See in Reader
127 lines
11 KiB
Plaintext
127 lines
11 KiB
Plaintext
\id 1TH
|
||
\ide UTF-8
|
||
\h 1 Tesalonika
|
||
\toc1 1 Tesalonika
|
||
\toc2 1 Tesalonika
|
||
\toc3 1th
|
||
\mt 1 Tesalonika
|
||
\c 1
|
||
\cl ŋati 1
|
||
\p
|
||
\v 1 Paulo, Silvano ojo Timoteo, te ikelesia no Tesalonika nia lo owuon to Hollum Monye, Habu lohoi Yesus Kristo. Hotowuana hamehini ho himwara no Hollum ta hatai.
|
||
\p
|
||
\v 2 Edule iyyohoi hisiara humo to Hollum te itai, iyya elioto iyyohoi itai to mojo nohoi.
|
||
\v 3 Errasa iyyohoi to hosiere Hollum Monye hohoi hiyyen huruk nahatai, igem nahatai, mune nahatai, hitila no hiŋere nahatai to moi nyia lo owuon ta Habu lohoi Yesu Kristo.
|
||
\v 4 Halasira, hullo omuno Hollum, eyyen iyyohoi hanyumuni nahatai,
|
||
\v 5 ashan otu ifa hiram no Hollum nolobe ara to hiro hamai, ati to golon no Loyiri lo Olibo. To hikoi nia, hidofe eyyen itai hira sihil le ilari iyyohoi ifa beren to hiji hatai.
|
||
\v 6 Eticelu itai iyyohoi ha Habu, iyya efwotu itai hiram no Hollum to hitigiama ojo hidofe to mune no Loyiri lo Olibo.
|
||
\v 7 To hiram nia, era itai hetimijak to heruhok illo Masedonia ojo Akaya illo eruk.
|
||
\v 8 Olieu hiram no Hollum te itai, obe lara to Masedonia ho Akaya hamai ati ta masik innafa egiamari itai esarik huruk nahatai to Hollum. Iyyania ebe iyyohoi eremik hiro innamuk hirro.
|
||
\v 9 Isia to wati innohosie elimak hafanu nohosie ta hatai. Ero isia hiloito nahatai toro rijorihien to Hollum lo bis.
|
||
\v 10 Elima isia hijo etila itai Lonyi honyie lottu te ido. Letidietu inya toro hayok. Inyia lia Yesu Kristo lo ohou iyyohoi tara jore nolottu.
|
||
\c 2
|
||
\cl ŋati 2
|
||
\p
|
||
\v 1 Eyyen itai ta wati innahatai, halasira, hijo obe ifa hawoŋ nohoi ta hatai ara assai.
|
||
\v 2 Eyyen ifa itai hijo obolo hitigiama nohoi man ottohe iyyohoi irri to Filipi, eyyen ifa itai. Eŋere ifa iyyohoi hiro hiram no Hollum to hiji ho hitigiama.
|
||
\v 3 Obe ifa hittitto nohoi ara to hipali, he ibwoti, to hinyiaba,
|
||
\v 4 ati eruhu Hollum iyyohoi esiarari te iyyohoi hiram nohonyie hijo anyar ero iyyohoi sayye inno olibo, inya nia ero iyohoi. Ero iyohoi hijo hotobiaŋa iyyohoi etumuno hiyyo, ati Hollum nyo Hollum hame oremik hiciem ojo hidofe oyyen tajia innohoi.
|
||
\v 5 Iyya ara Hollum a sut lohoi, ebe ifa iyyohoi ero ta hatai to teler kuya hidofe to nobo far hijo anyar edaya iyyohoi hirro innahatai.
|
||
\v 6 Ebe iyyohoi esiaha ohuo nohoi tara hiyyo, kuya hidofe tara itai kuya tara ilamuk. Nara ida ania, ne ewak iyyohoi idumuti innohoi to hira nohoi lefahat.
|
||
\v 7 Ati enyalam ifa iyyohoi ta hatai iya anyalam hotonye to durre innohonyie.
|
||
\v 8 To hikoi nia, emuno ifa iyyohoi itai. Ebe ifa iyyohoi ebwany hiram no Hollum nahatai hame ati esio ifa iyyohoi wati innohoi hatai.
|
||
\v 9 Edule itai hiyyen igem iko hitigiama nafa hohoi, halasira, egiama ifa iyyohoi ta tari ojo te iŋalio hijo hotobiaŋa iyyohoi etigem itai. Ta far nyia, etiyana ifa iyyohoi itai sayye inno Hollum.
