lmy_reg/61-1PE.usfm

\id 1PE
\ide UTF-8
\h I Petrus
\toc1 I Petrus
\toc2 I Petrus
\toc3 1pe
\mt I Petrus
\c 1
\cl Kawukku 1
\s Maringna Wali Tai Petrus
\p
\v 1 Wali tai Petrus wu rasul Yesus Kristus, ta ata ka engana ata lipalaka, kama habara ta tangage Pontus, Galatia, Kapadokia, Asia, mono Bitinia; hapede
\v 2 wali ulluge Allah Ama ledege pateguna Waddi kana dadiwe morha lari kamanuddu tai Yesus Kristus mono ka kolena ma pairo raNa: Kanyurru kage mono moli kama ringina majabo lawe tabaramu! 
\s Mamanne Ka Morha
\p
\v 3 Mahadi daikai Allah mono Ama wali ta Morida yitta Yesus Kristus, waige kanyurruNa kahadda madakka, kaha dadi hagga beda yitta lari ta kama manne kamorha ledege kaddenai Kristus Yesus wali ta jonga ata mate,
\v 4 mono kapikku dauge ngawu aika mabbo, aika tairara, mono aika malele; pa ijala ta surga tubami miyo,
\v 5 halinawe miyo ha mawo waige parehanai Allah lede hatena mane mara paha dedala ta hadukka rahi.
\v 6 Ta hada inne mi hadda lageborawu, loko mahiggo tuddu, nyi kabu etege, miyo um mayilla dahomi ta tangadi kama kaba
\v 7 daja lage hatenamu ka rehi hina wali ta amah rara ka otora, loko ha tunu beduyi latti, katadayi tidi mono kana hadadige madaika, manadana, mono ha akana ba dikki rahige padedalana Yesus Kristus.
\p
\v 8 Mi walem kali etak mayi Nyi, tabolo mi um manawarani Nyi, loko batauge aim eta duyi Nyi, tabolo mi um hatenayi tabaraNa. Mi um lagaharami waige bamu lagebora aiha angta takki mono habanuna manadana,
\v 9 oro dukkage ha kabo ate ha tenami tamrage dikige, halinawe manemara dewamu.
\p
\v 10 Tutu hoila inna, tangada nabi pa huru balebe kanyurru ha daumu inna na hamatara bedage mono da keju bewe waige kahamatarana.
\v 11 Yidda da mayegage kapiku tadayi iyayi mono pirra rahige hakabu atena Wadnai Kristus kadana ta tauda yidda kole Nyi bana huru balewe mayillanai Kristus mono manadana ka ammina taha dukka.
\p
\v 12 Tabara tangada nabi rada da tak bewe ta yidda wale hanukku madage tauda yidda, tabolo hanukku dagimi ta hada inna batauge paha dikkibe tabarami lededi ata katalarage Lina tabarami waini Waddi Bihha paha lewa wali ta surga; Hada raddala ha hadda kabu ate hingna paha delakada malaikat. 
\s Kamaika Morha Tenguna
\p
\v 13 Oroge inna, ha inya kawe paha ngadamu mono hamatara kigela, ijalawe hamannemu kabanuna ta ka nyurru ha yina tabramu nimi Kristus Yesus bah dedalani.
\v 14 Ba lakawa kama nudu, ilam ka ngak kawu ta mangidi ate japatami tujawe kole mi bamu morha homi takabanga,
\v 15 tabolo hatengugela lari ta tangage hadamu, katujawe Allah bana kamai kagu tenguna.
\v 16 Oro ba dage kama tolha, “Tengunala mi oro Nauwa tenguna.”
\p
\v 17 Mono, nyi mi bamu kamai kani Nyi Ama, nada Nyi ka yidi rakada tangana ata dokuge harayida yidda aipa hali hikke, morhamla lari ta maduta batamrahomi engana ba ata li palakami;
\v 18 waige mi bamu tadawe inna mi baha wali begimi wali ta hada moriha ka liloko, ha dau bemi wali ta weda waikami, wale wai mage ngawu ka otora katujana amaha rara mono kaka,
\v 19 tabolo waige ranai Kristus kama nadana, rayo ana bebbe ka aika otora mono katuba.
\v 20 Oro, Kristus ha pede beyi ai rayi hoge panu tana, tabolo Nyi ab hadedala wikina taka podi rahi tubam miyo.
\v 21 Ledeni Nyi, mi dadiwe hateyi Allah; halinawe Allah kaha kaddeyi Nyi wali ta jonga ata mate mono Allah ka yini manadana tabaraNa, dajalage hatena mono mamannemi dukka dahege laroi tai Allah.
