lpx_reg/59-HEB.usfm

\id HEB
\ide UTF-8
\h Eberei
\toc1 Eberei
\toc2 Eberei
\toc3 heb
\mt Eberei
\c 1
\cl ŋati 1
\p
\v 1 Ifa beren ero Hollum to hohonyok illohoi to hekilak hinyiahita ariai ojio tokoi ariai.
\v 2 Ati to holoŋitek hunna eliaha wati, ero Hollum to hoi to onyi honyie, lafa onyimu inyia hotorutak hirro bidaŋ, ati tara honyie atta inyia ayyeu hirro inno fau.
\v 3 Ara lonyi honyie to honyie acialai no kuatan, ojio hidofe ocialari iko Hollum dede ojio inyia ottoŋita hirro bidaŋ to duaran to no honyie. Nafa etilibik inyia hiyyata innohonyie, atta inyia hittole ta hani he inyiet no haduarani te idoo, ojio hidofe agalik anjilohien binno to nyo esio ifa hiyyo inyia fure no olibo na agalik inno anjilohien.
\p
\v 4 Obe ifa Hollum emak lobo anjilo hata galik onyi honyi to hikumita, iyya nafa agalihini fure no honyie inno anjilohien.
\v 5 To higierita obe Hollum ero to lobo anjilo hiro inafa elimak inyia to onyi honyi: “Era iyye onyi hanaŋ! Ena elimak nayya to hiyyo bi daŋ hijio ara nayya monyohoi!” Atta inyia hijo to nobo higieri, “Awu nayya hirra amonye honyi, ojio inyia owu hirra onyi hanaŋ”?
\p
\v 6 Nafa eyyani Hollum onyi honyie ille abaŋ inyia, onyi honyie ille lobotie a fau, atta inyia hirro: anjilohien illo honyie bi daŋ anyar omojo inyia.”
\p
\v 7 Ojio to higieri erro hidofe hirram no anjilohien: “Ehumak Hollum anjilohien illo honyie hijo hatara alo Oyirihien no ogol no owuon iyya ŋadief no hima.”
\p
\v 8 Ati to higierita, egiorohini hidofe ino onyi Hollum: “Iyye lia era Hollum le hikumo man fur, ejio iso iyye ewu hikumo no lobis to obie no hoi.
\q
\v 9 Emuno iyye hiyyo illohoi illo obe eyyau ejio iyye ebe emuno hiyyo illo owuon iko iyyata. Ati Hollum ille emojo iyye, emak iyye hotomune binno agalik lobo lo owuon.”
\p
\v 10 Eyyen hidofe iyyohoi hijo onyi honyi agalik anjilohien to nyo egioro to higierita hiram no onyi Hollum, “Hollum ara ifa iyye iyyeu fau to hitieri. Atta hidofe iyye ayyeu hirro bi daŋ inno owuon to fau, hahier ojio hirro bi daŋ inno owuon to hide. Obe hirro niyya enyak wuana, ati ewu iyye adule wuana man fur.
\q
\v 11 Ofu isia hisaha agwasari iyya nia ogwasari boŋojin ade. Ewu iso abibinari isia iyya ara isia
\v 12 boŋojin. Atta ati iyye hiloyyit hirro bidaŋ inno owuon ta fau hatara innak hirro ŋejuho, iyya tuŋani ille eciofok boŋojin ŋejuho. Ati ettole iso iyye na ociala, ejio iso iyye emanya fur!”
\p
\v 13 Holobe Hollum ejo innak hirro te illak anjilohien hirro inia ojio inyia to onyi honyie: “Tohunye ta hani he inyiet hanaŋ ejio iyye ekumo daŋ hanaŋ ati ajio nayya awu himir miorok illohoi bidaŋ anyar ewuon iyye to hide hosie!”
\p
\v 14 Ara anjilohien jia oyirihien illo efahu Hollum hijo anyar egiama ojo hidofe orriŋa heruhok illo ottu Hollum etilohu daŋ, iyya ojio inyia hijo awu inyia higiem to hosie.
\c 2
\cl ŋati 2
\p
\v 1 Ati, iyyania anyar ehum iyyohoi riŋa to hirro ino etiru iyyohoi inno onyi Hollum anyar lobe iyyohoi eremik hituwet hiruk nohooi.
\v 2 Lo obis hiram nafa ero anjilohien, itimoju iso hiyyata iko miasa ŋoto no obis,
\v 3 herruat iso iyyohoi jai le ebo iyyohoi etilohini ne ettok? Etilohini inna nafa ogiofohini te iyyohoi ta Habu tara lia illafa etiru.
\v 4 Ero hidofe Hollum to hituhutita, igiemita, iko iduariti ariai inno ogol, ojio hidofe to habuanyak nohonyie hisiorita inno oyiri no Olibo iyya ta wahan nohonyie.
\p
\v 5 Obe Hollum emak anjilohien hoto toŋitai fau ŋejuk na awu inyia ayyeu, ati owu inyia emak Kristo hoto toŋitai fau nyia.
\v 6 Ero lobo tuŋani ta nyalami to Hollum hirro inia to higierita, hijio, “Obe lobo tuŋani legigilo binno no eremik iyye higigilo te inyia! Obe lobo tuŋani lo owuon la anyar lo oremik iyye luaha inyia!
\q
\v 7 Eyyeu ifa iyye inyia lo odicio tara anjilohien, atta iyye baŋi isia iyya ne abaŋari hiyyo habuok.
\q
\v 8 Emak iyye hirro bidaŋ ta has hosie.” Ojio Hollum hijo anyar ekumo tuŋani hirro bidaŋ. Etihutek hijo obe enak hirro ino ofu ofitohini to hikumo to nohonyie. Ati iyyania, to holoŋitek hunna ebe iyyohoi egonyu tuŋani ekumo hirro bidaŋ.
\v 9 Ati, ebe iyyohoi eyyen hijo ŋai Yesu, lo olieu tamanya no honyie iyya odico tara anjilohien. Nyo omelehini inyia atta ye, esio Hollum inyia mai no olibo bino bi daŋ. Emak Hollum Yesu hatara habu lo hirro bidaŋ, nyo oye Yesu to hiyyo bidaŋ.
\p
\v 10 Nyo ara ifa no hijo omelehini Hollum to hoi, inyia nia owuon hirro inia. Ara ifa nia hijio emak Hollum Yesu bidaŋ tokoi ino hitigiemita ojio hotoyo te iyyohoi. Hollum oyyeu hirro bi daŋ, ojio ara inyia lia owuanari no hiro bi daŋ. Ojio ara Yesu le etuhumak Hollum hetilohu hiyyo.
\v 11 Ara Yesu hetiliboni lo hosie le emak isia aŋati ho Hollum, ojio ilia olibo wati owuon daŋ iko Hollum, ara daŋ tamai to nobotie, Hollum wan lohonyie. Ati obe Yesu eloriri hillilloŋ isia hijio halasira honyie iko hanasirak honyie.
\v 12 Nyo egiorohini hijo ojio Yesu to Hollum hijio etuhutek iso nayya fure nohoi to halasirak hanaŋ, awu nayya iso hidolo hitihabuo iyye to hiji ho heruhok!”
\p
\v 13 Ojio hekilak atta egiorok te innak higierita hijo hojo Yesu nyo to hiram no Hollum: “Awu nayya hiruk Hollum.” Ojio to innak higierita, ojio Yesu to hiyyo ilia ara onyirok ho Hollum,
\v 14 “Nayya ho onyirok iko Hollum hullo esio Hollum ta hanaŋ teni.” Ati iyya ara onyirok ho Hollum hiyyo, ara Yesu tuŋani iyya isia. Owuon sitan iko golon ne emak hiyyo hatabaŋa ye, ati awoŋ Kristo a tuŋani anyar ara to ye to nia honyie ojio to himir to nohonyi ye anyar etirifak inyia sitan.
