nle-ug-nyala_reg/59-HEB.usfm

\id HEB
\ide UTF-8
\h Abebuulaniya
\toc1 Abebuulaniya
\toc2 Abebuulaniya
\toc3 heb
\mt Abebuulaniya
\c 1
\cl Esuura 1
\p
\v 1 Omungeri zingi ezanjawulo erai oKanca yasimolanga na bazeiza baiswei omu barangi,
\v 2 Baitu omunaku zinu oluzwanyuma asimoire naiswei omu mwana, gwe yatairewo okubba omusika wa byoona byoona, era omu Ye yatondere ebintu byoona byoona.
\v 3 Oyo alanga ekinisya kya Kanca era ne kisani kyamwei nka nikiri abesyawo kintu nekigambo kya bukama bwamwe. Niyamaare okukola ekyakunaabya ebibbi, naikala oku mukono ogulyo ogwa bukulu aiguru.
\p
\v 4 Nka akusingira kimwe obukulu abantumwa niyaweweibwa eibara erisinga agaabwe.
\v 5 Kubbanga naani oku bantumwa gwe yaali asimoireku nti, oli mwana wange olwa leero nkubyaire we? Baitu, nti nje nabanga itamwe jaali baitu yeena yabanga mwana jendi?
\p
\v 6 Era baitu naleta omuberyeberye omu nsi, baitu asimoola nti era abantumwa ba Kanca boona boona bamuramyenge."
\p
\v 7 Era asimoola oku bantumwa nti, afuula abantumwa abampewo.
\p
\v 8 Baitu oku mwana asimoolanga nti entebe yaamu, Kanca, yaluberera emirembe seregenyi.
\q
\v 9 Wayenderye obwikiriiri nokyaawa obutengu, oKanca, Kanca wamu, nikyo azwa nakufaku
\v 10 Era ayongera emisingi gyansi neiguru mulimu gwa ngalo zamwe.
\q
\v 11 Ebyo biriwaawo, baitu we oli wabuliizo; nebyo byoona byoona birikairika nka ekizwalo.
\q
\v 12 "Era olibizingaku nka eissuuka, nka ekizwalo, ne biwanyisibwa baitu we oba bumwei, ne myaka jamwei tijirikoma.
\p
\v 13 Naani oku bantumwa gwe yaali asimoireko nti, ikala oku mukono gwange ogulyo, okwiica nindifuula abazigu baamu entebe ya magulu gaamu?"
\p
\v 14 Abantumwa boona boona tinijjo myoyo ejetebwa okuweesvreza aba abaluganda okusikira obulokozi?
\c 2
\cl Esuura 2
\p
\v 1 Nikyo lwaki tugwaniire okutaayo omuno eigani oku bintu byetwawulire, tutakyamuka nitubizwaku.
\v 2 Kubba, nikibba ng'ekigambo ekyabaziibwe abantumwa kyakakatire, buli omwe atakisengeirye oba okukyabiraku, yafunire ekibonerezo ekikumusaanira.
\v 3 Iswe tuliwona tutyai nitwalibba titutaireyo igani eji bucunguli, obukulu butyo? Obwo obwekereire okusimoolwa omukama waiswe atete nga abo abawuliire batukakaise nga butuufu.
\v 4 Era oKanca nakakasira kimwe bye basimoolanga omu bubonesyo n'omubyamaano, n'omubewuunyisya ebitali bimwe n'omubisembo bya mwoyo okweera, bye yagabire nka nakwendya.
\p
\v 5 Kubanga abantumwa tinibo beyafugisirye ensi ekwaaba okubbaawo, gye tukusimoolaku.
\v 6 Baitu Walowo ekifo omwe niyakobeire nakukoba ati, "omuntu lwaki, we okumwizukira? Oba omwana wa muntu, niye naani we okumwijukira?
\q
\v 7 Wamukoore nga okubulaku kadooli okwiisana nka bantumwa, wamutekeireku ekondo eyakitiinisya neitendo; nomufugisya emirimo ebya mukono gyaamu,
\v 8 Wateire ebintu byoona ansi wa magulu gaamwe" niyataire ebintu byoona ansi wamwe, ndoowo nakintu kyatamuwaire kufuga, baitu ati tucaali kubona bintu byoona nibiteekeibwe ansi waamwe.
\v 9 Baitu tukubona OYesu eyatereibwe ansi wa bantumwa okwiika akaire akadooli. Olwa Isaasi lya Kanca yagadiregadire n'afa, leke alege oku kufa okulwa buli omwei.
\p
\v 10 Nakityo kyasaniire nti ye, oku bwamwe era omu ye ebintu byoona nimwo bibbairewo, olwa kuleeta abaana baingi omu kitiinisya, olwa kwiikiirya omukulu owa bucunguli bwaabwe olwabiboonobono.
\v 11 Ayerye abantu okuzwa omu bibbi byaabwe era ye n'abo abeerebwa boona bata n'oitaabwe omwe.
\v 12 "N'akusimoola ati; ndikobera abaganda bange eibara lyamu ndikwemba akati omu ikumbaniro"
\v 13 Era nawandi akoba ati; nje namwesiganga oyo" erate nti, bona nje n'abaana oKanca beyampaire."
\p
\v 14 Olwakubba abaana abagaita nomubiri n'omusaayi, era yeena omwenyenere yagaitire ebyo, olwa kufa leke awerekeerye oyo eyaalina amaani ga kufa, nga niye sitaani.
\v 15 Aale leke abaweerye eidembe abo boona abali omu bwiiru obwomi bwaabwe bwona olwa ntiisa eya kufa
\v 16 Kubanga kya mazima abantumwa tinigwo bajuna, baitu ajuna ibyale lya Ibulayimu.
\v 17 Nikyo kyazwiire kimugwanira omu byoona okubba nk'abaganda baamwe, alyooke abbe okabona asinga obukulu owa isasi omwesigwa omu bigambo ebiri eji Kanca olwakuganiira ebibbi bya bantu.
\v 18 Kubanga ye wanyenere yagadiregadire n'akwoyeerwa, nikyo azwa n'asobola okubajuna abo aboyeerwa.
\c 3
\cl Esuura 3
\p
\v 1 Kale abaluganda abakiriiri, abali no mugabo kwetebwa okwa mwiiguru, mulowooze oku Yesu, omukwenda era kabona asinga obukulu owa mukwikiririza kwaiswe.
\v 2 Eyali omwesimbu era oyo eyamukomere, era nga OMusa ni yaali omwesimbu omu nyumba ya Kanca.
\v 3 Naye OYesu asaanire ekitiibwa ekingi okusinga OMusa, nka omwomboki wa nyumba nabba nekitiibwa okusinga enyumba.
\v 4 Lwakuba buli nyumba wabaawo ajomboka; naye eyayombokere byoona byoona niye Kanca.
\v 5 No Musa yaali mwesimbu omu nyumba ya Kanca nga omuwereza, okumanyisya ebintu ebyali bikwaba okusimolebwa,
\v 6 naye Kristo yaali mwesigwa omu nyumba ya Kanca nko omwana. Naiswe tuli nyumba yoyo, oba nga twakwatiranga kimwe obugumu bwaiswe nokwenyumiriza okwa mwi issuubi kwaiswe nga tunywezere okwiya enkomeero.
