lmv-x-levuka_reg/59-HEB.usfm

\id HEB
\ide UTF-8
\h Iperiu
\toc1 Iperiu
\toc2 Iperiu
\toc3 heb
\mt Iperiu
\c 1
\cl Wase 1
\p
\v 1 Sai ira na parofita ka vosa kinia eliu na Kalou vi ira na matua, ena gauna e levu, kei nai valavala e levu:
\v 2 ia sai koya na Luvena sa vosa kinia vi ita ko koya, ena gauna mai ki muri koya; o koya sa lesia ko koya mei taukei ni ka kece lia, o koya sa bulia voki lia kinia na vuravura kece lia;
\v 3 ko koya sa cila kinia na nona serau kei na yaloyalo ni nonai tovo, a sa tokonia na ka kece lia ena nona vosa mana, a sa tiko sobu ena liga i matau i Koya sa levu mai colo sara, ni sa vuya laivi oti vataki koya na nodai valavala ca;
\v 4 ni sa yaco me uasivi cake vi ira na agilose, ni sa taukenia na yaca sa uasivia na yacadra.
\v 5 Io, ko cei vi ira na agilose sa tukunia vua ko koya ena dua na siga, A Luvequ ko iko, au sa vatuburi iko ena siga koya? Sa tukunia voki, Au na Tamana koi au, ena Luvequ ko koya?
\p
\v 6 Ia ni sa yadia mai ko koya na Ulumatua ki vuravura, sa tukunia, Me cuva vi koya ko ira kece lia na agilose ni Kalou.
\p
\v 7 Ia ena vukudra na agilose sa tukunia ko koya, Ko koya sa qisi ira na nona agilose me cagi, kei ira na nonai talatala me yameyame ni buka.
\p
\v 8 Ia ena vuku ni Luvena, ena yali ni mudu na nomuni tikotiko vaturaga, oi ikonu na Kalou: Sai titoko ni caka dodonu nai titoko ni nomuni matanitu:
\v 9 Ni ikonu sa vinakatia nai valavala dodonu, ka catia nai valavala ca, Sa lumuti ikonu kinia na Kalou, a nomuni Kalou, Ena waiwai ni reki mo ni uasivi cake sara kinia vi ira na nomuni tokani.
\p
\v 10 Ia, Koi ikonu Turaga, ko ni a tauyavutaki vuravura enai vatekivu; Ia na cakacaka ni ligamuni ko lomalagi:
\v 11 Ena rusa koya; ia koi ikonu ena tiko lia: Ia ena madra mai koya kece lia me vaka nai sulu:
\v 12 O ni na lobia voki lia me vaka nai tutuvi, ka na vaisosomitakia: Ia koi ikonu sai ikonu tiko lia, Ia ena yali ni bau mudu na nomuni viyabaki.
\p
\v 13 Ia ko cei vi ira na agilose sa tukunia vua ko koya ena dua na siga, Mo tiko ena ligaqu i matau, Ka me'u qisi ira oti mada na nomu meca mei tutu ni yavamu?
\p
\v 14 Era sa yali li ni yalo dauviqaravi ko ira kece lia, sa talai yani me qaravi ira era na yaco emuri mei taukei ni bula?
\c 2
\cl Wase 2
\p
\v 1 O koya koya, e dodonu me da vananumia valevu sara kinia na ka eda a rogocia, de dua na siga e yali kinia vi ita.
\v 2 Ia kevaka ka vadinadinatakia na vosa era a tukunia ko ira na agilose, ka sa saumia vadodonu nai valavala ca kei na talaidredre kece lia;
\v 3 eda na bula vaevei koi ita, kevaka eda sa vaweleweletakia na bula levu koya; o koya sa vatekivunia na Turaga me tukunia, ka vadinadinatakia mai kivei ita ko ira era a rogocia;
\v 4 ni sa vadinadinatakia tiko lia vi ira na Kalou, enai vatakilakila eso kei na ka e vivakurabuitaki eso kei na cakacaka mana e levu, kei nai votavota ni Yalo Tabu, me vaka na lomana?
\p
\v 5 Ni sa yali ni solia ko koya vi ira na agilose me ra lewa na vuravura ena muri mai, o koya kitou sa vosatakia.
\v 6 A sa vatakila e dua ena dua na tikinia, ka tukunia, A cava na tamata, mo nanumi koya kinia? Se na luve ni tamata, mo dautalevi koya kinia?
\q
\v 7 Ko sa buli koya me uasivi sobu valailai lia vi ira na agilose: Ko sa vaisalatakia e nai ukuuku kei na varokoroko, ka lesia me lewa na cakacaka ni ligamu:
\v 8 Ko sa vamalumalumutakia na ka kece lia me tu e ruku ni yavana. Ia ni sa vamalumalumutakia vua na ka kece me lewa kinia, sa yali ni vo e dua na ka me yali ni vamalumalumutakia vua. Ia eda sa yali ni raicia ni kua ni sa vamalumalumutakia vua na ka kece lia me lewa kinia.
\v 9 Ia eda sa raici Jisu lia, sa caka me uasivi sobu valailai lia vi ira na agilose, sa qai vaisalataki enai ukuuku kei na varokoroko, ena vuku ni sa vosotia oti na mate; me sa mate ko koya ena vuku ni tamata kece lia, me vaka na loloma ni Kalou.
\p
\v 10 Ni sa kilikili ki koya, sai taukei ni ka kece lia, ka sa vavunia na ka kece lia, ni sa vayadia na luvena e lewe levu ki na vanua vaiukuuku, me varautaki koya ena dauvosotia me sa nodra vu ni bula.
\v 11 Ni sa dua bau lia na Tamadra, ko koya sa vasavasavatakia kei ira era sa vasavasavataki: ia e na vuku ni ka koya sa yali kinia ni madua ko koya me vatokai ira me ra tacina;
\v 12 ni sa tukunia, Au na tukunia na yacamuni vi ira na taciqu; Ena kedra maliwa nai soqosoqo lewe ni lotu ka'u na varokorokotaki ikonu ena sere.
\p
\v 13 Sa tukunia voki, Au na vararavi vi koya. Sa tukunia voki lia, Raicia o au kei ira na gone sa solia mai vi au na Kalou.
\p
\v 14 Ia ni sa lewe vata ka dra vata ko ira na gone, sa yaco voki lia ko koya me vakinia; me vamalumalumutaki koya kinia sa lewa na mate, o koya na tevoro, ena vuku ni mate;
\v 15 me sereki ira voki lia era vaka na bobula ena nodra bula voli taucoko ni ra sa rerevakia na mate.
\v 16 Ni sa yali sara ni mai vukei ira na agilose ko koya; sa mai vukei ira lia na kawa i Eparaama.
\v 17 O koya koya sa kilikili kinia ki koya, me yaco me vataki ira na wekana ena ka kece lia, me bete levu yalovinaka ka lomadina ena veika ni Kalou, me sorovakia na nodra i valavala ca na tamata.
\v 18 Ni sa vosotia na ka ca ko koya, ni sa dauveretakia, sa mai rawatia kinia me vukei ira era sa dauveretaki.
\c 3
\cl Wase 3
\p
\v 1 O koya koya, ikodou na viwekani yalosavasava, sa kacivi mei taukei ni ka valomalagi, dou vananumia nai Apositolo vata kei na Bete Levu eda sa vatusa tiko, ko Jisu:
\v 2 o koya ka lomadina vua sa lesi koya, me vataki Mosese voki lia ena nona mataqali taucoko.
\v 3 A sa dodonu me dokai valevu ko koya ka valailai ko Mosese, ni sa dokai valevu ko koya sa tara na vale, ia ka valailai lia na vale.
