ngp_reg/50-EPH.usfm

\id EPH
\ide UTF-8
\h Waefeso
\toc1 Waefeso
\toc2 Waefeso
\toc3 eph
\mt Waefeso
\c 1
\cl Mnango 1
\p
\v 1 Miye Paulo, Mwigala ulosi ywa Yesu Kilisito kwaviya aungile Mnungu, nawawandikilani nyuwe want'hu wa Mnungu wa Efeso, wahuwilwa mwo kulunganywa na Yesu Kilisito.
\v 2 Nawalombezelani uwedi no utondowazi kulawa kwa Mnungu Tati yetu na Zumbe ywetu Yesu Kilisito.
\p
\v 3 Atogolwe Mnungu eli Ise dya Yesu Kilisito. Kwaviya mwo kulunganywa na Kilisito kakivikila na kukink'ha mageleko yose.
\v 4 Kukongela aho isi ino ikei kuumbigwa, Mnungu nakakisagula kinde wakwe mwo kulunganywa na Kilisito, vileke kinde wakukile hakwe haheina lema.
\v 5 Mwo lukunde aho kale mwenye Mnungu nakakitalazila suwe kinde wanawe kwa sila ya Yesu Kilisito. Adamanyaga ivo kwaviya aungile.
\v 6 Ivo kimtogoleni Mnungu kwa wedi wakwe mkulu akink'hile kwombokela mwanawe amuungise.
\p
\v 7 Kugamba kwa sakame yakwe Yesu, suwe kikombolwa, kiusilwa wavu wetu. Nivo wili ukulu wo uwedi wakwe,
\v 8 akink'hile haheina kihimo, kwa ubala wose na umanyi.
\v 9 Mnungu adamanyaga kiya aungaga, niyo akink'ha kumanya mzungu wandaga ukei kumanyika uwo aungaga kuudamanya kombokela kwa Yesu Kilisito.
\v 10 Mzungu uwo nowize ukintizwe ni Mnungu aho lupisi lwakwe lukabula, ni kuwaduganya viumbwa vose kwo ulanga na mwe isi, wose wakanda walongozwa ni Yesu Kilisito.
\v 11 Mwo kulunganywa na Yesu, suwe kitendigwa wakipe wo ukombolwa kuligana naivo kiikilwe mizungu. Kwa diya Mnungu aungile kudamanya kila kint'hu kwa ulamuzi wakwe no kuunga kwakwe.
\v 12 Suwe kilongole kumhuwila Kilisito chaungwa kuutunya ukulu wa Mnungu
\v 13 Neinda kwa sila ya Kilisito kugamba nomwiva mbuli ya kindedi, mbuli yo uyokozi kwa sila ya Kilisito. Mumhuwila Kilisito naye niyo awagelani kiwalo kwa kumink'hani Muye ywa Mnungu uyo alaganaga naawenk'heni.
\v 14 Uyu Muye akukile nicho kiwalo kugamba nekihokele kiya Mnungu agambile naawenk'he want'hu wakwe, no kukink'ha ikindedi kugamba Mnungu naawenk'he ukombolwa ukint'hile awant'hu wakwe.
\p
\v 15 Kwa ivo kukongela aho nevaga umhuwi wenyu mwa Zumbe Yesu na lukunde lwenyu kwa want'hu wose.
\v 16 Higendeelesa kumtogola Mnungu kwajili yenyu na kumbukilani kila halombeza.
\v 17 Nalombeza kugamba Mnungu ywa Zumbe ywetu Yesu Kilisito, Tate mta ukulu, awenk'heni Muye ywakwe wo umanyi wakwe.
\v 18 Naho namlombeza Mnungu agubule mioyo yenyu idahe kuwona ung'azi wakwe vileke mmanye dikawiilo diya awetangileni no ukulu utendese wo uvikilwa awaikile want'hu wakwe
\v 19 Nalombeza mmanye ivo udahi wakwe wili mkulu vitendese kwetu suwe kikuhuwila. Udahi uno ukudamanya ndima mndani mwetu, uligana no ludole ludya lukulu lutendese.
\v 20 Ulo lumuuyule Kilisito, niyo lwamwiika kulume kwakwe uko kwe mbingu.
