lmv-x-levuka_reg/67-REV.usfm

\id REV
\ide UTF-8
\h Vakatakila
\toc1 Vakatakila
\toc2 Vakatakila
\toc3 rev
\mt Vakatakila
\c 1
\cl Wase 1
\p
\v 1 Ai Vakatakila ki Jisu Karisito, ka solia vi koya na Kalou me varaitakia vi ira na nonai talatala na ka sa voleka ni yaco mai; a sa tala ko koya na nona agilose me tukunia vi Joni na nonai talatala:
\v 2 o koya ka tukunia na vosa ni Kalou, ki nai tukutuku ki Jisu Karisito, ki na ka kece lia sa raicia ko koya.
\v 3 Sa kalougata ko koya sa wilikia, ki ira era sa rogocia na vosa ni parofisai koya, ka vabautia na ka sa volai kinia; ni sa voleka na kena gauna.
\p
\v 4 KO JONI vi ira nai soqosoqo lewe ni lotu e vitu mai Esia: Me nomudou na loloma, ki na vacegu, maivi koya sa bula ni kua, ka bula eliu, ka na bula voki lia emuri: maivi iratou voki lia na Yalo e vitu eratou sa tiko e na mata ni nonai tikotiko-vaturaga;
\v 5 maivi Jisu Karisito voki lia, na dautukutuku yalodina, na ulumatua vi ira era sa tu cake voki mai na mate, ki na nodra Turaga levu voki lia na tui e vuravura. Vi koya sa lomani ita, ka savai ita mai na nodai valavala ca e na nona dra dina,
\v 6 a sa qisi ita me da tui ka bete vua na Kalou ki Tamana; me sa caka vi koya na varokoroko ki na lewa ka yali ni mudu. Emeni.
\p
\v 7 Raicia, sa qai mai ko koya e na o: ka na raici koya na matada kece lia, ko ira voki lia era a suaki koya: ena tagi sara e na vukuna na vimataqali kece lia e vuravura. Me vaka lia koya. Emeni.
\v 8 Sa tukunia na Turaga na Kalou, Oi au ga na Alifa ki na Omeka, ai vatekivu ki nai vataotioti, o koya ka bula eliu, ka bula ni kua, ka na bula voki lia emuri, na Kaukauwa.
\p
\v 9 Koi au ko Joni, na wekamudou voki lia, ki nai tokani e na vivacacani, ki na matanitu ki na vosota ni Jisu, au a tiko e na yanuyanu ko Patimo, e na vuku ni vosa ni Kalou, ki nai tukutuku i Jisu.
\v 10 Kirau a tiko vokilia ki na Yalo Tabu e na siga ni Turaga, ia ka'u a rogocia e dakuqu na domo levu, e vaka na davui,
\v 11 ni sa tukunia, Oi au na Alifa ki na Omeka, ko koya sa liu sara, ko koya ena muri sara voki lia: ia, Na ka ko sa raicia, mo vola e nai vola, ka vayadia ki nai soqosoqo lewe ni lotu e vitu mai Esia: ki Efeso, ki Simurina, ki Perikamo, ki Caetaira, ki Sariti, ki Filatelifia, ki Leotisea.
\v 12 Au a qai rai vuki me'u raici koya ka vosa mai vi au. Ia ni'u sa rai vuki, sa vitu nai tutu-ni-cina koula ka'u sa raicia;
\v 13 ia sa tu e dua e na kedra maliwa nai tutu-ni-cina e vitu, e vataki koya na Luve ni tamata, sa vaisulu e nai sulu sa yaco sara ki na yavana, ka vau na lomaserena e nai vau koula.
\v 14 Sa vulavula na uluna ki na drau ni uluna me vaka na vutika ni sipi, me vaka na vulavula ni uca-vulavula; ka sa vaka voki lia na yameyame ni buka na matana;
\v 15 ia na yavana sa vaka na parasa makumakualiliva me vaka ni sa varirigi e na kuro; a sa vaka na vadugu ni wai e levu na domona.
\v 16 Sa tauria e na ligana i matau e vitu na kalokalo: ia ka sa qai mai na gusuna nai seleiwau gata ka batirua; ia na matana sa vaka na mata-ni-siga ni sa cila vakaukauwa.
\v 17 Ia ni'u sa raici koya, ka'u sa bale sara ki yavana me vaka e dua sa ciba. A sa tabaki au e na ligana i matau, ka tukunia vi au, Kakua ni rere; Koi au ko koya sa liu sara, ko koya ena muri sara voki lia,
\v 18 o koya sa qai Bula; ka'u a mate eliu, ka raicia, au sa bula ka yali ni mudu, Emeni; au sa tauria voki lia nai dola ki etesi ki na mate.
\v 19 Ia na veika ko sa raicia oti mo vola, ki na veika sa tu, ki na veika ena yaco mai muri,
\v 20 na ka vuni ni kalokalo e vitu, ko a raicia e na ligaqu i matau, ki nai tutu-ni-cina koula e vitu: A kalokalo e vitu sa nodra i talatala voki lia nai soqosoqo lewe ni lotu e vitu: ia nai tutu-ni-cina e vitu ko a raicia, nai soqosoqo lewe ni lotu e vitu.
\c 2
\cl Wase 2
\p
\v 1 Mo volavola voki lia vua nai talatala ni soqosoqo lewe ni lotu mai Efeso; Sa tukunia na veika koya ko koya sa tauria na kalokalo e vitu e na ligana i matau, o koya sa qai voli e na maliwa ni tutu-ni-cina koula e vitu:
\v 2 Au sa kila na nomu i valavala, ki na nomu oca ki na nomu dauvosotia, ni ko sa yali voki ni vosoti ira era sa ca; o sa vatovolei ira voki lia era sa tukunia era sai apositolo, a ra sa yali, o sa kilai ira ni ra sa daulasu lia:
\v 3 ia ko sa lomavinaka lia, ka vosotia tiko, ka oca e na vuku ni yacaqu, ka yali ni guca.
\v 4 Ia ka so lia na ka ko sa ca kinia, e na vuku ni ko sa dainia na nomu loloma ka tu vi iko eliu.
\v 5 Mo nanumia lia na ka ko sa lutu tani mai kinia; ia mo vivutunitakia, ka caka na cakacaka taumada; ia kevaka sa yali, ka'u na qai vasauri mai vi iko, ka yadia tani na nomu i tutu-ni-cina mai na kena tikina, kevaka ko sa yali ni vivutuni.
\v 6 Ia na ka voki lia koya sa tu vi iko, ni ko sa catia na nodra i valavala nai tokani i Nikola, koya ka'u sa catia voki lia koi au.
\v 7 O koya sa vadaligana, me mani rogocia sara na ka sa tukunia na Yalo Tabu vi ira na visoqosoqo lewe ni lotu: Vi koya sa gumatua ka'u na solia me kania na kau ni bula, ko ya sa tu e loma ni Parataisi ni Kalou.
\p
\v 8 MO volavola voki lia vua nai talatala ni soqosoqo lewe ni lotu mai Simurina: Sa tukunia na veika koya ko koya sa liu sara ka muri sara, o koya ka mate, a sa qai bula voki:
\v 9 A sa kila na nomu cakacaka, ki na nomu dauvararawataki, ki na nomu dravudravua (ia ko sa vutuniyau lia), ki na nodra vosa vacaca era tukunia era sa Jiu, ka ra sa yali, era sai vavakoso voki lia i Setani.
\v 10 Kakua ni rerevakia e dua na ka ko na vosotia: raicia, na tevoro ena daini ikodou eso ki na vale ni vivesu, mo dou vatovolei kinia; ia dou na vararawataki ka bogi tini: dou gumatua mo dou yacovia na mate, au na qai solia vi ikodou nai sala ni bula.
\v 11 O koya sa vadaligana, me mani rogocia sara na ka sa tukunia na Yalo Tabu vi ira na visoqosoqo lewe ni lotu. O koya sa gumatua sara ena yali ni ca e nai karua ni mate.
\p
\v 12 MO volavola voki lia vua nai talatala ni soqosoqo lewe ni lotu mai Perikamo: Sa tukunia na ka koya ko koya sa tauria nai seleiwau batirua:
\v 13 Au sa kila na nomu cakacaka, ki na yasana ko sa tiko kinia, sa tiko voki lia kinia nai tikotiko i Setani: ia ko sa tauria matua na yacaqu, ia ko sa yali ni cakitakia na noqu lotu e na siga sa vatusai au dina kinia ko Anitipasa, o koya sa vamatei e na ikodou maliwa, a yasana sa tiko kinia ko Setani.
\v 14 Ia ka so lia na ka ko sa ca kinia, e na vuku ni sa tiko vi iko ko ira era sa vabautia nai vavuvuli i Pelami, o koya ka vavulici Pelaki me dainia na vivacalai e na matadra na luve i Isireli, me ra kania na ka sa vacabori ki na vimatakau, me ra dauyalewa voki lia.
\v 15 Sa tiko voki lia vi iko ko ira sa vatavulicia tiko na nodra i vavuvuli nai tokani i Nikola, koya na ka ka'u sa catia.
\v 16 Mo vivutuni mada; kevaka e yali, au na qal vatotolo sara yani vi iko, ka vivala ki ira e nai seleiwau ni gusuqu.
\v 17 O koya sa vadaligana, me mani rogocia sara na ka sa tukunia na Yalo Tabu vi ira na visoqosoqo lewe ni lotu: Au na solia vi koya sa gumatua, me kania na mana vuni, au na solia voki lia vua na vatu vulavula, a vatu lia ko ya ena volai kinia na yaca vou e yali e dua me kila, o koya lia sa tauria sara.
\p
\v 18 Mo volavola voki lia vua nai talatala ni soqosoqo lewe ni lotu mai Caetaira: Sa tukunia na veika koya na Luve ni Kalou, o koya sa vaka na yameyame ni buka na matana, ki na yavana e vaka na parasa makumakualiliva:
\v 19 Au sa kila voki lia na nomu cakacaka, ki na dauloloma, ki na dauviqaravi, ki na vadinatia, ki na nomu dauvosotia, ki na nomu daucakacaka; ia koya emuri sa uasivia ko ya sa liu.
\v 20 Ia sa vica lia na ka ko sa cala kinia, ni ko sa vosotia na yalewa ko ya ko Jesepeli, o koya sa vatokai koya voki lia me parofita, me vavulici ira ka daini ira na noqu tamata me ra dauyalewa, ka kania na ka sa vacabori ki na vimatakau.
\v 21 Ia ka'u a solia vua na gauna me vivutunitakia kinia na nona dautagane; a sa yali ni via vivutuni.
\v 22 Raicia, ka'u na daini koya ki nai mocemoce, ki ira era sa dauyalewa vata kaya ki na rarawa levu, kevaka era sa yali ni vivutunitakia na nodra i valavala.
\v 23 Ia ka'u na vamatei ira na luvena e na mate; ia ena kila kinia na visoqosoqo lewe ni lotu kece lia ni'u sa dikevia na ivi ki uto ni tamata; ia ka'u na solia voki lia vi ikodou yadua me vaka na nomudou i valavala.
\v 24 Ia ka'u sa tukunia kivi ikodou, ki ira sa vo mai Caetaira, ko ira kece voki lia era sa yali ni vabautia nai vavuvuli koya, ko ira era sa yali ni kila na ka titobu ki Setani, me vaka voki lia na ka era sa vosatakia; au na yali ni taucia vi ikodou na ka tani e bibi.
\v 25 Ia na ka sa tu vi ikodou, dou tauria matua ka malua ka'u na qai voki yani.
\v 26 Ia ko koya sa gumatua sara, ka vabautia na noqu cakacaka me yaco mada nai vataotioti, au na solia vua me lewa na vimatanitu:
\v 27 ia ena lewai ira ko koya e nai titoko kaukamea: ena vorolaki ira me ra matailalai me vaka na vibilo ni dautuli bilo: io, me vaka na ka ka'u sa rawatia mai vi Tamaqu.
\v 28 Ia ka'u na solia voki lia vua na kalokalo i vola siga.
\v 29 O koya sa vadaligana, me mani rogocia sara na ka sa tukunia na Yalo Tabu kivi ira na visoqosoqo lewe ni lotu.
\c 3
\cl Wase 3
\p
\v 1 Mo volavola voki lia vua nai talatala ni soqosoqo lewe ni lotu mai Sariti: Sa tukunia na veika koya ko koya sa tauria na Yalo ni Kalou e lewe vitu, ki na kalokalo e vitu: Au sa kila na nomu cakacaka, ni sa yacamu loa lia na bula, ko sa mate lia.
