lsm-x-lugwe_reg/48-2CO.usfm

\id 2CO
\ide UTF-8
\h 2ABAKKOLINSO
\toc1 2ABAKKOLINSO
\toc2 2ABAKKOLINSO
\toc3 2co
\mt 2ABAKKOLINSO
\c 1
\p
\v 1 Paulo, omutume wa Kurisito Yesu olwokhudakha khwa Weere, nende Timoseo omusyani wefwe, Eyiri e kanisa ya Weere mu Kkolinso, alala nende abolerefu boosi mu Akiya:
\v 2 Esisa nende emirembe bibe nanywe okhutula eyiri Weere Seefwe nende Omwami Yesu Kurisito.
\s Weere Owo’Khukumiya Khwoosi
\p
\v 3 Okhukiniya khube khu Weere khandi simwana w’Omwami wefwe Yesu Kurisito, Bbaabba owokhusasira khandi Weere owo’khugumya khwoosi,
\v 4 otukumya mu Wudinyu weefwe woosi, kho khukumye abo boosi abali muwudinyu nende okhukumya efwe abene nabeene khu khwafuna okhutula eyiri Weere.
\v 5 Olwokhuba wusa nga okhusanda khwa Kurisito nga nikhwiidikha mu wulamu wefwe, khuutyo khwoosi okhubitira mu Kurisito okhukumya khwefwe nje lukhwiidikha.
\v 6 Nikhuba ni khuchunisiwa, siba sikumya no’khuwonesewa khwenywe; nikhukumisiwa, khuba khukumya khwenywe, esiiwula mwinywe okhwesimiirisa owukumu owokhusanda fwesi khu khusanda.
\v 7 Khandi esuubi lyefwe mwinywe lyomiifu, olwokhuba khumanyire wusa khuuti nga nimukabana mu khusanda khwefwe, mutyo lwosi mukabana mu khukumya khwefwe.
\p
\v 8 Sikhudakha mube nimutamanyire, baana befwe, ebidiira khu wudinyu wu khwasandisiwa mu syalo sya Asiya. Khwali mu wudinyu owamaani, lukali lwene okhukhira amaani kefwe akanyalira okhwesimirisa, khwola nende okhwekaana owulamu.
\v 9 Masima kene, mu myoyo chefwe khwabaasa khuuti khukhengeeywe okhufwa. Naye sinno syakholekha kho khukhaye okhwesika amaani kefwe naye khu Weere, osingisa abafu.
\v 10 Katwinulula mu khufwa okhwa’maani, khandi kakhatwinulule. Khumwene oyo nje khukhuteeye esuubi lyefwe khuuti anameede okhutwinulula,
\v 11 nga ni mutuyeeda nende okhwekalikhira khwenywe. Manu bangi balitwebasira olwesisa esituweresewe mu khukowolamo okhwekalikhira okhwa’bangi.
\s Engalukhana Mu Ntekekha Cha Paulo.
\p
\v 12 Wunanu khuno nje okhwepaakha khwefwe: khu khubaasa khwefwe khujulira khuuti khwebisiisye efwe abeene mu syalo, khandi okhukhira erala mu kholegana yefwe nanywe, mu wolerefu nende amasima ebitula eyiri Weere. Khukholire khutyo si khulwamakesi ake’syalo naye khu lwesisa sya Weere.
\v 13 Olwokhuba si khu bawandiikira esitu syoosi simutanyala okhusoma oba okhutegeera. Khandi nsubira nti,
\v 14 nga nimututegeeyekho wutono, mwiicha okhutegeera mu wichufu kho mutwepaakhiremo wusa nga fweesi ni khulibepaakhiramo mu ludaalo olw’Omwami Yesu.
\p
\v 15 Olwokhuba nali omwomifu mu sino, natekekha okhusookha okhubakeniya kho mufune khabiri.
\v 16 Natekkekha okhubakeniya niindi khu lukendo lwange okhucha e Makedoni khandi okhukowola yimuli okhutula e Makedoni, khandi khomube nga muntuma nindi khu lukendo lwange okhucha e Buyudaaya.
\v 17 Ninatekekha sino, nasikhola mu wokoyo? Oba nkhola entekekha change mu ngeri eye syalo kho mu khuyeera khulala okhwo mbole nti, “Eee, Eee khandi nti Bbe, bbe?”
\v 18 Naye mu masima nga Weere nali omwesikwa, owubakha wefwe yimuli siwuli mbo “Eee” khandi “Bbe.”
\v 19 Olwokhuba Omwana wa Weere, Yesu Kurisito, owawuulirwa mwinywe nange nende Sirwano nende Timosewo, siwali “Eee khandi “Bbe” naye mu ye sibeyenge “Eee.”
\v 20 Olwokhuba sisyamaani owungi wa makhabi ka Weere asubisiise kali “Eee” mu Kurisito. Manu siityo okhumubitiramo “Amiina” siwoolewa nafwe khu luyaali olwa Weere.
\v 21 Wunanu Weere nje okira feesi efwe nanywe khwomiira mu Kurisito. Katuchukhakho amafuta,
\v 22 khandi katutakho akhawonero khaye, khandi katutakho omwoyo kwaye mu myooyo chefwe nga rubbuni, okhwomiisa ebicha okhwiicha.
\p
\v 23 Nanga Weere nga omujulisi wange nti syali esitekekhe nabalekha muwulayi nga nintakowola mu Kkoliinso.
\v 24 Okhulekha mbo khusibatwiikha khu nfukiirira, naye khukhola nanywe khu lwe’sangaalo lyenywe, olwokhuba mu khufukiirira nje mu mubeera abakumu.
\c 2
\p
\v 1 Manu naKhengawo mu bibaaso byange nti sindabakeniye khandi muwuchuuni.
\v 2 Olwokhuba nimbachuniya, nanu osikala onkhusangaasa okhutusakho enywe banjuniisye?
\v 3 Nawandiika nga ni nawandiika ntyo kho nimba ni nicha kho nkhaye okhuchunisiwa nende abo abakhoya onkhusangaasa. Nabesika mweesi, nti mwesi mwakhasangaliiye alala nange.
\v 4 Olwokhuba nabawandiikira okhubita muwuchuni nende okhwekanyiisa khwo’mwoyo nende amasika maangi, okhulekha okhubachuniya naye okhubamanyisa okhudakha khwange okhukali khumbadakhiramo. Okhulekherwamo Okhwo’wesibi
\p
\v 5 Omutu yeesi naleetire owuchuni, syaba nikanjunisye lukali nga nabachunisye enywe mwesi mweesi, okhwola khusikera nawulebe__ owutasyoosa abi lukali.
