lpx_reg/60-JAS.usfm

\id JAS
\ide UTF-8
\h Yokobo
\toc1 Yokobo
\toc2 Yokobo
\toc3 jas
\mt Yokobo
\c 1
\cl ŋati 1
\p
\v 1 Yokobo, hegiamani lo Hollum ojo la Habu lohoi Yesu Kristo, to woyyojin inne Isarail hunna tomon ha arik; Efonya naŋ.
\p
\v 2 Itumune to hiji ho hitigemita innahatai halasira hanaŋ lobore hitigemita innahatai,
\v 3 eijo itai eyyen hijo eyyani hiciemiti dihan.
\v 4 Isiara dihan hesahak igem nohonyie hijo anyar ogolo huruk nahatai obe nobo sihin olitari itai.
\p
\v 5 Ati lawak lobo lahatai ofioroho, isiara hefia Hollum lesiara to himorot obe hiririŋa te ilia ille efia, ojo iso inyia atta hisio.
\v 6 Ati ifia to huruk eijo itai ibe ekuyya, ara tuŋani lekuya iyya hifoliaha no hifioŋ no ohut oyyami to nobo hikoi ojo inyie atta huruk epwoŋori.
\v 7 Hotobiaŋa tuŋani le egigilo hijo ahu iso inyia ŋamoju hifia nara honyie tara Habu;
\v 8 nyo eriaha higigilo no tuŋani le, ojo hidofe ololok te ikoita innohonyie bi daŋ ta mai
\v 9 Isiara halasi olociaŋ hetidarai ta mai honyie no owuon to hide,
\v 10 ojo halasi hasamani herruŋoi ta nyalami nohonyie, nyo olita iso inyia to tim iyya odwa.
\v 11 Edoŋ holoŋ no onok atta hiswak yani, man ohuyun turiena afau atta hilahaman nohonyie ye. To hikoi nia, olita iso hasamak to hiji he igemita inne hosie.
\p
\v 12 Hotowuana jaha to tuŋani lo odi icemiti, llellaŋ inyia ciama, efwotu iso inyeja tamu no wuaran nafa otiorohini te iliaa illo omuno Hollum.
\p
\v 13 Hotobiaŋa lobo lowuon to ciama ero hijo, “Ottu ciama inna tara Hollum,” nyo obe run oremik hiciem Hollum, ojo Hollum to wan nohonyie obe eremik hisio iciemiti to lobo.
\v 14 Orrumu tuŋani iciemiti innohonyie te iwahiti innohonyie inno orru atta eyari inyia ade.
\v 15 Niya lowodi iwahiti inno hiyyau, atta hiyyau ne esiuni, ati lobolo hiyyata, atta hiyyata inia yite aye.
\p
\v 16 Ibaŋa eruk hinyiaba, halasira hanaŋ hulloŋ.
\v 17 Afanu hisiorita inno olibo ojo hidofe hisiori no obis to hide, nottu aŋolon tara Monye lo calai. Obe inyia eremik hiloito iyya hidisi.
\v 18 Anyimu ifa Hollum to hisio to nohonyie iyyohoi wuaran to hiram no bisan, hijo hetera iyyohoi iyya hosiere inno haŋer to hiji ho hirro innafa oyyeu inyia.
\p
\v 19 Leyyen itai inna, halasira hanaŋ hullo dede. Isiara yohe inno hiyyo hehawa to hitira kwak, heyassa hiro, heyassa jore,
\v 20 nyo obe jore no tuŋani eremik hilwak bisan no Hollum.
\p
\v 21 Iyyania, ibusak daŋ hibwotita ojo irruti inno owuon ta massik daŋ, ati ta nyalami ifwotu hidula no hiram, no oremik etulwahu oyiriha innahatai.
\v 22 Itibaŋ hiram, ibaŋa hame etira, eijo itai enyiaba wati innahatai.
\v 23 Letira lobo hiram ojo inyie obe egiamari, ara inyia iyya tuŋani loriŋa homom nohonyie to miraya.
\v 24 Owolo homom nohonyie, leno ade tara miraya kwak atta agwe rijori nohonyie.
