lpx_reg/50-EPH.usfm

\id EPH
\ide UTF-8
\h Efisa
\toc1 Efisa
\toc2 Efisa
\toc3 eph
\mt Efisa
\c 1
\cl ŋati 1
\p
\v 1 Paulo, efahati lo Yesu Kristo to wahan no Hollum, te ilia illafa onyimu Hollum te Efisa ojo hidofe eruk to Yesu Kristo.
\v 2 Hotowuana hamehini ta hatai, iko himwara tara Monye lohoi Hollum ojo Habu hohoi Yesu Kristo.
\p
\v 3 Tojio hitihabuo hotowuana to Hollum Monye Habu lohoi Yesu Kristo ille esio wan to hoi ho Yesu Kristo imuniti bidaŋ inno oyiri inna olibo. Ara isia imuniti inno ido.
\v 4 Onyimu ifa Hollum iyyohoi to Kristo holobe inyia ayyeu fau inna ewuanari hullo olibo, wati iko hullo obe owuon ho hiyyata to hosiere honyie.
\v 5 To mune anyimok Hollum iyyohoi hijio hatara iyyohoi a durre illohonyie to Yesu Kristo. Egiem inyia ania nyo awak inyia higem iyya awak inyia.
\v 6 Eyyani inna lohwo to Hollum to hamehini nohonyie. Esio inyia inna assai toohoi to tuŋani lomuno inyia.
\p
\v 7 Ati enyiaŋu ifa inyia iyyohoi to hoto nohonyie, ojo hidofe ewuon iyyohoi iko hahek no hiyyeta to
\v 8 hamehini no honyie no lobolo. Nolodule wuana to honyek ojo to ofioroho honyie iko hiyyen nohonyie hirro daŋ.
\v 9 Etuhutek inyia te iyyohoi wahan nohonyie, inyia heŋofok wahan honyie inna onyimu inyia to wan honyie,
\v 10 Nafa ottubai ŋasi, ottubak iso inyia hirro bidaŋ to Kristo, hirro hunna te ido iko hunna ta fau to tuŋani lobotie, inyia Kristo.
\v 11 To Kristo, onyimu ifa inyia iyyohoi hatara iyyohoi harutak illohonyie. Onyimu ifa inyia iyyohoi man beren to higigilo nohonyie, to higiama nohonyie hirro daŋ iyya awak inyia.
\v 12 Tara iyyohoi illafa eyyik to Kristo ahosiere, anyar iyyohoi emanya ojo hetihabuori inyia to kwatan no honyie.
\v 13 Ojo hidofe leruk ifa isia inyia etiru ifa itai dede ho hirro hunna etiru itai to heyik nahatai to honyie esiyohini ta hatai no Loyiri no olibo lafa otiorohini ta hatai.
\v 14 Nyo ara inyia hitieri lo hirro hunna esio Hollum toohoi lafa lotubak inyia hiyyo bidaŋ illafa inyia ojo hidofe etihabuo isia inyia to kwatan no honyie.
\p
\v 15 Teyya to holoŋ nafa etirini naŋ hiruk hosie to Habu Yesu ho mune nahatai ho hiyyo Hollum bidaŋ,
\v 16 Abe nayya lapwak hisiara humo to Hollum ta hatai lamojo nayya ta hatai.
\v 17 Amojo nayya hijo anyar Hollum la Habu lohoi Yesu Kristo, Monye lo lohuo hesiara ta hatai Loyiri no hilofere hayyenari inyia,
\v 18 ojio hidofe eyari tajia innahatai harari hijo afanu iso imuniti to hiyyo illo ellilloŋo inyia. Amojo nayya hijo anyar eyyen itai ibariti inno hittaha tara hiyyo inno innohonyie.
\v 19 To mojo nanaŋ, amojo nayya hijo anyar eyyen itai bolo no duaran nohonyie te iyyohoi eruk, nafa etuhutek inyia. To hetubuhu nohonyie Kristo to ye atta emak inyia ta hani he inyiet nohonyie.
