lmy_reg/50-EPH.usfm

\id EPH
\ide UTF-8
\h Efesus
\toc1 Efesus
\toc2 Efesus
\toc3 eph
\mt Efesus
\c 1
\cl Kawukku 1
\s Salam dari Paulus
\p
\v 1 Waltai Paulus, ledu limana Yesus Kristus waige hakabu atenai Allah, tabarada ata ka engana ta Efesus, ata hatena tayi Yesus Kristus.
\p
\v 2 Kanyuru mono moli maringina tuban waltai Allah amada yita, mono mulida Yesus Kristus.
\s Berkat-berkat Rohani dalam Kristus
\p
\v 3 Masadi daika Allah mono Ama waltai Mori da yita Kristus Yesus, kamaring beda yita lar tai Kristus tangad kanyuru hatena tahadau surga.
\v 4 Oroge, Nyi napede beda yita lartai Kristus aika wungahoge panutana dajalage yita kada tengna mono ka ilda oroge ta aro mataNa. Tilmana wara,
\v 5 Nyi katutda yidda wal ulge bana keke tada kana anada ledeni Kristus Yesus dokge habai atena.
\v 6 Yi manarayige kana mana dana waige marada manawarana kamanada hamarada ate bena aikamangu gabana tabarada yita wainana hama nawarana.
\p
\v 7 LartaNyi, yita dakole bege hawalna ledege rana, nahawal bedadi tangadi layi pareha yita dokuge patege wanawara marada atena.
\v 8 Hayi bena Allah tabara yita lari tangage angta mono tada.
\v 9 Yige natak bewe batarada yita kabailana hakab atena dokge hakabu atena kadaha hainya bena tai Kristus.
\v 10 Hakako bena tamrage rahi pannage bana dikwe hawuge tanage tai Kristus, kadana tasurga mono kadana tapanu tana.
\p
\v 11 Lartai Kristus, yita dumo nabawe badage hadau da pahadidara bena wal ulge dokuge paha nyakana, loho kauladi tangadi la ha pohtana dokuge kabu atena.
\v 12 Dajalage yita ka wungana hayodage mamanena tai Kristus enga yiwe bana mahadi daikawe manadana.
\v 13 Lartanyiwo gaugimbam range bewe liyo katengna, Li Ege Ate dita koko pahoila mane mara dangami, mono hatena tabarana, kataube tada wain ngasu katengna ha jaji kira bena.
\v 14 Ngahu katengna yi hadada wal taha dauda yita, kaha bana dikwe li hawalna tabarada yida hadauna Allah wiku dau tuba ge mahadi daikage manadana.
\s Doa Paulus
\p
\v 15 Oro bataudage, wal bagu rangewe tubage hatenamu ta morda Yesus mono manawaramu tabara tangana ata tengna,
\v 16 nau walhadukkakmawe li ma waigu tubam dige nauwa bagu apemi miyo til sembayanggu.
\v 17 Gu pahadege kaenga nyi Allah wal tamorda nyita, Kristus Yesus, ama wal kamanada na, kana yigimi ngahu angta mono padelaka tiltada mini nyipo.
\v 18 Nauwag pahadege dajalage mata atem kana ma gakahage kana dadiwe bamu yadawe hajukamu kadabena tilkamai kanagimi, hapote kadabena lar hadaunanyi kama nadana tubana ata katengna.
\v 19 Mono kamang kulha madaka na ai ha angta ukra tabarada yita kahatena, tauna paha tingona kahada madaka kulhananyi.
\v 20 Ka hada madaka kulhana nyi natingoge kole nyi bana hakadei Kristus wali tajonga dalara ata mate mono nahangodoi Nyi-yo tabara lima wanana dete ta surga,
\v 21 karehna madesta wal tangage nukge, biktage, kul hage, kaha reha, mono rehi madehtage wal tangadi ngara kakal dabena, wale nyi kelmawe batauge nnehe, tabolo tauda jalage dimi ka amna.