\v 6 Esiwonereso esimubakho olwa’bangi simumala.
\v 7 Wunanu mukhoyire okhumulekheramo khandi mu mukumye, kho akhaye okhuba nende okhwelarikhirira okhubitiriiye.
\p
\v 8 Mbakhubbirisa, nolwesyo, okhwomiisa okhudakha khwenywe yaali.
\v 9 Esyakira ni mbawandikiira nje okhuwona nimunyala okhubita mu khukhemewa mwaaba abawulise mu wuli siitu.
\v 10 Nimulekheramo omutu yeesi, sessi mulekheramo. Khandi sindekheyemo__ ni aliwo syosi esyo’khulekheramo__ Ndekheyemo mu moni cha Kurisito khulwenywe,
\v 11 kho sitaani akhaye okhutukhira amakesi. Olwokhuba efwe sikhuli nga abatamanyire enkhwe chaye.
\s Abayeresa Abendakaano Mbyaakha
\p
\v 12 Wunanu ni nacha mu Tulowa okhuwuulira enjiri ya Kurisito manu nawukaana nga Omwami kali kanjikuliiye omulyango,
\v 13 Lwosi sinali nimbulira emireembe mu bibaaso byange, olwokhuba sinawukanayo mwanawama Tiito. Manu nabasiiwula nti mubeyo nimala nja e Makedoni.
\v 14 Naye nebasa Weere, oyo otutangirirangamo mulukendo olwa Kurisito khandi okhubitira mwifwe obakalanga nawuli awuutu akhaηηari akhamakesi kaye.
\v 15 Olwokhuba khuli aba Weere akhalekherekhe akha Kurisito akati mwabo abali okhuwonesewanga nende abo abali okhufwaanga.
\v 16 Eyiri mulala khuwunya okhufwa: eyiri owundi, akhaηηari akhowulamu. Manu nanu owakanaakana mu mulimo nga okwo?
\v 17 Okhukawukhana nende abangi, sikhuwoniya emboosi ya Weere khu lwa’magoba. Owutaba khutyo, mu Kurisito khulomaloma eyiri Weere nikhumaliriiye, nga abaatu abatumiwa okhutula eyiri Weere.
\c 3
\p
\v 1 Khuchakire okhwefumya abene khandi? Oba khudakha, nga abaatu bandi, amabbaruwa akatuseemba yimuli oba okhutula yimuli?
\v 2 Enywe abene ninywe ebbaruwa yefwe, eyawandiikiwa khu myoyo chefwe, eyimanyikhire khandi eyisomewa nende wuli mutu.
\v 3 Nga mwekesewa muuti muli ebbaruwa okhutula eyiri Kurisito, okhutula mu wuweresa wefwe, eyitawandiikiwa wino naye nende omwoyo owa Weere omulamu, atasi makina naye khu makina ke’myooyo echa baatu.
\p
\v 4 Owomiifu nga wuno wefwe okhubitira mu Kurisito khu lwa Weere.
\v 5 Okhulekha mbo khuli abechufu mwifwe abene okhuwoola khuti khunyala okhukhola esiitu syoosi abene, naye okhunyala khwefwe khutula eyiri Weere.
\v 6 Atukholire khwaba abanyala nga abakhosi abendakaano embyaakha__ okhulekha abebbaruwa naye abo’mwoyo; olwokhuba ebbaruwa yiita, naye omwoyo akaba owulamu.
\s Oluyaali Olwe’Ndakaano Embyaakha
\p
\v 7 Wunanu nisiba mbo owuweresa owaleeta okhufwa, okhwasaatiwa mu nukuta khwikina, khwecha nende oluyaali, kho aba’Yisirayiri bakhaye okhukhaηηaasa Musa mu moni khulwo’luyaali lwalyo, nende nisyali nga sifiirira siityo,
\v 8 Owuweresa owo’mwoyo siwuliba wo’luyaali lukhirakho?
\v 9 Nisiba mbo owuweresa owukhengera abaatu emisango wo’luyaali, naye oluyaali lwo’wuweresa owuleeta owulungifu wulyaka ye!
\v 10 Olwokhuba esyaali esyo’luyaali siwuma luyaali wunanu nusikeraniya khu luyaali olukhirawo.
\v 11 Khandi esyo esyali ni sifwiririra syecha no’luyaali, ne esyo’luyaali lwo’luberera lulyakaye!
\p
\v 12 Nolwesyo, nga nikhuli nende okhusuubira nga khuno, khuli abamaani lukali.
\v 13 Sikhuli nga Musa, owataanga esitambaara mu weeni waye okhukayira aba Yisirayiri okhuwona esyo esyalingi nisifiiririra.
\v 14 Naye ebibaaso byaawe byawumakho owoki, olwokhuba no’khwoosa wunanu esitambaara syene esyo syasikala nisitawikhuywe khu ndakaano enkhale ni yisomewa sitatusiiwakho bbe, olwokhuba mu Kurisito mwoηηene nje mu situsiwakho.
\v 15 Ata okhwoola olwaleero luno Musa nasomewa, esitambaara sibawiikha khu myoyo chawe.
\v 16 Naye omuutu yeesi nakaluukhana eyiri Omwami, esitambaara situsiwawo.
\v 17 Wunanu omwami nje omwoyo, ni khandi omwoyo wo’mwami aba, abawo owulekhuule.
\v 18 Manu efwe, abo’weeni owuwikhule khweekesa oluyaali olwo mwami, khukalukhanisiwa khwacha mu nfwaani yaye nende oluyaali lwemeeda, olutula ewo’mwami, oyo oli omwoyo.
\c 4
\p
\v 1 Nolwesyo, khasita okhubitira mu sisa sya Weere khuli nende owuweresa wuno, si khuwaamo omwoyo bbe.
\v 2 Okhukhirawo, khwewaaba engira chebyaama nende ebyensoni; khukaana okhukhola ebyowubacha, khandi sikhukodiya emboosi ya Weere. Naye okhukawukhanakho, okhutaangawo amasima mu lwatu khwekhakhasa efwe abeene eyiri wuli mutu mu moni cha Weere.
\v 3 Ata nende enjiri yefwe yiwiikhulwakho esitambaara, yiwiikhiwakho eyiri abo abacha okhusikhirira.
\v 4 were owoluse luno kawofusa ebibaaso ebyabatafukiirira, kho bakhaye okhuwona owulafu owenjiri eyoluyaali lwa Kurisito, oli enfwani ya Weere.
\v 5 Olwokhuba sikhuwuulira abeene, naye Yesu Kurisito nga Omwami, nafwe nga abakhosi benywe khulwa Yesu.
