\id GAL
\ide UTF-8
\h Abagalatiya
\toc1 Abagalatiya
\toc2 Abagalatiya
\toc3 gal
\mt Abagalatiya
\c 1
\p
\v 1 Paulo, omutume__ otatumiwa na baatu, oba no’muutu, naye nende Yesu Kurisito nende Weere Bbabba, owamusyukhisa mu bafu__
\v 2 nende ba mwanaama boosi ni nange, Eyiri amakanisa mu Galatiya:
\v 3 Esisa ne’mirembe yimuli okhutula eyiri Weere Bbaabba nende Omwami Yesu Kurisito,
\v 4 Owewayo omwene khulwe’bibi byefwe okhutuwoniya oluse lubi olwebikha bino, olwokhudakha khwa Weere wefwe nende Bbaabba,
\v 5 Okhoyire okhuwewa oluyaali endaalo ne’ndaalo. Amiina.
\s Awuma enjiri yindi
\p
\v 6 Esse mbuka okhuwona nti mu bikha bitono mwanguyire okhulekha oyo owabalanga olwe sisa sya Kurisito nende muli okhukalukhana nimulonda enjiri yindi __
\v 7 ne mumasima eyitali nanjiri ata nawutono. Aliwo owujulisi wumala nga abaatu bandi bali okhubasukunanga mu khutamanya yimuli khandi bakesakho n’okhukodiya enjiri ya Kurisito.
\v 8 Asyakhaba mbo efwe, oba malayika okhutula mukulu nawuulira enjiri eyikawukhanakho khu’yira yi khwabawuulira akhoyire akholimirwe endaalo choosi!
\v 9 Nga lukhubeye nikhuwooye, khandi nsilondamo: Ni abawo owundi oli okhubawuulira enjiri, eyitali yira yimwali mwafukirira, akhoyire okholimirwe endaalo choosi!
\v 10 Siri mbo ngesakho okhusimiwa na’baatu, oba nende Weere? Oba ndihukesakho okhusangasa abaatu? Nisiba mbo nali ngesakho okhusangasa abaatu, sinakhabeye mukhosi wa Kurisito. 
\s Paulo alangiwa nende Weere
\p
\v 11 Ndakha musimanye, baana befwe, muuti enjiri yi nawuulira si situ esyatewawo wusa no’muutu.
\v 12 Sinayifuna okhutula khu muutu yeesi, oba bayinsomesa wusomesa; okhumalakho, nayifuna okhubita mu khuwikhulirwa okhutula eyiri Yesu Kurisito.
\p
\v 13 Khuba enywe mwawulira khubinfakho mu wulamu wange nindi mu si Yudaaya, nga lu nasandiyanga ekanisa ya Weere ningesakho okhuyisikhirisa.
\v 14 Nali khiririsa mu byo’wuYudaaya nga nkhirakho aba’Yudaaya bo’luse lwange nga nomirira erala khu midunga cha ba kuuka yange.
\v 15 Ne Weere, oyo owandola okhutulira erala mu khwiwulwa khandi kanaanga olwe sisa syaye, kasangala
\v 16 okhuwikhulira omwana waye mwise khu nyale okhumuwuulira mu bateende. Ese sineteebakho khu mutu yeesi,
\v 17 ata sinachakho amukulu e’Yerusalemu okhuwona oba abali abatume ese nintaaba, ne nacha mu wangu mu wuwarabbu olunyuma nakoowola e’Damasiko.
\v 18 Olunyuma lwe’myaka chidatu, Nanina nacha e’Yerusalami okhunalana nende Petero namenya naye endaalo ekhumi na chitaanu.
\v 19 Sinawonakho khu batume bandi __ okhutusakho Yakobo, mwanaηηina wo’mwami.
\v 20 Mbakhakhasa mu moni cha Weere nti bimbandika yimuli siwubacha.
\v 21 Olunyuma nacha e Siriya nende e Silisiya.
\v 22 Samwene sinali manyikhanire eyiri amakanisa ko’mu wu’Yudaaya akali mu Kurisito.
