lot_reg/44-JHN.usfm

\id JHN
\ide UTF-8
\h Yoane
\toc1 Yoane
\toc2 Yoane
\toc3 jhn
\mt Yoane
\c 1
\cl Angati 1
\p
\v 1 Litteri hirre owon nya Nekyana bwo fe Nekyana awatta jyo Hollum, bwo fe Nekyana ara a Hollum.
\v 2 Litteri hirre owon nya inyi jyo Hollum.
\v 3 Oyyeu nya Hollum nerre daŋ tenyi, bwo obeŋ Hollum oyyeu omuk erre ’tuŋ hobeŋ inyi.
\v 4 Itwa honyi owon nya nesu, bwo nesu inyi nafaŋan wati,
\v 5 bwo fe nafaŋan ette faŋan lihiji idumele, ati obeŋ nedumele agalik inyi.
\p
\v 6 Owon nya obo atulo efahata olo Hollum, afure honyi Yoane.
\v 7 Ottu nya inyi itamijaniere nafaŋan jo oŋida aati daŋ iruhi ta nettiyenio honyi.
\v 8 Obeŋ inyi ara afaŋan ania, ati ottu nya inyi itamijaniere nafaŋan.
\v 9 Ottu nya afaŋan ahode itafaŋyere aati daŋ hul isiuni lifau.
\p
\v 10 Owon nya inyi lifau, bwo fe oyyeuni nafau ta adwaran honyi, ati obeŋi nya aati omijani inyi.
\v 11 Ottu nya inyi lihiji wati honyi bwo isi ette ilak ifwotuna inyi.
\v 12 Ati jyo hulya daŋ hul ifwotuni’to inyi, ojo hul iruhi jyo nafure honyi, isyo inyi narahan olonyirok Hollum.
\v 13 Obeŋi nya bu isi isiuni to nooto kuyya ta nawahan hwan, kuyya bu ta nawahan tulo, ati isiu Hollum isi ta adwaran honyi.
\p
\v 14 Ottu nya fe nekyana rahan atulo, ette manya lihiji hohoi attati hohoi iŋiŋyala etahwo honyi, an ara’to etahwo on osiru jyo Lonyi abotye olo Hollum Monye. Ifut amehino iko nelahode jihonyi.
\p
\v 15 Ara Yoane etamijanani honyi ette ikyana on okwat ojo, Inyi alya linya ajo ni jo, Ottu adi obo ihalu hoŋ ol obolo agalik ani, nyo owon nya inyi habeŋ ni.
\v 16 Ta namehino honyi en efut omehita inyi jihohoi daŋ gagaga.
\v 17 Nyo isyori nya efahita to Mose ati namehino iko nelahode ofwonni to Yesu Kristo.
\v 18 Hobeŋ tulo igonyu Hollum ’tuŋ. Lonyi honyi ol obotye al awatta’to jyo Monyonyi inyi al itahutak’to Hollum.
\p
\v 19 Ara etamijani ono Yoane ihwa ana. Ifahini laati Yudea omuk ehumak iko Levitahyen to Yerusalem ifiyere inyi ojori, ngai iye?
\v 20 Itarraŋ inyi bwo obeŋ odwa, ati ojo inyi, Ahode, obyaŋara ani Kristo.
\v 21 Ifiye isi inyi ojori, ngai ati iye? Iye Elija? Ojo inyi, Obeŋ. Iye eyani sayyo alya? Ette inyi itarraŋ ojo, Obeŋ.
\v 22 Attati isi jaran jihonyi jojo, Ŋai ati iye oŋida hohoi efwo itarraŋyere jyo hyodwo ifahuni’to hohoi? Ijo ati iye, iye ŋai?
\v 23 Ette inyi jaran jojo, “Ani ellilloŋoni otto mur ojo, Itabisana nekoi Hobu ’tor”, ihwa ninya ikyanari eyani sayyo Isaya.
\p
\v 24 Hyodwo lefahat isi hutteluluŋ Farisei.
\v 25 Bwo ifiye isi inyi ojori, Kuyya obyaŋara iye Kristo, kuyya bu Elija iko eyani sayyo alya, ati iye ibatisyo nyo?
\v 26 Itarraŋ Yoane jihosi ojo, Ebatisyo ni ta aari, ati owon lobo ihiji hatai al itimoti tai.
\v 27 Inyi olo hottu adi ’tehalu hoŋ, ol owon nya habeŋ ni, ati abeŋ ni asiru houna amuha honyi.
\p
\v 28 Ihanie nya hodwo hirre huna imiji Betania, lifohor Yordano tole imaji an isyatari Yoane batisimo.
\p
\v 29 Nya motye igonyu Yoane Yesu ol ottu ajihonyi ette jaran, Imijyete, Lonyo ker Hollum olo al iya’to addi eyyata hutta fau.
\v 30 Inyi alya inya ajo ni jo, Ottu adi obo ihalu hoŋ al ara’to jihoŋ eleittok nyo owon nya inyi habeŋ ni.
\v 31 Ani ta ahwan hoŋ abeŋ nya ni amijak ŋai inyi, dwadi bu attu ni ibatisyere ta aari itahutaniere inyi jyo Israele.
\p
\v 32 Ara ana etamijani inya iramak Yoane ojo, Egonyu nya ni Oloyiri ol Olibo orrijo ihwa awolo an isuru t’edou ette wotya ihou honyi.
\v 33 Abeŋ nya ni amijak inyi ati lya al ifahu’to ani isyoryere batisimo ta aari, iramak inyi ani ojo, Atulo ol ottu’to ibatisyo to Oloyiri ol Olibo inyi adi alya al isuru Oloyiri t’edou ette rasa jihonyi.
\v 34 Ihwania egonyu ni inyi ette ni iramana etamijani jo, inyi alya Lonyo Hollum.
\p
\v 35 Nya motye hetoŋoi Yoane dia iko leyiyanak honyi arrihai,
\v 36 ikikorik inyi jyo Yesu ta aleten honyi ette jaran, Imijyete, Lonyo ker Hollum lya.
\v 37 Itaniŋuni leyiyanak arrihai nekyana honyi ette jifaru Yesu.
\v 38 Tania ofyala Yesu ette igonyuna isi ijifunie inyi ette ifiyo isi ojo, Anyo iwahata tai jihoŋ? Ojori isi jihonyi, Rabbi, on ojo, Hettiyanani, aja imanya iye?
\v 39 Ojo inyi jihosi, Ifwanna, ifwatta adi igonyuna. Tania ofwoi isi ette igonyuna amaji an itoŋori inyi ette itoŋo ikonyi many otuhori oloŋ nya, ara nya saa aŋwan.
\p
\v 40 Abotye olo leyiyanak hulya arrihai ara inyi Andrea illa Simone Petro.
\v 41 Orumak inyi ahosyere illanyi Simone ette jaran jihonyi, Erumak dwo hohoi Kristo (on ojo onyimot olo Hollum).
\v 42 Ette Andrea iyaro inyi jyo Yesu. Ette Yesu mijo jihonyi ette jaran, Ira iye Simone lonyo Yoane, ifurani adi iye Kefa (on ojo Petro, amorwo).
\p
\v 43 Nya motye igigilo Yesu ilari Galilea bwo orumak inyi Filipo ette jaran, Ijifunie ani.
\v 44 Ara nya Filipo olo Beteseda, amiji ba Andrea iko Petro.
\v 45 Ette Filipo rumana Natanaele bwo iramak inyi ojo, Erumak hohoi lya linya igyorok Mose ifahita bwo fe eyak sayyo igyoroni, inyi Yesu olo Nasaret lonyo Yosefo.
\v 46 Ifiyo Natanaele inyi, Oremik obo ariŋ on oyyu’to ’tuna to Nasaret? Ojo Filipo jihonyi, Waŋ, ilo adi igonyuna.
\v 47 Igonyu Yesu Natanaele ottu ajihonyi, bwo ojo, Imijye Aserelitanani ahode ol obeŋ ara ahenyabani.
\v 48 Ifiyo Natanaele inyi ojo, Aŋai imijak iye ani? Itarraŋ Yesu jihonyi, Egonyu dwo ni iye towoyo ŋaboli, hobeŋ iye Filipo iloŋu.
\v 49 Itarraŋ Natanaele ojo, Hettiyanani, iye Lonyi Hollum, bwo fe ahobu Israele.
\v 50 Itarraŋ Yesu jihonyi ojo, Iruk iye ta ajaran hoŋ jo, egonyu dwo ni iye towoyo ŋaboli? Igonyu adi iye erre hun obolori’to agalihini huna.
\v 51 Ojo Yesu jihonyi, Eramyo ni iye erre ahode, ahode. Igonyu adi iye edou aŋa bwo anjelohyen hulo Hollum odohi bwo isuruni ihou Lonyi tulo.
\c 2
\cl Angati 2
\p
\v 1 Ninya allaŋi oŋitek arrihai owon alomone imiji Kana ono Galilea, bwo fe owon honye Yesu dia.
\v 2 Iloŋuni bu Yesu iko leyiyanak honyi jyo alomone ana.
\v 3 Ette aari ajalaŋi byaŋan bwo honye Yesu ikyana jihonyi ojo, Abeŋi aari ajalaŋi jihosi.
\v 4 Itarraŋ ati Yesu jihonyi ojo, Iyaŋ, heramak ani egyama hoŋ. Hobeŋi oŋitek hoŋ ottubai.
\v 5 Ojo honyonyi jyo legyamak ojo, Ihaniete nerre daŋ hun iramak adi inyi jihatai.
\v 6 Osyehini fe dia amoco ille hun ofiniarik ihwa an ihanierek aati Yudea. Oremehini isi ababo ta asofia miet kuyya bu ille.
\v 7 Ikyana Yesu jihosi ojo, Itufutana naari limoco. Ette isi itufutana many lihala bebelet.
\v 8 Ette Yesu jaran jihosi ojo, Ihwania owohuniete, iyatti jyo labusuti. Ette isi iyaro.
\v 9 Iniŋ labusuti naari hun olwoi ahari ajalaŋi ati otimo inyi tai ofwonni aari hwa, ati omijani legyamak hyodwo owohunie’to aari. Tania iloŋo inyi layamani,
\v 10 ette jaran ojo, Aati daŋ isyori do aari ajalaŋi hun oyiji’to bwo fe al ifoŋi laati isyori hun ofyahaji’to. Idehi dwadi iye aari ajalaŋi hun oyiji’to many iko ihwania.
\v 11 Ihanio Yesu etamijani netteri ana imiji Kana ono Galilea italeyeuniere etahwo honyi bwo leyiyanak honyi ette iruk jihonyi.
\p
\v 12 Latuhunie erre hunia alo inyi Kapernaum iko honyonyi. Ofwoi bwo fe illarak honyi iko leyiyanak ikonyi attati isi itoŋo dia oŋitek kai.
\p
\v 13 Ihwania ilyaha neyom ono Yudea an ifurani Allaŋan ono Anjelo, ette Yesu leten Yerusalem.
\v 14 Itwa haji imojit eneittok orumak inyi etinyyaŋak itinyyaŋai esuŋ, akyoro iko awolosin bwo atobok gurusi itoŋoi iger teremejahyen.
\v 15 Ihuhum inyi allyoto to ofi ette inyi ifuhara isi addi to haji. Ifuha inyi akyoro iko nesuŋ bwo itisarrahi agurusi ette sulara ateremejahyen.
\v 16 Ojo inyi jyo etinyyaŋak wolosin, Iyatti daŋ addi. Heloitoto aji Monyoŋ ahaji hahalak.
\v 17 Attati leyiyanak honyi giluna jo igyoroni nya jojo, “Ifut adi inyi iko efiriwa ta aji honyi.”
\p
\v 18 Ette Yudea ifiye inyi ojori, Anani etamijani an itahutak jihohoi elaballok hoi ihaniere erre huna?
\v 19 Itarraŋ Yesu jihosi, Al itatturoto tai aji ana aduhok adi ni inyi to oŋitek hunihoi.
\v 20 Itarraŋi Yudea ojori, Oduhoni nya aji imojit eneittok ana ta aŋasi atomwana aŋwan heille. Aŋai ijo iye jo aduhok adi ni inyi to oŋitek hunihoi?
\v 21 Ati ikyana inyi ta ahwan honyi an ara’to ihwa aji.
\v 22 Ihalu ebuhuna honyi to ye ette leyiyanak honyi giluna nekyana ania ette isi iruk nekyanita hunya igyoroni igyerita bwo nekyanita hunya ikyana Yesu.
\p
\v 23 Ninya awanari inyi Yerusalem te eyom ono Allaŋan Anjelo iruhi arryai ifure honyi nyo igonyuni isi etamijanita hun ihanio inyi.
\v 24 Ati obeŋ inyi itiyihi ahwan honyi jihosi nyo omijak inyi aati daŋ.
\v 25 Obeŋ inyi owak obo iramak inyi eram wati nyo inyi ta ahwan honyi omijak anyo owon itwa tulo.
\c 3
\cl Angati 3
\p
\v 1 Ihwania owon obo atulo olo Farisei afure honyi Nikodemo. Ara inyi eleittok olo Yudea.
\v 2 Ottu atulo olo jyo Yesu ta attari ette jaran jihonyi, Hettiyanani, emijak hohoi jo ira iye ahettiyanani al ifahu Hollum, nyo hobeŋ obo atulo oremik ihanio etamijanita hun ihanio iye, arari al owon Hollum ikonyi.
\v 3 Itarraŋ Yesu, ojo, Eramak ni iye ahode ahode jo, obeŋ adi obo atulo igonyu amaji ono Hollum al hobeŋi inyyahi isiuna inyi.
\v 4 Ojo Nikodemo jihonyi, Aŋai inyyahi isiuna atulo al imarwak’to? Oremik inyi inyyak jiŋana itwa hohe honyonyi bwo inyyahi isiuna?
\v 5 Itarraŋ Yesu ojo, Eramak ni iye ahode jo, obeŋ adi obo atulo ojiŋak imaji ono Hollum al hobeŋi isiuni ta aari iko to Oloyiri ol Olibo.
\v 6 Esiuna ono ahwan inyi ahwan bwo fe nesiuna ono Oloyiri ol Olibo inyi oloyiri.
\v 7 Hehawwa te eramita hoŋ hun eramak ni iye ojo, Oŋida isiuni itai daŋ t’edou.
\v 8 Ohut oyyami amaji an awak inyi bwo iye ette itaniŋuna ati ibeŋ iye imijak ottu inyi talali kuyya olo inyi aja. Ara ihwa ania jyo atulo al isiuni to Oloyiri ol Olibo.
\v 9 Itarraŋ Nikodemo ojo, Aŋai arai erre huna ihwania?
\v 10 Itarraŋ Yesu jihonyi ojo, Ira iye ahettiyanani olo Israele bwo fe ibeŋ iye imijak erre huna?
\v 11 Ahode eramak ni iye, emijak hohoi anyo ekyana hohoi bwo fe etahutak hohoi anyo igonyuni oŋite hohoi ati ibyaŋata tai ifwotuna etamijanita hohoi.
\v 12 Al ibyaŋata tai iruhoto erre hutto fau hun eramak ni itai aŋai iruhoto adi itai al eramak ni itai erre hutte dou.
\v 13 Ati hobeŋ tulo odok idou arari Lonyi tulo ta ahwan honyi linya ottu’to t’edou.
\v 14 Ihwa ninya akafaniere Mose to timore amunu ihitoi, ihwa ania akafi adi Lonyi tulo ahide,
\v 15 jo oŋida al iruk’to jihonyi owon iko nesu on osyo fur.
\p
\v 16 Nyo omuno Hollum aati daŋ hutta fau bebe, ette inyi isyo nya Lonyi honyi ol obotye, ojo al iruk’to jihonyi obeŋ adi oye, ati owon iko nesu on osyo fur.
\v 17 Obeŋ Hollum ifahu Lonyi honyi ifau iŋocere erre wati, ati ifahu nya inyi jo oŋida laati italahunie tenyi.
\v 18 Al iruk’to jihonyi obeŋi adi oŋoti jihonyi aye ati jyo lya ol obeŋ’to iruk jihonyi aŋoti jihonyi beryen naye nyo obeŋ inyi iyihi ta afure Lonyi Hollum.
\v 19 Ara ana aŋoco jo to ninya ottuniere afaŋan lifau omunoi nya laati nedumele agalik afaŋan nyo orrohoji nehanita hosi daŋ.
\v 20 Lya al ihanio’to on orroho, oliwari inyi afaŋan bwo fe obeŋ inyi ottu ifaŋan ŋadi ehanita honyi oleye.
\v 21 Ati al ihanio’to nelahode ottu inyi ifaŋan jo oŋida ehanita honyi oleye ihwa ihaniere Hollum.
\p
\v 22 Ihalu ana ofwonni Yesu iko leyiyanak honyi iŋati fau ono Yudea ette inyi itoŋo ikosi dia bwo fe isyoryo batisimo jyo laati.
\p
\v 23 Bwo fe ibatisyo Yoane aati itwa hari Anona ilyaha Salima nyo obolo aari dia, tania ofwonni laati jyo Yoane ifwotuniere batisimo.
\v 24 Nyo hobeŋi ifitani Yoane itwa babus.
\v 25 Itarisai leyiyanak hulo Yoane iko Yudea te eram ono etaliboryo.
\v 26 Ette isi fwanna jyo Yoane ette iramana inyi ojori, Hettiyanani, atulo inya iwatta’to ikoye iŋati hari Yordano, inyi alya inya iramak iye eram honyi ta ahwan hoi. Ihwania isyoryo inyi aati batisimo, tania ofwonni aati daŋ jihonyi.
\v 27 Itarraŋ Yoane ojo, Hobeŋ tulo ifwotu obo ariŋ arari al isyori jihonyi t’edou.
\v 28 Irata tai ta ahwattek hatai ahetamijanak hoŋ to ninya ajari ni obyaŋara ani Kristo, ati efahuni nya nani ahosyere honyi.
\v 29 Lya ol owon’to iko aŋotte an hetehi yemuno inyi ayamani. Ati orryahat hayamani al itoŋo’to ikonyi bwo fe itaniŋyo jihonyi omuno bebe al itaniŋu inyi nekyanita hayamani. Ihwania efut ni iko emuniti.
\v 30 Oŋida afure Yesu okwat bebe bwo onoŋ omuta.
\p
\v 31 Lya ol ottu’to t’edou, obolo inyi agalik daŋ, ati alya ol ottu’to to fau inyi olo nafau, bwo fe ikyana inyi te erre fau. Ol ottu’to t’edou inyi al agalik’to daŋ.
\v 32 Iramak inyi etamijanita te erre hun itaniŋu inyi bwo fe igonyu, ati obeŋ obo ifwotu etamijanita honyi.
\v 33 Al ifwotu’to etamijanita honyi iruk inyi te ettuŋo jo ara Hollum ahode.
\v 34 Alya al ifahu Hollum iramyo nekyanita honyi nyo itufutak Hollum inyi to Oloyiri ol Olibo.
\v 35 Omuno Monye Lonyi honyi bwo isyo ihani honyi erre daŋ.
\v 36 Al iruk’to jyo Lonyi owon iko nesu on osyo fur, ati alya ol omesyo’to inyi obeŋ adi igonyu nesu ati ijorya adi Hollum jihonyi fur.
