ngp_reg/52-COL.usfm

\id COL
\ide UTF-8
\h Wakolosai
\toc1 Wakolosai
\toc2 Wakolosai
\toc3 col
\mt Wakolosai
\c 1
\cl Mnango  1
\p
\v 1 Paulo mwigala ulosi wa Yesu kilisito kwa kuunga Mnungu, na Timoseo ndungu yetu,
\v 2 kwa wahuwilwa na wandugu wahuwilwa mwaKilisito weli Kolosai. Uwedi unde kwenyu, na utondowazi kulawa kwa Mnungu Tati yetu.
\p
\v 3 Chalava nt'hogola kwa Mnungu, Tate ywa Zumbe ywetu Yesu Kilisito, naho chawalombezela kila zuwa.
\v 4 Kiva mhuwi wenyu mwa Yesu Kilisito na nlukunde uwo mnanawo kwa wadya wose wasagukwe kwajili ya Mnungu.
\v 5 Mna lukunde ulwu ni kwaviya ya kawiilo dye kindedi diikigwe kwe mbingu kwajili yenyu. Mwevaga mwe kawiilo idyo dye kindedi ikanda ainati mbuli ye kindedi, na mbuli yedi ya Mnungu,
\v 6 iyo izile kwenyu. Kukongela aho mwevaga na kuhina mwo nuwedi wa Mnungu mwe kindedi. Mbuli ino iyedi yegenyela mwe si yose. Yatenda iivo mwetu
\v 7 Ino niyo mbuli yedi mhinile kulawa kwa Epafula, umiyetu mndima miyetu, uyo mndima mhuwilwa wa Kilisito mwa suwe.
\v 8 Epafula kautenda umanyikise mwetu na lukunde lwenyu mwo Muye.
\p
\v 9 Kwaviyan yo lukunde ulwu, aho chevaga ivi, hakilekile kuwalombezela. Nekinda kikawalombezela kugamba nomwink'hwe na mzungu na lukunde mwo umanyi wose na ubala we kimuye.
\v 10 Nekinda kikawalombezela kugamba nomgendeele kufinyiliza kwa Zumbe mwe sila zedi. Nekinda kikawalombezela kugamba nomwinde na upati mwe kila mbuli yedi na mwe mizungu ya Mnungu.
\v 11 Chalombeza mdahe kugeligwa ludole mwe kilka udahi kuligana na ludole lwa ukuki wakwe mwo kufinyiliza na ujalamu wose.
\v 12 Chalombeza kugamba, kwa kinyemi, nomlave nt'hogola kwa tate, awatendile nyuwe mdahe kunda hant'hu ho ukipe wa wahuwilwa mwo ungazi.
\p
\v 13 Kakiyokola kulawa mwo udahi we diziza na kukisamiza mwo useuta wa Mwanawe wo lukunde.
\v 14 Mwa Mwanawe kina nukombola, ulekelwa wo wavu.
\v 15 Mwana ni mliganyizo wa Mnungu hee kuoneka. Yehe andaga nt'hulasasu mwe viumbwa vose vandaga vikei kuumbigwa.
\v 16 Kwaviya kwombokela yehe, vint'hu vose vaumbagwa, vint'hu vikuoneka na hevikuoneka. Ni hamwenga na maseuta na wata udahi na wakulu, aumbaga vint'hu vose kombokela yehe naho kwajili yakwe.
\v 17 Yehe andaga uuko umwo vint'hu vose vandile havinati kunda uuko, vint'hu vose vanda aho vili mwa yehe.
\v 18 Yehe niye mntwi wo mwili, umwili ni want'hu wamhuwile Kilisito. Yehe niye chotoko cho ugima. Yehe niye ywa nk'hongo kuuyuka vileke ande ywa nk'hongo mwe vint'hu vose.
\v 19 Kwaviya Mnungu nakaunga mwenye kugamba Kilisito ande ivo eli.
\v 20 Kwa kwombokela yehe vint'hu vose vimwe isi na viya va kwe mbingu, kuvivuza hamwenga kwa Mnungu, adamanye utondowazi kwombokela sakame ya Mwanawe abanike mwo msalaba.
\p
\v 21 Nyuwe naho, kwa lupisi nlumwenga du nomnda wata kwiza wa Mnungu, naho nomnda wank'hondo wakwe kwe zifanyanyi zenyu na udamanyi wenyu wiihile.
\v 22 Mna haluse, kawavuzani hamwenga mwo mwili wakwe kwa sila ye file. Adamanyaga ivi, vileke awalete nyuwe mkukile, heweina kulabila na malongelezo yoyose.
