lot_reg/48-2CO.usfm

\id 2CO
\ide UTF-8
\h 2 Korinto
\toc1 2 Korinto
\toc2 2 Korinto
\toc3 2co
\mt 2 Korinto
\c 1
\cl Angati 1
\p
\v 1 Ani Paulo efahata olo Yesu Kristo ta awahan ono Hollum, bwo fe Timoteo illa hohoi. Egyoro hohoi jyo eklesya ono Hollum otto miji Korinto, iko jyo aati Hollum daŋ hun owoni ifau Akaya.
\v 2 Ijara amehino hatawana jihatai iko nelik taji on ottu’to jyo Hollum Monye hohoi iko jyo Hobu Yesu Kristo.
\p
\v 3 Ijara etahabuyo hatawana jyo Hollum inyi Monye Hobu hohoi Yesu Kristo, nyo inyi Monye olo amehino bwo Hollum etilihani daŋ.
\v 4 Nyo itilihyo inyi hohoi te ettigemita hohoi daŋ, jo oŋida hohoi eremik itilihyo hya hul owoni’to iko ettigemita te etilihyo inya itilihyere Hollum hohoi.
\v 5 Nyo ihwa ifuti ettigemita huno Kristo jihohoi, tania imyatani bwo fe jihohoi etilihyo ono Kristo.
\v 6 Kuyya awon ni iko ettigemita arai isi te etilihyo hatai iko etalahuna hatai. Kuyya awon ni iko etilihyo ara inyi te etilihyo hatai al idihuna tai ettigemita ihwa adihu ni.
\v 7 Bwo eyihi ni ahode tetai nyo amijak ni jo al inyurana tai ettigemita ikoŋ inyurana adi bwo fe itai etilihyo ikoŋ.
\p
\v 8 Illarak hoŋ, awak ni itai imijana jo anyurak ni ettigemyo on obolo ifau Asia, nyo ejiriŋa nya ni bebe agalik, bwo egigilo ni jo kuyya aye adi ni.
\v 9 Ahode egigilo ni jo owon aŋoco ono naye jihoŋ jo oŋida ani abeŋ eyihi jyo ahwan hoŋ, ati jyo Hollum ol oremik’to itubuhuna ayak.
\v 10 Italahu nya inyi ani to ye on orroho’to bwo italahu adi inyi ani. Eyihi fe ni jihonyi jo italahuta adi inyi ani gagaga.
\v 11 Al imojoti tai toni. Bwo fe isyori adi aati arryai ahumo ta alwahyo on olwahyere Hollum ani.
\p
\v 12 Nyo ara ana etahuyo hoŋ, jo amijak ni ta ataji hoŋ jo adaha nya ni ta alibori taji iko ta abyaŋan inyobyo ihosyere wati hutta fau bwo fe ihosyere hatai agalik. Obyaŋara to ofyoro huno afau ati ta amehino ono Hollum.
\v 13 Nyo egyoro ni jihatai erre hun iremehina tai ihenio bwo fe itaniŋuna.
\v 14 Ihwa imijana tai erre huna kai, eyihi ni jo imijana adi itai erre daŋ ihalu. Tania iremehina tai itahuyo toni bwo ni tetai iholoŋ ono Hobu hohoi Yesu.
\p
\v 15 Nyo eyihi nya ni te eram ania, awak nya ni ’tuna jihatai ahosyere, jo oŋida iremehina tai inyyak muno.
\v 16 Tania al agalaro ni itai alo ni Masedonia bwo fe al acohuno ni teyya attu adi ni inyyak mijaro itai, bwo iniamana adi itai ani al alo ni Yudea.
\v 17 Al eloit ni egigilo hoŋ, arai ekyanita hoŋ ihwa oloyami asai? Ariŋ an awak ni ihanio, ehanio ni ihwa atulo olo afau? Nyo ojo inyi, Afe ehanio adi ni, ati obeŋ inyi ihanio.
\v 18 Ati ihwa obeŋ Hollum iloit ekyanita honyi, obeŋi bwo fe ekyanita hoŋ jihatai iloitoi ojo, Afe, bwo fe ihalu ojo, Obeŋ.
\v 19 Ettiyenio hohoi jihatai Lonyi Hollum Yesu Kristo, hohoi iko Silivano ojo Timoteo. Obeŋ Yesu iloit ekyanita honyi ojo Afe bwo fe ihalu ojo Obeŋ, ati ihanio inyi ihwa ikyana inyi.
\v 20 Nyo to Kristo itasiruni ecoriti huno Hollum daŋ tania etahabuyo hohoi Hollum.
\v 21 Ati itagol Hollum hohoi ikatai inosoniere iko Kristo, bwo onyimu inyi hohoi.
\v 22 Oridinyak inyi hohoi bwo isyo jihohoi Oloyiri ihwa etamijani jo era hohoi awati honyi.
\p
\v 23 Ati eloŋo ni Hollum irari etamijani olo ataji hoŋ jo ara ta amehino hoŋ jihatai an abyaŋari nya ni alari jihatai Korinto.
\v 24 Obyaŋara jo awak ni ilettohori neruk hatai nyo ogol neruk hatai ihwania, ati egyama ni ikatai ilwahyere namuno hatai.
\c 2
\cl Angati 2
\p
\v 1 Ati aŋotonio ataji hoŋ jo abeŋ adi ni enyyak ’tuna mijyere itai te ejiriŋa.
\v 2 Nyo kuyya esyo ni jihatai ejiriŋa, ŋai adi isyo jihoŋ amuno? Obyaŋara itai hul ijiriŋati’to te ekyanita hoŋ?
\v 3 Egyoro nya ni ihwa ania jo oŋida al attu ni jihatai abeŋ ni inyyak ijiriŋa to hulya hul awak ni muno. Nyo eyihi ni tetai daŋ jo ara adi amuno hoŋ ahanatai bwo fe.
\v 4 Nyo egyoro nya ni jihatai te ejiriŋa on obolo iko adyaha taji bwo ta neyyo hun olwaji. Abeŋ ni awak itajiriŋ itai, ati oŋida itai imijana namuno on obolo an amunori ni itai.
\p
\v 5 Ati kuyya iyaŋuno obo atulo ejiriŋa, obyaŋara jihoŋ hama. Abeŋ ni awak ikyana bebe ati ahode isyo inyi adyaha jihatai daŋ.
\v 6 Jyo atulo alya, oremik abahyo an abahyerek laati hul olwaji jihonyi.
\v 7 Tania oŋida itai iloitoti jihonyi ibusaniere inyi bwo itilihata ataji honyi ŋadi inyi olo ihanio obo ariŋ on orroho te ejiriŋa honyi on obolo.
