lot_reg/59-HEB.usfm

\id HEB
\ide UTF-8
\h Ebrei
\toc1 Ebrei
\toc2 Ebrei
\toc3 heb
\mt Ebrei
\c 1
\cl Angati 1
\p
\v 1 Nya beryen ikyana Hollum jyo hohonyok hohoi te etuhe huno eyak sayyo te ekyanita gele gele iko te ekota arryai.
\v 2 Ati to oŋitek huttehalu huna ikyana inyi jihohoi to Lonyi honyi linya onyimu inyi irutaniere erre daŋ, bwo fe oyyeu nya Hollum afauhyen daŋ tenyi.
\v 3 Itahutak inyi akwatan ono Hollum bwo fe iyyalu inyi Hollum ahode. Adanyaro inyi erre daŋ ta adwaran ono nekyanita honyi. Ninya italibo inyi eyyata daŋ itoŋo inyi ihani iŋet ono Adwarani ette dou.
\p
\v 4 Bwo fe agalik inyi anjelohyen bebe nyo isyori nya jihonyi afure on oyyu’to agalik hunosi.
\v 5 Obeŋ nya Hollum ikyana jyo obo anjelo ojo, “Iye lonyi hoŋ, Ahana attu ni rahan amonyohoi.” Obeŋ bu inyi ojo jo obo anjelo jo, “Ara adi ni monyohoi, bwo fe ira adi iye lonyi hoŋ.”
\p
\v 6 Bwo fe ninya iyaŋuno inyi oloŋeu honyi ifau ojo inyi jo, “Ijara anjelohyen daŋ hulo Hollum itahabuye inyi.”
\p
\v 7 Ojo inyi ta anjelohyen jo, “Ihuhumak inyi anjelohyen honyi ihwa oloyyami, Bwo fe ihuhumak inyi legyamak honyi ihwa aŋadyefa hima.”
\p
\v 8 Ati to Lonyi ojo inyi, “Hollum, odulo adi akurus hoi fur. Bwo fe obisi efahita huno olobye hoi.
\q
\v 9 Imuno iye alibori bwo iliwari eyyata. Tania Hollum al ara’to Hollum hoi luŋa, onyimu inyi iye, Bwo fe isyo inyi jihoi etahabuyo iko namuno agalik daŋ.”
\p
\v 10 Ojo inyi bwo fe, “Hobu, t’etteri iyyeu nya iye afau, Bwo fe arai edohwo egyamita huno ahas hoi.
\q
\v 11 Otuhunie adi isi, ati irasa adi iye fur; Imarwahi adi isi daŋ ihwa aboŋo,
\v 12 Itabuhok adi iye isi ihwa ayyoni Bwo fe iloitoni adi isi ihwa agamis Ati ibeŋ iye iloito bwo aŋasi hoi obeŋi isidi.”
\p
\v 13 Obeŋ Hollum ojo jyo obo anjelo jo, “Itoŋoi oŋyatai hoŋ Many ehananiere ni amyorok hoi Ihwa ebalori hejek hoi.”
\p
\v 14 Haŋai anjelohyen? Arai isi oloyirihyen hul igyamai’to, hul ifahini ilwahyere hya hul ifwotuni adi etalahuna.
\c 2
\cl Angati 2
\p
\v 1 Tania oŋida hohoi ehum irrirrya erre hunya etaniŋu hohoi ŋadi hohoi ebuluhusaro addi jihosi.
\v 2 Nyo kuyya nekyanita hunya ikyanai anejelohyen arai ahode bwo fe oŋot Hollum epalita iko emesiti daŋ,
\v 3 aŋai adi eris hohoi kuyya eha hohoi etalahuna on obolo’to ihwa ana? Nyo ittittoyo nya Hobu inyi t’etteri, bwo ihalu hya hunya itaniŋuni’to eram ana itahutani jihohoi.
\v 4 Bwo ara Hollum ahetamijanani jyo nekyanita hosi te etamijanita bwo te ellillihita iko te edwariti arryai, bwo fe ara inyi ahetamijanani hosi te esyorita huno Oloyiri ol Olibo hun isyo inyi ihwa awak inyi.
\p
\v 5 Ati obeŋ adi Hollum isyo anjelohyen ilettohorik afau on ottu’to an ekyana hohoi.
\v 6 Ati igyoroni jyo obo amaji ojo, “Anyo igigilo iye ta atulo, ara inyi anyo? Kuyya bu lonyi tulo, nyo ilwak iye inyi?
\v 7 Iyyeu nya iye inyi do olomuta jyo anjelohyen, Isyo iye akwatan iko adwaran jihonyi. Ihanak iye inyi eleittok olo erre daŋ hunya iyyeu iye.
\q
\v 8 Ihanak iye erre daŋ iwoyo hejek honyi iniŋyere inyi.” Ninya ihanak Hollum erre daŋ iniŋyere atulo obeŋ bu inyi obusak obo ariŋ. Ati ihwania hebeŋ hohoi egonyu erre daŋ oniŋye inyi.
\v 9 Ati egonyu hohoi Yesu al itamutari jyo anjelohyen to obo asaa kai jo ta amehino ono Hollum oŋida inyi oye ta aati daŋ. Ifwotu inyi akwatan iko etahabuyo nyo odihu nya inyi naye.
\p
\v 10 Nyo ara ania egyama on osiru jyo Hollum ol oyyeu’to erre daŋ bwo fe adanyaro inyi isi daŋ, jo oŋida inyi ihuhumak Ekyomoni olo etalahuna ol obis te ettigemita iyaŋuniere lonyirok arryai jyo akwatan honyi.
\v 11 Ara Yesu ahataliboroni hosi bwo hya hul italibori owoni isi daŋ iko Monye abotye. Te eram ania obeŋ inyi iloriri iloŋori isi illarak honyi.
\v 12 Nyo ojo inyi, “Etahutak adi ni afure hoi jyo illarak hoŋ. Edolo adi ni itahabuyere iye ihiji heruhok.”
\p
\v 13 Ojo inyi bwo fe, “Eyihi adi ni jyo Hollum.” Inyyak inyi ikyana ojo, “Ani olo iko aduri hul isyo Hollum jihoŋ.”
\p
\v 14 Tania ihwa owoni aati honyi iko ahwattek bwo nooto ottu nya inyi bwo fe rahan atulo iko ahwan ihwa hunosi, jo ta naye honyi oŋida inyi itattur etisyahani ol owon’to iko adwaran ono naye.
\v 15 Oremik adi inyi bwo fe houna laati daŋ hul ifitani ihwa apiti to oŋitek daŋ hun hesworik isi nyo abaŋi isi naye.
\v 16 Nyo ahode obeŋ inyi ottu ilwahyere anjelohyen ati ottu inyi ilwahyere awoi Abramo.
\v 17 Tania oŋida inyi ottu rahan atulo al iyyalu illarak honyi te erre daŋ, jo oŋida inyi ara ehumani ol obolo’to ol owon iko amehino bwo abijon taji. Ara inyi ehumani ol obolo’to jyo illarak honyi tohosyere Hollum itimwaraniere isi t’eyyata hosi.
\v 18 Nyo onyurak inyi adyaha te ettigemita iko te esusuta, tania oremik inyi ilwahyere hya hul onyurani esusuta.
\c 3
\cl Angati 3
\p
\v 1 Tania itai illarak hul iliboroto’to hul onyimu Hollum, ikemijyete Yesu Efahata iko Ehumani ol obolo’to al ejifatyo hohoi.
