\id JUD
\ide UTF-8
\h Yuda
\toc1 Yuda
\toc2 Yuda
\toc3 jud
\mt Yuda
\c 1
\cl Andati  1
\p
\v 1 Waraga ‘di enga Yuda ni i’bure Yesu Kristu di ri di ongu saa Yakobo adozi 'i ri'i. Acwi a'i 'ba Rubanga a lungwele ra ri ni, lele ndo Rubanga Ata ni aga, pi Yesu Kristu kumba tana pi ni ri ni.
\v 2 Kiza, i’bwe pi leto kulee kenjaru anyini.
\p
\v 3 Ma rozi ma lele ndo ri, esu mo’bi opkosi waraga cwizo anyini lari ama tuwadu amemuru laka ri a ruge, ti man’de duba amacwi amemba du anya asi dudu anyi’ja opkosi a’i anda kele ‘ba pelere Rubanga di ni vu alu papala le’jo tuwadu ekore ra ri si.
\v 4 A’dusiku ‘ba zi’ba torukii vuruvuruni anya lelega ra. 'Ba ile ovi a'i ra le'jo lizo a'ia dige. A'i 'ba Rubanga ru'ba ku rii, lufukii kiza Rubanga amadi di ecoru vico ru di injwi rii du, pi lekii ama Amba pi ama Opi Yesu Kristu ni ku.
\p
\v 5 Male amera anya di - kesu anda anyini nga 'di ra saa 'i - a'jo Rubanga anda lari 'ba ezi a'i pi Ejito ga si, ti 'di a vuga Andaa eko 'ba a'i'ba ku ri pi.
\v 6 Ongu saa anjeli a'ia kare a'ia mori di ni ekukare kuru, ti e'bekii kare a'idi a'ia olurega ri ra ripi Rubanga ombe a'i cwi 'bo'bodu nyori si vu ini tiri ri ni aga, kutekii le'jo lalika o'du amgbugo na dii.
\v 7 'Ba Sodoma di Gomora to pi ‘ba zi’ba rongo a’ia baraga rito, edeki asa pi asa injwi ovi ‘ba a edeleku rito, ali le’jo a’ia dige. 'Di ke'dete 'bani le'jo 'ba ali le'jo a'ia ruge icandi ndezo asi olure tadu ri si rii a ruge.
\v 8 Leti alu ri ani, ‘ba orobibi a lubile ile kendikii a’ia ru. Kugakii 'ba amba ni le'jo imgbe pi kulu'jokii le'jo injwi injwi anjeli ruge.
\p
\v 9 Ti Maikol ni anjeli ni di ri saa lele a'ia kipele ni ga pi larafurega sitani to Musa a rusi ri ‘da andaa ni kuru, ti ku’jo. “Opi ke’ja ny’i.”
\v 10 Ti ‘ba 'dipi kulu’da nga a’ia nile ku rii, pi nga a'ia nile ra ovi 'ba a nga nizo ri ani rii, kende anyukwa nga nika ku riani, nga 'dipi kenji a'i ni.
\p
\v 11 A’i icandi to! A'dusiku kokii leti Kaino dii, ongu fekii ezeze ‘amgbo to enji Balaamu di niga dudu a’i kesu nga. Odakii pi kipele Kora di ni aga. 
\v 12 'Ba 'dipi 'ba injwi rii anya lonya le di niga, kulunyakii nga anyito ori ako, a'i indi leyi loronya'ba ayo rii. Kolukii lofu iyi ako ri ani oli a lungile ri ani, a'i ayi ni kwe o'a ako ri ani, odakii vu ri, anju a'i pi.
\v 13 Kolukii saa iyi meri di ongare opkosi ri ani, ke'detekii a'ia dinja laangwe kende kefuto ani, a’i lelego lafere ri ani, Rubanga ede a'ia a kare vu ini tiri olure tadu ri niga.
\p
\v 14 Enoka ni mo’di namba tuderi engazo Adamu di si ri nge le'jo profeta ani a'ia ruge ku'jo, “Anyinde! Opi kemu ‘ba Andaa di okole karako to,
\v 15 Le’jo lalire ga ‘ba tuwadu dige, pi Andaa kemu ku'ba le’jo kuzwa ‘ba tuwadu Rubanga ni ori’ba ku a’ia nga edele Rubanga ni orizo du ku ri si, pi le’jo tuwadu anga di pi ‘angala di Rubanga ni arizo ku ri to a’ia lu’jole Andaa ruge rii
\v 16 A’i ile ‘ba olu’ba luzurega luzu pi ‘ba kipele di nga a’ia lele ayo ri ni vu oko’ba ayo r’u, kulu’joki le’jo recuzo ri ayo papala, kulu'jokii ‘ba zi’ba ni ru enjodu dudu a’i kesunga a’ia lele ri du.
\p
\v 17 Ti anyi ma rozi malele ndo ri, kulee anyera le’jo anda maju Opi amadi Yesu Kristu a ngele eze ri.
\v 18 And a’i nge anyini a’jo, “Saa ire vu niti a lokozo ri si ‘ba ngali di vo kolu ‘aa, kuvo kokokii nga a'i lele ayo Rubanga a lele ku ri a vu ‘i papala.
\v 19 ‘Ba ovi ileni ile keziki larapika, a’I ‘ba vu ‘di di’i. Endi Rubanga di iyo a’ito.
\p
\v 20 Ti anyi ma rozi, anyede opko anyo a’i okole ambamba ri ni aga, pi anyelegi Rubanga ni Endi Okole aga.
\v 21 Anyekukaru anyanga si le Rubanga di ni aga, pi anyite kiza ama Opi Yesu Kristu di kusa ko lidi lokore ku ri nig a.
\p
\v 22 Anyede kiza ‘ba di ruki’ba ki ri ni.
\v 23 Anyalari ‘ba zi’ba ileni ri pi, anyeku a’i pi asi ‘asi; anyede kiza ‘ba zi’ba ni orito, ongu saa anyiga bongu enji ru di laka ri imgbe.
\p
\v 24 Eku kolu mo’di atere anyi ni embare e’bedu anyi’de enji aga ku ri ni, ongu ‘bare anyate edeka enji ako Andaa eku ni andaga enji ako anjoto,
\v 25 Eku, amba, keri pi opko tuwadu to kolu Rubanga alu papala ri ni, Andaa ni amani larire Yesu Kristu Opi amadi si rii, e’doru esu adi abi vu kuru ri ni nga, esa ko diadu, pi ko tadu. Amen.