lpx_reg/51-PHP.usfm

\id PHP
\ide UTF-8
\h Pilipi
\toc1 Pilipi
\toc2 Pilipi
\toc3 php
\mt Pilipi
\c 1
\cl ŋati 1
\p
\v 1 Paulo ho Timoteo, hegiamak illo Yesu Kristo, te ilia hullo ellilloŋu YesuKristo illo owuon to Filipi, he ettaha ojo hejufak.
\v 2 Isiara hamehini hotowuana ta hatai iko humwara tara Hollum lohoi Monye hohoi ojo Habu Yesu Kristo.
\p
\v 3 Esio nayya humo to Hollum lagilu nayya itai.
\v 4 Amojo nayya holoŋitek daŋ te itai, amojo nayya to mune.
\v 5 Esio nayya humo to tubai nahatai to hiram no Hollum man to hitieri man he iyyania.
\v 6 Ayyen nayya hijo lia le egiema ta hatai nalanyar, ohu iso esahak igem nohonyie man ta far no ottuni Yesu Kristo.
\v 7 Obis ta hanaŋ hegigilori te itai nalanyar, nyo ewuon itai ta taji hanaŋ. Era itai ta hatai amotiarak to hamehini ojo hidofe to hiriria nahatai naŋ ta babus, to hiram no Hollum.
\v 8 Oyyen Hollum hirro innanaŋ awak nayya egonyu itai nyo obolo mune no Yesu Kristo ta hatai
\v 9 Amojo nayya hijo: anyar efita mune nahatai agalik dayya to ofioroho ojo to hiyyen.
\v 10 Amojo naŋ hijo anyar eciem itai eijo hidofe enyimu hirro inno obis. Amojo nayya anyar ewuon itai no obis obe hipali man ta far no ottuni Kristo.
\v 11 Anyar efut itai ho haŋer inno bisan inna afanu tara Yesu Kristo, to lohuo no Hollum.
\p
\v 12 Iyyania awak nayya anyar eyyen itai, halasira hijo eluak hirro innafa edwoŋ ta hanaŋ eyari sayye inno Hollum a hosiere binno.
\v 13 Nyo etisarik haririk innanaŋ sayye no Kristo ta haŋ na Habu ojo to hiyyo illo owuon ta masik innak.
\v 14 Ohiŋere halasira iyyania arria hiro hiram na Habu obe baŋi to hiro nanaŋ to hosie.
\p
\v 15 Etiyana illak iyyania hiram no Kristo ta hayini ojo to rija, ojo ilak to libe.
\v 16 Oyyen illafa etiyana hiram no Kristo to mune hijo atafa nayya inni sayye inno Hollum.
\v 17 Ati etiyana illak hiram no Kristo ta hayin ojo to teler. Egigilo isia hijo etihara isia nayya to hifita nanaŋ ta aririk.
\v 18 Nyo? Kuyya to higigilo nohosie, kuyya hidofe etuhuma kuyya obis, Agiofohini hiram no Kristo, amuno nayya to hiram nia! Ee, amuno iso nayya.
\p
\v 19 Ayyen nayya hijo eyyani iso nia ta hanaŋ hetuluahini. Oremik iso nia hira dede tomojo nahatai ojo to luaha no Loyiri no Yesu Kristo.
\v 20 Amuno naŋ ajo hidofe ayyen hijo awuon ho huruk nobe esio nayya irri. Ati awak naŋ hijo hotodule Kristo kuatan ta iyyania man ahosiere to wuaran ojo to ye.
\p
\v 21 Ara Kristo ta hanaŋ manya ojo la aye naŋ osiru ha ayeri te inyia.
\v 22 Ati lamanya nayya to hiriŋo, are nia haŋer inno hegiama nanaŋ, arasa hijo anyumu isio nari? Abe naŋ ayyen.
\v 23 Atidahini ati to hiji ho hirro inno. Awak nayya eno wuana ho Kristo, sihin no olibo binno!
\v 24 Ati olibo hidofe daŋ ta hanaŋ hawuanari te itai to hiram nahatai.
\v 25 Iyya ayyen naŋ hiram nia, ayyen naŋ hijo adule iso nayya he itai te igem nahatai ojo hidofe daŋ to huruk nahatai.
\v 26 Obolo hitahuo nahatai to Kristo Yesu to wuana nanaŋ he itai.
\p
\v 27 Ihuhumak imanyiti innahatai no osiru sayye no Kristo. Abe hido nayya attu hiwolo itai kuyya abe nayya awuon ta hatai, awak naŋ etiru hijo ewueta itai to Loyiri nobotie. Awak nayya etiru hijo owuon oyiri innahatai nobotie to huruk na sayye.