\v 2 Ifaha Yesu lya ol onyimu’to inyi ihwa ifaha nya Mose Hollum ihiji wati honyi, hul iloŋoi ahaji honyi.
\v 3 Ati osiru akwatan jyo Yesu agalik ono Mose nyo lya ol oduho’to aji osiru inyi etahabuyo agalik aji.
\v 4 Owoni asik daŋ ababo iko aduhok hosi ati lya ol oyyeu’to erre daŋ inyi Hollum.
\v 5 Bwo fe igyama nya Mose ahode on oyyu ihwa apit ihiji wati Hollum itamijananiere erre hun ikyanai adi.
\v 6 Ati ilettok nya Kristo on oyyu ihaji Hollum ihwa lonyi. Bwo fe era hohoi aji ania kuyya egolik hohoi jyo neyihina hohoi te eŋere many isidi.
\p
\v 7 Tania ihwa ojo nya Oloyiri ol Olibo ojo, “Kuyya al itaniŋuna tai ahana etuk honyi,
\v 8 Hetagoloto atajya hatai ihwa laati hunya beryen Hul omesye’to to oŋitek hunya okemyerek isi to mur.
\v 9 Okemye nya monyyatai ani Bwo igonyuni isi egyamita hoŋ ta aŋasi atomwana aŋwan.
\p
\v 10 Tania ittadduhye nelahaji ania ani Ette ni jaran, Isyabitai atajya hosi oŋitek daŋ Bwo fe obeŋi isi omijani ekota hoŋ.
\p
\v 11 Tania ellama ni ta ajore ojo, Obeŋi adi isi ojiŋani iyiri hoŋ ’tuŋ.”
\p
\v 12 Illarak hoŋ ihumata irrirrya, ŋadi obo owon ihiji hatai iko ataji on orroho, on obeŋ’to iruk, an itadihu’to inyi addi jyo Hollum al isu’to.
\v 13 Isiŋyete illarak hatai oŋitek daŋ howoni asahyen jihatai, ŋadi obo tehiji hatai itadwa ataji honyi te eyyata hun inyobye’to.
\v 14 Tania era hohoi mottyarak hulo Kristo al egolik hohoi jyo neyihina hohoi many isidi, inyi neyihina inya eyihi hohoi t’etteri.
\v 15 Nyo ojori nya, “Kuyya al itaniŋuna tai ahana etuk honyi, Hetagoloto atajya hatai Ihwa laati hunya beryen hul omesye’to.”
\p
\v 16 Haŋai isi hul itaniŋuni ette mesyo Hollum? Arai isi hya daŋ hul ofwonni addi to Masir hul orihoro Mose.
\v 17 Haŋai isi hul ittadduhye Hollum ta aŋasi atomwana aŋwan? Arai isi hya hul iyyauni bwo fe oyei imur.
\v 18 Illama inyi jyo baŋai ojo, Obeŋi adi isi ojiŋani iyiri hoŋ ’tuŋ? Arai isi hya hul omesye’to.
\v 19 Tania egonyu hohoi jo, ittallihi isi jiŋana iyiri nyo obeŋi isi iruhi.
\c 4
\cl Angati 4
\p
\v 1 Tania howon ecorit jihohoi ijiŋaniere iyiri ijara hohoi ebaŋ, ŋadi obo tehiji hatai ittallik jiŋana iyiri.
\v 2 Nyo ittittohini asayyo hun oyiji’to jihohoi ihwa ninya ittittohinierek jihosi, ati obeŋi nya nekyanita hunia olwahi isi nyo obeŋi nya isi iruhi.
\v 3 Ati ejiŋak hohoi hul eruk’to jyo nayiri. Nyo ikyana nya inyi ojo, “Ellama ni ta ajore jo, Obeŋi adi hya hul omesye’to ojiŋani iyiri hoŋ ’tuŋ.” Ojo inyi ana dwadi ihuhumak inyi amaji jihosi many t’etteri fau.
\v 4 Jyo obo amaji ikyana inyi to oloŋ etahattarihi ojo, “To oloŋ itahattarihi oyiri Hollum te egyamita honyi daŋ.”
\p
\v 5 Ati ojo inyi, “Obeŋi adi isi ojiŋani iyiri hoŋ ’tuŋ.”
\p
\v 6 Arasa ecorit on ojo’to jo ojiŋani adi omuk jyo ayiri honyi, ati hya hul itaniŋuni’to ahosyere asayyo hun oyiji’to ittallihi jiŋana nyo omesye isi.
\v 7 Tania inyyak inyi nyimuna oloŋ obo on owon’to ahana. Ihalu ikyana nya inyi to hutuk Davide nekyanita hodwo ojo, “Kuyya al itaniŋuna tai ahana etuk honyi Hetagoloto atajya hatai.”
\p
\v 8 Kuyya ara nya an isyo Yosua nayiri jihosi obeŋ dwo Hollum inyyak ikyana to obo oloŋ.
\v 9 Tania arasa nayiri on odulo’to fur jyo laati Hollum.
\v 10 Nyo lya ol ojiŋak’to iyiri Hollum, oyiri inyi te egyamita honyi ihwa ihanio nya Hollum.
\p
\v 11 Tania ijara hohoi egyama ijiŋaniere iyiri ania. Helaha obo okwaharo te ejifatyo honyi amesyo ihwa okwaharai nya hohonyok.
\v 12 Nyo isui nekyanita Hollum bwo fe iruhuli. Ofiji isi bebe agalihini ademi. Ocuhi isi many jyo ehorit ono oloyiri iko ataji bwo fe iboŋita iko ittulai. Tania italeyehini isi egigilita iko ewahiti hutto taji tulo.
\v 13 Bwo fe obeŋ obo eyyet oremik idima jyo Hollum ati oleye erre daŋ bwo fe arai isi ahania ihoŋite Hollum al emanyari hohoi.
\p
\v 14 Tania hetagoloto neruk hohoi nyo ewon hohoi iko ehumani ol obolo’to al agalik’to daŋ al allaŋ’to edohwo, inyi Yesu Lonyi Hollum.
\v 15 Nyo obeŋ ehumani hohoi ol obolo’to otimo afyahajita hohoi nyo isusuye nya inyi te ekota daŋ ihwa an isusuyerek hohoi, ati obeŋ nya inyi iyyau.
\v 16 Tania hehutonia te eŋere ikurus Hollum olo amehino ifwotuniere amuno iko amehino ilwahyere hohoi ta asaa ono esusuyo.
\c 5
\cl Angati 5
\p
\v 1 Onyimuni ehumani ol obolo’to t’ehiji wati igyamari jyo Hollum ta laati, bwo fe isyoryere esyorita iko ehumita jyo Hollum te eyyata wati.
\v 2 Inyi alya ol oremik’to dihuna ta anyalami atimok iko eyyak nyo ara inyi bwo fe atulo al ilik’to.
\v 3 Tania oŋida inyi isyo ehuma te eyyata honyi luŋa bwo fe te eyyata wati.
\v 4 Obeŋ obo atulo oremik ’tifya egyama on oyyu’to ania ta ahwan honyi ati Hollum onyimu inyi ihwa onyimu nya inyi Arone.
\v 5 Ihwo nya obeŋ Kristo itahuyo ahwan honyi irari ahehumani ol obolo’to, ati onyimu Hollum inyi bwo ojo jihonyi jo, “Iye Lonyi hoŋ, Ahana attu ni rahan amonyohoi.”
\p
\v 6 Ojo inyi bwo fe jyo obo amaji jo, “Ira adi iye ehumani ol obolo’to fur Ta awoyo ba Melekisedek.”
