lpx_reg/63-1JN.usfm

\id 1JN
\ide UTF-8
\h 1 Yoani
\toc1 1 Yoani
\toc2 1 Yoani
\toc3 1jn
\mt 1 Yoani
\c 1
\cl ŋati 1
\p
\v 1 Nafa nyia man to hitieri, nafa etiru iyyohoi, nafa egonyu iyyohoi to honyehite innohoi, ejo hidofe eriŋa atta hitany ta has innohoi- ero inni to hiram no wuaran.
\v 2 Oliew ifa waran, egonyu iyyohoi, ejijo hidofe era asuuti, ettitto iyyohoi hiram no wuaran nosio fur, nafa lowon ho Monye nafa oliew te iyyohoi.
\v 3 Elimak iyyohoi ta hatai hirro innafa etiru iyyohoi ejio hidofe egonyu, hijo anyar erriaha itai iko hoi iyya inna erriahari iyyohoi iko Monye ojo Lonyi honye Yesu Kristo,
\v 4 egiorok iyyohoi hirro innia hijo anyar efut mune nohooi
\v 5 Hiram nyia nia nafa etiru iyyohoi tara honyie atta hidofe elimak ta hatai: Ara Hollum cialai nyo obe idumele tara honyi.
\v 6 Leijo iyyohoi hijo erriaha iyyohoi ho inyia eijo hidofe elot te idumele, era iyyohoi telerok ojo hilahode obe tara hohoi.
\v 7 Ojo lelot iyyohoi to cialai iyya owuon inyia ta calai, erriaha iso iyyohoi to wati innohoi ojo hoto no Lonyi honyie Yesu atta hillilla hiyyata innohoi tamai daŋ.
\v 8 Leijo iyyohoi hijo ebe iyyohoi ewuon he iyyau, enyaba iyyohoi wati innohoi ojo hilahode obe tara hohoi.
\v 9 Ojo lemitu iyyohoi hiyyata innohoi, olibo inyia ojo hidofe obis, oremik ŋamitu hiyyata innohoi atta ŋelilaw hibotita innohoi tamai daŋ.
\v 10 Ojo leijo iyyohoi hijo ebe iyyohoi leyyau, ehumak iyyohoi inyia loteler, ojo hiram nohonyie obe tara hohoi.
\c 2
\cl ŋati 2
\p
\v 1 Durre hanaŋ, egiorok naŋ ta hatai hijo hotobiaŋa itai eyau. Ati leyau lobo, ewuon iyyohoi iko hetumwarani lowuon ho Monye, inyia Yesu Kristo lara habisani.
\v 2 Odumak inyia hiyyata innohoi, obe ara innohoi hame, ati to inno hiyyo daŋ ta fau.
\p
\v 3 Te innia, lejufuta iyyohoi hifahita innohonyie, atta iyyohoi hiyyen hijo eyyen iyyohoi inyia.
\v 4 Oteler tuŋani lojio, “Ayyen naŋ Hollum,” ojo inyie obe ejufuta hifahita inno Hollum, ojio hilahode obe tara honyie.
\v 5 Ottuba mune no Hollum do tuŋai lejufuta hiram nohonyie. Etuhutak nia hijo ewuon iyyohoi to honyie.
\v 6 Hotodule tuŋani lowuon to Hollum atta hidofe loton daŋ iyya nafa olotori Yesu Kristo.
\p
\v 7 Motiarak, abe naŋ egioro hifahi ŋejuk ta hatai, ati nafa maruani nafa etiru itai beren. Hiram maruani nafa etiru itai.
\v 8 Ati egioro naŋ hifahi ŋejuk ta hatai, no bis to Yesu ojo ta hatai, nyo ellaŋ idumele ojo iyyania awoŋ cialai inna dede.
\v 9 Lojo lobo awuon inyie to cialai ojo inyia arasa aliwari ilasi honyie, harasa inyia te idumele man iyyania.
\v 10 Lia lomuno ilasi honyie, odule inyia to cialai, obe nobo far noremik inyia ŋahuye.