\v 25 Ojo tuŋani loriŋa dee to hafihai inna nalanyar, hifahi no bolioŋ, ojo inyie odule baŋi, obe ara to hetirani logueta, ajaha iso tuŋani legiamari hiram.
\p
\v 26 Legigilo lobo to wan nohonyie hijo ara inyie atuŋani le ikelesia, ojo inyie obe enief ŋadief nohonyie, enyiaba inyia taji nohonyie ojo huruk nohonyie ara assai.
\v 27 Ara manya to hiram no Hollum no olibo, no obe ebwot to hosiere ho Hollum ojo Monye inna: hotoluak hohio iko ihidahi tara hitigemita innohose ojo hidofe eriria wati innohosie tara himumuna na fau.
\c 2
\cl ŋati 2
\p
\v 1 Halasira hoti, ibaŋa etuhutek higigiala iyya ewuon itai to huruk na Habu lohoi Yesu Kristo, Habu lo obie to higigiala ne illak hiyyo.
\v 2 Lajiŋak lobo tuŋani to hiwaha nahatai ojo inyie eciefita bilet inno yiel ojo boŋojin inno opipiak, ojo hidofe tuŋani la ara olociaŋ ajiŋak daŋ ta hatai ho boŋojin inne ebwot,
\v 3 atta itai ŋatuhok honyehite to tuŋani leciefita boŋojin inno olibo atta itai hijo tohonyie, “Illa woŋ tohunyie ta mai no olibo,” ejo itai ette hijo do olociaŋ, “Towuetai ade,” kuyya, “Tohunyie to hejek hanaŋ,”
\v 4 ibe itai iyyania eŋoto wati innahatai to wati innahatai, atta itai hira haŋotok to higigilita inno orru?
\v 5 Itira, halasira hanaŋ, obe ifa ara Hollum onyimu lociaŋak illa fau hijo hetera isia hasamak to huruk atta hidofe ŋarutak obie nafa otiorok inyie te ilia illo lomuno inyia?
\v 6 Ati ibe itai lemuno lociaŋak! Obe ara hasamak ille odurra itai, obe ara isia ille epihita itai a masik inno okiko?
\v 7 Obe ara hasamak ille lomoro fure no tuŋani lafa ellilloŋu itai?
\v 8 Ati, legiem itai hafihi nafa hittok, iyya egioro to buk, “Emuno iso iye onyihari hoi iyya inna emunori iyye wan nohoi,” igiemai nalanyar.
\v 9 Ati legigiala iye illak hiyyo, atta iso iyye eyau, eniefu iso hifahi iyye, nyo era itai hawurok illo hifahi.
\p
\v 10 Labaŋi lobo hifahi daŋ ta mai, ojo hidofe ekos to sihin nobotie, enyiak iso inyia hira hepalani lowur hifahi daŋ tamai!
\v 11 Nyo ojo Hollum hijo, “Baŋa eyyau noŋorwo no lobo tuŋani,” edas hijo, “Baŋa lottohoi.” Lobe iyye eyyau noŋorwo no lobo, eijo iyye ettohoi, ewur iyye hifahi no Hollum.
\p
\v 12 Irara eijo hidofe ebaŋ iyya ilia illo lofwo okiko tamai no oŋotori hifahi hiyyo.
\v 13 Ottu ŋoto nobe omehini te ilia illo lobe etuhutek hamehini. Agalik hamehini ŋoto!
\p
\v 14 Holibo ati inyie iso jei, halasira, lojo lobo hijo awon inyie ho huruk, ojo higemita obe tara honyie? Oremik iso huruk ne etilohu inyia?
\v 15 Lawak lobo ilasi kuyya hanasi luaha no boŋojin ojo ŋiria inna to holoŋi,
\v 16 atta lobo lahatai hijo to hosie, “Inno nalanyar, todule nohon, tadahai hidofe daŋ nalanyar,” ati ibe itai esio to hosie hirro inno wan, hara ati libe nohonyie nyo?
\v 17 Te hikoi nia, lobe huruk to wan nohonyie owuon he igemita, ara no oye.
