lpx_reg/48-2CO.usfm

\id 2CO
\ide UTF-8
\h 2 Korinto
\toc1 2 Korinto
\toc2 2 Korinto
\toc3 2co
\mt 2 Korinto
\c 1
\cl ŋati 1
\p
\v 1 Nayya Paulo efahata lo Yesu Kristo to wahan no Hollum, ojo hidofe Timoteo ilasi hohoi. Egiorok iyyohoi te ikelesia no Hollum nolo'wuon to doŋe no Korinto, iko to hiyyo daŋ ta fau ha Acaya.
\v 2 Isiara hamehini hotowuana ta hatai ojo hilik na tajia no ottu tara Hollum Monye hohoi ojo tara Habu Yesu Kristo.
\p
\v 3 Isiara hitihabwo hotowuana to Hollum inyia Monye Habu lohoi Yesu Kristo, nyo ara inyia a Monye la hamehini ojo Hollum hetilahani daŋ.
\v 4 Nyo etiliha Hollum iyyohoi to hitigemita te innohooi daŋ, hijo anyar eremik iyyohoi etilihu ilia illo owuon iko hitigemita to hitiliha nafa etilihari Hollum iyyohoi.
\v 5 Iyya efut hitigemita inno Kristo tohoi, emiatahini iso hidofe hitiliha no Kristo tohoi.
\v 6 Kuyya lawuon naŋ ho hitigemita ara isia to hitiliha nahatai iko etilohini nahatai. Kuyya awuon naŋ iko hitiliha ara inyia hitiliha nahatai, nyo edihu itai hitigemita iyya adihu naŋ.
\v 7 Hidofe eyyik naŋ dede te'tai nyo ayyen naŋ hijo le'rrumu itai hitigiama ho naŋ, errumu iso hidofe itai hitiliha ho naŋ.
\p
\v 8 Halasira hanaŋ, awak naŋ hijo anyar leyyen itai hijo arrumu naŋ hitigiama binno ta fau he Asia, nyo ejiriŋa ifa naŋ binno agalik, egigilo naŋ hijo aye iso naŋ inni.
\v 9 Dede aŋotohini ifa ye tohoi, ati to Hollum lo'remik etubuhu hayok.
\v 10 Etilohu ifa inyia naŋ to ye no orru, hidofe etilohu iso inyia naŋ. Eyyik naŋ to honyie hijo odule iso inyia hitilaha naŋ gagaga.
\v 11 Egiem iso inyia inna iyya eluaha itai iyyohoi to mojo ta nahatai. Hidofe esio iso hiyyo arria humo to Hollum to libe to no hiyyo illo omojo te iyyohoi.
\p
\v 12 Ara inna hitidara nanaŋ, hijo ayyen naŋ ta taji nanaŋ hijo alot ifa naŋ to libe iko to biaŋan no hinyiaba to hosiere ho hiyyo illa fau ojo hidofe to hosiere hatai agalik. Obe ara to ofioro inno fau ati ta hamehini no Hollum.
\v 13 Ebe iyyohoi egiorok ta hatai nobo sihin inna obe itai eremik ehienu ojo hidofe nobe itai eremik hiyyen.
\v 14 Iyya eyyen itai hirro hunna kai, eyyik naŋ hijo eyyen iso itai daŋ ta halu. Niyya iremik ta nayya ajo hidofe nayya te'tai to holoŋ na Habu lohoi Yesu.
\p
\v 15 Nyo eyyik ifa naŋ to hiram nia, awak ifa naŋ ŋawoŋ ta hatai to hosiere, hijo anyar enyiak itai mune.
\v 16 Lagalari naŋ itai, ŋeno naŋ a Masedonia, ojo lacohini naŋ tara, attu iso naŋ hiwolo itai, ati enyiamak iso itai nayya le'no nayya a Yudea.
\v 17 Nafa egigilori naŋ ania, ebo ifa naŋ bi? Hegigilo ifa naŋ hirro inne iyya tuŋani la fau, hijo hajo naŋ “E e,” ojo “‘Obe obe,” ta far nobotie?
\v 18 Ati iyya obe Hollum eloit hirro innohonyie, obe hidofe rori innanaŋ eloito ta hatai hijo, ta halu, obe.
\v 19 Etiyena iyyohoi ta hatai Lonyi Hollum Yesu Kristo, Nayya iko Silvano ojo Timoteo. Obe Yesu eloit hiro nohonyie atta hijo ‘dede hidofe ta halu, obe iso ati ehuma inyia iyya ero inyia.
\v 20 To Kristo etisiru itieriti inno Hollum atta iyyohoi hitihabwo Hollum.
\v 21 Ati etigol Hollum iyyohoi he itai hattubari iko Kristo, nyo onyimu inyia iyyohoi.
\v 22 Esihok inyia iyyohoi atta hidofe hisio iyyohoi Oyiri ta tajia innohoi hatara a hitimijani hijo era iyyohoi a hiyyo illohonyie.
\p
\v 23 Ati ellilloŋu naŋ Hollum hatara asut na taji nanaŋ hijo ara ta hamehini nanaŋ da hatai inyeja ne abiaŋari hawuyere da hatai a Korinto.
\v 24 Obe ara hijo awak naŋ hira eittok to huruk nahatai nyo ogol huruk iyyania, ati egiama naŋ he itai hijo anyar a luak naŋ huruk nahatai.
\c 2
\cl ŋati 2
\p
\v 1 Ati eŋot naŋ ta taji nanaŋ hijo abe iso naŋ enyiak awoŋ hiwolo hirro inno odiaha ta hatai.
\v 2 Nyo kuyya esio naŋ ta hatai hijiriŋa, ŋai iso esio ta hatai mune? Obe ara ita ille ejiriŋa, to hira ta nahatai illalaŋ.
\v 3 Iyya egiorok naŋ hijo lattu nayya ta hatai, hotobiaŋa naŋ enyiak hitijiriŋ ilia illa awak mune. Nyo eyyik naŋ te'tai daŋ hijo ara iso mune nanaŋ iyya nahatai nobotie.
\v 4 Nyo egiorok ifa naŋ ta hatai to hijiriŋa no obolo iko diaha na taji hidofe to hidenya. Abe naŋ awak hisio diahai na tajia, ati anyar itai eyyen hisagaji no mune no obolo na amunori naŋ itai
\v 5 Ati kuyya eyyani lobo tuŋani hijiriŋa, obe ara ta hanaŋ hamai, abe awak hisio no ogol binno ta hatai.
\v 6 To tuŋani lia, oremik baha na abahari iluluŋ no hiyyo inyia.
\v 7 Tonia anyar itai eloit to honyie hebusak inyia hidofe itiliha taji nohonyie ŋasso inyia ohu hihuma nobo sihin norru to hijiriŋa nohonyie no obolo.
