lmv-x-levuka_reg/50-EPH.usfm

\id EPH
\ide UTF-8
\h Efeso
\toc1 Efeso
\toc2 Efeso
\toc3 eph
\mt Efeso
\c 1
\cl Wase 1
\p
\v 1 Koya na i vola i Paula e dua na i apositolo i Karisito Jisu me vaka na lewa ni Kalou. Kivei ira na tamata lotu mai Efeso, era sa yalodina tiko vi Karisito Jisu.
\v 2 Me nomuni na loloma kei na vacegu mai vua na Kalou o Tamada ki na Turaga ko Jisu Karisito.
\p
\v 3 Me vavinavinakatakia na Kalou na Tama ni noda Turaga ko Jisu Karisito, ko koya ka sa vakalougatataki ita ena ka ni vivakalougatataki vayalo kece lia, mai na viyasana valomalagi ena vuku i Karisito.
\v 4 Me vaka sa digitaki ita e liu ena vukuna, sa qai tauyavutakia e muri ko vuravura, me da yalo savasava ka yali ni cala e matana ena loloma;
\v 5 Ni sa lesi ita e liu me da vakabautia me da luvena ena vukui Jisu Karisito, me vaka na nona lewa vayalo vinaka;
\v 6 Me dokai kinia na kena vinaka ni nona loloma; ko koya sa lomani ita kinia ko koya ena vukuna na dau lomani;
\v 7 O koya e da sa rawatia kinia na bula sa voli ena nona dra, io, na vakabokoci ni valavala ca, me vaka voki lia na nona lololoma levu;
\v 8 o koya sa valevutakia sara vei ita ko koya ena vuku kei na yalomatua kece lia;
\v 9 Ni sa vatakila vei ita na nona lewa ka vuni tu, me vaka na e vinaka vua, ka sa nakitia vaikoya lia;
\v 10 Me yaco kinia na ka sa lewa ko koya ni sa oti kece lia na gauna sa lokucia me soqona vata na ka kece lia vi Karisito, me vaka vokij lia mai lomalagi, kei na vi ka e vuravura;
\v 11 E da sa caka voki lia kinia me nonai votavota, ni da sa lesi e liu me vaka sa nakitia ko koya sa cakavia na ka kece lia me vaka na nona lewa;
\v 12 me dokai kinia na nona vinaka ena vukui ita, o ita sa vararavi taumada vei Karisito;
\v 13 Oi kodou voki lia, ni dou sa rogocia e liu na vosa ni vavuvuli dina, nai tukutuku vinaka ni nomudou bula, sai koya ni dou sa vabautia ni dou sa dregati kinia, ena yalo tabu ka yalataki,
\v 14 o koya nai matai ni nodai votavota me yaco mada na gauna ena rawa dina kinia ko ira na nona sa voli tu, me dokai kinia na nona vinaka.
\p
\v 15 Ena vuku ni ka koya oi au voki lia, ena gauna lia au rogocia kinia na nomuni vabautia na Turaga ko Jisu, ki na nomuni loloma vi ira na tamata lotu,
\v 16 au sa yali ni mudu ni vavinavinaka ena vukumudou, niu sa cavuti kemudou tiko ena noqu masu;
\v 17 Vua na Kalou ni noda Turaga ko Jisu Karisito, a vuni ka e vaiukuukutakia, me solia vei ikodou na yalo ni vuku kei nai vavuvuli matata, mo dou kilai koya kinia;
\v 18 Ni sa vararamataki na mata ni yalomudou; mo dou kila kinia nai nuinui sa kacivi ikodou kinia ko koya, ki na kena levu ni ukuuku sa taukeinia ko koya vei ira sa lotu.
\v 19 Ki na kena levu sara ni nona kaukauwa vei ita sa vabautia me vaka sa dau caka yaco ena nona kaukauwa vakaidina,
\v 20 sa qisi Karisito kinia ko koya ni sa vaturi koya cake voki mai na mate, ka vatikori koya ena ligana i matau ena viyasana valomalagi.