\p
\v 7 To oŋitek hunya amanyari Yesu ifau ihwan tulo, omojo inyi bwo fe ilolya ta nayyo on okwat iko neyyo jyo lya ol oremik’to italahuna inyi to ye, bwo fe itaniŋyo Hollum jihonyi nyo itahabuyo Yesu inyi ta abaŋi.
\v 8 Dwadi ara inyi o Lonyi ittiyenu nya inyi efaha te ettigemita honyi.
\v 9 Bwo fe al obis inyi, ottu nya inyi rahan ahesyarani ono etalahuna jyo hya daŋ hul ifahai’to inyi.
\v 10 Onyimu Hollum inyi irari ahehumani ol obolo’to ta awoyo ba Melekisedek.
\p
\v 11 Ewak hohoi ikyana erre arryai ta Melekisedek ati ogoli isi bwo ettallik hohoi itahutaniere isi jihatai nyo ottuhoi ayyaha hatai.
\v 12 Iruhoto tai ta aŋasi arryai tania oŋida dwo irata tai ahettiyanak ati oŋida obo atulo inyyak ittiyenio itai ettiyenita Hollum hunya t’etteri. Hewahata tai ale hama obyaŋara eriŋo.
\v 13 Laati daŋ hul amatai’to ale hama otimoi isi awoyo hiram ono ekyanita huno abisan nyo arai isi olodolyo.
\v 14 Ati ara eriŋo ta laati hul obolori’to hul omijani ayiji iko arrohoji nyo odulori isi nyimuta ayiji.
\c 6
\cl Angati 6
\p
\v 1 Tania hagaluna ettiyenita hunya tetteri huno Kristo bwo fe haboboloroti. Oŋida hohoi ebeŋ erasa ikyana ettiyenita hunya tetteri ihwa eloituna taji addi t’egyamita hun ofyahaji’to bwo fe ihwa neruk jyo Hollum,
\v 2 kuyya bu ettiyenio te ellillayo, eyyabana has, nebuhuna ono ayak, iko aŋoco on ottu’to.
\v 3 Ahode ebobolororo adi hohoi kuyya aŋatak Hollum jihohoi.
\v 4 Nyo ittallik obo atulo cohuno jyo Hollum ihalu honyi mijana eram Hollum bwo iniŋ inyi esyoryo ono edou iko Oloyiri ol Olibo,
\v 5 bwo fe omijak inyi ayiji ono nekyanita Hollum iko adwaran ono afau on ottu’to;
\v 6 kuyya iloit atulo alya ataji honyi addi jyo Hollum, obeŋ inyi oremik cohuno jyo eloituna taji nyo isihok inyi Lonyi Hollum inyyak bwo fe isyarak inyi Yesu ariri tohosyere wati.
\v 7 Nyo afau on ojuryo’to ahide an asayo’to gagaga, ette ŋijuna erre hun oyiji’to jyo laromok, onyurak adi afau ania amuno ono Hollum.
\v 8 Ati kuyya isuruni ekwa iko eŋoro to fau, orroho adi afau ania bwo fe ipitani adi inyi, bwo esidi honyi ara adi aswahino.
\p
\v 9 Ati itai hul emuno hohoi, dwadi ekyana hohoi ihwa hodwo, emijak hohoi ihaniete tai erre hun oyiji’to agalihini hunia, nyo ihaniete tai erre huno etalahuna.
\v 10 Ihanio Hollum erre daŋ hun obisi, tania obeŋ inyi opwak imijyere egyama hatai bwo fe amuno hatai jihonyi an itahutana tai ta alwahyo hatai aati Hollum ihwa ihaniete tai ihwania.
\v 11 Bwo fe ewak hohoi jo oŋida itai daŋ ababo itahutana efiriwa hatai itasiruniere neyihina hatai many isidi.
\v 12 Heboyojoto ati ijifatyete hya hul orutani ecoriti ta neruk iko nadihan tajya hosi.
\p
\v 13 Al ocorok nya Hollum necoriti jyo Abramo ittuŋo inyi ta ahwan honyi nyo obeŋ obo agalik inyi.
\v 14 Ette inyi jaran, “Ahode esyo adi ni emuniti daŋ jihoi bwo fe etalwaj adi ni lonyirok hoi ahode.”
\v 15 Tania itila nya Abramo ta adihan, ette ifwotuna ecoriti hunia.
\v 16 Nyo ittuŋoi laati ta afure an agalik’to isi bwo ara ettuŋo esidi ono aŋalafa.
\v 17 Ittuŋo Hollum, nyo awak inyi itahutana jyo laati hul orutani adi ecoriti jo, ahode obeŋ adi awahan honyi oyito.
\v 18 Ihanio Hollum ihwo nya, nyo awak inyi itagol hohoi te erre arrihai, ecoriti honyi iko ettuŋo honyi, hun obeŋi adi oyitoi nyo ittallik Hollum gesemi, tania oŋida hohoi hul eris’to jihonyi ehum inef neyihina on owon’to ihosyere hohoi.
\v 19 Ara neyihina ana ihwa naririk hun ifitanierek oloyirihyen hohoi ta agolon bwo ittallihi futo. Ara inyi neyihina on ojiŋak’to imaji Hollum on odwa’to.
\v 20 Ikyomoro Yesu dia tohohoi nyo ottu inyi rahan ahehumani ol obolo’to ta awoyo ba Melekisedek.
\c 7
\cl Angati 7
\p
\v 1 Ara nya Melekisedek hobu olo Salem bwo fe ara inyi ehumani olo Hollum al agalik’to daŋ. Orwaŋanie nya inyi iko Abramo ninya ocohuniere Abramo to ’tohyo honyi hobwok ette Melekisedek itajahina inyi.
\v 2 Isyo nya Abramo aŋati etattomoni jihonyi ono erre hun iyauno inyi to ’rem, nyo ahosyere daŋ ara Melekisedek hobu olo abisan ihwa itahutak afure honyi. Inyi bwo fe hobu olo Salem on ojo hobu olo nelik taji.
\v 3 Obeŋi igyoroni esyok honyi ara bu awoyo hosi, obeŋi igyoroni etteri kuyya bu esidi ono nesu honyi, ati iyyalu inyi Lonyi Hollum nyo ara inyi ahehumani ol odulo’to fur.
\p
\v 4 Ikemijyete abolori ono atulo olo, nyo isyo nya Abramo amarwani aŋati etattomoni jihonyi ono erre hun iyauno inyi to ’rem.
\v 5 Bwo fe awoyo ba Levi hul ifwotutai egyama ono ehumani, owoni isi iko efahi imojuniere aŋati etattomoni jyo laati hul arai illarak hosi, dwadi arai isi hutto woyo ba Abramo.
\v 6 Ati atulo alya, Melekisedek ol obyaŋara to woyo ba Levi, ifwotu inyi aŋati etattomoni jyo Abramo, bwo fe itajak inyi lya ol owon’to iko ecoriti.
\v 7 Eram ana an ara’to ahode jo, itajak atulo al agalik’to lya ol omuta’to.
\v 8 Tania ifwotuni ehumak hutto woyo ba Levi aŋati etattomoni dwadi oyei adi isi, ati ifwotu Melekisedek aŋati ania bwo ara inyi atulo al isu’to fur.
\v 9 Bwo ajo ni jo, Levi alya al ifwotu’to aŋati etattomoni, oduma nya inyi beryen aŋati etattomoni to Abramo.
\v 10 Nyo arasa nya inyi ihwan hohonyi honyi ninya orwaŋanierek Abramo iko Melekisedek.