\v 21 Uko Kilisito kanda niye mkulu wakila uzumbe na udahi na ludole na ukulu, niye mkulu kujink'ha ukulu wose umanyike mwe isi ino na mwe isi iyo ikwiza
\v 22 Mnungu kaika vint'hu vose hasi yo udahi wa Kilisito. Niyo amwink'hiza kwe difyo dya wahuwila wa Kilisito ande mkulu mwe vint'hu vose.
\v 23 Wakumhuwila Kilisito wose, nuwo umwili wakwe Kilisito, naho nuko kukint'ha kwakwe yehe akugela kukint'ha kila kint'hu na kila hant'hu.
\c 2
\cl Mnango 2
\p
\v 1 Enga viya mwandaga mfa kwajili ya malema no wavu wenyu.
\v 2 Neinda yadya kugamba, mwekalaga mkatimila ivo wiihi we isi ino. Niyo mwanda mwawategeleza wakulu wo udahi kwo ulanga, yUno nuwo muye akudamanya ndima mwa wana wasaguke.
\v 3 Naivo suwe chose nekinda enga woho, kikekala kutimila kumunk'wamunk'wa munk'hwa kwiihile kwe isi, no kudamanya mbuli zikuibwedeza imili yetu ne zifanyanyi zetu. Naswe ivo kili mwo wavu, kinda enga woho, nekiwagilwa kusulumizwa ni maya ya Mnungu.
\p
\v 4 Mna Mnungu ni mta mbazi zitendese kakiunga kwa lukunde lukulise.
\v 5 Umwo chandile kibanika kwajili yo wavu wetu, kakitenda wagima hamwenga na Yesu Kilisito. Nyuwe myokolwa kwa uwedi wa Mnungu.
\v 6 Kwa kulunganywa na Yesu Kilisito, Mnungu kakiuyula hamwenga naye kinde mazumbe hamwenga naye uko kulanga.
\v 7 Nivo aungile kukilagisa kwa want'hu wa mazuwa yakwiza, ukulu wa uwedi wakwe uwo akink'hile kwa ukise mwo kulungana kwetu na Yesu Kilisito.
\p
\v 8 Kwaviya myokolwa kwa mbazi za Mnungu kombokela umhuwi. Mbuli ino hailaile kwa kukombeka kwenyu, idi ni ngeleko kulawa kwa Mnungu.
\v 9 Naho hiyo kwa udamanyi wenyu. Mnt'hu yeyose anase kukeduvya.
\v 10 Kwaviya Mnungu niye akiumbile ivi kili mwa kilisito Yesu kudamanya atedi. Nakakiumba vileke kikale wikazi we mitendele iyedi akiikile lumwe vileke kiidamanye.
\p
\v 11 Kwajili ya ayo msekujala kugamba aho kale, nyuwe want'hu hi Wayahudi kwaivo wili umwili, nyuwe mkwitangwa hemwigeligwe ngasu, ngasu ya mwo mwili ikuta kugelwa ni want'hu.
\v 12 Mwo lupisi ludya nyuwe mwandaga homwiinanaye Kilisito. Nomnda wata kwiza kwa want'hu wa Waizilaeli. Naho nomnda wata kwiza mwe dilagano. Mwandaga homwiina chochose mwe ndagano. Mwekalaga mwe isi ino mkanda mswesa makawiilo, naho enga want'hu hewe mmanyize Mnungu aha he isi.
\v 13 Mna haluse kwa kulungana na Kilisito Yesu, nyuwe mwandile hale aho nk'hongo, mnda hagihi kwombolela sakame ya Kilisito.
\p
\v 14 Kwaviya Kilisito mwenye kakigaila utondowazi. Kawatenda Wayahudi, na hi wayahudi kunda kint'hu kimwenga.
\v 15 Yesu ausaga miko ya Wayahudi, ne miko ne vihendo, inde kugamba, adamanye lukolo lumwenga mwo kulunganywa naye. Mwo kuudamanya ivo kegala utondowazi.
\v 16 Adamanyaga ivi kuwaduganya mafyo maidi ya want'hu kunda mwili umwenga kwa Mnungu kombokela msalaba. Kwa sila yo msalaba auhasaga unk'hondo.
\v 17 Yesu ezaga kubilikiza Mbuli Yedi yo utondowazi kwa nyuwe want'hu hi Wayahudi mwandagaga hale na Mnungu, naho kwa Wayahudi awo wandaga hagihi na Mnungu.