\v 6 Olwokhuba Weere, owawoola ati, “Owulafu khawadukhe mu siirema,” kakhola owulafu waye wadukhire mu myooyo chefwe okhutuwa owulafu owo’khumanya oluyaali lwa Weere mu weeni wa Kurisito.
\p
\v 7 Naye khuli nende owuyiinda wuno mu ntamu cheroba okhwekesa mbo_ amaani amabitiirifu kano katula eyiri Weere okhulekha okhutula mwife.
\v 8 Khufwinyirirwa lukali khumaande choosi, naye sikhusasakulwanga; khudondobanisiwa, naye sikhukowola enyuma,
\v 9 khusandisiwa, naye sikhulekhewa; khukhubbwa assi, naye sikhusikhirisiwa.
\v 10 Wuli sikha khukiinga mu mubiri kwefwe okhufwa khwa Yesu, kho owulamu wa Yesu woosi weyekese mu mubiri kwefwe.
\v 11 Olwokhuba efwe abalamu wuli sikha khuli okhuweresewangayo mukhufwa khu lwa Yesu, kho owulamu waye wuwonekhere mu mubiri kwefwe okufwa.
\v 12 Manu siityo, okhufwa khuli okhukholera mwiifwe, naye owulamu wukholera mwinywe.
\p
\v 13 Syawandiikiwa siiti: “Nafukiirira; nolwesyo nomalomire,” nende omwoyo kwene okwo okwokhufukiirira fweesi khufukiirira nolwesyo khulomaloma,
\v 14 olwokhuba khumanyire khuuti oyo owasingisa omwami Yesu okhutula mu bafu fweesi alitusiingisa alala nende Yesu atuleete yimuli mumoni waye.
\v 15 Bino byoosi biriwo khu lwo’wulayi wenywe, kho esisa esyoolera abatu bangi sinyale okhutawo okhwebasanga khwoole okhwidikhirira khu lwo’luyaali lwa Weere.
\p
\v 16 Nolwesyo sikhuwamo omwoyo. Asyakhaba mbo owulamu wefwe khu mukulu wuli okhunyasikhanga, naye mukati khuli okhukowosewanga wuyaakha wuli ludaalo.
\v 17 Olwokhuba owulafu wefwe no’wudinyu owesikha wukha wutuleetera oluyaali olutaakama olusidowa okhukhira choosi.
\v 18 Manu khuta emoni chefwe okhulekha khu biwonekha, naye si khu bitawonekha. Olwokhuba ebiwonekha bya sikha wusa, naye ebitawonekha by’olubeerera.
\c 5
\p
\v 1 Wunanu khumanyire khuuti eweema eyokhusyalo yi khwamenyamo niyirisikhirisiwa, khuli nende esyombakhe okhutula eyiri Weere, enyumba eye mirembe ne mirembe mwikulu eyitombakhiwa nende amakhono aka’baatu.
\v 2 Nikhubiindukha wusa, nikhulindiriranga okhwambasiwa nende owumenyo wefwe owo’mwikulu,
\v 3 olwokhuba nikhwambasiwa, sikhulyakaniwa nikhuli sichula.
\p
\v 4 Olwokhuba nikhuba nikhuli mu weema yino, khubindukha khandi khusidowerwa, olwokhuba sikhudakha khwambuliwe naye khwambasiwe nende owumenyo wefwe owo’mwikulu kho omubiri kufwa kumiriwe nende owulamu.
\v 5 Wunanu Weere nje owatukhola olwasino khandi atuweye mwoyo nga arubbuni, okhwomiisa esicha okhwiicha.
\p
\v 6 Nolwesyo wuli ludaalo khuli abomiifu khandi khumanyire khuuti khasita khuba nikhuli engo mu mubiri khuli ale okhutula khu Mwami.
\v 7 Khuliwo khu lwe’nfukiirira, okhulekha khulwokhuwona ne’moni.
\v 8 Khuli abomiifu, mboola, khandi nakhadahire ohuba ale nende omubiri nabanga sirala no’mwami.
\v 9 Manu sakira esichiiririrwa syefwe nje okhumusangasa, oba khuli ango mu mubiri oba ale nakwo.
\v 10 Olwokhuba fwesi khutekwa okhuwonekha emutwe we’sisaala esyo khukhenga emisango esya Kurisito, kho nawuli otula anyale okhufuna esyo esimukhoyera olwebiitu bikakhola nasiiri mu mubiri, oba birayi oba bibi.
\s Omulimo Kwokhuleeta Alala
\p
\v 11 Manu, siityo, khumanyire amakhulutu ako’khutya Omwami, khukesakho okhukhobya abaatu. Efwe sikhuli simanyikhanire eyiri Weere, khandi nsuubira nti simanyikhanire nende mu bibaaso byenywe.
\v 12 Sikhuli okhukesakho okhwefumya yimuli khandi, naye khuli okhubawa enkhabi okhutwesiimiramo, kho munyale okhukowolamo mwaabo abesiimira mwisyo esiwonekha okhukhira esyo esiri mu mwoyo.
\v 13 Nikhuba nikhuli erwanyi we’bibaaso byefwe, khuli khuutyo khu lwa Weere; naye ebibaaso byefwe byaaba nibiri awene biri khulwenywe.
\v 14 Olwokhuba okhudakha khwa Kurisito khutwoseresa, olwokhuba khumanyire khuuti mulala kafwira boosi, manu nolwesyo boosi bafwa.
\v 15 Manu kafwira boosi, kho abo abalamu bakhaye okhuba abalamu khulwawe abene naye khulwoyo owabafwirira khandi kasingisiwa.
\p
\v 16 Manu okhutula wunanu no’khucha mu moni awuma yikhutiingaala nikhwema khu mbaasa ye’syalo sinno. Nende mu khutangira nikhwabaasa khu Kurisito mu ngeri yino, sikhusiikhola khuutyo.
\v 17 Nolwesyo, omuutu yeesi naba mu Kurisito, aba ali esilonge esiyaakha; ebikhale biba biweyewo, ebiyaakha nga biichire!
\v 18 Bino byoosi bitula eyiri Weere, owatukowosa alala naye okhubita mu Kurisito khandi katuwa owubakha owukowosa abaatu alala.
\v 19 Esyo Weere kali ali okhukowosanga esyalo yaali mu Kurisito nga khandi syababaliyekho ebibi byawe. Ne khandi katudiisya owubakha owo’khukowosa alala.