\v 20 Golon inna nafa egiemini to Kristo nafa etidietu inyia Kristo tara hayok atta etittolojik inyia ta hani he inyiet nohonyie ta masik inno ido.
\v 21 Etittolojik inyia Kristo to hide he ettaha bi daŋ iko golon ojo hilohittok, iko fure no efurehini. Eniefita iso Kristo, obe ara ta ŋasi hunna, ati hidofe ta ŋasi huna afanu.
\v 22 Attati Hollum emak hirro daŋ to hejek inno Kristo atta hisio inyia ikelesia hijo hatara inyia hoo lo hirro bi daŋ.
\v 23 Ara ikelesia wan nohonyie, atta inyia hitufut hirro bi daŋ.
\c 2
\cl ŋati 2
\p
\v 1 Iyya ta hatai, aye ifa itai te irruti iko to hiyyata.
\v 2 Elot ifa itai te imohiti inno fau inna. Ejufuta ifa itai habu lo odua lo oyyami, inyia jiok le egiama ta tajia inno hiyyo illo omiasa.
\v 3 Ati emanya ifa iyyohoi daŋ iyya nafa hosie ho beren. Egiama ifa iyyohoi to hipalita inno iwahiti, higigilita, iko to hijufuta inno wati innohoi. Ara ifa iyyohoi iyya durre illafa ho beren ejoria Hollum to hose.
\p
\v 4 Ati to bolo no mune no Hollum, ebusak inyia iyyohoi to mune no omunori inyia iyyohoi.
\v 5 Nafa eyori iyyohoi to hiyyata, eyyani ifa inyia iyyohoi to manya inna ŋejuk iko Kristo.
\v 6 Akafari Hollum iyyohoi daŋ ahide atta etuhunyik iyyohoi iko Yesu Kristo te idou.
\v 7 Ehum inyia hijo, ta ŋasi niyya afanu anyar etuhutek inyia bolo no hamehini no honyie te iyyohoi. Etuhutek inyia nyalami nohonyie toohoi to Yesu Kristo.
\p
\v 8 Ati to hamehini nohonyie, etilohini ifa itai to huruk. Ati obe ifa ottu tara hatai, ara hisiori no Hollum.
\v 9 Obe ara te igem hijo hotobiaŋa ida lobo tuŋani etidarari.
\v 10 Ara iyyohoi a hiyyo hegiamak to Hollum, eyyeuni ifa iyyohoi to Yesu Kristo hegiamari higiemita inno olibo. Otiorok ifa Hollum higiemita innia toohoi ifa beren, ati anyar elot iyyohoi te isia.
\p
\v 11 Ta hagilini nafa eracie itai a hiyyo illo Jentail. Ellilloŋo ifa hiyyo itai hijo, “Pagani,” nyo ara hiyyo hullo ebuha hoŋoto ho ŋoto nafa ho wati ta has inno hiyyo.
\v 12 Ati apiahari ifa itai ade tara Yesu Kristo. Ejo hidofe itai ara hatamonok to hiyyo illo Isarail, elufa ifa itai to himwara nafa otiorok Hollum. Ebe itai ewuon iko higigilita inno mwoi hidofe ara ahiyyo asai hullo obe owuon iko Hollum inni to fau.
\v 13 Ati iyyania ta hatai ho hiyyo innafa elama ade tara ho Hollum, etuhutu hoto no Yesu Kristo itai aŋati ho Hollum.
\p
\v 14 Ara inyia ahimwara te iyyohoi. Ottubak inyia Yudea iko paganohien hatara nobotie. Etattur inyia liwa nafa to hiji hohoi owuon iyya mariŋ no ohitir nafa lohor iyyohoi iko Yudea.