\v 15 Egiem Yesu hirro inia anyar ohou iyyohoi bi daŋ, manya no hoi, ebe iyyohoi eremik ebusak wati innohoi hata baŋa ye.
\v 16 Nyo awoŋ no Yesu a tuŋani, obe ara anjilohien hame ottu inyia hiluak. Obe, ara luŋa iyyohoi ilo eruk Hollum iyya nafa egiem Abramo ŋai lia ottu inyia heluak.
\v 17 Ati emak Hollum Yesu hatara dede iyya iyyohoi, iyya tuŋani “halasirak.” Awoŋ inyia afadiri le ettok le egiama ta nyalami to hiyyo bi daŋ ojio hidofe egiama to hilik to na taji to Hollum, ati ohu inyia ye to hiyyata inno hiyyo ojio emak hikoi to Hollum hotomelehini to hosie.
\v 18 Oremik Yesu hitiluak hiyyo illo ociem eyyau nyo orumek inyia to wan to lohonyie hitigiemita ojio ifa sitan ociem inyia heyyau iyya nafa ehumahini inyia iyyohoi heyyau.
\c 3
\cl ŋati 3
\p
\v 1 Itai heruhok hulloŋ, emak Hollum itai to oger atta anyimu itai hatara illohonyie. Ati itiwolo Yesu.
\v 2 Ara inyia efahati lo Hollum to hoi ojio hidofe ara fadiri le ettok lafa eruk iyyohoi bi daŋ nobotie. Egiem inyia hirro dede to Hollum, lia onyimu inyia, iyya nafa egiamari Musa to hiyyo illo Hollum, ille ellilloŋo iyyohoi hijo haji no Hollum.
\v 3 Ati iyyania oyyeu inyia illak hiyyo hajik bidaŋ, oyyeu Hollum hirro bidaŋ.
\v 4 Ati oduhohini hajik daŋ te illak, ati Hollum lia oduho hajik bidaŋ.
\v 5 Etilik ifa Muse taji to higiama to Hollum ojio hidofe oluak hiyyo illo Hollum, iyya hegiamani le etilik taji te ettok lo honyie. Ati elimak Musa hijo nyo iso nia owu Yesu hijio.
\v 6 Ati ara Kristo onyi Hollum ille ara hekumoni ho hiyyo ilo Hollum, Ejio iyyohoi era hiyyo hullo ekumo inyia efi iyyohoi adule ho ŋere no hiruk to Kristo ejo iyyohoi edule ha tajia hijo owu Hollum higiem hirro innafa ojio inyia hijo awu inyia higiem tohoi.
\p
\v 7 Atta Oyiri no Olibo etuhutek hegiorok ho waraga hijo hegiorok hirro inno to Baibol te Isarail: “Iyyania,
\v 8 etiru itai Hollum ero tohoi, hotobiaŋa itai ettuho ojio hidofe ebe ebaŋ inyia, iyya nafa obiaŋari mamanyiok illahatai omiasari inyia nafa ociamari Hollum isia to waha.
\v 9 Edas ifa mamanyiok illahatai hiciem nayya, hijo kuyya awu iso nayya mahu hidik daŋ hosie, hara hido ŋasi tomwana aŋwan egonyu isia hirro hunna olibo ino agalik ino egiem nayya.
\p
\v 10 Ati atta nayya hiloyito to hiyyo ilia, atta nayya hirro te isia, ‘Obe isia nobo eruk ta hanaŋ, ojio hidofe obe etiru hawak isia hehumak imanyiti innohosie jai.’
\p
\v 11 Ejoria ifa nayya daŋ hosie atta nayya elimak dede to hosie bidaŋ, ‘Obe isia ofu ajiŋak ta fau no Kanaan na awu nayya hisio isia eyyomori!’”
\p
\v 12 Atti, heruhok huloŋ, ihuma riŋa tok obe elak illahatai eruk to Kristo to nyo to run na tajia innahai, ino ehumak itai hebuara Hollum hayyani ile dede owuon.
\v 13 Itudule hitigol wati inahatai holoŋitek daŋ, halawak Hollum itai. Hijo hotobiaŋa lobo tara hatai etigol taji nohonyie to hinyiaba iko iyyau.
\v 14 Efi iyyohoi iyyania tubai iko Kristo le edule iyyohoi eyyik ta tajia te innohoi hiruk to honyie, man to holoŋ to nyia nafa etiarari iyyohoi eyihini to honyie man to far nyia eyori iyyohoi.
\v 15 Egiorohini ifa to higierita hijo ojo Hollum, Iyyania, etiru itai nayya ero ta hatai, hotobiaŋa itai ettuho ojo hidofe emiasa nayya iyya nafa egiem mamanyo illahatai atta hibo nayya.”
\p
\v 16 Ŋai lafa lia eyyen itai lafa etiru Hollum atta hidefer? Obe ifa ara lia daŋ illafa afanu ade ta Masir tara Musa?
\v 17 Ejoria ifa inyia iko ŋai ta ŋasi innafa tomwana aŋwan? Hobe ifa ara liyya ille eyyau, atta isia ahuyik to waha?
\v 18 Hettuŋo ifa inyia ta ŋai hijo ebe iso isia ojiŋak yiri, lobe ifa hiyyo illafa omiasa inyia?
\v 19 Obe ifa isia oremik ajiŋak to yiri nohonyie to biaŋan no huruk nohosie.
\c 4
\cl ŋati 4
\p
\v 1 Iyya, ojo ifa Hollum hijo efi iyyohoi yiri, ati anyar ehum riŋa, anyar ewon nalanyar hotobiaŋa lobo tarahatai ohuyek to hiro huna.
\v 2 Elimak ifa tohoi sayye no olibo inya owoun. Ati obe ifa sayye nia oluak hetirak to nyo obe isia owuon ho hiruk iko lia ilo obe eruk.
\v 3 Iyyohoi hullo eruk hame eremik ojiŋak to yiri no Hollum, iyya ojio inyia hijo, “Iyya ettuŋo ifa nayya to jore, hijo obe iso isia enyiak ajiŋak to yiri.” La ara ania, esaha ifa igem nohonyie to hitieri na fau inna man beren.
\v 4 Ero inyia to nobo to hiram no hitahatarihi no holoŋ hijo, “Oyiri ifa Hollum to holoŋ no hitahattarihi tara igemita innohonyie.”
\p
\v 5 Enyiak inyia hijo, “Obe iso isia oremik ajiŋak to yiri nanaŋ.”
\p
\v 6 Iyyania, enyiak illak hiyyo ajiŋai eyyomori, Ati liya ilafa etiru sayye nalanyar nafa elimahini tohoi obe isia ojiŋak nyo obe isia eruk.
\v 7 Ati enyak Hollum ehumu holoŋ nobo, na ara “ena” ifa lero inya to Davide egioroni ifa hiro nia: “Iyyania, etiru itai hutuk nohonyie, ibaŋa etigol tajia innahatai.”
\p
\v 8 La ara ifa Josua esio to hosie yiri, no obe ifa Hollum enyiak hiro to nobo far.
\v 9 Iyyania, holowuon yiri to hiyyo illo Hollum.
\v 10 To tuŋani lo ojiŋak to yiri no Hollum, oyiri hidofe inyia ta wan nohonyie tara higiemita innohonyie iyya nafa oyiriari Hollum tara innohonyie.
\p
\v 11 Iyyania hetijiŋak to yiri nyia, hijo hotobiaŋa lobo tuŋani ohuyik to miasa nafa egiem isia.
\v 12 Owuar hiram no Hollum ojio hidofe egiama, no ofi agalik fijan no demio arik. Ocuk man obuany oholio tara oyiri, obuany huttuluta tara het. Oremik hiyyen higigilita inno owuon ta taji.
