lmv-x-levuka_reg/60-JAS.usfm

\id JAS
\ide UTF-8
\h Jemesa
\toc1 Jemesa
\toc2 Jemesa
\toc3 jas
\mt Jemesa
\c 1
\cl Wase 1
\p
\v 1 Koi au ko Jemesa, nai talatala ni Kalou ki na Turaga ko Jisu Karisito sa loloma yani vi ira na yavusa e tinikarua era sa Duiveiseyaki.
\p
\v 2 Oi ikodou na wekaqu, dou nanumia me ka ni reki sara, ni dou sa lutu ki na ka e levu sa dauvivatovolei;
\v 3 ni dou sa kila sa vatuburia na dauvosotia na vatovolei ni nomudou vabautia.
\v 4 Ia me tini vinaka na cakacaka ni dauvosotia, mo dou vinaka taucoko sara kinia, me kakua na ka e yali.
\p
\v 5 Ia kevaka sa lailai na vuku vua e dua vi ikodou, me kerea vua na Kalou, o koya sa solia valevu kivei ira kece lia na tamata, a sa yali ni dauvivadirideini; ka na soli lia vua.
\v 6 Ia me kerekere e na vabauta, me kakua ni vatitiqa: ko koya sa vatitiqa, sa vaka na ua ni waitui, sa cagina e na cagi ka vitubuyaki.
\v 7 Ia me kakua ni nanumia na tamata gona ni na rawatia e dua na ka mai vua na Turaga:
\v 8 a tamata lomalomarua, sa yamekemeke na nonai valavala kece lia.
\p
\v 9 Ia me marau na tamata dravudravua e na nona laveti cake:
\v 10 vata ki koya e vutuniyau, e na nona malumalumu mai: ni na takali lia ko koya me vaka na se ni co.
\v 11 Ni sa cabe cake na siga ki na cagi katakata, ka sa varaqosatakia sara na co, a sa mira na sena, a sa seavu na kena rairai vinaka: ena malai yani vakinia na tamata vutuniyau e na nonai valavala.
\p
\v 12 Sa kalougata na tamata sa vosotia ni sa vatovolei, io, ni sa vatovolei oti, ena rawatia nai sala ni bula o koya sa yalatakia na Turaga kivei ira sa lomani koya.
\p
\v 13 Ni sa dauveretaki e dua, me kakua ni tukunia, Sa dauveretaki au na Kalou: ni sa yali ni dauveretaki rawa na Kalou ki na ka ca, a sa yali ni dauveretakia e dua na tamata ko koya:
\v 14 ni sa dauveretakia na tamata yadua mai na ka e vinakatia, ni sa vecei koya na nona garogaro ca ka bacani koya.
\v 15 Ni sa kunekune na gagadre ca, sa vasucumia nai valavala ca; ia nai valavala ca gona ni sa taucoko na kena tubu sa qai vasucumia na mate.
\p
\v 16 Dou kakua ni vacalai, oi ikodou na wekaqu lomani.
\v 17 Sa qai mai colo nai solisoli vinaka kece lia vata kei nai solisoli kece lia e yaga sara, a sa qai sobu mai vua na Tama ni rarama, a sa yali vua na veivukiyaki, se yaloyalo ni veigoleyaki.
\v 18 Sa vatuburi ita ko koya e na nona lewa lia e na vosa ni dina, me da vaka nai sevu ni veika sa bulia ko koya.
\p
\v 19 O koya koya, oi ikodou na wekaqu lomani, mo dou kusarawa yadua ena varorogo, mo dou berabera lia ni vosa, mo dou berabera ni cudru:
\v 20 ni sa yali ni vatuburia na ka e dodonu vua na Kalou na cudru ni tamata.
\p
\v 21 O koya koya mo dou qai dainia tani na dukadukali kei na ka ca e uasivi tu, ka vabautia e na yalomalua na vosa sa tei e na lomamudou, ko ya sa vabula rawa na yalomudou.
\v 22 Ia dou muria na vosa ka kakua ni rogocia lowa lia, ka vaisini ikodou kinia vakai ikodou.
\v 23 Ia kevaka e dua sa rogocia lowa lia na vosa, ka yali ni muria, sa tautauvata ki na tamata sa qai ilovia na mata ni yagona e nai iloilo:
\v 24 ni sa ilovi koya oti, a sa qai qai tani yani, a sa guilecavia vasauri se sa vaevei nai rairai ni yagona.
