\id REV
\ide UTF-8
\h Okhuwikhulirwa
\toc1 Okhuwikhulirwa
\toc2 Okhuwikhulirwa
\toc3 rev
\mt Okhuwikhulirwa
\c 1
\p
\v 1 Okhuwikhulirwa khwa Yesu Kurisito, khu Weere kamuwa okhwekesa abakhosi baye esiteekwa okhubaawo wangu. Kasikhola okhumanyikha nga’tuma malayika waye eyiri omukhosi waye Yokana,
\v 2 ojjulira khu byosi byoosi bikawona__ nga nje, emboosi ya Weere nende owujulisi wa Yesu Kurisito.
\v 3 Ali nende enkhabi oyo osoma emboosi echo’wunabbi wuno, khandi bali nende enkhabi abo abayiwulira manu bata khu mwooyo ebyawandiikiwamo, olwokhuba esikha siri ambi.
\s Amakheeso No’khukumya
\p
\v 4 Yokana, Eyiri amakanisa musaanfu mu syalo sya Asiya: Esisa nende n’emirembe bibabekho okhutula eyiri oyo oli, khandi owali, khandi ocha okhwiicha, khandi okhutula eyiri emyoyo Musaanfu mu moni echesisala syaye esy’owen’engo,
\v 5 nende okhutula eyiri Yesu Kurisito, nga nje omujjulisi omwesikwa, omwana wamberi okhwiwuliwa okhutula mu bafu, khandi omutuki owa ben’engo abo’khusyalo. Eyiri oyo otudakha khandi otutusiise mu bibi byefwe nende amabaanga kaye,
\v 6 khandi atukholire okhuba owene’ngo khandi bakhawona okhukholera Weere waye khandi Bbaabbaa __ oluyaali lube naye nende owunyala emirembe ne’mirembe! Amiina.
\p
\v 7 Wona, kecha nende ebireesi, khandi nawuli moni yirimuwona, ata nende abo abamufumita; nende abaatu boosi abo’khusyalo balirira khu lwaye. Manu nje siriba! Amiina.
\v 8 “Niise ALUFWA khandi OMEGA,’’ nje awoola Omwami Weere, “Oliwo, khandi owaliwo, khandi ocha okhwiicha, ow’owunyala woosi.” Mulala ofwana ngo’mwana wo’mutu.
\p
\v 9 Esse, Yokana, omwana wenywe khandi owasyenywe mu nsaando nende owene’ngo nende okhugumikirisa n’okhwesimiirisa ebyefwe mu Yesu, byali khu sisinga Patimo khu lw’emboosi ya Weere nende owujjulisi wa Yesu.
\v 10 Khu ludaalo Lw’omwami nali mu mwooyo, nawulira emukongo wange ekono ekhongo nga eturumbeete,
\v 11 eryawoola liiti: “Wandika khu lupapula byowona khandi obitume eyiri amakanisa musaanfu: Efeeso, Sumuna, Perugamo, Suwatira, Saadi, Firaderufwiya nende Lawodikiya.”
\v 12 Natingachala mbone ekono eriri okhulomaloma nange. Ne ni natingachala nawona ebisiindi bye saabu musaanfu ebya’mataara,
\v 13 khandi mu bi siindi bya mataara mwalimo mulala “Oli nga omwana wo’mutu,” nikambaaye eganduula nga lyoola assi khu makulu kaye nende olugosi olwe’saabu okhwewodookhaniya esirifu syaye.
\v 14 Omutwe kwaye nende efwiiri byali birafu nga owooya we’koondi, nga birafu nga amakina akenfula, khandi emoni chaye chali chimekhamekhana nga enimi ech’omuliro
\v 15 amakulu kaye kali koti omugasa okuli mukuliro kungi, nende ekono lyaye lyali koti ekono lya’maachi akabwomookha.
\v 16 Mu mukhono kwaye omulungi kali adiiye eηiniηini musaanfu, khandi mu khanwa waye mwatulamo okukhande okw’owoki eyi n’eyi. Oweni waye wali nga eryuba eryadukhira muwulafu walyo owukhirira erala.
\v 17 Ni namuwona, nakwa mu makulu kaye naba nga ofwiiye. Manu kantakho omukhono kwaye omulungi kawoola ati: “Otatya. Niise owamberi khandi niise osembayo.
\v 18 Niise omulamu mwene; nali nfwiiye, khandi wona ndi mulamu emirembe nende emirembe! Khandi ndiiye ebisimuluso byo’khufwa nende esyalo sya’bafu.
\v 19 “Nolwesyo, wandiika, byoweene, ebyawunanu nende ebiribawo yiwiicha.
\v 20 Ebyekisa by’eηiniηini musaanfu chiwawona mu mukhono kwange omulungi nende esye bisiindi bye saabbu musaanfu nje sino: ‘Eηiniηini musaanfu nje ba malayika abamakanisa musaanfu, khandi ebisiindi musaanfu nje amakanisa musaanfu.
\c 2
\p
\v 1 “Eyiri malayika we kanisa mu Efweeso wandiika oti: Chino nje emboosi ch’oyo odiiye eηηiniηini musaanfu mu mukhono kwaye omulungi khandi nga akendera mu bisiindi musaanfu eby’efweesa:
\v 2 Manyire ebikholwa byenywe, emirimo chenywe echa’maani nende okhwesimiirisa khwenywe. Manyire nti si munyala okhugumira abaatu ababi khandi mukhemire abo aberaanga okhuba abatume naye nga sinje lubali, khandi nga mu baweene nga’babacha.
\v 3 Mwesimiirisa khandi mwagumira ebidinyu khu lwe’riita lyange, nga simuweeyemo amaani.
\v 4 Naye sino nsibatakho: mulekhire okhudakha khwenywe okhwamberi.
\v 5 Mwichulise owuleeyi yi mwatula kho mwakwa! Mweyolobye manu mukhole ebiitu bimwakhola mu khuchaaka. Nimuteyolobya, ndiicha yimuli namalayo ebisiindi by’etaara lyenywe okhutula mu sifwo syaalyo.
\v 6 Naye muli nasino khu lw’owulayi wenywe: simudakha ebikholwa bya Nikolayiti, seesi bintadakha.
\v 7 Oli nende okhutwi, awulire omwooyo syawoolera amakanisa. Eyiri oyo owangula, ndimuwa owunyala okhulya khu musaala okwo’wulamu, okuli mu ndalo ya Weere.
\s Eyiri Ekanisa Mu Sumuna
\p
\v 8 “Eyiri malayika ow’ekanisa mu Sumuna andiika ati: chino nje emboosi ch’oyo Owamberi khandi Osembayo, owafwa khandi kakowola mu wulamu.
\v 9 Manyire owudinyu wenywe nende owuwati wenywe__ ate nga muli bayiinda! Manyire owubacha wabo abawoola mbo ba Yudaaya ne sinje lubali, naye nga luwusano lwa Sitaani.
\v 10 Mutatya olwebyo ebicha okhubasandiya. Mbawoolera, omusuku acha okhuta balala khwinywe mwijeera okhubakhema, khandi mucha okhuwona esaando y’endaalo ekhumi. Mube abamasima, ata okhwoola khumbera ey’okhufwa, khandi ndibawa engule ey’owulamu.
\v 11 Oyo oli nende okhutwi, awulire omwoyo syawolera amakanisa. Oyo owangula syaliwumiya ata nende okhufwa okhw’okhubiri.
\s Eyiri Ekanisa Mu Perugamo
\p
\v 12 “Eyiri malayika owekanisa mu Perugamo andiika ati: chino nje emboosi ch’oyo oli nende okukhande kwooki ewuleka ne’wuleka.
\v 13 Manyire y’omenya__ yi Sitaani ali nesisaala sy’owenengo waye. Ate nga osikala owamasima khu lita lyange. Siwekaana enfukiirira yawo mwiise, ata nende mu ndaalo cha Antipa, omujulisi wange omwesikwa, yibetera mu siko syawo__ yi sitaani kamenya.
\v 14 Ne lusyakhaba siityo, ndi ne biitu bitono binkhwekanyisakho: oli nende abaatu eyo abeddiira khu nsomesa ya Bbalamu, owasomesa Bbalaki okhwingisa aba Yisirayiri mu sibi nga balya eby’okhulya bibaweresanga emisambwa khandi nende okhukholanga owudaamba.
\v 15 Mu mbya nasirala ewe weesi oli nende abo abediira khu khusomesa khwa Nikolayiti.
\v 16 Nolwesyo weyolobye! Nisitaba siityo, nja okhwicha wangu yuli khandi ndibalwanisa nende okukhande okwo’mukhanwa wange.
\v 17 Oyo oli nende okhutwi, akhoya awulire omwoyo syawoola eyiri amakanisa. Eyiri oyo owangula, ndimuwa khu mannu eyakisiwa. Khandi ndimuwa ekina erafu eriri nende eriita eyaakha niriwandiikirwekho, nga limanyirwe nende oyo yeŋŋene olifuna.
\s Eyiri Ekanisa Mu Suwatira
\p
\v 18 “Eyiri malayika owekanisa mu Suwatira andiika ati: chino nje emboosi ech’omwana wa Weere, owe’moni echememula ng’omuliro khandi owamakulu akali nga omugasa okuli mu kuliro kungi.
\v 19 Manyire ebikholwa byawo, okhudakha khwawo nende enfukiirira, owuweresa wawo nende okhwesimiirisa, khandi nga wunanu okhola okhukhirakho nga niwakhola olwataangira.
\v 20 Asyakhaba siityo, ndi okhukhwekanyisakho mu sino: Ogumira omukhasi ola Yeseberi, oweranga okhuba nabbi omukhasi. No’khusomesa khwaye akodiya abakhosi bange nabayira mu wudaamba nende mu khulya ebyo’khulya bibaweresa emisambwa.
\v 21 Muweeye ebikha keyolobye owubi waye, naye syakanya.
\v 22 Manu nja okhumukhubba khu sitanda esy’okhusanda, khandi nja okhukhola abo abakhola owudaamba ni naye basande lukali weene, okhutusakho nga beyolobya khu makira kaye.
\v 23 Ndikhubba abaana baye bafwa. Manu amakanisa kosi koosi kalimanya kaati niise oyo okonya emyoyo nende ebibaaso, khandi ndisasula nawuli syamulala khwinywe okhwema khu bikholwa byenywe nga lubiri.
\v 24 Wunanu mbolera enywe abasikaaye mu Suwatira, eyiri enywe abatediira khu nsomesa yaye khandi nga mutamanya Sitaani byalanga ati byaama byaye ebyo’mukati (sinja khubatakho enywe owusito wundi):
\v 25 Mwediire wusa khu bimulinabyo okhwoosa lu nakheche.
\v 26 Eyiri oyo owangula khandi kakhola bindakha okhwoola khunjakamo, ndimuwa owunyala khubyalo byoosi_
\v 27 ‘Alibafuka nende endawukhi eyesichuuma; alibasukuna nga ebikoloonjo eby’entamu’__ wusa nga ninfunire owunyala okhutula eyiri Bbaabbaa.
\v 28 Khandi ndimuwa eηηiniηηini ey’echuli.
\v 29 Oyo oli nende okhutwi, akhoyire awulire Omwooyo syawoola eyiri amakanisa.
\c 3
\p
\v 1 “Eyiri malayika owekanisa mu Saadi andiika ati: chino nje emboosi ech’oyo odiira emyooyo musaanfu echa Weere nende eηiniηini musaanfu. Manyire ebikholwa byawo; oli nende eriita eryo’khuba omulamu, naye oli mufu.
\v 2 Sisimukha! Yomiisa ebisikala ebiri ambi okhufwa, olwokhuba simbukaanire ebikholwa byawo nibichufu mu moni cha Weere wange.
\v 3 Nolwesyo, yichulisa, siwakhafunakho khandi wawulira; sifukiirire khandi weyolobye. Naye ni mutasisimukha, ndiicha nga omwiibi, khandi syulimanya bikha siina bindichiramo yuuli.
