ngp_reg/48-2CO.usfm

\id 2CO
\ide UTF-8
\h 2 Wakolinso
\toc1 2 Wakolinso
\toc2 2 Wakolinso
\toc3 2co
\mt 2 Wakolinso
\c 1
\cl Mnango 1
\p
\v 1 Miye Paulo mwigala ulosi ywa Yesu Kilisito, nitangwe ni Mnungu mwenye. Nihamwenga na ndugu yangu Timoseo chawegailani baluwa mwo mkowa wa Akaya. Chawegailani baluwa, want'hu wamhuwile Kilisito uko Kolinso, na want'hu wa Mnungu wose kila hant'hu uko kwo mkowa wa Akaya.
\v 2 Chawalombezelani kwa Mnungu Tati yetu na Zumbe ywetu Yesu Kilisito awenk'heni uwedi no utondowazi.
\p
\v 3 Atogolwe Mnungu, Ise dya Zumbe ywetu Yesu Kilisito, Tate mta mbazi, Mnungu akukink'ha kusangaala kwose.
\v 4 Akisangalaza suwe mwa makunt'ho yetu yose, vikukink'ha udahi wo kuwasangalaza want'hu watuhu mwe kila makunt'ho. Kwo kuwagela ludole ukudya suwe wenye kiuhokele kulawa kwa Mnungu.
\v 5 Suwe naswe niivo kikwingila mwa masulumizo ya Kilisito, iviyaiviya kombokela kwa Kilisito kusangalazwa kwetu kwanda kwingi.
\v 6 Uneva suwe chakunt'ha, inde chakunt'ha vileke nyuwe msangalazwe naho mkombolwe. Uneva suwe kikasangalazwa, nyuwe nanywe mwasangalazwa no kwink'hwa ludole lwo kufinyiliza makunt'ho naayadya suwe kikuyafinyiliza.
\v 7 Naivo makawiilo yetu mwa nyuwe yatoga kwaviya kimanya kugamba mnanda hamwenga na suwe mwa makunt'ho yetu, nomnde hamwenga na suwe iviyaiviya mwe kusangalazwa kwetu.
\p
\v 8 Wandugu zetu chaunga mmanye makunt'ho chapataga kudya kwo mkowa wa Asia. Makunt'ho nayanda makulu niyo chaona hakikudaha kufinyiliza, niyo chanda hakikukawiila kunda wagima, chamanyaga kugamba chabanika.
\v 9 Nekiva mwe mioyo yetu kugamba, enga kisengelwa kubanika. Mna aya yalaila vileke kisekukehuwila suwe wenye, mna kimhuwile Mnungu akuwauyula wabanike.
\v 10 Uyo akikombole mwe makunt'ho yo kubanika, naho nagendeele kukikombola, suwe kiika kukawiila kwetu mwakwe kugamba naakikombole naho.
\v 11 Nanywe mkachambiza mwo kulombeza kwenyu. Naivo kulombeza kwenyu kwingi kwajili yetu nokuhitulwe, kwaivo want'hu wengi nawenule maizwi yawe kumtogola Mnungu.
\p
\v 12 Suwe chakeduvya kwaviya: mioyo yetu heiina kiyangayanga yalonga uwona kugamba, kikala mwe isi ino, vitendese kwa kunda hamwenga na nyuwe kwa ujalamu na moyo wedi kink'higwe ni Mnungu. Hakilongozwe na mzungu wa mnt'hu ila kwa mbazi za Mnungu.
\v 13 Chawawandikilani yadya mkudaha kuyasoma na kuyakombaganya, nakawiila kugamba, nomkombaganye vedi,
\v 14 hata uneva nommanye ludodo. Kimanya kugamba mwe dizuwa dya Zumbe Yesu, nomndahe kukefenyela suwe, enga naswe ivo kikukefenyela nyuwe.
\p
\v 15 Handa ne dikawiilo idyo, aho nk'hongo nehinda na mizungu kuwatalamkilani, vileke mhokele uwedi wa Mnungu kaidi.
\v 16 Kwaviya nna mizungu ya kuwatalamkila umwo handa mwe utafi kuita kwo mkowa wa Makedonia, na mwo kuuya, vileke nipate wambizi kulawa kwenyu kwo utafi wangu wa Uyahudi.
\v 17 Haluse, umwo handa mwo mzungu uwo, hinda enga mnt'hu mta mahitu hitu? Hegu mwaona nadamanya kwa fanyanyi za kimnt'hu kugamba, “Heiye” na aaho kwa aaho nagamba “Bule”
\v 18 Mnungu ni mhuwilwa, makawiilo yangu kwenyu hayandile, “Heiye” Aaho naho nigambe “Bule”
\v 19 Kwaviya Yesu Kilisito mwana Mnungu, uyo andaga akabilikiza mwenyu, na kwa Siliwano, Timoseo na miye mwenye hiye ywo kugamba “Heiye” akajika naho, “Bule,” mna Yesu handile mnt'hu ywa “Heiye” na aaho aho ande mnt'hu ywa bule. Mna yehe mazuwa yose ni “Heiye” ya Mnungu.
\v 20 Kwaviya yadya yose alagane Mnungu ni “Heiye.” Kwa ivo, chagamba “Taile” kwa kwombokela Kilisito kwa kumwink'ha ukulu Mnungu.
\v 21 Ni Mnungu mwenye akukitenda suwe na nyuwe kukimala kitogile, mwo kulunganywa na Kilisito, naho niye akisagule suwe.
\v 22 Yehe akigeile kiwalo chakwe kugamba suwe ki want'hu wakwe, naho niye akink'hile Muye ywakwe Akukile mwe mioyo yetu, inde kilagiso kugamba vint'hu vose akiikile ni kindedi.
\p
\v 23 Mna Mnungu niye muwona ywangu, yehe kaumanya umoyo wangu, hizile naho Kolinso vileke niwageleni kinyulu.
\v 24 Hakikugeza kuwakant'hamizani mwo mhuwi wenyu. Kimanya kugamba mtoga mwo mhuwi, mna chadamanya ndima hamwenga na nyuwe kwa kinyemi chenyu.
\c 2
\cl Mnango 2
\p
\v 1 Ivo hiona nisekwiza kwenyu vituhu nnase kuwagela kinyulu.
\v 2 Kwaivo uneva nnawatendani mnde na kinyulu, niani anisangalaze, hiyo wadya nawageile kinyulu?
\v 3 Nivo vilekile hawegailani baluwa, hiungile kwiza kwenyu, no kugeligwa kinyulu ni wadya want'hu waungigwe kunda kinyemi changu. Nimwe kindedi kugamba nnanda na kinyemi, nanywe nomnde na kinyemi.
\v 4 Nehiwawandikilani aho nk'hongo handa na makunt'ho mengi na kinyulu mwo moyo, na masozi mengi, icho nehaunga hiyo kuwagelani kinyulu, mna ni kuwatenda mbunk'hule ivo lukunde lwangu lwili kwenyu.