\p
\v 18 Ati odule iso lobo hiro hijo, “Ewuon iyye ho huruk, ajo naŋ awuon he igemita.” Ituhutek ta hanaŋ huruk nohoi nobe egiama, ajo naŋ etuhutek tohoi huruk nanaŋ to higiemita.
\v 19 Eruk iyye hijo ara Hollum lobotie; ebis iye. Ati eruk hidofe miniaŋa daŋ atta hikikiro.
\v 20 Lewak iyye hiyyen, iyye lobolit lo hiyyo, ejo bahati iyye hijo ara huruk assai lobe igiemita?
\v 21 Hobe ifa Abramo hohonyi hohoi etibisahini te igiemita ta nafa ahafahini inyie lonyi honyie Isako hatara a hisiori to hide haltari?
\v 22 Ewolo itai hijo egiemu huruk igemita innohonyie, ojo te igemita, ŋarrumu huruk ilibiti innohonyie.
\v 23 Ero hiram no Hollum hijo, “Eruk Abramo Hollum, man orrumuni inyia bisan.” Era ifa Abramo a mote do Hollum.
\v 24 Ewolo itai hijo etibisahini tuŋani te igemita, obe ara to huruk hamai.
\v 25 Obe ifa Rahab isomo etibisahini te igemita, tanafa efwotuni inyie lefahat atta ŋefahak isia ade to nobo hiko nolufa?
\p
\v 26 Iyya lowuon wan hamai tara loyiri owuon no oye. Owuon ania, lobe huruk owuon he igem, ara no oye.
\c 3
\cl ŋati 3
\p
\v 1 Hotobiaŋa illak arria tara hatai hatara a hetiyenak, halasira hanaŋ, eyyen hijo efanu iso efwotu ŋoto nettok.
\v 2 Epal iyyohoi daŋ te innak hikota arria. Lobe lobo epal to hirro to nohonyie, ara inyia tuŋani lobis, nyo oremik inyia hinief wan nohonyie daŋ tamai.
\v 3 Iyyania lefitak iyyohoi hofi to hutuhien inno himari abaŋ iso isia iyyohoi, atta iyyohoi hiloit wati innohosie daŋ tamai.
\v 4 Itiyen hijo obolo babur ojo hidofe ogol ati oremik oyyami nefiriwa hiyir, oremik hidofe hiyirit letiŋ hiloit inyia a mai no ohuye hesuhoni.
\v 5 Ara ŋadief wan lettiŋ to wan no tuŋani, ati etidarari to hirro inno hittaha. Itiwolo, oremik hima ediehini atta hisok tutur!
\p
\v 6 Ara hidofe ŋadief a hima, fau nefut ho hiyyata lowuon to hiji ho wati innohoi, oremik hitibwot wan atta ŋediek hima to ikoi no wuaran, ojo inyia to wan ŋaswahahini to hima nosio fur.
\v 7 Oremik tuŋani ŋehuhumu ciaŋi hahonyak, cieŋ, ojo hirro inna amanya to hifioŋ.
\v 8 Ati obe lobo tuŋani oremik ŋeniefu ŋadief; ara run nobe oyiri, efut ho hiyyeri no ye.
\v 9 Ta ŋadief, etihabwo iyyohoi Habu lohoi iko Monye, ojo hidofe te inyia ettor iyyohoi hiyyo, illafa oyyeuni to rijori no Hollum.
\v 10 Afanu hidofe ijohiti daŋ to hutuk nara ottoro. Halasira hanaŋ, hotobiaŋa hirro inne ara ania.
\v 11 Heremik atii luŋa hifioŋ inno olibo ojo inno orru ŋafanu tara hari nobotie?
\v 12 Halasira hoti, heremik iso ŋaboli eŋarak haŋer innohonyie a hukwa, kuyya hukwai eŋarak innohonyie aŋaboli? Obe hidofe osiru ta hari no onyieta a mile iko hifioŋ amatat.
\p
\v 13 Ŋai to hiji hata lowuon ho ofioroho ojo hiyyen? Isiara tuŋani hetuhutek manya no olibo te igemita innohonyie ta nyalami nottu tara ofioroho.
