nle-ug-nyala_reg/48-2CO.usfm

\id 2CO
\ide UTF-8
\h 2 Abakkolinso
\toc1 2 Abakkolinso
\toc2 2 Abakkolinso
\toc3 2co
\mt 2 Abakkolinso
\c 1
\cl Esuura 1
\p
\v 1 OPawulo, Omutume wa Kristo oYesu olw’akwendya kwa Kanca, no Timoseewo ow’aluganda, edi e’Iramyo lya Kanca edi omu Kkolinso, amwei n’abaikiiri boona boona abali omu Akaya yoona yoona.
\v 2 Ekisa kibbenge naanywe ne mirembe ebizwa edi oKanca oiteiswe no Mukama waiswe oYesu Kristo.
\p
\v 3 Yebalibwe oKanca erate oitaamwe wa Mukama waiswe oYesu Kristo, oitaiswe owa kusasira, erate oKanca owa kusemeera kwoona kwoona.
\v 4 Atusemeerya omu buli kibonobono kyaiswe, iswei tusobole okusemeeryanga abali omu kubonabona koona koona, nokusemeerya iswei oKanca kwatusemeerya.
\v 5 Olwakubba ebibonobono bya Kristo nka nibyeyongera omuno jituli, erate nimwo kutyo n’okusemeerwa kwaiswe kweyongera muno oku bwa Kristo.
\v 6 Baitu nitubonabona, tubonabona lwa kusemeerwa no kulokoka kwanywe, erate nitusemeerwa, tusemeerwa olwa kusemeerwa kwanywe, okuleeta okuguminkiriza ebibonobono ebyo naiswe bye tubonabona.
\v 7 Erate okusuubira kwaiswe kwetulina kwa maani ji muli; olwakubba, tumaite tuti nka nimubonobona amwe naiswe, erate mutyo mugabana n’omukusemeerwa kweiswe.
\p
\v 8 Olwakubba nywe abaluganda, titwendya mugaane kwetejja, ebya kubonabona okwa twikireku omu Asiya, nitwazitowereirwe omuno okusiinga amaani gaiswe, erate nitutasuubira kubba bwoomi.
\v 9 Erate Iswe twawuliire okwesaara omusango ogwa kufa, ekyo kyalowo leke tuleme okwesiga amaani gaiswe, wazira twesige oKanca ayimbooca abafu.
\v 10 OKanca eyatuwonerye omu kufa okukooto omuno, erate alituwonia: erate oyo niye gwe tulinamu eisuubi okutuwonia.
\v 11 Nywena mutujune omu kusaba; nitulimala okuweebwa ekisiimo olwa bantu abaiinji, abaiinji leke bebalye oKanca oku lwaiswe, olwe mikisa gyetufunire olwo kusaba kwa baingi.
\p
\v 12 Olwakubba okwenyumiriza kwaiswe nikwo kuni, omwooyo waiswe atukakasa ati, omu nsi muni, nokusingira kimwe omu nywe tubaire tutambuura mu bwikiiri no mu mazuma ga Kanca, timu magezi gaiswe, baitu olwa kisa kya kanca.
\v 13 Olwakubba titubawandikira bindi, wazira ebyo bye musobola okusoma no kwetejja, erate nkusuubira nka olumwe mulibyetejerya kimwe.
\v 14 Erate nka nimwetejaaku ekitundu, baitu okukiro kya Mukama waiswe oYesu, iswe tulibba kwenyumiriza kwanywe, erate nka nanywe nimulibba okwenyumiriza jituli.
\p
\v 15 Erate omu kwekakasa okwo, nayenderye muno okusooka okwiiza jimuli, musobole okuweebwa ekisa kya mirundi ibiri.
\v 16 Okubacaara nka nkwaaba e Makedoni, erate nnyire jimuli nka nkuzwa e Makedoni musobole oku nsibiira nka nkwaaba e Buyudaaya.
\v 17 Ninaali nkwendya okukola ekyo namaare ga gakola? Obate byenteesa, mbiteesa nka omuntu owa mubiri, okukoba nti niwo awo, niwo awo, obate nti tiniwo awo tiniwo awo?
\v 18 Baitu nka oKanca niyesigika, ekigambo kyaiswe jimuli tikiri niwo awo erate tiniwo awo.
\v 19 Olwakubba omwana wa Kanca, oYesu Kristo, iswe gwe twakobere jimuli, nje no Sirwano no Timoseewo, tiyaali nti niwo awo obate tiniwo awo, baitu omu ye buliizo mulumu niwo awo.
\v 20 Olwakubba omu byoona byoona oKanca biyasubiize, omu oyo biri niwo awo, erate Amiina, oKanca ayangirizibwe oku lwaiswe.
\v 21 Erate atugumya iswe na nnywe omu Kristo, erate eyatusukireku amafuta niye oKanca,
\v 22 eyatuteireku akabonesyo, natuwa omwooyo omu mitima jaiswe nka omusiingo.
\p
\v 23 Nje nkweeta oKanca okubba omujuurwa owa meeme yange, nka nikyo nazwiire ntaiza omu Kkolinso, olwakubba nabasasiire.
\v 24 Tirwakubba nti tufuga okwikiriza kwaanywe, baitu tuli bakozi bairanywe olwaisanyu lyanywe; olwakubba olwa kwikiriza mwemeera.
\c 2
\cl Esuura 2
\p
\v 1 Baitu, inamaliriire omu mwooyo gwange, obutaira erate na bujune ji muli.
\v 2 Olwubbanga nje ni mbaletera okweinnatira, ale ansanyusa niye naani, oyo gwendeteire okweinnatira?
\v 3 Erate ekyo nakiwandiikire, nindiiza nneme okweinnatirwa abo abagwaana okunsanyuca, olwakubba nnina obukakafu omu nyweena nyweena, nka eisanu lyange, niryo eisanu lyanywe nywena nyweena.
\v 4 Olwakubba omu kubonabona okwiinji, n’okulumwa omwooyo nnabawandikiire, namaligga againji, tikubaletera kweinnatira, baitu mweteje okwendya kwennina ji muli nikuli okwiinji omuno.
\p
\v 5 Baitu, ni wabbaawo omuntu eyaletere okweinnatira, abba tiyeinnatirye ninje, wazira nnywe nyweena nyweena, erate ti nyweena, nneme okuzitowa omuno.
\v 6 Olwakubba ali atyo, ekibonerezo ekyo kyaweweibwe abaniji kimumala.