\v 18 Haluse kwasila ya Yesu Kilisito, suwe chose, Wayahudi na hi Wayahudi, chadaha kuita kwa Tate kombokela Muye ywa Mnungu yumwenga.
\p
\v 19 Ivo elo, nyuwe hi wayahudi hiyo wata kwiza naho, naho hiyo want'hu wa kuse. Nyuwe mwi want'hu wa hamwenga na want'hu wa Mnungu naho nyuwe ni want'hu wa mp'huga ya Mnungu.
\v 20 Nyuwe nanywe mzengigwa mwe zink'hongelo ziikigwe ni wegala ulosi na walotezi. Yehe mwenye Kilisito Yesu niye diiwe dikulu dye nk'hongelo.
\v 21 Yehe niye akudinula dizengo dyose no kudiluganya mpaka dinde Nyumba nk'hulu ya Zumbe.
\v 22 Kwa kulunganywa hamwenga na Yesu, nyuwe nanywe mwazengwa hamwenga na watuhu wose mnde ukalo wa Mnungu kwombokela Muye ywa Mnungu ywakwe.
\c 3
\cl Mnango 3
\p
\v 1 Kwaivo, Miye Paulo mvugailwa ywa Yesu Kilisito, nalombeza Mnungu kwajili yenyu want'hu hi Wayahudi.
\v 2 Ikindedi mwiva kugamba kwa mbazi zakwe Mnungu nakanink'ha indima ino niidamanye kwajili yenyu.
\v 3 Nawawandikilani naivo nigubuilwe miye. Iki nicho ikindedi icho niwandike kwa uguhi mwe mbuli ino,
\v 4 Naho mnasoma ayo niwandike nomdahe kumanya ivo nikimanyize kinyele cha Kilisito.
\v 5 Kwa vyeleko vituhu ikindedi iki hakitendigwe kimanyike kwa wana wa want'hu. Mna kwa haluse wiikwa pwilili kwa muye na kwa wegala ulosi waikigwe ni walotezi.
\v 6 Ikindedi iki kikefisile ni kugamba want'hu wa si we mwe ndala hamwenga na Wayahudi mwo kuvikilwa. Woho we ndala hamwenga na ndagano ya kilisito Yesu kombokela mbuli yedi.
\v 7 Miye hitendigwa kunda mndima we Mbuli Yedi, no uwedi anink'hile Mnungu kwa udahi wakwe mkulu.
\p
\v 8 Mnungu alavaga geleko kwangu, saviya miye ni mdodo vitendese mwa want'hu wose wa Mnungu. Geleko uno waniunga niwabwelekezele want'hu hi Wayahudi ugoli wakwe Kilisito hewiina kihimo.
\v 9 Yaniunga niwatende want'hu waone mzungu wa Mnungu ukefisile ivo ukudamanywa. Uno ni mzungu uwo wakefisaga kwa myaka mingi yomboke, na mnungu muumbi we vint'hu vose.
\v 10 Vileke inde haluse, kwe sila ya want'hu wamhuwile Kilisito, wakulu wa kulanga na wata udahi, wadahe kubunk'hula mzungu wa Mnungu.
\v 11 Adamanya imbuli iyo kutimila dia alongaga dya mazuwa ya ulo na ulo, idyo atendile kwa sila ya Kilisito Yesu Zumbe ywetu.
\v 12 Kwaviya chamhuwila Kilisito, chakeduvya naho kina udahi wa kuita hameso ya Mnungu kikanda ne kindedi akukihokela.
\v 13 Naivo namlombeza Mnungu msekusokezwa kwa masulumizo hupata kwajili yenyu. Kwaviya ayo ni kwajili ye nt'hogola yenyu nk'hulu.
\p
\v 14 Kwaivo nafika madi kulombeza hameso ha Tate.
\v 15 Uyo ichotoko che zink'holo ze vint'hu vose mwe isi na kwo ulanga.
\v 16 Namlombeza Mnungu viligane no ukulu we wedi wakwe utendese, awenk'heni nguvu kwa udahi wa Muye ywa Mnungu ywakwe, mtoge mioyo yenyu,
\v 17 Nalombeza kugamba Kilisito ekale mwe mioyo yenyu kwa mhuwi. Naho nalombeza kugamba mnde mtoga na nk'hongelo mwo lukunde lwakwe.