\v 23 Kawulirangakho enfuma yoŋene; “Omusaacha watuwalaniyanga wunanu awuulira enfukirira yikakesangakho okhusikhirisa,”
\v 24 Khandi bafumya Weere khu lwange.
\c 2
\p
\v 1 Emyaka nichibitirewo ekhumi nachine khandi nanina nakowolayo e’Yerusalemi, khu luno nende Balunabba. Nayira Tito yesi.
\v 2 Nacha olwokhuwikhulirwa nabatekekhera enjiri yinawuuliranga mu bateende. Ne sino nasikholanga eyiri abo abalingi nga batangirisi bonηηene, nga ntya nti nali nirukha oba nerukha khu werere.
\v 3 Nikhane ewe ata nende Tito, owali ni nange, yesi kali kayiikiwa okhukhebewa, nende abe nikali mu’Yonaani.
\v 4 Yino mbosi yasingira khu lwa baana befwe bandi abali babacha bali batwetawuyemo khumadaara kakhwalikho nibakhemeresa khu khweyaaka khu khwali nakhwo mu Kurisito Yesu nokhutukhola khube abawaambe.
\v 5 Sikhwalekha bikhwalikho khu lwawe ata nalulala, khu sinyalikhe okhutusa amasima kenjiri okhusikala ni nanywe.
\v 6 Ne eyiri abo abasikala nga bakhunufu__ oba bali bakhulutu oba khaba binjakanira; khuba Weere syakhenga khu lubyawene khu mukulu- abo baatu sibongera syosi syoosi khu mbosi yange.
\v 7 Khu luwande lundi, bawona baati nali mberesewe omudunga kwo’khuwuulira mu bateende, nga lusyali Petero lukali eyiri Abayudaaya.
\v 8 Khuba Weere, owali khu mulimo mu wuweresa wa Petero ngO’mutume eyiri Abayudaaya, yesi kali mu wuweresa wange nga omutume eyiri abateende.
\v 9 Yakobo, Petero nende Yokana, abali bakinisiwa baba ensiiro, bamba fembi nende Bbalunabba omukhono mulungi okwo’wulala nibola bategeera esisa syambewa. Bola bafukirisaniya baati efwe khuche eyiri abateende, nabo eyiri Abayudaaya.
\v 10 Syoηηene sibateeba syali efwe khukhoyire khuchanakane nokhwichulisa abaati, sirala wusa esyo sinali no’wuluwo okhukhola.
\s Paulo Ayinganiya Petero
\p
\v 11 Petero nikola okhwicha Antiyokiya, namuyinganiya moni khu moni, khulwokhuba kali muwakhafu khu luwande lutali lutufu.
\v 12 Abaatu bandi nibatoola okhutula eyiri Yakobo, kalyanga na’beteende. Ne nibola, kachaka okhukowolera emukongo nabekawulakho abateende bano khulwokhuba kali atya abo bakali namanyire nga nje abaye abo’mukanda kwabakhebewa.
\v 13 Abayudaaya bandi bamweyimbaniyakho mu khwebachirisa khwaye nga bosi mu khwebachirisa khwawe ata Bbalunabba yesi kakota engira yikalikho.
\v 14 Ni nawona nti sibali khulondakira engira ya masima ye’njiri, nola nawolera Petero mumoni chaawe boosi nti, “Ewe oli mu Yudaaya, n’omenyire ngo’muteende si ngo’muYudaaya. Sino siri sitye, wunanu, mbo oyinga abateende okhukhola ensambo cha Bayudaaya?
\v 15 “Efwe Abayudaaya khu lwowiwulanwa abataasi bakholi be’bibi bateende.’
\v 16 Manya oti omuutu syakholerwa wulayi olwo’khulonda amalako, naye khu lwe’nfukirira mu Yesu Kurisito. Sakira efwe, fesi, khuteeye enfukirira yefwe mu Kurisito Yesu kho khunyale okhukholerwa wulayi olwenfukirira mu Kurisito ni si khuliwo khulinda elako, khuba okhulinda elako awumawo ata mulala olikholerwa wulayi.