\p
\v 8 Tania elolya ni jihatai itahutaniere namuno hatai jihonyi.
\v 9 Te eram ana egyoro nya ni jihatai ikemyere itai imijaniere kuyya iniŋyete tai te erre daŋ.
\v 10 Al ibusana tai obo atulo, abusak adi ni inyi bwo fe. Erre hun abusak ni, kuyya abusak ni omuk erre, abusak ni te eram hatai ihosyere Kristo.
\v 11 Ehanio ni ihwa ania ŋadi Sitan ottu galihina hohoi nyo ebeŋ hohoi etimo egyamita honyi.
\p
\v 12 Ninya attuniere ni Trosa ittiyeniere asayyo huno Kristo, aŋa Hobu ekat ihosyere hoŋ,
\v 13 ati obeŋ oloyiri hoŋ itoŋo dee nyo abeŋ ni anyurak illaŋ Tito, tania abusak ni isi ette leten Masedonia.
\v 14 Ati humo jyo Hollum ol olwahyo’to hohoi igalihiniere erre daŋ to Kristo, bwo tohohoi itisarrahi inyi amijana hiram honyi ihwa ariŋ on oŋwo’to gir gir imasik daŋ.
\v 15 Nyo era hohoi arya ono Kristo on oŋwo’to gir gir jyo Hollum ihiji wati hul italahuni iko ihiji wati hul oyei’to.
\v 16 Jyo hulya hul oyei’to oŋwo arya ihwa aye an iyaŋuno’to naye; bwo jyo hul isui, oŋwo arya ihwa nesu an iyaŋuno’to nesu. Ŋai ol oremik’to ta nerre huna?
\v 17 Ebeŋ hohoi era ihwa aati hul olwaji hul iloice’to ekyana Hollum itipalyere laati, ati ettiyenio hohoi ta abyaŋan inyobyo ihwa laati hul ifahu Hollum, bwo to hoŋite Hollum ekyana hohoi ta adwaran ono Kristo.
\c 3
\cl Angati 3
\p
\v 1 Enyyak hohoi itteryo itakwat afureta hohoi? Oŋida hohoi eyaŋuno awaragat jihatai kuyya bu emoju omuk tetai, ihwa ihanie laati omuk?
\v 2 Irata tai awaraga hohoi an igyoroni itajya hohoi on omijani laati daŋ bwo fe ihenie isi daŋ.
\v 3 Bwo fe itahutana tai jo irata tai awaraga ono Kristo an eyaŋuno hohoi, on obeŋi igyoroni ta aari galam ati igyoroni to Oloyiri olo Hollum al isu’to. Obeŋi bwo fe ikyafani inyi imorwoi ati igyoroni inyi itajya wati.
\p
\v 4 Eyihi hohoi jo ara eram ana ahode to Kristo bwo ihosyere Hollum.
\v 5 Ati ettallik hohoi ta ahwattek hohoi ihaniere obo ariŋ, ati ottu adwaran hohoi jyo Hollum.
\v 6 Bwo fe isyo inyi agolon jihohoi irari ahettiyanak ono ecorit aŋejuk. Obyaŋara inyi efahi an igyoroni ati ara inyi ono Oloyiri. Nyo iyaŋuno efahi an igyoroni, naye; ati isyo Oloyiri nesu.
\p
\v 7 Ati efahita hun ikyafani imorwoi hun iyaŋunie naye, ofwonni nya isi ta akwatan, bwo obeŋi laati Israele oremehini mijo omom Mose ta apipyahi honyi, ati atuhuno nya apipyahi ania.
\v 8 Obeŋ adi egyama ono Oloyiri ottu ta akwatan an agalik?
\v 9 Nyo kuyya owon akwatan jyo efahita hun iyaŋunie naye, ahode, agalik akwatan ono ecorit aŋejuk an iyaŋuno’to alibori.
\v 10 Ahode ariŋ ninya owon’to iko akwatan, ottu ihwania wanan iko abyaŋan kwatan, nyo ta akwatan an agalik’to inyi.
\v 11 Nyo kuyya owon akwatan jyo ariŋ on otuhuno’to ahode ariŋ on odulo’to fur owon iko akwatan agalik.
\p
\v 12 Ewon hohoi iko eyihina ania, tania eŋere hohoi ikyanari.
\v 13 Ebeŋ hohoi era ihwa Mose al imuhok’to omom honyi jo oŋida laati Israele obeŋi igonyuni esidi ono akwatan an allaŋ’to.
\v 14 Ati odwari atajya hosi nyo many iko ahana al ihenie isi Ecorit Amarwani arasa emuhi jihosi, nyo obeŋi isi omijani jo iduhu Kristo emuhi addi.
\v 15 Afe, many iko ahana al ihenie isi awaraga ono Mose imuhoni atajya hosi.
\v 16 Ati al iloit obo atulo ataji honyi jyo Hobu, iduhuni emuhi addi.
\v 17 Ihwania ara Hobu alya Oloyiri, bwo jyo amaji an awanari Oloyiri olo Hobu owon ahohina.
\v 18 Ati hohoi daŋ to omomite hun obeŋi imuhoi, etahutak hohoi akwatan ono Hobu ihwa amiraya. Bwo Hobu al ara’to Oloyiri iloico inyi hohoi oŋitek daŋ irari ihwo inyi.
\c 4
\cl Angati 4
\p
\v 1 Tania nyo ewon hohoi iko egyama ana bwo ihwa efwotu nya hohoi amehino ono Hollum, ebeŋ hohoi eboyo kuyya elafuho.
\v 2 Ati ebusak hohoi erre huno eloriri hun idimani, ebeŋ hohoi enyobyo laati, ebeŋ hohoi eloit ekyana ono Hollum agesemi, ati ettiyenio hohoi nelahode ihosyere Hollum itahutaniere ayiji hohoi jyo atajya wati daŋ.
\v 3 Dwadi idimani asayyo hohoi, idimani isi jyo hul oyei’to.
\v 4 Nyo itaŋodo hobu olo afau ana egigilita wati hul obeŋi iruhi, jo oŋida isi obeŋi igonyuni afaŋan ono asayyo hun oyiji’to huno akwatan ono Kristo, al iyyalarai’to iko Hollum.
\v 5 Nyo ebeŋ hohoi ettiyenio erre hohoi ati ettiyenio hohoi Yesu Kristo al ara Hobu, bwo hohoi era apiti hatai te eram Yesu.
\v 6 Nyo Hollum alya ol ojo nya, Ijara afaŋan hatafaŋa ihiji idumele, itafaŋ inyi bwo fe atajya hohoi isyoryere afaŋan ono amijana kwatan ono Hollum ihomom Yesu Kristo.