\v 20 Manu no’lwesyo khuli ba wamuwanda ba Kurisito, oti fwana Weere kali akhubba omulanga okhubitira mwifwe. Khu bekweeda khu lwa Kurisito: mukowole eyiri Weere.
\v 21 Weere kamukhola oyo owawumakho esibi kaba esibi khulwefwe, kho mu’ye khunyale okhuba abalungifu ba Weere.
\c 6
\p
\v 1 Nga abakhosi bakholera alala nende Weere basyange mbekweeda owutafuna esisa sya Weere khu werere.
\v 2 Olwokhuba awoola ati, “Mu sikha esyokhudakha khwange nabawulira, khandi nende khu ludaalo olwo’wuwoniya nabayeeda.” Mbawolera, wunanu nje ebikha ebyokhudakha khwa Weere, khandi wunanu nje oludaalo lwo’khuwonesewa. Okhusaanda khwa Paulo
\p
\v 3 Khaba sikhuta esyo’kwekumula esikayira mu ngira yo muutu yeesi, kho wunanu owuweresa wefwe wukhaye okhwolobesewa.
\v 4 Naye, nga abaweresa ba Weere khwewayo mu ngira yoosi: mu womeranu wungi;
\v 5 mu khukhubbiwa, mu khuwoyewa nende mu wujjemu; mu mirimo midinyu, n’owutakona ndoolo nende enjala,
\v 6 mu siroonyo, okhutegeera, okhwesimiirisa nende esisa; mu mwoyo omwolerefu nende mu khudakha khwawene;
\v 7 mu khulomaloma okhutufu khwene mu maani aka Weere; nende ebyo’khulwanisa ebyo’wolerefu mu mukhono omulungi nende omukooda.
\v 8 Okhubitira mu luyaali nende muwubacha, eriita ebi nende eriita erayi, khuli balayi naye khuyiriwa nga abetakho wusa;
\v 9 Khumanyikhanire naye khuli nga abatamanyikhanire; khufwa ni nga khuliwo; khukhubbiwa naye nga sikhufwa;
\v 10 khweraliikhirira, naye nga khusangaala ebikha byoosi, nga abaati, ate nga khukira bangi baaba abayiinda; nga abawuma syoosi, ate nga khuli nende nawuli siitu.
\p
\v 11 Khulomalomire wusa yimuli enywe, Abakkoliinso, khandi khwikuyewo emyoyo chefwe mu wubaambali yimuli.
\v 12 Khaba sikhwerekheeye okhudakha khwefwe okhubatulakho, naye mwerekheye okhwenywe okhututulakho.
\v 13 Nga okhukowolamo owulayi__ nomaloma nanywe nga olomalomera abaana bange__ mwikule emyoyo chenywe chosi chibe emibaambali.
\s Mutambasiwa Ejoogi Na’batafukiirira
\p
\v 14 Mutambasiwa ejoogi lala nende abatafukiirira. Wulala siina owuli akati wo’wulungifu nende owukafwiri? Oba khukholera alala siina owulafu wuwuba nawo nende esirema?
\v 15 Kholagana siina eyiri akati wa Kurisito nende Beliyali? Siina omufukiirisi syafananiya nende otaasi omufukiirisi?
\v 16 Khufukiirisaniya siina okhuliwo akati we’nyumba ya Weere nende ebilongalongwe? Olwokhuba khuli enyumba ya Weere mulamu. Nga Weere lukawola ati: “Ndibamenyamo khandi ndikenda akati mu bo, khandi ndiba Weere waawe, khandi baliba batu bange.”
\p
\v 17 “Nolwesyo mubatulemo khandi mwekawule, awoola Omwaami Mutadiranga khu siitu esichafu, manu nakhabawukanire.”
\v 18 “Nja okhuba senywe yimuli, khandi muliba basyani nende abakhaana bange, awoola Omwami owowunyala.”
\c 7
\p
\v 1 Manu nga nikhuli nende ebisuubiso bino, abecha abakoosi, khwelafuye abeene okhutula khu byoosi ebichafuwasa omubiri nende omwoyo, nga khwoseresa owulungifu mu khutya Weere. Esangaalo lya Paulo.
\p
\v 2 Mututerewo esiseenge mu myoyo chenywe. Yiwuma yikhwasobeserya, yiwuma yikhukuliirirangakho, yiwuma yikhukhosesanga khwakhaya okhumusasula.
\v 3 Sinomaloma sino okhubatakho omusango; nasiwoola khale nti muli nesifwo nga esyo mu myoyo chefwe khuti khwakhabawo oba khwafwa nanywe.
\v 4 Ndi no’wukhakhafu wukali mwinywe; newulirira lukali lwene mwinywe. Nkhubbirisiwa lukali lwene; mu bidinyu byefwe byoosi esangaalo lyange liwuma syakamo.
\p
\v 5 Olwokhuba nikhwecha mu Makedoni, omubiri kwefwe kuno kwawumakho okhujoηηolokha, naye khwasandisiiwa wuli yikhwakalukhaniranga__ emyeero erwanyi, owuti mukati.
\v 6 Naye Weere, okumya abelarikhirifu, katukumya olwo’khwiicha khwa Tito,
\v 7 khandi silwokhwiicha khwaye khwoηηene naye nende okhusangasiwa khu mwamuwa. Katuwoolera okhwekomba khwenywe yindi, khulwange, kho esangalo lyange libe ekali okhukhirawo.
\p
\v 8 Anakhaba mbo nabawa esibeera mu bbaruwa yange, sinjesindukhamo. Anakhaba mbo nayesiindukhamo__ mbona nti ebbaruwa yange yabadisiya ettima, naye olwesikha sitono wusa__
\v 9 naye nga wunanu ndi omusangaafu, silwokhuba nti mwaba ne’sibeera, naye olwokhuba nti esibeera syenywe syabayira mu khweyolobya. Olwokhuba mwali ne’sibeera nga Weere lukadakha manu khaba sikhwachunisiwa mu ngeri yoosi.
\v 10 Esibeera syo’wa Weere sireeta okhweyolobya okhuyira abaatu mu khuwona manu awumawo okhweyolobya, naye esibeera sye’syalo sireeta okhufwa.
\v 11 Muwone esibeera syo’wa were sino sisiwuuye mwinywe: Sikhulutu si, khusambikha siina okhwatulakho kho mubaase okhwelwanakho, ttima si, nduulu si, khwekomba si, sibadirirakho yena, wetekefu siina okhuwona mbo amasima kolewakho. Khu sino mweyekesiise okhuba abawuma musango mu mboosi yino.