\c 4
\cl Angati 4
\p
\v 1 Ihwania omijak Hobu Yesu jo, itaniŋuni Farisei jo onyimu inyi leyiyanak bwo fe ibatisyo isi agalik Yoane.
\v 2 Ara dwadi bu leyiyanak honyi ibatisye ati obeŋ ara Yesu ta ahwan honyi.
\v 3 Tania obusak inyi Yudea ette caharu Galilea.
\v 4 Bwo oŋida inyi olo otto fau Samaria.
\v 5 Tania afany inyi imiji Sikara ono Samaria an ilyaha limana ninya isyo Yakobo jyo lonyi honyi Yosefo.
\v 6 Bwo owon dia ahirri ono Yakobo. Tania itoŋo Yesu ifau iger hirri al aniama ta adaha honyi. Ara nya afanni.
\v 7 Ninya ottu aŋotte Samaritanani iwohori aari ojo Yesu jihonyi, Esyo ani omuk amat.
\v 8 Nyo ofwoi dwo leyiyanak honyi imiji inyyinyyaŋarai aŋiyo.
\v 9 Itarraŋ aŋotte Samaritanani ojo, Aŋai imojo iye aari jihoŋ, iye Ayudetanani bwo ni Asamaritanani? (Nyo oliwarik Yudea Samaritahyen.)
\v 10 Itarraŋ Yesu ojo, Kuyya imijak iye esyoryo Hollum bwo fe ŋai alya ol ojo dwo jihoi esyo ani omuk amat oŋida ifiyo iye inyi bwo isyo adi inyi jihoi aari hun isui’to.
\v 11 Ojo aŋotte jihonyi, Leittok, obeŋ obo ariŋ jihoi iwohuniere bwo fe owudo ahirri. Irumak adi iye aari hun isui’to aja?
\v 12 Igalik iye hohonyi hohoi Yakobo linya isyo’to hohoi ahirri ana bwo fe amatatyo inyi ta ahwan honyi iko lonyirok honyi bwo anyanya honyi?
\v 13 Itarraŋ Yesu jihonyi ojo, Hul amatai’to daŋ jyo aari ana inyyahi adi ibwoto.
\v 14 Ati al amata’to aari hun esyo ni jihonyi obeŋ adi inyyak ibwoto ’tuŋ. Nyo odulori adi aari hwa itwa honyi ihwa olotilik on obeŋ oyoho bwo iyaŋuno jihonyi esu on osyo fur.
\v 15 Ojo aŋotte jihonyi, Leittok esyo ani aari hwa oŋida ani abeŋ enyyak ibwoto, bwo abeŋ enyyak daha dini iwohori.
\p
\v 16 Ojo Yesu jihonyi, Ilo iloŋo habi hoi bwo ifwanna dini.
\v 17 Itarraŋ aŋotte ojo, Obeŋ ani ’le. Ojo Yesu jihonyi, Ibis iye ijari, Obeŋ ani ’le.
\v 18 Nyo iwatta nya iye iko alyawa miet bwo alle al iwatta’to ikoye ihwania obeŋ ara habi hoi. Ara nekyana odwo ikyana iye ahode.
\p
\v 19 Ojo aŋotte jihonyi ojo, Leittok, amijak ni jo ira iye aheyani sayyo.
\v 20 Itahabuye hohonyok hohoi Hollum itwa doŋe ana bwo itai Yudea ijatta ara Yerusalem amaji an itahabuyerek aati daŋ Hollum.
\v 21 Ojo Yesu jihonyi, Hanioŋ, iruho nekyana hoŋ nyo ottu adi oloŋ an ibyaŋari adi iye ilari itwa doŋe kuyya Yerusalem itahabuyere Hollum.
\v 22 Itai aati Samaria, itimoti tai anyo itahabuyete tai ati emijak hohoi Yudea anyo etahabuyo hohoi nyo ottu etalahuna to Yudea.
\v 23 Idwoŋ oloŋ ihwania an itahabuyerek laati ahode Monye to oloyiri iko te elahode. Nyo ottifya Monye laati ihwa hya irari ahetahabwok honyi.
\v 24 Ara Hollum oloyiri bwo hul itahabuye’to inyi oŋida itahabuye inyi to oloyiri iko te elahode.
\v 25 Ojo aŋotte jihonyi, Amijak ni jo ottu adi onyimot olo Hollum al iloŋoi Kristo. Al attu inyi iramak adi inyi hohoi erre daŋ.
\v 26 Ojo Yesu jihonyi, Ani el ekyana’to jihoi, ani alya.
\p
\v 27 Hekyana inyi ofwonni leyiyanak honyi ette illilliha nyo ikyana inyi iko aŋotte, ati obeŋ obo olosi ifiyo inyi jo, anyo iwak iye? Anyo ikyanati tai ikonyi?
\v 28 Tania ette aŋotte ania busana atobok hari honyi ette caharu itwa miji. Ette ikyana jyo laati ojo,
\v 29 Ifwanna, efwo mijo atulo al iramak’to ani erre daŋ hunya ehanio ni. Inyi adi Kristo lya?
\v 30 Ihwania odyotoi isi to miji ette fwatan imijyere inyi.
\p
\v 31 Hofwonni isi to miji, illilloŋoi leyiyanak inyi ojori, Hettiyanani, iŋiye aŋirya.
\v 32 Ati itarraŋ inyi, Owon aŋirya hoŋ an aŋiyo ni an ibyaŋata tai imijana.
\v 33 Ette leyiyanak itteryo ahahaya ojori, Iyak dwo obo atulo inyi obo aŋiyo?
\v 34 Ojo Yesu jihosi, Aŋiyo hoŋ inyi ihaniere awahan ono lya al ifahu’to ani bwo fe ituhoniere egyama honyi.
\v 35 Ibyaŋata tai ijatta jo, Ihalu ayafajin aŋwan ette adyoŋo ’tuna? Eramak ni itai, imijyete, ofyalati amatta nyo adori isi bwo aremehini ta adyoŋo.
\v 36 Ifwotutta adyoŋoni aduma honyi bwo ittuttubuno aŋer jyo nesu on osyo fur. Jo oŋida layani hinyomo iko adyoŋoni omunoi arabotye.
\v 37 Te eram ana obis ekyana on ojo’to, Oyehi obo bwo obo odeŋu.
\v 38 Efak ni itai idyoŋori matta hun ibyaŋata tai igyamati. Igyamai omuk bwo itai ifwotuna erre hun igyamuni isi.
\p
\v 39 Iruhi aati arryai to miji Samaria jihonyi nyo te etamijani ono aŋotte ania on ojo, Iramak inyi ani erre daŋ hunya ehanio ni.
\v 40 Tania afanyi Samaria ette isi mojo inyi itoŋori ikosi ette inyi itoŋo dia oŋitek arrihai.
\v 41 Tania inyyahi omuk iruk arryai al itaniŋuni isi nekyana honyi.
\v 42 Ette isi jaran jyo aŋotte, Ihwania ebeŋ hohoi eruk te ekyanita hoi hama nyo etaniŋu hohoi inyi ta ahwattek hohoi, bwo fe emijak hohoi ahode jo inyi alya Etalahani wati daŋ hutta fau.
\p
\v 43 Ihalu oŋitek hunia arrihai olo Yesu teyya Galilea,
\v 44 nyo ikyana Yesu ta ahwan honyi jo obeŋ etahabuyo jyo eyani sayyo imiji hosi.
\v 45 Ninya attu inyi Galilea ette laati Galilea muno bebe ette iyaro inyi imiji nyo owoni nya isi daŋ iyom otto Yerusalem ette isi igonyuna erre daŋ hunya ihanio Yesu.
\v 46 Tania ottu inyi imiji Kana ono Galilea ninya maji iloicere inyi aari ahari ajalaŋi. Owon obo eleittok olo hobu dia ol oŋwai lonyi honyi imiji Kapernaum.
\v 47 Itaniŋu inyi jo ottu Yesu to Yudea, Galilea, ette inyi leten jihonyi bwo olwaha jihonyi jo, Waŋ, ilo itaŋida lonyi hoŋ nyo ilyaha inyi aye.
\v 48 Ojo Yesu jihonyi, Al ibyaŋata tai igonyuna etamijanita iko edwariti ibyaŋata tai iruhoto.
\v 49 Ojo eleittok jihonyi, Hobu waŋ, efwo kokwak hobeŋ lonyi hoŋ oye.
\v 50 Itarraŋ Yesu, Ilo ati, isu lonyi hoi. Tania ette atulo alya iruk ekyanita hun ikyana Yesu jihonyi, ette leten.
\v 51 Hadaha inyi tekoi ette irwaŋanio iko legyamak honyi hul ojori, Isu lonyi hoi.
\v 52 Ette inyi ifiyo isi, To noloŋ baya itteryo inyi aŋidari? Itarraŋi isi, Ŋoleŋole ayir oloŋ ol otoryai ette anahan hwan busana inyi.
\v 53 Tania ette monye giluna inyi amaji holoŋ ania oŋole ikyanari Yesu jihonyi ojo, Isu lonyi hoi. Ette inyi iruk iko aati hutta haŋ honyi jyo Yesu.
\p
\v 54 Etamijani ana etarrihi an ihanio Yesu, lattu inyi to Yudea, Galilea.
\c 5
\cl Angati 5
\p
\v 1 Ihalu erre hunia owon eyom ono Yudea bwo olo Yesu many Yerusalem.
\v 2 Ati owon atafar Yerusalem an ilyaha ikat hidye. Iloŋoi Ebrei inyi Beteseda. Owon inyi iko abalihyen miet.
\v 3 Imasik huna itaferehitai isi aati aŋwak arryai, aŋodok, aŋurak, iko aati hul orrohojari’to itilari efolyahita hari.
\v 4 Nyo ottuta anjelo olo Hobu to obo oloŋ itafar itafolyahyere aari. Ihalu efolyahita hari lya al isurok’to itwa hari ahosyere ette ŋidari ta aŋwai honyi.
\v 5 Ati owon obo atulo dia ol oŋwai ta aŋasi atomwana hunihoi hohottohunik.
\v 6 Ninya igonyu Yesu inyi oferyo dia bwo fe omijak inyi owon inyi dia beryen, ojo jihonyi, Iwak iye aŋidari?”
\v 7 Itarraŋ aŋwani ojo, Hobu, obeŋ tulo ani akafak itwa hari al ifolyahita aari. Al ajo ni esurok ihari ette obo isuronia to hosyere hoŋ.
\v 8 Ojo Yesu jihonyi, Totte, akafu ejotit hoi, adahai.
\v 9 Teyya kokwak ette atulo lya ŋidari ette inyi kafuna ejotit honyi ette daha. Oloŋ nya inyi oloŋ sabato.
\v 10 Tania ojori Yudea jyo atulo al itaŋida Yesu jo, Ara ahana oloŋ sabato, tania odwa jihoi ikafuniere ejotit hoi.
\v 11 Itarraŋ inyi jihosi ojo, Atulo al itaŋida’to ani inyi ani iramak jo, Akafu ejotit hoi bwo adahai.
\v 12 Ifiye isi inyi ojori, ngai atulo lya ol ojo’to jihoi, Akafu ejotit hoi, adahai?
\v 13 Ati obeŋ atulo lodwo itaŋidari omijak ŋai lya nyo olo Yesu addi nyo owoni eluluŋ wati jyo amaji nya.
\p
\v 14 Ihalu orumak Yesu inyi ihaji imojit eneittok ette ikyana jihonyi ojo, Imijye, iŋida iye. Henyyak leten iyyauna ŋadi obo ariŋ on orroho’to agalik ottu jihoi.
\v 15 Olo atulo lya ette iramana Yudea ojo, Yesu dwadi lodwo itaŋida’to ani.
\v 16 Tania ette Yudea itteryo ittigemyo Yesu nyo ihanio inyi erre huna to sabato.
\v 17 Ati itarraŋ inyi jihosi ojo, Hodulo Monyoŋ igyama many iko ahana bwo fe ni hegyama.
\v 18 Te eram ana ottifyai Yudea bebe ittohori inyi nyo obeŋ ara te etarrohojo honyi sabato hama, ati bwo fe nyo iloŋo inyi Hollum Monyonyi itarrijohiniere ahwan honyi iko Hollum.
\p
\v 19 Ette Yesu itarraŋ jihosi ojo, Ahode eramak ni itai jo obeŋ Lonyi oremik ihanio obo ariŋ ta ahwan honyi arari al igonyu inyi ariŋ an ihanio Monye. Nyo erre daŋ hun ihanio Monye, ihanio adi bwo fe Lonyi honyi.
\v 20 Nyo ta amuno Monye Lonyi itahutak inyi erre daŋ hun ihanio inyi ta ahwan honyi. Bwo fe itahutak adi Monye erre hun obolori’to agalihini huna jo oŋida itai illillihati.
\v 21 Nyo ihwa itubuhu Monye ayak bwo inyyak isyarana isi nesu, isyo bwo fe Lonyi nesu jyo hul onyimu inyi.
\v 22 Obeŋ Monye oŋot obo eram ono obo atulo ati isyo inyi aŋoco hirre daŋ jyo Lonyi honyi,
\v 23 jo oŋida laati daŋ itahabuye Lonyi ihwa itahabuye isi Monye. Lya ol obeŋ’to itahabuyo Lonyi obeŋ bu inyi itahabuyo Monye al ifahu’to Lonyi.
\v 24 Eramak ni itai ahode ahode, lya al itaniŋyo’to nekyanita hoŋ bwo fe iruk jyo lya al ifahu’to ani owon iko nesu on osyo fur. Obeŋ adi Hollum oŋot aye jihonyi ’tuŋ ati ollwa inyi to ye lisu.
\p
\v 25 Ahode eramak ni jihatai ojo, ottu oloŋ, afany dwadi ihwania an itaniŋunierek ayak ekyanita huno Lonyi Hollum bwo hya hul itaniŋuni’to isui adi.
\v 26 Ihwa owon Monye iko nesu ihwan honyi, tania isyo inyi Lonyi nesu hatawana ihwan honyi.
\v 27 Bwo isyo inyi Lonyi adwaran iŋocere arami nyo inyi Lonyi tulo.
\v 28 Hellillihati te eram ana nyo ottu adi oloŋ an itaniŋyerek hutte lumyo nekyana honyi,
\v 29 bwo ette fwanna addi t’elumyo. Hya hul ihanie’to on oyyu, ofwonni adi jyo nebuhuna ono nesu bwo fe hya hul ihanie’to oŋitek daŋ on orroho ofwonni adi jyo nebuhuna ono aŋoco hirre.
\v 30 Abeŋ ni aremik ihanio obo ariŋ ta ahwan hoŋ. Aŋot ni ihwa etaniŋu ni bwo fe obis aŋoco hoŋ. Nyo abeŋ ni attifya awahan hoŋ ati ara awahan ono lya al ifahu’to ani.
\p
\v 31 Al eramak ni etamijani ta ahwan hoŋ obeŋ etamijani hoŋ oremik.
\v 32 Iramak obo etamijani toni, ette ni mijana jo ara etamijani ania ahode.
\v 33 Ifahina nya itai omuk laati jyo Yoane bwo iramak inyi itai etamijani an ara’to ahode.
\v 34 Ati abeŋ ni efwotu etamijani ono obo atulo. Ekyana ni ihwania jo oŋida italahuniete tai.
\v 35 Ara nya Yoane ihwa allomo on oswahini ette wulori, bwo imunoti nya itai itoŋori ifaŋan honyi.
\v 36 Ati awon ni iko etamijani on obolo agalik ono Yoane, nyo ara egyama an isyo Monyoŋ jihoŋ etamijani jo ifahu Monye ani.
\v 37 Bwo fe Monye al ifahu’to ani inyi ahetamijanani hoŋ. Hobeŋ obo alatai itaniŋu ekyanita honyi to obo oloŋ bwo fe hobeŋ obo igonyu inyi.
\v 38 Obeŋi nekyanita honyi ’totwajin hatai nyo ibyaŋata tai iruhoto alya al ifahu inyi.
\v 39 Iheniete tai egyerita nyo igigiloti tai jo irumana adi itai nesu on osyo fur dia. Ati ara abuk ania etamijani toni.
\v 40 Bwo fe ibyaŋata tai ifwanna jihoŋ irumaniere nesu.
\p
\v 41 Abeŋ ni efwotu etahwo wati.
\v 42 Ati amijak ni itai jo ibyaŋata tai imunoti Hollum ta atajya hatai.
\v 43 Attu ni ta afure ono Monyoŋ. Bwo ibyaŋata tai ani irrehuna. Kuyya ottu obo ta afure honyi irrehuna adi itai lya.
\v 44 Aŋai iremehina tai iruk al ittifyati tai etahwo wati, bwo ibyaŋata tai ittifyati etahwo on ottu’to jyo Hollum?
\v 45 Hegigiloti jo etisyak adi ni itai jyo Monye. Mose inyi etisyahani hatai bwo iyihina tai jihonyi.
\v 46 Nyo al iruhoto tai Mose ahode ittata adi itai iruk ani nyo igyoro nya inyi toni.
\v 47 Ati al ibyaŋata tai iruhoto egyerita honyi, aŋai attadi iruhoto tai ekyanita hoŋ?
\c 6
\cl Angati 6
\p
\v 1 Ihalu erre huna allaŋ Yesu aari tole an anya’to Galilea, ifurani inyi bwo fe Tiberia.
\v 2 Bwo fe ijifatye aati arryai nehalu honyi, nyo igonyuni isi etamijanita hun obolori hun ihanio inyi jyo hul oŋwai’to.
\v 3 Odok ati Yesu jyo obo adoŋe bwo isugai inyi iko leyiyanak honyi.
\v 4 Ihwania ilyaha neyom ono Allaŋan Anjelo, inyi neyom eneittok ono laati Yudea.
\v 5 Ofyala Yesu ette igonyuna aati hul olwaji bebe ofwonni jihonyi ette jaran jyo Filipo, Aja adi enyyaŋa hohoi emunio oŋida laati hulo oŋiye?
\v 6 Ikyana Yesu ihwania ikemyere Filipo nyo omijak inyi nanyo on ojo inyi ehanio.
\v 7 Itarraŋ Filipo ojo, Ara dwadi bu arobia hun olwaji obeŋi fe oremehini inyyaŋari emunio jo oŋida isi daŋ ababo omojuni minoŋ, minoŋ.
\v 8 Abotye olo leyiyanak honyi al anya Andrea illa Simone Petro ojo,
\v 9 Owon dini obo leito iko emunio honyi miet bwo naham arrihai. Oremehini ati hunia jyo aati arryai ihwa hulo?
\v 10 Attati Yesu jaran, Iramana aati hetetoŋohi. Obolo amaji miyaŋ dia, tania itoŋoi laati ifau. Arai alyawa esiha atomwana miet.
\v 11 Omoju Yesu hodwo imunio ette jaran humo jyo Hollum ette harana jyo hul owoniari’to iko aham bu ihwa an awaharik isi.
\v 12 Al ifoŋi aati ojo Yesu jyo leyiyanak honyi, Osuduhana ofitot, hotobyaŋahi orrohojari.
\v 13 Osuduhani ati isi ette itafutana nafejin ’tomon harrihai to ofitot huno emunio miet hun ofituni jyo hyodwo wati oŋiye.
