See in Reader
144 lines
14 KiB
Plaintext
144 lines
14 KiB
Plaintext
\id 1JN
|
||
\ide UTF-8
|
||
\h 1 Yoane
|
||
\toc1 1 Yoane
|
||
\toc2 1 Yoane
|
||
\toc3 1jn
|
||
\mt 1 Yoane
|
||
\c 1
|
||
\cl Andati 1
|
||
\p
|
||
\v 1 Amacwi anyini waraga ‘di le’jo lidi di ni dige, ezesi vu a re’dozo ri ni nga saa Andaa ni aa, ameri Andaa ni ama bi si, amande Andaa ni ama mi si: Andaa ni amandele rii pi ama elole ama di si rii.
|
||
\v 2 Ongu lidi ile lende kare ingwe aga, ama nde ra. Diadu ama sadenia na'i, amange anyini le’jo lidi lokore ku ri a ru ge anda olure Ata di, kudi adi e'detee amani rii.
|
||
\v 3 Nga ama ndele pi ama erile ri amangee anyini ayo dudu ke’be anyemuru ama to, lemu amadi ‘di niga, amemuru Ata to pi Ngwaa ni Yesu Kristu to.
|
||
\v 4 Ama cwi nga ‘di anyini saa e’bedu ama asi i’bwe kate dura.
|
||
\p
|
||
\v 5 ‘Di ofu anda ama erile Andaa di si rii, ongu ama ngee anyini rii: a’jo, Rubanga ni ingwe, ongu Andaa ni aga kare zi ini na alusa iyo.
|
||
\v 6 De ama’jo amemu ru Andaa to ti adi amalawe vu ini aga, ama enjo, kesuo gba ni iyo ama i'bu ni ga.
|
||
\v 7 Ti de amalawe ingwe aga, Andaa oluzo ingwe aga ri ani, amemuru kare aluga amaamani, pi eri Andaa Ngwa Yesu Kristu di saa kujwe ama enji tuwadu aga si.
|
||
\v 8 De ama’jo ama ‘ba enj ako rii, keso amalunjwa ama amangasi, pi, le’jo gba ama ‘aga iyo.
|
||
\v 9 Ti de amalu ama enji ra, Andaa ni kegeni ru wa pi anda, ama enji ni e’bere ga, pi ama ni jwere ga enji amadi niga si tuwadu.
|
||
\v 10 De ama’jo amenji kuru, ama’ba Rubanga ni enjo ga, pi saa kesuo le’jo anda ri iyo ama ‘aga.
|
||
\c 2
|
||
\cl Andat 2
|
||
\p
|
||
\v 1 Maa ‘bonji, macwi waraga ‘di anyini dudu anyede enji ku, ti de mo'di zi kede enji ra, amani mo'di edere amasi ama ni elokore ga ri aa Rubanga Ata anda ga. Andaa ni Yesu Kristu ni ovi anda ri'i.
|
||
\v 2 Ongu Andaa ni gba ri Andaa nga si olu bilo ngwa azile Rubanga ni ama enji si ri'i, te enji amadi si ku ti enji 'ba vu dige tuwadu ri di si.
|
||
\p
|
||
\v 3 Nga e'detere a'jo amani Andaa ni ra ri Andaa cara ri vu okoka 'i.
|
||
\v 4 Mo'di 'jore andaa ni Andaa ni ra ti oko Andaa cara ni vu ku ri enjo, le'jo gba ri andaa 'aga iyo.
|
||
\v 5 Ti mo'di Andaa le'jo ni vu okore ri gba gbadu lale Rubanga di o'biru ra andaa 'aga. Le'jo 'disi amate nikana gbadu a'jo ama Andaa ni 'aga.
|
||
\v 6 Mo'di 'jore a'jo andaa ni Rubanga ni aga ri dubasi le kalawe anda Yesu a lawezo ri ani.
