lmv-x-levuka_reg/51-PHP.usfm

\id PHP
\ide UTF-8
\h Filipai
\toc1 Filipai
\toc2 Filipai
\toc3 php
\mt Filipai
\c 1
\cl Wase 1
\s Sa tukunia vi ira ko Paula ni sa vavinavinakatakia e na vukudra, ka daumasulaki ira, 1-11.  Sa tukunia ni sa vacegui ni sa dauvacacani, 12-26.  Sa varotia vi ira, ka vacegui ira, 27-30.
\p
\v 1 Koi kirau ko Paula vata ki Timoci, nai talatala i Jisu Karisito, vi ira kece lia era sa lotu mai Filipai, era sa tu vata ki Karisito Jisu ki ira nai talatala qase vata ki ira na tuirara:
\v 2 Me nomudou na loloma, ki na vacegu, mai vua na Kalou ko Tamada, ki na Turaga ko Jisu Karisito.
\p
\v 3 Au sa vavinavinaka vua na noqu Kalou ena gauna kece lia kau sa nanumi ikodou kinia,
\v 4 ena visiga kece lia, ena noqu masu kece lia, au sa masulaki ikodou ena marau,
\v 5 ni dou sa lomavata tu e nai tukutuku-vinaka mai nai vatekivu ka yacovia na siga ni kua;
\v 6 ia na ka koya kau sa vadinatia sara, o koya sa vatekivutakia na cakacaka vinaka e na lomamudou, ena caka tiko me yaco mada na siga i Jisu Karisito:
\v 7 ia sa dodonu meu nanumi ikodou kece lia va koya, ni dou sa tiko e na lomaqu; ni dou sa rawatia vata ki au na loloma koi ikodou kece lia, niu sa vesu tu, ka totaka ka vadinadinatakia nai tukutuku-vinaka.
\v 8 Ni sa kila na Kalou, niu sa lomani ikodou kece lia valevu sara e na yalololoma i Jisu Karisito.
\p
\v 9 Ia na ka koya kau sa kerea, me tubu cake valevu sara na nomudou loloma e na vuku ki na lewa vinaka kece lia;
\v 10 mo dou vinakatia kinia na vi ka sa vinaka sara, mo dou yalodina ka yali ni cala me yaco mada na siga i Karisito;
\v 11 ni dou sa sinai e na vua ni yalododonu, sa tubu e na vuku i Jisu Karisito, me varokorokotaki ka vavinavinakataki na Kalou.
\p
\v 12 Ia kau sa vinakatia, mo dou kila, na viwekani, ni sa tubu cake nai tukutuku-vinaka e na vuku ni ka sa yaco vi au;
\v 13 a sa varaitakia kinia na noqu vesuki e na vuku i Karisito vi ira kece lia na sotia e na vale ni tui, vi ira kece voki lia na kena vo;
\v 14 a ra sa lewe levu na viwekani era sa tu vata ki na Turaga, era sa gumatua mai niu sa vesuki tu, a ra sa doudou cake kinia me ra tukunia na Vosa ni Kalou ka yali ni rere.
\p
\v 15 E dina lia sa so era sa vunautaki Karisito ni ra sa dauvuvu ka dauvileti, eso voki lia ni ra sa lomavinaka;
\v 16 sa vunautaki Karisito ko ira eso ni ra sa dauvileti, ka yali e na lomadina, era nakitia lia me vaikuritakia na noqu vesu e na ka rarawa eso;
\v 17 eso voki e na loloma, ni ra sa kila kau sa lesi meu totakia nai tukutuku-vinaka.
\v 18 Ia ka vaevei? Sa takivivinaka, se ra vailasu, se ra dina, sa vunautakia na Karisito: ia na ka koya kau sa rekitakia, io, kau na rekitakia tiko lia.
\p
\v 19 Niu sa kila ni na yaco na ka koya me ka meu bula kinia, e na vuku ni nomudou masu, ki nai solisoli ni Yalo i Jisu Karisito,
\v 20 me vaka na ka kau sa dauwarakia ka vanuinuitakia meu kakua ni madua e na dua na ka, meu doudou sara lia, me vaka eliu, me vakinia ni kua me valevulevui na Karisito e na vuku ni yagoqu, se sa bula, se sa mate.