\v 12 Anakhaba mbo nabawandiikira, sinawandiika khu lwoyo owakhola owubi oba luwande lwoyo owakholewa owubi ne okhukhirira erala nti mu moni cha Weere mwakhawene abeene nga ni mwewayo yikhuli.
\v 13 Khulwa’bino byoosi khwukumisiwa. Okhwongera khuwukumisiwa khwefwe khwene, khwali basangaafu lukali okhuwona nga Tito nikali, olwokhuba omwoyo kwaye kukowosewamo amaani nanywe mweesi.
\v 14 Nali nepakhire yaali khwinywe, khandi simuswasiise bbe. Naye nga nawuli sikhwawoola yimuli syali situufu, manu okhwepaakha khwefwe yimuli khu Tito khukhakhasiise okhuba owutuufu wosi.
\v 15 Nende okhudakha khwaye okhwa’maani okhwo mukati yimuli nikechulisa ati mweesi mwali abalonga, okhumuwukaanira no’khutya nende okhutengerekha.
\v 16 Ndi omusangaafu nti nyala okhuba nende owomiifu wichufu mwinywe.
\c 8
\p
\v 1 Ne wunanu, baana befwe, khudakha mumanye ebidiira khu sisa Weere syaweye amakanisa ke Makedoni.
\v 2 Okhutula mu khukhemewa okhwa’maani, esangaalo lyawe ekali nende owuwati wawe owukali wawonekhera mu khukaba khwawe okhungi.
\v 3 Njulira nti bakaba nga nibanyala, ata no’khukhisawo abanyalira. Wusa khulwawe abeene,
\v 4 batwekalikhira wangu wene olwokhudakha okhukabana nende abolerefu.
\v 5 Manu sibakhola nga nikhwasuubira, naye bewaayo abeene okhutangira eyiri omwami kho khandi eyiri efwe mukhudakha khwa Weere.
\v 6 Manu khwakhubbirisa Tito, nga nikali nateyewo enjaaka, khandi okhuleeta okhumaliirisa esikholwa sinno esye’sisa khuluwande lwenywe.
\v 7 Naye wusa nga nimukhulakhulana mu biitu byoosi__ mu nfukiirira, mukhulomaloma, mu makesi, mu wumalirifu owamukulu nende mu ngeri yimutudakhiramo efwe__ muwone muuti lwosi mukhulakhulana mu sisa sino esyo’khukaba.
\p
\v 8 Sindi okhubalagira, naye ndakha okhubakhema okhuwona owomiifu wokhudakha khwenywe nga ngerageraniya nende owa’baandi.
\v 9 Olwokhuba mumanyire esisa syo’mwami wefwe Yesu Kurisito, mbo akakhaba nikali omuyiinda, ni nga khu lwenywe kekhola omuwati, kho enywe okhubitira mu wuwati waye munyale okhuba abayiinda.
\v 10 Ne khuno nje okhukeraka khwange ebidiira khu sikhira owulayi yimuli khu mboosi yino: omwaka kwaweye mwali bambeeri silwokhukaba khwoηηene naye nende okhuba mu mwoyo kudakha okhukhola muutyo.
\v 11 Wunanu mumale omulimo, kho okhudakha khwenywe okhusikhola khuchaane nende okhusimaliirisa khwenywe, okhwema khu wunyali wenywe.
\v 12 Olwokhuba okhudakha nikhuliwo, esiwanwa sifukiirirwa okhwema khu muutu syaaba nasyo, naye si khulwokhwema khu muutu syawuma nasyo.
\v 13 Okhudakha khwefwe sikhuli mbo abandi banyalirwe ne abandi bafwinyirirwe lukali, naye mbo abewo okhwakanakana.
\v 14 Esikha sya wunanu okhudakha khwenywe okhukali khulikaba ebyetaagiwa byaawe, kho okhudakha khwawe khwoosi khukabe bimudakha. Abewo okhwakanakana,
\v 15 nga nisyawandiikiwa siiti: “Oyo owa’wusa bingi sikafuna bingi, nende oyo owa’wusa bitono sikafuna bitono byeene.”
\s Tito Atumiwa E kkoliinso
\p
\v 16 Nebasa Weere, owata mu mwooyo kwa Tito okhufwayo nga ese khundi nakhwo yimuli.
\v 17 Olwokhuba Tito sikasangalira wusa okhukhubbirisa khwefwe syoηηene, naye ali okhwiicha yimuli nende okhudaha okhukhongo khandi nga omwene nje okhuchakire.
\v 18 Khandi khuli okhumutuma alala nende owasyefwe ofumisiwa nende amakanisa olwenkhola yaye khu njiri.
\v 19 Esikhirawo nisi, kangaliwa nende amakanisa okhucha nafwe nga nikhukinga esiwanwa, sikhuwayo mu khukiniya Omwami omwene manu kho khwekese okhudakha khwefwe mu khuyeeda.
\p
\v 20 Khudakha okhwekayakho okhwolobesewa mungeri yikhukholeramo okwo’khwewayo okwe’siyanwa sino.
\v 21 Olwokhuba khuli okhuyira owuchuuni okhukhola esituufu, simumoni cho’mwami yeηηene naye nende mumoni cha baatu.
\v 22 Mu khumeedakho, khuli okhubatuma nende owasyefwe otukhakhasiise mu ngira chosi choosi ati atayo omwoyo lukali olwe’nfukirira, khandi nende okhukhirawo olwokhuba ali nende owesikwa wukali mwinywe.
\v 23 Nga khulwa Tito, wasyange khandi yinkhola naye mwinywe; ne khulwabasyefwe, bo babakha ba makanisa khandi no’luyaali lwa Kurisito.
\v 24 Nolwesyo mwekese abaatu bano esikhakhasa okhudakha khwenywe nende esikira ni khubenyumirisamo, kho amakanisa kanyale okhusiwona.
\c 9
\p
\v 1 Sisyetaagisa ese okhubawandiikira ebidiira khu wuweresa eyiri abolerefu.
\v 2 Olwokhuba manyire nga nimwetekekhire okhuyeeda, khandi mbeye newulira eyiri abaatu be Makedoni, nimbawoolera nti okhutula omwaka kuweye enywe abali mu Akaya mwali mwetekekhire okhukaba, khandi okhumalirira khwenywe khuweeye amaani bangi khubo okhukhola.
\v 3 Naye ndi okhubatumira abafukirisi kho okhwewulisa khwefwe yimuli mu mboosi yino khukhaye okhuba okhwawusa, naye kho mube abatekefu, nga ninawoola nti mube.
\v 4 Olwokhuba abaatu abe Makedoni nibecha nange babawukana nimutetekekhire, efwe__ nikhutawoola esitu syoosi khwinywe__ khwakhaswaala olwokhutaba besikwa.