\v 13 Obe nobo sihin nafa oyyeu Hollum beren oremik eŋofohini. Ati oliew hirro bidaŋ to honyiehite inno tuŋani la afanu iyyohoi hisio higiemita innohosie.
\p
\v 14 Iyya ewuon iyyohoi iko fadiri lettok lafa ojiŋak eido, Yesu Kristo onyi Hollum, heniafa no ogol to huruk nohoi.
\v 15 Obe iyyohoi ewuon iko lobo fadiri le ettok lo obe oremik hamelehini te iyyohoi. Ati ewuon iyyohoi iko tuŋani lafa eba te iciemiti ariai iyya iyyohoi, ati obe ifa inyia owuon heyyau.
\v 16 Isiara iyyohoi hafanu to hiŋere to hittoloji no hamehini, anyar emoju iyyohoi hamelehini ejio hidofe errumu hamehini no oremik hiluak iyyohoi to holoŋ ne ewak iyyohoi luaha.
\c 5
\cl ŋati 5
\p
\v 1 Awak Hollum anyimu ettok la fadirihien, egielu inyia tuŋani to hiji ho hiyyo. Tuŋani lia owu higiama to Hollum to hiyyo; tuŋani lia ohu hisiara hisiorita to Hollum ojio hidofe esio ciaŋi to honyie to hiyyata inno hiyyo.
\v 2 Owu ettok lia etimojok nyalami to hiyyo ilo oyyen kai hiram no Hollum ojio hidofe to hiyyo ilo eyyau to honyie.
\v 3 Ara nia iyya elik ettok lo hetimojok to wan to lohonyie ho hiyyata, eyyani nia to honyie hesiara inyia ciaŋi ahisiorita hijo eyyau inyia iyya egiama hiyyo daŋ.
\v 4 Hotobiaŋa lobo tuŋani ta wan nohonyie eyari ohuo inna. Ati Hollum ellilloŋu inyia, iyya nafa ha Arone.
\v 5 To hikoi nia, obe ifa Kristo ta wan nohonyie emak wan nohonyie a fadiri le ettok. Ati, ojo tuŋani lafa ero to honyie hijo, “Iyye Lonyi hanaŋ; ena era nayya tohoi a Monye.”
\p
\v 6 Ara iyya nafa nia erarari inyia to nobo mai hijo, “Era iyye a fadiri mak, ta halu ho hipali no Melkisedek.”
\p
\v 7 Nafa amanyari Kristo ta fau, omojo inyia to Hollum atta hifia inyia lo oyo to honyie to hidenya. Efi inyia Hollum, ille oremik etiluahu inyia to oyori.
\v 8 Etira Hollum to honyie to nyo abaŋ Kristo Hollum. Ara hido Yesu onyi Hollum, amijak inyia baŋi Hollum to hitigiemita ojo to ye.
\v 9 To hesahak nohonyie hirro bidaŋ innafa ojio Hollum to honyie igiama.
\v 10 Onyimu ifa Hollum inyia hatara ettok la fadirihien iyya tekoi ta nafa asarari Melkisedek ettok la fadirihien.
\p
\v 11 Owuon hirro ariai ino Yesu ino awak nayya elimak ta hatai, ati ogol to hiro nyo obolo hibolit ta hatai, obe itai eremik etiru.
\v 12 Ati ne era ida itai iyyania hetiyanak, edule itai wahan lobo tuŋani hetiyanai itai hirro illo odicio inno Hollum. Ewak itai le, obe ara ŋiria no ogol!
\v 13 To tuŋani lo odule mata le, oremik hiro hirro inno ibisiti, nyo halara inyia ahiito letiŋ.
\v 14 Ati ara ŋiria no hiyyo hullo hittaha. Isia ilia hiyyo hullo ogol to himaruak nohosie emak hosi innohosie to hitiyana atta egigielu libe tara irruti.
\c 6
\cl ŋati 6
\p
\v 1 Ibusak hitiyyenita innafa ho beren inno Kristo anyar hidofe efu ahosiere. Hotobiaŋa iyohoi erassa enyiak adule hiro hirro innafa ho beren iyya yite to hiyyata to igemita inno ofiak, ojio hidofe to huruk to Hollum,
\v 2 kuyya hitiyana to hillilla, hatirok has, hebuhuni no hayok, iko ŋoto no hayok.
\v 3 Dede ebibolori iso iyyohoi la aŋatak Hollum tohoi.
\v 4 Nyo obe lobo tuŋani aciohini to Hollum ta halu ho hiyyen nohonyie hiram no Hollum hidofe etiru inyia hisiara ne ido iko Oyiri no Olibo,
\v 5 Hidofe oyyen inyia libe no hirorita inno Hollum iko duaran na fau no ottu iso;
\v 6 kuyya eloit tuŋani lia taji nohonyie ade tara Hollum, obe inyia oremik haciohini to heloyitori na taji nyo esihok inyia lonyi Hollum enyak hidofe inyia hisio Yesu iiri to hosiere ho hiyyo.
\v 7 Ero ida hido iyyohoi ania, eyyen iyyohoi hijo owuon hiro hunaŋ olibo tohoi ojio ino etiluahini. Obe Hollum egigiala hijio owu iso agwe igiem nahatai ojio mune ne etuhutek itai to fure to nohonyie.
\v 8 Ati lowoun hohukwa, obe olibo iko eliaha te epit. Ara hicuŋi nohonye to hima.
\p
\v 9 Ati eruk iyohoi tasaŋ inia tarahati inia anyar, ilasira, hiro ino eyani hetilahini, hata ero ida iyohoi tiji.
\v 10 Obe Hollum owon iko hipali. Obe inya ogwe egiam nohoi iko mune netihutek iye to fure to no honyi, nyo egiama iye tohiyo inlohonye, ejo iye arasa higiama to honye.
\v 11 Hidofe ewak iyyohoi hijio anyar etihutek itai daŋ gelegele golon nahatai hetisisru heyiyihini nahatai man to hisidi, anyar ewon itai homoi.
\v 12 Inya nia ebe iyyohoi ewak itai hatara ahiyyo halanak, ati anyar era itai ahiyyo illo orutak itieriti to huruk iko dihan.
\p
\v 13 Ifa Hollum otiorok golon ina ta Abramo, ettuŋo inyia to wan nohonyie, iya obe inya oremik hutuŋ to nobo jok.
\v 14 Atta hijo, “ajak esio naŋ iye hidofe esio nyar iye dure ariai.”
\v 15 Tokoi to nia, arumu Abramo egololiti ifa asan etila ifa inyia to mune atta amoju imunuti ino.
\v 16 Nyo ettuŋo hiyyo to fure na agalik isia ojo ara hittuŋo hisidi na ŋalafa.
\v 17 Ettuŋo Hollum, nyo awak inyia etihutek hijo hiyyo hullo orutak itierit hijo, dede obe iso wahan nohonyie aciaha. Ehuma Hollum iyya niyya, nyo awak inyia hitigol to hirro ariai, itieriti innohonyie to hittuŋo nohonyie.
\v 18 Hunna obe iso aciaha nyo obe Holum oteler, to nia iyyohoi hullo eris to honyi anyar ehum hinef heyihini nohonyie nolo wuon to hosiere hohoi.
\v 19 Ara heyihini inna iyya haririk huna efitari oholioho iyyohoi to golon ojo ina obe futo. Ara inyia heyihini no ojiŋak ta mai iko Hollum no odua.
\v 20 Ajiŋak ifa Yesu ta mai nia a hanyietani lo hosiere hohoi, ottu hidofe inyia afadiri le ettok ta halu ho hilima no Melkisedek.