\p
\v 7 Ati ewon hohoi iko akwatan ana ihwattek huno aboro huna, jo oŋida adwaran ono Hollum on obolo bebe oleyo, obyaŋara adwaran hohoi.
\v 8 Ewon hohoi iko ettigemita ta aŋaco daŋ ati obeŋi isi itihotye hohoi. Ewon bwo fe hohoi iko nekuyya ati eyihi hohoi.
\v 9 Ittigemye isi hohoi ati obeŋ Hollum obusak hohoi. Oborye isi hohoi ati ebeŋ hohoi eye.
\v 10 Edaha hohoi oŋitek daŋ iko edyahiti hun ojori ottohori hohoi, tania erryaha hohoi iko Hobu Yesu te ettigemita honyi, jo oŋida nesu ono Yesu oleyo ihwattek hohoi.
\v 11 Dwadi esu hohoi edulo hohoi yetyo oŋitek daŋ te eram ono Yesu, jo oŋida nesu ono Yesu oleyo ihwattek hohoi.
\v 12 Tania igyama naye ihwattek hohoi ati igyama nesu ihwattek hatai.
\p
\v 13 Ati ewon hohoi iko oloyiri ono neruk ihwo lya linya igyoro jo, “Eruk ni tania ekyana ni.” Eruk hohoi bwo fe, tania ekyana hohoi.
\v 14 Emijak hohoi jo lya al itubuhu nya Hobu Yesu, itubuhu adi hohoi bwo fe iko Yesu, bwo iyaro inyi hohoi ikatai ihosyere honyi.
\v 15 Nyo arai erre daŋ tetai jo oŋida al obolo amehino jyo laati arryai, oboboloro adi bwo fe ahumo hosi itahabuyere Hollum.
\p
\v 16 Tania ebeŋ hohoi eboyo kuyya elafuho nyo dwadi bu imarwahi ahwattek hohoi, lya ol owon’to itwajin hohoi itaŋejuhyo Hollum inyi oŋitek daŋ.
\v 17 Nyo omutari ettigemita hohoi ta asaa ana, bwo igyamai isi jihohoi akwatan on obolo’to agalik, bwo obeŋ isid.
\v 18 Nyo ebeŋ hohoi egigilo te erre hun egonyu hohoi ati egigilo hohoi te erre hun obeŋ tulo igonyu. Nyo erre hun igonyuni laati otuhunie adi, ati hun obeŋi laati igonyuni odulori adi tulaŋ.
\c 5
\cl Angati 5
\p
\v 1 Nyo emijak hohoi jo kuyya oye ahwan ana an ara ihwa aji en emanyari hohoi, ewon hohoi iko aji ono Hollum on obeŋi oduhoni ta ahas, on odulo adi fur tulaŋ idou.
\v 2 Ihwania etudeta hohoi, nyo ewak hohoi bebe ahwattek hohoi aŋejuho hutte dou hun eyyafak adi hohoi ihwa aboŋojin.
\v 3 Jo oŋida al eyyafak hohoi isi ebeŋ hohoi ewon ahania.
\p
\v 4 Nyo ahode etudeta hohoi hul ewon itwa ahwattek huna te ehawwa hohoi. Nyo ebeŋ hohoi ewak adaha ahania, ati ewak hohoi iyyafaniere ahwattek, jo oŋida ahwattek hun isui’to orutani huna hun omuyahi’to.
\v 5 Ati ara Hollum al ihuhumak hohoi te eram ana, bwo isyo inyi jihohoi etamijani an ara’to Oloyiri.
\p
\v 6 Tania ewon hohoi iko eŋere on obolo oŋitek daŋ bwo emijak hohoi jo al emanya hohoi ta ahwattek huna ebeŋ hohoi ewon iko Hobu.
\v 7 Nyo edaha hohoi ta neruk obyaŋara ta amijo.
\v 8 Ajo ni ewon hohoi iko eŋere on obolo, ati agalik daŋ, ewak hohoi idyaharo ahwattek huna bwo efwo itoŋori iko Hobu.
\v 9 Tania owon awahan abotye jihohoi, kuyya emanya hohoi dini kuyya ebeŋ hohoi tene, ewak hohoi itamunoyo Hobu.
\v 10 Nyo oŋida hohoi daŋ ewotya ihosyere lokiko ono Kristo ifwotuniere edumit ihwa osiru jihohoi te erre hunya ehanio hohoi ta ahwattek hohoi, kuyya ehanio hohoi on oyyu kuyya bu on orroho.
\p
\v 11 Nyo owon abaŋi Hobu itajya hohoi tania ettittoyo hohoi laati, ati omijak Hollum atajya hohoi bwo eyihi ni jo imijana tai hohoi bwo fe.
\v 12 Ebeŋ hohoi enyyak itakwat afureta hohoi jihatai, ati ekyana hohoi jo oŋida iremehina tai itahuyo hohoi bwo fe iremehina tai itarraŋ jyo hulya hul itahuye ahwattek wati, obyaŋara atajya.
\v 13 Kuyya esita hohoi ara inyi jo Hollum. Kuyya egigilo hohoi on obis ara tetai.
\v 14 Nyo iniefatyo amuno ono Kristo hohoi, nyo emijak hohoi jo oye nya atulo abotye ta laati daŋ, tania oyei isi daŋ.
\v 15 Bwo oye inyi tesi daŋ, jo oŋida hul isui’to obeŋi isui itamunoyere ahwattek hosi, ati isui isi itamunoyere lya inya oye’to tesi ette ibuhuna.
\p
\v 16 Ihwania ebeŋ hohoi egigilo to obo atulo ihwa igigiloi laati. Dwadi emijak nya hohoi Kristo ihwa atulo, ihwania ebeŋ hohoi egigilo tenyi ihwa atulo.
\v 17 Tania kuyya owon obo atulo itwa Kristo ara inyi neyyet aŋejuk. Ofwoi emanyiti amarwahi ad di ati ofwonni aŋejuho.
\v 18 Ati ofwonni erre daŋ jyo Hollum al itimoru’to hohoi jihonyi to Kristo, bwo isyo jihohoi egyama ono etimwarana.
\v 19 Inyi ana, owon nya Hollum itwa Kristo itimoruniere aati jihonyi. Obeŋ bu inyi ihenio eyyata hosi jihosi, bwo fe isyo inyi jihohoi ekyana ono etimwarana.
\v 20 Tania era hohoi ellellahiti hulo Kristo ihwa iloŋo Hollum itai tohohoi. Elolya hohoi jihatai ta afure ono Kristo, itimwarana ahwattek hatai jyo Hollum.
\v 21 Lya ol otimo’to eyyau ihuhumi inyi aheyyani imaji hohoi, jo oŋida hohoi ihuhumi ahaliborok hulo Hollum tenyi.