\v 22 Nyi na pukkad tangad takoko leduna mono na yiwe tauna banyi katakge waltangage kadana tut kangotena,
\v 23 hatauwik dauna, gige hapanuna Nyi-yo kana bankahage mono tangage.
\c 2
\cl Kawukku 2
\s Diselamatkan oleh Anugerah
\p
\v 1 Ulge, miyo um mate oro harayim monno jalam,
\v 2 nuthonna bam kako dokuge larapantana, bamdokuge kuaha kalingngora hareha kajapata tapankaraba nawad katangrana raiulla tajonga lakawa-lakawa aikaha doku.
\v 3 Tajonga yida, yitta tangnga ulge da morha alla bada kama'age inna habaige kanada yitta, bada hadokuge oroge habaige kanada monno hangada yitta. Yitta hayapgau allada talakawa wutogo, katujai rada kadadi ata wadeka.
\p
\v 4 Tabollo, Allah, kapotena manawara monno oronage inna manawara, Na kamadaka Nyi namanawarada yitta,
\v 5 lohho batangrada yitta mate oro malaida yitta, Nyi nahamorhada yitta ole dangngani Kristus, oro manawara miyo beha hoila bemi,
\v 6 monno Nyi kaha kade yitta waini Nyiyo monna nahangododa yitta ole waini Nyiyo nedo tahadau surgawi nedo tai Yesus Kristus,
\v 7 tannam dikkige rahi amge, Nyiyo naha tingngo dage hapotena manawara-Na aiha anta ukra nedo ta dahha-Na tabara yitta nedo tai Yesus Kristus.
\p
\v 8 Oronage, oro manawara miyo hoila ledege hatena monna inne kawaldame walta tau daumu, tabollo kanyur waltai Allah,
\v 9 walle oro haullamamuge, tannam kaillada langba wu'ak ata kakeketa wikkina.
\v 10 Inna yitta harainadai Allah, nahadadida nedo tai Yesus Kristus tannam kada rayige haulla kadaha behaganna baenadai Allah ulge tannam yitta kada antage bada hakakowe ta morhada.
\s Dipersatukan dalam Kristus
\p
\v 11 Oronage, apelah nut ulge miyo bam dadi um da'a ata marapu, inna hadulka “ata aika kabunyi (kabunyi=sunat), oro yida katak wikna ‘ata kabunyi,” ngabe kabunyi harai tabara tau waid lima kadadi ata.
\v 12 Apewelah nutna miyo morha tabalhadu Kristus, mawateka walta kalingngora ata Israel monna ata-ata kahaltama ta jaji monno kira hakatti, walle da kole mage mamanna monno tabali'i Allah nedo tapantana.
\v 13 Tabollo, nabatauge, nedo tai Yesus Kristus, miyo nut kaullu kadikko rautaka beha ngidbemi kam dadaheka oro ranai Kristus.
\p
\v 14 Oronage, Nyi dau ngabbe maring malala da yitta kaba'a raige rada kaduda bal-bali manna hawudi monno kaba'a hamauhage inna hamuhna inna kahawattena,
\v 15 nedo kahopbewe hamuhna taka na-Na, ngabbege Hukum Taurat kamabg ngihi hareha-hareha monno uk-pata tannam nedo ta tau-Na, Nyi manna rayidi kaduda bawuyi kadadi ata beru, tannam kanna dadiwe bamoli,
\v 16 monno kaha molidi kaduda tabarai Allah nedo ta wuyo ngihi ledeni nyayu kadailo, tannam kanna matewe hamuhna.
\v 17 Nyi ammini monno natalarage maring malala tabaramu inna kamarau monno maring malala tabarada yida kadageta.
\v 18 Oronage, leden Nyiyo, yitta kadudana dakoleni lara tama tabarana nai Ama needo ta wu Wadbihha.