\v 23 Uneva mnagendeela mwo mhuwi, mtogezwe kunda watogile, naho msekuzumila kusingiswa mwe dikawiilo diya mpatile umwo mwevaga Mbuli Yedi miye Paulo hinda mtumwa ywe Mbuli Yedi iyo ibilikizwe kale kwa want'hu wose mwe isi.
\p
\v 24 Naho haluse nna kinyemi mwa masulumizo nnanayo kwa ajili yenyu. Kwaviya kwa masulumizo yangu nayakintiza yadya yasigale mwa masulumizo ya Kilisito, kwa ajili yo umwili wakwe, want'hu wamhuwile Kilisito.
\v 25 Miye ni mndima wa mwe nyumba ya Mnungu, viligane ndima niink'higwe kulawa kwa Mnungu kwajili yenyu, kukin'hizambuli yedi ya mnungu.
\v 26 Iki nicho kindedi cha kinyele chafisagwa kwa miyaka mingi na vyeleko. Mna haluse kigubulwa kwa want'hu wakuhuwila mwakwe.
\v 27 Ni kwa wadya awo Mnungu aungaga kugubulwa ivo kwili ugoli wo ukulu wa kinyele che kindedi iki mwe si. Ni kugamba Kilisito emndani umwenyu, nanywe nomnde hamwenga mwo uwedi utendese ukwiza.
\v 28 Uyu niye kikumbwelekeza. Chamkanya kila mnt'hu, na kumhiniza kila mnt'hu kwa mzungu wose, vileke kugamba kimwigale kila mnt'hu mhuwilwa mwa Kilisito.
\v 29 Kwa sila ino, miye nakombekesa kuligana na ludole lwakwe lukudamanya ndima yangu mwo udahi.
\c 2
\cl Mnango 2
\p
\v 1 Kwaviya naunga mmanye ivo nandaga na makunt'ho kwajili yenyu, kwa wose weli Leodikia na kwa wose hewenione futa yangu mwo mwili.
\v 2 Nadamanya ndima vileke kugamba myoyo yenyu idahe kusangalazwa kwa hamwenga mwo lukunde na mwo ugoli wose ukint'hile wo umanyi, mwo kumanya kinyele cha kindedi cha Mnungu, uyo ni kilisito.
\v 3 Mwa yehe vindolo vose na mizungu vifisigwa.
\v 4 Nagamba ivi vileke kugamba mnt'hu yeyose anase kuwadamanyila nyambi mwo kubilikiza na kuwaluvya.
\v 5 Ikanda hihali hamwenga na nyuwe mwo mwili, mna ni hamwenga na nyuwe mwo muye. Nenda na kinyemi umwo haona migendeele yenyu yedi na ludolwe lwo mhuwi wenyu mwa kilisito.
\p
\v 6 Enga ivo mumhokele Kilisito Zumbe, mgendeele mwakwe.
\v 7 Mtogezwe mwakwe, mzengwe mwakwe, mtogezwe mwo mhuwi enga du ivo mhinizwe, na kwinda mwe nt'hogola zitendese.
\p
\v 8 Kauliseni mnt'hu yeyose anase kuwagwila kwa fanyanyi zakwe na milosi yo udant'hi kuligana vihendo va mwe si, na hiyo kuligana na kilisito.
\v 9 Kwaviya mwakwe yehe uhuwiklwa wose wa Mnungu wekala mwo mwili.
\v 10 Na nyuwe mmemezwa mwa yehe. Yehe ni mdahi wa kila kint'hu.
\v 11 Mwakwe nomvinwa hiko kwedi na want'hu kuuswa mwili we kimnt'hu, mna ni kwa kusagulwa na Kilisito.
\v 12 Nommoselwa msanga hamwenga nae mwo ubatizo. Na kwa sila yo mhuwi mwa yehe nomuyulwa kwa udahi wa Mnungu, amuyule kulawa kwa wabanike.
\v 13 Na umwo mwandaga mbanika mwe masa yenyu na kuto kuvinilwa mwe miili yenyu, awatendaga wagima hamwenga naye na kukilekela maihi yetu yose.
\v 14 Ahausaga nk'humbukila ya maliho yo kutigizwa yawandikagwa, na vihendo heviligane na suwe.
\v 15 Ahausaga yose umwo awambagwa mwo msalaba. Ahausaga ludole na ukulu. Ayaikaga pwilili na kutenda kunda na kinyemi cho uhumi kwa sila yo msalaba wakwe.
\p
\v 16 Kwaivo, mnt'hu yeyose asekuwasengelani nyuwe mwo kudya hegu mwo kunywa hegu mwe dizuwa dye kinyemi dyo mwezi mhya hegu mwe dizuwa dyo kuhumula.