\p
\v 5 Uneva mnt'hu kamgela mt'hu mtuhu kinyulu, hanigeile kinyulu miye du, mna kawageleni kinyulu nyuwe nyose, naho hikuunga kundilisa na maya.
\v 6 Usulumizo uwo enk'higwe ni want'hu wengi umkint'ha.
\v 7 Isigale nomkadaha kuyajala yadya adamanye, no kumsangalaza vileke msekunda na kinyulu niyo afa chevu.
\p
\v 8 Ivo nalombeza kwenyu kugamba, mlagiseni ivo mkumuungisa.
\v 9 Nawawandikilagani baluwa idya, Kwaviya naungaga kumanya ivo nomkadaha kwiva kwa kila mbuli.
\v 10 Uneva mnajala malema ya mnt'hu, name nayajala malema ya mnt'hu uyo. Naho uneva hajala malema ya mnt'hu uyo, nayajala malema ayo hameso ya Kilisito kwajili yenyu.
\v 11 Vileke kise kumwink'ha Mwavu luhenyo akidant'hilize, kwaviya kimanya upapala wakwe.
\p
\v 12 Nize nibule kwo mzi wa Toloa, kubilikiza Mbuli Yedi ya Kilisito, nehibwiila mnango ukomolwa kwajili ye indima ya Zumbe.
\v 13 Mna hikeivile vedi mwo moyo wangu, kwaviya nehinda na kiyanga yanga kwaviya hyamuwone Tito ndugu yangu. Nivo valekaga nawalaga wose na kuuya Makedonia.
\v 14 Mna Mnungu atogolwe yehe akukilongoza kunda wahumi mwo ludongo lukwanga uhumi wa Kilisito. Mnungu akitenda kiigendeze mbuli ye kindedi cha Kilisito enga mhemp'he kila hant'hu.
\v 15 Kwaviya kinda enga mhemp'he wo ubani uwo Kilisito akumlavila Mnungu, ukufunk'hizwa kwa wose wakuyokolwa, na wadya wa kwaga.
\v 16 Kwa wose wadya wakwaga ni mp'hofa ya file, mna kwa wose wadya wakuyokolwa, ni mhemp'he ukugela ugima. Niani elo akuunga ande mwe ndima enga iyo?
\v 17 Suwe hiyo enga wengi watuhu, wakuitendela yombe Mbuli ya Mnungu, suwe cha bilikiza Mbuli ya Mnungu mwe kindedi kwaviya kitumigwa ni Mnungu, kikanda kilunganywa mwa Kilisito.
\c 3
\cl Mnango 3
\p
\v 1 Togoleni, chakonga naho kukeduvya suwe wenye? Chaunga baluwa ya kuketambalisa kwenyu, hegu kulawa kwenyu enga watuhu?
\v 2 Nyuwe wenye mwi baluwa yetu iwandikwe mwe mioyo yetu, kila yumwenga aione na kuisoma.
\v 3 Imanyika kugamba nyuwe mwi baluwa ya Kilisito, aigale kwa mikono yetu. Ibaluwa yenye haiwandikwe kwa wino mna iwandikwa kwa Muye ywa Mnungu eli mgima. Haiwandikwe mwo luwe mna iwandikwa mwe mioyo ya want'hu.
\p
\v 4 Chalonga ivi kwa kukawiila kinanadyo kwa Mnungu kombokela kwa Kilisito.
\v 5 Hiyo kugamba chadaha kudamanya dyodyose kwa ludole lwetu, mna udahi wetu wose walawa kwa Mnungu.
\v 6 Naye niye akitendile kinde wandima we ndagano imp'ya, naho hiyo ndagano yo mwiko uwandikwe, mna kwa ndagano ya Muye ywa Mnungu. Kwaviya mwiko uwandikwe wegala file, mna Muye ywa Akukile wegala ugima.
\p
\v 7 Mwiko wawandikilagwa mwe vibesu va maiwe. Hamwenga na kugamba kwo uheelo wakwe unda file, naho ung'azi wakwe mkulu noukulisa hata wana wa Izilaeli wasekudaha kukaula kihanga cha Musa kwo ung'azi wakwe. Naho ung'azi uwo nounda wa lupisi du.
\v 8 Togoleni kiya kikudamanywa kwa sila ya Muye ywa Mnungu nekinde na ung'azi mkulu wa vivihi?
\v 9 Inanda zindima zikwigala file zina ukulu, togoleni, nezinde na ukulu wa vivihi zindima zikwigala ukombola!
\v 10 Ikindedi kiya chandile na ukulu aho kale, niyo chaza ukulu wakwe kwa mbuli ya ukulu utendese wizile
\v 11 Uneva kiya chandaga cho lupisi du chandaga na ung'azi wakwe, ikindedi kiya kikwikala ulo na ulo nekinde na ung'azi mkulu utendese!
\p
\v 12 Kwaviya idi nidyo dikawiilo dyetu, chalonga kwa weduvi mkulu.
\v 13 Suwe hiyo enga Musa akegubikaga kitambala mwo uso wakwe vileke Waizilaeli wase kuuona ung'azi wandaga ukagiila mp'halahole.
\v 14 Ubala wawe ugeligwa ubwalasi. Hata ivi dielo ikasomigwa indagano ya kale, kitambala icho kikei aaho. Kitambala icho nekiuswe du ukalungana na Kilisito.
\v 15 Hata dielo hohose hakusomigwa miko ya Musa, ubala wawe ukei ugubikwe.
\v 16 Mna umwo yeyose akamhitukila Zumbe, kitambala icho kimgubike chauswa.
\v 17 Haluse Zumbe niye Muye, naho hohose aho eli Muye ywa Mnungu, naho heli no ulekelwa.
\v 18 Haluse suwe wose vihanga vetu hevigubikwe, chanda enga kioo kikalagisa ukulu wa Zumbe, chahitulwa kikeige na uwo mliganyizo wakwe kwa ukulu ukulise. Iyo ni ndima ya Muye ywa Zumbe.
\c 4
\cl Mnango 4
\p
\v 1 Mnungu kwa mbazi zakwe, kakink'ha suwe indima ino kiidamanye, na ivo hakikuuya kunyuma.
\v 2 Kileka zimbuli zose ze kinyele na zikugela soni, hakikwikala naho kwa udant'hi hegu kwazaganya Mbuli ya Mnungu. Mna kwa kuulagisa ukindedi chakeika hasi ya ulamuzi wa want'hu haheina mahituhitu hameso ya Mnungu.
\v 3 Kwaviya uneva Mbuli Yedi kikubilikiza ikefisa, ikefisa kwa wadya wakwaga du.
\v 4 Hawakuhuwila kwaviya ubala wawe ugeligwa lwiza ni yudya Mwavu mnungu we isi ino. Wasekuona vedi ungazi we Mbuli Yedi ya ukulu wa Kilisito, uyo mliganyizo ukint'hile wa Mnungu.
