lot_reg/43-LUK.usfm

\id LUK
\ide UTF-8
\h Luka
\toc1 Luka
\toc2 Luka
\toc3 luk
\mt Luka
\c 1
\cl Angati 1
\p
\v 1 Jyo illaŋ Tiopilo: Owoni egyorok arryai hul igyoroni’to erre hunya ihanie ihiji hohoi,
\v 2 bwo fe igyoroni isi erre huna ihwa iramani aati hul igonyuni’to t’etteri hul arai ahettiyanak ikyanita.
\v 3 Oyyu bwo fe jihoŋ igyoroniere erre huna jihoi, illaŋ ol oyyu, Tiopilo, nyo attifya nya ni erre huna many beryen.
\v 4 Egyoro ni jihoi jo oŋida iye imijak jo nerre hunya ittiyenie jihoi arai ahode.
\p
\v 5 To oŋitek huno Erode hobu olo Yudea owon nya obo ehumani afure honyi Sakaria otto woyo ba Abaija. Owon nya inyi iko aŋotte honyi an ara’to otto woyo ba Arone, afure honyi Elisabeta.
\v 6 Olibori nya isi ihosyere Hollum bwo fe adahai te efahita huno Hollum daŋ, bwo obeŋ obo epali.
\v 7 Ati obeŋi nya bu isi owoni iko obo leito nyo iholofi Elisabeta bwo fe imarwahi isi.
\p
\v 8 Ninya ofwonni oŋitek hun isyoryere Sakaria ehumita jyo Hollum ihwa ihanie oŋitek daŋ,
\v 9 te emohiti huno laati ehumak, ottu noloŋ on ojiŋaniere inyi ihaji imojit eneittok ono Hobu iswahiniere ottogoŋ.
\v 10 Omojoi nya eluluŋ wati hul olwaji ilet ta asaa on oswahinierek ottogoŋ.
\v 11 Attati anjelo olo Hobu leyo jyo Sakaria ol owotya ta aŋati iŋet ono etityek on oswahinierek ottogoŋ.
\v 12 Idyaŋa ataji Sakaria bebe al igonyu inyi anjelo ette baŋi bebe.
\v 13 Ati ojo anjelo jihonyi, Sakaria, hebaŋ, nyo itaniŋu Hollum amojo hoi, bwo fe isiu adi ŋorwoi hoi Elisabeta leito bwo ifurak adi iye inyi Yoane.
\v 14 Iwon adi iye iko netahabuyo iko amuno, Bwo fe olwaji adi laati hul omunoi’to liholoŋ an isiunierek inyi.
\v 15 Ara adi inyi atulo eleittok ihomon Hobu. Obeŋ adi inyi amata abalu kuyya erre omuk hun ayafutai’to. Hesiuni inyi ifut adi inyi iko Oloyiri ol Olibo.
\v 16 Iloit adi inyi laati Israele arryai jyo Hobu Hollum hosi.
\v 17 Olo adi inyi ihosyere Hollum to oloyiri iko ta adwaran ihwa ono Elija, Iloicere atajya monyye jyo onyirok hosi. Bwo fe iloit adi inyi hul omesye’to jyo nelofyoro ono abisak, Ihuhumyere atajya wati to Hobu.
\p
\v 18 Ojo Sakaria jyo anjelo, Aŋai adi amijak ni ana, nyo emarwak ni bwo fe ŋorwoi hoŋ imarwak?
\v 19 Ojo anjelo jihonyi, Ani Gabriele. Awotya ni ihosyere Hollum al ifahu’to ani ikyanari jihoi asayyo hun oyiji’to huna.
\v 20 Ihwania ogoro adi ogolok hoi bwo ibeŋ adi iye ikyana many oloŋ an idwoŋorik nerre huna, nyo ibeŋ iye iruk nekyanita hoŋ hun ofwonni adi rahan ahode to nasaa nya.
\p
\v 21 Itilai nya aati Sakaria attati isi illilliha te elliŋya honyi ihaji imojit eneittok.
\v 22 Ninya attu inyi alet, obeŋ inyi oremik ikyana jihosi, attati isi mijana jo igonyu inyi omuk erre ihwa arigya to haji ania. Bwo ihuhuta inyi jihosi ta ahas nyo ittallik inyi ikyana.
\p
\v 23 Al isid asaa an igyamari inyi acaharo inyi imiji hosi.
\p
\v 24 Ihalu oŋitek huna oyedu ŋorwoi honyi Elisabeta bwo fe ta ayafajin miet idimak inyi ahwan honyi bwo fe ojo,
\v 25 Ihanio Hollum erre huna bwo fe ihwania iya inyi ariri hoŋ t’ehiji wati addi.
\p
\v 26 Ihalu ayafajin ille ifahu Hollum anjelo Gabriele imiji Galilea an anya Nasaret,
\v 27 jyo nobo odwoti on obeŋ’to ottironie iko obo alle on ocorok alle iyamari inyi, afure lya Yosefo. Ara odwoti otto woyo ba Davide bwo anya afure honyi Maria.
\v 28 Ottu anjelo jihonyi ette jaran jihonyi, Moŋ, iye an iyyu’to owon Hobu ikoye.
\v 29 Ati abaŋ inyi bebe te ekyana ana ette igigilo ta awoyo hiram ono efonyo ana.
\v 30 Ojo anjelo jihonyi, Maria, hebaŋ, nyo iyyu iye bwo omuno Hollum iye.
\v 31 Iyedu adi iye ette isiuna leito bwo ifurak adi iye inyi Yesu.
\v 32 Agalik adi inyi daŋ bwo iloŋoi adi inyi Lonyi lya al agalik’to daŋ. Isyo adi Hobu Hollum jihonyi aseger ono monyonyi Davide.
\v 33 Ette inyi ilohobu lihaji Yakobo tulaŋ, Bwo fe obeŋ adi nesidi lobye honyi.
\p
\v 34 Ojo Maria jyo anjelo, Aŋai adi oremehini erre huna, nyo obeŋ ani ’le?
\v 35 Attati anjelo jaran jihonyi, Ottu adi Oloyiri ol Olibo jihoi, Bwo fe idisok adi adwaran ono Hollum iye. Tania ifurani adi eito ol olibo’to al isiu adi iye, Lonyi Hollum.
\v 36 Bwo fe ayedu soni hoi Elisabeta an imarwak’to leito. Iloŋoi nya inyi eholofi ati ihwania arai ayafajin honyi ille.
\v 37 Nyo obeŋi omuk nerre hun ogoli’to agalihini Hollum ’tuŋ.
\p
\v 38 Attati Maria jaran jihonyi, Ani apit ono Hobu. Ijara hetehaniehe jihoŋ ihwa ikyana iye. Attati anjelo leten.
\p
\v 39 To oŋitek hwa odyoto Maria ette leten kwak liŋati doŋyok jyo obo amiji lifau ono Yudea.
\v 40 Ette jiŋana lihaji Sakaria ette ifony Elisabeta.
\v 41 Inya itaniŋu Elisabeta nefonyo Maria ette leito ididyaŋa ’totwa honyi, ette Elisabeta ifut iko Oloyiri ol Olibo.
\v 42 Bwo fe ette inyi ikyana on okwat ojo, Hotomunohi iye lihiji ŋorwo. Hotomunohi leito otto hohe hoi.
\v 43 Nyo ati idwoŋ eram ana jihoŋ jo oŋida honye Hobu hoŋ ottu jihoŋ?
\v 44 Nyo odwo etaniŋuniere ni nefonyo hoi ette leito ottotwa hoŋ ididyaŋa ta amuno.
\v 45 Hotomunohi nya an iruk’to jo idwoŋi adi erre hun iramak Hobu inyi ahode.
\p
\v 46 Attati Maria jaran, Itahabuyo ataji hoŋ Hobu,
\v 47 Bwo fe omuno oloyiri hoŋ Hollum Etalahani hoŋ.
\q
\v 48 Nyo igonyu inyi afyahaji hwan ono egyamani honyi. Tania iloŋoi adi aati daŋ ani ahamunoni Hollum.
\q
\v 49 Nyo ihanio lya al agalik’to daŋ erre hun obolori’to toni, Bwo fe olibo afure honyi.
\q
\v 50 Owon amehino honyi jyo hya hul abaŋi’to inyi Iko lonyirok lonyok hul hobeŋi isiuni.
\q
\v 51 Itahutak inyi agolon ta naani honyi Bwo itisarrahi inyi etadarak iko egigilita hosi.
\q
\v 52 Itusuru inyi hobwok hul ittaha’to imasik hosi, Bwo itadet aati hinya ofyahaji’to.
\q
\v 53 Itufutak inyi aati hul oniamai’to te erre hun oyiji’to, Bwo ifuha inyi abarak addi ahania.
\q
\v 54 Olwak inyi egyamani honyi Israele Bwo fe obeŋ inyi itapwak ecoriti hunya acorok inyi jyo hohonyok hohoi.
\v 55 Omehita inyi jyo Abramo Iko jyo lonyirok honyi tulaŋ.
\p
\v 56 Arasa Maria iko Elisabeta ta ayafajin hunihoi many ocohuniere inyi limaji hosi.
\p
\v 57 Tania ette nasaa ’tuna an isyori Elisabeta, ette inyi isiuna leito ’le.
\v 58 Attati aati hutta haŋ hosi iko hutto onyihari itaniŋuna jo itahutak Hobu amehino honyi jihonyi ette isi muno ikonyi.
\v 59 Attati oloŋ itahottohunihi ’tuna on oŋocerekf isi leito ette isi jaran, Efurak inyi Sakaria, ihwa monyonyi.
\v 60 Ati ojo honyonyi, Obeŋ, oŋida ifurani inyi Yoane.
\v 61 Attati isi jaran jihonyi, Obeŋ obo atta haŋ hatai anya Yoane.
\v 62 Ette isi ihanio etahutita jyo monyonyi imijaniere jo ifurani adi inyi ŋai.
\v 63 Attati inyi mojuna egyeri jihosi ette igyoronia, Afure honyi Yoane. Tania illillihai isi daŋ bebe.
\v 64 Kwak ette aŋadyef Sakaria ikyana attati inyi itteryo itahabuyo Hollum.
\v 65 Teyya ette abaŋi wanan jyo aati hutta haŋ hosi, bwo aati daŋ hutto misihi hutto doŋyok ette ikyanari erre hunia daŋ ifau Yudea.
\v 66 Bwo fe ihanani nya hul itaniŋuni’to daŋ ekyanita huna itajya hosi ette jaran, Ara ’tadi leito olo ŋai? Nyo owon aani Hobu jihonyi.
\v 67 Ifut nya monyonyi Sakaria iko Oloyiri ol Olibo bwo fe ette ikiluna ojo,
\v 68 Hotohwo Hobu, Hollum olo Israele Nyo ottu inyi mijo ette italahuna aati honyi.
\q
\v 69 Bwo fe itadet inyi Etalahani ol obolo’to tohohoi, Inyi otto woyo ba Davide egyamani honyi,
\v 70 Ihwa ikyana nya inyi beryen lihutuhe heyak sayyo honyi hul olibori’to.
\q
\v 71 Ojo inyi jo, Italwahuni adi hohoi to myorok hohoi, Iko to dwaran hya hul oliwarik’to hohoi.
\q
\v 72 Omehino inyi jyo hohonyok hohoi Bwo fe ogotyere inyi ecoriti honyi hun olibori.
\q
\v 73 Ocorok inyi necorit jyo hohonyi hohoi Abramo,
\v 74 On ojo italwahu adi inyi hohoi to has myorok, Ette hohoi igyama jihonyi ta abyaŋan baŋi
\v 75 Bwo fe itoŋori awati hul obisi ihosyere honyi To oŋitek daŋ hun eswori hohoi.
\p
\v 76 Leito hoŋ, iloŋoi adi iye aheyani sayyo olo lya al agalik’to daŋ, Nyo ikyomoro adi iye ahosyere Hobu Ihuhumyere nekoi honyi.
\q
\v 77 Bwo fe iramak adi iye laati honyi jo Italahuni adi isi ta ahohina ono neyyata hosi.
\q
\v 78 Nyo obolo amehino ono Hollum An idwoŋ’to jihohoi t’edou an ara afaŋan
\v 79 Itafaŋyere hya hul itoŋoi’to idumele iko imaji an ara’to ihwa abali ono naye Ette rihoro ejek hohoi te ekoi ono nelik tajya.
\p
\v 80 Oboboloro leito alya bwo fe ette golon to oloyiri, bwo fe owon nya inyi limur many oloŋ an italeyehinierek inyi jyo Israele.
\c 2
\cl Angati 2
\p
\v 1 To noŋitek hwa ottu nya neram an ifahu hobu Cesare Agusto jo oŋida igyoroni afureta wati daŋ hutta fauhyen.
\v 2 Ara nya ana negyeri etteri an igyororik to ninya arari Kwirino eleittok olo Sirya.
\v 3 Ofwoi nya isi daŋ itigyoroniere afureta hosi imisihi hosi.
\v 4 Olo nya Yosefo to miji Nasaret otto Galilea many ifau Yudea imiji Davide an ifurani Betlehem nyo inyi atta haŋ ba Davide.
\v 5 Afwoi inyi iko Maria ŋorwoi honyi an ilyaha’to nesyo itigyoroniere afureta hosi.
\v 6 Howoni isi dia ette noloŋ idwoŋ an isyori inyi,
\v 7 ette inyi isiuna lonyi honyi oloŋeu ette bubunana inyi ta aboŋojin attati itaferehina inyi itogol husuŋ nyo obeŋ nya namaji tesi ’totwa haji lojotori.
\p
\v 8 Jyo nafau ania owoni nya lomuk leyyak hidye hul irrirryai nedye hosi ta narwe imur.
\v 9 Teyya oleyo anjelo olo Hobu jihosi ette afaŋan ono Hobu itafaŋ isi attati isi daŋ baŋi.
\v 10 Attati anjelo jaran jihosi, Hebaŋata, nyo eyaŋuno ni jihatai asayyo hun oyiji hun iyaŋunie adi amuno on obolo jyo aati daŋ.
\v 11 Isiuni ahana jihatai Etalahani, to miji Davide, al anya Kristo Hobu.
\v 12 Ara fe ana etamijani jihatai jo inyurana adi itai olodole obubuna ta aboŋojin ol oferyo litogol husuŋ.
\p
\v 13 Teyya teyya oleye anjelohyen arryai iko anjelo lya ette isi itahabuyo Hollum ojori,
\v 14 Ijara akwatan hatawana lidou jyo Hollum Bwo nelik tajya lifau jyo aati hul itamunoye’to inyi.
\p
\v 15 Lafwoi anjelohyen lidou, ojori leyyak, Hafata Betlehem, efwo mijo ariŋ an idwoŋ’to ana an itahutak Hobu jihohoi.
\v 16 Attati isi fwatan kokwak ette nyurana Maria iko Yosefo iko leito ol oferyo litogol husuŋ.
\v 17 Igonyuni leyyak hidye inyi ette isi iramana neram hito lodwo iramani jihosi.
\v 18 Illillihai aati arryai al itaniŋuni isi erre hun iramani leyyak jihosi.
\v 19 Ati ottunak Maria hodwo hirre itaji honyi ette igigilo tesi.
\v 20 Acaharai leyyak hul itahabuye Hollum ta nerre hun itaniŋuni isi bwo fe igonyuni; nyo onyurani isi erre ihwa iramani dwo jihosi.
\p
\v 21 Ihalu oŋitek hottohunik al oŋoti inyi ette isi ifurana inyi Yesu ihwa ninya ifuraniere anjelo inyi hobeŋ honyonyi oyedu inyi.
\p
\v 22 Ati inya attubai oŋitek huno etaliboryo ihwa igyoroni ifahita huno Mose, iyaŋunie isi inyi Yerusalem isyoryere inyi jyo Hobu.
\v 23 Nyo igyoroni lifahita huno Hobu ojo, “Iloŋoi adi alyawa daŋ oloŋehwa ahegyamak jyo Hollum.”
\v 24 Bwo fe isyori isi ehumita ihwa ojori lifahita huno Hobu jo oŋida isyori awolosin arrihai kuyya amami arrihai.
\p
\v 25 Owon obo atulo afure honyi Simeona imiji Yerusalem. Ara nya inyi atulo ol obis bwo fe omuno inyi Hollum. Ottifya nya inyi alwahyo ono Israele bwo owon nya inyi iko Oloyiri ol Olibo.
\v 26 Bwo fe italeyehini jihonyi jo obeŋ adi inyi oye many igonyuniere inyi Kristog olo Hobu.
\v 27 Ottu inyi ihaji imojit eneittok ihwa iramak Oloyiri ol Olibo inyi. Al iyaŋunie esyok Yesu ihaniere jihonyi ihwa igyoroni ifahita,
\v 28 akafu inyi Yesu ihas honyi ette itahabuyo Hollum ojo,
\v 29 Ihwania Hobu ijara yo egyamani hoi hotoye ta nelik taji Ihwa ikyana iye.
\q1
\v 30 Nyo igonyuni oŋite hoŋ etalahuna hoi,
\v 31 An ihuhumak iye ihosyere wati daŋ.
\q1
\v 32 Ara inyi afaŋan on oleyo adi jyo paganohyen, Bwo isyo adi akwatan jyo aati hoi Israele.
\p
\v 33 Illillihai nya honye iko monye hito ta nerre hun ikyana Simeona tenyi.
\v 34 Bwo fe Simeona ette itajahina isi ette jaran jyo Maria ojo, Imijye, ta leito olo okwaharai adi omuk bwo odetunie adi omuk aati arryai hulo Israele, bwo fe ara inyi etamijani olo Hollum. Ati obeŋi laati iruhi,
\v 35 bwo fe italeyeuni adi egigilita tajya hosi. Tania ocuk adi ejiriŋa ataji hoi ihwa ademi.
\p
\v 36 Owon nya bwo fe nobo neyani sayyo afure honyi Anna ŋarri Fanuele otto woyo ba Aser. Imarwak inyi bwo amanyai inyi iko habi honyi aŋasi hattarik many hayamarik inyi,
\v 37 ette habi honyi ye bwo fe ara inyi nolobiloŋ. Arai aŋasi honyi atomwana hottohunik haŋwan. Odulo inyi itahabuyo Hollum ta aferuna iko amojo ette ilak busana aji imojit eneittok. Odulo inyi dia ta attari iko ta afanni daŋ.
\v 38 Ati inya attu asaa nya, ottu inyi ette isyo ahumo jyo Hollum ette ikyana te eito jyo hya hul ottifyai’to etalahuna ono Yerusalem.
\p
\v 39 Ninya attubani isi erre daŋ hun igyoroni ifahita huno Hobu, acaharai isi Galilea, amiji hosi Nasaret.
\v 40 Oboboloro nya leito alya ol ogol ette wanan iko nolofyoro bwo fe ifut inyi iko amehino ono Hollum.
\p
\v 41 Adahatye esyok honyi Yerusalem aŋasi daŋ ta neyom ono Allaŋan Anjelo.
\v 42 Inya labolo Yesu aŋasi ’tomon harrihai ofwoi nya isi daŋ ta amojo ihwa amok jihosi.
\v 43 Bwo fe ninya lacohunie isi te esidi ono neyom, arasa Yesu imiji Yerusalem. Obeŋi esyok honyi omijani.
\v 44 Ati igigiloi isi jo owon adi inyi liluluŋ wati. Adahai isi noloŋ abotye bwo fe ihalu ottifyai isi inyi jyo hutta haŋ hosi iko aati hul omijani’to inyi.
\v 45 Obeŋi isi onyurani inyi ette isi caharu Yerusalem ittifyari inyi.
\v 46 Ihalu oŋitek hunihoi onyurani isi inyi ihaji imojit eneittok ihiji hettiyanak. Itayiryo inyi jihosi bwo fe ifiyo inyi isi nefita.
\v 47 Illillihai aati daŋ hul itaniŋuni’to nyo ilofyoro inyi bwo fe obisi etarraŋita honyi.
\v 48 Ninya onyurani esyok honyi inyi, ette isi illilliha ette honyonyi jaran jihonyi, Lonyi hoŋ, nyo ittigemyo iye hohoi ihwania? Ettoho ani iko monyohoi attifya iye ta amijan tajya.
\v 49 Attati Yesu jaran, Nyo ittifyati tai ani? Itimoti tai jo oŋida ani awon ihaji Monyoŋ?
\v 50 Ati obeŋi nya isi itaniŋuni anyo ojo inyi jihosi.
\v 51 Acaharai inyi ikosi ette ruboro Nasaret bwo fe ifaha nya inyi jihosi, ette honyonyi gotyere erre huna itaji honyi.
\p
\v 52 Bwo fe oboboloruno Yesu to ofyoro bwo abolori hwan honyi iko ayiji honyi ihomom Hollum iko aati.
\c 3
\cl Angati 3
\p
\v 1 Ihiŋa etattomoni homiet ono elohobu Tiberio Cesare, owon nya Ponto Pilato amandir olo Yudea, bwo Erode ara eleittok olo Galilea, bwo illanyi Filipo ara eleittok olo afau Iturea iko Trakonito, bwo fe ara Lisania eleittok olo Abilene.
\v 2 Anas iko Kaifa arai ehumak hul obolori’to attati nekyana ono Hollum ’tuna jyo Yoane lonyi Sakaria lowonari inyi imur.
\v 3 Attati Yoane leten jyo amasik hutteger Yordano ittiyeniere aati jo oŋida isi iloiti atajya hosi ette ifwotuna batisimo ette Hollum busana eyyata hosi.
\v 4 Ihwa igyoroni libuk ono eyani sayyo Isaya ojo, “Iloŋo obo atulo to mur, Ette jaran, Ihuhumana nekoi Hobu, Itabisana ekota honyi ’tor.
\q1
\v 5 Itarryamahini adi awudorita daŋ, Bwo fe itosotonie adi adoŋyok, Itabisani adi nekota hun okukudoi’to, Bwo fe italiboroni adi nekota hun ogoŋye’to,
\v 6 Ette adi laati daŋ igonyuna netalahuna ono Hollum.”
\p
\v 7 Tania ikyana inyi jyo eluluŋ wati hul ofwonni’to jihonyi ifwotuniere batisimo ojo, Irata tai ihwa amunok. Ngai ojo jihatai ofuhoti ajore ono hottu’to?
\v 8 Oŋida ehanita hatai itahutani jo iloitoto tai ahode atajya hatai. Hejatta ta ahwattek hatai jo, Ara Abramo hohonyi hohoi, nyo eramak ni itai jo oremik Hollum ’yeuna lonyirok Abramo jyo amorwoi huna.
\v 9 Bwo fe ihwania ihanani atolu ihadde ’yanio. Oyefuni adi ayyanio daŋ hun obeŋi’to oŋijuni aŋer hun oyiji ette rwoŋonia lihima.
\p
\v 10 Attati eluluŋ ifiyo inyi ojori, Anyo ’tadi an ehanio hohoi?
\v 11 Attati inyi jaran jihosi ojo, Lya ol owon’to iko aboŋojin arrihai ijara hataharak lobo ol obeŋ iko obo aboŋo, bwo fe ol owon’to iko naŋiyo oŋida bwo fe inyi ihanio ihwo nya.
\p
\v 12 Ofwonni bwo fe amojok musuru jihonyi ifwotuniere batisimo ette isi ifiyo inyi ojori, Hettiyanani, ?anyo adi ehanio hohoi?
\v 13 Bwo inyi ette jaran jihosi, Hemojuna amusuru hun allaŋi aŋoco ono okuma.
\p
\v 14 Ette bwo fe oseŋer ifiyo inyi ojori, Ara bwo hohoi, anyo adi ehanio hohoi? Bwo inyi ojo jihosi, Hehorotyete aati te efiriwa kuyya ta netisyaha bwo fe heŋuŋunitati ta aduma hatai.
\v 15 Igigiloi aati ette isi ikikyana ta ahwattek hosi to Yoane ojori kuyya ara inyi Kristo.
\v 16 Ikyana Yoane jihosi daŋ ojo, Ebatisyo ni itai ta aari ati ottu adi lobo leittok al agalik’to ani al abeŋ ni asiru houna amuha honyi. Ibatisyo adi inyi itai to Oloyiri ol Olibo iko ta neema.
\v 17 Owon ayyani lihani honyi italiboryere ema honyi ette fyehina limugu honyi, ati oswahini adi acono lihima on obeŋ’to oremik dunyari.
\p
\v 18 Bwo fe ta nettittotya arryai ittittohi inyi asayyo hun oyiji’to jyo laati.
\v 19 Ati isiŋyo nya Yoane Erode te eram Erodia ŋorwoi illanyi bwo fe te erre arryai hun orrohoji’to hun ihanio inyi.
\v 20 Attati Erode inyyak fwanana obo arrohoji jyo erre huna daŋ te efitana honyi Yoane ibabus.
\v 21 Ninya atuk Yoane ebatisyo wati ottu Yesu bwo fe jihonyi attati Yoane ibatis inyi. Homojo inyi ette edou bwanya,
\v 22 attati Oloyiri ol Olibo isuruna jihonyi ihwa awolo attati nekyana ’tuna t’edou on ojo, “Iye Lonyi hoŋ al amuno ni bebe.”