|
||
\v 10 Era itai a suti inno hirro innia. Leyyen itai libe, bisan ojo imanyiti innohoi nafa ewuanari iyyohoi he itai eijo iyohoi emanya he itai illafa eruk.
|
||
\v 11 Leyyen itai hitigolo nafa hohoi ta hatai iyya monye ho durre innohonyie, ettitto ejo hidofe etigolo itai. Ettitto iyyohoi
|
||
\v 12 hijo anyar emanya itai iya lawak Hollum to lohuo nohonyie iyya ellilloŋu inyia itai to lobie ojo lohwo nohonyie.
|
||
\p
|
||
\v 13 To hiram nia edule iyyohoi hisiara to Hollum humo, To nafa emojini itai hiram no Hollum tara hohoi, obe ifa itai eruk hijo ara hiram no tuŋani, ati emoju ifa itai ania, hijo ara Hiram no Hollum, Inyia hiram nyia ne egiama to hiji hatai ille eruk.
|
||
\v 14 Halasira, era itai etimiyahak illo kelesiahan inno Hollum inno owuon Yesu Kristo nia to Yudea. Errumu itai hitigemita tara hiyyo illo doŋe nahatai hirro innafa orrumu isia tara hiyyo illo Judei.
|
||
\v 15 Illafa ottohe Habu lohoi Yesu Kristo ojo hekilak atta hidofe efuhai iyyohoi ade. Obe etumuno Hollum ojo hidofe odule aŋerejak to hiyyo daŋ hijo hotobiaŋa iyyohoi ero to huwo illo ara halufak hijo hotobiaŋa isia etilohini.
|
||
\v 16 To hikoi nia, adumu isia atta afonik hiyyata innohosie ati awoŋ jore no Hollum ta halu to hosie.
|
||
\p
|
||
\v 17 Halasira, elama ida hido iyyohoi tara hatai kai ta tajia, ewak iyyohoi bino ta tajia innohoi hiwolo itai to homomite.
|
||
\v 18 Nyo ewak iyyohoi afanu ta hatai-naya Paulo, ati sitan ettik iyyohoi.
|
||
\v 19 Nyo ara hitidara nohoi to heyik to tamu tara Habu lohoi, ta hawoŋ nohonye. Obe ara itai?
|
||
\v 20 Itai era lohuo ojo mune nohoi.
|
||
\c 3
|
||
\cl ŋati 3
|
||
\p
|
||
\v 1 Nafa ebe iyyohoi eremik hidi, eruk iyyohoi hijo edek isia iyyohoi ta Athene hame.
|
||
\v 2 Atta iyyohoi efahak Timoteo halasi ojo ara hidofe hegiamani iko hoi to sayye inno Yesu Kristo,
|
||
\v 3 hijo hetigolo inyia huruk nahatai, hijo hotobiaŋa lobo tara hatai orrwa to hitigemita inia. Eyyen itai to wati innahatai hijo ara isia innohoi.
|
||
\v 4 Dede, nafa helewuon iyyohoi he itai, elimak ifa iyyohoi itai beren hijo efu iso iyyohoi arrumu hitigemita iyya owuanari isia iyya egonyu itai eijo itai eyyen.
|
||
\v 5 To hiram to nia, ifa ewolo nayya hijo enyei iso nayya aremik hidi ahosiere, atta nayya efahak hijo anyar layyien nayya huruk nahatai, egigilo nayya ifa hijo enyiob mahu henyiabani itai atta igem nohoi eno assai.
|
||
\p
|
||
\v 6 Heletek Timoteo awoŋ te iyyohoi tara hatai atta hidofe eyyani te iyyohoi sayye inno olibo no huruk ojo mune nahatai. Elimak hidofe inyia iyyohoi hijo edule itai higigilo iyyohoi nalanyar, ojo ewak itai egonyu iyyohoi iyya nia ewahari hidofe iyyohoi egonyu itai daŋ.
|
||
\v 7 Halasira, to hitigemita innohoi daŋ, egol ifa iyyohoi te itai ojo to huruk ta nahatai.
|
||
\v 8 Emanya iyyohoi iyyania to weuta ta nahatai no ta Habu.
|
||
\v 9 Hesio iso iyyohoi to Hollum humo tetai jai to mune nohoi nolowuon to hosiere ho Hollum.
|
||
\v 10 Emojo iyyohoi to far iko te iŋalio hijo anyar egonyu iyyohoi itai eijo hidofe eremik hitigol huruk nahatai.