\v 2 Mo vatawa, ka vakaukauwatakia na ka sa vo vi iko ga, o koya sa voleka ni mate; ni'u sa yali ni raicia na nomu cakacaka me vinaka sara ena mata ni Kalou.
\v 3 Vananumia na nomu vabautia ki na nomu rogocia, ka tauria matua, ka vivutuni. Ia kevaka ko na yali ni vatawa, au na qai yani vi iko me vaka na daubutako, ia ko na yali ni kila na tiki-ni-siga ka'u na qai yani kinia vi iko.
\v 4 Sa tu lia vi iko mai Sariti e lewe vica lia era sa yali ni vadukadukalitakia na nodra i sulu; a ra na qai voli ki au e nai sulu vulavula: ni ra sa yaga voki lia.
\v 5 O koya sa gumatua, ena vaisulu e nai sulu vulavula; au na yali ni bokocia na yacana mai nai vola ni bula, ia ka'u na tukunia na yacana e na mata i Tamaqu, e na matadra voki lia na nona agilose.
\v 6 O koya sa vadaligana, me mani rogocia sara na ka sa tukunia na Yalo Tabu vi ira voki lia na visoqosoqo lewe ni lotu.
\p
\v 7 MO volavola voki lia vua nai talatala ni soqosoqo lewe ni lotu mai Filatelifia: Sa tukunia na veika koya ko koya sa yalosavasava, o koya sa dina, o koya sa tauria nai dola i Tevita, o koya sa dolavia, ka yali na tamata me sogotia; ka sogotia, ka yali na tamata me dolavia:
\v 8 Au sa kila na nomu cakacaka: (raicia, au sa dolavia e matamu e dua na darava, ka yali na tamata sa sogotia rawa:) sa tu valailai lia vi iko na kaukauwa, ia ko sa tauria tiko lia na noqu vosa, ka sa yali ni cakitakia na yacaqu.
\v 9 Raicia, ka'u na lewai ira nai vavakoso i Setani, era sa tukunia era sa Jiu, ia ka ra yali, era sa lasu lia; raicia, ka'u na lewa vi ira me ra qai mai me ra cuva ki yavamu, me ra kila ni ka'u a lomani iko.
\p
\v 10 Ni ko sa vabautia na noqu vosa mo vosotia lia, ka'u na maroroi iko voki lia e na gauna ni dauvivatovolei, ko ya ena qai mai ki vuravura taucoko, me vatovolei ira sa tiko e vuravura.
\v 11 Raicia, ka'u na qai vatotolo yani: tauria matua na ka sa tu vi iko, me kakua ni yadia na nomu i sala vaturaga na tamata tani.
\v 12 Au na lesi koya sa gumatua me duru e na vale ni noqu Kalou, ia ena yali ni qai tani yani ki tautuba: ia ka'u na volai koya e na yaca ni noqu Kalou, ki na yaca ni koro ni noqu Kalou, ko Jerusalemi vou, o koya sa qai sobu mai lomalagi mai vua na noqu Kalou: ia na yacaqu vou.
\v 13 O koya sa vadaligana, me mani rogocia sara na ka sa tukunia na Yalo Tabu vi ira na visoqosoqo lewe ni lotu.
\p
\v 14 MO volavola voki lia vua nai talatala ni soqosoqo lewe ni lotu mai Leotisea: Sa tukunia na veika koya na Emeni, o koya sa dautukunia na ka dodonu ka dina, ai vatekivu ni cakacaka ni Kalou:
\v 15 Au sa kila voki lia na nomu cakacaka, o sa yali ni batabata se katakata: au sa vinakatia mo batabata se katakata.
\v 16 Ni ko sa katakata valailai lia, ka yali ni batabata se katakata, ka'u na luaraki iko sara lia mai na gusuqu.
\v 17 Ni ko sa tukunia tiko, Au sa vutuniyau, ka levu tu na noqu i yau, ka yali na ka ka'u sa dravudravua kinia; ia ko sa yali ni kila ni sai iko lia na ka lomani, ka valoloma, ka dravudravua, ka mataboko, ka televua:
\v 18 au sa vavulici iko mo mai volia vi au na koula sa vatovolei e na bukawaqa, mo vutuniyau kinia; ki nai sulu vulavula, mo vaisulu kinia, me kakua ni rairai na nomu televua e vivamaduataki; mo lumutia voki lia na matamu e nai lumu ni mata, mo rai rawa.
\v 19 O ira kece lia ka'u sa lomania, ka'u sa vunaucia ka cudruvia: mo gumatua kinia, ka vivutuni.
\v 20 Raicia, ka'u sa tu e na mata ni darava, ka tukituki: kevaka sa rogocia na domoqu e dua na tamata, ka dolavia na darava, au na curu vua, ka varaiyavi vata kaya ka na varaiyavi vata voki lia ki au ko koya.
\v 21 Au na solia vua sa gumatua sara me tiko vata ki au e na noqu i tikotiko-vaturaga, me vaka ka'u sa gumatua, ka tiko sobu e nai tikotiko vaturaga ni Tamaqu.
\v 22 O koya sa vadaligana, me mani rogocia sara na ka sa tukunia na Yalo Tabu vi ira voki lia na visoqosoqo lewe ni lotu.
\c 4
\cl Wase 4
\p
\v 1 Sa oti koya kau a qai raicia, sa dola e dua na darava mai lomalagi: ia na vosa taumada kau a rogocia sa vaka sa vosa vei au na davui; ka tukunia, qai cake mai ke, au na vatakila vei iko na veika ena yaco ena gauna mai muri.
\v 2 Sa qai curumi au vasauri na yalo tabu ka raicia, sa caka nai tikotiko vaturaga mai lomalagi, a sa dua sa tiko kinia.
\v 3 Ia ko koya sa tiko kinia sa vaka nai rairai me vaka vokilia na vatu jasipa kei na satiusa; A sa dua na drodrolagi sa vavolivolita nai tikotiko vaturaga, sa rairai me vaka na emeralita.
\v 4 A sa ruasagavulu ka va nai tikotiko sa vavolivolitia na i tikotiko vaturaga; ia kau a raicia e lewe ruasagavulu ka va na matua sa tiko enai tikotiko; era sa vaisulu vulavula; a sa vaisala voki lia na uludra ena i sala koula.
\v 5 A sa qai mai nai tikotiko vaturaga na livaliva kei na kurukuru kei na vosa; a sa vitu na cina ni buka sa caudre tiko ena mata ni tikotiko vaturaga, o ira koya na yalo ni Kalou e ratou lewe vitu.
\v 6 A sa tu voki lia ena mata ni tikotiko vaturaga e dua na ka sa vaka na wasa iloilo, sa makare sara me vaka na karisitala. A sa tiko e va na ka bula e loma ni tikotiko vaturaga, ka vavolivolitia a sa vamatana kece lia na yagona na matadra kei na dakudra.
\v 7 Ia sa vaka na laioni nai matai ni ka bula, a sa vaka voki lia na luve ni pulumokau nai karua, a sa mata vatamata nai katolu, a sa vaka na ikeli vatabana nai kava.
\v 8 O iratou koya na ka bula eratou sa lewe va eratou sa tauyaono na tabadratou; a sa robotia na lomadratou na matadra; ia eratou sa yali ni bau cegu e na siga se na bogi, era tukunia tiko lia, E dodonu, e dodonu, e dodonu, na Turaga na Kalou Kaukauwa, o koya ka bula eliu, ka sa bula edaidai, ena bula voki lia emuri.
\p
\v 9 Ia ni ratou sa varokoroko ko iratou na ka bula ko ya vi koya sa tiko e nai tikotiko-vaturaga, o koya sa bula yali ni mudu, ka ratou sa dokai koya, ka vavinavinaka vua,
\v 10 sa qai cuva sobu ko ira na qase e lewe ruasagavulu ka va e na mata i koya sa tiko e nai tikotiko-vaturaga, ka varokoroko vi koya sa bula lia ka yali ni mudu, ka dainia na nodra i sala e na mata ni tikotiko-vaturaga, ka tukunia,
\v 11 Ikonu na nitou Turaga ki na nitou Kalou, sa dodonu me caka vi ikonu na varokoroko ki na vidokadokai, ki na kaukauwa: ni sai ikonu ka bulia na ka kece lia, era sa buli lia ka tu dei voki lia e na nomuni lewa.
\c 5
\cl Wase 5
\p
\v 1 Au a qai raici koya sa tiko e nai tikotiko-vaturaga ka tauria nai vola na ligana i matau, ko ya sa volai eloma e dakuna voki lia, sa dregati tu e na drega e vitu.
\v 2 Au a raicia na agilose kaukauwa voki lia, o koya sa kaci e na domo levu, ka tukunia, O cei sa yaga me tevukia nai vola, ka cecegia na kena drega?
\v 3 A sa yali e dua mai lomalagi, se e vuravura, se e ruku i vuravura, sa rawatia me tevukia nai vola, se rai kinia.
\v 4 Ia ka'u a tagicakia valevu, ni sa yali ni kune e dua e yaga me tevukia nai vola, se rai kinia.
\v 5 Sa qai tukunia vi au e dua na matua, Mo kakua ni tagi: raicia, sa gumatua na Laioni ni yavusa i Juta, na Waka i Tevita, me tevukia nai vola me cecegia voki lia na kena drega e vitu.
\v 6 Au a qai raicia e loma ni tikotiko-vaturaga ki na kedratou maliwa na ka bula e lewe va, ki na kedratou maliwa na matua, e dua na Lami sa vaka sa qai vamatei, e vitu na nonai leu e uluna, ka vitu na matana, o iratou lia koya na Yalo ni Kalou e lewe vitu eratou sa talai ki vuravura taucoko.
\v 7 A sa qai mai ko koya ka yadia nai vola mai na liga i matau i koya sa tiko e nai tikotiko-vaturaga.
\v 8 Ni sa yadia nai vola ko koya, sa cuva sobu e na mata ni Lami ko iratou na ka bula e lewe va, ki ira na matua e lewe ruasagavulu ka va era tauyadua na api, ki na vibilo koula sa sinai e na ka boi vinaka, koya na nodra masu na tamata yalosavasava.
\v 9 Era sa meketakia na meke vou, ka tukunia, Oi ikonu sa yaga me yadia nai vola, me cecegia voki lia na kena drega: ni ikonu a vamatei, ka voli kimamu e na nomuni dra maivi ira kece lia na vimataqali, ki na duivosavosa, ki na vimatanitu, ki na vivanua, me kimamu nona na Kalou:
\v 10 ia ikonu sa lesi kimamu me kimamu tui, me kimamu bete voki lia, vua na nimamu Kalou; ia kimamu na lewa tiko e vuravura
\v 11 Au a qai raicia, ia ka'u a rogocia na domo ni agilose e lewe vuqa, o ira era sa vavolivolitia nai tikotiko-vaturaga, ki iratou na ka bula ki ira na matua: ia na kedrai wiliwili sa oba vatini na udolu, ka vuqa voki na udolu;
\v 12 era sa tukunia e na domo levu, Sa yaga na Lami ka vamatei, me soli vua na kaukauwa, ki nai yau, ki na vuku, ki na qaqa, ki na vidokadokai, ki na varokoroko, ki na vavinavinaka.
\p
\v 13 Ia kau a rogocia na ka bula kece lia mai lomalagi, ki vuravura, ki na ruku i vuravura, ki na wasawasa, ki na ka kece lia sa tu kinia, ni ra tukunia, Me caka vua sa tiko e nai tikotiko-vaturaga, vi koya voki lia na Lami, na vavinavinaka, ki na varokoroko, ki nai ukuuku, ki na kaukauwa, ka yali ni mudu.
\p
\v 14 Ka ratou sa vaemeni ko iratou na ka bula e lewe va. A ra sa cuva sobu ko ira na matua e lewe ruasagavulu ka va, ka varokoroko vi koya sa bula tiko lia ka yali ni mudu.
\c 6
\cl Wase 6
\p
\v 1 Ia ka'u a raicia ni sa cecegia e dua na drega na Lami, ia ka'u a rogocia e dua vi iratou na ka bula e lewe va, sa vaka na kurukuru na domona, ka tukunia, Qai mai.
\v 2 Ka raicia, au a qai kunea na ose vulavula: ia sa tauria na dakai titi ko koya sa vodo tiko kinia; a sa soli vua e dua nai sala-vaturaga; a sa qai yani ko koya e na gumatua, ka me gumatua valevu.