|
||
\p
|
||
\v 7 Maa rozi, macwi anyini cara zi u'di na ku, ti cara oku anda anya oluzo to du ati eze rii. Cara oku ile le'jo anya erile ra ile 'i, ngele anyini ra ile 'i
|
||
\v 8 Kesu ileni saa, macwi anyini cara u'di, andaa ni gba Kristu di lele si pi anyidi lele si saa, a'dusiku vu ini kaca acaa, pi itu gba ri e'do vu 'jika ra.
|
||
\v 9 Mo'di 'jore andaa ni ingwe aga ti le adozi ri ku, kesuo andaa ni adi vu ini aga.
|
||
\v 10 Mo'di adozi ni lere ri kolu ingwe aga, laka nga zi 'bare 'ba ku'de du enji aga na iyo.
|
||
\v 11 Ti mo'di adozi ni lere ku ri adi vu ini aga pi kalawer vu ini aga, ni ku kare andaa kumu laka rii, a'dusi vu ini lu'bu andaa mi cwi.
|
||
\p
|
||
\v 12 Ma cwi waraga 'di anyini, anyi 'bonji ciri, a'dusi e'be anya enji ra Andaa ru si.
|
||
\v 13 Ma cwia anyini saa, anyi ata, a'dusi anyini mo'di anda eze si aa vu ni ti a re'donga ri ra. Ma cwia anyini yayi, a'dusiku anyizwa mo'di injwi ile ra. Ma cwi anyini ra anyi 'bonji, a'dusiku anyini Ata ni ra.
|
||
\v 14 Ma cwi anyini ra anyi ata, a'dusi anyini mo'di anda aa e'doru vu ni ti a re'donga ri ra. Ma cwi anyini ra anyi yayi, a'dusi anyi opko, le'jo Rubanga oli kolu anya 'a ga, ongu saa anyizwa mo'di injwi ile ra.
|
||
\p
|
||
\v 15 Anyile vu ku, kesu uga vu aga r'i saa. De mo'di kule vu ayo, kesuo lale Rubanga di 'a na ni aga iyo.
|
||
\v 16 A'dusuku nga tuwadu vu aga ri, kende vico ama ru di ama ni tizo to ri ani, pi vico injwi nga amadele ama ni si ri, ongu recuka nga amadi aa ama lidi ri ga re si, nga ovi 'dini 'di pi enga Ata di si ku, ti e'doruk'u vu dige 'dia.
|
||
\v 17 Vu koloko andaa vico to tuwadu ra, ti mo'di nga Rubanga a lele ayo ri ri edere ri kolu tadu.
|
||
\p
|
||
\v 18 Maa 'bonji, 'di diadu vu ri ti a lokoka. Anda a'jo anyini, ovire Kristu da kurucu kemu ra, ti diadu ovi'ba Kristu di evoki yaya du; 'di nga e'bere amaniye a'jo 'di andaa ni saa vu ni ti a lokozo ri'i.
|
||
\v 19 A'i nga k'u pi amadi si, a'dusiku esu andaa a'i 'ba amato r'u ku; kesu anda a'i 'ba amadi'i tebe 'dii enjaruk'u olure ga kare oluga amato ti ngaki pi amadi si dudu ke'dete ru kare ingwe aga a'jo a'i tuwadu 'ba amadi'i ku.
|
||
\v 20 Ti anyi'i, mo'di Okole ri efu anyi odu si ra, anyi tuwadu anyini nga ra.
|
||
\v 21 Ma cwi waraga 'di anyini anya nga gba ri ni nika kuru si ku, an'dusiku anyini ra, ongu enjo zi engare le'jo gba aga na iyo.
|
||
\v 22 A'di ni enjo ni? Mo'di enjo ri mo'di gare imgbe 'jore Yesu ni Kristu 'i ku rii. Ile andaa ni avire Kristu di'i, esuo andaa ga Ata pi Ngwa to imgbe.