\v 4 Ate nga oli nende abaatu batono mu Saadi abatachafuwasa enguwo chawe. Balikenda nange, nibambaaye ebirafu, olwokhuba bakhoyera.
\v 5 Oyo owangula, okhubafwanana alyambala ebirafu. Sinditusa liita lyaye mu sitawo sy’owulamu, naye nditumbula eriita lyaye mu moni cha Bbaabbaa nende ba malayika baye.
\v 6 Oyo oli nende okhutwi, akhoyire awulire Omwooyo syawoola eyiri amakanisa.
\s Eyiri Ekanisa Mu Firaderufwiya
\p
\v 7 “Eyiri malayika ow’ekanisa mu Firaderufwiya andiika ati: chino nje emboosi ch’oyo omwolerefu khandi owamasima, owadiira esisimuluso sya Dawudi. Nikekulawo yiwuma onyala kekalawo, khandi sikeekala yiwuma onyala kekula.
\v 8 Manyire ebikholwa byawo. Wona, nteye yuli olwiki olwikule lu mutu yeesi atanyala kekala. Manyire nti oli nende amaani matono, ni olindire emboosi yange khandi khaba siwekaanire eriita lyange.
\v 9 Nja okhukhola abo abo luwusano lwa Sitaani, aberanga okhuba aba Yudaaya ate nga sibali, naye nga babacha__ ndibakhola becha bakwa assi wa makulu kawo kho bafukiirire baati nkhudakha.
\p
\v 10 Khasita odiiye esiragiro syange wesimirisa wulayi, seesi nja okhukhulinda okhutula khu saawa eyo’khukhemewa eyicha okhwikha khu syalo syoosi okhukhema abo abamenya khu syalo.
\v 11 Niicha wangu. Yomiisa syuli nasyo, kho omutu wundi akhaye okhuyira engule yawo.
\v 12 Oyo owangula ndimufuula okhuba ensiiro mu nyumba ya Weere wange. Syacha okhuyitulamo lundi. Ndimuwandikakho eriita lya Weere wange nende eriita ly’esiko sya Weere wange, Yerusalemi embyakha, eyikha okhutula mwikulu okhutula eyiri Weere wange; khandi ndi muwandikakho eriitta lyange eyaakha.
\v 13 Oyo oli nende okhutwi, akhoyire awulire Omwoyo syawoolera amakanisa.
\s Eyiri Ekanisa Mu Lawodikiya
\p
\v 14 “Eyiri malayika ow’ekanisa mu Lawodikiya andiika ati: chino nje emboosi cha Amiina, omwesikwa khandi omujjulisi owamasima, omutuki webironge bya Weere.
\v 15 Manyire ebikholwa byawo, nga syuli omunyifu oba omubafu. Siba nisinyalikha wakhabeye sirala khu byombi!
\v 16 Manu, olwokhuba oli omudunduumu__ nga syuli omubafu khandi nga syuli omunyifu__ ndi ambi okhukhufucha okhutula mukhanwa wange.
\v 17 Owoola oti, ‘Ndi omuyiinda; nafuna owuyiinda khandi mbuma sinekomba.’ Naye syumanyire oti oli omuwati, osasirwa, omuwofu khandi oli sichula.
\v 18 Nkhukeraka wungulekho esabbu eyabita mu muliro, kho onyale okhuba omuyiinda; nende enguwo endafu ech’okhwambala, kho onyale okhuwikha khu wumachula wawo owensoni; nende amate ok’okhubakha khu moni chawo, kho onyale okhuwona.
\v 19 Abo bandakha mbakhamukhira khandi mbakerakira. Manu ba omumalirifu, khandi weyolobye.
\v 20 Mbano ndi ano! Nemire amulyango nkhoηonda. Omutu yesi yeesi owulira ekono lyange manu kekulawo olwiiki, ndingira khandi nalya ni naye, khandi yesi atyo nange.
\v 21 Eyiri oyo owangula, ndimuwa owunyala okhwikhala nange khu sisaala syange esy’owen’engo, wusa nga ni nawangula khandi nekhala assi nende laata yange khu sisaala esy’owen’engo waye.
\v 22 Oyo oli nende okhutwi, akhoyire awulire omwoyo syawoola eyiri amakanisa.
\c 4
\p
\v 1 Binno nibiweye natingaala, nawona emutwe wange omulyango ni kwemire nga mwikule mwikulu. Khandi nende ekono linawulira olwamberi nirinomalomera ng’eturumbeete niriwoola liiti, “Yicha eno, male nkhwekese ebiri n’okhulondakho bino nibiweeye.”
\v 2 Wangu weene nali mumwoyo, ne mu moni wange yaliyo esisaala esy’owen’engo mukulu nende owali nasikhaayekho.
\v 3 Khandi oyo owasiikhalakho kali afwana, nga amakina akamekhamekhana aka Yasepi nende Sadiyo. Lufudu, ofwaana nende ekina lilangiwa mbo Sunalidi niryewodokhanisye esisaala syo’wen’engo.
\v 4 Okhwewodokhaniya esisaala sy’owen’engo byaliyo ebisaala bindi amakhumi kabiri nende bine eby’owen’engo, nga ababikhaayekho bali abakhuluutu amakhumi kabiri nende bane. Bali bambaaye ebirafu nende engule che Sabbu khu mitwe chawe.
\v 5 Okhumyesukha okhwekhubba khwatula mu bisaala by’owen’engo, amakono nende okhwadulukha khwe’nfula. Emutwe wesisaala sy’owenengo, yaliyo amataara musaanfu akali nikamekhamekhana chino nje emyoyo musaanfu echa Weere.
\v 6 Khandi emutwe we’sisaala sy’owen’engo yaliyo esyali ne’fwaana nga okuyanja okwegiraasi, niyimekhamekhana nga’makina akenfula. Akati weene, okhwewodokhoniya esisaala esy’owen’engo, yaliyo ebiitu ebyalongewa ebiramu bine, khandi nga bichuuye emoni, emutwe nende emukongo.
\v 7 Esironge esiramu esyamberi syali nga edalaηηi, esy’okhubiri syali nga esirusi, esyo’khudatu syali no’weeni nga omutu, esyokhune syali nga enkhokhotole eribburukha.
\v 8 Nawuli sirala khubironge bine syali nende embaya mukaaga khandi nga siwikhiiwe nende emoni syosi syoosi, ata nende mukati w’embaya. Esideete nende esiro sibyakhayanga okhuwoola biiti: “Omwolerefu, omwolerefu, omwolerefu nje Omwami Weere owo’wunyala wosi woosi, Owali, khandi oliwo, khandi oliicha.”
\p
\v 9 Nawuli biramu bironge ni byawanga oluyaali, okhwinamirwa nende okhwebasa eyiri oyo owikhala khu sisaala sy’owen’engo khandi oliwo emirembe n’emirembe,
\v 10 abakhuluutu amakhumi kabiri nende bane bakwa assi wooyo owikhala khu sisaala sy’owen’engo, khandi bamwekalikhira oyo obaawo emirembe ne’mirembe. Baala engule chawe mu moni ch’esisaala sy’owen’engo ni bawoola baati:
\q1
\v 11 “Okhoyera, Omwami wefwe khandi Weere, okhufuna oluyaali nende okhwinamirwa nende owunyala, olwokhuba walonga ebiitu byoosi, khandi no’khudakha khwawo byalongewa khakira biriwo.”
\c 5
\p
\v 1 Ni khandi necha nawona mu mukhono omulungi okwoyo owekhala khu sisaala esy’owen’engo esitawo nisirikho owuwandiike khu mbaande chombi khandi nisirikho emikhuuru musaanfu.
\v 2 Khandi nawona malayika owa’maani mwene nalangirira mu kono ery’amukulu ati, “Nanu okhoyera okhusangula emikhuuru chino khandi kekulawo esitawo?”
\v 3 Naye yiwuma mutu ata mulala mwikulu oba khu syalo oba assi we syalo owanyala okhwikula esitawo esyo ata no’khutingaalamo mukati wasyo.
\v 4 Nalira khandi naalira olwokhuba yawumayo omutu owali nakhoyera okhwikula esitawo ata okhutingalamo mukati wasyo.
\v 5 Ne mulala khu bakhuluutu kamboolera ati, “Otalira! Wona, Edalaηηi ye gwanga lya Yuda, omulandira kwa Daudi, awanguuye. Anyala okhwikulawo esitawo nende emikhuuru chasyo musaanfu.”
\v 6 Khandi necha nawona omwana wekoondi, nikuli nga kubakhengire, nikwemire akati we sisaala esy’owen’engo nikuwodokhanisirwe nende ebiloonge biramu bira nende abakhuluutu. Kali nende enjika musaanfu nende emoni musaanfu, nga nje emyooyo musaanfu echa Weere nichatumiwa mu syalo syoosi.
\v 7 Kecha katusa esitawo mu mukhono omulungi okwooyo owekhala khu sisaala esy’owen’engo.
\v 8 Khandi nikali namalire okhusiyira, ebiramu bine ebyalongewa nende abakhuluutu bala amakhumi kabiri nende bane bakwa assi mu moni cho'mwana kwekoondi. Nawuli otula kali nende erere khandi nibadiiye ebbakuli eche Saabu echichuuye owubbani, nga nje okhwekalikhira okhw’abolerefu.
\v 9 Manu bemba olwembo oluyaakha baati: “Niiwe okhoyera okhuwukula esitawo esyo nende okhwikula emikhuuru chasyo, olwokhuba wetewa, khandi namabanga kawo wakulira Weere abaatu Okhutula mu wuli gwanga nende olulimi nende abaatu nende esyalo.
\q1
\v 10 Obakholire okhuba owen’engo nende bakhawona okhuwereesa Weere wefwe, khandi balituka khu syalo.”
\p
\v 11 Manu necha natingaala khandi nawulira ekono lya bamalayika abangi, nga bali elifu ne’lifu, khandi amakhabi omutwaalo. Bewodookhaniya esisaala esy’owen’engo nende ebiramu biloonge nende abakhuluutu.
\v 12 Mu kono eryamukulu bemba baati: “Okhoyera nje omwaana kwekoondi, okwetewa, okhufuna owunyala nende owuyiinda nende amakesi nende amaani nende okhwinamirwa nende oluyaali nende okhukinisiwa!”
\p
\v 13 Manu nawulira nawuli sironge mwikulu nende khu syalo nende assi w’esyalo nende khu kuyanja, nende ebyo byosi byoosi ebibirimo, nibyemba biiti: “Eyiri oyo owikhala khu sisaala sy’owen’engo nende eyiri omwaana kwekoondi abe nende okhukinisiwa nende oluyaali no’wunyala, na’maani emirembe ne’mirembe!”
\p
\v 14 Ebiramu biloonge bine byawoola biiti, “Amiina,” khandi abakhuluutu bakwa assi bekalikhira.
\c 6
\p
\v 1 Newunja nga omwaana wekoondi nikekula omukhuuru kusookha khu mikhuuru musaanfu. Khandi nawulira sirala khu bironge bine nisiwoola mukono khongo nga enkhubba siiti, “Yicha!”
\v 2 Nawona, emutwe wange aliwo ensukhiri ndafu! Omwirusi wayo kali adiye oluyiingo, ne kayeresewa engule, khandi kerusya natula ng’okhira ocha okhukhira.
\v 3 Omwaana wekoondi ni kekulawo omukhuru kw’okhubiri, nawulira esilonge silamu esy’okhubiri nisiwoola siiti, “Yicha!”
\v 4 Olwo ensukhiri yindi ey’okhubiri enjalaba yatula eyifwana mabanga. Omwirusi wayo kaweresewa amaani okhuyiyira emirembe okhutula khu syalo khandi n’okhukhola abaatu okhwitana abeene na’beene. Yee kayereswa okukhande okw’owoki embaande chombi.
\v 5 Omwaana wekoondi ni khekula omukhuuru kw’okhudatu, nawulira esiloonge silamu esy’okhudatu nisiwoola siiti, “Yicha!” Newunja, khandi eyo mu moni change yaliyo ensukhiri mali! Omwirusi wayo kali adiye eratiri chibiri mu mukhono kwaye.