\v 11 Ojo loliwari lobo ilasi honyie, harasa inyie te idumele ojo hidofe odule loton te idumele; obe inyia oyyen mai nolowuye inyia, nyo etiŋodo idumele honyehite innohonyie
\v 12 Durre hanaŋ, egiorok naŋ ta hatai, nyo ŋebusahini hiyyata innahatai to fure nohonyie.
\v 13 Monyie, egiorok naŋ ta hatai nyo eyyen itai inyia man to hitieri. Egiorok naŋ ta hatai nyarhalu, nyo emirai itai heturruoni. Egiorok naŋ ta hatai, durre hullo hitiŋi, nyo eyyien itai Monye.
\v 14 Egiorok naŋ da hatai, monyie, nyo eyyien itai inyia man to hitieri. Egiorok naŋ da hatai, nyarhalu, nyo hegol itai, ojo hiram no Hollum harasa ta hatai, amirai itai heturruoni.
\p
\v 15 Ibaŋa omuno fau iko hirro hunno owuon ta fau. Lomuno lobo fau ho hirro inno owuon daŋ ta fau, obe mune no Monye owuon do honyie.
\v 16 Hirro inno owuon ta fau- daya no hirro inno wan, daya no hirro to honyehite, ojo hitidara no manya.
\v 17 Esaha iso fau he iwahiti innohonyie, ojo tuŋani lehuma wahan no Hollum odule iso man fur.
\p
\v 18 Durre hullo hitiŋi, ara hucuŋi na sa, iyya nafa etiru itai hijo ottu iso mereni lo Kristo, iyane, obore miorok illo Kristo to hiji hohoi, eyyen iyyohoi hijo ara hucuŋi no sa.
\v 19 Ofu ifa isia ade tara hohoi, ati obe ifa isia ara illohooi. Lara ifa isia illohooi, nodule ida isia wuana he iyyohoi. Ati hefie nohosie tara hohoi, etuhutek hijo obe isia ara illohooi.
\v 20 Ati arrumu itai golon tara Oyiri Haliboni, eyyen itai daŋ tamai hilahode.
\v 21 Abe naŋ egiorok ta hatai hijo ibe itai eyyen hilahode, ati eyyen itai nyo obe hilahode awak teler.
\v 22 Ŋai ara loteler, ati lia lorisa hijo obe Yesu ara Kristo? A tuŋani lia mereni lo Kristo to risa nohonye Monye iko Lonyi.
\v 23 Obe lobo lorisa Lonyi ojo inyia Owuon ho Monye. Leleruk Lonyi owuon iso ho Monye.
\v 24 Ati ta hatai, isiara innafa etiru itai hotodule ta hatai. Larasa lafa etiru itai ifa beren da hatai, eijo iso itai erasa to Lonyi ojo to Monye.
\v 25 Ara inna itierit nesio inyia te iyyohoi: wuaran nosio fur.
\p
\v 26 Egiorok naŋ ta hatai hirro hunna to hiram no ilia illo oremik etipalai itai ade.
\v 27 Ojo ta hatai, arasa Oyiri nafa efwotu itai tara honyie, obe itai ewak lobo hetiyanai itai. Ati iyya etiyana Oyiri itai hirro daŋ, ara dede obe ara to teler, iyya etiyen inyia itai, itudule to honyie.
\p
\v 28 Iyyania, durre hanaŋ, itudule to honyie, laliew inyia, anyar honyie efu wueta to hiŋere to hosiere honyie obe irri laciohini inyia.
\v 29 Leyyen itai hijo ara inyia habisani, eyyen itai daŋ hijo legiama lobo nolobis, nyo ara esini inyia tara Hollum.
\c 3
\cl ŋati 3
\p
\v 1 Itiwolo to mune nelesio Monye toohoi, hijo era iyyohoi durre illo Hollum, era iyyohoi ania. To hiram nia, obe fau oyyen iyyohoi, nyo obe fau oyyen inyia
\v 2 Motiarak, iyyania era iyyohoi adurre illo Hollum, holobe ati etuhutahini hijo ewuon iso iyyohoi jai. Eyyen iyyohoi hijo era iso iyyohoi iyya inyia laliew inyia egonyu iso iyyohoi inyia.