\c 6
\cl Angati 6
\p
\v 1 Bwo egyama hohoi arabotye ikonyi, bwo elolya hohoi jihatai jo oŋida ibyaŋata tai ifwotuna amehino ono Hollum asai.
\v 2 Nyo ojo Hollum jo, “Etaniŋu nya ni itai ta asaa on osiru’to, Bwo alwak ni itai iholoŋ ono etalahuna.” Imijyete, ara ahana oloŋ ono asiruna ahode. Imijyete, ara ahana oloŋ ono etalahuna.
\p
\v 3 Ebeŋ hohoi ehanak obo ariŋ itikosyere obo atulo, jo oŋida obeŋ obo ikyana on orroho te ettiyenio hohoi.
\v 4 Ati te erre daŋ etahutak hohoi jo era hohoi legyamak hulo Hollum, ta adihan on obolo, te eŋwati, te ettigemita, te erre hun orrohoji’to,
\v 5 te ebahiti, te efitana ibabus, ta aŋalafita, te egyama on ogol, ta abyaŋan joto, iko ta ahure.
\v 6 Bwo fe etahutak hohoi egyama hohoi jihatai ta alibori tajya, to ofyoro, ta adihan ettigemita, ta amehino, to Oloyiri ol Olibo, ta namuno on obeŋ iko enyobyo,
\v 7 ta nekyana ahode, iko ta adwaran ono Hollum. Ewon hohoi iko erremiti huno alibori ihani iŋet iko ihani ihorroŋ.
\v 8 Itahabuye laati hohoi bwo fe omyanai. Ikyanai isi on oyyu tohohoi bwo fe on orroho. Ojori laati era hohoi ahenyabak ati ettiyenio hohoi nelahode.
\v 9 Ojori omuk era hohoi asai, ati omijak Hollum hohoi bebe. Elyaha hohoi aye, ati imijyete, esu hohoi; abahye isi hohoi, ati obeŋi isi ottohori hohoi.
\v 10 Ejiriŋa hohoi, ati emuno hohoi oŋitek daŋ; elocaŋ hohoi ati eyaŋuno hohoi ebariti jyo laati arryai; obeŋi omuk erre jihohoi, ati ewon hohoi iko erre daŋ.
\p
\v 11 Itai laati hulo Korinto, eramak ni itai erre daŋ hutto taji hoŋ bwo fe amuno ni itai bebe.
\v 12 Obeŋ amuno hoŋ omuta jihatai, ati omuta amuno hatai jihoŋ.
\v 13 Ihwania itaboloroto amuno hatai jihoŋ. Ekyana ni jihatai ihwa aduri hoŋ.
\p
\v 14 Henosoti iko hul obeŋi’to iruhi, nyo aŋai oremik alibori ’ryaha iko neyyau? Bwo fe aŋai oremik afaŋan ’ryaha iko edumele?
\v 15 Bwo fe aŋai orryahai Kristo iko Bilala? Bwo fe aŋai orryahai eruhoni iko alya ol obeŋ’to iruk?
\v 16 Bwo fe aŋai iruhonie aji ono Hollum iko arrijorihyen? Nyo era hohoi ahaji ono Hollum leswoni, ihwa ojo Hollum, “Amanya adi ni itwajin hosi bwo adaha adi ni ikosi. Ara adi ni a Hollum hosi Bwo isi awati hoŋ.
\p
\v 17 Tania ojo Hobu, ifwanna addi t’ehiji hosi Bwo fe obwanyuniete addi jihosi. Hettiroto obo ariŋ en ebot Bwo efwotu adi ni itai.
\v 18 Ojo Hobu Adwarani al agalik’to daŋ, Ara adi ni a Monye hatai Bwo fe irata adi itai olonyirok hoŋ iko ŋarryok hoŋ.”
\c 7
\cl Angati 7
\p
\v 1 Ihwa arai ecoriti huna ahunohoi illarak hoŋ hul amuno ni, hetaliboroto ahwattek iko oloyirihyen hohoi jyo erre daŋ hun itarrohojye’to isi, bwo hetafutana alibori hohoi ta abaŋi Hollum.
\p
\v 2 Ifwotuna hohoi. Ebeŋ hohoi etarroho obo atulo, ebeŋ etasila obo atulo, ebeŋ enyob obo atulo.
\v 3 Abeŋ ni ekyana ihwania iŋocere itai, nyo ajo nya ni iwanata tai itaji hoŋ, iyeri kuyya iswori arabotye ikoŋ.
\v 4 Obolo eŋere hoŋ tetai bwo fe obolo etahuyo hoŋ tetai. Efut ni iko etilihyo bwo osyaro amuno hoŋ ihiji ettigemita hohoi daŋ.
\p
\v 5 Ninya efwonni hohoi Masedonia obeŋ obo ayiri jihohoi nyo owoni ettigemita iŋaco daŋ. Owoni erremiti ilet iko abaŋi itajya.
\v 6 Ati Hollum alya al itilihyo hul ijiriŋai’to, itilik nya atajya hohoi ta attuna ono Tito.
\v 7 Bwo fe obyaŋara ta attuna honyi hama, ati ara te etilihyo an ifwotu inyi jihatai. Bwo fe amuno ni bebe nyo iramak inyi ani jo iwahata tai igonyuna ani bebe, bwo ijiriŋati tai iko efiriwa hatai toni.
\p
\v 8 Nyo kuyya eyaŋuno ni jihatai adyaha tajya ta awaraga hoŋ, abeŋ ni eloit ataji hoŋ dwadi ejiriŋa nya ni, nyo egonyu ni ihwania obeŋ adyaha hatai ta awaraga ania odulo fur.
\v 9 Bwo ihwania amuno ni, obyaŋara ta adyaha hatai, ati nyo ta adyaha hatai iloicete tai atajya hatai. Nyo amijak ni ara adyaha ania to Hollum, tania ebeŋ hohoi ehanio jihatai on orroho.
\v 10 Nyo adyaha an aŋatak Hollum jihatai, iyaŋuno inyi eloico ono ataji an ara esidi honyi etalahuna. Obeŋ obo ejiriŋa teyya. Ati adyaha ono afau ana iyaŋuno naye.
\v 11 Ikemijyete do esidi ono ejiriŋa an aŋatak Hollum jihatai. Te efiriwa ikyanati tai elyeti. Bwo te eyyau ania iloŋojitati tai bwo fe ibaŋata. Tania iwahata tai ani ilwahyere itai. Bwo te efiriwa taji iŋocete tai lya al iyyau’to. Tania itahutana tai jo iliboroto tai te eram ana.