\v 4 Ni sa dua e tara na vale yadua; ia ko koya sa tara na ka kece lia sa Kalou.
\v 5 Ia e dina lia sa lomadina ko Mosese e na nona mataqali taucoko, me vaka sai talatala, me vatakilai kinia na ka ena tukunia mai muri;
\v 6 ia na Karisito sa dina me vaka sa Gone e na nona mataqali; ia sa nona mataqali koi ita, kevaka eda sa tauria matua na noda doudou ki na reki ni nuinui me tu dei, me yacovia nai vataotioti.
\p
\v 7 O koya koya, me vaka sa tukunia na Yalo Tabu, E na siga koya kevaka dou sa via rogocia na domona,
\v 8 Kakua ni vakaukauwatakia na yalomudou, me vaka e na vivacudrui, Me vaka e na siga ni dauvere e na lekutu:
\v 9 Era sa dauveretaki au kinia ko ira na nomudou qase, era sa vatovolei au vaca, Ni ra sa raicia tiko na noqu cakacaka ka yabaki vasagavulu.
\p
\v 10 O koya koya ka'u a cudru kinia vi ira nai tabatamata ko ya, Ka tukunia, Era sa cala tiko lia e lomadra; Ia era a yali ni kila na noqu i valavala.
\p
\v 11 Au a bubului kinia e na noqu cudru, Ni ra na yali sara ni curu ki na noqu i vavacegu.
\p
\v 12 Dou raici ikodou vinaka, na viwekani de tiko e na lomadra eso vi ikodou na yalo sa ca e yali ni vabautia, dou sa dainia laivi kinia na Kalou bula.
\v 13 Ia dou dui vivatavulici vakai ikodou e na veisiga kece lia, ni sa vatokai lia, Na siga ni kua; de vayalokaukauwatakia e dua vi ikodou e na vuku ni sa dauvivaisini nai valavala ca.
\v 14 Ni sa noda lia na Karisito, kevaka eda sa tauria matua nai vatekivu ni noda dinatia me tu dei, me yacovia nai vataotioti.
\v 15 Ni sa tukunia tiko vakoya, E na siga koya, kevaka dou sa via rogocia na domona, Dou qai kakua ni vakaukauwatakia na yalomudou, me vaka e na vivacudrui.
\p
\v 16 Ia ko cei ko ira era a vacudruya ni ra sa rogocia oti? Ko ira kece lia era sa qai vata kei Mosese mai Ijipita se yali?
\v 17 Ia sa cudru vi cei ko koya ka yabaki vasagavulu? Vi ira sai valavala ca, ka bale na yagodra e na lekutu se yali?
\v 18 Ia ko cei sa bubului kinia ko koya me ra kakua ni curu ki na nonai vavacegu, vi ira lia sa yali ni vabautia?
\v 19 Ia eda sa raicia, ni ra sa yali ni curu rawa kinia, ni ra yali ni vabautia.
\c 4
\cl Wase 4
\p
\v 1 O koya koya me da qai rere, ni sa soli tu na vosa ni yalayala me da curu ki na nonai vavacegu, de yali beka ni yaco dina kinia koi ikodou eso.
\v 2 Ni sa tukuni mai vi ita e dua na ka vinaka, me vaka voki lia vi ira: ia ka yali ni yaga vi ira na vosa era sa rogocia, ni ra sa yali ni dua vata e na vabautia ki ira era sa varogocia.
\v 3 Ni da sa qai curu ki nai vavacegu, koi ita sa vabautia, me vaka sa vosa kinia ko koya, Me vaka ka'u a bubului kinia e na noqu cudru, Era na yali sara ni curu ki na noqu i vavacegu: ia sa dina sa oti na cakacaka ni sa tauyavutakia oti ko vuravura.
\v 4 Ni sa dua na tikinia sa vosatakia vakoya ko koya nai kavitu ni siga, A sa vacegu na Kalou mai na nona cakacaka kece lia e na kenai kavitu ni siga.
\p
\v 5 Ia koya voki lia, Era na yali sara ni curu ki na noqu i vavacegu.
\p
\v 6 Ia ni sa qai macala me curu kinia eso, ia ko ira ka tukuni taumada vi ira na ka vinaka era sa yali ni curu kinia, ena vuku ni nodra talaidredre:
\v 7 a sa qai lokucia voki e dua na siga ko koya, ka sa vosa ko Tevita, ka tukunia, Ena siga koya, ni sa oti na gauna dede; me vaka sa kainaki, E na siga koya, kevaka dou sa via rogocia na domona, kakua ni vakaukauwatakia na yalomudou.
\p
\v 8 Io, kevaka sa solia vi ira nai vavacegu ko Josua, ena yali ni vosatakia voki ko koya e dua tani na siga.
\v 9 O koya koya sa vo tiko e dua nai vavacegu me nodra na tamata ni Kalou.
\v 10 Ia ko koya sa curu ki na nonai vavacegu, sa vacegu mai na nona cakacaka, me vaka sa vacegu na Kalou mai na nona.
\p
\v 11 O koya koya me da qai gumatua sara me da curu ki nai vavacegu ko ya, de bale e dua na tamata ni sa talaidredre vakinia.
\v 12 Ni sa bula na Vosa ni Kalou, ka kaukauwa, ka gata valevu ka mucu lia nai seleiwau batirua, ka suakia me wasea rua kinia na lomada vata ki na yaloda, vata ki na nodai sema vata ki na uto ni sui, a sa valewa sara na nanumia vata ki nai naki ni yaloda.
\v 13 A sa yali voki lia e dua na ka e yali ni rairai e matana: ia sa televua lia ena ka kece lia, ka varairaitakia sara, ena mata i koya eda na vatusai ita vua.
\p
\v 14 Ia ni sa dua na noda bete levu, o koya ka curu ki lomalagi, o Jisu na Luve ni Kalou, tou tauria matua na noda lotu.
\v 15 Ni sa yali ni noda bete levu ko koya sa yali ni lomani ita rawa ni da sa malumalumu; ia sa dauveretakia vatautauvata ena ka kece lia ko koya, ia ka yali na nona cala.
\v 16 Ena vuku ni ka koya tou toro doudou kinia ki nai tikotiko-vaturaga loloma, meda vinakati kinia, meda lomani voki lia ka vukei ena gauna e yaga kinia.
\c 5
\cl Wase 5
\p
\v 1 Ia na bete levu yadua sa digitakia mai vi ira na tamata, sa lesi vua na Kalou ena vukudra na tamata, me vacaboi madrali vata ki nai soro ena vuku ni valavala ca:
\v 2 sa rawarawa vua me lomani ira era sa sesewa, ka cala; ni sa tiko voki lia vi koya na malumalumu.
\v 3 Ia ena vuku ni ka koya, me vaka e na vukudra na tamata sa vaka voki lia kinia ena vukuna, sa dodonu me vacaboi soro ko koya ena vuku ni valavala ca.
\v 4 A sa yali e dua sa tauria vai koya na cakacaka varokoroko koya, o koya lia sa lesi koya na Kalou, me vataki Eroni.
\v 5 Sa va voki lia kinia na Karisito sa yali ni dokai koya me via bete levu vataki koya; ena vukuna lia sa tukunia vua, “O iko na Luvequ; ni kua au yaco meu Tamamu.”
\p
\v 6 Me vaka voki lia na nona vosa e na tikinia tani, “A bete yali ni mudu ko iko me vataki Melikiseteki.”