\v 3 Tuŋani lehumak hittila nohonye to mwoi nyie ojo hidofe oriŋa do honye, etilibo iso wan nohonye iyya inyia.
\v 4 Lodule tuŋani hiyya, odulo inyia miasa hifahi no Hollum. Nyo ara hiyyau miasai no hifahita.
\v 5 Eyyen ifa itai hijo oliew ifa Kristo hijo anyar eyari hiyyata ade. Obe nobo iyyau to honye.
\v 6 Obe lobo lowuon to honye odule hiyya. Obe tuŋani lodule hiyya egonyu inyia kuyya hidofe oyyen inyia.
\v 7 Durre hanaŋ, hotobiaŋa lobo etipal itai. Lia legiama ibisiti ara habisani, iyya ara Kristo habisani.
\v 8 Lia legiama hirro inno hiyyau ara inyia a sitan, nyo eyyau ifa sitan man beren. To hiram nia, ottu ifa Lonyi Hollum hitihar igem no sitan.
\v 9 Obe lafa esiuni tere Hollum odule hiyya nyo arasa hinyomoti no Hollum to honye. Obe inyia odule hiya nyo era inyie a hiito lo Hollum.
\v 10 To nia, oliew durre illo sitan ojo durre illo Hollum. Lobe lobo egiama ibisiti ojo hidofe obe omuno ilasi honyie obe ara lo Hollum.
\p
\v 11 Hiram nyia nia nafa etiru itai man to hitieri, hijo itumune wati innahatai,
\v 12 nobe ara iya nafa ho Kaino lafa ottohoi ilasi honyie. No nyo ottohe inyia ilasi honyie? Nyo orru ifa igemita innohonyie, ojo inno ilasi honyie obis.
\v 13 Ibaŋa ati eliliha halasira hanaŋ loliwari fau itai.
\v 14 Eyyen iyyohoi hijo ellaŋ iyyohoi to ye awuaran, nyo emuno iyyohoi halasira. Lobe lobo omuno, odule iso inyia to ye.
\v 15 Loliwari lobo ilasi honye, ara inyia a hattohoni. Nyo eyyen itai hijo obe wuaran nolosio fur owuon to hattohoni.
\v 16 Eyyen iyyohoi mune nyo esio Kristo wan nohonye to mune nohonye iyyohoi. Hesiara hidofe wati innohoi to halasira.
\v 17 Ati lewolo lobo lowuon ho ibariti inno fau inna atta egonyu olociaŋ letaban atta enyie holwak inyia, obe mune no Hollum do honyie, Howuon iso mune no Hollum, jai iso lowuon mune no Hollum do honyie?
\v 18 Durre hanaŋ ibaŋa omuno to hiro iko to ŋadief ati to igem ojo to bisan.
\p
\v 19 Eyyien iyyohoi hijo era iyyohoi illo habisani eijo iyyohoi esio tajia innohoi to hosiere honyie.
\v 20 Nyo leŋot tajia innohoi iyyohoi, agalik Hollum tajia innohoi nyo oyyen inyia hirro bi daŋ.
\v 21 Motiarak, lobe tajia innohoi oŋot iyyohoi, atta iyyohoi eyyik to Hollum.
\v 22 Ojo lefia iyyohoi hirro tara honyie, eremik iso iyyohoi ŋamoju tara honye. Nyo ejufuta iyyohoi hifahita innohonyie atta iyyohoi hihuma hirro inno olibo do hosiere honye.
\v 23 Hifahi nohonye innaŋ, hijo anyar eruk iyyohoi to fure no Lonyi honye Yesu Kristo eijo hidofe emuno wati innahatai iyya nafa esiarari inyia hifahi nohonyie.
\v 24 Lejufuta lobo ifahita inno Hollum, odule iso inyia to Hollum. Te innia, atta iyyohoi hiyyen hijo arasa inyia te iyyohoi to Oyiri lafa esio inyia toohoi.