\p
\v 14 Ninya igonyuni isi etamijani eneittok an ihanio Yesu, ojori laati hulya, Ahode atulo alya inyi eyani sayyo ol ottu adi lifau.
\v 15 Ati omijak Yesu jo ofwonni adi isi inefuna inyi ihananiere inyi ahobu. Tania ette inyi iluny lidoŋe hama.
\p
\v 16 Ara akikai ette leyiyanak honyi fwatan ihari eneittok.
\v 17 Teyya ette isi dahina itogol bwo itterye isi allaŋan hari many imiji Kapernaum. Iryok attari ati hobeŋ Yesu afany jihosi.
\v 18 Bwo fe itteryo aari efolyahita nyo ohuco oyyami bebe.
\v 19 Al iguroroi isi alamarai ihiji hari igonyuni isi Yesu adaha ta ahide hari ol ottu ajihosi. Ette isi baŋi bebe.
\v 20 Ati ojo inyi jihosi, Hebaŋata, ani alya.
\v 21 Ette isi ŋatana inyi hettu itwa togol. Teyya teyya ette atogol fanyan ilotifor hari jyo amaji an awahi isi ifwarri.
\p
\v 22 Nya motye igonyuni laati hul arasai’to aŋati hari tole atogol abotye on odiha’to hama. Ette isi mijana hobeŋ Yesu olo iko leyiyanak honyi ati leyiyanak hama ofwoi ta ahwattek hosi.
\v 23 Ofwonni omuk atogoli to Tiberia ette isi isid jyo amaji oŋole oŋiyerek aati emunio ihalu isyarana Hobu ahumo jyo Hollum.
\v 24 Ninya igonyuni eluluŋ wati jo abeŋi Yesu iko leyiyanak honyi teyya, ette isi isuruna itogoli, ette fwatan Kapernaum ittifyari Yesu.
\p
\v 25 Ninya orumani isi inyi aŋati hari tolya ojori isi jihonyi, Hettiyanani, dwo baya ifany iye dini?
\v 26 Itarraŋ Yesu jihosi ojo, Eramak ni itai ahode ahode, ibyaŋata tai ittifyati ani te eram ono etamijanita ati ara te eram ono emunio hun iŋiyete tai ittata ifoŋ.
\v 27 Hegyamati ta aŋiyo on otuhuno adi ati igyamati ta aŋiyo an ara’to ta nesu on osyo fur. Isyo adi Lonyi tulo aŋiyo ania jihatai, nyo isyo Hollum Monye jihonyi adwaran.
\p
\v 28 Ifiye isi inyi ojori, Aŋai adi egyama hohoi egyama ono Hollum?
\v 29 Itarraŋ Yesu jihosi ojo, Egyama ono Hollum ana, oŋida iruhoto jyo alya al ifahu inyi.
\v 30 Ati ojori isi jihonyi, Anani etamijani an ilo iye ihanio oŋida hohoi egonyu ette iruk jihoi? Anani egyama an ijo iye ihanio?
\v 31 Oŋiye nya hohonyok hohoi emune itimore ihwa igyoroni nya ojo, “Isyo Hollum jihosi emune on ottu’to t’edou iŋiyere.”
\p
\v 32 Ojo Yesu jihosi, Ahode ahode eramak ni itai, obyaŋara Mose isyo jihatai emune on ottu’to t’edou, ati Monyoŋ isyo jihatai emune ania an ara’to ahode.
\v 33 Nyo emune an isyo Hollum ottu t’edou ette isyarana esu ifau.
\p
\v 34 Ojori isi jihonyi, Hobu oduloi isyoryo jihohoi emune ania fur.
\v 35 Itarraŋ Yesu jihosi ojo, Ani emune ono nesu. Ol ottu’to jihoŋ obeŋ adi inyyak niama bwo fe al iruk’to jihoŋ obeŋ adi inyyak ibwoto.
\v 36 Ati ihwa eramak dwo ni itai dwadi igonyuna tai ani ibyaŋata tai iruhoto.
\v 37 Laati daŋ hul isyo Monyoŋ jihoŋ ofwonni adi jihoŋ bwo fe ol ottu’to jihoŋ abeŋ adi ni efuha addi.
\v 38 Abeŋ ni attu t’edou ifau ihaniere awahan hoŋ ati attu ni ihaniere awahan ono lya al ifahu’to ani.
\v 39 Awahan ono lya al ifahu’to ani ana, jo oŋida ani abeŋ etalitohi hulya daŋ hul isyo inyi jihoŋ. Ati oŋida ani isi etubuhu iholoŋ an isidori afau.
\v 40 Nyo awahan ono Monyoŋ ana, jyo hulya hul omijye’to Lonyi bwo fe iruhi jihonyi owoni iko nesu on osyo fur bwo etubuhu adi ni isi iholoŋ an isidori afau.
\p
\v 41 Tania ette laati Yudea itteryo amwaŋa Yesu nyo ojo inyi jo, Ani emune on ottu’to t’edou.
\v 42 Ette isi jaran, Obyaŋara Yesu olo lonyi Yosefo? Ebeŋ hohoi emijak monyonyi iko honyonyi? Aŋai ojo inyi ihwania jo attu inyi t’edou?
\v 43 Itarraŋ Yesu jihosi ojo, Anyo ihahayati tai ta ahwattek hatai?
\v 44 Obeŋ obo ottu jihoŋ arari Monye al ifahu’to ani orihu inyi. Attadi ni itubuhuna inyi iholoŋ an isidori afau.
\v 45 Igyoroni nya eyak sayyo jo, “Ittiyenio adi Hollum isi daŋ.” Hul itaniŋuni bwo fe iyiyanai jyo Monye, ofwonni hya jihoŋ.
\v 46 Obeŋ obo atulo igonyu Monye arari lya ol ottu’to jyo Hollum, inyi hama igonyu Monye.
\v 47 Ahode ahode eramak ni itai, al iruk’to owon iko nesu on osyo fur.
\v 48 Ani emune ono nesu.
\v 49 Oŋiye nya hohonyok hatai emune itimore ati oyei isi.
\v 50 Oremehini laati ŋiyo emune ana on ottu’to t’edou ifau bwo obeŋi isi oyei.
\v 51 Ani emune ono nesu on ottu’to t’edou ifau. Ol oŋiyo’to emune ana isu adi tulaŋ, bwo fe ahwan hoŋ inyi emune an esyo ni ta nesu ono laati.
\p
\v 52 Tania ette Yudea mwaŋa ta ahwattek hosi ojori, Aŋai oremik atulo olo isyo ahwan honyi iŋiyere?
\v 53 Ojo Yesu jihosi, Ahode ahode eramak ni itai al ibyaŋata tai iŋiyete ahwan ono Lonyi tulo bwo fe ibyaŋata imatati nooto honyi, obeŋ obo nesu itwajin hatai ’tuŋ.
\v 54 Alya ol oŋiyo’to eriŋo hwan hoŋ bwo fe amata nooto hoŋ owon iko nesu on osyo fur, bwo fe etubuhu adi ni inyi iholoŋ an isidori afau.
\v 55 Nyo eriŋo hwan hoŋ inyi aŋiyo an ara’to ahode, bwo fe nooto hoŋ ara ariŋ an amatai ahode.
\v 56 Alya ol oŋiyo’to eriŋo hwan hoŋ, bwo fe amata nooto hoŋ ogolik inyi jihoŋ bwo fe ni agolik jihonyi.
\v 57 Ihwa ifahu Monye al isu’to ani bwo ni ette isu to Monye, bwo ol oŋiyo’to ani isu toni.
\v 58 Ara ana emune on ottu’to t’edou ifau. Obeŋ inyi orrijori iko emune ono hohonyok hatai inya oŋiye isi bwo arasai yetyo. Ol oŋiyo’to emune ana isu adi fur tulaŋ.
\v 59 Ikyana Yesu ekyanita huna al ittiyenio inyi ihaji imojit imiji Kapernaum.
\p
\v 60 Ninya itaniŋuni isi ana ojori omuk hulo leyiyanak honyi jo, Ogol ekyana ana. Ngai adi itaniŋu inyi?
\v 61 Omijak Yesu ta ahwan honyi jo omwaŋai leyiyanak honyi inyi te ettiyenio ana ette inyi jaran jihosi, Itamedeyuk ekyana ana atajya hatai?
\v 62 Aŋai adi al igonyuna tai Lonyi tulo odok jyo amaji inya awanari inyi beryen?
\v 63 Isyo oloyiri nesu. Obeŋ ahwan ihanio obo ariŋ. Nekyanita hodwo ekyana ni jihatai arai isi huno oloyiri iko nesu.
\v 64 Ati hobeŋi omuk hulatai iruhi. Nyo omijak Yesu t’etteri hul obeŋi’to iruhi jihonyi bwo fe omijak inyi lya ol ottu adi itinyyaŋana inyi.
\p
\v 65 Tania ojo inyi jo, Te eram ana eramak ni itai obeŋ obo ottu jihoŋ arari al orihuno Monyoŋ inyi.
\p
\v 66 Tania ette omuk leyiyanak honyi bwanyaru bwo obeŋi inyyahi daha ikonyi.
\v 67 Ifiyo Yesu hulo ’tomon harrihai ojo, Ara bwo itai, iwahata bwo fe itai acaharu?
\v 68 Itarraŋ Simone Petro ojo, Jyo ŋai adi efwo hohoi, Hobu? Owoni nekyanita huno nesu on osyo fur jihoi.
\v 69 Bwo fe eruk hohoi bwo emijak jyo, iye Aliboroni olo Hollum.
\v 70 Itarraŋ Yesu jihosi ojo, Abeŋ nya ni itai anyimu ’tomon harrihai bwo fe obo alatai ihanio ehanita huno Sitan?
\v 71 Ikyana Yesu ihwania to Yuda lonyi Simone Iskariote nyo ara Yuda obo olo ’tomon harrihai al ara’to adi ahetinyyaŋani Yesu.
\c 7
\cl Angati 7
\p
\v 1 Ihalu erre huna iddiddaha Yesu itwa misik huno Galilea. Obeŋ inyi awak adaha imisik Yudea nyo awahi Yudea ’tohoro inyi.
\v 2 Ihwania ilyaha eyom ono Yudea, inyi eyom ono asik.
\v 3 Ojori illarak honyi jihonyi, Heduhati tene efwo Yudea, jo oŋida leyiyanak hoi igonyuni egyama an ihanio iye.
\v 4 Nyo obeŋ obo atulo idimak erre hun ihanio inyi, al awak inyi laati omijani inyi. Al ihanio iye etamijanita, itahutak ahwan hoi jyo aati.
\v 5 Nyo ara dwo bu illarak honyi obeŋi iruhi jihonyi.
\v 6 Itarraŋ Yesu jihosi, Hobeŋ asaa hoŋ ottu ati ara asaa hatai ihwania.
\v 7 Obeŋi aati itai oswarik ati oswarik ani, nyo eramyo ni etamijanita jihosi jo orrohoji ehanita hosi.
\v 8 Ifwatta iyom ta ahwattek hatai. Habeŋ ni alo jyo eyom ania nyo hobeŋ asaa hoŋ ottu.
\v 9 Ikyana inyi erre huna ette inyi rasa Galilea.
\p
\v 10 Ihalu afwoi illarak honyi eyom ette inyi leten bwo fe, ati obeŋ aleten honyi oleyo ihomomite wati.
\v 11 Ottifyai Yudea inyi to maji ono eyom ania ette ifiyo ojori, Tali inyi?
\v 12 Omwaŋai eluluŋ wati inyi bebe. Ojori omuk, Oyyu atulo alya. Bwo omuk ojori, Obeŋ, itipalyo inyi laati.
\v 13 Obeŋ obo ikyana on okwat to Yesu nyo abaŋi isi Yudea.
\p
\v 14 Ati al ara ehiji ono neyom olo Yesu ihaji imojit eneittok ittiyeniere.
\v 15 Illillihai Yudea ojori, Aŋai omijak atulo olo egyerita huno Hollum bwo hobeŋ iyiyana?
\v 16 Itarraŋ Yesu jihosi ojo, Ettiyenio hoŋ obeŋ ara onoŋ ati ara ono lya al ifahu’to ani.
\v 17 Al awak obo ihanio awahan ono Hollum, omijak adi inyi jo, arai ettiyenita hoŋ ahuno Hollum kuyya ani ekyana ta ahwan hoŋ.
\v 18 Al ikyana’to ta ahwan honyi ottifya inyi etahwo honyi. Ati atulo ol ottifya’to etahwo jyo alya al ifahu’to inyi ikyana inyi ahode, bwo fe obeŋ inyi inyobyo.
\v 19 Obeŋ nya Mose isyo itai efahita? Ati obeŋ obo alatai ifaha efahita. Nyo iwahata tai ’tohoro ani?
\v 20 Itarraŋi neluluŋ ojori, Iwon iye iko ajok on orroho. Ngai iye ejo ettoho?
\v 21 Itarraŋ Yesu jihosi ojo, Ehanio nya ni obo ariŋ ittata tai daŋ illilliha.
\v 22 Ikemijata, isyo nya Mose jihatai aŋotou ati obeŋ ara Mose itteryo, hohonyok hatai nya itterye. Bwo imohina tai ŋoco leito dwadi to oloŋ sabato.
\v 23 Kuyya ifwotu leito aŋoto to sabato jo oŋida efahi Mose obeŋ opwak, nyo iloŋojitati tai jihoŋ te etaŋidaryo hoŋ atulo to noloŋ sabato?
\v 24 Heŋocete hebyaŋata tai imijana awoyo hiram, ati oŋototo on obis.”
\p
\v 25 Tania ojori omuk hulo Yerusalem jo, Obyaŋara atulo olo ol ojori ottohori?
\v 26 Ikemijyete, ikyana inyi oŋerejai bwo tulo obeŋ ikyana jihonyi. Omijani adi eleittaha jo inyi alya Kristo?
\v 27 Emijak hohoi tai ottu atulo olo ati al ottu Kristo obeŋ adi tulo omijak tai ottu inyi.
\p
\v 28 Tania itakwat Yesu nekyana al ittiyenio inyi itwa haji imojit eneittok ojo, Itai, imijana tai ani bwo fe tai attu ni. Ati abeŋ ni attu ta ahwan hoŋ. Lya al ifahu’to ani inyi elahode bwo fe ibyaŋata tai imijana inyi.
\v 29 Ati amijak ni inyi nyo attu ni jihonyi bwo ifahu inyi ani.
\p
\v 30 Ottifyatye isi inyi inefuniere ati obeŋ tulo ottirok ahas jihonyi nyo hobeŋi oŋitek honyi ottubai.
\v 31 Ati iruhi hutteluluŋ arryai jihonyi bwo ojori, Al attu Kristo ihanio adi inyi etamijanita agalihini huno atulo olo?
\v 32 Ikikyanai eluluŋi wati te ehanita Yesu ette Farisei itaniŋuna, tania ifahini eleittaha iko Farisei surukali inefuniere inyi.
\p
\v 33 Attati Yesu jaran jihosi, Harasa ni wanan ikatai kai bwo alo adi ni jyo lya al ifahu’to ani.
\v 34 Ittifyati adi itai ani bwo ibyaŋata adi itai irumana ani. Jyo amaji an alari ni ibyaŋata adi itai ifwanna.
\v 35 Ikikyanai Yudea ta ahwattek hosi ojori, Aja ojo atulo olo alo inyi jo oŋida hohoi ebeŋ erumak inyi? Olo ’tadi inyi jyo laati hohoi hul isarrahini’to huttehiji paganohyen bwo fe ittiyeniere laati Grik?
\v 36 Ojo inyi jo, Ittifyati adi itai ani bwo ibyaŋata adi itai irumana ani, bwo fe, Jo amaji an alari ni ibyaŋata adi itai ifwanna. Anyo ati nekyanita huna?
\v 37 To oloŋ eneittok on otuhuniere eyom, owotya Yesu bwo ikyana on okwat ojo, Kuyya ibwoto obo atulo ijara hettu jihoŋ imatari.
\v 38 Ihwa igyoroni igyerita jo, “Totwa alya al iruk’to jihoŋ, odulori aari hun isui’to ŋettyo.”
\v 39 Ojo inyi ana to Oloyiri ol Olibo al ifwotuni adi eruhok. Nyo hobeŋi nya bu inyi isyarani Oloyiri ol Olibo nyo hobeŋ Yesu ifwotu etahwo honyi.
\p
\v 40 Omuk hutteluluŋ hul itaniŋye’to ekyanita huna ojori, Ahode atulo alya inyi eyani sayyo.
\v 41 Bwo omuk ojori, Inyi Kristo. Ati ojori omuk, Ottu Kristo to Galilea?
\v 42 Ojori egyerita jo, “Odetuno adi Kristo to woyo Davide to miji ono Betlehem inya amanyari Davide.”
\v 43 Tania owon abwanya ihiji wati tenyi.
\v 44 Awahi omuk hulosi inefuna inyi ati obeŋ tulo ottir inyi.
\p
\v 45 Tania ette surukali caharu jyo eleittaha iko Farisei. Ifiye isi surukali ojori, Nyo ibyaŋata tai iyaŋuniete inyi?
\v 46 Itarraŋi surukali ojori, Hobeŋ tulo ikyana ihwa atulo lya.
\v 47 Itarraŋi Farisei jihosi ojori, Itai bwo fe, linyob bwo fe inyi itai?
\v 48 Iruhi omuk eleittaha iko hulo Farisei jihonyi?
\v 49 Ati eluluŋ wati hulya obeŋi omijani efahita tania iha Hollum isi.
\p
\v 50 Obo olosi Nikodemo linya olo’to mijo Yesu, ojo jihosi,
\v 51 Oremehini efahita hohoi iŋot atulo ahosyere hobeŋi ekyanita honyi itaniŋunie bwo fe hebeŋ emijak anyo an ehan inyi?
\v 52 Itarraŋi isi jihonyi, Iye ta ahwan hoi, ira iye olo Galilea? Ottifyai bwo fe ilo imijye, hobeŋ obo eyani sayyo ottu to Galilea.
\p
\v 53 Tania ofwoi aati daŋ ihaŋitek hosi.
\c 8
\cl Angati 8
\p
\v 1 Bwo Yesu olo idoŋe Oliveto.
\v 2 Ta amotye hanyik ocohuno inyi ihaji imojit eneittok bwo fe ofwonni aati daŋ jihonyi. Itoŋo inyi ette ittiyenio isi.
\v 3 Bwo fe legyorokv iko Farisei iyaŋunie aŋotte an inefuni orotoi iko obo atulo, ette isi itawojihina inyi ihosyere wati.
\v 4 Ojori isi jyo Yesu, Hettiyanani, aŋotte ana orumani oroto.
\v 5 Ihwania ojori efahita huno Mose jo oŋida hohoi erwoŋyo inyi ta amorwoi. Bwo iye, ijo iye aŋai tenyi?
\v 6 Ikyanai isi ana ikemyere Yesu jo oŋida isi errasak inyi. Tania irrafa Yesu ifau bwo itteryo igyoro ta afyalai honyi.
\v 7 Odulori isi ifiyo inyi bwo inyi ette itabisana ahwan honyi bwo omijo jihosi ette jaran, Ijara lya ol hobeŋ’to iyyau heterwoŋo inyi ahosyere.
