lsm-x-lugwe_reg/59-HEB.usfm

\id HEB
\ide UTF-8
\h AB’EBBULANIYA
\toc1 AB’EBBULANIYA
\toc2 AB’EBBULANIYA
\toc3 heb
\mt AB’EBBULANIYA
\c 1
\p
\v 1 Khale khale Weere kalomalomanga nende ba kuuka yefwe nabitira mu ba nabbi amakhabi mangi khandi mu ngira nyingi,
\v 2 ne mu ndaalo chimalirikha chino alomalomire nafwe nabitira mu mwana waye, omusikha yi kangala owe biitu byoosi, khandi yi kabitiramo khukakhola ebiitu byosi byoosi.
\v 3 Omwana oyo nje owulafu owekesa oluyaali lwa Weere khandi nje enfaani yaye yene, khandi nje olinda ebiitu byoosi okhubitira mu mboosi yaye eyamaani. Nikali namalire okhuwa okhulabisiwa khwe’bibi kekhala khu mukhono mulungi okwa simwana mukulu.
\p
\v 4 Sakira kasikala nasirala nakhiririsa ba malayika oluyaali nga wusa eritta khu lyasikhira nje lulikhira akaawe.
\v 5 Khuba nanu khu ba Malayika Weere yikawoolakho ati, “Oli mwana wange wo’wusyani; olwaleero nfukhire Bbaabbawo”? oba khandi nti, “Nja okhuba simwana, naye abe mwana wange musyani”?
\p
\v 6 Oba khandi ati, Weere naba aleta omwikulanda waye musyalo, awoola ati, “Bamalayika boosi aba Weere bamwinamire.”
\p
\v 7 Munomaloma khu bamalayika awoola ati, “Akhola bamalayika baba mbewo, Abapakasi baye baba ntambi che’miriro.”
\p
\v 8 Ne khu mwana awoola ati, “Esisaala syawo syo’wene’ngo, Oo Weere siribawo endaalo choosi, khandi owolerefu wuliba wo’khuwuka mu wene’ngo wawo.
\q
\v 9 Wadakha owulungifu khandi wasyuula enkhola ye’bibi; khulwesyo Weere, Weere wawo, akhuteye amukulu wabaasyo nga’khuchukhakho amafuta kesangaalo.”
\p
\v 10 Khandi awoola ati, “Mu njaka, Oo Omwami, watawo emisingi cho’khu syalo ne’chomukulu kwaba mulimo kwa makhono kawo.
\q
\v 11 Bino bicha okhuwawo, ne ewe odoηηa; biritandukha nge’nguwo.
\q
\v 12 Olibifumba nge’joora; nge enguwo birikalukhanisiwa. Ne’we osikala nasirala, khandi emyaka chawo sichiryakama.”
\p
\v 13 Malayika sina Weere yi kawoolakho ati, “Yikhala khu mukhono kwange mulungi okhwola lundikhola abasuku bawo baba siteeni sya’makulu kawo”?
\p
\v 14 Ba malayika boosi bayeresi bakholera mu myoyo abatumiwa akhuweeresa abo abalisikhira owuwoniya?
\c 2
\p
\v 1 Efwe khutekwa khweyongerakho okhutaayo omwooyo no’wegenderesa, nolwesyo, khwibyo bikhuwuliiye, kho khukhaye okhutabitulakho.
\v 2 Nisiba mbo owubakha walomwalomwa nende bamalayika wali wa masima, nende nawuli sinyasa nende esikhaya syafuna esiwonereso sikhoyeera,
\v 3 khulinyala khutye okhwewoniya nikhuba mbo sikhufwiiyeyo khu wuwoniya wa’maani nga owo? Okhuwonesewa khuno, okhwasokha okhulangirirwa no’mwami, khwakhakhasiwa yikhuli naabo abayiwulira nibomisa baati ya masima okhutula khuye.
\v 4 Weere yesi kajulira mu wuwonero, ebyekisa ne’bya mayiya, bitaasi nasirala, ne biyaanwa byo’mwoyo mwolerefu bikakaba olwo’khudakha khwaye.
\s Yesu Kakholewa Nga Bamwanaηηina.
\p
\v 5 Sisiri mbo ba malayika nje abacha okhutuka esyalo sicha, ambi nje sikhulomalomakho.
\v 6 Ne aliwo esifwo omutu akayeresera owujulisi ati: “Musaacha sina ewe yobasakho, omusyani wo’musaacha yofwakho lukali?
\q
\v 7 Wamukhola kabakho assi wabamalayika wutono; wamwambasa engule yo’luyaali nenfuma
\q
\v 8 khandi wata wuli siitu assi wamakulu kaye.” Mu khutta wuli siitu assi waye, Weere awuma sikalekha esitaasi assi wo’wunyala waye. Khu bikha bino khutawona ebiitu byoosi assi wo’wunyala waye.
\v 9 Naye khuwona Yesu, owakholewa okhuba assi wa ba malayika, wutono, wunanu owambasiwa engule yo’luyaali khandi ne’nfuma khulwokhuba kasandisiwa okhufwa, sakira khu lwe’sisa sya Weere sinyalikhe okhukhombakho khu khufwa khu lwa wuli mutu.
\p
\v 10 Mukhuletera abasyani bangi oluyaali, syali syolerera siiti Weere oyo, yisyatekekherwa khandi okhumubitiramo wuli siramu okhubawo, sikhoyerwa abe nje omwene omuchakirisi wo’khuwonesewa khwolerefu khwawe nga’bitiye mu khusaandisiwa.
\v 11 Byombi oyo okhola abaatu baaba bolerefu nende abo abakholewa baaba bolerefu bo baba benyumba ndala. Sakira Yesu syadiriwa nsoni okhubalanga bamwanaηηina.
\v 12 Awoola ati, “Nicha okhwatula eritta lyawo eyiri bamwanaama; mu lwichuye ese ndyemba enyembo ech’okhukhufumiya.”
\p
\v 13 Ni khandi, “nicha okhumutamo owesikwa.” Ni khandi, awoola ati, “mbano ndi ano, nabaana Weere bakambeye.”
\p
\v 14 Okhuba mbo abaana bali no’mubiri na’mabaanga, yesi kakabana nabo mu wulamu w’owuutu khu sibe nti okhubitira mu khufwa khwaye anyale okhumalawo oyo oli no’wunyala khu khufwa__ nje, setani__
\v 15 khandi anyale okhulekhula abadiriwa muwusibe olwo’wuti wawe olw’okhufwa.
\v 16 Mu masima sisiri mbo bamalayika nje bayeeda, ne siri khu bechukhulu ba Yibbulayimu.
\v 17 Khulwe’mboosi yino nje’syakira kakholewa okhufwana nende ba mwanaηηina mu ngira choosi, khu sinyalikhe abe owe’sisa khandi omwesikwa nga khawona mukhuluutu mberesa eyiri Weere, khandi khu bibi bya’baatu binyale okhubalekherwamo.
\v 18 Manu omwene khuba kasanda nikali nateemewa, ye anyala okhuyeeda abo ababitta mu khukhemewa.
\c 3
\p
\v 1 Nolwesyo, baana beefwe abolerefu, abakabana khu khulangiwa khwe’byo’mukulu, mute ebibibaaso byenywe khu Yesu, omutume khandi khawona mukhuluutu yikhutumbula.
\v 2 Kali mwesikwa eyiri oyo owamwangala, nga Musa lukali mwesikwa mu nyumba ya Weere yoosi.
\v 3 Yesu kakanirwe okhuba okhoyeera okhuweresewa oluyaali okhukhirakho Musa, ngo’omwombakhi we’nyumba lwaba no’luyaali lukhira enyumba yeene.
