lpx_reg/56-2TI.usfm

\id 2TI
\ide UTF-8
\h 2 Timoteo
\toc1 2 Timoteo
\toc2 2 Timoteo
\toc3 2ti
\mt 2 Timoteo
\c 1
\cl ŋati 1
\p
\v 1 Paulo, lefahata lo Kristo Yesu to wahan to no Hollum ojo do coro no waran no owuon to Kristo Yesu,
\v 2 to Timoteo, hiito lamuno naŋ: Isiara hamehini, ojo himwara tara Hollum Monye ojo Kristo Yesu Habu lohoi.
\p
\v 3 Esio naŋ to Hollum, letihabwo naŋ many tara hohonyiok hanaŋ, to higigilo no olibo iyya adule naŋ te itai holoŋitek daŋ. Ta tari iko far.
\v 4 Awak naŋ egonyu itai, hijo anyar efut mune nanaŋ. Agilu naŋ hidenya innahatai.
\v 5 Agilu hidofe naŋ huruk nahatai no ogol, nafa owuon ta hahanyi hatai Lois iko to hotonye hatai Eunis. Eruk hidofe naŋ hijo owuon ta hatai daŋ.
\p
\v 6 Inyia ne awak nayya elimak itai hijo idiek hisiori no Hollum no owuon ta hatai ta has innafa atanyahini naŋ ta hatai to mojo.
\v 7 Obe ifa Hollum esio tohoi oyiri na baŋi, ati no golon ojo mune iko huruk hitiyena.
\p
\v 8 Baŋa eloriri to hiyyen ta nahatai Habu lohoi, kuya hidofe nayya, Paulo, tuŋani la babus lohonyie. Ati itihor sayye inno Hollum to hitigiama to golon to no Hollum.
\v 9 Etilohu ifa Hollum iyyohoi atta hidofe ellilloŋu iyyohoi to dwaran. Egiem inyia inna obe ara te igemita te innohoi, ati ara to wahan to nohonyie ojo hamehini nohonye. Esio ifa inyia hirro inne to Kristo Yesu man beren holobe fau etiara.
\v 10 Ati iyyania, etiliew inyia etilohini no Hollum ta ŋaliew no hetilahani lohoi Kristo Yesu. Etisidok Kristo hucuŋi no ye atta eyyani wuaran nolobe hucuŋi ta cialai to hiram no Hollum.
\v 11 To hiram nia, onyimu ifa Hollum hijo hatara naŋ a herarani, alefahati ojo hidofe a hetiyanani.
\v 12 Te igem nia, Arrumu ifa naŋ hitigiama to hirro inne. Ati abe ifa naŋ eloriri nyo ayyen tuŋani leruk naŋ to honye. Eruk naŋ hijo oremik iso inyia hirro inne esio naŋ to honyie man ta far hucuŋi.
\p
\v 13 Tottoŋ nalanyar hitimijani inno sayye inne etiru iyye tara hanaŋ, ho huruk ojo mune nowuon to Kristo Yesu.
\v 14 Iririai libe nesio Hollum to hoi, to Oyiri lo olibo la amanya to hohoi.
\p
\v 15 Eyyen itai inna, hijo oyite illafa amanya te Asia tara hanaŋ. Tara iluluŋ inna, ara lobo Phigelo ojo lobo ara Hermogenes.
\v 16 Isiara Habu hesiara hamehini nohonyie to woyyo no Onesiphorus, odule inyia hitiŋejuho naŋ, obe hidofe owuon he irri to hifita hanaŋ.
\v 17 Ati ta nafa owuanari inyia to Roma, osiaha ifa inyeja naŋ binno man orrumu naŋ.
\v 18 Isiara Habu hesiara to honyie hamehini tere honye ta far nyie. Eyyen iyye binno hikoi nafa olwahari inyia nayya te Efisa.
\c 2
\cl ŋati 2
\p
\v 1 Iyye lonyi hanaŋ, towuetai nalanyar to hamehini na Habu lohoi Yesu Kristo.
\v 2 Ojo to hirro inne etiru iyye tara hanaŋ to hiji he iluluŋ, ituhutek isia to hiyyo ille eruk illo oremik hidofe hiyyen.
\p
\v 3 Todiha hitigemita daŋ hanaŋ, iyya hejufani lo Kristo Yesu lolibo.
\v 4 Obe lobo hejufani oremik higiama te ettok lohonyie atta hutumuno inyia ojo inyie odule hiniefita imanyiti inno fau inna.
\v 5 Hidofe, obe lobo oremik arrumu tamu no hanyietak ojo inyia ebo hijufuta hitiyenita inno fejak.
\v 6 Olibo ta haromoni hefwotuni mat innohonyie ahosiere.
\v 7 Igigile hiram nero naŋ tohoi, esio iso Habu tohoi hiyyen no hirro daŋ tamai.
\v 8 Togilu Yesu Kristo, tara hinyiomoti lo Davide, lafa etidietuni to ye. Ojo hiram no Hollum hanaŋ netigiamari naŋ ane,
\v 9 man efitari naŋ ta babus iyya lodefer. Ati obe hiram no Hollum efita nobo.