\v 12 Tania dwadi egyoro ni jihatai obeŋ ara te eram ono lya al iyyau’to, kuyya ono alya ol odyaha te eyyau ania, ati egyoro ni jo oŋida Hollum itahutak jihatai efiriwa hatai tohohoi.
\v 13 Tania ilihi atajya hohoi. Obyaŋara te etilihyo hohoi hama an emuno hohoi, ati emuno hohoi an agalik ta amuno ono Tito nyo ilik oloyiri honyi te eram hatai daŋ.
\v 14 Nyo kuyya etahuyo ni itai jihonyi abeŋ ni eloriri. Ihwa ekyana nya hohoi jihatai nelahode te erre daŋ, arai bwo fe erre hun etahuyo hohoi jyo Tito nelahode.
\v 15 Bwo fe omuno ataji honyi agalik tetai, nyo ogilu inyi aniŋyo hatai daŋ bwo abaŋi iko ekikiro an ifwotuniette tai inyi.
\v 16 Amuno ni nyo itoŋo ataji hoŋ dee te erre hatai daŋ.
\c 8
\cl Angati 8
\p
\v 1 Illarak hoŋ, awak ni iramana jihatai jo aŋai igyama amehino ono Hollum jyo aati hutto klesyahyen Masedonia.
\v 2 Dwadi owon jihosi ettigemyo on obolo osyaro amuno hosi, bwo dwadi ilocaŋi isi bebe isyori isi esyorita hosi ihwa abarak.
\v 3 Nyo amijak ni ahode isyori isi esyorita hosi ihwa oremehini isi. Ahode, ta awahan hosi isyori isi arobia hun olwaji agalihini.
\v 4 Ilolyai isi jihohoi bebe iyari esyorita hunia ilwahyere aati Hollum.
\v 5 Isyori isi agalihini egigilita hohoi, ati ahosyere isyori isi ahwattek hosi jyo Hobu iko jihohoi ihaniere awahan ono Hollum.
\v 6 Tania efak hohoi Tito ilari jihatai ifwotuniere arobia huno esyorita nyo itteryo inyi beryen egyama ihiji hatai.
\v 7 Ati ihwa igalihina tai te erre daŋ; te eruk, ta nekyana, ta amijana, te efiriwa, ta amuno hatai jihohoi, ottifyati bwo fe igalihiniere te egyama ono amehino ana.
\p
\v 8 Abeŋ ni ekyana efahi jihatai, ati ekyana ni ikemyere amuno hatai jo kuyya ara inyi ahode, ihwa amuno ono laati omuk.
\v 9 Nyo imijana tai amehino ono Hobu hohoi Yesu Kristo, jo ara dwo bu abara inyi, ottu inyi rahan olocaŋ tetai jo oŋida itai ifwanna rahan ahabarak te elocaŋ honyi.
\v 10 Ihwania eramak ni itai egigilo hoŋ te eram ana. Toŋoleŋai itteryete tai isyoryere esyorita ahosyere daŋ, bwo obeŋ ara ania ijai, ati imunoti tai ilwahyere laati bwo fe.
\v 11 Ati ihwania otuhonia eram ania. Iwahata nya itai ihanio tania otuhonia inyi ihwania ihwa iremehina tai.
\v 12 Nyo kuyya awak ataji tulo isyoryere esyorita, ifwotu Hollum esyoryo honyi ihwa owoni erre jihonyi. Ati obeŋ Hollum ifiyo esyoryo on obolo jyo olocaŋ.
\v 13 Abeŋ ni ajo ana jo oŋida laati omuk itoŋoi dee bwo itai iwatta iko ettigemyo.
\v 14 Ati ajo ni jo, ihwania oŋida alwaji hatai olwahyo elocaŋ hosi, bwo ihalu olwahi adi ebariti hosi elocaŋ hatai bwo irrijoro adi itai ikosi.
\v 15 Ihwa igyoroni jo, “Lya ol ohuru nya hun olwajic obeŋ ofitok omuk, bwo fe lya ol ohuru nya hun omutari obeŋ oniama.”
\p
\v 16 Ati humo jyo Hollum al ihanak’to efiriwa tetai itaji Tito ihwa efiriwa hoŋ.
\v 17 Nyo iruk inyi ekyanita hohoi bwo awak inyi leten jihatai ta awahan on obolo.
\v 18 Bwo fe efak hohoi illa hohoi ikonyi al itahuye eklesyahyen daŋ te ettiyenio honyi asayyo hun oyiji’to.
\v 19 Obyaŋara ania hama ati onyimuni eklesyahyen inyi ifwarri Yerusalem ikohoi iyari esyoryo on oyyu’to ana. Eharak adi hohoi esyoryo ana itahabuyere Hobu bwo fe itahutaniere amuno hohoi jihosi.
\p
\v 20 Oŋida hohoi ehum irrirrya ŋadi obo atulo arrasak hohoi te eram ono esyoryo ana on obolo’to an efwo hohoi iharaniere.
\v 21 Nyo ewak hohoi ihanio erre daŋ on obis obeŋ ara ihosyere Hobu hama, ati ihosyere wati bwo fe.
\v 22 Efak hohoi bwo fe illa hohoi obo ikosi linya ekemyo hohoi enyyahita arryai, bwo enyurak hohoi efiriwa honyi te erre arryai. Ihwania ifiriwa inyi agalik nyo omuno inyi itai ahode.
\v 23 Te eram ono Tito ara inyi illaŋ iko egyamani al egyama ikoŋ tetai. Bwo arai illarak hohoi omuk lefahat hulo eklesyahyen hul itahutani akwatan ono Kristo.
\v 24 Tania itahutana amuno hatai ihosyere wati hutto klesyahyen, bwo fe itahutana jyo illarak hulo jo obeŋ etahuyo hoŋ tetai ara asai.
\c 9
\cl Angati 9
\p
\v 1 Ihwania te eram ono alwahyo aati Hollum, oŋida ani abeŋ egyoro jihatai,
\v 2 nyo amijak ni awahan hatai ilwahyere isi. Eramak ni laati Masedonia te etahuyo, jo ihuhumani laati Akaya esyorita hosi many toŋoleŋai. Bwo fe te efiriwa hatai itawuloto tai atajya wati arryai ihaniere ihwo nya.
\v 3 Ati efak ni illarak hohoi jihatai jo oŋida obeŋ etahuyo hohoi tetai ara asai. Bwo fe oŋida ihuhumana ahwattek hatai isyoryere ihwa ekyana nya ni.
\v 4 Nyo kuyya efwonni omuk hulo Masedonia ikoŋ bwo onyurani isi ibyaŋata tai ihuhumana esyoryo hatai, eloriri adi hohoi ikatai daŋ te etahuyo hohoi.