\v 6 Khandi nawulira esyafuka nge’kono ery’esilonge sy’okhune nisiwoola siiti, “Sirala syo’khune esye’kilo eye ηηano khu lw’omusaara kwo’ludaalo, nende ekilo chidatu echamabere khu lw’omusaara kw’oludaalo, khandi otanyaasa amafuta nende amalwa!”
\v 7 Ne omwaana wekoondi ni khekula omukhuru kw’okhune, nawulira ekono ly’esilonge sy’okhune nisiwoola siiti, “Yicha!”
\v 8 Newunja, khandi awo mu moni change aliwo ensukhiri eyasiwuukha! Omwirusi wayo ngalangiwa ati okhufwa, amakombe nga kamulondakho na awambi emukongo waye. Baweresewa amaani okhukhulira sirala sy’okhune esy’esyalo okhwitta nibikhosesa okukhande, enjala, ne’ndwaye, nende ekisolo ch’omwinyasi khu syalo.
\p
\v 9 Nikekula omukhuru kw’okhutaanu, nawona assi w’olutaari emyoyo echabo abali nibakhengewa olw’emboosi ya Weere nende owujjulisi wubali bomisise.
\v 10 Balanga mu kono ly’amukulu, baati, “Siriyira mbaka si, omwami w’owunyala, omwolerefu, khandi owa masima, lw’olyolera okhukhengera abaatu b’okhusyalo wabawoneresa olwa’mabanga?”
\v 11 Khandi nawuli otula khubo kaweresewa eganjuula elafu, khandi bawolerwa okhulindakhokho wutono, okhwola enamba njichufu eya bakhosi basyawe, abali abokwitiwa wusa nga lubali bakholirwe.
\p
\v 12 Newunja nga lukekula omukhuru kwo’mukaaga. Aliwo okhutenga khwamakana okhwe’syalo. Omubasu kwachuukha kwaba siirema nga enguwo yekuniya eyakholewa muwoya we’mbusi, omwesi kwoosi kwakalukhana kwaba mabanga,
\v 13 nende eηiniηini khukulu chakwa khu syalo, ng’emituli mibisi luchikwa nichitula khu musaala mutuli nikudenganisiwa no muyaka kufuuwa n’amaani.
\v 14 Ekulu lyakhamyukhawo ngo’lupapula, lyafumbiwa, nende wuli ngulu ne’bisiinga byatusiwawo mu sifwo syabyo.
\v 15 Manu abene’ngo bo’khusyalo, abasyaani ba bene’ngo, nende abakali mu maye, abayiinda, abamakana, nende nawuli muwambe no’mulekhule bekisa mu nηungu nende mu makina ko’khungulu.
\v 16 Balaanga engulu namakina nibawoola baati, “Mutukwekho mutukise mu moni cho’yo owikhala khu sisala syo’wene’ngo nende khuttima lyo'mwaana wekoondi!
\v 17 Khuba oludaalo lwamakana olwe’tima lyawe lwolire, khandi nanu onyala ka ligumira?”
\c 7
\p
\v 1 Bino nibyakhawa nawona ba malayika bane nibemire mu nsoonda chine eche’syalo, nibadiririye amabewo kane ake’syalo okhukayira embewo yoosi okhutawuucha khusyalo, oba khu kuyanja oba khu musaala kwoosi.
\v 2 Awo nawona malayika wundi natulira ewutula lyuba, nali no’mukhuuru kwa Weere mulamu. Kalanga mu kono khongo bamalayika bano bane abali nibayeresewa owunyala wo’khunyaasa esyalo nende okuyanja:
\v 3 “Mutanyasa esyalo oba okuyanja oba emisaala nikhutata omukhuuru khu weeni wa bakhosi aba Weere wefwe omulamu.”
\v 4 Khandi nawulira owungi wabo abali nibatewakho omukhuuru: 144,000 okhutula mu nyanyi choosi echa Yisirayiri.
\v 5 Okhutula mu lwanyi lwa Yuda bali 12,000 abalikho omukhuuru, okhutula mu lwanyi lwa Leubbeni 12,000, okhutula mu lwanyi lwa Gadi 12,000,
\v 6 okhutula mu lwanyi lwa Asheri 12,000, okhutula mu lwanyi lwa Nafutali 12,000, okhutula mu lwanyi Manase 12,000,
\v 7 okhutula mu lwanyi lwa Simoni 12,000, okhutula mu lwanyi lwa Lefwi 12,000, okhutula khu lwanyi lwa Isaka 12,000,
\v 8 ohutula mu lwanyi lwa Sebulooni 12,000, okhutula mu lwanyi lwa Yosefu 12,000, okhutula mu lwanyi lwa Benyamini 12,000.
\s Okudiikha kwamaani mu Maganjuula Malafu
\p
\v 9 Bino nibyawa ne’wuunja emutwe wange aliwo okudiikha kwamaani eyiwuma onyala kakubala, okhutula mu wuli syalo, wuli gwanga, abaatu no’lulimi, nibemire emutwe w’esisaala syo’wene’ngo nende emutwe w'omwaana wekoondi. Bali bambaye amaganjuula malafu nibadiiye amasaga ke’misaasa mu makhono kawe.
\v 10 Ngabalira mukono lya’mukulu baati: “Okhuwonesewa khwa Weere weefwe, owikhala khu sisaala sy’owene’ngo, nende eyiri Omwaana wekoondi.”
\v 11 Bamalayika bosi boosi bali bemire nibewodokhanisye esisala sy’owen’engo no’khwewodokhana abakhuluutu nende ebiitu Weere bikalonga bine. Bakwa khu makulu n’oweeni wawe emutwe we sisaala sy’owen’engo nibamwinamira Weere,
\v 12 nga bawoola baati: “Amiina! Enfuma no’luyaali na’makesi no’khwebasa no’khukinisiwa owunyala namaani bibe khu Weere weefwe endaalo choosi Amiina!”
\p
\v 13 Awo mulala khu bakhuluutu kanteeba ati, “Nibano abali mu maganjula malafu__ nje ba nanu, khandi batula yeena?”
\v 14 Nakowoolamo nti, “Ssebo, omanyire.” Naye kawoola ati, “Bano nje abo abatulire mu khusandisiwa khwa’maani; bosise amaganjuula kaawe banyala okhukalabya bakakhola kalafuwa okhubita mu mabaanga k’omwaana wekoondi.
\v 15 Nolwesyo, “bali mu moni chesisaala sy’owene’ngo wa Weere khandi bamuweresa esideete nesiro mu nyumba yaye; khandi ye owikhala khu sisaala sy’owen’engo kecha okhubabambulirakho eweema yaye.
\v 16 Si balikowolamo khandi okhuwulira enjala; si balikowolamo khandi okhuwulira owuluwo. Omubasu si kulibakhubba, Oba owubafu wusaamba lukali.
\v 17 Olwokhuba omwaana wekoondi oli akati w’esisaala sy’owen’engo nje oliba omwaayi wawe; alibatangirira eyiri ensulo cha’maachi ko’wulamu. Nende Weere alibasimuula wuli sika khu moni chawe.”
\c 8
\p
\v 1 Nikekulawo omukhuuru kwo’musaanfu, aliwo okhuwuleera mukulu okhwamala ambi esitundu sye saawa.
\v 2 Khandi nawona malayika musaanfu abeema awambi nende Weere, nende etuturumbete musaanfu echabaweresewa.
\v 3 Malayika wundi, owali nesikoombe sye’saabbu, kecha nikema khu alutaari. Kaweresewa owubbani wungi okhuwaayo, alala no’khwekalikhira khwa’bolerefu boosi, khu alutaari y’esaabbu emutwe w’esisaala sy’owen’engo.
\v 4 Omwosi kwo’wubbani, alala no’khwekalikhira khw’abolerefu boosi, byacha amukulu ewa Weere okhutula mu mukhono kwa malayika.
\v 5 Awene awo malayika kawukula esikoombe syo’wubbani, kechusamo omuliro okhutula khu alutaari, kakhasukuna khu syalo; khandi awo wechawo okhuchanjaalikhana khw’enkhubba, okhududuma, okhumyesukhana khw’olumyesu n’okhudengana khw’esyalo.
\s Amaturumbete
\p
\v 6 Awo ba Malayika abali na’maturumbete musaanfu batekekha okhukakhubba.
\v 7 Malayika wasokha kakhubba eturumbete yaye, nawene awo echawo amakina kenfula n’omuliro ni bidubaniye na’mabaanga, bino bya sukuniwa assi khu syalo. Sirala sy’okhudatu esy’esyalo sya sambiwa syawawo, sirala syo’khudatu esy’emisaala sya sambiwa, n’enyasi lifana wunyasi lya sambiwa lyawawo.
\v 8 Malayika wo’khubiri kakhuuba eturumbete yaye, n’esiitu syali ng’olugulu lukhongo, niludiye omuliro, syasukuniwa mu kuyanja. Sirala sy’okhudatu sy’okuyanja syakalukhana syafana mabaanga,
\v 9 sirala sy’okhudatu sy’ebiitu byalongewa mu kuyanja byafwa, khandi sirala sy’okhudatu sy’emeeri ch’ononewa.
\v 10 Malayika w’okhudatu kakhubba enturumbete yaye khandi eηiniηini ngali, niyadukha ng’etoki, yakwa okhutula khu kulu khu sirala sy’okhudatu sy’emyaalo nende khunsulo chamaachi__
\v 11 eriita lye’ηiniηini lyali akhawukha kho’lubbawo. Sirala sy’okhudatu sya maachi kakalukhana amalulu, ne abaatu bangi bafwa olwa’maachi kakalukhana kaba malulu.
\v 12 Malayika wo’khune kakhuuba eturumbete yaye, khandi sirala syo’khudatu esyo’mubasu sya’khubbiwa, sirala syo’khudatu syo’mwesi nende sirala syo’khudatu sye’ηiniηini, kho sinyalikhe sirala syo’khudatu khubyo byakalukhana sirema. Sirala syo’khudatu syo’ludaalo syawuma owulafu, khandi ne’siro syosi.
\p
\v 13 Nga lunali ne’wunjire, nawulira ekhokhotole eryali niribburukha akati wembewo, nirilangirira mu kono khongo liiti: “nga chibakanire!, chibakanire! Chibakanire khulwa’bamenyi bo khu syalo, olwokhuba eturumbeete chicha okhukhubbiwa nende ba malayika bandi badatu!”
\c 9
\p
\v 1 Malayika wo’khutaanu kakhubba eturumbete yaye, khandi nawona eηiniηini eyali niyikwiye okhutula khu kulu paka khu syalo. Eηiniηini yayeresewa olusumuluso lwe’syalo assi ekotero.
\v 2 Nikekulawo esyalo syawasi kotero, omwoosi kwatulamo okuli nga mwoosi kwafudumukha nga okutula khu kuliro kukhongo eryuba nende amukulu bya maliyisiwa no’mwoosi okutula assi kotero.
\v 3 Ne mu mwosi mwatulamo ensike chekha khu syalo chaweresewa owunyala owakakana nende ow’otweere cho’khu syalo.
\v 4 Chakaniwa okhutawumisa enyasi lyo’khu syalo oba esyaamo ata omusaala kwoosi, naye abaatu abo boηηene abatalikho omukhuuru kwa Weere khu weeni wawe.
\v 5 Sichayeresewa owunyala okhubeeta, naye okhubasandiya khwoηηene okhumala emyesi chitaanu. Ne’ngisa chabakaana chali ngo’khuwochewa khw’otweere niyiwochire omutu.
\v 6 Mu ndaalo echo abaatu balyekomba okhufwa, ne sibali khwakana; balyekomba okhufwa, naye nga okhufwa khuliberukha.
\v 7 Ensike chali oti fwana ensukhiri echitekekhirwe eye. Khu mitwe chacho chambala esiitu siri nge’ngule ye’feesa, no’weeni wacho nga wufwana oweeni owabaatu.
\v 8 Efwiiri lyacho lyali nge’fwiri lya’bakhasi, khandi na’meeno kacho kali nga ake’dalaŋηi.