\v 10 Adi naŋ hirro daŋ tamai te ilia illafa onyimuni, hijo anyar hidofe orrumu isia etilohini nolowuon to Yesu Kristo ho lohuo man fur.
\v 11 Osiru hiram inna to hirro: “Laye ifa iyohoi he inyia, ewuar iso hidofe iyyohoi daŋ he inyia.
\q
\v 12 Ledi iyyohoi, esio iso iyyohoi he inyia. Lerrisa iyyohoi inyia, orrisa iso hidofe inyia iyyohoi.
\q
\v 13 Lobe iyyohoi eruk to honyie, arrasa inyia libe te iyyohoi, nyo obe inyia oremik risa wan nohonyie.”
\p
\v 14 Todule hirro to hosie to hirro inne. Tossor isia to hosiere ho Hollum hijo hotobiaŋa orija to hiro. Obe innak hirro afanu tara hosie inno oremik hulwak. Ottu iso hitihara te ilia ille etira.
\p
\v 15 Igiama hirro no olibo anyar etuhutek wan to Hollum hijo era iyye a hegiamani lo olibo obe irri. Iniafa hiram no bisan to libe.
\p
\v 16 Ibusak hiro nebo Hollum, ne esio hidefer to Hollum.
\v 17 Esarik hiro nohose to hiji ho hiyyo iyya ŋwai.
\v 18 Ara lobo Hymeneyo ojo Fileto. Ara hiyyo ille ediak bisan. Ero isia hijo eba ebuhu, eloit isia huruk ne illak hiyyo.
\v 19 Ati arasa hitieri no Hollum wueta nogol. Owuon he igierita no okolohini hijo: “Oyyen Habu ilia illa ara illohonyie,” ojo “Lefurek lobo fure na Habu, isiara hehuto ade tara ibwotita.”
\p
\v 20 Ta haŋ no owuon he ibariti, obe ihuloho efut ho dahab ojo yiel. Owuon hidofe ihuloho inno hoyiek ojo modie. Owuon innak inna ara inne igem no olibo iko innak inne igem norru.
\v 21 Letilibo lobo wan nohonyie tara igem norru, ara iso inyia ihulo lo olibo. Onyimuni inyia ade, olibo iso inyia te ettok, ojo hidofe ehuhumahini te igemita inno olibo.
\v 22 Irruata ade tara iwahiti inno nyarhalu. Tosiahai bisan, huruk, mune, ojo himwara he ilia ille ellilloŋo Habu ta tajia inno olibo.
\p
\v 23 Ati ibwara hifiita inno bolitok ho hatumok. Eyyen iyye hijo eremik esiu hitirijita arria.
\v 24 Hotobiaŋa hegiamani la Habu aŋalafa. Ati, isiara inyia hatanyalama to hiyyo daŋ, loremik hitiyena, hetilai.
\v 25 Isiara inyia hetiyanai ilia ille ebo inyia ta nyalam. Eremik iso Hollum hisio do hosie yite to hiyyen to nohose bisan.
\v 26 Oremik iso isia higigilo nalanyar atta hibo hisusuta no sitan, to higiama nafa hosie to honyie iwahiti innohonyie.
\c 3
\cl ŋati 3
\p
\v 1 Ati toyyen inna: To holoŋitek hucuŋita owuon iso holoŋitek inno ogol.
\v 2 Omuno iso hiyyo wati innohosie, hamunok ha arobiya, hetidarak, hetiŋoyak, adeferok to Hollum, ahamiasak to monyie, illo obe esio humo, ojo hidofe ebwot.
\v 3 Olitari mune isia, heturruok, illo obe oremik hinief wati innohosie, heŋiŋalafak, obe ara hamunok inno hirro inno olibo.
\v 4 Hetisiahak, ahelabasiok, hamunok illo hirro ebusak Hollum.
\v 5 Owuon iso rijori nohosie iyya no Hollum, ati orrisa iso isia golon nohonyie. Toyite ade tara hiyyo ilia.
\v 6 Ara illak illohosie hiyyo ille enyiaba ojo hidofe ojiŋita hajik inno ŋorwo bolitok. Efut ŋorwo innia ho hiyyata arria ojo hidofe ejufuta iwahiti arria.
\v 7 Odule ŋorwo innia hiyiyena ati obe oremik hiyyen ofioroho inno bisan.
\v 8 Iyya nafa oliwari Jannes iko Jambres Musa. To hikoi nia, oliwari hetiyanak telerok ille bisan. Ara isia hiyyo hullo efut hosi iko himumuna, obe hidofe osiru to hiram no huruk.
\v 9 Ati obe iso isia oremik hihuto a hosiere no. Oyyen iso hiyyo daŋ hibolit nohosie iyya no hiyyo ilia.
\p
\v 10 Ati tohoi, ejufuta ifa iyye hitiyena hanaŋ, iko ihumita innanaŋ, hikoi, huruk, hitaban, mune, dihan,
\v 11 hitigiemita, irruti, ojo hirro innafa edoŋ daŋ ta hanaŋ ta Antioka, Ikoniom, ojo do Lystra. Adi ifa naŋ hitigiemita arria. Ati tohosie daŋ, etilwahu ifa Habu nayya.