\v 7 Nikyo kizwa kibagwaanira nnywe okumuganyira mbbe, baitu aleme okumirwa ennaku zaamwe nka zimusukireku obwiinji.
\p
\v 8 Nikyo nzwa mbegayiira okugumya okwendya jaali.
\v 9 Olwakubba, erate nikyo nazwiire mpandiika, leke mbagezesye neteje, obate nka muli bagondu omu bigambo byoona byoona.
\v 10 Baitu buli gwe musaasira ekigambo, nanje mmusasira: olwakubba nanje kyensaasiire, obate nka nsasiire nsasiire ku lwanywe omu maiso ga Kristo.
\v 11 Ositaani alemenge oku twekuddumbalyaku, olwakubba tituli nka abateteja buliirani bwaamwe.
\p
\v 12 Baitu ni naizire omu Tulowa olwa njiri ya Kristo, erate olwiiji ni lwanyigulirwewo omu Mukama waiswe,
\v 13 Omwoyo gwange tigwaculeire, olwakubba tinayajiryeyo oTito omuganda wange. Nikyo nazwiire mbasiibula ninyaba omu Makedoni.
\v 14 Baitu oKanca yebalibwe, atutwaala buliizo nka abawangula omu Kristo, erate natukolyesya oku manyisya, akawoowo aka kumweteja omu buli kifo.
\v 15 Olwakubba tuli kaloosa kasai aka Kristo edi oKanca omu abo abacungurwa no mwaabo ababula;
\v 16 edi abo ababula, tuli kaloosa akzwa omu kufa akaleeta okufa, baitu edi abacungurwa tuli kaloosa akazwa omu bwoomi akaleeta obwoomi. Erate ebyo naani abiyinza?
\v 17 Olwakubba tituli nka baddi abasiinga obwinji, abatabangula ekigambo kya Kanca: baitu nka abantu aba mazuma, baitu nka abazwa edi oKanca, omu maiso ga Kanca nimwo tusimoola omu Kristo.
\c 3
\cl Esuura 3
\p
\v 1 Tutandikire erate okwetendereza iswenkai? Obate tukwendya abaluwa nka abandi, ezitusemba ji muli, obate nnywe ze muwandikire nka zitusemba.
\v 2 Nnywe muli bbaluwa yaiswa etusemba, ewandikirwe omu myooyo jaiswe; abantu boona boona ji basoma ni betejja emirumo jaiswe ji muli,
\v 3 amazuma muli bbaluwa ya Kristo, ekulanga ebizwa omubuwereza bwaiswe ji muli, etawandikiibwe na bwiino, okwiyaku omwooyo gwa Kanca omwoomi; tikubipande byamabbaale wazira kubipande bya myooyo ja bantu.
\p
\v 4 Erate nimwo tutyo twesiga oKanca oku bwa Kristo.
\v 5 Tikubbanga iswenkai tulina obuyinza okulowooza ekigambo kyoona kyoona nka ekizwa jituli, baitu obuyinza bwaiswa buzwa edi oKanca.
\v 6 Oyo niye yatusoboleserye okubba abaweereza aba ndagaano ejiyaaka, ti baweereza bannukuta, Wazira aba mwooyo olwakubba ennukuta eitta, baitu omwooyo guleeta bwoomi.
\p
\v 7 Baitu aba nka okuweereza okwa kufa okwaali omu nukutta okwasaliibwe okumabbaale, kwaiziire mu kitinisya kityo, na baana ba isiraeri nibatabayinza na kwetagereza maiso ga Musa olwa kitinisya kya maiso gaamwe, ekyaali kikwaaba okuwaawo.
\v 8 Okuwereza kwa mwooyo tikulisiinga muno okubba ne kitinisya?
\v 9 Olwakubba obate nka okuweereza okuleeta omusango nikyo kitinisya, okuweereza okwa bwikiriiri kweyongera muno okusukuluma ekitinisya.
\v 10 Ati omu nsonga eyo, ekitinisya ekyasookere, tikyaali kitinisya, nogeregaranya oku kitinisya ekikooto ekisiinga omuno.
\v 11 Olwakubba oba nka ekyaweirewo chaalina ekitinisya, ekyalubeerera kisiinga muno okubba ne kitinisya.
\p
\v 12 Ale nka ni tulina eisuubi eryaaga awo, tusimoola na maani gainji.
\v 13 Erate ti nka oMusa ayeswekanga oku maiso gaamwa, abaana ba isiraeri balemenge okubona ekitinisya, gonze nka chaali kya kuwaawo.
\v 14 Baitu amagezi gaabwe giakakanyiziibwe, olwakubba n’okwica ati, ni basoma endagaano, ekya kuswekaku kidi kicaalowo, erate ekya kuswekaku ekyo kisobola kuzwawo lwa kwikiriza Kristo.
\v 15 Baitu n'okwicha ati, ebya Musa ni bisomebwa, ekya kuswekaku kiri mu myooyo jaabwe erate tibetejja.
\v 16 Baitu buli muntu nakyukira Omukama waiswe, ekya kuswekaku kiyibwaawo.
\v 17 Baitu Omukama waiswe niye mwooyo, erate awabba omwooyo wa Mukama waiswe niwo wabba eiddembe.
\v 18 Baitu iswe isweena abatoleibweku ekya kusweekaku, tubonia erate twisana ekitinisya kya Mukama waiswe. Erate oKanca nka naali omwooyo, atukyuusa natufoola nka ye okwingira omu kitinisya kya kisani kyaamwe.
\c 4
\cl Esuura 4
\p
\v 1 Ale nka nituliina okuweereza okwo, olwa kusaasira kwa Kanca, titwiiririra.
\v 2 Baitu twaagaine eby'ansoni ebikwekebwa, nka titutambuura mu bukuusa, erate titukyamya kigambo kya Kanca, baitu olw'oku bonesya amazuma nka twetendereza edi omwooyo gwa buli muntu omu maiso ga Kanca.
\v 3 Erate gonze enjiri yaiswe esweekebwaku, esweekebwaaku edi abo ababuure.
\v 4 Nibaabo abataikiriza, oSetaani omufuzi w'emirembe jini be yazibire amaiso ga magezi gaabwe, n'abaziiyiza okubona eisana ly'anjiri yakitinisya kya Kristo, oyo nikyo kiisani kya Kanca.
\v 5 Olwakubba titwebuulira iswenkai, wazira oYesu Kristo nka niye Mukama waiswe, isweena nka tuta bairu baanywe oku lwa Kristo.
