ngp_reg/57-TIT.usfm

\id TIT
\ide UTF-8
\h Tito
\toc1 Tito
\toc2 Tito
\toc3 tit
\mt Tito
\c 1
\cl Mnango 1
\p
\v 1 Paulo mndima ywa Mnungu na mwigala ulosi wa yesu Kilisito, kwa mhuwi wa wadya wasagulwe ni Mnungu na mzungu we kindedi ukwigala uwedi.
\v 2 Weyaho mwe dikawiilo dyo ugima wa ulo na ulo uwo wo Mnungu heekudaha kulonga lulimi alaganaga ulo na ulo.
\v 3 Kwa lupisi lwedi, agubulaga ulosi wakwe mwo ulosi anink'haga miye nibilikize. Yaniungaga kudamanya ivi kwa sigilizi ya Mnungu myokozi ywetu.
\v 4 Kwa Tito, mwana ywe kindedi mwo mhuwi wetu, uwedi, mbazi na utondowazi kulawa kwa Mnungutate na yesu Kilkisito myokozi ywetu.
\v 5 Kwaviya ino nakulekaga kilete, kugamba ukint'hize mbuli zose izo hezinati kukint'; ha na kuwaika wadala mwe nyumba ya Mnungu kwa kila mzi enga ivo ilagizwe.
\v 6 Mdala wa mwe nyumba ya Mnungu aungwa asekunda na lema, eli na wana wahuwiklwa hewekulongwa yaihile hegu heweena wogohi.
\v 7 Ni vedi kwa mkaulizi, enga mkimaila mwe nyumba ya Mnungu, asekunda na lema. Asekunda mnt'hu wa lwasu hegu hekukekindila. Vaungwa asekunda mhufu wa maya, asekunda mkozi, asekunda mnt'hu wa kusonk'heleza nk'humbizi, naho asekunda mta kumunk'hwamunk'hwa.
\v 8 Mwa ayo: ande mnt'hu wa kuhokela watakwiza, akuungisa yedi. Vaungwa ande mnt'hu mta ubala, mta uwagilwa, akumvika mnungu, akukelongoza mwenye.
\v 9 Akudaha kukimaila mahinizo ya kindedi yahinizwe, vileke adahe kuwagela moyo kwa mahinizo yedi na akudaha kuwalangiliza wose wakumhiga.
\p
\v 10 Kwaviya kuna wasaguke wabindile wingi, naho ni wadya wavinilwe. Milosi ywe hi kint'hu. Wawadant'ha na kuwalongoza want'hu mwo kwaga.
\v 11 Vaungwa kuwakindila want'hu enga awo. Wahiniza yadya hewekuungwa kuhiniza kwa upati wa soni na kubananga mp'huga zose.
\v 12 Yumwenga ywawe, mnt'hu mta ujalamu, agambaga, “Wakilete wana lulimi holwiina uheelo, waiha na makala yaihile, wasokezi na wahank'hu.”
\v 13 Ino milosi ni ya kindedi, kwaivo usunguze kuwakindila vileke wadahe kulonga kindedi mwo mhuwi.
\v 14 Weye usekukehanganya na simo hiyo za kindedi ze Kiyahudi hegu silizi za want'hu, awo wakuvuza kunyuma ikindedi.
\v 15 Kwa wose weli wakukile, vint'hu vose vikuka. Mna kwa wose weli wasavu na hewekuhuwilka, hakikuli kikukile. Kwaviya fanyanyi zawe na kiya mkuunga zibunk'hulwa.
\v 16 Wazumila kummanya Mnungu, mna kwa udamanyi wawe wamlemela. Woho ni waihi naho hwewekuzumila. Hawakint'hizwe kwa udamanyi wowose wedi.
\c 2
\cl Mnango 2
\p
\v 1 Mna weye walonga yadya yakuligana na ulosi wa kuhuwilwa.
\v 2 Wadala wande na mbazi, nt'hunyo, ujalamu, mhuwi wedi, mwo lukunde, na mwe kufinyiliza.
\v 3 Iviyaiviya wavele wadala vaungwa wakelagise woho wenye enga wata kuketunya, na hiyo wasezengi.
\v 4 Vaungwa wasekunda wakozi. Waungwa kuhiniza yedi vileke kuwaika vedi wandele kunda na ujalamu kuwaunga wagosi zawe na wana wawe.
\v 5 Waungwa kuwahiniza kunda wajalamu, wedi, wakuika vedi zinyumba zawe, na kuwazumila wagosi zawe wenye. Waungwa kudamba mbuli izi vileke Mbuli ya Mnungu isekuhomolwa.