\v 15 Ati ehuhumak inyia hiyyo daŋ aŋejuk to honyie iko hilik na tajia.
\v 16 Ati egem inyia hijo anyar ottubak iyyohoi iko Hollum anobotie to kuruce, ati ottohe inyia liwai to kuruce nia.
\v 17 Ottu ifa Yesu elimak ta hatai illafa elama iko hullo eliaha aŋati honyie hilik na tajia.
\v 18 Ati attubahini iyyohoi daŋ to Yesu ojo hidofe ewuon iko hirro to Loyiri nobotie to Monye.
\p
\v 19 Ati ta hatai ho Jentail ebe itai enyiak hira alufajak iko hatamonok ati ara itai amonyie doŋe iko lia efiyak aŋati to Hollum ojo hidofe ara woyyo ta haji no Hollum.
\v 20 Aduhohini ifa itai to hitieri no hejufitak iko no hekikilak. Ati inni ara Yesu Kristo moru no gul to wan nohonyie.
\v 21 To honyie, owueta haji daŋ ahide iyya haji emojit na Habu.
\v 22 Ojo to honye, aduhohini itai daŋ nobotie hijo hatara amai emojit no Hollum to Loyiri.
\c 3
\cl ŋati 3
\p
\v 1 To hiram nia, nayya Paulo, nayya babus lo Yesu Kristo ta hatai Jentails.
\v 2 Agil nayya hijo etiru mahati itai hamehini no Hollum nafa esio inyia nayya te itai.
\v 3 Ojio hidofe inyia etilek ta hanaŋ hiram nafa eŋofohini iyya egiorok nayya ta hatai.
\v 4 To nia, eyyen iso itai hijo ayyen nayya hiram no Kristo nafa eŋofohini.
\v 5 Obe ifa Hollum etuhutek hiram inna to lonyirok ho hiyyo illafa ho beren, ati iyyania etuhutek Loyiri inyia to heyak ho sayye iko lefahat illohonyie hullo olibo illafa onyimuni te igem inna olibo.
\v 6 Hijo ara Jentail harutak hullo ejufuta ojo hidofe ara hejufutak monye illo wan iko hejufutak illo bwanya te itierit to Yesu Kristo tara sayye inno Hollum.
\v 7 Nyo nia ottu ehegiamani to hisio no Hollum to hamehini nohonyie hisio nayya egiamari to golon nohonyie.
\p
\v 8 Esio ifa Hollum hisiori inna ta nayya, ara ida hido nayya letiŋ to hiji ho hiyyo illo Hollum ille esio inyia ta hanaŋ hamehini inna hetiyanari ta paganohien etilohini no Kristo no obolo binno agalik ofioroho inno hiyyo.
\v 9 Ajo hidofe nayya etuhutek to hiyyo daŋ wahan no Hollum nafa eŋofok inyia man to hitieri no hirro, inyia lia lafa oyyeu hirro bi daŋ.
\v 10 Hijo anyar oyyen jiohin iko anjilohien te ido oyyen ofioroho inno Hollum inna agalik binno inno oliew te igem to nohonyie te ikelesia.
\v 11 Ara inna wahan nohonyie nafa onyimu inyia man beren hehumari to Yesu Kristo Habu lohoi.
\v 12 Ara to huruk to honyie ne ewuon iyyohoi to hiŋere herarari ejio hidofe hajiŋahini to Hollum.
\v 13 Ati efia nayya itai hijo hotobiaŋa itai elafuho to hitigemita innanaŋ hunna adihu nayya te itai, nyo ara isia lohuo nahatai.
\p
\v 14 To hiram nia arigoŋo nayya to Monye,
\v 15 lafa ho woyyojin inno owuon to hide ido iko to fureta inno owuon ta fau.
\v 16 Amojo nayya hijo anyar esio inyia, iyya te ibariti inno lohuo nohonyie, hijo anyar ewuon itai ho golon to Loyiri nohonyie, lo owuon ta hatai.