\p
\v 7 Kale, nka omwoyo omwikiriiri nasimoola nti, "olwa leero ni mwawura eiraka lyamwe,
\v 8 timukakanyalya mwoyo zanywe, nka omu kusunguwazibwa, nka oku lunaku olwa kwoyeerwa omwiirungu.
\v 9 Abazeiza banywe ni bankemere, nka bangezesya ni babona ebikolwa byange emyaka anai (40).
\p
\v 10 Nikyo nazwiire nsunguwaara emirembe ezo, ni nsimoola nti; bakyama buliizo omu myoyo gyabwe, baitu bo ni bateteja mazira gange!
\p
\v 11 Nka ni nalayire omu busungu bwange; "Nti tibalingira mukiwumulo kyange."
\p
\v 12 Mwekuume, abaluganda, omwoyo ogubi ogwa butaikiriza guganeng okuba omu muntu yeena yeena oku nywe, olwakuzwa oku Kanca omwomi.
\v 13 Naye mukoberenganenge buliizo, nka nimu kyaali ne kiseera e'kyetebwa, "ekya lwa leero" omuntu yeena yeena ku nywe aleme okukakanyalya obubeyegi bwa kibbi.
\v 14 Twafuukire abali kimwe no Kristo, oba nga twakwatiranga kimwe okussuubira kwaiswe okwekereire nga kugumire okwiica enkomeero.
\v 15 Nka ni kikyasimoolwa nti, "olwa leero ni mwawuura eiraka lyamwe, timukakanyalya myoyo zanywe, nka omukusunguwazibwa."
\p
\v 16 Banaani abo abawuura ni bamusunguwalya? Tinibo abo boona boona abaligire omu Misiri no Musa?
\v 17 Era banaani be yasunguwalire okumala emyaka anai? Tinibo abo abasiisire, nemirambo zabwe ni zigwa omu'irungu?
\v 18 Era banaani beyalayiriire obutaingira mu kiwumulo kyamwe, wabula abo abatajeemuka?
\v 19 Era tubona nga tibasoboire kwingira olwa butaikiriza.
\c 4
\cl Esuura 4
\p
\v 1 Ale tutiinenge nti ngekisuubizo ekyokwingira omu kiwummulo kyamwe nga ni kikyalowo, twekuume, omuntu yeena kunywe aleme kuboneka nga takwikiremu.
\v 2 Lwakuba naiswe twayegeswerwe enjiri, nka bo niba yegeserwe, naye ekigambo kya bayegesebwe tikyabagasire bo, olwakubba ni bakiwulire tibakiikirize.
\v 3 Olwakubba iswe abamaare okwikiriza ni twingira omu kiwummulo ekyo; nga ni ya simoire ati "nga ninalayirire omu busungu bwange, nti tibalingira mu kiwumulo kyange." Gonze nge mirimu gyamwe okuzwe mu kutondebwa kwa nsi.
\v 4 Lwakubba walowo wa kusimola oku lunaku lwa musanju ati, "Kanca nawummula oku lunaku olwa musanju mu mirimu gyamwe gyoona;
\v 5 Baitu nakinu te ati, "tibalingira mu kiwumulo kyange."
\p
\v 6 Ale lwakubba kisigaireyo abandi okwingiramu nabo abekereire okwegesebwa enjiri tibaingire olwa bujeemu.
\v 7 Nikyo yazwire natawo olunaku olwetebwa, "leero" nga niyasimoleire omu Dawudi oluzwanyuma lwa biro ebingi, mu bigambo byetumaare okusimolaku aiguru. "Leero, nimwuura eiraka lyange timukuddumbalya myoyo gyange."
\p
\v 8 Kubba singa OYoswa yabawaire ekiwummulo, okanca tiyanydongere te kulunaku lundi. Kanca.
\v 10 Lwakubba buli aingira omukiwummulo kya Kanca, ati aba owumwiire emirimu gyamwe, nka oKanca niyawumwiire egyamwe.
\p
\v 11 Ale twekambenge okwingira mu kiwumulo ekyo, waleme kubawo omuntu yeena alemereerwa okwingira lwa ngeri nkeyo eyabukuddumali.
\v 12 Lwakubba ekigambo kya Kanca kyoomi, ate kikoli, era kisala okusinga buli mpirima yoona eyabwoogi obubiri, ate kyakalamu nokwawula ni kyawula obwoomi no mwoyo, enyingo nobosokoro ati kyangu okwawula okulowooza, nokufumintiriza kwa mwoyo.
\v 13 Ate ndoowo kitonde kitaboneka mu maiso ganywe naye ebintu byoona bikuboneka biswekulibwe mu maiso goyo gwe tukuleetera ebigambo byaiswe
\v 14 Ale nga nituli nokabona asinga obukuulu omukooto, eyayakaire omwigguru, OYesu, omwana wa Kanca, tugumyenge okukwiriza kwaiswe.
\v 15 Lwakubba tetulina okabona asinga obukuulu alumirwa amwe naiswe mu bunaki bwaiswe, eyakemeibwe mu byoona nga iswe, so nga ye tiyabaire na kibbi.
\v 16 Ale twigerenge nobumaliri eji entebe eya kisa, leke tuweebwe okussaasirwa kandi tufune ekisa ekyatujunanga mu bwetaavu.
\c 5
\cl Esuura 5
\p
\v 1 Kubanga buli kabona akira obukulu akomebwa okuzwa omu bantu, ateekebwawo okuweereza ku lwa bantu eji oKanca okuweeryango ebisiimo era ne ssaddaaaka olwa bibbi byabwe.
\v 2 Ayinza okukwaata mpola abatamaite, kubanga era yeena kenyini yeetoolweire bunaki.
\v 3 Era olwa bunaki obwo kimugwanira okuwangayo ssaddaaka okulwamwe kenyini n'okulwa bantu.
\v 4 Ndoowo muntu yeena asobola okwetwaara ekitinisya ekyo, okutoolaku nga ayeteibwe Kanca, era nka Alooni ni yayeteibwe.
\v 5 N'o Kristo atyo, tiyegulumizire yenkai okufuuka kabona akira obukulu, wabula eyakomeibwe oyo eyamukobere ati; "we oli mwana wange," olwa leero nkubyaire we.
\p
\v 6 Era nga nasimoola awandi ati; "we oli kabona emijo gyoona, omulunyiriri lwa merukizeddeeki."
\p
\v 7 OYesu omu kyamwe yabbanga omu mubiri, yasabire ni yeeganiira nakukunga omwiraka aryaiguru na maliga, oyo eyasoboire okumucungula omu kufa, era yawuliire olwa kutiina kwamwe oKanca.
\v 8 Gonze nga yaali mwana wa Kanca, yayegere okugonda olw'ebyo bi yaboineboine.
\v 9 Awo ni yamaare okwikiira, nafuuka ensibiko or obuzwo bwa bucunguki obutawaawo eji abo boona abamugondeire,
\v 10 Era ni yakomeibwe oKanca okubba kabona akira obukulu omu lunyiriri lwa merukizeddeeki.