\v 28 Ibaŋa abaŋ nobo sihin netirija miorok illahatai te itai. Ati inna to hosie ahituhuti no heturori isia. Ati ta hatai, ara hituhuti no hitilaha nyo ara inna no Hollum.
\v 29 Ojo ta hatai, era ifa nahatai to hiram no Kristo, hijo obe ara huruk to honye, ati errumu iso itai hitigiama te inyia.
\v 30 Arrumu itai iŋalafiti iyya innafa egonu itai tara ho naŋ iyya etiru itai hijo eba ta hanaŋ iyyania.
\c 2
\cl ŋati 2
\p
\v 1 Egigilo naŋ hijo lo owuon hitigolo to Kristo. Egigilo naŋ hijo owuon hitiyana tara mune nohonyie. Egigilo naŋ hijo owuon tubai no Loyiri, owon hamehini ojo mune.
\v 2 Itufutak mune nanaŋ iyya ara higigillo nahatai nobotie, iyya owuon mune nahatai nobotie, to tubai ta nahatai to oyiri iyya etuba itai te igem nobotie.
\v 3 Ibaŋa egiem innamuk hirro to hirrute ojo to hinyiaba. Ati inyiaha wati innahatai anyar eruk itai illak agalik wati innahatai.
\v 4 Ibaŋa osiaha iwahiti innahatai hame ati itigilu hidofe daŋ iwahiti inno illak.
\p
\v 5 Anyar owoun iye iko hegigilori iyya nafa owun to Kristo Yesu.
\q
\v 6 Ara ifa inyia a Hollum, ati obe ifa inyia etirijik wan nohonyie iko Hollum ne esio iyyohoi ofioroho inno eremik iyyohoi etiyenu.
\q
\v 7 Nyo esio inyia wan nohonyie te iyyohoi. Odumu inyia wan iya hegiamani. Oliew inyia iyya hiyyo. Oliew inyia iyya tuŋani.
\q
\v 8 Enyiak inyia wan nohonyie atta huruk ye, ye no kuruce.
\q1
\v 9 Nia, atta Hollum hihaf inyia ahide. Esio Hollum to honyie fure nalagalik fureta.
\q
\v 10 Egiem inyia nia hijo anyar origoŋo huŋuta to fure no Yesu, huŋuta inno ilia te ido ojo hunna owuon ta fau.
\q
\v 11 Egiem inyia nia hijo oyito ŋadiefa hijo ara Yesu Kristo Habu, to lohuo no Hollum Monye.
\p
\v 12 Halasira hanaŋ, iyya edule itai baŋi to holoŋi, obe ara to hosiere ha naŋ ati no lalitai nayya, itidule higiama hitilaha nahatai ta baŋi ojo hilafuho.
\v 13 Nyo Hollum lia odule higiama ta hatai daŋ wahan nohonyie no olibo.
\p
\v 14 Igiamai hirro daŋ obe hilahana ojo rija.
\v 15 Igiamai daŋ to hikoi nia anyar honyie ewuon obe nobo hipali etiborori adurre illo Hollum obe nobo hibwoti. Itimanyai tohikoi na anyar honyie ewulo iyya cialai ta fau, to hiji ho hilahaji na harwok.
\v 16 Ihuma hinief hiram no wuaran anyar etukwata naa tafar no Kristo. Anyar ayyen nayya hijo obe ifa nayya anyieta assai kuyya hidofe araa hafa igem nanaŋ assai.
\p
\v 17 Ara ida hido hijo ejuhori nayya ade iyya hisiori he igem to huruk ta nahatai, adule nayya mune he itai daŋ.
\v 18 To hikoi nia, emuno hidofe itai kanaŋ
\v 19 Ati eyik nayya ta Habu Yesu hijo efahu iso nayya Timoteo ta hatai kwak anyar agol nayya letiru naŋ hirro innahatai tara honyie.
\v 20 Abe naŋ awuon ho lobo lerri he inyia, lawak dede huluak itai.
\v 21 Osiaha isia daŋ iwahiti innohose, obe ara hirro inno Kristo.
\v 22 Ati le eyyen itai libe nohonyie, nyo iyya nia egiamari hiito to monye honyie, egiama ifa inyia ikanaŋ to hiram no Hollum.
\v 23 Awak iso nayya efahu inyia kwak legonyu nayya hirro ofwo nanyar ta hanaŋ.
\v 24 Eruk nayya ta Habu hijo attu iso naŋ to wan kwak.