\p
\v 21 Ni sai koya na Karisito kau sa bula kinia; ia sa ka vinaka kevaka kau sa mate.
\v 22 Ia kevaka sa vavuana tiko na noqu cakacaka niu sa bula vayago koya, au sa qai yali ni kila na ka meu digitakia.
\v 23 Niu sa lomalomarua e na ka e rua, niu sa gadrevia meu qai yani, ka tiko vata ki Karisito; o koya sa vinaka cake sara:
\v 24 ia sa yaga cake vi ikodou meu tiko lia vayago.
\v 25 Ia niu sa vadinatia koya, au sa kila niu na tiko lia, io, ka tiko vata ki ikodou kece lia, mo dou tubu cake kinia e na marau ni vabautia;
\v 26 me levu cake e na vukuqu na nomudou rekitaki Jisu Karisito, e na noqu tiko vata voki ki ikodou.
\p
\v 27 Mo dou caka lia nai valavala sa kilikili ki nai tukutuku-vinaka ki Karisito: meu rogoci ikodou kinia, seu qai yani ka raici ikodou, seu tiko tani, ni dou sa tu dei e na yalovata, ka gumatua sara e na lomavata me tubu na vabautia ni tukutuku-vinaka
\v 28 me kakua ni varerei ikodou ko ira na nomudou meca e na dua na ka; koya nai vatakilakila vi ira ni ra na rusa, ia vi ikodou ni dou na bula, ia koya mai vua na Kalou.
\v 29 Ni sa soli vi ikodou e na vuku i Karisito, e yali loa lia mo dou vabauti koya, mo dou vosotia voki lia na ca e na vukuna;
\v 30 ni sa nomudou na vivala dou sa raicia eliu vi au, ka dou sa rogocia sa yaco vi au ni kua.
\c 2
\cl Wase 2
\s Sa varotia vi ira ko koya me ra vilomani, ka yalomalumalumu, me vataki Jisu, 1-11.  Me ra gumatua sara me ra bula: mera yaga voki lia, 12-18.  Sa tukuni Timoci kei Epafirotaito vi ira, 19-30
\p
\v 1 Ia kevaka sa tu na vivacegui e na vuku i Karisito, se tu na vivalecataki ni loloma, se tu na vilomani ni Yalo Tabu, se tu na yalololoma ki na yalovinaka,
\v 2 mo dou vayacoria sara na noqu marau, mo dou lomavata kinia, mo dou tautauvata e na loloma, mo dou lomavata, mo dou yalovata.
\v 3 Me kakua ni caka e dua na ka e na vileti se na vidokadokai loa lia; mo dou yalomalumalumu ka dui vasama ni sa uasivi cake vua ko koya kadua.
\v 4 Mo dou kakua ni nanumia na nomudou ka lia koi ikodou yadua, ia mo dou dui nanumia voki lia na nodra ka na tamata tani.
\p
\v 5 Me tiko e na lomamudou na yalo koya ka tiko voki lia vi Karisito Jisu:
\v 6 o koya, ni sai tovo vata ki na Kalou, sa yali ni vakasama ni sa butako ni sa vatauvatani ki na Kalou:
\v 7 a sa vadravudravuataki koya, ka yadia vua nai tovo ni tamata dauviqaravi, a sa caka me tautauvata ki na tamata:
\v 8 ia ni sa kune ni sai tovo vata ki na tamata, sa vamalumalumutaki koya, a sa talairawarawa me mate, io me mate e na kauveilatai.
\q1
\v 9 O koya koya sa valevulevui koya cake kinia na Kalou, a sa solia vua e dua na yaca sa uasivi cake e na yaca kece lia:
\v 10 me tekiduru kinia e na yaca i Jisu na duru vayadua lia, mai lomalagi, ki vuravura, ki na ruku i vuravura;
\v 11 me vatusa voki lia na yame kece lia ni sa Turaga ko Jisu Karisito, me varokorokotakia kinia na Kalou na Tamada.