|
||
\v 23 Mo'di iyo Ngwa gare mure olure Ata to na 'i. Mo'di ngwa ri a'ire ra ri kolu saa Ata to.
|
||
\v 24 Anye'be le'jo anya erile anda eze ile kolu anya 'aga. De le'jo anya erile eze ile kolu anya 'aga, anyi saa anyivo anyolu Ngwa 'aga pi Ata 'aga.
|
||
\v 25 'Di nga Andaa ecarale kele amani rii - andaa ni lidi lokoreku ri'i.
|
||
\p
|
||
\v 26 Ma cwi nga 'dipi anyini 'ba le'ba anyini legweka ri si.
|
||
\v 27 Ti anyini, odu Endi Okole ri di anda Kristu anyini efuzo ri kolu anya 'aga, e'bedu anyile mo'di zi ku anyini lenire ga. Rari odu Endi Okole di Andaa anyini efuzo ri keleni anyini nga tuwadu, pi Andaa ni gba, enjo laka iyo, ovidu Andaa anyini lenizo ri ani, anyolu Andaa 'aga.
|
||
\p
|
||
\v 28 Diadu 'ba, maa 'bonji, anyolu Andaa 'aga, e"bedu de Andaa kumu kelende ni saa, anyolu du asi opko to, dinja mu ko du anyi ku Andaa engwi nga.
|
||
\v 29 De anyi ni ra a'jo Andaa ovi anda, kulee anyini losdu a'jo mo'di alu alu nga anda ri ni edere ri kesuo Rubanga ti anda ri ni.
|
||
\c 3
|
||
\cl Andati 3
|
||
\p
|
||
\v 1 Adi anyinde ovi lale amgbugodu Ata a kele amani ri, amani lurungwezo 'boronji Rubanga di 'i rii, anda, ama gbadu ileni. E'be du vu ni ama ku, andaa Andaa ni nizo kuru ri ani.
|
||
\v 2 Maa rozi, diadu wo ama boronji Rubanga di'i, ovi amavo amoludu ri adi lende ku, ti amani ra de Kristu kumu kelende ni, ama saa amavo amelende Andaa ani, a'dusiku amavo amande Andaa ni kende Andaa oluzo ri ani.
|
||
\v 3 Ongu mo'di alu alu igeni 'di to lebire Kristu a ru ge ri'i kelemberu andaa nga si kolu pelere, ovidu Kristu a oluzo pelere ri ani
|
||
\v 4 Mo'di alu alu enji edere ri kesuo kungu cara, a'dusiku enji ri andaa ni cara nguka.
|
||
\v 5 Anyini ra a"jo Kristu ni anda emu enji 'dure ga pi, Andaa ni, aga Andaa ngasi enji iyo.
|
||
\v 6 Mo'di olure Andaa, aga ri olu enji ederega ku; mo'di olure enji edere ga ri kesuo nde Andaa ni kuru, ongu kesuo ni Andaa ni kuru.
|
||
\v 7 Maa 'boronji, anye'be mo'di zi kulunjwa anyi ku. Mo'di nga anda ri ni edere ayo ri, kesuo ovi na anda, kende Kristu a ovi oluzo anda ri ani.
|
||
\v 8 Mo'di olure enji edere ga ri kesuo andaa ni mo'di sitani di'i; a'dusiku sitani ni olu enji edere ga e'doru vu a re'donga. 'Di nga e'bere Ori Rubanga emudu ri'i, dudu kenji i'bu sitani di ra.
|
||
\v 9 Ma'di zi iyo Rubanga a tile ni ri kolu enji edere ga, a'dusiku ori Rubanga di kolu andaa 'aga; andaa du enji edere ga ku, a'dusiku kesuo Rubanga ti andaa ni ri.
|
||
\v 10 'Disi 'bonji Rubanga di pi 'bonji sitani di kelende laka: mo'di nga anda ri ni edere ayo ku ri andaa ni 'bura Runaga di'i ku, kesu mo'di adozi ni lere ku rii saa.