\v 5 Manu nabaasa nti sikhoyera okhukhubbirisa abafukirira okhubakeniya niwusiiri no’khumaliirisa entekekha cho’khuwayo ebiwanwa bimwali nimulakire. Manu siriba esiwanwa esitekekhe, okhutaba nge’siwanwa sibataweyeyo no’myoyo mulala.
\s Okhuwanya khwo’wuwaani
\p
\v 6 Mwichulise sino: nawuli owanya nakekeresa no’khukesa khwosi alikesa nakekeresa, nende owanya natakekeresa alikesa natakekeresa.
\v 7 Wuli muutu akhoya aweyo syakhengirewo mu mwoyo kwaye, ataasi okhwekanyiisa oba okhuyiingwa, olwokhuba Weere asangaalira okaba no’wusangaafu.
\v 8 Khandi Weere anyala okhukhola enkhabi choosi okhubabaakho, mu biitu byoosi, mu bikha byoosi mwaba ne’bitu byoosi bimudakha, muliba mu mirimo choosi emirayi.
\v 9 Nga nisyawandiikiwa siiti: “Asalaniisye ebiwanwa byaye eyiri abaati; Owulungifu waye wumenya endaalo choosi.”
\p
\v 10 Wunanu oyo okabira emwo omuwanyi nende omugaati nga ebyo’khulya alikabira khandi kameeda musibiikhiro syenywe khandi alibambaliyisa ekesa lyo’wulungifu wenywe.
\v 11 Muliba abayiinda mu ngeri choosi kho munyale okhuba abawaani nawuli lumukaba, khandi okhubitira mwifwe okhukaba khwenywe khulayi khulitulamo okhwebasa eyiri Weere.
\p
\v 12 Owuweresa wuno wumukhola sikhukaba wusa ebyetaago bya baatu ba Weere naye lwoosi widikha mu ngeri nyingi mu khwekesa okhwebasa Weere.
\v 13 Olwe’ngeri yo’wuweresa abeene wumukhakhasise, abaatu balikiniya Weere olwowuwulise owuchiira mu khwewayo eyiri enjiri ya Kurisito, nende mu wuwaani wenywe mu khukabana nabo nende nawuli otula yeesi.
\v 14 Khandi nende mu khwekalikhira khwawe khulwenywe emyoyo chaawe chiritula yimuli, olwokhuba esisa sya Weere esibitiriiye abaweye.
\v 15 Okhwebasa khuchire Weere olwe’siwanwa syaye esitawoolekhekha.
\c 10
\p
\v 1 Mu wunafu nende mu wuloonga wa Kurisito, mbekweeda__ Ese, Paulo, “Omuti” ninakananiya oweni khu weni nanywe, naye “Owa’maani” nindi aleyi!
\v 2 Mbasaba nti ni niicha nkhaye okhuba na’maani nga ninsuubira okhuba eyiri abaatu bandi ababaasa baati khumenya mumbeera chesyalo sino.
\v 3 Olwokhuba asyakhaba mbo khwamenya mu syalo, sikhutawo okhulwana nga esyalo lusikhola.
\v 4 Ebyo’khulwaana bi khukhosesa khaba sinje ebyokhulwaana bye syalo. Mu ngeri yindi, biri nende amaani ko’mwooyo okhusikhirisa ebifwo bya’maani.
\v 5 Khusikhirisa amayiingani nende nawuli situkaaniya esyefwanirisa okhulwanisa amakesi ka Weere, khandi khuwaamba wuli sibaaso okhusikhola esifukiirira Kurisito.
\v 6 Khandi khuliba abetekefu okhusandiya wuli sikholwa syo’wutawulira, khasita owulonga wenywe wolerera.
\p
\v 7 Mutingaala wusa khu mukulu we’bitu. Ni abawo yeesi omwomiifu ati wa Kurisito, akhoya abase lundi ati khuli ba Kurisito wusa nga nali.
\v 8 Olwokhuba nende newulise wusa nti khuwereere owunyala wo’mwami wukatuwa okhubombakha okhukhira okhubakwisa assi si sicha nkhunswaasa.
\v 9 Sindakha mbonekhe nga okesakho okhubatihirisiya ne’bbaruwa change.
\v 10 Olwokhuba abandi bawoola baati, “Ebbaruwa chaye nsito khandi chiyiinga, naye nga omuutu mwene syasangaasa nende okhulomaloma khwaye khuwumamo syoosi.”
\v 11 Abaatu nga abo bakhoya bamanye baati efwe nga lukhuli mu mabbaruwa kefwe nikhuwumawo, khuliba khuutyo mu bikholwa nikhuliba nikhuliwo.
\p
\v 12 Sikhunyala okhwekeraniya khu bandi abepaakha abene. Nibepiima abene khu bene, khaba sibakesi.
\v 13 Efwe, asyakhaba siityo, sikhucha okhwepaakha okhukhira esikhoyera, naye khulikhayisiriya okhwepaakha khwefwe khu muka Weere kukatuwa, omuka okwoola ata yikhuli.
\v 14 Sikhulicha ale lukali mu khwepaakha khwefwe, nga nisyakhabeeye nikhutechire yimuli, olwokhuba khwoola ale nga enywe nende enjiri ya Kurisito.
\p
\v 15 Khandi sikhutuumiya esikera nikhwepaakha olwemirimo echikholewa nende abandi. Okhusuubira khwefwe khuli mbo, nga enfukiirira yenywe niyemeeda okhukhula, omuka kwefwe mwinywe kuli bambaliya lukali,
\v 16 kho khunyale okhuwuulira enjiri mu byalo biri ale ni nanywe. Olwokhuba sikhudakha okhwepakhira khu mulimo omutu wundi ku kamala okhukhola mu syalo syaye.
\v 17 Naye, “Oyo owepaakha kepaakhire mu Mwami.”
\p
\v 18 Olwokhuba sisiri mbo owepaakha omwene si nje osimiwa, naye oyo Omwami yasiima.
\c 11
\p
\v 1 Nsuubira nti munanesimiirisire mu wusiru wange; naye lwosi muli okhukhola muutyo.
\v 2 Ndi nende embalikha yimuli ne mbalikha yowa Weere. Nabasuubisa khu wamwe yenywe mulala, khu Kurisito, kho nyale okhubawayo nga omusisira muchweenufu yaali.
\v 3 Naye ndi no’wuti wusa nga Kaawa nikabachirisiwa nende olukesikesi lwe’njokha, emyooyo chenywe chinyala chayiriwa entulo okhutula khu masima nende owuchweenufu khu Kurisito.