\p
\v 8 Iyyania, alia naŋ ta hatai hijo anyar etuhutek itai mune nahatai to honyie.
\v 9 Inyia ne egiorohini naŋ hijo anyar aciem naŋ itai atta naŋ hiyyen kuyya eruk mahu itai hirro daŋ.
\v 10 Lebusak itai lobo tuŋani tara hiyyata te innohonyie, ebusak hidofe naŋ tuŋani le iyya itai. Ŋari nyo nia ebusak naŋ-- lebusak naŋ nobo sihin-- ebusak naŋ te'tai to hosiere no Kristo.
\v 11 Ebusak naŋ hijo hotobiaŋa Sitan enyiob iyyohoi. Nyo ebe iyyohoi etumo higigilita innohonyie.
\p
\v 12 Tanafa attuni naŋ a Trosa etiyenari hiram no Kristo aŋa Habu ikat to hosiere nanaŋ.
\v 13 Ati abe ifa naŋ ayiri dia nyo abe ifa naŋ arrumu ilasi hanaŋ Tito, tonia abusak naŋ isia atta naŋ aciahari a Masedonia.
\v 14 Ati humo to Hollum, lia lolwuak iyyohoi hagalihini rori daŋ to Kristo, hidofe etisarrik inyia iŋwojit no libo ta massik daŋ.
\v 15 Nyo era iyyohoi ria no oŋwo girgir to Kristo to hiji he ilia ille etilohini iko te illia illo oye obe eruk.
\v 16 Te illia illo oye, ara iŋwojit tara ye man to ye. Ojo te illia ille etilohini, ara ŋwajan tara wuaran man to wuaran. Ŋai lia osiru to hirro inia?
\v 17 Obe iyyohoi era iyya hiyyo arria ille etinyiaŋa hiram no Hollum te idumuti. Ati to libe no higigilita, ero iyyohoi to Kristo iyya efanu iyyohoi tara Hollum to hosiere ho Hollum.
\c 3
\cl ŋati 3
\p
\v 1 Edas iyyohoi hitiara hitahuo wati innohoi? Obe iyyohoi awak nobo waraga tara iyye kuya tara hoi, iyya illamuk hiyyo, obe mahati?
\v 2 Iyye to wan nohoi ara iyye waraga, negioro ta tajia hohoi, no ediara ojo hiyyo oyyen.
\v 3 Ejo hidofe iyye etihutek hijo ara iyye waraga tara Kristo, nara iyyohoi eyari, no egioro obe ara to galam ati to Oyiri no Hollum la amanya, obe hidofe egioro to moruo, ati egioro ta tajia inno hiyyo.
\p
\v 4 Ejio inna ara hijo ta hamijak nohoi inna eita iyyohoi to Hollum tara Kristo.
\v 5 Obe ara hijo era iyyohoi hullo egalik herari to wati innohoi innamuk hirro hunna afanu te iyyohoi, ati haremik nohoi ara tara Hollum,
\v 6 lia ile ohutu iyyohoi hatara hegiamak inno emor ŋeju- obe ara to waraga ati ara to Oyiri; nyo to ottohe waraga, ati to Oyiri esio manya.
\p
\v 7 Iyyania lowuana igiem no ye nafa eŋudohini to waraga no moruo ottu iyya to kwatan nafa obe hiyyo illo Isarail oremik riŋai to homom, no Muse' tok nyo okwat ifa homom nohonyie, kwatan nafa olilita,
\v 8 oso iyya obe ara igiem no Oyiri nara binno to kwatan?
\v 9 Nyo kuyya lowuon igiem no ye ho kwatan, hara iso bajai igiem no bisan nolowuon to kwatan!
\v 10 Nyo dede, nia nafa owuon iko kwatan enyei holowuon iko kwatan tokoi tenia, nyo to kwatan nia agalik inna.
\v 11 Nyo kuyya nia nafa owu ade owuon iko kwatan, hara bajai nia odulei kwatan dia!
\p
\v 12 Iyya ewuon iyyohoi iko hamijak nia, ewuon ati iyyohoi iko ŋere,
\v 13 obe ara iyya Musa, lia letihok boŋo to homom nohonyie, anyar lobe hiyyo illo Isarail oriŋa to honyie tok to hucuŋi no kwatan nafa owu ade.
\v 14 Ati esiono ifa hosi innohosie. Ofe man to holoŋ ne inna arasa hitihi no hihieni nafa himori marwani; obe ifa aŋa, nyo ara bi to Kristo hegiamak ade iko.
\v 15 Ati ofe man ena, kuyya lehien Musa, etiho ifa tajia innohosie to boŋo.
\v 16 Ati oyite tuŋani ta Habu, ahafini boŋo hitihi ade.
\v 17 Nyo ara Habu Oyiri, ojo ta mai no owuanari Oyiri na Habu, owuon iso bolioŋ dia.
\v 18 Iyyania iyyohoi bi daŋ, ille etiho homomite, itiwolo lohuo na Habu. Eloito iyyohoi to rijori no lohuo nafa ho beren tara nobo lohuo man to nobo, iyya ara tara Habu, la ara Loyiri.
\c 4
\cl ŋati 4
\p
\v 1 Iyyania, ewuon iyyohoi iko igem inna, iyya nafa efwotuni iyyohoi amehini no Hollum, ebe iyyohoi ehalan ejio hidofe elafuho.
\v 2 Ati ebusak iyyohoi hirro hunna heiri ojio hunaŋ eŋofohini. Ebe iyyohoi enyiaba hiyyo, ebe hidofe iyyohoi eloit hiro no Hollum ateler. Ati etiyana iyyohoi to bisan to hosiere ho Hollum anyar etuhutek iyyohoi libe nohoi ta tajia ho hiyyo bidaŋ to hosiere ho Hollum.
\v 3 Ati le eŋofohini sayye innohoi, eŋofohini to hullo oye wati.
\v 4 To nyo etiŋodo jiok la fau inna higigilita inno hiyyo man obe isia eruk hijio anyar obe isia egonyu cialai inna ha sayye hunna olibo wati hunna ho lohuo no Kristo, ille ocialari wan ho Hollum.
\v 5 Ebe iyyohoi etiyana hirro innohoi ati etiyana iyyohoi Yesu Kristo ille ara Habu, ejio iyyohoi era apiti ta hatai to hiram no Yesu.
\v 6 Hollum ifa lia ojio, “Isiara cialai hoto cialai te idumele,” eticiala inyia tajia innohoi anyar esiarari cialai inna eyyanari iyyohoi kwatan no Hollum to hosiere ho Yesu Kristo.
\p
\v 7 Ati ewyon iyyohoi he ibariti inne efut to mocio no oyyeuni to modie, anyar oliew hijo ara golon no Hollum obe ara te iyyohoi. Ewuon iyyohoi ho hitigiemita ta ŋacio bi daŋ, ati obe isia etihita iyyohoi.