\p
\v 19 Inna, miyo walle hil ata kahala tama mam monno tam manyonga, tabollo ole kalingngora nedo ta ata-ata tengna monno taka lingngora olebainai Allah,
\v 20 nedo hakade nedo pan rasul mono walta nabim nedo Yesus Kristus dau kadadi Watu Katengna.
\v 21 Nedo tai Kristus, tangnga umma ha kadde tangra hawudi oleni monno kanna tummuyi dadi Bait Suci nedo tai Mori.
\v 22 Nedo Nyiyo, miyo wi'ina tangra hakade olemi dai hadau daunai Allah nedo ta Wadbihha.
\c 3
\cl Kawukku 3
\s Pelayanan Paulus untuk Bangsa Bukan Yahudi
\p
\v 1 Inne nyidawe kappege, nauwa, Paulus, kadana tagallu oronage Yesus Kristus tuttumi miyo tangngam ata marapu.
\v 2 Miyo enga bada rangebemige tuttugu baghalijjakawe manawarai Allah ha yi bena tabaragu tangam miyo,
\v 3 Oronage inna harayi be ngihi ate hataktabaragu katauda bena beha tulha kadubha ulluge.
\v 4 Tangra baha inne, miyo antage yappawe naha ngadagu tutuge nedo ngihi ata nai Kristus,
\v 5 aiha tak tabarada kahulleka ata heka, tabollo hatangra takki tabarada para rasul moono para nabi katengna oro Wadbihha.
\v 6 Inna ngihi ate hakappe dawe ledege Li'ege'ate tabara ata marapu kad ole dadi ahli waris, ole kangotedi wal ta wu tau, monno kadda rajja badda ngala dauda wal jaji nedotai Yesus Kristus.
\p
\v 7 Nauwa kadadi ledu limma Li'ege'ate katauda nedo kanyurru kawalta manawaranai Allah, hayi tabaragu dokuge raiullage kuaha-Na.
\v 8 Tabaragu, kahadda bawana ta jonga ata tengna, inne manawara hayi takdahowe tabara ata marapu hapotenai Kristus aiha yap,
\v 9 monno ngidi magakaha tabara tangngada ata tuttuge nedo ngihi ate kabunyi kabada riwo rata daubena madige nedotai Allah, kaha dadi tangngadi.
\v 10 Til bataudage, ledege kangote atahatena, tangngage antanai Allahnabatauge natakwe tabarada kahareha monno ka kuaha ta surgawi.
\v 11 Inne kaha tujja tahkabbu ate aika mate nedo harayi be tai Yesus Kristus, Mori da yitta,
\v 12 nedo tta Nyiyo, yitta da kolege taggora monno lara tama tabaranai Allah badda tija oro doku manenage Kristus.
\v 13 Oronage, nauwa ug karaiwe tabaram tannam kaillam gela gaggau bam etawe inna kamayilla hagartag nauwa tuttum miyo.
\s Doa Paulus untuk Jemaat Efesus
\p
\v 14 Inne nyida kappege, nauwa bagtakkodi kuddogu ta aronai Ama.
\v 15 Nyi dau wallge, kalingngora kaha olebaina ta surgawi monno tapantana dahiba nage Ngarana.
\v 16 Nauwa gusembayangna dokokuge hapote-Na kamanadana, Nyiyo na yiguge kanyurru kulha nedo ta atemu, waige kuaha ledeni Wadbihha,
\v 17 tannam Kristus ka engana dauwu nedo ta atemi waige hatena tannam miyo kam kalarta monna kam hapuyo nedo tamanawara,
\v 18 monna miyo kam oledi tangngada ata katengna kam antage bam yappawe bataudage maniuwolage, monno lurage, monna madehtage, monna kiddige manawara nai Kristus.
\v 19 Bataudage neda, miyo kole bamtadawe manawaranai Kristus karehiwe tangngage angta miyo kapannumi waige tangngage bannaa Allah.
\p
\v 20 Tabara Nyiyo, kamakge rayige karehi majabola walta tangngage haraida monno hangada yitta.
