See in Reader
52 lines
4.8 KiB
Plaintext
52 lines
4.8 KiB
Plaintext
\id JUD
|
|
\ide UTF-8
|
|
\h Yudas
|
|
\toc1 Yudas
|
|
\toc2 Yudas
|
|
\toc3 jud
|
|
\mt Yudas
|
|
\c 1
|
|
\cl Kawukku 1
|
|
\s Maringna Wali Tai Yudas
|
|
\p
|
|
\v 1 Wali tai Yudas ledu limanai Yesus Kristus, olebaina Yakobus, tabarada yida ha pedebe monno hamanawaranai Allah Ama, lohho harawa tubana Yesus Kristus.
|
|
\p
|
|
\v 2 Yallakawe marabeha ate, moli kama ringna, monno manawara kama jabola tabarami.
|
|
\s Allah Nahokudi Yida Karaina Jala
|
|
\p
|
|
\v 3 Bag olebaigimmi hamanawaragu, tangrag nauwa baggu run'ge tolhawe tabaramu tubage hoila dabada yitta, nadadi hinghowe tolhamige tabarami monno karaimi dajalage miyo kamu nangi tetakkage tuba hatena paha dikki, hadakkahege kaha ana murri- ana murri tabarada ata katengna.
|
|
\v 4 Oroge, dadi ata tama manyongabe aiha tada waimi, yida wal' ulge paha inyakabe tubage liyo ha akka ata aika hatena kajala waige kanyurrui Allah da yitta kaha bokta dawe kuplada monno katulrani ban nyiyo kabikta paharena monno Mori da yitta Yesus Kristus.
|
|
\p
|
|
\v 5 Nauwa ug kab atege hanamu gemige lokko bam tada kahha bekwe, oroge Mori da banna pahoila bedu'i ana shuhna waige banna pahudi yida walta Mesir, da'alage nyiyo banna puddahayi yida aika hatena.
|
|
\v 6 Monno, malaikat-malaikat aika manono tadirri parehada yida, nakat waibedi kalarbahi aika bohta lar takapagtan kahadda kapagtana tutge yid'i rakkada nimmi ta lado madakka.
|
|
\v 7 Tauda dumoge Sodom monno Gomora lohho harona taka lingngorage, kaha boktawe tauna lar taka jala, ha lo wikna monno karotdawe kupla aika tiddana, da tag bege li'hok lat-Na aikaha dukka kawuwe tuj'ja.
|
|
\p
|
|
\v 8 Tauda djalage yida rade ata, katau ngorawe naganipda yida, daha otarawe tauda, tullarage bikta hareha, monno taubawe tangngage kammanadana.
|
|
\v 9 Mikhael wi'kho, ngora malaikat, banna hagaba dangngani mortana, tutge karogo nai Musa, walna nabanmawe atena banna pahuge hanewe mapadda tabarana, dukka dahege banna hanewe, “Yallakawe lage Mori kanna ban'kagu.”
|
|
\p
|
|
\v 10 Tabollo yige, tangngada rada kahajallora inne yida kapaddawe agawe aiha hatada hoda, inna hatada daheda waige hangada dauda, katujja danna rade ranga aika manghangadana. Orodanage inna hada kataudana enga yidawe yida baha mu'kkadi.
|
|
\v 11 Mayilla da dage yida'la! Yida d'oku d'adani nade lara halidanai Kain, monno yida daroti dawe inna kawutogo, kajala harainai Bileam, monno hara'i kaliloko ka tujja dauwe tai Korah.
|
|
\p
|
|
\v 12 Yiddana rade kangidi otora nedo lar taha kulla manawara, yayo-enumi, aika momo badda ya ole dangnga gimmi, kahamatra dahege tau dauna. Yida da tujja dawe karabba aika ngidi urra, pawuddalana rereha nut nimmi. Yida da tujja dayi rade yayu aika wuyo dikkige tarahige, kaha du'na mate, monno halugra mangkalarta.
|
|
\v 13 Yida da tujjadawe inne ngalung bannu kahadda bani, kaha tummuge hamakke dangnga dauda yida. Yida datujjai maduyo kamma hallata nedo takapagtana kahada moroka beha dhinyakabe lohho kahha walmurge.
|
|
\p
|
|
\v 14 Tuttu dage rade atala nai Henokh, wallana kapit'na nai Adam, pahurbale, “Torroila, Mori baamminni oled rade riu rata ata katengna,
|
|
\v 15 tannam kapik hakakowe inna bayidi rakkada tabara tangngada ata; bahokudi tangngada rade ata bokala tapan tangngage haraida ka bokala nedo bada raige waige hada kabokala, monno tapannuge tangngage haneweda kawutogo bepaha hubeda rade ata kajala oro bokalada ta aronai Allah.”
|
|
\p
|
|
\v 16 Yida rade ata katagdage bada ha oha daudawe inna morhada, kamayega dage kajala, monno yida kadokdage inna kama'k ateda; yida namadakawe ba'da monno da lammeha ata heka oro mayega da dage utu.
|
|
\s Ha'ape Monno Hanuwa
|
|
\p
|
|
\v 17 Bag olebaigim hamanawaraggu, miyo um apedahowela inna beha takbeda rade rasul-rasulna Mori dayitta, Yesus Kristus.
|
|
\v 18 Yida dabebe hatakguge tabarammu, “Badikkage hadukka rahi, dadadi rade katagdage hanewe waigimmi nedo yida dokudahedage kama'kna kabokala.”
|
|
\v 19 Yida rade ata orodage madage inna aikahawuna, kadokudage inna kama'k pantana, monno aika mang Wadbihhana.
|
|
\p
|
|
\v 20 Tabollo yige, miyo, bag olebaigimmi hamanawaragu, hakadewe taudauwumu tapan hatena kahadda murraha monno kamsembayangna nedo ta Wad Katengna.
|
|
\v 21 Kam karawa dawe taumu nedo tamanawaranai Allah kam rema waige banna hajolada Mori da yitta, Yesus Kristus, kaha tutda tabara morha aika mangdukkana.
|
|
\p
|
|
\v 22 Kadadagela maloya ate tubada yida rade kadu dal,
|
|
\v 23 pahahoilaila ki'ila rade ata wadeka waige bamkaramadi yida walta latti. Tabarada wadeka walli, hatingngodagela manawara kodoge madauta, waige bambuttidi ate rade kalabbe hawaida yida kama nyarha waige bada kama'kge pantana.
|
|
\s Mahadi-Madaika Tabarai Allah
|
|
\p
|
|
\v 24 Tabarana Nyiyo, kamang kuaha banna angugu aika monu monno kahadukkegu aika mang otorana ta aro hadau ngodo-Na kamma nadana waige ege ate kamma dakka.
|
|
\v 25 Tabarana Nyiyo wu wai-waina Allah, kaha hoila da yitta, ledeni'i Kristus Yesus, Mori da yitta, kama nadana, kalangna, kakulha, monno kuaha aika hadukka: Wal ulluge, nabatauge, kahha wal murri-wal murri. Amin.
|