\v 18 Vileke mnde mwo lukunde lwakwe mdahe kumanya, hamwenga na wose wakuhuwila, kwa uzangalamu, naho kwa utali kuita kulanga, naho kwa kutendesa lukunde lwa Kilisito.
\v 19 Nalombeza kugamba mdahe kumanya lukunde lwa Kilisito, lukujink'ha umanyi wose. Mdamanya aya vileke mmemezwe vitendese ukintizi wo ugima no udahi wa Mnungu.
\p
\v 20 Na haluse kwa yudya akudaha kudamanya kila mbuli, kujink'ha yadya kikulombeza hegu kuyafanyanya, kuligana no ludole lwakwe lukudamanya ndima mndani mwetu,
\v 21 ukulu unde kwa Mnungu na mwe difyo dya wahuwila wa Kilisito na mwa Kilisito Yesu mazuwa yose na ulo na ulo. Taile.
\c 4
\cl Mnango 4
\p
\v 1 Haluse, miye mvugailwa kwa kudamanya ndima ya Zumbe, nawalombezelani mwikale kuligana no lwitango mwitangilwe ni Mnungu.
\v 2 Mnde wakweseleza mioyo, naho wajalamu, naho want'hu wano ugoja, mkafinyiliza kila yumwenga kwa miyawe kwa sila yo lukunde.
\v 3 Kombekeni kuulela umwenga ukwigalwa ni Muye ywa Mnungu kwa kuuwamila utondowazi ukuwaikani hamwenga.
\v 4 Wiyuko mwili umwenga wa Kilisito na Muye ywa Mnungu yumwenga, enga ivo mwili na kawiilo dimwenga mwitangilwe ni Mnungu.
\v 5 Eyuko Zumbe yumwenga, na mhuwi umwenga, no ubatizo umwenga,
\v 6 naho eyuko Mnungu yumwenga uyo Tate ywa wose. Yehe eyuko mnanga mwa yose, na mwa kila kint'hu na mndani mwa wose.
\p
\v 7 Naho kila yumwenga ywetu kenk'higwa geleko hediina maliho kuligana na viya Kilisito amwink'hile.
\v 8 Enga ivo viwandikwe mwa mawandiko kugamba. “Umwo apawaga kulanga vitendese, aitaga na wengi watahigwe. Niyo awenk'haga want'hu mageleko.”
\p
\v 9 “Haluse niyo imbwai,” Ikalongwa kugamba, nakaita kulanga, na nk'hongo nakaseelesa hasi ye isi?
\v 10 Naivo uyo aseele aha he isi, ni yehe aitile kulanga kwe zimbingu zose, vileke useuta wakwe wenele isi yose.
\v 11 Kilisito nakalava mageleko kwa want'hu, wamwenga kawatenda kunda wegala ulosi, wamwenga walotezi, wamwenga nawo kawatenda wadimi wamwenga nawo kawatenda wahinizi.
\v 12 Nakatenda ivo vileke awaike lumwe want'hu wa Mnungu kwa ndima ya Kilisito vileke umwili wa Kilisito ukule,
\v 13 naivo suwe chose kiubwiile umwenga kwa mhuwi wetu na mwo kummanya Mwana Mnungu, naswe hamwenga kikule mpaka kinde kikint'hile enga Kilisito mwenye ivo eli.
\v 14 Hekinde naho enga wana wakembe, kikajubwaniswa uko na uko ni nk'hung'ut'ho ya mahinizo yakuhinizwa ni want'hu wadant'hi vileke wawazaganye watuhu kwa nyambi zawe.
\v 15 Mna kina ubilikiza ikindedi kwa moyo wa lukunde nekikule mwe kila kint'hu vileke kinde enga Kilisito, uyo eli mtwi wa wahuwila wose.
\v 16 Mwo ulongozi wakwe, mwili wose walunganywa hamwenga no umwili. Naho kila kilungo kikadamanya indima yakwe. Ivo umwili wakula no kukezenga wenye kwa lukunde.
\p
\v 17 Haluse nalonga uwona no kuwakanyani kwa zina dya Zumbe, mse kwikala enga want'hu hewe mmanyize Mnungu, wata fanyanyi zawe heziina kint'hu.