\v 3 IA ni sa cecegia ko koya nai karua ni drega, au sa rogocia nai karua ni ka bula sa tukunia, Qai mai.
\v 4 A sa dua tani voki na ose sa qai yani, sa damudamu: a sa soli vua sa vodo tiko kinia me dainia tani e vuravura na sautu, ka me ra viraravui tiko lia: a sa soli vua nai seleiwau levu.
\v 5 IA ni sa cecegia ko koya nai katolu ni drega, au sa rogocia nai katolu ni ka bula sa tukunia, Qai mai. Ia ka'u a raicia, ka raicia, sa dua na ose loaloa; ia ko koya sa vodo tiko kinia, sa tauria nai varau e na ligana.
\v 6 Au a rogocia e dua na domo e na kedratou maliwa na ka bula e lewe va, sa tukunia, Me volitakia nai varau witi e na dua na pene, ka tolu nai varau parile e na dua na pene; ka raicia mo kakua ni vacacana na waiwai se na waini.
\v 7 IA ni sa cecegia ko koya nai kava ni drega, au sa rogocia nai kava ni ka bula sa tukunia, Qai mai.
\v 8 Ia ka'u a varaicia, ka raicia, sa dua na ose vulavula ca: ia na yaca i koya sa vodo tiko kinia ko Mate, ka sa muri vata kaya ko Etesi. A sa soli vua me rawa nai kava ni kena wase ko vuravura, me vamatei e nai seleiwau, ki na viakana, ki na mate ca, ki na manumanu kila ki vuravura.
\p
\v 9 IA ni sa cecegIa ko koya nai kalima ni drega, au sa raicIa e ruku ni cabocabo-ni-soro na yalodra era a vamatei e na vuku ni vosa ni Kalou, ki na vuku voki lia ni nodra i tukutuku;
\v 10 era sa kaci e na domo levu, ka kaya, sa vaevei na kena dede, na Turaga yalododonu ka dina, ni ko sa yali ni lewa ka cudruvakia na nimamu dra vi ira era sa tiko e vuravura?
\v 11 A sa soli vi ira yadua nai sulu vulavula; a sa tukunia vi ira, me ra cegu tiko mada valailai, me oti mada mai ko ira na nodra i tokani ki na wekadra, era na vamatei mada me vataki ira.
\p
\v 12 IA ka'u sa raicia ni sa cecegia ko koya nai kaono ni drega, ka raicia! Sa tavuki vakalevu na vanua: a sa loaloa sara na mata-ni-siga me vaka nai sulu vutika ni manumanu loaloa, a sa cadra na vula;
\v 13 a sa qeqera ki vuravura na vikalokalo ni lomalagi, e vaka na lolo sa qeqera na vuana ni sa yali ni dreu, ni sa kuretakia na cagi kaukauwa.
\v 14 A sa qai tani yani na lomalagi me vaka nai vola balavu sa vivigi vata; a sa kau tani mai na nodra i tutu na ulu-ni-vanua kece lia ki na yanuyanu kece lia.
\v 15 Ia ko ira na tui ki vuravura, ki na tamata era kena turaga, ki na tamata vutuniyau, ki ira na vu-ni-valu, ki ira na tamata qaqa, ki ira kece na bobula, ki ira kece lia nai taukei, era sa vunitaki ira e na viqara ki na viuluvatu e na viulu-ni-vanua;
\v 16 a ra sa tukunia ki na viulu-ni-vanua ki na viuluvatu, Lutuki kimamu, ka vunitaki kimamu mai na mata i koya sa tiko e nai tikotiko-vaturaga, mai na nona cudru voki lia na Lami:
\v 17 sa qai yaco mai na siga dina ni nona cudru; ia ko cei ena yatedei me na tu dei rawa?
\c 7
\cl Wase 7
\p
\v 1 Ia ni sa oti na veika koya ka'u a raicia na agilose e le va eratou sa tu e na tutu i vuravura e va, ka tauria na cagi e va kei vuravura, me kakua ni liwa ki vuravura na cagi, se ki na wasawasa, se ki na dua na kau.
\p
\v 2 Ia ka'u a raicia e dua tani voki na agilose sa qai mai na tu-i-cake, a sa tu vua na vatu ni drega nei koya na Kalou bula; a sa kaci e na domo levu ko koya vei iratou na agilose e le va, o iratou sa soli kinia me ratou vacacani vuravura kei na wasawasa,
\v 3 ka tukunia, Tei kakua mada ni vakacacani vuravura, se na wasawasa, se na kau, ka malua me keitou vola mada na yadredra na tamata ni noda Kalou.
\v 4 Au a rogocia na kedrai wiliwili era sa volai: sa lewe dua na drau ka vasagavulu ka va voki lia na udolu, sa volai vi ira kece lia na nodra viyavusa na luve i Isireli.
\v 5 Vi ira na yavusa i Juta sa volai e lewe tinikarua na udolu. Vi ira na yavusa i Rupeni sa volai e lewe tinikarua na udolu. Vi ira na yavusa i Kata sa volai e lewe tinikarua na udolu.
\v 6 Vi ira na yavusa i Aseri sa volai e lewe tinikarua na udolu. Vi ira na yavusa i Nafitalai sa volai e lewe tinikarua na udolu. Vi ira na yavusa i Manasa sa volai e lewe tinikarua na udolu.
\v 7 Vi ira na yavusa i Simioni sa volai e lewe tinikarua na udolu. Vi ira na yavusa i Livai sa volai e lewe tinikarua na udolu. Vi ira na yavusa i Isaka sa volai e lewe tinikarua na udolu.
\v 8 Vi ira na yavusa i Sepuloni sa volai e lewe tinikarua na udolu. Vi ira na yavusa i Josefa sa volai e lewe tinikarua na udolu. Vi ira na yavusa i Penijamini sa volai e lewe tinikarua na udolu.
\p
\v 9 Sa oti koya ka'u sa varaicia, ka raicia, sa dua nai soqosoqo levu sara lia, e yali e dua na tamata e wilikia rawa, mai na vivanua kece, ki na vimataqali, ki na vimatanitu, ki na duivosavosa, era sa tu e na mata ni tikotiko-vaturaga, ki na mata ni Lami, era vaisulu e nai sulu vulavula, ka tauria nai viu e na ligadra;
\v 10 a ra sa kaci e na domo levu, ka tukunia, A vu ni bula na noda Kalou, o koya sa tiko e nai tikotiko-vaturaga, vua na Lami voki lia.
\v 11 O ira kece lia na agilose era sa duri tu ka vavolivolitia nai tikotiko-vaturaga, ki ira na matua ki na ka bula e lewe va, ka cuva vatoboicu e na mata ni tikotiko-vaturaga, ka varokoroko vua na Kalou,
\v 12 ka tukunia, Emeni: Na vamolimoli, ki nai ukuuku, ki na vuku, ki na vavinavinaka, ki na varokoroko, ki na kaukauwa, ki na qaqa, me nona lia na noda Kalou ka yali ni mudu. Emeni.
\p
\v 13 Sa qai tukunia e dua na matua, ka tarogi au, O cei beka ko ira koya sa vaisulu e nai sulu vulavula? Ka ra qai beka maivei?
\v 14 Au sa qai tukunia vua, O iko, saka, ko sa kila. A sa tukunia vi au ko koya, O ira koya era sa qai mai na vivararawataki levu, ia era sa sava nodra i sulu, ka vavulavulatakia e na dra ni Lami.
\v 15 O koya era sa tiko kinia e na mata ni tikotiko ni Kalou, a ra sa qaravi koya e na siga ki na bogi e nona vale-ni-lotu; ia ena tiko vata ki ira ko koya sa tiko e nai tikotiko-vaturaga.
\v 16 Era na yali voki ni viakana, se viasomi voki; ena yali ni kati ira na siga, se dua tani na katakata.
\v 17 Ni na vakani ira na Lami sa tiko e na loma ni tikotiko-vaturaga, ka na tuberi ira ki nai vurevure ni wai bula: ia ena tavoya kece lia na Kalou na wai ni mata mai na matadra.
\c 8
\cl Wase 8
\p
\v 1 Ia ni sa cecegia oti ko koya nai kavitu ni drega, sa vanomodi ko lomalagi ka oti e dua na veimama ni aua.
\v 2 Au sa raicia na agilose e lewe vitu eratou sa tu e na mata ni Kalou; a sa soli vi iratou e vitu na davui.
\v 3 A sa dua tani voki na agilose sa qai mai ka qai tu e na mata ni cabocabo-ni-soro, a sa tauria na miqa koula; a sa soli valevu vua na ka boivinaka, me caboria vata kei na masumasu ni tamata yalosavasava kece lia e nai cabocabo-ni-soro koula sa tu e na mata ni tikotiko-vaturaga.
\v 4 Ia sa kuvu cake vata na kubou ni ka boivinaka, ki na masumasu ni tamata yalosavasava, mai na ligana na agilose ki na mata ni Kalou.
\v 5 A sa yadia na miqa na agilose, ka vasinaitia e na bukawaqa ni cabocabo-ni-soro, ka dainia ki vuravura: ka sa tubu na kudru ni vosa, ki na kurukuru, ki na livaliva, ki na tavuki ni vanua.
\p
\v 6 Ia ko iratou na agilose e lewe vitu, eratou sa tauria na davui e vitu, eratou sa varautaki iratou me ratou uvucia.
\v 7 O koya na kenai matai sa uvucia, ka sa qai muri mai na uca-cevata sa viwaki vata ki na bukawaqa ki na dra, a sa dai ki vuravura: a sa vakamai kinia nai katolu ni wase ki vuravura, ki nai katolu ni wase ni kau, a sa vakamai kece lia na co drokadroka.
\v 8 Sa qai uvucia nai karua ni agilose, a sa vaka e dua na ulu-ni-vanua levu sa caudre tu e na bukawaqa; sa dai ki na wasawasa a sa vuki kinia me dra nai katolu ni wase ni wasawasa;
\v 9 a sa mate kinia nai katolu ni wase ni ka kece lia sa bula e na wasawasa; a sa varusai voki lia nai katolu ni wase ni viwaqa.
\v 10 Sa qai uvucia nai katolu ni agilose, a sa dua na kalokalo levu sa lutu mai lomalagi, a sa caudre me vaka na cina, a sa lutu ki nai katolu ni wase ni viuciwai, ki na vivurevure-ni-wai;
\v 11 ia na yaca ni kalokalo ko Gagaduvaduva; a sa gaga kinia nai ka tolu ni wase ni wai; a sa lewe levu kinia na tamata sa mate e na wai ni ra sa vagagai.
\v 12 A sa uvucia nai kava ni agilose, a sa yavitia kinia nai katolu ni tiki ni mata-ni-siga, ki nai katolu ni tiki ni vula, ki nai katolu ni wase ni vikalokalo: ia nai katolu ni kena wase vi ira sa vabutobutotaki a sa yali voki lia ni rarama nai katolu ni wase ni siga, ka sa vaka voki lia kinia na bogi.
\p
\v 13 Ia ka'u a raicia, ka rogocia e dua na ikeli sa vuka e na maliwa ki lomalagi, a sa tukunia e na domo levu, E ca, e ca, e ca, vi ira sa tiko e vuravura, e na vuku ni domo ni nodratou davui na agilose e lewe tolu, o koya sa bera ni uvu!
\c 9
\cl Wase 9
\p
\v 1 A sa uvucia nai kalima ni agilose, ia ka'u a raicia e dua na kalokalo sa lutu mai lomalagi ki vuravura: a sa soli voki lia vua nai dola ki bulubulu e yali ni vabotona.
\v 2 A sa dolavia ko koya nai bulubulu e yali ni vabotona; a sa kuvu cake na kubou mai bulu, me vaka na kubou ni lovo levu; a sa butobuto na mata-ni-siga, ki na macawa, e na vuku ni kubou sa kuvu cake mai bulu.
\v 3 A sa qai tani mai na kubou na vodre me tiko e vuravura: a sa soli vi ira na kaukauwa, me vaka na nodra kaukauwa na batibasaga ki vuravura.
\v 4 A sa varotia vi ira me ra kakua ni vacacania na co e vuravura, se dua na ka karakarawa, se dua na kau; ko ira lia na tamata sa yali ni volai e na yadredra nai vatakilakila ni Kalou.
\v 5 A sa soli vi ira me ra kakua ni vamatei ira, ka me ra vararawataki ira lia ka vula lima: ia na nodra rarawa e vaka na rarawa ni sa katia na tamata na batibasaga.