\v 8 Tania inyyak inyi irrafa ifau ette inyyak igyoro ta afyalai honyi.
\v 9 Itaniŋuni isi nekyanita hunia, itterye isi jyo amarwak adaha daŋ addi. Ette busaro Yesu iko aŋotte hama.
\v 10 Itadet Yesu ahwan honyi ette jaran jihonyi, Ŋotte tahyai aati hulo? Obeŋ tulo oŋot aye jihoi?
\v 11 Itarraŋ aŋotte jihonyi, Hobu, obeŋ tulo. Ojo Yesu jihonyi, Abeŋ bwo fe ni aŋot iye. Ilo, ati henyyak iyyauna.
\p
\v 12 Tania inyyak Yesu ikyana jihosi ojo, Ani afaŋan ono afau. Lya al ijifatyo’to ani obeŋ adi adaha idumele ati owon iko afaŋan ono nesu.
\v 13 Tania ojori Farisei jihonyi, Iramaru iye etamijanita ta ahwan hoi. Obeŋi etamijanita hoi arai ahode.
\v 14 Itarraŋ Yesu jihosi, ara dwo bu eramyo ni etamijanita ta ahwan hoŋ, obisi etamijanita hoŋ nyo amijak ni tai attu ni bwo aja alo ni. Ati ibyaŋata tai imijana attu ni tai bwo alo ni aja.
\v 15 Iŋocete tai to ofyoro wati. Abeŋ ni aŋot obo atulo.
\v 16 Ara dwo al aŋoco ni obisi dwo eŋotiti hoŋ nyo obyaŋara ani hama ati Monye al ifahu’to ani ewon ikoŋ.
\v 17 Bwo te efahita hatai igyoroni jo obisi etamijanita huno laati arrihai.
\v 18 Ani abotye eramyo ni etamijani ta ahwan hoŋ bwo Monyoŋ al ifahu’to ani iramyo etamijanita toni.
\p
\v 19 Ifiye isi inyi ojori, Tali Monyohoi? Itarraŋ Yesu ojo, Ibyaŋata tai imijana ani ara dwo bu Monyoŋ. Kuyya dwo imijana tai ani imijana dwo itai Monyoŋ bwo fe.
\v 20 Ikyana inyi ekyanita huna jyo amaji an isyoryerek agurusi hettiyenio inyi ihaji imojit eneittok. Bwo obeŋ tulo inef inyi nyo hobeŋi oŋitek honyi ottubai.
\p
\v 21 Inyyak Yesu jaran jihosi, Alo adi ni addi bwo fe ittifyati adi itai ani ati iyeti adi itai iyyata hatai. Jyo amaji an alari ni ibyaŋata adi itai ifwanna.
\v 22 Tania itarraŋi Yudea ojori, Ottoho ’tadi inyi ahwan honyi? Nyo ojo inyi jo, Jyo amaji an alari ni ibyaŋata adi itai ifwanna?
\v 23 Ojo inyi jihosi, Irata tai huttowor bwo ni ottohide. Irata tai hulo afau ana bwo ni abeŋ ara olo afau ana.
\v 24 Inyi an ajari ni jo, iyeti adi itai iyyata hatai. Nyo al ibyaŋata tai iruhoto jo ani Kristo, lonyimot olo Hollum, iyeti adi itai iyyata hatai.
\p
\v 25 Ojori isi jihonyi? Iye ŋai? Itarraŋ Yesu jihosi ojo, Eramak dwo ni itai t’etteri.
\v 26 Owoni erre jihoŋ arryai ikyanari bwo fe iŋocere tetai. Lya al ifahu’to ani obis inyi, bwo ekyana ni jyo laati erre huna hun etaniŋu ni jihonyi.
\p
\v 27 Ati obeŋi isi itaniŋuni jo ikyana inyi to Monyonyi.
\v 28 Tania ojo Yesu jihosi, Al ikafana tai Lonyi tulo ahide, imijana adi itai jo ani alya, bwo fe abeŋ ni ehanio obo ariŋ ta awahan hoŋ, ati ekyana ni ihwa ittiyenak ani Monye.
\v 29 Bwo lya al ifahu’to ani ewon ikoŋ. Obeŋ inyi ani obusak hama nyo oŋitek daŋ ehanio ni erre hun itamunoi’to inyi.
\v 30 Al ikyana inyi ihwa ana, ette Yudea arryai iruk jihonyi.
\p
\v 31 Tania ikyana Yesu jyo Yudea hul iruhi’to jihonyi ojo, Al igolihina tai likyana hoŋ, irata tai aheyiyanak hoŋ ahode.
\v 32 Bwo fe imijana adi itai nelahode bwo ohohi adi itai nelahode.
\v 33 Itarraŋi isi ojori, Edetuno hohoi to woyo ba Abramo bwo fe hebeŋ hohoi epito jyo obo atulo. Anyo an ijo iye jo ihohiniete adi itai?
\v 34 Itarraŋ Yesu ojo, Ahode ahode eramak ni itai jo, Aati daŋ eyyak arai apiti jyo neyyau.
\v 35 Obeŋ apit arasa ihaŋ tulaŋ, ati arasa lonyi tulaŋ.
\v 36 Al ohohi itai Lonyi, ohohini adi itai ahode.
\v 37 Amijak ni idetuniete tai jyo Abramo ati iwahata tai ani ’tohoro nyo obeŋi nekyanita hoŋ oyiji jihatai.
\v 38 Eramyo ni erre hun egonyu ni jyo Monyoŋ bwo fe imohoti tai te erre huno monye hatai.
\p
\v 39 Itarraŋi isi jihonyi ojori, Ara Abramo monye hohoi. Itarraŋ Yesu ojo, Kuyya itai lonyirok Abramo oŋida ihaniete ehanita huno Abramo.
\v 40 Ati ihwania ijatta tai ani ettoho al eramyo ni itai nelahode an etaniŋu ni jyo Hollum. Obeŋ nya Abramo ihanio ihwa ana.
\v 41 Ihaniete tai ehanita huno monyatai. Ojori isi jihonyi, Ebeŋ hohoi era olonyirok harotok. Ewon hohoi iko Monye abotye inyi Hollum.
\v 42 Ojo Yesu jihosi, Kuyya ara Hollum Monyatai imunoti dwo itai ani nyo abusak ni Hollum ittuniere dini. Abeŋ ni attu ta awahan hoŋ ati Hollum ta ahwan honyi inyi ani efahu.
\v 43 Aŋai ibyaŋata tai itaniŋuna ekyanita hoŋ? Nyo ibyaŋata tai iremehina itayiryo ekyanita hoŋ.
\v 44 Itai lonyirok monyatai Sitan bwo iwahata tai ihanio ewahiti monyatai. Ara nya inyi ahattohoni t’etteri bwo obeŋi omuk ekyanita honyi obisi nyo obeŋ nelahode jihonyi. Al ogesem inyi, ogesem inyi ta ahwan honyi nyo ara inyi ologesem bwo fe amonye gesemi.
\v 45 Ati ibyaŋata tai iruhoto ani nyo ekyana ni nelahode.
\v 46 Omijak obo alatai jo ara ni aheyyani? Nyo ibyaŋata tai iruhoto ani al ekyana ni nelahode?
\v 47 Alya al ara aholo Hollum itaniŋu inyi ekyanita Hollum. Tania te eram to nya ibyaŋata tai itaniŋyete nyo ibyaŋata tai irata ahulo Hollum.
\p
\v 48 Itarraŋi Yudea jyo Yesu ojori, Ebeŋ hohoi ettenu al ejo hohoi jo ira iye Asamaratanani bwo fe iwon iye iko ajok on orroho?
\v 49 Itarraŋ Yesu ojo, Abeŋ ni awon iko ajok on orroho. Etahabuyo fe ni Monyoŋ bwo itai imoryete nani.
\v 50 Abeŋ bu ni attifya etahwo hoŋ ati owon obo ol ottifya’to bwo inyi adi aŋotoni.
\v 51 Ahode ahode ajo ni jihatai jo al ogotyere’to ettiyenita hoŋ obeŋ adi inyi oye ’tuŋ.
\p
\v 52 Bwo fe Yudea ette jaran jihonyi jo, Ihwania emijak hohoi jo iwon iye iko ajok. Oye nya Abramo, oyei nya eyak sayyo, ati ijo iye, Al ogotyere’to nettiyenita hoŋ obeŋ adi inyi oye ’tuŋ.
\v 53 Igalik iye hohonyi hohoi Abramo linya oye’to? Bwo fe eyak sayyo hinya oyei’to? Igigilo iye jo ira iye ŋai?
\v 54 Itarraŋ Yesu ojo, Al etahworo ni ahwan hoŋ, ara etahwo hoŋ asai. Monyoŋ fe inyi al itahuyo nani al ijatta tai jo ara a Hollum hatai.
\v 55 Bwo hebyaŋata tai imijana inyi, nani ati amijak inyi. Al ajo ni abeŋ ni amijak inyi ara fe ni ehenyabani ihwa itai. Ati amijak ni inyi bwo agotyere ni nekyanita honyi.
\v 56 Omuno nya monyatai Abramo igonyuniere oloŋ hoŋ. Ligonyu inyi oloŋ hoŋ ette inyi muno bebe.
\p
\v 57 Ojori ati Yudea jihonyi, Hobeŋi aŋasi hoi ottubai atomwana miet. Aŋai igonyu iye Abramo?
\v 58 Ojo Yesu jihosi, Ahode ahode ajo ni jihatai, hobeŋi isiuni Abramo, awon nya ni.
\v 59 Ohuruni isi namorwoi irwoŋyere inyi ati idima Yesu ette jiŋara to haji imojit eneittok alet.
\c 9
\cl Angati 9
\p
\v 1 Hojiŋu Yesu ette inyi igonyuna atulo ol oŋodo’to many t’esiuniere.
\v 2 Ifiye leyiyanak inyi ojori, Hettiyanani, ŋai nya iyyau, atulo olo, kuyya esyok honyi an isiunierek inyi ol oŋodo?
\v 3 Itarraŋ Yesu ojo, Ara dwo bu inyi iko esyok honyi obeŋi iyyauni. Idwoŋi erre huna ihwa huna oŋida itahutanierek egyama ono Hollum.
\v 4 Oŋida hohoi egyama egyama ono alya al ifahu’to ani hara aholoŋ. Ottu adi attari on obyaŋari tulo igyamari.
\v 5 Hawon ni ifau ani afaŋan ono afau.
\p
\v 6 Hekyana inyi ette inyi mitana amilak ifau bwo ette nyutuna efwoto ta amilak ette yalana ihoŋite oŋodo.
\v 7 Bwo ojo jihonyi, Ilo illillai itafar ono Silom (on ojo ifuhari). Tania olo atulo alya ette illilla oŋite honyi ette cohuno ol omijo.
\v 8 Ihwania hutto onyihari honyi hul omijani’to atileŋita honyi ojori, Obyaŋara atulo olo ol otileŋita toloŋi?
\v 9 Ojori omuk, Afe, inyi alya. Bwo omuk ojori, Obeŋ, ati iyyalu inyi lya. Ette inyi itarraŋ jo, Ani alya.
\v 10 Ihwania ifiye isi inyi, Aŋai imijo iye?
\v 11 Itarraŋ inyi ojo, Atulo al anya’to Yesu inyutu efwoto bwo iyalak ihoŋite hoŋ, ette jaran jihoŋ, Ilo illillai itafar Silom. Teyya ette ni leten ette illilla, ette ni itteryo amijo.
\v 12 Ojori isi jihonyi, Tali inyi? Itarraŋ atulo alya, Abeŋ ni amijak.
\p
\v 13 Teyya iyaŋunie isi atulo linya oŋodo’to jyo Farisei.
\v 14 Ihwania ara nya ta noloŋ sabato inyutu Yesu efwoto bwo isyarak amijo jyo atulo alya.
\v 15 Teyya itterye Farisei ifiyo atulo alya, Aŋai imijo iye? Ojo inyi jihosi, Ihanak inyi efwoto ihoŋite hoŋ ette ni illillauna bwo ni ette mijo.
\v 16 Ojori omuk hulo Farisei, Obeŋ atulo olo ottu jyo Hollum nyo obeŋ inyi itadwara efahi ono sabato. Ati ojori omuk, Aŋai ihanio eyyani etamijanita ihwa huna? Tania owon abwanya ihiji hosi.
\v 17 Inyyahi isi ifiyo oloŋodo, Anyo adi ijo iye tenyi te etaŋidaryo honyi oŋite hoi? Itarraŋ inyi ojo, ara inyi aheyani sayyo.
\p
\v 18 Obeŋi ati Yudea iruhi jo oŋodo nya inyi ahode bwo inyi ette ifwotuna amijo. Iloŋuni isi esyok tulo ol oŋodo’to.
\v 19 Ifiye isi ojori, Lonyi hatai olo, al ijatta tai oŋodo nya many t’esyori? Aŋai ati omijo inyi ihwania?
\v 20 Itarraŋi esyok honyi ojori, Emijak hohoi jo lonyi hohoi olo bwo fe isiuni nya inyi ol oŋodo.
\v 21 Ati ebeŋ hohoi emijak aŋai omijo inyi ihwania, bwo fe ebeŋ hohoi emijak ŋai isyarak jihonyi amijo. Ifiyete inyi ta ahwan honyi. Obolo inyi, ikyana adi inyi ta ahwan honyi.
\v 22 Ikyanai esyok honyi ihwania nyo abaŋi isi Yudea. Nyo oŋoti Yudea ojori, Al ojo obo jo Yesu inyi Kristo, oŋida ifuhari to haji imojit.
\v 23 Inyi on ojarik esyok honyi ifiyete inyi ta ahwan honyi nyo abolo inyi.
\p
\v 24 Tania inyyahi Yudea iloŋ atulo inya oŋodo’to ojori jihonyi, Isyarak etahabuyo jyo Hollum nyo emijak hohoi ara atulo alya aheyyani.
\v 25 Tania itarraŋ atulo inya oŋodo’to ojo, Abeŋ ni amijak kuyya ara inyi aheyyani. Ariŋ abotye an amijak ni, ahosyere aŋodo ni, bwo ihwania amijo ni.
\v 26 Ojori isi jihonyi, Ihan dwo inyi anyo jihoi? Aŋai itaŋida inyi oŋite hoi?
\v 27 Itarraŋ inyi ojo, Eramak dwo ni itai bwo itai ibyaŋata itaniŋyete. Nyo iwahata tai inyyak itaniŋyo? Iwahata tai ratan aheyyiyanak honyi?
\v 28 Teyya ette isi itafoyoŋyo inyi ojori, Iye ati olo leyiyanak honyi. Hohoi leyiyanak hulo Mose.
\v 29 Emijak hohoi ojo ikyana Hollum jyo Mose, ati atulo olo ebeŋ hohoi emijak ottu inyi tai.
\v 30 Itarraŋ atulo alya jihosi, Obo ariŋ ana an illillihai aati jo, ibyaŋata tai imijana tai ottu inyi, ati isyo inyi jihoŋ amijo.
\v 31 Emijak hohoi jo, obeŋ Hollum itaniŋyo eyyak, ati itaniŋyo inyi jyo lya al itahabuyo’to inyi bwo fe ihanio awahan honyi.
\v 32 T’etteri fau hebeŋ hohoi etaniŋu obo atulo al itaŋida atulo ol oŋodo many t’esyori.
\v 33 Kuyya dwo obeŋ atulo olo ottu jyo Hollum obeŋ dwo bu inyi ihanio ehanita huna.
\v 34 Itarraŋi isi jihonyi, Isihini nya iye iyyata, bwo iye ijo ittiyenio hohoi? Ette isi ifuhara inyi addi.
\p
\v 35 Itaniŋu Yesu jo ifuhari inyi addi. Tania orumak Yesu inyi ette jaran jihonyi, Iruk iye jyo Lonyi Hollum?
\v 36 Itarraŋ inyi, ngai lya Hobu? Oŋida ani eruk jihonyi.
\v 37 Ojo Yesu, Igonyu dwo iye inyi bwo fe inyi alya al ikyana’to jihoi.
\v 38 Ojo inyi, Eruk ni Hobu, ette inyi itahabuyo Yesu.
\p
\v 39 Ojo Yesu, Attu ni ifau iŋocere erre, jo oŋida hul obeŋi’to igonyuni, igonyuni, bwo fe itaŋodoyere hul omijye’to.
\v 40 Omuk hulo Farisei hul owoni’to ikonyi itaniŋuni huna ette isi ifiyo inyi ojori, Eŋodo hohoi bwo fe?
\v 41 Itarraŋ Yesu jihosi ojo, Kuyya dwo iŋodoti tai obeŋi dwo omuk eyyata jihatai, ati ihwania ijatta tai emijo hohoi, tania arasai eyyata hatai.
\c 10
\cl Angati 10
\p
\v 1 Ahode ahode eramak ni itai ojo, Ol obeŋ’to ojiŋak itwa hidye ta akol hidye ati odok to obo ekoi on obeŋi odohitarik, ara inyi olohoho.
\v 2 Ati ol ojiŋu’to ta akol hidye inyi monye hidye.
\v 3 Aŋahi adi eyyahani akol jihonyi. Iruhi akyoro eloŋo honyi bwo ahaco inyi akyoro honyi ta afureta hosi ette inyi ’yaharu isi.
\v 4 Al irribu inyi nedye honyi totwa, ikyomoro inyi to osyere hosi bwo akyoro ette jifaru inyi nyo omijani isi etuk honyi.
\v 5 Obeŋi isi ijifarai atamononi ati ofuhoi isi addi jihonyi nyo obeŋi isi omijani etuk tamononi.
\p
\v 6 Iramak Yesu isi arryamara ana ati obeŋi isi itaniŋuni erre hunia.
\v 7 Ojo Yesu jihosi, Ekyana ni jihatai ahode ahode, ani akol kyoro.
\v 8 Hul ofwonni’to ahosyere hoŋ arai ahahalak ati obeŋi akyoro itaniŋye jihosi.
\v 9 Ani akol. Ol ojiŋu’to totoloŋ italahuni adi. Ojiŋak ati inyi itwa bwo ojiŋuta addi irumaniere amaji ŋiyo.
\v 10 Ottu ahahalani ihoholyere bwo ittohyere iko itarrohojyere. Attu ni jo oŋida isi owoni iko nesu en ifut bwo nemuniti daŋ.
\p
\v 11 Ani leyyahani ol oyyu. Isyo leyyahani ol oyyu nesu honyi ta akyoro honyi.
\v 12 Ati lemahani ol obeŋ ara aheyyahani ol obeŋ bu ara amonye kyoro igonyu elemye attu bwo inyi idehi akyoro ette fuho attati elemye honyaru bwo fe itisarraru akyoro.
\v 13 Ofuho lemahani nyo odumai inyi bwo fe obeŋ bu inyi igigilo ta akyoro.
\v 14 Ani leyyahani ol oyyu. Amijak bu ni akyoro hoŋ, bwo fe isi omijani nani.
\v 15 Ihwa on omijaniere Monyoŋ nani, bwo fe ni amijak Monyoŋ, esyo bwo fe ni nesu hoŋ ta nakyoro hoŋ.