\v 21 Tabarana Nyilah kamanada nedo taka lingngora hatena monno nedotai Yesus Kristus tabarana tangna kahulleka ata kahha wal murri-wal murri. Amin.
\c 4
\cl Kawukku 4
\s Kesatuan Tubuh Kristus
\p
\v 1 Oro bataudge, nauwa, ata paha tama tagallu oroi Mori, duhara gim miyo kam morha kaha merada bamaikagim habebe bamu hibawe.
\v 2 Waige tangage libawa ate monno maluj'ja, loppo maloya, kamu hatagu-hatagu bikta lar tamanawara,
\v 3 karun pangatage dokuge kulham bam karawawe hawuna tangahu lar kama katti moli kama ringna.
\v 4 Dukka dahege bada dage kawuna tau, monno hawuna Waddi, kaha merada miyo bamaika gimi tawu hamanne wali banna wali bamaikagimi.
\v 5 Wuyi Mori da, wu hatena, wu hareha.
\v 6 Wu Allah monno wu Ama wali tanga ge, kadaudete tangngage, ledege tangngage, monno lar tangngage.
\p
\v 7 Tabollo, tabarada yitta tangngage dihha-dihha Nayida dage kanyurru dokuge ukrage marada Kristus.
\v 8 Nyiwe oroge, matakkiwe, “Nyi napanne be tahadau kama dehta, Nyi na yappai ata ha lokata, monno nayiwe marada ate tabara kadadi ata.”
\p
\v 9 Kole hatakkiwe, “Nyi na panne,” walle taudajalage Nyi banna burru tahadau li bawa ta pannutana?
\v 10 Nyi, kaburru, Nyijalah kapanne rehi madehta wali tanga ge langta dajalage Nyi kanna panuwe tangngage.
\v 11 Nyi karagge nyiwe, tabarada ledu limman, nabi-nabi yida katakiwe Lina ege ate, tangngada kajawa ana bebe, lohho kaha nuawa monno kaha akka,
\v 12 kaha inyakaiyi tangngada ata katengna lar taha ulla kaha nukkwe dau kade dangage tau wai Kristus,
\v 13 lodo yitta tangngage kadikkige hawuna hatena monno tadaiyi Ana Allah, halina ata katuna, dokuge ukra katum kama nuju rewana kabanna tai Kristus.
\p
\v 14 Nyi batauda dagege, yitta walle hil lakawamada haki'ika oro ngalung monno kakodo nuttu nimmida oro rereha panua, matipu kadadi ata, angta monno matipu manyarha.
\v 15 Tabalge, takwe tena lar tama nawara, yitta enga tummu hoda walta tangage tabara na Nyi, ba-Nyiyo katagge, nai Kristus.
\v 16 Waali tabarada tangngage ngihida mapaha monno hakat hamera dajalage kanna hawudi lede madulla tangadi kaluta. Nyiduwe dihha-dihha bada pahadayi dauda, tauna kanna tummuwe kaenga nyiwe bana hakadewe taudauna larta manawara.
\s Cara Hidup yang Benar dalam Kristus
\p
\v 17 Nyidawe ge, lugdamoge bag pahira gimige lartai Mori, illam hiltuja dai morha ata aika hatena, kamorha waige paha ngadana kaliloko.
\v 18 Pah ngadada yida nadadiwe banna pagtage monno daha watka wikkna ta morhai Allah.
\v 19 Ate kamma padda yida naka ronga bewe monno nayiwe tauna tamorha kama'ana waige dadarada.
\v 20 Lodoge, wale tauda damage hadage bam hanuawa tubai Kristus.
\p
\v 21 Tauna miyo bam range bewe tubana Nyi monno baha nuawa begimmi lar ta Nyiyo, dokubege katena lartai Yesus.
\v 22 Baitage hada morha kadadi ate kamemana hakolena walta hada morhana ka tibe, kataudana rada aika dahai tamorha kajiraka kama tipu.
\v 23 Haberu la ngahu paha ngadamu.