\v 25 Ia ko koya sa varaicia matua na vunau sa vinaka sara, na vunau ni veisereki, ka tu dei kinia, sa yali ni daurogocia ka guilecavia, ia sa caka voki lia na cakacaka, ena kalougata kinia ko koya koya e na nona cakacaka.
\p
\v 26 Kevaka e dua vi ikodou sa nanumia ni sa lotu, ia ka yali ni tarovia na yamena, ia ka sa dauvakaisinia lia na yalona, sa ka loa lia na nona lotu na tamata koya.
\v 27 Na lotu savasava ka yali ni cala e mata ni Kalou ko Tamada sa vakoya, Me sa dauraici ira na luveniyali kei ira na yada, ni ra sa rarawa, me sa qarauni koya voki lia me kakua ni tauvi koya na duka ni ka vavuravura.
\c 2
\cl Wase 2
\p
\v 1 Koi ikodou na wekaqu, dou kakua ni vaduiduitaki ira na tamata ena nomudou tauria na vabauti Jisu Karisito, na noda Turaga sa varokorokotaki.
\v 2 Ia kevaka sa curu ki na nomudou valenilotu e dua na tamata sa vamama koula, ka vaisulu enai sulu vaiukuuku, a sa curu voki lia kinia na tamata dravudravua, enai sulu ca;
\v 3 ia dou sa varokorokotaki koya sa vaisulu enai sulu vaiukuuku, ka tukunia vua, Mo tiko ena yasana vinaka koya; ia dou sa tukunia vua na tamata dravudravua, Mo mani tu yani na vanua koya, se mai tiko e ruku ni tutu ni yavaqu:
\v 4 dou sa qai yali li ni caka na vivaduiduitaki, ka sa yaco kinia mo dou daulewa e na vakasama ca?
\v 5 Dou rogocia, oi ikodou na wekaqu lomani, Sa yali beka ni digitaki ira na Kalou era sa dravudravua ena ka vavuravura me ra vutuniyau ena vabautia me ra taukenia voki lia na matanitu sa yalatakia ko koya vi ira era sa lomani koya?
\v 6 Ia dou sa becia na tamata dravudravua.
\v 7 Era sa yali beka ni vasaurarataki ikodou ko ira na vutuniyau, ka yarataki ikodou ki na vale ni vilewai? Era sa yali beka ni vosavacatakia na yaca varokoroko dou sa vayacani kinia?
\v 8 Kevaka dou na muria sara na vunau vaturaga me vaka nai Vola Tabu, Mo lomania na kai nomu me vataki iko, dou na qai caka vinaka:
\v 9 ia kevaka dou sa digitaki ira na tamata, dou sa qai valavala ca, ka sa beitakia vi ikodou na vunau nai valavala ca.
\p
\v 10 Ia ko koya ena muria na vunau taucoko, ka sa cala lia ena tikinia e dua loa lia, sa beitaki me vaka sa talaidredre ki na vunau kece lia.
\v 11 Ni sai koya lia sa tukunia, Kakua ni caka vibutakoci, sa tukunia voki lia, Kakua ni laba. Ia kevaka ko sa yali ni vibutakoci, ia ko sa laba lia, ko sa qai talaidredre ki na vunau.
\p
\v 12 Dou vosa vakinia, kai valavala vakinia, me vataki ira era na lewai me vaka na vunau ni visereki.
\v 13 Ni na lewai ka yali ni vosoti, ko koya sa yali ni caka na yalololoma; ia na yalololoma sa rawa na vilewai.
\p
\v 14 Ena yaga vacava, oi ikodou na wekaqu, kevaka sa tukunia e dua ni sa tu vua na vabautia, kevaka sa yali vua na cakacaka? Ena vabulai koya beka na vabautia?
\v 15 Ia kevaka sa dua na viwekani se yalewa se tagane sa yali na nonai sulu, ka yali na kena ena visiga,
\v 16 ia ka dua vi ikodou sa tukunia vi ira, Dou qai ena vacegu, dou tatalai ka vamamautaki; ia dou sa yali ni solia na veika e yaga na yagodra; a cava na betena?
\v 17 Sa va voki lia kinia na vabautia kevaka sa yali ni tu vata ki na cakacaka, sa mate lia, ni sa tu dua loa lia.