\v 6 E na siga koya era na domomate ko ira na tamata, ia ena yali ni yacovi ira: era na gadrevia me ra mate, ia ena dro tani maivi ira na mate.
\v 7 Ia na kedrai rairai na vodre sa vaka na ose sa varau me qai ki valu: ia sa toka e uludra na ka sa vaka nai sala koula, ia na matadra sa vaka na mata ni tamata.
\v 8 Ia na drau ni uludra sa vaka na drau ni ulu ni yalewa, ia na batidra sa vaka na batidra na laioni.
\v 9 Ia nai sasabai ni lomaseredra, sa vaka nai sasabai kaukamea ni seredra; ia na cakucaroba ni tabadra sa vaka na vadugu ni qiqi-ni-valu, ki na ose e vuqa ni ra sa cici ki nai valu.
\v 10 Ia na buidra sa vaka na bui ni batibasaga, a sa tiko e buidra na batidra: a ra sa rawatia kinia me vararawataki ira na tamata ka vula lima.
\v 11 Ia sa dua na nodra tui, na agilose ni bulubulu e yali ni vabotona, a yacana e na vosa va-Iperiu ko Apatoni, ia na yacana e na vosa va-Kirisi ko Apolioni.
\p
\v 12 Sa dua na ka ca sa oti; ia ka raicia, sa rua voki na ka ca sa bera ni qai mai.
\p
\v 13 Ia sa uvucia nai kaono ni agilose, ia ka'u sa rogocia e dua na vosa mai na tutuna momoto vava ni cabocabo-ni-soro koula sa tu e na mata ni Kalou,
\v 14 sa tukunia vua nai kaono ni agilose sa tauria na davui, Sereki iratou na agilose e lewe va, eratou sa vesu tu mai na uciwai levu ko Uferetisi.
\v 15 A sa sereki ko iratou na agilose e lewe va, a ratou sa varau me dua na nodratou aua, ka dua na nodratou siga, ka dua na vula, ka dua na yabaki, me ratou vamatea nai katolu ni wase ni tamata.
\v 16 Ia na kedrai wiliwili nai valu sa rua na drau na milioni era sa vodo ose: ia ka'u a rogocia na kedrai wiliwili.
\v 17 Ia ka'u a raici ira na ose va koya e na raivotu, ki ira sa vodo tiko kinia, ai sasabai ni lomaseredra na bukawaqa, ki na vatu damudamu, ki na sulifure: ia na ulu ni ose e vaka na ulu ni laioni; a sa qai tani mai na gusudra na bukawaqa ki na kubou ki na sulifure.
\v 18 A ra sa vamatei ko ira nai katolu ni wase ni tamata, e na ka ca tolutolu koya, e na bukawaqa, kei na kubou, ki na sulifure, sa qai mai na gusudra.
\v 19 Ni sa tu na nodra kaukauwa e na gusudra, ki na buidra: ni sa vaka na gata na buidra, a ra sa vaulu, a ra sa caka kinia na ka ca.
\v 20 Ia ko ira na tamata sa vo era sa yali ni vamatei e na mate ca koya, era sa yali ni vivutunitakia na cakacaka ni ligadra, me ra kua ni varokoroko ki na tevoro eso, ki na matakau koula, ki na siliva, ki na parasa, ki na vatu, ki na kau: koya sa yali ni rai rawa, se rogo rawa, se qai voli:
\v 21 era sa yali voki lia ni vivutunitakia na nodra daulaba, se na nodra cakacaka vatevoro, se na nodra dauyalewa, se na nodra daubutako.
\c 10
\cl Wase 10
\p
\v 1 Ia ka'u a raica e dua voki na agilose kaukauwa sa qai sobu mai lomalagi, sa vakaisulu e na o: a sa vakaisala e na drodrolagi, sa vaka voki lia na mata-ni-siga na matana, a sa vaka voki lia na duru bukawaqa na yavana;
\v 2 A sa tauria nai vola lailai e na ligana, ka sa tevuki tu: a sa butukia na dela ni wasawasa ko koya e na yavana i matau, kei na dela ni vanua e na yavana i mawi,
\v 3 a sa kaci e na domo levu, me vaka na laioni sa tagi: ia ni sa kaci oti ko koya, sa qai cavutia na nodratou vosa na kurukuru e vitu.
\v 4 Ia ni ratou sa cavutia na nodratou vosa na kurukuru e vitu, au sa vakarau me'u volavola: au sa qai rogocia na vosa mai lomalagi, sa tukunia vei au, Mo dregatia na ka sa cavutia na kurukuru e vitu, ka kakua ni vola
\v 5 Ia na agilose ka'u a raicia ni sa tu e na wasawasa kei na vanua, sa dodokia cake na ligana ki lomalagi,
\v 6 a sa bubului vei koya sa bula yali mudu, o koya ka buli lomalagi, kei na veika sa tu kinia, kei vuravura, kei na veika sa tu kinia, kei na wasawasa, kei na veika sa tu kinia, ni na yali voki e dua na gauna me vo:
\v 7 ia e na gauna ni domo i koya nai kavitu ni agilose, ni sa vatekivu ko koya me uvucia, ena vakaoti vinaka na ka vuni ni Kalou, me vaka na nona vosa vinaka vei ira na nonai talatala na parofita.
\p
\v 8 Sa qai vosa voki vei au na domo ka'u a rogocia mai lomalagi, ka tukunia, Mo qai ka yadia nai vola lailai sa tevu tu, o koya sa tauria na liga ni agilose sa tu e na wasawasa kei na vanua.
\v 9 Au sa qai qai vua na agilose, ka tukunia vua, Solia mai vei au nai vola lailai. A sa tukunia vei au ko koya Mo tauria, ka kania sara; ia ena gaga e ketemu, ka na kamikamica lia e gusumu me vaka na oni.
\v 10 Au sa qai tauria nai vola lailai mai na liga ni agilose, ka'u sa qai kania voki; a sa kamikamica e gusuqu me vaka na oni: ia ni'u sa kania oti, sa gaga sara na ketequ.
\v 11 A sa tukunia vei au ko koya, O na parofisai vokilia vei ira na veimatanitu e vuqa, kei na veivanua, kei na duivosavosa, kei na tui eso.
\c 11
\cl Wase 11
\p
\v 1 A sa dua na gasau sa soli vi au e vaka nai titoko; a sa tu na agilose, ka tukunia, Mo tu cake, ka varautakia na vale ni Kalou, ki nai cabocabo-ni-soro, ki ira era sa lotu kinia.
\v 2 Ia na lomanibai e taudaku ni vale, kakua ni varautakia: ni sa soli koya kivi ira na vimatanitu tani kece lia: ia era na butukia na koro tabu ka vula vasagavulu ka rua.
\v 3 Ia ka'u na solia voki lia vi rau na noqu i talatala, me rau parofisaitakia rawa ka siga e dua na udolu ka rua na drau ka onosagavulu, ka rau na vaisulu voki lia e nai sulu taga.
\v 4 Na kau ruarua koya na yacana na olive, ki nai tutu-ni-cina e rua sa tu e na mata ni Turaga ki vuravura.
\v 5 Ia kevaka e dua na tamata sa via vacacani rau, sa qai mai na gusudrau na bukawaqa, ka kania sara na nodrau meca: ia kevaka e dua na tamata sa via vacacani rau, ena vamatei lia va koya.
\v 6 Erau sa rawatia me sogoti lomalagi, me kakua ni tau na uca e na gauna erau sa vunau kinia: erau sa rawatia voki lia me vukicia na wai kece me dra, me rau yaviti vuravura voki lia e na mate ca kece, me vaka na nodrau itovo.
\v 7 Ia ni rau sa vaotia na nodraui tukutuku, ena vivala ki rau na manumanu sa qai mai bulubulu sa yali ni vabotona, ena kaukauwa vi rau ko koya, ka vamatei rau.
\v 8 Ia ena dai lowa tu na yagodrau sa mate e na saqata ni koro levu, sa vatokai vaibalebale ko Sotoma ki Ijipita, sa lauvako voki lia kinia e na kauveilatai na nodrau Turaga.
\v 9 Ia ko ira na vimatanitu ki na vimataqali ki na duivosavosa ki na vivanua kece lia, era na raicia na yagodrau sa mate ka tolu na siga ki na vimama ni dua voki na siga, a ra na yali ni dainia me buluti na yagodrau e nai bulubulu.
\v 10 O ira voki lia era tiko e vuravura era na reki ni rau sa mate, ka marau valevu, a ra na dui visoliyakia na nodra ka ni loloma; ni rau sa vararawataki ira era sa tiko e vuravura koi rau na parofita koya.
\v 11 A sa oti e tolu na siga ki na veimama ni ka va ni siga, sa qai curumi rau na Yalo ni bula mai vua na Kalou, a rau sa duri tu kinia; a sa ka levu na rere sa kani ira era sa raici rau.
\v 12 A rau sa rogocia e dua na domo levu mai lomalagi sa tukunia vi rau, Drau qai cake mai ki ke. A rau sa qai cake ki lomalagi e na o; a sa raici rau ko ira na nodra meca.
\v 13 E na tiki-ni-siga lia ko ya sa tavuki valevu kinia na vanua, a sa bale nai katini ni wase ni koro, a sa lewe vitu na udolu na tamata sa vamatei, ni sa tavuki na vanua: o ira sa vo era sa rere, ka vavinavinakatakia vua na Kalou ki lomalagi.
\p
\v 14 Sa qai oti nai karua ni ka ca; ka raicia, sa qai vatotolo sara mai nai katolu.
\p
\v 15 SA qai uvu davui nai kavitu ni agilose; a sa muri eso na vosa sa domo levu mai lomalagi, sa tukunia, Na matanitu ki vuravura koya sa qai yaco me nona na noda Turaga, a nei koya na nona Karisito; ia ena lewa ko koya ka yali ni mudu.
\v 16 O ira na qase e lewe ruasagavulu ka va, era sa tiko e nodra i tikotiko e na mata ni Kalou, era sa cuva vatoboicu, ka varokoroko ki na Kalou,
\v 17 ka tukunia, Kitou sa vavinavinaka vi ikonu, na Turaga na Kalou Kaukauwa, ko ni sa bula ni kua, ko ni a bula eliu, ko ni na bula voki lia emuri; ni ikonu sa yadia vi ikonu na nomuni kaukauwa levu, ka lewa tiko.
\q1
\v 18 O ira na vimatanitu era sa cudru, ia sa yaco dina mai na nomuni cudru, ki na nodra gauna na mate, me ra saumia kinia, mo ni solia voki lia vi ira na nomuni talatala na parofita na kedrai sau, vi ira voki lia na tamata yalosavasava, vi ira voki lia era rerevakia na yacamuni, se ra turaga se ra tamata lalai; mo ni vakawabokotaki ira era sa vakawabokotaki vuravura.
\p
\v 19 A sa dola na vale-ni-lotu ni Kalou mai lomalagi, a sa rairai e na nona vale na kato ni vola ni viyalayalati: a sa qai muri na livaliva, ki na vosa, ki na kurukuru, ki na tavuki ni vanua, ki na uca-cevata levu.
\c 12
\cl Wase 12
\p
\v 1 A sa dua na ka levu e vivakurabuitaki sa rairai mai lomalagi; sa dua na yalewa sa vaisulu e na mata-ni-siga, a sa tu e ruku ni yavana na vula, a sa vaisala e na kalokalo e tinikarua:
\v 2 ia ni sa bukete sa qoqolou, ni sa taratara me vasucu.
\v 3 A sa dua voki na ka e vivakurabuitaki sa rairai mai lomalagi; sa dua na gata levu e damudamu, sa vitu na uluna ka tini na nonai leu, ka vitu nai sala-vaturaga sa toka e uluna.
\v 4 A sa yaratakia nai katolu ni wase ni kalokalo ni lomalagi na buina, ka daini ira ki vuravura: a sa tu e na mata ni yalewa na gata levu ni sa varau me vasucu, ka me kania sara na luvena ni sa qai sucu mai.
\v 5 A sa vasucumia ko koya na gonetagane, sa lesi me lewai ira na vimatanitu kece lia e nai titoko kaukamea: a sa yadi yani na luvena vua na Kalou, ki na nonai tikotiko-vaturaga voki lia.
\v 6 A sa dro na yalewa ki vikau, ki na dua na tikina ka varautakia na Kalou, me nona me ra vakani koya kinia ka dua na udolu ka rua na drau ka onosagavulu na siga.