\c 7
\cl ŋati 7
\p
\v 1 Ara ifa Melkisedek habu lo Salem hidofe ara fadiri lo Hollum la galik daŋ. Eboŋohini ifa inyia iko Abramo nafa aciohini Abramo to toho nohonyie habuwok atta Melkisedek etijahak inyia.
\v 2 Esio ifa Abramo kal hitatomoni to honyi no hirro inno eyyani inyia ta mai horem, nyo ahosiere daŋ, ara Melkisedek ahabu lo bisan iyya etihutek fure nohonyie. Ara inyia hidofe habu lo Salem nojo habu elik taji.
\v 3 Obe ifa inyia owuon iko monye, iko hotonye, ojo hohonyiok, obe ifa hitieri iko hisidi no manya nohonyie. Ati arasa inyia afadiri iyya onyi Hollum mak.
\p
\v 4 Iko ituwolo bolo no tuŋani ille nyo esio ifa Abramo kal hititamoni to honyie no hirrro hunna eyari inyia amai ho rem.
\v 5 Dede onyirok ho Levi illafa omoju egiamari no fadirihien owuon isia iko hifahi no heyari hisiorita tara hiyyo, hijo ilasira illo Isarali ara ida hido isia onyirok ha Abramo.
\v 6 Ati tuŋani lia Melkisedek lo obe ara to woyyo ba Lefi, omoju inyia kal hitatomoni hijo Abramo, hidofe etijak inyia lia lo owuon iko itieriti.
\v 7 Hiram inna ara dede hijio, etijak tuŋani ille agalik lia odicio.
\v 8 Ati niyya omoju fadirihien lia to woyyo ba Levi kal hitatomoni, no oye ida hido isia omoju Melkisedek kal nia ojo inyia ara tuŋani lo owuar fur.
\v 9 Ati ajo naya hijo, Levi lo omoju kal hitatomoni, oduma ifa inyia beren kal no hitatomoni ta Abramo,
\v 10 nyo owuon ifa inyia ta mai hohonyi honyie Abramo nafa eboŋori Melkisedek iko Abramo.
\p
\v 11 Iyyania kuyya onyimu hiyyo bisan ta fadirihien illo woyyo ba Levi nyo te inyia omoju hiyyo hifahita, nyo obe iso ŋai enyiak wahan fadiri lobo lia ocialari iko Arone hoto'diote, ati tara ba Melkisedek?
\v 12 Nyo eloyit woyyo no fadirihien, anyar eloyit hidofe hifahita.
\v 13 To hiyyo hullo elimahini hirorita hunaŋ to hosi ara isia illo nobo woyyo, hullo holobe lobo tuŋani higiama ta altari.
\v 14 Ati iyyania, ara ifa dede hijio ottu ifa Habu lohoi to woyyo ba Yuda, woyyo nafa obe Musa eliet hijo hatara afadirihien.
\v 15 Ati obis hirro huna ero iyyohoi hijo odioto lobo fadiri la ara iyya Melkisedek.
\v 16 Obe inyia ara fadiri to hijufuta nohonyie hifahita, ati to duaran no wuaran no obe iso esid.
\v 17 Nyo ojo ifa to honyie hijo ara iso iyye afadiri mak to woyyo ba Melkisedek.
\p
\v 18 Ati opuahan ifa hifahi nia to hosiere nyo elik ifa inyia ojo hidofe ofiak.
\v 19 Nyo obe ifa hifahita etibis illak hirro ati ewuon iyyohoi iko heyihini na anyar agalik, ehutori iyyohoi to Hollum.
\p
\v 20 Ehumak ifa Kristo afadiri to hilifo.
\v 21 Ehumak fadirihien ilia to hosiere to biaŋan no hilifo, ati ero Hollum to Kristo hijio elifo habu. Hidofe obeŋ iso inyia eloyit hirorita innohonyie ara iso iyye afadiri mak.
\p
\v 22 To nia etigol Yesu itierit ŋejuk na la nayar agalik nafa maruani.
\p
\v 23 Owuon ifa fadirihien aracie nyo oye lobo orutak iso lobo igem no inyia hegiamari mak.
\v 24 Ati odule Yesu mak to nia odule obe iso igem no honyi esaha.
\v 25 Ojio to nia oremik inyia hetilohini man mak lia daŋ hullo afanu to Hollum te inyia nyo amanya inyia mak amojori te inyia.
\p
\v 26 Anyar to hoi ha awuanari iko fadiri lo obolo iyya lia nyo olibo inyia hidofe obe inyia enyiaba, kuya hido eyyau amanya inyia to hiji ho heyyak hidofe etihabuwo inyia idoho.
\v 27 Obe Yesu esio hihumita holoŋitik daŋ iyya nafa ehumari fadirihien hullo hitaha, to hiyyata innohosie ahosiere, ojo ta halu ho hiyyata inno hiyyo. Ati ehumak ifa inya hifahi nobotie nesio ifa inyia wan nohonyie hayori to kuruce.
\v 28 Onyimu ifa hifahita inno Musa hiyyo hullo elik, ati hirro no hilifo no owuon ta halu ho hifahita, onyimu inyia Lonyi lo obis mak.
\c 8
\cl ŋati 8
\p
\v 1 Iyyania ara inna sihin ne ewak iyyohoi hiro hijo, ewouon iyyohoi iko Fadiri ile obolo ille ettole ta hani he inyiet no haduwari lia te ido.
\v 2 Ara inyia hegiamani ta haji no lo odua no oduhok Habu ati obe ara tuŋani oduhok.
\p
\v 3 Nyo onyimu fadirihien hullo obolo daŋ hesiarari hihumita iko hisiorita anyar owuon hidofe fadiri lo obolo iko nobo sihin hesiarari.
\v 4 Ta mai inna owuon altari na attagoŋ no orru to yeil hidofe owuon senuk no itierit no orru hidofe to yeli. To hotwai ho senuk owuon moti no oyeni to yeli ojio mana to hotwai honyie.
\v 5 Owuon hidofe fatige na asar iko hifahita hunna ekiyafak to moruo to hotwe ho senuk. To hide ho senuk owuon anjilohien illo hiyyo hullo emuho hittoloji to hide senuk ne efurek mai no hamehini, ati obe holoŋ iyyania herarari tohosie daŋ hamaihamai.”
\v 6 Ati iyyania, obe higiama no Kristo agalik nyo ara inya hetumwarani lo himwara no olibo agalik nafa otiorohini, nyo owueta inyia to itieriti hunna olibo agalik.
\p
\v 7 Nyo kuyya anyar ifa itierit nafa to hiteri, no obe ida esiaha himwara nobo.
\v 8 Ati egonyu Hollum hipali no hosie atta hijio, itiwolo, afanu iso holoŋitek hunna esiarari iso manya ne itierit ŋejuk to hiyyo illo Isarail ojo hidofe to hiyyo illo Yudea.
\q
\v 9 Ojio hidofe Habu, obe iso inyia ara iyya himwara nafa ehumak nayya to hohonyok hosie to holoŋ nafa arihini nayya isia ade ta fau ho Maser, nyo obe ifa isia odule to himwara nia, teyya abe nayya egigilo te isia, ojio Habu.
\q
\v 10 Ojo Habu, ara inna himwara ne esio iso nayya to hiyyo illo Isarali ta halu ho holoŋi inia; ehumak iso nayya hifahita inanaŋ to higigilita inohosie, egiorok iso nayya isia ta tajia innohoise hidofe ara iso isia a hiyyo ilalaŋ ojo hidofe naya ara a Hollum lohosie.
\q
\v 11 Obe iso isia etiyana ille, onyihari hosie nara ida hido ahalasira hosie hijo, hetiyyen Habu, nyo oyyen iso isia nayya daŋ iko dure hulo ho lodicio, ojio maruak daŋ.
\q
\v 12 Amehini iso nayya te iruti innohosie, hidofe abe iso nayya enyiak agilu hiyata innohosie.