\v 17 Ivi ni vizuli ye zimbuli zikwiza, mna ichenye ni Kilisito.
\v 18 Mnt'hu yeyose asekuhokwa nt'hunyo yakwe kwa kumunk'hilwa na ujalamu na kwa kuvika watumigwa wa kwe mbingu. Mnt'hu wa ivo engila mwe zimbuli aone na kuluvigwa na fanyanyi zo mwili wakwe.
\v 19 Yehe hakukutoza mtwi. Ni kulawa mwo mtwi kugamba mwili wose kombokela vilungo vakwe na mavuha hulunganywa na ktozana hamwenga; na kukula kwa ukuli ukulavigwa ni Mnungu.
\p
\v 20 Ikanda nombanika hamwenga na Kilisito kwa kihendo che si, nii mwekala enga mwaungwa kwa si:
\v 21 “Msekutoza hegu kuluma, hegu kukwafa?”
\v 22 Aya yose yaikigwa kwajili yo ubanangi ukwiza na udamanyi, kuligana na sigilizi na mahinizo ya want'hu.
\v 23 Sigilizi izi zina umanyi we miviko idamanywe kwa kuunga wenye na ujalamu wo kusulumila yo mwili. Mna hazina yombe mwom kumunk'hwa kommwili.
\c 3
\cl Mnango  3
\p
\v 1 Ikanda Mnungu kawauyula hamwenga na Kilisito, zunguleni mbuli za kulanga uko Kilisito akwikala mwo mkono wo kulume wa Mnungu.
\v 2 Fanyanyeni mwe mbuli za kulanga, na hiyo mwe mbuli ze isi.
\v 3 Kwaviya mbanika, na wikazi wenyu ufisigwa hamwenga na Kilisito mwa Mnungu.
\v 4 Umwo Kilisito akeza kuoneka, uyo ni wikazi wenyu, niho na nyuwe nomoneke naye mwo undiilo.
\p
\v 5 Kwa ivo yasunt'heni mbuli zi mwe isi, usavu, uhabwasi, fanyanyi nziihile, na kumunk'hwa kwihile, izo ni mviko wa mahili.
\v 6 Ni kwajili ye zimbuli izi maya ya Mnungu yeza kwa wadya wana hewekuzumila.
\v 7 Na ni kwajili ye zimbuli izo nanywe mwandaga iivo mkadamanya umwo mwekalaga mwawe.
\v 8 Mna haluse mwaungwa mhause mbuli izi zose. Maya, fanyamnyi ziihile, kuhomola, na miloso misavu yakulawa mwe milomo yenyu.
\v 9 Msekukedant'ha nyuwe kwa nyuwe, kwaviya muuhambula unt'hu wenyu wa kale na udamanyi wakwe.
\v 10 Muuvala unt'hu uhya, uwo ukudamanywa uhya mwo kulawa mwo mzungu kulawa mwamliganyizo wa yudya muumbi.
\v 11 Mwe zifanyanyi izi, hehali Myunani hegu Myahudi, kuvinilwa na kutokuvinilwa, msomi na hiyo msomi, mtumwa na hiyo mtumwa, mna vituhu vakwe Kilisito ni mbuli zose mwa yose.
\p
\v 12 Enga wasagulwa wa Mnungu, wakukile na wakuungiswa, kevaleni unt'hu wedi, ujalamu, uhoile na kufinyiliza.
\v 13 Mkeambize nyuwe kwa nyuwe. Keneleni mbazi kila mnt'hu na miyawe, Unevaq mnt'hu ana masongelezo mwa miyawe, amlekele kwa iviya Zumbe awalekeleni nyuwe.
\v 14 Akajika mbuli izi zose, mnde na lukunde, icho nicho kikuungwa kwo uhuwilwa.
\p
\v 15 Utondowazi wa Kilisito uwalongoze mwe myoyo yenyu. Neinda kwajili yo utrondowazi uno kugamba nomwitangilwa mwo mwili umwenga. Indeni na kutogola.
\v 16 Na mbuli ya Kilisito iukale mndani mwenyu kwa ugoli. Kwa umanyi wose, kehinizeni na kukelangilizana nyuwe kwa nyuwe, kwa zabuli, na ukemiu na ukemi wo muye. Kemeni kwa kutogola kwa myoyo yenyu kwa Mnungu.
\p
\v 17 Na chochose mkudamanya, mwe mbuli hegu mwo udamanyi, damanyeni yose kwa ziuna dya Zumbe Yesu. Mwink'heni nt'hogola Mnungu tate kombokela yehe.
\p
\v 18 Wavele, keselezeni mwa wagosi zenyu, enga ivo akuunga Zumbe.