\p
\v 12 Ia koi ikodou, kau sa daulomania, me vaka na nomudou talairawarawa e na vigauna sa oti, dou sa yali ni caka loa lia niu sa tiko vi ikodou, dou sa uasivi cake kinia niu sa takali, dou caka vakinia na cakacaka dou sa bula sara kinia e na rere ki na sautaninini.
\v 13 Ni sai koya na Kalou sa cakacaka e na lomamudou me vaka na nona lewa vinaka, mo dou nakitia ka caka voki lia.
\p
\v 14 Me kakua sara na dau didi ki na vileti e na nomudou cakacaka kece lia:
\v 15 mo dou kakua ni vunaucia rawa, ka tawa cala mo dou luve ni Kalou ka yali ni bitaki me ca, e na kedra maliwa nai tabatamata takelo ka lomavatani, mo dou sa cila e na kedra maliwa me vaka na vicina e vuravura;
\v 16 ni dou sa tauria tiko na vosa ni bula; meu reki kinia e na siga i Karisito, niu sa yali ni cici loa lia, seu daucakacaka loa lia.
\p
\v 17 Ia kevaka kau sa sovarakia yani e na nomudou vabautia niu sa cabori mei madrali, au sa reki kinia, ka marau vata ki ikodou kece lia.
\v 18 E na vuku ni ka koya mo dou reki voki lia koi ikodou, ka marau vata ki au
\v 19 Ia kau sa vanuinui vua na Turaga ko Jisu ni sa voleka na noqu talai Timoci vi ikodou, meu vacegui voki lia, niu sa kila na nomudou tiko.
\v 20 Ni sa yali e dua sa tiko vi au sa yalovata kaya, me daunanumia na nomudou ka e na lomana dina.
\v 21 Ni ra sa vasaqara na nodra ka ko ira kece lia, ka yali na ka ni Jisu Karisito.
\v 22 Ia dou sa kilai koya ni sa vatovolei, ni sa vaka na gone vi tamana, sa daucakacaka vata ki au e nai tukutuku-vinaka.
\v 23 O koya kau sa nakitia kinia me malua valailai kau na qai talai koya yani, meu kila mada se sa na vaevei koi au.
\v 24 Ia kau sa vararavi vua na Turaga niu sa voleka voki lia koi au meu qai yani.
\p
\v 25 Ia kau sa vakasama ni sa dodonu meu talai Epafirotaito mada vi ikodou, na taciqu, ki na qau i caba e na cakacaka, ki na noqu i tokani e nai valu koya, ki na nomudou i talatala, ki koya sa vukei au e na noqu dravudravua.
\v 26 Ni sa sasaga yani vi ikodou kece lia, a sa rarawa na yalona, ni dou a rogocia sa tauvi-mate ko koya.
\v 27 E dina lia sa tauvi-mate ka sa voleka ni ciba: ia ka sa yalovinaka vi koya na Kalou; a sa yali loa lia vi koya, vi au voki lia, de vaikuritakia na noqu rarawa e na dua voki na ka rarawa.
\v 28 O koya koya kau sa gumatua cake kinia meu talai koya, mo dou reki kinia, ni dou sa raicia voki, ka me lailai sobu kinia na noqu rarawa.
\v 29 O koya mo dou qai vacegui koya e na Turaga, e na reki levu sara; ka mo dou dokai ira era sa vakinia:
\v 30 ni sa voleka ni mate ko koya e na vuku ni cakacaka i Karisito, a sa yali ni taleitakia na nona bula, me vaikuritakia na nomudou cakacaka vi au sa vo tu.
\c 3
\cl Wase 3
\s Sa vaisalataki ira ko koya e na vukudra nai vavuvuli vailasu, 1-11.  Sa tukunia ni sa cici cere, a sa varotia vi ira me ra vakinia, 12-21.
\p
\v 1 Meu tinia oi ikodou na wekaqu, mo dou reki e na Turaga. Meu vola vi ikodou na veika kau a vola eliu sa yali dina ni ka rarawa vi au, ia na ka dou sa tu vinaka kinia.
\p
\v 2 Dou qarauni ikodou vinaka mai na koli, dou qarauni ikodou mai vi ira era sa daucaka ca, dou qarauni ikodou mai vi ira na cili.
\v 3 Sai ita lia na vicili ko ita sa masu vayalo vua na Kalou, ka rekitaki Karisito Jisu, ka yali ni vararavi ki na yago.