\v 16 Owoni bu omuk akyoro hoŋ huno hobeŋi ottubanie libore ana. Oŋida osuduhanie isi daŋ jihoŋ bwo itayirye adi isi netuk hoŋ, oŋida ara abore abotye iko leyyahani abotye.
\v 17 Inyi ana on omunori Monyoŋ ani nyo esyarak ni nesu hoŋ jo oŋida ani enyyak inyyahuna.
\v 18 Obeŋ obo ohororo nesu addi jihoŋ. Esyo ni ta awahan hoŋ. Owon adwaran jihoŋ isyoryere bwo inyyahuniere. Efwotu ni adwaran ana jyo Monyoŋ.
\p
\v 19 Te ekyanita huna owon abwanya inyyak ihiji wati Yudea.
\v 20 Ojori omuk arryai, Isita inyi bwo fe owon iko ajok on orroho’to. Nyo itaniŋyete tai jihonyi?
\v 21 Hul omuk ojori, Obyaŋara nekyanita huno ajok huna. Oremehini ajohin iŋa oŋite aŋodok?
\v 22 Tania owon nya oloŋ ono eyom an ajaharik aji imojit eneittok imiji Yerusalem.
\v 23 Ara nya ahameyu. Adaha Yesu idafata haji imojit eneittok.
\v 24 Tania ikoloni Yudea daŋ inyi bwo ifiye inyi, Many baya iwak iye itawojo hohoi dini? Iramak hohoi kuyya ira iye Kristo.
\v 25 Itarraŋ Yesu jihosi ojo, Eramak dwo ni itai bwo ibyaŋata tai iruhoto. Ehanita hun ehanio ni ta afure Monyoŋ itamijaniere ani.
\v 26 Ati ibyaŋata tai iruhoto nyo ibyaŋata tai irata akyoro hoŋ.
\v 27 Itaniŋye akyoro hoŋ ekyana hoŋ bwo amijak ni isi bwo isi ette ijifuno ani.
\v 28 Esyo ni jihosi nesu on osyo’to fur bwo obeŋi adi oyei jyo ’tuŋ. Obeŋ obo atulo ohoru isi to hani hoŋ.
\v 29 Monyoŋ al isyarak’to isi jihoŋ ogol inyi agalik daŋ bwo fe obeŋ tulo ohoru isi to hani Monyoŋ.
\v 30 Ani iko Monyoŋ era hohoi abotye.
\p
\v 31 Inyyahi Yudea huruna amorwoi irwoŋyere inyi. Ojo Yesu jihosi,
\v 32 Etahutak ni itai ehanita arryai hun oyiji huno Monyoŋ. Ta anani ehani iwahata tai irwoŋyo ani?
\v 33 Itarraŋi Yudea jihonyi ojo, Ebeŋ hohoi iye erwoŋyo te ehanita hun oyiji, ati te emorit nyo ira iye atulo ati ijo iye jo, ira iye Hollum.
\v 34 Itarraŋ Yesu jihosi, Obeŋi igyoroni ifahita hatai, “Ojo Hollum, Irata tai ajohin”?
\v 35 Emijak hohoi jo arai nekyanita huno Hollum ahode, bwo iloŋo inyi hya hul ifwotuni ekyanita ajohin.
\v 36 Ati onyimu Monye ani ette ifahuna ani ifau. Tania aŋai ijatta tai jo amoryo ni al ajo ni jo ani Lonyi Hollum?
\v 37 Al abeŋ ni ehanio nehanita huno Monyoŋ, heruhoto ani.
\v 38 Ati kuyya ehanio ni isi dwadi ibyaŋata tai ani iruhoto, iruhoto ehanita jo oŋida ifwanna tai mijana bwo fe iduloti etaniŋuta jo, owon Monye itwa hoŋ bwo fe ni itwa Monyoŋ.
\p
\v 39 Tania ojori isi enyyak iniafaru inyi ati iris inyi addi to has hosi.
\p
\v 40 Ette inyi leten ’laŋan aari Yordano tole jyo amaji inya ibatisyere Yoane ahosyere. Ette inyi itoŋo dia.
\v 41 Ofwonni laati arryai jihonyi ette jaran, Obeŋ nya bu nyi Yoane ihan obo etamijani. Ati erre daŋ hunya ikyana inyi ta atulo olo, obisi.
\v 42 Teyya ette aati arryai iruk jihonyi.
\c 11
\cl Angati 11
\p
\v 1 Ihwania oŋwai obo atulo al ifurani Lasaro. Inyi olo Betania amiji ono ba Maria iko hanionyi Marta.
\v 2 Inyi Maria inya iyal’to Hobu Yesu te eyali bwo ifufus ejek honyi to ofir. Illanyi Lasaro ol oŋwai’to.
\v 3 Ifahini haniarak honyi neram jyo Yesu ojori, Hobu imijye, lya al imuno iye, lioŋwai.
\v 4 Itaniŋu Yesu eram ana ojo inyi, Obeŋ adi bu nyi naŋwai ottoho inyi, ati itahuye adi Lonyi Hollum tenyi.
\v 5 Ihwania omuno Yesu Marta iko hanionyi bwo Lasaro.
\v 6 To ninya itaniŋu inyi jo oŋwai Lasaro arasa inyi oŋitek arrihai jyo amaji ninya awanari inyi.
\p
\v 7 Ihalu ana ojo inyi jyo leyiyanak honyi, Hafata hacahati Yudea.
\v 8 Ojori leyiyanak honyi, Hettiyanani, hetehi iye Yudea jaran ettoho, bwo fe inyyak iye caharu dia?
\v 9 Ojo Yesu, Obeŋi asahyen arai ’tomon harrihai hutto fanni? Kuyya adaha obo atulo ta afanni obeŋ adi ikosoro, nyo igonyu inyi nafaŋan ono afau.
\v 10 Ati al adaha obo ta attari ikosoro inyi, nyo obeŋ afaŋan jihonyi.
\p
\v 11 Ojo inyi erre huna bwo lihalu ojo, Lasaro orryahat hohoi lyo ojoto. Halo ni itahenyuna inyi.
\v 12 Itarraŋi leyiyanak honyi ojori, Hobu, kuyya ojoto inyi ohenyu adi yo.
\v 13 Ihwania ikyana Yesu ta aye honyi ati igigiloi isi jo ikyana inyi eram joto ahode.
\v 14 Tania iramak inyi isi, Aye Lasaro.
\v 15 Bwo fe nyo te eram hatai amuno ni ta abyaŋan hoŋ teyya jo oŋida itai iruhoto. Ifwanna efwo jihonyi.
\v 16 Tania Tomaso, al ifurani aturoti ikyana jyo leyiyanak, Hafata bwo fe oŋida efwo ye ikonyi.
\p
\v 17 Lafany Yesu orumak inyi Lasaro anuha itwa ilume oŋitek aŋwan.
\v 18 Ilyaha nya Betania Yerusalem.
\v 19 Tania aati arryai hulo Yudea ofwoi itwari jyo Marta iko Maria ta aye illa hosi.
\v 20 Al itaniŋu Marta jo attu Yesu ette inyi leten irwaŋaniere ikonyi. Ati arasa Maria itoŋo itwa haji.
\v 21 Ojo Marta jyo Yesu, Hobu iwon ŋole iye dini, obeŋ ŋole bu nyi illaŋ oye.
\v 22 Ati ihwania amijak ni to obo ariŋ an ifiyo iye jyo Hollum, isyo Hollum jihoi
\v 23 Ojo Yesu jihonyi, Ibuhu adi illa hoi.
\v 24 Itarraŋ Marta ojo, Amijak ni jo ibuhu adi inyi iholoŋ isidi fau an ibuhunierek aati.
\v 25 Ojo Yesu, Ani nebuhuna iko nesu. Alya al iruk’to jihoŋ dwadi oye inyi, isu adi.
\v 26 Bwo al isu’to iruk jihoŋ obeŋ adi oye. Iruk iye ana?
\v 27 Ojo Marta, Afe Hobu, eruk nya ni jo iye Kristo Lonyi Hollum al ittu’to ifau.
\p
\v 28 Al ikyana Marta huna olo inyi iloŋuno hanionyi Maria bwo iramak inyi hama ojo, Afany ettiyanani bwo iloŋo inyi iye.
\v 29 Tania itaniŋu Maria odyoto inyi kwak ette leten jihonyi.
\v 30 Nyo hobeŋ Yesu afany itwa miji, harasa inyi jyo amaji odwo orwaŋanierek Marta ikonyi.
\v 31 Ati Yudea hyodwo owoni’to itwari, al igonyuni isi Maria adyoto kwak ette leten, bwo fe isi ette jifaro inyi. Igigiloi isi ojo olo adi inyi ilume iyyori.
\p
\v 32 Al ottu Maria jyo amaji odwo awanari Yesu bwo igonyu inyi, ette inyi kwahino ihejek honyi bwo omojo inyi ojo, Hobu iwon ŋole iye dini obeŋ ŋole illaŋ oye.
\v 33 Al igonyu Yesu inyi oyyo bwo fe Yudea hul iniemunie’to inyi oyyoi ette ataji honyi mijan bebe ta amehino.
\v 34 Ojo inyi, Aja inuhana tai inyi? Itarraŋi isi ojori, Hobu, waŋ imija.
\v 35 Ette Yesu ’yo.
\v 36 Ojori Yudea, Imijyete omuno dwadi Yesu inyi bebe.
\v 37 Ati ojori omuk hulosi, Isyarak nya atulo olo oloŋodo amijo. Tania obeŋ ati inyi oremik itihuna Lasaro to ye?”
\v 38 Tania inyyak ataji Yesu mijan bebe ette leten ilume an ara ahinom on ottuhoni ta amorwo.
\v 39 Ojo Yesu, Itabororo amorwo addi. Ojo Marta hanie hayani jo, Hobu ihwania amuyak nyo owon inyi ilume oŋitek aŋwan.
\v 40 Ojo Yesu jihonyi, Abeŋ dwo ni iye eramak ojo, al iruk iye igonyu adi iye etahwo Hollum?
\v 41 Teyya itaborori isi amorwo addi bwo Yesu ette mijo ahide bwo ojo, Monyoŋ ajo ni jihoi humo nyo itaniŋyo iye jihoŋ.
\v 42 Bwo amijak ni jo itaniŋyo iye jihoŋ oŋitek daŋ. Ati te eram ono eluluŋ wati hul owotyai’to dini ekyana ni ihwania oŋida isi iruhi jo ifahu iye ani.
\v 43 Ihalu honyi ikyana ana, iloŋo inyi on okwat ojo, Lasaro, waŋ addi.
\v 44 Ette ayani ’tuna ol obubunani ahas, ejek, omom iko ahwan honyi daŋ ta aboŋo. Ette Yesu jaran, Ohoto inyi, ijara hetelo.
\p
\v 45 Iruhi hulo Yudea arryai hyodwo ofwonni’to jyo Maria, al igonyuni isi ariŋ an ihanio Yesu.
\v 46 Bwo omuk afwoi jyo Farisei iramaniere ehanita huno Yesu.
\v 47 Attubanie ehumak eleittaha iko Farisei iko aŋotok hirre. Ojori isi, Efwo adi hohoi ihanio anyo? Nyo ihanio atulo olo etamijanita arryai.
\v 48 Al ebeŋ hohoi etik inyi jyo ehanita huna iruhi adi aati daŋ jihonyi. Ofwonni adi aati Roma ilettohori amiji hohoi iko laati hohoi.
\p
\v 49 Ati obo olosi afure honyi Kaifa al ara nya eleittok te eŋa ania ojo jihosi, Ibyaŋata tai imijana obo ariŋ ’tuŋ.
\v 50 Ibyaŋata tai igigiloti jo oyyu dwo aye ono atulo abotye ta aati daŋ agalik etatturyo ono namiji?
\v 51 Obeŋ inyi ikyana ekyanita huna ta ahou honyi, ati nyo ara inyi ehumani ol obolo’to te eŋa ania, ifwotu inyi ekyana ana jyo Hollum ojo, oye adi Yesu ta aati Yudea daŋ.
\v 52 Obeŋ ara ta aati hya hama ati oŋida inyi ottubak eluluŋ duri Hollum hul isarrahini’to.
\v 53 Teyya to oloŋ to nya iwwahai isi aŋai ottohori adi isi inyi.
\p
\v 54 Tania obeŋ Yesu inyyak daha ol oleyo ihiji Yudea ati olo teyya addi ilyaha imur jyo obo amiji an ifurani Eprimo ette rasa dia iko leyiyanak honyi.
\p
\v 55 Tania ilyaha eyom ono Yudea an ifurani Allaŋan ono Anjelo. Ofwoi aati arryai to misihi Yerusalem ihosyere eyom ania ihuhumyere ahwattek hosi.
\v 56 Odulori isi attifya Yesu bwo fe ikikyanai ta ahwattek hosi hetoŋoi isi ihaji imojit eneittok ojori, Igigiloti tai jo ottu adi inyi iyom?
\v 57 Ihwania eleittaha iko Farisei ifahini eram ojori, Al omijak obo owon inyi aja oŋida iramak jihohoi inefuniere inyi.
\c 12
\cl Angati 12
\p
\v 1 Ihwania ottu Yesu Betania, imiji ba Lasaro linya itubuhu Yesu to ye. Arasai nya oŋitek ille ihosyere iyom ono Allaŋan Anjelo.
\v 2 Tania isyori aŋiyo jihosi bwo igyama Marta aŋiyo ania. Oŋiyo bwo fe Lasaro ikosi iteremeja.
\v 3 Tania iduhu Maria eyali on ogol enyyaŋa honyi bebe on okemye ta arotol abotye. Ijuhok inyi ihejek Yesu bwo ifufus to ofir honyi. Teyya oŋwo aji bebe arya.
\p
\v 4 Ati ojo Yuda Iskariote, leyiyanani ol ottu adi itinyyaŋana Yesu,
\v 5 ojo, Nyo obeŋi itinyyaŋani arya ana ta arobia esiha arrihai bwo olwahyerek alocaŋak?
\v 6 Obeŋ bu inyi igigilo ta alocaŋak te ekyana honyi ania ati ara inyi olohoho bwo ara inyi ahattunani gurusi. Bwo fe al isyori jihonyi agurusi iyatta inyi omuk.
\v 7 Tania ojo Yesu jihonyi, Obusana inyi. Ijuhok inyi ana ihuhumaniere ani ta anuhana.
\v 8 Iwatta tai iko alocaŋak oŋitek daŋ ati abeŋ adi ni etoŋo ikatai fur.
\p
\v 9 Al omijani aati Yudea jo Yesu adia ette isi fwanna. Ati obyaŋara ta Yesu hama ati ofwonni isi imijyere Lasaro linya itubuhu inyi to ye.
\v 10 Bwo iwwahai eleittaha ojori, Ottohoro bwo fe Lasaro.
\v 11 Nyo ara te eram honyi an iharik aati hohoi bwo itterye iruk jyo Yesu.
\p
\v 12 Nya motye itaniŋuni eluluŋ wati arryai hun ofwonni’to iyom ono Allaŋan Anjelo, jo ottu Yesu Yerusalem.
\v 13 Ette isi yafa atanata ’yanio bwo ofwoi irraŋyere inyi, iwuwoŋitai ojori, Itahabuyete Hollum. Hotomunoi lya ol ottu’to ta afure ono Hobu ara dwo bu Hobu olo Israele.
\v 14 Teyya orumak Yesu asigirya ette itoŋo ihide honyi ihwa igyoroni nya;
\v 15 “Hebaŋ ŋarri Sion. Imijye Hobu hoi al attu Itoŋo ihorwoŋ ŋarri sigirya.”
\p
\v 16 Ihwania obeŋi leyiyanak honyi itaniŋuni erre hunia ati al itubuhuni Yesu ogiluni isi jo igyoroni nyadi erre huna tenyi, bwo fe ihanie isi ihwa igyoroni nya tenyi.
\p
\v 17 Bwo fe eluluŋ wati hunya owoni’to ikonyi iholoŋ ninya iloŋori inyi Lasaro t’elume, bwo fe itubuhu inyi to ye, iramye isi etamijanita.
\v 18 Te eram tana ofwonni laati ’raŋuno inyi nyo itaniŋuni isi etamijani an ihanio inyi.
\v 19 Tania ojori Farisei ta ahwattek hosi, Imijyete, ebeŋ hohoi eremik ihanio obo ariŋ. Ijifatye laati daŋ inyi.
\p
\v 20 Ihwania owoni dia omuk hulo Grik hul ofwonni imojo neyom ono Allaŋan Anjelo.
\v 21 Ofwonni hya jyo Filipo olo Beteseda amiji Galilea, ifiyere inyi ojori, Leittok, ewak hohoi mijo Yesu.
\v 22 Olo Filipo ette iramana Andrea ette isi fwatan iramaniere Yesu.
\v 23 Itarraŋ Yesu ojo, Attu oloŋ an itahuyerek Lonyi tulo.
\v 24 Ahode eramak ni itai ojo, Al obeŋ emai odohi ifau bwo fe obeŋ ifodura arasa inyi ta ahwan honyi hama ati al ifodura inyi oŋerik adi aŋer arryai.
\v 25 Ol omuno’to nesu honyi italitohi adi inyi. Bwo alya ol obeŋ’to igigilo ta nesu ono afau ana ottunak adi ononyi ta nesu on osyo’to fur.
\v 26 Al awak obo atulo igyama toni oŋida odulo ijifatyo ani bwo fe jyo amaji an awanari ni oŋida egyamani hoŋ owon dia bwo fe. Al igyama obo atulo toni itahabuyo adi Monye inyi.
\p
\v 27 Ihwania odyaha ataji hoŋ. Anyo adi ajo ni? Monyoŋ itahoru ani ta asaa ana. Ati te eram ana attu ni jyo asaa ana.
\v 28 Monyoŋ, ijara afure hoi itakwace. Teyya ottu nekyana t’edou on ojo, Etahwo nya ni afure hoŋ bwo ihalu enyyak adi ni itahwo inyi.
\v 29 Tania eluluŋ wati hul owoni’to dia itaniŋuni bwo ojori, Etitta hide ania. Ati ojori omuk, Ikyana anjelo jihonyi.
\v 30 Itarraŋ Yesu ojo, Obyaŋara ekyana ania te eram hoŋ ati ara ta arami hatai.
\v 31 Ihwania ara aŋoco ono afau ana bwo ifuhari adi hobu olo afau ana.
\v 32 Bwo al akafani ani to fau, arihu adi ni aati daŋ jihoŋ.
\v 33 Ojo inyi ana itahutaniere jo aŋai oye adi inyi.
\p
\v 34 Tania itarraŋi aati ojori, Etaniŋu hohoi te efahita jo amanya adi Kristo tulaŋ, anyo an ijo iye jo akafarai adi Lonyi tulo ngai Lonyi tulo alya?
\v 35 Ojo Yesu jihosi, Harasa afaŋan ihiji hatai. Adahati hewatta tai ifaŋan ŋadi edumele itai etihok. Alya al adaha’to idumele obeŋ omijak aja olo inyi.
\v 36 Hewatta tai iko afaŋan iruhoto afaŋan jo oŋida irata tai lonyirok faŋan. Ihalu ekyanita huna olo Yesu addi jihosi idimari.
\v 37 Ati ara dwo bu ihanio inyi etamijanita arryai lihomomite hosi arasai isi byaŋan iruk jihonyi.