\p
\v 11 Ihwania kuyya onyurani laati abisan te ehumak hutto woyo ba Levi, nyo tenyi ifwotuni laati efahita, nyo nyi do ewak hohoi obo to woyo ba Melekisedek, bwo obyaŋara to woyo ba Arone?
\v 12 Nyo al iloiti awoyo ono ehumak oŋida bwo fe iloiti efahita.
\v 13 Igyoroni erre huna to lya ol odyoto’to jyo obo awoyo hama, bwo to woyo honyi obeŋ nya tulo igyama te etityek ono ehuma.
\v 14 Nyo ahode ottu nya Hobu hohoi to woyo ba Yuda, ati obeŋ nya Mose ojo onyimuni adi ehumak to woyo ania.
\v 15 Bwo fe oleye adi erre hun ekyana hohoi ahode al egonyu hohoi obo ehumani odyoto ihwa ninya arari Melekisedek.
\v 16 Obeŋ inyi ara ahehumani te ejifatyo honyi efahita ati ta adwaran ono nesu on obeŋ adi isid.
\v 17 Nyo ojori nya jihonyi jo, “Ira iye ahehumani fur to woyo ba Melekisedek.”
\p
\v 18 Tania itapwahi efahi ottohosyere nyo ilik inyi bwo fe ofyaha.
\v 19 Nyo obeŋi nya efahita itabisi omuk erre ati ewon hohoi iko neyihina on oyyu’to agalik, an ituhutoro’to hohoi jyo Hollum.
\p
\v 20 Ihanani nya Kristo ahehumani te ellama.
\v 21 Ihanani ehumak huttohosyere ta abyaŋan illama, ati ikyana Hollum jyo Kristo ojo, “Illama Hobu Bwo fe obeŋ adi inyi iloit nekyanita honyi. Ira adi iye ahehumani fur.”
\p
\v 22 Tania itagol Yesu ecorit aŋejuk on oyyu’to agalik ninya amarwani.
\p
\v 23 Owoni nya ehumak arryai nyo al oye obo oŋida obo orutak egyama honyi.
\v 24 Ati odulo Yesu fur tania obeŋ adi egyama honyi otuhuno.
\v 25 Tania oremik inyi italahuna many fur hya daŋ hul ofwonni’to jyo Hollum tenyi nyo amanya inyi fur imojori tesi.
\p
\v 26 Oyyu jihohoi iwanari iko ehumani ol obolo’to ihwa alya nyo olibo inyi, bwo fe obeŋ inyi inyobyo, kuyya bu iyyau dwadi amanya inyi ihiji heyyak, bwo fe itahabuye inyi idohwo.
\v 27 Obeŋ Yesu isyo ehumita oŋitek daŋ ihwa ninya ihanierek ehumak hul obolori’to, te eyyata hosi ahosyere, bwo fe ihalu te eyyata huno laati. Ati ihanio nya inyi enyyahi abotye al isyo nya inyi ahwan honyi iyeri ikruce.
\v 28 Onyimuni efahita ehumak hul ilihi’to, ati nekyana ono ellama on owon’to ihalu efahita, onyimu inyi Lonyi ol obis’to fur.
\c 8
\cl Angati 8
\p
\v 1 Ihwania ara ana ariŋ en ewak hohoi ikyana jo, ewon hohoi iko ehumani ol obolo’to al itoŋo ihani iŋet ono akurus ono Adwarani ette dou.
\v 2 Igyama inyi imaji on odwa’to inyi aji an ara’to ahode, on oduhok Hobu, obyaŋara atulo oduhok inyi.
\p
\v 3 Nyo onyimuni ehumak hul obolori daŋ isyoryere ehumita iko esyorita tania oŋida bwo fe ehumani ol obolo’to lya owon iko obo ariŋ isyaraniere.
\v 4 Ati kuyya owon dwo inyi ifau obeŋ dwo inyi ara ahehumani, nyo owoni ehumak hul isyori esyorita ijifatyere efahita.
\v 5 Isyori isi ehumita hun arai’to arrijorihyen huno erre hutte dou. Ninya awahari Mose ihuhumaniere amusyama imur ihwa aji iramak Hollum inyi to rigya ojo, “Ihuma irrirrya jo oŋida iye ihuhumak erre daŋ ihwa arrijori ninya itahutani jihoi to doŋe.”
\v 6 Ati ihwania oyyu egyama ono Kristo agalik nyo ara inyi etimwarani olo emwara on oyyu’to agalik ninya ocoroni, nyo owotya inyi te ecoriti hun oyiji’to agalihini.
\p
\v 7 Nyo kuyya oyyu nya ecorit inya tetteri obeŋi dwo ottifyai ecorit obo.
\v 8 Ati igonyu Hollum epali hosi ette jaran, “Imijyete, ofwonni adi oŋitek Hun esyoryere adi ni ecorit aŋejuk jyo aati Israele Bwo fe jyo aati Yudea.
\q
\v 9 Ojo Hobu bwo fe, Obeŋ adi inyi ara ihwa ecorit ninya esyo ni jyo hohonyok hosi To oloŋ ninya arihuniere ni isi addi to fau Masir, Nyo obeŋi nya isi odulori jyo ecorit ania, Tania abeŋ ni egigilo tesi.
\q
\v 10 Ojo Hobu ara ana ecorit an esyo adi ni jyo aati Israele Ihalu oŋitek hunia; Ehanak adi ni efahita hoŋ igigilita hosi, Egyoro adi ni isi itajya hosi, Bwo fe ara adi ni a Hollum hosi, Bwo fe isi awati hoŋ.
\q
\v 11 Obeŋi adi isi ittiyenie hutto lonyihari hosi, Dwadi bu illarak hosi jo, Omijana Hobu, Nyo omijani adi isi daŋ ani, Dwadi bu aduri hul omutari’to iko amarwak daŋ.
\q
\v 12 Nyo amehino adi ni ta arrohojita hosi Bwo fe abeŋ adi ni enyyak giluna eyyata hosi.”
\p
\v 13 Al ikyana inyi te ecorit aŋejuk, itimarwak inyi ecorit etteri. Ati ariŋ an imarwak’to ilyaha inyi atuhuno.
\c 9
\cl Angati 9
\p
\v 1 Jyo ecorit etteri owoni efahita hun omojorik aati iko amaji on odwa’to.
\v 2 Nyo ihuhumani nya amusyama ihwa aji, bwo jyo amaji ottohosyere owon allomo iko ateremeja an ihanatarik emune on odwa’to. Ifurani amaji ana amaji on odwa’to.
\v 3 Ihosyere boŋo etarrihi owon amaji obo an ifurani amaji on odwa’to bebe.
\v 4 Imaji ana owon etityek ono ottogoŋ on orrohini ta ayyel bwo fe owon asenuk ono ecorit on orrohini bwo fe ta ayyel. Itwa senuk owon atobok on orrohini ta nayyel bwo owon manap itwa honyi. Owon bwo fe elluk ono Arone on oyis’to iko efahita hun ikyafani imorwoi itwa senuk.
\v 5 Ihide senuk owoni anjelohyen hulo akwatan hul imuhoni etoŋi ottohide senuk an ifurani amaji ono amehino, ati obeŋ asaa ihwania ikyanari tesi daŋ ababo.
\p
\v 6 Oŋidari erre hunia, tania odulori ehumak jiŋita jyo amaji ottohosyere igyamari egyama hosi.
\v 7 Ati jyo amaji etarrihi ojiŋak ehumani ol obolo’to hama enyyahi abotye te eŋa abotye. Obeŋ inyi ojiŋak ta ahas ijai ati iyaro inyi nooto an isyo inyi te eyyata honyi iko te eyyata wati.
