lpx_reg/54-2TH.usfm

\id 2TH
\ide UTF-8
\h 2 Tesalonika
\toc1 2 Tesalonika
\toc2 2 Tesalonika
\toc3 2th
\mt 2 Tesalonika
\c 1
\cl ŋati 1
\p
\v 1 Paulo, Silvano, ojo Timoteo, to kelesia no Tessalonika no Hollum Monye hohoi ojo habu Yesu Kristo.
\v 2 Isiara hamehini hotowuana ta hatai ojo himwara tara Hollum Monye hohoi ojo Yesu Kristo.
\p
\v 3 Ewak iyyohoi adule hisiara humo to Hollum te itai, halasira, anyar nia binno nyo obolo huruk nahatai binno, ojo mune nahatai to wati odule hifita to wati innahatai.
\v 4 Edule iyyohoi hitidara to hiro nohoi ta wati innohoi to wuana nahatai to hiji ho kelesiaha inno Hollum to dihan ojo huruk nahatai to hiji ho hitigemita innahatai daŋ, iko to hitigemita inno edihu itai.
\p
\v 5 Ara inna hutuhuti no obisari ŋoto no Hollum. Etuhutak nia luŋa hijo esiru itai to obie no Hollum ne etabanari itai.
\v 6 Dede to Hollum henyiahahini hitigiama to ilia etigiama itai,
\v 7 Ati hitilek tahatai illo etaban ojo tohoi hedofe, laliew habu Yesu te ido ha anjilohien illohonyie illo ogol.
\v 8 Iyya ŋadief no hima, elienyu iso inyia hiyyo illo obe oyyen Hollum ojo hidofe to liyya illo obe awak hitiraŋ to sayye inno habu lohoi Yesu.
\v 9 Orrumu iso isia hitigiama no losio fur no hitihara nolobe onyiha aŋati ho Habu ojo tara kwatan no dwaran no honyi.
\v 10 Ottu iso inyia higem ina lawoŋ inyia to far nyia etihabuori hiyyo illohonyie ojo hidofe omuno to hiyyo daŋ illafa eruk inyia, ara ifa hituhuta nohoi hiruk.
\p
\v 11 To hiram nia, edule iyyohoi daŋ mojo te itai anyar etisiru Hollum hira nahatai heruhok, hidofe anyar etufutak Hollum wahan no libe ojo igem no huruk to golon.
\v 12 Emojo iyyohoi hijo hotohkwata fure no habu lohoi Yesu to itai, hidofe hotokwata itai te inyia, to hamehini no Hollum lohoi ojo Habu Yesu Kristo.
\c 2
\cl ŋati 2
\p
\v 1 Iyyania ta hawoŋ no Habu lohoi Yesu Kristo ojo tubai nohoi arabotie he inyia: efia iyyohoi tahatai halasira,
\v 2 hijo ibaŋa eruk hitidiaha kuyya hitigiama kuyya to oyiri kuyya no hiro kuyya nobo waraga no owoun iyya ottu tara hohoi, nero hijo eba Yesu.
\v 3 Hotobiaŋa lobo tuŋani enyiob itai to nobo hikoi. Obe ottu man ottuni tahalu ho hahuye nohonyie, ojo tuŋani olieu lo ebo hifahita, lonyi hetiharani.
\v 4 Inyia lia ebo Hollum atta hafita wan nohonye, atta hililoŋo wan nohonye Hollum lia letihabuo hiyo. Ettole inyia to hotwai iko ta haji imojit no Hollum atta ehumak wan nohonye a Hollum.
\v 5 Ebe itai egilu hijo nafa awuanari naŋ ikatai elimak efa naŋ hirro inia?
\p
\v 6 Iyyania eyyen itai hirro inno etilliŋa inyia, hijo anyar oliew inyia ta far no olibo.
\v 7 Egiama hifahita inno tuŋani lia iyyania, ati owuon tuŋani le etiliŋa inyia iyane man eyari inyia ade to hikoi.
\v 8 Atta tuŋani lobe hifahita alieu, lolottohe Yesu to hiyyehita no hutuk nohonyie. Etilitek iso Habu inyia la alieu hawoŋ nohonyi.
\p
\v 9 Hawaŋ no lia lolobeŋ hifahi ottu to ogiem no Sitan to golon daŋ, hutuhututa, teler ojo hililiha,
\v 10 ojo hinyiebita inno orru inno enyeb illie etaban, nyo obe isia efwotu mune no dede no hetilahini.