\v 17 “Nisiba mbo khukonya okhukholerwa wulayi mu Kurisito, syolerera mu wukhakhafu siiti efwe fwabeene khuli bakhosi be bibi, sino siba sikhakhasa siiti Kurisito akhusa esibi? Khabaa sinje lu siri!
\p
\v 18 Singa no’mbakha si nasaakula, nakhabeye khakhasa nti ndi mukhalaki wa malako.
\v 19 Khulwokhuba okhubitira mu lako nafwa khulwe’lako kho sinyalikhe ese okhubaawo omulamu olwa Weere.
\v 20 Nakhomererwa nende Kurisito sinsiri mulamu, ne Kurisito amenya mwiise. Owulamu wundimo mu mubiri, ndinawo olwe’nfukirira eyindimo olwo’mwaana wa Weere, owandakha kewayo khu lwange.
\v 21 Sinyala nata elubeka esisa sya Weere, khuba nisiba mbo owolerefu wunyala wakaniwa okhubitira mu lako, Kurisito kafwira werere!”
\c 3
\p
\v 1 Enywe a Bagalatiya basiru! Nanu owabaloka? Mu moni chenywe abeene Yesu Kurisito kekesewa musifananyi mu waakhafu ngo’wakhomererwa.
\v 2 Nakhadakhire okhweka wusa esitu sirala okhutula khwinywe: Mwafuna omwoyo okhutula khu khulondakirira elako, oba olwokhufukirira bimwawulira?
\v 3 Muli wusa abasiru muutyo? Nimumalire okhuchaka no’mwoyo, muchakire wunanu okhukesakho okhwakana bimugenderera no’wunyala wo’mubiri?
\v 4 Mwasanda lukali khu werere__ nisiba mbo mu masima sya werere?
\v 5 Weere kabawa omwoyo waye akhola ebyamangalima mwinywe khulwokhuba mulonda elako, oba khulwo khuba mufukirira bi mwawulira?
\p
\v 6 Mubaase khu Yibbulaimu: “Kafukirira mu Weere, okhusiima khwamuweresewa ngo’mwolerefu.”
\v 7 Musimanye, olwo, muuti abo abafukirira baba baana ba Yibulaimu.
\v 8 Esyawandikiwa syekesa khale siiti Weere alikhola abateende baba bolerefu okhubitira mu nfukirira, khandi kasilangirira mu njiri niwusiri eyiri Yibulaimu ati: “Ebyalo byoosi biriyeresewa enkhabi okhukhubitiramo.”
\v 9 Sakira abali nenfukirira bali nenkhabi alala nende Yibulaimu, omusaacha we’nfukirira.
\v 10 Boosi abesika okhulonda amalako bali assi we’sikholimo, khuba syawandikiwa siiti: “Akholimiiywe omuutu yeesi otachanakana okhukhola wuli syawandikiwa mu sitawo sya malako.”
\v 11 Simanyikhanire wulayi siiti awumawo yeesi olibaliwa okhuba wulayi mu moni cha Weere okhubitira mu mulako khulwo’khuba, “Abolerefu balibaawo olwe’nfukirira.”
\v 12 Amalako sikema khu musingi kwe’nfukirira; khu luwande lundi siwoola siiti, “Omuutu okhola ebitu bino alibawo olwabyo.”
\p
\v 13 Kurisito katutusa mu siwaabo sy’elako kaba esiwaabo khu lwefwe, khuba syawandiikiwa siiti: “Owawaabiwa nje oyo yeesi owawanikhiwa khu musaala.”
\v 14 Katukula efwe omukisa kwawewa Yibbulayimu kunyale okhwola khu bateende nikubitira mu Kurisito Yesu, khu sibe mbo okhubitira mu nfukirira khunyale okhwakaana omwoyo ku katusubisa. Elako nende esisubiso.
\p
\v 15 Baana befwe, khambukule esyo’khuwonerakho okhutula khu biriwo mu wulamu wefwe. Nga yiwuma omuutu yeesi onyala katusakho oba kongera khu ndakaano yo’wuutu eyatewawo, khulwesyo nje lu siri khu situ sino.