\v 8 Ewuon hidofe iyyohoi iko hikuyya obolo heyyik te iyyohoi;
\v 9 Etigiama isia iyyohoi ati obe Hollum obusak iyyohoi; Ollum isia iyyohoi ati ebe iyyohoi etiara.
\v 10 Elocie iyyohoi ye no Yesu holoŋitek daŋ to wati innohoi, hijo anyar olieu hidofe wuaran no Yesu to wati innohoi.
\v 11 Iyyohoi hullo ewuar, ehafita iyyohoi ta wati innohoi ye no Yesu Kristo, anyar hidofe oliew manya no Yesu to wati innohoi.
\v 12 Ati egiama ye to wati innohoi ojio wuaran egiama ta wati innahatai.
\p
\v 13 Ati ewuon iyyohoi ho Oyiri no hiruk iyya nafa egiorohini hijio: “Eruk nayya, atta nayya hiro.” Eruk hidofe iyyohoi, ati ero iyyohoi.
\v 14 Eyyen iyyohoi hijio lia lafa etubuhu Habu Yesu, etubuhu iso hidofe iyyohoi daŋ arik ho Yesu, atta iso inyia eyari iyyohoi daŋ hatai ahosiere honyi.
\v 15 Ara hirro bi daŋ te itai, hijo iyya esarrik hamehini to hiyyo arria, anyar hidofe obolo hitahuo nohosie to Hollum.
\p
\v 16 Ati hotobiaŋa iyyohoi etidiek tajia. Emaruak ida hido iyyohoi ta bali, ati etiŋejuho inyia tajia innohoi holoŋitek daŋ.
\v 17 Nyo oduhoco hitigiemita innohoi to holoŋ tena, ati egiama isia tohoi kwatan inna obolo agalik, ojio hidofe obe oremik hisid.
\v 18 Nyo ebe iyyohoi egigilo to hirro hunna erriŋa iyyohoi ati egigilo iyyohoi to hirro hunna obe tuŋani egonyu. To nyo, hirro hunna egonyu tuŋani ofu esohini iso, ati hunna obe tuŋani egonyu ofu ŋadule iso man tulaŋ.
\c 5
\cl ŋati 5
\p
\v 1 Eyyen iyyohoi hijo lo owuana manya inna ta fau netihara, ewuon iso iyyohoi iko haji nobo tara Hollum, haji inna obe ara tuŋani oyyeu ta has innohoyie, ati ara haji inna amanya tulaŋ te ido.
\v 2 Nyo to titi inna eyamitari iyyohoi, esiahari heciofok ne imanyiti inno ido
\v 3 nyo le eciofok iyyohoi isia ebe iso iyyohoi eremik wuana aŋatturre.
\p
\v 4 Nyo iyya ewuon iyyohoi to titi, ara iyyohoi hayamitak, ojo hidofe ho hitigiama- no obe ojo anyar owuon iyyohoi obe etihok boŋojin, ati ewak iyyohoi boŋojin, nyo te innamuk hunna odwa anyar eyari inno wuaran.
\v 5 Lia ille eyyani iyyohoi to hiryo hunna iyya Hollum, lesio iyyohoi Oyiri no lia ille owu awoŋ.
\p
\v 6 Tonia odule iso wuana iko heyiyik; todule hiyyen hijo lewuon iyyohoi ta haŋ to wati innohoi, toyyen hijo elama iyyohoi ade tara Habu.
\v 7 Nyo elot iyyohoi to huruk, obe ara to riŋai.
\v 8 Tonia ewuon iyyohoi iko heyiyik; anyar ida leruk iyyohoi wuana alamarai to wati innohoi ojo to hotwai haŋ iko Habu.
\v 9 Tonia emak iyyohoi nia ahikoi nohoi, ewuon ida hido iyyohoi ta haŋ kuyya ade, anyar emuno inyia.
\v 10 Nyo efanu iso iyyohoi daŋ ahosiere ho Kristo holobe ŋoto, anyar mahati errumek iyyohoi hirro innamuk inia hunna eremik wan higem, kuyya ta nyaru kuya hidofe to run.
\p
\v 11 Tonia, anyar eyyen ejio hidofe ebaŋ Habu, hejufak hiyyo. Inia aracie iyyohoi ahaliborok egonyu Hollum, aje hidofe nya etilaw iyya olibo te imanyiti innahatai.
\v 12 Obe iso iyyohoi inyiak hisio wati innohoi ta hatai hidas, ati esiara iyyohoi ta hatai hitimanyita anyar emuno kuya mahati eyita itai hitiraŋi no ilia hullo etidara to wati ati obe ara to hirro inno tajia innohosie.
\v 13 Nyo lobe iyyohoi ewuon ho higigilo to wati innohoi, ara nia bi to Hollum; ojo le ewuon iyyohoi iko bisan no ho higigilo, ara nia bi ta hatai.
\v 14 Nyo to mune no Kristo ne efuhak iyyohoi, tia eyyen iyyohoi nia hijo: ara inyia loye te iyyohoi bidaŋ, ojio hidofe tonia eye daŋ.
\v 15 Ojio Kristo oye daŋ, nyo iyya to ilia hullo amanya anyar obe amanya to watie innohosie ati te inyia lia lafa oye atta ebuhu.
\p
\v 16 Nyo to ofioroho, man iyyania iko ahosiere ebe iyyohoi eŋot lobo te imanyiti inno owuanari tuŋani, owuon ida hido hijo erriŋa iyyohoi to Kristo iyya nia. Ati iyyania ebe iyyohoi eŋot lobo to nobo hikoi inyiak.
\v 17 Tonia, lo owuon lobo to Kristo, ayyeuni inyia aŋejuk. Ellaŋ hirro innafa ho beren. Towolo, enyiak isia hira ŋejuho.
\v 18 Ara hirro bidaŋ tara Hollum. Lafa etimorik iyyohoi to honyie to Kristo, atta hisio iyyohoi igem ne imor;
\v 19 nafa owuon to Kristo Hollum anyar etimwarahini fau tp honyie, obe ehianak hiyyata innohosie to hosie ojo hidofe esio tohoi igem no sayye ne imor.
\v 20 Tonia ohutu ifa inyia iyyohoi anyar iyyohoi ewueta to fure no Kristo, inyia nia esiarari Hollum te iyyohoi hiram nohonyie te iyyohoi, efia iyyohoi to wati innohoi, nyo to hiram no Kristo: “Imwarai iko Hollum!”
\v 21 Oyyeu inyia Kristo anyar ara ahisiori no hiyyata innohoi- lia ille obe oremik eyyau, nyo to Kristo anyar mahati era iyyohoi habisak to Hollum.