\p
\v 11 Waliwo bingi bye twandenderye okumusimoolaku, baitu ate nka kizibu okubinyonyola, kubanga timwega mangu.
\v 12 Gonze nga mwandibbisire ni mukusobola okwegesya abandi, kikyetaagisa okwiramu okubeegesyaku ebyekeerwaku ebya kigambo kya Kanca. Mwendya matai ati ti mmere ejigumu.
\v 13 Kubanga buli anywa amatai abba tamaite kigambo kya bwikiiri, abba na kyali mwana muto.
\v 14 Naye emmere ejigumu ya bakulu, abamaare okwetendeka ni bayega okwawula ekisai oku kibbi.
\c 6
\cl Esuura 6
\p
\v 1 Kale katuleke ebyo ebisokerwaku okwegesya OKristo, tweyongere omu kukula omu kwikiriza, kubba twabatereirewo irai omusingi ogwa kwenenya ebikolwa ebifu n'okwikiriza oKanca.
\v 2 Twabeegeserye irai ebya kubatizibwa, ebya kuteekebwaku emikono, ebya kuzuukira kwa bafu n'ebya musango ogutawaawo.
\v 3 Era twiza kukola tutyo oKanca nga niyayendya.
\v 4 Kubanga kizibu okwirya omukweneya abo abamaare okwakirwa, ni baloza oku kirabo ekya mwiguru ni bafuuka abaisana omu mwoyo omwikiiri,
\v 5 ni baloza okukigambo ekisai ekya Kanca no kumaani aga mirembe ezikwiza,
\v 6 ni bagwa okubizwamu, tikisoboka bo okubanga obuyaaka olwa kwenenya. Kubba babba bakomereire omwana wa Kanca omulundi ogwa kabiri, ni bamuswaza mu lwatu.
\v 7 Kubba ensi enywa oikendi agitonyaku emirundi ezingi, nebala ebibala ebisaanira abo ababiruma, efuna omukisa okuzwa eji oKanca,
\v 8 naye nebala amawa nebigurusuuru, tesimibwa era ebaaimpi n'okolimirwa, okunkomerero ebimeereku byokyebwa.
\p
\v 9 Naye, banywani, gonze tubazire tutyo nywe titubabusabusa, tumaite nga muli ne bintu ebisai ebiranga nga muli mu bulokozi.
\v 10 Kubba oKanca mwikiriiri tayinza kwerabira mulimo gwanywe n'okwendya kwe mwalangire eji eibara ryamwe, nimwawereize abaikiiri era mukya wereeza.
\v 11 Era twendya muno buli muntu okunywe okulanganga obunyiinkivu obwo olwa kwetegerezera kimwe eissuubi eryo okwika okunkomerero;
\v 12 timubbanga na bugayaavu, naye mubbe nk'abo abaikiriza era abaguminkiriza ni bafuna ebya suubiziibwe.
\p
\v 13 Kubba oKanca ni yasuubize o Ibulayimu, niwatabaire gwasinga kulaira amusinga bukulu ni yeraayira yenkai.
\v 14 Nakoba nti "mazima okuwa omukisa nakuwanga omukisa, nokwaalya nakwalyanga.
\v 15 Atyo o Ibulayimu ni yamaare okuguminkiriza naweebwa ekyasubizibwe.
\v 16 Kubba abantu balaira asinga obukulu, era omu mpaka zaabwe zoona zoona ekirayiro nibwo bukakafu obusalawo.
\v 17 No Kanca atyo nikyo yazwire ataawo ekirayiro nga akwendya okukakasira kimwe abasika ba kisuubizo nti taliyindula ekyo kyeyasuubiize.
\v 18 OKanca yakikoore atyo, okutulanga ebintu bibiri ebitayinduka, oKanca byatayinza kubeyegeramu, leke tubenga n'ekikutugumya ekigumu iswe abairukiire gyali okulokoka, tusaana okubba abagumu kubba taligaana kutuwa ebyo byeyasuubize.
\v 19 Ebyo nibyo bugumirya kimwe emyoyo gyaiswe nga ennanga okulyato eya bwomi, eissuubi erigumu era eringira omunda omulutimbe;
\v 20 OYesu mweyaingire omukulembeze okulwaiswe niyafuukire okabona asinga obukulu emirembe seregenyi nga enda ya merukizedeeki niyabbaire.
\c 7
\cl Esuura 7
\p
\v 1 Kubanga oyo Merukizeddeki, kabaka owe ssaalemi, kabona wa Kanca ali aigguru muno, yatangaraine OIbulayimu ni yaali nga okwira okuzwa okwita abakabaka, namusabira omukisa,
\v 2 era OIbulayimu yawaire Omerukizeddeki ekitundu ekyaikkumi ekya byoona byoona ebyebanyagire. Eibara eryo litegeeza, kabaka owa bwikiiri, era ekyakabiri, niye kabaka wa ssalemi ekitegeeza nti niye kabaka owa mirembe,
\v 3 atabaire no oitowamwe ti yaali na mamwe, ti yaali na bazeiza baamwe, ti yaali na lunaku lweyasokeireku wadde okusembayo kwa bwoomi, eyaisaine omwana wa Kanca aba kabona owa lubeerera enaku zoona zoona.
\p
\v 4 Leke mumulowozenga omuntu oyo eyali omukulu OIbulayimu ozeiza waiswe omukulu gwe yawaire ekitundu ekimwei kya ikumi ku munyago gwe yafunire.
\v 5 Naabo abo boona baba Leevi abawereibwe obwa kabona amateeka gabalagire okusorozanga ebitundu ebya ikumi mu bantu, ba baganda babwe, gonze nga bazwire mu Ibulayimu.
\v 6 Naye oyo atabaire wa mu kika kyabwe, yafunire ekimwe ku kyaikumi okuzwa ku Ibulayimu namusabira omukisa gwo oyo eyalina ebyasuubizibwe.
\v 7 Naye tikiganibwa nakadooli, omukulu yasabiire omuto omukisa.
\v 8 Mungeri emwei abawereibwe ebitundu ebya eikumi nibo abantu abafiire, naye mungeri eyindi, kyawereibwe eji oyo eyategerekekere nga mwoomi,
\v 9 tusobola era okukoba nti no Leevi, yaweirebwe ekimwei kyaikumi, yawaire ekyamwe nga akwakala mu Ibulayimu;
\v 10 kubanga yaali akyali muntumbwe za zeiza wamwe.
\p
\v 11 Kale okwikiira singa kwaliwo olwa bakabona bwa Abaleevi, kubanga abantu bawereibwe amateeka mubiro bya bwo, kiki ekyo ekikwendesya te kabona owa kabiri okwiimuka mu ngeri ya Merukizeddeki notabaarwa omu ngeri ya Aloni.
\v 12 Kubanga obwa kabona ni bwacusiibwe era na'mateeka tegalirema kucusibwa.
\v 13 Kubanga oyo eyasimworweiku ebigambo ebyo wa kika kindi omutazwanga muntu yeena yeena eyaliwereza ku kyoto.