\v 17 Amojo hidofe nayya hijo anyar amanya Kristo ta tajia innahatai to huruk, ojio hidofe etigol itai to mune nohonyie.
\v 18 Anyar eyyen itai nobotie iko hiyyo daŋ Hollum muune no Kristo na agalik ofioroho inno hiyyo.
\v 19 Hijo anyar eyyen itai iko heruhok latan iko hisagaji ojio wude no mune nohonyie. To nia, efut iso itai iko wuana no Hollum.
\p
\v 20 Iyyania to honyie lia ille oremik higiem hirro daŋ arria inno efi iyyohoi ejio hidofe eremik higigil, iyya to golon nohonyie ne egiama te iyyohoi.
\v 21 Isiara lohuo hotowuana to honyie man to hetilohu nohonyie kelesia to Yesu Kristo. Amen.
\c 4
\cl ŋati 4
\p
\v 1 Efita nayya to fure na Habu, esiŋa naŋ itai hijo anyar elot itai no osiru to hillilloŋo nahatai.
\v 2 Itiloto to biaŋan no hitidara, ta nyalami, to dihan no hitigiemita, hijo anyar hidofe edi itai halasira hatai to mune.
\v 3 Itudule hitumwara hiyyo hijo anyar ottuba isia to Loyiri iko hilik na tajia.
\v 4 Owuon wan nobotie, ojio Oyiri nobotie, iyya ellilloŋo Hollum iyyohoi to heyik nohonyie nobotie;
\v 5 Owuon Habu lobotie ojio hiruk nobotie, ojio batisimo nobotie,
\v 6 ojio Hollum Monye lo hiyyo daŋ lobotie, ille agalik hirro bi daŋ, la amanya ta tajia innohoi daŋ.
\p
\v 7 Esio inyia daŋ toohoi lobotie lobotie hamehini hijo efwotu iyyohoi hisiorita inno Kristo.
\v 8 Iyya ojio ifa higierita hijo, ta nafa orretari inyia ahide ido, orihori ifa inyia hiyyo ille efita, atta hisio hisiorita to hiyyo.”
\p
\v 9 “Lia lafa orre wan ahide ido, esuru ifa hidofe inyia afau.
\v 10 Lafa esuru wan inyia lia orre wan ahide ido ille agalik daŋ hijo anyar etifutak inyia hirro bi daŋ.
\v 11 Inyia lia esio te illak hiyyo lefahat, ojio te illak hatara hekilak, ojio te illak hayitak ha sayye, ojio te illak ahetisarrak ha syaye inno olibo, ojio te illak hatara hetiyanak he ikelesia,
\v 12 ehuhumak isia hiyyo illo Hollum to higiema, inno oluak etibolori wan no Kristo.
\v 13 Man efanu iyyohoi to huruk nobotie, ojio hidofe ta ŋamijak no Lonyi Hollum, atta iyyohoi ebibolori man efut iyyohoi iyya Kristo.
\v 14 Hotobiaŋa ida iyyohoi enyiak hira iyya durre, illo oniŋie huta no hitiyenita inno hiyyo iyya oniŋie hari huta no oyyami, hotobiaŋa iyyohoi eniŋe hinyiaba arik ho hisusita no hiyyo illa awak hitipala.
\v 15 Ati isiara iyyohoi herara dede to mune, ojio anyar ebolo iso to hirro bidaŋ to Kristo la ara hoo lohoi.
\v 16 Ojo hidofe to honyie edia iyyohoi iyya wan ne edia ta ŋacio daŋ egiamari higiemita innohosie hamai hamai to duaran nohonyie etibolori wan nohonyie to mune.
\p
\v 17 Elimak naŋ itai iyyania ajio hidofe naŋ elalia to fure na Habu, hijo anyar ebe itai elot iyya paganohien hullo ejufuta higigilita innohosie hunna ara bi assai.