\v 16 Ebisubise byalomalomwa khu Yibbulayimu nende khu mwichukhulu waye. Esiwandiiko sisiwoola siiti “nende khu bechukhulu,” nisyekesa abaatu bangi, ne “khu mwichukhulu wawo,” esyekesa mulala, oyo nje Kurisito.
\v 17 Sinekesa nje sino: Elako, eryaletewawo emyaka bina mwa satu olunyuma, sirimalawo enfukirisaniya eyali yiteywewo nende Weere syali sisubiso.
\v 18 Nisiba mbo okhusikhira khwema khu malako, sisiba nisisyema khu sisubiso; ne Weere mu sisa syaye kawa Yibbulayimu okhubitira khu khusubisa.
\p
\v 19 Wunanu, sina esyali sigendererwa sye’lako? Amalako kongerwakho khu’lwe bibi okhwoosa omwichukhulu yibasubisa lwalyoola. Amalako kateewa munkhola okhubitira mu bamalayika nende okhukhubbaniya.
\v 20 Okhukhubbaniya, nende siri siityo, sikemerera oluwande lulala, ne Weere yee, ali mulala.
\p
\v 21 Amalako nako, kayinganiya ebisubiso bya Weere? Khaba ata nawutono! Nisiba mbo amalako kaweresewa kanyale okhuleeta owulamu, olwo owolerefu wakhanyalire okhwicha nga wubita mu malako.
\v 22 Ne esyawandiikiwa sikhengawo siiti esyalo syoosi siri mu wuwaambe we’sibi, khu sibe mbo esyasubisiwa, nisiba syayeresewa okhubitira mu nfukirira mu Yesu Kurisito, yinyalikhe okhuweresewa khu abo abafukirira.
\v 23 Enfukirira yino niyitecha, khwali basibe ba malako, nga khwekalirwa okhwola enfukirira luyi na’khawikhulirwe.
\v 24 Elako lyatewawo litutangirire okhutwosa khu Kurisito kho khunyale okhukholewa wulayi abolerefu okhubitira mu nfukirira.
\v 25 Wunanu nge’nfukirira lu yichire, sikhusifukiwa na malako.”
\s Abaana ba Weere
\p
\v 26 Mweesi muli baana ba Weere okhubitira mu nfukirira eya Kurisito Yesu,
\v 27 khu lwokhuba mweesi ababatisiwa mu Kurisito mweyaambasa mwabeene Kurisito.
\v 28 Si ali mu Yudaaya oba mu Yonaani, omuwaambe, oba otali muwaambe, omusaacha, oba omukhasi khuba mwesi mweesi muli mu Kurisito Yesu.
\v 29 Noba noli mulala khu Kurisito, oba oli lumwo lwa Yibbulayimu, khandi abasikha okhwema khu sisubiso.
\c 4
\p
\v 1 Sindi okhuwoola siri siiti syamala syaba mbo omusikha aba mwaana, aba awuma enjawukhana no’muwambe, nende asyakhaba mbo njo’omweene wusikha nebitu byo’mufu.
\v 2 Aba asiri assi wa balindi nabayeedi okhwoola khu ludaalo simwana lukatawo.
\v 3 Nje lusyali nikhwali nikhusiri baana, khwali mu wuwaambe we’bitu bikhira okhumanyikha mu syalo muno.
\v 4 Ne ebikha nibyali byakholerera, Weere katuma omwana waye, owewulwa no’mukhasi, owewulwa assi we’lako,
\v 5 okhununula abo abali assi we’lako, khu khunyalirwe okhwangaliwa mu wichufu nga baana ba Weere.
\v 6 Khulwokhuba muli baana, Weere katuma omwoyo kwo mwaana waye mu myoyo chefwe, omwoyo olanga ati, “Abba, Bbabba.”
\v 7 Siri mbo sy’osiri muwaambe, ne oli mwaana, nende khuba oli mwaana, Weere akhukholire wesi omusikha.
\s Paulo achunirwa aba Galatiya
\p
\v 8 Enyuma eyo, nimwali mutamanya Weere, mwali bawaambe khu biitu ebitaali bya Weere.