\v 21 Sa cecere cake kinia ko Karisito vi ira kece lia sa liu, ki ira sa nodra na lewa, ki ira era sa kaukauwa ka qaqa, ka sa cecere cake mai na viyaca sa dau cavuti ena gauna koya ki na vigauna e muri.
\v 22 A sa vamalumalumutakia na kece lia me tu e ruku ni yavana, a sa lesi koya me lewa na ka kece lia, ena vuku ni soqosoqo lewe ni lotu,
\v 23 O koya na yagona, sa sinai sara vua sa vasinaitakia na ka kece lia ena ka kece lia.
\c 2
\cl Wase 2
\p
\v 1 A sa vabulai ikodou, oi ikodou ka mate tu e na caka cala kei nai valavala ca;
\v 2 dou a muria tiko eliu me vaka nai valavala kei vuravura koya, ni dou a muria tiko na nodra turaga era sa kaukauwa e na macawa, a yalo sa cakacaka tiko e lomadra era sa dautalaidredre;
\v 3 ko ira eda sai valavala vata kaya koi ita kece e na gauna eliu, e na gagadre ca ni yagoda, ni da sa muria tiko na dodomo ni yagoda kei na yaloda; ia na nodai tovo me da cudruvi kinia, me vataki ira voki lia na tani:
\v 4 ia, na Kalou, sa vutu ni loloma, e na vuku ni nona loloma levu sa lomani ita kinia,
\v 5 io ni da a mate tu e na caka cala, sa vabulai ita vata kei Karisito, (a loloma loa lia dou sa vabulai tu kinia;)
\v 6 a sa vaturi ita cake vata, ka vatikori ita vata kei Karisito Jisu e na veiyasana valomalagi:
\v 7 me vatakila kinia e na gauna ena muri mai na nona loloma levu sa uasivi sara ni sa lomavinaka vei ita e na vuku i Karisito Jisu:
\v 8 ni sa loloma loa lia dou sa vabulai kinia ena vuku ni vabauta; ia sa yali ni vuna koi ikodou; ai solisoli lia ni Kalou:
\v 9 sa yali ena vuku ni cakacaka, me kakua kinia e dua me dokai koya:
\v 10 ni da sa nona cakacaka, sa caka me da tu vata kinia ki Karisito Jisu me caka nai valavala vinaka, ko koya sa varautakia eliu na Kalou me da caka vakinia.
\p
\v 11 O koya mo dou nanumia, ni dou a yali ni lotu eliu ni dou sa sucu va kinia, ia dou a vakatokai na Tawacili vei ira sa vatokai na Cili sa caka na liga e na yago;
\v 12 ni sa yali vei ikodou na Karisito e na gauna ko ya, dou sa yali ni matanitu vata vei ira na Isireli, a sa yali ni nomudou na ka sa yalataki e na viyalayalati, a sa yali vi ikodou nai nuinui; ka sa yali ni nomudou na Kalou, e vuravura:
\v 13 ia e na gauna koya ni dou sa tu vata kei Karisito, oi ikodou ka yawa eliu dou sa qai voleka mai e na vuku ni dra i Karisito.
\p
\v 14 Ni sai koya na vu ni noda veivinakati voki, o koya sa qisia na rua me dua loa lia, a sa basukia na bai sa ia kinia na vitawasei;
\v 15 ni sa vaotia e na yagona na ka eda a veicati kinia, o koya na vunau sa varotia nai valavala ni lotu: me ia kinia na veivinakati, ka qisi rau me rau tamata vou e dua loa lia ni rau tu vata kaya;
\v 16 me vameyautaki rau voki lia kei na Kalou me vaka ni sa dua loa lia na tamata e na vuku ni kauveilatai, ni sa vaotia kinia na veicati:
\v 17 a sa qai mai ka vunautakia na viivinakati vii ikodou sa yawa, vii ira voki lia era sa voleka:
\v 18 ni sai koya eda sa torovia rawa kinia na Tamada koi ita ruarua e na Yalo e dua loa lia.