\v 4 Khuba wuli nyumba yombakhiwa no’mutu, ni Weere nje omwombakhi wa byoosi.
\v 5 Musa kali mwesikwa ngo’mukhosi mu nyumba ya Weere yoosi, ngajulira khu byali bicha okhulomwalomwakho mu ndaalo echicha.
\v 6 Naye Kurisito wa masima ngo’musyani olinda enyumba ya Weere. Khandi khuli enyumba yaye, nikhuba khwediiye khu wugumu khandi ne’suubi likhwe’simiramo.
\s Okhulawula Khu Owutafukirira.
\p
\v 7 Sakira, ngo’mwoyo mwolerefu nawoola ati: “olwaleero, nowulira ekono lyaye,
\v 8 mutomiya emyoyo chenywe nga lu mwakhola mu khediimo, mu bikha bimwali mukhemewa mu sibarara,
\v 9 bakuka yenywe yibankhemera khandi bangesakho khandi okhumala emyaka kane nibawona binakhola.
\p
\v 10 Nje esyakira nindirwa ettima na’baatu boluse olwo khandi nawoola nti, “Emyoyo chawe chikota wuli ludaalo, khandi sibakhirire okhumanya amakira kange.”
\p
\v 11 Sakira nalangirira ni nerayira mutima lyange nti, sibalingira mu sifwo ambulukhira.’”
\p
\v 12 Baana befwe musiwone muuti, awuma ata mulala khwinywe abali no’mwoyo mubi okutafukirira okukawukhana okhutula khu Weere mulamu.
\v 13 Ne mukumisaniye wuli ludaalo, khasita lulangiwa Olwaleero, awumewo ata mulala khwinywe owulirwa onyala komisiwa ne’bibi by’okhubachirisiwa omwoyo kwaye.
\v 14 Khwecha okhukabana mu Kurisito nikhuba mbo khwediira khwomirirakho okhwola khu njakamo no’wesikwa wu khwali nakhwo mukhuchaka.
\v 15 Nga lusyakhalomwalomwakho wusa siiti: “Olwaleero, nimuwulira ekono lyaye, mutomiya emyoyo chenywe nga lu mwakhola mu weddimo.”
\p
\v 16 Bali bananu abawulira manu bamala bediima? Sinje Musa bakatangirira nabatusa mu Misiri?
\v 17 Naye baatu si Weere ba kali nabo etima okhumala emyaka kane? Sinje abo abali nibasobisye, ne mibiri chaawe chakwa mu sibbarara?
\v 18 Khandi nanu Weere yikalayirira okhutengira yawulukhira, nisitali abo abamujemera?
\v 19 Wunanu khuwona khuuti sibanyala okhwingira, olwo’wutafukirira wawe.
\c 4
\p
\v 1 Nolweso, okhutula khu sisubiso sy’okhwingira mu khuwumula khwaye nsiisiriwo, manu khube begenderesa awumewo yeesi khwinywe owakaniwa nakwiye owutasingiramo.
\v 2 Khuba efwe fesi khubeye nikhuwulirwa enjiri, wusa bosi nga lubawulirwa; ne abayiwulira sibayita alala ne’nfukirira.
\v 3 Wunanu efwe abafukirira khwingira mu khuwumula nga wusa Weere khu kalomaloma ati, “Sakira nangirira ni nerayira mu tima lyange nti, ‘Sibalingira mu sifwo ambulukhira.’” Ne naye omulimo kwaye kakumala okhutula esyalo nisilongewa.
\v 4 Olwokhuba awutu andi kalomaloma khu ludaalo lwo musanfu mu mboosi chino: “Khandi khu ludaalo lwo’musanfu Weere kawumula emirimo chaye choosi.”
\p
\v 5 Khandi kameedakho mu siwandiiko amukulu awoola ati, “Sibalinyala ata okhwingira mu siwulukhiro syange.”
\p
\v 6 Sisikala siiti abandi balingira mu khuwulukha okhwo, nabo abo abawulira enjiri niyiwuulirwa yibali ni sibengira, khulwokhutawulira khwawe.
\v 7 Nolwesyo Weere khandi katekekha oludaalo lundi, kalulanga ati olwaleero, ne’nyumakho eyo ebikha nibibitirewo kalomaloma okhubitira mu Dawudi, nga lukali nawooye olwamberi ati: “Olwaleero, nimuwulira ekono lyaye, simwomyanga myoyo chenywe.”
\p
\v 8 Khuba siba syali mbo Yoswa kali abaweye okhuwumula, Weere syaba nikakhalomalomire olunyuma khu bidiira khu ludaalo lundi.
\v 9 Asikalawo, olwo, okhuwumula khwa sabbiti -khu lwa baatu ba Weere;
\v 10 khuba yeesi owingira mu khuwumula khwa Weere yesi awumula emirimo chaye omwene, nga wusa Weere lukakhola echaye.
\p
\v 11 Nolwesyo fwesi, khukhole esinyalikha okhwingira mu khuwumula okhwo, sibe mbo awumewo okwa na’londakirira enfwani yawe eyo’khutawulira.
\v 12 Khuba emboosi ya Weere namu khandi yikhola. Yokiya okhukhira ekhande lyo’woki oluwande -no’luwande, niringira lyola no’khukabaniyamo omwoyo no’wulamu, enyingo no’wujunjuni; ebibaaso ne’bikholwa byo’mwoyo.
\v 13 Awumewo syoosi esyalongewa esyakisiwa mu moni cha Weere. Wuli siitu sibikhuliwa syalekhewa alafu mu moni chaye yikhutekwa okhwekesa embalirira eya wuli situla.
\s Yesu Khawona Mukhuluutu Mu Boosi.
\p
\v 14 Nolwesyo, nga lukhuli nende khawona okhira mu boosi owacha okhubitira mukulu, Yesu omwana wa Weere, khwedire khwomirire khunfukirira yikhwaatula.
\v 15 Naye sikhuli nende khawona mukhuluutu otanyala khusasira no’khutuchunirwa no’wunafunafu wefwe, ne khuli noyo owakhemewa mu nawuli ngira, nga wusa fwesi lu khuli__ nende sikalikho ne’sibi.
\v 16 Manu khwolerere esisala syo’wene’ngo sye’sisa no’wugumu, sinyalikhe efwe okhwakana okhutukwira ne’sisa situyeede mu bikha byefwe ebyo’khudakhiramo.
\c 5
\p
\v 1 Wuli khawona mukhuluutu adolewa mu baatu khandi katumiwa okhubakhikhirira mu mboosi chidirana nende Weere, okhuwa ebiwaanwa ne’biwewayo olwe’bibi.
\v 2 Anyala okhudirana nabo abatamanyire kala nende abakota, khuba yesi omwene anyala kosewakho owunafu.
\v 3 Sino nje esikira yesi kawayo ebiwewayo khu lwe’bibi byaye omwene, nende khu lwe’bibi bya baatu.
\v 4 Awumewo oweewa oluyaali omwene; atekwa okhulangiwa nende Weere, wusa nga Aroni lukali.
\v 5 Manu Kurisito yeesi siketaakho omwene oluyaali olwokhuba khawona mukhuluutu. Ne Weere kamuwoola ati, “Oli mwana wange; olwaleero nekholire okhuba Bbaabbawo.”
\p
\v 6 Khandi awoola mu situndu sindi ati, “Oli khawona endaalo choosi mu ngeri ya Malikisadeki.”
\p
\v 7 Mu ndaalo Yesu nikali khu syalo, kewangayo mu khusaba nikekalikhira namaliro kamukulu namasika eyiri oyo owakhamununuye okhutula mu khufwa, khandi kawulirwa khulwokhuba kali mulonga mukhwewayo.