\v 8 Tania itahutak Oloyiri ol Olibo jihohoi jo, obeŋ amaji on odwa’to bebe aŋa inya howotya amusyama etteri.
\v 9 Nyo ara inyi arrijori ono oŋitek hunia. Nyo ittallihi esyorita iko ehumita hunya isyori laati italibo atajya hya hul iyaŋunie’to isi.
\v 10 Nyo arai efahita huna ta ahwan tulo hama, ihwa aŋiyo bwo amata ojo ellilla. Isyarani efahita hunia jihohoi many ottuniere Kristo.
\p
\v 11 Ati oleyo Kristo ihwa ehumani ol obolo’to olo erre hun oyiji’to hun ofwonni adi. Ojiŋak inyi ihaji on obolo’to on obeŋi oduhoni ta ahas an agalik aji ninya nyo obeŋ inyi ara ono afau ana.
\v 12 Ojiŋak inyi enyyahi abotye imaji on odwa’to bebe. Obeŋ inyi iyaro nooto ono nedye kuyya bu ono atawa, ati ojiŋak inyi iko nooto honyi itasiruniere etalahuna hohoi.
\v 13 Nyo kuyya oremik arwasyo ono nooto hidye kuyya ono esuŋ kuyya bu enwara ono atawo italiboryere atulo,
\v 14 oyyu nooto ono Kristo agalik italiboryere atajya hatai t’egyamita hun ofyahaji’to igyamari jyo Hollum al isu’to. Nyo to Oloyiri al isu’to tulaŋ isyo nya Kristo ahwan honyi ol obeŋ iko eyyau jyo Hollum.
\p
\v 15 Te eram ania ara inyi etimwarani olo ecorit aŋejuk jo oŋida laati hul iloŋuni ifwotuni orutat hun odulori’to fur hunya ocoroni jihosi. Ifwotuni isi orutat nyo ta naye honyi italahu inyi isi t’eyyata hunya ihanie isi hamanyai isi te ecorit etteri.
\v 16 Al igyoroni awaraga ono orutat, ittallihi isi rutana erre honyi hobeŋ lamonye oye.
\v 17 Nyo oyyu awaraga ono orutat al aye lamonye; obeŋ inyi igyama hesu lamonye al igyoro’to inyi.
\v 18 Bwo fe tania obeŋ nya ecorit etteri igyama hobeŋ nooto owouno.
\v 19 Nyo ninya iramak Mose efahita daŋ jyo laati daŋ, iduhu inyi nooto ono atawa bwo fe ono nedye iko aari, bwo iduhu inyi aboŋo on odo’to iko atanata ’yanio ette sabulonia ihoto ette rwasyere abuk ono efahita bwo fe laati daŋ.
\v 20 Ette inyi jaran, “Ara ana nooto ono ecorit an isyo Hollum jihatai.”
\v 21 Ihwo nya orwas inyi aji iko asahani daŋ huttotwa haji ta nooto.
\v 22 Ahode ihwa ojori efahita italibori erre daŋ ta nooto bwo fe kuyya obeŋ nooto owouno obeŋ bwo fe abusana ono eyyata.
\p
\v 23 Oŋida italibori erre hun arai’to arrijorihyen huno erre hutte dou ihwo nya, ati oŋida italibori erre hutte dou te ehumita hun oyiji’to agalihini hunia.
\v 24 Obeŋ nya Kristo ojiŋak imaji on odwa’to on oduhoni laati an ara’to arrijori ono erre hutte dou, ati ojiŋak inyi idou luŋa iwotyari ihosyere Hollum tohohoi.
\v 25 Obeŋ nya inyi ojiŋak dia isyoryere ahwan honyi gagaga, ihwa ojiŋata ehumani ol obolo’to imaji on odwa’to bebe aŋasi daŋ iko nooto on obyaŋara ononyi.
\v 26 Kuyya ara dwo ihwo nya oŋida nya Kristo odihu ettigemita gagaga many t’etteri fau; ati ihwania te esidi fau ottu inyi enyyahi abotye iyari eyyata addi ta naye honyi.
\v 27 Ihwa isyo nya Hollum jyo laati iyeri enyyahi abotye, bwo ihalu ania owon aŋoco,
\v 28 isyori bwo fe Kristo enyyahi abotye idihuniere eyyata wati arryai; bwo fe ottu adi inyi enyyahi etarrihi, obyaŋara te eram ono eyyata, ati italahuniere hul itilai’to inyi.
\c 10
\cl Angati 10
\p
\v 1 Arai efahita arrijori ono erre hun oyiji’to hun ofwonni adi, ati obyaŋara isi erre hunia luŋa, tania ittallihi isi itabisana laati hul ofwonni’to te ehumita hun odulori isi isyoryo aŋasi daŋ.
\v 2 Kuyya itabisani dwo isi aati opwahi dwo isi esyoryo ehumita. Nyo kuyya italibori ehumita laati hul isyorye’to, obeŋi dwo isi inyyahi igigilo te eyyata hosi.
\v 3 Ati te ehumita hosi igigiloi isi aŋasi daŋ te eyyata hosi.
\v 4 Nyo obeŋ nooto ono esuŋ kuyya bu ono nedye oremehini iyara eyyata addi.
\p
\v 5 Tania ninya attu Kristo ifau ojo inyi jo, “Ibeŋ iye iwak esyorita iko ehumita, Ati ihuhumak iye ahwan toni.
\q
\v 6 Ibeŋ bwo fe iye imuno ehumita hun oswahini iko huno eyyata.
\q
\v 7 Ette ni jaran, Ahode Hollum, attu ni ihaniere awahan hoi, Ihwa igyoroni nya ibuk hoi toni.”
\p
\v 8 Ahosyere ojo inyi jo, Ibeŋ iye imuno esyorita iko ehumita, ibeŋ bwo fe iwak ehumita hun oswahini iko huno eyyata hun isyori ihwa igyoroni ifahita.
\v 9 Ihalu ojo inyi jo, Ahode attu ni ihaniere awahan hoi. Tania itapwak inyi ecorit etabotye jo oŋida inyi itagol etarrihi.
\v 10 Ta awahan ono Hollum enyurak hohoi alibori nyo isyo Yesu Kristo ahwan honyi enyyahi abotye ta laati daŋ.
\p
\v 11 Oŋitek daŋ owotyai ehumak isyoryere ehumita hosi gagaga ati obeŋi ehumita hunia oremehini iyara eyyata wati addi.
\v 12 Ati isyo nya Kristo ehumi abotye on odulo’to fur te eyyata, ette inyi itoŋo oŋyatai ono Hollum,
\v 13 itilari many ihananierek amyorok honyi ihwa ebalori hejek honyi.
\v 14 Te ehumi abotye italibo inyi onyimot honyi tulaŋ.
\v 15 Bwo fe ara Oloyiri ol Olibo ahetamijanani hohoi ette inyi jaran,
\v 16 “Ojo Hobu, ara ana ecorit An esyo adi ni jihosi ihalu oŋitek hwa. Ehanak adi ni efahita hoŋ itajya hosi Bwo fe egyorok adi ni isi igigilita hosi.”
\p
\v 17 Ojo inyi bwo fe, “Abeŋ adi ni enyyak giluna eyyata hosi iko arrohojita hosi.”
\p
\v 18 Tania al owon abusana, obeŋ tulo inyyak isyarana ehumi te eyyata.