\v 5 Kwaviya hakikuhungukilwa kukebilikiza suwe wenye, mna chambilikiza Yesu Kilisito uyo Zumbe, suwe wenye kikanda wandima wenyu kwa ajili ya Yesu.
\v 6 Mnungu uyo agambile, “Ung'azi umweke kulawa mwo lwiza!” Nu uuyo Mnungu akuimwekeza mioyo yetu, kukink'ha mmweko wo ung'azi wo ukulu wa Mnungu ukung'ala mwe kihanga cha Yesu Kilisito.
\p
\v 7 Haluse, suwe kine kindolo che kimuye, kinda enga nyungu za ulongo, vileke kilagise kugamba ludole ulo lukulu ni lwa Mnungu, hiyo lwe suwe.
\v 8 Mazuwa yose chakunt'ha, mna hakikukant'hamizwa, chanda na jakamoyo mna hakikuuya kunyuma,
\v 9 chakunt'ha mna hakikuswesa wambizi, naho hata kikakinywa hasi, mna hakomwa.
\v 10 Mazuwa yose chaiguha ifile ya Yesu mwe miili yetu yo kubanika, vileke ugima wakwe nao uonekele mwe mili yetu.
\v 11 Mwo wikazi wetu chadugana no kubanika mazuwa yose kwajili ya Yesu, vileke ugima wakwe ukaulwe mwe mili ino iyetu yo kubanika.
\v 12 Uku nuko kugamba, ukubanika kwadamanya ndima mndani mwetu, mna ugima wadamanya ndima mwenyu.
\p
\v 13 Mawandiko yakukile yagamba: “Hilonga kwaviya nehihuwila.” Naswe kikanda no mhuwi uuwo, chahuwila, naho kwaivo chalonga.
\v 14 Kimanya kugamba Mnungu uyo amuuyule Zumbe Yesu, naakiuyule naswe hamwenga na Yesu, no kukiika ho undiilo wakwe hamwenga na nyuwe.
\v 15 Yose aya ni kwa ajili yenyu, naho enga viya uwedi wa Mnungu ukuwabwiila want'hu wengi vitendese, nt'hogola nazo zongezekele vitendese, kwa ukulu wa Mnungu.
\p
\v 16 Kwaivo, hakikufa chevu, hata uneva mili yetu yasakala, mna muye wetu watendigwa uhya zuwa kwa zuwa.
\v 17 Makunt'ho aya kikupata madodo, ni ya lupisi du, mna yakink'ha ukulu ukuyajink'ha makawiilo yose, nt'hogola ya ulo na ulo.
\v 18 Kwaivo chakawiila kwa wengele hiyo kwa vint'hu vikukaulika, mna viya hevikuoneka, na viya vikuoneka vekela lupisi ludodo, mna viya hevikuoneka vekala mazuwa yose.
\c 5
\cl Mnango 5
\p
\v 1 Kwaviya kimanya kugamba, hakwikala ivi haluse aha he isi, umwili wetu, ukeza kubanangwa, Mnungu naakink'he nyumba akiikile lumwe uko kwe mbingu, nyumba ya ulo na ulo heidamanywe kwa mikono.
\v 2 Haluse mwa aya chalugumila, kukawiila kwa kunyemwa nyemwa kwink'higwa mili ya kwe mbingu,
\v 3 kwa kwink'higwa imili iyo hekioneke kunda kimbwigili.
\p
\v 4 Umwo kikekala mwo mwili uno we kimt'hu, chaila kwa makunt'ho. Hiyo kwa kuileka imili yo kubanika, mna chaunga kinde ne mili ya kwe mbingu, vileke mwili wo kubanika uhitulwe pele no ugima wa mazuwa yose.
\v 5 Mnungu mwenye niye akiikile lumwe mahitulo aya, naho kakink'ha Muye ywakwe Akukile kulagisa kindedi kwa yose yadya akiikile.
\p
\v 6 Ivo mazuwa yose mtoge. Kimanya kugamba, kwikala mwe mwili uno, ni kwikala hale na kwetu kaya na Zumbe.
\v 7 Kwaviya chekala kwa mhuwi, hiyo kwa yadya kikukaula.
\v 8 Mna kitoga, naho chaona ni vedi kusama nyumba ino yo mwili, kikasamile kwe nyumba yetu hamwenga na Zumbe.
\v 9 Kwa ivo chaunga kimuwagile Mnungu, kikanda mwe nyumba yetu aha he isi, hegu uko.
\v 10 Kwaviya suwe chose nekiungwe kukimala hameso ha Kilisito, kihokele usengelo kulawa kwakwe. Kila yumwenga naahokele kiya awagilwe kulawa mwa yadya adamanye umwo kikanda kikei mwe isi, yande yedi hegu yaihile.
\p
\v 11 Kwaviya kimanya kiya kikuugwa mwo kumwogoha Zumbe, naivo chakombeka kuwalangiliza watuhu. Mnungu akimanya pele, naho chakawiila kugamba miye name nomnimanye mwe mioyo yenyu.
\v 12 Hiyo kugamba chakehamp'hikiza kwenyu. Mna chawenk'hani luneka kukeduvya kwajili yetu, vileke mdahe kuwahitula wadya wakukeduvya, kwaivo wakuoneka kwa kuse, kujink'ha ivo weli kwe mioyo yawe.
\v 13 Uneva kikaoneka wahezi, ni kwa ajili ya Mnungu, mna inanda kiwabala, iyo ni kwajili ya kuwambiza nyuwe.
\v 14 Kwaviya chalongozwa nu lukunde lwa Kilisito, naho haluse chakombaganya kugamba, mnt'hu yumwenga abanikaga kwa ajili ya kila yumwenga, nuko kugamba wose kibanika hamwenga na yehe.
\v 15 Abanikaga kwa ajili ya want'hu wose, vileke wose wakwikala mwo ugima wasekunda wagima kwa kukehuwila wenye, mna kwa kumhuwila yehe abanike niyo auyulwa naho.
\p
\v 16 Kukongela ivi haluse, hakikugeza kumsengela yeyose, hamwenga na kugamba lupisi lumwenga chamgeza Kilisito kwa kimnt'hu mnt'hu, mna ivi haluse hakikumgeza ivo.
\v 17 Yeyose alungane na Yesu Kilisito kanda kiumbwa kihya, ya kale yomboka, kila kint'hu kinda kihya.
\v 18 Yano yose yadamanywa ni Mnungu. Yehe awavuzile kwakwe want'hu wavu, kwombokela Yesu Kilisito, niyo akink'ha suwe ndima yo kuwavuza watuhu nawo kwakwe.
\v 19 Ulosi wetu ni uno, Mnungu andaga akawatenda want'hu wose kunda wambuyaze kombokela kwa Yesu Kilisito. Mnungu haukaule wavu wawe, naho kakink'ha ulosi wa kuwatenda want'hu wande wambuyaze.
