lmv-x-levuka_reg/49-GAL.usfm

\id GAL
\ide UTF-8
\h Kalatia
\toc1 Kalatia
\toc2 Kalatia
\toc3 gal
\mt Kalatia
\c 1
\cl Wase 1
\p
\v 1 O Paula nai apositolo, (e yali ni maivi ira na tamata, se e nai lesilesi vatamata, e nai lesilesi lia i Jisu Karisito, kei na Kalou ko Tamana, o koya ka vaturi koya cake mai na mate;)
\v 2 ki ira kece lia na mataviwekani sa tiko vi au, kivi ira na visoqosoqo lewe ni lotu mai Kalatia:
\v 3 Me nomudou na loloma ki na vacegu mai vua na Kalou ko Tamada, ki na noda Turaga ko Jisu Karisito,
\v 4 o koya ka soli koya e na vuku ni nodai valavala ca, me vabulai ita kinia mai na vuravura ca koya, me vaka na loma ni Kalou ko Tamada:
\v 5 me nona na varokoroko ka yali ni mudu. Emeni.
\p
\v 6 Au sa kurabuitakia ni dou sa vuki tani vatotolo vakoya ki na dua tani nai tukutuku-vinaka, mo dou daini koya ka kacivi ikodou e na loloma i Karisito:
\v 7 ia ka sa yali dina ni dua tani; ia ka so era sa vararawataki ikodou, ka via vatanitakia nai tukutuku-vinaka ki Karisito.
\v 8 Ia kevaka koi kitou, se dua na agilose mai lomalagi, sa vunautakia vi ikodou e dua tani nai tukutuku-vinaka sa yali ni va koya, kitou a vunautakia vi ikodou, me rusa ko koya.
\v 9 Me vaka na ka kitou a tukunia eliu, au sa qai tukunia voki vakinia, Kevaka e dua na tamata sa vunautakia vi ikodou e dua tani nai tukutuku-vinaka sa yali ni vaka na ka dou sa vabautia, me rusa kinia ko koya.
\v 10 Ia, kau sa qai valomavinakataki cei, na tamata, se na Kalou? Seu tovolea beka me ra vinakati au ko ira na tamata? Kevaka sa ka lia me ra vinakati au ko ira na tamata, au na qai yali ni talatala nei Karisito.
\p
\v 11 Ia kau sa vatakila vei ikodou, na viiwekani, ni sa yali ni ka vatamata nai tukutuku-vinaka kau a vunautakia:
\v 12 niu a yali ni rawatia mai vua e dua na tamata, seu vatavulici kinia, ia sa yaco vi au ni sa varaitakia ko Jisu Karisito.
\p
\v 13 Ni dou a rogocia na noqu i valavala eliu e na nodra lotu na Jiu ka niu a vacacania valevu sara nai soqosoqo lewe ni lotu ni Kalou, ka vaqeavutakia:
\v 14 ia kau sa uasivi cake e na lotu vaka-Jiu vi ira na kai noqu era lewe levu era taba vata ki au, niu sa gumatua valevu sara tiko e na nodra i tukuni na noqu matua.
\v 15 Ia ni sa vinaka vua na Kalou, o koya sa lesi au, mai na kete i tinaqu, ka qai kacivi au e na nona loloma lowa lia,
\v 16 me vatakila na Luvena ki na lomaqu, meu vunautaki koya vi ira na vimatanitu tani; au sa qai yali ni bose ki ira na tamata,
\v 17 seu qai cake ki Jerusalemi vei ira era sai apositolo taumada vi au; ia kau sa qai sara ki Arepea, ka lesu voki ki Tamasiko.
\v 18 Ni sa oti e tolu na yabaki, au sa qai qai cake ki Jerusalemi me'u la'ki sota kei Kifa, ka keirau a tiko vata ka bogi tinikalima:
\v 19 Au a yali ni raicia e dua voki vei iratou na i apositolo, o Jemesa lia na tacina na Turaga.
\v 20 Ia na ka kau sa qai volai vei ikodou, raicia e na mata ni Kalou, au sa yali ni lasu.
\v 21 Au sa qai qai ki na viyasana mai Siria kei Silisia;
\v 22 A ra sa yali tiko ni kila na mataqu ko ira na vei soqosoqo mai Jutia era sa tu vata kei Karisito.
\v 23 Era sa rogocia lia, o koya ka vacacani ita e liu, sa qai vunautakia na vabautia ka vaqeavutakia e liu.
\v 24 Ara sa varokorokotakia na Kalou e na vukuqu.
\c 2
\cl Wase 2
\p
\v 1 Sa oti e tinikava na yabaki, au saqai qai cake voki kei Panapasa ki Jerusalemi, kau sa yadi Taito voki lia.