\c 6
\cl ŋati 6
\p
\v 1 Ati, egiama iyyohoi nobotie he inyia, elia iyyohoi ta hatai hijo hotobiaŋa itai emoju hamehini no Hollum assai.
\v 2 Ojo inyia, “To holoŋ no olibo etira naŋ tohoi, ojo to holoŋ no hetilohu aluak ifa naŋ iyye.”
\p
\v 3 Toriŋai, iyyania ara holoŋ no hetilohini; toriŋai, iyyania ara far no hetilohu. Obe iyyohoi ehumak moru no olulur to hosiere holobo tuŋani, ati obe iyyohoi ewak igiem nohoi hotohuyai.
\v 4 Ati, etuhutek iyyohoi wati innohoi to higemita, hijo iyyohoi piti illo Hollum-to hadihu, to hitigiama, biaŋan no mune, hitigemita,
\v 5 baha, hifita, hitigema, te igem nologol, biaŋan no jio ta harie, hiŋa,
\v 6 to libe, ofioroho, dihan, nyalami, to Loyiri lo Olibo, to mune nolobis;
\v 7 Era iyyohoi hegiamak illo hiro nolobis, to golon no Hollum. Ewuon iyyohoi iko iriemiti inno bisan ta hani he inyiet ojo ta hani he ihorroŋ.
\v 8 Egiama iyyohoi to baŋi iko to biaŋan no baŋi, to heyialai ojo to hitahuo. Nyo orrosok hiyyo iyyohoi hinyiaba ojo hidonye iyyohoi ero dede.
\v 9 Egiama iyyohoi iyya obe ŋai oyyyen iyyohoi ojo hidonyie oyyen; iyya oye ojo orriŋa! Hidonyie amanya; iyya etiniŋ to higiemita innohoi ati obe ara hepitai to ye.
\v 10 Egiama iyyohoi iyya obe mune ati edule iyyohoi mune; iyya lociaŋak iko ehuhumak ariai hatabarai; iyya obe iyyohoi ewuon he illak hirro ojo hidonyie egiemu hirro ariai.
\p
\v 11 Elimak iyyohoi hirroinno obis bidaŋ ta hatai, Korinto, ojo hidofe tajia innohoi aŋa.
\v 12 Obe mune nanaŋ odicio ta hatai, ati odicio mune nahatai ta hanaŋ.
\v 13 Iyyania, itifonik mune nahatai ta hanaŋ. Ero nayya ta hatai iyya durre illallaŋ.
\p
\v 14 Ibaŋa ottuba nobotie iko illo obe eruk. Jai oremik libe riaha iko hibwoti? Hara ŋari tubai owuon to cialai iko idumele?
\v 15 Jai hidofe owuon tubai no Kristo iko Beliar? Hidofe hara nyo inia obwanya heruhok iko illo obe eruk?
\v 16 Nyo huruk no haji no Hollum iko rijorihien? Ara iyyohoi haji no Hollum hullo owuar, iyya ojo Hollum, “Amanya naŋ to hiji hosie ajo hidofe alot iko isia; ara iso naŋ Hollum lo hosie ojo iso isia ara hiyyo illallaŋ.”
\p
\v 17 Iyyania, “Ifanu ade to hiji hosie, atta itai wuana hame,” ojo Habu, hotobiaŋa itai ettir hirro inno obe olibo, ajo naŋ atta efwotu itai.
\v 18 Ojo era iso itai durre illallaŋ iko durre innanaŋ,” ojo Hollum Lologol.
\c 7
\cl ŋati 7
\p
\v 1 Iyya ara itieriti hunaŋ innohoi halasira hanaŋ hulloŋ amuno nayya, hetilibo wati arik ho oyirihin innohoi to hirro daŋ hunna eturruo wati iyyohoi, ati hetufutak libe nohoi ta baŋi to no Hollum.
\p
\v 2 Itimoju iyyohoi ebe iyyohoi, holobe iyyohoi eturru lobo tuŋani, ebe iyyohoi etisilai lobo tuŋani, ebe iyyohoi enyieb lobo tuŋani.
\v 3 Abe nayya ero ania hijo aŋotori itai, to nyo ajo ifa nayya hijo ewuon itai ta taji hanaŋ, kuya to ye kuya to wuaran era nobotie daŋ hanaŋ.
\v 4 Obolo ŋere nanaŋ tetai ojio hidofe hitahuo nanaŋ obolo tetai. Efut nayya ho hilik na taji, ojio mune nanaŋ atta asiari to hiji ho hitigiemita innohoi daŋ.
\p
\v 5 Nafa afanu iyyohoi a Masedonia obe lobo yiri tara hohoi Ati obore ifa hitigiemita te iyyohoi ta bali ojio baŋi wuon to oko hotwe.
\v 6 Ati Hollum le etilik wan hiyyo ille ejiriŋa wati, etilik ifa inyia tajia innohoi to ŋawoŋ no Tito.
\v 7 Obe ifa ara ta hawoŋ no honyie hame ati ara to hitiliha inna omoju inyia tara hatai, amuno ifa naŋ binno nafa elimak inyia nayya hijio ewak itai egonyu nayya binno, ejio hidofe itai ejiriŋa man atta nayya muune binno.
\p
\v 8 To nyo kuya eyyani waraga nanaŋ ta hatai diahai na tajia, abe naŋ eloit taji nanaŋ ejiriŋa ida hido nayya, nyo egonyu nayya obe diahai nahatai to waraga inna odule iso man fur.
\v 9 Ati iyyania amuno nayya, obe ara to diahai nahatai, ati to diahai nia hatai, eloit itai tajia innahatai, nyo ottu diahai nia tara Hollum ejio iyyohoi iso ebe ehuma ta hatai no lorru.
\v 10 To diahai nia aŋatak Hollum ta hatai, eyyani inyia hiloito na taji inna ara hisidi nohonyie etilohini. Obe nobo hijiriŋa tara; diahai na fau innaŋ eyyani ye.
\v 11 Itiwolo iko hisidi no hijiriŋa inna aŋatak Hollum ta hatai hijo eyyani mahu nyo. Ero itai ilieti innahatai to hifiriwa to Hollum. Ati to heyyau nia eloŋojita itai ejio hidofe itai ebaŋ. Inyia nia awak nayya hataluak itai, ojio to hifiriwa no taji iŋot itai le eyyau wan. Inyia nia etuhutek itai hijo elibo itai to hiram te inna.
\v 12 Ati egiorok nayya ta hatai obe ara to lia le eyyau wan kuyya to lia ille odiaha to heyyau to nia, ati egiorok nayya hijio anyar etihutek Hollum ta hatai hifiriwa nahatai to hosiere no Hollum.