\p
\v 13 To hijo nohonyie hijo, “ŋejuk,” etimaruak inyia himwara nafa maruani, nafa ottu hira no obe olibo, na awak alitek.
\c 9
\cl ŋati 9
\p
\v 1 Iyyania man to hitieri ne imor owuon ifa mai no hitihabuo ta fau ojo hisiŋita inno hitihabuo.
\v 2 Nyo to altari ehuhumahini ifa mai imojit, teko bali ara ifa mai nolodua. Dia ta manya nafa owuanari, terefeja ojo imune ara ifa no wuana.
\v 3 Ojo to holoŋ hitarihi no boŋo owuon nobo gutiya, nafa ara mai nolodua.
\v 4 Ara ifa yiel no attagog. Ara ifa hidofe togoli ne imwor, nafa ara bi- daŋ owuon iko yiel. To hotwai ara ifa yiel te hulo namanna, hali nafa Arone obolo, iko moru no himwara.
\v 5 To hide hotogoli ne imwor ara hihiana no kuatan nolo owoun to hide nolojo etiwet inyi nolobe oremik higiorok arumek to hiram.
\p
\v 6 Ta halu ifa atiorok isia hirro inia, olot ifa fadiri hesiŋari anyar ojiŋu inyia abali na haji imojit anyar oremik hisio wan nohonyie to higiemita.
\v 7 Ati ojiŋak fadiri le ettok hame ta haji hitarihi inyia lobotie to hiŋa, ojo obe esio nobo hisio no hoto nyo to wan nohonyie nyo obe awak himor isia.
\v 8 To nia, etuhutek oyiri lo Olibo te iyyohoi hijo obe nobo mai no odua binno nafa holowueta haji hitieri nia. Nyo ara inyia rijori no holoŋitek inia.
\v 9 Nyo ettallik hisiorita iko hihumita innafa esiarahini man iyyania horemik hitilibo higigilita inno hetihabwok.
\v 10 Nyo ara hifahita hunna to wan no tuŋani hame iyya to daha iko mata ojio hillilla. Esiarahini hifahita inia te iyyohoi man ottuni Kristo.
\p
\v 11 Ati oliew Kristo iyya fadiri le ettok lo hirro inno olibo inna afanu iso. Ojiŋak inyia ta haji ne ettok no obe oduhohini ta has nalagalik haji nafa nyia, nyo obe inyia la fau nyia.
\v 12 Obe ifa ara to hoto no hine ojo to hoto no tawo, ati ara ifa to hoto nohonyie nafa ojiŋahini Kristo tamai inna odua to okit nobotie tolobo lia ojo etilahu iyyohoi to hitilahita.
\v 13 Nyo kuyya oremik hoto no hine ojo no husuŋ arwasak te ilia hullo etidara hijo anyar elibo isia ojo hidofe ojo hijo anyar etilibo wati innohosie,
\v 14 Hara bajai iso hoto no Kristo, lia ille esio wan nohonyie to oyiri nolobe hibwoti to Hollum, lofie higigilita innohoi tara higiemita inno ye anyar egiem to Hollum ille owuar?
\p
\v 15 Nyo to higigilo nia, ara Kristo hetimwarani ille ŋejuk le imwor. Ara nia hijo owuana ye to masik hunna owuon imwor to hitieri he-iyyau, nyo ilia hullo ellilloŋ Hollum hijo omoju itieriti inno manya no ruta no odule. Anyar
\v 16 Iyya aji amanya lobo lia tahalu ho hiruk, ara iso dede hijo anyar eyyen itai no tuŋani lia ille ehumak iyya.
\v 17 Nyo olibo waraga no tuŋani harutani, hijo loye monye lohonyie; obe inyia egiama holowuar inyia le egioro inyia to wan.
\v 18 Teyya to hitieri obe ifa imwor etiarahini holobe hoto.
\v 19 Nyo nafa esio Musa hifahita inno bisan to hiyyo, Odumu inyia hoto no hiteŋ ojo no hine, iko hifioŋ atta ewuasak to hiyyo iko; to higierita.
\v 20 Teyya ejo inyia, ara inna hoto himori nafa esio Hollum ta hatai.”
\v 21 To koi inia, arwasak inyia hoto to haji ojo to tobwaha innafa egiamari fadirihien.
\v 22 Ojo iyya nafa ojo ibisiti, hirro bi-daŋ olibo to hoto. Lobe wo no hoto obe nobo hahehini no hiyyata.
\p
\v 23 Tonia ara ifa dede hijo hegiorihini no hirro nia te ido anyar olibo to hoto no hibuluci no ciaŋi. Teyya, hirro inno ido to wati innohosie olibo iso nalanyar to hibulucuta.
\v 24 Nyo obe ifa Kristo ojiŋak ta mai no odua hunna ehumak hani, hunna egiorohini iyya ara dede. Ati iyya to honyie hajiŋahini te ido hamai, inyia nia olieu inyia iyyania to hosiere ho Hollum te iyyohoi.
\v 25 Obe ifa inya owu adia hijo anyar esio inyia wan nohonyie holoŋitek daŋ, iyya ara fadiri lettok, ille ojiŋak to mai inna odua ta ŋasi iko hoto nobo.
\v 26 Kuyya lara ifa nia dede, inyia ati nia oremik inyia iso hitaban hinyiahita arriai man to hitiari ha fau. Ati iyyania ara bi daŋ ania to hicuŋi no ŋasi nafa etilieu inyia hijo anyar efiyak ade to hiyyata inno hibuluci inno wan nohonyie.
\v 27 Iyya esio ifa Hollum to hiyyo hayori hinyiahi nobotie, ojio ta halu nia atta ŋoto hawoŋ.
\v 28 Esiarahini hidofe Kristo hinyiahi nobotie hadihuni hiyyata inno hiyyo ariai; ojio hidofe inyia ottu hinyiahi hitarrihi, obe ara to hiram no hiyyata, ati hetilohini hiyyo ilo etila inyia.
\c 10
\cl ŋati 10
\p
\v 1 Ara ifa hifahita arrijori no hirro hunna olibo, hunna afanu iso, ati obe ara isia hirro inia luŋa, Tonia obe iso isia oremik etibisak hiyyo hullo afanu to hihumita hunna odule fadiri hisiara ŋasi daŋ.
\v 2 Kuyya etibisak iso hido isia hiyyo, opuak iso isia hesiarari to higemita nyo kuyya etilibo hihumita hiyyo hullo esio,
\v 3 obe ida isia enyiak higigilo to hiyyatta innohosie. Ati to hihumita ŋasi daŋ to hiyyata ino hosie
\v 4 nyo obe hoto no husuŋ kuyya no hine no oremik eyari hiyyata ade.
\p
\v 5 Niyya, nafa awoŋ Kristo afau ojio inyia hijio, “Ebe iyye ewak hisiorita iko hihumita, ati ehuhumak iyye wan ta nayya.
\q
\v 6 Obe hidofe iyye emuno hihumita hunna osuahak iko hunna hiyyata.
\q
\v 7 Atta Nayya hijo, “towolo Hollum, attu naya egiamari wahan nohoi, iyya egioro ifa to buk nohoi ta nayya.”
\p
\v 8 To hosiere ojio inyia hijio: “Obe iyye emuno hisiorita iko hihumita, obe hidofe iyye ewak hihumita ino osuahahini iko ino hiyyata ino esiarari iyya egioro to hifahita.
\v 9 Ta halu ojio inyia hijio, “Dede attu naya egiamari wahan nohoi, tonia, etupuak inyia itierit hitieri hijio, “Anyar etigol inyia hitarrihi.
\v 10 To wahan to no Hollum, errumek iyyohoi libe nyo esio Yesu Kristo wan nohonyie hinyiahi hitieri to hiyyo daŋ.
