lpx_reg/55-1TI.usfm

\id 1TI
\ide UTF-8
\h 1 Timoteo
\toc1 1 Timoteo
\toc2 1 Timoteo
\toc3 1ti
\mt 1 Timoteo
\c 1
\cl ŋati 1
\p
\v 1 Paulo, efahati lo Yesu Kristo iyya to hifahita inno Hollum hetilahani lohoi ojo Yesu Kristo lo eyik iyyohoi,
\v 2 Timoteo, hiito lo eruk dede. Omelehini, ebusak, ojo himwara tara Hollum monyie hohoi iko Yesu Kristo Habu lohoi.
\p
\v 3 Iyya nafa elimahini nayya ta hatai ho egiama ajo nayya awuyieri a Masedonia, itirasai to Efisa anyar elimak itai to hiyyo lia hotobiaŋa etiyana hitimanyita inno orru.
\v 4 Kuyya hetira iso isia to hiyebita ojo to hucuŋuta, inno eyyani irijiti ati ituluak to higiemita inno Hollum, inno ara to huruk.
\v 5 Ati ara hifahita inno irumuti hira wahan to taji no arra dede, to ofioroho inno olibo, ojo to huruk no arra dede.
\v 6 Atta illak hiyyo efie ojo oyyito ade to hirro hunna to hirro jia.
\v 7 Awak isia hira hetiyanak illo hitimanyita, ati obe isia etiru ojo isia nyo kuyya inno edasa isia.
\p
\v 8 Ati eyyen iyyohoi hijo olibo hitimanyita egiamari iyye isia to hikoi no libo.
\v 9 Ejo iyyohoi eyyen inna, hijo obe hifahita ehumahini to tuŋani lo obis, ati to pagani iko to hiyyo miorok, to hiyyo illo obe ara illo Hollum iko heyyak, to hiyyo illo obe ara heruhok iko illo obe abaŋ, to hiyyo illo ottohe monyie iko hotonyie hosie, ta hattohok,
\v 10 to hiyyo somok, to liawa illo ofirie liawa, to lia epihori wati hiyyo apiti, to telerok, hetisiahak, ojo to hiro daŋ inno obe awak hitimanyita inno okuat.
\v 11 Iyya to sayye inno okwat inno ajak Hollum nafa eruhori nayya.
\p
\v 12 Ati esio naŋ humo to Kristo Yesu Hobu lohoi, hetigolori hanaŋ, awak inyia nayya eheruhoni ojo hidofe ehumak nayya to egiem -
\v 13 nayya hetiruoni hitieri, hatohoni ojo ara tuŋani hetigalafani. Ati amoju naŋ hamelehini iyya egiem ifa naŋ to biaŋan no huruk.
\v 14 Ati ojo hamelehini no Hobu lohoi hotobolo iko huruk ojo mune no Kristo Yesu.
\p
\v 15 Ara sayye inna dede ojo hidofe orumehini dede, hijo awoŋ Kristo Yesu afau anyar etiluak heyyak. Nayya hetiruoni no hunna.
\v 16 Ati to higigilo nia ebusahini ifa naŋ to hitieri, ati ta hanaŋ, to run, Kristo Yesu etimiyaha inyalamiti daŋ, ahutuhuti to lia ille leruk to honyie to manya no osio fur.
\p
\v 17 Iyyania to habu lo hilahajisien, to wuaran, lo obe olieu, Hollum lobotie, hotowuana baŋi ojio kwatan man fur. Amen.
\v 18 Elimak naya inna to hosiere hatai, Timoteo, hiito lalaŋ, ajio naya eruk to hikilita inno owon to hiji hatai, anyar ewuon itai ho golon neremik amirai mereni.
\v 19 Anyar mahati ewuon iyye ho hiruk ojo imanyiti inno olibo. Ebo ilak huwo inia ojo hidofe etihara to baŋi no hiruk.
\v 20 Ara isia Himenyo iko Alesander, illafa esio nayya to Sitan anyar mahati etiyana isia hijo hotobiaŋa isia enyiak moro.
\c 2
\cl ŋati 2
\p
\v 1 To hitieri, efi nayya hjio anyar emojo itai, ifia, ilamai ejio hidofe esio humo to Hollum to hiyyo bi daŋ.