\v 8 Nende nikali mwana, keka okhuba omuwulise okhutula mu ngeri yikawonawoneramo
\v 9 khandi, nikakholewa omwolerefu kafukha ensulo y’owuwoniya khwa baatu boosi abamufukirira
\v 10 khandi kakhusiwa nende Weere okhuba khawona Mukhuluutu mu ngeri ya Malikisadeki. Okhulawula khu bakwa ni batula khunfukiirira
\p
\v 11 Khuli nende bingi bikhunyala okhulomaloma khusino naye khaba si syangu okhusinyonyola khulwokhuba muli beeki ba kaala.
\v 12 Mu masima, nende siri mbo mu bikha bino mukhoyire okhuba abekesa, mudakha omutu okhubasomesa ebisokherwakho byene ebya’masima ebidiira khu mboosi ya Weere khandi nga’beruula. Mudakha amabeere, si mere enyangalafu!
\v 13 Omutu yeesi naba nasiri khu mabeere, aba asiri mudoto, nga atoola okhumusomesa eby’owulungifu.
\v 14 Naye eby’okhulya byomeranu bya baatu bakhuluutu, abali namakesi akabakhola banyala okhwukawukhaniya ebirayi n’ebibi.
\c 6
\p
\v 1 Nolwesyo khukhoyire khulekhe ensomesa yichakirwakho khu bidiira khu Kurisito khuche khu byo’wukhuluutu, okhutataawo omusingi khandi okwokhweyolobya olwe’bikholwa ebituyira mu khufwa, nende eyenfukirira mu Weere,
\v 2 engeraka yo’khubatiisa, ey’okhubatakho amakhono, eyokhusyukhisiwa khwa bafu, nende okhukhengerwa mu wulamu wutaliwawo.
\v 3 Nende Weere nafukirira, khwicha okhusikhola.
\v 4 Sisinyalikha eyiri abo abalikho nibekesewa, abakhombakho esiyaanwa sy’omukulu, abakabanakho mwoyo mulafu,
\v 5 abakhombakho owulayi we’mboosi ya Weere, namaani ak’oluse lwicha,
\v 6 ni baba mbo bakwa entulo sisinyalikha okhukowosewa mu khusaba esirekhero, khulwokhuba mukhufwirwa sino baba bakhomerera omwana wa Weere wuyakha lundi khandi bamuta no’khumuwemula mu lwichuye.
\v 7 Esyalo sinywa mu nfula ni yiisikwakho khandi syewusa esirime syo’mugaso eyiri abo abakira syalimiwa sifuna enkhabi ewa Weere.
\v 8 Ne esyalo esiwula amaawa ne’nyaasi sisiri no’mugaso khandi siba mu khabi kh’okhukholimirwa. Mu njakamo sirisaambiwa.
\p
\v 9 Nende akhwakhalomaloma khuuti, abeecha abadakhwa, khwomisiwa olwe’biitu birayi khu lwenywe__ ebiitu bichaana n’okhuwonesewa.
\v 10 Weere syasosola; syalibirira emirimo chawo nokhudakha khu wamwekesa nga luwayeeda abaatu baye khandi nga luchanakana n’okhubayeeda.
\v 11 Khudakha wuli mulala khwinywe okhwekesa enkhola ndayi yino nasirala okhwola khunjakamo, kho esuubi lyenywe lyolerere.
\v 12 Sikhudakha enywe munafuwe, naye khwekeraniya abo okhubitira mu nfukirira no’khwesimirisa mukerame simwasubisiwa. Amasima kesisuubiso sya Weere.
\p
\v 13 Weere nikali nakhola esisuubiso syaye eyiri Yibbulayimu, khuba ali awuma owali namukhulira yaali kho amwelayire, kelayirira omwene,
\v 14 nawoola ati, “Mu masima ndikhuwa enkhabi khandi nakhuwa abechukhulu mu wungi.”
\v 15 Ne khandi mu khulinda no’khwesimirisa, Yibbulayimu kafuna sibamusuubisa.
\v 16 Abaatu belayira eyiri oyo obakhirakho, no’khulayira khukhakhasa esilomwalomirwe khandi syakamya okhuyingana khwoosi.
\v 17 Khu lwokhuba Weere kadakha okhukhola embeera yitakalukhana eyaye khulwaye nga njakhaafu eyiri abakerami bebyo ebyasuubisiwa, kasikhakhasa nesilayiro.
\v 18 Weere kakhola sino khusinyalikhe, okhubitira mu biitu bibiri ebitakalukhanisiwa ebitanyalikha Weere okhubacha, efwe aberukha okhwediira khu suubi eryatuweresewa kho khunyale okhugumisiwa okhwa’maani.
\v 19 Khuli ne’suubi lino nge sy’okhwesirakho esyo’mwoyo, no’womiifu nokhwerinda. Singira mu siwonekhera mukati w’esawo gumu eyiri emukongo wo’lutiimbe,
\v 20 eyo Yesu, yikatusokha okhucha, yikengira khu lwefwe. Yikolire okhuba khawona mukhuluutu endaalo choosi, mu ngeri ya Malikisadeki.
\c 7
\p
\v 1 Malikisadeki kali Omwene’ngo wa Salemu khandi khawona wa Weere owa’mukulu lukali. Kakanana nende Yibbulayimu nakowola natula yikali nakhirire abene’ngo khandi kamuwa enkhabi,
\v 2 khandi Yibbulayimu kamuwa sirala sy’ekhumi syawuli siitu. Okhusokha, eritta lyaye lyekesa, “Omwene’ngo wabolerefu;” nende lwosi, “Omwene’ngo wa Salemu” esyekesa “Omwenengo we’mirembe.”
\v 3 Owawuma Bbaabba oba Maama, owawuma ebimulomalomakho, awawuma enjaako che’ndaalo oba enjakamo cho’wulamu, ngo’mwaana wa Weere asikala khawona endaalo choosi.
\p
\v 4 Baasa wusa owukhunufu wukali nawo: nende kuka yefwe Yibbulayimu kamuwa sirala sye’khumi esya wuli siitu sikali nanyakire!”
\v 5 Wunanu elako lidakha abechukhulu ba Lefwi abali bakhawona okhusolosa sirala sy’ekhumi okhutula mu baatu__ nga nje, bamwanaηina__ nende syali mbo bamwanaηina bali bechukhulu okhutula mu Yibbulayimu.
\v 6 Omusaacha ono, nende syali siityo, sikali wo’lwiwulo lwa Lefwi, ate nga kasolosa sirala sye’khumi okhutula khu Yibbulayimu khandi kamuwa enkhabi oyo owali nali nende ebisubiso.
\v 7 Khandi owawuma okhukanakana omutu owaasi ngaweresewa enkhabi no’mukhira.
\v 8 Mu ngira ndala, sirala sy’ekhumi syasolosewa na’batu bafwa; ne khu luwande lundi, syasolosewanga noyo owalangirirwa okhuba mulamu.
\v 9 Omutu ate nga anyala okhuwoola ati Lefwi, ofukirirwa okhusolosa sirala sye’khumi, kasasula esy’ekhumi okhubitira mu Yibbulayimu,
\v 10 khu lwokhuba olwo Malikisadeki ni kakanana nende Yibbulayimu, Lefwi kali asiri mu mubiri kwa kukaηηene.
\s Yesu nga Malikisadeki
\p
\v 11 Nisiba mbo okhwolerera khwali wakhakaniwa okhubita mu wukhawona wa ba Lefwi (khu khwema khu malako akaweresewa abaatu), lwasi akhabayewo khandi okhudakha khawona wundi okhwicha__ mulala muntekekha yilonda eya Malikisadeki, okhulekha entekekha ya Arooni?
\v 12 Niwabawo enjuukha ya owaba khawona, atekwa okhubawo wosi enjuukha ya malako.