\p
\v 7 O koya koya ena visiga ni nona tiko vatamata, ni sa caboria oti na kerekere vata ki na masumasu vata ki na tagi vararawa, ni sa vawai na matana, vua na Kalou, sa rawatia me vabulai koya mai na mate, a sa rogoci lia ena ka sa rerevakia ko koya;
\v 8 ia sa dina lia sa Luvena ko koya, a sa vatavulici lia enai valavala ni talairawarawa, ni sa vosotia tiko na ka rarawa;
\v 9 ia ni sa varautakia oti, sa yaco me vu ni bula yali ni mudu vi ira kece lia sa talairawarawa vua;
\v 10 sa kacivia na Kalou me bete levu me vaka nai valavala i Melikiseteki.
\p
\v 11 E levu na ka sa vo me kitou tukuni koya kinia, ia ka sa dredre lia na kenai balebale, ni sa yali vi ikodou na daliga rogo.
\v 12 Ni sa dodonu mo dou rawatia makawa mo dou i vavuvuli, ia ka sa qai yaga mo dou vatavulicia voki se cava na vu ni vavuvuli ni Kalou; sa yaga voki lia vi ikodou na wai-ni-sucu, ka yali na kakana dina.
\v 13 Ni sa yali ni kila vinaka nai vavuvuli ni vivadonui, ko koya sa somicia wale lia na wai-ni-sucu; ni sa gone lailai lia.
\v 14 A sa yaga vi ira sa matua na kakana dina, o ira era sa varautakia na yalodra e nai valavala, me ra valewa rawa na ka se vinaka se ca.
\c 6
\cl Wase 6
\p
\v 1 Sa vavulici ira me ra tu dei, ka gumatua sara, me ra kakua ni yalowai, ni sa vosa dina sara na Kalou ni sa yalatakia na ka vinaka,
\v 2 ai vavuvuli ni vipapitaisotaki, kei na vitabaki liga, kei na nodra tu cake voki lia, ko ira na mate, kei na lewa ka yali ni mudu.
\v 3 Ia na ka koya eda na caka, kevaka e vinaka vua na Kalou.
\v 4 Ni sa dredre sara me vavoui voki me ra vivutuni ko ira ka vararamatakia eliu, era a tovolea nai solisoli valomalagi, ka rawatia na Yalo Tabu,
\v 5 ka tovolea na vosa vinaka ni Kalou, kei na kaukauwa ni bula ena muri mai,
\v 6 a ra sa qai vuki voki; ni ra sa vakotia tiko vakai ira na Gone ni Kalou ki na kauveilatai, ka beci koya ena matanavotu.
\v 7 Ni sa vakalougatatakia na Kalou na qele sa somia na uca sa qai wasoma kinia, sa vatuburia na kau sa yaga vi ira era sa kelia:
\v 8 ia sa yali ni vabau ka sa vo e lailai me biu sara koya sa vatuburia na kau votovotoa vata vata kei na soni; ia na kenai otioti me visa.
\p
\v 9 Ia koi ikodou lia, sa lomani, e dina lia kitou sa vosa vakoya, ia kitou sa nanumi ikodou ni dou sa vinaka cake, ka ni na tu vi ikodou na ka sa qai vata ki na bula.
\v 10 Ni sa yali ni yali dodonu na Kalou me guilecavia na nomudou cakacaka, ki na loloma, dou a vatakila ki na yacana ni dou a qaravi ira era sa lotu, ia dou sa qaravia tiko lia.
\v 11 Ia kitou sa vinakatia mo dou dui gugumatua vakinia, mo dou vanuinui matua sara kinia ka me yacovia nai vataotioti:
\v 12 mo dou kakua ni vucesa, mo dou muri ira lia era sa qai taukei ni veika ka yalataki ni ra a vabautia ka vosotia vadede.
\p
\v 13 Ia ni sa yalayala vi Eparaama na Kalou, ka ni sa yali ni cavutia rawa e dua sa uasivi cake, sa qai cavutia koya lia ena nona bubului,
\v 14 ka tukunia, E dina ka'u na vakalougatataki iko valevu, ka valewelevutaki iko valevu sara.
\v 15 Sa vaka lia kinia, ni sa vosotia vadede mada ko koya, sa qai yaco mei taukei ni ka ka yalatakia.
\v 16 Ia ni sa bubului ko ira na tamata, era sa daucavutia na ka sa levu cake: a sa oti vi ira na vileti ena bubului mei vadinadina.
\v 17 Sa vakinia na Kalou, ni sa vinakatia ko koya me vatakila dina sara kivei ira era na taukenia na ka ka yalatakia ni sa tu dei na nona lewa, sa vadinadinatakia ena bubului:
\v 18 me rua kinia na ka sa tu dei sara, sa yali ni rawa kinia me vosa lasu na Kalou, me da vacegui sara kinia, koi ita eda sa qai varuru ni da sa tauria nai nuinui sa viritu e matada:
\v 19 ko ya sa tu vi ita mei kelekele ni yaloda, ni sa dina ka kaukauwa, ia ka sa curu sara ki loma ni lati:
\v 20 a tikinia ko ya sa curu kinia ena vukuda ko Jisu, me nodai liuliu, ni sa qisi me bete levu ka yali ni mudu me vaka nai valavala i Melikiseteki.
\c 7
\cl Wase 7
\p
\v 1 Ia ko Melikiseteki koya, sa tui Selemi, a bete ni Kalou Cecere sara, sa tavaki Eparaama ni sa lesu voki mai na nona mokuti ira na tui, a sa vosavakalougatatakia koya;
\v 2 sa solia voki lia vi koya ko Eparaama nai katini ni ka kece lia: (nai balebale ni yacana na Tui ni caka dodonu, a yacana voki lia emuri na Tui Selemi, a kenai balebale na Tui ni vivacegui;
\v 3 e yali ni tukunia na tamana, se na tinana, se na nona mataqali, sa yali ni vatekivu na nona gauna, se oti na nona bula; a sa caka me vaka na Luve ni Kalou), a sa tiko lia me bete ka yali ni mudu.
\p
\v 4 Dou vakasama na kena uasivi na tamata koya, ni sa solia vi koya ko Eparaama na turaga matua nai katini ni kamunaga sa tokitakia.
\v 5 A sa dina vi ira na luve i Livai, era sa bete, ni sa varotii vi ira ena vunau, me ra vaisigana mai vi ira na tamata, io, mai vi ira na wekadra, ia sa dina lia ni ra sa qai mai na kawa i Eparaama:
\v 6 ia ko koya koya sa vaisigana mai vi Eparaama, a sa yali ni wili vata ki na nona mataqali, a sa vosavakalougatataki koya ka vosatakia kinia na yalayala.
\v 7 Ia sa yali ni vatitiqatakia rawa koya, ni sa vosavakalougatataki koya sa uasivi sobu ko koya sa uasivi cake vi rau.
\v 8 Ia gona era sa tauria nai sigana ko ira na tamata era sa dui mate; ia mai na vanua gona sa tukunia e dua ni sa bula tiko.
\v 9 Io, kevaka e tara me'u vosa vakinia, ko Livai voki lia, o koya sa dau tauria nai sigana, erau sa solia kei Eparaama nai sigana;
\v 10 ni sa bera ni sucu ko koya ni sa tavaki Melikiseteki ko tamana.
\p
\v 11 Ia kevaka sa rawa mera vinaka sara e na vuku ni cakacaka ni bete va-Livai, (ni sa tukunia vata kaya na vunau vi ira na tamata,) ena yaga vacava me tubu e dua voki na bete me vaka nai valavala i Melikiseteki, ka me yali ni vatokai me vaka nai valavala i Eroni?
\v 12 Ia ni sa qai vaisosomitakia na bete, sa dodonu sara me vaisosomitaki voki lia na vunau.