\p
\v 18 Ia ena tukunia beka e dua, Sa tu lia vi iko na vabautia, sa tu lia vi au na cakacaka; mo vatakila mai vi au na nomu vabautia ni sa yali lia na nomu cakacaka, ia ka'u na vatakila vi iko na noqu vabautia ena noqu cakacaka.
\v 19 Ko sa vabautia ni sa dua na Kalou; ko sa caka vinaka koya: ia ko ira voki lia na tevoro era sa vabautia, a ra sa sautaninini voki lia.
\v 20 Ko sa via kila beka, o iko na tamata sesewa, ni sa mate lia na vabautia ni sa yali ni cakacakataki:
\v 21 e yali beka ni vadonui ko Eparaama na tamada e na vuku ni cakacaka, ni sa vacaboria na luvena ko Aisake e dela ni cabocabo-ni-soro?
\v 22 O sa raicia beka ni sa vivuke na vabauta ki na nona cakacaka, a sa taucoko sara mai na vabautia e na vuku ni cakacaka?
\v 23 A sa vayacori kinia nai Vola Tabu o koya sa tukunia, Sa vabautia na Kalou ko Eparaama, a sa wili vua mei valavala dodonu; a sa vayacani me Weka ni Kalou.
\v 24 Ia dou sa qai raicia ni sa vadonui na tamata e na vuku ni cakacaka, a sa yali lia e na vuku ni vabautia duadua lia.
\v 25 Sa vaka voki lia kinia ko Reapi na yalewa ka dautagane, sa yali li ni vadonui e na vuku ni cakacaka, ni sa vacegui rau nai talaki, ka vatala yani e na sala tani?
\p
\v 26 Me vaka sa mate na yago ni sa takali na yalo, sa mate voki lia na vabauta ni sa yali na cakacaka.
\c 3
\cl Wase 3
\p
\v 1 Oi ikodou na wekaqu, me kakua ni lewe levu vi ikodou mei vavuvuli, ni dou sa kila eda na lewai vakalevu cake enai vavuvuli.
\v 2 Ni da sa cala kece lia e na ka e levu. Kevaka sa yali ni cala e dua e na vosa, sa tamata uasivi sara ko koya, a sa rawarawa vua me tarovia na yagona taucoko
\v 3 Raicia, kevaka eda sa vaciqiria na kedrai tatarovi na ose ki na gusudra, me ra talairawarawa kinia vi ita, eda sa qai saumakia na yagodra taucoko.
\v 4 Raicia voki lia na waqa, ni sa ka levu vaidina, a sa savu kalia e na cagi kaukauwa, ia sa saumaki lia e na uli lailai sara, ki na yasana e vinakatia ko koya sa tauria nai uli.
\v 5 Sa vaka voki lia kinia na yameda ni sa tikida lailai lia, a sa vosa vaviavialevu. Raicia, sa vacaudrevia na buka levu na bukawaqa lailai!
\p
\v 6 Ia sa bukawaqa na yameda, a ka taucoko ni ca: sa vakinia na yameda e na veitiki ni yagoda taucoko, a sa vacaudrevia nai valavala kece lia ni yagoda; a sa vacaudrevia qori ko eli.
\v 7 Ni sa vamanoatakia na manumanu kece lia e yavai va, kei na manumanu vatabana, kei na ka sa qasi, kei na ka ni waitui, a sa vamanoataki ira tu ko ira na tamata:
\v 8 ia ka sa yali na tamata sa vamanoatakia rawa na yame; a ka ca sa yali ni tarovia rawa, sa sinai e na ka gaga e dauveivamatei.
\v 9 Eda sa vavinavinaka kinia vua na Turaga ko Tamada; eda sa rukaki ira voki lia kinia na tamata, era sa buli me tautauvata kei na Kalou.
\v 10 Sa vu mai na gusu e dua loa lia, na vavinavinaka kei na veirukaki. Oi ikodou na wekaqu, e yali ni dodonu me vakinia na veika koya.
\v 11 E dua beka na mata-ni-wai sa vadavea mai na matana e dua loa lia na wai dranu kei na wai gaga voki lia?
\v 12 Oi ikodou na wekaqu, sa dua beka na lolo sa vuatakia rawa na olive? Se dua li na vaini, me vuatakia na lolo? Sa vakinia, sa yali ni vakakinia e dua na mata-ni-wai me tovure mai kinia na waitui kei na wai dranu.