\v 13 Ye yi biitu bino bilomwalomwakho kali wolulyo olwali lyo’lulimi lukawukhanire, khandi ali awumawo omutu owali natula mu bo’lulimi olwa owali nikakhola khu Alutari,
\v 14 khuba syaalafu siiti Omwami wefwe katula mu lwiwulo lwa Yuda, khandi okhwema khu sikha esyo mu lulyo lwa Musa sikalomalomakho syoosi khu bakhawona.
\v 15 Khandi efwe sikhulomalomire khandi bikhirakhowo ni aba mbo khawona ofwana nga Malikisadeki awonekha,
\v 16 oyo oba nafukhire kaba khawona otaasi khu ngeraka yitali yentekekha yo’lulyo lwatulakho ne khu ntekekha eyo’wunyala ne yo’wulamu wutanyala khusaakuliwa.
\v 17 Khuba syalangirirwa siiti: “Oli khawona wo’luberera, mu ntekekha ya Malikisadeki.”
\p
\v 18 Elako lyatangira lyateewa khuntulo khulwo’khuba lyali nafu khandi nga sirigasa.
\v 19 (Khuba elako siryakhola syoosi syalungikhiwa), khandi esuubi erikhirakho lyaletewawo, mu’lyo litusudiya ambi nende Weere.
\p
\v 20 Khandi sisyali atali silayiro! Abandi bafukha bakhawona atali khulayira,
\v 21 ne kafukha khawona owali nalayire Weere nasimuwoye: “Omwami alayiiye khandi syalikalukhaniya esibaaso syaye: ‘Oli khawona endaalo choosi.’”
\p
\v 22 Khulwo khulayira khuno, Yesu asikaaye omusiiro kwenfukirisaniya yikhirakho.
\p
\v 23 Wunanu abeeyewo bakhawona abo bangi, khuba okhufwa khwabakayira okhuchiririra okhuba khu mirimo;
\v 24 ne khu lwokhuba Yesu abawo endaalo choosi, ali no’wu Khawona owutakama.
\v 25 Khulwesyo ye anyala okhuwoneserya erala abo abecha eyiri Weere nibamubitiramo, olwokhuba, aliwo olwokhubawoseresera endaalo chosi choosi.
\p
\v 26 Khawona oli atyo kolerera ebidinyu byefwe__ oyo omwolerefu, otalikho sibamwolobya, otalikho ekoondo, oli embesuule nabakholi be’bibi, ofumwa amukulu wekulu.
\v 27 Okhutakeraniya nende ba khawona bakhulutu bandi, si simudakhisa okhuwaayo ebiwanwa wuli ludaalo, okhusokha olwe’bibi byaye omwene, nende olwe’bibi bya’baatu. Kewayo nga siyaanwa khu lwe’bibi byawe lulala lwoηηene nga lu kewayo omwene.
\v 28 Khuba elako lidoola ba khawona bakhulutu abataali na’maani; ne’silayiro, esyecha elako niririwo, syadoola Omusyani oyo owaweresewa owolerefu endaalo choosi.
\c 8
\p
\v 1 Esyene sikhuwoola nje sino: Khuli nende oyo khawona mukhuluutu, owekhala khu mukhono mulungi khu sisaala syo’luyaali mukulu,
\v 2 khandi owereesa mu saawo, mu weema ya masima eyateewawo nO’mwami, si no’muutu.
\p
\v 3 Wuli khawona mukhuluutu adolewa okhuweresa ebiwanwa byombi nende ebiwewayo, khandi sakira syali sikhoyeera ono yeesi kaaba ne’siitu syoosi esyokhuwayo.
\v 4 Aba kali khu syalo, sikakhabeye khawona, khuba abaatu bo balikho abawayo ebiyanwa ebilomwalomwakho ne’lako.
\v 5 Bayereesa mu sawo sino nje okhufanana khandi esisiko syekesa ebiri mukulu. Sino nje esyakira Musa kalawulwa nikali ambi okhwombakha eyeema: “Okhoyiire osiwone oti okhola wuli siitu no’londakirira engeri yibakhukeranisiryamo noli khu lugulu.”
\v 6 Naye owuweresa Yesu wu kafuna wuli ngo’wukhulutu okhukhirakho owawe nge elako likayeresewa okhuba nga wamuwanda nga nje luliri amukulu we elako khale, khandi ebisubise byema khu musingi okwe’bisubiso bikhirawo.
\p
\v 7 Khuba nisiba mbo yiriwo esitali sibi ne’nsubisa yasookha, wakhawumirewo esifwo esikonyerwa owundi.
\v 8 Ne Weere kakaana ebisobyo na’baatu khandi Omwami alangirira ati: “Ebikha biri okhwicha, awola Omwaami, lundinkhola endakano mbyakha ne’nyumba ya Yisirayiri khandi ne’nyumba ya Yuda.
\q
\v 9 Sisiriba nga endakano yinakhola nende ba kuuka yawe lu nabawukula no’mukhono okhubatusa mu Misiri, khuba sibasikala nibali no’wesikwa mu ndakano yange, nakalukhana nabakhubba omukongo, nje awoola Omwami.
\q
\v 10 Yino nje endakano yinja okhukhola ne’nyumba ya Yisirayiri ebikha ebyo nibibitire, awoola Omwami. Nicha okhuta amalako kange mu bibaaso byawe khandi ngawandiike khu myoyo chawe. Ndiba Weere wawe, nabo baliba baatu bange.
\q
\v 11 Aliwumawo omutu olisomesa omusibiranire, oba omutu eyiri mwanaηηina, nawoola ati, ‘Manya Omwami,’ khulwokhuba boosi baliimanya, okhutula khu mutono mubo okhwoola khu obakhiramo.
\q
\v 12 Khuba ndibalekheramo owutali wolerefu wawe khandi sindichulisa ebibi byawe lundi.”
\p
\v 13 Olwokhulanga yino ndakano “Mbyakha,” akholire eyasokha okhukofula; khandi esikofuye sibe nga esinatere okhukotawo.
\c 9
\p
\v 1 Wunanu endakaano yasokha yalimo amalako ako’khwinamira nende ebifwo byolerefu ebyo’khu syalo.
\v 2 Eweema yateewa amakulu. Mu sisenge sisokha mwalimo esisindi sy’okhutakho etaara, emmesa no’mugaati Weere ku kawa nge siwanwa sirangiwa esyolorefu.
\v 3 Emukongo wo’luttimbe lwo’khubiri yaliyo esisenge sirangiwa esifwo esikhiramo owolerefu,
\v 4 esyali nende alitari yefwesa__ no’wubbani wuwikhekho owuwunya akhawowo khalayi nende Esanduku lye ndakaano. Lino Sanduku lyalimo emuka yefwesa ni yirimo emmanu, endawukhi ya Arooni eyasewukhakho amasaafu madoto, namakina kalikho amalako ke’ndakaano.
\v 5 Amukulu we’sanduku aliwo ebakerubbi bekesa oluyaali lwa Weere, nibabambuye embaya chikhingakira esifunikho sye’sifwo syo’khusasira. Ne sikhunyala okhukhubba embakha khu biitu binno mu wuleeyi wunanu wuno.
\p
\v 6 Wuli siitu nisyali syakhawa okhutekekhewa siiti, khawona bengiranga owutakonera mu sisenge syerwanyi okhukhola owuweresa wubatumiwa.
\v 7 Ne khawona mukhuluutu yeηηene nje owengiranga mu siseenge syo’mukati, khandi lulala mu mwaka, khandi owutakosa namabaanga, kakawangayo khulwaye omwene nende khu lwe’bibi bya baatu bi baliingi nibakholire mu wutamanya.