|
||
\p
|
||
\v 11 A'dusiku di lejo anya erile anda eze r'u, ajo kulee amaleru ama amani.
|
||
\v 12 Amolu kaiu ani ku, andaa ni anda Enjire ile a 'bura 'i, pi anda 'di adozi ni kpo. 'Di adozi ni kpo a'dusi? A'dusi nga tuwadu andaa edele ri esu injwi, ti nga tuwadu adozi a edele ri anda.
|
||
\v 13 Maa adinji, anya'u ku, de vu le anyi ku na 'i.
|
||
\v 14 Amani ra, amalaga da asi pi, ama diadu lidi aga, a'dusiku amaleru ama ad'unji si ndo. Mo'di le ako ri kesuo adi olu oda aga.
|
||
\v 15 Mo'di adozi ni evure ri andaa ni lo'di re, ongu anyini ra mo'di lo'di re ni aga lidi olure tadu ri iyo.
|
||
\v 16 'Di ke'be amani nga lale ru ge, a'dusiku Kristu ke Andaa lidi amasi. Ama saa kulee amazi ama lidi ama adiinji si.
|
||
\v 17 Ti dee mo'di limi vu dige ri to nja, kunde adozi ni vu a zwale ra na pi kule ikonyi keka laka ku, lale Rubanga di kolu mo'di ile a 'aga ingoni?
|
||
\v 18 Maa bonji, anyolu lale ti di si ku, ti anyile 'ba lale gba lendere i'buge si ri si.
|
||
\p
|
||
\v 19 'Di kumu ke'detee a'jo ama ni ra ama 'ba gba to rii ongu kumu kuke amani asi i'bwe Andaa anda ga ra.
|
||
\v 20 De ama asi kuli le'jo ama ruge a'jo le'jo zwa ama ra, ti amani ra Rubanga ni amgbu zwa ama asi ra, ongu ni nga tuwadu.
|
||
\v 21 Maa rozi, de ama asi li le'jo ama ruge ku amolu asidi ni opko to Rubanga anda ga.
|
||
\v 22 Ongu amesu nga tuwadu ama Andaa ni a'izo ri ra, a'dusi amoko Andaa cara ni vu ayo pi amede nga Andaa asi ni e'bwere ri'i.
|
||
\v 23 Andaa cara ni 'di'i, a'jo ama'i Andaa Ngwa ni Yesu Kristu a ru 'i, ongu amaleru amanga si amaama ni, ovidu anda Andaa amani ecarazo ri ani.
|
||
\v 24 Mo'di Rubanga a cara ni vu okore ayo ri kolu Rubanga 'aga, ongu Rubanga saa kolu andaa 'aga. Nga e'bere amaniye du Andaa kolu ama 'aga ri, Andaa Endi Okole ri ni ekeka amani ri si.
|
||
\c 4
|
||
\cl Andati 4
|
||
\p
|
||
\v 1 Maa rozi, anya'i endi tuwadu ku, ti adi anyo'bi a'i pa, anyinde du de a'i endi engare Rubanga di ri'i na'i, a'dusiku profetaa karako enjo ri acakii vokii vu dige tuwadu.
|
||
\v 2 Anyivo anyi ni Endii Rubanga di ovi 'disi, endi tuwadu 'jore Yesu Kristu ni anda emu ru 'badi to ri Endi Rubanga di'i
|
||
\v 3 ti endi le'jo ngere Yesu a ru ge ileni ku ri enga Rubanga di ku. Ile endi avire Kristu di anda anya erile a'jo kumu kemu ra ri'i, diadu wo aa vu diga.
|
||
\p
|
||
\v 4 Ma 'bonji, anyi 'bonji Rubanga di'i, anyizwa a'i wo ra; a'dusiku mo'di anya, aga ri amgbu zwa mo'di vu aga ri ra.