\v 23 Inya itteryo Yesu ittiyenio arai aŋasi honyi atomwana hunihoi. Igigiloi laati jo inyi lonyi Yosefo, al ara lonyi Eli,
\v 24 al ara lonyi Matata, al ara lonyi Levi, al ara lonyi Meleki, al ara lonyi Yana, al ara lonyi Yosefo.
\v 25 al ara lonyi Matatia, al ara lonyi Amosa, al ara lonyi Nahama, al ara lonyi Eseli, al ara lonyi Naga,
\v 26 al ara lonyi Mata, al ara lonyi Matatia, al ara lonyi Simi, al ara lonyi Yoseke, al ara lonyi Yoda.
\v 27 al ara lonyi Yoana, al ara lonyi Resa, al ara lonyi Serubabele, al ara lonyi Salatiele, al ara lonyi Neri,
\v 28 al ara lonyi Meleki, al ara lonyi Adi, al ara lonyi Kosama, al ara lonyi Elemadama, al ara lonyi Ere,
\v 29 al ara lonyi Yose, al ara lonyi Eliesere, al ara lonyi Yorima, al ara lonyi Natata, al ara lonyi Levi.
\v 30 al ara lonyi Simeona, al ara lonyi Yuda, al ara lonyi Yosefo, al ara lonyi Yonama, al ara lonyi Elayakima,
\v 31 al ara lonyi Melea, al ara lonyi Mena, al ara lonyi Matata, al ara lonyi Natana, al ara lonyi Davide,
\v 32 al ara lonyi Yese, al ara lonyi Obede, al ara lonyi Boasa, al ara lonyi Salamone, al ara lonyi Nasona.
\v 33 al ara lonyi Aminadaba, al ara lonyi Aruni, al ara lonyi Eserome, al ara lonyi Perese, al ara lonyi Yuda,
\v 34 al ara lonyi Yakobo, al ara lonyi Isako, al ara lonyi Abramo, al ara lonyi Tera, al ara lonyi Nahora,
\v 35 al ara lonyi Seruga, al ara lonyi Ru, al ara lonyi Pelege, al ara lonyi Ebere, al ara lonyi Sela.
\v 36 al ara lonyi Kanana, al ara lonyi Arufakasada, al ara lonyi Seme, al ara lonyi Noa, al ara lonyi Lemeke,
\v 37 al ara lonyi Metusela, al ara lonyi Enoka, al ara lonyi Yerede, al ara lonyi Malelele, al ara lonyi Kanana,
\v 38 al ara lonyi Enosa, al ara lonyi Sete, al ara lonyi Adam, al ara lonyi Hollum.
\c 4
\cl Angati 4
\p
\v 1 Ifut nya Yesu iko Oloyiri ol Olibo inya lattu inyi to hari Yordano bwo fe orihoro nya Oloyiri inyi itwa mur.
\v 2 Ette inyi itoŋo dia oŋitek atomwana aŋwan hun okemyere etisyahani inyi. Obeŋ nya inyi oŋiyo omuk erre to oŋitek hwa bwo fe al isidi oŋitek hwa oniama inyi.
\v 3 Attati etisyahani al anya’to Sitan jaran jihonyi jo, Kuyya ira iye Lonyi Hollum iloito amorwo ana hetera aŋirya.
\p
\v 4 Attati Yesu itarraŋ jihonyi ojo, Igyoroni ojo, “Obeŋ atulo isu ta aŋirya hama.”
\p
\v 5 To obo asaa attati etisyahani iyaro inyi ihide doŋe ette itahutana inyi olobyehyen hutta fau.
\v 6 Attati jaran jihonyi, Esyo adi ni jihoi eleittok itoŋori ahobu hosi bwo fe ifwotuniere akwatan hosi, nyo isyori nya isi jihoŋ, bwo fe aremik ni isyo jyo lya al awak ni isyo.
\v 7 Kuyya itahabuyo iye ani arai adi isi daŋ ahunohoi.
\p
\v 8 Attati Yesu itarraŋ jihonyi ojo, Igyoroni jojo, “Oŋida iye itahabuyo Hobu hoi Hollum, Bwo igyama jihonyi hama.”
\p
\v 9 Attati inyi iyaro Yesu Yerusalem ihide haji imojit eneittok ette jaran jihonyi, Kuyya ira iye Lonyi Hollum itakwahai ahwan hoi tene,
\v 10 nyo igyoroni igyerita jo, “Ifak adi Hollum anjelohyen honyi irrirryari iye.”
\v 11 Igyoroni bwo fe jo, “Itarrauni adi isi iye ta ahas hosi Jo oŋida iye ibeŋ isyak eju hoi imorwoi.”
\p
\v 12 Attati Yesu itarraŋ jihonyi ojo, Igyoroni jo, “Oŋida ibeŋ iye ikemyo Hobu hoi Hollum.”
\p
\v 13 Latohu etisyahani akemyo inyi te erre daŋ ette inyi leten do addi.
\p
\v 14 Ocohuno Yesu ta agolon ono Oloyiri ol Olibo many Galilea bwo fe asayyo honyi ette isarrahina ifauhyen daŋ.
\v 15 Attati inyi itteryo ittiyenio ihasik imojiti bwo itakwace isi daŋ afure honyi.
\p
\v 16 Attati inyi ’tuna Nasaret ninya obolorori inyi, bwo fe olo inyi ihaji imojit to sabatoh ihwa ara nya emohit honyi.
\v 17 Attati inyi wotya iheniere abuk ono eyani sayyo Isaya. Aŋa inyi abuk ette nyurana amaji an igyoroni dia ojo,
\v 18 “Owon Oloyiri olo Hobu jihoŋ, Onyimu inyi ani ittiyeniere asayyo hun oyiji jyo alocaŋak. Ifahu inyi ani iramaniere ahohina jyo hul ifitani, Bwo fe itamijyere aŋodok, Ihohiniere hya hul ittigemye,
\v 19 Iramaniere neŋa ono amehino ono Hobu.”
\p
\v 20 Ihyanak inyi abuk ette isyo jyo hul itayirye’to ette itoŋo ikurus bwo fe aati daŋ huttotwa haji ette ikikorihina jihonyi.
\v 21 Attati inyi jaran jihosi ojo, Ahana itasiruni ekyanita huno abuk ana ihwa itayiruna tai.
\p
\v 22 Ikyanai isi daŋ on oyyu tenyi bwo fe illillihai te ekyanita hun ikyana inyi te etuk honyi ette ifiyo ojori, Lonyi Yosefo olo?
\v 23 Attati inyi jaran jihosi, Ahode ijatta adi itai jihoŋ jo, Akim, itaŋida ahwan hoi. Etaniŋu hohoi erre hunya ihanio iye to Kapernaum. Ihanie bwo fe dini erre ihwo nya.
\v 24 Ati ajo ni jihatai obeŋ etahabuyo jyo eyani sayyo imiji hosi.
\v 25 Ahode eramak ni itai jo owoni nya nobiloŋi ŋorwo hun oyei habiak hosi arryai ifau Israele to oŋitek huno Elija ninya obyaŋari ahide asayere ta aŋasi hunihoi iko ayafajin ille, bwo fe attu ahure lifau daŋ.
\v 26 Obeŋ nya Hollum ifak Elija jyo aŋorwo hunia ati ifahini inyi imiji Sarefata lifau Sidon jyo obo aŋotte on oye habi honyi.
\v 27 Olwaji nya aati ’tallulu ifau Israele ta aŋasi huno eyani sayyo Elisa, ati obeŋ nya itaŋidari obo olosi arari Namana olo Sirya.
\v 28 Ninya itaniŋuni laati itwa haji imojit erre huna, ifuti nya isi daŋ iko eloŋojita.
\v 29 Attati isi dyoto daŋ ette iyaro inyi to miji addi ette rihoro inyi ihide doŋe ninya oduhorik isi amiji hosi jo oŋida isi esulu inyi tohide ’walaŋ.
\v 30 Ati ojiŋu inyi tehiji hosi ette leten addi.
\p
\v 31 Ette inyi leten Kapernaum amiji ono Galilea. Bwo ittiyenio inyi laati to sabato.
\v 32 Illillihai isi te ettiyenita honyi, nyo arai ekyanita honyi ihwo huno eleittok.
\v 33 Bwo fe ihaji imojit owon obo atulo ol owon iko ajok on orroho’to, ette inyi lwaha on okwat ette jaran,
\v 34 Aii Yesu Anasaratanani, anyo hiram iwak iye jihohoi? Ittu iye itarrohojyere hohoi? Amijak ni iye, iye Aliboroni olo Hollum.
\p
\v 35 Ette Yesu iŋere ojo, Odwai, obusak inyi. Ilo addi. Attati ajok ania ihanana ahwe jihonyi ette ’tuna totwa honyi addi ati obeŋ itarroho inyi.
\p
\v 36 Illillihai laati daŋ ette hahaya ta ahwattek hosi ojori, Anyo hiram ana? Ta adwaran iko agolon ifuha inyi ajok ette inyi jiŋuna addi totwa tulo.
\v 37 Bwo itisarrahini eram honyi jyo amisik daŋ hun onyihai’to dia.
\p
\v 38 Odyoto inyi ette dyaharo aji imojit ette leten jiŋana ihaji Simone. Oŋwai hamoni Simone iko anahan hwan bwo isi ette mojo Yesu oŋida olwak inyi.
\v 39 Attati inyi wotya iger ijotit honyi ette ifuhara anahan hwan bwo anahan hwan honyi ette ’turoro ette inyi dyoto kwak ette igyama aŋiyo jihosi.
\p
\v 40 Liddorro oloŋ, iyaŋunie aati daŋ aŋwak jyo Yesu, hul oŋwai’to iko eŋwati hun olufaji bwo iyyabak inyi ahas honyi jihosi itaŋidaryere isi daŋ.
\v 41 Bwo ajohin hun orrohoji’to ette fwanna addi to wati ette lwahatyo ojori, Iye Lonyi Hollum. Ifuhak Yesu isi daŋ bwo fe iyimo inyi isi ikyanai nyo omijani isi daŋ jo inyi Kristo.
\p
\v 42 Afaŋ amotye hanyik ette inyi leten ihidyofo. Ottifyai aati daŋ inyi attati nyurana inyi bwo iyimoi isi inyi aleten addi.
\v 43 Ati ojo inyi jihosi, Oŋida ani ettiyenio asayyo hun oyiji huno olobye ono Hollum jyo amisik omuk nyo inyi eram an ifahunierek ani.
\v 44 Bwo fe ittiyenio inyi ihasik imojiti huno Galilea.
\c 5
\cl Angati 5
\p
\v 1 Ottidani laati Yesu nyo awahi isi itaniŋyo neram Hollum, ette inyi wotya iger hari Genesaret.
\v 2 Attati inyi igonyuna atogoli arrihai ahania nyo ofwoi ayafohok illillayere aboyo hosi.
\v 3 Isurok inyi itogol Simone ette leten to otifor kai, attati ittiyenio aati hul owotyai ilotifor bwo inyi itwa togol.
\v 4 Al atohu inyi ekyana ojo inyi jyo Simone, Iyaro atogol hoi jyo amaji on owudo bwo ibironia aboyo hatai iyafohuniere aham.
\p
\v 5 Itarraŋ Simone ojo, Leittok eyafoho hohoi attari daŋ ebeŋ hohoi eyafohu omuk. Ati te ekyana hoi ebirok adi hohoi aboyo.
\v 6 Ninya ihanie isi ihwo nya ayafohuni isi aham arryai attati aboyo hosi jaran afuto.
\v 7 Ette isi itakodo jyo aati hutto togol ebotye oŋida olwahi isi. Ette isi itufutana atogoli many ojarik edyo itwa hari.
\v 8 Ninya igonyu Simone Petro ana ette inyi rigoŋi ihosyere hejek Yesu ette jaran, Hobu ilo jihoŋ addi, nyo ara ni aheyyani.
\v 9 Nyo illillihai isi daŋ ta ayafohuna hosi aham hun olwaji.
\v 10 Bwo fe illillihai Yakobo iko Yoane onyirok Sebedeyo hinya arai’to hutteluluŋ Simone. Attati Yesu jaran jyo Simone, Hebaŋ nyo ihalu iloŋo adi iye aati.
\v 11 Ninya iyaŋunie isi atogoli hosi ilotifor idehini isi erre daŋ ette jifaru Yesu.
\p
\v 12 To ninya to nya owon Yesu jyo obo amiji, ette obo atulo ’tallulu ’tuna jihonyi. Origoŋ inyi lihomon Yesu ette juru ifau ette jaran, Hobu, al iwak iye iremik iye itaŋida ani.
\p
\v 13 Attati Yesu ihalamana ani honyi ette ’tir inyi ette jaran, Ihwa awak ni, toŋidara. Ette attallulu atulo alya ’turoro kwak.
\v 14 Attati Yesu ifahina inyi ojo, Heramak obo atulo eram ana, ati ilo itahutak ahwan hoi jyo ehumani ihaji imojit bwo fe iyaro ehumi ono aŋidari hoi ihwa iramak nya Mose jyo laati ihaniere te etamijani.
\v 15 Tania ette eram Yesu isarrahina imasik daŋ attati eluluŋ wati arryai ’tubanio itayiryere jihonyi bwo fe ifwotuniere aŋidari t’eŋwati hosi.
\v 16 Ati olo inyi limur imojori.
\p
\v 17 To oŋitek hwa ninya ittiyeniere Yesu owoni Farisei iko ettiyanak hulo efahita aŋati. Ofwonni nya isi jyo amisik huno Galilea iko Yudea bwo fe to Yerusalem bwo owon agolon ono Hobu jyo Yesu itaŋidaryere laati.
\v 18 Attati aati kafuna obo atulo ol ogolyo hwan te ekafit, attati isi ’tifya ekoi iyaŋuniere atulo lya jyo Yesu.
\v 19 Ati obeŋi isi orumani ekoi itajiŋaniere inyi nyo ifudai aati. Tania odohi isi ihide haji ette ’tul aji attati ililyofonia inyi te ekafit honyi jyo Yesu ihiji wati.
\v 20 Ninya igonyu Yesu neruk hosi ojo inyi, Illaŋ, ahohinie eyyata hoi.
\p
\v 21 Attati egyoroki iko Farisei iŋuŋunita ojori, ngai alya al ikyana’to ekyana ono amoryo? Obeŋ tulo oremik hohina eyyata arari Hollum fe abotye.
\p
\v 22 Ati omijak Yesu egigilita hosi ette inyi ifiyo isi ojo, Nyo igigiloti tai ta atajya hatai ihwania?
\v 23 Anani an ilyaha’to, ajaran hoŋ jo, Ahohinie eyyata hoi, kuyya ajaran hoŋ jo, Totte, adahai?
\v 24 Ati oŋida itai imijana jo owon adwaran jyo Lonyi tulo ihohiniere eyyata wati hutta fau. Tania ojo inyi jyo atulo ol ogolyo hwan, Ajo ni jihoi, otte, obubunak ejotit hoi, ilo ihaŋ.
\v 25 Teyya ette inyi dyoto kwak tehiji hosi ette bubunana ejotit odwo oferyere inyi, ette leten ihaŋ hosi al itahabuyo Hollum.
\p
\v 26 Tania ette isi daŋ illilliha, ette itahabuyo Hollum bwo fe ifuti isi iko abaŋi ette jaran, Egonyu hohoi ahana erre hun olufaji’to.
\p
\v 27 Ihalu ana alo Yesu alet ette nyurana lamojoni musuru al anya’to Levi. Itoŋo inyi ihaji on odumarik amusuru, attati Yesu jaran jihonyi, Ijifunie ani.
\v 28 Attati inyi dyoto ette ijifaru inyi.
\p
\v 29 Attati Levi ihanana eyom on obolo ihaji honyi tenyi bwo fe olwaji eluluŋ wati iko lamojok musuru hul oŋiye iteremeja ikonyi.
\v 30 Attati Farisei iko egyorok ikikyana jyo leyiyanak hulo Yesu ojori, Nyo iŋiyete tai bwo fe imatati iko lamojok musuru iko leyyak?
\v 31 Attati Yesu itarraŋ jihosi ojo, Laati hul oŋidari’to obeŋi awahi afwatan jyo akim, ati hul oŋwai’to ofwoi isi jyo akim.
\v 32 Abeŋ ni attu iloŋori ayijok ati attu ni iloŋori leyyak, oŋida isi iloiti atajya hosi t’eyyata hosi.
\p
\v 33 Attati isi jaran jihonyi, Oferutai eyiyanak hulo Yoane bwo fe omojoi gagaga bwo fe eyiyanak hulo Farisei ihanie ihwo nya, ati hulohoi oŋiye bwo fe amatai.
\p
\v 34 Ifiyo Yesu isi ojo, Oferutai mottyarak hayamani al itoŋoi isi ikonyi?
\v 35 Ofwonni adi oŋitek hun iyarik ayamani t’ehiji hosi addi bwo to noloŋ to nya ette adi isi feruna.
\p
\v 36 Iramak bwo fe inyi isi arryamara on ojo, Obeŋ obo atulo ogwasu aboŋo aŋejuk ette ’tafana jyo amarwani. Kuyya ihanio inyi ihwania ogwasaru adi aŋejuk addi ette ilak remehina jyo odwo.
\v 37 Bwo fe obeŋ obo ijuhok abalu aŋejuho itwa ihulo amarwani. Al ijuhok obo ihwania, obor adi abalu ehulo amarwani ette abalu iko ehulo byaŋan.
\v 38 Oŋida ijuhoni abalu aŋejuho itwa ihulo aŋejuho.
\p
\v 39 Bwo fe obeŋ obo atulo al amat abalu amarwani inyyak wahan abalu aŋejuk nyo ojo inyi, Oyyu abalu amarwani.
\c 6
\cl Angati 6
\p
\v 1 To oloŋ sabato addaddaharai Yesu iko leyiyanak honyi ta atwa matta hima ette leyiyanak honyi giluna omuk nema ette fofo ette niŋa.
\v 2 Ifiye omuk Farisei isi ojori, Nyo ihaniete tai ariŋ on odwa’to ihaniere to noloŋ sabato?
\v 3 Bwo Yesu ette itarraŋ ojo, Ibyaŋata tai ihenuna erre hunya ihanio Davide iko laati honyi laniamai isi?
\v 4 Ojiŋak nya inyi ihaji ono Hollum ette duhuna emunio ette ŋiyo bwo fe isyo inyi omuk jyo laati honyi. Isi emunio hun odwari’to hun obeŋ tulo oŋiyo arari ehumak hama.
\v 5 Attati inyi jaran jihosi, Ara Lonyi tulo Hobu olo sabato.
\p
\v 6 To obo sabato ojiŋak inyi ihaji imojit ittiyeniere. Owon dia obo atulo ol oye aani iŋet honyi.
\v 7 Bwo egyorok iko Farisei ette ikikorihina jyo Yesu imijyere kuyya itaŋida adi inyi atulo to oloŋ sabato nyo awahi isi rasana inyi.
\v 8 Ati omijak inyi egigilita hosi ette jaran jyo atulo ol oye hani, Otte, owotya ihiji wati. Bwo inyi ette dyoto ette wotya dia.
\v 9 Attati Yesu jaran jihosi ojo, Efiyo ni itai, oyyu ihaniere on oyyu to oloŋ sabato kuyya ihaniere on orroho? Anani on oyyu’to, etahoruna atulo kuyya attohoro?
\v 10 Attati inyi mijo jihosi daŋ attati jaran jyo atulo lya, Onitok aani hoi. Bwo inyi onitok ihwo nya ette aani honyi ŋidari.
\v 11 Ati ifuti nya isi daŋ iko ajore ette itarisa ta ahwattek hosi ojori, Ehanio adi hohoi anyo jyo Yesu.
\p
\v 12 Jyo oŋitek hunia attati Yesu leten idoŋe imojori, bwo fe ta arwe daŋ omojo inyi jyo Hollum.
\v 13 Lafaŋ amotye iloŋu inyi eyiyanak honyi ette nyimuna jihosi ’tomon harrihai hul ifurak inyi lefahatk.
\v 14 Simone inya ifurak inyi Petro, iko illanyi Andrea, Yakobo, Yoane, Filipo, Bartolomeo,
\v 15 iko Matteyo, Tomaso, Yakobo lonyi Alufayo, Simone Selotl,
\v 16 bwo Yuda lonyi Yakobo bwo fe Yuda Iskariote letinyyaŋani Yesu.
\p
\v 17 Isuru Yesu ikosi ette wotya igum doŋe iko eluluŋ heyiyanak arryai iko eluluŋ wati hul ofwonni’to to Yudea, to Yerusalem, bwo fe to masik hutteger Turo iko Sidon. Ofwonni laati daŋ itaniŋyere jyo Yesu iko itaŋidaryere ahwattek hosi t’eŋwati hosi.
\v 18 Bwo fe hya hul ittigemye ajohin hun orrohoji’to aŋidari daŋ.
\v 19 Bwo fe ottifyai eluluŋ wati daŋ ittiryere inyi nyo ottu adwaran jihonyi itaŋidaryere isi daŋ.
\v 20 Attati inyi mijo jyo leyiyanak honyi ette jaran, Omunoti itai alocaŋak, nyo ara Hollum a Hobu hatai.
\v 21 Omunoti itai hul iniamati’to ihwania nyo itifoŋ adi Hollum itai. Omunoti itai hul iyyoti’to ihwania nyo isuhotyete adi itai.
\p
\v 22 Omunoti al oliwarik aati itai bwo fe al ihari isi itai; al ipice laati itai bwo al oliwarik isi afureta hatai te eram ono Lonyi tulo.
\v 23 Omunoti to oloŋ ania bwo fe isilihitati ta amuno nyo owon aduma hatai on obolo lidou nyo ihanie nya hohonyok hosi ihwo nya jyo leyyak sayyo.
\p
\v 24 Ati orroho bebe jihatai abarak, nyo inyurana nya itai edumit hatai.
\v 25 Orroho bebe jihatai hul ifoŋata’to ihwania nyo iniamati adi itai. Bwo orroho bebe jihatai hul imunoti’to ihwania nyo ijiriŋati adi itai bwo fe iyyoti adi itai.
\v 26 Orroho bebe jihatai al itahabuye laati itai nyo ihanie nya hohonyok hosi ihwania jyo eyak sayyo hul ipali’to.
\p
\v 27 Ati ajo ni jihatai hul itaniŋyete’to jo, Omunoti amyorok hatai, ihaniete on oyyu jyo hya hul oliwarik’to itai.
\v 28 Omunoti hya hul ipice’to itai, omojoti to hya hul ihanie’to on orroho jihatai.
\v 29 Lya al anaŋ’to iye amahalyo isyara bwo fe ebotye. Bwo fe lya al iyaro’to aboŋo hoi isyara bwo fe agamis hoi.
\v 30 Isyatta erre jyo hya hul omojoi’to, bwo fe hya hul iyarai’to erre hatai henyyahata mojuna isi.
\v 31 Ihaniete jyo laati ihwa iwahata tai isi ihanie jihatai.
\p
\v 32 Kuyya imunoti tai aati hul omunoi’to itai, anyo adi ayiji jihatai? Ara dwadi bu eyyak omunoi isi hya hul omunoi’to isi.
\v 33 Kuyya ihaniete tai on oyyu jyo hya hul ihanie’to jihatai on oyyu, anyo adi ayiji jihatai? Nyo ihanie eyyak daŋ ihwo nya.
\v 34 Kuyya isyatta tai erre jyo hul igigiloti tai jo inyyahunie adi, anyo adi ayiji jihatai? Ara dwadi bu eyyak isyori jyo eyyak bwo fe ofwonni inyyak inyyahuna.
\v 35 Ati omunoti amyorok hatai, ihaniete on oyyu jihosi, isyatta jihosi bwo hegigiloti jo oŋida isi inyyahunie; obolo adi edumit hatai bwo irata adi itai olonyirok hulo lya al agalik’to daŋ. Nyo omehino inyi jyo hya hul obeŋi’to ojori humo, bwo fe jyo hul orrohoji’to.
\v 36 Omehiniete ihwa Monyatai ol owon’to iko amehino.
\p
\v 37 Heŋototo laati bwo obeŋ adi Hollum oŋot itai. Heŋototo naye jyo laati bwo obeŋ adi Hollum oŋot aye jihatai. Obusana laati bwo obusak adi Hollum itai.
\v 38 Isyatta erre jyo laati bwo isyo adi Hollum jihatai ekemit on oyyu, an isihi bwo fe osyarai ilet. Nyo ekemit an isyatta tai inyyahuno adi Hollum jihatai.
\p
\v 39 Inyyak inyi bwo fe iramana isi arryamara ojo, Oremik oloŋodo rihotyo aŋodok? Obeŋi adi isi okwahari iwure?
\v 40 Obeŋ obo eyiyanani agalik ettiyanani honyi, ati al ihum inyi ittiyenio ara adi inyi ihwa ettiyanani honyi.
\p
\v 41 Aŋai adi igonyu obo alatai alle honyek al awon jo illanyi bwo obeŋ inyi igigilo te etoi on obolo’to otto honyek honyi?
\v 42 Kuyya aŋai ikyana adi obo alatai jyo illanyi jo, Hadi, agorotu ni alle honyek to honyek hoi bwo owon etoi on obolo’to otto ononyi? Ara olo ahenyabani. Oŋida ahosyere ogorotu inyi etoi on obolo’to otto honyek honyi attadi inyi iremehina igonyuna ligorotuniere alle honyek otto honyek illanyi.