\v 18 Oriok higigilita innohosie ojio hidofe isia opiahari ade tara wuaran no Hollum to biaŋan nohosie hiyyen inyia nyo odua tajia innohosie.
\v 19 To duaran inno tajia innohosie odule isia hihuma hirro inno somon arik ho hirro hunna ebwot ta daya to nohosie.
\p
\v 20 Ati holobe itai etiyenu hirro inia tara Kristo.
\v 21 Holobe itai etiru hirro innohonyie, hidofe holobe itai etiyenu manya dede no Yesu Kristo,
\v 22 anyar ebo itai tuŋ imanyiti innahatai inafa ho beren innafa emaruak inno tajia innahatai inne edihori itai to hima te iwahiti inno enyiaba wati itai.
\v 23 Anyar etiŋejuk itai tajia arik ho higigilita innahatai,
\v 24 ejio itai atta eturutak tajia ŋejuho, inno oyyeu Hollum to bisan iko to libe.
\p
\v 25 Iyyania, ibusak hirro inno teler. “Irara bisan to hiyyo illo onyik daŋ katai,” to nyo era iyyohoi daŋ ŋacio inno wan nobotie.
\v 26 “Ijoriai, ati ibaŋa eyyau.” Anyar emwara itai holobe holoŋ asuori,
\v 27 heŋatak mai nobo tolobo hetisiahani.
\v 28 Isiara lohoho hotobiaŋa enyiak hahala, ati isiara inyia hegiamai nobo igem inna olibo ta has innohonyie anyar owuon inyia he innak hirro inno oluahari lociaŋak.
\v 29 Hotobiaŋa hirorita hunna orru afanu to hutuhe innahatai, ati eremik itai hiro irara hirro hunna olibo hijo anyar eyyani amehini to hiyyo ille etiru wati anyar omuno isia.
\v 30 Hotobiaŋa itai etijoria Loyiri lo Olibo no Hollum, to nyo oduanyahini inyia ta hatai ehuhumari tajia innahatai to holoŋ tonia etilohini.
\v 31 Ibusak ade swa no wati, jore, hiloŋojita, hihutuk, moro, ojio liwai tara hatai. Itinyalama to halasirak hatai,
\v 32 ijio hidofe itai emehini to hosie. Ibusak halasira hatai iyya nafa ebusahini Hollum itai to Kristo.
\c 5
\cl ŋati 5
\p
\v 1 Ijufutai Hollum iyya durre hullo omuno inyia.
\v 2 Ojio hidofe itilote to mune iyya omune ifa Kristo iyyohoi atta hisio wan nohonyie te iyyohoi iyya hisiori nafa oŋuo gir gir nara hihumi to Hollum.
\v 3 Ati to roto ojo hirro inno somon kuyya hidofe daya no hirro hotobiaŋa ojiŋak ta hatai, anyar edule itai ahabisak iyya hiyyo illo Hollum.
\v 4 Ojio hidofe to hiyaba no hirro inno somon ojo hikwaraŋa, iko hiciaforro, obe olibo ta hatai to hiro hirro inia, ati anyar esio isia humo to Hollum.
\v 5 Anyar eyyen itai dede hijo hotobiaŋa roto, hullo orru wati, kuyya hiyyo hullo eŋaru, ho hiyyo illo omojo to rijori, Obe iso owuon hame to lobie no Kristo iko no Hollum.
\v 6 Hotobiaŋa lobo tuŋani enyieb itai to hirrorita assai. To nyo hiyyata inno ottu iso hiloŋojita no Hollum to hiyyo hullo ebo wati.
\p
\v 7 Hotobiaŋa itai elot daŋ he isia.
\v 8 Ifa beren ewuon ifa itai te idumele ati iyyania ewuon itai to cialai na Habu. Itiloto iyya durre illo cialai-
\v 9 To nyo ara haŋer inno cialai bi daŋ ilibiti, ibisiti, ojo dede.