\v 4 Olwokhuba omutu yeesi nikeecha yimuli kawuulira Yesu wundi okhulekha Yesu yikhwawuulira, oba nimufuna omwoyo kukawukhanire khu kumwafuna, oba enjiri yindi okhulekha yimwafukiirira, mukhola wulayi okhumwesimiirisira.
\v 5 Naye simbaasa nti ndi wa’assi lukali eyiri “abatume abakhuluutu.”
\v 6 Nyala owutaba omulomalomi omuteendekhe, naye ndi nende amakesi. Sino khusiteeye alafu mu moni yimuli mu ngeri yoosi.
\p
\v 7 Syali sibi ese okhweyisa assi kho enywe musiingisiwe mu khuwuulirwa enjiri ya Weere yimuli khu werere?
\v 8 Nanyaka amakanisa kandi nga ngafunakho owuyeedi kho nyale okhubakholera.
\v 9 Khandi ni nali nanywe ni nalingi nende sindakha, si nali mukuku khu muutu yeesi. Olwokhuba abasyefwe abatula e Makedoni batusa bi nali nindakha. Neriinda simweene owutaba omukuku yimuli mu ngeri choosi, khandi nja okhuchanakana ninkhola ntyo.
\v 10 Nga mumasima amasima ka Kurisito nikandimo, yiwuma muutu mu bitundu bya Yakaya olingaaniya okhwepaakha khwange khuno.
\v 11 Khusiina? Olwokhuba simbadakha? Weere amanyire ati mbadakha!
\p
\v 12 Khandi ndichaanakana okhukhola bindi okhukhola kho wabewo embaasa yaabo abadakha akhakisa okhubasiwa mbo bakana nafwe mu bitu bibepaakha nabyo.
\v 13 Olwokhuba abaatu nga abo batume bowubacha, abakhosi bo’wubacha, abefaananiya nga abatume ba Kurisito.
\v 14 Ne sisiwukiya, olwokhuba Sitani omwene kefananiya nga malayika wo wulafu.
\v 15 Si siwukiya, manu, abakhosi baye nibefananiya nga abakhosi bowulungifu. Enjakamo yawe yiriba nga ebikholwa byaawe nibikhoyera.
\s Paulo Kepaakha Olwo’Khusanda Khwaye
\p
\v 16 Nondamo nti: Atabawo yeesi obaasa ati ndi omusiru. Naye nimubaasa muutyo, manu mumbukanire wusa nga ni mwakhakaniye omusiru, kho nyale okhwepaakhakho wutono.
\v 17 Mu khwekhakhasa simweene nga nepaakha sinomaloma nga omwami lukakhali, naye nga omusiru.
\v 18 Khasita bangi bepaakha nga esyalo lu sikhola, seesi nakhepaakhe.
\v 19 Mwesimiirisa abasiru nga enywe lu muli abakesi!
\v 20 Mu masima mwesimiirisira nende oyo obayira nga abaambe oba obakhosesera wusa oba obepaakhirakho oba oweyira emutwe oba obapaama mu weeni.
\v 21 Mu nsoni change nfukiirira nti olwo’wunafu wefwe si watufukirira okhwola khwiisyo! Omutu yessi syakhengawo okhwepaakhirakho__ nomaloma nga omusiru__ khandi sesi nenyiira okhwepaakha.
\v 22 Abo be Bbulaniya? Sesi nje ndi. Abo ba Yisirayiri nibo? Seesi nje ndi. Bechukhulu ba Yibbulayimu? Sesi nje ndi.
\v 23 Bakhosi ba Kurisito? (ebibaaso bingotirekho okhulomaloma nti) ese nkhira awo. Nkholire lukali lwene, mbeeye mwijeera nawuli sikha, nkhubbiwa amakhabi na’makhabi.
\v 24 Amakhabi kataanu nakhubbiwa nende Abayudaaya embooko amakhumi kane nutusiisekho ndala.
\v 25 Amakhabi kadatu nakhubbiwa nende enga, olundi bankhubba amakina, amakhabi kadatu nachukhiwa ne’meeri ni yadikhaniremo. Namala esiro ne’sideete alafu mu kuyanja,
\v 26 mbeeye wusa mu khuwawo. Mbeeye mu khabi okhutula mu basiku, mu khabi okhutula mu batu bange beene, mu khabi mu syalo, mu khabi mu kuyanja; nende mu khabi okhutula mu basyefwe bo’wubacha.
\v 27 Nkholire khandi nakhenyukha oluuya khandi nga singona; manyire enjala nende owuluwo khandi mbeeye nga sinfuna ebyo’khulya; mbeeye munyifu khandi sichula.
\v 28 Nutusiisekho ebitu bindi, wuli ludaalo mbukaana owusito owundiirakho owa’makanisa koosi.
\v 29 Nje nanu omunafu, ese nakhaya okhuwulira owukata? Nanu oyiriwa mu sibi, ese nakhaya okhuya mukati?
\p
\v 30 Ninteekwa okhwepaakha, ndyepaakhira mu bitu ebyeekesa owunafu wange.
\v 31 Weere khandi simwana wO’mwami Yesu, ocha okhukinisiwa endaalo choosi, amanyire ati simbacha.
\p
\v 32 Mu Damasiko Gafana assi wo’mwen’engo wa Aleta kakhola esiko sya Damasiko syalindiwa kho bandiire.
\v 33 Naye banjisira mu sidubi okhubitira mu dinisa mu sida ne’fubatuula nabita mu makhono kaye.
\c 12
\p
\v 1 Ntekwa okhuchanakana no’khwepaakha. Asyakhaba mbo yiwuma esyo’khufunamo. Ndichanakana nende okhuloota nende okhuwikhulirwa okhutula eyiri Omwami.
\v 2 Manyire omuutu mu Kurisito yi myaaka ekhumi na’chine enyuma owadiiriwa amukulu khu kulu lyo’khudatu. Oba syali mu mubiri oba erwanyi wo mubiri simanyire__ Weere amanyire.
\v 3 Khandi manyire nti omutu ono__ oba mu mubiri oba ali nende omubiri simanyire, naye Weere amanyire__
\v 4 kadiiriwa paka mundalo ya Weere. Kawulira ebiitu ebitakhatuumbulwa, ebitu bi muutu atafukiirirwa okhuwoola.
\v 5 Ndyepaakhira khu mutu nga oyo, naye sindyepaakha ese omweene, okhutusakho esidiira khu wunafu wange.