\v 12 Orrumu iso illa awak manya to ofioroho inno Yesu Kristo daŋ hitigiama.
\v 13 Ofwo iso hiyyo illo orru iko illo etimiyaha a mai noru binno. Edihori iso isia illak a mai nepal. Nyo ejufari isia hepalak ade.
\v 14 Ati tohoi, todule to hirro innafa eyiyenu eijo hidofe iyye eruk no. Leyyen iyye tara tuŋani lafa eyiyenu iyye.
\v 15 Leyyen iyye hera iyye oŋeye hirro innafa esio iyye ofioroho. Eremik hirro inne hisio iyye ofioroho inne etilohu iyye to huruk to Yesu Kristo.
\v 16 Ohudak ifa Hollum oyiri nohonyie to higierita innohonyie daŋ ta mai. Olibo to hitiyena no hiram nohonyie, to hituhuta no hipali, ojo hidofe olibo to hitiyena to to bisan.
\v 17 Osiru hiram nia to hegiamani lo Hollum, anyar ottulu inyia higiemita daŋ ta mai.
\c 4
\cl ŋati 4
\p
\v 1 Esio naŋ to hosiere ho Hollum, ojo Yesu Kristo, lottu hiŋot hiram no hawuarak iko hayok, oliew iso inyia to obie nohonyie:
\v 2 Itiyanai hiram Hollum. Todiara to okit na anyar, ojo to okit norru. Ilimak hipali, tosor, itigolo, to dihan ojo hitiyena.
\v 3 Ottu iso nobo far nobe hiyyo iso eremik hidi hitiyena no olibo. Ati eduduhu iso isia to wati innohosie hetiyanak illo awak yohe innohosie hitira. Esio isia yohe to hirro inna awak isie hitira.
\v 4 Ebo iso isia hitira hirro inno obis, oyito iso isia to hiyebita assai.
\v 5 Ati iyye, isiara hoo hegigile nanyar to hirro daŋ. Orrumu hitigiemita; igiama igem no Hollum; itufutak igem nohoi.
\p
\v 6 Awuana naŋ iyyania to hiji he igem. Awoŋ holoŋ ne ebusahini fau.
\v 7 Egiem naŋ igem nettok; attohu naŋ nyieta; Adule naŋ hiniefita huruk.
\v 8 Owuana tamu no bisan nanaŋ te ido nafa ehumak Habu haŋotoni lobis nottu inyia hisio ta hanaŋ da far nyie. Obe ara ta hanaŋ hame, ati te ilia ille etila ojo hidofe omuno aciohini nohonyie.
\v 9 Igiemai no olibo anyar etu ta hanaŋ kwak.
\v 10 Ebusari Demas nayya. Omuno inyia fau inna hena, lia eno a Tessalonika. Efie hiyyo illo Kreto a Galatia, ojo Tito ohu hidofe a Dalmatia.
\v 11 Luka hame owuon hanaŋ inni. Torrumu Marko, anyar efanu he inyia daŋ inni nyo olibo inyia ta hanaŋ te igem.
\v 12 Ŋefahak naŋ Tyciko Efisa.
\v 13 Osorini daŋ boŋo nafa ebusak naŋ to Troas ho Karpus, iyyani isia he iyye lawoŋ iyye, iyyani daŋ ho buhi, ati binno higierita.
\p
\v 14 Etuhutek Alesander hedoŋoni ta hanaŋ irruti arria. Odumak iso Hollum to honyie te igemita inne ehum inyia.
\v 15 Ihuma iye hidofe hiriria wan nohoi tara honyie, nyo ebo ifa inyia hirro innohoi.
\p
\v 16 To hitieri no hirro innanaŋ, obe ifa lobo owueta ho naŋ. Ati ebusari ifa hiyyo naŋ lobotie. Hotobiaŋa ehianahini norru to hosie.
\v 17 Ati owueta ifa Hollum ika naŋ aŋati atta hitigol nayya hijo anyar efut hirro innafa ero inyia hijo anyar etiru hiyyo halufak illo Jentail hiram nohonyie ta nayya. Etilwahini ifa naŋ tara hutuk ne emie.
\v 18 Etilwahu iso Hollum nayya ade tara irruti daŋ atta hidofe etilohu nayya to hiram no obie ne ido. Isiara lohuo hatara nohonyie man fur. Amen.
\p
\v 19 Ifonyak Prisilla, Acquilla, ojo woyyo no Onesiforo.
\v 20 Arasik Erasto to Korinto, ati ebusak naŋ Trophimo loŋwai to Mileto.
\v 21 Anyar eruhuni kwak holobe hameyu. Efonya Eyubulo iyye, ba Pudens, Lino, Klaudia ojo halasira daŋ.
\v 22 Isiara Hollum hotowuana hoyirihien innahatai. Isiara hamehini hotowuana daŋ he itai.