\p
\v 11 Holoŋitek daŋ owueta fadirihen hesiarari hihumita ino hosie edasedas, ati obe hihumita innia oremik eyyari hiyyata inno hiyyo daŋ adde.
\v 12 Ati esio ifa Kristo hihumi nobotie no odule mak to hiyyata, atta inyia hittole iko inyiet no Hollum.
\v 13 Etila man ehumari miorok illohonye iyya ebalori hejek innohosie.
\v 14 To hihumi nobotie etilib inyia onyimot ilo honyie mak.
\v 15 Hidofe ara Oyiri lo Olibo asut lohoi atta inyia hijio,
\v 16 “Ojio Habu, ‘Ara naya himwara ne esio iso naya to hosie ta halu ho holoŋitek nia. Efiyak iso naya hifahita inanaŋ ta tajia innohose, hidofe egiorok iso naya higigilita innanaŋ to tajia innohosie, ajio hidofe egiorohini ta higigilita innohose.”’
\p
\v 17 Ojio hidofe inyia hijio, “Abe iso naya enyiak agilu hiyyata innohosie iko irruti innohosie.”
\p
\v 18 Tonia, lowuon hebusak no hiyata obe lobo tuŋani enyiak hisio hihumi to hiyata.
\p
\v 19 Tonia ilasira hanaŋ, ewuon iyyohoi iko hiŋere hajiŋari tamai no odua binno to hoto no Yesu,
\v 20 to hikoi ŋejuk na aŋa te iyyohoi hajiŋari aboŋo no orita nara iya wan nohonyie.
\v 21 Nyo ewuon iyyohoi iko fadiri lettok binno lara ettok lo hiyyo illo Hollum.
\v 22 Tonia hehutok aŋati ta tajia hunna obis, inne efut iko hiruk, ojio hidofe ino elileni te iwahiti ino orru, hidofe hehutok iko wati ino elileni to hifioŋ inno olibo.
\v 23 Hetigolik to heyik nohoi to biaŋan no hukuyya, nyo obe iso lia lafa ociorok hirro ino etipuak itieriti innohonye.
\v 24 Hidofe anyar egigilo iyyohoi to halasirak illohoi hetuwulori isia hamunori halasirak hosie ojio hidofe egiamari no olibo.
\v 25 Hidofe anyar iyyohoi ebe etupuak tubai no wati innohoi iyya egiama hiyyo hilak, ati hesiŋai halasria hohoi na agalik iyya egonyu itai holoŋ no Kristo eliaha.
\p
\v 26 Kuyya omoju tuŋani bisan ojio ta halu, odule hiyya ojio inyia hidofe omuno hiyyata, obe nobo hihumi no oremik hefufuse hiyyata inne.
\v 27 Ati orrumek iso inyia ŋoto no lorru binno ojio hidofe hima no owulo binno noremik hitattur iso miorok illo Hollum.
\v 28 Ottohe ifa tuŋani to biaŋan no hamehini lia lebo lobo hifahita inno Musa lafa ero suti lohorik kuyya lohunik.
\v 29 Ati osiru iso haŋotori no obolo binno agalik to lia lebo Lnyi Hollum, lia lo omiana inyia to hoto ne emwarari no oremik hitilibo inyia, ojio hidofe omoro Oyiri lo hamehini.
\v 30 Nyo eyyen iyyohoi lia lafa ojio hijio, “Elienyu iso nayya ajio hidofe, “Aduma iso nayya.” Enyiak hidofe inyia hijio, “Oŋot iso Habu hiyyo illohonye.”
\v 31 Dede, hahuyek ta has ho Hollum hauarani, ara hiram ne eyyani baŋi binno!
\p
\v 32 Ati itigilu holoŋitek innafa ellaŋ beren, nyo nafa eruhori itai hitigiemita inno ogol.
\v 33 Te innak holoŋitek ellohitari ifa hiyyo itai te imoriti iko ibahiti, ojio te innak holoŋitek ettole ifa itai nobotie iko hiyyo illo orrumek hitigemita.
\v 34 Nyo emehini ifa itai to liyya ille efita to kijan, ojio hidofe itai emuno nafa eyari hiyyo rori innahatai adde nyo eyyen itai hijio owuon hirro inna olibo agalik, ojio hidofe hiruk odule ta hatai fur.
\v 35 Tonia heruasak heyyik nahatai ade nyo errumek iso itai duma no obolo binno.
\v 36 Anyar ewuon iyyohoi ho dihan na tajia da hatai hijio lia lehuma to wahan to no Hollum, orrumek iso isia itierit.
\v 37 “Nyo ojio higierita hijio, ‘Eba iso lia lo ottu, ati obe iso inyia elliŋa.
\q
\v 38 Ati amanya iso hegiamani hanaŋ lo olibo to hiruk, ati loyite inyia, abe iso naŋ amuno inyia.”
\p
\v 39 Ebe iyyohoi era iyya liyya illo oyitori atta ye, ati ewuon iyyohoi iko hiruk hetilohini oholioho innohoi.
\c 11
\cl ŋati 11
\p
\v 1 Iyania ara hiruk heyik hijo afanu iso hirro hunna etila iyyohoi, ojo inyie ara heyik hijo owuon hiro dede hunna obe watik oliew.
\v 2 Nyo to huruk hijio etimuno hiyyo illafa ho beren Hollum.
\v 3 To hiruk eyyen iyyohoi hijio oyyieni ifa fau daŋ to hiro no Hollum, ati tara oyyieni ifa hirro hunna egonyu iyyohoi to hirro hunna obe wati olliew.
\p
\v 4 To hiruk esio ifa Abel hisiorita to Hollum inno olibo wati agalik hisiorita inno Kaino, Tara etuhutek Hollum ta Abel hijio, ebis iyye, nyo amoju Hollum hisiorita inohonyie. Oye inyia ifa beren ati arasa inyia hiro to hiruk.
\p
\v 5 To hiruk akafari ifa Hollum Enok ido holobe inyia ye. “Ati, obe ifa hiyyo orrumek inyia, nyo eyari Hollum inyia.” Ati ojio ifa hiro to honyie hijo, etimuno inyia ifa Hollum holobe eno eido.
\v 6 To biaŋan no hiruk, ogol hetihabuori Hollum, ati to lia la awak awoŋ to Hollum anyar eruk inyia hijo, arasa Hollum manye hidofe esio hijohiti to hiyyo illo etufa inyia.
\p
\v 7 To hiruk aduhok ifa Noa togoli hijio anyar etilahu hiyyo ta haŋ honyie, nyo elimak Hollum inyia hirro hunna obe wati oliew, ati atta inyia baŋi to higiemita inohonyie hunna ogot inyia ta fau, ati owu inyia hira aharutani lo habisak to hiruk.
\p
\v 8 To hiruk efaha Abramo, nafa ellilloŋori inyia hawuye adoŋe nyia nafa omoju inyia tara ho Hollum hijio doŋe orrutari nohonyie. Ati eno ifa inyia amai no obe inyia oyyen.
\v 9 To hiruk, amanya ifa inyia ahatamononi ta fau nafa otiorohini to honyie. Hidofe amanya inyia iko Yokobo ojio Isako aharutak illo fau nyie tara honyie.
\v 10 Ara hijo anyar oriŋa inyia ahosiere harumehini bore no gala inna ara haduhok innohonyie iso Hollum.
\v 11 To hiruk orrumu ifa Sara duaran hesini hiito ta amaruahai nyo eyik inyia to lia lafa otiorok to honyie hijo, obe iso inyia etupuwak hiram nafa ero inyia.
\v 12 To tuŋani lobotie, emaruwak ida hido inyia bi no no, afanu iso hiyyo ilo emonya iyya haher inno owuon te idou ojo hidofe emonya iso isia iyya siŋata inno owuon to otifor ha hari.