\v 14 Kubanga kitegerekekere nti omukama waiswe yazwire mu Buyudaaya; omu kika OMusa kyatasimoireku mu bigambo bya bakabona.
\v 15 Era kitegerekere nga waizirewo okabona owundi ali mukifananyi kya Merukizeddeki,
\v 16 Afukire kabona ti mumateeka nga nigalagira abe nga okuzwa mululyo lwa babyaire, naye azwire mu momi ga bwomi obutazwawo.
\v 17 Kubanga OKristo asimolebwaku ati, "oli kabona okwica emirembe gyoona nka engeri ya Merukizeddeeki neri."
\p
\v 18 Kubanga ekiragiro ekyasokere okwejjulwa olwo bunaki no obutagasa bwakyo, kubanga amateeka tigabaireku kye gaikirirye, eissuubi ensinga obusai neringirwa,
\v 19 eritusemberye eji oKanca.
\p
\v 20 Era kinu tekyakoleibwe agati kulayira kirayiro.
\v 21 Kubanga abo bafulibwe bakabona awatabaire kirayiro; naye niye yafulibwe kabona mu kirayiro nga akwakala mu oyo omusimolaku, ati "omukama yalayira, era talyezukya, oli kabona okwica emirembe gyoona gyoona."
\p
\v 22 Era no Yesu atyo nimwo yafukire omuyima wa ndagano esinga obusai.
\p
\v 23 Abakabona babaire baingi olwa kuba bafwanga nga tebasobola okubaawo eibanga lyoona lyoona.
\v 24 Naye kuba Yesu abaawo emirembe gyoona gyoona, nikyo azwa aba no bwakabona obutawaawo.
\v 25 Era nikyo asobola okucungura cimwe abaiza eji oKanca ku lwamwe, kubanga abenga omwomi enaku zoona zoona okubawozeranga.
\p
\v 26 Nolwekyo kabona asinga obukulu aisana atyo niye yatusamire, omwikiri, ataliku kabi koona koona okutali kipaapi, eyakikinize okusinga eigguru;
\v 27 Atawalirizibwe nga bakabona abasinga obukulu badi, okuwangayo essaddaaka buli lunaku, okusokera ku bibi byamwe okwo bakukoleire cimwe omulundi gumwe, ne bewerayo abenyenere.
\v 28 Kuba amateeka galondenga abantu okuba bakabona abasinga obukulu, no obunaki bwabwe naye ekigambo ekya kirayiro, ekyairire amateeka, kyalondere omwana eyaikiriire emirembe gyoona gyoona.
\c 8
\cl Esuura 8
\p
\v 1 Kale omukigambo byetusimola kinu nikyo kinyusi; tulina okabona asinga obukulu, aisana atyo, eyaikaire okumukono ogulyo ogwa ntebbe yabukulu bwa mwiguru,
\v 2 omweereza wa bwikiriiri, era owa weema ya mazima, etayombokeibwe bantu, wabula omukama.
\p
\v 3 Kubanga buli kabona asinga obukulu alondebwa olwa mulumo ogwa kuwangayo ebirabo era no mutango, nikyo kyazwiire kimwetagisa no kabaona onu kubaku na kintu.
\v 4 Kale singa ti yaali ku nsi, tiyandibaire kabona na'kadooli. Nga walowo abakabona abawaireyo ebirabo nk' amateeka ni gali.
\v 5 Abawerereyize omu kifananyi ne kiituuru kyamwiguru, nko OMusa ni yakoberwe oKanca, ni yaali nga okwaaba okukola eweema; kubanga oKanca yamukobere nti, tolemanga kukola byoona byoona nka ekyakuboneraku ni kiri kye walangiibwe oku lusozi."
\v 6 Naye ati nimwo kiri OYesu yawereibwe okuwereza okusinga obukulu, era n'endagaano gyalumu nka agaitta niyo esinga obusai kubanga era n'ebisuubizo byayo nibyo bisinga obusai.
\p
\v 7 Kubba endagaano eyekereire singa tiyaluku kyaku nenyezebwa, tiwandibairewo nsonga etakisya ya kabiri;
\v 8 kubanga n'abanenya nasimola nti, "bona, ebiro bikwiiza," nemwo asimola oKanca. Ni ndikola endagaano egiyaaka n'enyumba ya Yuda.
\q
\v 9 Ti nk'endagaano gye nalagaine na bazaiza baabwe. Oku lunaku lwe nnabakwaite oku mukono okubatoola omu nsi ya Misiri, kubanaga abo ti banywereire mu ndagaano yange, njeena ni mbaleka okubabona, nimwo asimoola oKanca.
\q
\v 10 Kubanga enu niyo ndagaano gye ndiragaana n'enyumba ya Isirayiri anyuma lw'annaku ezo nimwo asimoola omukama; ndita amateeka gange omubirowoozo byabwe, era ndi gawandiika oku mwoyo zanywe, njeena ndibaanga Kanca waabwe, boona bakubaanga bantu bange.
\q
\v 11 Era ti waliba muntu alyegesya mwiraamwe, oba muganda waamwe, ng'akoba nti, tegeera omukama; kubanga boona boona balitegeera, okuzwa oku muto okwiika kw'asingayo obukulu.
\q
\v 12 Kubanga ndibasaasira mu butali bwikiriiri bwaabwe. N'ebibbi byabwe tindibiizukirate."
\p
\v 13 Nimwo asimoola oku ndagaano ejjiyaaka, kiba kikutegeeza nti eyakwekeera aba ajikairikirye. Nayeekikulu ekikairika kibba kiri ampi okuwaawo.
\c 9
\cl Esuura 9
\p
\v 1 Era n'endagaano esooka yalina empisa ezalagirwe eza kusinzanga oKanca, n'ekifo ekikiiri, ekya mu nsi.
\v 2 Olwakuba eWeema yakoleibwe, eyaluberyeberye yaluumu ekikondo ne ttaala ne mmeenza me migaati ezakulanga awayeteebwanga awaikiiri.
\v 3 Era enyuma wa lwigi olw'akabiri waliyo eweema eyetebwa ejiikiriiri omuno,
\v 4 mukifo ekyo mwalumu ekinyonkereze ekya zaabu, nesanduuki eya endagano eya swekeibweku ozaabu oludda no lwona, eyalumu ekibya ekya zaabu omwabbaire emmaanu, n'omwigo gwa Alooni ogwalokere, n'ebipande ebya ndagaano.
\v 5 No kuruguru ku yo bakerubi aba kitiinisya nga basendasenda entebe eya kusaasira, bye tutasobola kusimolaku atibuni kimwe n'akimwe
\v 6 Naye ebyo nimwo byakoleibwe bityo, abakabona baingiranga buli lunaku weema eyaluberyeberye, nga bakwikiirya emirimu eza ekuwereza.
\v 7 Naye omu edi eyakabiri aingiramu kabona asinga obukulu yenkai, omulundi gumwe buli mwaka, era yayabangayo n'omusaayi, gwamwe yawanga yo kulwamwe n'olwebibbi bya abantu bye baakolangamu
\s butamanya.