\v 18 Naho ubala wawe umwo lwiza. We hale no ugima wa Mnungu kwa ivo weli wahezi, ne zink'hani mwe mioyo yawe.
\v 19 Waganika, naho heweina soni, wengila mwe kuhuja, wadamanya kipump'ha kila mbuli za usavu, naho waungisa kudamanya ugila.
\p
\v 20 Mna nyuwe hivo ivo mhinile mwa Kilisito.
\v 21 Kindedi nomwiva zimbuli za Yesu, niyo mwahinizizwa mwa yehe kugamba ukindedi umwakwe.
\v 22 Haluse, lekeni lugendo lwenyu lwa kale, enga mnt'hu akuhambula suke, udya unt'hu wenyu wa kale wandaga ukabanangwa ni kumunk'hwamunk'hwa kwo udant'hi.
\v 23 Ketendeni uhya mwe mioyo yenyu ne zifanyanyi zenyu,
\v 24 valeni unt'hu uhya enga viya mnt'hu akuvala suke mp'hya, uumbigwe ukeigile Mnungu, udya ukukelavanya mwo wikazi wo uwagilwa no ukuki no ukindedi.
\p
\v 25 Elo haluse, lekeni udant'hi, kila yumwenga amgambile mhuwila miyawe ikindedi, kwaviya kila yumwenga amhuwila miyawe.
\v 26 Uneva mnafa maya, msekuzumila amaya yenyu yaleke mdamanye wavu. Naho zuwa disekuswa maya yenyu yande yamlawani.
\v 27 Mnase kumwink'ha Mwavu luneka lolose.
\v 28 Mbavi ase kubawa, akonge kudamanya ndima yedi kwa mikono yakwe vileke ande ne vint'hu va kumwambiza mkiwa.
\v 29 Msekulonga milosi iihile, mna inde niidya iyedi ikuwazenga watuhu, vileke yadya mkulonga yegale uwedi kwa wose wakuyeva.
\v 30 Msekumgela kinyulu Muye ywa Mnungu, kwaviya Muye ywa Mnungu ni kiwalo cha Mnungu kwenyu kugamba nyuwe ni want'hu wakwe, naho ni kiwalo cha kugamba dizuwa dyeza dya Mnungu dyo ukombola.
\v 31 Haluse, lekeni usungu na maya na vugo na nk'humbizi na wiihi wi hengi indeni na wedi nyuwe kwa nyuwe.
\v 32 Mnde mbazi. Mlekelane nyuwe kwa nyuwe, enga viya Mnungu awausileni nyuwe wavu wenyu kwombokela Zumbe Yesu.
\c 5
\cl Mnango 5
\p
\v 1 Ivo mnde want'hu wa kumtimila Mnungu. Enga wanawe wakumuungisa.
\v 2 Wikazi wenyu ulongozwe ni lukunde enga viya Kilisito akiungise suwe, niyo akelava yehe mwenye akomwe kwajili yetu. Yehe nakanda malavo yana mhemp'he wedi yakumwelela Mnungu.
\v 3 Haviwagilwe mbuli za uhabwasi na usavu hegu ugubaguba, vise kugeza kutambulwa mwenyu.
\v 4 Naho mbuli za soni, ubwalasi, uhungu, ayo yose hayawagilwe kwenyu, mbuli za kumtogola Mnungu nizo zikuwagila.
\v 5 Manyeni kugamba mhabwasi yoyose na msavu na mgubaguba, uko nako ni enga kuvika mahili, hegu mnt'hu yeyose ywa ivo haande na hant'hu kwo useuta wa Kilisito na Mnungu.
\v 6 Msekuzumila kudant'hilizwa ni mnt'hu kwa milosi ya uhezi, naho kwajili ye zimbuli enga izo maya ya Mnungu nayawezile wose wakulemela kumhuwila.
\p
\v 7 Ivo msekunda hamwenga na woho.
\v 8 Hadya nk'hongo mwandaga mwo lwiza, mna mwize mnde want'hu wa Mnungu, mmwo ung'azi, ivo mwaungwa kwikala viwagile want'hu wo ung'azi,
\v 9 kwaviya ung'azi wegala kila kint'hu chedi, no kutendigwa kunda wedi no ukindedi.