\p
\v 19 O koya koya dou sa qai yali tiko ni vulagi kinia se kai tani, dou sa koro vata lia kei ira era sa lotu, ka dou sa lewe ni vale ni Kalou;
\v 20 ka dou sa tara cake e na nodra yavu nai apositolo kei ira na parofita, ia sai koya ko Jisu Karisito sa kenai vadei e na tutu-ni-vale:
\v 21 o koya sa sema vata kinia na vale taucoko, a sa tubu cake kinia me vale tabu ni sa tu vata kei na Turaga:
\v 22 o koya dou sa vatataki vata voki lia kinia me vale ni Kalou ni sa tiko kinia na Yalo Tabu.
\c 3
\cl Wase 3
\p
\v 1 E na vuku ni ka koya koi au ko Paula, sa ni Karisito Jisu, ka sa vesu tu e na vukumudou sa matanitu tani,
\v 2 ni dou a rogocia beka se sa vaevei na loloma ni Kalou sa soli mai vi au e na vukumudou:
\v 3 ni sai vavuvuli mana sa vatakila kinia ko koya vi au na ka ka vuni tu: me vaka kau a vola valailai eliu,
\v 4 ka dou na kila rawa kinia, ni dou sa wilikia, na noqu vuku e na ka vuni ki Karisito;
\v 5 koya sa yali ni vatakilai vi ira na tamata e na gauna sa oti, me vaka sa qai vatakilai e na Yalo Tabu vi ira na nonai apositolo yalosavasava ki na nona parofita;
\v 6 ni ra sai taukei vata na vimatanitu tani, ka sa mataviwekani vata, ka sa rawatia vata voki lia na ka sa yalatakia ko koya, e na vuku i Karisito, me vaka nai tukutuku-vinaka:
\v 7 o koya kau a lesia kinia meu kenai talatala, me vaka nai solisoli ni loloma ni Kalou, sa solia mai vi au e na cakacaka yaco ni nona kaukauwa:
\v 8 vi au, io vi au ka uasivi sobu sara vi ira kece lia era sa lotu, sa soli kinia na loloma koya, meu vunautakia vi ira na vimatanitu nai yau ni Karisito, sa yali ni kilai rawa;
\v 9 ka meu varairaitakia vi ira na tamata kece lia se sa vaevei na ka ka vuni tu, sa vunia mai nai vatekivu ki vuravura na Kalou, o koya sa bulia na ka kece lia:
\v 10 me yaco kinia, e na gauna koya, nai soqosoqo lewe ni lotu, mei vatakilakila vi ira na turaga ki ira sa kaukauwa e na viyasana valomalagi, ni sa takivivinaka sara na vuku ni Kalou,
\v 11 me vaka nai naki sa tu tikotiko lia vua, sa nakitia ko koya e na vuku i Karisito Jisu na noda Turaga:
\v 12 o koya, ni da sa vabauti koya, eda sa doudou kinia ka toro voleka e na vararavi.
\v 13 O koya koya sa yaloqu kinia mo dou kakua ni ceguoca niu sa vararawataki e na vukumudou, ia koya sa ka mo dou reki kinia.
\p
\v 14 E na vuku ni ka koya kau sa tekiduru kinia vi koya na Tamada,
\v 15 o koya era sa vayacani kinia na mataqali kece lia mai lomalagi ki vuravura,
\v 16 me solia vi ikodou ko koya, me vaka na kena levu ni nona vinaka, me vakaukauwataki ikodou e na Yalona mo dou kaukauwa eloma;
\v 17 me tiko lia e na lomamudou na Karisito e na vabautia; mo dou vakawakana ka tauyavutakia e na loloma,
\v 18 ka rawatia kinia mo dou kila vata ki ira kece lia era sa lotu, se cava na kena raraba, ki na kena balavu, ki na kena titobu, ki na kena cecere:
\v 19 ka mo dou kila na loloma i Karisito, o koya sa uasivi cake e na ka e kilai rawa; mo dou sinai e na ka kece lia sa sinai kinia na Kalou.