\v 6 Olwakubba oKanca eyasimoire ati, eisana liryaaka omu kirikiirya, alekere eisana eryo okwaaka omu mitima jaiswe, erate tweteje ekitinisya kya Kanca ekibonekera omu maiso ga Yesu Kristo.
\p
\v 7 Baitu obuguuda obwo tuta nabwo omu bibya eby'eibumbba, amaani againji omuno leke gazwenge edi Kanca, baitu ti mwiswe.
\v 8 Tunyigirizibwa omu buli ngeri, baitu titumalwaawo, tusoberwa, baitu tituwaamu eisuubi.
\v 9 Tuyiganyizibwa, titulekebwaawo; tummeigebwa, baitu tituzikiira.
\v 10 Buliizo tutambula nka tuliina omu mubiri, okufa kwa Yesu, erate n'obwoomi bwa Yesu leke bubonesebwe omu mubiri gwaiswe.
\v 11 Olwakubba iswe abwoomi tuwebwaayo ennaku zoona zoona edi okufa okutujunaana oYesu, erate n'obwoomi bwa Yesu leke bubonesebwe omu mubiri gwaiswe ogufa.
\v 12 Nimwo kityo, okufa kukoora mwiswe, baitu obwoomi mu nywe.
\p
\v 13 Baitu nka tuliina omwooyo gudi ogw’akwikikiriza, okusinziira omwebyo ebyawandikiibwe, naikiriize erate nolwekyo nsimoola, isweena twaikiriiza, erate nolwekyo tusimoola.
\v 14 Nka tumaite nk'oyo eyayimbocerye Omukama waiswe oYesu, erate naiswe alituyimbooca amwe n'oYesu, erate alitwanjuura amwe naanywe.
\v 15 Olwakubba byoona byoona biri ku bwa nywe, ekisa ekyo ni kyeyongera oku lwa bainji, kyongera okuleeta okweebalya oKanca n'okumuweesya ekitinisya.
\p
\v 16 Nikyo tuzwa tulema okwiririra, baitu gonze omuntu waiswe ow'akuruguru awaawo, Baitu omuntu waiswe ow'amunda afooka omuyaaka buliizo n’obuliizo.
\v 17 Olwakubba okubonabona kwaiswe okutazitowa, okwa kiseera kyaati, kongerayongera muno okutukoora ekitinisya ekikuzitowa ekya miijo n'emiijo.
\v 18 Iswe nka tituloleera ebikuboneka, wazira ebitaboneka, olwakubba ebiboneka bya kiseera, baitu ebitaboneka bya mijjo na mijjo. 5.
\c 5
\cl Esuura 5
\p
\v 1 Olwakubba tumaite tuti, obate nk'ennyumba yaiswe eya nsiisira ey'amunsi eryonolebwa, tulina eya yombokeibwe ezwa edi oKanca, ennyumba etayombokeibwe na mikono, eya mirembe seregenyi eya mwigguru.
\v 2 Olwakubba tusiindira omw’enu, nka twegomba okuzwalikisibwa ennyumba yaiswe erizwa omwigguru.
\v 3 Tulizwalikisibwa baitu tuleme kusangibwa nka tuli bukunya.
\p
\v 4 Olwakubba iswe abali omu nsiisira enu tusiinda nka tulemeerwa, ti lwakubba twendya okweyambula, baitu okuzwalikisibwa, ogwo ogufa leke gumiribwe obwoomi.
\v 5 Baitu eyatukoleire ekyo niye oKanca, eyatuwaire omwooyo okubba omusiingo.
\p
\v 6 Nikyo tuzwa tuguma omwooyo ennaku zoona zoona, erate tumanya nti ni tubba omu mubiri gunu tubba alai no Mukama waiswe.
\v 7 Olwakubba tutambula lwa kwikiriza baitu ti lwa kubona.
\v 8 Tuguma omwooyo, erate kinu nikyo tusiinga okwendya, okubba alai omu mubiri, nokubba Omukama waiswe jaali.
\v 9 Erate nikyo tuzwa tufuba, obate nka tukyali omu mubiri munu, obate nka tuli alai, okusiimibwa ye.
\v 10 Olwakubba iswe iswena iswena kitusaanira okuboneka omu maiso ga Kristo jaali saara emisango; buli muntu aweebwe ekimusaanira okusinzira oku bisai obate oku bibbi bye yakoore nka akyaali omu mubiri.
\p
\v 11 Ale, ni tumanya okutiina Omukama waiswe tusendasenda abantu, Baitu Okanca amaite ni tuli abesigwa, erate nsuubira nka nanywe mumaite omu myooyo zaanywe.
\v 12 Titwetumbya tte ji muli, baitu okubawa nywe ki mwasinziirangaku okwenyumirizanga oku lwaiswe, leke mubbenga n'ekyakubairamu abenyumiriza olw'ebyo ebiboneka, baitu ti mu mwooyo.
\v 13 Baitu obate nka tulalukire, tulalukire edi oKanca, obate nka twegendereza, twegendereza kulwa nywe.
\v 14 Olwakubba okwendya kwa Kristo nikwo kutufuga, nka tulowooza tuti nka omwei yabafiririire boona boona, boona boona nikyo bazwire bafa.
\v 15 Baitu yafiririre boona boona, aboomi balekenge kubba aboomi oku lwaabwe bonkai, baitu oku bw’oyo eyabafiririire nayimbooka.
\p
\v 16 Okutandiika no lwa leero nikyo tuzwa nitutamanya muntu yenna yenna okusinziira oku mbona ya buntu, gonze omukwekeera twatwaire oKristo omu mbona ya buntu, baitu ati titukyamumanya tte tutyo.
\v 17 Omuntu yeena yeena n'abba omu Kristo, nikyo azwa abba ekitonde ekiyaaka, ebyairai nka biweirewo, bona nka bifookere biyaaka.
\v 18 Baitu byoona byoona bizwa edi oKanca eyatutabaganirye amwe naye yenkai oku bwa Yesu Kristo, natuwa iswe okuweereza okwa kutabagania.
\v 19 Nikwo okukoba oti, oKanca yaali mu Kristi nka akutabagania ensi naye omwenyini, nka tababaara bibbi byaabwe, erate nka yatubiikisirye iswe ekigambo ekya kutabagania.
\v 20 Nikyo tuzwa tubba abakwenda omu kifo kya Kristo, oKanca nka akubeegayiira okwakala omwiswe, tukubegayiira omu kifo kya Kristo, mutabagane n'oKanca.