\p
\v 13 Oye ifa hiyyo hullo daŋ to hiruk holobeŋ isia arrumu hirro hunna otiorohini, ati egonyu isia hirro hunna ta alamarai atta mune, nyo ojo isia hijio era isie ahatamonok iko hallotok ta fau inna.
\v 14 Nyo lia le ero iyyania, etuhutek hijo osiaha isia nobo fau anyar ara anohosie.
\v 15 Kuyya ida le egigilo isia ta fau ne ediahari isia, erumu ida isie hikoi haciahari ade.
\v 16 Ati awak isia nobo fau nala anyar agalik, no lo owuon te ido. To nia obe Hollum eloriri hawuanari a Hollum lohosie. Nyo ehuhumak inyia mai te isia.
\p
\v 17 To hiruk no Abramo, esio inyia lonyi honyie Isako iyya hihumi to holoŋ nafa acamari Hollum inyia,
\v 18 dede, lia lo omoju itieriti to mune eliaha ifa to honyie hesiarari lonyi honyie lobotie, ero ifa hido Hollum to honyie hijio, “Ehenini iso woyyo nohoi tara Isako.”
\v 19 Nyo eyik hijio oremik Hollum etibuhu Isako oye ida hido inyia, hidofe ara iyya omoju inyia Isako atta hiro atta ehumak te iyyohoi ahitimijani.
\p
\v 20 To hiruk etijak ifa Isako Yokobo iko Esau te imuniti hunna afanu iso.
\p
\v 21 To hiru etijak Yokobo onyirok ho Yesofo lobotie atta inyia hitihabuo Hollum lo ottirok wan nohonyie to hitehi, hijio eliaha ifa inyia ye.
\v 22 To hiruk ero ifa Yosefo nafa eliaha ye nohonyie ta hajiŋahini no hiyyo Isarail, atta inya elimak isia heyari het innohonyie anyar onuhak.
\p
\v 23 To hiruk, eŋofok hesiok ho Musa inyia to yafajin hunik inafa esini hiyyo inyia, nyo egonyu isia hijio inyia hiito lolibo hidofe obe isia hifahi na habu.
\v 24 To hiruk inna obolo Musa ebo ifa inyia hillilloŋo no hiyyo hijo inyia lonyi ŋani Farao,
\v 25 atta inyia anyimu hetolojori iko hiyyo illo Hollum to hitigemita inno hosie, obe ara hamanyari to imuniti inno hiyyatta.
\v 26 Egigilo ifa Musa hijio anyar hitigemita to fure no Kristo agalik ibariti inno Masir nyo orriŋa inyia to idumit no mwoi ottu.
\v 27 To hiruk ebusak ifa inyia Masir, obe ara ta baŋi no Habu ati odule inyia halocie nyo egonyu inyia lia obe wan oliew.
\v 28 To hiruk odule ifa inya yiri no laŋan no anjilo hidofe oruwas hiyyo to hoto hijio anyar obe toho no oŋewha ottir durre inno Isarail.
\p
\v 29 To hiruk allaŋ ifa isia hari no lodo iyya ara inyia fau no ote, nafa ojo hiyo ilo Masir ellaŋ adia hosie atta hifioŋ awatari isia.
\p
\v 30 To hiruk ahuye ohitir inno doŋe no Yeriko nafa elutari hiyyo illo Isarail isia to holoŋitek hattarik.
\p
\v 31 To hiruk obe ifa Rahaba hasomoni oye nyo omoju inyia haliyamak to hilik ta na taji, Ara ida hido oye hiyyo illafa omiasa wati.
\p
\v 32 Ati ajo iso naŋ nyo ino emonya? Nyo abe naya awuon iko holoŋ helimahini to Gidion, Barak, Samson, Jefa, Davide, Samuele ojo inno hekilak,
\v 33 ŋai lia iso orumek lobiehien to hiruk, to biaŋan no higiala to higemita, iko hamojini no itieriti. Esahak isia hutuhe inno emioho;
\v 34 etudun isia hima no obolo; eris isia te ifija ho demi; to hilik to nohosie orumu isia golon hidofe obolo duaran to hosie hariomori atta isia hitatur miorok illohosie.
\v 35 Omoju ŋoruo hayok illohosie nyo etibuhu isia. Etigem ifa ilak no loru man oyoori isia nyo ebo isia hahoni hijio anyar erumu waran nalanyar agalik.
\v 36 Etigiama ifa hiyyo isia to hilohita to baha, hidofe to haririk iko hifita to kijan.
\v 37 Erruwoŋ ifa hiyyo isia to moru, eŋiŋot isia to demio, eticiofo isia to leni inno hine iko inno kioro, etilociaŋ isia, etigema isia hidofe etiŋuwa ifa isia,
\v 38 obe ifa lia ta fau olibo nobo, owuejita ifa to mur, to doŋiok, to nomi ojo to iwudoho hunna ta fau.
\p
\v 39 Owuon ida hido isia ahullo etumuno Hollum, to hiruk nohosie, obe isia oremik amoju hiro innafa otiorohini.
\v 40 Nyo ehuhumak Hollum nobo sihin nalanyar agalik te iyyohoi, to nia obeŋ isia orumu bisan man ebarari to hoi hidofe.
\c 12
\cl ŋati 12
\p
\v 1 Tonia iyya ekolok suti ariai iyyohoi, hebusak hiro ino erosi iko hiyyata hunna eniefita iyyohoi tid, ojio hidofe hetinyetai to dihan na tajia to hikoi no owuon to hoi.
\v 2 Anyar erriŋa iyyohoi to Yesu le eciemini iko hetibisani lo mune no owuon iso ahosiere honyie. Ati omiana inyia irri no kuruce atta inyia hittole aŋati inyiet no kurus no Hollum.
\p
\v 3 Iko hetiriŋai to lia lodihu imoriti inno heyyak illo oliwari inyia hijio hotobiaŋa itai elafuho.
\v 4 Ojo hidofe hotobiaŋa itai etaban ta tajia innahatai.
\v 5 Hegwee herorita hetigolita ino tajia inafa elimak Hollum tahatai, duri ilohonyi hijo; “Hito, ihuma asik yohe ile etabisa nina iyye, itigolo taji leŋere nnaya tohoi.
\q
\v 6 Nyo, etibisa naya lia ‘daŋ, hulo obuor taji nanaŋ, ojo hedofe etigiama lia ‘daŋ hulo eruk naŋ hijo isia duri ilalaŋ.”
\p
\v 7 Adihu itai baha hetibisahini higemita innahatai. Ehuma Hollum ta hatai iyya onyirok, nyo ŋai monye lobe abak lonyi honye?
\v 8 Kuyya obe inyia abak itai, iyya ehuma inyia to onyirok honyie daŋ, obe itai era lonyirok honye, ati era itai illo orotot.
\v 9 Hidofe etihabuo iyyohoi monyie hohoi illia ta fau hullo abaha ifa iyyohoi, tonia anyar iyyohoi eniŋo Monye hohoi lia te ido harrumehini wuaran.
\v 10 Iyyania abaha ifa monyie hohoi iyyohoi ta ŋasi kai iyya egigilo isia hijio olibo iso, ati abak inya iyyohoi haluahari iyyohoi harrumehini libe nohonyie.
\v 11 Ta saa na abahari, ewuon iyyohoi iko hijiriŋa nobe ara no mune ati ta halu eyyani hilik na tajia iko bisan te ilia illo oniŋe inyia.
\p
\v 12 Tonia, itikaf has innahatai hunna elik ejio hidofe etigol huŋuta innahatai inne ekikiro.
\v 13 Ihuhuma hikoita inno obis to hejek innahatai hijio anyar lia loŋura hotobiaŋa ohuye ati orrumek iso golon.