\v 4 Ia koi au, e dina sa noqu na ka vayago meu vararavi kinia. Kevaka sa dua tani sa nanumia sa tu vua e dua na ka vayago me vararavi kinia, au sa uasivi cake kinia;
\v 5 au a cilivi e nai kawalu ni siga, au a sucu me luve i Isireli, mai na yavusa i Penijamini, oi au na Iperiu mai vi rau na Iperiu; e na ka lia ni vunau au a Farisi;
\v 6 e na ka ni lomakatakata au a vacacania nai soqosoqo lewe ni lotu; e na vivadonui sa yaco mai na vunau, au a yali ni cala.
\p
\v 7 Ia na veika kau a taleitakia au sa vaka me yali vadua vi au me noqu kinia na Karisito.
\v 8 Io, e dina lia, niu sa qai vayalitakia vadua vi au na ka kece lia ni sa uasivi cake kinia na vikilai ki Karisito Jisu na noqu Turaga; o koya kau sa vosotia kinia me yali vi au na ka kece lia, ia kau sa vasama ni sa de-ni-manumanu loa lia, meu rawai Karisito kinia me noqu,
\v 9 me kirau kune vata kaya, me kakua ni tu vi au na vadonui, sa rawa mai na vunau, ko ya lia sa rawa e na vabauti Karisito, na vadonui sa mai vua na Kalou e na vuku ni vabautia:
\v 10 meu kilai koya, ki na kaukauwa ni nona tu cake voki mai na mate, ka me kirau vitokani vata kaya e na ka rarawa, meu vatauvatani kaya e na nona mate;
\v 11 deu yacovia beka na tu cake voki mai na mate.
\p
\v 12 Au sa yali ni vaka kau sa rawatia kece, seu yaco sara yani: ia kau sa muria tiko lia, meu tauria dina na ka ka tauri au kinia ko Jisu Karisito.
\v 13 Oi ikodou na viwekani, au sa yali ni vakasami au niu sa tauria oti; ia sa dua bau lia na ka kau sa caka, au sa guilecavia na ka sa sivi, kau sa kakavaki meu tadolovia na ka ki liu,
\v 14 kau sa cicivia oti na cere, meu taucia na cere sa kacivi au kinia mai colo na Kalou e na vuku i Karisito Jisu.
\v 15 O koya me da qai lomavata e na ka koya, oi ita kece lia sa matua e na lotu; ia kevaka sa dua na ka dou sa yali ni lomavata kinia, ena varaitakia voki lia i ikodou na Kalou na ka ko ya.
\v 16 Ia, na ka eda sa yacovia sara lia, me da muria tiko nai varau ko ya.
\p
\v 17 Oi ikodou na viwekani, dou muri au vata lia, ka varaici ira era sai valavala vakinia, ni kitou sai varau vi ikodou.
\v 18 Ni ra sa lewe levu kau sa tukunia wasoma vi ikodou, ia kau sa qai tukunia voki lia niu sa tagi tiko, ni ra sa meca ni kauveilatai i Karisito e na nodra i valavala:
\v 19 ia sa kedrai tinitini na rusa, a nodra kalou na ketedra, era sa valevulevui e na nodra ka e vivamaduataki, a ra sa daunanumia na vi ka ni vuravura.
\v 20 Ia eda sa lewe ni koro mai lomalagi koi ita; eda sa warakia mai kinia nai Vabula, na Turaga ko Jisu Karisito:
\v 21 o koya ena vamataliatakia na yagoda sa malumalumu, me vatauvatani ki na yagona sa vaiukuukutakia, me vaka na kaukauwa sa vamalumalumutakia rawa kinia na ka kece lia ko koya.
\c 4
\cl Wase 4
\s Sa vavulici ira eso ko koya, a sa vavinavinakatakia ni ra sa lomani koya, 1-120. Sa tinia na nonai vola, 21-23.
\p
\v 1 O koya mo dou qai tu dei vua na Turaga, oi ikodou na wekaqu kau sa daulomana, ka gu kinia na yaloqu, au sa reki kinia, kau sa lagilagi kinia, oi ikodou kau sa daulomania.
