lmv-x-levuka_reg/54-2TH.usfm

\id 2TH
\ide UTF-8
\h Karua Ni Vola I Paula Nai Apositolo Vei Ira Na Kai Cesalonaika
\toc1 Karua Ni Vola I Paula Nai Apositolo Vei Ira Na Kai Cesalonaika
\toc2 Karua Ni Vola I Paula Nai Apositolo Vei Ira Na Kai Cesalonaika
\toc3 2th
\mt Karua Ni Vola I Paula Nai Apositolo Vei Ira Na Kai Cesalonaika
\c 1
\cl Wase 1
\p
\v 1 Oi kitou ko Paula ki Silivenuse, ki Timoci, ki nai soqosoqo lewe ni lotu mai Cesalonaika era sa tu vua na Kalou ko Tamada ki na Turaga ko Jisu Karisito.
\v 2 Me nomunu na loloma, ki na vacegu, mai vua na Kalou ko Tamada ki na Turaga ko Jisu Karisito.
\p
\v 3 Sa kilikili ki itatou me ia tiko lia na vavinavinaka vua na Kalou ena vukumunu, na viwekani, ni sa dodonu lia koya, ni sa tubu valevu sara na nomunu vabautia, a sa uasivi cake na nomunu vilomani vataki ikodou yadua;
\v 4 ia kitou sa vacaucautaki ikodou vi ira na visoqosoqo lewe ni lotu ni Kalou, ena vuku ni nomunu loma dei ki na nomunu vabautia ena nomunu vacacani kece lia, ki na vararawatakia, dou sa vosotia.
\p
\v 5 Koya nai vatakilakila ni lewa dodonu ni Kalou, monu vabau kinia monu yaga me rawatia na matanitu ni Kalou, o koya dou sa vararawatakia voki lia kinia.
\v 6 Ni sa dodonu vua na Kalou me saumi ira varawarawa era sa vararawataki ikodou;
\v 7 ia vi iko dou voki lia sa vararawatakia, me vacegui vata ki kitou, ni na varaitakia mai lomalagi na Turaga ko Jisu ki ira vata kaya na nona agilosi kaukauwa,
\v 8 e na yameyame ni bukawaqa, me cudruvi ira era sa yali ni kila na Kalou, a sa yali ni vabautia nai tukutuku vinaka ni noda Turaga ko Jisu Karisito:
\v 9 Sa nodra cudruvi na vivarusai yali mudu mai na mata ni Turaga; mai na nona kaukauwa vaidina voki lia.
\v 10 Ni na qai mai ena siga koya me varokorokotakia ko ira na nona tamata yalo savasava, ka me dokai koya ko ira kece lia era sa vadinatia, ena siga koya, (ni sa vadinatia na neitou tukutuku vi ikodou.) Baletia na nitou tukuni yalo vi ikonu sa vabautia.
\p
\v 11 O koya koya keitou sa masulaki ikodou voki lia; me vabauti ikodou na neitou Kalou mo dou yaga me rawatia na ka dou a kacivi kinia; ka me vayacori sara ena kaukauwa na gagadre vinaka kece lia, ki na cakacaka ni vabautia:
\v 12 me vacaucautakia kinia na yaca ni noda Turaga ko Jisu Karisito e na vukumudou, koi ikodou voki lia e na vukuna, me vaka na loloma ni noda Kalou ki na Turaga ko Jisu Karisito.
\c 2
\cl Wase 2
\p
\v 1 Ia keitou sa qai vamasuti ikodou, na viwekani, ena vuku ni nona qai voki mai na noda Turaga ko Jisu Karisito, ki na noda soqoni vata vi koya,
\v 2 mo dou kakua vitosoyaki vasauri mai na loma dei, se vataqayataki, me kakua ena vuku ni vosa ni yalo, se nai tukutuku, se nai vola, me vaka sa vu vei itatou, me vaka sa voleka dina mai na siga i Karisito.
\v 3 Me kakua sara e dua na ka me vakaisini ikodou kinia e dua; ni na yaco mada e liu na vuki tani, ka na varaitaki mada na tamata ni valavalaca, a luve ni veivarusai.
\v 4 O koya sa dau voratia, a sa valevulevui koya me uasivi ena ka kece lia sa vatokai me Kalou, se dauqaravia, sa tiko kinia ko koya ena vale ni Kalou; a sa varaitaki koya me Kalou.
\v 5 Dou sa yali beka ni nanumia; ni'u ma tukunia vi ikodou na veika koya, ni'u na tiko vata ki ikodou.
\p
\v 6 Ia dou sa qai kila na ka sa tarovia, me varaitakia mai kinia ko koya ena kena gauna.
\v 7 Ni sa cakacaka vavuni ni kua na ca, ia sa dua e tarovia tiko lia, ka warakia me yadi tani ko koya.
\v 8 Ena qai varaitakia na vuni ca ko koya, o koya ena va rusa na Turaga enai cegu ni gusuna, ka vaotia ena nona rairai mai.