\v 2 Ta habwok ojo to lia daŋ ilo ara hekumok, hijo anyar emanya iyyohoi to himwara ojo te imanyiti inno olibo inno baŋi iko ta nyalami.
\v 3 Olibo ojo hidofe omojini ahosiere ho Hollum Hetilahani hohoi
\v 4 inyia hiyyo daŋ hetilahini ojo anyar afanu to ofioroho inno hiruk.
\v 5 Ati ara Hollum lobotie, ojo ohe lo Hollum iko tuŋani ara nobotie, lo tuŋani Kristo Yesu,
\v 6 lafa esio wan nohonyie daŋ idumut, hetihutani dede to saman no olibo.
\v 7 To hiram inna, Nayya, to wan lalaŋ, anyimuni ehetiyanani ojo efahati. Ero Nayya dede; obe Nayya ateler. Ara Nayya hetiyanani lo Jentails to hiruk ojo dede.
\p
\v 8 Ati, awak naŋ hiyyo daŋ to masik hotomoje ojo akaf ahide has innoolibo to biaŋan no jore iko to hiyyen.
\v 9 Iyya hidofe, awak naŋ ŋoruo ho eciofok boŋojin inno olibo to wati hosie, iko to baŋi no wati, obe lara to hofir inno olibo, kuyya yiel, kuyya boŋojin inno ogol to hinyiaŋa,
\v 10 ati to hirro inno osiru ho ŋoruo inno etihutek ibaŋiti to higiemita inno olibo.
\v 11 Etiyenu iso hiito noŋoruo te ilueti iko to hiruhuta daŋ.
\v 12 Obe nayya eawak hiito nongoruo he etiyana iko ho elimak hikumuta to liawa, ati hotowuanai ho duai.
\v 13 Adam ifa ara hitieri, atta Eva ejufak.
\v 14 Obe Adam ifa eruk hinyiaba, ati enyiaba ifa hiito no ŋoruo dede to biaŋan no hiruk.
\v 15 Ati, etilohini iso inyia to toŋita no durre, arassa isia ho hiruk ojo mune ojo to wahan ho libe no hoo.
\c 3
\cl ŋati 3
\p
\v 1 Ara hirorita hunna dede: La awak lobo tuŋani hira hegiamani, awak inyia igiem no olibo.
\v 2 Ati obe iso inyia enyiak hitipala, oliawa hiito oŋoruo nobotie, herrirriani, lelofere, habisani, la anyalam, lo eremik hitiyana,
\v 3 lo obe ara hamatani la balu, lo obe ara hetiŋalafani, ati ille ara hiito oliawa lo ogol, anyalam, lo obe orru to arobiyaha.
\v 4 Hotottoŋ haŋ nohonyie nalanyar, ojo durre inno honyie abaŋ inyia ho baŋi daŋ;
\v 5 ati le enyie tuŋani ho oyyen toŋita haŋ nohonyie, hotoŋ iso inya ikelesia no Hollum jai?
\v 6 Hotobiaŋa inyia ara heruhoni ŋejuk, anyar obe eremik hira hetidarani hijo hotobiaŋa ohuyik to hikumuta iyya hetisiahani.
\v 7 Anyar owuon hidofe ho higigilita iko lia owuon ade, anyar obe inyia ohuyik ho irri ojo to hikoi no Sitan.
\p
\v 8 Ettaha, iyya nyia, anyar owuon ho baŋi, lo obe ara herarani ho rori arriai, lo obe amata balu no no, ojo hidofe obe ara orrute.
\v 9 Anyar owuon isia ho hituhututa dede inno hiruk iko baŋi no olibo.
\v 10 Hotociem hiyyo isia to hosiere, attati isia higiama nyo obe isia owuon ho nobo hipali.
\v 11 Anyar hidofe abaŋ ŋorwo daŋ to hikoi to nia, obe ara to hipalita, hotobiaŋa egiama no no, ojo hidofe ara heruhoni to hirro daŋ.
\v 12 Isiara hegiamani le ikelesia hotowuana ho hiito noŋoruo nobotie ojo hidofe hotottoŋ durre iko haŋ nohonyie no olibo.