\p
\v 7 A sa tubu nai valu mai lomalagi; o Maikeli ki ira na nona agilose era sa vivala ki na gata levu; a sa ia vata nai valu na gata levu ki ira na nona agilose,
\v 8 a ra sa yali ni gumatua: a sa yali voki ni kune e dua na nodra tikina mai lomalagi.
\v 9 A sa dai tani na gata levu, na gata makawa, a yacana na Tevoro, ki Setani, o koya sa temaki ira kece lia na kai vuravura: a sa dai ki vuravura, a ra sa dai vata kaya na nona agilose.
\v 10 Au sa rogocia e dua na domo levu mai lomalagi, sa tukunia, Sa qai yaco na bula, ki na kaukauwa, ki na matanitu ni noda Kalou, ki na kaukauwa ni nona Karisito: ni sa dai sobu ko koya sa daubitaki ira na wekada, o koya koya sa bitaki ira tiko lia e na mata ni Kalou e na siga ki na bogi.
\q1
\v 11 Era sa rawai koya e na vuku ni dra ni Lami, ki na vuku ni vosa era sa tusanakia; ia era yali ni taleitakia na nodra bula, era sa bole mate lia.
\q1
\v 12 O koya koya mo reki kinia na lomalagi, ki ikodou sa tiko kinia. Dou na ca koi ikodou sa tiko e vuravura ki na wasawasa: ni sa qai sobu vi ikodou na tevoro, a sa cudru valevu, ni sa kila ko koya ena yali ni dede na nona gauna.
\p
\v 13 Ia ni sa kunea na gata ni sa dai ko koya ki vuravura, sa qai vacacania na yalewa sa vasucumia na gonetagane.
\v 14 A sa rua na taba ni ikeli levu sa soli vua na yalewa, me vuka kinia ko koya ki na vikau ki na nona tikinia, sa laki maroroi kinia e na dua na gauna, kei na gauna voki eso, ki na vimama ni gauna, mai na mata ni gata.
\v 15 Ia na gata levu sa luarakia na wai mai na gusuna e vaka na dobui, me dave muria na yalewa, me vacirimia tani e na waluvu.
\v 16 A sa vukei koya na yalewa ko vuravura, ni sa dalaga na gusuna ko vuravura, ka sa tilomia na dobui sa luarakia na gata levu mai na gusuna.
\v 17 A sa cudru vua na yalewa na gata levu, ka laki ia na vivala ki ira na kena vo ni nona kawa, o ira sa vabautia na vosa ni Kalou, ka tauria tiko lia nai tukutuku ki Jisu.
\v 18 Ia na gata levu sa duri tu ena nuku ni matasawa.
\c 13
\cl Wase 13
\p
\v 1 Ia sa tu e na vinukunuku mai matasawa ko koya, ia ka'u a raicia e dua na manumanu sa qai cake mai na wasawasa, e vitu na uluna ka tini na nonai leu, a sa toka e na nonai leu nai sala-vaturaga e tini, a sa tu lia e na uluna na yaca ni dauvosavacacataki.
\v 2 Ia na manumanu ka'u a raicia sa vaka na lepate, a yavana sa vaka na yava ni pera, a gusuna e vaka na gusu ni laioni: a sa solia vua na nona kaukauwa dina na gata levu, kei na nonai tikotiko-vaturaga, me mai turaga levu kinia.
\v 3 Ia ka'u a raicia e dua na uluna e vaka sa vuetaki me mate kinia: a sa bula voki mai na nona vue ka voleka ni mate kinia: a ra sa kurabui kece lia na kai vuravura e na vuku ni manumanu.
\v 4 A ra sa varokoroko vua na gata levu, o koya sa solia na kaukauwa vua na manumanu: a ra sa varokoroko vua na manumanu, ka tukunia, O cei sa vaka na manumanu koya? O cei sa rawatia me rau vivala kaya?
\v 5 A sa soli vua na gusu me vosatakia na ka levu ki na vosa vacaca sara; a sa soli vua me turaga ka vula vasagavulu ka rua.
\v 6 A sa dalaga me vosa ca ki na Kalou, me vosavacacatakia na yacana, ki na nona vale, ki ira era sa tiko mai lomalagi.
\v 7 A sa soli vua me vivala ki ira na tamata yalosavasava, ka me rawai ira: a sa soli vua me turaga vi ira na vimataqali kece, ki na vimatanitu ki na duivosavosa, ki na vivanua.
\v 8 Ia ena varokoroko vua ko ira kece lia era sa tiko e vuravura, ko ira sa yali ni volai na yacadra e nai vola ni bula ni Lami sa vamatei mai nai vatekivu ki vuravura.
\v 9 Kevaka e dua sa vadaligana, me mani rogocia sara.
\v 10 O koya sa dauia na vivabobulataki ena vabobulataki; o koya sa ia na vivamatei e nai seleiwau ena mate voki lia e nai seleiwau. Koya na nodra vosotia ki na nodra vabautia na tamata yalosavasava.
\p
\v 11 Ia ka'u a raicia e dua tani voki na manumanu sa qai cake mai vuravura; ia sa rua na nonai leu me vaka na luve ni sipi, a sa vosa me vaka na gata levu.
\v 12 A sa tu vua na kaukauwa kece lia ni manumanu sa liu vua, ka vasaurarataki vuravura kinia ki ira sa tiko kinia me ra varokoroko vua na manumanu sa liu, o koya ka bula e na nona vue ka voleka ni mate kinia.
\v 13 Ia sa caka na ka levu e vivakidacalataki ko koya, a sa yadia mai lomalagi ki vuravura na bukawaqa e na matadra na tamata,
\v 14 a sa temaki ira era sa tiko e vuravura e na vuku ni cakacaka mana sa caka ko koya e na mata ni manumanu; a sa tukunia vi ira era sa tiko e vuravura, me ra caka na matakau me nona na manumanu sa lautia e nai seleiwau, ka sa bula tiko lia.
\v 15 A sa rawatia ko koya koya me solia na bula ki na matakau ni manumanu, me vosa rawa kinia na matakau ni manumanu, ka vavunia voki lia na nodra mate ko ira era sa yali ni via varokoroko ki na matakau ni manumanu.
\v 16 A sa vasaurarataki ira kece lia, na tamata lalai ki na turaga, o ira sa vutuniyau ki ira sa dravudravua, ai taukei ki na bobula, me volai e dua nai vatakilakila e na ligadra i matau, se na yadredra:
\v 17 ka me kakua ni vivoli e dua, o koya lia sa tu vua nai vola, se na yaca ni manumanu, se nai wiliwili ni yacana.
\v 18 Koya lia na vuku. O koya sa yalomatua me mani wilikia nai wiliwili ni manumanu; ni sai wiliwili ni tamata; ka sa kenai wiliwili e ono na drau ka onosagavulu ka ono.
\c 14
\cl Wase 14
\p
\v 1 Ia ka'u a varaicia, ka raicia, e dua na Lami sa tu ena ulu-ni-vanua ko Saioni, a sa tu vata kaya e lewe dua na drau ka vasagavulu ka va na udolu, sa volai ena yadredra na yacana kei na yaca i Tamana.
\v 2 Ia ka'u a rogocia e dua na domo mai lomalagi, e vaka na domo ni wai e levu, ia sa vaka na domo ni kurukuru levu: au a rogocia voki lia na domodra era qiria na nodra api:
\v 3 a ra sa meketakia na meke vou e na mata ni tikotiko-vaturaga, kei na matadratou na ka bula e va, kei na matadra na q: amatua sa yali e dua sa kila rawa na meke ko ya, o ira lia na le dua na drau ka vasagavulu ka va na udolu, era sa vabulai tu mai vuravura.
\v 4 O ira koya era sa yali ni ca kei na yalewa; ni ra sa yali ni viyacovi kaya e dua. O ira koya era sa muria na Lami e na veiyasana sa qai kinia ko koya. O ira koya era sa vabulai maivei ira na tamata, me rai sevu vua na Kalou kei na Lami.
\v 5 A sa yali ni kune e gusudra na lasu: ka ra sa yali ni cala.
\p
\v 6 IA ka'u a raicia e dua tani voki na agilose sa vuka e na maliwa kei lomalagi kei vuravura, a sa tauria nai tukutuku-vinaka e yali ni oti rawa, me vunautakia vei ira era sa tiko e vuravura, vei ira kece voki lia na vimatanitu, kei na vimataqali, ki na duivosavosa, ki ira na tamata,
\v 7 ka sa tukunia e na domo levu, Dou rerevakia na Kalou, ka varokoroko vei koya; ni sa yaco na nona gauna me lewa: ia dou varokoroko vi koya ka buli lomalagi, ki vuravura, ki na wasawasa, ki na vivurevure-ni-wai.
\v 8 A sa dua tani voki, nai karua ni agilose sa muri, ka tukunia, Sa bale, sa bale ko Papiloni, na koro levu, e na vuku ni sa vagunuvi ira kece lia na vimatanitu e na waini ni cudru ni nona dautagane.
\v 9 A sa muri rau nai katolu ni agilose, a sa tukunia e na domo levu, Kevaka sa dua na tamata sa varokoroko vua na manumanu na nona matakau, ka rawatia na nonai vatakilakila e na yadrena, se na ligana,
\v 10 ena somia ko koya na waini ni cudru ni Kalou, o koya sa sovarakia ka yali ni vawai ki na bilo ni nona cudru; ena vararawataki valevu voki lia e na bukawaqa ki na sulifure e na matadra na agilose yalosavasava, ki na mata ni Lami:
\v 11 a sa kuvu cake na kubou ni nodra yaluma ka yali ni mudu: a ra sa yali ni cegu e na siga se na bogi, ko ira sa varokoroko vua na manumanu kei na nona matakau, ki ira era sa vatakilakilataki e nai vatakilakila ni yacana.
\p
\v 12 Koya gona na nodra vosotia na tamata yalosavasava: sa tu eke ko ira era sa vakabautia na vosa ni Kalou, ka tauria tiko lia na vakabauti Jisu.
\v 13 Ia ka'u a rogocia e dua na vosa mai lomalagi, sa tukunia mai vei au, Vola, Sa kalougata mai na gauna koya ko ira na mate era sa mate ni ra sa tu vata kei na Turaga: sa tukunia na Yalo Tabu, Io, me ra vacegu mai na nodra cakacaka; ka sa muri ira na nodra i valavala.
\p
\v 14 Ia ka'u a varaicia, ka raicia, sa dua na o vulavula, ia sa dua sa dabe tiko ena o e vaka na Luve ni tamata, a sa dua nai sala koula vaturaga sa toka e uluna, a sa tauria e ligana e dua nai sele-takelo gata.
\v 15 A sa dua tani voki na agilose sa qai mai na vale-ni-lotu, a sa kaci e na domo levu vi koya sa tiko ena o, Vacurumia na nomu i sele-takelo, ka tamusukia: ni sa yaco na gauna ni tamusuki; ni sa rui dreu matua na sila kei vuravura.
\v 16 A sa vacurumia na nonai sele-takelo ki vuravura ko koya sa tiko e na o; a sa tamusukia kinia na vuana kei vuravura.
\v 17 A sa dua tani voki na agilose sa qai mai na vale-ni-lotu sa tu mai lomalagi, a sa tauria voki lia ko koya e dua nai sele-takelo gata. A sa dua tani voki na agilose sa qai mai na vale ni lotu sa tu mai lomalagi, a sa tauria voki lia ko koya e dua nai sele-takelo gata.
\v 18 A sa dua tani voki na agilose sa qai mai nai cabocabo ni soro, sa lewa rawa na bukawaqa! A sa kacivakia e na domo levu vi koya sa tauria nai sele takelo gata, ka tukunia, Vacurumia na nomu i sele-takelo gata, ka cebetia nai soso vua ni vaini kei vuravura; ni sa dreu matua sara na vua ni vaini.
\v 19 A sa vacurumia na agilose na nonai sele-takelo ki vuravura, ka cebetia nai soso vua ni vaini kei vuravura, ka dainia ki nai keli-ni-waini levu ni cudru ni Kalou.
\v 20 A sa butukia nai keli-ni-waini e nai bili ni koro, a sa qai mai nai keli-ni-waini na dra, a sa yala ki na wa-tarovi ni ose, me rua na drau na maili.
\c 15
\cl Wase 15
\p
\v 1 Ia ka'u a raicia e dua tani voki nai vatakilakila mai lomalagi, na ka levu e vivakidacalataki, e le vitu na agilose sa tauria e vitu na mate ca sa kenai otioti sara; ni sa vayacoria sara vi ira na cudru ni Kalou.