\p
\v 13 O cei vi ikodou sa vuku ka yalomatua? Me vatakila e nai valavala vinaka na nona cakacaka e na vuku sa yalomalua.
\v 14 Ia kevaka sa tu e na lomamudou na dauvuvu e gaga kei na dauveiba, dou kakua ni valevulevui ikodou, se lasutakia nai vavuvuli dina.
\v 15 A vuku va gona sa yali ni qai mai colo, sa vavuravura lia, sa vakayago, sa vakatevoro.
\v 16 Io, kevaka sa tu na vuvu kei na veiba, sa tu kinia na veisei kei na cakacaka kece lia e ca.
\v 17 Ia na vuku mai colo sa savasava mada, emuri sa dauia na veivacegui, sa yalomalua, sa vamasuti rawarawa, sa sinai e na loloma kei na vua vinaka, ka yali ni digitaki ira vakailoa na tamata, se dauveivaisini.
\v 18 Ia na vua ni valavala dodonu sa kaburaki vata kei na veivacegui vei ira era sa caka tiko na veivacegui.
\c 4
\cl Wase 4
\p
\v 1 Sa vu mai vei na viba kei na vivala vi ikodou? Sa yali li ni vavuna na nomudou gagadre ca sa vivala e na vitiki ni yagomudou?
\v 2 Dou sa kocokoco, ka yali ni rawatia: dou sa vivamatei kinia, ka dou sa daugagadre, ka yali ni tauria rawa me nomudou: dou sa vivala ka veiba kinia, ia dou sa yali ni rawatia, ni dou sa yali ni kerekere.
\v 3 Dou sa kerekere lia, ka yali ni rawatia, ni dou sa kerekere e nai naki cala, mo dou vayalia e na nomudou gagadre ca.
\p
\v 4 Oi ikodou na dauyalewa kei na dautagane, dou sa yali beka ni kila, ni sa veicati kei na Kalou na veivinakati kei vuravura? Ia sa veimecaki kei na Kalou ko koya sa via veiwekani kei vuravura.
\v 5 Dou sa vakasama beka ni sa tukunia lowa lia nai Vola Tabu, Sa gadrevia vakavuvu na Yalo sa tiko e na lomada?
\v 6 Ia sa solia vakalevu na loloma ko koya. O koya sa tukunia kinia ko koya, O ira sa viavialevu sa vorati ira na Kalou, ia sa solia na loloma vei ira era sa yalomalumalumu.
\p
\v 7 O koya mo dou qai vamalumalumutaki ikodou vua na Kalou. Voratia na tevoro, ena dro tani kinia vei ikodou ko koya.
\v 8 Toro voleka yani vua na Kalou, ka na toro voleka mai vei ikodou ko koya. Vakasavasavatakia na ligamudou, oi ikodou na lomalomarua.
\v 9 Dou mai rarawa, ka qoqolou, ka tagi: me vuki na nomudou dredre me qoqolou, kei na nomudou marau me mataveveku.
\v 10 Dou vamalumalumutaki ikodou e na mata ni Turaga, ka na laveti ikodou cake ko koya.
\p
\v 11 Kakua ni dou veikaseti, na veiwekani. O koya sa kasetia na wekana ka vakalewai koya na wekana, sa kasetia na vunau ka sa vakalewa voki lia nai vunau. Ia kevaka ko sa vakalewa na vunau, ko sa qai yali ni muria nai vunau, ia ko sa turaga ni lewa lia.
\v 12 Sa dua loa lia sa vaturia nai vunau ka turaga ni lewa, o koya lia sa rawa ia na veivabulaikei na vivarusai, o cei ko iko mo vakalewa na tani?
\p
\v 13 Dou qai mai, oi ikodou sa dau kaya, ni kua se na savulaci eda na qai ki na koro gona, ka tiko kinia ka yabaki dua, ka veivoli kinia, ka rawatia nai yau:
\v 14 ia dou sa yali ni kila na ka sa na yaco e na savulaci: A cava na nomudou bula? Na kabukabu loa lia koi ikodou, sa rairai ka dede valailai lia, sa qai seavu yani.
\v 15 Ia koya mo dou kaya, Kevaka sa vinaka vua na Turaga, eda na bula, ka caka na ka koya, se na ka ko ya.