\p
\v 20 Ia vi koya, sa rawatia me caka na ka sa uasivi cake valevu sara e na ka kece lia eda sa kerea se vakasama kinia, me vaka na kaukauwa sa cakacaka yaco e na lomada,
\v 21 me ia vi koya na varokoroko e nai soqosoqo lewe ni lotu e na vuku i Karisito Jisu, me yacovia na vitabatamata kece lia ka yali ni mudu. Emeni.
\c 4
\cl Wase 4
\p
\v 1 O koya gona kau masuti ikodou kinia oi au sa vesu tu e na vuku ni Turaga, mo dou caka tiko lia nai valavala sa kilikili ki nai tutu dou sa kacivi kinia,
\v 2 mo dou yalomalumalumu sara ka yalomalua, mo dou vosotia vadede ka vivosoti va ikodou e na loloma;
\v 3 mo dou gumatua sara mo dou maroroya na lomavata ni Yalo Tabu, ni dou sa vauci vata e na vivinakati.
\v 4 Sa dua vata nai soqosoqo lotu kece, ka dua lowa lia na Yalo Tabu, me vaka dou sa kacivi ki nai nuinui e dua lowa lia ni dou a kacivi:
\v 5 sa dua lowa lia na Turaga, sa dua lowa lia na vabautia, sa dua lowa lia na vipapitaisotaki,
\v 6 sa dua lowa lia na Kalou na Tamada kece lia, o koya sa lewa na ka kece lia, a sa curumia na ka kece lia, ka tiko e na lomamudou kece lia.
\p
\v 7 Ia ka sa soli vi ita yadua na loloma me vaka nai varau ni solisoli ni Karisito.
\v 8 O koya gona sa tukunia kinia ko koya, Ni sa qai ki colo ko koya, sa vabobulataki ira e lewe levu me ra bobula, A sa solia nai solisoli eso vi ira na tamata.
\p
\v 9 (Ia na nona qai cake koya, sa cava beka, a ka lia ni sa qai sobu voki lia eliu ko koya ki na yasa i vuravura era?
\v 10 O koya lia sa qai sobu mai sai koya voki lia ka qai colo me yawa sivitia kece na lomalagi, me vasinaitia kinia na ka kece lia.)
\v 11 Ia sai koya sa solia eso, me rai apositolo; ka so, me ra parofita; ka so, me ra tamata dauvunau voli; ka so, me rai vatawa kai vavuvuli:
\v 12 me ra vavinakatakia kinia ko ira sa lotu, me ia na cakacaka ni talatala, me vatataki cake nai vavakoso ni Karisito:
\v 13 me da yaco sara koi ita kece lia me da lomavata e na vabautia, ka kila sara na Luve ni Kalou, me da tautauvata ki nai varau ni tamata dina, era sa sinai sara ki Karisito:
\v 14 me da kakua ni vagonegonea tiko, ka vitosoyaki ka viyadiyaki e na cagi kece lia ni vavuvuli, e nai lawaki ca ni tamata, e na dauvivaqaseni sa nakitia kinia na vivacalai;
\v 15 ia me da caka na ka dina e na yalololoma, me da tubu cake vi koya e na ka kece lia, vi koya lia na uluda, na Karisito:
\v 16 o koya sa sema vata mai vua na yago taucoko, ka vaucia vata, e na vuku ni kena yaga nai sema yadua, me vaka na ka sa caka sara na tikina kece lia ni sa dui vaitavi, a sa vatuburi cake ki na yago tabu ni sa vatataki cake vakai koya e na loloma.
\p
\v 17 O koya gona kau sa vosa kinia, ka varotia matua e na vuku ni Turaga, mo dou kakua ni valavala tiko me vataki ira na vimatanitu tani, e na lomadra lialia,
\v 18 ni sa vabutobutotakia na lomadra, a ra sa yali ni viriti ki na bula sa mai vua na Kalou, e na vuku ni lialia sa tu e na yalodra, ka ni sa kaukauwa na lomadra:
\v 19 ia ni ra sa yali ni madua rawa, era sa soli ira ki na cakacaka vasisila, me ra caka na ka kece lia sa yali ni savasava ni ra sa daugarovia.