\p
\v 19 Tania illarak hoŋ, ewon hohoi iko eŋere ijiŋaniere imaji on odwa’to bebe to nooto ono Yesu,
\v 20 te ekoi aŋejuk, an isu’to, an aŋa inyi jihohoi ijiŋaniere. Ejiŋa hohoi aboŋo an agwasa’to an ara’to ihwa ahwan honyi.
\v 21 Ewon hohoi iko ehumani ol obolo’to bebe al ilettohori aati Hollum.
\v 22 Tania hehutonia onyihai ta atajya hun obisi, hun ifuti iko neruk, bwo fe hun illillauni t’ewahiti hun orrohoji’to, bwo fe hehutonia iko ahwattek hun illillauni ta aari hun olibori’to.
\v 23 Hagolihina jyo neyihina hohoi ta abyaŋan ikuyya, nyo obeŋ lya al ocorok’to erre hunia itapwak ecoriti honyi.
\v 24 Bwo fe ijara hohoi egigilo ta illarak hohoi itawuloyere isi homunohi illarak hosi bwo fe igyamari on oyyu.
\v 25 Bwo fe oŋida hohoi ebeŋ etapwak attubyo hwattek hohoi ihwa ihanie laati omuk, ati hesiŋyete illarak hohoi an agalik nyo igonyuna tai oloŋ ono Kristo ilyaha.
\p
\v 26 Kuyya ifwotu atulo nelahode bwo ihalu odulo inyi iyyauta bwo omuno inyi eyyata, obeŋ obo ehumi ’tuŋ on oremik ifufusoro eyyata hunia.
\v 27 Ati onyurak adi inyi aŋoco on orroho bebe bwo fe eema on owulo’to bebe an itattur adi amyorok hulo Hollum.
\v 28 Ottohori nya atulo ta abyaŋan mehino al iha’to efahita huno Mose al ikyanai etamijanak arrihai kuyya bu hunihoi.
\v 29 Ati osiru adi aŋoco on obolo bebe agalik jyo lya al iha’to Lonyi Hollum, al omyana inyi nooto ono ecorit an italibo’to inyi, bwo fe omoryo Oloyiri olo amehino.
\v 30 Nyo emijak hohoi lya linya ojo’to jo, “Enienu adi ni bwo fe aduma adi ni.” Ojo inyi bwo fe jo, “Oŋot adi Hobu laati honyi.”
\v 31 Ahode ikwahiniere ihas Hollum leswoni ara eram ono abaŋi bebe.
\p
\v 32 Ati ogilutati oŋitek hun allaŋi’to nyo ninya liruhoto tai idihuna tai ettigemita hun ogoli’to.
\v 33 To omuk oŋitek osuhotyerek nya aati itai te emoriti iko ebahiti, bwo to omuk oŋitek itoŋoti nya itai arabotye iko aati hul onyurani’to ettigemita.
\v 34 Nyo imehiniete nya itai jyo hya hul ifitani ibabus, bwo fe imunoti nya itai ninya iyarai laati asaŋ hatai addi, nyo imijana tai jo owoni erre hun oyiji’to agalihini bwo fe odulori isi jihatai fur.
\v 35 Tania herwasana neyihina hatai addi nyo inyurana adi itai aduma on obolo’to.
\v 36 Oŋida owon adihan tajya jihatai jo al ihaniete tai awahan Hollum inyurana adi itai ecoriti.
\v 37 Nyo ojori egyerita jo, “Ihalu kai afany adi lya ol ottu’to, Bwo obeŋ adi inyi illiŋya.
\q
\v 38 Ati amanya adi legyamani hoŋ ol olibo’to ta neruk Ati al oyito inyi abeŋ adi ni amuno inyi.”
\p
\v 39 Ebeŋ hohoi era ihwo hya hul oyitoroi’to ette ye, ati ewon hohoi iko neruk italahuniere oloyirihyen hohoi.
\c 11
\cl Angati 11
\p
\v 1 Ara neruk neyihina jo ofwonni adi ahode erre hun etila hohoi, bwo fe ara inyi neyihina jo owoni ahode erre hun obeŋi’to oleye.
\v 2 Nyo ta neruk itamunoye laati hunya beryen Hollum.
\v 3 Ta neruk emijak hohoi jo oyyeuni nya afauhyen te nekyana Hollum, tania oyyeuni erre hun egonyu hohoi te erre hun obeŋi’to oleye.
\p
\v 4 Ta neruk isyo nya Abele ehumi jyo Hollum on oyyu’to agalik ehumi ono Kaino, tania itahutak Hollum jyo Abele jo, Ibis iye; nyo ifwotu Hollum esyorita honyi. Aye nya inyi beryen ati ta neruk harasa inyi ikyana.
\p
\v 5 Ta neruk akafaro nya Hollum Enoka idou hobeŋ inyi oye bwo fe obeŋi nya laati onyurani ahwan honyi nyo akafaro Hollum inyi, ati hobeŋi inyi akafarai idou, igyoroni jo itamuno nya inyi Hollum.
\v 6 Obeŋ tulo oremik itamuno Hollum kuyya obeŋ neruk jihonyi, nyo lya al awak’to ’tuna jyo Hollum oŋida inyi iruk jo owon Hollum ahode bwo fe lya ol ottifya’to inyi onyurak adi.
\p
\v 7 Ta neruk oduhok nya Noa atogol italahuniere laati hutta haŋ honyi nyo iramak Hollum inyi erre hun obeŋi’to oleye ette inyi baŋi. Te ehanita honyi huna oŋot inyi laati hutta fau ette inyi rahan aharutani olo abisan ta neruk.
\p
\v 8 Ta neruk ifaha Abramo inya iloŋuni inyi idahari jyo amaji on orutak adi inyi, ette inyi leten dwadi bu obeŋ inyi omijak amaji nya.
\v 9 Ta neruk olo nya inyi jyo afau on ocorok Hollum jihonyi, on obeŋ ara ononyi, ette inyi manya imusyama iko Isako ojo Yakobo hul orutani ikonyi ecorit odwo.
\v 10 Itila nya inyi ta amiji on oduhoni on ogol, on oduhok Hollum luŋa.
\v 11 Ta neruk onyurak nya Sara adwaran isiuniere eito dwadi imarwak inyi, nyo iyihi inyi jyo lya ol ocorok’to, jo obeŋ adi inyi itapwak nekyana honyi.
\v 12 Tania ta atulo abotye, dwadi imarwak inyi bebe, ofwonni laati arryai ihwa elelyefi bwo fe hul olwaji bebe ihwa asuluŋayo otto otifor hari.
\p
\v 13 Ayei nya laati hulo daŋ ta neruk hobeŋi isi onyurani erre hun ocoroni, ati igonyuni isi erre hunia alamarai ette muno, nyo ojori isi jo era isi atamonok iko adahak jyo afau ana.
\v 14 Nyo hya hul ikyanai’to ihwania itahutani jo ottifyai isi obo afau an ara’to ahonosi.
\v 15 Kuyya dwo igigiloi isi ta afau an idyaharai isi, onyurani dwo isi ekoi icahari dia.
\v 16 Ati awahi isi obo afau on oyyu’to agalik, on owon’to idou. Tania obeŋ Hollum iloriri iwanari a Hollum hosi nyo ihuhum inyi amaji tesi.
\p
\v 17 Ta neruk isyo nya Abramo Isako ihwa ehumi iholoŋ on okemyere Hollum inyi. Ahode, lya al ifwotu’to ecoriti ta namuno ilyaha inyi esyarana lonyi honyi olobotye,
\v 18 dwadi ikyana nya Hollum jihonyi ojo, “Ihenuni adi awoyo hoi to Isako.”