\v 21 Ataamaite kusiisa, yamufiire ekibbi oku lwaiswe, iswe leke tufooke obwikiriiri bwa Kanca omu ye.
\c 6
\cl Esuura 6
\p
\v 1 Erate nka abakoora amwe no Kanca, tukubegayiira obutaweerwa bwereere ekisa kya Kanca.
\v 2 Olwakubba oKanca asimoola ati, omu biro bya kwikirizibwaamu nnakuwuliire, n'oku lunaku olwa bucunguri nna kuyambire, bona, binu nibyo biro bya bya kwikirizibwaamu; bona, lunu nilwo lunaku olwa bacunguri:
\v 3 Nka titubba nkonge yoona yoona omu nziira ya muntu yeena yeena, okuweereza kwaiswe kulemenge kunenyezebwa.
\v 4 Baituomu byoona byoona nka tweranga okubba abaweereza ba Kanca, omu kugumikiriza, omu bibonobono, omu kwetaaga, no mu nnaku.
\v 5 Omu kukubbibwa, omu kusibwa, omu kukayana, omu kufuba, omu kubonia, n'omu kusiiba,
\v 6 Omu bulongooki, omu kwetejja, omu kuguminkiriza, omu kisa, omu mwooyo ogwikiiri, omu kwendya okutalumu bunanfuusi.
\v 7 Omu Kigambo eky'amananu, omu maani ga Kanca; ne bya kulwanisya ebya bwikiriri omu mukono ogulyo no gumoso
\v 8 Olwa kitinisya n'olwakugaibwa, olwa kuzumibwa, n'olwa kusiimibwa; Twetebwa ababeyegi, baitu nka tuli ba mananu.
\v 9 Nka abatamaitiibwe, erate baitu abamaitiibwe omunno, nk'abafa, erate bona tuli bwoomi, nka ababonerezebwa, baitu ni tutaitibwa.
\v 10 Nk’abanakuwala, baitu abasemeerwa buliizo, nka abataalina kintu, erate baitu abalina kimwe byoona byoona.
\p
\v 11 Akanwa kaiswe kasamire jimuli. Abakkolinso, no mwooyo gwaiswe tugubaswekulire.
\v 12 Iswe titwabanyigirirye, baitu mwenyigirirye nywenkai omu myooyo, janynwe.
\v 13 Nkubasaba okwiramu nka baana bange, muswekule emyooyo jaanywe.
\p
\v 14 Timwegaitanga n’abataikkiriza, olwakubba timwenkanankana: obwikiriri bwegaita butyai n’obujeemu? Obate eisana libba lityai amwe ne kirikiirya?
\v 15 Erate oKristo yegaita atyai no Beriyali? Obate omwikkiriza agabana mugabo ki natali mwikkiriza.
\v 16 Erate Eiramyo lya Kanca lyegaita lityai n’ebiisani? Olwakubba iswe tuli Iramyo lya Kanca omwoomi; nka oKanca niya kobere ati, Naabbanga mu nibwo, ni ntamburanga mu nibwo; nanje naabbanga Kanca waabwe, Boona baabbanga bantu bange.
\p
\v 17 Ale muzwe akati waabwe, mweyawule, oKanca nimwoo akukoba, ale timukomanga ku kintu ekitaali kirongooki, nanje ndibasemberya.
\v 18 Erate naabbange itaanywe ji muli, nanywe mwabbanga jindi, abaana ba boojo n’ababwaala, nimwo asimoola oKanca omuyinza wa bintu byoona byoona.
\c 7
\cl Esuura 7
\p
\v 1 Banywani, nka ni tulina ebisuubizo ebyo, twenabyengeku obugwaagwa boona boona obw'amubiri n'omwooyo, nka twikiirya obwikiiri omu kutiina oKanca.
\p
\v 2 Mutwikkirize: titusiisanga ku muntu yeena yeena, titukyamyanga muntu yeena yeena, titukumpanyanga muntu yeena yeena.
\v 3 Tinsimoire kubanenya: olwakubba nasimoire irai nka muli mu mitima jaiswe okufiira amwe nanywe n'okubba abwoomi amwe nanywe.
\v 4 Nsimoola n’obugumu bwinji jimuli, nenyumiirya muno oku lwanywe: nyizwiire muno okusemeerwa, nyakaliriirye okusagaruka gonze nka twakala omu bibonobono.
\p
\v 5 Olwakubba, erate nitwaizire omu Makedoni, omubiri gwaiswe nigutabona kuwumula n'akaddooli, baitu nitugadiragadira eruda n’eruda, enzai waaliyo entalo, erate omunda mwalumu okutiina.
\v 6 Baitu asemeerya abasobeirwe, niye oKanca, natusemeerya iswe, olwa kwiiza kwa Tito.
\v 7 Ale tilwa kwiiza kwaamwe kwonkai, baitu olwa mawuuro agairyaamu amaani ge yaletere okuzwa jimuli. Nka niyatukobeire okwegomba kwanywe, okunakuwala kwanywe, okunyikira kwanywe oku lwange; njeena nikyo nazwiire neyongera okusemeerwa.
\p
\v 8 Olwakubba gonze nka nabanakuwairye n'ebbaluwa yange, tineijusa, gonze nka nasokere okwejusa, olwakubba mboine nka ebbaluwa eyo yabanakuwairye, gonze nka yabanakuweirye kaseera.
\v 9 Ati nsemereirwe, tinsemereirwe olwakubba mwanakuwaire, baitu olwakubba mwanakuwaire n'okwenenya nimwenenya: olwakubba mwanakuwaire edi oKanca, muleme okufiirwa ekigambo kyoona kyoona oku lwaiswe.
\v 10 Olwakubba okunakuwala edi oKanca kuleeta okwenenya ok’wabucunguri obuteijusibwa: baitu okunakuwala okw'amunsi kuleeta okufa.
\v 11 Olwakubba bona, okunakuwala okwo edi oKanca kwabaleteire okufuba okwinji, erate okuwozia ensonga yanywe, erate n’okunyiiga, erate n’okutiina, erate n’okwegomba, erate n'okunyinkira, erate n'okuwalana eiyanga! Omu byoona byoona mwemanyisya nka muli baikiiri omu kigambo ekyo.
\v 12 Gonze nka nabawandikiire, tinawandikire kulw’oyo eyakoore okubbi, obate okw'oyo gwe bakoore okubbi, wazira okunyinkira kw'anywe oku lwaiswe kusobole okubonekera edi nywe omu maiso ga Kanca.