\p
\v 20 Ia koi ikodou, dou a yali ni vuli vi Karisito mo dou vakinia:
\v 21 kevaka dou a rogoci koya, ka sa vatavulici vi koya, me vaka na dina sa tu vi Jisu:
\v 22 e na vuku ni valavala eliu, mo dou dainia tani kinia na tamata makawa, o koya sa ca mai e na vuku ni gagadre ca sa vivakaisini;
\v 23 mo dou vavoui mai e na yalomudou ki na lomamudou;
\v 24 ka mo dou vaisulu e na tamata vou, o koya sa caka me vaka na Kalou e na yalododonu ki na yalosavasava ni dina.
\p
\v 25 O koya lia koya ni dou sa dainia tani kinia na lasu, me vosa dina na tamata yadua vua na kai nona: ni da sa tikina vata vakai ita.
\v 26 Ni dou sa cudru, kakua ni dou cala kinia; me kakua ni dromu na mata-ni-siga ni dou sa cudru tiko lia:
\v 27 kakua voki lia ni varawarawataki ikodou vua na tevoro.
\v 28 Me kakua ni butako tiko ko koya ka daubutako, ka me daucakacaka lia, ka caka e na ligana na ka sa yaga, me so kinia na nona ka me soli vi koya sa dravudravua.
\v 29 Me kakua ni qai mai na gusumudou e dua na vosa velavela, o koya lia sa vinaka me ia kinia na vivatataki, me vaka sa rautia, me yaco kinia na vinaka vi ira era sa rogocia.
\v 30 Ia dou kakua ni vararawatakia na Yalo Tabu ni Kalou, o koya dou sa dregatia kinia me yaco mada na siga ni bula.
\v 31 Me dai tani kece vi ikodou na yaloca, ki na cudrucudru, ki na daunene, ki na viba, ki na vosavakacaca, ki na ca kece lia sa vakinia:
\v 32 ia dou vilomani vakai ikodou, dou lomavinaka, dou kakua ni vicudruvi, me vaka sa yali voki lia ni cudruvi ikodou na Kalou e na vuku i Karisito.
\c 5
\cl Wase 5
\p
\v 1 O koya koya mo dou qai vadamurimuria na Kalou, me vataki ira na gone ni toko;
\v 2 ka dou ia tiko lia nai valavala ni loloma, me vaka sa loloma voki lia na Karisito vi ikodou, a sa soli koya e na vukudra mei madrali kai soro vua na Kalou me ka boi vinaka.
\v 3 Ia na dauyalewa, ki na ka kece lia sa velavela, ki na daukocokoco, me kakua ni cavutia e na ikodou maliwa, me vaka sa kilikili ki ira era sa lotu;
\v 4 me kakua voki lia na ka vasisila, se na vivosaki lialia, se na viwali, a ka koya sa yali ni kilikili: me caka lia na vavinavinaka.
\v 5 Ni dou sa kila na ka koya, ena yali sara na nonai votavota e na matanitu ni Karisito ki na Kalou, e dua na daudara, se dua sa velavela, se dua na daukocokoco, ni sa dauqaravia na kalou lasu ko koya gona.
\v 6 Me kakua ni vacalai ikodou e dua e na vosa loa lia: ni sa vi ka koya sa yaco kinia na cudru ni Kalou ki vi ira sa dautalaidredre.
\p
\v 7 O koya mo dou qai kakua ni malele vata ki ira.
\v 8 Ni dou a butobuto eliu, ia dou sa qai rarama e na Turaga; mo dou ia tiko nai valavala ni gone ni rarama:
\v 9 (ni sa vua ni rarama nai valavala vinaka kece lia ki nai valavala dodonu ki na ka dina:)
\v 10 ni dou vatovolea na ka sa vinaka vua na Turaga.