\v 9 Ne wunanu nga siri mbo mu manyire Weere__ oba mu manyikhanire nende Weere¬_ siri mbo abamanyire__ syakhaba sitye khandi nimukalukhanira ebyo ebinafu no’wulamu wengisa? Mudakha okhuba abawaambe babyo khandi?
\v 10 Mwoseresa endaalo khulutu ne myesi nende ebirumbi ne’myaka!
\v 11 Mbatiiye, khuba mukhuwona nyasise amaani kange khu lwenywe werere.
\v 12 Mbekweda, baana befwe, mube nga lundi, khuba nekhola nga enywe. Awuma simwankhola esibi.
\p
\v 13 Nga lumusimanyire, syali olwo’khuba no’wulwaye syakira nawuulira enjiri yimuli olusokha.
\v 14 Asyakhaba mbo owulwaye wange wali esikhemo yimuli, simwanechusyula oba mwankhomoola. Okhutusakho, mwansangalira oti fwana nali malayika wa Weere, oti fana nali Kurisito Yesu mweene.
\v 15 Sina esyakholekhana musangaalo lyenywe? Nyala okhuwa owujjulisi wuwoola wuuti, nimuba nimwasikhola mutyo mwakhetusisemo emoni chenywe mwachiimba.
\v 16 Wunanu nfukhire musuku olwo’khubawoolera ebya masima?
\v 17 Abo baatu bali nesinani sy’okhubakalukhaniya, naye si lwo’wulayi. Sibadakha nikhwo okhubenamya no’khubayenyekha mututulekho khomunyale okhubaloonda.
\v 18 Sirayi okhuba ne’sinani okhutusakho nga lwe’sichirirwa silayi, nende nisiba siityo wuli ludaalo. Okhutaba wusa nti syoηηene ndi nanywe.
\v 19 Baana bange abadakhwa, bandi nabo khandi mu wuchuni we’sasakisi okhwosa Kurisito nakholewa mwinywe.
\v 20 Nakhekombire okhuba nanywe wunanu nende okhukalukhaniya enomaloma yange, khulwokhuba ebibaso byange bikosobanire khu lwenywe.
\s Agali nende Saala
\p
\v 21 Mumbolere, enywe abadakha okhuba assi we’lako, simumanyire khu bidiira khu lako liriwoola?
\v 22 Khuba syawandikiiwa siiti Yibbulayimu kali nabasyaani babiri, mulala kewulwa no’mukhasi muwaambe no’wundi kewulwa no’mukhasi otali muwaambe.
\v 23 Omusyaani we’wulwa no’mukhasi muwaambe kewulwa okhwema khu wekombi wo’mubiri; no’musyaani w’omukhasi otali muwaambe kewulwa okhwema khu sisubiso.
\v 24 Bino biitu binyala okhukeranisiwa khu bakhasi baba nge ndakaano chibiri. Endakano ndala eyitula khu lugulu lwe Sinai ne lwewula abaana abakhabe bawaambe: ono nje Agali.
\v 25 Wunanu Agali kema mu sifwo syo’lugulu olwa Sinai mu syaalo syabawarabbu manu lwakeranisiwa khu siko sya Yerusaalemi, khulwokhuba ali mu wuwambe nabaana baye.
\v 26 Ne Yerusaalemi eyiri amukulu si mambe, khandi nje ηηineffwe.
\v 27 Khuba syawandiikiwa siiti; “Wekhoye, Oo omukhasi mukumba, Otewula baana; Sokha otalikhe no’khulira lukali, Ewe otali ne’nsasakisi; Khulwokhuba bangi bacha okhuba abo’mukhasi yibaloba Okhukhira abaana bo’mukhasi oli no’musaacha.”
\p
\v 28 Wunanu enywe, baana befwe, nga Isaaka, muli abaana be’sisubiso.
\v 29 Khu bikha ebyo omusyaani we’wulwa okhwema khu wekombi wo’mubiri keta omwana we’wulwa namaani ko’mwoyo. Nje lusiri nasirala wunanu.