\p
\v 22 Oro mi paha murraha beyi urrami lari ta manuddu katena dajalage mi kamau dauge manawara ha ole baina murraha, nyiwe maida kada hamanawar wikina katertakana wali ta atemi kamurraha,
\v 23 oro mi hadadi hagga begimi, walle wali ta winni kadadi mate, tabolo wali ta winni aika mate, halinawe ledege linai Allah ka morha mono aika dikki.
\v 24 Jurata Bihha linawe, “Tangada ka morha tujayi ruta, mono tangage manadana tujawe wala ruta; Ruta malele mono wala ruta monuyi,
\v 25 tabolo, linai Mori engage kahha ana murri.” \rq Yesaya 40:6-8 \rq* Mono, liyo inna nyiwe li ege ate hatakki tabarami.
\c 2
\cl Kawukku 2
\s Watu Kamorha Mono Ata Katenguna
\p
\v 1 Oroge inna, baitadi tangadi butu ate, tangadi matipu, tangadi kobo ate lari, tangadi ha wiyo wikina, mono tangadi ha langu lira wikina.
\v 2 Katujayi lakawa abu kadadi, nyidawe mi kami baidana huhu hatena ka atna daja lage mi kam tummumi lari ta mane marami,
\v 3 nyi mila bamu tau takkakge padage nai Mori bana dahha.
\p
\v 4 Ta rahi mi bamu mai tabarai Kristus, Watu morha ha tularada kadadi ata, tabolo ha pedenai Allah mono ka hadda mangu hina tubaNa,
\v 5 mi jala tujayi watu morha, paha kadde ka wuwe umma hatena, rato katenguna tutu bamu yiyo maraka hatena ka tuba tai Allah ledeni Yesus Kristus.
\v 6 Oro jurata Bihha lianwe, “Etayila, Nauwa ug ijalayi wu watu ta Sion, wu watu hadda ha pede mono mandana, mono iya hing kayi kaha tena tabaraNa ruruge baha makkeyi.” \rq Yesaya 28:16 \rq*
\v 7 Nyiwe, watu nadda manadana tubami miyo kaha tena, tabolo tubada aika hatena, “Watu hatulla radanai ata karayina umma, na dadi watu hadda be,” \rq Mazmur 118:22 \rq*
\v 8 mono na dadi, “Wu watu widda, mono watu kalabara ha bukka dangana ata.” \rq Yesaya 8:14 \rq* Yidda da widda oro aida manudduge liNa. Nadda nyi lara paha yanna be tubada yidda.
\p
\v 9 Ta nyiduwe, miknala ata ha pede rato kaha doku, kabihhu ata katenguna, ana huhu hadau nai Allah daja lage mi dadiwe talarage dahhaNa, ka maika begimi miyo huna wali taka kapagtana aro ta magakaha Na ka manadana.
\q1
\v 10 “Ulluge, mi wale ana huhui Allah mahomi, tabolo batauge miyo ana huhui Allahmi. Ulluge, mi walem hibak mawe marada ate, tabolo batauge hiba bwewe maradda atei Allah.” \rq Hosea 2:23 \rq*
\s hakakowe Morha Ka Dahha Tutu Manadai Allah
\p
\v 11 Bagu ole bai gimi hamanawaragu, nauwa ug kabu atege hanua gimi miyo ba ata abbu danaga mono lipalaka ta panu tana inne tutu hama rau wikina wali kamadige mangidi ate panu tana kaha tau gabani urrami.
\v 12 Hamata rage kanogomu ka dahha ta jonga ata hatena dajalage yidda bada pitlami ba karayi nagimi kajapata, yidda da etawe harayimu kadahha, mono enga manada dani Allah ta laddo bana haelo. 
\s Patuhlah kepada Penguasa
\p
\v 13 Waige ngarai Mori, kagak kadi tangadi kaha reha paha yanna beda kadadi ata, ba tabarana raja ba nyi kadauge pareha kama dehta,
\v 14 waleka ta tangada Gubernur paha lewana raja tutu hokudi tangada karayina japata mono yidi madaika tabarada ata karayina kadahha.
\v 15 Oro, tauda dage la hakabu atei Allah: waige harayi kadahha, miyo um toniwe aiha tadana ata kabanga.
\v 16 Morhamila ba ata ka hoilami, tabolo ilam waikage mahiggo hoilami inna bamu bugerage tutu kajapat. Gabbagela, morhadamila ba ata nagimi Allah.
\v 17 Ha aka kidi tangada ata. Manawara kidi ole baimu taha tena, maduta kini Allah, mono hikiyi raja. 