\p
\v 43 Nyo obeŋ ayyani on oyyu’to oremik ŋijuna aŋer hun orrohoji’to, obeŋ bwo fe ayyani on orroho’to oŋiju aŋer hun oyiji.
\v 44 Nyo omijani ayyanio daŋ ta aŋer hosi. Ittallihi laati huruna aŋer ŋaboli to hikwa bwo fe ittallihi isi huruna aŋer ajalaŋi te laŋi.
\v 45 Ojiŋuni erre hun oyiji’to totwa taji tulo ol oyyu’to, bwo ojiŋuni erre hun orrohoji’to to taji tulo ol orroho’to. Nyo to taji ofwonni erre hun ikyanai te etuk.
\p
\v 46 Nyo iloŋoti tai ani jo, Hobu, Hobu, bwo ibyaŋata tai ihaniete erre hun eramak ni itai?
\v 47 Hya daŋ hul ofwonni’to jihoŋ bwo itaniŋye ekyanita hoŋ bwo fe ihanie isi, etahutak ni itai jo arai isi ihwa baŋai.
\v 48 Arai isi ihwa atulo ol oduhok’to aji. Obwak inyi ifau ette ihanana etteri haji ihide morwoi bwo fe al ottu egura hari, obeŋ adi aji okwaharo nyo oduhoni inyi ihide morwoi.
\v 49 Bwo lya al itaniŋyo’to ekyanita hoŋ bwo fe obeŋ ihanio ara inyi ihwa atulo ol oduhok’to aji ifau bwo obeŋ ara ihide morwoi. Al ottu egura hari ette inyi kwaharu an atturo.
\c 7
\cl Angati 7
\p
\v 1 Latuhok Yesu ettiyenio honyi jyo aati daŋ, ette inyi leten Kapernaum.
\v 2 Ihwania owon nya obo jafit iko apit ol omuno inyi bebe. Oŋwai nya inyi ilyaha aye.
\v 3 Inya itaniŋu jafit eram Yesu, ifak inyi eleittaha hulo Yudea jyo Yesu jo oŋida inyi ottu itaŋida apit honyi.
\v 4 Ninya lafwonni isi jyo Yesu ikyanai isi jihonyi ta amehino ojori, Osiru itaŋida iye lapit honyi ihwo awak inyi.
\v 5 Nyo omuno inyi aati hohoi bwo fe oduhok nya inyi aji imojit hohoi.
\p
\v 6 Attati Yesu fwatan ikosi. Hobeŋ inyi afany ihaji, ifak jafit orryahat jihonyi hul ojori, Hobu hettigemyo ahwan hoi, nyo obeŋ osiru jihoŋ ittu iye ihaji hoŋ.
\v 7 Bwo abeŋ ni asiru ilari jihoi. Ati ikyanai te etuk bwo oŋida adi apit hoŋ.
\v 8 Nyo aniŋyo ni eleittok hoŋ bwo oseŋer hoŋ oniŋye ani. Aremik ni jaran jyo obo, Ilo, bwo inyi ette leten; bwo fe jyo lobo, Waŋ, bwo inyi ette ’tuna; bwo ajo ni jyo apit hoŋ, Ihanie ania, bwo inyi ette ihanio.
\p
\v 9 Itaniŋu Yesu ana, illilliha inyi ette yito jyo eluluŋ wati ninya ijifatyo’to inyi ojo, Eramak ni itai, ara dwo bu jyo Israele abeŋ ni anyurak obo neruk on obolo ihwa ana.
\v 10 Bwo hya hinya ifak inyi ocohunie ihaji, onyurani isi apit laŋida.
\p
\v 11 Ihalu gaa, olo Yesu jyo obo amiji an ifurani Nain bwo leyiyanak honyi iko eluluŋ wati arryai ette fwatan ikonyi.
\v 12 Ilyaha Yesu ikat miji, iwwaharai aati atulo ol oye. Ara nya inyi olonyi abotye jyo honyonyi, nolobiloŋ, bwo fe ofwonni eluluŋ wati hutto miji ikonyi.
\v 13 Inya igonyu Hobu inyi, ette inyi mehino jihonyi ette jaran jihonyi, Heyyo.
\v 14 Attati inyi ’tuna ette ’tir ekafit honyi ette ewwak wotya. Ojo Yesu, Illa ajo ni jihoi, totte.
\v 15 Teyya ette ayani alya dyoto ette itteryo ekyana. Bwo Yesu ette isyo inyi jyo honyonyi.
\p
\v 16 Abaŋi laati daŋ bebe ette isi itahabuyo Hollum ojori, Adyoto eyani sayyo ol obolo ihiji hohoi bwo fe attu Hollum jyo laati honyi.
\v 17 Isarrahi eram ana ifau Yudea daŋ iko ifauhyen daŋ hun onyihai’to dia.
\p
\v 18 Iramani leyiyanak hulo Yoane erre huna jihonyi.
\v 19 Bwo Yoane ette iloŋuna leyiyanak arrihai ette ifahina isi jyo Hobu ifiyere inyi ojo, Iye alya linya ojori eyak sayyo jo ottu adi, kuyya oŋida hohoi etila obo?
\v 20 Ofwoi isi jyo Yesu ette jaran, Ifahu Yoane Batista hohoi jihoi ojo, Iye alya ol ojori laati jo ottu adi, kuyya oŋida hohoi ettifya obo?
\v 21 Ta asaa to nya itaŋida Yesu aati t’eŋwati hosi bwo fe ifuhak inyi ajohin hun orrohoji’to. Jyo hya hul oŋodoi’to isyo inyi amijo.
\v 22 Bwo inyi ette itarraŋ jihosi ojo, Ifwatta iramana Yoane erre hun igonyuna tai bwo fe hun itaniŋuna tai. Omijye aŋodok, adahai aŋurak, oŋidari aati ’tallulu, itaniŋye atuhok, ibuhuni ayak bwo fe ittiyenie asayyo hun oyiji jyo alocaŋak.
\v 23 Bwo omuno adi lya ol obeŋ’to iha eram hoŋ.
\p
\v 24 Acaharai lefahat hulo Yoane, ette Yesu itteryo ikyana ihiji wati te eram Yoane jo, Ifwatta nya itai imur imijyere anyo? Igonyuna nya itai osiholoti on ohuta oyyami? Obeŋ.
\v 25 Ati ifwatta nya itai imijyere anyo? Kuyya ifwatta tai imijyere atulo ol iyyafatyo’to aboŋojin hun ilamani? Ahode hul iyyafani’to aboŋojin hun ilamani amanyai isi ihasik hobwok.
\v 26 Ati ifwatta nya itai imijyere anyo? Kuyya eyani sayyo? Afe, eramak ni itai jo agalik Yoane eyani sayyo.
\v 27 Nyo igyoroni ekyanita huna tenyi ojo, “Imijye, efak ni eyani sayyo hoŋ ahosyere hoi, Al ihuhumak’to nekoi ahosyere hoi.”
\p
\v 28 Eramak ni itai jo, Ihiji wati daŋ hul isiuni obeŋ obo agalik Yoane. Ati lya ol omuta’to ilobye Hollum agalik adi inyi Yoane.
\p
\v 29 Itaniŋuni aati iko amojok musuru ekyanita honyi ette isi itahabuyo Hollum, nyo ibatisye nya isi ta batisimo ono Yoane.
\v 30 Ati ihari nya Farisei iko eleittaha awahan Hollum bwo fe obeŋi isi ifwotuni batisimo jyo Yoane.
\p
\v 31 Etarrijohi adi ni aati hulo iko anyo? Arai isi ihwa anyo?
\v 32 Arai isi ihwa aduri hul itoŋoi’to lisuk bwo illilloŋoi illarak hosi ojori, Ehut hohoi acuwali jihatai bwo itai ibyaŋata ihyati. Eyyo hohoi atwari bwo itai ibyaŋata iburyete.
\v 33 Nyo ottu Yoane Batista ol obeŋ oŋiyo aŋirya bwo fe obeŋ amata aari ajalaŋi, bwo itai ijatta jo orrohoja inyi.
\v 34 Ottu Lonyi tulo ol oŋiyo bwo fe amata bwo itai ijatta ara inyi alaŋaru iko arumani bwo fe amotte hamojok musuru iko leyyak.
\v 35 Itahutani ehanita Hollum jo obisi ofyoro honyi.
\p
\v 36 Iloŋo obo olo Farisei Yesu iŋiyere ikonyi. Attati inyi leten ihaji Fariseitanani ette itoŋo iger teremeja iŋiyere.
\v 37 Bwo fe owon nya obo aŋotte ono amiji ania an ara’to aheyyani. Itaniŋu inyi jo oŋiyo Yesu ihaji Fariseitanani, ette inyi iyaŋuno arya ta akarajaja an ara’to ahiyali.
\v 38 Ette inyi wotya ihorwoŋ Yesu iger hejek honyi ette ’yo. Oyihi inyi eyyo ihejek Yesu ette ifufus to ofir honyi ette jur ejek honyi bwo ette iyalyo ta arya.
\v 39 Tania al igonyu Afariseitanani linya iloŋu’to Yesu, ojo inyi ta ataji honyi, Ara dwo atulo olo eheyani sayyo omijak dwo inyi anani aŋotte an ottir’to ania inyi nyo ara inyi aheyyani.
\p
\v 40 Attati Yesu itarraŋ jihonyi ojo, Simone, ajo ni ekyana omuk erre jihoi. Bwo inyi ette itarraŋ ojo, Hettiyanani ikyanai.
\v 41 Ojo Yesu, Owon nya obo atulo iko aati horos honyi arrihai, ara ono atulo abotye arobia esiha miet, bwo obo arobia atomwana miet.
\v 42 Obeŋi isi oremehini duma ahorosi hosi ette inyi busana isi daŋ. Tania alali adi ol omuno’to inyi agalik?
\v 43 Ojo Simone, Egigilo ni jo lya ol obusak inyi hun olwaji. Bwo Yesu ette jaran jihonyi, Iŋot iye on obis.
\v 44 Oyito inyi jyo aŋotte ania ette jaran jyo Simone, Igonyu iye aŋotte ana? Ajiŋak dwo ni ihaji hoi, ibeŋ iye isyo ani aari illillayere ejek hoŋ ati oyihi inyi eyyo ihejek hoŋ ette ifufus to ofir honyi.
\v 45 Ibeŋ dwo iye ijur ani, ati many hajiŋak ni ihaji, ojuryo inyi ejek hoŋ.
\v 46 Ibeŋ dwo iye iyal ahou hoŋ te eyali ati iyal inyi ejek hoŋ ta arya.
\v 47 Ihwania eramak ni iye jo ahohinie eyyata honyi hun olwaji nyo omuno inyi ani bebe. Ati lya al ahohinie eyyata hun omutari omuta namuno honyi bwo fe.
\v 48 Attati inyi jaran jyo aŋotte, Ahohinie eyyata hoi.
\p
\v 49 Attati hya hul itoŋoi’to iger teremeja ikonyi itteryo ikyana ta ahwattek hosi ojori, ngai olo ol ohohi’to eyyata?
\v 50 Attati Yesu jaran jyo aŋotte, Italahu eruk hoi iye. Ilo te elik taji.
\c 8
\cl Angati 8
\p
\v 1 Ihalu olo Yesu totwa misik ittiyeniere asayyo huno olobye Hollum. Ofwoi leyiyanak ’tomon harrihai ikonyi.
\v 2 Bwo fe ofwoi aŋorwo hunya itaŋidaruni jyo ajohin hun orrohoji’to iko eŋwati ikonyi. Owon bwo fe Maria an ifurani Madalena inya ifuha Yesu ajohin hattarik hun orrohoji’to,
\v 3 bwo Yoana ŋorwoi Cusa legyamani olo Erode iko Susana bwo fe omuk arryai. Olwahi aŋorwo huna Yesu iko leyiyanak honyi te erre hosi.
\p
\v 4 Ottubanie eluluŋ wati arryai bwo aati to misihi daŋ ette fwatan jyo Yesu attati inyi ikyana jihosi ta arryamara on ojo,
\v 5 Olo obo atulo yehina enyomo honyi. Hoyehi inyi ofodoŋonie omuk enyomo likoi bwo aati adak ette ryehina ta nejek hosi bwo fe naheny ette kuba.
\v 6 Ofodoŋonie omuk ihiji morwoi bwo isi ette isuruna ette oloŋ itayoho afarawa hosi nyo obeŋi aboro ofuji.
\v 7 Ofodoŋonie omuk lihiji hikwa, ette isi isuruna arabotye iko nekwa ette nekwa itabunara isi.
\v 8 Okwahinie omuk jyo aboro hun oyiji ette isuruna on oyyu bwo ihalu ette fwanna ŋerihina ema esiha abotye. Hekyana inyi ihwania ette inyi jaran bwo fe ojo, Lya ol owon’to iko ayyaha ijara inyi hetaniŋu.
\p
\v 9 Attati leyiyanak honyi ifiyo inyi awoyo hiram ono arryamara ana.
\v 10 Ojo inyi jihosi, Italeyehi Hollum jihatai nelahode ono olobye honyi ninya idimani ati jyo hul omuk ikyanai jihosi ta arryamara jo al omijye isi obeŋi adi isi igonyuni, bwo fe al itayirye isi obeŋi adi itaniŋuni.
\p
\v 11 Ihwania awoyo hiram ono arryamara ana; arai nenyomo ekyana Hollum.
\v 12 Nenyomo hutte koi isi aati hul itayirye’to nekyana ette etisyahani ’tuna ette kwararu ekyanita addi to tajya hosi ette isi byaŋan iruk ette ilak italahuno.
\v 13 Nenyomo hutto morwoi isi aati hul itayirye’to nekyana ette ifwotuna ta namuno ati obeŋi jihosi nadde, iruhi isi do, ati al attu esusuyo ette isi ipal addi.
\v 14 Nenyomo hun ofodoŋonie’to itwa hikwa isi aati hul itayiruni’to ati itabunari ebariti iko ehawwata bwo emuniti huno afau ana isi bwo aŋer hosi obeŋi odori.
\v 15 Bwo hun okwahinie liboro hun oyiji, isi aati hul itayirye’to nekyana ette ’tunana itajya hosi hun oyiji bwo fe obeŋi inyobye ette fwanna ŋijuna aŋer ta adihan hosi.
\p
\v 16 Obeŋ obo atulo oswak allomo ette muhonio ta agufa kuyya ihanak iwoyo ijotit, ati oyihak inyi allomo ihide jo oŋida hya hul ojiŋani’to igonyuni afaŋan.
\v 17 Onuhani laati omuk erre jo oŋida ihalu inyyahi bwahuna isi. Imuhoni laati erre jo oŋida ihalu inyyahi isi duhuna.
\v 18 Ihumata aŋai itaniŋuna tai; nyo lya ol owon iko erre ofonik adi Hollum omuk jihonyi, bwo lya ol obeŋ’to iko erre, iyari adi jihonyi addi dwadi hun omutari hun igigilo inyi jo owoni jihonyi.
\p
\v 19 Attati illarak Yesu iko honyonyi fwanna, ati obeŋi isi oremehini fanyan jihonyi nyo olwaji aati.
\v 20 Iramani laati inyi ojori, Honyohoi iko illarak hoi owotyai ilet, owahi isi iye.
\p
\v 21 Ati ojo inyi jihosi daŋ, Heyaŋ iko illarak hoŋ hulo. Isi hul itaniŋye’to ekyanita hoŋ bwo fe ihanie.
\p
\v 22 To nobo noloŋ adak Yesu itogol iko leyiyanak honyi, ette jaran jihosi, Efwo aŋati hari tole, attati isi fwatan.
\v 23 Hofwoi isi ette inyi jotoro. Bwo asiŋit ette dyoto on obolo bebe bwo fe ifut atogol iko aari ette isi jaran edyo itwa hari.
\p
\v 24 Ette isi itaheny inyi ojo, Leittok, leittok, ejo hohoi eye. Odyoto Yesu ette ifahina oyyami iko afolyak folyak hari hotodwahi. Ette asiŋit dwa ette aari ŋettyo dee.
\p
\v 25 Ojo inyi jihosi, Tani neruk hatai? Bwo isi ette baŋi bwo fe illillihai ette ikikyana ta ahwattek hosi ojori, Anyo tulo olo al itadwa’to oyyami iko aari, ette isi dwa?
\v 26 Attati isi fanyan ifau Gerasa on owon’to ta aŋati abotye ono Galilea.
\v 27 Hesuru Yesu ifau, orwaŋanie inyi iko obo atulo olo amiji ania ol owon’to iko ajohin hun itisitaji’to inyi. Ta aŋasi arryai obeŋ inyi iyyafatyo aboŋojin bwo obeŋ inyi amanya ihaji, ati amanya inyi ihiji lumyo.
\p
\v 28 Ninya igonyu inyi Yesu, oyyo inyi ette kwahino ifau ihosyere Yesu ette lwaha jihonyi on okwat ojo, Yesu Lonyi Hollum al agalik’to daŋ, anyo hiram iwak iye jihoŋ? Amojo ni jihoi hettigemyo ani.
\v 29 Nyo ifuha Yesu ajohin hun orrohoji hefwahi jihonyi addi. To oŋitek arryai inefi ajohin inyi bwo dwadi ifitani inyi ta nofi iko aririk ofut inyi isi ette ajohin iyaro inyi litwa mur.
\p
\v 30 Ifiyo ati Yesu atulo ojo, ngai afure hoi? Itarraŋ inyi ojo, Ani Legon, on ojo olwaji ajohin hun ojiŋani’to ihwan honyi.
\v 31 Ifiye ati isi Yesu oŋida inyi obeŋ ifuhak isi litwa iwure.
\v 32 Ihwania owoni neluluŋ bataha arryai hun oŋiye ihide doŋe attati ajohin lwaha jo oŋida inyi aŋatak isi ijiŋaniere itwa bataha. Bwo iruk Yesu isi hetefwahi.
\v 33 Attati ajohin fwan addi totwa tulo ette jiŋana litwajin bataha, bwo eluluŋ bataha ette ŋyoron olotifor, hutu, hutu, hutu, ette kwahino lihari ette dyoro ette ye iko dia.
\p
\v 34 Inya igonyuni leyyak eram ana ofuhoi isi ette iramana jyo hutto miji iko hutteger miji daŋ.
\v 35 Attati aati fwatan mijo anyo on owon’to dia. Ofwonni isi jyo Yesu ette igonyuna atulo odwo isita’to itoŋo iger hejek Yesu. Iyyafak inyi aboŋojin bwo fe obis egigilo honyi ette isi baŋi.
\v 36 Bwo laati hinya igonyuni’to ette iyabana omuk eram ono etaŋidaryo ol osita.
\v 37 Tania ikikyanai aati daŋ hutto Gerasa ette fuhara Yesu addi nyo owon nya abaŋi on obolo jihosi, tania adak inyi litogol ette caharu.
\v 38 Ifiyo atulo odwo isita’to Yesu lifwatari ikonyi ati ifak Yesu inyi addi ojo,
\v 39 Ilo imiji hatai bwo fe iramak laati erre hun obolori’to hun ihanio Hollum jihoi. Alo inyi ette iramana laati hutto misihi daŋ erre hun obolori’to hun ihanio Yesu jihonyi.
\p
\v 40 Acaharu Yesu ette laati irraŋuno inyi nyo itilai isi inyi.
\v 41 Bwo fe ette obo atulo ’tuna afure honyi Yario. Ara inyi eleittok olo aji imojit. Origoŋ inyi lihomon Yesu ette mojo jihonyi ojo, Waŋ efwo ihaji hoŋ.
\v 42 Nyo owon inyi iko ŋarri abotye an ilyaha aye. Arai aŋasi honyi ’tomon harrihai. Holo Yesu ottidani aati inyi.
\v 43 Bwo fe ottu obo aŋotte jihonyi on owouno hoto to hwan honyi ta aŋasi ’tomon harrihai. Otuhok nya inyi agurusi honyi daŋ jyo akimi ati obeŋ inyi oŋida.
\v 44 Ottu inyi ihorwoŋ Yesu ette ’tir esidi boŋo attati nooto honyi wotya kokwak.
\v 45 Attati Yesu jaran, ngai ottir aboŋo hoŋ? Ati orisai aati daŋ. Ojo Petro iko hul adahai’to ikonyi ojo, Olwaji laati hul osusularai’to iko hul itittaŋye’to iye.
\p
\v 46 Ati ojo Yesu, Ottir dwo obo atulo ani nyo amijak ni itaŋida adwaran hoŋ inyi.
\v 47 Inya igonyu aŋotte jo abeŋ inyi aremik dima, ottu inyi an ikikiro ette rigoŋi ihosyere honyi ette iramana jihonyi ihosyere wati daŋ ojo, Attir ni Yesu bwo aŋida ahwan hoŋ.
\v 48 Ojo Yesu jihonyi, Hanioŋ, itaŋida neruk hoi iye. Ilo ta nelik taji.
\p
\v 49 Hekyana inyi ottu obo to haji Yario ette jaran, Aye ŋarri hoi. Obusak ettiyanani.
\p
\v 50 Ati itaniŋu Yesu ette jaran jyo Yario, Hebaŋ, iruho bwo oŋida adi ŋarri hoi.
\v 51 Ninya afany inyi ihaji obeŋ inyi iruk obo atulo ijiŋaniere ikonyi arari Petro, Yoane iko Yakobo, bwo fe monye iko honye hito.
\v 52 Oyyoi laati dia bwo fe iwuwoŋitai. Ati ojo Yesu jihosi, Heyyoti, nyo obeŋ inyi oye, ojoto joto.
\v 53 Ati osuhotyerek isi inyi nyo omijani isi aye dwo inyi.
\v 54 Ati inef Yesu aani hito ette jaran, Ŋarri hoŋ, odyotoi.
\v 55 Attati oloyiri honyi cohuno ette inyi dyoto kwak. Ifak Yesu isi hesyarahi obo aŋiyo jihonyi.
\v 56 Illillihai esyok honyi ati ifak inyi isi hotobyaŋahi iramani obo atulo anyo riŋ an ihanio inyi.
\c 9
\cl Angati 9
\p
\v 1 Attati inyi iloŋuna leyiyanak honyi ’tomon harrihai ette isyo jihosi adwaran iko elaballok igalihiniere ajohin iko itaŋidaryere eŋwati wati.
\v 2 Bwo inyi ette ifahina isi ittiyeniere laati olobye ono Hollum bwo fe itaŋidaryere aŋwak.
\v 3 Attati inyi jaran jihosi, Heyatti obo ariŋ ta adaha hatai ara dwadi bu elluhi kuyya akisi, kuyya aŋirya, kuyya agurusi, kuyya agamisi arrihai.
\v 4 Bwo jyo naji an ijiŋaniete tai itoŋoti dia many ifwatta tai jyo amaji ania addi.
\v 5 Kuyya ihari omuk aati itai, al ibusana tai amiji ania iddiddyaŋata attuduha to hejek hatai itahutaniere etamijani jihosi.
\v 6 Tania ofwoi isi ette fwatan ta atwa misihi ittiyeniere aati asayyo hun oyiji bwo fe itaŋidaryere aati imasik daŋ.
\p
\v 7 Ihwania itaniŋu Hobu Erode nerre hunya ihanio Yesu ette inyi illilliha nyo ojori nya omuk jo ibuhu Yoane to ye.
\v 8 Bwo omuk ojori jo inyi Elija, bwo omuk ojori inyi eyani sayyo linya beryen al ibuhu’to.
\v 9 Attati Erode jaran, Aŋotuni nya ahou Yoane addi, ?ati ŋai alya al etaniŋu ni erre honyi huna? Bwo awak inyi igonyuniere Yesu.
\p
\v 10 Ocohunie lefahat ette iramana Yesu erre daŋ hunya ihanie isi, attati inyi iyaro isi many iger miji Beteseda.
\v 11 Ijifarai eluluŋ wati inyi al igonyuni isi isi ofwoi. Attati inyi irraŋuna isi bwo ette ittiyenio jihosi eram ono olobye Hollum bwo fe itaŋida hya hunya awahi’to aŋidari.
\p
\v 12 Inya amuta oloŋ ofwonni leyiyanak honyi jihonyi ette jaran, Ifak eluluŋ wati addi, oŋida isi ofwoi itwa misihi iŋiyere bwo fe ijotori nyo ewon hohoi dini ihotohoto.
\p
\v 13 Ati ojo inyi jihosi, Isyatta isi erre hun oŋiye isi. Bwo isi ojori, Ebeŋ hohoi ewon iko nobo aŋiyo arari emunio miet iko aham arrihai. Oŋida ati hohoi efwo inyyaŋuno aŋiyo ta aati hulo daŋ?
\v 14 Nyo arai nya laati hulya esiha atomwana miet. Bwo Yesu ette jaran jyo leyiyanak ojo, Iramana aati hetetoŋohi lifau te eluluŋi atomwana miet.
\v 15 Attati isi ihanio ihwo nya ette ititoŋonia aati.
\v 16 Attati inyi iduhuna emunio huna miet iko aham arrihai ette ibonno bwo ette jaran humo jyo Hollum ette ibibeny attati isyo jyo leyiyanak honyi hataharaniehe jyo aati.