\v 20 Suwe kiwalotezi wa Kilisito, enga naho Mnungu mwenye akulonga na nyuwe. Kwa zina dya Kilisito chawalombezani mtendigwe kunda wambuya wa Mnungu.
\v 21 Yesu handaga mwavu, mna kwa ajili ya suwe Mnungu nakamtwika wavu wetu, mwo kulunganywa hamwenga naye kinde naye mwo uwagilwa wa Mnungu.
\c 6
\cl Mnango 6
\p
\v 1 Elo, kikanda wandima hamwenga na Mnungu chawaungani digeleko dya Mnungu kulawa kwa Mnungu disekwaga bule.
\v 2 Kwaviya Mnungu agamba, “Aho wize uunge wambizi nehikwiva, Mwe dizuwa dyo kukukombola, Nakwambizaga.” Tegelezeni! Ho ukombola wa Mnungu ni haluse.
\p
\v 3 Vileke kise kunda na nk'hindilo kwa yeyose mwe ndima yetu, hakikuunga kudamanya ivo vileke indima yetu isekukalalizwa.
\v 4 Mna mwe zimbuli zose kikudamanya chalagisa kugamba, suwe kiwandima wa Mnungu, mwo kufinyiliza kutendese mwa masulumizo yose, mwe makunt'ho na mwe maihi yose,
\v 5 kitoigwa, kivugailwa, nk'humbizi, kudamanya ndima ndala, naho nekiswesa ugono, na kuswesa nk'hande.
\v 6 Mwo uwedi, umanyi, mwo kufinyiliza, no ukise, kilagisa kugamba suwe kiwandima wa Mnungu, kwa Muye ywa Mnungu, na kwa lukunde lwetu lwa kindedi,
\v 7 kwo ulosi we kindedi, na kwo udahi wa Mnungu. Kuoneka kwetu hameso ya Mnungu kunda wawagilwa niyo int'hoanilo yetu, kulume na kumoso.
\v 8 Kikala lumwe kutunywa no kubeligwa, kwa kusezengwa na kutogolwa. Chagambigwa chadant'ha, kumbe chalonga kindedi,
\v 9 enga want'hu hewemanyike, mna kimanyika kwa want'hu wose, enga want'hu wabanike, mna enga ivi mkuona haluse chagendeela no ugima. Hamwenga na kusulumizwa mna hakikomigwe.
\v 10 Hata uneva kisulumizwa, hekibanike, hakikomigwe, hata uneva kina kinyulu mazuwa yose, mna kina kinyemi mazuwa yose, chaonwa kunda wakiwa, mna chawatenda want'hu wose kunda wagoli, wakikaula enga want'hu waswesile, mna kina kila kint'hu.
\p
\v 11 Wandugu zetu Wakolinso, kilonga kwa mioyo ikomolwe kwenyu, kiitende mioyo yetu inde ikomolwa pwilili.
\v 12 Uneva mwaona kuna nk'hindilo yoyose idya, nk'hindilo iyo ikwenyu nyuwe wenye, naho hiyo kwetu suwe.
\v 13 Haluse nalonga na nyuwe enga wanangu, kilagiseni kugamba Kikomoeleni mioyo yenyu enga ivo suwe kili.
\p
\v 14 Mse kutimilana na hewekuhuwila. Togoleni wedi no wavu vazumilana? Ungazi no lwiza vadaha vivihi kwila hamwenga?
\v 15 Kilisito na mwavu wadaha kuivana vivihi? Mhuwila aivana vivihi na hekuhuwila?
\v 16 Vadahika vivihi Nyumba ya Mnungu kunda ya mahili ya udant'hi? Kwaviya suwe kinyumba ya Mnungu. Saviya Mnungu mwenye alongile, “Nenidamanye wikazi wangu hamwenga na want'hu wangu naho nenikale mwawe, Neninde Mnungu nywawe akuvikwa ni want'hu, naho nawande want'hu wangu.”
\p
\v 17 Naivo Zumbe agamba, “Foseni mwawe, naho mkepagule kulawa mwawe, Msekudosa kint'hu kisavu, name neniwazumileni.
\v 18 Neninde Tati yenyu, naho nomnde wanangu wa kilume na wa kike,” ivi nivo akulonga Zumbe ywo Udahi.
\c 7
\cl Mnango 7
\p
\v 1 Wandugu zangu, kikanda kink'higwa zindagano izi zose, kikesunt'he na chochose kikudaha kugela usavu imili ne mioyo yetu kinde want'hu wa Mnungu na kwikala kwa kumwogoha Mnungu.
\p
\v 2 Kikomoeleni mioyo yenyu, hakitendile wiihi kwa mnt'hu yeyose, hakibanange chochose. Naho hahana kint'hu kiungile kulawa kwa yeyose kwa kumdant'hiliza.
\v 3 Hikuyalonga aya vileke niwageleni mwo usengelo, enga viya nalongile hadya nk'hongo, muwandugu zetu, naho kiwose mazuwa yose, kikanda wagima hegu hata mwo kubanika.
\v 4 Himanya nyuwe mkimala mtogile, nna wefenyi kwa ajili yenyu. Mwa makunt'ho yetu yose, nakeink'ha moyo, naho handa na kinyemi.
\p
\v 5 Hachahumulaga hata kize kibule Makedonia. Ntendelo zose nokunda na makunt'ho, kwandaga na nk'humbizi na want'hu watuhu, mwe mioyo yetu chandaga na wogofi.
\v 6 Mna Mnungu akuwasangalaza wasokele mioyo, kakisangalaza kwa kwiza kwakwe Tito.
\v 7 Hiko ukwiza kwakwe Tito du nuko kukisangalaze suwe, mna iviyaiviya ivo mumgeile moyo. Yehe kakigambila ivo mkuungisa kuniyona miye, kwa ivo mkunionela kinyulu, naivo mkuunga kunamila, mbuli ino inink'ha kinyemi kitendese.
\p
\v 8 Hata uneva baluwa yangu idya iwagelani kinyulu, hikuona nii nde na usungu kwa kuwaandikilani. Naona kugamba baluwa idya iwatenda mnde na kinyulu mna kwa lupisi.
\v 9 Haluse nna kinyemi, hiyo kwaviya mnda na kinyulu, mna kwaviya kinyulu chenyu kiwatendani mmuuiye Mnungu. Ivo Mnungu kawatendani mhitule sila zenyu kwa icho kinyulu, naivo suwe hakiwalumizeni kwa dyodyose.
\v 10 Kugamba mwe kinyulu icho Mnungu kegala uhituzi wo moyo ukwigala ukombola. Ivo hakuna chochose kikuleka kione usungu. Mna kinyulu che isi chegala file.
\v 11 Kauleni kiya kidamanywe ni Mnungu mwe kinyulu chenyu, mwakombeka kukelagisa hemwiina malema. Mna maya, mwazinduka, na kogoha, nna nk'hwina ya kuwona, kukombeka na kuwasulumiza waihi! Kwa kila sila mkelagisa wenye kugamba mkuka mwe mbuli iyo.