\v 19 Nyo iyihi Abramo jo oremik Hollum itubuhuna Isako dwadi oye inyi, bwo fe ara ihwa ifwotu inyi Isako to ye ati ekyana hohoi arryamara.
\p
\v 20 Ta neruk itajak nya Isako Yakobo iko Isau ta nemuniti hun ofwonni adi.
\p
\v 21 Ta neruk itajak Yakobo lonyirok Yosefo ababo ette inyi itahabuyo Hollum al okyehi inyi ahwan honyi itehi nyo ilyaha naye honyi.
\v 22 Ta neruk ikyana nya Yosefo al ilyaha naye honyi, ta ajiŋuna ono laati Israele, ette inyi iramana isi iyari ahoi honyi inuhaniere.
\p
\v 23 Ta neruk idimani esyok Mose inyi ta ayafajin hunihoi ninya isiuni inyi, nyo igonyuni isi jo inyi eito al ilaman bwo fe obeŋi isi abaŋi efahi ono hobu.
\v 24 Ta neruk labolo Mose iha nya inyi eloŋo wati inyi lonyi ŋarri Faro,
\v 25 ette inyi nyimuna itoŋori iko laati Hollum te ettigemita hosi, obyaŋara imanyari te emuniti huno eyyata.
\v 26 Igigilo nya Mose jo oyiji ettigemita ta afure Kristo agalihini ebariti huno Masir nyo ikikorik inyi jo aduma ono hottu’to.
\v 27 Ta neruk idyaharu nya inyi Masir, obyaŋara ta abaŋi jore ono hobu, ati odulo inyi idahari nyo igonyu inyi lya ol obeŋ’to oleyo.
\v 28 Ta neruk ogotyere nya inyi neyom ono Allaŋan Anjelo bwo fe orwasye aati nooto jo oŋida attohoni olo aduri oŋehwa obeŋ ottir aduri Israele.
\p
\v 29 Ta neruk allaŋi nya isi aari on odo’to ihwa ara inyi afau on oyoho’to, ati al ojori nya laati Masir ellaŋ isi ette aari wororo isi.
\p
\v 30 Ta neruk okwaharai olohitiri hutto miji Yeriko ninya ilutarik laati Israele isi to oŋitek hattarik.
\p
\v 31 Ta neruk obeŋ nya Rahaba asomoni oye nyo ifwotu inyi elilomok ta nelik taji, dwadi oyei hya hul omesye’to.
\p
\v 32 Ajo adi ni anyo bwo fe? Nyo obeŋ asaa jihoŋ iramaniere jihatai ehanita huno laati hulo: Gidiona, Baraka, Samsoni, Yefata, Davide, Samwele, iko eyak sayyo.
\v 33 Ta neruk iyyalari isi olobyehyen; oŋoti isi laati on obis; ifwotuni isi ecoriti; ottuhi isi etuhe lemyo;
\v 34 itadunyi isi eema on obolo’to; irisi isi to fere; te elihita hosi onyurani isi agolon bwo fe obolo adwaran jihosi irryomoniere ette isi itattur amyorok hosi.
\v 35 Ifwotuni aŋorwo layak hosi nyo itubuhuni isi. Ittigemye omuk on orroho many oyerik isi nyo ihari isi ahohina, jo oŋida isi onyurani nesu on oyyu’to agalik.
\v 36 Ittigemye laati isi ta asuhotyo iko abahyo, bwo fe ta aririk iko efitana ibabus.
\v 37 Irwonye laati isi ta amorwoi, iŋiŋoce isi sarr, isusuye isi, ottohori isi ta afere, iyyafani isi amuhuny iko anafi bwo ilocaŋi isi, ittigemye laati isi, bwo fe ihanie on orroho jihosi.
\v 38 Oyiji laati hulo agalihini aati hutta fau. Adahatye isi imur bwo fe idoŋyok, amanyai isi inomi iko iwuryo huno afau.
\p
\v 39 Dwadi itamunoi laati hulo daŋ Hollum ta neruk hosi, obeŋi bu isi ifwotuni erre hunya ocoroni.
\v 40 Nyo ihuhumak Hollum obo ariŋ on oyyu’to agalik tohohoi, tania obeŋi isi onyurani abisan many efanyari adi hohoi bwo fe.
\c 12
\cl Angati 12
\p
\v 1 Tania ihwa ikoloni etamijanak arryai hohoi, ijara hohoi ebusak erre hun odiŋi’to iko eyyata hun iniafatye’to hohoi ’tid, bwo fe ijara hohoi eŋettyo ta adihan tajya te ekoi on owon’to jihohoi.
\v 2 Ijara hohoi emijo jyo Yesu Ekyomoni iko Etabisani olo neruk hohoi. Inyi alya ol odihu’to akruce nyo igigilo inyi ta namuno on owon adi ihosyere honyi. Ati omyana inyi neloriri ono akruce attati inyi itoŋo iŋati iŋet ono akurus Hollum.
\p
\v 3 Ikyemijyete do lya ol odihu’to nemoriti huno leyyak hul oliwarik’to inyi ŋadi itai ilafuhoti bwo fe itabanata itajya hatai.
\v 4 Ikyamati tai iko eyyata ati ibyaŋata tai ikyamati ikosi many owouniere nooto hatai,
\v 5 bwo fe igwoti tai nekyana inya isiŋyerek itai ihwa lonyirok jo, “Lonyi hoŋ hemyana abahyo ono Hobu, Bwo fe helafuho al isiŋyo inyi iye.
\q
\v 6 Nyo abak Hobu lya ol omuno inyi, Bwo fe itabis inyi lonyirok daŋ ababo hul ifwotu inyi.”
\p
\v 7 Idihuna tai abahyo itabisaniere ehanita hatai. Ihanio Hollum jihatai ihwa lonyirok, nyo alali monye ol obeŋ’to abak lonyi honyi?
\v 8 Kuyya obeŋ inyi abak itai, ihwa ihanio inyi jyo lonyirok honyi daŋ, ibyaŋata tai irata olonyirok honyi ati irata tai olorotot.
\v 9 Bwo fe etahabuyo hohoi monyye hohoi hutta fau hul abahye nya hohoi, tania oŋida hohoi eniŋyo Monye hohoi ette dou inyuraniere nesu.
\v 10 Ahode abahye isi hohoi ta aŋasi kai ihwa igigiloi isi jo oyyu adi, ati abak inyi hohoi ilwahyere hohoi inyuraniere alibori honyi.
\v 11 Ta asaa ono abahyo ewon hohoi iko ejiriŋa obyaŋara namuno, ati ihalu iyaŋuno inyi nelik tajya iko abisan jyo hya hul oniŋye’to inyi.
\p
\v 12 Tania akafata ahas hatai hun ilihi’to bwo fe itagoloto ahunyita hatai hun ikikiroi’to.
\v 13 Ihuhumata ekota hun obisi’to te ejek hatai jo oŋida lya ol oŋura’to obeŋ okwaharo ati onyurak adi agolon.
\v 14 Ottifyati imanyari ta nelik tajya iko laati daŋ bwo fe ottifyati alibori nyo ta abyaŋan libori obeŋ tulo igonyu Hobu.
\v 15 Ihumata irrirrya ŋadi obo atulo tehiji hatai obeŋ onyurak amehino ono Hollum. Ihumata bwo fe ŋadi ottu aliwa an iyauno arrohoji ihiji hatai itarrohojyere laati arryai.
\v 16 Ihumata irrirrya ŋadi owon obo ihiji hatai al ara ahasomoni kuyya bu atulo al igigilo te erre hutta fau ihwa Isau linya itinyyaŋak’to orutat honyi ta aŋirya.