\v 17 Oŋiye isi daŋ ette ifoŋ bwo isi ette iddudduhuna ofitot hun oremehini afejin ’tomon harrihai.
\p
\v 18 To obo oloŋ al omojo Yesu abotye, ofwonni leyiyanak honyi jihonyi. Attati inyi ifiyo isi ojo, Ojori aati ani ŋai?
\v 19 Itarraŋi isi, Ojori omuk iye Yoane Batista, bwo omuk ojori iye Elija, bwo fe omuk ojori iye leyani sayyo linya beryen al ibuhu’to ihwania.
\p
\v 20 Attati inyi inyyak ifiyo isi ojo, Ati ijatta tai ani ŋai? Itarraŋ Petro jihonyi ojo, Iye Kristo olo Hollum.
\p
\v 21 Attati inyi ifahina isi hotobyaŋahi iramani obo atulo eram ania.
\v 22 Ojo inyi bwo fe, Ittigemye adi Lonyi tulo te erre arryai, ihari adi amarwak iko ehumak eleittaha bwo egyorok inyi. Bwo ottohori adi laati inyi ati ihalu oŋitek hunihoi ibuhu adi inyi.
\p
\v 23 Attati inyi jaran jihosi daŋ ojo, Al awak obo atulo ijifatyo ani, ijara inyi hetehai ahwan honyi, hotolorotye akruce honyi oŋitek daŋ, hetejifatye ani.
\v 24 Al awak obo atulo italahuna nesu honyi italitohi adi inyi. Ati lya al isyo’to nesu honyi te eram hoŋ, italahuni adi inyi fur.
\v 25 Anyo adi ayiji al opocou obo atulo erre daŋ hutta fau bwo nesu on osyo fur olitohi?
\v 26 Lya al iloriri’to jihoŋ bwo fe jyo ekyanita hoŋ, iloriri adi bwo fe Lonyi tulo jihonyi al ottu inyi iko akwatan honyi iko ono Monyonyi bwo fe iko ono anjelohyen hul olibori’to.
\v 27 Bwo fe ekyana ni nelahode jihatai, itoŋoi omuk dini hul obeŋi adi igonyuni naye many igonyunierek isi olobye ono Hollum.
\p
\v 28 Ninya allaŋi oŋitek hottohunik ihalu ekyanita huna, iyaro Yesu Petro, Yoane, iko Yakobo ihide doŋe imojori.
\v 29 Homojo inyi ette ahwan honyi lufaji ette aboŋojin honyi bwaran bwo fe opipyahi.
\v 30 Teyya oleye omuk aati arrihai hul ikyanai’to ikonyi, isi Mose iko Elija.
\v 31 Oleye isi ta akwatan bwo ikyanai isi ta naye honyi on ottu adi inyi iyeri imiji Yerusalem.
\v 32 Ati ijoŋitai Petro iko hya hul owoni’to ikonyi bwo al ohenyuni isi, igonyuni isi akwatan ono Yesu iko aati hulo arrihai hul owoni’to ikonyi.
\v 33 Lafwoi isi addi ojo Petro jyo Yesu ojo, Hettiyanani, oyyu jihohoi iwanari dini. Eduhok adi hohoi akukuhyen hunihoi, obo jihoi, obo jyo Mose, bwo obo jyo Elija; nyo obeŋ Petro omijak anyo an ikyana inyi.
\v 34 Hekyana inyi ottu nedis ette itihonia isi ette isi baŋi al itihok edis isi.
\p
\v 35 Attati nekyana ’tuna totwa idis on ojo, “Lonyi hoŋ olo al anyimu ni. Itayiryete jihonyi.”
\v 36 Latuhuno nekyana ette Yesu wanan hama. Obeŋi isi iramani obo atulo erre hun igonyuni isi to oŋitek hwa.
\p
\v 37 To noloŋ an ijifak’to ofwonni isi to doŋe. Orwaŋanie isi iko eluluŋ wati arryai.
\v 38 Owon obo atulo ihiji iluluŋ al iloŋo inyi ojo, Hettiyanani, omehinie jihoŋ, imija lonyi hoŋ olo, ara abotye.
\v 39 Inef ajok inyi ette bwarana inyi lifau ol oyyo bwo ididyaŋa inyi ette obulal ’tuna to hutuk bwo fe ititoŋosyo inyi. Obeŋ bwo fe inyi obusak inyi.
\v 40 Bwo elolya ni jyo leyiyanak hoi hetefuhahi ajok addi ati obeŋi isi oremehini.
\p
\v 41 Attati Yesu jaran jihosi ojo, Aii, itai aati hul obeŋi iko neruk bwo fe hul ogoli tajya. Many baya adi etoŋo ni ikatai? Many baya adi adik ni itai? Iyaŋunie lonyi hoi dini.
\v 42 Ati hottu inyi inef ajok inyi ette bwarana inyi lifau ette inyi didyaŋa. Attati Yesu ifuhara ajok on orroho’to addi ette eito ŋidari attati Yesu isyo inyi jyo monyonyi.
\v 43 Illillihai isi daŋ ta adwaran ono Hollum on obolo’to. Ati hellillihai isi te erre daŋ hun ihanio Yesu jyo aati, ette inyi ikyana jyo leyiyanak honyi ojo,
\v 44 Ijara ekyanita huna hotojiŋaniehe liyyaha hatai, nyo isyori adi Lonyi tulo lihas wati.
\v 45 Ati obeŋi isi itaniŋye ekyanita huna nyo idimani awoyo hiram jihosi jo oŋida isi obeŋi itaniŋuni, bwo isi ette baŋi ifiyere inyi te ekyana ana.
\p
\v 46 Attati isi itteryo itarisa ojori, ngi adi eleittok?
\v 47 Ati al omijak Yesu egigilita hosi ette inyi iduhuna eito on odiha’to ette ititoŋonia iger honyi.
\v 48 Ette jaran jihosi, Lya al ifwotu’to eito on odiha’to ta afure hoŋ, ifwotu inyi ani. Bwo fe lya al ifwotu’to ani ifwotu inyi lya al ifahu’to ani. Nyo lya ol omuta’to tehiji hatai daŋ, obolo adi.
\p
\v 49 Itarraŋ Yoane jihonyi ojo, Hettiyanani, egonyu dwo hohoi lobo al ifuha’to ajohin hun orrohoji’to ta afure hoi attati hohoi itik inyi nyo obeŋ inyi ara aholohoi.
\p
\v 50 Attati Yesu jaran jihonyi, Hetihoto inyi, nyo lya ol obeŋ’to ara amyotononi hatai ara inyi amotte hatai.
\p
\v 51 Ihwania ilyahai oŋitek attuba hun ifwotunierek inyi idou, bwo ihwania iyihi inyi ahode iculari Yerusalem.
\v 52 Ifak inyi lefahat ahosyere honyi, bwo isi ette fwatan jiŋana imiji Samaria ihuhumaniere amaji tenyi.
\v 53 Ati obeŋi nya laati ifwotuni inyi nyo olo inyi Yerusalem.
\v 54 Ninya igonyuni Yakobo iko Yoane eram ania, ojori isi, Hobu, ?iwak iye hohoi eloŋu neema t’edou iswahiniere isi?
\v 55 Ati oyito inyi ette isiŋyo isi ette jaran jihosi, Ibyaŋata tai imijana anyo an ikyanati tai.
\v 56 Nyo obeŋ nya Lonyi tulo ottu lifau ittohyere laati, ati ottu inyi italahuniere isi. Attati isi fwatan jyo obo amiji.
\p
\v 57 Hadahai isi te ekoi ojo obo atulo jihonyi, Ejifatyo adi ni iye jyo amasik daŋ hun ilari iye.
\p
\v 58 Bwo Yesu ette jaran jihonyi, Owoni obeyohi iko ewuryo hosi. Owoni aheny iko asik hosi, ati obeŋ obo amaji jyo Lonyi tulo iferyere.
\v 59 Attati inyi jaran jyo lobo, Ijifunie ani. Itarraŋ lya ojo, Hobu, ijara do ani alo nuhana monyoŋ.
\p
\v 60 Ojo Yesu jihonyi, Ijara ayak onuhani ayak hosi ati ilo, ittiyenie eram ono olobye Hollum.
\p
\v 61 Bwo fe lobo ette jaran, Hobu ejifatyo adi ni iye. Ati ijara do ani alo imalauno hutta haŋ hohoi.
\p
\v 62 Ati ojo Yesu jihonyi, Atulo al itteryo’to adaha bwo ofyala orwaŋai obeŋ inyi osiru igyamari ilobye ono Hollum.
\c 10
\cl Angati 10
\p
\v 1 Ihalu erre huna onyimu Hobu omuk laati atomwana hattarik ette ifahina isi arrihai arrihai ahosyere honyi limisihi daŋ iko imasik hun ojari inyi alari.
\v 2 Ojo inyi jihosi, Obolo adyoŋo, ati omutari egyamak. Hamojoti jyo Hobu olo adyoŋo ifahuniere legyamak imatta honyi.
\v 3 Ifwatta, efak ni itai ihwa akyoro ihiji lemyo.
\v 4 Heyatti omuk akisi kuyya abuteni iko amuha bwo hefonyata obo atulo te ekoi.
\v 5 Bwo jyo aji an ijiŋana tai ijatta ahosyere, Ijara nelik tajya hatawana jyo aati hutta haji ania.
\v 6 Kuyya owon atulo dia al anyalam ijara nelik tajya hatai odulo jihonyi. Kuyya obeŋ inyi teyya, ocohuno adi nelik tajya jihatai.
\v 7 Oŋida irasati jyo aji ania, oŋiyete bwo amatati erre hun isyori isi jihatai nyo osiru aduma jyo legyamani te egyama honyi. Heculata jyo omuk ahaŋitek.
\v 8 Kuyya jyo obo amiji an ijiŋana tai bwo ifwotuni isi itai, oŋiyete erre hun iyaŋunie isi jihatai.
\v 9 Itaŋidaryete aŋwak hosi bwo ijatta jihosi ilyaha dwo olobye ono Hollum attuna jihatai.
\v 10 Ati jyo amisihi omuk hun obeŋi’to ifwotuni itai, iculata to olofirihi hosi bwo ijatta,
\v 11 Ara dwadi bu attuduha miji hatai an eryeu hohoi, edidyaŋak hohoi jihatai jo oŋida imijana tai jo ilyaha dwo olobye Hollum attuna jihatai.
\v 12 Ati ajo ni jihatai iholoŋ ania obolo adi aŋoco jyo amiji ania agalik ono Sodoma.
\p
\v 13 Orroho adi bebe jyo amiji Korasin ati bwo fe orroho adi bebe jyo Beteseda nyo hara nya ihanie edwariti imisihi Turo iko Sidon ihwa hunya ihanie jihatai, nya mana iloiti isi atajya hosi beryen te ejiriŋa on obolo iko atarihita.
\v 14 Ati oyyu adi jyo Turo iko Sidon agalik itai iholoŋ ono aŋoco.
\v 15 Bwo iye amiji Kapernaum, itadara iye bebe ati ibironi adi iye many Hadesem.
\p
\v 16 Lya al itayiryo’to jihatai itayiryo jihoŋ, bwo lya al iha’to itai iha inyi ani, bwo lya al iha’to ani iha inyi lya al ifahu’to ani.
\p
\v 17 Attati hulo atomwana hattarik cohuno ta amuno ojori, Hobu ara dwadi bu ajohin, egalik hohoi isi ta afure hoi.
\v 18 Bwo Yesu ette itarraŋ jihosi ojo, egonyu ni Sitan akwaharu ihwa ahilai on odou’to t’edou.
\v 19 Imijyete, esyo ni jihatai adwaran iryeyere amunok iko atone bwo fe jyo egoliti daŋ huno amyorok bwo obeŋ adi obo ariŋ iryafu itai jyo ’tuŋ.
\v 20 Ati hemunoti jo igalihina tai ajohin ati omunoti jo igyoroni afureta hatai lidou.
\p
\v 21 Ta nasaa ania, omuno Yesu to Oloyiri ol Olibo ette jaran, Ajo ni jihoi humo Monye Hobu olo edou iko afau nyo te edimana hoi erre huna jyo aati hul ilofyoroji’to iko hul itaniŋuni’to bwo ette itahutana isi jyo odolyo nyo ara ana awahan hoi.
\v 22 Isyo Monyoŋ erre daŋ jihoŋ, bwo obeŋ obo atulo omijak Lonyi arari Monye omijak, bwo fe obeŋ obo omijak Monye arari Lonyi iko hya hul itahutak Lonyi.
\p
\v 23 Attati inyi yito jyo leyiyanak honyi ette jaran jihosi hama, Imunoti adi itai bebe nyo igonyuna tai erre huna.
\v 24 Eramak ni itai jo olwaji eyak sayyo iko hobwok hul awahi’to igonyuna erre hun igonyuna tai ati obeŋi isi igonyuni. Awahi isi itayiruniere erre hun itayiruna tai ati obeŋi isi itayiruni.
\p
\v 25 Attati lobo al ara’to ahaŋotoni hirre dyoto jihosi ette ikem inyi ojo, Hettiyanani, ?anyo adi ehanio ni inyuraniere nesu on osyo fur?
\v 26 Itarraŋ Yesu jihonyi jo, Anyo igyoroni lifahita? Ihenio iye anyo?
\v 27 Bwo inyi ette itarraŋ ojo, “Oŋida imunoti Hollum Hobu hatai ta atajya hatai daŋ, ta nesu hatai daŋ, ta agolon hatai daŋ, iko te egigilita hatai daŋ,” bwo fe, “Oŋida imunoti hutto lonyihari hatai ihwa ahwattek hatai.”
\p
\v 28 Ojo Yesu jihonyi, Itarraŋ iye on oyyu, ihanie ihwania bwo isu adi iye.
\p
\v 29 Ati awak inyi itahutana ayiji honyi jyo aati ette jaran jyo Yesu, Haŋai hutto lonyihari hoŋ?
\v 30 Ojo Yesu jihonyi ojo, Olo nya obo atulo to Yerusalem many Yeriko ette irwaŋanio iko ahahalak ette isi houna aboŋojin honyi bwo fe ette ibibahyo inyi bwo ette idyaharu inyi al ataragaŋa.
\v 31 Attati obo ehumani ruboro awor te ekoi ania. Al igonyu inyi atulo odwo icul inyi aŋati tole.
\v 32 Ottu bwo fe obo olo Levitahyen jyo amaji nya ette mijo inyi ette bwo fe icul aŋati tole.
\v 33 Attati obo Asamaritanani ’tuna jyo amaji ania ette igonyuna inyi ette mehino jihonyi.
\v 34 Ottu inyi jihonyi ette iyal atoŋos honyi te eyali iko ta aari ajalaŋi ette luronia ta arubat ette kafana inyi ihide sigirya honyi ette iyaro inyi jyo obo aji on ojotorik laati bwo irrirrya inyi.
\v 35 Nya motye isyo inyi arobia jyo monye haji ojo, Irrirryai inyi bwo fe to omuk erre daŋ hun inyyaŋak iye inyi attu adi ni dumana iye al acohuno ni.
\v 36 Tania ifiyo Yesu aŋotoni hirre ojo, Jyo aati hulo hunihoi, ŋai adi al ijo iye jo ara olonyihari ol oyyu jyo atulo olo al abahye ahahalak?
\v 37 Bwo inyi ette jaran, Lya al itahutak’to amehino jihonyi. Attati Yesu jaran jihonyi, Ilo ihanie ihwo nya.
\p
\v 38 Ati lafwoi Yesu iko leyiyanak honyi ojiŋak Yesu jyo obo amiji attati obo aŋotte an anya Marta ette iloŋuna inyi lihaji honyi.
\v 39 Owon inyi iko hanie an anya Maria an itoŋo iger hejek Hobu itayiryere ekyana honyi.
\v 40 Ati ottohoro nya Marta egyama aŋiyo ette ’tuna jyo Yesu ette jaran? Hobu, ibeŋ iye igonyu hanioŋ abusaro ani egyama abotye? Ifahu inyi hetettu ani lwak.
\p
\v 41 Ati itarraŋ Yesu jihonyi ojo, Marta, Marta, ihawwa iye bwo fe igigilo te erre arryai.
\v 42 Owon ariŋ abotye on oyyu’to agalik bwo onyimu Maria ariŋ ania on obeŋ adi ohoro jihonyi addi.
\c 11
\cl Angati 11
\p
\v 1 Ati to obo oloŋ omojo Yesu jyo obo amaji. Latohu inyi amojo, ojori leyiyanak honyi jihonyi jo, Hobu ittiyenie hohoi amojo ihwa ninya ittiyeniere Yoane leyiyanak honyi.
\p
\v 2 Attati inyi jaran jihosi ojo, Al imojoti tai ijatta, Monye hohoi ol owon lidou, hotokwata afure hoi, hetettu olobye hoi, hetehaniehe awahan hoi lifau ihwa ihanie lidou.
\v 3 Isyara hohoi ahana aŋiyo hohoi ottoloŋi.
\v 4 Ohohi eyyata hohoi ihwa an ehohiniere hohoi aati horosi hohoi. Heyaro hohoi jyo nesusuta ati itahoru hohoi jyo arrohojita.
\p
\v 5 Attati inyi jaran jihosi, Kuyya olo obo alatai ihaji motte honyi ta arwe ette jaran, Illa, isyara jihoŋ emunio hunihoi,
\v 6 nyo hetek motte hoŋ ’tuna te ewatari honyi bwo obeŋ obo aŋiyo an esyo ni jihonyi.
\p
\v 7 Bwo inyi ette itarraŋ ’totwa haji ojo, Hettigemyo ani, nyo awon ni iko aduri hoŋ ihwania lijotiti hohoi bwo fe ihyana ekat haji hoŋ. Abeŋ ni aremik dyoto isyoryere emunio jihoi.
\v 8 Eramak ni jihatai ara dwadi bu obeŋ inyi awak dyoto isyoryere motte honyi emunio, al odulo inyi amojo odyoto adi inyi ette isyo inyi erre daŋ hun awak inyi.
\v 9 Bwo fe ajo ni jihatai, ifiyete bwo isyo adi Hollum jihatai. Ottifyati, bwo inyurana adi itai. Inninnaŋata ekat bwo aŋahi adi inyi jihatai.
\v 10 Nyo lya al ifiyo’to jyo Hollum ifwotu adi, lya ol ottifya’to onyurak adi, bwo lya al inninnaŋyo’to ekat aŋai adi jihonyi.
\v 11 Isyo adi obo monye lonyi amunu al omojo inyi ahami? Obeŋ. Kuyya omojo inyi emune isyo adi monyonyi amorwo? Obeŋ.
\v 12 Bwo fe kuyya omojo inyi atelyo, isyo adi inyi eitoni? Obeŋ.
\v 13 Kuyya itai hul irrohojata’to omijana isyoryere erre hun oyiji jyo lonyirok hatai, obeŋ adi Monyatai ette dou isyo Oloyiri ol Olibo jyo hul ifiye’to inyi?
\v 14 Ifuhak Yesu ajok jyo atulo ol obeŋ’to oremik ikyana ati al obusak ajok inyi ette inyi ikyana bwo illillihai laati bebe.
\v 15 Ati ojori omuk hulosi ojo, Ifuha inyi ajohin addi ta afure Belsebulin hobu olo ajohin.
\v 16 Bwo omuk awahi kemyo inyi ette ifiyo inyi te etamijani on ottu’to t’edou.
\p
\v 17 Ati omijak inyi egigilita hosi, ette jaran jihosi ojo, Al orryomonie laati hutto lobye ta ahwattek hosi itatturi adi olobye ania. Bwo al aŋalafai laati hutta haŋ ta ahwattek hosi itatturi adi awoyo hosi.
\v 18 Al ihiharak Sitan adwaran honyi, aŋai adi oremik olobye honyi itoŋo? Ijatta tai jo efuhak ni ajohin ta afure Belsebuli.
\v 19 Kuyya efuha ni ajohin addi ta afure Belsebuli, ta anani fure ifuhatai lejifak hatai isi?
\v 20 Ati kuyya efuha ni isi ta adwaran Hollum, oŋida imijana tai jo ottu olobye Hollum jihatai ahode.
\p
\v 21 Al irrirrya olotir ahaŋ honyi ta afyara honyi itoŋoi erre honyi dee.
\v 22 Ati al ottu obo al agalik’to inyi ette bwarana inyi, ohoru adi jihonyi afyara hodwo iyihi inyi jo olwahye adi inyi ette hororo erre honyi daŋ.
\v 23 Lya el ebeŋ’to egyama ikoŋ inyi amyotoni hoŋ, bwo itisarrayo lya el ebeŋ’to eddudduha ikoŋ.
\p
\v 24 Al obusak ajok on orroho’to atulo adaha inyi ihotohoto ittifyari amaji yiri ati obeŋ inyi onyurak. Tania ojo inyi jo, Acaharo ni jyo atulo odwo edyehuno ni.
\v 25 Al afany inyi onyurak inyi ataji tulo alibo bebe bwo ilaman.
\v 26 Tania alo inyi rumana omuk ajohin hattarik hun orrohoji’to agalihini inyi ette isi jiŋana itwa tulo lya ette manya dia. Tania orroho ihwania jyo atulo alya agalik ninya hosyere.
\p
\v 27 Ati hekyana inyi ekyana ana iloŋo obo aŋotte teluluŋ ette jaran jihonyi, Hotomunoi aŋotte an isiu iye bwo itadasyo.
\v 28 Attati Yesu jaran jihonyi, Hotomunohi hya hul itaniŋuni’to ekyanita huno Hollum ette niŋyo isi.
\p
\v 29 Ottubanie aati imaji abotye ette Yesu itteryo ikyana jihosi ojo, Orroho nelahaji ana. Ottifyai isi etamijani ati obeŋi adi itahutani jihosi obo etamijani arari etamijani ono Yona.
\v 30 Nyo ihwa ninya arari Yona ahetamijani jyo aati hutto miji Ninifa, ara adi bwo fe Lonyi tulo etamijani jyo nelahaji ana.
\v 31 Odyoto adi nobu otto ŋati ihorroŋ iŋocere nelahaji ana. Nyo ottu nya inyi to fau an alama’to itayiruniere olofyoro huno Solomone. Ati imijyete, owon dini obo al agalik’to Solomone.
\v 32 Odyotoi adi aati Ninifa iŋocere nelahaji ana nyo iloiti nya aati Ninifa atajya hosi ninya ittittoyere Yona jihosi. Ati imijyete, owon dini obo al agalik’to Yona.
\p
\v 33 Obeŋ obo atulo oswak allomo honyi ette dimana inyi kuyya imuhok ta agufa. Ati oyihak inyi allomo ihide jo oŋida afaŋan afaŋ jyo hul ojiŋuni’to itwa haji.
\v 34 Ara nonyek ihwa afaŋan ono nahwan tania al afaŋ inyi on oyyu ifut afaŋan daŋ ihwan tulo. Ati al orroho onyek iryok adi ahwan daŋ.
\v 35 Ihwania ihumata jo helaha afaŋan hatai ara edumele.
\v 36 Tania kuyya ifut ahwan daŋ iko afaŋan, obeŋ adi obo eryohi. Afaŋ adi inyi bebe ihwa afaŋan ’lomo on olibo’to bebe.
\p
\v 37 Hekyana inyi iloŋo obo olo Farisei inyi iŋiyere ikonyi ette inyi leten ette itoŋo iger teremeja iŋiyere.
\v 38 Ati al igonyu olo Farisei ana illilliha inyi nyo hobeŋ Yesu ofinia ihosyere ŋiyo.
\v 39 Attati Hobu jaran jihonyi, Itai Farisei, italiboryete tai orwoŋ kos iko asahan bwo idehina atwa an ifut iko enyobita bwo fe arrohojita.
\v 40 Itai hul isitajata’to, obeŋ nya lya ol oyyeu’to orwoŋ oyyeu bwo fe atwa?
\v 41 Tania italiboroto atwa bwo olibori adi daŋ.
\p
\v 42 Ati orroho bebe jihatai Farisei nyo isyatta tai aŋati etattomoni ono ema hatai iko aful, bwo erre ihwa huna jyo Hollum, ati ipwahata tai aŋoco on obis iko amuno jyo Hollum. Oŋida imunoti Hollum bwo fe isyatta esyorita jihonyi.
\v 43 Orroho bebe jihatai Farisei nyo imunoti tai itoŋori imasik huno etahabuyo itwa haji imojit bwo fe imunoti tai efonya wati hutto suk.
\v 44 Orroho bebe jihatai nyo irata tai ihwa elumyo hun obeŋi’to oleye bwo aati ette daha ihide hosi nyo obeŋi isi omijani.
\p
\v 45 Attati lobo olo aŋotok hirre itarraŋ jihonyi ojo, Hettiyanani, ?isiŋyo iye hohoi bwo fe?
\v 46 Bwo fe Yesu ette jaran jihonyi ojo, Orroho bebe jihatai bwo fe aŋotok hirre nyo isyatta tai erre hun odiŋi’to jyo aati iwwahari, ati ibyaŋata tai ilwahata isi dwadi ta aani abotye.
\v 47 Orroho bebe jihatai nyo ibwahati nya itai elumyo huno eyak sayyo hinya ottohori hohonyok hatai.