\v 13 To hiram to nia, anyar elik tajia innahatai. Hotobiaŋa ara to hitilik nohoi hame inna emuno iyyohoi, ati emuno iyyohoi binno agalik to mune no Tito to nyo elik oyiri nohonyie to hiram ta nahatai bi daŋ.
\v 14 To nyo kuyya etidara nayya to honyie tetai abe nayya awuon he irri. Iyya ero ifa iyyohoi ta hatai hirro dede daŋ, ara hidofe hunna etahuo iyyohoi to Tito.
\v 15 Ojio hidofe taji nohonyie omuno agalik tetai, nyo ogilu inyia ŋaniŋe nahatai ojio hidofe baŋi arik ho hikikiro nafa imojuni itai inyia.
\v 16 Amuno nayya etole taji nanaŋ dee to hirro innahatai daŋ.
\c 8
\cl ŋati 8
\p
\v 1 Ilasira hanaŋ awak naŋ elimak ta hatai hijo egiama hamehini no Hollum jai to hiyyo liyya to ikelesia no Masedonia.
\v 2 Ara hido nolo owuon hitigiama to hosie nolo obolo osiari mune nohosie, ara ida hido elociaŋ isia binno, esiara isia hisiorita inno hosie iyya habarak.
\v 3 Nyo ayyen naŋ dede hijo esiara isia hisiorita inno hosie iyya oremik isia. Dede, to wahan to nohosie esio isia arobiyaha inno oluŋa agalik.
\v 4 Elalia isia tohooi binno heyari hisiorita inno haluahari hiyyo illo Hollum heruhok.
\v 5 Obe ifa ottu hijio te iwahiti innohoi, ati ahosiere esio isia wati innohosie ta Habu. Esio isia wati innohosie hehumari wahan no Hollum.
\v 6 To nia efahak iyyohoi Tito heno ta hatai hamojini arobiyaha inno hisiorita nyo etiara inyia higiama beren to hiji hatai.
\v 7 Ati iyya egalik itai to hirro daŋ; to hiruk, iko hiro, to hiyyen, to hifiriwa, to mune nahatai te iyyohoi itisiahai hidofe hagalihini anyar edule itai to himorot.
\p
\v 8 Abe naŋ ero hifahita ta hatai, ati ero naŋ haciamari mune nahatai hijo kuyya ara inyia dede, iyya mune no hiyyo ilamuk.
\v 9 Nyo eyyen itai hamehini no Habu lohoi Yesu Kristo hijo abara ida hido inyia, ottu inyia hira olociaŋ te itai hijo anyar efanu itai hira habarak to hilociaŋ to nohonyie.
\v 10 Iyyania elimak naŋ higigilo nanaŋ ta hatai hiram inna hijio anyar oluwak itai. To hiŋa nafa alaŋ etira ifa itai hisiara ahosiere daŋ obe ara nia hame, ati emuno itai haluwahari hidofe hiyyo.
\v 11 Ati iyyania atuhuni hiram nia. Ewak ifa itai hihuhuma ati esiaha inyia.
\v 12 Nyo kuya awak taji no tuŋani hasiahari hisiorita, omoju Hollum hisiara nohonyie iyya owuon hirro to honyie ati obe Hollum efia hisiara to olociaŋ.
\v 13 Abe naŋ ajo inna hijo anyar ettole ilamuk hiyyo to ye ejo itai ewuon iko hitigiemita ajo naŋ hijo,
\v 14 iyyania anyar oluaha iluluŋ nahati hilociaŋ nohosie, ojo ta halu oluak iso ibariti innohosie hilociaŋ nahati ojo ecialari iso itai iko isia.
\v 15 Iyya egioro hijo, “Lia lafa ohurru illo oduhucio obe iso owodo.”
\p
\v 16 Ati humo to Hollum le ehumak hifiriwa ta taji ho Tito iyya nia ehumahini ta tajia hatai.
\v 17 Nyo eruk inyia hirrorita innohoi ojo inyia enno ta hatai to wahan no lobolo.
\v 18 Ejo iyyohoi efahak ilasi hohoi iko inyia lia etahuwo daŋ to heyyani no honyie sayye inno olibo.
\v 19 Obe ara nia hame ati onyimu ikelesiaha inyia hafuye a Yerusalam iko hoi heyari hisiara nolo libo. Ara inna baŋi nohoi ta Habu ta wan nohonyie, ojo to wahan nohoi haluahari.
\p
\v 20 Anyar ehum iyyohoi hiriria hijo hotobiaŋa lobo tuŋani orrosok iyyohoi nobo hiram no hirro hunna esio itai te iyyohoi.
\v 21 Nyo ewak iyyohoi hihuma hirro inno obis obe ara to hosiere ha Habu hame, ati to hosiere ho hiyyo daŋ.
\v 22 Efahak iyyohoi ilasi hohoi lobo iko isia lafa eciem iyyohoi hinyiahita arriai hidofe errumu iyyohoi hifiriwa nohonyie agalik, nyo omuno inyia itai dede.
\v 23 To hiram no Tito, ara inyia ilasi hanaŋ iko hegiamani le egiama iko ta hatai. Te ilasira illak illohoi efahak ifa ikelesiaha isia hullo etihutek hitihabuo no Kristo.
\v 24 Iyyania ituhutek mune nahatai to hosiere ho hiyyo lia te ikelesiahien, ituhutek hidofe te ilasirak hullo hijo nobe hitahuwo nanaŋ te itai ara assai.
\c 9
\cl ŋati 9
\p
\v 1 Iyyania, to hiram to no luaha hiyyo ille eruk Hollum, anyar abe nayya egiorok ta hatai.
\v 2 Nyo ayyen nayya nyo nia ewak itai hijo eluahari isia, elimak nayya to hiyyo illo Masedonia to hitahuo. Elimak isia hijio ehuhumak hiyyo illo Akaya hisiorita innohosie man ifa toŋoleŋa. Hifiriwa na hatai etiwulek tajia inno hiyyo arriai ehumari isia ania.
\v 3 Ati efahak nayya halasira hohoi ta hatai hijo anyar obe iyyohoi etahuo itai bi assai, ojio anyar ehuhumak itai wati innahatai, iyya ero nayya ifa.
\v 4 Nyo, kuyya afanu illak illo Masedonia daŋ hanaŋ atta arrumu itai ibe ehuhumak hisiorita innahati, efi iyyohi hiloriri daŋ to hitahuo nohoi itai.
\v 5 Egigilo nayya iyyania hijo olibo ofu halasirak hohoi hulloŋ ta hatai to hosiere hanaŋ anyar ofu ehuhumak hisiorita innahatai iyya etiorok ifa itai. Ara nia hijo anyar hisiorita innahatai oso to wahan no wati innahatai hotobiaŋa ara ta ŋarrosok.