\p
\v 2 Ia ka'u a raicia e dua na ka e vaka na wasa iloilo sa viwaki vata kei na bukawaqa; ia ko ira era sa gumatua vua na manumanu, ki na nona matakau, ki nai wiliwili ni yacana, era sa tu e na wasa iloilo, a ra sa tauria na viapi ni Kalou.
\v 3 A ra sa meketakia na meke i Mosese nai talatala ni Kalou, ki na meke ni Lami, ka tukunia, A ka levu ka vivakurabuitaki na nomuni cakacaka, na Turaga na Kalou Kaukauwa; sa dodonu ka dina na nomuni valavala, oi ikonu na Tui ni vigauna kece lia.
\q1
\v 4 O cei me yali ni rerevaki ikonu, na Turaga, ka varokorokotakia na yacamunu? Ni sai ikonu lia sa yalosavasava: ko ira kece lia na vivanua era na qai mai ka cuva e matamunu; ni sa vatakilai mai na nomunu cakacaka dodonu.
\p
\v 5 Ia ka oti ka'u sa varaicia, ka raicia, sa dola tu na vale ni tikina tabu ni viyalayalati mai lomalagi:
\v 6 ia ko iratou na agilose e lewe vitu eratou sa qa mai na vale ni lotu, eratou sa tauria na mate ca e vitu, eratou vaisulu e na lineni savasava sara ka vulavula, a sa vau na lomaseredratou e na wa koula.
\v 7 A sa dua vi iratou na ka bula e lewe va sa solia vi iratou na agilose e lewe vitu na bilo koula e vitu sa sinai e na cudru ni Kalou, ko koya sa bula lia ka yali ni mudu.
\v 8 A sa sinai na vale-ni-lotu e na kubou mai nai ukuuku ni Kalou, mai na nona kaukauwa voki lia; a sa yali na tamata sa curu rawa ki na vale-ni-lotu, ena vayacoria mada eliu na mate ca e vitu sa tauria ko iratou na agilose e lewe vitu.
\c 16
\cl Wase 16
\p
\v 1 Ia ka'u a rogocia e dua na domo levu mai na vale-ni-lotu, sa tukunia vi iratou na agilose e lewe vitu, Dou qai, ka sovarakia yani na bilo e vitu ni cudru ni Kalou ki vuravura.
\v 2 A sa qai na kenai matai, a sa sovarakia na nona bilo ki vuravura; a sa tauvi ira na tamata na vidikoso ca e rarawa sara, o ira sa tu kinia nai vatakilakila ni manumanu, ki ira sa varokoroko ki na nona matakau.
\v 3 Ia nai karua ni agilose sa sovarakia na nona bilo ki na wasawasa; a sa vuki kinia me vaka na dra ni tamata mate: ia sa mate na ka kece lia sa bula voli e na wasawasa.
\v 4 Ia nai katolu ni agilose sa sovarakia na nona bilo ki na viuciwai ki na vivurevure-ni-wai; a ra sa vuki kinia me dra.
\v 5 Ia ka'u a rogocia na agilose ni viwai ni sa tukunia, Oi ikonu na yalododonu, o ni sa bula ni kua, o ni a bula eliu, o ni sa yalosavasava, ni ikonu sa lewa va koya.
\v 6 Ni ra sa vadavea na dra ni tamata yalosavasava ki na dra ni parofita ko ira koya, ko ni sa qai solia vi ira na dra me ra somia; sa dodonu me vakinia vi ira.
\v 7 Ia sa dua tani voki ka'u a rogocia mai nai cabocabo-ni-soro, sa tukunia, E vaka lia koya, na Turaga na Kalou Kaukauwa, sa dina ka dodonu na nomuni lewa.
\v 8 Ia nai kava ni agilose sa sovarakia na nona bilo e na mata-ni-siga; a sa soli vua me vakatakatai ira sara lia na tamata e na bukawaqa.
\v 9 A ra sa qesa na tamata ni sa katakata valevu, a ra sa vosavacacatakia na Kalou, o koya sa lewa rawa na vimate ca koya: a ra sa yali ni vivutuni me ra varokorokotakia na nona lewa.
\p
\v 10 Ia nai kalima ni agilose sa sovarakia na nona bilo ki nai tikotiko ni manumanu; a sa butobuto na nona matanitu; a ra sa katia na yamedra e na vuku ni rarawa,
\v 11 ka vosavacacatakia na Kalou ni lomalagi e na vuku ni nodra rarawa ki na nodra vidikoso, a ra sa yali ni vivutunitakia na nodra i valavala.
\v 12 Ia nai kaono ni agilose sa sovarakia na nona bilo ki na uciwai levu ko Uferetisi; a sa maca kinia na kena wai, me caramakia na nodra sala na tui mai na tu-i-cake.
\v 13 Ia ka'u a raicia e lewe tolu na yalo velavela eratou sa vaka na boto, eratou sa qai mai na gusu ni gata levu, mai na gusuna voki lia na manumanu, mai na gusuna voki lia na parofita vailasu.
\v 14 Ni ratou sa yalo ni tevoro ko iratou, eratou sa caka na cakacaka mana, a ratou sa qai yani vi ira na tui ni vivanua ki vuravura taucoko, me vasoqoni ira vata ki nai valu ni siga dina ko ya ni Kalou Kaukauwa.
\v 15 (Raicia, au sa qai mai me vaka na daubutako. Sa kalougata ko koya sa vatawa, a sa tauria na nonai sulu, de qai voli ka televua, ia ka ra raicia na nona televua.)
\v 16 A ratou sa vasoqoni ira vata e na vanua na yacana e na vosa va-Iperiu ko Amaketone.
\p
\v 17 Ia nai kavitu ni agilose sa sovarakia na nona bilo e na macawa; a sa rogo mai kinia na domo levu, mai na vale-ni-lotu mai lomalagi, mai nai tikotiko-vaturaga voki lia, a sa tukunia, Sa cakati oti.
\v 18 A sa rogo na domo ni vosa, ki na kurukuru, ka tibi na livaliva; a sa tavuki valevu na vanua, sa yali ni vakinia mai nai vatekivu ni nodra tiko e vuravura na tamata, ka me tavuki vakaukauwa, ka valevu vakinia.
\v 19 A sa tawase vatikitolu na koro levu, ia sa bale na vikoro e na vivanua; a sa mai vananumi ko Papiloni na koro levu e na mata ni Kalou, me soli kinia na bilo ni waini ni nona cudru waqawaqa.
\v 20 A sa tuba tani yani na viyanuyanu kece lia, ia na viulu-ni-vanua sa yali ni kune.
\v 21 A sa lutuki ira na tamata na uca-cevata levu mai lomalagi, a kena bibi e dua na taledi: a ra sa vosavacacatakia na Kalou ko ira na tamata e na vuku ni mate ca ni uca-cevata; ni sa ka levu sara na mate ca koya.
\c 17
\cl Wase 17
\p
\v 1 Sa qai mai vi au e dua vei iratou na agilosi e lewe vitu ka tiko vi iratou na bilo e vitu, ka tukunia vei au, “Qai mai, au na vatakila vi iko na nona cudruvi na yalewa koya sa dautagane valevu sa tiko e na bati ni wai levu:
\v 2 o koya era sa vibutakoci kaya ko ira na tui ki vuravura, a ra sa vamatenitakia ko ira na kai vuravura e na waini ni nona dautagane.
\p
\v 3 Sa qai yadia na yaloqu ko koya ki na vikau; ia ka'u a raicia e dua na yalewa sa vodo tiko e na dua na manumanu kulakula, ka sa levu na yacana sa vosavacacatakia kinia na Kalou, a sa vitu na uluna ka tini na nonai leu.
\v 4 A sa vaisulu na yalewa koya e nai sulu lokaloka ki nai sulu kulakula, sa vaiukuuku e na koula ki na vatu dredre voki lia, ki na mata-ni-civa, a sa tauria e ligana e dua na bilo koula sa sinai e na kena ca ki na kena dukadukali ni nona dautagane:
\v 5 a sa volai e na yadrena na yacana va koya, SA YALI NI KILAI, O PAPILONI NA KA LEVU, A TINADRA NA DAUTAGANE KI NA VI KA VASISILA KI VURAVURA.
\v 6 Ia ka'u a raicIa na yalewa sa mateni e na kedra dra na tamata yalododonu, kei na kedra dra na tamata era sa mate e na vuku i Jisu: ia ni ka'u a raicia, ka'u a kurabui valevu sara kinia.
\p
\v 7 A sa tukunia vi au na agilose, O sa kurabui e na vuku ni cava? Au na tukunia vi iko na kenai balebale vuni ni yalewa koya, ki na manumanu sa vodo kinia ko koya, o koya sa vitu na uluna ka tini na nonai leu.
\v 8 A manumanu ko a raicia sa bula eliu, a sa qai yali voki; ia ena qai cake mai bulubulu e yali ni vabotona, ena qai qai ki na rusa: ia era na kurabui kinia ko ira sa tiko e vuravura, o ira sa yali ni volai na yacadra e nai vola ni bula mai nai vatekivu ki vuravura, ni ra raicia na manumanu sa bula eliu, a sa yali voki, a sa tiko voki.
\v 9 Koya na loma sa tu kinia na vuku. Na uluna e vitu na ulu-ni-vanua e vitu, sa tiko kinia na yalewa koya.
\v 10 Ia sa lewe vitu na tui: e lewe lima sa bale, e dua sa tiko, e dua voki sa bera ni qai mai: ia ni sa qai mai ko koya, ena tiko vadede valailai.
\v 11 Ia na manumanu sa bula eliu, a sa qai yali voki, o koya koya nai kawalu, a sa dua vi ira na lewe vitu ko koya, ka sa qai ki na rusa.
\v 12 Ia nai leu e tini ko a raicia eratou sa lewe tini na tui, a ratou sa yali lia ni vamatanitu ni kua, a ratou sa kaukauwa ki koya na manumanu, me vaka na tui, e na dua lia na aua.
\v 13 O iratou koya eratou sa lomavata, ia eratou na solia na nodratou qaqa ki na nodratou kaukauwa vi koya na manumanu.
\v 14 O iratou koya eratou na vivala ki na Lami, ia sa na rawai iratou na Lami: ni sa Turaga vi ira na turaga ko koya, ki na nodra Tui na tui: ia ena gumatua voki lia ko ira sa tiko vata kaya, era sa kacivi, ka digitakia, ka lomadina.
\v 15 A sa tukunia vi au ko koya, Na viwai ko a raicia, sa tiko kinIa na yalewa dautagane, koya gona na vivanua ki na mataqali e levu, ki na vimatanitu, ki na duivosavosa.
\v 16 Ia nai leu e tini ko a raicia, ki na manumanu, eratou na cata na yalewa dautagane, a ratou na caka koya me dai ka me televua; ia eratou na kania na lewena, ka vakamai koya sara e na bukawaqa.
\v 17 Ni sa vavulicia na yalodratou na Kalou me ratou vayacoria na nona lewa, me ratou lomavata, me ratou solia na nodratou matanitu vua na manumanu, me vayacoria mada na vosa ni Kalou.
\v 18 Ia na yalewa ko a raicia, na koro levu ko ya, sa lewa vi ira na tui ki vuravura.
\c 18
\cl Wase 18
\p
\v 1 Ni sa oti na veika ko ya, au a qai raicia e dua voki na agilosi ni sa qai sobu mai lomalagi. A sa ka levu na nona kaukauwa, ka sa vararamataki vuravura taucoko na nona i serau.
\v 2 A sa kaci ena domolevu: Sa qai bale! Sa qai bale o Papiloni na koro cecere! Sa yaco me nodra i tikotiko na tevoro ki na yalo velavela; era sa bula lia kinia na vimataqali manumanu vuka duka ka catia valevu.
\v 3 Ni ra sa bale na veivanua kece lia ni ra sa somia na waini ni cudru ni nona dautagane, a ra sa vibutakoci kei na tui kei vuravura, a ra sa vutuniyau na tamata dau veivoli ena vuku ni nona dau garogaro.
\p
\v 4 Ia ka'u a rogocia e dua tani voki na vosa mai lomalagi, sa tukunia, Dou qai tani mai vua, oi ikodou na noqu tamata, mo dou kakua ni cala vata kaya, ka me kakua ni tauvi ikodou na nona mate ca.