\v 19 Na nyuwe wagosi, waungeni wavele wenyu, naho msekunda na nk'hani mwawe.
\p
\v 20 Wana weveni welesi wenyu mwe zimbuli zose, kwaviya nivo vikumuwagila Zumbe.
\v 21 Watate msekuwasogola wana wenyu, vileke wanase kufa chevu.
\p
\v 22 Watumwa weveni wakulu wenyu mwo mwili mwe zimbuli zose, na hiyo kwa udamanyi wa meso enga want'hu wa kukeungisa du, mna kwa moyo we kindedi. Mogoheni Mnungu.
\v 23 Chochose mkudamanya, damanyeni kulawa mwe myoyo yenyu enga kwa Zumbe nahi hiyo enga kwa want'hu.
\v 24 Mwamanya kugamba nomhokele geleko dyo wikazi kulawa kwa Zumbe. Ni Kilisito Zumbe mkumdamanyila ndima.
\v 25 Kwaviya yeyose akudamanya hiyo yo uwagilwa naahokele usengelo kwa udamanyi howiina uwagilwa adamanye, naho hahana kwazagula.
\c 4
\cl Mnango 4
\p
\v 1 Nyuwe wakulu, wadamanyileni watumwa wenyu kwo uwedi, mkamanya kugamba nanywe mnanaye Zumbe uko kwe mbingu.
\p
\v 2 Msekuleka kumlombeza Mnungu, naho indeni meso mwo kulombeza no kumgamba Mnungu nivedi.
\v 3 Naho mkakilombezela na suwe, vileke Mnungu akink'he luneka lwedi kibilikize ulosi wakwe, ukugubula zimbuli hemwizimanyize za Kilisito.
\v 4 Naho lombezeni kugamba nidahe kuika pwilili, engan ivo huungwa kulonga.
\p
\v 5 Mnde na mzungu mwo wikazi wenyu mkanda hamwenga na want'hu hewekuhuwila.
\v 6 Na milosi yenyu inde na uwedi lupisi lwose, na kumhitula vedi kila mnt'hun mazuwa yose, vileke kugamba mdahe kumanya ivo huungwa kumhitula kila mnt'hu.
\p
\v 7 Mwe mbuli zangu miye, Tukiko naadamanye imanyike kwenyu, yehe ni mndugu ywetu kikumuungisa, mtumwa mhuwilwa, naho mtumwa miyetu mwe ndima ya Zumbe.
\v 8 Namsigiila kwenyu awagambileni mbuli zangu zose. Ivo namtuma kwenyu, vileke mmanye ivo suwe kili, naivo adahe kuwagela ludole imioyo yenyu.
\v 9 Namsigiila hamwenga na Onesimo mndugu ywetu kikumuungisa naho mhuwilwa, yumwenga mwe difyo dyenyu. Awo nawawagambileni kila kiya kikulaila aha.
\p
\v 10 Alistaliko, mvugailwa miyangu, awalamsani, na Maliko soviye dya Banaba, mhokela kale sigilizi kulawa kwakwe, “Enga umwo aneza kwenyu, mhokelenii,”
\v 11 Naho Yesu akwitangwa Yusito. Awa naawo du wakudamanya ndima kwajili yo Useuta wa Mnungu. Wandaa wakanisangalaza miye.
\v 12 Epafula, yumwenga mwe difyo naho mtumwa ywa Yesu Kilisito, awalamsani, naho mazuwa yose akombeka mwe kuwalombezelani kwa Mnungu, vileke mdahe kukimala mtogile, naho mhuwilise Kilisito no kumtegelezesa Mnungu.
\v 13 Kwaviya nadaha kulonga uwona kugamba, akombekesa kuwadamanyilani ndima nyuwe na want'hu wa Laodekia, na wose wa uko Hierapoli.
\v 14 Luka mlaguzi ywetu kikumuungisa, na miyawe Dema, wawalamsani.
\p
\v 15 Chawalamsa wandugu wa uko Laodekia, hamwenga na Nimfa, na want'hu wamhuwile Kilisito, wose wakudugana mwe nyumba yakwe.
\v 16 Mnabinda kusoma ibaluwa ino, kombekeni kwavovose isomwe ne difyo dya wahuwila wa Kilisito wa uko Laodekia na nyuwe tendeni ubala vileke mwink'higwe msome ibaluwa wenk'higwe woho.
\v 17 Mgambileni Alikipo, “Adamanye vedi indima idya enk'higwe ni Zumbe aikint'htize.”
\p
\v 18 Miye Paulo nawandika ndamsa ino kwa mkono wangu mwenye. Kumbukileni kugamba, ni mwe divugailo. Uwedi wa Mnungu unde na nyuwe.