\p
\v 2 Au sa masuti Uotia, au sa masuti Sainitiki voki lia, me rau lomavata e na Turaga.
\v 3 Au sa masuti iko voki lia, nai tokani dina, mo vukei rau na yalewa koya oi rau ka daucakacaka vata ki au e nai tukutuku-vinaka, ki Kelemedi voki lia, ki ira voki na noqu i tokani, sa tu na yacadra e nai vola ni bula.
\p
\v 4 Dou reki tiko lia vua na Turaga: au sa tukunia voki, Dou reki.
\v 5 Me kilai na nomudou yalomalumalumu vi ira na tamata kece lia. Sa voleka na Turaga.
\v 6 Dou kakua sara ni lomaocaoca; ia e na ka kece lia me vatakilai vua na Kalou na nomudou kerekere e na masu ki na dau cikecike ki na vavinavinaka.
\v 7 Ia na vacegu ni Kalou, sa uasivia na ka kece lia e kilai rawa, ena vataudeitakia na yalomudou ki na lomamudou e na vuku i Karisito Jisu.
\p
\v 8 Meu tinia, na viwekani, a ka kece lia sa dina, na ka kece lia e vaturaga, na ka kece lia e dodonu, na ka kece lia e savasava, na ka kece lia e daulomani, na ka kece lia e rogorogo vinaka; ia kevaka sa dua na ka e vinaka, se na ka e daudokai, dou nanumia na vi ka koya.
\v 9 A vi ka dou sa vatavulici kinia, ka vabautia, ka rogocia, ka raicia vi au, dou caka; ena qai tiko vata ki ikodou na Kalou ni vivacegui.
\p
\v 10 Ia kau sa reki valevu e na Turaga, ni sa qai tubu cake voki edaidai na nomudou daunanumi au; dou a daunanumia voki lia eliu, ia ka sa yali ni rawa vi ikodou.
\v 11 Au sa yali ni vosa niu sa dravudravua: niu sa vatavulici, meu vacegu tiko, e na ka kece lia sa yaco vi au.
\v 12 Au sa kila na vadravudravuataki, kau sa kila voki lia na vavutuniyautaki: e na viyasana kei na ka kece lia kau sa vatavulici kinia meu mamau, meu viakana voki lia, ka meu vutuniyau, meu dravudravua voki lia.
\v 13 Au sa rawatia na ka kece lia e na vuku i Karisito o koya sa vakaukauwataki au.
\v 14 Ia dou sa caka vinaka, ni dou sa solia na ka eso niu sa vararawataki.
\p
\v 15 Ia dou sa kila voki lia, koi ikodou na kai Filipai, ni sa vatekivu nai tukutuku-vinaka, niu a qai tani e Masitonia, sa yali e dua nai soqosoqo lewe ni lotu sa vukei au ni sa soli ka vi au, koi ikodou dua loa lia.
\v 16 Ia mai Cesalonaika dou a vukei au mada vadua, io varua e na noqu dravudravua.
\v 17 Ia kau sa yali ni gadrevia nai solisoli; ia kau sa gadrevia lia na vua me uasivi cake e na vukumudou.
\p
\v 18 Ia sa tu vi au na ka kece lia, ia kau sa vutuniyau: au sa mamau, niu sa rawatia maivi Epafirotaito na vi ka mai vi ikodou, a ka boi vinaka, ai madrali sa vinakati, sa vinaka sara vua na Kalou.
\v 19 Ia na noqu Kalou ena solia me rautia kece lia na nomudou dravudravua, me vaka na nonai yau levu, e na vuku i Karisito Jisu.
\v 20 Me caka na varokoroko vua na Kalou na Tamada, ka yali ni mudu. Emeni.
\p
\v 21 Au sa loloma yani vi ira kece lia era sa lotu, era sa tu vata ki Karisito Jisu. Era sa loloma yani vi ikodou ko ira na viwekani era sa tiko vata ki au.
\v 22 Sa loloma yani vi ikodou ko ira kece lia era sa lotu, ka sa valevu ko ira na lewe-ni-vale i Sisa.
\p
\v 23 Me nomudou kece lia na loloma ni noda Turaga ko Jisu Karisito. Emeni.