\v 5 Ni sa yacovi lomalagi na nonai valavala ca, a sa nanumia na nonai valavala ca na Kalou.
\p
\v 6 Cudruvi koya me vaka na nona cudruvi ikodou, ka caka varua vua me varua me vaka na nonai valavala: ia na bilo sa vasinaitia ko koya, vasinaitia varua vua.
\v 7 Me vaka na nona dokai koya, ki na nona daugarogaro, solia vakinia vua na yaluma ki na rarawa: ni sa tukunia e lomana ko koya, Oi au na kuini ka'u sa tiko koya, ka'u sa yali ni yada, ka'u na yali ni kila na rarawa.
\v 8 O koya koya ena yaco vata kinia vua na mate ca e na dua na siga, a mate, ki na tagi, ki na dausiga; ia ena vakamai e na bukawaqa: ni sa kaukauwa na Turaga na Kalou sa cudruvi koya.
\p
\v 9 Ia ko ira na tui ki vuravura, era sa vibutakoci kaya ka daugarosa vata kaya, era na tagicakia, ka yasovakia, ni ra sa raicia na kubou ni kena kama,
\v 10 a ra na tu vayawa ni ra sa rerevakia na nona yaluma, ka tukunia, Isa! Isa! Na koro levu ko Papiloni, na koro kaukauwa ko ya! E na dua loa lia na aua sa yaco na nomu cudruvi.
\v 11 O ira voki lia na dauvivoli ki vuravura era na tagicakia ka yasovakia: ni sa yali na tamata me volia voki na nodra i yau:
\v 12 Ai yau ni vivoli na koula, ki na siliva, ki na vatu talei, ki na mata-ni-civa, ki na lineni matailalai, ki na ka lokaloka, ki na silika, ki nai sulu kulakula, ki na kau boi vinaka kece, ki na bilo tabua kece, ki na bilo kau dredre sara kece ki na parasa, ki na aironi, ki na vatu vivolavolai,
\v 13 ki na sinamoni, ki na macou, ki na ka boi vinaka ki nai lumu, ki na drega me vakamai, ki na waini, ki na waiwai, ki na madrai droka vinaka, ki na witi, ki na pulumokau, ki na sipi, ki na ose, ki na qiqi-ni-tamata, ki ira na bobula, ki na yalo ni tamata.
\v 14 Ia na vuata sa garovia na yalomu sa takali yani vi iko, ki na ka talei ki na ka vinaka sa qai tani vi iko, ia ko na yali sara ni kunea voki.
\v 15 A tamata era dauvivoli e na veika koya, a ra sa vavutuniyautaki e na vukuna, era na tu vayawa ni ra sa rerevakia na nona yaluma, era na tagi ka yaso,
\v 16 ka tukunia, Isa! Isa! Na koro levu ko ya! Ka vaisulu e na lineni matailalai, ki nai sulu lokaloka, ki nai sulu kulakula, ka vaiukuuku e na koula, ki na vatu dredre, ki na mata-ni-civa!
\v 17 A sa vaqeavutakia na ka kece lia koya e na dua loa lia na aua. O ira kece lia nai taukei ni waqa, ki ira kece lia e vodo e na waqa, ki ira na lewe ni waqa, ko ira kece lia sa dausoko me ra vivoli, era sa tu vayawa,
\v 18 ka ni ra sa raicia na kubou ni kena kama, era qolouvakia ka tukunia, A koro cava beka erau tautauvata ki na koro levu koya?
\v 19 A ra sa kabua ki na uludra na kuvu ni soso, ka qoqolou, ka tagi, ka yaso, ka tukunia, Isa! Isa! Na koro levu ko ya! Sa vavutuniyautaki e na vukuna ko ira kece lia nai taukei ni waqa sa soko voli e loma ni wasawasa e na vuku ni nona ka vaturaga! A sa vaqeavutakia e na dua loa lia na aua.
\p
\v 20 Mo dou reki sara e na vukuna, na lomalagi, ki ikodou nai apositolo ki na parofita; ni sa qai cudruvaki ikodou na Kalou ni sa ca ko koya.
\p
\v 21 A sa dua na agilose kaukauwa sa lavetia cake e dua na vatu e vaka na vatu levu i qaqi, a sa dainia ki loma ni wasawasa, ka tukunia, Ena vabalei vakaukauwa va koya na koro levu ko ya ko Papiloni, ka na yali sara ni kune voki.
\v 22 Ia ena yali sara ni rogoci voki e tikimu na domona sa dauqiri api, ki na dau-ni-vucu, ki na dauuvu bitu-ni-vatagi ki na davui; ena yali voki lia na matai, e mataitakia e dua na ka, me kune voki e tikimu; ena yali voki lia ni rogo voki e tikimu na rorogo ni vatu i qaqi;
\v 23 ena yali lia ni caudre voki e tikimu na rarama ni cina; ena yali voki lia ni rogo voki e tikimu na domo ni tagane sa qai vawati, se na domo ni yalewa sa qai vawati: o ira na nomu tamata dauvivoli eliu era sa tamata turaga ki vuravura; ni sa nomu i lawaki sa vacalai kece kinia na vivanua.
\v 24 A sa kune e tikina na kedra dra na parofita, ki ira na tamata yalosavasava, ki na kedra dra ko ira kece era a vamatei e vuravura.
\c 19
\cl Wase 19
\p
\v 1 Sa oti na veika koya, ka'u a rogocia na domodra na lewe levu mai lomalagi, era sa tukunia, Aleluya: A bula, ki na vavinavinaka, ki na varokoroko, ki na kaukauwa, me ia vua na noda Kalou:
\v 2 ni sa dina ka dodonu na nona lewa: ni sa lewai koya na yalewa ka dautagane valevu, o koya sa vadukadukalitaki vuravura e na nona dautagane, a sa saumia vi koya na kedra dra na nona tamata.
\v 3 A ra sa qai tukunia voki, Aleluya. A sa kuvu cake na kena kubou me yali ni mudu.
\q1
\v 4 A sa cuva sobu na qase e lewe ruasagavulu ka va, ki na ka bula e lewe va, a ra sa varokoroko vua na Kalou o koya sa tiko e nai tikotiko-vaturaga, ka tukunia, Emeni; Aleluya.
\v 5 A sa dua na vosa sa qai mai nai tikotiko-vaturaga, sa tukunia, Vavinavinaka ki na noda Kalou, oi ikodou kece lia na nona tamata, ki ikodou sa rerevaki koya, se dou tamata lalai se dou turaga.
\v 6 Au sa rogocia na ka e vaka na domo ni lewe levu, ka vaka na domo ni wai e levu, ka vaka na domo ni kurukuru levu, sa tukunia, Aleluya: sa lewa na Turaga na Kalou Kaukauwa sara.
\q1
\v 7 Tou marau ka reki, ka ia na varokoroko vi koya; ni sa yaco na vawati ni Lami, a sa varautaki koya vakai koya na watina-yalewa.
\q1
\v 8 A sa soli vua me vaisulu e na lineni matailalai, sa savasava ka lumilumisa: ia na lineni matailalai na nodra i valavala dodonu na tamata yalosavasava.
\p
\v 9 A sa tukunia vi au ko koya, Mo vola, Sa kalougata ko ira era sa kacivi ki nai varaiyavi ni vawati ni Lami. A sa tukunia vi au ko koya, Koya gona na vosa dina ni Kalou.
\v 10 Ia ka'u a cuva ki yavana me'u varokoroko vi koya. A sa tukunia vi au ko koya, Raicia, mo kakua: oi au na nomu i tokani, ka dua vi ira na wekamu era sa tauria tiko nai tukutuku ki Jisu; varokoroko vua na Kalou: ia nai tukutuku ki Jisu na yalo ni parofisai.
\p
\v 11 Ia kau a raici lomalagi ni sa dola tu, ka raicia sa dua na ose vulavula; o koya sa vodo kinia sa vatokai ko Dodonu ka Dina, a sa lewa vadodonu ko koya ka caka nai valu.
\v 12 A matana e vaka na yameyame ni buka, sa toka e uluna nai sala vaturaga e vuqa: a sa volai na yacana, ia sa yali na tamata e kila o koya duadua lia.
\v 13 Sa vaisulu tu o koya ena dua na i sulu sa kureitakia kinia na dra. Ia na yaca sa vatokai vua, Na Vosa ni Kalou.
\v 14 Ia ko ira na matai valu mai lomalagi era sa muri koya, ni ra sa vodo e na viose vulavula, a ra sa vaisulu e na lineni matailalai, e vulavula ka savasava.
\v 15 A sa dara mai na gusuna e dua nai seleiwau gata, me yaviti ira kinia na vimatanitu ko koya: ia ena lewai ira e nai titoko kaukamea: a sa qaqirakia ko koya nai keli-ni-waini ni cudru waqawaqa ni Kalou Kaukauwa.
\v 16 Ia na yacana sa volai e na nonai sulu ki na sagana vokilia, A NODRA TUI NA TUI, KI NA NODRA TURAGA NA TURAGA.
\p
\v 17 Ia ka'u a raicia e dua na agilose sa tu e na mata-ni-siga; a sa kaci e na domo levu ko koya, ka tukunia vi ira kece lia na manumanu era vuka e na maliwa ki lomalagi, Dou vasoqoni ikodou vata mai ki nai varaiyavi ni Kalou levu:
\v 18 mo dou kania na lewedra na tui, ki na lewedra na turaga ni valu, ki na lewedra na tamata qaqa, ki na lewedra na ose, ki ira era sa vodo kinia, ki na lewedra kece lia, se rai taukei se ra bobula, se ra tamata lalai se ra turaga.
\v 19 Ia ka'u a raicia na manumanu, ki ira na tui ki vuravura, ki na nodra i valu, era sa soqoni vata mai me ra vivala kaya sa vodo e na ose, ki ira na nonai valu.
\v 20 A sa tauri na manumanu, ka sa tauria vata kaya na parofita vailasu, o koya sa caka na cakacaka mana e matana, o koya sa daulari ira kinia era sa volai e nai vatakilakila ni manumanu, ki ira era sa varokoroko ki na nona matakau. Oi rau ruarua koya erau sa dai bulabula ki na drano bukawaqa sa caudre e na sulifure.
\v 21 Ia ko ira na kena vo era sa vamatei e nai seleiwau i koya sa vodo e na ose, ai seleiwau sa dara mai na gusuna: ia ko ira kece lia na manumanu vuka era sa mamau e na lewedra.
\c 20
\cl Wase 20
\p
\v 1 Ia ka'u a raicia e dua voki lia na agilose sa qai sobu mai lomalagi, sa tauria e na ligana nai dola kei bulubulu sa yali ni vabotona ka dua voki lia na sinucodo levu.
\v 2 A sa laki tauria na gata levu, a gata makawa, o koya koya na Tevoro, ki Setani, a sa vesukia me oti mada e dua na udolu na yabaki,
\v 3 sa daini koya ki bulubulu sa yali ni vabotona, a sa sogolati koya eloma, a sa dregatia nai sogo vi koya, me kakua ni temaki ira voki na vivanua ko koya, ka me oti mada na yabaki e dua na udolu: ia ni sa oti koya, ena qai sereki valailai voki.
\p
\v 4 Ia ka'u a raicia eso nai tikotiko-vaturaga, ka ra tiko kinia eso, a sa soli vi ira me ia na vilewai: au a raicia na yalodra voki lia e tamusukia na uludra ni ra sa vatusai Jisu, e na vuku voki lia ni Vosa ni Kalou, o ira era sa yali ni varokoroko vua na manumanu, se vua na nona matakau, a sa yali voki lia ni volai nai vatakilakila e na yadredra, se na ligadra: a ra sa bula ka lewa vata ki Karisito ka dua na udolu na yabaki.
\v 5 Ia na kena vo ni mate era sa yali ni bula voki ka me oti mada na yabaki e dua na udolu. Koya nai matai ni bula voki mai na mate.
\v 6 Sa kalougataka ka yalosavasava ko koya sa vaturi cake e nai matai ni bula voki mai na mate: ena yali ni kaukauwa vi ira nai karua ni mate, ia era na bete ni Kalou ki Karisito, ka ra na lewa vata kaya ka dua na udolu na yabaki.
\p
\v 7 Ia ni na sa oti e dua na udolu na yabaki, ena qai sereki voki ko Setani mai na vale-ni-vivesu sa tiko kinia,
\v 8 ena qai qai tani yani ko koya me temaki ira na vivanua era sa tiko e na yasa i vuravura e va, ko Koki ki Mekoki, me vasoqoni ira vata me ra vala: a kedrai wiliwili sa vaka na mata ni nuku ni matasawa.