\v 30 Ne ebiwandiiko biwoola si? “Yirusya omukhasi muwaambe no’mwaana waye, khuba omusyaani wo’mukhasi mu waambe syalikabana mu wusikha no’musyaani wo’mukhasi otasi muwaambe.”
\v 31 Nolwesyo, baana befwe, sikhuli baana bo’mukhasi mu waambe ne khuli bo’mukhasi otasi muwaambe.
\c 5
\p
\v 1 Syo’wulekhuule okhuba nti mu Kurisito katukhola khwaba abalekhuule, mube bomiifu, olwo, mutafukirira mwatwikhiwa khandi ejoogi yo’wuwaambe.
\v 2 Mudiire emboosi change! Ese, Paulo, mbawolera nti ni mufukiirira mwabeene okhukhebewa, Kurisito syaba nali no’mugaso ata nawutono.
\v 3 Khandi nangirira okhukhakhasa eyiri wuli muutu owetusayo kakhebewa sibe mbo akhoyire alondakirire na’malako koosi.
\v 4 Enywe abakesakho okhulungisiwa na malako enywe mube nga musimanyire muuti mutula mu muyiito kwa Kurisito; mwakwa okhutula mu sisa.
\v 5 Ne khulwe’nfukirira khusikaye nikhulindirira okhubitira mu mwoyo owulungifu wu khulimo ne suubi.
\v 6 Khuba mu Kurisito Yesu ata okhukhebewa oba okhutakhebewa sikhuli no’mugaso oba amakhulutu. Esiitu esiriwo sy’oηηene esya makhulutu nje enfukirira nga yekesa eyeene okhubita mu khudakha.
\p
\v 7 Mwali mwirukha embiro ndayi. Nanu owabakhengakho khandi kabakaniya okhufukiirira amasima?
\v 8 Enkhobya nge’yo siyitula eyiri oyo owabalanga.
\v 9 “Otumera tutono tukhola twaswaniya mu wusye wubbakhe woosi.”
\v 10 Ndi no’wukhakhafu mu mwami nti simunasiwukule mungira yiindi. Oyo oli okhubasukuna mu khutawukha alisasula ekobi, akakhaba nanu.
\v 11 Baana befwe, nimba ni nsiwuulira okhukhebewa, lwasina nsisandisiwa? Mu ngira eyo omusango kwo’musalabba kwatusiwawo.
\v 12 Ne eyiri abo ababachuuba, nakhadakhire mbo bache mu ngira yoosi khandi beradde abeene!
\p
\v 13 Enywe, baana befwe, mwalangiwa okhuba balekhuule. Ne mutakhosesa eddembe lyenwe okhweyingisa mu khukhola ebibi byo’mubiri; ne syakhakhoyire, mwayeresaniya enywe abeene khubeene mu khudakha.
\v 14 Elako lyoosi lyateewa mu silagiro sirala: “Dakha okhusibiranire nga luwedakha wamweene.”
\v 15 Nimusikala nimulumana no’khulichana abeene na beene, mwerinde khuba mwicha okhwola mumalanewo abeene na beene.
\s Owulamu khulwo’mwoyo
\p
\v 16 Sakira mbola nti, mubewo khu lwo’mwoyo, simunakiniye esibi sy’okhudakha khwo’mubiri.
\v 17 Okhudakha khwo’mubiri khukawukhana no’khudakha khwo’mwoyo, ne okhudakha khwo’mwoyo khwukawukhana no’khudakha khwo’mubiri. Biri mu makhaabi, sibe mbo sy’okhola byo’dakha okhole wamwene.
\v 18 Ne noba n’otangiriywe no’mwoyo, syoba noli asi we’lako.
\p
\v 19 Ebikholwa bibi ebyo’mubiri bya’lafu nje bino: owudamba, esifaabi, nende okhwitana;
\v 20 okhwinamira ebifananyi, no’wulakusi; owusuku, okhuyiirimbana, omutoolyo, etima, owimani, okhwekawulanamo, okhwekholamo emikaanda,
\v 21 nende ekhoyo; owumeesi, owutemo, ebiyuumo nende ebifaana biityo. Mbalawula, nga lunabalawulakho khale, nti abo abakhola ebifaana biityo, si balisikhiira owene’ngo wa Weere.