\v 6 Ata nende ni ndoolawo okhwepaakha, sinakhali musiru, olwokhuba nakhali nomaloma amasima. Naye khaba si nsikhola, sakira atabawo omuutu yeesi owumbaasakho lukali okhukhira nga nisidakhiwa ese okhukhola oba okhulomaloma.
\v 7 Okhwerinda owuteefumiya olwe’bitu bino ebya’maani ebiwukiya ebyo’kkhuwikhulirwa, byali byantamo ewa mu mubiri kwange, omubakha wa Setani, okhunsandiya.
\v 8 Amakhabi kadatu naalachira Omwami okhunsitusakho.
\v 9 Naye kamboola ati, “Esisa syange sikhumala, olwokhuba amaani kange kaba molerefu mu wunafu.” Nolwesyo ndyepaakha no’khukhiririsakho nasirala no’wusangaafu khu wunafu wange, kho amaani ka Kurisito kanyale okhunjoηηolokherakho.
\v 10 Khakira, khulwa Kurisito, nsangalira mu wunafu, mu manyeko, mu wukosi, mu khusandisiwa, mu bidinyu. Olwokhuba nimba omunafu, khandi mba na’maani.
\s Okhufaayo khwa Paulo Khu Bakkoliinso
\p
\v 11 Nekholire okhuba omusiru omwene, naye enywe ninywe abanjosiise awo. Nkhoyera okhuba ni nakhali ninsembewa nanywe, olwokhuba sinseembewa okhuba khwabo abakhiramo owutono “abatume abakhira owulayi”, anakhaba ni ntaasi situ.
\v 12 Ebiitu ebikira omuutu kaba omutume__ owuwonero, ebiwukisa nende ebyamayiiya__ byakholewa mwinywe nokhwesimiirisa okhukali.
\v 13 Mwali mutye aba asi mu makanisa kandi, okhutusakho nga sinalikho omukuku yimuli? Munsaasire esisobyo sino.
\p
\v 14 Wunanu netekekhire okhubakeniya enkhabi eryo’khudatu, naye nga sinja okhuba omukuku yimuli, olwokhuba sindakha bimuli nabyo naye ndakha enywe. Lwosi, abaana sinje abakhoya okhubiikhira abeewusi baawe, naye abeewusi nje abakhoyire okhubiikhira abaana bawe.
\v 15 Manu no’wusangaafu wukali nja okhubakholera syoosi siindi nasyo nende ese owulamu wange samweene. Nimbadakha lukali, enywe munandakhe wutono?
\p
\v 16 Nende nisyakhali siityo, simbeye mukuku yimuli. Manu, omukalangatanu nga lundi nabawambya mu makesi kange.
\v 17 Nabatusakho esiitu syoosi nimbitira mu baatu ba nabatumira?
\v 18 Nakhubbirisa Tito okhwiicha yimuli khandi natuma owasyefwe naye. Tito si kabatusakho esiitu syoosi, kabatusakho? Sikhwakholera mu mwoyo mulala khandi khwadiira engira nasirala?
\p
\v 19 Okhutula khale mubeyenge mubaasa muuti khubeeye khwewosakho abene yimuli? Khubeyenge khulomalomera mu moni cha Weere nga abali mu Kurisito; khandi nawuli sikhukhola, beecha befwe abakoosi, syo’khubomiisa enywe.
\v 20 Olwokhuba ndi muti nti ninicha nyala owutabawukaana nga nindakha mube, khandi mwesi munyala owutambukaana nindi nga ni mudakha mbe. Ntya nti anyala okhubawo okhunyekana, omutoolyo, ettima, okhukawukhana kawukhanamo, owubacha, okhumonyana, okhwekhuduumbasa, okhweniniya, owutefuka.
\v 21 Ndi no’wuti nti ni nakheche khandi Weere wange kakhanjise assi yimuli, khandi nja okhunyoolerera bangi abakhola owubi okhusookha khandi nga sibeyolobya elwe’bibi, esibi syo’wudaamba nende owukendaani ne’bikholwa bindi bi beyingisamo.
\c 13
\p
\v 1 Lino licha okhuba ekhabi lyange eryo’khudatu okhukhukeniyira. “Wuli siitu sitekwa okhumanyikha nende owujulisi wa babiri oba badatu.”
\v 2 Namala okhubalawula ninali nanywe ekhabi eryo’khubiri. Wunanu nsirondamo nintaasiwo: Nindikowola sindirekha abo abanyaasa okhusookha oba abandi boosi,
\v 3 khasita muli okhudakha esyomiisa siiti Kurisito ali okhulomaloma nikambitiramo. Si munafu okhubakholakho, naye wa’maani mwinywe.
\v 4 Olwokhuba mu masima, kakhomererwa mu wunafu, ate nga aliwo khulwa’maani ka Weere. Nasirala, khuli banafu mu’ye, ate nga khulwa’maani ka Weere khuliba abalamu naye okhubakholera.
\p
\v 5 Mwekhebere abeene okhuwona nimuli munfukiirira; mwekhebere abeene. Simumanyire muuti Kurisito Yesu ali mwinywe__ okhutusakho nga, mu masima, mukwa amateebo?
\v 6 Khandi nomiisa nti mulifumbula muuti khaba sikhwakwa amateewo.
\v 7 Wunanu khwekalikhira Weere khuuti simucha okhukhola esitu syoosi esibi. Si baatu okhuwona baati khubitire amateewo naye mbo mulikhola esikhoyera ata nende khube nga abakwiiye.
\v 8 Olwokhuba yiwuma sikhwakhakhola okhuyiinganiya amasima, naye wusa khulwamasima.
\v 9 Khuli basangaafu nawuli lukhuba abanafu naye enywe muba abamaani; ne khandi okhusaba khwefwe khube wolerefu wenywe.
\v 10 Sino nje esikira nimandiika ebiitu bino nimbumawo, kho ni niicha nkhaye okhuba omuwalaba mu khukhosesa owunyala wange__ owunyala Omwaami wukaamba olwo’khubombakhanga enywe, okhulekha okhubawukhaniyangamo.
\s Amakheeso Akasembayo.
\p
\v 11 Esisembayo, baana befwe, mubeeyo. Mugenderere owolerefu, mutekerese bimbawoola, mube abebibaaso birala, mube mu mirembe. Khandi Weere wo’khudakha nende emirembe aliba nanywe.
\v 12 Mukhesaniye syamulala nimukwiichana mu birifu mu wolerefu.
\v 13 Abolerefu boosi babalakirisiye amakheeso.
\v 14 Esisa sy’omwami Yesu Kurisito, nende okhudakha khwa Weere, nende okhukholera alala okhwo’mwooyo omwolerefu bibe ni nanywe mweesi.