\p
\v 25 Ati awak ida nayya efahak Epaprodito a halu ta hatai. Ara inyia ilasi ha naŋ ojo hidofe ara hegiamani lalanyar, ara hidofe lo oseŋer, hefahani lo hirro inna awak naŋ.
\v 26 Awak ifa inyia luŋa egonyu itai binno, nyo etiru ifa itai hijo oŋwai ifa inyia.
\v 27 Oŋwai ifa inyia binno man opwany ye. Ati omehini ifa Hollum to honyie, obe ara to honyie hame, ati ojo hidofe daŋ ta hanaŋ, hijo hotobiaŋa nayya awuon to run ho nobo.
\v 28 Efahak nayya inyia ta hatai, itimune lewolo itai inyia, baŋi nohonyei owuon ta hatai. Ifwotu
\v 29 Epaprodito ta Habu la hatai daŋ. Itibaŋ hiyyo illa ara ania. Awak ifa inyia ye te igem no Kristo.
\v 30 Esio ifa inyia wan hegiamari ta hanaŋ man etufutak igem nafa ebe itai eremik higem ta hanaŋ.
\c 3
\cl ŋati 3
\p
\v 1 To hucuŋi nohonyie, itumune ta Habu. Obe orru ta hanaŋ hegiorohini ta hatai hirro hunna. Eriria iso hirro hunna itai. Ihuma riŋa ŋohe.
\p
\v 2 Ihuma riŋa hegiamak illo orru. Ihuma riŋa ta hattohok. Nyo aŋoto iyyohoi. Nyo etihabwo iyyohoi to Loyiri no Hollum.
\v 3 Iyyohoi ille etidara to Kristo Yesu, iyyohoi ille ebe eruk to hirro inno iwahiti inno wan.
\v 4 Lara to hirro inno iwahiti inno wan, nayya ara hosiere. Le egigilo lobo tuŋani hijo awuon inyie ahosiere te iwahiti inno wan, agalik innanaŋ binno.
\p
\v 5 Agoto ifa naŋ to holoŋ hitahotohunihi. Ara naŋ le Isaraile, woyyo no Bejamin. Ajo hidofe ara le Ebrei. Ajo hidofe ejufuta hifahita, ajo hidofe eruk to hirro inno Farisei.
\v 6 Eyyale ifa naŋ ikelesia. Abe ifa naŋ epal innak hirro inno hifahi, awuon ifa nayya lalibo to hosiere ho hifahi.
\p
\v 7 Ati era ifa hirro innia ta hanaŋ assai, awolo ifa naŋ isia a hirro assai to hiram no Kristo.
\v 8 Dede ariŋa naŋ hirro daŋ assai to libe no wuana ho ofioroho inno Kristo Yesu hanaŋ. Ebo naŋ hirro daŋ tamai te inyia. Ebo naŋ isia hijo anyar
\v 9 arrumu naŋ Kristo atta hidofe naŋ arrumuni to honyie. Abe naŋ awuon ho nobo bisan nanaŋ to wan hamai tara hifahi. Ati awuon naŋ ho bisan nottu to huruk to Yesu. Bisan nottu tara Hollum to huruk.
\v 10 Iyyania, awak nayya hiyyen inyia ojo golon no hebuhu nohonyie, ojo tubai no hitigemita innohonyie. Awak naŋ heloito Kristo nayya to rijori no ye nohonyie,
\v 11 anyar awuon naŋ iko hebuhu to ye.
\p
\v 12 Holobe naŋ arrumu hirro innia daŋ dede tamai, kuyya hidofe hijo ottubai mahu hirro inia ta hanaŋ. Ati adule naŋ riŋa hosiere hijo anyar eniefu naŋ hiram nafa awak Kristo Yesu etuhutek ta hanaŋ.
\v 13 Halasira, abe naŋ ajo to wan hijo eniefu nayya. Ati owuon nobo sihin nobotie:
\v 14 Aau nayya ahosiere hijo anyar eba naŋ to hucuŋi atta hidofe arrumu hisiori nyia ne ellilloŋori Hollum to Kristo Yesu nayya.
\v 15 Te iyyohoi hullo hittaha, hegigile to hikoi nia. Ojo le egigilo itai nolufa te innak hirro, etuhutek iso Hollum ta hatai.
\v 16 Ati leba iyyohoi, itiloto to hikoi no olibo.
\p
\v 17 Iticelu nayya, halasira. Itiriŋai te ilia illo olot to hitimiyaha ne egonyu itai tara hohoi.
\v 18 Obore illo olot, liya illafa elimak naŋ ta hatai, ati iyyania, elimak naŋ itai to hidenya. Olot illak amiorok illo kuruce no Kristo.