\v 24 Hanukdawe morha ata kaberu, pahadadi lar pahadadinai Allah waige tija monno katenengna aikahadukka.
\p
\v 25 Tanyiduwe ge, waige bamu baitage kapalleka, maitangamge kamhanewe dage tubage katena tabara ole atamu oroge yitta kaha olebaina wali tau kaha wuna.
\v 26 Bankaduwu nyiyo tabollo illam rayikana jala. Illa kahha bantama ka mata lado til banimu.
\v 27 Illam nyikanni mahiggo kabalka.
\v 28 Ata kedu be, ilna hillu kedu ka lage. Atnaha dahhahoge nyiyo ba ri-ri kalutana ullana monno pahadawe ha ulla kadahaki waidi limma dauna nyiyo kada dauna kanna dadiwe banna bawe tabara ole atana.
\p
\v 29 Illam pahaikage hanewe manyarha banna huge walta bamu, tabollo dukka dahege hanewe kadahha kaharukkai olem ata kabaige waige hanewemmu kadda kanyurru waige tuba yida karangewe.
\v 30 Illam hama yillai Ngahu katengnai Allah, oro Nyila kataugimmi tada, ta lado hawal.
\v 31 Baitad tangngadi kapadu, but ate lar, bani, hagabba wikna, monno hanewe halang lira wikna, taudajalage tangngage japata, hama rauwudi walta tabaramu.
\v 32 Pahada dakiwe lagahara yau monno olemmu, kadakige atem kamaluj'ja, monno hawali-wali wikna, tauna Allah lar tai Kristus banna hawal j'alagimmi dimmi.
\c 5
\cl Kawukku 5
\p
\v 1 Nyiwe batauge, dadimlah dokuni'i Allah kataunaa lakawa-lakawa kahade pena manawara.
\v 2 Morhamla tatillu manawara, katauna Kristus banna manawara yitta loppo banna yiwe taudau-Na tuttuda yitta diha wuwe maraka lohho dihha wuwe manuta kahahada bau buratana tabara nai Allah.
\p
\v 3 Tanyiduwe illa dakage morh a marihaka ohho dumo morha manyarha, lohho dumo kama'ana lohho wal takda hingwe illage oronage hinna kataudana walle nateng langmage taa tillu kangote ata murraha.
\v 4 Ila dakadi panewe aika dana, panewe kama gabba, lohho kawolloka awa, pabut ate danga, aika tuba, yaanyiduwe tabalge, takkawe wai-wai balumu.
\v 5 Nyiwe mi tada mige, kahaada hira ata kamarihaka, ata katada lopo wal ata manyarha, ata bara marapu walena dadi mawe banna kolena hadauna kawaha parehana Kristus loppo Allah.
\p
\v 6 Ila daka ata katippum miyo banna waige panewena kawohoka oroge radde kataudana, yidda illa padadi tangngage but ate nai Allah tabarana lakawa-lakawa ka aroge li loko.
\v 7 Kataudage, illammu pakahha wikkam tabarada ole panewedi.
\v 8 Ullege miyo tapagtahomi tanyoduwe patauge tama gahakama nami tabanai Mori, morhamlah kataudana lakawa-lakawa kamma gakaha.
\v 9 Wuge kamma gakaha yidda duyi ngara dukkadi kadahha, katijana, lohho wal katena.
\v 10 Banna kabakage mayegage padauge aga linna daahowe kayanna nage atenai Mori.
\v 11 Illam dok'kana bam ngalawe tatillu parayi kapagtana aika dadi pahuda dangage wuge, tanyiduwe padedaladi tangadi rade parayi.
\v 12 Oroge batakiyi harayi kabunyida haa make danganyi.
\v 13 Tanyiduwe, ngaradukkadi paha dedala oro magahara engandadi ge bada pik etayi.