\v 8 Omwoyo mwolerefu kalingi kekesa khu lwa sino ati engira okhucha mu sifwo esikhiramo owolerefu syali sitoola okhwikulwawo olwokhuba eweema yamberi yali yisyemire.
\v 9 Sino nje esyo’khwekesa okhwola mu bikha bya wunanu, nga syekesa siiti ebiwanwa ne’biwewayo bibawangayo sibyali nibinyala byoosa okhutegeera khwo’mwekalikhiri.
\v 10 Byali syoηene olwe’mmere no’khunywa no’lwe’misiro cho’khwesaaba__ okhwe’rwanyi na’malako kabakholanga okhwola ebikha bye’bilagiro biyaakha.
\s Amabaanga ka Kurisito
\p
\v 11 Kurisito nikecha nga khawona mukhuluutu owe biitu birayi ebiri na ano, kabitira mu weema eyikhira khandi eyikhiririsa mu wolerefu eyitakholewa no’muutu, nje okhuwoola nti, sisirala khu byalongewa bino.
\v 12 Sikengira khu lwa mabaanga ke’mbusi oba akeηηombe ndaawo; naye kengira lulala mu sifwo sikhiramo owolerefu na’mabaanga kaye keene, namalire okhufuna owuwoniya owutaliwawo.
\v 13 Amabaanga ke’mbusi na’kensirusi nekokhe ly’emoosi nakawanyirwanga khwabo abataliingi bolerefu mu misiro balabisiwe siwonekhe nga balaba khumukulu.
\v 14 Amabaanga ka Kurisito kalyakaye, olwo, obitira mu mwoyo otafwa kewaayo omwene otalikho sibi syoosi khu Weere, kalabya ebibaaso bye’myoyo chefwe mu bikholwa bituyira mu khufwa, khu sinyalikhe efwe okhuweresa Weere mulamu!
\p
\v 15 Khulwe’mboosi yino Kurisito nje omukhubbaaniya w’elakano yakha, eyiri abo abalangiwa banyale okhufuna owulamu we’nsikhirano__ wunanu mbo atufwiririye nga esiwewayo khu sinyalikhe balekhuliwe mu bibi assi we’ndakano yasokha.
\v 16 Yi siraamo yisiri, sikhoyera okhukhakhasa enfwa eyoyo owasikhola,
\v 17 khuba esiraamo sibaawo omuutu nafwiye; sibasikholerakho omutu oyo owasikhola nasiri mulamu.
\v 18 Sino nje esikira nende elakano lyasokha niritatewa munkhola ataasi mabaanga.
\v 19 Ne Musa nikali namalire okhulangirira eyiri abaatu boosi ebilagiro koti lubiri mu malako, kawukula amabaanga ako’tumoosi, alala na’maachi, kawanya khu bitawo bya’malako nende khu baatu boosi nakhosesa owooya wekondi wufana mabaanga khumasaga kali khu lusala lwo mu Yisopu.
\v 20 Kawoola ati, “Kano nje amabaanga ke’ndakaano, Weere kabalagiiye okhulinda.”
\v 21 Mu ngira nasirala, kaanya amabaanga khu Sanduku nende khu wuli siitu syakhosewewanga khu mikholo.
\v 22 Masima, elako lidakha wuli siitu sikhosesewa okhulabisiwa na’mabaanga, khandi ataasi okhwidisiwa khwamabaanga awumawo okhulekherwamo.
\p
\v 23 Syali sikhoyera, olwo, okhwekeraniya ebyo’mukulu byalabisiwa ne’biwaanwa naye ebyo’mukulu wene bibe nebiwanwa ebikhirakho binno.
\v 24 Khuba Kurisito sikengira mu sifwo sikhiramo owolerefu esyakholwa omutu wutu, esyali wusa okhwekeraniya esifananyi sy’owikhalo wa masima weene; kengira mukulu lyene, wunanu awonekhana mu moni cha Weere khu lwefwe.
\v 25 Oba sikengira ekulu okhwewaayo khu lwaye khandi na khandi, engira khawona mukhulutu yi kengirangamo wuli mwaka namabaanga akatali kaye omwene.
\v 26 Olwo Kurisito kakhabeeye asanda mu biitu bingi okhutula khu khulongewa khwe syalo. Naye wunanu awonekhanire lulala khu lwa boosi khu njakamo ye bikha okhumalawo ebibi okhwewaayo nge’siwanwa omwene.
\v 27 Nga wuli mutu lwali wo’khufwa lulala, no’lunyuma keme okhukhengerwa omusaango,
\v 28 sakira Kurisito kawewaayo nge’siwanwa lulala okhumala khu bangi ebibi; khandi aliwonekhana ekhabi lyo’khubiri, si khu lwe’sibi, naye okhuleeta owuwoniya khu abo abamulindiririye.
\c 10
\p
\v 1 Elako liri wusa nga esisiko sye’biitu bingi ebiri okhwicha__ naye si masima keene. Khulwe’mboosi yino, sisinyalikha ata nawutono, okhubitira mu biwanwa bino nasirala okhulondwamo awuma okhulekherwa wuli mwaka no’kundi, okhukhola abaatu balabisiwa abo abasuda ambi no’khwekalikhira.
\v 2 Nisyakhabeye siityo, sibakhakamire okhuba nga bawangayo? Khuba abekalikhisi bakhabeye balabisiwa lulala lwoηηene, khandi sibakhawuliye nibewulira nga bali ne’sibi mu bibi byawe.
\v 3 Ne ebiwanwa ebyo sichuliso wuli mwaka olwe’bibi byawe,
\v 4 khulw’okhuba si sinyalikha amabaanga ka mawunwa nembusi okhumala khu baatu ebibi.
\p
\v 5 Sakira, olwo Kurisito nikecha mu syalo, kawoola ati: “Siwadakha ebiwanwa ne’biweresewa, naye omubiri kuwantekekhera ese;
\q
\v 6 ne’biwanwa bye’bisolo bisambiwa nibimalawo ebibi si wabisangalira.
\q
\v 7 Wunanu nawoola nti, ‘Mbano ndi ano__ syambandikiwakho mu bitawo__ Nichire okhukhola syodakha, Oo Weere.’”
\p
\v 8 Okhusokha kawoola ati, “Ebiwanwa nebiwewayo nende ebiwanwa bisambiwa siwabidakha, ata si wabisangalira.” (nende siri mbo elako lyadakha bikholewe.)
\v 9 Khandi kawoola ati, “Mbano ndi ano, nichire okhukhola okhudakha kwawo” Akowoosa esyasokha khuntulo katawo esyo’khubiri.
\v 10 Okhubitira mu khudakha khuno, khukholirwe okhuba abolerefu okhubitira mu siwanwa esy’omubiri kwa Yesu Kurisito lulala atasi khukowocholamo.
\p
\v 11 Endaalo choosi wuli khawona lukemanga okhukhola emirimo che’ddini; ebikha byoosi nga’waayo ebiwanwa nasirala, ebitanyala okhutusakho ebibi.
\v 12 Naye khawona ono nikawangayo esiwanwa sirala syoηηene khu lwe’bibi, kekhalanga khu mukhono mulungi okwa Weere.
\v 13 Okhutula olwo alindirira abasuku baye okhuteewa assi wa makulu kaye,
\v 14 khuba olwe’siwanwa sirala esyo, kamala okhulabya abo abali okhukholewa abolerefu endaalo choosi.
\v 15 Omwoyo mwolerefu yesi ajulira yikhuli khu bino. Okhusokha awoola ati:
\q
\v 16 “Yino nje endakano yindikhola nabo ebikha ebyo nibibitire, nje lwawoola Omaami. Ndita amalako kange mu Myoyo chawe, khandi ndikawandiika mu bibaaso byawe.”
\p
\v 17 Kamala kameeda ati: “ebibi byawe ne’bikholwa byawe ebikhalaka amalako sindibikhewulira.