\p
\v 6 Ara higigilo tiji: tuŋani ille oyyek ŋama bok bok odieŋu iso hunna oduhucio, ojio lo oyyek wan inno oluŋa, odieŋu iso arriai.
\v 7 Isiara hiyyo daŋ nobotie nobotie hesiara iyya otiorok ifa isia ta tajia hosie obe ara mijan to na tajia kuyya hidofe ta baŋi- nyo omuno Hollum tuŋani ille esio hisiorita to mune na taji.
\v 8 Oremik Hollum ŋetifutak hisiorita innohonyie daŋ ta hatai, hijo anyar ewuon itai ho hirro inne ewak itai holoŋitek daŋ, eremik itai hiluak higiemita daŋ hunna olibo wati.
\v 9 Iyya egiorohini hijo, “Aharak inyia ibariti atta hisio to lociaŋak; Odule iso ibisiti innohonyie man fur.”
\p
\v 10 Ati Hollum ille esio hinyiomo ta hayani arik he imune inna ohu inyia adahari, etisarik iso inyia ta hatai ojio hidofe ofonik ta hatai hinyiomo inne efu itai edulak anyar ofonik haŋer hunna oluŋa.
\v 11 Efanu iso itai hira habarak to hirro bidaŋ anyar imorot itai, atta hiyyo hisio ta hatai humo to Hollum.
\p
\v 12 Nyo obe hisiorita hunnaŋ ara iluahiti inno hiyyo inno Hollum hame, ati efut isia arriai ho humo no Hollum hame.
\v 13 To nyo egonyu hiyyo hisiorita hunna; etahuo iso isia Hollum ta baŋi nahatai sayye no Kristo ne ero itai, ojio to himorot nahatai to hosie ojio to hiyyo daŋ.
\v 14 Omojo isia tetai ojio tajia innohosie awak itai, to nyo to hamehini no Hollum inna obolo binno to hotwajin hatai.
\v 15 Humo to Hollum to hisiorita hunna obolo wati inne etalik iyyohoi hiro!
\c 10
\cl ŋati 10
\p
\v 1 Iyyania, nayya Paulo, elolia nayya ta hatai ta wan nanaŋ, ta nyalami iko ta bijan no Kristo. Ojio illak hiyyo hijo afiaha nayya to hosiere hatai, ati eŋere nayya la alama nayya ta hatai.
\v 2 Esiŋa nayya itai hijo, la awoŋ nayya hijo hotobiaŋa nayya eŋere ta hatai iyya inna eŋere nayya te illak hiyyo illo ojio elot iyyohoi te iwahiti inno wati innohoi.
\v 3 Ara ida hido hijo elot iyyohoi to wati te innohoi hunna, obe riem nohoi ara wati innohoi hunna.
\v 4 Obe irremiti innohoi ara inno wan inna, ati ara golon nohosie tara Hollum no oremik hitihar masik inno ogol. Oremik hidofe isia hitifiaha ofioroho.
\v 5 Etattur hidofe iyyohoi higigilita iko hirro daŋ inne etidara ojio hidofe etihita hiyyen no Hollum. Efit iyyohoi higigilita daŋ hatara piti hotoniŋe Kristo.
\v 6 Ebak iso hidofe iyyohoi hamiasak daŋ to holoŋ ne eniŋori itai dede.
\p
\v 7 Igigile dede to hirro hunna. Le ejio lobo tuŋani dede hijo ara inyie lo Kristo, isiara inyie hegigile to wan to nohonyie, era hidofe iyyohoi daŋ illo Kristo.
\v 8 Le etidara ida hido nayya kai to hilohittok nohoi, nafa esio Habu te iyyohoi haduhori itai ahide hijo hotobiaŋa iyyohoi etihar itai, abe iso naŋ awuon he irri.
\v 9 Ati abe nayya awak hitibaŋa itai to waragat innanaŋ.
\v 10 Nyo ojio illak hiyyo hijo, “Ero inyia to golon ojio hidofe efiriwa ta waragaha innohonyie, ati ofiak inyia to homomite innohoi. Obe osiru hetirari to hiro nohonyie.”
\v 11 Isiara hiyyo iyya hullo hotoyyen inna; to hirro inne egioro iyyohoi ta hatai to waragaha ejio iyyohoi ebe ewuon he itai niyya, efanu iso iyyoho hihuma le eba iyyohoi nia.
\p
\v 12 Ebe iyyohoi eŋere hetirrijori wati innohoi iko illak hiyyo illo ojio elibo isi. Ati obe ofioroho to hosie le etirrijo isia wati illohosie he illak hiyyo, ojio hidofe isia ociama wati illohosie he illak hiyyo, obe isia owuon ho higigilo on obis.
\v 13 Ati ebe iso iyyohoi etidara iyya hiyyo hullo ellaŋ ohori. Ati iyya esio Hollumte iyyohoi ohori nohonyie, eba ohori nia man ta hatai.
\v 14 Ati ebe iyyohoi ellaŋ ohori nohoi le egiama iyyohoi to hiji hatai, nyo eba ifa iyyohoi to hiji hatai to hosiere iko sayye inno olibo inno Kristo.
\p
\v 15 Obe iyyohoi etidara ellaŋ ohori te igem ne illak hiyyo, ati eyyik iyyohoi hijo lobolo huruk nahatai, atta iso igem nohoi bolo to hiji hatai agalik.
\v 16 To nia atta iyyohoi iso hitiyana sayye inno olibo te innak fauhien inno owuon to hosiere inno masik innahatai. Nyo obe iyyohoi etidara te igem ne ehuma lobo tuŋani to nobo mai.
\v 17 “Ati lia le etidarawan, isiara inyia hetidarai ta Habu.”
\p
\v 18 Oliew libe no tuŋani le etahu Habu inyia. Obe ara lia le etahuo wan nohonyie.
\c 11
\cl ŋati 11
\p
\v 1 Awak naŋ hijo anyar edihu itai ika naŋ le'ro naŋ rori kai inno ofiak.
\v 2 Nyo ahain naŋ te'tai ta haini no Hollum, nyo atiorok ifa naŋ itai to oliawa lobotie, hijo anyar esio naŋ itai to Kristo iyya hoduoti no olibo
\v 3 Ati abaŋ naŋ hijo enyob iso munu itai iyya nafa enyiabari inyia Eva to ofioroho te innohonyie, hijo hotobiaŋa inyia orihori higigilita innahatai ade tara mune no olibo nemunori itai iyyania to Kristo ta tajia innahatai daŋ.
\v 4 Elimak ifa iyyohoi itai hiram no Yesu, atta itai efwotu Oyiri lo Olibo, eijo hidofe itai atta huruk hiram nohoi. Ati enyiak itai ebusak ilak hiyyo hetiyenai ta hatai lobo Yesu lo'lufa. Iyyania ewak itai huruk Oyiri lo olufa atta itai huruk hiram no olufa.