\v 11 To hiram nia, efahak Hollum to hosie hipali hijo anyar eruk isia hinyiaba
\v 12 ati anyar oremik isia daŋ to hokum, illie illo obe eruk dede ati omuno biaŋan na manya nalanyar.
\p
\v 13 Ati anyar esio iyyohoi humo to Hollum to itai, halasira ilo omuno Habu. Onyimu Hollum itai hetera haŋer hiterita illo Loyiri na ara igiem nohonyie hitilahini hijo anyar eruk todede.
\v 14 Ellilloŋu inyia itai to sayye nohoi anyar errumu itai lohuo na Habu lohoi Yesu Kristo.
\p
\v 15 Iyyania, halasira, itiwetai nologol hidofe iniefu imohiti innafa etiyenu itai to hiro kuya hidofe to waraga nohoi.
\p
\v 16 Iyyania isiara Habu lohoi Yesu Kristo to wan tonohonyie, Hollum Monye, lomuno iyyohoi, atta hisio iyyohoi golon no osio fur ojo heyik no olibo to hamehini,
\v 17 itiliha ojo hidofe itigolo tajia innahatai to igiem no olibo ojo to hiro.
\c 3
\cl ŋati 3
\p
\v 1 Iyyania halasira, itimoje te iyyohoi, hijo hotoruhari hiro no habu hidofe hotokwata iyya to hatai.
\v 2 Hidofe daŋ hijo hetalini iyyohoi tara hiyyo ille epalita ojo hidofe orru, nyo obe hiyyo daŋ owuon ho huruk.
\p
\v 3 Ati obolo huruk no Hollum lo etigol itai ojo hidofe eriria itai tara harruoni.
\v 4 Edule iyyohoi huruk ta Habu te itai, hijo edule iso itai hihuma hirro innafa elimak iyyohoi itai.
\v 5 Isiara Habu hetihutek tajia innahatai to mune no Hollum ojo to dihan no Kristo.
\p
\v 6 Iyane, elimak iyyohoi itai halasira, to fure na Habu lohoi Yesu Kristo, hijo ibusak lobo ilasi hatai lamanya asi hidofe obe awak nayya to imohiti innafa efwotu itai tara hohoi.
\v 7 Eyyen itai to wati innahatai, hijo anyar etiriju itai iyyohoi. Ebe ifa iyyohoi emanya asai nafa ewanari iyohi ikatai.
\v 8 Ebe ifa iyyohoi edaha nobo imune no lobo tuŋani ebe iyyohoi eduma. Ati egiama ifa iyyohoi daŋ ta tari ojo ta far ta mai no ogol to higiama hijo hotobiaŋa iyohoi etiyana itai.
\v 9 Egiem iyyohoi ania obe lojo ebe mahu iyyohoi ewuon ho golon. Ati egiem iyyohoi ania hijo anyar etiyenu itai toro iyyohoi.
\v 10 Nafa helewuon iyyohoi ikatai, elimak ifa iyyohoi itai hijo, “Lobe lobe awak higiama, hotobiaŋa inyia adaha.”
\v 11 Etiru iyyohoi hijo ettole illak ania obe awak higiama to hiji hatai. Obe awak higiama ati awak halan.
\p
\v 12 Iyyania, ewak iyyohoi hitigol isia to fure to no Habu Yesu Kristo, hijo hegiamai isia to dwai anyar adaha inno egiemu isia to wati innohosie.
\p
\v 13 Ati itai, halasira, ibaŋa etaban higiama no olibo.
\p
\v 14 Lobe lobo abaŋ hiro no waraga inna, itiyyen inyia, atta ebusak inyia anyar ottohe irri inyia.
\v 15 Ibaŋa orriŋa inyia amereni, ati itisor inyia iyya ilasi hatai.
\p
\v 16 Isiara Habu lo himwara to wan nohonyie hesiara itai himwara ta far daŋ ojo te ikota daŋ. Isiara Habu hotowuana daŋ to koi itai.
\v 17 Naya, Paulo, Egioro tahatai ta hani naŋnaŋ, ne etuhutak ta waragat innanaŋ.
\v 18 Isiara hamehini na Habu lohoi Yesu Kristo hotowuana daŋ hatai. Amen.