\v 38 Oŋida itasiruni ekyana ono eyani sayyo Isaya on ojo, “Hobu, haŋai iruhi ekyanita hohoi? Bwo fe jyo ŋai itahutani adwaran ono Hobu?”
\v 39 Tania obeŋi isi iruhi nyo ojo Isaya bwo fe ojo,
\v 40 “Itaŋodo Hollum oŋite hosi Bwo itagol atajya hosi, Oŋida obeŋi igonyuni to oŋite hosi Bwo fe obeŋi itaniŋuni ta ayyaha hosi, Ette caha jihoŋ itaŋidaryere isi.”
\p
\v 41 Ikyana Isaya ekyanita huna nyo igonyu inyi etahwo Yesu ette ikyana tenyi.
\p
\v 42 Ara dwo bu te erre hunia iruhi eleittaha arryai jihonyi, ati obeŋi isi iramani obo atulo nyo abaŋi isi Farisei nyo ŋadi isi ifuhari to haji imojit addi.
\v 43 Nyo omunoi isi etahabuyo wati isi agalik etahabuyo ono Hollum.
\p
\v 44 Ihwania ikyana Yesu on okwat ojo, Alya al iruk’to jihoŋ obeŋ iruk jihoŋ hama, ati iruk jyo lya al ifahu’to ani.
\v 45 Bwo fe al igonyu’to ani igonyu inyi bwo fe lya al ifahu’to ani.
\v 46 Attu ni ifau ihwa afaŋan jo oŋida obo al iruk’to jihoŋ obeŋ arasa idumele.
\p
\v 47 Ati al itaniŋyo’to ekyanita hoŋ bwo fe obeŋ ifaha isi abeŋ ni aŋot inyi. Nyo abeŋ ni attu iŋocere aati ati italahuniere isi.
\v 48 Alya al iha’to ani bwo fe obeŋ ifwotu ekyanita hoŋ owon inyi iko aŋotoni, inyi nekyana en ekyana ni on oŋot adi inyi iholoŋ isidi fau.
\v 49 Nyo abeŋ ni ekyana ta awahan hoŋ ati Monyoŋ ta ahwan honyi al ifahu’to ani isyarak ani efahi iko ekyanita ikyanari.
\v 50 Bwo fe amijak ni jo ekyanita honyi isi nesu on osyo fur. Tania al ekyana ni, ekyana ni ihwa iramak Monyoŋ ani.
\c 13
\cl Angati 13
\p
\v 1 Ihwania hobeŋi itterye eyom ono Allaŋan Anjelo, omijak Yesu jo ilyaha noloŋ an adahari inyi jyo Monye. Omuno bwo fe inyi laati honyi hul owoni lifau bwo omuno adi inyi isi many lisidi fau.
\v 2 Ihwania, omijak Yesu jo ihanak Sitan itaji Yuda Iskariote lonyi Simone, awahan itinyyaŋaniere inyi jyo lamyorok.
\v 3 Bwo fe omijak Yesu jo isyo nya Monye nerre daŋ lihas honyi, omijak inyi bwo fe jo ottu inyi jyo Hollum bwo fe acaharu adi inyi jyo Hollum.
\v 4 Ninya atuhuno aŋiyo odyoto Yesu to loŋiyere, ifihak aboŋojin honyi, ette iduhuna obo aboŋo efufusi, ette tarana lihuluk.
\v 5 Attati inyi ijuhonia aari isyak ette itteryo illillayo nejek huno leyiyanak ette bwo fe ifufus ejek hosi to nodwo boŋo atarak inyi lihuluk.
\p
\v 6 Afany inyi jyo Simone Petro. Ojo Petro jihonyi ojo, Hobu, iye illilla nejek hoŋ?
\v 7 Itarraŋ Yesu ojo, Hebeŋ iye itaniŋu ariŋ en ehanio ni ati ittu adi iye mijana lihalu.
\v 8 Ojo Petro jihonyi, Ibeŋ adi iye illilla nejek hoŋ mak. Itarraŋ Yesu ojo, Al abeŋ ni ellilla nejek hoi, ebeŋ iye ikoŋ etoŋo.
\v 9 Ojo Simone Petro jihonyi ojo, Hobu, hellilla nejek hoŋ hama, illilla bwo fe ahas iko nahou hoŋ.
\v 10 Ojo Yesu jihonyi, Lya al hetek’to huyoro oremik jihonyi ellillayo hejek honyi hama bwo olibo inyi daŋ. Iliboroto tai, ati ibyaŋata tai iliboroto daŋ.
\v 11 Omijak fe Yesu ŋai alya etinyyaŋani honyi. Ta neram ana ojo inyi, Ibyaŋata tai iliboroto daŋ.
\p
\v 12 Al atuhuno ellillayo hejek hosi ette inyi iyyafana aboŋojin honyi ette caharu limaji loŋiyere attati jaran jihosi, ojo, Imijana tai nodwo riŋ ehanio ni jihatai?
\v 13 Iloŋoti tai nani Ettiyanani bwo fe Hobu. Ittenuna tai nyo ani fe alya.
\v 14 Nani Ettiyanani bwo fe Hobu, ellillayo ni nejek hatai jo oŋida itai bwo fe ifwatta illillayo nejek mottyarak hatai.
\v 15 Esyo ni netamijani, oŋida itai ihaniete ihwa nodwo ehaniere ni.
\v 16 Ahode ahode eramak ni itai obeŋ apit agalik eleittok honyi bwo fe al ifahuni obeŋ agalik al ifahu’to inyi.
\v 17 Al imijana tai erre huna bwo ihaniete isi imunoti adi itai.
\v 18 Abeŋ ni ekyana tetai daŋ. Amijak ni haŋai hul anyimu ni. Ati oŋida itasiruni egyeri on ojo, “Lya ol oŋiyo’to emune hoŋ oryehi ejek honyi ihwan hoŋ.”
\p
\v 19 Ihwania eramak ni itai erre hobeŋi isi ofwonni, jo al idwoŋi isi oŋida itai iruhoto jo ani alya.
\v 20 Ahode ahode eramak ni itai, al ifwotu’to atulo el efak ni ifwotu inyi ani. Bwo fe alya al ifwotu’to ani ifwotu inyi lya al ifahu’to ani.
\p
\v 21 Al ikyana Yesu ihwania ette ataji honyi dyaha bebe. Ojo inyi, Ahode ahode eramak ni itai ojo, obo alatai itinyyaŋak ani.
\v 22 Teyya ilafuhoi leyiyanak ette imimijyo ahwattek hosi ojori, ŋai ’tadi ojo inyi.
\v 23 Oco obo olo leyiyanak jihonyi ol omuno Yesu.
\v 24 Teyya ahahaya Petro jyo lya ojo, Ifya, ikyana inyi to ŋai.
\v 25 Tania oco lya ihwan Yesu bwo ojo jihonyi, Hobu ŋai attadi inyi?
\v 26 Itarraŋ Yesu, Inyi lya al esyo adi ni emune en edutu ni. Tania al idutu inyi emune ette inyi isyo jyo Yuda lonyi Simone Iskariote.
\v 27 Ihalu honyi ifwotuna emune ette Sitan jiŋana jihonyi. Ojo Yesu jihonyi, Ihanie kokwak ariŋ an ijo iye ihanio.
\v 28 Ihwania obeŋ obo itaniŋu anyo ikyana inyi jyo Yuda.
\v 29 Nyo omijani isi attunio Yuda agurusi, tania ojori omuk kuyya iramak Yesu inyi oŋida inyyaŋuno erre ta neyom kuyya bu isyarak jyo alocaŋak.
\v 30 Hefwotu Yuda emune ojiŋu inyi addi. Ara nya attari.
\p
\v 31 Ihalu aleten Yuda, ojo Yesu jo, Itahabuye Lonyi tulo ihwania, bwo itahabuye Hollum tenyi.
\v 32 Itahabuhi adi Hollum inyi ihwan honyi. Itahabu adi inyi ihwania ihwania.
\p
\v 33 Lonyirok hoŋ, ewon adi ni ikatai to omuk oŋitek kai. Ittifyati adi itai ani. Ihwa ajo nya ni jyo Yudea, jo amaji an alari ni ibyaŋata adi itai ifwanna, ajo ni jihatai ihwania bwo fe.
\v 34 Esyo ni jihatai efahi aŋejuk on ojo, Omunoti illarak hatai. Ihwa an amunori ni itai, omunoti bwo fe illarak hatai.
\v 35 Tania omijani adi laati daŋ jo itai leyiyanak hoŋ al imunoti tai illarak hatai.
\p
\v 36 Ifiyo Simone Petro ojo, Aja ilo iye Hobu? Itarraŋ Yesu ojo, Jyo amaji an alari ni ibyaŋata tai iremehina ijifuno ani, ati ijifuniete adi itai ani ihalu.
\v 37 Ojo Petro jihonyi, aŋai abeŋ ni aremik jifaru iye ihwania Hobu? Ajo ni esyarak adi ni nesu hoŋ teye.
\v 38 Itarraŋ Yesu ojo, Ijo iye iwak iye isyarana nesu hoi toni? Ahode ahode eramak ni iye, hobeŋ ahohoro ilok, iha adi iye ani eharita hunihoi.
\c 14
\cl Angati 14
\p
\v 1 Hetebyaŋahi atajya hatai odyahai. Iruhoto tai jyo Hollum, iruhoto bwo fe jihoŋ.
\v 2 Ihaji Monyoŋ owoni amasik arryai. Obeŋ dwo ara ihwania eramak ni itai. Halo ni ihuhumyo amasik tetai.
\v 3 Al alo ni ihuhumyo amasik tetai, acohuno adi ni ifwotuniere itai ta ahwan hoŋ oŋida itoŋoti jyo amaji en etoŋori ni.
\v 4 Bwo fe imijana tai ekoi an alari ni.
\p
\v 5 Ojo Tomaso jihonyi, Ebeŋ hohoi emijak aja ilo iye Hobu. Tania aŋai eremik hohoi rumana ekoi?
\v 6 Itarraŋ Yesu jihonyi ojo, Ani nekoi, bwo nelahode bwo nesu. Obeŋ obo ottu jyo Monyoŋ arari jihoŋ do.
\v 7 Kuyya dwo imijana tai ani, imijana dwo itai Monyoŋ bwo fe. Ati igonyuna tai ahana inyi bwo fe imijana tai inyi tulaŋ.
\p
\v 8 Ojo Filipo, Hobu itahutak hohoi Monye bwo ette adi iremehina to hohoi.
\v 9 Ojo Yesu, Awon ni ikatai oŋitek arryai bwo iye Filipo, ibeŋ iye imijak ani? Alya al igonyu’to ani igonyu Monyoŋ. Aŋai ijo iye, itahutak hohoi Monye?
\v 10 Ibyaŋata tai iruhoto jo awon ni itwa Monyoŋ bwo fe Monyoŋ itwa hoŋ? Nekyanitah un ekyana ni obyaŋara ani ta ahwan hoŋ ekyana ati ara Monyoŋ al itoŋo’to itwa hoŋ ikyana. Inyi igyama egyama honyi.
\v 11 Iruhoto ani jo awon ni itwa Monyoŋ bwo fe Monyoŋ itwa hoŋ. Kuyya iruhoto ani te egyamita hun ehanio ni.
\v 12 Eramak ni itai ahode ahode, jo alya al iyihi’to jihoŋ, ihanio adi inyi egyamita hun egyama ni bwo fe egyamita hun obolori’to agalihini huna igyama adi inyi, nyo alo adi ni jyo Monyoŋ.
\v 13 Erre daŋ hun ifiyete tai ta afure hoŋ ehanio adi ni jo oŋida Monye itahu to Lonyi.
\v 14 Erre daŋ hun ifiyete tai ta afure hoŋ ehanio adi ni.
\p
\v 15 Al imunoti tai ani, igotyete adi itai efahita hoŋ.
\v 16 Bwo amojo adi ni jyo Monyoŋ ette adi inyi isyo jihatai obo alwahani al itoŋo adi ikatai tulaŋ.
\v 17 Inyi Oloyiri olo nelahode. Obeŋ afau oremik mojuna inyi nyo obeŋ afau inyi igonyu bwo obeŋ omijak. Ati imijana tai inyi nyo owon adi inyi ikatai bwo fe itwajin hatai.
\v 18 Abeŋ adi ni itai edehi ihwa ahohyo ati acohuno adi ni jihatai.
\v 19 Harasa kai bwo obeŋ adi afau inyyak igonyuna ani ati igonyuna adi itai ani. Nyo amanya adi ni fur bwo fe itai imanyati.
\v 20 To oloŋ tania imijana adi itai jo awon ni itwa Monyoŋ bwo itai itwa hoŋ bwo ni itwajin hatai.
\v 21 Lya al ifwotu’to efahita hoŋ bwo fe ogotyere isi omuno inyi ani. Bwo ol omuno’to ani, omuno adi inyi Monyoŋ bwo fe amuno adi ni inyi ette ni italeyehina ahwan hoŋ jihonyi.
\p
\v 22 Ojo Yuda (obyaŋara Iskariote), Hobu, aŋai adi italeyehi iye ahwan hoi jihohoi bwo obeŋ jyo aati omuk?
\v 23 Itarraŋ Yesu ojo, Al omuno obo ani ogotyere inyi nekyanita hoŋ, ette Monyoŋ muno inyi ette hohoi fwan manya jihonyi.
\v 24 Ol obeŋ’to omuno ani obeŋ bu inyi ogotyere nekyanita hoŋ, ati nekyanita hun itaniŋuna tai obeŋi bu isi arai ahunoŋ ati arai ahuno Monyoŋ linya ifahu’to ani.
\v 25 Hodwo hirre ekyana ni jihatai hamanya ni ikatai.
\v 26 Ati Etalwahani, inyi Oloyiri ol Olibo al ifahu adi Monyoŋ ta afure hoŋ, inyi adi fe ottu ittiyenio itai nerre daŋ bwo itagiluta adi itai erre daŋ hunya ekyana ni jihatai.
\v 27 Abusak ni jihatai nelik tajya. Esyo ni jihatai nelik hoŋ. Abeŋ bu ni esyo nelik tajya jihatai ihwa an isyoryerek aati. Hetebyaŋahi atajya hatai odyahai bwo fe helahahi apapaŋi.
\p
\v 28 Itayiruna tai nodwo hiram ekyana ni jihatai jojo, Alo ni bwo fe acohuno adi ni jihatai. Al imunoti tai ani imunoti adi itai nyo alo ni jyo Monyoŋ, bwo agalik Monyoŋ ani.
\v 29 Eramak ni itai eram ana hobeŋ ottu jo oŋida iruhoto tai lattu idwoŋ.
\v 30 Abeŋ adi ni ekyana omuk erre jihatai arryai, nyo lobu olo afau ana lyo hottu ati obeŋ adwaran honyi agalik ani.
\v 31 Oŋida ati aati omijani jo, amuno ni Monyoŋ bwo fe ehanio ni ihwa ninya ifahuniere Monyoŋ ani. Ottena, hafatta.
\c 15
\cl Angati 15
\p
\v 1 Ani ajalaŋi ahode bwo Monyoŋ ahedulani ajalaŋi.
\v 2 Isisalutta inyi atanata hoŋ omuk hun obeŋi’to oŋiji bwo oŋututta inyi atanata daŋ hun oŋiji’to jo oŋida inyyahi ŋijuna arryai.
\v 3 Ihwania iliboroto tai te ekyana en ekyana ni jihatai.
\v 4 Ogolihina jihoŋ bwo fe ni agolik jihatai. Ihwa obeŋ atanati ajalaŋi oremik ŋijuna aŋer honyi hama bwo obeŋ iryata ilajalaŋi obeŋ obo alatai oremik ŋijuna aŋer many igolihiniete tai jihoŋ.
\p
\v 5 Ani ajalaŋi, bwo itai atanata. Ol ogolik’to jihoŋ bwo ni jihonyi oŋiju inyi aŋer arryai. Nyo al ilamajata tai jihoŋ ibyaŋata tai iremehina ihanio obo ariŋ.
\v 6 Al obeŋ obo ogolik jihoŋ irwoŋoro inyi alet ihwa atanati iyohojori. Atanata hunia aharanyuni isi ette irwoŋonia ihima iswahiniere.
\v 7 Al igolihina tai jihoŋ bwo ekyanita hoŋ ogolihini jihatai, ifiyete anyo iwahata tai bwo inyurana adi itai.
\v 8 Ta aŋijuna haŋer iko aratan aheyiyanak hoŋ itahabuyete tai Monyoŋ.
\p
\v 9 Ihwa omuno Monyoŋ ani bwo fe amuno ni itai, ogolihina limuno hoŋ.
\v 10 Al igotyete tai efahita hoŋ igolihina adi itai imuno hoŋ ihwa en efahari ni efahita Monyoŋ bwo fe agolik ni imuno honyi.
\v 11 Eramak ni itai erre huna jo oŋida amuno hoŋ arasa jihatai bwo fe oŋida amuno hatai ifut.
\v 12 Efahi hoŋ ana, omunoti illarak hatai ihwa an amunori ni itai.
\v 13 Obeŋ obo atulo oremik itahutana amuno agalik ana jo oye inyi imaji illarak honyi.
\v 14 Itai illarak hoŋ al ihaniete tai ariŋ en efak ni itai.
\v 15 Abeŋ adi ni eloŋo itai apiti nyo obeŋ apit omijak anyo ihanio eleittok honyi ati eloŋo ni itai illarak nyo etahutak ni jihatai erre daŋ hunya ettiyenu ni jyo Monyoŋ.
\v 16 Ibyaŋata tai inyimuna ani ati anyimu ni itai ette ifahina itai jo oŋida ifwatta tai ŋijuna aŋer. Bwo fe oŋida aŋer hatai arasahinie bwo fe te erre daŋ hun ifiyete tai jyo Monyoŋ ta afure hoŋ isyo adi inyi jihatai.
\v 17 Efahi hoŋ ana, omunoti illarak hatai.
\p
\v 18 Al oliwarik omuk aati itai ogiluna jo oliwarik isi ani ahosyere.
\v 19 Irata dwo itai ahulo afau ana omunoi dwo aati hulo itai ihwa illarak hosi, ati ibyaŋata tai irata hulo afau ana nyo anyimu ni itai jyo afau ana, inyi on oliwarik aati itai.
\v 20 Ogotyete erre hun eramak ni itai, obeŋ lapit agalik eleittok honyi. Al ittigemye isi ani ittigemye adi bwo fe isi itai. Kuyya ogotyerek isi ekyana hoŋ, ogotyerek adi bwo fe isi nekyana hatai.
\v 21 Ihanie adi isi erre hunia daŋ jihatai ta afure hoŋ nyo obeŋi isi omijani lya al ifahu’to ani.
\v 22 Hara dwo abeŋ ni attu ikyana jihosi obeŋi dwo oŋoti eyyata jihosi. Ati ihwania obeŋi elyeti jihosi te eyyata hosi.
\v 23 Ol oliwari’to ani oliwari inyi Monyoŋ bwo fe.
\v 24 Hara dwo abeŋ ni ehanio egyamita hun hobeŋ tulo igyama ihiji hosi obeŋi dwo oŋoti eyyata hosi. Ati ihwania igonyuni isi, bwo fe oliwarik ani iko Monyoŋ.