\p
\v 18 Khandi bino yibyalekherwamo siwasiiri esiyanwa syoosi khulwe’sibi. Okhukhubbirisa khu khwesimirisa.
\p
\v 19 Nolwesyo, baana befwe, khasita khuli bagumu okhwingira mu sifwo esyolerefu esy’amukulu nga khu bitira mu mabaanga ka Yesu,
\v 20 okhubita khungira njakha khandi enamu eyatwikulirwa okhubitira mu luttimbe, nje omubiri kwaye,
\v 21 khandi khasita khuli nende khawona mukhulutu olinda enyumba ya Weere,
\v 22 khusude ambi nende Weere ne’myoyo cha masima echichuye enfukirira, nikhuli ne’myoyo echibakhirwekho chalabisiwa okhutula mu wuti we’bibi ne’mibiri chosewirwe na’maachi malafu.
\v 23 Khwediire atali khudengana mu nsubira khujulira, khuba oyo owatusubisa mwesikwa.
\v 24 Khandi kha khubaase nga lu khunayedane abeene nabeene nikhwekesa okhudakhana nebikholwa birayi.
\v 25 Khutawaamo omwoyo kwokhwewusanga alala, nga abandi lubali mu sambo yo’khusikhola, naye khugumisaniye__ khandi okhukhirira erala nga lu muwona oludaalo nga lulusuda ambi.
\p
\v 26 Ne nikhugenderera okhukhola ebibi ne’simiiniye nikhumalire okhufuna amakesi ka masima, awuma esiwanwa olwe’bibi esyadoηηa,
\v 27 naye syoηηene okhulindirira owutti w’okhusubira okhukhengerwa omusaango no’kuliro okwaηeηeera okulirya abasuku ba Weere.
\v 28 Oyo yeesi owakhaya elako lya Musa kafwa atali sisa mu wujjulisi owa babiri oba badatu.
\v 29 Osibasa otye omutu akhoyire awoneresewe okhwakaye oyo osenakiriye omwana wa Weere mu makulu, oba obisisye amabaanga akendakano eyamuwaayo nge siitu sitali esyolerefu, khandi oyo owanyeka omwoyo ow’esisa?
\v 30 Khuba khumumanyire oyo owawoola ati, “Siri yiindi okhusasula; njo’khusasula,” khandi no’lundi, “Omwami alikhengera abaatu baye.”
\v 31 Siitu syakhabi okhukwa mu makhono ka Weere mulamu.
\p
\v 32 Yichulisa echo ndaalo chiwali ni wafuna owulafu, niwali wemire khulwawo khu makulu kawo mubikhemo bisito ebyo’khukerana mu moni ch’ensaando.
\v 33 Ebikha bindi bakhunyekanga mu lwichuye khandi osandisiwa; khandi mu bikha bindi ni mwemire alala nabo bosi ababisiwanga baatyo.
\v 34 Wasasiranga abalingi mu jjera khandi wafukiriranga ne’nsangalo okhudiira nibayiiranga ebiitu byawo, khu lwokhuba mwamanya muuti enywe mwabeene mwali ne’biitu bikhira khandi eby’oluberera.
\v 35 Sakira mutasukuna owugumu wenywe; wicha okhubawa omusaara mukali.
\v 36 Mudakhiwa okhwesimirisa kho sinyalikhe mbo nimukholire Weere syadakha, mwicha okhufuna sikasubisa.
\v 37 Mu bikha wusa ebitono ebichayo, “Oyo oli okhwicha kecha khandi syacha okhukhinda.
\q
\v 38 Naye Omwolerefu wange acha okhubawo okhubitira munfukirira. Khandi nisiba mbo akowolerera enyuma, sindabe musangafu naye.
\p
\v 39 Naye efwe sikhuli khwabo abakowolerera enyuma khandi abamaliwawo, naye khuli khwabo abafukikirira khandi bawonesewa.
\c 11
\p
\v 1 Wunanu enfukirira yiri okhukhakhasiwa okhutula khu bikhusubira khandi khukhakhasa khwibyo bikhutawona.
\v 2 Sino nje abakhalekhale sibasemberwamo.
\v 3 Okhubitira mu nfukirira khutegeera khuuti esyalo syakholewa khulwe silagiro sya Weere, khusibe nti bibawona sibyakholewa okhutula mubiwonekha.
\p
\v 4 Olwe’nfukirira Abbiri kawa Weere esiwanwa esikhirakho owulayi khu sya Kayini sikawa. Okhubitira khunfukirira kakhakhasiwa ngo omutu mulungifu, nga Weere lukalomaloma birayi khu biwanwa byaye. Khandi olwenfukirira asilomwalomwakho nende kafwa.
\p
\v 5 Olwenfukirira Enoka kayiriwa okhutula mu wulamu wuno, khusinyalikhe okhutabita mukhufwa; nga syanyala khwakanikha, khulwokhuba Weere kali amuyirire. Natayiriwa, kakhakhasiwa okhuba mulala khu basangasa Weere.
\v 6 Khandi awuma enfukirira sisinyalikha okhusangasa Weere, khuba omutu yeesi owicha yaali atekwa okhufukirira ati aliwo khandi ati asasula abo abamukonya mu masima.
\p
\v 7 Olwe’nfukirira Nuwa, nibamulawula olwe’biitu ebyali nibitawonekha, mu khutya khwolerefu kombakha eryaato okhuwoniya edaala lyaye. Olwenfukirira yaye kakhengera esyalo khandi kaba omusikha wo’wulungifu owicha olwenfukirira.
\p
\v 8 Olwenfukirira Yibbulayimu, ni kalangiwa okhucha mu sifwo sikafunire olunyuma nga sye’nsikhirano, kafukirira kacha, nende syali mbo sikali namanyire yikali nacha.
\v 9 Olwenfukirira kakhola edaala lyaye mu sifwo sisubise ngo’muteende mu syalo sitali syaye; kamenya mu maweema, nga Yisaka nende Yakobo lu bakhola, abali abasikha naye abasubisiwa nasirala.
\v 10 Khuba kali alindiriye okhucha mu siko esye’misiingi, omutekekhi no’mwombakhi nje Weere.
\v 11 Olwenfukirira Yibbulayimu, nende kali abitiriiye mumyaka__ nende Saala omwene owali mukumba__ kanyalirwa okhuba Omwiwusi khulwokhuba kamuyira okhuba wamasima owali nakholire naye esisubiso.
\v 12 Nolwesyo okhutula khu musaacha mulala ono, khandi yee oli nga omulayi ngo’mufu, nje owatulamo abechukhulu mu wungi nga enηηiniηηini khwikulu khandi ng’omusenye kutabalikha okwo’khuntulo wenyanja.
\p
\v 13 Abaatu bano boosi bali basiri balamu olwenfukirira khu bamala bafwa. Sibamala bafuna ebiitu bibabasubisa; syoηηene babiwona khandi babisangalira ni balikho khanayiiro. Khandi bafukirira baati bali sirala khandi bateende khu syalo.
\v 14 Abaatu bawoola ebiitu bifaana biityo bekesa baati bali okhukonya esyalo esyawe khuwawe.
\v 15 Nisiba mbo bali babaasa khu syalo sibali nibalekha, bali bakhabeye nebikha byo’khukowolayo.
\v 16 Esifwo sya sino, bali bekomba okhucha mu syalo sikhirakho sino__ esifwo syo’mukulu. Nolwesyo Weere siwansoni okhulangiwa Weere wawe, khuba kabatekekhera bo esiko sikhuluutu.