\v 9 Chali nebyuma byambaliwa khu sirifu ebyali nge’bibya, khandi no’lukhero lwe’mbaya lwali nge’nkhubba ye’nsukhiri nyingi echikingire abalwani abeyuna okhucha okhulwana.
\v 10 Chali n’emikhinga chalikho entununu ngo’tweere, khandi mu mikhinga chacho chali n’owunyala ow’okhusandiya abaatu okhumala emyesi chitaanu.
\v 11 Chali nende owali nga omwene’ngo obakhulira malayika wa assi ekotero, owali ne’riita mu lwe’Bulaniya nga nje Abadooni, ne mu Luyonaani nga nje Apolyooni.
\p
\v 12 Esiwonereso sisokha siweye; bibiri biriyo biicha.
\p
\v 13 Malayika wo’mukaga kakhubba eturembete yaye, khandi nawulira ekono niritula mu njika chine echa olutaari ye’fweesa eyali mu moni cha Weere.
\v 14 Lyawolera malayika wo’mukaaga owali ne turumbeete liiti, “Lekhula ba malayika bane bala abawoyewa khu mwalo mukali okwa Yufeerete.”
\v 15 Ne ba malayika bano bane abali nibabikhirwe nibetekefu khu lwe’saawa yene yino, no’ludaalo khandi no’mwesi no’mwaka balekhuliwa okhwita esitundu syo’khudatu esyo’mutu yeesi.
\v 16 Owungi wabo abali baninire khu nsukhiri bali emilyoni emya chibiri. Nawulira owungi wawe.
\v 17 Ensukhiri nabachirusya banawona mu khuwonekherwa bafwana baati: ebyuma byo’khusirifu byali ebya mabanga, nga cha rabboki, nende namuki ngo’khwadukha khwe’sibiriiti. Emitwe ch’ensukhiri nga chifana nge’mitwe che’dalanηi, ne mu minwa chacho nga chitulamo omuliro, no’mwosi no’muliro.
\v 18 Sirala syo’khudatu syo’mutu syetewa nende endwaye chino chidatu echo’muliro, omwosi nende omuliro kwe’sibiriti okutula mu minwa chacho.
\v 19 Amaani ak’ensukhiri kali mu minwa chacho nende mu mikhinga chacho; khuba emikhinga chacho chali nge’njokha, echirikho emitwe chi chakhosesanga okhuwumisa abaatu.
\v 20 Abaatu boosi abali basikaye nibatetewa n’endwaye chino basikala nibateyolobisye emirimo cha makhono kawe; basikala nibatalekheye okhwinamira emisambwa nebilongalonge ebyakholewa mu feesa, saabu, mu mugasa, mu makina ne’mbaawo__ ebifwananyi ebitanyala khuwona, okhuwulira oba okhukenda.
\v 21 Ata sibanyala okhweyolobya owiiti wawe, owukholi wa mayiya kawe, owudaamba wawe oba owiibi wawe.
\c 10
\p
\v 1 Olwo nawona malayika wa makana wundi nikekha assi okhutulo mukulu. Kawoyewa mu ganjula mu sireesi, nende lufudu amukulu wo’mutwe kwaye; oweni waye wali nge’ryuba, namakulu kaye kali nga’matakoola ko’muliro.
\v 2 Kali adiye esitawo sitono, esyali sibambule mu mukhono kwaye. Kataaka okhukulu khwaye khulungi mu kuyanja no’khukulu khukooda mu syalo,
\v 3 manu kakhumula nekono kali ng’okhwaana khwe’dalaηηi. Nikamala okhukhumula, amakono akekhubba musaanfu kaddulukha.
\v 4 Ne enkhubba chino munsaafu nichalomaloma, nali awambi okhuwandiika; ne nawulira ekono nirutula mukulu niriwola liiti, “Khubba omukhuuru khu mboosi echibeye mu khwadulukha musaanfu ne syochiwandika.”
\v 5 Manu malayika ese yinali nimbwene nikemire khu kuyanja nende khu syalo kasingisa omukhono kwaye mulungi eyiri ekulu.
\v 6 Manu kamala kalayira mu litta lyoyo omulamu emirembe ne’mirembe, owalonga ekulu nebyo byoosi ebiririmo, esyalo nebyo ebisirimo, no’kuyanja nebyo ebikulimo kamala kawoola ati, “Siyecha khubawo esyo’khulindya ata nawutono lundi!
\v 7 Naye mu ndaalo cha malayika wo’musaanfu nichali chiri ambi okhukhubba eturumbete yaye, ebye’kisa bya Weere bicha okhwolerera, wusa nga lukalangirira eyiri abakhosi baye banabbi.”
\p
\v 8 Manu ekono linali nimbuliye okhutula mukulu khandi lyalomaloma yiindi liiti; “Cha, owukule esitawo sikukhire mu mukhono kwa malayika owemire khu kuyanja no’khu syalo.”
\v 9 Ne nacha eyiri malayika namusaba kambe esitawo sitono. Kambola ati, “siwukule omale osirye. Siicha okhukalukhaniya enda yawo yiluluwe, ne’mukhanwa wawo siicha okhunyunyula ngo’wuwukhi.”
\v 10 Nawukula esitawo sitono okhutula mu mukhono kwa malayika nasirya. Syali sinyunyula ngo’wuwukhi mu khanwa wange. Ne ninali nimalire okhusirya, enda yange yaluluwa.
\v 11 Bambolera baati, “otekwa okhulakula khu baatu bangi, ebyalo, enimi nende abene’ngo.”
\c 11
\p
\v 1 Naweresewa esibya esifwana nge’kadda nga esipiimo syo’khukerera khandi nawolerwa nti, “Cha okere enyumba ya Weere nende alutaari, khandi obale abasaba bali awo.
\v 2 Naye otatakho esisenge sye’rwanyi; otasikera, khu lwokhuba syayeresewa abateende. Balisenakirira esifwo syolerefu okhumala embaka ye’myeesi 42.
\v 3 Nja okhuwa abajjulisi bange babiri owunyala, bamale balakule okhumala endaalo 1,260, nibali mu byambalo byamaguniya.”
\v 4 Chino nje’misaala mituli chibiri khandi ne bisindi bibiri ebya’mataara akeema mu moni cho’mwami owo’khusyalo.
\v 5 Nisiba mbo omutu yeesi akesakho okhubakholakho esibi, omuliro kutula mu minwa chawe chamalawo abasuku bawe. Yino nje engeri omutu yeesi odakha okhubakholakho abo owubi atekwa okhufwa.
\v 6 Bano baatu bali no’wunyala okhwikala ekulu enfula yikhaye okhukwa mu bikha bibaba balakula; khandi bali no’wunyala okhukalukhaniya amaachi kafukha amabaanga khandi bali no’wunyala owukhubba esyalo no’lumbe lwe mbya olwa wuli nkholo mu bikha bibadakhiyemo.
\v 7 Wunanu nibaba ni bamalire okhuwuulira emboosi, okusolo kucha okhutula yikwekhala kubaseete, kubakhise amaani, khandi kubeete.
\v 8 Emilambo chawe chicha okhukona khu makira ke’siko sikhongo, esifanirisiwa wusa syalangiwa Sodoma nende Misiri, eyo yosi Omwami wawe yibamukhomerera.
\v 9 Okhumala endaalo chidatu ne’situndu abasaacha okhutula mu batu boosi, ebikha, enimi, ne’byalo bicha okhwelolera emibiri chawe, khandi bachikayire okhusikhiwa.
\v 10 Abaatu bo’khusyalo bacha wusa okhusangalira okhufwa bakowolayo batawo omuyumo no’khuweresaniya ebiyanwa, khulwokhuba ba nabbi bano babiri basandiya abo abali abamenya khu syalo.
\v 11 Naye endaalo chidatu nesitundu ni chiweye omuuya kwo’wulamu okhutula eyiri Weere kwabengiramo, bema khu makulu kawe, okhutenga khwa’khubba abo abali ni babawene.
\v 12 Awo bawulira ekono khongo eritula mukulu niribawoola liiti, “Mwiche amukulu ano.” Bamala banina mukulu mu sireesi, abasiku baawe nibabewunjire.
\v 13 Mu saawa yene eyo aliwo embukuma yamaani nende eweema ye siko sikali yakwa. Abaatu elifu musaanfu betewa mu mbukuma eyo, nabawonamo batenga lukali boola bawa Weere wo’mukulu oluyaali,
\v 14 engisa yo’khubiri yiweeye; engisa yo’khudatu yiicha wangu wene.
\s Eturumbete Yo’musaanfu
\p
\v 15 Malayika wo’musaanfu kakhubba eturumbete yaye, abawo amakono makhongo mukulu, kawoola ati: “Owene’ngo wo’khusyalo wufukhire owene’ngo w’Omwami wefwe khandi owa Kuristo waye, khandi alifuka endaalo ne’ndaalo.”
\v 16 Khandi abakhulutu amakhumi kabiri nabane, abali nibekhaye khu bisaala byawe byo’wutuki mu moni cha Weere, benama oweeni wawe benamira Weere,
\v 17 nibawooola baati: “Khuwa okhwebasa yuli, Omwami Weere owamaani, oyo oliwo khandi owaliwo, khulwokhuba oyirire owunyala wawo wa’maani khandi ochakire okhutuka.
\q1
\v 18 Ebyalo byali netima; khandi etima lyawo lichire. Ebikha byolire ebyo’khukhengera abafwa, n’okhuwa abakhosi bawo akhasiimo ba nabbi nabolerefu bawo nende abo abaweresanga eriita lyawo oluyaali, abatono nabakali__ no’khusikhirisa abo abasikhirisa esyalo.”
\p
\v 19 Olwo enyumba ya Weere mukulu yekuliwawo, khandi mukati we nyumba ya Weere eryato lye’ndakano yaye lyawonekhana. Khandi wechawo okhumyensukha khwe’khubba, no’khwaddulukhana khwe’khubba, okhudengana khwe’syalo namakina kenfula masito ka’maani.
\c 12
\p
\v 1 Esiwonero syamaani esyo’khuwuka sya wonekha mukulu: omukhasi nikambaye eryuba, no’mwesi assi wamakulu kaye ne’ngule ekhumi nachibiri eche’ηiniηini khu mutwe kwaye.
\v 2 Kali ne’nda nga’lira mu wuchuuni nga lukali awambi okhwiwula.
\v 3 Khandi akhawonero khandi khawonekhana mukulu: okuyokha okwamakana okufwana mabanga okwali ne’mitwe musaanfu ne’njika ekhumi ne’ngule musaanfu khu mutwe kwakwo.
\v 4 Omukhinga kwakwo kweya sirala syo’khudatu sye’ηiniηini cho’khwikulu kwachichukha khu syalo. Okuyokha kutisya kwema emutwe wo’mukhasi owali awambi okhwiwula, kho sibe mbo kunyale okhusenakirira nikunyoba omwana ebikha byoosi akewulirwa.
\v 5 Kewula omwana we’sisyaani, ocha okhufuka ebyalo byoosi no’lwayiro lwe’sichuuma. Khandi omwana waye kabbakhuliwa paka amukulu eyiri Weere no’khwola khu sisala syaye esyo’wutuki.
\v 6 Omukhasi kerukha kacha mu sibarara musifwo Weere sikamutekekhera, yikakhalindiywe okhumala endaalo 1,260.
\p
\v 7 Khandi aliwo okhulwana eye mukulu. Mikayiri nende bamalayika baye balwanisa okuyokha, no’kuyokha kwosi nende bamalayika bakwo bosi balwaana nabo.
\v 8 Naye sibali namaani kamala, sakira bakhirwa bafwirwa esifwo syawe mukulu.
\v 9 Okuyokha kukali kwarugujiwa assi__ okuyokha okwa’khale okulangiwa omusiku oba setani, okosya esyalo syoosi. Kwarugujiwa khu syalo, nende ba malayika bakwo.
