\id 2TI
\ide UTF-8
\h 2 Timoteo
\toc1 2 Timoteo
\toc2 2 Timoteo
\toc3 2ti
\mt 2 Timoteo
\c 1
\cl Angati 1
\p
\v 1 Ani Paulo efahata olo Yesu Kristo ta awahan ono Hollum bwo te ecorit ono nesu on owon’to jyo Yesu Kristo,
\v 2 egyoro ni jyo Timoteo lonyi hoŋ al amuno ni. Ijara amehino bwo namuno iko nelik taji on ottu’to jyo Hollum Monye iko Yesu Kristo Hobu hohoi hatawana jihoi.
\p
\v 3 Esyo ni ahumo jyo Hollum al adulo ni giluta iye ta attari iko ta afanni ta amojo hoŋ. Egyama ni jihonyi ta ataji on olibo ihwa igyamarik nya hohonyok hohoi.
\v 4 Al agilu ni eyyo hoi, awak ni igonyuna iye bebe jo oŋida amuno hoŋ ifut.
\v 5 Agilu ni neruk hoi on obeŋ’to owon iko enyobyo, ninya owon’to ahosyere jyo ahanyi hoi Losi iko jyo honyohoi Yunia, bwo amijak ni ahode owon inyi bwo fe jihoi.
\p
\v 6 Te eram ana etagilu ni iye jo, oŋida iye itawulo esyoryo Hollum on owon itaji hoi on ottu’to ta eyyabana has hoŋ jihoi.
\v 7 Nyo obeŋ Hollum isyo jihohoi atajya hun abaŋi, ati isyo inyi jihohoi adwaran iko namuno bwo errirriyo hwattek.
\p
\v 8 Heloriri ikyanari eram Hobu hohoi, ara dwo bu toni al ara’to ababus tenyi. Ati odihu ettigemita te eram ono asayyo hun oyiji ta adwaran ono Hollum.
\v 9 Inyi alya al italahu’to hohoi bwo iloŋo hohoi te eloŋo on olibo, obyaŋara te egyamita hohoi, ati ara ta awahan honyi iko amehino honyi an isyo inyi jihohoi to Yesu Kristo hobeŋ etteri fau.
\v 10 Itahutak inyi amehino honyi jihohoi ta attuna ono Etalahani hohoi Yesu Kristo, linya itattur’to naye, bwo fe itahutak inyi ekoi ono nesu on osyo fur ta asayyo hun oyiji.
\v 11 Onyimu inyi ani ahettittoni iko alefahata bwo fe ahettiyanani sayyo hun oyiji.
\v 12 Te eram ana adihu ni edyahiti huna, ati abeŋ ni eloriri nyo amijak ni lya inya eruk ni bwo fe amijak ni ahode oremik inyi irrirriyo erre hun attunak ni jihonyi many jo oloŋ ania.
\p
\v 13 Ijifatye ettiyenita hun oyiji hunya itaniŋu iye jihoŋ, ta neruk iko namuno on owon’to jihohoi to Yesu Kristo.
\v 14 Irrirryai nelahode ninya isyori jihoi. Irrirryai inyi to Oloyiri ol Olibo al amanya’to jihohoi.
\p
\v 15 Imijak iye ana jo, laati daŋ hulo Asia oyitotyai isi orwoŋitek hosi jihoŋ. Ihiji laati hulya owoni Fugelo iko Erumonege.
\v 16 Ijara Hobu omehino jyo laati hutta haŋ ba Onesiforo nyo enyyahita arryai olwahyo inyi ani bwo obeŋ inyi iloriri ta aririk hoŋ.
\v 17 Nyo inya awanari inyi Roma ottifya inyi ani bebe ette nyurana ani.
\v 18 Ijara Hobu isyo jihonyi inyuraniere amehino ono Hobu iholoŋ ania. Bwo ihwa imijak iye bebe olwaji elwahiti honyi jihoŋ imiji Efisa.
\c 2
\cl Angati 2
\p
\v 1 Tania lonyi hoŋ, itagolo ataji hoi ta amehino an isyo Yesu Kristo jihoi.