\v 25 Ihwania itasiruni ekyana ninya igyoroni ifahita hosi ojo, “Oswarik isi ani oboijai.”
\p
\v 26 Ottu adi Etalwahani, inyi Oloyiri olo nelahode ol odetuno’to jyo Monye. Efak adi ni inyi jihatai bwo inyi ahetamijanani hoŋ.
\v 27 Bwo fe irata adi itai etamijanak hoŋ nyo ewon nya itai ikoŋ many t’etteri.
\c 16
\cl Angati 16
\p
\v 1 Ekyana dwo ni nerre huna jo oŋida ibyaŋata tai ipalata addi.
\v 2 Ifuhari adi isi itai to hasik imojiti bwo teyya ette noloŋ ’tuna an igigilorik lattok hatai jo egyama isi jyo Hollum.
\v 3 Ihanie adi isi jihatai ihwania, nyo obeŋi isi omijani Monye, obeŋi bu omijani nani.
\v 4 Hodwo hirre ekyana ni jihatai oŋida al attu noloŋ hosi igiluna tai jo eramak nya ni jihatai. Abeŋ nya ni ekyana erre huna jihatai ahosyere nyo awon nya ni ikatai.
\p
\v 5 Ihwania alo ni jyo lya al ifahu’to nani, obeŋ ati lobo alatai ifiyo nani jo, Aja ilo iye?
\v 6 Bwo fe ijiriŋati tai bebe nyo ekyana ni jihatai neram ana.
\v 7 Ati eramak ni itai ahode, oyyu jihatai luŋa jo oŋida ani alo addi. Al abeŋ ni alo, obeŋ adi Etalwahani ottu jihatai. Al alo ni efahu adi ni inyi jihatai.
\v 8 Al attu inyi ituruk adi inyi laati ta neram ono neyyauna, iko ono nalibori ojo bwo fe naŋoco hiram.
\v 9 Ituruk inyi isi te eram ono neyyauna nyo obeŋi nya isi iruhi nani;
\v 10 te neram ono nalibori nyo alo ni jyo Monye, ittata byaŋan igonyuna nani;
\v 11 ta aŋoco hiram nyo laŋoti neram ono hobu olo afau ana.
\p
\v 12 Holwaji nerre hun awak ni ikyana jihatai ati ittallihoto tai itaniŋuna isi ahana.
\v 13 Ati al attu Oloyiri alya olo nelahode, ittiyenio adi inyi itai nerre daŋ hun arai ahode, nyo obeŋ adi inyi ikyana ta ahwan honyi hama, ati ikyana adi inyi jihatai nerre hun itayiru inyi bwo fe iramak adi inyi jihatai nerre hun ofwonni adi lihalu.
\v 14 Itahuyo adi inyi ani nyo omoju adi inyi nekyanita hoŋ ette iramana jihatai.
\v 15 Erre daŋ hun owoni jyo Monyoŋ arai ahunoŋ. Tania ajo ni jo iyaro adi inyi hunoŋ ette itahutana jihatai.
\p
\v 16 Harasa kai ittata byaŋan igonyuna nani. Ojo gaa, ittata igonyuna ani.
\v 17 Tania ikikyanai omuk leyiyanak honyi ojori, Anyo hiram an ikyana inyi ojo, Harasa kai ittata byaŋan igonyuna nani, ojo gaa, ittata igonyuna nani, bwo fe alo ni jyo Monye?
\v 18 Arasai isi ittittifa anyo nekyana ana an ikyana inyi ojo, Gaa. Ebeŋ hohoi etaniŋu neram an ikyana inyi.
\p
\v 19 Omijak ati Yesu jo, awahi isi ifiyo neram jihonyi, ette inyi jaran jihosi ojo, Herasati tai ittittifa awoyo ono ekyana hoŋ jo, Harasa kai ittata byaŋan igonyuna nani, ojo gaa, ittata igonyuna nani?
\v 20 Ahode ahode ajo ni jihatai, Iyyoti adi itai bwo fe iyihitati, ati laati asai omunoi adi. Ijiriŋati adi itai, ati ottu adi nejiriŋa hatai rahan amuno.
\v 21 Iburaŋatyo aŋotte nyo attu asaa honyi an isyori inyi eito ati al isiu inyi ogworo inyi adyaha ta amuno nyo isiu inyi eito ifau.
\v 22 Ati ihwania ijiriŋati tai, ati attu adi ni itai mijo attati atajya hatai muno, bwo obeŋ obo atulo ohororo amuno hatai jihatai.
\v 23 Ati jyo oloŋ ania ibyaŋata adi itai ifiyete ani omuk erre. Eramak ni itai ahode ahode erre daŋ hun ifiyete tai jyo Monyoŋ ta afure hoŋ isyo adi inyi jihatai.
\v 24 Many iko ahana ibyaŋata tai ifiyete obo ariŋ ta afure hoŋ. Ifiyete bwo isyori adi jihatai jo oŋida amuno hatai ifut.
\p
\v 25 Hodwo hirre ekyana ni jihatai ta narryamara. Ottu ati noloŋ an abyaŋari adi ni enyyak ikyanari jihatai ta narryamara, ati ekyana adi ni ahode nerre Monyoŋ.
\v 26 To oloŋ ania ifiyete adi itai erre ta afure hoŋ, ati abeŋ ni ajo jihatai jo amojo adi ni jyo Monyoŋ tetai.
\v 27 Nyo omuno bu Monyoŋ itai, nyo itai imunoti nani bwo fe iruhoto tai jo adyetuno ni jyo Monyoŋ.
\v 28 Adyetuno nya ni jyo Monyoŋ ette ’tuna lifau, ati edyaharo adi ni afau ette caharu jyo Monyoŋ.
\p
\v 29 Ojori leyiyanak jihonyi jo, Ikeja, ikyana iye ihwania ekyana on oleyo, obyaŋara ta arryamara.
\v 30 Ihwania emijak hohoi jo imijak iye erre daŋ, ati ibeŋ iye ittifya obo atulo ifiyere iye to omuk erre. Tania eruk hohoi jo idyetuno iye jyo Hollum.
\p
\v 31 Ojo Yesu, Iruhoto tai ihwania?
\v 32 Imijyete, ihuhutu asaa, ilyaha ihwania an itisarrahini adi itai ababo ihasik hatai, ittata tai ani idyaharo hama. Ati abeŋ adi ni etoŋo abotye nyo awon ni iko Monye.
\v 33 Ajo ni jihatai erre huna jo iwanata adi itai iko nelik tajya toni. Lifau ana inyurana adi itai ettigemyo, ati itagoloto atajya hatai nyo agalik ni erre hutta fau.
\c 17
\cl Angati 17
\p
\v 1 Ihalu erre huna ibonno Yesu ahide ette jaran, Monyoŋ attu asaa. Itahwo ani Lonyi hoi jo oŋida Lonyi hoi itahu iye.
\v 2 Nyo isyo nya iye jihoŋ nelaballok igalihiniere aati daŋ bwo fe isyoryere aati hul isyo iye jihoŋ nesu on osyo fur.
\v 3 Nesu on osyo fur ana, amijana iye, jo iye abotye Hollum ahode iko Yesu Kristo al ifahu iye.
\v 4 Etahuyo ni iye ifau. Atuhok ni egyama ninya isyo iye ani ihaniere.
\v 5 Ihwania Monyoŋ etahu ani ta ahwan hoi te etahwo ninya owon’to jihoi ikoŋ hobeŋ afau.
\p
\v 6 Etamijanak ni afure hoi jyo laati hul isyo iye jihoŋ to fau. Arai nya isi hulohoi ette iye isyo isi jihoŋ attati isi gotyere ekyana hoi.
\v 7 Omijani isi ihwania jo erre daŋ hun isyo iye jihoŋ ofwonni jihoi.
\v 8 Nyo esyo ni isi ekyanita hun isyoryo iye jihoŋ. Omojuni isi ekyanita ette isi mijana ahode jo attu ni jihoi bwo fe iruhi isi jo ifahu iye ani.
\v 9 Amojo ni tesi, abeŋ ni amojo ta aati daŋ ati amojo ni ta hul isyo iye ani nyo arai isi ahulohoi.
\v 10 Erre hoŋ daŋ arai ahunohoi. Bwo hunohoi daŋ arai ahunoŋ. Bwo fe oleyo akwatan hoŋ tesi.
\v 11 Abeŋ ni ihwania enyyak wanan ifau, ati arasai hulo ifau bwo alo ni jihoi. Monyoŋ ol olibo, ogotyere ta afure hoi hul isyo iye ani, jo oŋida isi inosoi abotye ihwa en enosori hohoi abotye.
\v 12 Inya awanari ni ikosi agotyere ni isi ta agolon fure hoi inya isyo iye jihoŋ. Errirrya ni isi ette obo ilak litohina arari lya al atuhuno ahode, jo oŋida ekyanita Hollum hunya igyoroni igyerita itasiruni.
\p
\v 13 Ati ihwania alo ni jihoi. Ekyana ni erre huna bwo fe harasa ni ifau, jo oŋida isi owoni iko amuno hoŋ an ifut ihwattek hosi.
\v 14 Esyo ni jihosi ekyanita hoi ette aati hutta fau liwari isi nyo obeŋi isi arai ahulo afau, ihwa an abyaŋari ni arari olo afau.
\v 15 Abeŋ ni efiyo ojo oŋida iye iya isi to fau addi ati jo oŋida irrirrya iye isi jo olorrohox.
\v 16 Obeŋi isi arai ahulo afau ihwa an abyaŋari ni arari olo afau.
\v 17 Ittaŋu isi jyo nelahode. Ara ekyana hoi nelahode.
\v 18 Ihwa an ifahuniere iye ani ifau ihwania efak bwo fe ni isi jyo aati hutta fau.
\v 19 Esyo ni ahwan hoŋ jihoi tesi jo oŋida isi arai ahulohoi ahode.
\p
\v 20 Abeŋ ni amojo tesi hama ati to hya bwo fe hul iruhi’to jihoŋ te ekyana hosi.
\v 21 Oŋida isi inosoi arabotye. Monyoŋ ihwa an iwanari iye itwa hoŋ bwo fe ni itwa hoi jo oŋida isi enoso ikohoi, ette aati iruk daŋ jo ifahu iye ani.
\v 22 Ati etahwo inya isyo iye jihoŋ esyo ni jihosi jo oŋida isi inosoi arabotye ihwa an ewanari hohoi.
\v 23 Awon ni itwajin hosi bwo iye itwa hoŋ jo oŋida isi inosoi arabotye, oŋida aati hutta fau omijani efahuna hoi ani bwo imuno iye isi ihwa an imunori iye ani.
\p
\v 24 Monye awak ni hul isyo iye ani oŋida etoŋo ikoŋ jyo obo amaji an alari ni, jo oŋida isi igonyuni etahwo hoŋ an isyo iye ani nyo imuno nya iye ani t’etteri fau.
\p
\v 25 Monye ol olibo, obeŋi dwadi bu aati omijani iye, ati amijak ni iye, bwo omijani hulo jo ifahu nya iye ani.
\v 26 Etaleyehi ni afure hoi jihosi bwo enyyak adi ni italeyehina jo oŋida amuno an imunori iye ani owon jihosi bwo fe ni itajya hosi.
\c 18
\cl Angati 18
\p
\v 1 Ihalu ikyana Yesu ekyanita huna ofwoi inyi iko leyiyanak honyi lifohor lowore Kedro tolya. Owon dia nobo najasyore, ette inyi jiŋana dia iko leyiyanak honyi.
\p
\v 2 Omijak fe Yuda, etinyyaŋani, amaji ania nyo adahatye nya Yesu dia iko leyiyanak honyi gagaga.
\v 3 Isyori ehumak eleittaha iko Farisei jyo Yuda eluluŋ oseŋer iko legyamak hulo aji imojit eneittok, ette inyi leten dia. Iyarai isi allomohyen iko narwata ojo erremiti.
\v 4 Nyo ta amijana Yesu nerre daŋ hun ofwonni adi wanan, teyya ette inyi leten jihosi ette jaran, ngai al ittifyati tai?
\v 5 Itarraŋi isi ojori, Yesu Anasaretanani. Ojo Yesu jihosi, Ani alya. Owon bu Yuda, etinyyaŋani, lihiji hosi.
\v 6 Lajo ati Yesu, Ani alya, bwo isi ette iŋiŋad bwo ibatarai ifau.
\v 7 Inyyak fe Yesu ifiyo isi ojo, Ittifyati tai ŋai? Itarraŋi hya ojori, Yesu Anasaretanani.
\v 8 Itarraŋ Yesu, ojo, Ajo dwo bu ni jihatai nani alya. Al ittifyati tai nani, idehina hulo hetefwahi.
\v 9 Oŋida itasiruni nodwo hiram ikyana inyi ojo, Aati hinya isyo iye nani abeŋ ni etalitohi obo olosi abotye.
\p
\v 10 Owon ati Simone Petro iko nademi on obolo. Osutu inyi ademi to sohobo ette yef lobo lapit olo ehumani ol obolo’to ette isaluna neyyok honyi etteŋet. Anya lapit alya Malko.
\v 11 Ojo ati Yesu jyo Petro, Osuhok ademi hoi lisohobo. Igigilo iye jo abeŋ adi ni amat akosy an isyo Monyoŋ jihoŋ?
\v 12 Ette eluluŋ oseŋer iko eleittok hosi bwo legyamak hulo Yudea inefuna Yesu,
\v 13 ette ifitana, ette rihoro inyi teyya jyo Anas do, nyo inyi hamoni Kaifa, al ara’to ehumani ol obolo’to te eŋa nya.
\v 14 Inyi Kaifa alya linya iramak’to Yudea jo oŋida atulo abotye oye ta aati daŋ.
\p
\v 15 Ati arasai Simone iko lobo leyiyanani ijifatyo Yesu. Bwo fe omijak ehumani ol obolo’to afure leyiyanani lya. Ojiŋani iny i arabotye iko Yesu lihiloŋoni ehumani.
\v 16 Ati arasa Petro ilet. Ojiŋu ati lodwo leyiyanani ol omijak ehumani ol obolo’to inyi ette ikyana jyo nerrirryani ikat, ette itajiŋana Petro.
\v 17 Ojo ati nerrirryani ikat jyo Petro, Iye bu lobo olo leyiyanak honyi? Itarraŋ inyi, Obeŋ.
\v 18 Inahini legyamak iko oseŋer eema ette wotya dia osujai eema, nyo ihacoro bebe. Bwo fe owotya Petro ikosi ol osuja eema.
\p
\v 19 Ifiyo fe ehumani ol obolo’to jyo Yesu neram ono leyiyanak honyi iko nettiyenio honyi.
\v 20 Itarraŋ Yesu ojo, Ekyana ni jyo aati on oleyo, ettiyenatyo nya ni ihasik imojiti iko ihaji imojit eneittok hun adaharik Yudea daŋ. Abeŋ nya ni ekyana obo ariŋ lit lit.
\v 21 Ifiyo iye jihoŋ nyo? Ifiye hinya itayiruni’to nerre hunya ekyana ni jihosi, omijani fe isi nerre hunya ekyana ni.
\v 22 Al ikyana inyi ihwo nya, abotye olo legyamak hul owoni’to dia anaŋ Yesu bwo ojo, Itarraŋ iye jyo ehumani ol obolo’to ihwania?
\v 23 Ojo Yesu jihonyi, Al ekyana dwo ni on orroho, itahutak nepali hoŋ. Al ekyana dwo ni on oyyu, inaŋ ati iye nani nyo?
\v 24 Ette Anas ifahina Yesu al ifiti jyo Kaifa ehumani ol obolo’to.
\p
\v 25 Owon bu Simone Petro dia ol osuja eema. Ojori omuk jihonyi, Ira bwo fe iye lobo olo leyiyanak honyi? Iha inyi ojo, Obeŋ.
\v 26 Obo olo legyamak ehumani ol obolo’to, atahaŋ ba atulo odwo isalu Petro neyyok honyi, ojo, Abeŋ dwo ni egonyu iye lijasyore ikonyi?
\v 27 Inyyak Petro risa, ojo, Obeŋ. Ette ahohoro ilok.
\p
\v 28 Ara amotye attati isi rihoro Yesu to haji Kaifa lihaji okuma an anya’to pretoryo. Hobeŋi isi ojiŋani nyo itadwari isi jo al ejiŋak isi ette isi byaŋan enyyak ŋiyo neyom.
\v 29 Ojiŋu fe Pilato alet jihosi, bwo ojo, Anyo riŋ an irrasana tai atulo olo?
\v 30 Itarraŋi isi ojori, Obeŋ dwo inyi ara olorroho eyaŋuno dwo hohoi inyi jihoi?
\v 31 Ojo ati Pilato jihosi ojo, Iyati inyi, oŋototo neram ta ahwattek hatai.
\v 32 Ojori ati Yudea jihonyi, Itihi jihohoi attohyo lobo. Ara ana itasiruniere nekyana Yesu an itahutaniere inyi naye on oyeri adi inyi.
\p
\v 33 Inyyak Pilato jiŋana ihaji ette iloŋuna Yesu ette ifiyo inyi ojo, Ira iye a Hobu olo Yudea?
\v 34 Itarraŋ Yesu ojo, Neram ana iye likyana ta natwa hoi hama kuyya lomuk ikyanai jihoi?
\v 35 Itarraŋ Pilato ojo, Ara ni Ayudetanani? Aati hoi iko ehumak eleittaha, isi iyaunie iye jihoŋ. Anyo nyati ihanio iye?
\v 36 Itarraŋ Yesu jo, Obeŋ olobye hoŋ ara ono afau ana. Ara dwo nolobye hoŋ ono afau ana dwo mana aati hoŋ arrem jo oŋida obeŋi isyori nani jyo Yudea. Ihwania obeŋ nolobye hoŋ odyoto tene.
\v 37 Ojo ati Pilato jihonyi ojo, Ira ati iye ahobu? Itarraŋ Yesu ojo, Iye lijo ara ni ahobu. Ta neram ana isiuni nya nani. Attu nya bu ni lifau itamijaniere nelahode. Hul awahi’to daŋ nelahode itayirye nekyanita hoŋ.
\v 38 Ojo Pilato jihonyi, Nanyo nelahode? Likyana Pilato ihwania inyyak inyi jiŋuna jyo Yudea ette jaran jihosi ojo, Abeŋ ni anyurak obo eram honyi on orroho.
\v 39 Ara emohit hatai ihohiniere atulo abotye te eyom ono Allaŋan Anjelo. Iwahata tai ahohi ni jihatai Hobu olo Yudea?
\v 40 Inyyahi isi iwuwoŋita daŋ ojori, Hehou olo, ohou ati Baraba. Ati ara Baraba olohoho.
\c 19
\cl Angati 19
\p
\v 1 Ihwania ette Pilato iyaro Yesu jyo oseŋer ette isi lumyo inyi asai.
\v 2 Bwo oyiri oseŋer egorya hikwa ette isihonia lihou ette itiyyafana nahwan honyi ta nobo naboŋo en emoli.
\v 3 Bwo fe ihuhutoni jihonyi ette jaran, Hobu Yudea, moŋ, bwo fe ette naŋ inyi.