\v 13 Ia ko koya sa tukunia vakoya, sa dua tani na nona yavusa, sa yali mai kinia e dua na tamata sa qaravia nai cabocabo-ni-soro.
\v 14 Ni sa macala sara sa tubu mai vi ira na Juta na noda Turaga; ia na yavusa ko ya e yali ni vosa kinia ko Mosese me ra bete.
\v 15 Ia sa macala valevu sara; ni sa tubu e dua tani voki na bete me vataki Melikiseteki,
\v 16 o koya ka lesi, ka yali ni vaka na vunau vavuravura, koya lia me vaka na kena mana ni bula yali ni mudu.
\v 17 Ni sa tukunia ko koya, O iko na bete yali ni mudu Me vaka nai valavala i Melikiseteki.
\p
\v 18 A sa dina sa mudu na vunau sa liu ni sa malumalumu ka yali ni yaga:
\v 19 ni sa yali ni vinaka sara e dua na ka ena vuku ni vunau, ia sa kenai liuliu ni nuinui sa vinaka cake, o koya eda sa toro voleka kinia vua na Kalou.
\p
\v 20 Ka ni sa ia na bubului ena nona lesi me bete:
\v 21 (ni sa buli loa lia mera bete ko ira koya, ia ka yali ena bubului; ia ko koya koya ena bubului; ena vuku i koya sa tukunia vua, Sa bubului ko Jiova, ka na yali ni vivutuni, ko iko na bete yali ni mudu:)
\v 22 sa uasivi cake vakinia na viyalayalati, o koya sa kenai vadinadina ko Jisu.
\p
\v 23 Ia ko ira koya era lesi mera bete, era sa lewe levu, ni sa tarovia na nodra tiko na mate:
\v 24 ia ko koya koya, sa yali ni vaisosomitakia na nona cakacaka vabete, ni sa tiko lia ka yali ni mudu.
\v 25 O koya koya sa rawarawa kinia vua me vabulai ira sara era sa qai mai vua na Kalou ena vukuna, ni sa bula tiko lia ko koya me masulaki ira.
\p
\v 26 Ni sa dodonu me noda e dua na bete sa vakoya, sa yalosavasava, sa yalovinaka, sa yali ni ca, sa tawase tani mai vi ira na tamatai valavala ca, a sa caka me uasivi cake ki lomalagi ena nona cecere:
\v 27 o koya e yali kinia ni yaga ena visiga, me vacaboria taumada nai soro ni nonai valavala ca, ia emuri nai soro ni nodra i valavala ca na tamata, me vataki ira na bete levu: ni sa caka koya vadua lia ko koya, ni sa vacabori koya.
\v 28 Ia sa buli ena vunau na tamata era sa malumalumu me bete levu; ia na Luve ni Kalou sa caka me vinaka sara ka yali ni mudu ena bubului sa taravia na vunau.
\c 8
\cl Wase 8
\p
\v 1 Ia sa kena levu ni veika sa vosatakia oti: Sa vakoya na noda bete levu, sa tiko ena liga i matau ni tikotiko i Koya sa levu mai lomalagi;
\v 2 ai talatala ena tikinia tabu, ki na vale tabu dina, sa yali ni tara na tamata, sa tara lia na Turaga.
\p
\v 3 Ni ra sa lesi kece lia na bete levu me vacabora nai madrali kei nai soro: o koya koya sa dodonu voki lia kinia vi koya na bete levu koya me dua na ka me vacaboria.
\v 4 Ia kevaka sa tiko lia e vuravura ko koya, ena yali ni bete, ni ra tiko na bete era vacaboria nai madrali me vaka na vunau:
\v 5 o ira sa caka nai vatakarakara kei na yaloyalo ni veika valomalagi, me vaka sa vatakila vi Mosese na Kalou ni sa voleka ni tara na vale tabu: ka tukunia, Raicia, mo caka na ka kece lia me tautauvata kei na kenai vatakarakara ka vatakilai vi iko ena ulu-ni-vanua.
\v 6 Sa qai nona na cakacaka vabete e uasivi cake, me vaka sa dautataro voki lia ko koya ena dua na viyalayalati e uasivi cake, o koya sa vataudeitakia ena vosa ni yalayala e uasivi cake.
\p
\v 7 Kevaka sa vinaka koya sa taumada, e yali voki ni vaqarai e dua tani.
\v 8 Ia ni sa yali ni vinakatia, sa tukunia ko koya, Sa vosa ko Jiova, ena yaco na siga, Ka'u na caka kinia na viyalayalati vou vi ira na mataqali ni Isireli kei na mataqali ni Juta:
\v 9 Ena yali ni vaka na viyalayalati ka'u a caka vi ira na nodra qase Ena siga ka'u a tauria kinia na ligadra me tuberi ira mai na vanua ko Ijipita; Ni ra sa yali ni tu dei ena noqu viyalayalati, A sa tukunia kinia ko Jiova, ka'u a yali ni maroroi ira.
\q
\v 10 A sa tukunia ko Jiova, Sa vakoya na viyalayalati ka'u na caka vi ira na mataqali ni Isireli ni sa oti na gauna ko ya; Au na tugania na noqu vunau ki na lomadra, Ka vola ena yalodra: Ia ka'u na yaco me nodra Kalou, Ia era na yaco me noqu tamata:
\v 11 era na yali ni vavulici ira yadua me nona lewe-ni-koro vata kei na wekana, ka tukunia, Mo kila na Turaga: Ni ra na kilai au kece lia, ko ira sa tamata lalai kei ira voki lia sa turaga.
\q
\v 12 Ni'u na yalovinaka vi ira sa yali ni dodonu, Ia ka'u na yali ni nanumia voki na nodra i valavala ca ki na nodra talaidredre.
\p
\v 13 Ni sa cavutia ko koya e dua sa vou, sa vamadratakia koya ka taumada. Ia na ka sa qai madra mai ka makawa sa voleka ni takali sara.
\c 9
\cl Wase 9
\p
\v 1 Sa dina lia sa tu ki na viyalayalati ka taumada eso nai varo ni lotu, kei na vale-ni-soro vavuravura.
\v 2 Ni sa caka lia na vale tabu; o koya sa taumada, sa tu kinia nai tutu-ni-cina, kei na tepeli, kei na madrai dauraici; a yacana koya na tikinia tabu.
\v 3 Ia sa sivi nai karua ni lati, sa qai tu na vale tabu sa vatokai na loqi tabu sara;
\v 4 sa tu kinia na miqa koula, kei na kato ni viyalayalati sa botani na yasana kece ena koula, sa tu kinia na bilo koula sa tawa e na mana, ki nai titoko voki lia i Eroni o koya sa kubu, ki na vatu raraba ni viyalayalati;
\v 5 sa tu lia e cake koi rau na jerupi vaiukuuku sa varurugia nai cabocabo-ni-bulubulu; ia ka sa dredre ni kua me tukunia yadua na veika koya.
\p
\v 6 Ia ni sa varautakia oti na veika koya, sa curu ko ira na bete ena visiga ki nai matai ni vale tabu, ka ia kinia na lotu:
\v 7 ia sa curu ki na kenai karua na bete levu dua loa lia vadua lia ena viyabaki, ka yadia na dra, a sa vacaboria ena vukuna, ena vuku voki lia ni nodra vacala ka na tamata:
\v 8 a sa vatakila na Yalo Tabu na ka koya, ni sa yali ni varairaitakia mai na sala ki na loqi tabu sara, ena gauna sa tu lia kinia na vale tabu ka taumada.