\v 2 Bwo fe nerre hun itaniŋu iye jihoŋ tohosyere hetamijanak arryai, iramak jyo laati hul obiji hwattek, hul oremehini’to ittiyenio omuk bwo fe.
\p
\v 3 Odihu ettigemita ihwa oseŋeritanani ol oyyu’to olo Yesu Kristo.
\v 4 Obeŋ obo oseŋeritanani igigilo te erre hutto miji al orrem inyi arrem, nyo awak inyi itamuno komodal honyi.
\v 5 Bwo fe kuyya awak obo atulo iracari, obeŋ inyi onyurak esyoryo arari al irwat inyi on obis.
\v 6 Aromoni ol oromo’to, oŋida inyi oŋiyo aŋer mana honyi ahosyere.
\v 7 Igigiloi erre hun ekyana ni, nyo isyo adi Hobu jihoi amijana hirre daŋ.
\v 8 Ogotyere Yesu Kristo inya ibuhu’to to ye, bwo inya odetuno’to to woyo ba Davide ihwa ettiyeniere ni ta asayyo hun oyiji’to.
\v 9 Ta asayyo huna, anyurak ni ettigemita iko aririk ihwa olorroho. Ati obeŋ obo ariŋ oremik ifit ekyanita Hollum.
\v 10 Tania adihu ni erre daŋ te eram ono onyimot hulo Hollum jo oŋida isi bwo fe onyurani etalahuna on owon’to jyo Yesu Kristo iko akwatan on osyo fur.
\v 11 Arai nekyanita huna ahode jo, “Al eye hohoi ikonyi, esu adi hohoi bwo fe ikonyi;
\v 12 Al edihu hohoi ettigemita, elohobu adi bwo fe hohoi ikonyi; Al eha hohoi inyi, iha adi bwo fe inyi hohoi.
\q
\v 13 Dwadi eloit hohoi atajya hohoi arasa inyi igigilo jihohoi, Nyo obeŋ inyi oremik ihara ahwan honyi.”
\p
\v 14 Itagilye laati te erre huna. Iramak isi ihosyere Hobu jo oŋida isi obeŋi aŋalafai ta nekyanita hun obeŋi’to olwahye isi, hun itarrohojye’to etaniŋok.
\p
\v 15 Ihuma gyama itamunoyere Hollum ihwa egyamani ol obeŋ’to iloriri, al ittiyenio on oyyu nekyana ono nelahode.
\p
\v 16 Ati ihai nekyanita hun arai’to asai nyo iyarai isi laati jyo abyaŋan iruk iko ehanita hun orrohoji.
\v 17 Obobolororoi adi nekyanita hunia ihwa aŋodyo toŋosa. Ara ihwania jyo Humenayo iko Fileto.
\v 18 Ipali isi addi jyo nelahode nyo ojori isi obeŋ obo nebuhuna. Itipalarai isi laati omuk addi to hiruk.
\v 19 Ati owotya nelahode ono Hollum on ogol ihwa etteri lohitir nyo igyoroni dia jo, “Omijak Hobu hul arai ahulonyi,” bwo fe, “Ijara laati daŋ hul iruhi’to ta afure Hobu ihari erre hun obeŋi’to olibori.”
\p
\v 20 Itwa haji on obolo’to owoni asahani huno nayyel iko omuk abilat hun opipyahi’to. Owoni bwo fe atogoli iko atobwaha. Arai omuk te egyamita hun oyiji’to bwo omuk te egyamita hun ofyahaji’to.
\v 21 Tania kuyya obwanya atulo ahwan honyi addi te erre huna hun ofyahaji’to, ara adi inyi ihwa asahan on ottunani hama. Nyo ara inyi asahan an ilaman’to, an igyamari eleittok, an ihuhumani te egyamita daŋ hun oyiji.
\v 22 Ofuhoi addi t’ewahiti hun orrohoji’to hun ihanie aduri horwoŋ, bwo ijifatye alibori, neruk, namuno, iko nelik taji arabotye iko laati hul omojoi’to jyo Hobu ta atajya hun olibori’to.