\v 5 Tania egigilo ni jo, oyyu al ofwoi illarak hulo jihatai ahosyere hoŋ, ihuhumaniere esyoryo hatai ihwa icoronia nya itai, jo oŋida esyoryo hatai ara ta awahan hatai obyaŋara ta arrosonia.
\p
\v 6 Igigiloti ta ana, Lya ol oyehi’to ema bok bok odeŋu adi inyi hun omutari, bwo fe lya ol oyehi’to hun olwaji odeŋu adi inyi hun olwaji.
\v 7 Ijara laati daŋ ababo isyori ihwa ocoroni isi itajya hosi, obyaŋara ta amijan taji kuyya ta abaŋi, nyo omuno Hollum lya al isyo’to agurusi ta namuno taji honyi.
\v 8 Bwo fe oremik Hollum itufutana esyorita honyi daŋ jihatai jo oŋida iwanata tai iko erre daŋ hun iwahata tai oŋitek daŋ, tania iremehina tai ilwahyere egyamita daŋ hun oyiji’to.
\v 9 Ihwa igyoroni jo, “Lya al itisarrahi ebariti bwo isyo jyo alocaŋak, Odulo adi amehino honyi fur.”
\p
\v 10 Ati Hollum al isyo enyomo jyo layani iko emune iŋiyere, isyo adi inyi jihatai bwo ofonik adi inyi erre jihatai itisarrahiniere, tania iyaŋuno adi amehino hatai aŋer hun olwaji.
\v 11 Ifwanna adi itai ratan ahabarak te erre daŋ bwo fe al eyaro hohoi esyorita huna, isyori adi laati ahumo jyo Hollum.
\p
\v 12 Nyo obeŋi esyorita huna arai elwahiti huno laati Hollum hama, ati ifuti isi iko ahumo on osyaro jyo Hollum.
\v 13 Nyo al igonyuni laati esyoryo ana, itahabuye adi isi Hollum te efaha hatai asayyo huno Kristo an ikyanati tai, bwo fe te emorotita hatai jihosi iko jyo laati daŋ.
\v 14 Bwo omojoi isi tetai bwo awahi atajya hosi itai, nyo ta amehino ono Hollum on obolo’to itwajin hatai.
\v 15 Humo jyo Hollum te esyoryo honyi on obolo’to, en ettallik hohoi ekyanari.
\c 10
\cl Angati 10
\p
\v 1 Ihwania ani Paulo, elolya ni jihatai ta ahwan hoŋ, ta anyalami iko abijon ono Kristo. Ati ojori omuk laati afyaha ni ihomomite hatai, ati eŋere ni al alama ni jihatai.
\v 2 Esiŋyo ni itai jo al attu ni oŋida abeŋ ni eŋere jihatai ihwa an eŋerejitari adi ni jyo omuk laati hul ojori jo edaha hohoi te ewahiti huno ahwattek hohoi.
\v 3 Nyo dwadi bu edaha hohoi ta ahwattek huna, obeŋ arrem hohoi ara ta ahwattek huna.
\v 4 Nyo obeŋi erremiti hohoi arai ahuno ahwan, ati ara agolon hosi ono Hollum, tania oremehini isi itatturyo elyatiha hun ogoli’to.
\v 5 Etattur hohoi egigilita iko erre daŋ hun itadarai’to itihyere amijana Hollum. Bwo efitak hohoi egigilita daŋ ihwa apiti iniŋyere Kristo.
\v 6 Bwo fe ebak adi hohoi amyosok daŋ to oloŋ an iniŋyete tai ahode.
\p
\v 7 Igigiloti te erre huna. Kuyya ojo obo atulo ahode ara inyi olo Kristo, ijara inyi inyyak igigilo ta ahwan honyi jo era hohoi ahulo Kristo bwo fe ihwa inyi.
\v 8 Nyo dwadi ajo ni etadara ni bebe te elaballok hohoi, abeŋ ni eloriri, nyo ara Hobu al isyo jihohoi elaballok itaboloryere itai, obyaŋara itatturyere itai.
\v 9 Ati abeŋ ni awak itabaŋyere itai ta awaragat hoŋ.
\v 10 Nyo ojori isi jo, Ikyana inyi ta agolon iko efiriwa ta awaraga honyi, ati ofyaha inyi to homomite hohoi bwo emyana hohoi ekyanita honyi.
\v 11 Ijara laati ihwa hulo omijani ana, jo erre hun egyoro hohoi iwaragat al ebeŋ hohoi ewon ikatai, efwonni adi hohoi ihanio al efany hohoi jihatai.
\p
\v 12 Ebeŋ hohoi eŋere itarrijoryere ahwattek hohoi iko omuk laati hul ojori’to eyyu isi. Ati obeŋi ofyoro jihosi al itarrijye isi ahwattek hosi iko omuk, bwo al okemye isi ahwattek hosi iko laati omuk.
\v 13 Ati ebeŋ adi hohoi etadara ihwa ellaŋ hohoi ekori, ati ihwa isyo Hollum hohoi ekori honyi, afany ekori ania many jihatai.
\v 14 Ati ebeŋ hohoi ellaŋ ekori hohoi al egyama hohoi ihiji hatai, nyo efany nya hohoi jihatai ahosyere daŋ iko asayyo hun oyiji’to huno Kristo.
\p
\v 15 Ebeŋ hohoi etadara ta egyama ono laati omuk ihwa ellaŋ hohoi ekori ati eyihi hohoi jo al obobolororo neruk hatai, obobolororo bwo fe egyama hohoi ihiji hatai agalik.
\v 16 Tania eremik hohoi ittiyenio asayyo hun oyiji ifauhyen huttohosyere miji hatai. Nyo ebeŋ hohoi etadara te egyama an ihanio obo atulo jyo obo amaji.
\v 17 “Ati lya al itadara’to ijara inyi itadara to Hobu.”
\p
\v 18 Oleyo ayiji ono atulo al itahuyo Hobu inyi. Obyaŋara lya al itahuyo’to ahwan honyi.
\c 11
\cl Angati 11
\p
\v 1 Awak ni oŋida itai edihu ikoŋ al ekyana ni ekyanita hun ofyahaji kai. Odihuna yo.
\v 2 Nyo ahain ni tetai ta ahaini ono Hollum, nyo acorok nya ni itai jyo habi abotye, jo oŋida ani esyo itai jyo Kristo ihwa odwoti on olibo’to.
\v 3 Ati abaŋ ni, nyo ihwa inyobyo nya amunu Eva te elofere honyi, ŋadi inyi orihoro egigilita hatai addi jyo namuno on olibo’to an imunoti tai Kristo ta atajya hatai daŋ.