\v 17 Nyo imijana tai jo ihalu ottifya Isau orutat honyi, ati iha Hollum inyi. Dwadi ottifya inyi ta neyyo obeŋ inyi onyurak ekoi inyyahuniere orutat honyi.
\p
\v 18 Nyo ibyaŋata tai ifwanna jyo adoŋe on oleyo, on owulo’to ahima, amaji an awanari edumele iko neryok ojo asiŋit.
\v 19 Owon nya bwo fe ahuta ono aforojo iko netuk an ikyana’to, ati hunya itaniŋuni’to ilolyai isi jo oŋida dwo Hollum obeŋ inyyak ikyana jihosi.
\v 20 Nyo ittallihi isi fwotuna efahi an isyarani jihosi ojo, “Dwadi ara acaŋ on ottir’to adoŋe irwoŋi inyi ta amorwo.”
\v 21 Abaŋ nya Mose bebe al igonyu inyi erre huna ette jaran, “Ekikiro ni ta abaŋi.”
\v 22 Ati ifwanna tai jyo adoŋe ono Sion, jyo amiji ono Hollum al isu’to, an anya’to Yerusalem ette dou, bwo fe ifwanna tai jyo anjelohyen hul ottubanie’to ta namuno.
\v 23 Ifwanna tai bwo fe jyo attubanio wati hul igyoroni afureta hosi idou, bwo fe jyo Hollum aŋotoni wati daŋ bwo fe jyo oloyirihyen habisak hul olibori’to.
\v 24 Ifwanna tai bwo fe jyo Yesu etimwarani olo ecorit aŋejuk, bwo fe jyo arwasyo hoto an iyaŋuno jihohoi amehino agalik nooto ono Abele.
\p
\v 25 Ihumata mijo ŋadi ihara tai lya al ikyana’to. Nyo kuyya obeŋi isi irisi to ninya iharik isi lya al iramyo’to isi to fau, aŋai attadi eris hohoi kuyya eha hohoi lya al ikyana’to t’edou?
\v 26 Beryen itakitik nekyana honyi afau bwo ihwania isyo inyi ecorit jihohoi jo, “Enyyahi abotye etakitik adi ni afau, obyaŋara afau hama, ati edou bwo fe.”
\v 27 Al ojo inyi jo, Enyyahi abotye, itahutak ania jo iyari adi erre hun oyyeuni addi hun ikikiroi, jo oŋida erre hun obeŋi’to ikikiroi odulori fur.
\v 28 Tania ihwa efwotu hohoi olobye on obeŋ’to oremik ikikiro, ijara hohoi esyo ahumo jyo Hollum iko negyamita hun oyiji’to ta abaŋi iko te etahabuyo.
\v 29 Nyo ara Hollum hohoi ihwa eema on oŋiyo’to erre daŋ.
\c 13
\cl Angati 13
\p
\v 1 Omunoti illarak hatai fur.
\v 2 Olwahyete atamonok al ofwonni isi jihatai, nyo al ihanie omuk ihwo nya olwahye isi anjelohyen dwadi obeŋi isi omijani isi.
\v 3 Olwahyete hya hul ifitani ibabus ihwa iwanata tai ibabus ikosi, olwahyete hya hul owoni’to iko ettigemyo nyo iwanata tai bwo fe iko ahwattek ihwo hunosi.
\p
\v 4 Ijara itagoli eram yama tohosyere wati daŋ, bwo fe hehaniete erre somon nyo oŋot adi Hollum arotok iko asomok.
\v 5 Hefitana atajya hatai ta amuno gurusi. Itoŋoti iko nelik tajya iko asaŋ hun owoni’to jihatai, nyo ojo Hollum ta ahwan honyi jo, “Abeŋ adi ni edehi itai ’tuŋ bwo fe abeŋ adi ni abusak itai ahode ’tuŋ.”
\p
\v 6 Tania eremik hohoi daŋ ababo ikyana te eŋere ojo, “Ara Hobu ahalwahani hoŋ, Abeŋ adi ni abaŋ. Anyo adi ihanie laati jihoŋ?”
\v 7 Ogiluna hul arai’to eleittaha hatai, hul ittiyenie jihatai eram Hollum. Omijyete amanya hosi bwo ijifatyete neruk hosi.
\v 8 Orrijo Yesu Kristo ahana ihwa ŋoloŋole bwo odulo adi inyi ihwo nya tulaŋ.
\v 9 Hepalata addi jyo nettiyenita arryai hun olufaji’to nyo ara amehino ono Hollum an itagol’to atajya, obyaŋara aŋiryasin nyo obeŋi isi olwahye laati hul oŋiye’to.
\p
\v 10 Ewon hohoi iko etityek bwo fe hulya hul ijifatye’to efahita hunya beryen obeŋi isi oremehini ŋiyo dia.
\v 11 Nyo iyaŋuno nya ehumani ol obolo’to nooto ono anyanya imaji on odwa’to isyoryere te eyyata wati ette iswahina ahwattek hanyanya iler miji.
\v 12 Tania odihu nya Yesu adyaha to ler miji italiboryere laati ta nooto honyi.
\p
\v 13 Tania ijara hohoi efwo jihonyi iler miji idihuniere ettigemita ta afure honyi.
\v 14 Nyo obeŋ obo amiji jihohoi on odulo’to jyo afau ana, ati etila hohoi amiji ono hottu’to.
\p
\v 15 Tenyi ijara hohoi edulo isyoryere ahumo jyo Hollum ihwa ehumita, isi nekyanita hutto hutuhe hohoi hun itahabuye’to afure honyi.
\p
\v 16 Hepwahata ihaniere ayiji iko ilwahyere alocaŋak, nyo ehanita ihwa huna itamunoi Hollum.
\p
\v 17 Ifahati hul arai’to eleittaha hatai bwo fe oniŋyete isi nyo irrirryai isi atajya hatai bwo ofwonni adi isi moi ilyeco ehanita hosi. Tania oniŋyete isi jo oŋida isi igyamai egyama hosi ta namuno, obyaŋara te ejiriŋa, nyo obeŋ adi ania iyauno ayiji jihatai.
\p
\v 18 Oduloro mojo tohohoi nyo emijak hohoi jo oyiji atajya hohoi bwo fe ewak hohoi manya on oyyu te erre daŋ.
\v 19 Elolya ni jihatai bebe imojori toni, jo oŋida ani acohuno jihatai kokwak.
\p
\v 20 Ihwania ijara Hollum olo nelik taji igyama itajya hatai nyo itubuhu nya inyi Hobu hohoi Yesu to ye, inyi leyyahani eleittok olo akyoro ta nooto ono ecorit on odulo’to fur.
\v 21 Ijara inyi isyo jihatai erre daŋ ihaniere awahan honyi, bwo fe ijara inyi igyama ihwattek hatai erre hun itamunoye’to inyi to Yesu Kristo. Ijara akwatan hatawana jihonyi fur. Amen.
\p
\v 22 Illarak hoŋ elolya ni jihatai jo odihuna nesiŋita hun egyoro ni jihatai ta awaraga on osuk’to ana.
\p
\v 23 Omijana jo ahohino illa hohoi Timoteo to babus. Kuyya alattu inyi kwak efwo adi hohoi ikonyi imijyere itai.
\p
\v 24 Itifonyana eleittaha hatai daŋ iko aati Hollum daŋ. Itifonyai laati hutta fau Italya itai.
\p
\v 25 Ijara amehino hatawana jihatai daŋ. Isi hunia.