\v 13 Nikyo twazwiire tusemeerwa, n'omukusemeerwa kwaiswe, nitweyongera muno okusemeera olw'aisanu lya Tito, olwakubba nyweena nyweena mwawumwiirye omwooyo gwaamwe.
\v 14 Olwakubba obate nka neenyumiriza omu kigambo kyoona kyoona oku lwanywe edi eyo, tinakwatiibwe nsoni; baitu nka nitwabakobeire byoona byoona omu mazuma, erate nimwo kutyo n'okwenyumiriza kwaiswe edi oTito kwaali kwa mazuma.
\v 15 N'okwendya kwaamwe okwa munda kweyongera muno okubba jimuli nka ayizukira okugonda kwanywe nywena nywena, nimwamusembeirye n’okutiina n'okujugumira.
\v 16 Nsemereirwe olwakubba omu byoona byoona nnina obwesige omu nywe.
\c 8
\cl Esuura 8
\p
\v 1 Erate tukubamanyisya, ab’aluganda, ekisa kya Kanca ki yalangire aba’Maramyo ga mu Makedoni.
\v 2 Omu kubonabona kwaabwe okwagezeserye omuno eisanu lyaabwe eryayakaliriirye; no bwooro bwaabwe abwayakaliriirye, byombi byayakaliriirye omu buguuda obwa bugabi bwaabwe obwanjulukuki.
\v 3 Olwakubba, nkutegeeza nka bo baagabire okusiinziira okubusoboli bwaabwe, nkakasa nka basingire nawo.
\v 4 Batusabire n’okwegayiira okwinji baikkirizibwe okwegaita naabo abajjuna abaikiiri.
\v 5 Erate baakoore ki naali tinkulowooza, baitu basookere kwewaayo bonkai edi oKanca waiswe, nejiiswe omu kwendya kwa Kanca.
\v 6 Nikyo twazwire tusaba oTito, nka ni yatandikire eirai omulumu ogwo ogwa kisa, aize agumaliirye erate omu nywe.
\v 7 Baitu, nka ni mwakaliriirya omu byoona byoona, omu kwikkiriza, n’omu kusimoola, n’omu kweteja, n’omu kufuba koona koona, n’omu kwendya kwanywe jituli, erate musukirirenge n’omu mulumo gunu ogwa kisa.
\p
\v 8 Tinkusimoola nka akubaduumira mbbe, wazira olwa kufuba kwa bandi, nka nkugezesya okwendya kwanywe nka kwa mazuma.
\v 9 Olwakubba mu maite ekisa kya Mukama waiswe oYesu Kristo, nka niyaali omuguuda, baitu nafooka omworo oku lwanywe, obworo bwaamwe leke bubaguduwalye nywe.
\v 10 Okusonga enu nkubawa amagezi, kisingaku ati okumaliirya ki mwatandikire omwaaka ogu mwei ogw'ayakaire, baitu tikukola kwonkai, erate baitu n’okwendya.
\v 11 Nimwo mbbe, mumaliirye omulumo gwe mwatandikire, okwendya kwaanywe kwe mwalangire omu kusooka kwiisane ati okuwaayo kwanywe, mukole nka kimuli nakyo.
\v 12 Niwabba nka walowo ki mu kwendya okukola, kiikkirizibwa okusinziira oku muntu kya linakyo, baitu tinga kyatalina.
\v 13 Olwakubba tinsimoire ntyo, abandi bawumuzibwe, erate nywe mutawanyibwe:
\v 14 wazira. Olwa kwenkanankana, nywe bimulinabyo ebiinji omu kiseera kinu, bibajunenge abo omu kwendya kwaabwe. Erate ebyaabwe bibalibba nabyo ebiinji, biribajuna nywe omu kwendya kwaanywe, okwekanankana kubeewo;
\v 15 nka ni kyawandikiibwe kiti, eyakumbanianga ebiinji, tiyasigalyangawo; baitu eyakumbanianga ebidoola, tiyetaaganga te.
\p
\v 16 Baitu oKanca yeebalibwe, eyawaire oTito omwooyo ogubalumirwa.
\v 17 Olwakubba tiyakomere ku kwikkiriza mbbe ki twamusabire; baitu ye yenyenere omu kufuba aiza jimuli kulwaamwe.
\v 18 Baitu, tukumusindika n’owaluganda ayangirizibwa omu njiri omu Maramyo goona goona olwa mulumo gwa kukoba enjiri.
\v 19 Baitu tinikyo ekyo kyonkai, erate niye yalondeibwe Amaramyo okutambula naiswe, olwa kisa ekyo, kituweereza iswe, Omukama waiswe aweebwe ekitinisya. Erate tulange okwendya kwaiswe amaangu:
\v 20 nga twewala omuntu yeena yeena obutatujunaana olwa kirabo kinu kituweereza iswe.
\v 21 Olwakubba tuteekateeka ebisai, timu maiso ga Mukama waiswe mwonkai, erate n’omu maiso ga bantu.
\v 22 Erate tte tukubatuma amwe, n’omuganda waiswe, gwe twagezesyanga emirundi eziinji omu bigambo ebiinji nka munyinkiiri, baitu ati munyinkiiri muno okusingawo.
\v 23 Baitu oTito ye, aisa kimwe nanje, erate niye mukozi mwirange omu buweereza bwange jimuli. Erate, baitu abaganda baiswe abo, nibo bakwenda ba’Iramyo, abo nibo kitinisya kya Kristo.
\v 24 Ale omu maiso ga Iramyo, mubalange ekikasa okwendya kwanywe n’okwenyumiriza kwaiswe oku lwanywe.
\c 9
\cl Esuura 9
\p
\v 1 Olwakubba tikinetaagisa okubawandiikira te ebya baikiiri.
\v 2 Olwakubba mmaite nka muli baculeeri okuyamba, ekyo nikyo nkubenyumiryaamu edi aba Makedoni oku lwanywe nka nkubakoba nti, Abamu Akaya betegekere okuzwera kimwei omu mwaaka ogwa’yakaire. Erate okunyinkiira kwanywe kwa kubiriize bainji omu bwo.
\v 3 Baitu nkutuma abaluganda ji muli okwe nnyumiirya kwaiswe oku lwanywe leke kuleme okubba okwa bwereere omu kigambo ekyo; wazira mubbe nka mukulindiirya nka ni nsimoire.