\v 9 A kenai vatakarakara loa lia koya, ka yacovia na gauna koya, sa vacabori kinia nai madrali ki nai soro, o koya sa yali ni vasavasavatakia rawa na nona lewa-eloma ko koya sa mai lotu;
\v 10 (ena kakana ki na ka-ni-somi, ki na vuivui valevu) ki na vivaro vavuravura, sa lesi me yaco mada na gauna ni vivadodonutaki.
\p
\v 11 Ia sa qai mai na Karisito, a sa bete levu ena ka vinaka ena muri mai, ena vale tabu levu ka uasivi cake na kena vinaka, e muri ni tara ena liga, ni sa yali ni caka vakinia;
\v 12 e yali voki lia ena dra ni me kei na luve ni bulumokau, ena nona dra lia sa curu vadua ki na loqi tabu sara, ni sa rawatia me solia na bula sa yali ni mudu.
\v 13 A kevaka sa yaga na dra ni bulumakau kei na me, kei na dravusa ni bulumakau yalewa ni sa kureitakia vi ira sa dukadukali, me savasava kinia na yagodra:
\v 14 ena vabekai evei na dra ni Karisito, o koya ka vacaboria koya vua na Kalou ena vuku ni Yalo Tabu yali ni mudu ia ka yali vua na ca, ena yali beka ni rawarawa sara me vui laivi kinia na nomudou lewa-eloma mai na cakacaka sa ka ni mate, mo dou qaravia na Kalou bula?
\p
\v 15 O koya koya sa yaco kinia ko koya me dautataro ena viyalayalati vou, mera rawatia kinia ko ira ka kacivi nai votavota yali ni mudu ka yalatakia, ena vuku ni nona mate, sai soro ni valavala ca ka caka oti ena gauna ni viyalayalati taumada.
\v 16 Ia kevaka sa dua na viyalayalati, sa yaga me mate o koya sa ia kinia na viyalayalati:
\v 17 ni sa mate sa vataudeitakia kinia na viyalayalati; ia ka sa yali ni yaga valailai ni sa bula tiko ko koya sa ia na viyalayalati.
\v 18 Ko koya koya sa yali kinia ni vatabui loa na viyalayalati sa taumada, sa caka lia ena dra:
\v 19 io, ni sa cavutia oti ko Mosese nai vavuvuli kece lia ni vunau vi ira kece liga na tamata, sa qai yadia ko koya na kedra dra na luve ni pulumokau kei na me, ki na wai, ki na vuti ni sipi sa vadamudamutakia, kei na isopa, ka kureitakia ki nai vola, kivei ira kece voki lia na tamata,
\v 20 ka tukunia, Koya na dra ni viyalayalati sa caka vi ikodou na Kalou.
\v 21 Sa kureitakia vaka voki lia kinia na dra ki na vale tabu, kei na bilo kece lia ni lotu.
\v 22 Ia ka vica na ka sa yali ni vasavasavatakia ena dra me vaka na vunau; ia kevaka sa yali ni vadavei na dra, sa yali ni bokoci nai valavala ca.
\p
\v 23 Ia sa dodonu kinia me vasavasavatakia nai vatakarakara ni veika mai lomalagi e na veika koya; ia na veika dina sa valomalagi sa vasavasavataki e nai soro e uasivi cake vi ira.
\v 24 Ni sa yali ni curu na Karisito ki na loqi tabu sa caka e na liga, koya sai vatakarakara lia ni ka dina; sa curu ki na lomalagi dina lia, me rairai ni kua e na mata ni Kalou e na vukuda;
\v 25 sa yali voki lia ni vacabori koya valevu, me vaka sa curu na bete levu ki na loqi tabu ena viyabaki, ka yadia na dra ni ka tani;
\v 26 ia ke sa vakinia ke sa dodonu me mate valevu mai nai vatekivu ki vuravura: sa qai varairaitakia vadua ko koya e nai vataotioti ni vigauna sa loku me yadia tani nai valavala ca ni sa vacabori koya.
\v 27 Ia me vaka sa lesi me mate vadua ko ira na tamata, ka me qai muri na siga ni lewa:
\v 28 sa vacabori vadua vavoki lia kinia na Karisito me cudruvi ena vuku ni valavala ca ni lewe levu; ka na rairai mai varua ko koya kivi ira sa waraki koya me ra bula, ia ena yali lia mei soro.
\c 10
\cl Wase 10
\p
\v 1 Sa tu lia e na vunau nai vatakarakara ni veika vinaka me na muri mai, ia ka yali ni koya na yaloyalona dina, ka voki lia ni rawa enai soro era sa caboria tiko ena viyabaki, me vasavasavataki ira era toro tiko kinia.
\v 2 Ia kevaka sa rawa, sa yali li ni mudu na nodra vacaboria, ni ra sa yali ni bitakia tiko enai valavala ca ko ira sa dausoro, ni ra sa vasavasavatakia vadua?
\v 3 Ia enai soro koya sa vananumi voki kinia nai valavala ca ena viyabaki.
\v 4 Ni sa dredre sara me yadia tani nai valavala ca na dra ni bulumakau ki na me.
\p
\v 5 O koya koya sa tukunia kinia ko koya ni sa qai mai ki vuravura, Ai soro ki nai madrali ko sa yali ni vinakatia, Ia ko sa varautakia lia vi au na yago:
\v 6 Ai soro kama, ki nai soro voki lia sa sorovaki kinia nai valavala ca, ko sa yali ni reki kinia:
\v 7 Au sa qai tukunia, Raicia, au sa qai mai, (Au a volai enai vola vivigi,) Me'u caka na ka ko sa vinakatia, na Kalou.
\p
\v 8 A sa tukunia eliu ko koya, Ai soro ki nai madrali ki nai soro kama ki nai soro sa sorovaki kinia nai valavala ca, ko sa yali ni vinakatia, se rekitakia, (o koya sa vacaboria me vaka na vunau,)
\v 9 sa qai tukunia ko koya, Raicia, au sa qai mai me'u caka na ka ko sa vinakatia, na Kalou. Sa yadia tani ko koya nai matai, me vayacoria na kenai karua.
\v 10 Ia eda sa vasavasavatakia ena vuku ni lewa koya, ena yago i Jisu Karisito ni sa caboria vadua.
\p
\v 11 Ia ko ira kece lia na bete era sa tu ka cakacaka ena visiga, ka vacaboria wasoma nai soro koya sa yali ni yadia tani rawa nai valavala ca:
\v 12 ia ko koya koya, ni sa vacaboria oti vadua nai soro e dua lia ena vuku ni valavala ca, sa qai tiko sobu ena liga i matau ni Kalou;
\v 13 a sa qai warakia tiko me vayacoria ko ira na nona meca mei tutu-ni-yavana.
\v 14 Ni sa vacaboria vadua nai soro sa caka kinia ko koya na ka kece lia e yaga vi ira era sa vasavasavatakia tiko.
\v 15 Ia sai vadinadina voki lia vi ita na Yalo Tabu: io, ni sa tukunia oti ko koya,
\v 16 Koya na viyalayalati ka'u na caka vi ira ni sa oti na gauna ko ya, sa qai tukunia na Turaga, Au na tugania na noqu vunau ki na yalodra, Ka vola ena lomadra;
\v 17 Ia na nodra i valavala ca ki na nodra talaidredre ka'u na yali ni nanumia voki.
\p
\v 18 Ia kevaka sa bokoci na veika koya, sa yali ni vacaboria voki nai soro ni valavala ca.