\v 10 Kombekeni kumanya yadya yakumuwagila Zumbe.
\v 11 Mnasekudamanya mbuli ziihile za mwo lwiza heziina wambizi wowose, vituhu vakwe zitendeni zimanyike kwa want'hu.
\v 12 Mbuli zikudamanywa kifiso ni want'hu hewe mmanyize Mnungu, zagela soni hata kuzisimuila
\v 13 Mna zimbuli zikudamanywa ho ung'azi, ikindedi chakwe chalavanywa,
\v 14 naho kila kiya kilavilizwe, kizangazwa. Ung'azi nuwo ukulaviliza kila kint'hu. Nivo vikuleka igambigwa, “Inuka weye ugonile, naho uuyuke, yehe mwenye Kilisito naakuzangazile.”
\p
\v 15 Mndilise na wengele mwo wikazi wenyu. Mse kwikala enga wabwalasi, vituhu vakwe mwikale enga wata umanyi.
\v 16 Mtendele vedi luneka mnanalo, kwaviya mazuwa aya yaihisa.
\v 17 Mse kunda wahezi, mna mgeze kuzungula kiya Mnungu akumuungani mdamanye.
\p
\v 18 Msekukolwa kwa mp'hombe, kwaviya neiwatendeni mdamanye mbuli ziihile haheina kumanya, mna mlongozwe ni Muye ywa Mnungu mwo wikazi wenyu.
\v 19 Simuileni kwa milosi ya zabuli ne mila, naho mumkemele Zumbe mila na zabuli kwa nt'hogola mwe mioyo yenyu.
\v 20 Mtogoleni Mnungu mazuwa yose kwa kila kint'hu, kwa sila ya zina dya Zumbe ywetu Yesu Kilisito.
\v 21 Kila yumwenga amtegeleze miyawe kwa kumtegeleza Kilisito.
\p
\v 22 Nyuwe wavele muwategeleze walume zenyu, enga kumtegeleza Zumbe.
\v 23 Kwaviya mgosi ana udahi kwa mkaziwe, enga viya Kilisito naye eli na udahi mwa want'hu wamhuwile. Naho niye Mlokozi wa want'hu wamhuwile Kilisito.
\v 24 Enga want'hu wamhuwile Kilisito ivo wakumtegeleza Kilisito, enga iivo wavele nao wawategeleze wagosi zawe mwe zimbuli zose.
\p
\v 25 Wagosi nanywe waungiseni wavele wenyu enga viya Kilisito awaungisaga want'hu wamhuwile, niyo aulava ugima wakwe kwajili yawe,
\v 26 vileke awasunt'he wamzumile Kilisito kwa mbuli ya Mnungu, akawatenda wahuwila wose wakukizwe kwa mazi na ulosi.
\v 27 Na ivo awatende want'hu wamhuwile Kilisito wande wakwe wakanda want'hu wa Mnungu, naho heweina malema, heena mabalo hegu usavu wowose.
\v 28 Ivo wagosi wawaungise wavele wawe enga viya wakuiungisa imili yawe, naho yeyose akumuungisa mkaziwe akeungisa yehe mwenye.
\v 29 Hakuna mnt'hu yeyose akuwiihiya umwili wakwe mwenye, vituhu vakwe awink'ha nk'hande na kuuvala suke. Ivo nivo Kilisito akudamanya kwa want'hu wose wamhuwile,
\v 30 kwaviya suwe ki vilungo vo mwili wakwe.
\v 31 “Kwaivo mgosi naamleke ise na nine, naalungane na mkaziwe, naho waidi awa nawande mwili umwenga.”
\p
\v 32 Hana kindedi kikefisile. Mna naona kugamba imbuli ino ni ya Kilisito na wahuwila wakwe wose.
\v 33 Mna naho aya ni ya nyuwe, kila mnume aungwa amuungise mkaziwe enga ivo akukeungisa mwenye, naho kila mvele aungwa kumtegeleza mgosiwe.
\c 6
\cl Mnango  6
\p
\v 1 Nyuwe wana, weveni welesi wenyu kwaviya nyuwe ni wa Zumbe, naho icho ni kint'hu cho uwagilwa.
\v 2 “Mtegeleze iso na nyokwe” (Ino niyo miko ya nk'hongo ine ndagano),
\v 3 vileke unde na uvikilwa mwo wikazi wako, naho wikale mazuwa mengi mwe isi.