\v 4 Tikulwa nka abamwe oku ba Makedoni baliiza nanje, balibaajja nka timwetekeretekere, iswe nitutasimoola oku kuswaala kwanywe ni tukwatibwa ensoni olwa bwesigwa bwe twalinabo omu nywe.
\v 5 Erate ndowooza nka kikunetaagisya okwegayiira abaluganda bankulembere okwiiza ji muli bateeketeeke ekisembo ekyo, ki mwalaganisirye kyajibwe nka kiteekeibwetekeibwe lwa kwesiimira, baitu nka ti lwakuwaliriza.
\p
\v 6 Baitu kinsimoire kinu, nti asigga akadooli, alikungula kadooli, erate asigga eziinji, alikungula ziinji.
\v 7 Buli muntu akolenge nka naabba amaliriire omu mwooyo gwaamwe. Baitu ti lwa nnaku gonze okuwalirizibwa: olwakubba oKanca ayendya muno oyo agaba neissanu.
\v 8 Erate oKanca, ayinza okweerya ekisa kyoona kyoona ji muli; nywe nka mulina byoona byoona ebikubamala ebiro byoona omu bigambo byoona byoona leke mwakaliriryenge omu bikolwa ebisai.
\v 9 Nka ni kyawandikiibwe kiti, yasansainye, yagabiire abworo; obwikiiri bwaamwe bwa miijo na miijo.
\p
\v 10 Erate oyo aweerya ensigo omulumi n’eemere eya kulya, yabaweryanga, erate yabongerangaku ensigo zaanywe, erate yayalyanga ebibala ebya bwikiriri bwanywe.
\v 11 Mwa guduwalanga omu byoona byoona leke mugabenge muno, okwakala omwiswe oKanca yebazibwenge.
\p
\v 12 Olwakubba okugaba okwakuwereza okwo tikwizula mbbe bwizuli omu kigero kyebyo abaikiiri bye bakwendya, erate baitu okwakalirirya olwa kwebalya okwiinji edi oKanca.
\v 13 Olwakubba olwa kukemembwa kwanywe omu kuweereza kunu bayangiriza oKanca olwa bugondu bwa kwatula kwanywe edi enjiri ya Kristo, n'olwa bugabi bwanywe edi badi na bandi boona boona.
\v 14 Erate bo bonkai nka bakubalumirwa nnywe, n’okubasabira olwa kisa kya Kanca ekitasingika omu nywe.
\v 15 OKanca yebalibwe olwa kisembo ekitakobekeka.
\c 10
\cl Esuura 10
\p
\v 1 Baitu nje oPawulo nkubegaira olwa buculeeri n’obuwombeki bwa Kristo, nje omugondu nimbba naanywe, erate owa maani nka tindi naanywe.
\v 2 Ale nkubegaira bairaba, nindibba nka ndi naanywe, nneme okubalanga amaani agwo gendowooza okubba nagwo edi abandi abalowooza nka iswe tutambula mu mukusengeryanga omubiri.
\v 3 Olwakubba gonze nka tutambula mu mubiri, ti tulwaana kusengeerya mubiri.
\v 4 Olwakubba ebya kulwanisya eby'antalo zaiswe tibya mubiri, baitu birina amaani agazwa edi oKanca olwa kuwendawenda obiggo;
\v 5 nka tuwendawenda empaka na buli kintu ekiggungumali ekitimbibwa okulwaana n'okweteja kwa Kanca, erate nka tuwambba buli kirowoozo okusobola okugondera oKristo.
\v 6 Erate nka twetekeretekere okubonereza obukakanyali boona boona, obugondu bwa nnywe nibulikiira.
\p
\v 7 Mulorere ebintu nka nibiri? Omuntu yeena yeena ni yekakasya omunda nka wa Kristo, yerowooze kinu yenkai, erate nka naali owa Kristo naiswe nimwo tutyo.
\v 8 Olwakubba nebwenyakaliriirya okwenyumirya olwa buyinza bwaiswe Omukama waiswe buyatuwaire olw'akubomboka, wazira tilwa kubanagga, tindikwatibwa nsoni:
\v 9 Tinkwendya kwiisana nka akubatinisiirya n'ebbaluwa zange.
\v 10 Olwakubba basimoola bati Ebbaluwa zaamwe zizibu, za maani, baitu omu mubiri gwaamwe munaki, n’okusimoola kwaamwe tikulumu nsonga.
\v 11 Akulowooza kinu, yetejje ati bitukoba omu bbaluwa nka tituliyo, erate nibyo tukola nka tuli naanywe.
\p
\v 12 Olwakubba titwendya kwebaara ku muwendo ogw'abo abetendereza bonkai, baitu bepima bonkai na bonkai, erate begeregaranya bonkai na bonkai, tibalina magezi.
\v 13 Naiswe iswe baitu te titulyenyumiirya okusiinga ekipimo kyaiswe, wazira omu kipimo eky’ansalo oKanca jiyatugabiire okubba ekipimo erate n'okwiika niji muli.
\v 14 Olwakubba titweyakaliirya okusiinga ekipimo nka abataikire ji muli: olwakubba erate mwaali niinywe, nikyo twaizire n'okwiika ji muli n’enjiri ya Kristo.
\p
\v 15 Nka titwenyumiirya okusiinga ekipimo kyaiswe omu mirimu jabandi, baitu nka tukusubira, okwikiriza kwaanywe ni kulikula, olwo ensalo zaiswe omu nywe nizigaziwa.
\v 16 Erate tulisobola okubuulira enjiri omu bifo alai naanywe, erate Obutenyumiira omu nsalo za bandi.
\v 17 Baitu eyenyumiirya yenyumiryenge omu Mukama waiswe.
\p
\v 18 Olwakubba omuntu eyetendereza yenkai tiniye asiimibwa, wazira oyo Omukama waiswe gwa gwatendereza.
\c 11
\cl Esuura 11
\p
\v 1 Nandiyenderye munguminkirize omu busirusiru bwaange obudooli, baitu ddala munguminkirize.
\v 2 Olwakubba mbakwaturwa obwiiya n’obwiiya bwa Kanca, nabafumbiize oibanywe omwe, leke mbaleete edi oKristo, nka omwaala omulongoki.
\v 3 Baitu ntinire, nk’ompiiri ni yabeyegerebeyegere oKaawa omu bukuyikuyi bwaamwe, n’ebirowoozo byanywe biyiinza okukyamizibwa muleke kwewerayo kimwe omu mazuma edi oKristo.