\v 48 Iruhoto tai ehanita huno hohonyok hatai nyo ottohori isi eyak sayyo bwo itai iduhoti elumyo hosi.
\v 49 Tania ojo nya Hollum jo, Efak adi ni eyak sayyo iko lefahat bwo ottohori adi isi omuk hulosi bwo lomuk ittigemye.
\v 50 Tania oŋoti adi jyo nelahaji ana naye ono leyak sayyo hinya oyei’to many t’etteri fau.
\v 51 Isi laati many to ye Abele many jyo naye ono Sakaria linya ottohori tehiji etityek iko aji imojit eneittok. Eramak ni itai ahode ahode jo oŋoti adi nelahaji ana.
\v 52 Orroho bebe jihatai aŋotok hirre nyo ibyaŋata tai ittiyeniete aati ekoi ono olofyoro. Ibyaŋata tai ijiŋana ikoi Hollum ta ahwattek hatai bwo fe itihoto tai hya hul awahi’to jiŋana dia.
\p
\v 53 Hojiŋu Yesu teyya ette aŋotok hirre iko Farisei wahan aŋalafa jihonyi bebe ette ikyana jihonyi on orroho te erre arryai.
\v 54 Nyo ottifyai isi omuk erre to hutuk honyi itisyahiniere inyi.
\c 12
\cl Angati 12
\p
\v 1 Ninya lattubai laati hul olwaji bebe hul ifudai ette Yesu ikyana jyo leyiyanak honyi ojo, Ihumata irrirrya abula huno Farisei hun arai’to enyobita.
\v 2 Nyo erre daŋ hun imuhoni italeyehini adi, bwo erre daŋ hun idimani omijani adi.
\v 3 Tania erre daŋ hun ikyanati tai idumele, itayiruni adi ta afaŋan. Bwo erre hun ihahayati tai itwa haji iramani adi ihosyere wati.
\p
\v 4 Ajo ni jihatai illarak hoŋ, hebaŋata hya hul ottohori’to ahwattek wati ati lihalu obeŋi oremehini inyyak ihanio omuk erre.
\v 5 Ati eramak adi ni itai jo oŋida ibaŋata ŋai. Abaŋata Hollum ol owon iko adwaran ibironiere itai lihima ihalu attohoro honyi itai. Ajo ni jihatai abaŋata inyi.
\v 6 Obeŋi itinyyaŋani aheny miet ta agurusi arrihai? Ati obeŋ Hollum ogworo obo olosi.
\v 7 Ara dwadi bu ofir hutto hosi hatai ihen Hollum daŋ. Tania hebaŋata, nyo igigilo Hollum tetai agalik aheny.
\p
\v 8 Ajo ni jihatai jo, lya al iruk’to ani ihosyere wati, iruk adi bwo fe Lonyi tulo inyi ihosyere anjelohyen hulo Hollum.
\v 9 Lya al iha’to ani ihosyere wati, iha adi bwo fe Lonyi tulo inyi ihosyere anjelohyen hulo Hollum.
\v 10 Lya ol omwaŋa’to Lonyi tulo obusak adi Hollum inyi, ati lya ol omwaŋa’to Oloyiri ol Olibo, obeŋ adi obusanio.
\v 11 Al iyaŋunie itai lihasik imojiti ihosyere eleittaha kuyya bwo fe ihosyere okuma hebaŋata jo anyo adi itarraŋata tai. Kuyya anyo adi ijatta tai.
\v 12 Nyo ittiyenio adi Oloyiri ol Olibo itai jyo nasaa ania anyo adi an ijatta tai.
\p
\v 13 Attati lobo teluluŋ jaran jihonyi ojo, Leittok, iramak illaŋ jo oŋida inyi ehor ikoŋ orutat.
\p
\v 14 Ati ojo Yesu jihonyi jo, Ŋai ihanak ani ahaŋotoni bwo fe ahaharani hatai?
\v 15 Attati inyi jaran jihosi ojo, Ihumata helaha adaya ojiŋak itajya hatai nyo obeŋ amanya tulo owon ta alwaji hirre hun owoni’to jihonyi.
\p
\v 16 Bwo inyi ette ikyana jihosi to obo arryamara ojo, Odo amana hasamani bebe.
\v 17 Attati inyi igigilo ta ahwan honyi ojo, Ehanio adi ni anyo nyo obeŋ amaji jihoŋ ihananiere ema hoŋ?
\v 18 Bwo inyi ette jaran, Ehanio adi ni ihwa ana, etattur adi ni amugwo hoŋ, ette duhonia nobo on obolo bwo ejuhok adi ni ema dia.
\v 19 Attati ni jaran jyo oloyiri hoŋ ojo, Olo, owoni erre jihoi ta aŋasi arryai. Itoŋoi dee, oŋiye, amatai bwo omunoi.
\p
\v 20 Ati ojo Hollum jihonyi, Iye el isita’to, ta arwe ana ottu adi naye jihoi. Tania arai adi erre hun igyama iye hunia ahuno ŋai?
\v 21 Ara ihwania jyo lya ol ottunak’to ebariti honyi, obeŋ inyi abara ihosyere Hollum.
\p
\v 22 Jihatai jo, hehawwati ta nesu hatai, ta nerre hun iŋiyete tai ara dwo bu ta aboŋojin hun iyyafatyete tai.
\v 23 Nyo agalik nesu aŋiyo, agalik ahwan aboŋojin.
\v 24 Ikemijyete olohuresi, obeŋi isi oyehini bwo fe obeŋi odeŋuni, obeŋi isi owoni iko omuk amugwo, ati Hollum itaŋiyo isi. Ati igigilo Hollum tetai agalik aheny.
\v 25 Ngai obo alatai ol oremik’to itabobolororo ahwan honyi te ehawwa honyi?
\v 26 Kuyya ibyaŋata tai iremehina ihanio erre hun omutari’to, nyo ilafuhoti tai te erre omuk?
\v 27 Ikemijyete ayaburita aŋai isuri isi. Obeŋi isi igyamai, obeŋi bwo fe ikaice, ati ajo ni jihatai jo obeŋi nya aboŋojin Solomone ilamani bebe ihwa ayaburita huna.
\v 28 Kuyya ibuya Hollum ayaburita hun isuruni’to ahana ifau bwo motye oswahini, obeŋ adi Hollum itiyyafak itai on oyyu agalik? Aii itai laati hul omuta neruk.
\v 29 Tania helafuhoti te erre hun iŋiyete adi itai kuyya hun imatati adi itai.
\v 30 Nyo ottifyai aati hutta fau erre huna daŋ, ati omijak Monyatai jo iwahata tai erre huna.
\v 31 Ati ottifyati ahosyere ekoi ono Hollum attati Hollum fonihina erre huna daŋ jihatai.
\p
\v 32 Akyoro hoŋ, hebaŋata, nyo awak Monyatai isyarana jihatai olobye.
\v 33 Itinyyaŋana erre hun owoni’to jihatai bwo isyatta agurusi hwa jyo alocaŋak. Ihuhumana akisi hun obeŋi adi imarwahi. Ottunana ebariti hatai idou jyo amaji on obeŋ’to opwak, nyo obeŋ olohoho teyya kuyya bu neyyu.
\v 34 Nyo igigiloi atajya hatai jyo amaji on ottunarik ebariti hatai.
\p
\v 35 Iyyafana aboŋojin hatai bwo ijara allomohyen hatai owulori.
\v 36 Bwo fe irata ihwa aati hobu hul omijye ta acohuno honyi to olohomo. Al ottu inyi ette inninnaŋ ekat oŋida isi aŋahi jihonyi kwak.
\v 37 Hotomunohi legyamak hul onyurak hobu isi arrai ta attuna honyi. Ahode ajo ni jihatai iyyafak adi inyi aboŋojin honyi ette iloŋuna isi iŋiyo ette ’tuna isyarana isi aŋiyo.
\v 38 Hotomunohi legyamak hya hul onyurak hobu isi omijye ta acohuno honyi dwadi ara ta arwe.
\v 39 Ati omijana jo hara dwo omijak monye haji jo ottu adi olohoho lihaji honyi baya, omijo dwo inyi bwo fe obeŋ inyi obusak aji honyi owur olohoho ta arwe.
\v 40 Ihumata ’ra nyo ta asaa an ibyaŋata tai igigiloti, ottu adi Lonyi tulo.
\p
\v 41 Attati Petro jaran jihonyi ojo, Hobu, ikyana iye arryamara ana jihohoi kuyya jyo hul omuk daŋ?
\v 42 Attati Yesu jaran ojo, Ŋai ati lapit ol oyyu’to bwo fe ilofyoro? Ihanak hobu inyi ihaji honyi isyoryere aŋiyo jyo laati ta asaa ono aŋiyo.
\v 43 Hotomunoi apit alya al ottu hobu honyi nyurana inyi ihanio egyama ana.
\v 44 Ahode ajo ni jihatai jo ihanak adi hobu apit alya eleittok hirre honyi daŋ.
\v 45 Ati kuyya orroho apit alya ette igigilo ta ataji honyi jo, illiŋya hobu hoŋ, ette itteryo bahyo legyamak lyawa iko negyamak ŋorwo bwo ette ŋiyo ette mata many orumari inyi,
\v 46 ilunyu adi hobu olo apit lya lunyuna ta asaa on obeŋ inyi omijak. Ette hobu bak inyi bebe ette ŋot jihonyi abahyo ono aati hul orrohoji’to.
\v 47 Bwo apit lya ol omijak’to awahan hobu honyi ette byaŋan ihanio obeŋ bwo fe inyi ihum imijo, abahi adi inyi ta allyoto edasita arryai.
\v 48 Ati lya ol otimo’to awahan hobu honyi, bwo ette iyyauna erre hun osiruni ta allyoto, abahye adi inyi kai. Al isyo Hollum jyo obo atulo erre arryai awak inyi ifwotuna jyo atulo alya arryai. Al isyo Hollum egyama on obolo jyo obo atulo awak inyi ifwotuna ayiji an agalik jihonyi.
\p
\v 49 Attu ni inohyere eema ifau. Ati oyyu kuyya anyurak ni inyi awulo.
\v 50 Awon ni iko obo batisimoo an efwotu adi ni bwo fe odyaha ataji hoŋ many atuhoniere ni egyama ana.
\v 51 Igigiloti tai jo attu ni ifau isyoryere nelik tajya? Eramak ni itai, obeŋ. Ati eyaŋuno ni abwanya.
\v 52 Kuyya owoni miet lihaji abotye obwanyai adi isi. Oliwarik adi hulo hunihoi hulo arrihai bwo fe arrihai oliwarik hulo hunihoi.
\v 53 Oliwari adi monye lonyi honyi bwo lonyi oliwari monye. Oliwari adi honye ŋarri bwo fe ŋarri honyonyi, bwo hamoni oliwari hamoni honyi bwo fe hamoni honyi jyo hamoni.
\p
\v 54 Attati inyi jaran jyo eluluŋ wati ojo, Al igonyuna tai nedis ottu t’eddorro holoŋ ijatta tai jo ottu adi ahide, attati inyi ’tuna.
\v 55 Bwo fe al igonyuna tai jo ohut oyyami otto hani iŋet, ijatta tai jo onok adi oloŋ, ette nahan ahode.
\v 56 Itai enyabak, imijana tai erre hutte dou iko hutta fau, aŋai itimoti tai oŋitek huna?
\v 57 Bwo fe nyo ibyaŋata tai iŋocete on obis ta ahwattek hatai?
\v 58 Kuyya iyaro arrosoni obo alatai ihosyere lokiko oŋida lya opulok eram honyi kwak hebeŋ inyi afany ilokiko ŋadi iyaro inyi ihosyere aŋotoni hirre bwo isyo adi aŋotoni hirre inyi jyo oseŋer ifitaniere ibabus.
\v 59 Eramak ni itai jo obeŋ adi lya ohouno many odumari inyi daŋ.”
\c 13
\cl Angati 13
\p
\v 1 Owoni omuk laati dia hul iramani jyo Yesu eram ono aati hulo Galilea hinya ifak Pilato ittohori isi ta asaa an isyoryerek isi ehumita hosi.
\v 2 Attati Yesu itarraŋ jihosi ojo, Igigiloti tai jo orrohoji aati Galilea hulya agalihini hul omuk nyo ittigemye isi ihwania?
\v 3 Ati ajo ni, obeŋ. Ati kuyya ibyaŋata tai irwejata t’eyyata hatai iyeti adi itai ihwo nya.
\v 4 Ara nya hya ’tomon hohottohunik hunya okwahino olobele ono Silom jihosi ette ’tohoro isi. Igigiloti tai jo arai isi aheyyak agalihini aati daŋ hutto miji Yerusalem?
\v 5 Eramak ni itai, obeŋ. Ati kuyya ibyaŋata tai irwejata t’eyyata hatai iyeti adi itai ihwo nya.
\p
\v 6 Ikyana bwo fe Yesu arryamara ana ojo, Owon aŋaboli limana ono obo atulo ette inyi ’tuna ’tifya aŋer iŋaboli ania ati obeŋ inyi onyurak omuk.
\v 7 Ojo inyi jyo errirryani mana honyi ojo, Attifya ni aŋer jyo aŋaboli ana ta aŋasi hunihoi bwo abeŋ ni anyurak omuk. Ayafai inyi addi. Nyo itihok inyi afau oboijai?
\v 8 Ati itarraŋ errirryani mana ojo, Hobu, idehi do jyo neŋa ana abotye bwo arom adi ni awoyo honyi ette ihanana aworot jihonyi.
\v 9 Kuyya al oŋiju inyi aŋer, oyyu; kuyya al obeŋ oŋi, ayefu adi ni inyi addi.
\p
\v 10 Ittiyenio nya Yesu ihaji imojit to oloŋ sabato.
\v 11 Owon nya obo aŋotte on okudo ahwan honyi ta aŋasi ’tomon hohottohunik, obeŋ inyi oremik itabisana ahwan honyi.
\v 12 Ninya igonyu Yesu inyi, iloŋu inyi aŋotte nya ette jaran jihonyi ojo, Hanioŋ, aŋida ahwan hoi ihwania.
\v 13 Attati Yesu iyyabana ahas honyi jihonyi. Teyya kwak abis ahwan atulo ania ette inyi itahabuyo Hollum.
\p
\v 14 Ati iloŋojita eleittok olo aji imojit nyo itaŋida Yesu aŋotte to oloŋ sabato ette jaran jyo laati ojo, Owoni oŋitek ille hun igyamarik aati. To noŋitek hunia ifwanna ifwotuniete aŋidari, obyaŋara to sabato.
\p
\v 15 Attati Hobu jaran, Itai enyabak, ?ibyaŋata tai daŋ ihohitati esuŋ hatai to bore to noloŋ sabato ittata tai iyaro ihari?
\v 16 Ijatta tai jo oŋida ŋarri Abramo ana an ifitak Sitan ta aŋasi ’tomon hohottohunik obeŋi ohohini ta aŋwai honyi to noloŋ sabato?
\v 17 Likyana inyi nerre huna, ette laati daŋ hodwo iŋiŋyalai’to inyi iloriri. Bwo fe aati omuk ette muno te erre hun obolori’to hun ihanio inyi.
\p
\v 18 Bwo fe Yesu ette ifiyo ojo, Ara olobye ono Hollum ihwa anyo? Etarrijohi adi ni inyi iko anyo?
\v 19 Orrijori inyi iko aŋeryo bule an iyaro atulo ette idulana imana honyi. Isuru inyi ette ’tuna ratan ayyani on obolo ette aheny hutte dou duho asik hosi litanata honyi.
\p
\v 20 Bwo fe inyyak inyi jaran jo, Etarrijohi adi ni olobye Hollum iko anyo?
\v 21 Orrijori inyi iko abula hun iduhu aŋotte ette iharrwahina iko efwa many ayafutarik daŋ.
\p
\v 22 Bwo inyi ette leten ta atwajin misihi ette itittiyenaro aati many Yerusalem.
\v 23 Attati lobo ifiyo inyi ojo, Hobu, omutari adi hul italahunie? Bwo ojo inyi jyo laati daŋ,
\v 24 Ottifyati bebe ijiŋaniere te ekat ol ottida’to. Nyo olwaji hul ottifyai’to ijiŋaniere ati obeŋi isi oremehini jiŋana.
\v 25 Odyoto monye haji ette hyanana nekat haji bwo itai ifwanna inninnaŋyere nekat bwo ijatta tai, Hobu, Hobu, aŋahi hohoi nekat. Itarraŋ adi inyi jihatai ojo, Abeŋ ni amijak itai. Ifwanna tai tai?
\v 26 Ijatta adi itai jihonyi ojo, Eŋiyo nya hohoi bwo emata ikoye, bwo fe ittiyenio nya iye lilofirihi hohoi.
\p
\v 27 Ati ojo adi inyi ojo, Eramak ni itai, abeŋ ni amijak itai. Ifwanna tai tai? Ifwatta addi, itai hul ihaniete’to erre hun orrohoji’to.
\v 28 Owon adi ayyo iko aŋutta hala iholoŋ an igonyuniete adi itai Abramo iko Isako ojo Yakobo iko eyak sayyo daŋ ilobye Hollum bwo itai irasati ilet.
\v 29 Bwo ofwonni adi laati t’ettedwoŋi holoŋ iko t’etteddorro holoŋ bwo fe ta aŋaco daŋ ette itoŋo ilobye Hollum.
\v 30 Ati aati huttehalu ofwoi adi ahosyere bwo huttohosyere ofwonni adi ihalu.
\p
\v 31 Ofwonni omuk Farisei hul ojori jihonyi ojo, Ilo addi, nyo awak Erode ’tohoro iye.
\p
\v 32 Attati inyi jaran jihosi, Ifwatta iramana olobeyok lya jo, etaŋidaryo ni laati bwo fe efuhatyo ni ajohin ahana iko motye bwo ara oloŋ itahunihi esidi hoŋ.
\v 33 Oŋida ani adaha ahana iko motye many oloŋ itahunihi nyo obeŋi oremehini ’tohoro eyani sayyo arari limiji Yerusalem.
\p
\v 34 Yerusalem, Yerusalem, amiji an ittohyo’to leyak sayyo bwo fe irwoŋyo hya hul ifak Hollum jihoi. Awak ni ’tubana lonyirok hoi jihoŋ enyyahita arryai ihwa on ottubaniere ahohoro akiyehi honyi itwa hiwa honyi, ati iha iye.
\v 35 Ahode idehi Hollum aji hoi jihoi ahania. Bwo ajo ni jihoi, ibeŋ adi iye inyyak igonyuna ani many iholoŋ an ijo iye, Hotomunoi lya ol ottu’to ta afure ono Hobu.
\c 14
\cl Angati 14
\p
\v 1 To oloŋ sabato olo Yesu iŋiyere aŋirya lihaji obo eleittok olo Farisei, attati laati ikikorihina jihonyi.
\v 2 Owon nya bwo fe lobo latulo dia ol owon iko obo aŋwai ono abalaco.
\v 3 Attati Yesu ifiyo aŋotok hirre iko Farisei ojo, Odwa itaŋidaryere atulo to noloŋ sabato?
\v 4 Attati isi dwahino ette Yesu iyaro atulo alya ette itaŋida ette ifahina inyi hetelo.
\v 5 Inyyak inyi ikyana jihosi ojo, Ŋai obo alatai ol okwahino asigirya honyi kuyya eteŋ litwa hirre bwo inyi obeŋ ipihu inyi addi to noloŋ sabato?
\v 6 Bwo isi obeŋi itarraŋi jihonyi ta nerre hunia.
\p
\v 7 Attati inyi ikyana arryamara jyo hya hinya iloŋuni iŋiyere, nyo igonyu inyi isi onyimuni amasik hun oyiji itoŋori. Ojo jihosi,
\v 8 Al iloŋo obo alatai jyo alomone, hetoŋo jyo amaji ono eleittok ara bwo hottu obo atulo al ara eleittok jihoi.
\v 9 Ojo adi latulo al iloŋuno’to iye ojo, Isyarak olo amaji hoi. Tania ilo adi iye ta ariri jyo amaji obo.
\v 10 Ati al iloŋoro iye, ilo, itoŋoi jyo amaji on ofyaha’to. Bwo al ottu leloŋoni wati, ottu adi jaran jihoi ojo, Illa, waŋ, itoŋoi imaji on oyyu’to ana, tania iwon adi iye iko nolohwo ihosyere hul oŋiye’to.
\v 11 Nyo lya al itahabworo’to ahwan honyi, itiloririji adi, bwo lya ol omyana’to ahwan honyi itahabuhini adi.
\p
\v 12 Tania ojo Yesu jyo lya al iloŋu inyi ojo, Al ihuhum iye aŋiyo on obolo heloŋ illarak hoi kuyya bu orryahat hoi, kuyya aati hutta haŋ hatai, kuyya aati hatai hul abarai’to, ŋadi isi iloŋuni iye obo oloŋ iŋiyere ikosi.
\v 13 Ati al ihuhumyo iye akarama iloŋu alocaŋak, arrohojak, aŋurak, iko aŋodok.
\v 14 Bwo ifwotu adi iye namuno nyo obeŋi isi oremehini inienuna iye iŋiyere bwo ifwotu adi iye edumit hoi iholoŋ an ibuhunierek aati hul oyiji’to.
\p
\v 15 Ati litaniŋu lobo ol oŋiye’to ikosi neram ana, ette jaran jyo Yesu ojo, Hotomunoi atulo ol oŋiyo’to aŋirya ilobye Hollum.
\p
\v 16 Ati ojo Yesu jihonyi ojo, Ihuhumyo nya obo atulo naŋiyo on obolo bebe ette iloŋuna aati aaryai.
\v 17 Al ara asaa ono aŋiyo, ifak inyi apit honyi hetelo iloŋuno aati nyo attubai nerre daŋ.
\p
\v 18 Bwo isi daŋ ababo ette ikyana elyati hosi. Ojo ebotye jihonyi ojo, Enyyaŋu ŋole ni nobo amana tania awak ni leten mijo. Ajo ni jihoi, ilo iramak inyi.
\p
\v 19 Bwo fe lobo ette jaran, Enyyaŋu ŋole ni attamoti husuŋ miet, ajo ni alo mijo. Ajo ni jihoi, ilo iramak inyi.
\p
\v 20 Bwo lobo ojo, Ayama ŋole ni aŋotte, tania abeŋ ni aremik leten.
\p
\v 21 Attati lapit cohuno ette ramana eleittok eram ana. Tania ijorya eleittok bebe ette jaran jyo lapit honyi ojo, Ilo lilofirihi miji kokwak bwo iloŋunie dini alocaŋak, arrohojak, aŋurak bwo aŋodok.
\p
\v 22 Attati lapit jaran jihonyi ojo, Leittok, ehanio ni ihwa ikyana iye ati harasa amaji.
\p
\v 23 Attati eleittok jaran jyo lapit ojo, Ilo ikota daŋ orrosunie omuk oŋida ofwonni daŋ dini jo oŋida aji hoŋ ifut hiny hiny.
\v 24 Nyo ajo ni jihatai jo, Obeŋ adi obo jyo hya hul iloŋuni ahosyere iniŋ aŋiyo hoŋ.
\p
\v 25 Attati eluluŋ wati arryai fwatan iko Yesu bwo inyi ette jaran jihosi,
\v 26 Al ottu obo atulo jihoŋ ol obeŋ oliwari monyonyi iko honyonyi, ŋorwoi, onyirok, hutta haŋ honyi, haniarak honyi iko nesu honyi luŋa, obeŋ inyi oremik ratan aheyiyanani hoŋ.
\v 27 Bwo fe ol obeŋ’to olororo akruce honyi ette jifaro ani obeŋ oremik ratan aheyiyanani hoŋ.
\v 28 Kuyya awak obo alatai duho aji on ohodo’to, itoŋo inyi ahosyere do lifau ette ihen arobia honyi imijyere kuyya oremehini isi ituhoniere egyama honyi.
\v 29 Nyo ŋadi al ihanak inyi etawoni haji do bwo labeŋ inyi otuhonio, osuhotyerek adi aati inyi.
\v 30 Ojori adi isi, Itteryo nya inyi aduho haji ati obeŋ oremik tuhonia.
\p
\v 31 Kuyya awak obo hobu arrem iko obo, ahosyere do igigilo inyi jo kuyya oremik inyi iko aati honyi alif ’tomon ’rem iko aati alif atomwana arrihai.
\v 32 Kuyya obeŋi isi oremehini, halamaji hya, ifak inyi atulo itimwaraniere isi.
\v 33 Ihwo nya, lya ol obeŋ’to obusak nerre honyi daŋ obeŋ oremik ratan aheyiyanani hoŋ.
\p
\v 34 Oyyu amile, ati al ilik amile, aŋai adi inyyahini eŋolito honyi?
\v 35 Obeŋ bwo fe inyi oremik itayyu obo ariŋ, oŋida ibiro inyi addi. Lya ol owon’to iko ayyaha ijara inyi hetaniŋu.
\c 15
\cl Angati 15
\p
\v 1 Obo oloŋ ofwonni lamojok musuru iko leyyak jyo Yesu itayiryere nettiyenio honyi.
\v 2 Bwo Farisei iko legyorok ette mumwaŋa ojori, Iloŋuta atulo olo leyyak ette ŋiyo ikosi.