|
||
\v 5 'Ba ile a'i 'ba vu di'i ongu lo'jo'jo a'i a lu'jole ri lo'jo'jo vu di'i, vu saa keri a'i.
|
||
\v 6 Ama 'ba Rubanga di'i; mo'di Rubanga ni nire ra ri keri ama le'jo, ti mo'di Rubagna nire ku ri eri ama le'jo ku. Nga 'di ke'be amani du endi anda ri pi ni lele lapika endi enjo di ri to.
|
||
\p
|
||
\v 7 Ma rozi, kulee amaleru ama amani, a'dusiku le kenga Rubanga di si, pi mo'di 'ba lere ndo ri kesuo andaa ni 'bura Rubanga di'i pi ni Rubanga ni ra.
|
||
\v 8 Mo'di le ako ri, ni Rubanga ni ku, a'dusiku Rubanga ni le.
|
||
\v 9 Nga le Rubanga di ni e'dete re anda amani ri 'di, Rubanga ezwe Andaa 'bura alu papala ri vu diga ra dudu amolu lidi Andaa si.
|
||
\v 10 'Di andaa ni le, ama Rubanga ni leka am si ku, ti Andaa le ama ni, e'be Andaa ezwe Andaa Ngwa ni enji 'dure ga pi ama ruge si.
|
||
\v 11 Ma rozi, de Rubanga le ama ileni na, kulee ama saa amaleru ama amani.
|
||
\p
|
||
\v 12 Mo'di zi anda Rubanga ni ndere na iyo. De ameleru ama amani, Rubanga kolu ama 'aga, pi Andaa le kolu ama aga.
|
||
\v 13 Nga 'bare amaniye ama Andaa ni 'aga pi Andaa ni ama 'aga ri a'dusiku Andaa ke amani Endi Andaa di ra.
|
||
\v 14 Ongu saa amande ra, pi ama nge sadeni ra a'jo Rubanga Ata ezwe Andaa Ngwa ni olurega vu lorire.
|
||
\v 15 Mo'di a'ire a'jo Yesu ni 'Bura Rubanga di'i ri kesuo Rubanga kolu andaa 'aga, pi andaa ni saa Rubanga ni 'aga.
|
||
\v 16 'Di ke'be amani du le Rubanga di ama ruge, ongu ama'i ra Andaa le ama ra. Rubanga ri le, mo'di olure le aga kolu Rubanga 'aga, Rubanga saa kolu andaa 'aga.
|
||
\v 17 De ama le kuga de amolu asi opko to o'du le'jo lalizo ri ni nga, ovidu kende Yesu a oluzo ri ani, ama'i saa ile ovi amolu du vu 'di ni dige rii.
|
||
\v 18 Ori zi iyo le aga, ti de le kuga de kudo ori pi, a'dusiku ori kemu icandi lamgba di si. Mo'di orire ri kesuo le andaa di ga de kuru.
|
||
\v 19 Nga 'bare amolu le to ri esu atisi Andaa le ama ni.
|
||
\v 20 De mo'di zi ku'joo andaa le Rubanga ni ra, ti le adozi ni ku, andaa ni enjo; a'dusiku de mo'di le adozi ni andaa kunde runa misi ri ku, ate Rubanga ni andaa ru na ndele misi kuru ri ni leka ku.
|
||
\v 21 Amesu cara 'di Andaa di si a'jo: mo'di Rubanga ni lere ri kulee kule adozi ni saa.
|
||
\c 5
|
||
\cl Andati 5
|
||
\p
|
||
\v 1 Mo'di alu alu a'ire a'jo Yesu ni Kristu ni Rubanga a ovile ri'i ri andaa ni 'bura Rubanga di'i, ongu mo'di zi ata ni lere ri, kule andaa 'bura saa to.
|
||
\v 2 De amale Rubanga ri ra, ongu amoko Andaa cara ni vu 'i, 'di ku'ba amale 'bonji Rubanga di saa.