\v 5 Egigilo naŋ hijo abe naŋ ara assai te efahat illo hittaha.
\v 6 Ettallik ida hido naŋ to hiro no olibo iyya iyya isia, obe hiyyen nanaŋ odico. Etuhutek iyyohoi inna ta hatai te hikota daŋ ojo to hirro daŋ.
\p
\v 7 Atta naŋ hipala letifiaha naŋ wan nanaŋ ajo naŋ etibolo itai to hitiyena nanaŋ ta hatai sayye inno Hollum to biaŋana no duma.
\v 8 Ahoru ifa naŋ arobia tara ikelesia hijo anyar egiamari naŋ ta hatai.
\v 9 Nafa awuanari naŋ to hiji hatai olociaŋ, abe ifa naŋ efifia hinak hirro tara lobo tuŋani, nyo esio halasria illa afanu ta Masedonia hirro innafa awak naŋ. Abe ifa naŋ efia hinak hirro ta hatai, hidofe, abe iso naŋ adule hififia itai.
\v 10 Iyya owuon bisan to Kristo ta hanaŋ, dede oyyen iso hiyyo inno owuon to doŋe na Akaya hiram inna.
\v 11 Obe ojo hijo abe naŋ amuno itai, oyyen Hollum hijo amuno naŋ itai.
\p
\v 12 Ojo to hirro inne ehuma naŋ, adule iso naŋ hihuma hetihori ille etidara to hijo to nohosie hijo, egiama isia iyya iyohoi.
\v 13 Ara hiyyo ille efahat henyiabak iko hegiamak ille enyaba, nyo ojo isia era lefahat illo Kristo assai.
\v 14 Ebe iyyohoi elliliha te inne, nyo olwo sitan to wan nohonyie iyya anjilo lo cialai.
\v 15 Niyya obe ara to hillilliha kuyya to hinyiaba ne hegiamak illohonyie atta hijo, era isia hegiamak illo libe. Osiru iso ŋoto to hosie to hihumita inne ehuma isia.
\p
\v 16 Enyiak naŋ hiro, hotobiaŋa lobo egigilo hijo esita naŋ, ati legigilo itai ania, etidara nayya hijo anyar etidara naŋ kai.
\v 17 Hirro inne ero naŋ, abe naŋ ero to hituhuta na Habu, ati ero naŋ to hitidara iyya lofiaha.
\v 18 Nyo etidara hiyyo arria to hirro inno wati innohosie, etidara iso hidofe naŋ.
\v 19 Egigilo itai hijo era itai ferejiok ati etiru itai tara liyya ille esita.
\v 20 Le'humak lobo itai piti, itidihu, lohorru lobo hirro innahatai, le'nyob inyia itai, kuyya letidara inyia to wan nohonyie, kuyya annaŋa inyia homoŋite innahatai, itidihu daŋ.
\v 21 Ero naŋ to irri nyo ara iyya elik ifa iyyohoi. Ati letidara lobo, atta naŋ hiro iyya lobolit--Etidara iso naŋ hidofe.
\v 22 Hara isia hiyyo ille Ebrei? Ara hidofe naŋ. Hara isia hiyyo ille Isarail? Ara hidofe naŋ. Hara isia to woyyo na Abramo? Ara hidofe naŋ.
\v 23 Hara isia hegiamak to Kristo? Ee, ara hidofe nayya daŋ. Ati ero naŋ iyya osita. Agalik ati naŋ isia binno to higiemita arria, to hifita ta babus to hinyiahita arria, te ibahiti arria, ojo hidofe ye eliaha ta hanaŋ hinyiahita arria.
\v 24 Hinyiahita miet efwotu naŋ ibahiti tomwana hunik hohottoŋwan ta hali no Yudea. Abaha hiyyo naŋ hunik to fattigioho.
\v 25 Errwuoŋ isia naŋ to moru inyiahi nobotie. Awuon naŋ ta babur ne esiak moru atta ŋadiori ahotwai hari.
\v 26 Eyari naŋ hifoliaha no hifioŋ inyiahi nobotie. Alot naŋ to hiji ho hirro inno oyeyer inyiahita arria. Yeyer no hariak, yeyer na hahalak, yeyer to hiyyo illallaŋ, yeyer ta paganohien, yeyer no doŋe yeyer no tim, yeyer no hotwai ho hifioŋ nettok, yeyer no hittole to hiji no hiyyo ille enyiaba.
\v 27 To holoŋitek arria egiama naŋ binno to hitigiama no'bolo. Abe naŋ ajoto ta hariejin.
\v 28 Alot naŋ to hibwoti no biaŋan no hifioŋ, to biaŋan no hinya innamuk hirro daŋ ettulak, ojo hidofe daŋ to hirobi ojo to biaŋan no boŋojin. Owuon hirro hunna daŋ ta bali, ati agalik inna. Obolo hitihawua ne ikelesia binno holoŋitek daŋ.
\v 29 Le'lik lobo, abe naŋ elik ojo hidofe lahuye lobo, abe naŋ ejiriŋa binno.
\p
\v 30 Kuyya letidara naŋ, anyar etidara naŋ iso naŋ to hilik nanaŋ.
\v 31 Hollum lara Monye Habu lohoi Yesu letahuo tulaŋ, oyyen inyia, abe naŋ agesem.
\p
\v 32 To doŋe na Damaseka owuon eittok la habu la Aretta lerriria doŋe na Damaseko henefuni nayya,
\v 33 Ati ettusuru halasira hanaŋ nayya to gufa te ittulit no ohitir, atta naŋ hurrwuata ade tara hosie.
\c 12
\cl ŋati 12
\p
\v 1 Anyar nayya etidara, ati obe iso innak hirro afanu nyaru to hitidara nia. Ati ero nayya to hijiriŋa iko to hirro hunna etilek Habu ta hanaŋ.
\v 2 Amijak nayya nobo tuŋani to hotue ho Kristo ojo hidofe nia ta halu ho ŋasi tomon ha aŋwan man ta nafa akafari Hollum inyia a'ido to holoŋ hitahunihi, kuyya ara to wan nohonyie kuyya obe, abe nayya ayyen, ati Hollum inyia oyyen.
\v 3 Ati ayyen nayya tuŋani lia--kuyya to wan nohonyie, kuyya obe ara to wan nohonyie, obe naŋ ayyen, ati kuyya Hollum oyyen--
\v 4 efitini ifa in ni ho paradiso iko hetirini no hirro hunna etibaŋa tuŋani lobo herarari.
\v 5 Etidara iso nayya to tuŋani lia. Ati iyya ta hanaŋ obe iso naŋ etidara, ati ara to fiaha nanaŋ.