\p
\v 4 Inyyak Pilato jiŋuna alet ette jaran jihosi, Alya atina alya, eyak ni inyi jihatai oŋida imijana tai jo abeŋ ni anyurak obo eram honyi on orroho.
\v 5 Ojiŋu fe Yesu ol owon iko egorya hikwa lihou bwo naboŋo en emoli. Ette Pilato jaran, Imijyete atulo alya.
\p
\v 6 Ninya igonyuni ehumak eleittaha iko legyamak hosi Yesu iwuwoŋitai isi ojori, Isihonia inyi, isihonia inyi. Ojo Pilato jihosi, Iyatti, isihonia ta ahwattek hatai ikruce, ati abeŋ ni anyurak obo eram honyi on orroho.
\v 7 Itarraŋi Yudea jihonyi, Owoni nefahita jihohoi, ta nefahita huna osiru jihonyi naye, nyo ikyana nya inyi ojo ara inyi o Lonyi Hollum.
\p
\v 8 Itaniŋu Pilato ekyanita huna ette inyi baŋi bebe.
\v 9 Inyyak bu Pilato jiŋana ihaji ette jaran jyo Yesu, Iye alaja? Obeŋ fe Yesu itarraŋ obo ekyana jihonyi.
\v 10 Ette Pilato jaran jihonyi, Ibeŋ iye ikyana jihoŋ? Itimo iye jojo owon nadwaran jihoŋ ihouniere iye iko isihoniere?
\v 11 Itarraŋ Yesu jihonyi, Hara nya obeŋi isyori jihoi t’edou ibeŋ dwo iye iko nobo nadwaran ihaniere obo ariŋ jihoŋ. Ta neram ana lya al isyo’to nani lihas hoi iyyau dwo inyi neyyau an agalik’to onohoi.
\p
\v 12 Ihwania awak Pilato houna Yesu, ati Yudea iwuwoŋitai bebe ojori, Al ihou iye inyi ibeŋ iye ira amotte hobu Cesare nyo aati daŋ hul ojori’to era isi ahobwok ihari Cesare.
\p
\v 13 Itaniŋu Pilato nekyana ana, orihoro inyi Yesu alet ette isuga ikurus an iwwaharik limaji an ifurani Ebrei Gabata.
\p
\v 14 Ara nya akilfanni ono oloŋ an ihuhumyerek neyom. Ette Pilato jaran jyo Yudea, Imijyete Hobu hatai.
\p
\v 15 Iwuwoŋitai ati isi ojori, Iyaro, iyaro addi, isihonia inyi likruce. Ojo Pilato jihosi, Esihok adi ni Hobu hatai? Itarraŋi ehumak eleittaha, Ebeŋ hohoi obo lobu arari Cesare.
\p
\v 16 Ette Pilato isyo Yesu jihosi isihoniere likruce.
\p
\v 17 Inefuni ati isi Yesu ette iyaro. Bwo fe Yesu olororo akruce honyi ette leten jyo namaji an ifurani Ebrei Golgota on ojo amaji hou.
\v 18 Isihoni isi Yesu dia iko lomuk arrihai, abotye tolo, lobo tole ati owon Yesu ihiji hosi.
\p
\v 19 Igyorok fe Pilato nobo negyeri an ihanani ihide kruce. Igyoroni jo, YESU OLO ANASARETANANI HOBU OLO YUDEA.
\v 20 Ihenie Yudea arryai negyeri ana nyo namaji an isihonierek Yesu ilyaha imiji. Igyoroni ta nekyana Ebrei iko ono Grik iko ono Latini.
\p
\v 21 Ojori ati ehumak eleittaha hulo Yudea jyo Pilato, Hegyorok, Hobu olo Yudea, igyorok ati jo, Ikyana inyi jo, inyi Hobu olo Yudea.
\p
\v 22 Itarraŋ Pilato ojo, Nerre hodwo egyorok ni, legyoro ni.
\p
\v 23 Ninya isihoni oseŋer inyi iduhuni aboŋojin honyi ette harana amasik aŋwan bwo isyarani jyo oseŋer daŋ ababo. Iduhuni bu naboŋo ottotwa. Obeŋ nerifit jyo aboŋo ottotwa ana. Oyyei nya inyi daŋ arabotye to murut many lihejek.
\v 24 Ikikyanai ati isi, Helaha egwas ana. Hekilati ottuadi inyi jyo ŋai. Oŋida itasiruni egyerita hun ojori, “Aharai isi naboŋojin hoŋ, Bwo fe abahai isi ogumar ta naboŋo hoŋ.”
\p
\v 25 Ihanie oseŋer ihwo nya. Owotyai ati liwoyo kruce honyonyi bwo Maria ŋorwoi Kleofa, bwo hanie honye Yesu, iko Maria Madalena.
\v 26 Al igonyu Yesu honyonyi iko leyiyanani ol omuno inyi owotyai dia, ojo jyo honyonyi, Iyaŋ, lonyi hoi olo.
\q
\v 27 Ette inyi jaran bu jyo leyiyanani, Honyohoi ana. To noloŋ nya itamanyayo leyiyanani lya honye Yesu.
\p
\v 28 Lihalu nyo omijak Yesu latuhunie nerre daŋ, oŋida ihanie bu neram inya igyoroni, ikyana inyi ojo, Ebwoto ni.
\v 29 Ihanani fe dia nobo natobok hari an ifut iko aari hun irwatiŋoi litwa. Ilutoni obo aboŋo litwa ette ihanana jyo obo olosiholoti ette isi iyahina lihutuk Yesu.
\v 30 Al amat Yesu ojo inyi, Atuhuno. Ijurru inyi nahou ette ye.
\p
\v 31 Ara nya noloŋ an ihuhumyerek neyom. Oŋida hetebyaŋahi ahwattek arasai likrucehyen to sabato, nyo ara sabato ania noloŋ eneittok. Ifiye Yudea jyo Pilato hotowuriehe nejek hosi jo oŋida iduhuni ahwattek addi to krucehyen.
\v 32 Afwoi ati oseŋer ette isi wur nejek tulo abotye iko huno atulo etarrihi hyodwo isihoni iko Yesu.
\v 33 Ofwonni isi jyo Yesu, onyurani isi aye inyi ette isi ilak wur nejek honyi.
\v 34 Ati ocuk obo olo oseŋer amari Yesu ta afere attati nooto iko naari wouno teyya.
\v 35 Linya igonyu’to itahutak etamijani bwo fe ara etamijani honyi ahode. Omijak bu inyi jo ikyana inyi eram ahode, oŋida itai iruhoto.
\p
\v 36 Hodwo hirre ihanie oŋida itasiruni egyerita hun ojori, “Obeŋ adi obo ahotyo honyi owuro abotye.”
\v 37 Bwo fe nobo ekyana ojo, “Iŋiŋyalai adi isi jyo lya ol ocuhi isi.”
\p
\v 38 Ihalu hodwo hirre, ottu Yosefo otto miji Arimatea, al ara ahejifani Yesu an idima ta abaŋi Yudea, ette ifiyo Pilato ta ahwan Yesu iyari addi. Aharak fe Pilato. Attati inyi leten, ette idutuna nahwan Yesu.
\v 39 Bwo fe Nikodemo linya ottu’to jyo Yesu ta arwe iyaŋuno muraz en eharuto iko aloea hun odiŋi daŋ arotle esiha abotye.
\v 40 Iyarai isi nahwan Yesu bwo obubunani ta aboŋo ette ihanana dia nerre hun oŋwoji gir gir, ihwa ihanie Yudea al onuhani obo atulo.
\v 41 Limaji an isihonierek Yesu owon obo najasyore. Bwo fe lijasyore owon obo nelume naŋejuk ono hobeŋi onuhani lobo dia.
\v 42 Itaferehini fe Yesu dia, nyo ilyaha nelume bwo fe motye ara oloŋ neyom ono Yudea.
\c 20
\cl Angati 20
\p
\v 1 Oloŋ etteri ono esabit hara amotye hanyik beryen bwo fe heryok ottu Maria Madalena ilume ette nyurana amorwo itaboroni to hutuk ilume addi.
\v 2 Oŋeru inyi jyo Simone Petro iko jyo obo leyiyanani ol omuno Yesu ette jaran, Iyarai omuk laati Hobu t’elume bwo ebeŋ hohoi emijak ifihani isi inyi aja.
\p
\v 3 Attati Petro iko leyiyanani abotye itteryo adaha ifwarri ilume.
\v 4 Oŋeri isi daŋ bwo leyiyanani abotye irwat Petro ette fanyan ilume ahosyere.
\v 5 Irrafa inyi ifau ette iluŋur ette igonyuna aboŋojin abubunita Yesu arasai imaji hosi. Ati obeŋ inyi ojiŋa itwa.
\p
\v 6 Attati Petro ’tuna al ijifuno ette leten itwa ilume attati inyi mijo aboŋojin abubunita ihwa awoni isi.
\v 7 Bwo aboŋo abubuni hou obeŋ owon iko huno ahwan ati obubuna ta ahwan honyi hama imaji honyi.
\v 8 Bwo fe leyiyanani ebotye odwo afany’to ilume ahosyere ette jiŋana itwa ette igonyuna bwo fe ette iruk.
\v 9 Nyo obeŋi nya isi omijani jo ibuhu adi Yesu to ye ihwa igyoroni.
\p
\v 10 Attati leyiyanak caharu imiji hosi.
\v 11 Ati owotya Maria tottolet ilume on oyyo. Harasa inyi iyyo irrafa inyi ifau ette luŋur atwa lume.
\v 12 Ette igonyuna anjelohyen arrihai hul obwori aboŋojin. Itoŋo obo imaji hou bwo obo imaji hejek jyo odwo maji itaferehinierek Yesu.
\p
\v 13 Ette isi jaran jihonyi, Ŋotte, anyo iyyo iye? Itarraŋ inyi, Iyarai omuk laati Hobu hoŋ addi bwo abeŋ ni amijak ifihani isi inyi aja.
\v 14 Hekyana inyi huna oyito inyi orwaŋai ette igonyuna Yesu owotya dia. Ati obeŋ inyi omijak jo Yesu alya.
\q
\v 15 Ojo Yesu jihonyi, Hanioŋ, anyo iyyo iye? Ŋai al ittifya iye? Ati igigilo inyi ojo errirryani ginana adi alya ette jaran jihonyi, Leittok, kuyya dwo al iyaro iye inyi addi iramak jihoŋ amaji an ifihaniere iye inyi. Eyaro adi ni inyi addi ta ahwan hoŋ.
\p
\v 16 Ojo Yesu jihonyi, Maria. Oyito inyi jihonyi ette iloŋo ojo, Raboni, on ojo Hettiyanani te ekyana Ebrei.
\q
\v 17 Ojo Yesu, Henefatyo ani nyo habeŋ ni do adok jyo Monyoŋ. Ilo jyo illarak hoŋ ijara jihosi adok ni jyo Monyoŋ iko Monye hatai bwo fe jyo Hollum hoŋ iko Hollum hatai.
\q
\v 18 Ette Maria Madalena leten jyo leyiyanak iramaniere asayyo ojo, Egonyu dwo ni Hobu bwo fe ojo inyi erre huna jihoŋ.
\p
\v 19 To oloŋ tania to otoryai, oloŋ etteri ono esabit, ihyanai dwadi bu ekatin haji jyo amaji on ottubarik leyiyanak ta abaŋi Yudea. Ottu Yesu ette wotya ihiji hosi ette jaran, Ijara elik tajya hatawana jihatai.
\v 20 Hekyana inyi huna itahutak inyi isi ahas iko amari honyi. Ette leyiyanak muno bebe nyo igonyuni isi Hobu.
\p
\v 21 Inyyak Yesu ikyana jihosi ojo, Ijara elik tajya hatawana jihatai. Ihwa ifahu nya Monyoŋ ani, efak bwo fe ni itai.
\v 22 Ihalu ikyana inyi ana ette yirihina jihosi ette jaran, Ifwotuna Oloyiri ol Olibo.
\v 23 Al ihohina tai eyyata huno obo atulo ohohinie isi ahode ati hul ibyaŋata tai ihohina arasai eyyata hosi.
\p
\v 24 Ati obeŋ nya bu nyi Tomaso obo olo ’tomon harrihai ol iloŋoi aturoti owon ikosi to ninya ottuniere Yesu.
\v 25 Ati odulori leyiyanak iramyo inyi ojori, Egonyu dwo hohoi Hobu. Ette inyi iramana isi ojo, Al abeŋ ni egonyu ettuliti gusamari ihas honyi bwo fe abeŋ ni elutok afyala hoŋ ittuliti gusamari bwo fe aani hoŋ imari honyi abeŋ ni eruk.
\p
\v 26 Ihalu oŋitek hottohunik inyyahi leyiyanak wanan itwa haji iko Tomaso daŋ. Ihyanai ekatin daŋ ati ottu Yesu ette wotya ihiji hosi ette jaran, Ijara nelik tajya hatawana jihatai.
\q
\v 27 Bwo jyo Tomaso ojo inyi, Ihalamak aani hoi dini, imija ahas hoŋ, bwo ilutok aani hoi dini imari hoŋ. Hera aheharani hiram, ira ati aheruhoni.
\q
\v 28 Ati itarraŋ Tomaso jihonyi ojo, Hobu hoŋ iko Hollum hoŋ.
\q
\v 29 Ojo Yesu jihonyi, Iruk iye nyo igonyu iye ani? Hotomunohi hul obeŋi’to igonyuni ani ati iruhi.
\p
\v 30 Ihanio nya Yesu etamijanita arryai hun igonyuni leyiyanak honyi ati obeŋi ihwania igyoroni jyo abuk ana.
\v 31 Ati igyoroni huna oŋida itai iruhoto jo ara Yesu a Kristo Lonyi Hollum, bwo fe ta neruk jihonyi iwatta tai iko nesu ta afure honyi.
\c 21
\cl Angati 21
\p
\v 1 Ihalu italeyehi Yesu ahwan honyi jyo leyiyanak ihari Tiberia, itahutak inyi ahwan honyi ihwa ana.
\v 2 Owon nya Simone Petro bwo Tomaso aturoti, bwo Natanaele olo Kana otto Galilea iko lonyirok arrihai hulo Sebedeyo bwo omuk leyiyanak honyi arrihai.
\v 3 Ojo Simone Petro jihosi, Alo ni iyafok. Ette isi itarraŋ ojori, Efwo daŋ. Ette isi ati dahina itwa togol ette fwatan iyafohori.
\p
\v 4 Ati inya afaŋ amotye owotya Yesu ilotifor hari, ati obeŋi leyiyanak oheruni jo Yesu lya.
\q
\v 5 Ojo Yesu jihosi, Illarak hoŋ, obeŋi omuk aham jihatai? Itarraŋi isi jihonyi jo, Obeŋi.
\q
\v 6 Ette inyi ati jaran jihosi, Ibironia aboy hatai iŋati iŋet ono atogol bwo inyurana adi itai. Ette isi ati ibironia bwo fe obeŋi isi oremehini ipihuna aboy hosi itwa togol nyo olwaji aham arryai.
\v 7 Attati leyiyanani ol omuno Yesu jaran jyo Petro ojo, Hobu lya. Itaniŋu Simone Petro jo, Hobu lya, ette iduhuna aboŋojin ette iyyafana nyo obeŋ agamis jihonyi ette luhina itwa hari.
\v 8 Bwo leyiyanak hul omuk ette fwanna ta atogol hul ipihotye aboy an ifut iko aham nyo obeŋ nya olotifor alama.
\v 9 Alouni isi totwa togol, igonyuni isi eema owulo ilotifor. Owoni bwo fe omuk aham bwo emunio ihide honyi.
\p
\v 10 Ojo Yesu jihosi, Iyaŋuniete aham omuk hun hetehata tai inefuna.
\v 11 Ette Simone Petro leten ipihuna aboy ilotifor an ifut iko aham hun olwaji esiha abotye iko atomwana miet hohunihoi. Ati olwaji dwadi bu aham hunia obeŋ aboy ofuto.
\p
\v 12 Iloŋo Yesu isi ojo, Ifwanna eŋiyo. Obeŋ obo olo leyiyanak iŋere ifiyo inyi jo, ngai iye? Nyo omijani isi jo Hobu alya.
\v 13 Ette Yesu leten iduhuna emune ette isyo jihosi iko aham.
\v 14 Enyyahi ana etahunihi an italeyehiniere Yesu ahwan honyi jyo leyiyanak ihalu ibuhuna honyi to ye.
\p
\v 15 Atuhi isi aŋiyo, ifiyo Yesu Simone Petro ojo, Simone, lonyi Yoane, imuno iye ani agalik erre huna? Ojo Petro jihonyi, Afe, Hobu, imijak iye jo amuno ni iye. Ojo Yesu jihonyi, Itaŋiye akyoro hoŋ.
\p
\v 16 Inyyak Yesu ifiyo inyi etarrihi ojo, Simone lonyi Yoane, imuno iye ani? Itarraŋ inyi ojo, Afe Hobu, imijak iye jo amuno ni iye. Ojo Yesu, Irrirryai akyoro hoŋ.
\p
\v 17 Ifiyo Yesu inyi etahunihi ojo, Simone lonyi Yoane, imuno iye ani ahode? Ijiriŋa nya Petro ta efi etahunihi an ifiyo Yesu inyi ojo, Imuno iye ani ahode? Attati inyi itarraŋ ojo, Leittok imijak iye erre daŋ bwo fe imijak iye jo amuno ni iye. Ojo Yesu, Itaŋiye akyoro hoŋ.
\p
\v 18 Eramak ni iye ahode ahode, inya hera iye ahito iyyafata nya iye aboŋo hoi bwo idahari jyo amaji an iwak iye. Ati al imarwak iye irryomok adi iye ahas hoi jyo lobo al ifitak adi aboŋo jihoi ette iyaro iye jyo amaji an ibeŋ iye iwak leten.
\v 19 Ojo inyi ana itahutaniere naye ono Petro an itahubuyo adi Hollum. Ihalu ojo inyi jihonyi, Ijifatye ani.
\p
\v 20 Ette Petro yito bwo igonyu leyiyanani ol omuno Yesu arasa ijifatyo. Inyi leyiyanani linya oco’to jyo Yesu to loŋiyere bwo ifiyo ojo, Hobu ŋai adi itinyyaŋak iye?
\v 21 Igonyu Petro inyi ette jaran jyo Yesu, Hobu ara bwo olo?
\v 22 Ojo Yesu jihonyi, Kuyya anyimu ni jo oŋida inyi arasa many attuniere ni, ara ati inyi jihoi anyo? Ijifatye ani.
\v 23 Tania isarrahi ekyana jyo illarak jo oŋida leyiyanani alya obeŋ oye. Ati obeŋ Yesu ojo, Obeŋ adi inyi oye, ati ojo inyi, Kuyya anyimu ni jo arasa inyi many attuniere ni, ara ati inyi jihoi anyo?
\v 24 Inyi leyiyanani olo al itahutak’to etamijani jyo erre huna bwo igyorok isi, ette hohoi mijana jo arai etamijanita honyi ahode.
\p
\v 25 Ati owoni erre omuk arryai hunya ihanio Yesu. Hara dwo igyoroni isi daŋ egigilo ni dwadi bu afau daŋ obeŋ oremik ’tubuna abuhi hun igyororik.