\c 4
\cl ŋati 4
\p
\v 1 Motiarak, ibaŋa leruk innak oyirihien ati iticiem oyirihien anyar eyyen kuya hara mahu no Hollum, nyo esarai telerok illo hekilak a fau.
\v 2 Lehum itai ania eyyen iso itai Oyiri no Hollum-oyiri neruk tamai daŋ hijo eyari Yesu Kristo wan ara tara Hollum,
\v 3 ojo oyiri nobe eruk Yesu obe ottu tara Hollum. Oyiri no haliwak illo Kristo illia, nafa etiru itai hijo ottu iso, ojo iyyania eba ta fau.
\p
\v 4 Era itai illo Hollum, durre hanaŋ, egalik itai i isia nyo lia lowuon ta hatai agalik lia lowuon ta fau inna.
\v 5 Ara isia illo fau, nyo ara rori innia ero isia inno fau, ojo fau etira to hose.
\v 6 Era iyyohoi illo Hollum. Lia loyyien Hollum etira te iyyohoi. Lia lobe etira te iyyohoi obe ara lo Hollum. Te innia, eyyen iyyohoi oyiri no bisan ojo oyiri no hipali.
\p
\v 7 Motiarak, hetumonoi wati, nyo ottu mune tara Hollum, tuŋani lomuno esiuni inyia tara Hollum ojo hidofe inyia oyyen Hollum.
\v 8 Tuŋani lobe omuno, obe oyyen Hollum, nyo ara Hollum mune.
\v 9 Oliew ifa mune no Hollum to hiji hohoi, nyo efahu ifa Hollum Lonyi honyie ille lobotie a fau hijo anyar emanya iyyohoi te inyia.
\v 10 Etuhutek ifa Hollum te iyyohoi mune, obe ifa iyyohoi emuno Hollum, ati etier ifa inyia mune iyyohoi, atta ŋefahu Lonyi honyi hatara idumut no hiyyata innohoi.
\v 11 Motiarak hanaŋ, lomuno Hollum iyyohoi, anyar emuno hidofe iyyohoi wati innohoi.
\p
\v 12 Holobe lobo tuŋani egonyu Hollum. Lemuno iyyohoi wati, odule iso Hollum iko hooi ojo mune nohonye atta hufut te iyyohoi.
\v 13 To nia att iyyohoi hiyyen hijo erasa iyyohoi to honyie ojo hidofe inyia arasa toohoi, nyo esio inyia te iyyohoi Oyiri nohonyie.
\v 14 Egonyu iyyohoi ejo hidofe era asuuti hijo ŋefahu Monye Lonyi hatara hetilahani la fau.
\v 15 Tuŋani leruk hijo ara Yesu Lonyi Hollum, odule iso Hollum to honyie ojo inyia hidofe odule to Hollum.
\v 16 Eyyen iyyohoi ejo hidofe eruk mune no Hollum nolowuon dohooi. Ara Hollum mune, lia lodule to mune, odule iso inyia to Hollum ojo Hollum to honyie.
\v 17 Ehuhumahini mune nalanyar to hiji hohoi, hijo anyar ewueta iyyohoi ta far no ŋoto, iyya ne owuanari inyia, ewuon iso iyyohoi ta fau daŋ inna ania.
\v 18 Obe baŋi to mune. Efuhai mune no olibo baŋi ade, nyo edia baŋi arik ho baha. Ati holobe tuŋani labaŋ arrumu mune nalanyar.
\v 19 Emuno iyyohoi nyo omuno Hollum iyyohoi to hitieri.
\v 20 Lojo lobo hijo “Amuno naŋ Hollum,” ojo inyia oliwari ilasi honyie, ara loteler. Lobe lobo omuno ilasi honye lo oliew lo riŋa inyie, jai horemik iso inyia mune Hollum lobe inyia egonyu.
\v 21 Ara hifahi inna tiji: Lia lomuno Hollum, hotomunoi daŋ ilasi honye.
\c 5
\cl ŋati 5
\p
\v 1 Tuŋani leruk hijo ara Yesu a Kristo, esiuni tara Hollum. Ojo hidofe tuŋani lomuno lobo lafa ottu tara Monye, anyar omuno daŋ durre innohonyie.