\v 10 Khandi nawulira ekono khongo okhutula mukulu niriwoola liiti: “Wunanu okhuwonesewa khwichire no’wunyala no’wenengo owa Weere weefwe, khandi no’wunyala wa Kurisito waye. Oba omuwaabi wa’baana beefwe, Oyo obawaabira mu moni cha Weere wefwe esideete ne’siro, amalire okhurugujiwa assi.
\q1
\v 11 Becha bamukhira okhubitira mu mabaanga komwaana wekoondi nende emboosi y’owujjulisi wawe” sibadakha wulamu wawe lukali ata n’okhunywa okhutula mu khufwa.
\q1
\v 12 Nolwesyo sangaala, enywe ekulu nende enywe abamenyamo! Ne chikhwakanire esyalo nende okuyanja, khu lwokhuba omusiku kekhire assi yimuli! Kechusiwa ne’ttima, khulwokhuba amanyire ati ebikha byaye bimbikiti.”
\p
\v 13 Ne okuyokha nikwawona kuuti kwali kurugujirwe khu syalo, kwayiima omukhasi owali nikewuye omwana we’sisyaani.
\v 14 Omukhasi kaweresewa embaya chibiri eche’khokhotole kali, kho sinyalikhe ye okhubburukha kole mu sifwo syamutekekherwa mu sibarara, yikakhalindiywe khu bikha, amakhabi n’esitundu sy’ebyo bikha, okuyokha yikutoola.
\v 15 Khandi okhutula mu munwa kw’okuyokha kwafucha amaachi ng’omwaalo, okhukhisa omukhasi khandi kamweyawo nikamubwomokhakho ngenfula yolukeka.
\v 16 Naye esyalo syayeda omukhasi syasama okhumira omwaalo okuyokha kukwabwomola okhutula mu munwa kwakwo.
\v 17 Awo okuyokha kwadirwa ettima khu mukhasi kwatula okhuchaka eye khu lwiwulo lwo’mukhasi__ abo abafukirira amalako ka Weere bomiisa owujjulisi wa Yesu.
\c 13
\p
\v 1 Khandi okuyokha kwema khu ntulo wo’kuyanja. Okusolo Erwanyi wo’kuyanja. Khandi nawona okusolo nikwicha nikutula mu kuyanja. Kwali nenjika ekhumi ne’mitwe musaanfu, ne’ngule ekhumi khu njika chakwo, ne khunawuli mutwe khwalikho eriita lyo’khufotokheresa.
\v 2 Okusolo kunawona kwali kufwana ne’ngwe, ne kwali namakulu kafana nakenani no’munwa nga okweddalaηi. Okuyokha kwaweresa okusolo owunyala wakwo nesisaala syo’wutuki no’wunyala wubitirifu.
\v 3 Mulala khu mitwe cho’kusolo kwali ngo'kulikho ekonjo lya nawakhwaku, ne ekonjo lya nawakhwaku lyali kawona. Esyalo syosi syoosi syecha syawuka khandi syalonda okusolo.
\v 4 Abaatu benamira okuyokha khu lwokhuba kwali kuweye okusolo owunyala, khandi bosi benamira okusolo khandi bateeba baati, “Nanu oli nga okusolo? Nanu onyala kakulwanisa mu’ye?”
\v 5 Okusolo kwaweresewa omunwa okhufucha emboosi cho khwepaakha necho’khufwotokheresa khandi no’khukhosesa owunyala wakwo okhumala embaka ye’myeesi kane nachibiri.
\v 6 Kwasama omunwa kwakwo okhufwotokheresa Weere, nesifwo sikamenyamo abamenya mukulu.
\v 7 Kwayeresewa amaani okhukhola eye nga kulwanisa abolerefu no’khubawangula. Khandi kwayeresewa owunyala khu wuli gwanga, baatu, enimi, nende nawuli syalo.
\v 8 Wuli mu menyi w’okhu syalo alinamira okusolo__ abo boosi abatali na meta kawe nikatawandikiwa mu sitawo syo’wulamu esyo'mwaana wekoondi owetewa okhutula mu khulongewa khwe’syalo.
\v 9 Oyo oli no’khutwi, awulire.
\v 10 Nisiba mbo omutu akhoyire ayiriwe mu wuwaambe, mu wuwambe aliyiriwa. Ni abawo mbo wo’khwitiwa n’okukhande, no’kukhande alitiwa. Sino siba sidakha okhuba akhwekhalirikha, okhwesimirisa ne’ nfukirira khuluwande lwabolerefu. 
\s Okusolo kutula mu Loba
\p
\v 11 Awo khandi nawona okusolo kundi, nikutula mu loba. Kwali ne njika chibiri ngomwaana wekoondi, ne nga alomaloma ngo okuyokha.
\v 12 Kwekesa owunyala woosi nga owo’okusolo kwasokha mu sifwo syakula, khandi kwayinga esyalo nabasimenyakho okhwinamira okusolo kwasokha, okwene konjo lya nawakhwaku elyali ni lyawona.
\v 13 Khandi kwakhola owuwonero wuwukya lukali, khandi nga kukhola omuliro nikukwa khu syalo okhutula mukulu abaatu boosi nibakuwona mu wichufu.
\v 14 Khulwo wuwonero kwaweresewa amaani okhukhola mu sifwo syo’kusolo kwasokha, kabachirisa abamenyi bo khu syalo. Kabalagira okhutekekhawo esifananyi syo’luyaali lwo’kusolo nikwatewakho embala no’kukhande naye nga kusiiri kulamu.
\v 15 Kwaweresewa amaani okhuwa omuuya kwo’wulamu eyiri esifananyi esyo’kusolo kwasokha, kho kunyale okhulomaloma no’khukhola boosi abakhaya okhwinamira esifananyi okhwitiwa.
\v 16 Okhumeeda khwisyo kwayinga wuli mulala, omutono no’mukali, omuyiinda no’muwati, omulekhule no’muwaambe, okhufuna akhawonero khu mukhono mulungi oba mu weeni,
\v 17 kho sibe mbo awumawo yeesi onyala okhukula oba okhukusa okhutusakho nga alikho akhawonero, nga nje eriita lyo’kusolo oba nj’enamba ye’riita lyakwo.
\v 18 Bino bidakha amakesi. Ni aliwo omutu yeesi owamakesi, akesekho abale enamba echo’kusolo, khulwokhuba enamba chakwo cho’mutu. Enamba chakwo chiri 666.
\c 14
\p
\v 1 Khandi newunja, ne mumoni change aliwo omwaana wekoondi, nikemire khu lugulu lwa Sayuni, ne alala naye aliwo 144,000, abali neriita lyaye ne’rita lya simwana niryawandikiwa khu weeni wawe.
\v 2 Khandi nawulira okhuwuuma okhutulira mukulu nikhuworoota nga okhuworoota khwa’maachi kerukha lukali khandi nga okhwadulukha khwenkhubba. Okhuwuuma khuno khunawulira khwali nga abakhubbi bamalere nibakhubba amalere kawe.
\v 3 Khandi bemba olwembo luyakha nga bembera esisala syo’wutuki khandi nga bembera ne bilonge biramu bine na bakhuluutu. Awumawo omutu yeesi owanyala okhweka olwembo okhutusakho bano 144,000 abali nibawonesewe okhutula khu syalo.
\v 4 Bano nje abo abali nibatanyasikha olwo khwekhubbaniya nabakhasi, khuba berinda ni bali endikho. Balonda omwaana wekoondi wuli yikachanga. Bakuliwa okhutula mu basaacha khandi baweresewayo nga ebyamo bisokha eyiri Weere nende omwaana wekoondi.
\v 5 Mu minwa chawe mwawumamo owubacha; bawumakho esyo’khubolobya.
\s Ba Malayika Badatu
\p
\v 6 Manu nawona malayika wundi nabburukha akati mu mbewo, ne kali nenjiri yitawawo eyo’khuwuulira eyiri abo abamenya khu syalo__ eyiri wuli syalo, khu ebikha, enimi nabaatu.
\v 7 Kawoola mu kono khongo, ati, “Tya Weere khandi muwe oluyaali, khulwokhuba esaawa yo’khukhengerwa emisango yolire. Mwinamire oyo owakhola ekulu, esyalo, okuyanja ne’nsulo cha’maachi.”
\v 8 Malayika wo’khubiri kalondakho khandi kawoola ati, “Yikwiye! Yikwiye nje Bbabbulooni Ngali, eyakhola ebyalo byoosi okhunywa omwenge okukwisakho elalu olw’owudaamba wasyo.”
\v 9 Malayika wo’khudatu kabalondakho kabawola mukono khongo ati: “Ni abawo omutu yeesi owinamira okusolo n’esifanani syakwo khandi kamala kafuna akhawonero khu weeni oba khu mukhono,
\v 10 ye, yesi, alinywa khu malwa aketima lya Weere, akachukhiwa mu maani matufu mu sikombe syetima lyaye. Alisandisiwa no’muliro kwadukha mu moni chaba malayika bolerefu nende omwaana wekoondi.
\v 11 N’omwosi kutula khunsando yawe kuliniina endaalo ne’ndaalo. Awuma okhuwumula esiro nesideete eyiri abo abenamira okusolo nesifananyi syakwo, oba eyiri omutu yeesi ofuna akhawonero khe’rita lyakwo.”
\v 12 Sino sidakha okhuba abagumu okhwesimirisa khu luwande lwa’bolerefu abawulira ebiragiro bya Weere manu basikala mu nfukiirira eyiri Yesu.
\v 13 Khandi nawulira ekono okhutula mukulu niriwoola liiti, “Wandiika oti: Baweresewa enkhabi abafu abafwira mu mwami okhutula wunanu no’khuchanakana.” “Eee, Nje awoola omwoyo, “Baliwulukha mu mirimo chawe, khu lwokhuba ebikholwa byawe biribalondakho.”
\s Okhukesa Khwe Syalo
\p
\v 14 Newunja, khandi assi wange aliwo esireesi sirafu, ne khusireesi khwali khwikhayekho omutu owali nga “omwana wo’mutu” nali nengule ye ssabbu khu mutwe kwaye ne’ngeso njoki mu mukhono kwaye.
\v 15 Khandi malayika wundi katula mu nyumba ya Weere kalanga mu kono khongo oyo owali nikekhaye khu sireesi ati, “Wukula engeso yawo okese, khulwokhuba ebikha byo’khukesa byolire, ebyo’khukesa khwe’syalo bilabire.”
\v 16 Sakira oyo owali kekhaye khu sireesi kawuuba engeso yaye amukulu we’syalo ne’syalo sya’kesewa.
\v 17 Malayika wundi kecha katula mu nyumba ya Weere mukulu, khandi yesi kali ne’ngeso enjoki.
\v 18 Lundi malayika wundi, nga nje olinda omuliro, katula khu alutari kalanga mu kono khongo oyo owali ne’ngeso enjoki ati, “Wukula engeso yawo enjoki owuse ebiwaku bye’misabbibbu che’syalo, khuba emisabbibbu chakwo chilabire.”
\v 19 Malayika kawuuba engeso yaye enjoki khu syalo, kawuusa emisabbibbu chasyo kachisukuna mu sikhunyiro sya’maani esyetima lya Weere.
\v 20 Chasenakirwa mu sikhunyiro erwanyi wesiko, na’mabaanga kasulula nikatula mu sikhunyiro, nikanina nga ebikhandakiro by’ensukhiri olukendo oba owubambali efuti 1,600 okhunina amukulu.
\c 15
\p
\v 1 Nawona mukulu akhawonero khamaani khandi nga khamakana: malayika musaanfu nende olumbe olusembayo amakhabi musaanfu__ olusembayo, khulwokhuba mulwo etiima lya Weere liriba lyolereeye.
\p
\v 2 Khandi nawona esyali sifwana ng’okuyanja kw’emonero okutawuywe no’muliro, nga kwemire ambi no’kuyanja, abo abali nibawanguye okusolo ne’sifwanani syakwo khandi amukulu wakwo ngo’wuungi we’ritta lyakwo. Badiira amalere akabayeresewa nende Weere
\v 3 khandi bemba olwembo lwa Musa omukhosi wa Weere khandi no’lwembo lwomwaana wekoondi: “Bikali khandi byamakana nje ebikholwa byawo, Omwami Weere obakhira boosi. Owakaniya khandi owamasima nje engira chawo, Omwene’ngo we’mirembe chosi choosi.