\p
\v 23 Ihai nefita hun arai’to asai iko hun obeŋi’to ilofyoroji, nyo iyaŋunie isi aŋalafa.
\v 24 Oŋida apit Hollum obeŋ aŋalafa ati ijara inyi hetoŋoi ta anyalami jyo laati daŋ. Oŋida inyi ittyiyenio on oyyu, bwo odihu ettigemita daŋ.
\v 25 Oŋida inyi isiŋyo ta anyalami laati hul ihari’to inyi, nyo kuyya isyo adi Hollum jihosi iloicere atajya hosi imijaniere nelahode.
\v 26 Bwo fe ofuhoi adi isi addi jyo nofidik ono etisyahani ninya inefatyo’to isi ihaniere awahan honyi.
\c 3
\cl Angati 3
\p
\v 1 Ati omijak ana, te esidi fau ofwonni adi oŋitek huno ettigemita hun obolori.
\v 2 Nyo arai adi laati ahamunok hwattek hosi, lamunok gurusi, etadarak, ahetahwok hwattek, lamorok, amyosok hesyok, abyaŋak isyoryo ahumo, eharak libori,
\v 3 eharak illarak hosi, eharak itattana, etisyahak, eharak ’rirrya hwattek hosi, abyaŋak mehino, iko eharak yiji.
\v 4 Bwo fe arai isi ahenyabak, afiriwajak, ahetahwok hwattek, bwo omunoi isi ebaliti hosi agalik amuno Hollum.
\v 5 Ojori isi era isi aduri Hollum ati ihari isi adwaran honyi. Oyitotyai orwoŋ hoi addi jihosi.
\v 6 Ihiji hosi owoni omuk hul ojiŋatai kai kai ihasik inyobyere aŋorwo hun osilari’to, hun ifuti’to iko eyyata bwo hun ijifatye ewahiti huno ahwattek hosi.
\v 7 Odulori aŋorwo hunia itaniŋyo ati obeŋi isi onyurani amijana ono nelahode.
\v 8 Ihwa ninya ihari Yane iko Yambere ekyanita Mose, ihari bwo fe aati hulya nelahode. Orrohoji egigilita hosi bwo obeŋi isi arai aduri Hollum.
\v 9 Ati ittallihi adi isi ihanio arrohojita arryai nyo oleyo adi asilara hosi jyo laati daŋ, ihwa ebwanak hulya hinya ihari’to Mose.
\p
\v 10 Ati imijak nya iye ahode ettiyenita hoŋ, iko ehanita hoŋ, awahan hoŋ, neruk hoŋ, anyalami hoŋ, namuno hoŋ, iko adihan hoŋ.
\v 11 Imijak iye bwo fe ettigemita hoŋ, ejiriŋita hoŋ, iko erre hun idwoŋi’to jihoŋ imisihi Antioka bwo Ikonia iko Listara. Imijak iye ettigemita hun obolori hun adihu ni ati italahu Hobu ani t’ehiji hosi daŋ.
\v 12 Ahode, laati daŋ hul awahi manya on obis jyo Yesu Kristo onyurani adi ettigemita.
\v 13 Ati odulori adi arrohojak iko enyabak ihanio on orroho agalik. Inyobye isi laati, bwo inyobye isi ahwattek hosi.
\v 14 Ati oŋida iye igolik jyo erre hunya ittiyenu iye iko hunya imijak iye, nyo imijak iye lya al ittiyenio’to iye.
\v 15 Many hera iye ahito imijak iye egyerita huno Hollum hun isyori’to jihoi ofyoro inyuraniere etalahuna ta neruk jyo Yesu Kristo.
\v 16 Ofwonni egyerita daŋ jyo Hollum bwo oyiji isi ittiyeniere, isiŋyere, itabisyere bwo ittittoyere laati ekoi ono abisan,
\v 17 jo oŋida atulo olo Hollum owon iko egoliti daŋ hun oremehiniere inyi igyamari on oyyu.