\p
\v 3 Ette Yesu ikyana jihosi ta narryamara ana ojo,
\v 4 Kuyya owon obo alatai iko akyoro nesiha abotye bwo obo abotye olitohi, obeŋ adi inyi idehi huna atomwana hottoŋwan hohottoŋwan imur ette leten ’tittifyaru aker ania many onyuraniere inyi?
\v 5 Bwo fe al onyurak inyi naker nya olorok inyi ilohoho ta amuno.
\v 6 Lafany inyi imiji iloŋu inyi mottyarak honyi iko orryahat honyi ojo, Hamunoti ikoŋ nyo anyurak ni naker hoŋ odwo olitohi’to.
\v 7 Ajo ni jihatai jo owon adi amuno on obolo lidou ta leyyani abotye al iloit’to ataji honyi t’eyyata honyi, agalik jyo hul omuk atomwana hottoŋwan hohottoŋwan hul oyiji’to hul obeŋi’to iloiti atajya hosi.
\p
\v 8 Kuyya owon obo aŋotte hatai iko agurusi atomwana ’tomon, bwo olitohi obo agurus abotye, obeŋ adi inyi inwok neema ette fyeyo afau haji ette ’tifya bebe many onyuraniere inyi?
\v 9 Al onyurak inyi inyi iloŋu inyi hutto onyihari honyi iko hutta haŋ honyi ette jaran jihosi ojo, Hamunoti ikoŋ nyo anyurak ni agurus hoŋ odwo olitohi’to.
\v 10 Ihwania ajo ni jihatai jo, Omunoi anjelohyen hulo Hollum ta leyyani abotye al iloit’to ataji honyi t’eyyata honyi.
\p
\v 11 Bwo Yesu ette jaran, Owon nya obo atulo iko lonyirok arrihai.
\v 12 Bwo alahalu ette jaran jyo monyonyi ojo, Monyoŋ isyarak jihoŋ orutat hoŋ. Attati inyi harana jihosi ebariti honyi.
\v 13 Lihalu omuk oŋitek kai iddudduhu alahalu nerre honyi daŋ ette leten jyo obo afau an alama ette tuhonia erre honyi daŋ ta asilara honyi.
\v 14 Latuk inyi agurusi honyi, bwo ahure on obolo ette ’tuna jyo afau ania ette inyi ilocaŋ.
\v 15 Attati inyi leten itoŋo iko obo atulo ette atulo lya isyo jihonyi egyama ono eyyahatyo bataha.
\v 16 Bwo fe awak inyi ŋiyo aŋiyo bataha hun arai erre asai. Nyo obeŋ obo atulo isyo jihonyi aŋiyo.
\v 17 Ati ninya attu inyi igigilo on oyyu ojo inyi, Arai legyamak monyoŋ omukaja hul owoni’to iko aŋiyo on oŋiye isi ette fituna nobo, bwo ni aye dini iko ahure.
\v 18 Acaharu adi ni jyo monyoŋ bwo ajo adi ni jihonyi, Monyoŋ, eyyau ni ihosyere Hollum bwo fe ihomon hoi.
\v 19 Tania obeŋ osiru jihoŋ irari olonyi hoi. Ihanak ani ahegyamani hoi.
\v 20 Attati inyi dyoto ette leten jyo monyonyi. Ati halama inyi igonyu monyonyi inyi ette mehino jihonyi ette ŋyoron ette ifony inyi bwo fe ette hut ayyaha honyi.
\v 21 Ati ojo lonyi honyi jihonyi ojo, Monyoŋ, eyyau ni ihosyere Hollum iko ihomom hoi tania abeŋ ni asiru irari olonyi hoi.
\p
\v 22 Ati iloŋo monye legyamak honyi ojo, Iyaŋuniete aboŋo an ilaman’to bebe itiyyafana inyi, bwo fe ihanak ahatim lihani honyi, iko amuha ihejek honyi.
\v 23 Iyaŋuniete atawwo ol ofir’to bebe bwo oŋototo, haŋiyete bwo fe hamunoti.
\v 24 Nyo aye nya lonyi hoŋ olo, bwo ihwania lisu. Olitohi nya inyi, bwo ihwania aleyo. Attati isi muno bebe.
\p
\v 25 Owon nya lonyi honyi ahouti imana bwo hottu inyi ilyaha ihaji itayiru inyi nedolo iko ahya.
\v 26 Iloŋu inyi legyamani ette ifiyo jihonyi ojo, Anyo eram dia?
\v 27 Itarraŋ inyi ojo, Attu illa hoi bwo isyak monyohoi atawwo ol ofir’to nyo acohuno illa hoi ol oyyu.
\p
\v 28 Tania iloŋojita nya inyi bebe ette hara ajiŋana lihaji. Attati monye jiŋuna jihonyi ette iloŋuna inyi.
\v 29 Bwo inyi itarraŋ jyo monyonyi ojo, Aii, egyama ni jihoi aŋasi arryai bwo fe abeŋ ni eha efahita hoi bwo iye ibeŋ isyo ani lobo naker an aŋot ni imunori iko orryahat hoŋ.
\v 30 Ati lattu lonyi hoi olo ol otuk agurusi hoi daŋ ta amanya iko aati asomok, bwo iye ittu isyahina inyi atawwo ol ofir’to.
\p
\v 31 Attati monye jaran, Lonyi hoŋ, emanya iye ikoŋ aŋasi daŋ bwo fe arai erre hoŋ daŋ ahunohoi.
\v 32 Ati oyyu jihohoi imunori ahana nyo oye nya illa hoi olo, ati ihwania lisu; olitohi nya inyi, bwo ihwania aleyo.
\c 16
\cl Angati 16
\p
\v 1 Attati Yesu ikyana jyo leyiyanak honyi ojo, Owon nya lobo abarani iko labusuti honyi. Itisyahini laati abusuti jyo abarani jo, Otuk inyi erre hoi asai.
\v 2 Bwo inyi ette iloŋuna abusuti ette jaran jihonyi ojo, Nyo etaniŋu ni erre hoi ihwania? Iramak jihoŋ negyama hoi ono nelobusi nyo atuhuno egyama hoi jihoŋ.
\p
\v 3 Igigilo inyi ta ataji honyi ojo, Ehan ’tadi ni aŋai? Nyo eya eleittok hoŋ nelobusi hoŋ addi. Abeŋ ni aremik romo bwo fe eloriri ni atileŋita ihaŋitek wati.
\v 4 Amijak ni anyo adi ehanio ni jo oŋida isi omojuni ani ihasik hosi al atuhuno egyama ono elobusi hoŋ.
\v 5 Attati inyi iloŋuna aati horosi leittok honyi ette jaran jyo letteri ojo, Owoni asaŋ leittok hoŋ jihoi baya?
\v 6 Bwo inyi ette jaran jihonyi, Asofiahyen hiyali esiha abotye. Attati inyi jaran jihonyi, Itoŋoi, igyorok aduma hoi atomwana miet.
\p
\v 7 Ojo inyi jyo lobo, Arai hunohoi omukaja? Bwo inyi ette jaran, Asofiahyen alif abotye huno ometi. Ojo inyi jihonyi, Itoŋoi, igyorok aduma hoi atomwana hottohunik.
\v 8 Attati eleittok jaran jyo labusuti ol orroho’to ojo, Oyiji ehanita hoi nyo ilofyoroji laduri hulo elahaji ana agalihini lonyirok afaŋan.
\v 9 Tania ojo Yesu jihosi ojo, Orrehuna orryahat hatai ta ahwattek hatai te ebariti hutta fau jo oŋida al atuhuno jihatai ifwotuni adi isi itai jyo amanya on osyo’to fur.
\v 10 Lya al ihanio’to on oyyu te erre hun omutari’to ihanio adi inyi on oyyu bwo fe te erre hun obolori’to. Bwo fe lya al ihanio’to on orroho te erre hun omutari’to ihanio adi inyi on orroho bwo fe te erre hun obolori’to.
\v 11 Tania kuyya ibeŋ iye ihanio on oyyu te ebariti hutte fau, ŋai adi isyo jihoi ebariti huno nelahode?
\v 12 Bwo fe al ibeŋ iye irrirrya on oyyu erre huno obo atulo, ŋai adi ottu isyarana jihoi erre hoi?
\v 13 Obeŋ obo atulo oremik igyama jyo eleittaha arrihai. Nyo oliwari adi inyi olobotye bwo fe omuno obotye. Kuyya bu awak adi inyi olobotye bwo fe omyana obotye. Ibyaŋata tai iremehina igyamari jyo Hollum bwo fe jyo ebariti.
\p
\v 14 Bwo fe Farisei hul omunoi’to agurusi itaniŋuni erre huna ette isi suhotyere inyi.
\v 15 Bwo Yesu ette jaran jihosi ojo, Itai hul itahutana’to ehanita hatai hun oyiji ihomomite wati, omijak Hollum atajya hatai daŋ. Nyo oliwari Hollum erre hun itahabuye laati.
\p
\v 16 Odulori nya nefahita huno Mose iko egyerita huno eyak sayyo many ottuniere Yoane Batista. Many ta asaa nya ittiyenie asayyo hun oyiji huno nolobye Hollum bwo ojiŋani aati dia ta agolon.
\v 17 Ilyaha jyo nedou iko nafau apwahan agalik apwahan ono obo ekyana abotye ono efahita.
\p
\v 18 Iyyau lya al ifuha’to ŋorwoi honyi bwo ette yemuna obo. Bwo fe iyyau lya al ayama’to aŋotte an ifuhari.
\p
\v 19 Owon nya lobo labarani ol iyyafatyo’to aboŋojin hun oyiji hun ogoli te enyyaŋa. Bwo fe obolo aŋiyo jihonyi oŋitek daŋ.
\v 20 Owon nya lobo atileŋani al anya’to Lasaro inya itaferehini likat habarani bwo owon inyi iko atoŋos.
\v 21 Awak nya inyi ŋiyo ebenyiti hun odouni’to to teremeja habarani. Bwo aŋohe ette fwanna iddiddala atoŋos honyi.
\v 22 Inya laye atileŋani alya, akafarai nya anjelohyen inyi many jyo Abramo; ihalu oye bwo fe abarani ette nuhana.
\v 23 Attati inyi itoŋo Hadese, imaji ono layak, ta adyaha on obolo bebe. Teyya ette inyi bonno ette igonyuna Abramo alamarai iko Lasaro ol oco isuhe Abramo.
\v 24 Attati inyi iloŋo ojo, Abramo monyoŋ, omehinie jihoŋ. Ifahu Lasaro jo oŋida inyi ottirok afyalai honyi itwa hari oŋida bati iyyak ’tuna itilik aŋadyef hoŋ nyo amuda ni lihima.
\p
\v 25 Ati ojo Abramo jihonyi, Hito, oŋida iye igilu to oŋitek huno nesu hoi. Ifwotuta nya iye erre hun oyiji’to bwo Lasaro onyurak erre hun orrohoji’to, bwo ihwania omuno inyi bwo iye ittigemye.
\v 26 Bwo fe oŋida iye imijak jo owon awudori ihiji hohoi ikoye on obolo bebe. Jo hya hul owoni’to dini obeŋi oremehini ’laŋan dinia. Bwo hya hul owoni’to dinia obeŋi oremehini ’laŋuna dini.
\p
\v 27 Attati inyi jaran ojo, Monye Abramo, amojo ni jo oŋida iye ifak Lasaro ihaji monyoŋ.
\v 28 Awon ni iko illarak miet oŋida inyi olo iramana jihosi ŋadi isi ofwonni jyo amaji hima ana.
\p
\v 29 Ati ojo Abramo jihonyi, Owoni Mose iko eyak sayyo, ijara isi itaniŋye jihosi.
\p
\v 30 Bwo inyi ojo, Obeŋ, monyoŋ Abramo. Nyo al olo atulo jihosi to ye, oniŋye adi isi.
\p
\v 31 Bwo Abramo ette jaran jihonyi, Kuyya obeŋi isi itaniŋye jyo Mose iko eyak sayyo, obeŋi adi bwo fe isi itaniŋye ara dwadi bu ibuhu lobo to ye.
\c 17
\cl Angati 17
\p
\v 1 Attati Yesu jaran jyo leyiyanak honyi ojo, Ipali adi laati ahode ati orroho bebe jyo alya al itipalyo’to isi.
\v 2 Osiru ifitani amorwo on obolo’to imurut honyi ette bironia inyi ihari an ittok’on, ŋadi inyi itipal hul omutari’to hulo.
\v 3 Ihumata irrirrya ahwattek hatai. Kuyya iyyau illa hoi isiŋa inyi. Bwo al ijiriŋa inyi obusak inyi.
\v 4 Kuyya ihanio inyi on orroho jihoi enyyahita hattarik to noloŋ abotye bwo fe ijiriŋa inyi enyyahita hattarik ette jaran jihoi, Obusak ani, oŋida iye ibusak inyi.
\p
\v 5 Ojori lefahat jyo Hobu ojo, Itaboloro neruk hohoi.
\p
\v 6 Attati Hobu jaran ojo, Al owon neruk hatai ihwa aŋeryo bule iremehina adi itai jaran jyo ayyani ana, Odutunie addi jyo amaji ania, bwo idulanie itwa hari bwo inyi ette niŋyo.
\p
\v 7 Kuyya owon obo alatai iko apit ol oromo limana kuyya eyyahani kyoro bwo al ottu inyi t’egyama honyi, ojo adi eleittok jihonyi ojo, Waŋ, ihwania iŋiye aŋirya?
\v 8 Obeŋ adi inyi ojo jihonyi, Ihuhumak amaji ŋiyo? Ojo adi inyi bwo fe jo, Iyyafak aboŋo hoi bwo isyarak ani aŋiyo. Al atuk ni aŋiyo hoŋ iko amata, iremik adi iye ŋiyo bwo fe imata.
\v 9 Ojo adi inyi jyo lapit honyi, humo, al ihanio inyi erre hun ifak inyi?
\v 10 Ara ihwania jihatai bwo fe; al ituhonia tai nerre hun ifahini jihatai, ijatta jo, Era hohoi egyamak hul erroho’to, ehanio hohoi egyamita hun ifahini jihohoi hama.
\p
\v 11 Ati to ninya alari inyi Yerusalem ojiŋa nya inyi te ehiji Samaria iko Galilea.
\v 12 Ninya ojiŋak inyi jyo obo amiji, orwaŋanie inyi iko aati ’tallulu ’tomon ette isi wotya alamarai.
\v 13 Iloŋoi isi inyi bebe ojori, Yesu, Hobu, omehinie jihohoi.
\p
\v 14 Igonyu inyi isi ette jaran, Ifwatta, itahutana ahwattek hatai jyo ehumak hulo aji imojit. Hofwoi isi ette isi ŋidari.
\v 15 Attati lobo abotye al igonyu aŋida inyi, acohuno ette itahabuyo Hollum on okwat.
\v 16 Ette ruboho lifau ihosyere hejek Yesu ette isyo inyi ahumo bwo ara inyi olo Samaria.
\v 17 Attati Yesu ifiyo inyi ojo, ?Obeŋi dwo hul itaŋidari arai ’tomon? Tahyai hul omuk hulo hottoŋwan?
\v 18 Tahyai hul ofwonni isyoryere ahumo jyo Hollum? Ottu atomononi olo hama?
\v 19 Ojo Yesu jihonyi, Totte, ilo, itaŋida neruk hoi iye.
\p
\v 20 Ifiye omuk Farisei Yesu ojori, Ottu adi nolobye ono Hollum baya? Itarraŋ inyi ojo, Obeŋ nolobye Hollum ottu on oleyo.
\v 21 Tania obeŋi adi laati ojori, Imijyete owon inyi dini kuyya dia, nyo owon olobye Hollum ihiji hatai.
\p
\v 22 Attati Yesu jaran jyo leyiyanak honyi ojo, Ofwonni adi oŋitek hun iwahati adi itai igonyuniere noloŋ ono Lonyi ati ibyaŋata adi itai igonyuna.
\v 23 Bwo ojori adi isi jihatai, Imijyete dini, kuyya, imijyete dia. Ati hefwatta ittifyari inyi.
\v 24 Nyo al imedek ahilai t’edou, afaŋ inyi jyo aŋati abotye ono edou many jyo aŋati obotye. Orrijo adi jyo Lonyi tulo to noloŋ honyi.
\v 25 Ati ahosyere oŋida ittigemye inyi te ettigemita arryai bwo fe ihari adi inyi laati honyi.
\v 26 Ihwo ninya to noŋitek huno Noa, ara adi bwo fe ihwo nya to noŋitek huno Lonyi tulo.
\v 27 Oŋiye nya isi bwo fe amatai, ayamai isi bwo isyori nya isi liyamari many jyo noloŋ ninya ojiŋaniere Noa itogol, bwo naari ette ’tuna ette ’tohoro isi daŋ.
\v 28 Ihwo ninya bwo fe to noŋitek huno Loto, oŋiye nya isi bwo fe amatai, inyyaŋai isi bwo fe itinyyaŋai, oromoi isi bwo fe oduhoi asik.
\v 29 Ati to noloŋ ninya alari Loto addi to miji Sodoma ette neema iko abarut douna t’edou ette tuk isi daŋ.
\v 30 Ara adi ihwo nya jyo noloŋ an italeyeunierek Lonyi tulo.
\v 31 To noloŋ ana helaha lya ol owon’to lihide haji isuru ijiŋaniere itwa haji iduhuniere asaŋ honyi addi. Bwo fe helaha lya ol owon’to limana ocohuno lihaji honyi.
\v 32 Ogotyete ŋorwoi Loto.
\v 33 Lya al awak’to italahuna nesu honyi italitohi adi inyi, ati lya al italitohi’to nesu honyi italahuni adi inyi.
\v 34 Eramak ni itai jo, ta attari ania ojotoi adi aati arrihai jyo nejotit abotye. Iyarai adi abotye bwo idyaharai adi abotye.
\v 35 Owoni adi aŋorwo arrihai hun iryeye eluluŋ. Iyarai adi abotye bwo idyaharai adi abotye.
\v 36 Owoni adi alyawa arrihai imana. Iyarai adi abotye bwo idyaharai abotye.
\p
\v 37 Attati leyiyanak honyi itarraŋ ojori, Hobu jyo anani maji? Bwo inyi ette jaran jihosi ojo, Ottubanie adi attaruha jyo namaji an awanari ahwan hayani.
\c 18
\cl Angati 18
\p
\v 1 Attati Yesu iramana isi narryamara an itahutak’to isi jo oŋida isi odulori amojo bwo fe obeŋi itabani.
\v 2 Ojo inyi, Owon nya lobo aŋotoni hirre ol obeŋ abaŋ Hollum bwo fe obeŋ abaŋ aati.
\v 3 Bwo fe owon nya nobo nolobiloŋ ŋotte dia on odulo’to adaha jihonyi on ojo, Inienok ani amyotononi hoŋ.
\p
\v 4 Iha aŋotoni hirre ahosyere do, ati lihalu ojo inyi ta ahwan honyi ojo, Abeŋ bu ni abaŋ Hollum bwo fe abeŋ ni abaŋ laati,
\v 5 ati ittigemyo ani aŋotte ana, tania enienok adi ni inyi ŋadi inyi ittigemyo ani fur.
\v 6 Bwo Hobu ette jaran jo, Itaniŋyete erre hun ikyana laŋotoni al enyobyo’to.
\v 7 Obeŋ adi Hollum inienu onyimot honyi hul oyyoi jihonyi ta afanni iko ta attari? Bwo fe odihu inyi isi fur.
\v 8 Eramak ni itai jo inienu adi inyi isi kwak. Ati al ottu Lonyi tulo ottu adi inyi nyurana neruk lifau?
\v 9 Iramak nya bwo fe inyi narryamara ana jyo lomuk laati hul ojori’to jo elibo isi ati omyanai isi omuk.
\v 10 Ofwoi aati arrihai imojori litwa haji imojit eneittok. Ara lobo olo Farisei bwo lobo amojoni musuru.
\v 11 Owotya Afariseitanani ette mojo ta ahwan honyi ojo, Hollum ajo ni humo nyo abeŋ ni ara ihwa aati omuk, hul arai’to ahahorok gurusi wati, emumunak, asomok, bwo fe ihwa amojoni musuru olo.
\v 12 Aferuta ni enyyahita arrihai te esabit abotye. Esyoryo ni aŋaco etattomonita huno erre daŋ hun owoni’to jihoŋ.
\p
\v 13 Ati lamojoni musuru owotya alamarai ol obeŋ ibonno ahide ette naŋ asuhe honyi bwo ojo, Hollum omehinie jihoŋ, ani leyyani.
\v 14 Eramak ni itai, olo atulo olo ihaŋ honyi al alibo agalik lodwo lobotye. Nyo lya al itahabworo’to ahwan honyi itiloririji adi, bwo lya ol omyana’to ahwan honyi itahabuhini adi.
\p
\v 15 Iyaŋunie isi jyo Yesu aduri hun odihara’to jo oŋida inyi ottir isi. Ati ninya igonyuni leyiyanak honyi ana, itihi isi aduri hotobyaŋahi ofwoi jyo Yesu.
\v 16 Attati Yesu iloŋo isi ojo, Obusana aduri ofwonni jihoŋ, hetihoto isi nyo ara Hollum a Hobu hosi.
\v 17 Ahode eramak ni itai jo lya ol obeŋ’to iruk Hollum irari a Hobu honyi ihwa iruhori eito ol odiha’to obeŋ adi inyi ojiŋak ilobye Hollum.
\p
\v 18 Bwo ottu lobo eleittok ette ifiyo Yesu ojo, Hettiyanani ol oyyu, ehanio adi ni aŋai inyuraniere nesu on osyo fur?
\v 19 Attati Yesu itarraŋ jihonyi ojo, Nyo iloŋo iye ani ol oyijo? Obeŋ obo atulo oyyu arari fe Hollum hama.
\p
\v 20 Imijak iye efahita, “Hehanio nerre somon, hettoho, hehoholyo, hegesem, bwo fe itahabuye monyohoi iko honyohoi.”
\p
\v 21 Bwo eleittok alya ette jaran, Efaha ni erre hunia daŋ hara ni ahito many iko ahana.
\p
\v 22 Ninya itaniŋu Yesu nerre hunia ojo inyi jihonyi ojo, Owon ariŋ abotye an ipwak iye. Ilo itinyyaŋak erre hoi daŋ bwo aharak agurusi jyo alocaŋak bwo iwon adi iye iko ebariti hoi lidou, bwo ihalu waŋ, ijifatye ani
\v 23 Litaniŋu inyi erre hunia ette inyi jiriŋa bebe nyo abara inyi.
\v 24 Tania igonyu Yesu ejiriŋa honyi ette jaran, Ogol bebe jyo hul owoni iko ebariti ijiŋaniere ilobye Hollum.
\v 25 Ogol bebe jyo abarani ijiŋaniere ilobye Hollum agalik ajiŋana konnikonni ittulit libira.
\p
\v 26 Attati hya hul itaniŋuni’to inyi jaran, ngai ’tadi al italahuni?
\v 27 Attati Yesu jaran jihosi, Erre daŋ hun agalihini’to aati oremik Hollum ihanio.
\p
\v 28 Bwo Petro ette jaran jo, Ebusak hohoi erre hohoi daŋ ette jifatyo iye.
\p
\v 29 Tania ojo Yesu jihosi, Ahode ajo ni jihatai, atulo ol obusak’to ahaŋ honyi iko ŋorwoi honyi, illarak honyi, esyok honyi, kuyya bu aduri honyi ta namuno lobye Hollum,
\v 30 ifwotu adi inyi erre arryai jyo afau ana bwo fe lihalu ifwotu adi inyi nesu on osyo fur.
\p
\v 31 To obo oloŋ iyaru Yesu leyiyanak honyi hulo ’tomon harrihai aŋati ette jaran jihosi, Imijyete, efwo hohoi Yerusalem, bwo ihanie adi jyo Lonyi tulo nerre daŋ hunya igyoroni leyak sayyo.
\v 32 Nyo isyori adi inyi jyo paganohyen bwo osuhotyerek adi isi inyi ette ittigemyo inyi on orroho bwo fe omitai adi isi lihomom honyi.
\v 33 Abahye adi isi inyi ette ’tohoro inyi, ati ihalu oŋitek hunihoi ibuhu adi inyi.
\v 34 Obeŋi nya bu leyiyanak honyi itaniŋuni nerre huna nyo idimani nekyana ania jihosi bwo obeŋi isi omijani isi.
\p
\v 35 Ninya ilyaha Yesu imiji Yeriko bwo itoŋo obo oloŋodo iger ikoi al ififiyo’to aati ta alwahyo.
\v 36 Itaniŋu inyi eluluŋ wati adahai te ekoi ette inyi ifiyo isi ojo, Anyo eram?
\v 37 Ojori isi, Yesu olo Nasaret alya al adaha’to te ekoi.
\p
\v 38 Ette inyi iloŋo bebe ojo, Yesu Lonyi Davide, omehinie jihoŋ.
\v 39 Bwo fe hul adahai’to ahosyere ette iramana inyi hotodwai, ati arasa inyi illilloŋo agalik ojo, Lonyi Davide omehinie jihoŋ.