\v 4 Nyo kuyya ottu obo atulo ittiyeniere Yesu ol olufa jyo lya al ettiyenio hohoi, idihuna tai inyi. Kuyya ifwotuna tai oloyiri ol olufa jyo inya ifwotuna tai, oyyu ana jihatai. Kuyya iruhoto tai asayyo hun olufaji jyo hunya iruhoto tai, awahi atajya hatai ana bwo fe.
\v 5 Egigilo ni abeŋ ni amuta jyo lefahat hulya hul obolori’to.
\v 6 Dwadi ettallik ni ekyana on oyyu, obeŋ amijana hoŋ omuta. Etahutak hohoi ana jihatai te ekota daŋ iko te erre daŋ.
\p
\v 7 Epal ni al etafyaha ni ahwan hoŋ bwo etabolo ni itai te ettiyenio hoŋ jihatai asayyo huno Hollum ta abyaŋan idumit?
\v 8 Ahoru ni ebariti iklesyahyen omuk nyo efwotu ni agurusi hosi igyamari jihatai.
\v 9 Bwo fe ninya awanari ni ikatai ololocaŋ abeŋ nya ni efiyo omuk erre jyo obo atulo, nyo isyori illarak hul ofwonni’to to Masedonia erre hun awak ni. Abeŋ nya ni efiyo omuk erre jihatai, bwo fe abeŋ adi ni efiyo itai.
\v 10 Ihwa owon nelahode ono Kristo itwa hoŋ, ahode omijani adi aati daŋ hutta fau Akaya eram ana.
\v 11 To nyo? Nyo abeŋ ni amuno itai? Omijak Hollum jo amuno ni itai.
\p
\v 12 Bwo fe erre hun ehanio ni, adulo adi ni ihanio itihyere hya hul itadarai ta ajaran hosi jo, egyama isi ihwa hohoi.
\v 13 Arai laati hya efahat hul inyobye’to iko egyamak hul inyobye’to, nyo ojori isi era isi lefahat hulo Kristo.
\v 14 Ebeŋ hohoi ellilliha ta ania, nyo Sitan ta ahwan honyi olwo ihwa anjelo olo afaŋan.
\v 15 Tania obyaŋara eram ono ellilliha kuyya inyobye legyamak honyi ojori, era isi ahegyamak hulo ayiji. Osiru adi jihosi aŋoco te ehanita hosi.
\p
\v 16 Enyyak ni ikyana, helaha obo igigilo jo esita ni, ati kuyya igigiloti tai ihwania odihuna ani kai jo oŋida ani etadara kai.
\v 17 Erre hun ekyana ni abeŋ ni ekyana te etaleyeuna ono Hobu, ati ekyana ni te etadara ihwa olofyaha.
\v 18 Nyo itadarai laati arryai te erre huno ahwattek, ekyana bwo fe ni te etadara.
\v 19 Igigiloti tai jo itai aloferejok ati itaniŋuna tai jo hya hul isitaji’to.
\v 20 Nyo kuyya ihanak obo itai apiti idihuna tai, kuyya ohoru inyi asaŋ hatai, kuyya inyobyo inyi itai, kuyya itadara inyi ta ahwan honyi, kuyya anaŋyo inyi omomite hatai, idihuna tai daŋ.
\v 21 Ekyana ni te eloriri nyo ara ihwa elik nya hohoi. Ati al oremik obo atulo iŋere te erre omuk aremik bwo fe ni iŋere ati ekyana ni ihwa olosita.
\v 22 Arai isi laati Ebrei? Ani bwo fe. Arai isi ahulo Israele? Ani bwo fe. Arai isi hutto woyo ba Abramo? Ani bwo fe.
\v 23 Arai isi legyamak Kristo? Ani bwo fe al agalik isi, ati ekyana ni ihwa olosita. Agalik ni isi bwo fe te egyamita arryai, te efitita ibabus enyyahita arryai, te ebahiti arryai, bwo ilyaha naye jihoŋ enyyahita arryai.
\v 24 Enyyahita miet efwotu ni ebahiti atomwana hunihoi hohottoŋwan ta alyoto Yudea.
\v 25 Enyyahita hunihoi abahye laati ani te elluhi. Enyyahi abotye irwoŋye isi ani ta amorwoi. Enyyahita hunihoi awon ni ibabur al isyak inyi amorwo ette dyoro itwa hari. To oloŋ abotye iko arwe daŋ iyaro afolyahita hari ani ihari.
\v 26 Enyyahita arryai adaha ni ihiji hirre hun oyeyeri’to. Ayeyeri to haryak, ayeyeri to hahalak, ayeyeri to wati hoŋ, ayeyeri to paganohyen, ayeyeri imiji, ayeyeri imur, ayeyeri ihiji hari on obolo’to, bwo fe ayeyeri ihiji wati hul inyobye’to.
\v 27 To oŋitek arryai egyama ni bebe iko ettigemyo on obolo. Ta arwejin arryai abeŋ ni ajoto. Adaha ni iko ahure bwo eboti hari, ta aferuna gaga, bwo fe ta acoro iko ta abyaŋan boŋojin.
\v 28 Owoni erre huna daŋ ilet, ati agalik ana, owon jihoŋ etahawwayo ono eklesyahyen oŋitek daŋ.
\v 29 Kuyya ilik obo, abeŋ ni elik bwo fe? Kuyya okwaharo obo, abeŋ ni ejiriŋa bebe?
\v 30 Kuyya oŋida ani etadara, etadara adi ni te elihita hoŋ.
\v 31 Hollum al ara Monye Hobu hohoi Yesu al itahuye tulaŋ, omijak inyi abeŋ ni agesem.
\p
\v 32 Imiji Damasko owon eleittok olo hobu Areta al irrirrya amiji Damasko inefuniere ani,
\v 33 Ati itusuruni illarak ani ta agufa te ettulit lohitir, ette ni fuho to miji.
\c 12
\cl Angati 12
\p
\v 1 Oŋida ani etadara ati obeŋi adi omuk erre ofwonni yiji ta etadara hoŋ. Ati ekyana ni te erigya iko erre hun italeyo Hobu jihoŋ.
\v 2 Amijak ni obo atulo itwa Kristo bwo ihwania allaŋi aŋasi ’tomon haŋwan many te ninya akafarik inyi idou etahunihi; kuyya ara ta ahwan honyi kuyya obeŋ, abeŋ ni amijak ati Hollum omijak.
\v 3 Bwo fe amijak ni atulo olo, kuyya ta ahwan honyi kuyya obyaŋara ta ahwan honyi an akafarik inyi idou imaji Hollum, d abeŋ ni amijak ati Hollum omijak.
\v 4 Itaniŋu inyi erre hun obeŋi tulo oremik ikyanari.
\v 5 Etahuyo adi ni te eram ania, ati ettallik ni itahuyo ahwan hoŋ arari te elihita hoŋ.