\v 6 Kuyya la wahan naŋ hitidara, abe iso nayya ara obolit, ahu iso nayya hirro hunna bi dede. Ahu iso naŋ hefihak hitidara, hijo hotobiaŋa ida lobo tuŋani egigilo ta nayya bi inna na agalik nya egonyuni iko hetirini tara hanaŋ.
\v 7 Iyya ta nyalami nia tara hanaŋ inno halieu, ahu iso naŋ hefiyak ade. Ati abe naŋ iso afiari ade to hitidara, iyya te irruti hunna esio ta hanaŋ, efahati lo ottu tara sitan hijo anyar etihar nayya, abe iso nayya ara ahetidarani ille no.
\v 8 Efia iso nayya ta Habu to hirro te inia man hinyiahita hunik, hijo te itai he eyari ade tara hanaŋ. Ojo ati inyia ta hanaŋ hijo,
\v 9 “Isiara hamehini hanaŋ hotoremik ta hatai, ehumahini hifiriwa nololibo to fiahajo.”
\v 10 Ojo iyyania hiram no Kristo, amuno nayya to hilihita, to imoriti, to hitigiamta, iko to golon no hijiriŋa, nyo la afiahajo nayya, atta iso nayya golon.
\p
\v 11 Era nayya lobolit! Ati arrosok itai ta hanaŋ hijo egiama, etihabuwo ida hiyyo nayya te itai. Abe ifa nayya ara assai to hejufutak, ara ida hido naŋ asai.
\v 12 To hejifutak hullo dede ara igem to hiji hosie to dihan, to halieu, iko to libe no higiamita.
\v 13 Efiyak ifa itai jai to hiji ho innamuk ikelesiaha, ati abe ifa naŋ amirak itai. Ati ibusak nayya to hipalita inia!
\p
\v 14 Itiriŋe ati, awuana naŋ la ajo attu ta hatai to hitahunuhi no holoŋ. Ati abe iso naŋ amirak itai, nyo abe nayia awak hirroinna hatai, ati awak naŋ itai. Hotobiaŋa ida durre ottunahini to monye iko hotonye. Ati isiara ida monye iko hotonye hotottunak to durre.
\v 15 Esahak iso naŋ mune nanaŋ to oyirihien innahatai. Ŋa la mune nayya itai, odicio iso mahu mune nahatai ta hanaŋ?
\p
\v 16 Ati iyya ojo tiji, abe naŋ amirak itai hamojori arobiyaha. Ati ojo illak hijo ara to hinyiaba iko teleri no poco no hirro ta hatai.
\v 17 Eyari ifa naŋ hijo anyar efahitari itai?
\v 18 Efahak ifa naŋ Tito ta hatai adiya. Ebe ifa iyyohoi elot to hikoi iko higemita nobotie?
\p
\v 19 Igigilo itai to holoŋitek daŋ hijo itai ifa etiluwaha wati innohoi? Ati to hosiere ho Hollum, ero iyyohoi hirro bidaŋ to Kristo hijo anyar itai egol.
\v 20 Abaŋ naŋ hijo lawahan nayya awoŋ, kuyya abe naŋ attu arrumu itai iyya nia awahari nayya. Abaŋ hidofe nayya hijo ebe iso itai afanu arrumu nayya iyya to higigilo nahatai. Awuon naŋ la abaŋ bi hijo kuyya ewuon itai iko irijiti, hayini, imoriti to jore, hurrute, imwoŋiti, hitidara iko baha.
\v 21 Abaŋ nayya hijo la aciohini naŋ, etinyalam iso Hollum lalaŋ nayya to hosiere hatai. Abaŋ hidofe naŋ hijo afanu iso hiyyo illafa eyyau iko ilia holobe hiruk hipalita, isomiti, iko iwahiti inno wati innohosie hunna ehuhuma isia hitijiriŋa nayya.
\c 13
\cl ŋati 13
\p
\v 1 Ara innaŋ iyya hinyiahita hunik inna attuni nayya ta hatai. To hutuhe inno hiyyo lohorik kuyya lohunik hetiyanak ille eruk hiyyo hiro nohosie.
\v 2 Elimak ifa nayya to hiyyo hullo eyyau wati arik ho hullo illak daŋ nafa awuanari nayya daŋ hatai to hitarihi nafa attuni naŋ, ati iyyania enyiak nayya hilima ta hatai: Ati awoŋ naŋ abe nayya enyiak amehini isia.
\v 3 Ero naŋ iyyania nyo esiaha itai hituhuti nafa ero Kristo ta nayya. Obe inyia elik ta hatai; ati egiama inyia to hiji hatai binno no ogol.
\v 4 To nyo esiohini ifa inyia to hilik, ati owuar inyia to golon no Hollum. Ati elik hidofe iyyohoi daŋ to honyie, ati emanya iso iyyohoi he inyia to golon no Hollum lo owuon ta hatai.
\p
\v 5 Iticiem tajia innahatai anyar eyyen itai hijo kuyya ewuon itai ho hiruk. Iticiem tajia innahatai dede. Ibe itai eyyen hijo owuon Yesu Kristo ta tajia hatai? Owuon inyia kuyya ebe itai era dede onyirok ho Hollum.
\v 6 Ati eyyik nayya hijo eyyen itai hijo era iyyohoi daŋ durre illo Hollum.
\v 7 Iyyania emojo iyyohoi to Hollum hijo hotobiaŋa iyyohoi ehuma no lorru, obe ara hijo anyar osiru higiama nohoi, ati anyar ihumari na lo anyar hijo era hido hiyyo hijo ebe iyyohoi era adurre illo Hollum dede.
\v 8 To nyo etaluk iyyohoi hitik hirro hunna dede ati egiama iyyohoi to bisan.
\v 9 Emuno iyyohoi la agolon itai ejio iyyohoi elik. Ejio iyyohoi emojo hijo anyar ebibolori itai.
\v 10 Egioro nayya saŋ ajio naŋ abe tara hatai, anyar attu nayya hirro ta hatai inna ogol to duaran ne esio Habu ta hanaŋ hijo anyar etigolori itai, obe ara anyar etatturori itai.
\p
\v 11 Hucuŋi nohonyie halasirak ho hanasirak hanaŋ, itumune! Isiara tajia innahatai hoto golo to huruk ojio hidofe elik, ittolojo to higigilo nobotie, itimanyiai to hilik na tajia, ojio iso Hollum lo owuon iko mune ojo himwara hotowuana daŋ hatai.
\v 12 Itifonyak halasirak hatai to hifonya no olibo.
\v 13 Etifonya hiyyo illo Hollum daŋ itai.
\v 14 Isiara hamehini na Habu Yesu Kristo ojio mune no Hollum ojio riaha no Oyiri lo Olibo hotowuanai daŋ hatai.