\v 12 Ivo hata uneva hiwawandikilani ibaluwa idya, neinda hiyo kwa yudya adamanye wiihi, hegu kwa yudya adamanyilwe. Nehiwandika vileke vimanyike pwilili hameso ya Mnungu kugamba mwakombekesa kwajili yetu.
\v 13 Nivo vikuleka nekisangalazwa vitendese. Hiyo kugamba nekigelwa moyo du, mna Tito nakakigela kinyemi kwa yadya yose mwambize kumsangalaza.
\v 14 Miye hiwatogolesa nyuwe hameso hakwe, naho mwe mbuli ino hamkigeile soni. Kilonga ikindedi kwenyu mazuwa yose, saiivo kukeduvya kwetu hameso ya Tito kunda mbuli ya kindedi.
\v 15 Naivo lukunde lwakwe kwenyu lugenyelesa, akakumbukila ivo nyuwe nyose mwadahile mkategeleza, na ivo mwamhokele kwa wogofi na kuzingiza.
\v 16 Nna kinyemi, kwaviya nadaha kuwahuwila kindedindedi kwa kila mbuli.
\c 8
\cl Mnango 8
\p
\v 1 Wandugu zangu chaunga mmanye, mageleko heyeiina maliho yadya Mnungu awenk'hile want'hu wamhuwile Kilisito wa Makedonia.
\v 2 Wahuwila wa kudya nawagezigwa vitendese kwa makunt'ho, mna kinyemi chawe nekinda kikulisa, no kongezekelesa mwo ukise wo kulava kwawe, hamwenga na kugamba nawanda wakiwa vitendese.
\v 3 Nadaha kulava uwona kugamba nawanda wakise kuligana no udahi wawe hata kujink'ha. Kwa kuunga kwawe wenye.
\v 4 Nawakilombezesa wenk'higwe luneka mwe mbuli yo uwedi uno, mwo kunda ndala mwo kuwambiza want'hu wa Mnungu uko Uyahudi.
\v 5 Ayo yajink'ha yadya nekikakawiila. Nk'hongo wakelava woho wenye kwa Zumb. Akajika naho kwa kuunga kwakwe Mnungu wakelava woho wenye kuchambiza suwe.
\v 6 Ivo kimgambila Tito yehe akongile indima ino kuigendeleza no kuwambizani kubindiliza indima ino kwa lukunde.
\v 7 Nyuwe mna kila kint'hu mwo mhuwi, mwo kulonga, no umanyi na kukombeka kose mwo kudamanya uwedi na lukunde lwenyu kwetu. Naivo chawakawiila mpate mbazi.
\p
\v 8 Hikuwalagiza, mna naunga du kulagisa wamwenga ivo wakukombeka kwambiza, vileke nimanye ivo lukunde lwenyu ivo lwili lwa kindedi.
\v 9 Kwaviya mmanya uwedi wa Zumbe ywetu Yesu Kilisito, ivo wili, kaketenda yehe mwenye kunda mkiwa, kwa kuwazungulani nyuwe, vileke awatendeni nyuwe kunda wagoli kwo ukiwa wakwe.
\v 10 Fanyanyi zangu ni kugamba, ni vedi vitendese, kwa nyuwe kubinda haluse kiya mkongile mwo mwaka womboke. Hiyo kugamba nomnda wank'hongo du kudamanya, mna ni hamwenga no kuunga kuidamanya.
\v 11 Mbindilize indima iyo, na kwaivo mkeikile lumwe kuunga kudamanya ivo, saiivo mkakeike lumwe kukint'hiza kuligana na ivo no mdahe.
\v 12 Uneva mwakombeka mwo kulava, Mnungu na azumile malavo yenyu mwa kiya mnt'hu ananacho, hiyo kiya mnt'hu henanacho.
\v 13 Hikuunga vinde kugamba wamwenga wande na kint'hu wamwenga nawo waswese, mna kwaungwa kunde na kuligana.
\v 14 Kwaviya ivi haluse mnanavo, nivo mkuungwa kuwambiza wadya wose heweina kint'hu, niho umwo mkanda hemwiina, watuhu wananavo nawawaambizeni, mwo kutenda ivi wose nawande waliganywa.
\v 15 Saviya enga ivo viwandikwe kugamba; “Yudya akuduganya vint'hu vingi, hananavo vikumkint'ha, na yudya akuduganya vigeke ananavo vikumkint'ha.”
\p
\v 16 Mna atogolwe Mnungu ageile nk'hwina mwo moyo wa Tito, nk'hwina izia nnanazo zo kuwambizani.
\v 17 Kazumila viya kimgambile, naho kwaviya ana nk'hwina kujink'ha ayo keza kwenyu kwa kuunga kwakwe mwenye.
\v 18 Nekimsigiila ndugu ywetu akuhuwiliswa ni want'hu wamhuwile Kilisito, hamwenga na Tito, kwa ivo akudamanya ndima yo kubilikiza Mbuli Yedi.
\v 19 Naho hiyo ivo du, mna kasagulwa ni mafyo ya want'hu wamhuwile Kilisito, kunda na suwe mwo uwedi uno wa kwigala undima uno kikudamanya kwaajili ya ukulu wa Zumbe na kulagisa ivo ivedi kikuunga.
\p
\v 20 Chanda na wengele kisekulabila mwe kukimaila kwetu mwo uwedi uno.
\v 21 Ukawiilo wetu hiyo kudamanya vedi kwa Mnungu du, mna iviya iviya mwa want'hu wose.
\v 22 Kwaviya chamwigala ndugu ywetu, kimgeza nk'hanana nyingi, na kumuwona nk'hanana zose aungisa kuwambizani, naho haluse kanihuwilisa kujink'ha hadya nk'hongo.
\v 23 Tito ni miyangu, naho chadamanya ndima hamwenga naye kwajili yenyu, mna mwa awo ndugu zetu watuhu wakwiza hamwenga nawo, awo ni wegala ulosi wa mafyo ya wahuwila wa Kilisito, ukulu unde kwa Kilisito.
\v 24 Ivo lagiseni ikindedi cho lukunde lwenyu kwawe hameso ya want'hu wamhuwile Kilisito, no kukeduvya kwetu kwajili yenyu.
\c 9
\cl Mnango 9
\p
\v 1 Haviihile hata hina waandikileni mwe mbuli yo wambizi wigalwe kwa wasuntilwa.
\v 2 Himanya kugamba mwaungisa kwambiza, naho hikeduvya kwajili yenyu hameso ya want'hu wa Makedonia, Nehigamba, “Wandugu zetu wa Akaya wakeika lumwe kulava kukongela mwaka womboke.” Kudya kukombeka kwenyu kuwasongeza want'hu wengi wa Akaya.
\v 3 Haluse nehiwegala wandugu awa vileke kukeduvya kwetu mwa nyuwe mwe mbuli ino kusekunda kwa milosi du, mna inde enga viya nilongile kugamba, nomkeike lumwe no wambizi wenyu.