|
||
\p
|
||
\v 11 Iyyania, isiara Hollum Monye hohoi to wan nohonyie Habu lohoi Yesu hehuhumak toohoi hikoi neremik iyyohoi afanini ta hatai.
|
||
\v 12 Hotofonik Habu mune nahatai hotoloŋori te illak ojo to hiyyo daŋ ta mai iyya ara nohoi ta hatai daŋ.
|
||
\v 13 Isiara inyia hetigolo tajia innahatai anyar obe nobo hipali ta hatai to hosiere ho Hollum Monye hohoi laciohini Habu lohoi Yesu iko halibok illohonyie daŋ.
|
||
\c 4
|
||
\cl ŋati 4
|
||
\p
|
||
\v 1 Hucuŋi nohonyie, halasira, etigolo iyyohoi eijo hidofe ettitto itai ta Habu lohoi Yesu. Iyya emoju itai hituhututa tara hohoi inno loton eijo itai etumuno Hollum, hidofe to loton nia, itudule higiama ahosiere.
|
||
\v 2 Nyo eyyen itai hijo esio iyyohoi hituhututa innia tara Habu Yesu.
|
||
\p
|
||
\v 3 Ara inna wahan no Hollum: lewak itai libe ibwara hirro inno somon,
|
||
\v 4 hijo anyar otoŋ lobo oŋoruo honyie nalanyar to libe ojo to baŋi.
|
||
\v 5 Ibaŋa ladaya ŋoruo inno illak hiyyo iyya hiyyo illo lobe loyyen Hollum.
|
||
\v 6 To hiram nia, hotobiaŋa lobo eturwo kuyya etipala ilasi honyie. Abak iso Habu hiyyo ille ehuma hirro innia. Elimak ifa iyyohoi hiram nia ta hatai beren.
|
||
\v 7 Obe ifa Hollum ellilloŋu iyyohoi hijo hotodule hihuma hirro inne ebwot. Onyimu ifa inyia iyyohoi hijo hotobwanyari iyyohoi tara hirro inno lorru.
|
||
\v 8 Iyyania, lebo lobo abaŋ hiram inna, obe inyia ebo hiyyo, ati Hollum esio oyiri lolibo nohonyie ta hatai.
|
||
\p
|
||
\v 9 Ati abe nayya awak egiorok ta hatai hemuno itai heruhok jai. Etiyenak Hollum to wan nohonye hijo itumune wati innahatai.
|
||
\v 10 Dede, emuno itai heruhok daŋ ta Masedonia. Ati efia iyyohoi itai motiarak hijo, itumune wati innahatai binno. Hotobiaŋa itai etidiotok nobo hiram to lobo. Igemai hirro innahatai to wati innahatai, obe ara ho hirro inno hiyyo. Igemai ta has te innahatai.
|
||
\v 11 Elimak ifa iyyohoi itai hijo igemai hirro inne. Legem itai hirro innia, egigilo iso illamuk hiyyo nalanyar te itai, egigilo iso hiyyo illo lobe eruk Kristo nalanyar ta hatai. Oyyen iso isia hijo eruk itai binno atta hijo elibo itai.
|
||
\v 12 Hidofe legem itai hirro innia, ebe iso itai ewak lobo hotoluak itai innak hirro.
|
||
\p
|
||
\v 13 Halasira, awak nayya anyar eyyen itai hiram na hayok illafa oye. Hijo hotobiaŋa itai emumuha isia iyya inna omumuhari illak hayok illohosie. Omumuha hiyyo liyya nyo obe isia owuon ho nobo heyik ta halu ho ye no tuŋani.
|
||
\v 14 Leruk iyyohoi hijo oye ifa Yesu atta ebuhu to ye, Eruk iyyohoi daŋ hijo ottuba hiyyo illo oye iko Kristo.
|
||
\v 15 Eruk iyyohoi hijo eyyani iso Hollum hiyyo liyya lawoŋ Habu, ebe iso iyyohoi eremik efie ahosiere tara liyya illafa ojiotori.
|
||
\v 16 Ta far nyia, eyyorro iso Hollum to hilohitok, ojo hiyyo atta etiru hutuk no Anjilo la agalik. Etiru iso isia kwatan no ikakan. Atta Habu to wan nohonyie awoŋ te ido afau.
|
||
\v 17 Atta liyya illafa ottuba ho Kristo ebuhu, atta isia diote to hosiere. Ta halu, atta iyyohoi hawuarak illafa daŋ diote ahide atta efie ahide. Atta Hollum eyari iyyohoi ahide ottubari he isia te itiran. Eyari iso inyia iyyohoi heboŋohini ha Habu to oyyami. Ewuon iso iyyohoi iko Habu holoŋitek daŋ.