\v 19 Ara hucuŋi nohosie run. Ara hosehen innohosie jok losohosie, ojo hitidara nohosie ara irri nohosie. Egigilo isia to hirro inno fau.
\v 20 Ati owuon haŋ nohoi inna dede te ido, mai netilari hidofe iyyohoi hetilahani, Habu Yesu Kristo.
\v 21 Eloit iso inyia wati innohoi inne elik hatara wati iyya wan nohonyie no opipiak. Wan no oyyieu inyia to golon ojo to dwaran nohonyie hatara hirro bi daŋ innohonyie.
\c 4
\cl ŋati 4
\p
\v 1 Halasira, illa amuno nayya egonyu to mune ojo to hiticofo na tamu hanaŋ, motiarak, ituwuetai nalanyar ta Habu to hikoi nia.
\p
\v 2 Adule naŋ hiro te Euodia ojo Sintike hotowuana iko higigilo nobotie.
\v 3 Dede efia hidofe naŋ itai motiarak hanaŋ: Itulwak ŋorwo inia. Etisarra isia daŋ ikanaŋ sayye inno Hollum ho Kelement ojo hegiamak illak, illo owuon fureta innohosie to buk no wuaran.
\p
\v 4 Itidule mune ta Habu holoŋitek daŋ. Enyiak ofe naŋ hijo, itimune.
\v 5 Isiara nyalami nohoi daŋ hotolew to hiyyo. Eliaha iso Habu.
\v 6 Ibaŋa elafuho innak hirro. Ati isiara hirro innahatai daŋ ahosiere to mojo ojo hisiara humo, isiara hirro inne ewak iye hotoliew to Hollum.
\v 7 Eriria iso himwara no Hollum na agalik ofioroho tatajia innahatai iko higigilita to Kristo Yesu.
\p
\v 8 Hucuŋi nohonyie halasira, nowuon innak hirro inno obis, inno olibo, lowuon innak hirro inno anyar, lowuon nobo hirro no obis, ojo lowon nobo sihin ne eremik mune, igigile to hirro inia.
\v 9 Hirro inne etiyenu itai ho hirro inne efwotu itai ho hirro inne etiru itai, eijo hidofe itai egonyu tara naŋ. Igiamai hirro hunna, owuon iso Hollum lo himwara he itai.
\p
\v 10 Amuno naŋ binno ta Habu hijo enyiak itai hitiŋejuk mune nahatai ta hanaŋ. Dede egigilo ifa itai ta nayya hafa beren, ati obe ifa mai ta hatai haluahari.
\v 11 Obe lojo hijo mahu awak nayya innamuk hirro lero naŋ ania. Etiyenu naŋ dihan no biaŋan no hirro.
\v 12 Ayyen naŋ hilociaŋ, ayyen hidofe naŋ lowuon hirro. To hirro inno obe, ayyen naŋ hiram no hiŋa ojo lowuon hirro,
\v 13 Ati aremik naŋ higem hirro dayya te inyia to hitigolo nohonyie nayya.
\v 14 Ati, egiem itai no olibo to huluak ta nahatai nayya to hirro inno ogolik ta hanaŋ.
\p
\v 15 Eyyen itai hiyyo illo Filipi, hijo man to hitieri no sayye ta nafa eno naŋ ade tara Masedonia, obe ifa nobo kelesia oluaha nayya to hisiara arobiya, aracie itai hamai.
\v 16 Ta nafa awuanari naŋ to Tessalonika, efahu ifa itai iluahiti hinyiahita arriai.
\v 17 Abe naŋ asiaha hisiorita innahatai. Ati, asiaha naŋ haŋer inno oremik afonihini ta hatai.
\p
\v 18 Amoju nayya hirro daŋ arria. Afoŋi naŋ. Aŋamoju naŋ tara Epafrodito hirro innahatai. Ara isia hisiorita inno oŋuo girgir inne etumuno Hollum.
\v 19 Etufut iso Hollum lalaŋ hirro inne ewak itai iyya to wahan to nohonyie te ido to Kristo Yesu.
\v 20 Iyyania isiara lohuo heno to Hollum ojo Monye hohoi man mak ojo mak. Amen.
\p
\v 21 Ifonyak heruhok daŋ to Kristo Yesu. Efonya halasira hullo owuon hanaŋ itai binno.
\v 22 Efonya heruhok hunna teni itai, agalik inia inno owuon ta haji ho Kesari.
\p
\v 23 Isiara hamehini na Habu Yesu Kristo hotowuana ho oyirihien innahatai.