\s Mayillanai Kristus Wuwe Li Tujja Morha
\p
\v 18 Ata pahalewa, kangaka kimi tabara morimi waige bamu ha akadi. Wale tabara kel mada yidda kadahhaki mono malujjana, tabolo dummo tabarada yidda ai katijana.
\v 19 Oro ba wuwe maradda ate manawara, nyi tutu tadai Allah, wu ata bana tahna lari ta mayilla oro ai ka tijana.
\v 20 Oro, agawe kahewage nyi miyo bamu tahna hibba palu oro harayimu kajala? Ta nyiduwe, nyi miyo bamu mayillami oro bamu rayige kadahha mo miyo um hiba waige tahna, harayimu inna na yannage tabaranai Allah.
\v 21 Oro, nyiduwela gauge mi maka maika gimi, oroi Kristus dummo na mayillabe tubam miyo mono na ijaka begimige tujja tuybami dajalage miyo kamu dokuni oro leduNa.
\q1
\v 22 Nyi walena rayikmana jala, mono matipu wale lakmage tabaNa. \rq Yesaya 53:9 \rq*
\v 23 Kole Nyi batere kayi, Nyi walena hagabbak mawe hatereka; kole Nyi mayilla, Nyi walena banikma, tabolo yinage tauna Nyi tabarai Allah ka yige rakkage waige katijana.
\v 24 Nyi dau na tagubedi jalada yitta waige tauna Nyi ta yayu paka dailo daja lage yitta mate ta jala, mono morha tutu katena. Waidi kapillana Nyi, miyo um tagahami.
\v 25 Ulluge, miyo tujai bebbe ka jalora hakitana, tabolo batauge miyo um hagga bemi ta Kadauge Jawami mono kaha mawo gimini urrami.
\c 3
\cl Kawukku 3
\s Kanogo Ole Umma Mono Tangada Laida
\p
\v 1 Tauda dummo gela mi ta ole umma kabani, ka ngak kiwu ta lai mu. Oro, inna ta jongada yidda daka ai ka dokuge Liyo, yidda dadiwe tailowe kanogo ole ummana lakma hatakkina,
\v 2 oro yidda hadda languwe mono magu hige kanogomi.
\v 3 Inna dahha mu illa wali da kel kage ba lewu bali haddu, tujage wali hadidara hadudage wumu, waina amaha rara, waleka waina kalabe ka bikta hina.
\v 4 Gabage, bana moda hewe inna dahhamu ka wali dage lari ta atemu, dahha aika malele, kawali ta waddi ka malujja atena mono kadanna. Inna nyiwe kamangu hina ta matanai Allah.
\p
\v 5 Oro, tauda dagela laewai katenguna nutu ulluge, kaha yodana mamannena yidda tai Allah, hadoyiwe tauda yidda; waige bada ka ngakka ta laida.
\v 6 Tauda dagei Sara manuddu ta laina, Abraham, mono bana kamai kani ‘mori.’ Mi anai Sarami n yi mi bamu rayi kage kadahha waige aina kalubu gimi hada kama dauta kole bamu rayige.
\p
\v 7 Tauda dummo nage mi, ta kabani laida lawai, morha ole dangani laimu waige paha ngadamu oro yidda ata kalojayi. Hikiyi yidda ba ole ata midi ka dauge lohho hibawe ka nyurru morha daja lage sembayangumu ilna mapade kawe. 
\s Mayilla Oro Rayige Katena
\p
\v 8 Nyidawe, mi kana hawu dadila paha ngadami, hamanawara wikina, manawara ka ha ole baina, ate kama lujana, mono li bawa ate.
\v 9 Ilam tau kage gabage japata ole japatadi, waleka hatola ole hatoladi. Ta nyiduwe, hamaringi wiki dana oro nyiwe gauge mi ba kamai kagimi, daja lage mi kamau dauge ka nyurru.
\v 10 Oro Jurata bihha linawe, “Iyayi kabige morha, mono etayi lado morhana kadahha, nyi na karawa dahowe lammana wali kajapata, mono ro wina wali taha newe matipu mara jabbu.
\q1
\v 11 Nyi dummo naha marau wiki dahoge tauna wali kajapata mono na rayige kadahha. Na mayega dahoge kamoli, mono karuhhu dahowe rotiwe.
\q1
\v 12 Oro, matana Morimi naha mataradi ata katena, mono katiluNa na range dadi sembayangda yidda. Tabolo, mataNa na gabbadi ata karayige japata.” \rq Mazmur 34:13-17 \rq*
\p
\v 13 Iya kaduyi kabokala waigu nyi yau bamu manuddu kaduwu rayige kadahha?