\c 4
\cl Angati 4
\p
\v 1 Eramak ni iye erre huna ihosyere Hollum iko Yesu Kristo ol oŋot adi eswok iko ayyak. Eramak ni iye erre huna ta attuna honyi iko olobye honyi jo,
\v 2 ittiyenie nekyanita Hollum. Heminyaro, ittiyenie to oloŋ on oyyu’to iko to oloŋ on orroho’to, ituruhye isi, isiŋye isi, ittittoye isi, ittiyenie isi ta adihan taji daŋ.
\v 3 Nyo ottu adi oloŋ on obyaŋarik laati awaharik itaniŋyere ettiyenita hun oyiji, ati awahi ayyaha hosi itaniŋuna erre hun olufaji bwo itattubani adi isi ettiyanak arryai hul ittiyenie’to isi ihwa awahi isi itaniŋyo.
\v 4 Iloice adi isi ayyaha hosi addi jyo nelahode, bwo oyitotye isi jyo eyabita asai.
\v 5 Ati iye Timoteo, ihuma irrirrya erre daŋ, odihu ettigemita, igyamai egyama ono etisarrani sayyo hun oyiji, otuhok negyamita daŋ.
\p
\v 6 Nyo ihwania ilyaha naye hoŋ nyo esyo ni nesu hoŋ ihwa ehuma jyo Hollum, bwo attuba asaa en edyahari ni itai.
\v 7 Atuk ni arrem on oyyu, iko aŋettyo hoŋ. Adulo ni ’rirrya neruk.
\v 8 Tania ottunani toni egorya ono abisan an ilaman an iyyafaniere ihou, an isyo adi Hobu jihoŋ iholoŋ ania, Hobu alya inyi aŋotoni ol obis. Obyaŋara egorya ania toni hama, ati ara ta laati daŋ hul omunoi’to ta aleyo honyi.
\v 9 Ottifyai bebe ittuniere jihoŋ kwak,
\v 10 nyo obusaro ani Demo, nyo omuno inyi erre huno afau ana ette inyi leten Tesalonika. Alo Kresente ifau Galatia. Alo Tito ifau Dalmatia.
\v 11 Luka hama al ewon’to ikoŋ. Iyaŋunie Marko, ifwanna ikonyi daŋ nyo olwahyo adi inyi ani te egyama hoŋ.
\v 12 Ati efak ni Tikiko imiji Efisa.
\v 13 Al ittu iye iyaŋunie aboŋo ninya agwohi ni imiji Trosa jyo Karupo iko abuhi, ati agalik daŋ oŋida iye iyaŋuno awaragat huno amuhuny.
\p
\v 14 Alesandro ehuhumani felehi, ihanio inyi jihoŋ on orroho bebe. Oduma adi Hobu inyi te ehanita honyi.
\v 15 Ihuma irrirrya inyi bwo fe, nyo iha inyi nekyanita hohoi ta agolon.
\p
\v 16 To okikoi hoŋ etteri, obeŋ obo esiyoni al isiyo’to ani, ati obusarai isi ani daŋ. Helaha Hollum oŋot eram ana jihosi.
\v 17 Ati owotya Hobu iger hoŋ bwo itagol inyi ani ittittoyere asayyo hun oyiji ette paganohyen daŋ itaniŋuna. Italahu inyi ani bwo fe to hutuk lemye.
\v 18 Italahu adi Hobu ani jyo egyamita daŋ hun orrohoji’to bwo iyaŋuno adi inyi ani ilobye honyi idou. Ijara etahabuyo hatawana jihonyi fur. Amen.
\p
\v 19 Itifonyak Pirisa iko Akwila bwo fe hutta haŋ ba Onesiforo.
\v 20 Arasa Erasto imiji Korinto bwo oŋwai Trofimo ette ni busaro inyi imiji Milito.
\v 21 Oŋida ifwanna jihoŋ hobeŋ ameyu. Itifonyai laati iye, isi Ebulo, Pudeno, Lino, Klaudia iko illarak daŋ.
\v 22 Ijara Hobu hatawana jyo oloyiri hoi. Ijara amehino hatawana jihoi.