\q1
\v 4 Omwami, nanu otalikhutya, No’khuleeta oluyaali khu liita lyawo? Khulwokhuba ewe weηene oli mwolerefu. Ebyalo byoosi biricha byakhwinamira mu moni chawo, khulwokhuba ebikholwa byawo bikololofu bimalire byakisuliwa.”
\p
\v 5 Bino nibiweye newunja mwikulu enyumba ya Weere, nga nje ensanduku eyo’wujulisi, eyekuliwawo.
\v 6 Okhutula mu nyumba ya Weere mwatulamo bamalayika musaanfu n’olumbe amakhabi musaanfu. Nga bambasiiwe enguwo nyonjo, echimekhamekha nga bambasiiwe otujwenge twe feesa khu birifu okhwewodokhaniya.
\v 7 Nawo sirala khu bilonge bine ebilamu byawa bamalayika bano musaanfu amabbakuli ke’feesa musaanfu akechusiwa ne’tima lya Weere, obawo endaalo ne’ndaalo.
\v 8 Khandi enyumba ya Weere yechusiwa n’omwoosi okutula khu luyaali lwa Weere nende khu maani kaye, yawuma omutu yeesi owakhanyala okhwingira mu nyumba ya Weere okhwola nga olumbe amakhabi musaanfu olwa malayika musaanfu niluweeye.
\c 16
\p
\v 1 Khandi nawulira ekono elyamukulu okhutula mu nyumba ya Weere nirowoola ba malayika musaanfu liiti, “Muche, muchukhe amabbakuli musaanfu ake’tima lya Weere khu syalo.”
\v 2 Malayika osokha kacha kachukha ebbakuli yaye khu lukerekha, amakonjo kachuna lukali kadiira abaatu abali nakhawonero kho kusolo nga benamira esifwanani syakwo.
\v 3 Malayika wo’khubiri kachukha ebbakuli yaye khu kuyanja, yakalukhana mabaanga nga’komusaacha mufu, nawuli silamu syali mu kuyanja syafwa.
\v 4 Malayika wo’khudatu kachukha ebbakuli yaye khu myalo n’omunsulo cha’maachi, kafukha mabaanga.
\v 5 Awo nawulira malayika olabirira amaachi nawoola ati: “Muli wusa mu khukhengerwa chino misaango, enywe abali nende aballi, abo abolerefu, khulwokhuba mukhengire mutyo;
\v 6 khuba bedisa amabaanga kabolerefu bawo nende ba nabbi, khandi enywe mwabawa amabaanga okhunywa nga lubakhoyera.”
\v 7 Khandi nawulira khu olutaari niyikowolamo yiiti: “Yee, Omwami Weere owamaani amasima no’khwakaniya, nje enkhenga yawo.”
\v 8 Malayika wo’khune kachukha ebbakuli yaye khu lyuba, ne’ryuba lyawewa amaani okhusamba abaatu no’muliro.
\v 9 Basambiwa no’woki wo’wubafu khandi bawaaba eriita lya Weere, owali no’wunyala khu lumbe luno, ne bakaana okhweyolobya no’khumufumiya.
\p
\v 10 Malayika wo’khutaanu kachukha ebbakuli yaye khu sisala syo’wutuki syo’kusolo, no’wenengo wo’kusolo wakwa musireema. Abaatu bekukuna enimi chawe mu wuchuuni
\v 11 khandi bawaaba Weere wo mukulu khu lwa’machuuni kawe namakoonjo, ne bakaana okhweyolobya khu ebyo bibali nibakholire.
\v 12 Malayika wo’mukaaga kachukha ebbakuli yaye khu mwaalo mukhongo Yufureeti, khandi amaachi kakwo kecha komerera okhutekekha engira Ya’bene’ngo batulira ewutula lyuba.
\v 13 Olwo nawona emisambwa chidatu echali chifwana namakhere; chatula mu munwa kw’okuyokha, omunwa kw’okusolo, no’mu munwa kwo’mu nabbi mubacha.
\v 14 Chali emyoyo che’misambwa echikhola owuwonero wa mayiya, nichitula erwanyi okhucha mu benengo be’syalo syoosi okhubawuusa alala mukhulwana eye khu ludaalo lukhuluutu olwa Weere wo wunyala woosi.
\v 15 “Mwekhalirise, nicha ngo’mwibi! Ali ne’nkhabi oyo osikala namoka khandi nga asikala ne’nguwo chaye, akhaye khusikala sichula nikanulukhire munsoni.”
\v 16 Khandi bawuusa Abene’ngo alala mu sifwo silangiwa mu lwe’bbulaniya baati Arumagedoni.
\p
\v 17 Malayika wo’musaanfu kachukha ebbakuli yaye mu’bbanga, khandi mu nyumba ya Weere mwatulamo ekono khongo okhutula khu sisala sy’owutuki, niriwoola liiti, “Siweye!”
\v 18 Awo echawo okhumyesukha khwo’wulafu, okhududuma, no’khumyesukha khwenkhubba khandi nende embukuma yitisya ey’esyalo ey’amaani. Ali awumakhowo embukuma yitisya okhutula abaatu babe khu syalo, okhutengerekha khwali okhwa’maani akabitiriye.
\v 19 Esiko sikhuluutu sya’kawukhanamo ebitundu bidatu, n’ebiko by’ebyalo byawungulukha. Weere kakhewulira Bbabbilooni eya’maani khandi kayiwa esikombe esichuuye amalwa mululu ne’tima lyaye.
\v 20 Wuli sisinga syerukhayo n’engulu wakhaya okhuchakanawo.
\v 21 Okhutula khukulu amakina kenfula masito akeratiri emya wuli litula kakwa khu baatu. Khandi bawaaba Weere okhwema khu lumbe olw’amakina kenfula, khu lwokhuba olumbe olwo lwali lw’amakana.
\c 17
\p
\v 1 Mulala khu ba malayika musaanfu owali ne’bbakuli musaanfu kecha kambola atti, “Yicha, nja okhukhwekesa esiwonereso sya’malaya owa’maani, owikhala khu maachi mangi.
\v 2 Nende abene’ngo bo khu syalo abakhola owudaamba khandi abatu bosi abo’khu syalo bameera amalwa ko’wudaamba waye.”
\p
\v 3 Khandi malayika kanginga kambira mu mwoyo khu sibbarara. Eyo nawonayo omukhasi owikhaye khu sisolo sifwana mabaanga esyalikho ameeta kafwotokheresa nga ali ne’mitwe musaanfu ne’njika ekhumi.
\v 4 Omukhasi kali kambaaye enguwo cho’mudowa kwa rabboki khandi nga mabaanga, khandi nga ffesa yimekhamekhana, namakina kebbeyi ako’wuyiinda. Kali adiiye esikombe sy’efeesa mu mukhono kwaye, nikwichuye ebiitu by’owuwemu ne’byowukhwe, nga bitula mu wudaamba waye.
\v 5 Esiwandiiko sino syawandiikiwa mu weeni waye ni sisoma siiti: EBYEKISA BBABBILOONI SIKHULUTU MAMA WA BAMALAYA KHANDI NO’WUWEMU WE’SYAALO.
\v 6 Nawona nti omukhasi kali nanyweye nameeye amabaanga ka bolerefu, amabanga kabo abali no’wujulisi khu Yesu. Ni namuwona, nesindukha lukali lwene.
\p
\v 7 Awo malayika kamboola atti, “Lwasina wesindukha? Nicha okhukhwekesa esyama esyakisiwa esyo’mukhasi nende okusolo kukekhayekho okulikho emitwe musaanfu ne’njika ekhumi.
\v 8 Okusolo, kuwawona kwaliwo, wunanu kuwumawo, khandi kulitula muliina litakama ni kumala kucha mu khusikhirisiwa khwakwo. Manu abaatu bamenya khu syalo abali na’metta akatawandiikiwa mu sitawo esyo’wulamu okhutula esyalo sichake balyesindukha lukali nibaliwona okusolo, khulwokhuba olwamberi kwaliwo, ni wunanu sikuliwo, ne khandi kuliicha.
\v 9 Sino sidakha owongo namakesi. Emitwe musaanfu nje engulu musanfu omukhasi khukekhala.
\v 10 Yiriyo abene’ngo bosi musaanfu. Bataanu bakwiiye, mulala aliwo, owundi asiri okhwicha; ne namala kecha atekwa okhubawo esikha sitono.
\v 11 No’kusolo okwaliwo olwamberi, ne wunanu sikuliwo, nje omwen’engo wo munana. Ali mulala khu musaanfu khandi yesi alinda okhusikhirisiwa khwaye.
\v 12 Enjika ekhumi chiwawoona nje abene’ngo ekhumi abatafuna owene’ngo, naye khulwe’mbaka ye’saawa ndala abalifuna owunyala wo’wutuki nga bene’ngo alala no’kusolo.
\v 13 Bali ne’sigendererwa sirala khandi baliyeresewa amaani kawe no’wunyala wawe okusolo.
\v 14 Bacha okhukhola eye nibalwanisa Akhakondi, naye Akhakoondi khalibayingira khulwokhuba nje Omwami wa baami khandi Omwene’ngo wa bene’ngo__ khandi ni naye balibawo abaaye balange, abadoole khandi abafukirisi besikwa.
\v 15 Khandi malayika kamboola atti, “Amaachi kawawona, Malaya yikekhala, nje abaatu, ebidiikha, ebyalo ne’nimi.
\v 16 Okusolo nenjika ekhumi biwawona birisyuula Malaya. Birimwosa khu khusikhirira byamulekha machula; birirya omubiri kwaye khandi byamusamba no’muliro.
\v 17 Khuba Weere abiteeye mu myoyo chawe okhwoseresa esigendererwa syaye olwokhufukirira okhuwa okusolo owunyala okhufuka, okhwosa emboosi cha Weere lu chilyolerera.
\v 18 Omukhasi yiwawona nje esiko sikhongo esifuka amukulu wa benengo bo’khu syaalo.
\c 18
\p
\v 1 Bino nibiweye nawona malayika wundi nekekha okhutula mukulu. Kali no’wunyala wungi, khandi esyalo syecha syamulisiwa no’wulayi waye.
\v 2 Kakhumulira amukulu ne’kono lyo’wunyala atti: “Akwiiye! Akwiiye nje Bbabbilooni ngali! Asikaye edaala lye’bikhyeeno alala ne’myoyo mibi, aninirwe ne’bitu byo’mufuto bya nawuli sikha ne’nyooni y’emisiro.
\v 3 Khuba ebyaalo byoosi byanywa khumalwa kaye ake’ralu lyaye eryo’wudamba. Abene’ngo bo’khu syaalo boosi bamala okhukhola owudamba naye, Nabasuwusi bo’khu syaalo bayiindiyaye okhutula khu khuchakala khubitirifu okhwo’wuyiinda waye.
\p
\v 4 Khandi nawulira ekono lindi okhutula mukulu nirilomaloma liiti: “Mu mutulemo, baatu bange, khu sinyalikhe enywe okhutakabana naye mu bibi byaye, kho munyale okhutafuna khu lumbe lwaye;
\v 5 khuba ebibi byaye byekholire akhafuumi okhwola mwikulu, khandi Weere kechulisise ebibi byaye bikakhola.
\p
\v 6 Mu mukowosere yesi nga lu kabawa; mu musasule amakhabi kabiri khu ebyo bikakhola. Mu mutawulire khabiri khu situndu mu sikombe syaye omwene.
\v 7 Mu mukhubbe nga lusinyalikha ne’nsando ngo’luyaali n’owuyiinda nga bikewa omwene. Mu mwoyo kwaye kefumya, nokhwedakha atti; ‘Nikhala nga nalulingiriiye; sindi mufwire, khandi sindimokosakho masika.’