\v 8 omwoyo omwikiriiri atutegeeza nti, enzira eikka omu kifo ekikiriiri ekyaali kubonekebwa, ng'eweema esooka ekyayemereirewo.
\v 9 Amakulu gabyo mukiseera kinu gali nti, ebirabo era ne ssaddaaka eyaweweibweyo nga tebisobola kwikiirya mulimu gw'oyo asinza.
\v 10 Olwakuba Nizo mpisa ezalagiirwe eza mubiri obubiri (amwe ne zakulya ne zakunywa ne zakunaaba okutali kummwe) ezateekebwewo okwika ku biro ebya kwiirya obuyaaka.
\p
\v 11 Naye Kristo niyaizire okabona asinga obukulu owa bigambo ebisai akwaaba okwiiza, nayakala mu weema esinga obukulu n'okwikiira, etakoleibwe na mikono, amakulu, etaliyansi munu,
\v 12 naye ti lwa musaayi gwa mbuzi n'ennyana, naye lwa musayi gwamwe mwenyenere, naingiriira kimwe awaikiriiri, niy'amaare okufuna okununula okutawaawo.
\v 13 OlwaKubba oba nka omusaayi gwambuzi n'ente enumi, neikoke rya nte ennyana, ebimansirwa kwabo abalina ebibbi bikiiranga okunaabya omubiri.
\v 14 Omusaayi gwa Kristo, eyewaireyo yenkai olwa mwoyo ogutawawo eji oKanca nga taliku bulema, tegulisinga muno okunaabya omwoyo gwa nywe okuzwa mu kikolwa ebifu okuweereza oKanca omwoomi?
\p
\v 15 N'olwekyo oKristo nikyo yazwiire nabba omukwenda wa ndagaano ejiyaaka, okufa nka ni kwabbairewo olwa kununulwa mu byakusiisa ebya mundagaano eyasokere, abeteibwe basobole okuwebwa okusubiza kwa busika obutawaawo.
\v 16 OlwaKubba awabba endagaano eya busika, kisaana okubbaawo okufwa kw'oyo eyajjikoore.
\v 17 Kubanga endagaano eya busika egumira awaba okufwa kubanga tebba namakuru nga eyagikoore akyaali mwoomi;
\v 18 Era endagaano eyasookere teyakakasibwe owatali omusaayi.
\v 19 Kubanga buli kiragiro ni kyamalanga okusimolwa OMusa edi abantu boona boona nka mateeka nka ni gali, n'atwalanga omusaayi gwa nnyana, na mbuzi, amwe n'amaizi n'ebyoya bya ntaama ebiikiriiri n'ezoobu, n'amansiranga ku kitabo kyenyenere, era n'oku bantu boona boona.
\v 20 Ng'asimoola nti, "gunu nigwo musaayi ogwa ndagaano oKanca gweyalagiire."
\v 21 Era ate eweema 'ebintu byoona byoona ebya kuweereza nabimansirako omusaayi atyo.
\v 22 Era omu mateeka kubulaku kadyooli ebintu byoona byoona okunaabibwa nomusaayi, era awatali kusuka isagama t'ewabbaawo kusonyiyiwa.
\p
\v 23 Kale ebifwananyi nibyo ebya mwiguru kyabigwaniire okunaabibwa nebyo, naye ebya mwiiguru byenyenere okunaabibwa ne saddaaka ezisinga ezo.
\v 24 OlwaKubba oKristo ti yangiriire mukifo ekikiriiri ekyakoleibwe na mikono, ekyaisaine nkekyo ekyamazima, naye omwiguru mwenyinire, okuboneka ati omu maiso ga Kanca ku lwaiswe.
\v 25 Naye ti lwa kwewangayo mirundi zingi nk'okabona asinga obukulu naingira omu kifo ekikiriiri neisagama etali yamwe.
\v 26 OlwaKubba kyamusaaniire okuboonaboona emirindi zingi okuzwa okukutondebwa kwa nsi, naye ati bunu yaizire omulundi gumwei okunkango ya mirembe asobole okwiyawo ebibbi olwakwewayo kamwe.
\v 27 Era nka abantu ni babiikiirwe okufa omulundi gumwe oluzwanyuma lwakwo musango,
\v 28 Era no Yesu Kristo atyo, ni yamaite oku webwaayo omulundi gumwe okwetiika ebibbi ebyabaingi, ali boneka omulundi ogwa kabiri gyatali kibbi edi abo abamulindiirya olwa bucunguli.
\c 10
\cl Esuura 10
\p
\v 1 Olwakubba amateeka ni gaali ekyiituuru ekya bisai ebyaali bikwaaba okwiiza, naye nga tikifananyi ekya bigambo, ssadaaka ezitakyuuka zibawangayo obutayosanga buli mwaka nga tiziyinza kwerukya abo abazibbaku ampi.
\v 2 Olwakubba tizandikeire kuwebwayo? Olwakubba abaramya ni bamala okunabira kimwe omulundi gumwe, bakkubbaire tibakyewura nga bali ne bibbi.
\v 3 Naye omwezo, mulumu okwizukiranga ebibbi buli mwaka buli mwaka.
\v 4 Olwakubba tikisoboka omusaayi gwa nte onnumi nombuli okutoolawo ebibbi.
\p
\v 5 OKristo nga akwiiza omu nsi essaddaaka ne biweebwayo olwa bibbi tiwabyenderye, naye wantekeiretekeire omubiri.
\q
\v 6 Tiwasimire bbe ebyokyebwa ebiramba nebibawayo olwa bibbi.
\q
\v 7 Ale ni nsimoola nti, bona nnyizire okukola byotaka, ayi oKanca; nka ni źkyampandiikibweku omukizinge ekyakitabo
\v 8 Nimwo asimoola aiguru nti, essaddaaka nebibawaayo, nebyokyebwa, ebiramba nebyebawaayo olwa bibbi, tiwabyenderye, gonze tiwabisiimire, kyonkai nga byawebwangayo nka amateeka ni gaali.
\v 9 Nasimoola ati, bona nnyizire okukola byoyendya atolawo ebyekereire nsobole okugumya ekyakabiri.
\v 10 Omubyataka twayerukire, olwamubiri gwa Yesu gweyawaireyo omulundi ogumwei
\v 11 Na buli kabona ayemeera buli lunaku omukuweereza nga akuwayo emirundi zingi essaddaaka ezitacuuka, emirembe zoona.
\v 12 Naye oyo ni yamaare okuwaayo essaddaaka emwei olwa bibbi okwikya emirembe zoona, nasobola okwiikala oku mukono ogulyo ogwa Kanca.
\v 13 Nga akulindiirya oluzwanyuma afuule abalabe baamwe entebe yamagulu gaamwe.
\v 14 Olwakubba niyawaireyo essadaaka emwei abo bonkai abayerukiibwe.
\v 15 Era omwooyo ogweruki, niye mujulizi jetuli olwakubba namala okusimoola ati,
\v 16 Enu nijjo ndagaano yange nabo, oluzwanyuma lwa naku zidi, nimwo asimoola omukama, ndita amateeka gange okumyooyo zaabwe, era nokumagezi gaabwe; ndiwandiika, era nasimoola nti;
\v 17 Ebibbi byabwe, nokujeema kwabwe, tindiiramu kubiizukira.