\p
\v 19 O koya koya, oi ikodou na viwekani, ni da sa qai doudou rawa me da curu ki na loqi tabu sara ena vuku ni dra i Jisu,
\v 20 ena sala vou ka bula, o koya sa qai vatara vi ita ko koya, ia sa ka e curu kinia nai lati, koya na yagona;
\v 21 ka ni sa dua voki lia na noda bete levu ena vale ni Kalou;
\v 22 me da toro voleka yani ena yalo dina ki na vabautia dina sara, ni sa kureitakia tu na yaloda meda kakua ni bitaki ita ena ca, ka sa vasilimi tu na yagoda ena wai makare.
\v 23 Tou tauria matua na vatusa ni noda vabauta me kakua ni yavala; ni sa yalodina ko koya sa yalatakia;
\v 24 me da vivananumi ita vakai ita me da vivakatakatai me dauloloma kai valavala vinaka:
\v 25 me da kakua ni dainia na vasoqoni vata, me vaka nai valavala ni tamata eso; me da vivamasuti tiko: ia me valevu, ni dou sa raicia sa toro voleka mai na siga.
\p
\v 26 Io, kevaka eda sai valavala ca ka sa yaloda kinia, ni da sa kila oti nai vavuvuli dina, sa qai yali voki e dua tani nai soro ni valavala ca:
\v 27 sa vo lia na noda warakia ena rere na siga ni lewa vata ki na cudru waqawaqa voki lia, koya ena kani ira na meca.
\v 28 O koya sa beca na vunau i Mosese sa mate lia, sa yali voki ni lomani, ni sa bitakia vi koya e lewe rua se lewe tolu nai vadinadina:
\v 29 dou vakasama se na vaevei na kena levu cake ni cudruvi, sa dodonu me yaco vua, sa butukia na Luve ni Kalou, a sa vawaletakia na dra ni viyalayalati sa vasavasavatakia kinia, a sa beci koya na Yalo ni loloma?
\v 30 Ni da sa kilai koya sa tukunia, Sa noqu i tavi me'u cudruvakia, au na sauma lia. Ka sa tukunia voki, Ena lewai ira na nona tamata ko Jiova.
\v 31 Sa ka rerevaki me lutu ki na liga ni Kalou bula.
\p
\v 32 Ia dou vananumia na visiga eliu, dou a vararamataki kinia ka dou a qai vosotia na vivala ena rarawa vaidina;
\v 33 eso, ni dou a vasesevotuni ena vivalialiai ki na vivararawataki; ka so, ni dou a tiko vata ki ira era sa vakinia.
\v 34 Ni dou a lomani ira lia era sa vesuki, ka reki ni sa kovei na nomudou i yau, ni dou sa kila ena lomamudou sa tu lia mai lomalagi na nomudou i yau e vinaka cake kinia ka viqati.
\v 35 Ko koya koya mo dou qai kakua ni dainia na nomudou dinatia ena levu na kenai sau.
\v 36 Ni sa yaga vi ikodou na vosotia, mo dou caka na ka sa lewa na Kalou, ka me nomudou kinia na ka ka yalatakia.
\v 37 Ni na dede valailai, Ena qai qai mai ko Koya e qai mai, ka na yali ni dede sara lia.
\q
\v 38 Ia ena bula na tamata yalododonu ena vabautia: Ia, kevaka sa suka tani voki, ena yali ni vinakati koya na yaloqu.
\p
\v 39 Ia koi ita, eda yali ni vataki ira sa suka voki yani ki na rusa; eda sa vataki ira lia era sa vabautia tiko me bula na yalo.
\c 11
\cl Wase 11
\p
\v 1 Ia na vabautia sa vaka ni sa vayacoria na veika sa vanuinuitakia, e vaka ni sa varaitaki na veika sa yali ni virai.
\v 2 Ni sa ka koya sa rogo vinaka kinia eliu ko ira na qase.
\v 3 Na vabautia eda sa kila kinia ni sa ia na vibuli ena Vosa ni Kalou, ia sa yali ni caka na veika sa rairai mai ena veika sa virai tiko.
\p
\v 4 Ni sa vabautia sa vacaboria ko Epeli nai soro sa vinaka vua na Kalou ka ca na nei Keni, ka sa rawatia kinia nai vadinadina ni sa yalododonu, ni sa vatakila na Kalou ni sa vinakatia na nonai madrali: ia na ka koya sa vosa tiko lia kinia ko koya ni sa mate tu.
\p
\v 5 Ni sa vabautia sa kau yani kinia ko Inoki ka yali ni mate; a ra sa yali ni kunei koya, ni sa yadi koya yani na Kalou: ia ni sa bera ni kau yani, sa tu lia vua nai vadinadina ni sa vinakati koya na Kalou.
\v 6 Ia kevaka sa yali na vabautia, sa dredre sara me da vinakati: o koya sa torovia na Kalou e dodonu me vabautia ni sa bula ko koya, ni sa saumi ira voki lia era sa dauvaqarai koya.
\p
\v 7 Ni sa vabautia sa rere kinia ko Noa, ni sa vasalatakia oti na Kalou ena vuku ni veika sa bera ni rairai mai, a sa taya e dua na waqa ko koya me vabulai ira kinia na nona lewe-ni-vale; a sa valewai ira kinia na kai vuravura, ka yaco mei taukei ni vivadonui sa yaco ena vabautia.
\p
\v 8 Ni sa vabautia sa talairawarawa kinia ko Eparaama, ni sa kacivi me qai ki na vanua sa bera ni soli vua me taukenia; ka sa qai yani, ia sa yali ni kila na vanua sa qai kinia.
\v 9 Ni sa vabautia sa qai ka tiko vulagi kinia e na vanua ka yalatakia, me vaka sa yali ni nona, ka tiko lowa lia ena vivale laca, ko Aisake voki lia vata kei Jekope, eratou taukenia vata emuri na ka koya ka yalatakia:
\v 10 ni sa nuitakia ko koya na koro sa tauyavutakia, ka tara na Kalou ka caka.
\v 11 Ni sa vabautia sa vakaukauwatakia kinia ko Sera me kunekunetakia na kawa, a sa vasucu gone ni sa oti na kena gauna, ni sa nanumia lia sa yalodina ko koya ka yalatakia:
\v 12 o koya sa tubu kinia mai vua e lewe dua, o koya e vaka sa mate, e lewe levu me vaka na vikalokalo ni lomalagi, e va voki lia na nuku mai matasawa e yali ni wili rawa.
\p
\v 13 Sa mate ena vabautia ko ira kece lia koya ia ka sa yali ni nodra dina na veika ka yalatakia, era sa raicia vayawa, ka ciqomia, ka tukuni ira ni ra a tiko vulagi lia ka viqaiyaki voli e vuravura.
\v 14 Ia ko ira sa vosa vakoya era sa vatakila sara ni ra sa vaqara na vanua sa nodra.
\v 15 E dina lia, kevaka era sa nanumia na vanua ko ya era sa dainia tu, sa rawarawa lia mera lesu voki kinia.
\v 16 Ia era sa qai gutia sara e dua na vanua sa vinaka cake, koya sa valomalagi: o koya lia koya e yali kinia ni madua na Kalou me vatokai me nodra Kalou: ni sa tara ko koya e dua na koro me nodra.
\p
\v 17 Ni sa vabautia sa vacabori Aisake kinia ko Eparaama, ni sa vatovolei, ia ko koya ka vosatakia kinia na yalayala sa vacaboria koya na lewe dua loa lia o koya ka vatuburia ko koya
\v 18 ia ka sa kainaki ena vukuna eliu, Na kawa i Aisake ena vatokai me nomu kawa:
\v 19 ni sa vadinatia ko koya sa rawarawa vua na Kalou me vabulai koya voki mai na mate; a sa tauri koya voki vakinia enai vatakarakara.