\v 4 Olwakubba omuntu naiza nabakobera oYesu owondi gwe tutabakobeire, obate nimuweebwa omwooyo owondi gwe mutaweweibwe, obate enjiri eyendi ji mutaikiriize, mukola kusai okumuguminkiriza.
\v 5 Olwakubba nkulowooza nti omu budooli bwaange tinsiingibwa muno abatume abo abakulu.
\v 6 Baitu gonze nka tindimumalirivu omu kusimoolla, baitu tindi ntyo omu kweteja, baitu twabayoleserye byoona byoona, omu ngeri yoona yoona.
\p
\v 7 Nasiisire ninetowaize njenkai nywe mugulumizibwe olwakubba nabakobeire enjiri ya Kanca nka ndoowo kyenkusubira okuzwa ji muli?
\v 8 Nanyagire Amaramyo agandi, nka nkuweebwa empeera okuzwa jibali leke mbawereze nywe.
\v 9 Erate ninabbanga nanywe nka nkwetaaga, tinazitoweranga muntu yeena yeena; Olwakubba abaluganda abazwiire omu Makedoni, bandeteire byoona byoona byenaali nkwendya. Omu byoona byoona neekuumire obutabazitoweranga omu ngeri yoona yoona, erate tindibazitoweera.
\v 10 Nk'amazuma ga Kristo nigali omu nje, ndowoowo omu Yakaya aliyiinza okungaana okwenyuminkiirya olwekyo.
\v 11 Lwaki? Olwakubba timbendya? OKanca ammaite nka mbendya.
\p
\v 12 Ekyo kyenkola, nkwiiza kweyongera oku kolanga ntyo, leke nnemesye abo abakwenyuminkiirya omu batume baabwe, nka bakukoba bati, bakola nka iswe ni tukola.
\v 13 Olwakubba abali nka abo nibo abatume aba bubeyeji, abakola ebya bukuyikuyi, abeisanisya abatume ba Kristo.
\v 14 Baitu tinewuunya, olwakubba n’oSitaani yeisanisya nka Ontumwa owaisana.
\v 15 Ale ti kitalo! Erate n'abaweereza baamwe boona nibeisanisya nka abawereeza aba bwikiriri; enkomeero yaabwe ekwaaba kubba nka ebikolwa byaabwe.
\p
\v 16 Nkwiramu okukoba nti, omuntu yeena yeena aleke kundowooza nka ndi musirusiru, baitu nikibba kityo, mumpuliirye nka nimwandiwuliriirye omusirusiru. Nanje nenyumiiryeku akadooli.
\v 17 Kinsimoire, tinkisimoire nka ekigambo kya Mukama waiswe, baitu nka omu busirusiru, erate omu maani ganu aga kwenyumiirya.
\v 18 Olwakubba baiinji abenyumiirya omu mubiri, nanje nenyumiirya.
\v 19 Olwakubba muguminkiriza neisanu abasirusiru, olwakubba nywe muli bagezigezi.
\v 20 Olwakubba muguminkiriza omuntu n’ebwabafoola abairu, bwa banyaga, niyegulumiza, bwa bapaay empi omu maiso.
\v 21 Neswaazire okukoba nti tubaire banaki okukola ekyo. Baitu omuntu yeena yeena kiyenyumiiryaamu (nkusimoola nka omusirusiru te), njeena nenyumiirya.
\v 22 Bebbulaniya? Njeena ntyo, Baisiraeri? Njeena ntyo. Boona niryo ibyaire lya Ibulayimu? Njeena ntyo.
\v 23 Bo baweereza ba Kristo? (Nkusimoola nk’omulalu) baitu nje mbasiinga; omu kufuba nyakaliriirya, omu kubuwebwa nyakaliriirya muno, omu kukubbwa okwinji, erate emirundi zinji nka nkubulaku kadooli okufa.
\v 24 Edi Abayudaaya nakubirwe emirundi itaanu emiigo amakumi asatu na mwendai.
\v 25 Emirundi eisatu nakubirwe engga, omulundi ogumwe nakasukiriirwe amabbaale, emirundi isatu obwaato bwayatikire, nabasirye erate ninsiiba ebuluba wa nyanja.
\v 26 Omu kutambulanga emirundi ezinji, naikiibweku obulabe obukuzwa omu miiga, erate abanyagi. Obukuzwa edi abaiyanga lyange n’edi abamaanga. Obulabe obukuzwa omu kibuga, obulabe obukuzwa omwiirungu, obulabe obukuzwa omu nyanja, n’obulabe obukuzwa omu baluganda aba bubeyeji.
\v 27 Omu kufuba nokukerwa, omu kubonianga emirundi ezinji, omu nzala na malo, omu kusiibanga emirundi ezinji, omu mpoowo nokubba obwereere.
\v 28 Nnoyaku ebyo walowo ekinzitoweera buliizo, okweralikiriranga olwa Maramyo goona goona.
\v 29 Naani omunaki, nje nintabba munaki? Naani akemwa n'agwa, nanje nintasaliirwe?
\p
\v 30 Obate nka kisaanira okwenyumiirya, nenyumiiryanga olwa bunaki bwange.
\v 31 OKanca oitaamwe wa Mukama waiswe oYesu eyebalibwa emiijo joona ammaite nka tindi mubeyeji.
\p
\v 32 Omu Ddamasiko owaisazza ansi wa Mukama Aleta yateegere emiryango ja kibuga oDdamasiko leke ankwaate.
\v 33 Nibanyakarya mudirisa nka ndi mukisira oku bbugwe wa kibuga, nincunguka okuzwa omu mikono zaamwe.
\c 12
\cl Esuura 12
\p
\v 1 Kigwaniire okwenyumiirya, gonze nka tikusaana, baitu kannyabe omukolecebwa n'okuswekuurwa kwa Mukama waiswe.
\v 2 Mmaite omuntu omu Kristo, emyaaka eikumi n'enai ejakairewo eyatwaliibwe omwigguru erya kasatu, obate mu mubiri, obate timu mubiri timmaite; oKanca niye ammaite.
\v 3 Erate mmaite omuntu aisana atyo, o obate mu mubiri, obate timu mubiri timaite, oKanca niye ammaite.
\v 4 Niyatwaliibwe omu lusuku lwa Kanca, nawuura ebigambo ebitasimolekeka, ebitasaanire muntu kubyaatula.