\p
\v 40 Owotya Yesu ette ifahina isi ojo, Iyaŋuniete inyi jihoŋ. Ottu inyi ette Yesu ifiyo inyi ojo,
\v 41 Anyo iwak iye oŋida ani ehanio jihoi? Ojo oloŋodo, Hobu, awak ni mijo.”
\p
\v 42 Ojo Yesu jihonyi ojo, Ijara oŋite hoi homijyehe. Itaŋida neruk hoi iye.
\v 43 Teyya kokwak omijo inyi ette jifaro Yesu bwo itahabuyo Hollum. Bwo fe laati daŋ hul igonyuni’to erre hunia itahabuye Hollum.
\c 19
\cl Angati 19
\p
\v 1 Ojiŋak inyi itwa miji Yeriko ette cul teyya.
\v 2 Owon lobo atulo al ara’to ahamojoni musuru bwo fe abara inyi, afure honyi Sakiyo.
\v 3 Ottifya inyi igonyuniere Yesu nyo awak inyi mijana inyi, ati ittallik inyi igonyuna nyo olwaji aati bwo fe osuk inyi.
\v 4 Ette inyi ŋyoron ihosyere ette dahina ihide ŋaboli nyo ottu Yesu te ekoi ania.
\v 5 Ninya afany Yesu jyo amaji ania ette inyi mijo ahide ette jaran jihonyi, Sakiyo, isuru kokwak, nyo ahana alo ni ihaji hoi.
\v 6 Isuru inyi kokwak ette rehuna inyi ta namuno.
\v 7 Igonyuni laati ette isi iŋuŋunita daŋ ojori, Alo inyi itoŋo iko atulo al ara’to aheyyani.
\p
\v 8 Bwo Sakiyo wotya ette jaran jyo Hobu ojo, Hobu esyarak ni anus hirre hoŋ jyo alocaŋak bwo fe kuyya ahoholu ni huno obo atulo enyyak ni jihonyi enyyahita aŋwan.
\p
\v 9 Ojo Yesu jihonyi ojo, Ahana ottu etalahuna jyo aji ana, nyo ara atulo olo bwo fe olonyi Abramo.
\v 10 Nyo ottu Lonyi tulo ittifyari iko italahuniere laati hul olitohini’to.
\p
\v 11 Ninya itaniŋuni isi erre hunia ikyana Yesu obo arryamara jihosi nyo ilyaha Yerusalem bwo fe igigiloi laati jo ottu adi olobye Hollum kokwak.
\v 12 Ojo inyi jihosi jo, Olo nya obo aboloni jyo obo afau ifwotuniere obo olobye, bwo inyi ojo acohuno adi.
\v 13 Ette inyi iloŋuna apiti honyi ’tomon ette isyarana jihosi ababo arobia ’tomon ette jaran jihosi, Opocoti ta agurusi huna many acohuniere ni.
\p
\v 14 Ati oliwarik aati hutto miji inyi ette ifahina omuk laati ihalu honyi hul ojori, Ebeŋ hohoi ewak atulo alya ahobu hohoi.
\v 15 Ifwotu inyi olobye honyi ette cohuno. Attati inyi iloŋuna apiti honyi hunya isyarak inyi agurusi. Ifiyo inyi isi ojo, Anyo an opocouna tai ta agurusi hunia?
\v 16 Otto ati obo olosi ’tuna jihonyi ojo, Hobu apocou ni esiha abotye ta arobia hoi hunya ’tomon.
\p
\v 17 Ojo hobu jihonyi, Oyyu, iye egyamani al iyyu. Igyama iye on oyyu ta ariŋ on omuta. Ehanak ni iye eleittok olo amisihi ’tomon.
\p
\v 18 Ottu etarrihi ojo, Hobu, apocou ni atomwana miet ta arobia hoi hunya ’tomon.
\p
\v 19 Ojo hobu jihonyi, Oyyu, ira iye eleittok olo amisihi miet.
\p
\v 20 Ottu bwo fe obo ojo jihonyi, Hobu, hibe arobia hoi huna hunya attunak ni isenuk hoŋ.
\v 21 Nyo abaŋ ni iye nyo ira iye atulo al igol. Ifwotu iye erre hun ibeŋ iye isyo bwo ideŋu iye jyo amaji an ibeŋ iye iyehi.
\p
\v 22 Ojo hobu jihonyi, Aŋot ni iye ihwa ikyana iye nyo ira iye egyamani al irroho’to. Imijak iye jo ara ni atulo al agol al efwotu erre hun abeŋ ni esyo, bwo fe adeŋu ni jyo amaji an abeŋ ni ayehi.
\v 23 Tania nyo ibeŋ iye ittunak agurusi hoŋ jyo aji an ottunatarik aati agurusi? Tania al attu ni anyurak dwo ni arobia hoŋ iko efoniti hosi.
\v 24 Ette inyi jaran jyo hul owotyai’to dia, Iyara arobia honyi, isyatta jyo lya ol owon’to iko arobia esiha abotye.
\p
\v 25 Ati ojori isi jihonyi, Hobu owon inyi iko arobia esiha abotye.
\p
\v 26 Ojo inyi, Ajo ni jihatai jo lya ol owon’to iko erre ofonik adi Hollum omuk jihonyi. Ati jyo lya ol obeŋ’to iko erre iyari adi jihonyi addi dwadi erre hun omutari hun owoni’to jihonyi.
\v 27 Iyaŋuniete amyorok hoŋ hulo hul ojori’to ebeŋ isi ewak ani ahobu hosi. Ottohoro isi ihosyere hoŋ.
\p
\v 28 Ninya atuhuno ekyana ette Yesu leten te ekoi Yerusalem.
\v 29 Lafany inyi ilyahai amisik Betfaji iko Betania hutteger doŋe an iloŋoi Oliveto, ifak inyi leyiyanak honyi arrihai,
\v 30 ojo, Ifwatta itwa miji on owon’to ihosyere hatai, inyurana adi itai obo aŋarri sigirya an ifitani, on obeŋ obo atulo itoŋori many hesiuni inyi. Ohouniete inyi, iyaŋuniete dini.
\v 31 Kuyya ifiyo obo itai ojo, nyo ihouna tai inyi? Itarraŋata jihonyi ojo, Awak Hobu inyi.
\v 32 Ette hul ifahini fwatan ette nyurana ihwa ikyana dwo Yesu jihosi.
\p
\v 33 Al ohouni isi asigirya ojori lamonye jihosi, nyo ihouna tai inyi?
\v 34 Itarraŋi isi ojori, Awak Hobu inyi.
\v 35 Ette isi iyaŋuno inyi jyo Yesu. Ofyatani isi aboŋojin hosi ihorwoŋ honyi, ette Yesu itoŋo dia.
\v 36 Hadaha inyi ofyatani isi bwo fe aboŋojin hosi ikoi.
\p
\v 37 Holo inyi te ekoi on orubo’to to doŋe Oliveto attati eluluŋ heyiyanak muno bwo fe itahabuye Hollum on okwat te edwariti daŋ hunya igonyuni isi.
\v 38 Ojori isi, Hotomunoi lya ol ottu’to ta afure ono Hobu, ijara nelik taji hatawana idou iko akwatan jyo Hollum.
\p
\v 39 Owoni nya omuk Farisei hutteluluŋ hul ojori jihonyi, Hettiyanani, Itadwa leyiyanak hoi.
\p
\v 40 Ati itarraŋ inyi ojo, Eramak ni itai, kuyya odwai laati hulo, iwuwoŋitai adi amorwoi.
\p
\v 41 Ninya afany inyi ilyaha igonyu inyi amiji ette iyyo ta amiji.
\v 42 Ojo inyi, Kuyya dwo imijak iye ahana eram ono nelik taji oyyu dwo. Ati ihwania idimani isi to hoŋite hoi.
\v 43 Nyo ofwonni adi oŋitek hun ikolonierek amyorok iye. Ikoloni adi isi iye to olohitir itihyere iye.
\v 44 Obwarani adi isi iye ifau iko aduri hoi daŋ. Obeŋ adi obo amorwo arasa ihide obo nyo ibeŋ nya iye imijak asaa on ottuniere Hollum jihoi.
\p
\v 45 Ette Yesu jiŋana ihaji imojit eneittok ette itteryo ifuhara hul itinyyaŋai’to.
\v 46 Ojo inyi jihosi, Igyoroni jo, “Iloŋoi adi aji hoŋ ahaji imojit, ati iloitoto tai inyi ahinom hahalak.”
\p
\v 47 Ette Yesu ittiyenio oŋitek daŋ ihaji ania. Attati ehumak eleittaha iko egyorok iko labolok wahan ’tohoro inyi.
\v 48 Ati obeŋi isi onyurani obo ekoi ihaniere ana nyo ijifatye laati inyi itaniŋuniere nekyanita honyi.
\c 20
\cl Angati 20
\p
\v 1 Teyya hettiyenio Yesu asayyo hun oyiji jyo laati ihaji imojit eneittok, ofwonni ehumak eleittaha iko egyorok bwo amarwak jihonyi.
\v 2 Ojori isi jihonyi jo, Iramak hohoi ta anani elaballok an ihanio iye erre huna. Ngai isyo jihoi elaballok?
\v 3 Ette inyi itarraŋ jihosi ojo, Efiyo adi ni itai obo efi, itarraŋata jihoŋ.
\v 4 Ottu elaballok ono Yoane an ibatisyere inyi laati tai? Ottu inyi jyo Hollum kuyya jyo aati?
\v 5 Ette isi ikikyana ta ahwattek hosi ojori, Kuyya ejo hohoi ottu elaballok honyi jyo Hollum, ojo adi inyi, Nyo ibyaŋata tai iruhoto inyi?
\v 6 Ati kuyya ejo hohoi, ottu elaballok honyi jyo aati, irwoŋye adi laati hohoi nyo iruhi isi daŋ jo ara Yoane aheyani sayyo.
\v 7 Tania ojori isi, Ebeŋ hohoi emijak.
\p
\v 8 Ojo Yesu jihosi, Abeŋ bwo fe ni eramak itai ta anani elaballok an ehanio ni erre huna.
\p
\v 9 Itteryo Yesu iramana laati arryamara ana. Idulak nya obo atulo ajalaŋi imana honyi ette inyi duma omuk laati icyari imana bwo olo inyi jyo obo afau ette itoŋo fur.
\v 10 Al ottu ayafa on odyarak aati aŋer ajalaŋi ifak inyi apit jyo ecyak mana imojuniere omuk aŋer jihosi. Ati abahi ecyak apit alya ette fuhara inyi ahania.
\v 11 Ifak inyi obo apit ette isi bak lya bwo fe, ette ihanio on orroho bebe jihonyi ette fuhara inyi ahania.
\v 12 Ifak inyi obo apit ette isi inyyak bak lya bwo fe ette fuhara inyi.
\v 13 Ojo lamonye ajalaŋi, Ehanio adi ni anyo? Efak adi ni lonyi hoŋ al amuno ni. Kuyya abaŋi adi isi inyi.
\p
\v 14 Ati al igonyuni ecyak lonyi honyi ojori isi, Arutani al attu lya, hattohoro inyi oŋida hohoi erutak erre honyi.
\v 15 Ette isi fuhara inyi to mana ette ’tohoro inyi. Tania ihanio adi lamonye ajalaŋi anyo jihosi?
\v 16 Ottu adi inyi ’tohoro ecyak hulya ette isyarana amana jyo lomuk. Al itaniŋuni isi ana ojori isi, Helaha ara ihwania.
\p
\v 17 Ati omijo Yesu jihosi ette jaran, Anyo attadi igyoroni? Igyoroni ojo, “Amorwop inya ihari aduhok Ottu ratan moi etteri lohitir.”
\p
\v 18 Lya ol okwaharo’to jyo amorwo ania, owuro adi, ati al isyak amorwo ania atulo, atad adi ahwan honyi.
\p
\v 19 Ta asaa ania awahi egyorok iko ehumak eleittaha inefuniere Yesu nyo omijani isi ikyana inyi arryamara ana tesi, ati abaŋi isi laati.
\v 20 Attati egyorok iko ehumak eleittaha irrirrya Yesu ette ifahina omuk aati hul itoŋoi ikonyi ihwa aati hul olibori itaniŋuniere ekyanita honyi jo oŋida isi arrasani inyi jyo okuma iko hobu olo okuma.
\v 21 Ifiye isi inyi ojori, Hettiyanani emijak hohoi jo ikyana iye bwo fe ittiyenio on obis, bwo ibeŋ iye igigya obo atulo ati ittiyenio iye ekoi ono Hollum ahode.
\v 22 Oyyu jihohoi idumari amusuru jyo hobu Cesare kuyya obeŋ?
\v 23 Ati omijak inyi enyobita hosi ette jaran jihosi,
\v 24 Iyaŋuniete arobia. ?Anaŋai arrijori ana bwo fe anaŋai afure ana? Ojori isi huno Cesare.
\p
\v 25 Ette inyi jaran jihosi, Isyatta jyo Cesare erre Cesare bwo fe jyo Hollum erre huno Hollum.
\v 26 Obeŋi isi oremehini rasana inyi ihosyere wati ta ekyana ana, attati isi illilliha te ekyanita honyi ette dwa.
\p
\v 27 To obo oloŋ ofwonni omuk hulo Saducehyen jihonyi hul ojori jo obeŋ nebuhuna.
\v 28 Ette isi ifiyo inyi ojori, Hettiyanani, ittiyenio nya Mose jihohoi efahi on ojo, Kuyya oye illa obo, bwo idyaharo ŋorwoi on obeŋ hito jihonyi, oŋida illanyi ojuŋori aŋotte nya isiuniere omuk aduri te illanyi.
\v 29 Owoni nya illarak hattarik. Oyemu oloŋeu aŋotte ette ye hobeŋi duri.
\v 30 Ihanio etarrihi bwo fe ihwo nya.
\v 31 Ihanio etahunihi ihwo nya. Attati isi daŋ hattarik ihanio ihwo nya ette ye obeŋi duri.
\v 32 Ihalu daŋ oye bwo fe aŋotte.
\v 33 Iholoŋ ono ebuhuna ottu adi inyi itoŋoi ŋorwoi ŋai? Nyo isi daŋ hattarik ojuŋorik inyi.
\p
\v 34 Ojo Yesu jihosi ojo, Ayamai aati hutta fau ana, bwo isyori iyamari.
\v 35 Ati hul osiruni’to ifanyari idou bwo fe hul ibuhuni’to to ye, obeŋi adi ayamai.
\v 36 Obeŋi adi bu isi inyyahi ye nyo orrijori isi iko anjelohyen bwo fe te ebuhuna hosi arai adi isi lonyirok Hollum.
\v 37 Itahutak nya Mose jo ibuhuni adi layak nyo iŋati buk honyi ehenio hohoi eram ono ayyani on owulo’to bwo iloŋo inyi Hobu, “Hollum olo Abramo, Hollum olo Isako, Hollum olo Yakobo.”
\v 38 Obyaŋara inyi Hollum olo ayak, ati ara inyi olo eswok, nyo isui laati daŋ tenyi.
\p
\v 39 Itarraŋi omuk hulo egyorok jihonyi ojori, Hettiyanani, ikyana iye on oyyu.
\v 40 Nyo abaŋi isi ifiyere inyi obo ariŋ.
\p
\v 41 Ette inyi ifiyo isi, Aŋai ojori laati ojo ara Kristo lonyi Davide?
\v 42 Nyo ojo nya Davide ta ahwan honyi ibuk ono Afureta ojo, “Ojo Hobu Hollum jyo Hobu hoŋ, Itoŋoi oŋyatai hoŋ,
\v 43 Many ehananiere ni amyorok hoi ebalori hejek hoi.”
\p
\v 44 Kuyya iloŋo Davide inyi Hobu, nyo ati ara inyi lonyi honyi?
\v 45 Ette Yesu ikyana jyo leyiyanak honyi bwo laati daŋ itaniŋuni.
\v 46 Ojo inyi, Ihumata mijo egyorok hul awahi’to adaha iko aboŋojin hun ohodori bwo fe omunoi isi laati hutto suk ifonya isi ta abaŋi. Awahi isi itoŋori imasik hun oyiji ihaji imojit, bwo fe imasik huno etahabuyo al oŋiye isi akarama.
\v 47 Ohoruni isi asaŋ to hasik ihidahi, ati omwanani isi arrohoji hosi te emojiti hun obolori’to. Ifwotuni adi isi abahyo on obolo bebe.
\c 21
\cl Angati 21
\p
\v 1 Ette Yesu mijo ette igonyuna abarak hul ifihye agurusi hosi isenuk imojit gurusi.
\v 2 Bwo fe ette inyi igonyuna obo elocaŋ ihidahi an itadohi atarifa itwa senuk.
\v 3 Ette Yesu jaran, Ahode ajo ni jihatai jo, obolo esyoryo elocaŋ ihidahi ana agalik daŋ.
\v 4 Nyo isyori isi daŋ te ebariti hosi ati te elocaŋ honyi isyarak inyi daŋ hun owoni’to jihonyi.
\p
\v 5 Ikikyanai omuk laati ta aji imojit eneittok jo ilaman inyi ta amorwoi iko ayyel hun isyori laati. Ati ojo Yesu jihosi,
\v 6 Imijyete tai erre huna ahana ati ofwonni adi oŋitek hun obeŋ adi obo amorwo arasa ihorwoŋ obo nyo itatturi adi isi daŋ.
\p
\v 7 Ette isi ifiyo inyi ojori, Hettiyanani, baya adi idwoŋi erre huna? Anyo adi etamijani an itahutak hohoi ojo ilyahai erre hwa?
\v 8 Ojo inyi, Ihumata irrirrya, helaha obo atulo itisyaba itai. Nyo ofwonni adi laati arryai ta afure hoŋ hul ojori, Ani alya Kristo, ojori isi bwo fe, Ilyahai oŋitek attuba, ati hejifatyete isi.
\v 9 Al itaniŋuna tai jo owon arrem bwo fe aŋalafa on obolo, hebaŋata, nyo ofwonni adi erre huna ahosyere ati hobeŋ esidi fau.
\p
\v 10 Ette inyi jaran jihosi, Ofwoi adi laati hutto maji obo jyo obo irryomoniere, bwo fe laati hutto lobye obo jyo obo.
\v 11 Bwo fe ikikiro adi afau bebe, owon adi ahure on obolo imasik arryai iko eŋwati. Ofwonni adi etamijanita hun obolori’to t’edou hun itabaŋi’to laati.
\v 12 Ati ahosyere hobeŋi erre huna idwoŋi, inefuni adi laati itai ittigemyere. Iyarai adi itai ihasik imojiti iko ababusi, bwo ihosyere hobwok iko mandiri ta afure hoŋ.
\v 13 Ara ana asiruna ono amiji jihatai iramaniere neruk hatai.
\v 14 Hegigiloti ahosyere jo itarraŋata adi itai aŋai.
\v 15 Nyo esyo adi ni jihatai ekyanita iko olofyoro hun obeŋi adi amyorok hatai oremehini itarraŋ.
\v 16 Isyori adi esyok iko illarak hatai itai jyo amyorok hatai, bwo fe isyori adi aati hutta haŋ iko mottyarak hatai itai jihosi bwo ottohori adi omuk hulatai.
\v 17 Oliwarik adi itai aati daŋ ta afure hoŋ.
\v 18 Ati obeŋ adi obo ofiti to hosi hatai olitohi.
\v 19 Bwo al odihu’to italahuni adi.
\p
\v 20 Ati al igonyuna tai oseŋer ikoloni Yerusalem, omijana jo ilyaha atturo honyi.
\v 21 Iholoŋ ania ijara hul owoni’to Yudea hotofuhohi lidoŋyok, bwo fe hul owoni’to itwa miji hefwahi addi. Bwo fe ol owon’to limana hotobyaŋa acaharu itwa miji.
\v 22 Nyo arai oŋitek huna oŋitek huno enienuna jo oŋida itasiruni erre daŋ hun igyoroni.
\v 23 Orroho bebe jyo aŋorwo hun oyeduri’to iko hun itadasye’to to noŋitek hwa. Nyo owon adi ettigemyo on obolo jyo afau ana iko ajore on obolo jyo laati hulo.
\v 24 Ottohori adi omuk ta afere bwo iyarai adi omuk apiti ifau paganohyen, bwo fe iryeyere adi paganohyen amiji Yerusalem many ottubarik oŋitek huno paganohyen.
\p
\v 25 Owoni adi etamijanita liholoŋ iko liyafa bwo lilelyefi. Bwo fe lifau owon adi elafuho iko apapaŋi lihiji wati nyo ifolyahita aari bebe.
\v 26 Okwaharai adi laati ta abaŋi al igonyuni isi erre hun ofwonni’to ifau nyo ikikiroi adi erre hutte dou.
\v 27 Attati isi igonyuna Lonyi tulo al isuru t’edou lihide idisi iko nadwaran iko akwatan on obolo.
\v 28 Al igonyuna tai erre huna idwoŋi, owotyati, ibonnoto ahide, nyo ilyaha etalahuna hatai.
\p
\v 29 Ette inyi iramana jihosi obo arryamara. Imijyete aŋaboli iko ayyanio daŋ.
\v 30 Al oyisuni abene aŋejuho imijana tai ta ahwattek hatai jyo ilyaha atahas.
\v 31 Ihwania bu al igonyuna tai erre huna idwoŋi, omijana jyo ilyaha olobye Hollum.
\v 32 Ahode ahode ajo ni jihatai, obeŋ adi elahaji ana oyei many ihanierek erre huna daŋ.
\v 33 Nyo obyaŋarani adi nedou iko nafau ati obeŋi nekyanita hoŋ opwahi ’tuŋ.
\p
\v 34 Ati ihumata ahwattek hatai bwo fe helaha atajya hatai ifuti iko adaya ojo aruma bwo fe ewahiti huno afau ana, ŋadi oloŋ ania ilunyu jihatai lunyuna ihwa elohit.
\v 35 Nyo ottu adi inyi ihwania jyo laati daŋ hutta fau.
\v 36 Tania ihumata irrirrya ta asahyen daŋ bwo fe omojoti jo oŋida itai iremehina iris jyo erre hun ofwonni’to huna ittata tai wotya ihosyere Lonyi tulo.
\p
\v 37 Ati oŋitek daŋ ittiyenio Yesu ihaji imojit eneittok bwo fe ta attari olo inyi jototyo idoŋe Oliveto.
\v 38 Bwo fe ta amotye hanyik ofwonni aati daŋ jihonyi ihaji imojit eneittok itayiruniere ekyanita honyi.
\c 22
\cl Angati 22
\p
\v 1 Ihwania ilyaha neyom an ifurani Allaŋan Anjelo bwo fe neyom on oŋiyerek isi emune on obeŋi bula.
\v 2 Attati ehumak eleittaha iko legyorok ’tifya aŋai adi ottohori isi Yesu. Nyo abaŋi isi laati.
\p
\v 3 Attati Sitan jiŋana Yuda al ifurani Iskariote al ara’to olo ’tomon harrihai.
\v 4 Ette inyi leten iwwaha iko ehumak eleittaha bwo oseŋer, aŋai adi itinyyaŋak inyi Yesu jihosi.
\v 5 Omunoi isi ette coronia jihonyi aduma.
\v 6 Iruk inyi ette ’tifyatyo amaji an obyaŋarik laati isyoryere Yesu jihosi.
\p
\v 7 Ette oloŋ ania ’tuna ono nemunio iko on ottohyerek isi aker ono ehuma.
\v 8 Ette inyi ifahina Petro iko Yoane ojo, Ifwatta ihuhumana amaji jihohoi iŋiyere ta neyom ono Allaŋan Anjelo.
\p
\v 9 Ojori isi jihonyi, Anani maji an efwo hohoi ihuhumyo?”
\v 10 Ojo inyi jihosi, Imijyete, al ijiŋana tai itwa miji irumana adi itai obo atulo al iwwahatyo atobok hari. Ijifati inyi jyo aji an alari inyi.
\v 11 Ijatta jyo amonye haji jo, Ojo Ettiyanani, tani aji tamonok oŋida ani aŋiyere ta neyom iko leyiyanak hoŋ?
\v 12 Itahutak adi inyi itai aji an alat iko nerre daŋ huno neyomita bwo itai ihuhumana amaji to hohoi.
\v 13 Ette isi fwatan ette rumana erre daŋ ihwa iramak dwo inyi isi. Tania ihuhumani isi aŋiyo te eyom ono Allaŋan Anjelo.
\p
\v 14 Ninya attuba asaa itoŋo inyi iko lefahat honyi.
\v 15 Attati inyi jaran jihosi, Ta awahan on obolo itaji hoŋ awak dwo ni iŋiyere te eyom ana ikatai ihosyere ettigemyo hoŋ.
\v 16 Nyo ajo ni jihatai, abeŋ adi ni enyyak ŋiyo inyi many etaleyehiniere ni awoyo hiram honyi ilobye Hollum.
\v 17 Ette inyi ifwotuna akos ette jaran humo jyo Hollum, ette isyarana jyo leyiyanak honyi ojo, Hibetina, ihiharana ihiji hatai.
\v 18 Nyo ajo ni jihatai abeŋ ni enyyak mat aari ajalaŋi many ottuniere olobye Hollum.