\v 6 Viligane na ivo, wageline moyo wabwanga wenyu wande wajalamu.
\v 7 Mwe zisila zenyu keikeni wenye kwa mliganyizo mwe ndima yedi; na umwo mkahiniza, lagiseni uwedi na nt'hunyo.
\v 8 Longeni ulosi una ugima hewiina lema, vileke yeyose akuhigana engile soni kwaviya hana diihile mwo kulonga mwetu.
\v 9 Watumwa wawazumile wakulu wawe mwa kila kint'hu. Waungwa kuwabwedeza na hiyo kuhigana nawo.
\v 10 Hawakuungwa kubawa. Vituhu vakwe, waungwa kulagisa uhuwilwa wose wedi vileke mwe zisila zose wahamp'he na mahinizo yetu ya Mnungu myokozi ywetu.
\p
\v 11 Kwaviya mbazi za Mnungu zaoneka kwa want'hu wose.
\v 12 Yakihiniza kulemela mbuli hiyo za kimnungu na kumunk'hilwa kwe si. Yakihiniza kwikala kwa ujalamu, kwa uwedi, na kwa sila za kimnbungu mwo lupisi ulu.
\v 13 Umwo kikakawiila kuhokela kawiilo dyetu dina uvikilwa, ivo vikuoneka ukukile wa Mnungu ywetu mkulu na Myokozi wetu yesu kilisito.
\v 14 Yesu akelavaga mwenye kwaajili yetu vileke kukikombola kulawa mwo kusaguka na kukitenda wedi, kwaajili yakwe, want'hu wana kinyemi kudamanya ndima yedi.
\p
\v 15 Yalonge na kutigiza mbuli izi. Kanya kwa udahi wose. Usekuzumila mnt'hu yeyose akubele.
\c 3
\cl Mnango 3
\p
\v 1 Uwakumbuse want'hu wakeseleze kwa vilongozi wata udahi, kuwazumila na kuzumila kila ndima yedi.
\v 2 Wakumbuse wanase kumdamanyila mnt'hu yeyose yaihile, wakenege kuhigana, wawenk'he lupwapwazi want'hu watuhu mwo kudamanya mwivano, na kulagisa ujalamu kwa want'hu wose.
\p
\v 3 Kwaviya hata suwe nekinda na fanyanyi ziihile na wank'hani. Nekinda mwo kwaga naho nekitendigwa watumwa kwa kumunk'hwa kwingi. Nekiikala mwe finju na uwihi. Nekiihiya na kuihiyana.
\v 4 Mna mwe mbazi za Mnungu myokozi ywetu na lukunde lwakwe kwa want'hu weze woneke,
\v 5 hayandaga kwa udamanyi wetu wo uwedi kiiudamanye, mna akiyokolaga kwa uwedi wakwe. Akiyokolaga kwa kukikukiza kjwa kwelekwa uhya na kutendigwa uhya kwa muye Akukilke.
\v 6 Mnungu amgambaga Muye Akukile mwetu suwe kombokela Yesu kilisito myokozi ywetu.
\v 7 Adamanya ivi kugamba, kikanda kiwazigwa uwagilwa kwo uwedi wakwe, kinde wamwenga mwe kindedi cho wikazi wa ulo na ulo.
\p
\v 8 Uno ni ulosi wa kuhuwilwa. Naunga myalonge kwa udahi mbuli iuzi, vileke kugambawadya wakumhuwila Mnungu wande na kindedi mwe ndima yedi iyo aikilwe kwakwe. Mbuli izi ni zedi na yana upati kwaajili ya want'hu wose.
\v 9 Mna kenegeni na vitala va kihezi, mahigano, na nk'humbizi mwe sigilizi. Mbuli izo hiyo kint'hu naho hazina upati.
\v 10 Mlemeleni yeyose akwigala mipanganizo mwa nyuwe. Akajika mkanyeni nk'hanana imwenga hegu mbili,
\v 11 manyeni kugamba mnt'hu wa ivo kaleka sila yedi naho adamanya wavu na kukesengela mwenye.
\p
\v 12 Umwo nenimsigile kwako Atemi hegu Tikiko, usunguze kwiza kwangu uku Nikopoli uko hwikala lupisi lwa mp'heho.
\v 13 Sunguza naho umsigiile Zena akumanya sigilizi, na apolo, haheina kuhungukilwa na kint'hu.
\v 14 Want'hu wetu vaungwa wahine kudamanya ndima zedi izo zikuungwa vileke kugamba sema wakanda heweena upati.
\p
\v 15 Wose wehamwenga na miye wakulamsa. Walamse wadya wakukiunga mwo mhuwi. Uwedi unde na nyuwe nyose.