\p
\v 20 Ni sa vabautia sa vosavakalougatataki Jekope vata kei Iso kinia ko Aisake ena veika sa bera.
\p
\v 21 Ni sa vabautia sa vosavakalougatataki rau kinia na luve i Josefa ko Jekope, ni sa voleka ni mate; a sa cuva sobu ena nonai titoko.
\v 22 Ni sa vabautia sa tukunia kinia ko Josefa, ni sa voleka ni mate, ni na qai tani ko ira na luve i Isireli; a sa tataunakia na suina.
\p
\v 23 Ni sa vabautia sa vunitaki Mosese ka vula tolu koi rau na nona matua, ni sa sucu ko koya, ni rau sa raicia sa matavinaka na gone; a rau sa yali ni rerevakia nai varo ni tui.
\v 24 Ni sa vabautia sa bese kinia ko Mosese, ni sa qai tamata bula mai, me vatokai me luvena na luve i Fero na goneyalewa;
\v 25 ni sa digitakia me vosotia na vivacacani kei ira na tamata ni Kalou, ia ka catia ni bau marau loa lia enai valavala ca ena siga eso;
\v 26 ni sa vadinatia sai yau levu me valialiai ena vuku i Karisito, ia na ka lailai nai yau mai Ijipita: ni sa varaicia tu na kenai sau.
\v 27 Ni sa vabautia sa daini Ijipita kinia ko koya, ka yali ni rerevakia na cudru ni tui; ni sa gumatua me vaka sa raici koya sa yali ni vi rai.
\v 28 Ni sa vabautia sa caka kinia ko koya na kana vata ni qai-sivia, ki na kureitakia na dra, me kakua ni tarai ira ko koya sa vamatei ira na ulumatua.
\p
\v 29 Ni sa vabautia era sa qai kinia eloma ni Wasawasa Damudamu me vaka sa vanua mamaca: ia ni sa vatovolea ko ira na kai Ijipita mera qai vakinia, era sa luvu.
\p
\v 30 Na vabautia sa bale kinia na bai mai Jeriko, ni sa buku na druadrua ka bogi vitu.
\p
\v 31 Ni sa vabautia sa yali kinia ni rusa vata kei ira sa yali ni vabautia ko Reapi, na yalewa dautagane, ni sa yadi rau ena vivacegui rau na yamata.
\p
\v 32 Ia a cava voki me'u tukunia? Ni sa dede sara kevaka ka'u sa tukuni Kitioni vata kei Peraki vata kei Samisoni vata kei Jefica vata kei Tevita vata kei Samuela vata kei ira na parofita:
\v 33 o ira, ni ra sa vabautia, era sa vamalumalumutakia na matanitu eso, era sa caka na ka e dodonu, era sa rawatia me nodra na veika ka yalatakia, era sa sogotia na gusu ni laioni,
\v 34 era sa bokocia na bukawaqa rerevaki, era sa bula mai nai seleiwau, era sa vakaukauwatakia voki ni ra sa malumalumu, era sa qaqa enai valu, era vasavi ira nai valu ni kai tani.
\v 35 Sa tauri ira voki ko ira na yalewa eso na kai nodra, era sa tu cake voki mai na mate: ia ka so sa vararawatakia valevu, a ra sa bese lia ni bula; me vinaka cake kinia na nodra tu cake voki mai na mate;
\v 36 ia sa vatovolei eso ena vivalialiai ki na vakanakuitatakia, kei na vesu voki lia kei na biu ki na vale ni vivesu;
\v 37 era sa lauviri ena vatu, era sa varomusukia rua, era sa dauveretakia, era sa vamatei enai seleiwau: era sa vilqaiyaki voli ka sa vaisulu ena kuli ni sipi kei na kuli ni me; era sa dravudravua sara, era sa vararawatakia, era sa vacacania;
\v 38 (ia sa yali ni yaga ko ira na kai vuravura me ra tiko vata ki ira:) era sa se ki na vivanua liwa lala, ki na viulu-ni-vanua, ki na qara eso, kei na viqaravatu e vuravura.
\p
\v 39 Ia ko ira kece lia koya era sa rogo vinaka ena vuku ni vabautia, ia ka yali ni nodra dina na ka ka yalatakia:
\v 40 Ia sa varautakia na Kalou vi ita na ka e vinaka cake, me ra kakua kinia ni vavinakatakia sara dua loa lia me da vavinakataki sara vata lia.
\c 12
\cl Wase 12
\p
\v 1 Ena vuku ni ka koya, ni sa vavolivoliti ita voki lia e lewe levu e vaka na o era sa varaici ita, meda dainia tu na ka bibi kece ki nai valavala ca eda sa tao rawarawa kinia, ka meda cicivia tiko lia na cere sa tu e matada,
\v 2 ka meda varaici Jisu, o koya sa vatekivunia ena saumia voki lia na noda vabautia; o koya, ena vuku ni marau sa viritu e matana, sa vosotia na kauveilatai, ka sa yali ni madua ni sa valialiai kinia, a sa qai tiko sobu ko koya ena liga i matau ni tikotiko-vaturaga ni Kalou.
\p
\v 3 Dou qai vananumi koya sa vosotia ni sa vosavacacataki koya valevu ko ira na tamata ca, de oca ka waicala na lomamudou.
\v 4 Dou sa yali tu ni voratia mo dou vamatei, ena nomudou vivala vata ki nai valavala ca:
\v 5 ia dou sa guilecavia nai vavuvuli sa vosa kivei ikodou me vaka kivei ira na gone, Na luvequ, mo kakua ni beca ni sa cudruvi iko ko Jiova, Se yalowai ni sa vunauci iko ko koya:
\v 6 O koya sa lomania ko Jiova, sa cudruvia ko koya, Ka sa yaviti ira kece lia na luvena sa vinakatia ko koya.
\p
\v 7 Kevaka dou sa cudruvi, sa qai caka vi ikodou na Kalou me vaka vi ira na luvena; io, ko cei na gone sa yali ni cudruvi koya ko tamana?
\v 8 Ia kevaka dou sa yali ni cudruvia, sa dauia vi ira kece lia, dou sa qai vaka na gone e yali ni vatamani, ka yali ni vaka na luvena dina.
\v 9 Ia sa daucudruvi ita na tamada vayago, ia eda a daudoka: ena yali li ni levu cake sara na noda talairawarawa vi koya na Tama ni yaloda, ka da na bula kina?
\v 10 Ia ko ira koya era a daucudruvi ita ena visiga eso me vaka era sa vinakata; ia ko koya me bau yaga vi ita, me da vataki koya kinia ena yalosavasava.
\v 11 Ia ka yali ni ka ni marau na dauvicudruvi ni sa caka tiko, a ka rarawa lia: ia emuri sa qai vuatakia na vua ni yalododonu era sa vacegui kinia ko ira sa caka vi ira.
\p
\v 12 Ko koya koya mo dou qai vakaukauwatakia na liga sa wadamele vata ki na duru sa malumalumu;
\v 13 ka vakadodonutakia na sala ki na yavamudou, me kakua ni tovoci ko koya sa gera, me vabulai lia.
\v 14 Dou saga mo dou vivinakati vata ki ira na tamata kece lia, vata ki na yalosavasava, ni sa yali e dua ena raicia na Turaga kevaka e yali vua na ka koya:
\v 15 ka dou qarauni ikodou vinaka de bale e dua mai na loloma ni Kalou; de dua na waka gaga e tubu cake ka caka kinia na rarawa, ka vaqeleqelewataki kinia na lewe levu;
\v 16 de dua na daudara, se dua sa beca na ka tabu, me vataki Iso, o koya ka volitakia na nona ulumatua ena kakana e dua loa:
\v 17 ni dou sa kila, sa gadrevia emuri ko koya me vosavakalougatatakia; ia sa bureitakia vua: (ni sa yali ni raicia na ka e rawa kinia na vuki me duatani,) ia ka sa vaqara matua, ka vawai na matana.