\v 8 Nolwesyo mu ludaalo lulala Olumbe lwaye lulimuyira: okhufwa, okhulira ne’njala. Aliriiwa n’omuliro, khuba omukali nje Omwami Weere omukhengera omusaango.
\p
\v 9 “Awo abene’ngo bo’khu syalo abakhola owudaamba naye khandi bakabana owuyiinda waye nibaliwona omwoosi kwo’khuya khwaye, balirira no’khumoosa amasika khu lwaye.
\v 10 Nibatiiye lukali olwokhusanda, balyema ale khandi baalira baati: “’Wowe! Wowe, Oo esiko sikali, Oo Bbabbiloni esiko syamaani! Mu bikha bye saawa ndala engisa no’khusikhirira khwawo khwolire!’
\v 11 “Abasuwusi bo’khusyalo balirira bamoosa amasika khu lwaye khuba awumawo yeesi olikula emikuku chawe ata olundi__
\v 12 Emikuku che’ssabbu, effeesa, amakina ke’bbeyi katali nasirala; nenguwo chifwana mabaanga, emisaala eche’mbewo, ne’mbya che’biitu ebikholewa mu meno kenjofu, embaawo ch’owukusi wamukulu, ebye’migasa, ebye bichuma na makina ke’bbeyi ngali.
\v 13 Ne’mikuku cha Ninamooni nende bibata mu lyaani, owubbani, miira nende amafuta akawunya akhawowo, no’wusye wunusye, neηηano; eηηombe na’makoondi; enfarasi, ebiggali bikhwesewa; emibiri ne’myoyo cha’baatu.
\v 14 Baliwola baati, “Esyaamo siwekomba sikhutulirekho ewe. Eby’owuyiinda wawo nende biwekhoyeramo byolobereye okhutakowosewa khandi.”
\v 15 Abasuwusi abakusa ebiitu bino khandi nibafuniremo okhuyindiwala okhumutulakho balyemera ale, no’wuti khulwo’khusaanda khu kalimo.
\v 16 Balilira bamokoosa amasika baati: “’Wowe! Wowe, Oo ewe esiko sikhongo, esyambasiwa enguwo cha solume, ech’ewookha nende echifwana mabaanga, khandi ngo’mekhamekhana no’khwewikhakho emigasa che’ssabbu, namakina kebbeyi nende eluru!
\v 17 Mu saawa ndala owuyinda wakwo wamaani wusikhirisiwe!’ “Wuli mwiruusi w’emeeri mukhulutu, nabo boosi abalikho, nabo abafuna omusara khu meeri no’mu kuyanja balyeema ale nayo.
\v 18 Nibawona omwoosi okutula khu khusambiwa khwaye, baliwuka baati, ‘Ali khowo esiko sikhoongo nga sino?’
\v 19 Baliwanyakho olufu khu mitwe chawe, nibalira no’khu mokoosa amasika nibawoola baati: “’Wowe! Wowe, Oo esiko sikhoongo, eyiri boosi abali mu meeri khu kuyanja bafuna owuyiinda nibabitira mu wuyiinda waye!” mu sawa ndala amalire okhusikhirisiwa!
\p
\v 20 Wekhoye khu lwaye, Oo Ekulu! Mwekhoye, enywe abolerefu nende abatume nende ba Nabbi! Weere amukhengeye omusaango mungeri yikababisiryamo.’”
\p
\v 21 Khandi malayika wamaani mukhulutu kecha kakiinga ekina eryakana no’lukina kalisukuna mu kuyanja namala awoola atti: “Yino nje embya esiko sikhuluutu esya Bbabbilooni yisirisukuniwa assi, okhutakaaniwa lundi.
\v 22 Enyembo cha bakhubbi ba malere n’abembi, abakhubbi bamalere, nenturumbete, sibaliwulirikha khandi. Awuma omutu yeesi owowusubusi olyakanikha mwiywe khandi. Ekono lyo’lukina lusya siririwulirikhana khandi.
\v 23 Owulafu we’taara siwulyaddukha mwiwe lundi. Ekono lyo’mweya nende ery’oddekhisye Siririwulirikhana mwinywe khandi. Abasuwusi bawo nje abali abasaacha bakhunufu be’syalo. Okhubitira mu wulakusi wawo esyalo syoosi syakosewa.
\v 24 Okhubitira mu yee kakaniwamo amabaanga, ka banabbi nende aka bolerefu, nende abo boosi abali ni betewa khu syalo.”
\c 19
\p
\v 1 Bino ni byawa nawulira esyafuka nge ekono ely’amaani lyabaatu bangi okhutula mukulu ni riwoola liiti: “Alleluyah! Owuwoniya no’luyaali khandi na maani bya Weere wefwe,
\q1
\v 2 khulwa masima no’khukhenga khwakaniyakaniya khwaye. Akhengera omudamba wa’maani owakosya esyalo olw’owudaamba waye. Kemeye okhwo khu kamukowosera khu lwa mabanga kabakhosi baye.”
\v 3 Khandi kalomalomera amukulu lundi atti: “Allelluyah! Omwoosi okumutulakho kuniina amukulu emirembe ne mirembe.”
\q1
\v 4 Abakhuluutu amakhumi kabiri nabane ne’bilonge bine byakwa asi byenamira Weere, owali nikekhaye khu sisala syo’wenengo. Khandi balira baati: “Amiina, Alleluyah!”
\v 5 Olwo ekono lyatula khu sisaala syo’wene’ngo niriwoola liiti: “Weere wefwe afumwe eyiri abakhosi baye abo abamutya, abatono, n’abakali!”
\v 6 Olwo nawulira esyafuka nga esidiikha syamakana, nga’maachi kakholomokha lukali khandi nga okhwaddulukha khwe’nkhubba, niyikhumula yiiti: “Alleluyah! Omwami weefwe Weere Owamaani koosi Omwami afuka.
\q1
\v 7 Khusangale khandi no’wusangafu aweresewe oluyaali! Khuba oweya wakhakondi wolire, ne omweya yesi ketekekhire.
\q1
\v 8 Enguwo cha fulyungu, endayi chiwonekha khandi nyonjo chimuweresewe okhwambala.” (Fulyungu ndayi chemirewo khu lwebikholwa bilungifu ebya’bolerefu.)
\p
\v 9 Awo malayika kambolera atti, “Wandiika otti, ‘Bali nenkhabi abo abalangiwa khu weeya okhulya esye’ngolobe nomwaana wekoondi!’” khandi kameedakho atti, “Chino nje emboosi ntufu echa Weere.”
\v 10 Okhuwulira sino namukwa mu makulu okhumwinamira yee. Ne kamboola ati, “Otasikhola! Esse ndi mukhosi wasyo nende ba mwanamawo abeddira khu wujulisi wa Yesu. Yinamira Weere! Khuba owujjulisi wa Yesu nje omwoyo kw’owunabbi.”
\s Omufuki khu Nsukhiri endafu
\p
\v 11 Nawona ekulu niryemire nirikule ne awo mu mooni wange mbona ensukhiri ndafu, omwirusi wayo alangiwa Ow’enfukirira khandi khandi Mutufu. Alamula kakaniya khandi akhola eye.
\v 12 Emooni chaye chiri ngo’muliro kwekeeka, khandi khu mutwe kwaye khulikho engule nyiingi. Ali ne’riita libamuwandiikakho nga omuutu yeesi syalimanyire okhutusakho yee omweene.
\v 13 Kambaaye ensibiro echenikhiwa mu mabaanga, ne’riita lyaye nje Emboosi ya Weere.
\v 14 Amaye ko’mukulu kali kamulonda, nikali khu nsukhiri ndafu mu wungi nikambaaye enguwo cha fulyungu, endafu enyonjo.
\v 15 Okhutula mu munwa kwaye mutulamo okukhande kwoki okw’okhulwanisa ebyalo byoosi. Acha okhutukira endawukhi yesichuuma,” Acha okhukhunyira enfwinyo mu sikhunyiro syetima lya Weere owo’wunyala woosi.
\v 16 Khulusibiro lwaye nende khutaango lyaye khulikho eriita ewandike liiti: OMWENE’NGO WABENE’NGO KHANDI OMWAMI WA BAAMI.
\p
\v 17 Khandi nawona malayika nikemire mu lyuba, owalirira mu kono lyamukulu eyiri amayoni koosi akali akati mu mbewo atti, “Mwiche mwewuse alala okhulya esye’ngolobe sya Weere,
\v 18 kho munyale okhulya omunofu okwa’benengo, abakhongo mu maye, nende abasaacha ba’maani abe nsukhiri nababafuka, khandi ne’minofu echa baatu boosi, abatali bawambe, nabawambe abatono na’bakali.”
\v 19 Awo nawona okusolo nende abene’ngo b’esyalo na maye kawe nibewusise alala okhukhola eye okhuseeta omufuki we’nsukhiri ne’ye lyaye.
\v 20 Naye okusolo kwadiiriwa, nakwo baliwo ba nabbi bo’wubacha abali nibakholire owuwonero wa mayiya mu litta lyakwo. No’wuwonero wuno kawukhosesanga okhubachirisa abo abali nende akhawonero kho kusolo khandi nga benamira esifananyi syakwo. Bombi basukuniwa mu nyanja y’omuliro okwa’maani nibalamu.
\v 21 Abasikaye betewa no’kukhande okwatula mu munwa okwo mwirusi we’nsukhiri, na mayoni koosi kecha keyinyaka enyama yabyo.
\c 20
\p
\v 1 Khandi nawona malayika nikekha natula mukulu, naali no’lusumuluso lw’erina litakama mu mukhono kwaye nadiye okujjegere okukhongo.
\v 2 Kecha kadiira okuyokha, okuyokha kula okwakhale, omusuku, oba setani, kamuwowa okhumala emyaka elifu ndala.
\v 3 Kamusukuna mulina eritakama, khandi kamwikalirawo khandi kakhoma nikomisira erala, olwo- khumulindirayo kho akhaye okhubachanga khandi ebyaalo ata okhumala emyaka elifu lu chakhawe. Sino nisiweye, atekwa okhulekhuliwa khu bikha bitono.
\p
\v 4 Nawona ebisaala byo’wutuki khu abo abaweresewa owunyala okhuba abalamusi. Khandi nawona emyoyo chaabo abali nibakhengewakho emitwe khu lwo wujjulisi wawe khu Yesu khandi khu lwe’mboosi ya Weere. Sibali nibenamiye okusolo oba esifwananyi syakwo khandi sibali bateywekho akhawonero khu weeni wawe atta no’khumakhono kawe. Basyukhisiwa bafuka nende Kurisito emyaka elifu.
\v 5 (Abadoηηa sibasyukhira baba no’wulamu okhwola emyaka elifu ndala lu chawa.) Khuno nje okhusyukhira khusokha.
\v 6 Bali nenkhabi khandi bolerefu abo abali mu khusyukhira khusokha. Okhufwa khw’okhubiri khuwuma amaani khwabo, ne becha okhuba bakhawona ba Weere khandi aba Kurisito khandi balifuka naye okhumala emyaka elifu.
\s Engisa Ya Setani
\p
\v 7 Emyaka elifu ndala nichakhawa, setani alilekhuliwa okhutula mu jjera yaye
\v 8 khandi alitula kacha okhubacha ebyalo mu mbaande choosi chine ech’esyalo__ Gogo nende Magogo__ okhubawusa mukhulwana. Mu wungi wawe bali ngo’musenye okuli khu ntulo w’ebikobero.
\v 9 Bakenda mu nyiriri nibakhalakaniya owubambali esyalo khandi bewodokhaniya owumenyo wa baatu ba Weere, esiko syakhira okhudakha. Naye omuliro kwekha okhutula mwikulu kwabasikhirisa.
\v 10 Khandi omusuku, owa’babacha, kasukuniwa mu nyanja mu muliro kwadukha murutu, eyo okusolo nende ba nabbi bowubacha yibali basukuniwe. Balisandisiwa esiro n’esideete endaalo nendaalo.
\s Abafu Bakhengerwa
\p
\v 11 Olwo nawona esisaala syo’wutuki sikali esilafu noyo owali nasikhayekho. Esyalo nende ekulu byerukha okhutula mu moni chaye, khandi wawumawo esifwo syawe.