\p
\v 9 Sa vaka na cakacaka i Setani na nona qai mai, ia ena kaukauwalevu vata na vivatakilakila ki na vi ka vailasu e vivakurabuitaki,
\v 10 ki na ka e yali ni dodonu sa vivacalai vi ira era sa rusa; ni ra sa bese ni lomania na dina, me ra bula kinia.
\v 11 Ena vuku ni ka koya, sa tala tiko na vivacalai mana vi ira na Kalou, me ra vadinatia kinia na ka e yali ni dodonu.
\v 12 Me cudruvi kinia ko ira kece lia era sa yali ni vabautia na ka dina, a ra sa vinakatia lia na ka e yali ni dodonu.
\p
\v 13 Ia sa kilikili ki kitou me kitou ia tiko lia na vavinavinaka vua na Kalou ena vukumunu, na viwekani, oi ikodou sa lomania na Turaga, ni sa digitaki ikodou na Kalou mai nai vatekivu mo dou bula ni dou sa vasavasavataki ena Yalo Tabu, ka dou na vabautia na ka dina:
\v 14 ka sa kacivi ikodou kinia ko koya enai tukutuku vinaka, mo dou rawatia kinia na kena kalougata ni noda Turaga ko Jisu Karisito.
\p
\v 15 O koya monu tudei na viwekani, ka tauria tiko nai tukutuku dou sa vavulici kinia mai vi kitou, ena vosa se nai vola.
\p
\v 16 Ia noda Turaga ko JIsu Karisito, kei na Kalou ko Tamada, o koya sa lomani ita, ka solia vei ita ena loloma na vakacegu sa yali ni mudu kei nai nuinui vinaka,
\v 17 Me vakaceguya mada na yalomunu ka vataudeitaki ikodou ena vosa ki na cakacaka vinaka kece lia.
\c 3
\cl Wase 3
\p
\v 1 Me'u tinia, ikodou na viwekani, dou masulaki kitou, me cici yani na Vosa ni Turaga, ka me dokai tiko, me vaka vi ikodou:
\v 2 ka me kitou vabulai voki lia mai vi ira na tamata ena yalo vatani ka ca; ni sa yali vi ira kece lia na vabautia.
\p
\v 3 Ia sa lomadina na Turaga, o koya ena vataudeitakia vi ikodou ka maroroi ikodou mai na ca.
\v 4 Ia kitou sa vadinatia na Turaga ena vukumunu, ni dou sa qai caka ka dou na caka voki lia i muri na vi ka kitou sa varotia vei ikodou.
\v 5 Ia me tuberia mada na yalomudou na Turaga ki na loloma ni Kalou, ki na dauvosotia me vataki Karisito.
\p
\v 6 Ia kitou sa varotia vi ikodou, na viwekani, ena yaca ni noda Turaga ko Jisu Karisito, mo dou kakua ni tiko vata kaya e dua vei ira na viwekani sa dau ia nai valavala vatani; ka yali ni vaka nai vavuvuli era sa rogocia vi kitou.
\v 7 Ni dou sa kila sa kilikili vi ikodou mo dou vadamurimuri kitou; ni kitou a yali ni valavala vatani ena ikodou maliwa;
\v 8 ka kitou a yali ni kana loa lia vua e dua na tamata, ia kitou a oga ka oca ena bogi ki na siga, me kitou kakua kinia ni vabibitakia e dua vi ikodou.
\v 9 E yali ni dodonu vi kitou, ia me kitou sa nomudou i varau lia mo dou vadamurimuri kitou.
\v 10 Ia, ni kitou a tiko ki ikodou, sa nitou i varo koya vi ikodou, me kakua ni kana ko koya sa yali ni cakacaka.
\v 11 Ni kitou a rogocia ni sa so vi ikodou, era caka tiko nai valavala vatani, era sa yali sara ni cakacaka, a ra sa makutu vatani.
\p
\v 12 Ia ko ira era sa vakoya kitou sa varotia ka vamasutia ena vuku ni noda Turaga ko Jisu Karisito, me ra tiko vamalua ka daucakacaka, ka kania lia na kedra.
\p
\v 13 Ia ko ikodou, na viwekani, dou kakua ni cegu oca ena cakacaka vinaka.
\p
\v 14 Ia kevaka e dua sa yali ni talairawarawa kina nitou vosa enai vola koya, dou vatakilakilatakia na tamata ko ya, ka kakua ni tiko vata kaya, me madua kinia ko koya.
\v 15 Ia dou kakua lia ni nanumia koya me meca, ia mo dou vatavulicia lia me vaka sa wekamudou.
\p
\v 16 Ia na Turaga ni vivacegui me solia tiko lia vi ikodou na vacegu ena ka kece lia. Me tiko vata ki ikodou kece lia na Turaga.
\v 17 Au sa loloma yani koi au ko Paula, kau sa vola ena ligaqu dina, o ko ya na kenai vadinadina enai vola kece lia au sa vola vakinia.
\v 18 Me nomudou kece lia na loloma ni noda Turaga ko Jisu Karisito. Emeni.