\v 22 Ne esyaamo syo’mwoyo nje okhudakha, esangaalo, emirembe, okhwesimiirisa, esisa, owulayi, oweesikwa,
\v 23 owulonga, nende okhweriinda omweene. Esikhiira khu biitu bifaana biityo awuma elako.
\v 24 Abo aba Kurisito Yesu bakhomerera esibi syo’mubiri no’wuluwo no’khudakha khwasyo.
\p
\v 25 Nga lu khuliwo khu lwo’mwoyo, khube mu muyiito kwo’khufukiwa no’mwoyo.
\v 26 Sikhukhoyire khwaba ebewona, n’okhuchuuba nende okhukholera abasyefwe ekhoyo.
\c 6
\p
\v 1 Baana befwe, ni abawo yeesi odiywe mu sibi, enywe abali mu mwoyo mukhoyire mu mukowose khu ngira mu wuloonga. Ne mwerinde abeene oba mwesi munyala mwakhemewa.
\v 2 Mukinganire wuli otula emikuku, ne mu ngira yino munyala okhwoseresa elako lya Kurisito.
\v 3 Nisiba mbo omuutu abaasa ati ye situ ni nga si situ, aba kebacha omweene.
\v 4 Wuli mulala akhebere ebikholwa byaye omwene. Awo nje anyala okhweninisirya omwene, natekeranisye khu muutu wundi,
\v 5 khuba wuli muutu akhoyire akinge omukuku kwaye.
\p
\v 6 Yeesi omala kakerakiwa mu mboosi atekwa akabanemo ebirayi byoosi no’mukeraki waye.
\v 7 Otabachirisiwa: Weere syanyala kakhomoolewa. Omuutu akesa byawanyire.
\v 8 Oyo owanya okhusangasa ebikholwa byaye byo’mubiri kwe’sibi, okhwema khusikholwa syo’mubiri esyo alikesa okhusikhirisiwa; ne oyo owanya okhusangasa omwoyo, okhwema khu mwoyo alikesa owulamu owutaliwawo.
\v 9 Khutaluuwa mu Khukhola owulayi, khuba khubikha byeene ebiraayi khulikesa ekesa nikhuba sikhuweyemo amaani.
\v 10 Nolwesyo, nga lukhusiri nakhakisa, khukhoyire okhukholanga abaatu boosi wulayi, okhukhirira erala eyiri abo abali mu nyumba eyabafukiirira. Si Khukhebewa Naye esilonge siyakha.
\p
\v 11 Muwone owukali wenukuta chinkhosesa nga lu mbandiika yimuli no mukhono kwange omweene!
\v 12 Abo abadakha okhukhola akhawonero khalayi akhokhumukulu bakesakho okhubayinga mukhebewe. Esyo syoηηene esikira bakhola sino nje okhuwona mbo batasandisiwa khu lwo’musalabba kwa Kurisito.
\v 13 Ata nende abo abakhebewa sibakholera khu malako, ate badakha mukhebewe khubamale bepaakha khu lwe mibiri chenywe.
\v 14 Nkhoyera ntepaakha okhutusakho mu musalabba okwo’mwami wefwe Yesu Kurisito, mu syalo syakhomererwa eyiri ese, nende ese eyiri esyalo.
\v 15 Awumawo okhukhebewa oba okhutakhebewa sisyekesa; esibaliwa nje okhulongewa khuyakha.
\v 16 Emirembe ne'sisa bichiire abalonda elako lino, nende eyiri Yisirayiri ya Weere.
\p
\v 17 Khunjakamo, awumewo omuutu yeesi owundetera ebidinyu, khuba ndi no’tuwonero khu mubiri kwange olwa Yesu.
\p
\v 18 Esisa syo’mwami wefwe Yesu Kurisito sibe ne’mwoyo chenywe, baana befwe. Amiina.