\v 4 Kwa vovose, uneva want'hu kulawa Makedonia kinezanya niyo wawabwiilani kugamba hamkeikile lumwe, nekikeivise soni, hi mwe zisoni za nyuwe, mna kwa kudya kuwahuwilisa nyuwe.
\v 5 Ivo hiona kugamba neiungigwa kuwalombeza wandugu, wanilongoele, no kuika lumwe mwe digeleko dyenyu mgambile nomlave. Naivo neinde iikwa lumwe umwo habula, naho neilagise kugamba mwalava kwaviya mwaunga ukulava, hiyo kwaviya mgambigwa mlave.
\p
\v 6 Mkumbukile kugamba akuhanda mbeyu ngeke naalozole vigeke, yeyose akuhanda kwa mzungu naalozole uvikilwa.
\v 7 Kila mnt'hu alave enga viya akuona kunda ni vedi, kwa moyo hiyo kwa kutigizwa, kwaviya Mnungu awaunga wakulava kwa kinyemi.
\v 8 Naye Mnungu adaha kumink'hani nyuwe kujink'ha viya mkuunga, vileke mazuwa yose mnde navo viya mkuviunga, vikuwegusani, mdahe kwambiza mwe vingi kwa kila ndima yedi.
\v 9 Enga ivo iwandikwe: “Awenk'ha kwa ukise wadya heweina kint'hu, uwagilwa wakwe ni wa ulo na ulo.”
\p
\v 10 Naye Mnungu akuwenk'hani mbeyu zo kuhanda, ne mikate yo kudya naamink'heni naho mbeyu zose mkuziunga, naho naazitende zihote, zikule, no kweleka cheleko cha ugoli, kulawa mwo uwedi wenyu.
\v 11 Mazuwa yose naawenk'heni ugoli wa kwigusa, kuwatenda mnde wakise mazuwa yose, vileke awengi wamtogole Mnungu, kwa mageleko yenyu wakuyahokela kulawa kwetu.
\p
\v 12 Undima uno mkudamanya hiyo kuwegaila du want'hu wa Mnungu viya wakuviunga, mna iviyaiviya neinde watende want'hu kumtogola Mnungu.
\v 13 Kwajili yo wambizi mkudamanya, muwatenda, want'hu wamtogole Mnungu kwa uhuwilwa udya mnanao, na kukeiila kwenyu mwe Mbuli Yedi ya Kilisito, no udya ukise mnanawo kwa want'hu wose.
\v 14 Naho nawawavikileni nyuwe kwa moyo, kwajili yo udya uwedi, udya Mnungu amlagiseni.
\v 15 Kimtogole Mnungu kwo uwedi wakwe hakikudaha hata kuusimwiila ivo vikuwagilwa!
\c 10
\cl Mnango 10
\p
\v 1 Miye Paulo want'hu wamwenga wanigamba ni mkali umwo handa hale na nyuwe, mna ni mjalamu handa na nyuwe nt'humba na nt'humba kwe digeleko dya Mnungu no uwedi wa Kilisito.
\v 2 Kiya huunga kwenyu ni iki, msekunitenda ninde mkali Umwo heza, Kwaviya himanya kindedi kugamba nadaha kunda mkali kwa wadya wose wakugamba chekala kwa kulongozwa ni mbuli za mwe isi.
\v 3 Ni kindedi chekala mwe isi, mna hakikutoana nk'hondo enga want'hu we isi ivo wakutoana.
\v 4 Vitoanilo vetu va nk'hondo hiyo vitoanilo va kimnt'hu, mna ni vitoanilo va udahi wa Mnungu, kwaivo, chamola magomela, chabananga uhigani wo udant'hi,
\v 5 Naho chabananga weduvi wowose ukukeduvya na umanyi wa Mnungu, fanyanyi zose chazitaha na kuzitenda zimtegeleze Kilisito.
\v 6 Mnanda wakindedi, nekidahe kusulumiza kila mnt'hu heekwiva.
\p
\v 7 Nyuwe mwavikaula vint'hu kwa kuse du. Eyuko mnt'hu yeyose akukegamba yehe mnt'hu ywa Kilisito, mlekeni afanyanye mwenye kugamba enga viya yeye eli ywa Kilisito, suwe naswe nivo kili.
\v 8 Hikuona soni hata uneva hiketogolesa, mwo udahi udya kink'higwe ni Mnungu, kakink'ha udahi wa kuwazengani, hiyo kuwamolani.
\v 9 Hikuunga inde kugamba nawogofyani mwe zibaluwa zangu.
\v 10 Wamwenga wagamba, “Baluwa za Paulo zaluma naho zina milosi mikali, mna akanda hamwenga na suwe ni msokezi, naho milosi yakwe haina dyodyose.”
\v 11 Want'hu enga awo waungwa kumanya kugamba, yadya huwandika mwe zibaluwa handa hale na nyuwe, na yadya hulonga mwo mnomo kikandanya, yose ni yamwenga.
\p
\v 12 Kwa vovose hakikugeza kukeliganyiza na wadya wakuketogola woho wenye. Want'hu wakutenda woho wenye kunda kihimo cho kukehimila, wakeliganya woho wenye kwa wenye, awo ni wahezi.
\v 13 Wefenyi wetu haujink'hile kihimo, kukefenya kwetu nokunde mwe kihimo che ndima kink'higwe ni Mnungu, indima kikuidamanya hata kwenyu.
\v 14 Ivo hakijink'hile mwo widuvi wetu umwo chezaga kwenyu. Kwaviya ni suwe chandaga we nk'hongo kwiza kwenyu kuwegailani Mbuli Yedi ya Kilisito.
\p
\v 15 Hakikukefenyela ndima idya idamanywe ni want'hu watuhu kujink'ha kihimo kiya kink'higwe ni Mnungu. Mna chakawiila kugamba mhuwi wenyu nougenyele mwa nyuwe kwa viya akiikile Mnungu.
\v 16 Aho nekidahe kubilikiza Mbuli Yedi mwe ziisi zint'huhu hale na nyuwe, naho hiyo mbuli ya kukefenya kwa ndima idamanywe ni want'hu watuhu na kunt'hu kutuhu.
\v 17 “Mna yeyose akuunga kukefenya akefenye mwa yadya yadamanywe ni Zumbe.”
\p
\v 18 Kwaviya akuzumilwa hiyo yudya mnt'hu akukeona mwenye kugamba kazumilwa, mna ni yudya akuona ni Mnungu kugamba kazumilwa, uyo niye azumilwe.
\c 11
\cl Mnango 11
\p
\v 1 Finyilizeni ludodo kwajili yangu, hata uneva ni mhezi vihi. Finyilizeni du.
\v 2 Nawaonelani finju, enga ivo Mnungu akuwaonela, naho nalaganaga na nyuwe ndoza ya mgosi yumwenga du, uyo Yesu Kilisito.