\v 19 Ette inyi iduhuna emune ette jaran humo jyo Hollum, ette ibibeny attati isyarana jihosi ojo, Ara ana ihwa ahwan hoŋ an esyo ni tetai, ihaniete ihwania igiluniere ani.
\v 20 Ninya atuhuno aŋiyo ette inyi iduhuna akos ojo, Ara akos ana ecorit aŋejuk ono nooto hoŋ, on owouno’to addi tetai.
\v 21 Ati imijyete, lya al itinyyaŋa’to ani el ewon ikohoi iteremeja.
\v 22 Nyo oye adi Lonyi tulo ihwa onyimok nya Hollum tenyi ati orroho bebe jyo alya al itinyyaŋa’to inyi.
\p
\v 23 Ette isi itteryo ififiyo ta ahwattek hosi jo ŋai alya al ihanio’to ariŋ ania.
\p
\v 24 Ette isi ŋalafa jo ŋai adi eleittok ihiji hosi.
\p
\v 25 Attati Yesu jaran jihosi, Ilettohorik hobwok hulo paganohyen aati hosi. Bwo fe iloŋoi aati isi ahalwak hosi.
\v 26 Ati obeŋ ara ihwania jihatai, nyo ijara eleittok hatai hetera do apit, bwo fe ijara hobu hetera do ahegyamani.
\v 27 Ngai adi eleittok? Inyi alya al itoŋo’to iŋiyere kuyya lya al isyo jihonyi aŋiyo? Ahode lya ol oŋiyo’to, inyi eleittok. Ati attu ni ihiji hatai ihwa alya al igyama’to.
\p
\v 28 Ati jihatai hul edulo’to ikoŋ te ettigemyo hoŋ,
\v 29 acorok ni jihatai olobye ihwa ocorok nya Monyoŋ jihoŋ.
\v 30 Iŋiyete adi itai bwo fe imatati iteremeja hoŋ ilobye hoŋ. Itoŋoti adi itai bwo fe imaji leittok iŋocere awoi ’tomon harrihai huno Israele.
\p
\v 31 Ojo Yesu, Simone, Simone, imijye awak Sitan iye igilyo ihwa ema.
\v 32 Ati amojo ni teye jo oŋida neruk hoi obeŋ opwak. Bwo fe al irwe iye itagolo illarak hoi.”
\p
\v 33 Ati ojo Petro jihonyi, Hobu ehuhuma ni ilari ibabus dwadi iyeri ikoye.
\p
\v 34 Ati ojo Yesu, Eramak ni iye Petro jo hobeŋ ahohoro ilok ahana, iha adi iye ani enyyahita hunihoi.
\p
\v 35 Attati inyi jaran jihosi, Ninya efahuniere ni itai ahania ta abyaŋan kis, kuyya ettunit gurusi, kuyya bu amuha, iwahata nya itai omuk erre? Ojori isi, Obeŋ nya obo.
\p
\v 36 Bwo ojo inyi jihosi, Ati ihwania ijara alya ol owon’to iko akis heyaro inyi, iko lya ol owon’to iko ettunit gurusi. Bwo fe ol obeŋ’to owon iko afere ijara inyi itinyyaŋak agamis honyi inyyaŋuniere afere.
\v 37 Nyo ajo ni jihatai, etasiru adi ni ekyana ana on ojo, “Ihyanani inyi iko aati hul iyyauni’to.” Nyo itasiruni adi erre daŋ hun igyoroni toni.
\p
\v 38 Ojori isi jihonyi jo, Hobu imijye, afyara arrihai huna. Bwo ojo inyi jihosi oremehini hunia.
\p
\v 39 Ette inyi jiŋuna to miji ette leten lidoŋe Oliveto ihwa ihanio inyi toloŋi. Attati leyiyanak honyi jifaro inyi.
\v 40 Ninya afanyi isi jyo amaji ania, ojo inyi jihosi, Omojoti jo oŋida esusuyo obeŋ ottu jihatai.
\v 41 Ihut inyi alamarai kai ihwa oremik atulo irwoŋoro amorwo. Origoŋ inyi ette mojo.
\v 42 Ojo, Monye kuyya ara awahan hoi iyai akosq ana addi jihoŋ, ati ijara awahan hoi ihanie, obyaŋara awahan hoŋ.
\v 43 Attati anjelo leyo jihonyi t’edou itagolyere inyi.
\v 44 Ette ataji honyi dyaha bebe ette inyi mojo ta amijan taji bwo fe opulo omom honyi ahoto ette itihuna many ifau.
\v 45 Ninya atuhuno amojo ette inyi dyoto ette leten jyo leyiyanak honyi. Onyurak inyi isi ojotoi nyo obolo ejiriŋa jihosi.
\v 46 Ette inyi jaran jihosi, Nyo ijototi tai? Ottena, omojoti jo oŋida esusuyo obeŋ ottu jihatai.
\p
\v 47 Hekyana inyi ofwonni eluluŋ wati iko Yuda al ara’to olo ’tomon harrihai al ikyem osyere. Ihutok inyi jyo Yesu bwo awak inyi jur inyi.
\v 48 Ati ifiyo Yesu inyi ojo, Yuda, itaminyeyo iye Lonyi tulo ta ajuryo hoi?
\v 49 Ninya igonyuni laati hul owoni’to iko Yesu erre hun idwoŋi’to ojori isi, Hobu, errem adi hohoi isi ta afyara?
\v 50 Bwo oyef obo olosi egyamani olo ehumani ol obolo’to, ette isaluna neyyok honyi etteŋet.
\p
\v 51 Ati ojo Yesu jihonyi, Obusak, ette inyi ’tir eyyok egyamani ette itaŋida inyi.
\v 52 Ojo Yesu jyo ehumak eleittaha, iko oseŋer hulo aji imojit eneittok bwo amarwak hul ofwonni’to jihonyi, Ifwanna tai iko afyara bwo elluhi inefuniere ani ihwa olohoho?
\v 53 Ati oŋitek daŋ ewon ni ikatai ihaji imojit eneitok bwo ibyaŋata tai ani inefuna. Ati ara asaa ana anatai iko adwaran ono edumele.
\p
\v 54 Inefuni isi inyi ette rihoro inyi many ihaji ono ehumani ol obolo’to. Ati ijifaro Petro isi alamarai.
\v 55 Inahini isi eema itwa haŋ ette isi suja arabotye. Itoŋo Petro bwo fe ikosi.
\v 56 Ati igonyu obo odwoti inyi itoŋo ifaŋit hima ette inyi yadari jihonyi ette jaran, Owon dwo atulo olo ikonyi.
\p
\v 57 Ati orisa inyi ojo, Hanioŋ, abeŋ ni amijak inyi.
\p
\v 58 Ojo gaa igonyu obo inyi ette jaran, Ira iye obo olosi. Ati ojo Petro, Olo, obeŋ.
\p
\v 59 Al allaŋ asaa abotye ette obo ikyana ojo, dwo atulo olo ikonyi, nyo ara inyi olo Galilea.
\p
\v 60 Ati ojo Petro, Olo, abeŋ ni amijak anyo ikyana iye. Teyya hekyana inyi ette ahohoro ilok.
\p
\v 61 Oyito Hobu ette fyala jyo Petro. Attati Petro giluna ekyana ono Hobu, odwo ojo inyi jihonyi jo, Hobeŋ ahohoro ilok ahana iha adi iye ani eharita hunihoi.
\v 62 Olo inyi ilet ette ’yo bebe.
\p
\v 63 Attati laati hul inefuni’to Yesu osuhotyere inyi ette bahyo inyi.
\v 64 Ifitani isi aboŋo ihoŋite honyi ette isi jaran jihonyi, Ottenu, ŋai al anaŋ’to iye?
\v 65 Ette isi moryo inyi te erre arryai.
\p
\v 66 Nya motye ottubanie amarwak iko ehumak eleittaha bwo legyorok ette iyaro inyi ihosyere okikoi hosi. Ojori isi,
\v 67 Kuyya ira iye Kristo, iramak hohoi. Ati ojo inyi jihosi, Kuyya eramak ni itai ibyaŋata tai iruhoto.
\v 68 Bwo fe kuyya efiyo ni itai obo efi ibyaŋata adi itai itarraŋata.
\v 69 Ati igonyuna adi itai Lonyi tulo al itoŋo’to ihani iŋet ono Hollum adwarani.
\p
\v 70 Ojori isi, Ira ati iye Lonyi Hollum? Ojo inyi jihosi, Ihwa ijatta tai, ani alya.
\v 71 Ojori isi, Anyo nyi ettifya hohoi etamijanak omuk? Etaniŋu hohoi ta ahwattek hohoi ekyanita honyi.
\c 23
\cl Angati 23
\p
\v 1 Teyya odyotoi laati hulya ette iyaro Yesu ihosyere Pilato.
\v 2 Ette isi ’rosyo inyi ojori, Enyurak hohoi atulo olo isusuyo laati hohoi bwo fe iramak inyi laati hotobyaŋahi odumai amusuru jyo Cesare. Ojo inyi bwo fe inyi Kristor, Hobu.
\p
\v 3 Ifiyo Pilato inyi ojo, Ira iye Hobu olo Yudea? Tania itarraŋ Yesu, Ihwa ijo bu iye.
\p
\v 4 Attati Pilato jaran jyo ehumak eleittaha iko eluluŋ wati ojo, Abeŋ ni anyurak obo epali jyo atulo olo.
\p
\v 5 Ati ikyanai isi ta agolon ojori, Itipalyo inyi laati te ettiyenio honyi ifau Yudea daŋ, to Galilea many jyo amaji ana.
\p
\v 6 Ninya itaniŋu Pilato erre hunia ifiyo inyi ojo, Olo Galilea olo?
\v 7 Al itaniŋu inyi jo ara inyi olo afau an ilettohori Erode, ifak inyi Yesu jyo Erode ol owon’to Yerusalem jyo oŋitek hunia.
\v 8 Ninya igonyu Erode Yesu omuno inyi bebe nyo awak nya inyi igonyuna Yesu, nyo itaniŋu nya inyi eram honyi bwo fe awak inyi igonyuna obo etamijani an ihanio inyi.
\v 9 Ifiyo inyi Yesu efita arryai ati obeŋ Yesu itarraŋ obo ariŋ.
\v 10 Attati ehumak eleittaha iko legyorok rosyo inyi ta ajore.
\v 11 Itafitaŋye Erode iko oseŋer honyi Yesu ette suhotyere inyi. Itiyyafani isi aboŋo an ilaman jihonyi ette inyyaharo inyi jyo Pilato.
\v 12 To oloŋ ania ette Pilato iko Erode imwara nyo oliwai nya isi.
\p
\v 13 Attati Pilato iloŋuna ehumak eleittaha iko hobwok hulo aati,
\v 14 bwo ojo jihosi, Iyaŋuniete dwo itai atulo olo jihoŋ nyo ijatta tai ara inyi atulo al isusuyo aati. Ati imijyete, efiyo dwo ni inyi ihosyere hatai ati abeŋ ni anyurak arrohoji honyi te erre hun irrasana tai inyi.
\v 15 Obeŋ bwo fe Erode onyurak arrohoji honyi nyo inyyahuno inyi Yesu jihohoi. Teyya obeŋ obo ariŋ an ihanio inyi an osiru jihonyi ta aye.
\v 16 Tania aŋot adi ni jihonyi abahyo bwo ette hohina inyi.
\v 17 Nyo oŋida inyi ohou atulo abotye to babus iholoŋ ono neyom.
\p
\v 18 Ati iwuwoŋitai laati arabotye ojori, Iyara atulo olo addi, ohou jihohoi Baraba.
\v 19 Ara nya Baraba amyotononi olo okuma ol ottohyo’to aati tania ifitani okuma inyi ibabus.
\v 20 Ati awak Pilato ihohiniere Yesu ette iloŋuna jihosi.
\p
\v 21 Ati arasai isi iwuwoŋitai ojori, Isihonia inyi, isihonia inyi.
\v 22 Inyyak inyi jaran jihosi enyyahi etahunihi. Nyo, anyo ariŋ on orroho’to an ihanio inyi? Abeŋ ni anyurak obo ariŋ an osiru jihonyi ta aye. Aŋot adi ni abahyo jihonyi ette hohina inyi.
\v 23 Ati iwuwoŋitai isi bebe agalik ojori, Isihonia inyi. Ette isi itarisa iko Pilato fur ette ihara ekyana honyi.
\v 24 Attati Pilato ŋot jihonyi ihwa awahi dwo isi.
\v 25 Ette inyi hohina amyotononi olo okuma alya inya ifitani ibabus ta attohyo honyi aati, ihwa awahi isi. Ati isyo inyi Yesu jihosi ihaniere ihwa awahi isi.
\p
\v 26 Orihoroi isi Yesu addi, ette isi inefuna Simone olo Cirene ol ottu’to to mana ette italororo inyi akruce ihalu Yesu.
\v 27 Ijifarai eluluŋ wati arryai ehalu honyi, iko aŋorwo hun oyyoi bwo fe ijiriŋai bebe.
\v 28 Oyito Yesu jihosi ette jaran, Ŋarryok Yerusalem, heyyoti toni, ati oyyoti ta ahwattek hatai iko aduri hatai.
\v 29 Nyo imijyete, ofwonni oŋitek hun ojori adi laati, Ijara aŋorwo hun iholofiji’to hotomunohi bwo fe hun obeŋi’to isiuni aduri iko hun obeŋi’to itadasye.
\v 30 Ojori adi laati jyo adoŋyok, Okwahuniete jihohoi bwo fe imuluhana hohoi.
\v 31 Al ihanie isi erre huna ta atahas, ihanie adi isi anyo ta ameyyu?
\v 32 Orihoroi isi bwo fe omuk aati arrihai hul orrohoji’to ittohori iko Yesu.
\v 33 Afanyi isi jyo obo amaji an iloŋoi amaji hou, ette isihonia Yesu dia iko hyodwo wati hul orrohoji’to, abotye ette ŋet bwo abotye ette horroŋ.
\v 34 Ojo Yesu, Monye obusak isi nyo otimoi isi anyo an ihanie isi. Awahi isi horyo aboŋojin honyi ette isi bak agumar.
\v 35 Owotyai laati dia ette iŋiŋyala inyi. Osuhotyerek bwo fe eleittaha inyi ojori, Italahu nya inyi omuk. Ikejara inyi italahu ahwan honyi kuyya ara inyi Kristo onyimoto olo Hollum.
\p
\v 36 Osuhotyerek bwo fe oseŋer inyi ette isyarana jihonyi aari hun irwatiŋoi’to.
\v 37 Ette jaran, Kuyya ira iye Hobu olo Yudea, italahu ahwan hoi.
\v 38 Igyoroni isi ihide kruce honyi jo, Ara olo Hobu olo Yudea.
\p
\v 39 Abotye olo aati hul orrohoji’to hul isihoni ikonyi omoryo inyi ojo, Ibeŋ iye ira Kristo? Italahu ahwan hoi ikohoi.
\p
\v 40 Ati isiŋyo obotye inyi ette jaran, Ibeŋ iye ibaŋ Hollum? Bwo orrijori aŋoco hoi iko ononyi.
\v 41 Obis jihohoi, nyo efwotu hohoi edumit on osiru jihohoi, ati obeŋ atulo olo ihanio obo ariŋ on orroho.
\v 42 Ette inyi jaran jyo Yesu ojo, Ogilu ani al ifany iye ilobye hoi.
\p
\v 43 Ojo Yesu jihonyi, Ahode ajo ni jihoi, ahana ewon adi iye ikoŋ imaji Hollum.
\p
\v 44 Ta akilfanni many otoryai iryok afau daŋ edumele ’tir ’tir.
\v 45 Iryok bwo fe oloŋ attati aboŋo ono aji imojit eneittok gwasa hama tehiji.
\v 46 Attati Yesu iloŋo bebe on okwat ojo, Monyoŋ, esyo ni oloyiri hoŋ ihas hoi. Hekyana inyi ihwania ette inyi ye.
\p
\v 47 Al igonyu eleittok olo oseŋer erre hun ihanie, itahabuyo inyi Hollum ojo, Ahode ara atulo olo atulo ol olibo.
\v 48 Ottubanie aati hyodwo omijye’to ette naŋyo asuhyara hosi ta abaŋi ette caharu.
\v 49 Bwo fe mottyarak honyi iko aŋorwo hun ijifatye inyi to Galilea, owotyai alamarai imijyere erre huna.
\p
\v 50 Attati obo atulo ’tuna al anya’to Yosefo al ara olo aŋotok wati. Ara inyi atulo ol obis bwo fe olibo.
\v 51 Obeŋ dwo bu inyi iruk aŋoco hosi on orroho. Ara inyi olo Arimatea amiji ono Yudea, bwo fe itilatyo inyi to olobye Hollum.
\v 52 Attati inyi leten jyo Pilato ifiyere ahwan Yesu.
\v 53 Ette inyi dutuna ahwan Yesu to kruce ette bubunana inyi ta aboŋo on obwor ette itaferehina inyi ilume an ikyafani ibak jyo amaji an hobyaŋarik onuhanierek obo atulo.
\v 54 Ara nya inyi oloŋ an ihuhumyerek erre to sabato.
\v 55 Attati aŋorwo hodwo ofwonni’to ikonyi to Galilea, jifaro imijuniere elume iko ahwan honyi.
\v 56 Ette isi caharo ihuhumyere eyali on oŋwo’to gir gir. Bwo fe to sabato oyiri isi ifahari efahita.
\c 24
\cl Angati 24
\p
\v 1 Iholoŋ etteri ono nesabit ta ataŋatye motye, iyarai isi arya on oŋwo’to gir gir ette fwatan ilume.
\v 2 Ette isi nyurana amorwo ibolohuni addi te lume.
\v 3 Ojiŋani isi ette nyurana ahwan ono Hobu Yesu abeŋ teyya.
\v 4 Tania illillihai isi, attati omuk laati arrihai wotya iger hosi hul iyyafatye aboŋojin hun opipyahi’to.
\v 5 Abaŋi aŋorwo ette ruboho ifau. Ojori laati jihosi jo, Nyo ittifyati tai lya al isu’to ihiji hayak?
\v 6 Abeŋ tene nyo ibuhu dwo inyi. Ogiluna ekyanita hunya ikyana inyi jihatai howon inyi Galilea,
\v 7 ojo, Oŋida Lonyi tulo itinyyaŋani ihas wati hul iyyauni’to isihoniere, ette inyi buhuna ihalu oŋitek hunihoi.
\v 8 Ette isi giluna ekyanita honyi.
\v 9 Acaharai isi te lume ette iramana erre huna daŋ jyo leyiyanak hulo ’tomon habotye iko hul omuk daŋ.
\v 10 Arai nya isi Maria Madalena, Joane, Maria honye Yakobo iko omuk aŋorwo hun iramani’to erre huna jyo lefahat.
\v 11 Ette lefahat hulo igigilo jo ikyanai isi asai bwo obeŋi isi iruhi.
\v 12 Teyya odyoto Petro ette ŋyoron ilume, irafa inyi ette luŋur atwa lume. Ette inyi igonyuna aboŋojin hama, ette caharo ihaŋ honyi bwo illilliha inyi te erre hun idwoŋi’to huna.
\p
\v 13 To oloŋ nya ofwoi omuk laati imiji Emayo an ara alamaji honyi to Yerusalem amail hattarik.
\v 14 Hadahai isi ikikyanai isi ta ahwattek hosi te erre hun idwoŋi’to huna.
\v 15 Teyya hekikyanai isi bwo fe ifiye awoyo hiram ottu Yesu ette daha ikosi.
\v 16 Igonyuni isi inyi ati obeŋ oleyo jihosi ihwa Yesu dwo lya.
\v 17 Ette inyi ifiyo isi, Anyo ikikyanati tai ta ahwattek hatai al idahati tai? Ette isi wotya bwo ijiriŋai.
\p
\v 18 Bwo obo olosi afure honyi Kiliopa itarraŋ jihonyi ojo, Iye alya atulo abotye to Yerusalem al itimo’to erre hun idwoŋi’to huna to oŋitek huna?
\v 19 Ojo inyi jihosi, Anyo hirre hwa? Ojori isi jihonyi ojo, Erre huno Yesu olo Nasaret, inya ara’to aheyani sayyo ol owon iko adwaran te ehanita bwo fe ekyanita ihosyere Hollum iko laati daŋ.
\v 20 Bwo fe iyarai ehumak eleittaha iko hobwok hohoi inyi ette ŋot jihonyi aye, bwo isihoni inyi.
\v 21 Eyihi nya hohoi jo inyi adi alya al italahu’to Israele. Ati ihwania allaŋi oŋitek hunihoi ihalu erre hunia.
\v 22 Bwo fe ellilliha hohoi to omuk aŋorwo hohoi hun ofwoi dwo motye hanyik ilume.
\v 23 Attati isi nyurana ahwan honyi abeŋ teyya, ette isi fwanna bwo ojori, Egonyu dwo hohoi anjelohyen hul ojori’to jihohoi, isu inyi.
\v 24 Ofwoi dwo omuk hulohoi ilume bwo fe onyurani erre ihwa ikyanai dwo aŋorwo ati obeŋi isi igonyuni Yesu.
\p
\v 25 Attati Yesu jaran jihosi, Itai hul ibuyaŋati’to bwo fe hul obeŋi’to iruhi kokwak ekyanita daŋ hunya ikyanarik eyak sayyo.
\v 26 Osiru jyo Kristo idihuniere erre hunia ette jiŋana ikwatan honyi.
\v 27 Ette inyi iramana jihosi erre daŋ hunya igyoroni igyerita tenyi, many te egyerita huno Mose many jyo eyak sayyo daŋ.
\p
\v 28 Ette isi fanyan jyo amiji ninya ofwarrik isi bwo fe ojo Yesu allaŋ inyi amaji ania.
\v 29 Ati itihi isi inyi ette jaran, Hetoŋoi ikohoi nyo amuta oloŋ bwo ilyaha attari. Attati inyi leten itoŋori ikosi.
\v 30 Teyya itoŋoi isi iŋiyere, ette Yesu iduhuna emune ette jaran humo jyo Hollum ette ibibeny ette isyarana jihosi.
\v 31 Attati inyi leyo jihosi ette isi mijana inyi attati inyi litohina to hoŋite hosi.
\v 32 Bwo ikikyanai isi ta ahwattek hosi ojori, Obeŋi dwo atajya hohoi owulori odwo ikyanari inyi jihohoi te egyerita?
\v 33 Ette isi dyoto ta asaa ania ette caharu Yerusalem. Attati isi nyurana hulo ’tomon habotye ottubanie arabotye, bwo fe hul owoni’to ikosi hul ojori,
\v 34 Ibuhu dwo Hobu ahode ette leyo jyo Simone.
\v 35 Ette isi iramana isi erre hun ihanie dwo te ekoi, bwo fe aŋai omijani isi inyi al obeny inyi emune.
\p
\v 36 Hekyanai isi ihwania ette Yesu wotya ihiji hosi ta ahwan honyi bwo ojo jihosi, Ijara nelik tajya hatawana jihatai.
\v 37 Ati abaŋi isi bebe bwo fe ikikiroi nyo igigiloi isi ara inyi aŋarri jok.
\v 38 Ati ojo inyi jihosi, Nyo ibaŋata tai bwo ilafuhoti?
\v 39 Imijyete ahas hoŋ iko ejek hoŋ. Ara ani ahode. Ikottiroto ahwan hoŋ bwo fe imijyete, nyo obeŋ aŋarri jok owon iko ahwan ihwa ani.
\v 40 Attati inyi itahutana jihosi ahas honyi iko ejek.
\v 41 Ati arasai isi ikuyya ati omunoi isi bwo fe illillihai. Ette inyi ifiyo isi, ?Owon obo aŋiyo jihatai?
\v 42 Obenyani isi jihonyi obo eriŋo hami.
\v 43 Ette inyi mojuna ette honya ihosyere hosi.
\p
\v 44 Attati inyi jaran jihosi, Ekyanita hoŋ huna hunya ekyana ni jihatai ninya hawon ni ikatai, jo oŋida itasiruni erre daŋ hunya igyoroni toni igyerita huno Mose, iko huno eyak sayyo bwo fe afureta.
\v 45 Tania aŋa inyi egigilita hosi jo oŋida isi itaniŋuni egyerita.
\v 46 Bwo fe ojo inyi jihosi, Igyoroni jo odihu adi Kristo ettigemita bwo ihalu oŋitek hunihoi ibuhu adi inyi to ye.
\v 47 Oŋida bwo fe itisarrahini ettiyenio ifauhyen daŋ hettyarahi to miji Yerusalem, jo oŋida laati iloiti atajya hosi t’eyyata ette ifwotuna ahohina ono eyyata ta afure honyi.
\v 48 Irata tai ahetamijanak hulo erre huna.
\v 49 Ati imijyete, efak ni ecorit ono Monyoŋ jihatai. Ati itilati imiji Yerusalem many ifwotuniete tai adwaran t’edou.
\p
\v 50 Ette inyi itadihoro isi many iger miji Betania ette inyi kaf ahas honyi ahide ette mojo tesi.
\v 51 Teyya homojo inyi ette inyi dahan ahide t’ehiji hosi idou.
\v 52 Attati isi itahabuyo inyi ette caharo Yerusalem ta namuno on obolo.
\v 53 Ette isi duloro itahabuyo Hollum ihaji imojit eneittok.