\v 9 Ia era a qaivia na raraba kei vuravura, ka vavolivolita na nodra koro na tamata yalododonu, kei na koro daulomani, me buku na druadrua: a sa lutu sobu mai lomalagi na bukawaqa, ka kani ira.
\v 10 Ia sa dainia na tevoro sa temaki ira ki na drano bukawaqa sa vakasulifure, sa tiko kinia na manumanu kei na parofita vailasu; ia eratou na vararawatakia e na siga kei na bogi ka yali ni mudu.
\p
\v 11 Ia ka'u a raicia e dua nai tikotiko-vaturaga e levu ka vulavula, ki koya voki lia sa tiko kinia, a sa tuba tani mai vua ko vuravura ki lomalagi; a sa yali na vanua e kune me rau tiko kinia.
\v 12 Ia ka'u a raici ira era a mate, na tamata lalai ki na turaga, era sa tu e na mata ni Kalou; a sa tevukia nai vola eso: e dua tani voki nai vola sa tevukia, ai vola ni bula: ia na mate era sa lewai mai na ka sa volai e nai vola, me vaka na nodra i valavala.
\v 13 Ia na wasawasa sa soli ira na mate era sa tiko kinia, o mate voki lia ki bulu erau sa soli ira na mate era sa tiko kinia; a sa lewai ko ira na tamata yadua me vaka na nodra i valavala.
\v 14 Ia ko mate ki bulu voki lia erau sa dai ruarua ki na drano bukawaqa. Sai koya koya nai karua ni mate, io na drano bukawaqa.
\v 15 Ia sa dai ki na drano bukawaqa ko koya yadua sa yali ni volai e nai vola ni bula.
\c 21
\cl Wase 21
\p
\v 1 Ia ka'u a raicia na lomalagi vou kei na vuravura vou; ni sa takali na lomalagi makawa kei na vuravura makawa; ia sa yali sara na wasawasa.
\v 2 Ia koi au ko Joni, au a raicia na koro tabu, ko Jerusalemi vou, sa qai sobu mai vua na Kalou mai lomalagi, a sa ukucavu me vaka na goneyalewa sa ukucavu me lako vua na watina.
\v 3 Ia ka'u a rogocia voki lia e dua na domo levu mai lomalagi, sa tukunia, Raicia, a vale ni Kalou sa tu vei ira na tamata, ia ena tiko vata kei ira ko koya, ia era na nona tamata, ia ko koya na Kalou ena tiko vata kei ira, me nodra Kalou.
\v 4 Ia na Kalou ena tavoya tani kece lia na wai ni mata mai na matadra; ia ena yali voki na ciba, se na rarawa, se na tagi, ka na yali voki na vutugu: ni sa takali tani na ka makawa.
\p
\v 5 Sa qai vosa ko koya sa tiko e nai tikotiko-vaturaga, Raicia, au sa vavoutakia na ka kece lia. A sa tukunia vei au ko koya, Vola mada: ni sa vosa mana koya ka dina.
\v 6 A sa kaya vei au ko koya, Sa caka oti. Oi au na Alifa kei na Omeka, na kenai vatekivu kei na kenai vataotioti. Au na solia lowa lia vua sa viasomi, mai nai vurevure ni wai ni bula.
\v 7 O koya sa gumatua ena rawatia na ka kece lia koya. Au na nona Kalou koi au, ia ena luvequ ko koya.
\v 8 Ia ko ira na daurere, kei ira e vatitiqa, kei ira era vasisila, kei ira na daulaba, kei ira na dauyalewa, kei ira era kila ka-vatevoro, kei ira sa dausoro ki na veimatakau, kei ira na daulasu kece lia, sa votai vei ira na nodra i votavota e na drano sa caudre kinia na buka kei na sulifure: ia koya nai karua ni mate.
\p
\v 9 Sa qai qai mai vei au e dua vei iratou na agilose e lewe vitu, eratou sa tauria na bilo e vitu sa sinai e na mate ca ena muri sara mai, a sa vosa vei au, ka tukunia, Qai mai ki ke, au na vatakila vei iko na goneyalewa, na wati ni Lami.
\p
\v 10 A sa yadia na yaloqu ko koya ki na dua na ulu-ni-vanua levu ka cecere, a sa vatakila vei au na koro levu, ko Jerusalemi savasava, sa qai sobu mai lomalagi mai vua na Kalou,
\v 11 a sa tu kinia nai ukuuku ni Kalou: ia na kena rarama e vaka na vatu dredre sara, e vaka na vatu jasipa, e varaitayaloyalo me vaka na karisitala;
\v 12 ia na kena bai e levu ka cecere, a sa tinikarua na kena matamata-ni-koro, a sa lewe tinikarua na agilose sa tu e na matamata-ni-koro, a sa volai kinia na yacadra, ia koya na yacadra na nodra mataqali e tinikarua ni Isireli:
\v 13 e tolu na matamata-ni-koro sa donuya na tu-i-cake; e tolu na matamata-ni-koro sa donuya na tokalau; e tolu na matamata-ni-koro sa donuya na ceva; e tolu na matamata-ni-koro sa donuya na ra.
\v 14 Ia na kena yavu na bai ni koro sa tinikarua a sa tu kinia na yacadra nai apositolo ni Lami e lewe tinikarua.
\p
\v 15 Ia sa tauria e dua na gasau koula ko koya sa vosa vi au, me katumia kinia na koro, ki na kena matamata-ni-koro, ki na kena bai.
\v 16 Ia sa va na yasa ni koro, a kena balavu e tautauvata ki na kena raraba: a sa katuma na koro ko koya e na gasau, ka sa tinikarua na udolu na kena falogi. Ia sa tautauvata na kena balavu ki na kena raraba ki na kena cecere.
\v 17 A sa katumia ko koya na kena bai, A kena kiupiti e dua na drau ka vasagavulu ka va, ia nai varau ni tamata, sai koya nai varau ni agilose.
\p
\v 18 Ia na kena bai sa jasipa; ia na koro sa koula dina sara lia, me vaka nai iloilo makare.
\v 19 Ia na yavu ni bai ni koro sa vaiukuukutaki e na vivatu talei kece lia. Ai matai ni kena yavu na jasipa; ai karua, na safairi; ai katolu, na kalisetoni; ai kava, na emeralita;
\v 20 ai kalima, na satonikisa; ai kaono, na satiusa; ai kavitu, na karisolita; ai kawalu, na perili; ai kaciwa, na topasa; ai katini, na karisopiraso; ai katinikadua, na vatu karakarawa; ai katinikarua, na amecisita.
\v 21 Ia na matamata-ni-koro sa caka e na mata-ni-civa e tinikarua: sa dua na mata-ni-civa sa caka kinia na matamata-ni-koro yadua; a sala koula vinaka sara na sala ni koro, me vaka nai iloilo makare sara.
\p
\v 22 Ia sa yali na vale-ni-lotu ka'u a kunea kinia: ni sa kena vale-ni-lotu na Kalou Kaukauwa ki na Lami.
\v 23 A sa yali ni yaga e na koro koya na mata-ni-siga, se na vula, me cila kinia: ia nai ukuuku ni Kalou sa vararamatakia, ka sa kena rarama na Lami.
\v 24 Ena qai voli e na kena rarama ko ira na lewe ni vimatanitu: o ira na tui ki vuravura era sa yadia mai na nodra i ukuuku me tu kinia.
\v 25 Ia na kena vimatamata-ni-koro ena yali ni sogo e na siga; (ni na yali kinia na bogi.)
\v 26 Ia era na yadia mai me tu kinia nai ukuuku ki na varokoroko ni vimatanitu.
\v 27 Ka sa yali sara e dua na ka eda vasisilatakia ena curu kinia, se dua e caka na ka ca, se daulasu: ko ira lia era sa volai e na nonai vola ni bula na Lami.
\c 22
\cl Wase 22
\p
\v 1 Sa qai vatakila mai vi au ko koya na uciwai ni bula, sa makare sese sara me vaka na karisitala na kena wai, sa drodro mai nai tikotiko-vaturaga ni Kalou ki na Lami.
\v 2 E na loma ni kena sala, ki na batina ruarua voki lia, sa tei kinia na kau ni bula, a sa vuatakia na vuana e na vivula e tinikarua ka sa duidui na vuana: ia na drau ni kau koya sa medra wai ni bula na lewe ni vivanua.
\v 3 Ia era na yali voki ni cudruvi kinia: ena tu lia kinia nai tikotiko-vaturaga ni Kalou ki na Lami: ka na qaravi koya ko ira na nona tamata:
\v 4 era na raicia na matana, ka na volai e na yadredra na yacana.
\v 5 Ka na yali kinia na bogi; ena yali voki lia ni yaga vi ira na cina, se na rarama ni siga; ni sa vararamataki ira na Turaga na Kalou; ia era na vaturaga tiko ka yali ni mudu.
\p
\v 6 A sa tukunia vi au ko koya, A vosa koya sa mana ka dina: ia na Turaga na nodra Kalou na yalo ni parofita sa tala na nona agilose me vatakila vi ira na nonai talatala na ka sa voleka ni caka.
\v 7 Ka raicia, au sa qai kusarawa mai: sa kalougata ko koya sa tauria matua na vosa ni parofisai e nai vola koya.
\p
\v 8 Ia koi au ko Joni au a raicia ka rogocia na vi ka koya. Ia ni'u a rogocia, ka raicia, au a cuva sobu ki na yavana na agilose sa vatakila mai vi au na vi ka koya me'u varokoroko.
\v 9 Sa qai tukunia vi au ko koya, Raicia mo kakua lia: ni daru sai talatala vata, ki ira voki lia na wekamu na parofita, ki ira era sa tauria na vosa ni vola koya: mo varokoroko vua na Kalou.
\v 10 A sa tukunia vi au ko koya, Kakua ni dregatia na vosa ni parofisai ni vola koya: ni sa voleka na kena gauna.
\v 11 O koya sa yali dodonu, me yali dodonu tiko lia: ki koya sa dukadukali, me dukadukali tiko lia: ki koya sa dodonu, me dodonu tiko lia: ki koya sa yalosavasava, me yalosavasava tiko lia.
\p
\v 12 Ka raicia, au sa qai kusarawa mai; a sa tu lia vi au na ka, me'u solia vi ira na tamata yadua me vaka na nonai valavala.
\v 13 Oi au na Alifa ki na Omeka, na kenai vatekivu ki na kenai vataotioti, na kenai liuliu ki na kenai murimuri.
\v 14 Sa kalougata na tamata era sa sava na nodra i sulu, me ra kania vaitaukei na kau ni bula, me ra curu e na matamata-ni-koro ki loma ni koro.
\v 15 Sa tu e taudaku ko ira na koli, ki ira era sa daucaka na ka vatevoro, ki ira na dauyalewa, ki ira na daulaba, ki ira era sa daumasu ki na vimatakau, ki ira kece era sa vinakatia na lasu ka caka tiko.
\p
\v 16 Oi au ko Jisu ka'u sa tala na noqu agilose me vatakila na vi ka koya vi ikodou e na visoqosoqo lewe ni lotu. Oi au na kena vu ki na kawa ni Tevita, ki na kalokalo i vola siga e serau tu.
\p
\v 17 A sa tukunia na Yalo Tabu, ki koya voki lia na watina-yalewa, Qai mai. Me tukunia voki lia ko koya sa rogocia, Qai mai. Ia me qai mai ko koya sa viasomi. O koya sa vinakatia, me mai somia lowa lia na wai ni bula.
\p
\v 18 Au sa vatakila vi ira na tamata kece lia era sa rogocia na vosa ni parofisai ni vola koya, Kevaka e dua na tamata ena vaikuritakia na vi ka koya, ena vaikuritakia vi koya na Kalou na mate ca sa volai tu e nai vola koya;
\v 19 ia kevaka sa dua na tamata sa yadia tani eso na vosa mai nai vola ni parofisai koya, ena yadia tani na Kalou na nonai votavota mai na kau ni bula, mai na koro savasava, ka mai na vi ka voki lia sa volai tu e nai vola koya.
\p
\v 20 Sa tukunia ko koya sa vatakila na vi ka koya, E dina ka'u sa qai kusarawa mai. Emeni. Ni qai mai, Turaga Jisu.
\p
\v 21 Me nomudou kece lia na loloma ni noda Turaga ko Jisu Karisito. Emeni.