\p
\v 18 Naye ebyo nga bitoleibwewo, tiwakyalowo ssaddaaka okulwa bibbi. Okuguma omukwiikiriza no mukuguminkiriza.
\p
\v 19 Kale abaluganda nka ni twaali abagumu okwiingira omu kifo ekyeruki olwa musaayi gwa Yesu.
\v 20 Omu nzira egiyaaka jiyatutereirewo, nga erimu obwoomi eyakala omulutimbe, nigwo omubiri gwaamwe.
\v 21 Era nka ni tuli no kabona omukooto afuga ennyumbba ya Kanca.
\v 22 Tusemberenge nomwooyo ogwa mazima olwa kwiikiriza okwiikiriire omu mwooyo zaiswe nga zisamulibweku okuzitolamu emwooyo ezibbi, nemibiri zaiswe nga bazinabirye namaizi agasai
\v 23 Tugumye okwatulanga okusuubira kwaiswe nga tutukuyugayuga olwakubba eyasuubiize yesigibwa,
\v 24 era twerowozengaku iswenkai, naswenkai nga tweizukirya ebikolebwa ebisai.
\v 25 Obutalekanga kukumbaana amwe, nka bandi ni beeyakalya, naye nga tulamba, era nga tweyongera nga olunaku luli ampi okwiika.
\p
\v 26 Olwakubba nitugendeera okusiisa nga tumaare okufuna okutegeera, amazima, wabba tiwakyaliwo ssadaaka ewebwaayo olwa kibbi ekyo,
\v 27 wabula okulindiirya nga kitiina okutusaara okwokya abalabe.
\v 28 Agaya amateeka ga Musa, afa nga ndoowo kumusaasira nga walowo abajulizi ababiri aba basatu,
\v 29 mulowooza mutyai ekibonerezo kiryenkana, ai ekyirisaanira, okusinga obubbi eyaziniririire kimwe omwana wa Kanca, nalowooza nti omusaayi gwa ndagaano ogwamwerye nti tigweruki takola ekyejjo oku mwoyo owa kisa?
\v 30 Olwakubba tumumaite oyo eyasimooire ati nje ndiwolera eiyanga, nje ndisasula, era nekindi nti omukama niye alisaara abantu baamwe omusango.
\v 31 Kigambo kya kutiinisya okugura omu mukono za Kanca omwoomi
\v 32 naye mwiizukire enaku zairai eisana ni ryamaare okubakira nga mwaguminkirizanga okuboonaboona okwa maani.
\v 33 Oluusi mwafuukire ekiroleerwa nimuzumibwa mbabayiganya owundi nimwisana nabo, ababwoinebweine nka nywe.
\v 34 Olwakubba mwasasiire abasibe era mwaguminkiriize nokusemeerwa, okunyagibwaku ebintu byanywe, olwakubba mwetejerye nga muli nebintu ebisinga obusai nga byabulubeerera.
\v 35 Kale mutanaganga bugumu bwanywe obukulu empeera ejikooto.
\v 36 Olwakubba mwendye ogumikiriza, era ni mulimala okukola oKanca byataka, obwo musobole okufuna biyasuubiize.
\v 37 Olwakubba wakyasigaireyo akaseera kadooli muno, akwiiza, aliika era talirwaawo.
\q
\v 38 Naye omwikiriiri wange alibba mwoomi lwakwikiriza, era nairayo emabega, omwoyo gwange tugumusanyunkira bbe.
\p
\v 39 Naye iswe titukwiiza kwiira mabega omu kwiikiriza, naye tuli bakwiikiriza olwa kulokola obwoomi.
\c 11
\cl Esuura 11
\p
\v 1 Okwiikiriza kwanywe kukakasa nti ebisuubirwa biriikiriira, erate n'okutankana gonze nka tekuliboneka.
\v 2 Kubanga okwiikiriza kwamu kuzwaku abantu abairai okusembwa oKanca.
\v 3 Olwa kwiikiriza tetwetejja nkebintu byoona bya koleibwe kigambo kya Kanca, erate ebiriboneka.
\p
\v 4 Olwa kwiikiriza Abeli yawaire oKanca esaddaaka ekisinga obusai okusinga eya Kayini, ni kimuweerya obwiikiriiri, oKanca ni yaikiriize ebisiimo byanywe, erate olwa kityo gonze nka Abeli yafiire baitu akyasimoola.
\p
\v 5 Olwa kwiikiriza, Enoka yatwalibwe nka tayakaire omu kufa, nataboneka kubanga oKanca yamutwaire, kubanga ni yaali nga akyaali kumutwala oKanca yategezerye nga ni yamusiimire.
\v 6 Erate awataali kwiikiriza tikisoboka kusemeera oKanca, kubanga buli aiza erate oKanca kikugwanira okwikiriza nka oKanca waali erate nka niyawerya empeera, erate abo abamutoolya.
\p
\v 7 Olwa kwiikiriza ONuuwa, ni yalabwire oKanca natiina erate omu kwikiriza nayomboka eryato olwa kucungula enyumba yamwe, kiyazwire asaara ensi omusango, nafooka omugweitta olwabwiikiriiri obuli omu kwiikiriza.
\p
\v 8 Olwa kwiikiriza OIbulayimu ni yayeeteibwe, nawuura n'okwaba nayaba omu kifo ekyaali okwaba okuweebwa okubba omugweitta; atyo nayaba nka tamaite jakwaaba.
\v 9 Olwa kwiikiriza, nabanga omugenyi omu nsi eyasuubiziibwe, nke tali yaamwe, nga asula omu weema amwe n'oIsaaka n'oYakoobo, yagweetta abairamwe olwa kusuubizibwa okwo.
\v 10 Kubanga yalindiriirye ekibuga kidi ekirina emisingi, oKanca kya kubbire erate kiya yombokere.
\v 11 Olwa kwiikiriza erate no Saala yenyini naweebwa amaani okubba nenda gonze nga yaali ayakaliirye omu myaka, kubanga oyo eya musuubize yamulowoize nga mwesigwa.
\v 12 Nakityo okuzwa omu muntu omwei eyaali aiyanana nka afiire, nimwo mwazwiire abantu baingi nk'enyenyezi eza mu mwiguru obungi, erate nko musenyu oguli ebuluba bwa nyanja.
\p
\v 13 Abo boona bafereire mu kwiikiriza, nka tebawereibwe bye basuubizibwe, baitu nka bakubirengera erai, erate abatambuli oku nsi.
\v 14 Kubanga asimoola atyo aisana nka akutoolya ensi eyabutaka
\v 15 Erate singa baizukira ensi edi gyi bazwiremu bandibaire ne ibanga okwirayo.
\v 16 Baitu; atibuni bakwegomba ensi esinga obusai, nigyo ya iguru, oKanca nikyo azwa aleke okwatibwa ensoni oku lwaabo, okweteebwayo oKanca waabwe; kubanga yabatekeiretekeire ekibuga.