\v 12 Khandi nawona abafu, abakali na’batono, nibemire mu moni ch’esisaala syo’wutuki, nebitawo byawikhulwa. Esitawo sindi syawikhuliwa, nga nje esitawo syo’wulamu. Abafu bakhengerwa emisaango okhwema khu bibali nibakholire nga lusyalisyawandiikiwa mu bitawo.
\v 13 Enyanja yaleta abafu abayirimo, okhufwa namakombe byaleta abafu ababirimo khandi wuli mutu kakhengerwa omusaango okhwema khu bikholwa byaye nga lu byali.
\v 14 Awo okhufwa namakombe byasukuniwa mu nyanja yo’muliro. Enyanja yo’muliro nje okhufwa khwo’khubiri.
\v 15 Omutu yeesi owakaniwa nga eriita lyaye siryawandikiwa mu sitawo syo’wulamu, kasukuniwa mu nyanja yo’muliro.
\c 21
\p
\v 1 Khandi nawona ekulu yaakha ne’syalo siyaakha, khuba ekulu lisokha nesyalo sisokha byali biweyewo, ne ali wawumawo khandi okhuwona okuyanja.
\v 2 Nawona esiko sikhuluutu esyolerefu, Yerusalemi mbyakha, yekha niyitula mukulu okhutula eyiri Weere, niyitekekhirwe ng’omweeya yibambasise wulayi nga bamwambasira wamwe.
\v 3 Khandi nawulira ekono ekali niritula mu sisaala sy’Omwaami niriwoola liiti, “wunanu owikhalo wa Weere wuli nabaatu, khandi acha okhumenya nabo. Bacha okhuba baatu baye, khandi Weere mwene acha okhuba nabo khandi abe Weere wawe.
\v 4 Acha okhubeeya wuli sika khu moni chaawe. Siwalibaawo okhufwa khwoosi oba okhulira oba esibeera oba owuchuuni, khuba entekekha nkhale y’ebiitu yakamire.”
\p
\v 5 Oyo owali kekhaye khu sisaala sy’owutuki kawoola atti, “Ndi khukhola wuli situla wuyakha!” awo kawoola atti, “wandika sino assi, khuba emboosi chino chesikiwa khandi ntufu.”
\v 6 Kamboola atti: “Siweye. Nise Alufwa khandi Omega, Enjaka khandi Enjakamo. Eyiri oyo oli no’wuluwo nja okhumuwa okhutula mu nsulo ya’maachi ko’wulamu atasi amakusi.
\v 7 Oyo owangula alisikhira bino byoosi, ni khandi ndiba Weere waye khandi aliba musoliri wange.
\v 8 Ne abati, abatafukirira, abawalaba, abeeti, abadaamba, abakhola ebyamayiya bye’syalo, abenamira ebilongalonge khandi na’babacha boosi__ esifwo syawe siriba mu nyanja y’omuliro. Khuno nje okhufwa okhwo’khubiri.”
\p
\v 9 Mulala khuba malayika musaanfu owali na mabbakuli musaanfu amechufu ak’olumbe kecha kamboola atti, “Yicha, ese nja okhukhwekesa omweeya, omukhasi wa khakondi.”
\p
\v 10 Kamala kanginga kambira mu myoyo khu lugulu lwamaani khandi oluleeyi lukali, kanjekesa esiko sikhongo esyolerefu, Yerusalemi, nga situla mukulu ni siikha okhutula eyiri Weere.
\v 11 Syadukha no’luyaali lwa Weere, na makesi kamukulu kali nga amakina kebbeyi, nga egirasi yo’khu alitaari, eyimekhamekha.
\v 12 Yali nesida syamaani, esireeyi nebiriwa ekhumi nabibiri, nende ba malayika ekhumi nababiri khu biriwa. Khu miryango khwalikho ameeta ni kawandikiwakho ameeta k’ebikha ekhumi nabibiri ebya’Yisirayiri.
\v 13 Yaliyo ebiriwa bidatu khu mukhono kwe’wutula lyuba, bidatu okhutula e’mukulu, bidatu okhutula emwaalo nende bidatu okhutula ewukwa lyuba.
\v 14 Esida sye’siko sikhuluutu syali ne’misingi ekhumi nachibiri, khucho khwa wandiikiwakho ameeta ka batume ekhumi nababiri abakhakondi.
\p
\v 15 Malayika owalomaloma nange kali no’mudaya kwa sabbu okwokhukerera esiko sikhuluutu, ebiriwa byaasyo nebidda.
\v 16 Esiko syali syakerewa mu wubambali no’wuleeyi okhwakanakana kakera esiko sikhuluutu nesikerero esyo kasyakana mbo siri emita 12,000 mu wuleeyi no wubambali nasirala khulooba no’khucha amukulu.
\v 17 Kakera esidda syasyo syaba emikhono mikolole 144 mu khubala khwo mutu, malayika yikali nakhosesa.
\p
\v 18 Esidda syali syakholewa mu makina kebbeyi akalangiwa, “Jasipari” esiko sye saabu njerere, nga egirasi.
\v 19 Emisingi che’sidda sye’siko chali chakholewa nende amakina ka nawuli mbya akebbeyi ngali lukali. Omusingi kusookha kwali okwa’makina akalangiwa Jasiperi, okwo’khubiri kwali nende akalangiwa Sapire, okwo’khudatu amakina kakwo kali kalangiwa Agate, naye okwokhune kwali nende akalangiwa, “Emeralidi”
\v 20 ne okwo’khutanu kali kalangiwa Onikisi, ne okwomukaga kali kalangiwa Kareneliyani, na’makina ako kwo’musaanfu kali kalangiwa Yelo Kuwarisi nako munana kali kalangiwa Berili amakina ko’musingi kwo’mwenda kali kalangiwa Topassi akokwe’khumi kali kalangiwa Chalisedoni okwe’khumi nandala Takwoyise naye okwe’khumi nachibiri kwaba kulangiwa Amesisiti.
\v 21 Ebiriwa ekhumi nabibiri byali nibyo Parili ekhumi nachibiri. Wuli siriwa syali syakholewa mu Parili ndala. Engira ngali che’siko chali chakholewa mu sabbu njerere, eyiwonekherera nga egirasi.
\p
\v 22 Si nawona enyumba ya Weere mu siko, khulw, okhuba Omwami Weere okhira mu byoosi khandi omwaana wekoondi nje enyumba ya Weere.
\v 23 Esiko sisyali sidakha eryuba oba omwesi okhwadukhirakho, khuba oluyaali lwa Weere luyiwa owulafu walwo ne khandi Omwaana wekoondi etaara lyasyo.
\v 24 Ebyalo birikendera khu wulafu wasyo ne khandi aben’engo be’syalo syoosi bacha okhuleta ebyo’wuyinda byawe musyo.
\v 25 Awuma oludaalo atta lulala ebiriwa lubirikalwa, khuba aliwumawo esiro eyo.
\v 26 Oluyaali no’khukiniya khw’ebyalo biriretewa musyo.
\v 27 Yiwuma esiitu syoosi esitasi syolerefu esirisingiramo, atta wusa no’mutu yeesi okhola eby’ensoni oba eby’owubacha, okhutusakho abo boŋŋone ameeta kaawe akawandiikiwa mu sitawo syomwaana wekoondi esyo’wulamu.
\c 22
\p
\v 1 Olwo khandi malayika kanjekesa omwalo kwa maachi k’owulamu, amalafu nge’moni ya chumbi, nikakherengeta okhutula mu sisaala sya Weere ne’sya khakondi.
\v 2 Nikekhirira akati wengira ekhongo ey’esiko sikhuluutu. Khu nawuli luwande lwo’mwaalo waliyo omusaala kwo’wulamu, nikwiwula ebirime, ekhumi nabibiri eby’ebyamo, nibiwula ebyamo byakwo wuli mwesi. Namasafu k’omusaala nga kokhuwoniya ebyalo.
\v 3 Aliwumawo lundi esikholimo. Esisaala sy’owutuki sya Weere ne syo'mwaana wekoondi biriba mu siko, nende abakhosi baawe balimukholera.
\v 4 Baliwona oweeni waye, khandi erita lyaye liriba khu weeni wawe.
\v 5 Aliwumayo khandi esiro. Aliwumawo lundi owetaafu we’tara oba owulafu w’eryuba, khuba Omwami Weere alibawa owulafu. Manu khandi nje abacha okhufuka endaalo nendaalo.
\p
\v 6 Malayika kamboola atti, “Chino mbosi cha masima khandi ntufu. Omwami, Weere w’emyoyo cha ba nabbi, katuma malayika waye okhwekesa abakhosi baye ebitu ebitekwa okhubawo mu bikha bitaasi bya aleyi.” Yesu keecha
\v 7 “Wulirisa, ese ndi okhwicha mu wangu wene! Ali ne’nkhabi oyo odiira emboosi cho’wunabbi owe’sitawo sino.”
\p
\v 8 Ese, Yokaana, nise mulala owawulira khandi nawona ebiitu bino. Khandi ni nali nimbuliiye no’khubiwona, nakwa asi namwinamira mu makulu ka malayika owali nabekesa eyiri ese.
\v 9 Ne kamboola atti, “Otasikhola! Ese ndi mukhosi wasyenywe nende abasyenywe ba nabbi naabo boosi abalinda emboosi ech’esitawo sino. Yinamira, Weere!”
\v 10 Olwo kambolera atti, “Otawikha khu mboosi ch’owunabbi we sitawo sino, khu lwokhuba ebikha byolire.
\v 11 Lekha oyo okhola esibi ache mu moni no’khukhola esibi; khandi oyo omubi yesi akhoyire abe mubi; mulekhe oyo okhola wulayi ache wusa mu moni no’khukhola wulayi; khandi mulekhe oyo omwolerefu achanakane okhuba omwolerefu.”
\p
\v 12 “Wulirisa, ndi okhwicha mu wangu weene! Esirawo syange siri nange, ne khandi ndiwa wuli mulala okhwema khu byaliba nakholire.
\v 13 Nise Alpha nende Omega, Owamberi khandi Okhenerekha, Ochaka khandi Osembayo.
\v 14 “Bali ne’nkhabi abo aboosa ensibiro chawe, kho banyale okhuba no’wunyala khumusaala kwo’wulamu khandi kho babe nga babita mu biriwa okhwiingira mu siko.
\v 15 Erwanyi yiriyo embwa, abo abakhola ebyo’wulakusi, ebyo’wudaamba, abeeti, abenamira ebilongalonge nende nawuli mutu odakha khandi okhwoseresa ebyo’wubacha.
\p
\v 16 “Ese, Yesu, ntumire malayika wange okhubawa owujjulisi wuno eyiri amakanisa. Nise omusi khandi omwichukhulu wa Dawudi, khandi eηiniηini yadukha lukali echulichuli.”
\p
\v 17 Omwoyo no’mweya bawola baati, “Yicha!” lekha oyo owulira awole atti, “Yicha!” Omutu yeesi oli nduwo, mulekhe keche; khandi oyo yeesi odakha, mulekhe awukule esiyaanwa syawerere esya’maachi ko’wulamu.
\p
\v 18 Ndawula wuli muutu owulira emboosi cho’wu nabbi echesitawo sino: niwabawo omutu yeesi omeedakho khu mboosi esiitu syoosi khwebyo, Weere alimumeedakho olumbe olwalomwalomwakho mu sitawo sino.
\v 19 Ni khandi ni aba omutu yeesi otusakho emboosi mu sitawo sino esyo’wunabbi, Weere alimutusakho omukawo kwaye khu musaala kwo’wulamu khandi no’mu siko syolerefu, ebyalomwalomwakho mu sitawo sino.
\p
\v 20 Oyo yeesi owa owujjulisi we bitu bino awoola atti, “Yee, ndi khwicha wangu wene.” Amiina, yicha/ Omwami Yesu.
\p
\v 21 Abaatu Essisa sy’omwami Yesu sibe na’baatu ba Weere. Amiina.