\v 13 Lia egiem no olibo orrumek to wati inno hosie hilohittok iko to wahan no hiruk to Kristo Yesu.
\p
\v 14 Egiorok Nayya ta hatai hirro hunna ajo naŋ awak hidofe awoŋ ta hatai kkuak.
\v 15 Ati elliŋa nayya, egiorok naŋ anyar eyyen mahati iyye hijo hegiamai hiyyo jai ta haji no Hollum, inna ara ikelesia no Hollum lo owuon iko hoi, anyar etihutek, ikotin ojo iluahiti inno hiruk.
\v 16 Dede obolo hiyyen binno hiram no hiyye Hollum nafa eŋofohini: “Oliew ifa Kristo ta wan no tuŋani. Etuhutak Loyiri libe nohonyie, egonyu ifa anjilohien inyia, etiyana hiyyo hiram nohonyie to hiji ha paganohien, eruk hiyyo illo fau hiram nohonyie, ojio hidofe efwotu inyia te ido to kwatan.”
\c 4
\cl ŋati 4
\p
\v 1 Iyyania ojo Loyiri hijo ta halu edek iso illak hiyyo hiruk atta hitira to hinyiebita inno oyiri no orru ojo to hitiyenita inno Sitan to
\v 2 hinyebita inno hitipalita, te ibaŋiti inno hosie egiorohini.
\v 3 Etuwet iso isia yama atta hiyumo ŋiria nafa oyyek Hollum te ibwanyiti iko hisiorita inno humo to heruhok illafa afanu hiyyen dede.
\v 4 Ati olibo hirro inno oyyeu Hollum daŋ, ojo hidofe inyia obe ebo nia eyari iyyohoi ahisiorita inno humo,
\v 5 iyya nia aracie inyia to hirorita inno Hollum ojo imojiti.
\v 6 Le etiyana iyye hirro inia to hosiere ho halasirak, era iso iyye hegiamani lo olibo lo Yesu Kristo iyya etiyenini iyye to hirorita inno hiruk ojo to hitiyenita inno olibo innafa ejufak iyye.
\v 7 Ati hotobiaŋa iyye eruk hiyebita hipalita inno omuno maruak inno ŋoruo, ati itiyana wan nohoi to hiruk.
\v 8 Ati elahaman hitiyana no wan kai, ati elahaman hiruk to hirro daŋ ojo hidofe ottoŋ itieriti inno manya nia iyyania ojo to manya no ottu.
\v 9 Ara sayye hunna dede ojo hidofe efut ho hiruk.
\v 10 Ara iyya nafa etufari iyyohoi ejio hidofe egiama no no, iyyania ewuanari iyyohoi ho hiruk to Hollum lo amanya iko hoi, lo ara hetilahani lo hiyyo daŋ, ati no no to heruhok.
\v 11 Ilimak atta iyye hitiyanai hirro hunna.
\p
\v 12 Hotobiaŋa lobo omiana iyye ta ŋasi ilia hatai, ati anyar efanu itai hira hutuhututa illo hiruk to hirorita, to higiemita, to mune, ojo te ilibiti.
\v 13 Man attuni nayya, itire to hihienita, to hitigolita, ojo to hitiyenita.
\v 14 Baŋa ebusak hisiorita inno owuon tohoi, innafa esiarahini tohoi to hikilita, iko to ifieriti inno has inno maruak.
\v 15 Iririe hirro hunna, itiwuana iko isia, anyar efu itai ahosiere to hirro daŋ.
\p
\v 16 Ihuma riŋa wan nohoi iko to hitiyana nohoi. Todule to hirro hunna iyya egiem iyye daŋ ania etuluak iso iyye wan nohoi iko ilia ille etira tohoi.
\c 5
\cl ŋati 5
\p
\v 1 Baŋa ero no orru to marwani, ati itigolo inyia iyya monye, ojo etigolo hiyyo ilo hitiŋi iyya halasirak,
\v 2 Itigolo maruak inno ŋoruo iyya hotonye, iko ŋoruo inno hitiŋi iyya hanasirak to hikoi no olibo.
\p
\v 3 Itibaŋa ihidahi, ihidahi hunna dede.