\v 14 Ati lewon iye ho haini no odua eijo hidofe taji nohoi errute, baŋa etidara eijo hidofe eteler to hirro hunna ara dede.
\v 15 Obe inna ara genyan nottu afau te ido, ati ara nafa, nobe ara no Hollum, efut ho miniaŋa.
\v 16 Lowuon haini ojo iwahiti inno wan efut, owuon iso hiharra iko igemita inno orru.
\v 17 Ati obis genyan nottu to hide hosiere, atta hati himwara no mune, nyalami, mune na tajia, nefut hamehini ojo haŋer inno olibo, nobe higigiala ne hialk huwo.
\v 18 Ojo haŋer inno bisan edulahini to himwara te ilia ille ehuma himwara.
\c 4
\cl ŋati 4
\p
\v 1 Ottu rija ho ŋalafa to hiji hatai taji? Hobe obe afanu tere iwahiti innahatai inno orru inna aŋalafa ta wati innahatai?
\v 2 Le edaya itai hirro inno libe itai eremik ŋarrumu. Ettohe itai atta itai hitiŋatta hirro inne ebe itai eremik ŋarrumu. Eŋalafa itai atta rija, ati lebe itai errumu nyo ebe itai efi Hollum.
\v 3 Efi itai ejo itai ibe efwotu nyo efia itai to hirro inno orru, hijo anyar etiharari itai to hirro innahatai inno orru.
\p
\v 4 Itai harotok, ibe itai le eyyen hijo lomuno illak hiyyo fau, ara isia miorok illo Hollum? Lia lo oriaha ha fau, ara inyia mereni to Hollum.
\v 5 Egigilo itai hijo ero hiroita assai ta nafa erarari isia hijo, “Omuno Loyiri lowuon tohoi iyyohoi ta wahan nara ahaini.”
\v 6 Ati esio inyia hamehini nalagalik. Nia ero higierita hijo, “Ebo Hollum hetidarak ati omehini inyia ta nyalamak.”
\p
\v 7 Itiniŋe Hollum, ibwara hetisiahani atta iso inyia hurruata ade tara hatai.
\v 8 Ihutok aŋati to Hollum, ojo iso Hollum atta ehutok aŋati ta hatai. Itilibo has innahatai itai heyak, itilibo tajia innahatai itai ille eriok tajia.
\v 9 Ititarihai tajia, ititarihai, eijo hidofe eyio, anyar oyito hilohita nahatai tariha, ojo mune nahatai oyito no odiŋ.
\v 10 Inyiaha wati innahatai ahalu to hosiere na Habu, atta iso inyia hitibolo itai.
\p
\v 11 Halasira hanaŋ, ibaŋa omwaŋa lobo tuŋani. Lia lomwaŋa ilasi honyie kuyya ojo hidofe oŋot inyia norru te ifahita ati oŋot inyia hifahita. Ati leŋot iyye hifahita, ibe iyye era ahehuhumani he ifahita, ati ira iyye haŋotoni lo hosie.
\v 12 Owuon hesiarani le hifahita lobotie lara haŋotoni, inyie lia loremik etilohu ojo hidofe oremik ŋatohe. Ati ŋai iyye lewuon a haŋotoni lo onyihari hoi?
\p
\v 13 Igigile iyyania itai ille eijo, “Ena kuya motie efi iso iyyohoi a doŋe nobo, emanya iso iyyohoi to hiŋa nobotie nyo efwo iso iyyohoi hitinyaŋa eijo hidofe epoco ibariti.
\v 14 Ibe itai eyyen nyo nia ottu motie. Ara wuaran nahatai iyya nyo. Ara inyia iyya itiran no oliew iyyania, ojo kwak atta alitek.
\v 15 Anyar eijo itai hijo, lawak Hollum, ewuar iso iyyohoi atta iyyohoi hihuma tiji, kuyya iyya nyia.
\v 16 Ati iyyania etidara itai to hirro inne ehuma itai. Orru hitidara iyya inna.
\p
\v 17 Iyyania, lia lo oyyen hihumita inno olibo, attati hibo hihuma, eyyau inyia.
