo, anga mwea wasesungayo Nyerekuritu.
\v 15 Mukohye kutabhesi ngi mwea watara mo nchumo ya Ongo; kutabhesi anga na muri wa bwae, utarekeringi ntongwa, utabhutingi n' ebhunubya; na bhingi bhatatingirwingi nao;
\v 16 Kongo kutabehsingi ari musingirani ari ntwasimira bhuri Esau, ing' wachuyanga biyo ekirira chae ch' entangi.
\v 17 Bhanu musi mbu, kuruma, wasond' eninkwa mukisa, watawa, nakiro mbu wasondekanyanga ro mu bhiro, bhushwa ntutamukocha ekurucha ishe mw' ebhundur' emwanikire.
\p
\v 18 Nti mu kweya kwihi n' ou rwamutingirwange na r' ominange mo kasha ari n' otundo, ari na mwerimya, ari n' eyuhu,
\v 19 Ari na mirenge ya tuhanda, ari na changa chabinwa, imbi bh' orukiranga cho bhahema bhatashishi bho kimpe charenga.
\v 20 Bhushwa abhesanga bhatamurindire emombo 'ngo: Nakiro nyamishwa yameya kwihi n' er' ou: nti yashurwa.
\v 21 N' echabhesanga 'mpo chabesnga chasuma na Musa w' ebha: nasubhaha na nt' ukakengi!
\v 22 Eina mumeya kwihi n' er' ou rwa Sayuni, mor' obhungu rwa Ongo 'ng' uri ho, Yerusaremu ya mo mbingu, bhichiri ebyaronj' ereimba r' esangashani,
\v 23 By' enkumanano y' esantangi satiranyiwa mo mbingu, kw' emukekeri wer' obhansa ngi Ongo w' ebhati, w' emitima y' ebasimana yakomenwa,
\v 24 Bha Yesu ng' emukumanya w'e bhununsane bhushasha, n' enshama yarensanswa inji yarenga ya Aberi.
\p
\v 25 Mw' irange mor' etin' iyorukira ing' webhange, bhushwa ebhatinang' iyo rukira ing' wabhesang' oninkanange emahano mo chuo nti bharamanga bhuni ngwamurama bhate, kubha twatina 'ngu webhang' ekwiyo mo mbingu.
\v 26 Iwe, ngy' emurenge wae wakakiyang' echuo, na ng' enompena waronja r' ino irai: Rimpe rima tu nsekakiya tu nty' echuo ho, eina n'e mbingu,
\v 27 E bhinwa mbi: rimpe rima tu byashea, er' ibhunduka r'ebhikai byaronjiwanga bhisekakeyo bhuri byaronjiwanga mu ntambi, kongo ebhikai 'mbi bhitangakake ngi byasia.
\v 28 hNgy' asingwa, mor' ininkwa bhubhake nti bwikake, tushee mu bhususe, bw' emumoesha mwekuruchie Ongo kibhimbi chemukokomesha, hima n' eshuururwa n' osubhahwa.
\v 29 Bhushwa Ongo witu hotu iwe kasha k' eshiriya.
\c 13
\cl Chunda 13
\p
\v 1 Murike mu nchime y' ebhunakima.
\v 2 Kiro mobya erikokane, bhushwa bhima mor' ikora mbo bharekoke ngashani, nti ntibhasibha.
\v 3 Musubhukiyang' ebhaminwa, bhuri na bhanu muminwa, imbi bhanubhiwange bhuri bhanu bh'esine mu mubhi uma nabho.
\p
\v 4 Ebhunumba bhuninkwe osubhahwa n' ebhati, n' entange ya bha mukari na moke utabhesingi mo mikonsi, bhushwa Ongo usekerayo obhansa mo bhasingirani n' ebhashuma.
\v 5 Angi m'weriya mo nchime ya bhehe; mubhese n' ikokoma n' ebhiri n' inu, bhushwa Ongo w' esine webha: ntakusimiyo na ntakusiiyo.
\p
\v 6 Nti hima na mwenyihiro ngi twamukoch'iebha: Nyerekuritu ng' emusakiri wani, ntasubhahiyo kikai, emwea wamunikia nki?
\p
\v 7 Musubhukianga ebhabhusimanire, ebhabhuhanang' ekinwa cha Ongo musisirise hani ngi hende n' ebhuingo bwabho na musianye erisimira rabho.
\v 8 Yesu Kirisitu ng' e uma ho mo mwiyoro, run' otu na mukoma.
\v 9 Angi murianyiwa na mitondeko mingi na mishasha; bhushwa rakoma e mitima ibhese na maa mo nchumo, nti mu bhiyo imbi nti byaresake kikai mu 'mbi bh' erikweriya mubyo.
\p
\v 10 Turi n' irango imbi bhakorange 'muro mor' irameso nti bhasimirwa erisa.
\v 11 E mibhi y' esanyamishwa, insi e nshama yato y' erishiwa mo r' irango n' e mukungu mukwakare bhushe 'bhibhi, sishikwanga kumushi n'e nkambi.
\v 12 Bhushwa nancho Yesu nae, kongo washuurur' ebhea mo nshama e wesine wanubhiwanga kumushi n'e rubhi.
\p
\v 13 Tutuke mw' iend' ekuri we kumushi n' enkambi, mw' eriya esankene sae.
\v 14 Bhushwa tusira hano hansi obhungu rw' ibhera, eina tusondange ndu ruseyayo.
\p
\v 15 Kuri we, tusi ebhuri Ongo kinsinso ch' imutata ang'iruhuka nger' iebha mbu, ebyuma by' emitutu inji itikongi erina rae.
\p
\v 16 N' angi mobya e bhongo n' erikoana bhushwa mubhinsinso bya 'mbo bhususe ngi byashima Ongo.
\p
\v 17 Musimire ebhabhusimanire namubhese n' otunda nabho, bhushe bhakohya bhushe n'e mitima yinu, bhaserishayo e mwasi wayo, muronje bhumbo kongo bhakora cho na ngoa, nti mw' ebhibhe, nti ritabhesi na mwengerero kuri bhanu.
\p
\v 18 Mutuhemi, bhushwa turi n' esimira na mwanikire wakonda, mwisonda mu kinsi kikai ienda 'shu.
\v 19 Nibhuhemange na bhonso muronje bhumbo nikochikuruka kuri bhanu tete.
\p
\v 20 E Ongo w'e bhuhoro, ing' wakuruchanga etuka mo bhakwi emusumba mukiri w' esamburi mo nchama y' ebhununsane bhushasha b' wematu ati n' eati, Nyerekuritu Yesu.
\v 21 Wabhuninke kara mu kinsi murimo wakonda, waronje kumunda ninu echamumukokomesha, kuri Yesu Kirisitu, kuriwe kubhese bwime mo bhiranga n' ebhiranga bhibhesi mbo!
\p
\v 22 Nabhuhema, bhanakitu, mwiemisanya n' ebhinwa bhino by' emahano, bhushwa namabhutiranyie mo bwihi.
\p
\v 23 Musibhe mbu munakitu Timoteo wamakind' ioborwa, kubha weya tete, nti nseya kabhusunga hima nae.
\p
\v 24 Munkereanga ebhabhusondore binu bhati, n' ebhashuururwa bhati. E bhaku Italia bhabhukeya.
\p
\v 25 Enchumo ibhese hima ninu bhanu bhati bhibhesi mbo!