\v 14 Oroge ngara dukkada kabada dedobe yidaduyi kama gakaha, Nyiwe oroge, malina dadiwe, “Kademi, ta miyo kadukkalawe dura! Kademge walta jonga dalara ata mate, lohho Kristus engage banna pamagakaha tabaramu.”
\p
\v 15 Inna, pamatrage patidge waige wal kalak atemu agalinna dahowe morhammu, illam tujja dai nade ata mate kalita, dadi ulla ata kahada angta tada.
\v 16 “Waidahage mahiggo kadana, “Kam dadige hada kadahha orogere nade lado patudda hadda japatai.
\v 17 Yiwe batauge, illa na dadi kawu wu ata kabangnga, tada patidda pogela agawe hakabu atena Mori Nyiwela.
\v 18 Illa nayannawu oro we anggur oronage kataudana walle nama yanna mage, ta nyiduwe kanna bankagimi Wad katengna.
\v 19 Kamu pawukana panewe tangara dukkami, waini lawiti, manyanyi ege ate, manyanyi rohani, lohho rayige mahadi kata baranai Mori kawal ta lak atemu.
\v 20 Rayige mahadi madaika wai ba lummini tangara dukkadi kadahha tabaranai Allah, Ama, lohho tangara Mori da yitta Kristus Yesus. 
\s Nasihat untuk Suami dan Istri
\p
\v 21 Libawa kiwula tabara nade olemu tatillu madauta ni'i Kristus.
\p
\v 22 Pa inya- pa inya, libawa kiwu la tabara laimu, kataudana tabaranai Mori.
\v 23 Oronage, diha wu ha ama ta dihha bat umma kapala nan ole ummana, kataudana tai Kristus nyi kapalage dihha wu jemaat, nyiduwe taumma, lohho Nyidau kapa tolka mane maraiyi.
\v 24 Nyi batauge, katauna dihha wu jemaat banna libawa tabanai Kristus, tauna jalage dihha wu pa inya naha libawa wikdahona takab hareha laina tangara dukkadi agayi parayina.
\p
\v 25 Ngara dukkami pa ama- pa ama manawara kinni ole umma mu kataunai Kristus banna manawarage jemaat lohho banna yiwe tau dau-Na tutge jemaat.
\v 26 Tannammu kadda tenglangna lohho bana pamuraha dadi, naliwe napa murraha waidi we lohho ege ate.
\v 27 Oro batauda dage, Kristus nadadiwe banna marakawe wu jemaat waige ta taudau-Na tatillu kamanadana, aika manu jira akta, lohho wal ulla nakaruda matada dajalage jemaat kadda teng langna lohho illa manu ladage morhada.
\p
\v 28 Tauda jalage ngara dukkami pa ama- pa ama manawara dahoni ole ummamu kataudana tau daumu bam manawarage. Baiyaduyi kamanawaran ole ummana manawara nage taudauna.
\v 29 Oronage walle ladamani wu ata kabutge ate tau dauna tanyiduwe engage banna karawawe taudajalage Kristus banna karawa jemaat.
\v 30 Oroge yitta wudada ledu limmana.
\v 31 Nyiwe batauge, dihha wukabani na ijakahodi amana-inyana lohho engage banna pawu dangani ole ummana tannam yida walle da dadi duda atama tabolo wu heyi.
\v 32 Nyiwe wu rahasia aika anana, mag takgimige tabara tatillu paduwu danga dani Kristus monno jemaat.
\v 33 Nyidawe batauge, disa-disa kam manawaramni ole ummami kataudana tau daumi lohho wu ha inya enga daho ge banna kangak'kani laina.
\c 6
\cl Kawukku 6
\s Nasihat untuk Anak-Anak dan Orang Tua
\p
\v 1 Lakawa-lakawa, taukid hida ata katumi ledini Mori oronage nyida hoe katena.
\v 2 “Taukidi hida amamu monno inyammu,” inne nyidawe Li ukpareha kadihhana hadoku hawaimi ha'tukku,
\v 3 “tannam kanna hadahawe morhamu monno kanna malauwaige lolo ngahum tapanutana.”