\v 14 Itisiahai manya to hilik na tajia iko hiyyo daŋ ojio hidofe itisiahai libe nyo obe lobo tuŋani oremik egonyu Habu.
\v 15 Ihuma hiriria hijo hotobiaŋa lobo tuŋani to hiji hatai obe odiak hamehini, itirriŋai hijo hotobiaŋa liwai no oremik eyyani run to hiji hatai hetiharari hiyyo ariai.
\v 16 Ihuma hiriria hijio hotobiaŋa lobo to hiji hatai la ara osomo kuyya hidofe tuŋani le egigilo to hirro inno fau iyya Isau lafa etinyaŋak iruta nohonye to ŋiria.
\v 17 Nyo eyyen itai hijio, ta halu awoŋ Isau siaha iruta nohonyie, ati ebo ifa Hollum inyia. Osiaha ida hido inyia to hidenya ati obe inyia oremik arrumek hikoi henyahini iruta nohonye.
\p
\v 18 Nyo ebe itai efanu adoŋe no oliew, ojio hidofe owulo ahima, mai no owuanari idumele, harie ojio hai no oyyami.
\v 19 Obe itai efanu etirari hitir no ikakan, iko nobo hutuk ne ero hirorita na awak hetirak illohonyie hijo hotobiaŋa lobo tuŋani ero to hosie.
\v 20 Nyo obe ifa isia oremik hidi hirro ino elimahini to hosie: Otir ida hido nobo ciaŋ doŋe, isiara hiyyo hepuda inyia.”
\v 21 Ogolo ifa harriŋari to honyie, man ojio Musa to hosiere honyie hijo, “Abaŋ nayya luŋa binno man okikiro nayya wan.’
\v 22 Ati efanu itai to doŋe no Sion, to doŋe no Hollum lo owuar, nara fure nohonye Yerusalem ne ido, hidofe efanu itai ta anjilohien hullo ottuba to mune.
\v 23 Efanu hidofe itai to tubai no hiyo ille egioro fureta innohosie te ido, ojio hidofe to Hollum haŋotoni lo hiyyo daŋ iko to oyirihien hullo halibok.
\v 24 Efanu hidofe itai to Yesu hetumwarani lo himwara ŋejuk ojio hidofe to ruasa no hoto neyyani tohoi hamehini agalik hoto na Abele.
\p
\v 25 Itirriŋai nalanyar hijio hotobiaŋa itai ebo lia le ero. Nyo kuyya obe isia eris to nafa ebuarari isia lia la asara isia ta fau. Jai iso eris iyyohoi kuyya ebo hidofe iyyohoi lia lero te idou?
\v 26 Beren etir ifa hiro nohonyie fau ati iyyania, esio inyia itierit tohoi atta hijo, “To hinyiahi nobotie enyiak iso naya hittir fau, obe ara fau hame, ati ido daŋ.”
\v 27 Lejio inyia hijo, “To hinyiahi nobotie, etuhutek nia hijio odumu iso hiro innafa oyyeuni ade ino okikiro anyar odule hirro inno obe okikiro man fur.
\v 28 Iyya amoju iyyohoi obe no obe okikiro, hesiara humo to Hollum iko higemita hunno olibo ta baŋi iko to hitihabuo.
\v 29 Nyo ara Hollum lohoi iyya hima na adahari hirro bi daŋ.
\c 13
\cl ŋati 13
\p
\v 1 Isiara mune no halasira hotodule.
\v 2 Ibaŋa ogwe heyyanini hatamonok, ati to higiama nohoi, ihu iso itai hellilloŋu anjilohien illo obe itai efu hiyyen.
\v 3 Hegigile to hiyyo hullo efita to kijan, iyya ewuon itai to hikoi isia ojo hidofe iyya etigiamari watik inna hatai iyya innohosie.
\p
\v 4 Hetibaŋa yama daŋ ojo hidofe ijotit na hayamani hotodule libe, ottu iso Hollum hiŋot itai ilia eroto iko ŋorwo inno hiyyo iko hasomok.
\v 5 Ibusak koi inno imanyiti inna hatai adde tara mune no gurusi. Itolojo bolioŋ to saŋ te inia owuon ta hatai, iyya lo ojo Hollum to wan nohonyi. “Abe iso nayya ebusak itai hidofe abe agwe itai.”
\p
\v 6 Hetimune to hiŋere no erarari hijo, “Ara Habu haluahani hanaŋ; abe iso nayya abaŋ. Nyo iso nia egiama lobo ta hanaŋ?”
\p
\v 7 Egigile to hiyyo hullo edihita itai, hullo elimak ta hatai hirorita inno Hlloum ta hatai iko ilibiti innohosie; ojo hitimiaha no hiruk no hosie.
\v 8 Arasa Yesu Kristo lobotie man iŋoleŋole, ena, man mak.
\v 9 Hotobiaŋa hitiyenita hunna epal wati eyari itai ade, ati olibo la duhohini taji to hamehini, ati obe ara to imohiti ino ŋiria hunna obe oluak ilia hullo amanya te isia.
\p
\v 10 Ewuon iyyohoi iko altari no egiamari ilia illo obe wati owuon iko bisan no hadahari.
\v 11 Hoto no ciaŋi ara ahisiorita no hiyyata, eyyani hehumak hullo obolo amai no olibo, ojo wati innohosie omudahini to oger ha maŋat.
\v 12 Etigem ifa hiyo Yesu to hikat habali no Yerusalam, hijo anyar etihutu hiyyo to Hollum to hoto no honyie.
\p
\v 13 Ati ehafi to honyie adia amaŋat, anyar edihu hitigiama to fure no honyie.
\v 14 Nyo ebe iyyohoi ewuon iko haŋ inna odule inni ta fau. Ati hetufai haŋ nyia ottu.
\p
\v 15 To Yesu, edule iso iyyohoi hisiara hisiorita hetihabuori Hollum, hitihabuo ara inyia a hibieleti no hutuhen no lo oyyen fure nohonyi.
\p
\v 16 Ibaŋa ogwe hegiama no hiro inno olibo iko hilwak no motiarak, ara to hisiorita hunna etumuno Hollum bi no.
\p
\v 17 Hetiniŋe ojo hidofe hefahai te ettaha illahatai, hijo anyar odule isia hiriria itai iko oholioho inna hatai hijo anyar oyyen isia. Itiniŋe hijo anyar honyi erriria ettaha illa hatai itai to mune, obe ara to hijiriŋa inna obe oluak itai.
\p
\v 18 Itimoje te iyyohoi, hijo anyar olibo tajia innohoi ejo hidofe iyyohoi ewak manya no olibo to hirro daŋ.
\v 19 Ati elalia nayya tahatai hijo legiama itai no obolo aciohini iso nayya ta hatai kuak.
\p
\v 20 Ati iyyania, isiara himwara no Hollum hotowuana daŋ iko itai, lia etubuhu heyyohoni lo kioro ille hittok, inyia Yesu Kristo Habu lohoi. To hoto itierit inna amanya mak,
\v 21 ihuhumak ilibiti inno saŋ ta hatai anyar hegiamari egem nohonyie, ne egiama to wati innohoi hijo anyar etimuno inyia to hosiere honyie, inyia Yesu Kristo, isiara kuatan hotodule to honyie fur. Amen.
\p
\v 22 Ilasirak hanaŋ elalia naya ta hatai hijo hetidi to hiro no hisiŋa nia egiorok naya ta hatai.
\p
\v 23 Hetiyyen hijo ilasi hohoi Timeteo owuanai ifa inyia lo obe efita, efanu iso iyyohoi daŋ iko inyia hiwolo itai la woŋ inyia kuak.
\p
\v 24 Itifonyak ettaha iko heruhok illahatai daŋ. Etifonya hidofe lia lo owuon te Italia itai.
\p
\v 25 Isiara hamehini hotowuana iko itai bi daŋ.