\v 2 To nia eyyen iyyohoi hijo emuno iyyohoi durre inno Hollum-Lemuno iyyohoi Hollum, att iyyohoi egiamari hifahita innohonyie.
\v 3 Ara mune to Hollum hijo anyar eduloi iyyohoi hujufuta hifahita innohonyie nyo obe hifahita innohonyie erosi.
\v 4 Lesiuni tuŋani tara Hollum, odule iso inyia ŋagalik fau. Golon nyia nia no oremik ŋagalik fau, inyia huruk nohoi.
\v 5 Ŋai lia oremik agalik fau? Inyia tuŋani leruk hijo ara Yesu Lonyi Hollum.
\p
\v 6 Inyia lia lesiuni to hifioŋ ojo to hoto- Yesu Kristo, Obe inyia esiuni to hifioŋ hamai, ati esiuni inyia to hifioŋ iko to hoto. Oyiri lo libo inyia hamai etuhutak, nyo ara Oyiri habisani.
\v 7 Owuon hirro hunik inne etuhutek:
\v 8 Owuon Oyiri, ojo hifioŋ ojo hoto; Ojo hirro hunik inne emwara daŋ anobotie.
\v 9 Lefwotu iyyohoi hutuhuti no hiyyo, agalik ati no Hollum hutuhuti no Hollum, ara inna hutuhuti netuhutari Hollum hirro inno Lonyi honye.
\v 10 Leruk lobo tuŋani to Lonyi Hollum owuon inyia ho hutuhuti to wan nohonye. Lobe lobo eruk Hollum ehumak inyia Hollum loteler, nyo obe inyia eruk hutuhuti nelero Hollum hirro inno Lonyi honye.
\v 11 Ara inna ahutuhuti hijo eisio Hollum dohoi waran no losio fur, ojo wuaran nolosio fur inna owuon to Lonyi honye.
\v 12 Lia lo owuon ho Lonyi honye, owuon ho wuaran; ojo tuŋani lobe owuon ho Lonyi Hollum obe owuon ho wuaran.
\p
\v 13 Egiorok naŋ ta hatai hirro inne hijo anyar leyyen itai hijo lewuon itai ho wuaran no losio fur. Ta hatai ille eruk to fure no Lonyi Hollum.
\v 14 Owuon huruk nohoi to honyie tiji, hijo oremik inyia hisio iyyohoi innak hirro inne lefia iyyohoi to honyie lara to wahan nohonyie, etira inyia iyyohoi.
\v 15 Leyyien iyyohoi hijo etira inyia iyyohoi, esio inyia hirro inne ewak iyyohoi lefia iyyohoi inyia.
\p
\v 16 Lewolo lobo tuŋani ilasi honyie lehuma hiyyau no lobe oremik eyyani ye, isiara inyia hotomoje ojo Hollum att hisio to honyie wuaran. Ero naŋ te illia lobe hiyyau nohose oremik eyyani ye. Owuon iyyau no oremik eyyani ye. Abe naŋ ajo anyar lomojo inyia ania.
\v 17 Ara ibwotita daŋ tamai iyau. Ati owuon iyyau nobo nobe oremik eyyani ye.
\v 18 Eyyien iyyohoi hijo obe tuŋani lesiuni tara Hollum odule hiyya. Nyo eriria lafa esiuni tara Hollum inyia, obe heturruoni oremik eriafu inyia.
\v 19 Nyo eyyien iyyohoi hijo era iyyohoi illo Hollum eijo hidofe iyyohoi leyyen hijo owuon fau daŋ ta has ho heturruoni.
\v 20 Ati, eyyen iyyohoi hijo awoŋ Lonyi Hollum atta hisio toohoi hiyyen, hijo anyar eyyen iyyohoi inyia lara habisani anyar ewuon iyyohoi to honyie lara habisani-ojo to Lonyi honyie Yesu Kristo. Inyia lara Hollum dede ojo wuaran no losio fur.
\p
\v 21 Durre hanaŋ, ibusak rijorihien.