\p
\v 18 Ni dou sa yali ni qai mai ki na ulu-ni-vanua sa tarai rawa, a sa caudre ena buka, ki na o loaloa, ki na butobuto, ki na cava,
\v 19 ki na rorogo ni davui, ki na domo ni vosa; ko ya sa masu kinia ko ira era a rogocia, me kakua ni vosatakia voki vi ira;
\v 20 ni ra sa yali ni vosotia rawa na ka sa varoti, Kevaka e tara na ulu-ni-vanua e dua na manumanu e yavai va, ena vaviriki ena vatu;
\v 21 ia sa ka rerevaki sara na kenai rairai ni ka ko ya, ka sa tukunia kinia ko Mosese, Au sa domobula ka sautaninini valevu:
\v 22 ia dou sa qai mai ki na ulu-ni-vanua ko Saioni lia, ki na koro ni Kalou bula, ki Jerusalemi valomalagi, ki na nodra i soqosoqo na agilose e yali ni wili rawa,
\v 23 ki na nodra i soqosoqo na ulumatua, sa volai mai lomalagi, vua voki lia na Kalou sa lewai ira kece lia na tamata, ki na yalodra na tamata yalododonu sa yaco kece kinia na nodra vakalougatataki,
\v 24 kivei Jisu voki lia na dautataro ni viyalayalati vou, ki na dra sa kureitakia, koya lia sa cavutia tiko na ka vinaka, sa cavutia na ka ca na dra i Epeli.
\p
\v 25 Dou raicia, mo dou kakua ni bese vua sa vosa. Ia kevaka era a yali ni tuba bula ko ira era a bese vua sa vosa e vuravura, ena dredre valevu cake vi ita, kevaka eda sa vuki tani mai vua sa vosa mai lomalagi:
\v 26 o koya sa vayavalataki vuravura ena domona ena gauna koya: a sa qai yalatakia, ka tukunia, Sa vadua voki, ka'u na yali ni vayavalataki vuravura lia, ko lomalagi voki lia.
\v 27 Ia koya, Sa vadua voki, sa vatakilai mai kinia ni na kau tani yani na veika sa vayavalatakia, me vaka na veika sa caka, me tu dei kinia na veika sa yali ni vayavalatakia rawa.
\v 28 Ia ni da sa rawatia na matanitu sa yali ni vayavalatia rawa, meda tauria matua na loloma sa soli, eda sa qaravia vinaka kinia na Kalou ena yalomatua ki na rere:
\v 29 ni sa bukawaqa caucaudre na noda Kalou.
\c 13
\cl Wase 13
\p
\v 1 Me tiko lia na vilomani vavitacini.
\v 2 Kakua ni guilecavia na vakani ira na vulagi: ni sa so era a vakania na agilose eso ka lecavia lia.
\v 3 Mo dou nanumi ira era sa vesu tu; me vaka dou sa vesu vata kei ira voki lia era sa valoloma, me vaka dou sa vayago voki lia.
\p
\v 4 Sa kilikili sara lia kei ira na tamata kece na vawati, kei nai mocemoce e yali ni vibutakoci: ia ko ira na daudara kei ira na dauyalewa ena lewai ira na Kalou.
\v 5 Mo dou kakua ni daukocovia nai lavo: ia dou lomavinaka ena ka sa tu vi ikodou: ni sa tukunia ko koya, Au na yali sara ni daini iko, se valaivi iko.
\p
\v 6 Ena vuku ni ka koya eda sa doudou kinia me tukunia, A noqu i vukevuke ko Jiova, ia ka'u na yali ni rere A cava na ka ena caka vi au na tamata?
\p
\v 7 Dou nanumi ira era a liutaki ikodou, era a tukunia vi ikodou na vosa ni Kalou; vadamurimuria na nodra vabautia, ka nanumia nai otioti ni nodra i valavala.
\v 8 Sai koyakoya tiko lia ko Jisu Karisito, ena siga sa oti, ki na siga ni kua, ki na visiga emuri.
\v 9 Dou kakua ni viyadiyaki enai vavuvuli e levu sa qai vatani. Ni sa yaga me vataudeitakia na yalo ena loloma sa soli, ia me kakua lia ena kakana, sa yali ni yaga vi ira era sa oga kinia.
\p
\v 10 Sa dua na nodai cabocabo-ni-soro, sa yali ni dodonu me kana kinia ko ira sa qaravia na vale tabu.
\v 11 Ni sa vakamai enai bili ni koro na yago ni manumanu koya, sa yadia na kedra dra ki na loqi tabu ko koya na bete levu mei soro ni valavala ca.
\v 12 Ko koya lia koya sa mate kinia ko Jisu e taudaku ni matamata-ni-koro, me vasavasavataki ira na tamata ena nona dra.
\p
\v 13 Ena vuku ni ka koya me da qai kinia kivi koya ki nai bili, ka vosotia vata kaya na vivalialiai.
\v 14 Ni sa yali na noda koro koya me da tiko vadua kinia, ia eda sa vaqara lia e dua ena muri mai.
\p
\v 15 Ia ko koya koya meda qai vacaboria tiko lia nai madrali ni vavinavinaka vua na Kalou ena vukuna, koya na vua ni tebenigusuda, ni da tusanakia na yacana.
\p
\v 16 Kakua voki lia ni guilecavia na caka vinaka ki na dausoli ka: ni sa vinakatia sara na Kalou nai madrali vakoya.
\p
\v 17 Dou talairawarawa vi ira sa liutaki ikodou, ka mo dou vamalumalumutaki ikodou: ni ra sa yadravia na yalomudou, me vataki ira era na tukuni ira kinia, me ra caka kinia ena marau, ka yali ena vutugu: ni sa yali ni yaga vi ikodou me vakoya.
\p
\v 18 Dou masulaki kitou: ni kitou sa dinatia ni sa vinaka na nitou lewa eloma, ka kitou sa vinakatia mei valavala dodonu ena ka kece lia.
\v 19 Ia ka'u sa vamamasu me caka lia na ka koya, me'u vatotolotakia yani kinia vi ikodou.
\p
\v 20 Ia na Kalou ni vivacegui, o koya ka yadia voki mai na mate na noda Turaga ko Jisu, na nodra i Vatawa levu na sipi, ena vuku ni dra sa caka kinia na viyalayalati yali ni mudu,
\v 21 me vavinakatakia ikodou mada ko koya enai valavala vinaka kece lia mo dou caka na nona lewa, ka me caka ko koya ena lomada na ka sa vinaka vua, ena vuku i Jisu Karisito; me caka vi koya na varokoroko ka yali ni mudu. Emeni.
\p
\v 22 Ia ka'u sa masuti ikodou, na viwekani, mo dou vosotia na vosa ni vivadreti: ni'u sa vola vi ikodou nai vola, ena vosa e vica loa lia.
\p
\v 23 Dou kila, sa serekia voki na wekada ko Timoci; kevaka sa tadu kusarawa mai ko koya, kirau na raici ikodou vata kaya.
\p
\v 24 Au sa loloma yani vi ira kece sa liutaki ikodou, ki ira kece lia era sa lotu. Sa loloma yani vi ikodou ko ira mai Itali.
\p
\v 25 Me tiko vi ikodou kece lia na loloma. Emeni.