\c 5
\cl ŋati 5
\p
\v 1 Ifanu iyyania itai habarak, itiyye eijo hidofe eluluo to hitigemita inna afanu iso ta hatai.
\v 2 Omurai ibariti innahatai ojo hidofe hiyyu essok boŋojin innahatai.
\v 3 Obe yieli iko arobiyaha innahatai osiru nyo ero iso murai nohosie norru ta hatai atta hissok wati innahatai iyya hima. Ettunak iso itai ibariti innahatai to hucuŋi inno holoŋitek.
\v 4 Itiwolo, oyyo hegiamak illo odioŋo matta innahatai te idumuti innohosie, nyo eduma itai isia to hoho, ati eba yio na hadioŋok man ta Habu lo oseŋer.
\v 5 Emanya itai te imuniti inno fau ejio hidofe ejufuta iwahiti inno wati innahatai, etidaha itai tajia innahatai man do holoŋ no toho.
\v 6 Eŋotok itai ye ta habisak atta itai ŋattohe inyia ati obe inyia ebo itai.
\p
\v 7 Halasira hanaŋ, itilau to dihan na hawoŋ na Habu. Itirriŋe, iyya etila haromoni dioŋo na mana, etila inyia to dihan nohonyie haŋer inna awak inyia binno man ottuni hai hitieri iko inna ottu halu.
\v 8 Itai hidofe, itidihu eijo hidofe itigolo tajia innahatai, nyo eliaha ŋacohini na Habu.
\v 9 Halasira hanaŋ, ibaŋa eŋuŋunuta atta itai mwaŋa lobo tuŋani hijio hotobiaŋa ŋoto ottu ta hatai. Itiwolo, oweta haŋotoni de ikat.
\v 10 Halasira hoti, itiwolo dihan no hekilak illafa ero to fure na Habu.
\v 11 Itiwolo, elliloŋo iyyohoi luha illo odi, “Lowuon ha jaha.” Etiru ifa itai dihan no Job, ejio hidofe itai eyyen igem na Habu to Job, nyo efut ifa Habu iko nyalami iko hamehini.
\p
\v 12 Halasira hanaŋ, hiram ba agalik bi daŋ inna hijo hotobiaŋa itai ettuŋo; kuyya to fure ne ido iko fure na fau, kuyya hidofe to hillama. Ati le ejio itai “Dede” isiara hatara “Dede ojio “Obe” nahatai arasa, “Obe” hijo hotobiaŋa itai ehuyek to ŋoto.
\p
\v 13 Ho owuon lobo lahatai to diahai na wan Isiara inyia hotomoje. Lo owuon lobo lahatai lo omuno? Isiara inyia hedolo fureta.
\v 14 Lo owuon lobo lahatai lo oŋuai? Isiara inyia hellilloŋo ettaha ille ikelesia hotomoje to honyie. Isiara isia hefufusok hiyali to honyie to fure na Habu.
\v 15 Atta mojo no tuŋani heruhoni hitilibo tuŋani haŋuani ojio Habu atta hitidiet inyia ahide. Ojio leyyau inyia hiyyata, ebusak iso Hollum inyia.
\v 16 Ilimak hiyyata innahatai to halasira hatai ejio hidofe emojo te isia hijo anyar itai elibo. Egiama mojo no tuŋani habisani binno.
\v 17 Omojo inyia to hifiriwa. Owuon ifa Elijah iko iwahiti iyya iyyohoi, ati omojo ifa inyia to hifiriwa hetihori hai, ojio ta ŋasi hunik iko yafajin ile obe ifa hai assan ta fau.
\v 18 Atta inyia hinyiak mojo ojio hai atta san binno, atta fau aŋijak haŋer innohonyie.
\p
\v 19 Halasira hanaŋ, kuyya le epal lobo lahatai to hikoi no hilahode, atta lobo tuŋani enyiahu inyia,
\v 20 isiara inyia hotoyyen hijo enyiahu inyia heyyani ade tara hipali nohonyie, etilohu iso inyia ade tara ye, ojio hidofe etihok hiyyata innohonyie arria.