\p
\v 17 OLwa kwiikiriza OIbulayimu, ni yagezeseibwe, yawaireyo oIsaaka omwana wamwe eyabyalibwe omwei yenkai eyawereibwe ebyasuubizibwe,
\v 18 eyakobeibwe nti, "omu Isaaka eibyaire lyamu nimwo yakaalanga."
\v 19 Yamaite nga oKanca ayinza okumuyimbokya omu bafu, erate nayakirya Isaaka nk'akwisana ayimbookere omu bafu.
\p
\v 20 Olwa kwiikiriza Isaaka yasabire omukisa OYakobo no Esawu, omu bigambo ebyali bikwaba okwiiza.
\p
\v 21 Olwa kwiikiriza OYakobo ni yaali akwaaba okufa, yasabiire omukisa abaana ba OYusufu bakali ababiri, nansiza nga okutaime oku kalogodyo ka musaale gwamwe.
\v 22 Olwa kwiikiriza OYusufu, ni yaali nga yatera, okufa, nasimoola oku kuzwayo kw'abaana ba Israeri, nalagira ku bya maguma gamwe.
\p
\v 23 Olwa kwiikiriza OMusa, ni yawalariibwe, ababyaire baamwe ne bamubisira emyezi isaatu, kubanga bamuboine nga mwana musai, batatiina kiragiro kya mukama.
\v 24 Olwa kwiikiriza OMusa, ni yakuure nagaana okweteebwanga omwana wa mwala wa Falaawo.
\v 25 Ng'asinga okutaka okwolebwanga obubbi omwana n'abantu aba Kanca okusinga okubba omu kisembo okwa kibbi okuwaawo amangu.
\v 26 Nga kulowooza ekizumo kya OKristo okubba obugguuda obusinga ebintu ebya Misiri, kubanga yaali akusuubira empeera eyo.
\v 27 Olwa kwiikiriza nazwa omu Misiri, ng'akutiina obusungu bwa mukama; kubanga yaguminkirirye ng'akubona oyo ataboneka.
\v 28 Olwa kwiikiriza yakoore okwakalwaku n'okumansiira isagama, eyawerekereirye ababeryeberye ba Misiri aleke boona okubatwaraamu.
\p
\v 29 Olwa kwiikiriza ni bakaala omu nnyanja ejitukuliki nka bakwala oku lunaku. Aba Misiri ni bagezeryeku okwola batyo nibawerekeerwa.
\p
\v 30 Olwa kwiikiriza olukologo lwa Yeriko nerunwa, nka kimaale okwe bulunguura okumala ennaku musanju.
\p
\v 31 Olwa kwiikiriza OLakabu omusiyani oyo tiyawerekeire amwei nabo abatalibagondu, ni yagereirye omukeiti emwijo.
\p
\v 32 Nsimoole ki te? Kubanga ekiseera ni kirimpwaku ni nasimooire oku Gidiyooni, Obakaki; OSamusooni, oYefusa no ku Daudi, OSamwiri na balangi abandi.
\v 33 Olwa kwiikiriza abo ni bawangwiire obukama, ni bebakoole obwa ntalo.
\v 34 Bbe balikirye amaani ga muuro nibo baikire obwogi bwa mpirima, nabo baweibwe amaani okuzwa omu bunaki, ni bafukire abazira omu ntalo. Niba bagobere eiye lya bapaati.
\v 35 Abakali ni babaweerya abafu baabwe nka bakizwiirwe, nabandi ni babayiganyizibwa, nga tibaganya kucungurwa leke baweebwe okuyimbooka okusinga obusai.
\v 36 N'abandi ni baduurwa ni bakubwa, nibabbuwa, ni babata omu nkomyo.
\v 37 Bakubiibwe amabbaale, babasalemu n'omusumeeni, bakwayeerwe, babaitire n'empirima, batambwirenge nga bazwaire ebyanzo bya ntaama ne bya mbuli nka ti balina katu, nka bakubonyabonyezebwa nka bakolebwa ebibbi.
\v 38 N'ensi nka tebasaanire, nka bakwala omu mairungu nomu nsozi. Nka bakweeka omu mpuku no mubwiina obwansi
\v 39 Baitu abantu abo boona gonze bakakaisibwe olwa kwiikiriza kwaabwe, ti batungire ekya basuubizibwe.
\v 40 Kubba oKanca yatuboneire irai iswei ekisinga obusai, bo baleke okwiikirizibwa iswei nke tetulowo.
\c 12
\cl Esuura 12
\p
\v 1 Ale naiswe nga ni tulina ekibuura akya bajuurwa ekyenkanaawo tweyambulenge buli ekizitowa n'ekibbi ekyegaitta naiswe, twirukenge nokuguminkiriza embiro ezitekeibwetekeibwe omu maiso gaiswe,
\v 2 nga tukuloleero OYesu yenkai omukulu wa kwiikiriza kwaiswe erate omwukwikirya waako, olwa'issanyu eryatekeibwe omu maiso gaamwe eya gumikkirize omusalabba, nga anyooma ensoni, naikala oku mukono ogulyo ogwa ntebbe ya Kanca.
\p
\v 3 Kubbanga mumulowooze oyo eyagumikirize empaka ezibbi, mulemenge okukerwa, oba okwiriira omu myoyo janywe.
\v 4 Mukyali kuwakana okwika kusuka omusaayi gwanywe nga mukulwana ne kibbi.
\v 5 Mwerabiire ebigambo ebibakoberwa nka abaana, "mwaana wange, tonyoomanga okukangavula kwa mukama, ate towangamu maani na kunenyanga.
\q
\v 6 Kubbanga omukama gwayendya amukangavula, ate akubba buli mwaana gwaiikiriza.
\p
\v 7 Olwa kukangavula nikyo mwazwanga mugumiikiriza OKatonda abakole nk'abaana, kubba mwaana ki oitaamwe gw'a takangavula?
\v 8 Baitu ni mutakangavulwa nka abandi ni bakangavulwa mwabbanga basoroore, baitu ti baana.
\v 9 Twalina abaitaiswe aba mubiri abatukangavulanga, ni tubatangamu ekitiinisya, titulisinga muno okugonderanga oitamwe wa myoyo, nitubba aboomi.
\v 10 Kubbanga bo baatukangavulanga ennaku zidooli olwa kwegasa bo, baitu oyo atukangavula olwa kutugasa, tulyoke tufune omugabo oku bwikiriiri bwamwe.
\v 11 Okukangavulwa kwoona omubiseera ebya'ti, tikwisana nka kwaissanyu wabula kwa bujune, baitu oluvanyuma kubala ebibala ebyamirembe ejaabo ebegesebwa omukwo, nibyo bibala byabwiikiriiri.
\p
\v 12 Ale mugolole emikono jaanywe ejikeerwe, namazwi ganywe agasaraire;
\v 13 Erate mukubirenge amagulu ganywe enzira ezigolokoki, akyenkyengera, baitu owonenge mbe.
\v 14 Mubenge ne mirembe edi abantu boona, no bwikiriiri awataali obwo, ndoowo alibona Kanca.