\p
\v 17 Olwenfukirira Yibbulayimu, Weere ni kamukesakho, kawaayo Yisaka nge’siwanwa. Ye ngo’waali nafunire ebisubiso kali ambi okhwita omwana waye mulala khandi nga nje omusyani yeηηene,
\v 18 nende siri mbo Weere kali amuwooye ati, “Sinabitire mu Yisaka khu siwanwa syawo sinafukirirwe syamanyikha.”
\v 19 Yibbulayimu kayingana nawa ensonga ati Weere anyala okhusyukhisa abafu, khandi kataamo engacho, kafuna Yisaka kakowoola okhutula mu khufwa.
\p
\v 20 Olwenfukirira Yisaka kawa Yakobo nende Esau mu ngira yo’wulamu wawe wo’mu mooni.
\p
\v 21 Olwenfukirira Yakobo, nikali nafwa, kawa enkhabi mulala syamula khu basyani ba Yusufu, khandi kekalikhira nikesiiye khu ndawukhi yaye.
\v 22 Olwenfukirira Yusufu, nikali ambi okhufwa, kalomaloma khu lukendo lwabaana ba Yisirayiri nibatula Emisiri khandi karagira ebidiira khu makumba kaye.
\p
\v 23 Olwenfukirira abewusi ba Musa bamukisa okhumala emyeesi chidatu namalire okhwiwulwa, khuba bawona baati sikali wusa nga omwana owa wuli ludaalo, khandi sibali ni batya esilagiiro syo’mwenengo.
\v 24 Olwenfukirira Musa, nikali nakhulire, kakaana okhumanyikhana nga omwana wo’mukhana wa Falaawo.
\v 25 Kangalakho okhusandisiwa alala nabatu ba Weere okhukhira okhweyagalira mu masangaalo kesibi mu ndaalo ntono.
\v 26 Kangalakho ebye’nsoni khu lwa Kurisito olwo’mugaso kukhira ebyo’wuyiinda w’Emisiri, khulwokhuba kali kewunjire emutwe khu lwesiraawo syaye.
\v 27 Olwenfukirira katula mu Misiri nga syatya ettima lyo’mwenengo; kesimirisa khuba kamuwona oyo otawonekha.
\v 28 Olwenfukirira kalinda elako lyo’khubitakho nende eryo khuwanyakusa amabaanga, khu sibe mbo omwitti w’abaana bamberi akane okhunyala okhudiira khu baana bamberi ba Yisirayiri.
\p
\v 29 Olwenfukirira abaatu babita mu Nyanja ya mabanga nga bakenda khu syalo; ne aba Misiri ni bakesakho okhusikhola, bebira.
\p
\v 30 Olwenfukirira ebidda bya Yeriko byakwa, abaatu nibali bakhamala okhusyewodokhaniya okhumala endaalo musanfu.
\p
\v 31 Olwenfukirira omukhasi Malaya Rakhab, khulwo’khusangalira abakheeti, siketewa naabo abatali bawulise.
\p
\v 32 Khandi bingi sinna binyala nawoola? Sindi ne’bikha binyala nalomaloma khu Gidiyoni, Balaka, Samusooni, Yosofati, Dawudi, Samwiri nende ba Nabbi,
\v 33 bano okhubitira munfukirira baamba owenengo wungi, batayo enkhenga y’okhwakaniyakaniya, khandi bafuna amagoba khu byali byasubisiwa; aboola bekala eminwa chamaddalaηηi,
\v 34 basimiya ettima lye’miriro, khandi bawona owooki we’kikhande; owunafu wawe; wakalukhanisiwa waba amaani; khandi abecha bechusiwa amaani nibalwana khandi bakhira amaani ka basuku bateende.
\v 35 Abakhasi bakowoserwangayo abafu bawe, basyukhisiwa mu wulamu khandi. Abandi bakhubbwanga, balooberwa okhulekhuliwa khu sinyalikhe mbo okhwakana okhusyukhisiwa okhukhirakhowo.
\v 36 Abandi bamisyoolewa, baswanduliwa, kho khandi abandi bawoyewa khu njeegere khandi bayiriwa mu jjera.
\v 37 Bakhubbiwa amakina; bakhengwamo khabiri ne’misumeno; abandi batewa no’kukhande. Bakendanga nibambaye amaseero ka’makoondi, na’kembusi, nabatalikho ne’siitu syosi syoosi nibasandisiwa khandi bayiriwa wubi__
\v 38 esyalo bbe sisyali sibakhoyera. Bayikanaanga mu sibbarara mungulu, nende muηηungu no’mumeena kali muloba.
\p
\v 39 Bano boosi basimiwa olwenfukirira yawe, ata awumawo owafuna bikali nikasubisiwa.
\v 40 Weere kali katutekekhera esiitu esikhiramo owulayi kho sibe mbo syoηηene nibali alala nafwe sinyalikhe bakholewe okhuba abolerefu.
\c 12
\p
\v 1 Nolwesyo, nga lukhwawodokhanisiwa nende owungi wa bajjulisi bakhiraawo, khakhusukune era wuli siitu syoosi esikayira khandi esibi esitukachakachaniya muwangu, khandi khwirukhe no’khwesimirisa embiro echatutekherwa.
\v 2 Lekha khuute emooni cheefwe owutatemiya khu Yesu, omuchakirisi khandi omwoseresi wenfukirira yefwe, khu lwe’sangaalo kataawo mu mooni chaye kagumira omusalabba, kakhoomola ensoni, khandi kekhala assi khu mukhono mulungi okwe’sisala syo’wutuki wa Weere.
\p
\v 3 Baasa khuyo owagumira okhuyinganisiwa khwengeri eyo okhutula mu baatu bakholi be bibi, kho wiche okhaye okhuba omujoηηu no’khufwa omwoyo.
\v 4 Mu khulwanakana khwawo olwe’sibi, otoola ata okhuguna okhwola okhwidisa amabaanga kawo.
\v 5 Khandi wibiriye emboosi eyo’khukumiya eyibanjulayo nga abaana yiti: “Mwana wange, otasiyiranga okhukeraka khw’Omwami ngo’musaanyo, khandi otawaamo amaani nakhuwalabira,
\q
\v 6 khuba Omwami akololosa abo badakha, khandi kasandiya wuli mulala yafukirira ng’Omwana.”
\p
\v 7 Gumira ebidinyu ng’okololwa; Weere abayira nga abaana. Mwana si otakololwa nende simwana?
\v 8 Noba no’takololwa (Khuba wuli otula abita mu khu kololewa), wunanu muba muli baana berwaanyi khandi simuba nimuli abaana baye beene.
\v 9 Atenga efwe, fweesi khwali nende baseefwe bo’wuutu abatukololanga khandi khwabawanga oluyaali khu lwesyo. Khukhoyire okhuba balonga owaka yee eyiri sefwe we’myoyo cheefwe no’wulamu!
\v 10 Ba sefwe batukololanga efwe olwe’sikha sitono nga lu bawonanga baati sikhoyera; naye Weere atukolola khu lw’owulayi wefwe, khukhunyale okhukabanakho khu wolerefu waye.
\v 11 Awuma okhukololewa khuwonekhanga okhuba khw’esangaalo naye okhwowuchuuni. Olunyuma, nende siba siityo, khwiwula ekkesa lyo’wulungifu khandi emirembe eyiri abo ababitira mu khusomesewa nga okhwo.
\p
\v 12 Nolwesyo, mwomise amakhono kenywe mokoyo namakhumbo manafu.
\v 13 “Mukwalase amakira khulwa makulu kenywe,” khu sibe abalema bataba abatenyaala, naye abawonire. 
\s Okhulawula Khudiira Khu Khukaana Weere
\v 14 Mukhole syoosi esinyalikha okhumenya mu mirembe nabaatu boosi khandi okhuba abolerefu; atali owolerefu awumawo oliwona Omwami.