\v 16 Ia dou sa qai marau ka dokadokai ikodou: e ca na marau kece lia sa vaka ko ya.
\p
\v 17 O koya sa valavala ca kinia vua sa kila me caka vinaka, ka yali ni caka.
\c 5
\cl Wase 5
\p
\v 1 Dou qai mai, oi ikodou na tamata vutuniyau, dou tagi ka qoqolou ena vuku ni nomudou ka rarawa ena yaco mai.
\v 2 Sa vuca na nomudou iyau, a sa kania na nomudou isulu na sarasara.
\v 3 Sa veveka na nomudou koula kei na siliva, ka na tukuni ikodou na kena veveka ka na kania lewemudou me vaka na bukawaqa. Dou sa kumunia vata nai yau me yacovia na gauna mai muri sara.
\v 4 Raicia, sa tagi na kedrai voli na tamata daucakacaka era sa tamusukia na nomunu veiwere, o koya dou sa besetakia, ka sa yaco ki na daligana na Turaga ni lewe levu na nodra tagi ko ifra sa dautatamusukia.
\v 5 Dou sa marau tiko lia e vuravura ka dou sa daukana tiko. Dou sa dau vakania na lomamudou ena siga sa ia kinia na dauveivakamatei.
\v 6 Dou sa lewai koya na yalododonu ka dou sa vakamatea, ka yali ni voratia ikodou ko koya.
\p
\v 7 O koya lia koya, na veiwekani, mo dou vosotia, me yacovia na nona lesu voki mai na Turaga. Raicia, nai vatawa-ni-were sa warakia na vua ni qele e talei, ka sa wawa vadede me rawatia mada na uca tau iliu, kei na uca tau muri.
\v 8 Dou vosotia voki lia koi ikodou vataudeitakia na yalomudou, ni sa voleka mai na nona qai mai na Turaga.
\v 9 Dou kakua ni veicudruvi na veiwekani, de dou cudruvi. Raicia, sa tu e na mata ni daravaq na turaga ni lewe!
\v 10 Oi ikodou na wekaqu, vakadamurimuri ira na parofita, e na nodra vosotia na ka rarawa, kei na nodra dauvosotia, era a vosa ena yaca ni Turaga.
\v 11 Raicia, eda sa vakayacani ira era sa vosotia mera kalougata. Dou a rogocia na dauvosota ni Jope, dou sa raicia voki lia ni sa tinia vacava na Turaga; ni sa yalovinaka sara na Turaga, ka sa yalololoma.
\p
\v 12 Ia na ka levu sara koya, oi ikodou na wekaqu, mo dou kakua sara ni bubului, kakua ki lomalagi, se ki vuravura, se ki na dua voki na ka, me io lia na nomudou io, ia me yali lia nanomudou yali, de dou cudruvi kinia.
\p
\v 13 Kevaka e dua vi ikodou sa vararawataki, me masu tiko. Kevaka e dua sa marau, me sere.
\v 14 Kevaka e dua vi ikodou sa tauvi-mate, me kacivi ira na matua ni soqosoqo lewe ni lotu; ia me ra masulaki koya, ka lumutia e na waiwai e na yaca ni Turaga:
\v 15 ia na masu ni vabauta ena vabulai koya sa tauvi mate, ka na vabulai koya na Turaga, ia kevaka sa kitaka nai valavala ca, ena vosoti ko koya.
\v 16 O koya mo dou dui vakatusa kinia na nomudoui valavala ca, ka veimasulaki, mo dou vabulai kinia. Sa kaukauwa vakalevu ka gumatua na nona masu na tamata yalododonu.
\v 17 A tamata sa vataki ita lia ko Ilaijia, a sa masu vagumatua sara me kakua ni tau mai na uca, ka sa yali kinia ni tau mai na uca e vuravura, ka sa oti mada na yabaki tolu kei na vula ono.
\v 18 A sa qai masu voki, a sa tau na uca mai Lomalagi, a sa vuatakia na vuana na qele.
\p
\v 19 Oi ikodou na veiwekani, kevaka e dua vei ikodou sa qai tani mai nai vavuvuli dina, a sa valesui koya voki mai e dua;
\v 20 me kila ko koya koya, o koya sa valesuya voki na tamata caka cala mai na nonai valavala e cala kinia ka sa vabula na yalo mai na mate, a sa bulutia voki lia nai valavala ca e levu.