\p
\v 4 Ha'ama-ha'ama, illiam rayikadage anamu tangada ha pa'aha ate dangada, tabollo hamatudayi yidda kamayannana monno ha ullanai Mori.
\s Nasihat untuk Hamba dan Tuan
\p
\v 5 Haa'ata-ata taukidi hida rada morimi kadana tapanutana lohho kangakkini monno kayi'ikakini lohho muraha ate tjja dahowe tai Kristus.
\v 6 Illam tujja kayi ata-ata aika ullana ha'ulla ha'eta dahena ata kahadaha nage atena ata, tabollo yitta ha'ata-atanai nai Kristus karayige hakabu atenai Allah kawalta kalaku ate.
\v 7 Ha'nukwe waige kalaku atemu tuj'jawe tai Mori walle tuttu ata pimawe.
\v 8 Oronage, bamu tadawe, baha atayi monno ata hoila, mobana rayikage kadaha, Mori natauge tangage tabaraada.
\p
\v 9 Mori-mori rayi jala kige tabarada ha'ata-atam. Ha'ngahuwela bam hatu'ula kam tada wela wal Morimi lohho Mori da yid'da ha mera dani ta sorga, monno Nyiyo wallena na pede manna ata bana manawara.
\s Pakailah Seluruh Senjata Allah
\p
\v 10 Begge, kam kullha dawu tai Mori monno ta kuaha-Na.
\v 11 Waidi tangadi hagannanai Allah, Tannam kam kulha waige bam gabadi kabalka.
\v 12 Oronage, harunni hanangida wale gabbana ka'na monno ra'dama dage, taboolo gabbana kapareha-kapareha pannutana, hakulha-hakullha pannutana kapagtana, monno bhabana wad kakulha kawaltai kabalka kadana ta langta.
\v 13 Mo batauge, wayidi tangakahadi hangadanai Allah tannam kam ta tagora ba'am kage lado kabokala, monno tangadi kam dede didra kawu.
\p
\v 14 Mo, kaam dede did'dara, lohho kam ajjerage kalarbage hatenamu tabaggemu, monno halikalabge katijana.
\v 15 Monno hali kopa leduge lohho hadinyaka li ege ate kamaringina.
\v 16 Tangakahadi ngalaiyi toda hatena mi kam paddayi pana latti kawaltai kabalka.
\v 17 Ngalai, top bahi ha tolka danga lohho kito kaleka Wadbihha, nyidduwe Li bihha madinai Allah.
\v 18 Kam sembayangna gadi monno lado waini Wad katengna lohho tangadi sembayang monno hakaraiyimmu. Tatil sembayangummu, hadinyaka wikkim lohho tangadi hama nuddumu lohho kam kariwe tangakahadi tuba ata ka tengna.
\p
\v 19 Smbayang jala kiga duggu tannammu bgu bugrakage bagu, hatakki hayidaga tabaragu tannam kailla gu madautawa baggu takwe ha'nappu Li ege ate.
\v 20 Oronage Li ege atela, halewa ha koga. Sembayangga tannam kaillag madautawa bagtakwe ba'aga linna dahowe katena baggu takwe.
\s Salam Terakhir
\p
\v 21 Tikhikus, olebai oleha tenagu hamanawaragu monno ha atanai Mori, ig tak gimige tangkahadi tabara tangngam dimmi kam tadawe ba aga linnawe hapaddagu monno harayigu.
\v 22 Nauwa mema ig halewa minni tabaram rade ha aro, nyiduwe kam tadawe kawal tabarama monno yida howe kaha maddo gimege atemu.
\p
\v 23 Mol kamaringna tabarami ole bai-ole bai ole hatenagu, monno manawara kamaringna kawal da tai Allah, Ama monno Mori Yesus Kristus.
\v 24 Maring malala da ole gimmi tangngami ata kamanawarani Mori da yitta, Yesus Kristus, lohho manawara aika hama yilla.