\v 3 Mna nogoha kugamba ubala wenyu nouzaganywe kuuleka uhuwilwa wenyu we kindedi kwa Kilisito, enga ivo, dizoka kwo upapala wakwe dyamdant'hilizaga Hawa.
\v 4 Kwaviya kwa kinyemi mwamhokela mnt'hu yeyose akumiziilani, no kuwabilikiza mbuli ya Yesu mtuhu, hiye yudya Yesu kibilikize ulosi wakwe, naho mwazumila Muye na Mbuli Yedi na ulosi hewiligane na udya suwe kibilikize!
\v 5 Hangi uneva kugamba miye ni mdodo kwa dyodyose, mwa wadya wose wakwitangwa wegala ulosi wenyu wakulu.
\v 6 Vadahika hidahile kulonga, hina umanyi, kiitenda imanyike kwenyu mwo lupisi lwose, naho kwavovose.
\p
\v 7 Togoleni nehibalanga miye kweseleza vileke nyuwe mkwezwe, kwaviya nehiwabilikizani Mbuli Yedi ya Mnungu haheina kulihigwa?
\v 8 Umwo nandaga hadamanya ndima kwajili yenyu, nandaga haleligwa ni mafyo ya wahuwila wa Kilisito matuhu. Nadaha kugamba nawahokaga vint'hu vawe vileke niwadamanyilani ndima nyuwe.
\v 9 Naho umwo nandile na nyuwe, hyegame mwenyu haunga chochose. Wandugu zangu kulawa Makedonia nawakanigaila kila kia nehaunga. Nehinda na wengele vitendese nisekwegamila kwenyu kwa dyodyose diya, naho nenigendeele kutenda ivo.
\v 10 Kwe kia ikindedi cha Yesu Kilisito nnanacho, hehali yeyose akuunga anitende nisekukeduvya hant'hu hohose mwe Akaya.
\v 11 Nii? Kwaviya hiukuwangani? Mnungu kamanya kugamba namiungani.
\p
\v 12 Nanigendeele kudamanya kiya hudamanya ivi haluse, vileke wadya wakuzungula luneka wasekulupata, ludya luneka lwa kukeduvya kugamba wadamanya enga ivo suwe kikudamanya.
\v 13 Kwaviya want'hu awo ni wegala ulosi wo udant'hi, wakudamanya ndima kwa nyambi, wakukehitula woho wenye kunda enga wegala ulosi wa Kilisito.
\v 14 Na ivo hakikwehelwa kwaviya hata Mwavu mwenye adaha kukehitula no kunda enga watumigwa wo ung'azi.
\v 15 Elo uneva wandima wakwe wakehitula woho wenye kunda enga wandima we kindedi hiyo kint'hu cha kwahela, kwo uheelo nawahokele kiya kiwagilwe.
\p
\v 16 Navuzagiza: Ivo mnt'hu asekunigamba miye ni mhezi. Mna uneva mwagamba miye ni mhezi, nizumileni ludodo enga mhezi, vileke name ninde na kukeduvila ludodo.
\v 17 Naivo kiya hulonga ivi haluse, hiyo kiya Zumbe anilagize nilonge, mwe imbuli ino yo kukeduvya, kindedi nalonga enga mhezi.
\v 18 Kwaviya awengi wakukeduvila mbuli ze isi, miye name nenikeduvye.
\v 19 Nyuwe wenye muwabala, naivo kwa kinyemi mwafinyiliza hata awahezi.
\v 20 Naho mwafinyiliza hata mt'hu akuwatumagizani, akawatahani, akuwabelani, akuwasant'hulani vibao mwo uso.
\v 21 Nazumila kugamba nekindilisa wasokezi kuyadamanya ayo. Mna yeyose akugeza kukeduvila kint'hu, nalonga enga mnt'hu mhezi, miye name nakeduvya kwa icho.
\v 22 Woho Waibulania? Miye name ni Muibulania. Woho Wazilaeli? Hata miye ni Mzilaeli. Wowo ni welekwa wa Ibulahimu? Hata miye.
\v 23 Woho hi wandima wa Yesu Kilisito? (Nalonga enga mkilalu) Mna mtumwa ywedi kujink'ha woho. Hidamanyisa ndima, hivugailwa mwe mavugailo nk'hanana nyingi, hitoeswa, nk'hanana zose hinda hagihi no kubanika.
\v 24 Nkanana shano Wayahudi wanitoa ngoda milongo mitatu na kenda,
\v 25 Nkanana nt'hatu hitoigwa ni Walumi, naho hitoigwa maiwe nk'hanana imwenga, ngalawa yangu inivunikila nk'hanana nt'hatu mwa mazi, naho nezaga kunda mwa mazi kilo kimwenga na msi umwenga.
\v 26 Mwe zint'hambo zangu zinyingi nakaulagwa ni nk'hondo ya nk'hanana na wahoki, mwe nk'hondo ya Wayahudi na want'hu hi Wayahudi, nazungulukagwa na nk'hondo za mwe mizi, naho kwa makala yaihile, mwe bahali, naho nk'hondo yangu neinda kwa wambuya wadant'hi.
\v 27 Hidamanya ndima no kwangadika, nk'hanana nyingi hicheleza, sala na nk'hilu nehinda navo, nk'hanana nyingi nehafunga no kwikala mwe mp'heho hiina suke.
\v 28 Haheina kujala mbuli zimwenga nyingi, kila zuwa hitozigwa na ndima za mafyo ya wahuwila wa Kilisito yose.
\v 29 Yumwenga akanda hakudaha, name nanda hikudaha, uneva yumwenga anasaguka, moyo wangu waluma.
\p
\v 30 Uneva hakeduvya nakeduvya kwa vint'hu vikunilagisa ivo nisokele.
\v 31 Mnungu na Tati yakwe Zumbe Yesu, zina dyakwe neditogolwe ulo na ulo, yehe kamanya kugamba miye hikudant'ha.
\p
\v 32 Umwo nandaga Damesiki, mkulu we isi ehasi ya seuta Aletasi, aikaga wamizi mwe zink'hili zo mzi vileke wanigwile.
\v 33 Mna naselezelagwa mwe dilanga kwa mwo lukazi kwa gahu niyo namsumka.
\c 12
\cl Mnango 12
\p
\v 1 Nakeduvya hata uneva hina icho nenihokele mwo kukeduvya uko, mna neniwagambileni amaona no ugubulo, nink'higwe ni Zumbe.
\v 2 Miyaka mlongo na mine yomboke, kwandaga na yumwenga ywa Kilisito aguhagwa mpaka mbingu ya katatu, hikumanya kugamba, mnt'hu uyo aitaga no umwili wakwe, hegu aitaga kimp'heho, mna Mnungu kavimanya ivo.
\v 3 Navuzagiza kulonga, himmanya mnt'hu uyu kugamba egalagwa kulanga, naho hikumanya kugamba yandaga kindedi hegu wandaga vihi, Mnungu mwenye niye amanyize
\v 4 na uko evaga vint'hu va kinyele, ni vint'hu mnt'hu heekudaha kuvilonga.