\v 11 Ia dou kakua ni malele vata ki ira sa dau caka nai valavala butobuto sa yali ni yaga, ka dou vunaucia lia.
\v 12 Ni sa ka e vivamaduataki me vosatakia na vi ka era sa daucaka vuni.
\v 13 Ia na ka kece lia koya ni sa vunaucia sa vavotui e na rarama; ni sa rarama na ka kece lia sa vavotui.
\v 14 O koya koya sa tukunia kinia ko koya, O iko sa moce mo yadra mai, ka tu cake mai na mate, ena qai vararamataki iko na Karisito.
\p
\v 15 O koya mo dou qai raici ikodou vinaka, mo dou i valavala vayalomatua, mo dou kakua ni vataki ira na lialia, mo dou vataki ira lia na vuku,
\v 16 mo dou volia me nomudou na gauna, ni sa ca na visiga koya.
\v 17 O koya mo dou qai kakua ni sesewa, mo dou kila lia na loma ni Turaga.
\p
\v 18 Ia dou kakua ni mateni e na waini, ni sa ia kinia na ka vasisila; dou vasinaiti lia e na Yalo Tabu;
\v 19 ka dou vivosaki va ikodou e na same ki na sere ki na meke vakayalo, ka dou seretakia na sere e lagati vinaka e na yalomudou vua na Turaga:
\v 20 ka dou vavinavinaka tiko lia e na vuku ni ka kece lia vua na Kalou ki na Tamada e na yaca ni noda Turaga ko Jisu Karisito;
\v 21 ka dou dui vivamalumalumutaki ikodou vakai ikodou e na rere vi Karisito.
\p
\v 22 Oi ikodou na yalewa vawati, mo dou dui vamalumalumutaki ikodou vua na watimudou, me vaka vi koya na Turaga.
\v 23 Ni sa ulu ni watina na tagane, me vaka sa ulu ni soqosoqo lewe ni lotu na Karisito, ia nai Vabula voki lia ni yago ko koya.
\v 24 Ia me vaka sa malumalumu nai soqosoqo lewe ni lotu vi Karisito, me ra vaka voki lia kinia na yalewa vi ira na watidra ena ka kece lia.
\p
\v 25 Oi ikodou na tagane vawati, lomani ira na watimudou, me vaka sa lomania nai soqosoqo lewe ni lotu na Karisito, a sa soli koya e na vukuna;
\v 26 me vasavasavatakia ka savatia ni sa vuya e na wai ki na vosa,
\v 27 me varairaitakia kinia vi koya mei soqosoqo lewe ni lotu e serau sara, me kakua ni tauvi-duka, se sasalukiluki, se dua na ka e vakinia; me savasava ka yali na tikina e ca.
\v 28 E kilikili ki ira na tagane me ra lomani ira vakinia na watidra, me vaka na yagodra dina. O koya sa lomania na watina sa lomani koya voki lia vakai koya.
\v 29 Ni sa yali e dua sa catia na yagona dina; ia sa vakania ka maroroya, me vaka sa ia voki lia ko Karisito ki nai soqosoqo lewe ni lotu:
\v 30 ni da sa tiki ni yagona.
\v 31 Na ka koya ena dainia kinia na tagane na tamana ki na tinana, a rau na dua vata sara lia ki na watina, a rau na lewe dua lowa lia.
\p
\v 32 Sa ka levu na ka vuni koya: ia kau sa vosataki Karisito ki nai soqosoqo lewe ni lotu.
\v 33 Ia mo dou dui lomania yadua na watina me vataki koya; ia na yalewa, me varokorokotakia na watina.
\c 6
\cl Wase 6
\p
\v 1 Oi ikodou na gone, dou talairawarawa vii ira na nomudou matua e na ka sa vinaka vua na Turaga: ni sa dodonu sara lia.
\v 2 Mo varokoroko vi rau na tamamu ki na tinamu; (koya na vunau taumada sa dua kinia na vosa ni yalayala);
\v 3 mo vinaka kinia, mo bula vadede voki lia e vuravura.