\v 4 Ati owuon ihidak ho durre kuyya hidofe durre inno onyi honye kuyya ŋani honye, anyar etihutek isia to baŋi ta haŋitek hosie ojo ho etidumak to monyie iko hotonyie, nyo etimuno inna Hollum.
\v 5 Ati edehini ihidahi hunna dede daŋ hame ojo ehumak higiemita inno honyie to Hollum, odule inyia hitila to hosiere honyie te iluahiti ojo imojiti ta tari ojo ta far daŋ.
\v 6 Ati, oye iso hiito no ŋoruo na manya te ibariti, iyya ida hido ho larasa inyia wuaran.
\v 7 Ojo itiyanai hirro hunna anyar mahati obe isia ho hitipalita.
\v 8 Ati enyie lobo tuŋani he esio to hilahaŋ nohonyie, no no to lia ara woyyo honyie, orisai inyia hiruk ojo orru to hiyyo illo obe ara heruhok.
\p
\v 9 Esiara ihidak hatara ihidak no obe ŋasi inno honyie ara tomwuana ile, oŋoruo tuŋani lobotie.
\v 10 No eyyen hiyyo inyia to higiemita inno olibo, kuya ara iyya eriria inyia durre, kuya ojo olibo to lufajak, kuya ellilla hejek inno heruhok, kuya etihutek to hetabanak, kuya lejufuta igiem no olibo.
\v 11 Ati te ihidahi inno hitiŋi, baŋa etigiorok isia to hiji hosie, iyya nafa afanu isia he iwahiti to wati innohosie to Yesu, awak isia yama.
\v 12 To hikoi inna arrumu isia hipalita iyya obe isia ottoŋita itieriti innohosie.
\v 13 Hidofe, atta isia afanu hittole ania. Loton ta huluta haŋ ahaŋ. Obe ara nia hame owuana hidofe isia ania, ati atta hira hidofe telerok ojo arra heitiharak, ero hirro inno obe isia eremik hiro.
\v 14 Teyya awak nayya ŋoruo inno hittiŋi hatayamai anyar esiu durre, anyar eniefita haŋitek, hotobiaŋa esio to hetirijak furusa ne etisiahari to hosie to higiemita inno sitan.
\v 15 Ati oyite illak halas ade ta halu ho Sitan.
\p
\v 16 Owuon nobo hiito oŋoruo no eruk he ihidahi, isiara inyia hotoluak isia, anyar obe ikelesia etaban, anyar eremik mahati huluak ihidahi hunna dede.
\p
\v 17 Isiara maruak illo edihita no olibo hotorrumek baŋi nettok, no no to lia olot ho hisiŋita ojo ho hitiyenita.
\v 18 Ati ojo higierita hijo, “Hotobiaŋa iyye efit hiteŋ tamot ille ahafita ŋama,” ojo “Hegiamak orrumek arobiyaha innohosie.”
\p
\v 19 Baŋa eruk to hitisiahita inno maruani ille owuon mahati ho sutin ohorik kuya lohunik.
\v 20 Itihutek heyyak to hosiere ho hiyyo daŋ anyar mahati abaŋ baŋi illo hosie.
\p
\v 21 Elimak nayya ta hatai to hosiere ho Hollum, to Kristo Yesu, ojo to anjilohien onyimot, iniafa hitimanyita hunna to biaŋan no teler, ojo hidofe itai iso obe eticio.
\p
\v 22 Ibaŋa ehumak has inno orru to lobo, kuyya ebuan hiyyata inno arra inno lobo. Ihumak wan nohoi atuŋani dede.
\v 23 Hotobiaŋa iyye enyiak mata hifioŋ, ati amat lobo balu kai to hosehe nohoi iko to ŋwai nohoi no odule.
\v 24 Eyyen iyyohoi luŋa hiyyata inno illak hiyyo, ojo isia ofu iko isia, ekumori. Ati ejufari illak innak hiyyata iso ta halu.
\v 25 Iyya hidofe, oyyen hiyyo higiemita inno olibo daŋ, ati obe innak oremik eŋofohini.
\c 6
\cl ŋati 6
\p
\v 1 Isiara iluluŋ ho hepitok hejufari halu no hegiamak ilo hekumok illohosie obe ara to hilohitok inno hosie inno hiruk no baŋi daŋ, anyar obe fure no Hollum ho hitiyana nohonyie etihara.