\v 14 Tabolo, nyi bamu mayilla kawu tutu katena, nyiwe yau enga hama ringiwu.” Ilam madautawu mono ilam gedowu tabarada yidda kapa hada guge hama yilla dangamu.”
\v 15 Ta nyiduwe, hatenguyila Kristus ba mori muni lari ta atemu! Ha inyaka hangatanala bamu yige baleha tabara iya hingkayi karaiwe matutra tutu mamanem kadana ta yau,
\v 16 tabolo rayigela inna waige ate malujja mono hige, lohho dau kigela ate kamurha ka languna daja lage kole mi ba langu lirami, ata katola gimige hada morhami kadahha lari tai Kristus enga da makke.
\p
\v 17 Oro, rehi naha dahha dahoge mayilla oro rayige kadahha, nyi inna ba habu ate nagei Allah, wali ba mayilla oro ba rayige ka japata.
\v 18 Oroi Kristus dummo na mayillabe oro jala, hadakkana tutu tangana ata, kamate orona ai katena, daja lage Nyi dadiwe ngidi da yitta tabarai Allah. Hamateyi ta tau atana, tabolo ha morhayi lari ta Waddi.
\v 19 Lari ta Waddi, Nyi dummo kako mono rayige talarage tabarada waddi tagallu,
\v 20 halinawe yidda ulluge aika manono kolei Allah waige maloya remadi yidda tai Nuh, tamranai Nuh bana hadahhayi tenana. Waini tena nada, hodi hekki, loho podo pata ata hekida ka hoila wali ta we bannu.
\v 21 Weyo bannu inna tada nage we ha riha inna batau ge kapa hoilami. Weha riha wali hamuraha dakama nage raiyi wali ta tauda, tabolo wudawe lima raino tabarai Allah tutu ate kamuraha ka langna ledege kaddenai Yesus Kristus,
\v 22 inna Nyi batauge ka pannebe ta surga mono dani tabra kawanai Allah; kole tangada malaikat, kaha reha, mono tanga kadana kawahana ka ngakka tabraNa.
\c 4
\cl Kawukku 4
\s Jawaila Bebbenai Allah
\p
\v 1 Oroge inna, ba ole bai atada mono ka eta waige mata mayillanai Kristus, mono dumo ba ata dukuge ngalawe daumi lari ta manadana nimi paha dedala, nauwa ug dullami bai ata ka dana ta jongami:
\v 2 Jawaila bebbenai Allah ka dana tabrami! Illa oro karuhhu kawe, tabolo wali ate, katauna Allah hakabu atena; Ilam rayi kage oro ba dayo ha utumu aika dahha, tabolo oro ha inyakage atemu.
\v 3 Oro bana tutuwe ma higgo ta lado morhamu ulluge kapiku rayige kadamma ata ai katadayi Allah; morha ta hada dadi ata, kalango enu, rayi ulla majobera, duka lawe enu, mono kangak kana hala hatau kabanuna akta.
\p
\v 4 Batauge, yidda hadda hangatara kole mi ba dikki gimi inna mige aim dokuge lari kama yarha uttana yidda harayida.
\v 5 Oro bataudage, yidda da yidaho tagu baleha tabarana Nyi ka yige rakkage ata kamorha mono kamate.
\v 6 Tutu kappe innela, lina ba talarage tabarada ata batauge kamatebe lokko yidda kole begge rakkage ta panu tana inne dukuge hada kadadi ata, tabolo yidda morha dokuni waddi dokuge hadai Allah. 
\s Waige Kanyurrumu Tutu Hanukkuwe
\p
\v 7 Kapodige tangage dageta nage. Oroge inna, yapugela mono jaga wikimila dajalage mi kam sembayangna.
\v 8 Ta panuge tangage inna, hakitage hamanawara wikimi katau takkana oro buta layi jala hatonina.
\v 9 Hatingoge ramemu diha-diha illa dakage lujamu.
\v 10 Oro tangana ata kahibawe kanyurru, waige innala bamu hanukku wikkimi ba miyo kaha nukku kadahha ta tangadi kanyurru wali tai Allah:
\v 11 iyayi kaha newe, kana haneweda ba wuyi ata kaha dikkige linai Allah; mono iyayi kaha nukku, pahaini kana hanukku waige kulahana nyi wali tai Allah yiwe dajalage lari ta tangage hada, Allah kaha manadayi ledeni Yesus Kristus. Tubana Nyila manadana mono bikta pareha kaha ana murri. Amin. 