\v 15 Nga muloleera muno, walemenge okubbaawo omuntu yeena aweebuuka omu kisa kya Kanca; ate mwekumenga "ekikolo kyoona ekisaara" kiremenge okusebuka omunywe, okugwagwawalya abaiji.
\v 16 Erate mwegenderezenge waleme okubbaawo omusiyani, oba atatiina Kanca, nka Eswau, eyatundire obugweeta bwamwe olwa kawumbo kammere akamwe.
\v 17 Kubbanga mumaite nga ate oluzwanyuma, ni yayenderye okugweta omukisa, tikyasobokere kubbanga tiyafunire ibbanga lya kwendekeramu mwoyo, gonze nga yaguswagire na maliga gaiji.
\p
\v 18 Kubbanga timwiizire ku lusozi olukwatibwaaku era olwaaka nomuuro, neji kirikiirya ekikwaite dyodyo.
\v 19 N'okuvuga kwa magwaara n'eddoboozi lya bigambo abaawuliire ni beegayiira obutayongerwaku kigambo lwa kabiri;
\v 20 Kubbanga tibaakiyinzirye ekyalagiirwe nti "Gonze nekisolo nikikoma oku lusozi, kirikubwa amabbaale.
\v 21 Nebyabonekere byaali bya tiisa biti oMusa nakukola nakoba nti ntiinire muno era nkankaine."
\v 22 Baitu mwizire oku lusozi sayuuni, no ku kibuga kya Kanca omwoomi OYerusalemi ekya mwiiguru, neji bukumi bwa bamalaika.
\v 23 Eji eikumbaaniro erikooto era ekanisa eya luberyeberye abawandikiibwe omwiguru neji oKanca omulamuli wa boona, neji myoyo jabaikiriiri abaikiriziibwe,
\v 24 Neji oYesu omubaka wa ndagaano ejiyaaka, neji omusaayi ogwa kumamiira ogubaza ebisai okusinga ogwa Abbeeri
\v 25 Mwekumenge obutagaananga kuwuura kusimoola, kubbanga badi ti bacungukire, ni bagaine oyo eyabalabwiire nga okusinzira oku nsi, iswe tuliwona tutyai? Nituli kyaama okuzwa okwoyo asimoola omwiguru?
\v 26 Eyakankainye ensi neiraka lyamwe omubiseera biddi, baitu ati yasuubiize, nga akusimoola ati "ekyasigairo omulundi gumwe ndinenya, tinsi yonkai, baitu neiguru"
\v 27 Neekyo nti "ekyasigaireyo omulundi gumwe kitegeeza okwiyibwawo okwebyo ebikankana, nga ebyakoleibwe ebitakankana, biryoke bibeewo.
\v 28 Ale ni tuweebwa obukama obutakankanizibwa, tubenge n'ekisa, kituwerezesye okuweereza okusiimibwa, oKanca, n'okwegendereza nokutiina.
\v 29 Kubbanga oKanca waiswe nigwo muuro ogubabula.
\c 13
\cl Esuura 13
\p
\v 1 Okwendyangana nk'abaluganda kubengewo.
\v 2 Timwerabiranga okusemberya abagenge olwakuba waalowo abasembeirye abamalaika nga tibamaite.
\v 3 Mwizukirenge abasibe, nka basibirwa amwe nabo, era ni babona obujune, olwakuba nanywe muli mu mubiri.
\p
\v 4 Okufuumbirwangana kwa kitiibwa eji abantu boona boona, nekitabo kirongooki, olwakuba abagwagwa na benzi oKanca alibasaara omusango.
\v 5 Mubenge n'empesa eya butayendya bintu; byemulinabyo bibamalenge; olwa kuba ye omwenyenere yakobere tindikuleka nakadyoli era tikulekeera nakadyoli.
\p
\v 6 Nikyo tuzwa ni tusobola akusimoola bobugumu nti, "omukama niye muyambi wange, tinatiinenge omuntu ayinza okunkola kki?"
\p
\v 7 Mwizukirenge abakama banywe ababuliira ekigambo kya Kanca, nga muloleera enkango ya mpisa zaabwe, musengeryenge okwiikiriza kwaabwe.
\v 8 OYesu Kristo eizo ne leero abba bumwe okwiika emirembe nemirembe
\v 9 Timusendebwenga mu kwegesya okwa ngeri ezingi okwiiza, olwakubba kisai omwoyo okugumizibwa ekisa, ate tina kugumizibwa na mpisa ezakulyanga, ezitagasa abo abazitambuuramu;
\v 10 tuli ekyoto abaweereza ebya mu weema kye batalagiirwe kuliirangaku.
\v 11 Olwakuba ebisolo bidi, ebitwalibwamu omusaayi gwabyo okabona asinga obukulu omukifo ekikiriiri olwa kibbi, emibiri babyo zocerwe enzai wa lusisira.
\v 12 Era no Yesu nikyo yazwiire na gadiragadira. Enzai wa wankaaki asibole okweeruca abantu no musaayi gwamwe.
\p
\v 13 Kale tuwuluke okwaaba jaali enzai owalisiisira nga twetiikire okuzumibwa kwamwe.
\v 14 Olwa kubba titulina kibuga ekibereire tukuswaagana ekikwaaba okwiiza.
\p
\v 15 Kale omuye tuweyo eddi oKanca buliizo essaddaaka eyaitendo, nikyo kibala ekya minwa ezatula eibara lyamwe.
\p
\v 16 Naye okukala okusai nokwekalangula temubyerabiranga; kuba essadaaka eziri mu ngeri ezo zimusanyusa muno oKanca.
\p
\v 17 Muwuurenge abo ababaguga mubagonderenge olwakubba abo baloleera olwa bwomi bwanywe. Nga balowooza nibakola basobole okukalanga batyo nga basanyuki, nga tebemulugunyanga, olwa kuba n'ibabemulugunyiza tikibagasa nywe.
\p
\v 18 Mutusabirenge, olwa kuba tumaitiire kimwe tuli nomwoyo ogusai, nga twendya okubala empisa ezisai mu byoona byoona.
\v 19 Era okusinga, omuno nkubegayiira okukolanga mutyo. Nsobole okwiira mangu jemuli.
\p
\v 20 Naye oKanca owamirembe, eyairye okuzwa omu bafu omulisya wa ntaama omukulu olwa musaayi gwa ndaagano eyasookere niye mukama waiswe Yesu.
\v 21 Abaikiirye mu buli kigambo ekisai okukolanga byayendya nga akoora omubo ebisiimibwa ekitiibwa emirembe n'emirembe Amiina.
\p
\v 22 Naye nkubabuuliira abaluganda, muguminkirezenge ekigambo ekyakubuuliira olwakubba mbawandikiire mu bigambo bidyooli.
\p
\v 23 Mumaite nga owa luganda Timiseewo yataisibwe; niyaliiza mangu. Ndibabonera amwe naye;
\v 24 Mulamuce boona ababafuga, nabaikiriiri boona. Aba muIitaliya babamucirye.
\p
\v 25 Ekisa kibenge nanywe nyweena nyweena. Amiina.