\p
\v 2 Hotobiaŋa hekumok lia owuon ho hiruk to etaha etifiak watek inno hosie, iyya nia aracie isia ahalasirak. Ati anyar egiama isia tohosie daŋ, iyya te ettaha ilia ohoru arobiyaha inno hosie ara to mune ojo hidofe ara to hiruk. Itiyanai atta iyye elimak hirro inia.
\p
\v 3 Etiyana lobo tuŋani ilufuti ojo obe eruk hirorita inno olibo tara iyyohoi, hirorita inno Hobu lohoi Yesu Kristo, ojo to hitiyenita inno hiruk,
\v 4 etidara inyia ojo obe oyywn innak hirro, oŋuai inyia he irijiti iko iŋalafiti, inno eyiani dayia, irijiti, imoriti, hitisiahita,
\v 5 ojo iŋalafiti inno hiyyo ho tajia inno orru. Oyite isia ade tara hiruk. Egigilo isia hijo hiruk to Hollum inyia ara hikoi no harrumehini ibariti.
\p
\v 6 Ati baŋi no Hollum iko mune hira irumut nettok.
\v 7 Ati enyie iyyohoi ho eyyani innak hirro afau inna, ojo kuya eremik mahu iyyohoi eyari ade innak hirro.
\v 8 Ati, oremik iso ŋiria iko boŋojin iyyohoi.
\v 9 Iyyania ahuyik hiyyata to lia awak wati hirra habarak, to hitigiemita, to hibolit ojo to higiemita inno emonya, ojo to innak hirro hidofe inno etijiŋak hiyyo ho effi to hitisiahita ojo to hitiharita.
\v 10 Ara mune na arobiya hadeti no irruti. To hiyyo illa lawak arobiyaha efie ade tara hiruk ojo obe oremik hitir watik innohosie iko hijiriŋa arriai.
\p
\v 11 Ati to hoi, tuŋani lo Hollum, ibusak hirro inia. Tosiehai ibisiti, hirro inno Hollum, bisan, mune, dihan, iko nyalami.
\v 12 Irribe hirribo nalanyar no huruk. Ijufari hikoi no wuaran iyya nafa ellilloŋori nayya itai, ojo to hetihutek nohoi sutin to hosiere ho sutin arriai iyya to libe.
\p
\v 13 Elimak naŋ ta hatai to hosiere ho Hollum, le ehumak hirro daŋ ha amanyari, ojo to hosiere ho Yesu Kristo, le ero ilibiti dede to hosiere Pontio Pilato.
\v 14 Iniafa hifahita dede, inno agalik hitimorita, man olieuni Habu lohoi Yesu Kristo.
\v 15 Eyyani iso halieu no honye iyya holoŋ no obis no ehumahini te ille eruk, to golon, ta habollok ille ekumo, ojo Habu la ara ettok.
\v 16 Owuon inyia ho wuaran hame ojo amanya hititifita inno obe aciala. Obe lobo tuŋani lo owolo inyia ojo obe eremik egonyu inyia. Isiara baŋi iko golon nohonyie no odule obe hucuŋi. Amen.
\p
\v 17 Ilimak habarak illo fau inna hotobiaŋa etidara, kuyya anyar egigilo te ibariti inno eremik litai. Ati anyar egigilo isia to Hollum, le esio te iyyohoi daŋ ibariti hunna dede inne emanyari iyyohoi.
\v 18 Ilimak isia ho egiame ilibiti, anyar abara to higiemita inno olibo, anyar emorot, ojo hidofe eremik hubwan.
\v 19 To hikoi nia, atta isia arrumu manya to wati innohose manya no olibo to nyio iso ottu, ojo hidofe isia eremik hinief manya inna dede.
\p
\v 20 Timoteo, tottoŋ sihin nafa esiarahini tohoi. Baŋa ero hirorita inne ebolit ojo hititihara inno irijiti te iteleriti inne ellilloŋo hiyyo ofioroho.
\v 21 Ero illak hiyyo hirro inia ojo hidofe ofu ade tara hiruk. Hotowuana hamehini he itai daŋ.