\p
\v 4 Na nyuwe watate, mse kuwasogola wana wenyu mna waleleni enga ivo vikumwelela Zumbe kwa kuwakanya na mahinizo ya Zumbe.
\p
\v 5 Nyuwe watumwa, weveni wakulu wenyu aha he isi kwa wogofi na moyo wose, damanyeni ivo kwa moyo wedi vikuligana na kumdamanyila Kilisito.
\v 6 Naho msekudamanya du umwo wakamkaulani vileke muwelele want'hu, mna mwaungwa mdamanye kwa moyo, enga viya akuunga Mnungu, kwaviya nyuwe mwi watumwa wa Kilisito.
\v 7 Damanyeni ndima ya Zumbe kwa kinyemi, naho hiyo kwa kuwawagila want'hu.
\v 8 Kumbukileni kugamba yeyose akudamanya uwedi, ande mtumwa hegu mlekelwa, naahokele nt'hunyo ya Zumbe.
\p
\v 9 Nyuwe wakulu nanywe, damanyeni aayo kwa watumwa wenyu naho msekuwatisa. Mmanye kugamba nyuwe na watumwa wenyu nyose mwi wa uuyo mkulu yumwenga ywa kwe mbingu, akuwasengela wose haheina kwazagula.
\p
\v 10 Mnungu awenk'heni kutoga mwo kulungana na Zumbe naho kwa wambizi wo udahi wakwe.
\v 11 Kekakeni vitowanilo vose mkwink'higwa ni Mnungu, vileke mdahe kuzihuma zinyambi ziihile zo Mwavu.
\v 12 Kwaviya hakikuhigana na want'hu wa mwe isi, mna chahigana na useuta na udahi na wakulu we diziza idi, naho chahigana na mafyo ya mp'hepo ziihile mwe isi ye kimuye.
\v 13 Kwaivo, kekakeni vitowanilo vose mkwink'higwa ni Mnungu vileke mnde wadahi mwe dizuwa dyo wiihi dikeza kuwezilani naho mkabinda ayo yose, msigale mtogile.
\p
\v 14 Naho keikeni lumwe, naho mkekake ukindedi, unde enga mkoa mwe vigudi venyu, naho kutendigwa wedi kwenyu kunde enga nk'hindo mwe vifuwa venyu.
\v 15 No kumunk'wamunk'wa kubilikiza Mbuli Yedi yo utondowazi inde enga vilatu mwe viga venyu.
\v 16 Kwa kongezela, mhuwi unde enga nk'hindo mwe mikono yenyu, mdahe kuizima misale yo moto yo Mwavu.
\v 17 Hokeleni ukombolwa enga taji yenyu ye chuma, Ulosi wa Mnungu nawo unde sime mkwink'higwa ni Muye ywa Mnungu.
\v 18 Mlombezeni Mnungu mazuwa yose, mkamlombeza wambizi wakwe. Mnde mkamvika Mnungu kwa udahi wa Muye ywa Mnungu. Kwaivo kauliseni haheina kusokela mkawamlombezela Mnungu want'hu wose.
\v 19 Naho mnilombezele kwa Mnungu anink'he cho kulonga, nidahe kuwagambila want'hu ikinyele che Mbuli Yedi haheina wogofi.
\v 20 Miye ni msigiilwa ywa Mbuli Yedi, hamwenga na kugamba ivi haluse ni mwe divugailo. Lombezeni vileke ninde mdahi mwo kuibilikiza Mbuli Yedi enga ivo huungwa kuibilikiza.
\p
\v 21 Tukiko, ndugu yetu kikumuungisa, mtumwa mhuwilwa mwe kudamanya ndima ya Zumbe, naawagambileni zimbuli zangu zose vileke mmanye ivo nili.
\v 22 Namwigala kwenyu vileke mmanye zimbuli zetu naho awageleni moyo.
\p
\v 23 Utondowazi unde kwa wandugu na lukunde hamwenga na mhuw kulawa kwa Mnungu tate na Zumbe Yesu kilisito.
\v 24 Uwedi wa Mnungu unde na want'hu wose wakumuunga Zumbe ywetu Yesu Kilisito kwa lukunde holwiina uheelo.