\p
\v 4 Oi ikodou voki lia na qase, dou kakua ni vacudrui ira na nomudou gone: ia dou vavulici ira e na vunau ki nai vavuvuli ni Turaga.
\p
\v 5 Oi ikodou na tamata, dou talairawarawa vi ira na nomudou turaga vayago, e na rere ki na sautaninini, ni sa dina na yalomudou, me vaka vi Karisito;
\v 6 mo dou kakua ni makutu e matadra lia na turaga, mo dou vinakatia kinia vatamata; ia me vaka dou sa tamata ni Karisito, mo dou caka na loma ni Kalou mai na vu ni yalomudou;
\v 7 ni sa vinakatia tiko na lomamudou, ka me vaka vi koya na Turaga, ka yali vi ira na tamata, dou sa makutu kinia;
\v 8 ni dou sa kila na ka vinaka kece lia ena caka na tamata yadua, se bobula se itaukei, ena saumia vakinia mai vua na Turaga.
\p
\v 9 Oi ikodou voki lia, na turaga, dou caka vakinia vi ira, ka kakua ni vosa vakacudrucudruya: ni dou sa kila sa tiko mai lomalagi na nomudou Turaga, o koya sa nodra voki lia; a sa yali ni vinakatia e dua vailowa ko koya.
\p
\v 10 Meu tinia, oi ikodou na wekaqu, mo dou kaukauwa tiko lia e na Turaga, ki na kena levu ni nona kaukauwa.
\v 11 Dou vaiyaragi e nai yaragi kece lia ni Kalou mo dou tu dei rawa ka voratia nai lawaki ni tevoro.
\v 12 Ni da sa yali ni vivala lowa lia ki ira na tamata, eda vivala voki lia ki ira era sa liu, ki ira era sa kaukauwa, ki ira era sa vitaliatakia na butobuto ki vuravura koya, ki ira na vivavakoso yalo ca e na viyasana valomalagi.
\v 13 O koya mo dou vaiyaragi e nai yaragi kece lia ni Kalou, mo dou voratia rawa kinia e na siga ca, ia ni dou sa caka kece mo dou tu dei.
\p
\v 14 O koya mo dou qai tu dei ni sa vauci tu na tolomudou e na lomadina, ka sa tu e na lomaseremudou nai sasabai ni valavala dodonu;
\v 15 ka sa vaivava na yavamudou e na cakacaka ni tukutuku-vinaka ni vivinakati;
\v 16 ia me kenai kuri, mo dou yadia na vabautia mei sasabai dou na bokocia rawa kinia na gasau vi di kece lia ni tevoro,
\v 17 ka yadia na bula mei varuru ni ulu, ki nai seleiwau ni Yalo Tabu, koya na vosa ni Kalou:
\v 18 dou masu tiko lia e na masumasu kece lia ki na daukerekere e na Yalo Tabu, ka yadravia tiko kinia e na gumatua kece ki na daukerekere e na vukudra kece lia na tamata lotu;
\v 19 e na vukuqu voki lia me soli vi au meu vosa rawa, ka vadoudou niu tukunia na ka vuni ni tukutuku-vinaka,
\v 20 o koya, kau sa talai meu vunautakia, oi au sa vesu tu; meu vosatakia vadoudou, me vaka sa kilikili ki au meu vosa.
\p
\v 21 Ia mo dou kila voki lia na noqu tiko, ki na noqu i valavala, ena tukunia na ka kece lia vi ikodou ko Tikiko, na wekaqu daulomani ki nai talatala yalodina ni Turaga;
\v 22 o koya kau sa tala vi ikodou e na vuku ni ka koya, mo dou kila kinia na nitou tiko, me vaceguya voki lia na yalomudou ko koya.
\p
\v 23 Me nodra na viwekani na vacegu, ki na loloma, ki na vabautia, mai vua na Kalou ko Tamada ki na Turaga ko Jisu Karisito.
\v 24 Me tu na loloma vi ira kece lia era sa lomania na noda Turaga ko Jisu Karisito e na lomadina. Emeni.