\v 6 Ati kuyya awak ni itadara, abeŋ ni esita nyo ekyana ni nelahode. Ati abeŋ ni etadara ŋadi obo igigilo toni jo ayyu ni agalik ehanita hoŋ kuyya ekyanita hoŋ.
\v 7 Ati isyori jihoŋ ekwai ihwan hoŋ jo oŋida ani abeŋ etadara te erre hun obolori’to hun italeyeuni jihoŋ. Ara ekwai ania efahata olo Sitan ittigemyere ani jo oŋida ani abeŋ etadara bebe.
\v 8 Enyyahita hunihoi amojo ni jyo Hobu iyari ariŋ ania addi jihoŋ.
\v 9 Ati ojo inyi jihoŋ, Oremik amehino hoŋ jihoi, nyo italeyehini adwaran hoŋ te elihita hoi. Tania amuno ni itadarari te elihita hoŋ, jo oŋida agolon ono Kristo odulo jihoŋ.
\v 10 Tania te eram ono Kristo amuno ni te elihita, te edyahita, te erre hun ogoli’to, te ettigemita, iko te ejiriŋita, nyo al elik ni agol adi ni.
\p
\v 11 Ekyana dwo ni ihwa olosita nyo ittadduhyete tai ani. Oyyu dwo al ikyanati tai on oyyu’to toni, nyo abeŋ ni amuta jyo lefahat hulya hul obolori’to, dwadi ara ni atulo asai.
\v 12 Nyo ehanio ni etamijanita ihiji hatai huno lefahata al ara’to ahode. Ehanio ni isi ta adihan, te edwariti, te elihita, iko te egyamita hun obolori’to.
\v 13 Aŋai imutarata tai jyo eklesyahyen omuk arari ta abyaŋan hoŋ ittigemyo itai imojuniere agurusi? Obusana ani te epali hoŋ ana.
\p
\v 14 Imijyete, ara ana enyyahi etahunihi an ajo ni attu adi ni jihatai. Ati abeŋ adi ni ettigemyo itai imojuniere agurusi nyo abeŋ ni attifya ebariti hatai, ati attifya ni itai ta ahwattek hatai. Nyo obeŋi aduri ottunani erre jyo esyok hosi ati oŋida esyok ottunani jyo aduri.
\v 15 Tania amuno ni isyoryere asaŋ hoŋ iko ahwan hoŋ to oloyirihyen hatai. Kuyya amuno ni itai agalik, ottu adi amuno hatai jihoŋ mutari?
\v 16 Dwadi abeŋ ni ettigemyo itai imojuniere agurusi, ati ojori omuk jo, ara te enyobyo iko agesemi an apocouniere ni erre jihatai.
\v 17 Apocou ni omuk ebariti ta laati hunya efak ni jihatai?
\v 18 Efak nya ni Tito ilari jihatai iko illa abotye. Opocou Tito ebariti hatai? Obeŋ. Nyo egyama hohoi ta ataji abotye bwo fe orrijori ehanita hohoi.
\p
\v 19 Igigiloti tai jo ewwaha dwo ni elyeti hoŋ ihosyere hatai? Obeŋ, ati ekyana ni ihomom Hollum to Kristo. Itai hul amuno ni, ekyana ni erre daŋ itaboloryere itai.
\v 20 Nyo abaŋ ni ŋadi attu ni nyurana itai ihwa abeŋ ni awak, bwo itai inyurana ani ihwa ibyaŋata tai iwahata. Abaŋ ni ŋadi anyurak ni ihiji hatai aŋalafa, ahaini, ajore, abwanya, amwaŋa, arrosyo, etadara, iko abahyo.
\v 21 Abaŋ ni ŋadi al acohuno ni itiloriri adi Hollum ani ihiji hatai, bwo attu ni jiriŋa ta laati omuk hunya iyyauni’to iko hul obeŋi’to iloiti atajya hosi addi jyo ebotita iko esomiti bwo arrohojita hunya ihanie isi.
\c 13
\cl Angati 13
\p
\v 1 Ara ana enyyahi etahunihi an attuniere ni jihatai. Te etuhe huno etamijanak arrihai kuyya hunihoi iruhi adi laati ekyanita.
\v 2 Eramyo nya ni laati hul iyyauni’to iko hul omuk daŋ ninya awanari ni ikatai ta attuna hoŋ etarrihi, bwo fe ihwania enyyak ni iramana isi al abeŋ ni jihatai, jo al attu ni abeŋ adi ni enyyak mehino jihosi.
\v 3 Ekyana ni ihwania nyo ittifyati tai etamijani on ojo ikyana Kristo toni. Obeŋ inyi ilik jihatai ati igyama inyi ihiji hatai on ogol.
\v 4 Nyo isihoni inyi al ilik, ati isu inyi ta adwaran ono Hollum. Bwo elik hohoi ikonyi, ati esu adi hohoi ikonyi ta adwaran ono Hollum.
\p
\v 5 Ottifyati itajya hatai imijaniere kuyya owon neruk jihatai. Okemyete atajya hatai ahode. Ibyaŋata tai imijana jo owon Yesu Kristo itajya hatai? Kuyya ibyaŋata tai irata aduri hulo Hollum ahode.
\v 6 Ati eyihi ni jo imijana tai era hohoi aduri hulo Hollum ahode.
\v 7 Ihwania amojo ni jyo Hollum jo oŋida ibyaŋata tai ihaniete on orroho. Obyaŋara jo oŋida egyama hohoi osiru, ati oŋida itai ihaniete on oyyu dwadi ojori laati jo ebeŋ hohoi era aduri hulo Hollum ahode.
\v 8 Nyo ettallik hohoi itihyo nelahode ati egyama hohoi ta nelahode.
\v 9 Nyo emuno hohoi al igoloto tai dwadi elik hohoi. Bwo emojo hohoi ta ana, jo oŋida itai iboboloroto.
\v 10 Tania egyoro ni erre huna al abeŋ ni jihatai, ŋadi attu ni ikyana jihatai on ogol ta adwaran an isyo Hobu jihoŋ itagolyere itai, obyaŋara itatturyere itai.
\p
\v 11 Ihwania illarak te esidi, humotina. Ijara atajya hatai ogoli ta neruk bwo fe ilihi, itoŋoti te egigilo abotye, amanyati ta nelik tajya, bwo owon adi Hollum olo namuno iko nelik taji jihatai.
\v 12 Itifonyana illarak hatai ta ahas.
\v 13 Itifonyai aati Hollum daŋ itai. Ijara amehino ono Hobu Yesu Kristo iko namuno ono Hollum bwo narryaha ono Oloyiri ol Olibo hatawana jihatai daŋ.