\v 10 Itiyenu hirro hunna etimuno Habu.
\v 11 Ibaŋa heriaha ho higiemita hunna he edumele hunna obe lowuon ha haŋer, ati itupulok irruti innohosie,
\v 12 Eyyani hirro inia irri inne ehuma isia te iriohi.
\v 13 Hirro daŋ hunna olieu daŋ ta cialai,
\v 14 to nyo edia cialai to hide hosie daŋ. Ojio ifa hijo, “Tocieŋu, itai ille ejioto, ojio hidofe ebuhu to ye, ojio Kristo ottu wule ta hatai.”
\p
\v 15 Ihuma riŋa hemanya itai jai, helot iyya hiyyo hullo ottumo wati, itilocitai iyya hiyyo illo ofioroho.
\v 16 Igiama igem nahatai le esiru itai, nyo orru holoŋitek hunna binno.
\v 17 Ibaŋa ara rifahak illo hiyyo itiyen nyo nia awak Habu lahatai tara hatai.
\p
\v 18 Ibaŋa oruma balu, oremik etidihori itai te irruti, ati itufutak wati innahatai ho Loyiri lo Olibo,
\v 19 irara to halasirak to fureta inno Hidolita ojio to fureta inne etihabuori itai Hollum idoloi ta tajia inne hatai anyar emak inyia hotomune,
\v 20 isiarai humo holoŋitek daŋ ta Habu lahatai Yesu Kristo to Hollum Monye;
\v 21 Itiniŋye halasirak hatai ta baŋi no Kristo.
\p
\v 22 Anyar oniŋe ŋoruo liawa illohosie, iyya ta Habu.
\v 23 Nyo ara oliawa ho no oŋoruo, iyya ara Kristo hoo le ikelesia, ara hidofe Hetilahani lo wan.
\v 24 Ati iyya oniŋe ikelesia Kristo, anyar hidofe ara ŋoruo to liawa to hirro bidaŋ.
\p
\v 25 Liawa, itimune ŋoruo innahatai iyya nia omunori Kristo ikelesia atta hisio wan nohonyie te ikelesia,
\v 26 hijio anyar emak inyia hotoduara to nyo etilib inyia wan nohonyie to hillilla no hifioŋ to hiro,
\v 27 hijio omoju iso inyia ikelesia to wan to nohonyie inna elahaman, obe iso nobo hafore kuyya hidofe hinyunyuri kuyya iyya hirro hunna ati olibo inyia tila obe nobo mai no lorru.
\v 28 Tekoi ho nia ociala ania, anyar omuno liawa ŋoruo innohosie iyya wati innohosie. Iyye tuŋani lo omuno oŋoruo hoi emuno iyye wan nohoi.
\v 29 Holobe lobo tuŋani hibo wan lohonyie, ati etama ojio omuno wan no honyie, iyya nia omunori Yesu Kristo hidofe ikelesia,
\v 30 to nyo era iyyohoi iluluŋ no wan no honyie.
\v 31 “To hiram nia ebusak iso tuŋani monye honyie arik ho hotonye honyie atta attubak wan nohonyie ho oŋoruo; tara atta hatara arik afanu wan nobotie.”
\p
\v 32 Ara sihin nia hiram nettok nafa eŋofohini, ati ero nayya hiram no Yesu Kristo he ikelesia nohonyie.
\v 33 Ati, itai daŋ gele gele anyar omuno lobo oŋoruo honyie iyya wan lo honyie, ojio oŋoruo anyar esio baŋi to oliawa.
\c 6
\cl ŋati 6
\p
\v 1 Durre, ifahai hesiok hatai to fure na Habu nyo obis ania.
\v 2 “Tabaŋa monyo hoi iko hotonye hoi.” Ara nia ifahi hitieri no owuon iko itierit no ojio,
\v 3 “Olibo iso to hoi nyo emanya iso iyye ta fau man ahosiere.”