\v 5 Kwaivo nakeduvila umnt'hu uyu, mna henikeduvye miye mwenye, mna nenikeduvye mwe viya vint'hu vikunilagisa usokezi wangu.
\v 6 Naungile kukeduvya, hegu hyandile mhezi kwaviya nenilonge kindedi, mna henikeduvye kwaviya hikuunga yeyose akaniona miye ni mkulu kujink'ha ivo akuniona, na ivo akuniva hulonga.
\v 7 Mna vileke ninde kuse yo kukeduvya kwe vint'hu ivingi nivione, higelwa miwa mwo mwili wangu, enga mtumigwa ywa Mwavu, anitumize no kuketenda nisekukeduvya.
\v 8 Namlombezaga Mnungu nk'hanana nt'hatu, mwa idi, no kumwiila adilave mwo mwili wangu.
\v 9 Mna uhituzi wakwe wandaga. “Uwedi wangu wakwigusa Kwaviya udahi wangu ukulisa umwo ukanda kusokela.” Naona kinyemi kukeduvila kwo usokezi wangu, vileke udahi wa Kilisito wikale mwangu.
\v 10 Miye neguswa ni usokezi, kuhomola, kukunt'ha, kusulumila, madala, kwa kumzungula Kilisito kwaviya umwo handa msokezi niho hunda no ludole.
\p
\v 11 Nehiketenda enga mhezi! Mna nyuwe ni nyuwe mkuleka handa ivo. Naho ni nyuwe nomkawagilwa mnitogole. Hata uneva miye hikint'hu, kwavovose miye hiyo mdodo kwa wegala ulosi wenyu wose wadya wakugambigwa wakulu.
\v 12 Vihungi vingi na mbuli za kweehela vikunilagisa kugamba miye ni mwigala ulosi vidamanywa mwenyu hamwenga no kufinyiliza kwingi.
\v 13 Nyuwe mhungukilwa kujink'ha want'hu wamhuwile Kilisito watuhu mna miye hiwazamileni. Nioneleni mbazi kwa idi!
\p
\v 14 Ino ni nk'hanana ya katatu kugamba hikeika lumwe kwiza kuwatalamkilani naho heninde nt'wika ya kwetwika kwenyu. Namiungani nyuwe hiyo matundu yenyu. Yakujink'ha ayo wana wadodo hiyo woho wo kuwambiza welesi mna welesi nao wakuungwa kuwambiza wana wawe wadodo.
\v 15 Neninde na kinyemi kutimila vose nnanavo, na miye mwenye, vileke nimuambizeni. Naho mniunge kwaviya miye namiungisani?
\p
\v 16 Nomzumile naho kugamba, hyamizamileni nyuwe. Wamwenga wagamba nehinda mbala na mmanyi.
\v 17 Togoleni nehiwadant'hilizani woho nawatumile kwenyu?
\v 18 Nihimlombeza Tito kwiza uko, nuyo namtumile na ndugu ywetu mtuhu, mhuwila ywa Kilisito hamwenga na yehe mwadaha kugamba Tito amidant'hilizagani? Miye na yehe hakidamanye hamwenga, mwa Muye Akukile?
\p
\v 19 Mwafanyanya mwadaha kugamba, suwe chakegombela mwa meso yenyu bule? Chalonga enga viya Kilisito akukikawiila kulonga mwo udahi wa Mnungu, naho kila kikudamanya ni kwa kuwambizani nyuwe.
\v 20 Nogoha kugamba heza kwiza aho, neniiwabwileni vituhu na viya nehaunga nyuwe mnde naho nomnione name kunda vituhu na viya nomkaunga ninde. Nogoha kugamba nenize nibwiile nk'humbizi na finju na maya no kukeunga nyuwe wenye du, kwinuilana mbuli no kutetana na weduvi.
\v 21 Nogoha kugamba heza kwiza naho Mnungu wangu naanitende kunda wa hasi mwa meso yenyu, naho nihongeze kwa wadya wengi wadamanyaga wavu aho nk'hongo hawaungile kweiila kwe zimbuli zawe ziihiye, no wavu wo uhabwasi.
\c 13
\cl Mnango 13
\p
\v 1 Ino ni nk'hanana ya katatu yangu kwiza kuwatalamkilakila. Mawandiko yagamba, “Kila longelezo dyaungwa ditalaulwe ha waona waidi hegu watatu na kugendeela.”
\v 2 Nehilonga kale kwa wadya wose watendaga wavu nk'hongo, haluse nalonga naho handa hale, wose wadya watendile wavu haheina kweiila, na wadya watuhu, heza kwiza heniwaonele mbazi.
\v 3 Kwaviya mwaunga mmanye kugamba Kilisito alonga kombokela miye. Umwo akawadamanyilani ndima, yehe hasokele, mna udahi wakwe wadamanya ndima mgati mwenyu.
\v 4 Kwaviya hata uneva awambagwa mwo msalaba kwajili yo usokezi, mna haluse ekala kwa udahi wa Mnungu. Suwe naswe kiwasokezi, mna nekikale naye kwa udahi wa Mnungu kwajili yenyu.
\p
\v 5 Kehimeni wenye mdahe kumanya kugamba mna mhuwi. Viya nyuwe hamanyize kugamba Yesu Kilisito emndani mwenyu? Uneva hiyo ivo nyuwe mdunduga pele.
\v 6 Mna nakawiila kugamba nyuwe mmanya kugamba suwe hakidunduge.
\v 7 Suwe chamlombeza Mnungu kugamba msekudamanya wavu wowose, hiyo kilagise kugamba suwe kiwant'hu wedi, mna mdahe kudamanya ayedi, hata kinaoneka kunda kihumigwe.
\v 8 Kwaviya hakikudaha kukihiga ikindedi, mna chekala mwe kindedi.
\v 9 Kwaviya suwe chelelwa kunda wasokezi, mna nyuwe mwi wadahi, naivo chalombeza kugamba mnde wakint'hile.
\v 10 Ivi nivo vikuleka nawa wandikilani ivi haluse handa hale na nyuwe, naivo heza kwiza uko, hikwiza kunda mkali kwenyu kwo udahi nink'higwe ni Zumbe, udahi wa kuwazengani, hiyo kuwakinyani.
\p
\v 11 Elo haluse wandugu zangu chalagana! Damanyeni zimbuli zenyu, tegelezeni yadya huwagambila, ivaneni, ikaleni kwa utondowazi, naye Mnungu wo lukunde no utondowazi naande hamwenga na nyuwe.
\v 12 Mkelamse kwa kilagiso cha lukunde lukukile.
\v 13 Want'hu wose wa Mnungu wa uku wawalamsani.
\v 14 Uwedi wa Zumbe Yesu Kilisito na lukunde lwa Mnungu no uhamwenga wa Muye ywa Mnungu nowikale na nyuwe nyose.