\v 15 Musiwone muuti awumawo omutu yeesi otafuna esisa sya Weere khandi awumewo omusi kwoosi mululu okukhula okhuleeta ebidinyu khandi okhwonona bangi.
\v 16 Muwone muuti awumawo omutu okhola owudaamba, otamanyire Weere nga Esawu, owakusa esideru sye’mere sirala kafwirwa owusikha waye ngo’mwaana musyani osookha.
\v 17 Olunyuma, nga lumumanyire, nikali nadakha okhusikhira enkhabi yino, kakhayiwa. Kali syanyala khuletawo engalukhaniya mu bibaaso, nende syali nti kali akoonya enkhabi yinno namokoosa amasika.
\p
\v 18 Siwichire khu lugulu olunyala lwadiriwakho khandi oluya no’muliro; mu sirema, okhwewunamira no’lukeka;
\v 19 khu turumbete yadulukha oba ekono ni rilomaloma emboosi echiri mbo abachiwulira basaba baati owumewo emboosi yindi eyilomwalomwa yameedewakho yibali,
\v 20 khuba sibali basinyala okhusigumikirisa esyali silagirwa siiti: “Nisiba mbo siti ata ensolo niyegeŋηa khu lugulu, yitekwa okhukhubiwa amakina.”
\v 21 Embonekha yali eyiitisya okhwola Musa lu kawoola ati, “Ndi khutenga no’wutti.”
\v 22 Naye wichire khu lugulu lwa Sayuuni, mu Yesrusalemu yo’mukulu, esiko sikhulutu esya Weere mulamu. Wichire eyiri enkhuŋana ch’esangaalo cha malifu na malifu ka bamalayika,
\v 23 mu nyumba ya Weere ey’Omwana wamberi, owa metta kawandikiwa mukulu. Wichire eyiri Weere, omulamusi wa baatu boosi, abakholewa abolerefu,
\v 24 eyiri Yesu omuyimbaani we’ndakano mbyakha, khandi khu mabaanga kabakhiwa akalomaloma emboosi yikhira amabaanga ka Abbiri.
\p
\v 25 Khola esinyalikha otakaana oyo olomaloma. Nisiba mbo sibeyiba nibamukanire oyo owabalawula khu syalo, khulikhola khutye, nikhuba mbo khumwekalukhaniyakho owatulawula okhutula mukulu?
\v 26 Okhutula mu bikha bira ekono lyaye lyadenganiya esyalo, ne wunanu atusubisise ati, “Khandi lundi, sinja khudenganiya esyalo syoŋηene naye ne’kulu lyosi.”
\v 27 Emboosi chino “khandi lundi,” chekesa okhutusawo ebyo ebinyala byadenganisiwa__ nje okhuwoola, ebiitu ebyalongewa__ khu sibe mbo ebyo ebitanyala khudenganisiwa binyale okhusiikala.
\v 28 Nolwesyo, khasita khuli okhwakaana owenengo wutanyala khudenganisiwa, khwekhoye khandi khwekalikhire Weere mu khufukirirwa no’wuloonga no’khutya,
\v 29 olwokhuba, “Weere weefwe muliro kusikhirisa.”
\c 13
\p
\v 1 Muchiririre no’khudakhana abeene khu beene nga’beekho.
\v 2 Mutebirira okhusangaasa abateende, khuba nimusikhola abo abandi basangaasa ba malayika ata nibatamanyire.
\v 3 Yichulisa abali mu wowowe oti fwana mwesi muli bawowe basyaawe, khandi abo abasandisiwa oti fwana mwesi mwabeene mwali musaanda.
\p
\v 4 Okhudekhesaniya khukhoyera okhuweresewa oluyaali nende boosi, khandi esitanda sye’rya sirindiwenge mu wukwalaafu, khuba Weere alikhengera abekombi na’baddaamba.
\v 5 Mwerinde okhutaba no’wekombi we’rubya khandi ebiitu bimuli nabyo bibamalenge, olwokhuba Weere awooye ati, “Sindibalekha; sindibasukuna.”
\p
\v 6 Sakira khuwoola no’wugumu khuuti, “Omwami nje omuyeedi wange; sinja khutya. Siina omuutu syanyala okhunkhola?”
\p
\v 7 Mwichulise abemeresi benywe, ababalomalomera emboosi ya Weere. Mubasekho ebitula mu wulamu wawe khandi mwekeraniye enfukirira yawe.
\v 8 Yesu Kurisito ali nasirala ekulo no’lwaleero ne’ndaalo choosi.
\v 9 Mutayiriwa ne’njekesa ngeni. Sirayi emyoyo chefwe okhwomisiwa ne’sisa, okhulekha ne’byokhulya ebye’mikholo, ebiwuma omugaso eyiri abo ababirya.
\p
\v 10 Khuli nende alutaari okhutula eyiri abo abaweresa mu weema yibakhatanyala balirakho.
\v 11 Khawona mukhulutu akinga amabaanga k’ebisolo kayira mu sifwo sikhiramo owolerefu nge’siwanwa sy’esibi, siwewaayo naye emibiri chisambiwa erwanyi w’eweema.
\v 12 Sakira Yesu yesi kasandira erwanyi wo’mulyango kwe’siko sikhulutu akhukhola abaatu babe bolerefu okhubitira mu mabaanga kaye omweene.
\p
\v 13 Nolwesyo, mulekhe efwe wunanu, khuche yaali erwanyi w’ekambi, khukinge okhuswala khu kakiinga.
\v 14 Khuba ano sikhuli ne’siko sikhuluutu, naye khuli okhukonya esiko sikhuluutu esicha okhwicha.
\p
\v 15 Okhubitira mu Yesu, nolwesyo, khakhwemeede okhuwayo eyiri Weere esiwanwa syo’khufumiya___ khu syaamo sye’minwa chitumbula eritta lyaye.
\p
\v 16 Khandi mutebiriranga okhukhola ebirayi nokhukabananga nabasyenywe, khuba mu khuwaayo khwe’ngeri eyo Weere asangala.
\p
\v 17 Muwulire abatangirisi benywe khandi mubatengemo oluyaali mu wunyala wawe. Olwo nje ababaliinda nga abo abaliwayo embalirira. Mubawulirenge kho banyale okhukhola emirimo chawe ne’sangalo, okhulekha okhuba emikuku, sino sisyakhaba sy’omugaso yimuli.
\p
\v 18 Mutusabirekho. Khumanyire khuuti khuli nebibaaso birayi khandi khudakha okhubaawo mu luyaali mu ngira choosi.
\v 19 Esse mbakhunuusa nimbakhubbirisa okhusaba kho sinyalikhe esse okhukowosewa yimuli khangu.
\p
\v 20 Manu Weere we’mirembe, oyo okhubita mu mabaanga ko’mundakano eyitaliwaawo, owasyukhisiwa okhutula mu bafu Omwami wefwe Yesu, omwayi mukhulutu wama’koondi,
\v 21 abakangise nende nawuli siitu sirayi olwokhukhola byadakha, anyale okhukhola mwifwe ebyo ebimusangasa yaali, okhubitira mu Yesu Kurisito, oluyaali lumuchire endaalo choosi. Amiina.
\p
\v 22 Baana befwe, mbakhubbirisa enywe mugumire emboosi yange y’okhubakhutira, khuba mbawandiikiye enywe ebbaruwa nyimbikiti yoηηene.
\p
\v 23 Ndakha musimanye muuti omwaana wefwe Temisewo bamalire okhumulekhuula. Nikoola ebikha byoosi, nicha okhwicha naye yimuli okhubawona.
\p
\v 24 Mukhese abatangirisi benywe nabaatu ba Weere boosi. Abo abatula Yitale babatumira amakheeso.
\p
\v 25 Esisa sibe nanywe mweesi.