\p
\v 4 Ati ta hatai monyie, hotobiaŋai itai etiloŋojita durre innahatai assai, ati itiboloru isia to hisiŋa iko ifahita inno Habu.
\p
\v 5 Piti, itiniŋe ettaha hullo ta fau ta baŋi na nyalami iko to higigilo nobotie ta taji, iyya to Kristo.
\v 6 Hotobiaŋa itai egiama to baŋi no honyehite inno hiyyo etumunori isia, ati igiamai iyya piti illo Kristo ille ehuma wahan no Hollum ta tajia innohosie, igiamai wahan no Hollum ta tajia innahatai.
\v 7 Egiamai to higigilo no olibo no tajia hatai iyya egiama itai ta Habu, nobe ara to hiyyo.
\v 8 Nyo eyyen itai hijio lehuma lobo tuŋani sihin no olibo, omoju iso inyia tara Hollum no olibo, ara ida hijo ara apit kuyya obe ara pit.
\p
\v 9 Itai ettaha, igiamai iyya ania to piti illahatai. Hetibaŋ isia ati itiyyen hijo owuon ettok lohosie daŋ iko Habu lahatai te ido hidofe obe inyia egigiala lobo tuŋani.
\p
\v 10 To hucuŋi, isiara tajia innahatai hotogolo ta Habu to duaran iko to golon nohonyie.
\v 11 Iciofok irremiti inno Hollum hijo anyar itai eremik hiŋere hinyobita inno hetisiahani.
\v 12 Obe rem nohoi ara no wuana ati iko anjilohien ojo jiohin iko idwuariti inno idumele inno fau, ojo hidofe johin inno orru inno owuon to hide.
\v 13 Tonia, iciofok irremiti inno Hollum daŋ hijo anyar ewueta itai to holoŋ no ottuni hetisiahani he irruti innohonyie. Ta halu, legiem iyye hirro innia daŋ atta iso iyye wueta no ogol.
\p
\v 14 Iyyania, itiwuetai eijo hidofe elurok hirro inno obis te ihuluhi innahatai na ara iyya ittodit, hidofe, iciofok libe na tajia iyya yiel to suhiana hatai.
\v 15 Iciofok hamuha to hejek hatai hunna ara iyya sayye inne elik ta tajia anyar elot itai to golon.
\v 16 Na agalik daŋ, odumu hiruk na ara iyya buhu etihori hauwua inno owulo inno hetisiani.
\v 17 Iciofok tamu no hetilohini, hidofe itudumu hiro no Hollum na ara ara fere no hiram no Hollum.
\v 18 Itudule mojo, ifia holoŋitek daŋ to golon no Oyiri. Ihuma riŋa to dihan ojio to mojo to heruhok daŋ ta mai.
\v 19 Ojio hidofe itimoje ta nayya hijo anyar ero naŋ rori ajio hidofe etiyana to hiŋere no sayye inno olibo innafa eŋofohini.
\v 20 To hiram nia, ara naŋ lefahati lefita to haririk, hijio anyar ero naŋ to golon iyya awak Hollum.
\p
\v 21 Ati anyar eyyen itai hiram nanaŋ ejio hidofe efahak naŋ Ticiko ta hatai hetuhutek hirro hunna daŋ. Ara inyia ta hanaŋ halasi lamuno naŋ binno ojio hidofe hegiamani lo olibo binno ta Habu.
\v 22 Leyyen itai hewuon iyyohoi jai, ogol iso tajia innohoi iko innahatai.
\p
\v 23 Isiara hilik tajia hotowuana te ilasira iko mune ojio hiruk no Hollum Monye iko Habu Yesu Kristo.
\v 24 Isiara hamehini hotowuana te illia daŋ illo omuno Habu lohoi Yesu Kristo to mune no obe oremik ye.