|
||
\v 18 Iyyania, ittittok hirro inia te illak.
|
||
\c 5
|
||
\cl ŋati 5
|
||
\p
|
||
\v 1 Motiarak, ebe iyyohoi egiorok ta hatai ta far ojo holoŋitek inno lofuye hirro hunna hebarari.
|
||
\v 2 Eyyen itai binno hacohini na Habu. Etubur iso far nyia hiyyo binno iyya awoŋ no lohoho ahahalari hiyyo ta tari.
|
||
\v 3 Ifa lejo isia, “imor iko manya nalanyar,” kokwak oto iso run tohosie.’ Owoun isio iyya diahai no hitado no hiito noŋoruo. Obe iso nobo hekoi heryace.
|
||
\v 4 Ati itai, halasira, ojo hanasira, abe itai iwanun te idumele hotobiaŋa far nyia oburak itai iyya lohoho.
|
||
\v 5 Era itai daŋ durre illo cialai ojo durre illo far. Ebe itai era lonyirok illo harie kuyya illo edumele.
|
||
\v 6 Hotobiaŋa iyyohoi ejoto iyya illamuk. Ati hetudule hiriria ojo hosi odule ŋaa.
|
||
\v 7 Liyya illo ojioto, oijoto isia ta taharie, ojo ilia eboto, eboto daŋ ta tari.
|
||
\v 8 Ati iyya era iyyohoi lonyirok illo far, anyar ehum iyyohoi riŋa eijo hidofe egigilo na anyar. Anyar eciofok iyyohoi buhu no suhe no huruk ojo no mune, ojo tamu no etilohini no moi.
|
||
\p
|
||
\v 9 Obe ifa Hollum onyimu iyyohoi hijo hetera iyyohoi illo jore, ati hijo anyar errumu iyyohoi hetilahini ta Habu lohoi Yesu Kristo.
|
||
\v 10 Inyia ifa oye te iyyohoi hijo kuyya eriŋa iyyohoi kuya hidofe efer iyyohoi, anyar emanya iyyohoi daŋ he inyia.
|
||
\v 11 Ilimak hirro innia te illamuk anyar obe wati innahatai elik. Itulwak wati iyya nia egiamari itai iyyania.
|
||
\p
|
||
\v 12 Iyyania, efia iyyohoi itai halasira, iruho ilia ille egiama to hiji hatai ojo hidofe ara ettaha ta hatai ta Habu ojo hidofe etiyana itai.
|
||
\v 13 Ewak hidofe iyyohoi anyar emuno itai isia binno te igem nohosie. Ituwuanai to himwara to hiji hatai.
|
||
\p
|
||
\v 14 Ettitto iyyohoi itai, halasira: Itisor heturwok, itulwak ille etaban to hiji hatai, itulwak ille elik, isiara hidi nahatai to hiyyo.
|
||
\v 15 Hotobiaŋa lobo odumak run ho run to lobo, ati itudule siaha hirro inno olibo te illak ojo hiyyo daŋ.
|
||
\p
|
||
\v 16 Tomune holoŋitek daŋ.
|
||
\v 17 Itudule mojo.
|
||
\v 18 Isiara humo to Hollum to hirro daŋ. Nyo ara nia wahan no Hollum te itai to Kristo Yesu.
|
||
\p
|
||
\v 19 Baŋa etuduny Loyiri.
|
||
\v 20 Baŋa olisa hikilita. Iticem hirro bi daŋ.
|
||
\v 21 Iniefa hirro inno olibo.
|
||
\v 22 Ibusak higemita inno orru.
|
||
\p
|
||
\v 23 Isiara Hollum lo himora hototubak itai. Isiara oyiri nahatai daŋ tamai, oholio, ojo wati innahatai hototubahini obe hipali ta hawoŋ na Habu lohoi Yesu Kristo.
|
||
\v 24 Agalik libe no lia lafa ellilloŋu itai, ojo lia lohu hidofe higem.
|
||
\p
|
||
\v 25 Halasira, itimoje daŋ hidofe te iyyohoi.
|
||
\v 26 Itifonyak halasira daŋ to hijujura no hutuk.
|
||
\v 27 Efia nayya itai to fure na Habu hijo anyar ehianak itai waraga inna ta halasira daŋ.
|
||
\v 28 Isiara hamehini na Habu lohoi Yesu Kristo hotowuana ikaitai.
|