|
||
\v 3 A'dusiku Rubanga ni leka ni Andaa cara ni vu okoka. Ongu cara Andaa di angi ama dige ku.
|
||
\v 4 A'dusi mo'di alu alu Rubanga a tile ni ri kuzwa vu ra. Nga amazwa du vu ra ri ama a'i 'i.
|
||
\v 5 A'di'i adi kuzwa vu wa ri'i? Mo'di a'ire a'jo Yesu ni 'Bura Rubanga di'i ri'i.
|
||
\p
|
||
\v 6 Yesu Kristu ni mo'di anda emure iyi si pi eri si ri'i. Emu iyi si a'dule papala ku, ti emu iyi si pi eri si saa.
|
||
\v 7 Endi Okole ni sadeni, a'dusiku End Okole ni gba.
|
||
\v 8 'Disidu sadenia aa na: Endi Okole 'i, iyi pi eri to; a'i na 'di le'jo a'ia sadeni di emuru alu.
|
||
\v 9 De ama'i sadeni 'ba a ngele ri, sadeni Rubanga di amgbu zwa a'idi ra. 'Di sadeni Rubanga di'i, Andaa ngele Ngwa a ruge r'i.
|
||
\v 10 Ayosi mo'di Rubanga a Ngwa ni a'ire ri aa sadeni 'di to andaa 'aga andaa nga si. Mo'di Rubanga ni a'ire ku ri keco Rubanga ni enjo, a'dusiku kesuo andaa a'i sadeni Rubanga di Andaa ngele Andaa Ngwa a ruge ri kuru.
|
||
\v 11 Sadeni ile andaa ni 'di, a'jo Rubanga ke amani lidi lokore ku ri ra, ongu lidi 'di aa Andaa Ngwa ni 'aga.
|
||
\v 12 Mo'di Ngwa to ri aa lidi lokore ku ri to, mo'di Ngwa Rubanga di oko ri lidi oko.
|
||
\p
|
||
\v 13 Macwi le'jo 'di anyini, anyi 'ba ru Ngwa Rubanga di ni a'i'ba ri ni, dudu anyini a'jo anyi 'ba lidi lokore ku ri to rii.
|
||
\v 14 Nga 'bare amolu igeni to Andaa ru ge ri di 'i, de ama'i nga Andaa di si Andaa lale ni aga, Andaa keri ama elegi ra.
|
||
\v 15 Ongu de amani a'jo Andaa keri ama elegi, amaniye wo amesu nga ama a'ile Andaa di si ri ra.
|
||
\p
|
||
\v 16 De mo'di kunde adozi kede enji atere 'ba zire da aga ku r'i, kulee kelegi andaa si, pi Rubanga kumu kuke andaa ni lidi ra, a'i 'ba enji ede'ba ate da ni ku ri pi ni. Enji zi'ba aa kuzi 'ba da aga; ma'jo ku akelegi ovi enji ileni ri pi si.
|
||
\v 17 Le'jo ego tuwadu 'ba a edele ri enji, ti enji zi'ba aa zi mo'di da aga ku.
|
||
\v 18 Amani ra, mo'di Rubanga a tile ni ri olu enji edere ga ku. Ti mo'di Rubanga a tile ni ri kekuka andaa ru, pi mo'di enji di ile ede nga injwi andaa ni ku
|
||
\v 19 Amani ra ama 'bonji Rubanga di 'i, pi vu di ndutu avire a diga.
|
||
\v 20 Ti amani ra, Rubanga a Ngwa ni emu ra, pi eke ama ni nga dudu amani Andaa ni gba 'i rii. Ongu saa ama Andaa ni gba ri ni aga, Andaa Ngwa Yesu Kristu ni aga. 'Di Andaa ni Rubanga gba ri 'i, ongu 'di ayo lidi lokore ku ri 'i
|
||
\v 21 Maa 'bonji, anyekuka ru, anyiru nga 'ba a edele disi lungwele rubanga du ri ku.
|