\v 5 Oku lwa omuntu aisana atyo nnenyumiiryanga: baitu okulwange tindyenyumiirya, wazira omu bya bunaki bwange.
\v 6 Olwakubba siinga nayenderye okwenyumiiryanga, tinandibaire musirusiru; olwakubba nandisimoire amazuma: baitu mbireka, omuntu yeena yeena aleke kulowooza okunje okusiinga kyakumbonamu obate kyakuwuura jendi.
\v 7 Baitu gonze nka naweweibwe okuswekuruurwa okwo, nikyo nazwiire mpeebwa eiwa omu mubiri, omukwenda wa sitaani okumboniabonia, ndemenge okugulumizibwa omuno.
\v 8 Emirundi isatu negayiriire Omukama ekigambo ekyo kinzweku.
\v 9 Nankoba ati Ekisa kyange kikkumala: olwakubba amaani gange gaikiira mu bunaki. Nikyo nazwanga n'enyumiirya n'eisanu eriinji olwa bya bunaki bwange, amaani ga Kristo leke geyongere okukoora omu nje.
\v 10 Ale olwa Kristo nikyo nzwa nsanyukira obunaki erate okunkooranga ebya kyejo, okwetaaganga, okuyigibwanga, okugadanga, ebizibu byenyaja olwa Kristo: olwakubba nimbba omunaki, nimwo mbba owa maani.
\p
\v 11 Nfukire musirusiru: ninywe mwampaliriize; olwakubba nagwaniire nywe okuntendereza, olwakubba gonze nje tindi kintu baitu abatume abo abakulu omuno, tibansiinga mu kigambo kyoona kyoona.
\v 12 Mazuma obubonesyo bwa bwa mutume bwakorwanga wanywe omu kuguminkiriza koona koona, omu bubonesyo n'eby’amageero n'eby’amaani.
\v 13 Olwakubba kiki amaramyo agandi kigabasinganga, okwiyaku nje njenkai obutabazitoweera? Munsasire ekibbi ekyo.
\p
\v 14 Bona, omulundi ogw’akasatu ati neteketeekere okwiiza ji muli, baitu tindibazitoweera, olwakubba tinkutoolya byanywe, wazira nywe. Olwakubba tikisaniire abaana okubiikiranga abakaire, wazira abakaire okubiikiranga abaana.
\v 15 Ndiwaayo ebyange erate nanje ndyewerayo kimwei oku lwanywe, nka ndi musanyuki muno. Ale nimbendya omuno, nyendebwa kadooli.
\p
\v 16 Mwikkiriza nti nje tinabazitowereire, baitu ni naali omugerengetanya, nabategere omu lukwe ni mbakwatisya.
\v 17 Baitu Walowo amagoba ge nafunire okuzwa ji muli okwakala omwaabo benabatumiire?
\v 18 Neegayirire oTito okubacaara, erate ni ntuma ow'aluganda owoondi amwei naye. OTito yafunireku amagoba okuzwa ji muli? Ye nanje titwakoleire mu mwooyo gumwei? Titwatambuliire mu kisiinde kimwei?
\p
\v 19 Obwairai mulowozere nka iswe twewozeerya omu maiso ganywe? Bbe tusimoola binu lwa Kristo, erate oKanca nka niye mujuurwa. Banywaani bange baitu byoona byoona tubikola lwa kubomboka nywe.
\v 20 Olwakubba ntiniire, ni ndiiza nneme okubasanga nka mukwisana nintakwendya, njeena nywe muleme kunsanga nka nkwisaana nimutakwendya kanda ni wabbaawo okulwaana, obwiiya, obusungu, empaka, okweyagaliza, okugeya, okwegulumirya, n'okujeema.
\v 21 Erate nkutiina, nindiiza te, oKanca wange alintowaaza omu maiso ganywe, nanje ni nakuwaara abaiinji abasiisire eirai ni batayendeka omu bugwaagwa n'obusiani n'obukaba bwe bakoore.
\c 13
\cl Esuura 13
\p
\v 1 Guni nigwo mulundi ogwakasatu nka nkwiiza ji muli. Omukanwa kabajuurwa ababiri obate abasatu buli kigambo kiri gumma.
\v 2 Nabalabwiire erate nkubalabula, nka ninakoore ni naali eyo omulundi ogw’akabiri, erate natubuni nka tindiyo, nkubakoba abo abaasisire eirai nabandi boona boona, nti nindiiza tte, tindisasira.
\v 3 Olwakubba mukuswagana ekikakasa nka oKristo asimoora omu nje, oKristo timunaki omu kukolanga nanywe, baitu aliina amaani omu nywe.
\v 4 Olwakubba yakomereirwe olwa bunaki, baitu mwoomi alw’amaani ga Kanca. Olwakubba naiswe tuli banaki omu ye, baitu tulibba bwoomi amwei naye olw’amaani ga Kanca edi nnywe.
\p
\v 5 Mwekebere nywenkai obate nka muli omukwikiriza, mwekeme nywenkai. Obate timweteja nywenkai nka oYesu Kristo ali nanywe? Okwiyaku amazuma nka muli abatakusiimwa.
\v 6 Baitu nkusuubira nka mulyeetejja nka iswei ti tuli abatasiimwak.
\v 7 Erate tukusaba Okanca waywei mulekenge kukola kubi koona koona, tiniiswe okuboneka nka abakusiimwa, wazira nywe okukolanga okusai iswe nebwetulibba nka abatakusiimwa.
\v 8 Olwakubba tituyinza kugaana mazuma, wazira okugajuna.
\v 9 Olwakubba tusanyuka iswei nitubba abanaki, nanywei nimubba n’amaani, erate nakini tukisaba’ nywei okwikiira.
\v 10 Nikyo nzwire nimpandika ebyo nka tindiyo, nindiiza eyo ndeke kubba muwandi, nka obuyinza nibuli omu Mukama waswei bwe yampaire olw’akomboka, baitu tilwa kuwenda.
\p
\v 11 Ekikusembayo, abaluganda, mweraba. Mwiikirire, mwefeeku, mulowooze bumwei, mubbe nemirembe; N'oKanca ow’akwendya n'emirembe yabbanga nanywei.
\v 12 Mulamukyenganenge nokufumbatagana okwikiiri.
\v 13 Abaikiiri boona boona babalamukirye. Ekisa kya Mukama waiswe oYesu Kristo, n’okwendya kwa Kanca, n’okwiikya ekimwe okwa mwooyo ogwikiiri bibbe nka nanywe nyweena nyweena.