\s MAYILLA BA ATA KADOKUNI KRISTUS
\p
\v 12 Bagu ole bai gimi hamana waragu, Ilam kadada kami waige latti kama kaba kamai kirra hami miyo, ba mera wuwe kaha yadda tabarami.
\v 13 Tabolo, laga hara dami oro mi bamu dokuge lari tama yillanai Kristus dajalage mi dummo dadiwe lagahara mono ege ate ta mahiggo manadaNa hadelage.
\v 14 Maringkana mila paha melo oro ngarai Kristus, Oro waddi manadana mono waddi Allah engana ta miyo.
\v 15 Ta nyiduwe, illa daka ta jongami kama yilla ba ata kaha mateyi ata, ka kedu, karayina japata, waleka ba ata katagu ha nyongage urha ata wadeka.
\v 16 Ta nyiduwe, iya dahingkayi kama yilla ba ata migguyi, ilna makkeka, ta nyiduwe ka enga dage nyi daikayi Allah oro taguge hada inna.
\v 17 Eahi benagege yige rakage baha legewe wali ole bainai Allah. Mono, nyi hokunai Allah ba kapukage ta yitta, aga linawe hadada ata aika manuddu ta Linai Allah?
\q1
\v 18 Nyi ata hatena dau ruruge ba haoilayi, aga lina dawe ata japata mono jala? \rq Amsal 11:31 \rq*
\p
\v 19 Oroge inna, yammadi yidda ka mayilla oro hakabu atei Allah, yiyi urrana ta Kadauge hadadige ka mikku, ha gapege rayige ka dahha.
\c 5
\cl Kawukku 5
\s Jawaila Bebbenai Allah
\p
\v 1 Oroge inna, ba ole bai atada mono ka eta waige mata mayillanai Kristus, mono dumo ba ata dukuge ngalawe daumi lari ta manadana nimi paha dedala, nauwa ug dullami bai ata ka dana ta jongami:
\v 2 Jawaila bebbenai Allah ka dana tabrami! Illa oro karuhhu kawe, tabolo wali ate, katauna Allah hakabu atena; ilam rayi kage oro ba dayo ha utumu aika dahha, tabolo oro ha inyakage atemu.
\v 3 Illa dajalaka harayimu ba waige kawahamu tabarada yidda paha tenawu pa tagumu baleha, tabolo dadi dawula tujja tubada yidda.
\v 4 Waige bataudage, kole nimmila Kabanningge jawa ammini, mi enga hiba mige kataupa manadana aika ka malele.
\p
\v 5 Tauda jala nage dimmi mi, karehi bodi, ka ngak kadila tangada bai atami; mono mi kadadage li bawa ate, dihha-dihha oro: Allah na gabani ata ka baibo, tabolo Nyi na yini kanyurru tabarana ata kali bawa atena. \rq Amsal 3:34 \rq*
\v 6 Oroge inna, hali bawage taumi ta kabu limma nai Allah kabanuna kawaha. Nyiwe, Nyi enga hama dehta gimi miyo ta rahige.
\v 7 Yi kahhawe gela gaggamu tabarai Allah oro Nyi karawami miyo.
\p
\v 8 Hamatarage mono ha inya wikimula! Mihhumu, kabalka, na kako ma-mai tujayi singa ka bura, mayegana ha yana kagu kaballoni balinna.
\v 9 Gabbanila kabalka! Dede didarami taha tenami oro mi tadawe ta tangage panu tana, ole baimi taha tena da tagu jalage mayilla kalimi.
\p
\v 10 Mono, kole mi bamu mayilla ta mahiggo tuddu, Allah puge tangage kanyurru kamaika begimi dokuge ngalawe daumi lari tamanadaNa aika dukka lari tai Kristus enga naha tagahami, hakulhami, mono ha kaddemi miyo.
\v 11 Tubana Nyila, kawaha kahha ana murri. Amin! 
\s Maringi Hatoni Waiwe
\p
\v 12 Nauwa ug tolha dubhage jurata tabarami ledeni Silwanus, ha tadagu ba ole bai taha tena ka mikku. Nauwa ug kabu atege yini hayarta mono takkiwe tabarami, oro inna ka nyurru kabanningna wali tai Allah. Dede didarami lari taka nyurru inna.
\p
\v 13 Kangote ka dana ta Babilonia, ba ana huhu ha pede jala nadi Allah, padikkige maringina tabarami. Markus, anagu lari tai Kristus, hadikki jala guge maringina tutumu.
\v 14 Yiwe maringimu dihha-dihha waige hangakha manawara. Moli kama ringina tubana tangana kadana tai Kristus. Amin.