\v 2 Ia sai vavuvuli liae na raivotu kau a qai cake kinia, kau sa tukunia vi ira nai tukutuku-vinaka kau sa vunautakia tiko vi ira na vimatanitu tani, ia ka vuni lia vi ira era sa rogocia, de yali yaga na noqu cici koya, se na noqu cici e liu.
\v 3 Ia sa yali ni vasaurarataki me cilivi ko Taito, keirau sa tiko kaya, a kai Kirisi”
\v 4 E yali ena vukudra na mata viwekani vailasu era sa yadi vavuni mai, ia o ira sa curu lo mai me ra varaicia na nodra lalaga eda sa rawatia ni da sa tu vata kei Karisito Jisu, me ra vabobulataki ita kinia:
\v 5 keitou a yali ni talairawarawa kinia vi ira me vamalumalumutaki ita, e yali sara ena dua lia na tiki ni siga; me tudei kinia vi ikodou na dina ni tukutuku vinaka.
\v 6 Ia ko iratou sa eratou sa dau rogocia ni ratou sa kalevu cake, (se ratou vakabeka evei sa ka lowa lia vi au; sa yali ni vinakatia vailoa e dua na tamata na Kalou;) io, ko iratou eratou sa dau rogo, sa yali e dua na ka eratou sa vaikuritakia vi au.
\v 7 Sa yali sara ni vaka kinia, ia ni ratou sa raicia niu sa lesi meu vunautakia nai tukutuku vinaka vi ira sa yali ni cili, me vaka ko Pita vi ira sa cili
\v 8 (io, ko koya sa cakacaka e na loma i Pita mei apositolo vi ira sa cilia, sa cakacaka e na lomaqu voki lia e na vukudra na vimatanitu tani;)
\v 9 Ia ko iratou ko Jemesa kei Kita, kei Joni, eratou sa daurogo ni ratou sa duru, ni ratou sa kila na loloma ka soli vi au, eratou sa vabauti keirau kei Panapasa e na vitauri liga i matau ni keitou sa duavata, ka me kirau qai vi ira era sa yali ni lotu, ia ko iratou vi iratou sa cili:
\v 10 Ia sa lomadra voki lia koya me keirau nanumi ira na dravudravua: na ka voki lia koya kau sa gumatua kinia.
\p
\v 11 Ia ni sa qai mai ki Anitioki ko Kifa, au sa vorati koya ena matana votu, ni sa dodonu me vunauci.
\v 12 Ni sa kana vata e liu ko koya ki ira na matanitu tani, ni ra sa yali ni tadu mai eso mai vei Jemesa; ia ni ra sa tadu mai, sa yali ni via tiko vata ki ira ka sa qai tani ko koya, ni sa rerevaki ira na cili.
\v 13 O ira voki lia na Jiu sa vo era sa ia vata kaya na vivakaisini ko ya; a sa yadi vatani voki lia kinia ko Panapasa ena nodra vivakaisini.
\v 14 Ia kau sa raicia era sa yali ni valavala dodonu ka me vaka na dina ni tukutuku vinaka, au a tukunia vi Kifa ena matadra kecelia, kevaka ko sai valavala tiko me vataki ira sa matanitu tani ni ko sa Jiu, ka yali ni vataki ira na Jiu, e na cava ko sa vasaurarataki ira kinia era sa matanitu tani me ra i valavala me vataki ira na Jiu?
\v 15 O ita eda sa Jiu ni da sucu, ka yali ni tamata ca mai vi ira na vimatanitu tani,
\v 16 ni da sa kila ni sa yali ni vadonui na tamata ena vuku ni cakacaka ni vunau, ena vuku lia ni vabauti Jisu Karisito, eda sa vabauti Jisu Karisito, eda sa vabauti Karisito Jisu, koi keda, me da vadonui kinia ena vuku ni da vabauti Karisito, ka yali lia ena cakacaka ni vunau; ni sa yali na tamata ena vadonui ena vuku ni cakacaka ni vunau.
\v 17 Kevaka eda sa kune koi keda voki lia me da tamata ca, ni da sa vasaqara tiko meda vadonui ena vukui Karisito, sa qai vu beka ni valavala ca na Karisito? E yali sara.
\p
\v 18 Ia kevaka kau sa tara cake voki na ka kau a basukia sobu, au sa tukuni au kinia niu sa tamata ca.
\v 19 Ni sai koya nai vunau kau sa mate kinia ki na vunau meu bula vua na Kalou.
\v 20 Kirau sa vakoti vata kei Karisito ki na kauveilatai: ia sa yali lia ni koi au dina sa bula tiko, na Karisito lia sa bula ena lomaqu: ia na noqu bula vayago koya au sa bula tiko kinia niu sa vabautia na luve ni Kalou, o koya ka lomani au, ka soli koya ena vukuqu.
\v 21 Au sa qai yali ni vatawayagatakia na loloma ni Kalou' ni sa qai yali ni yaga na mate i Karisito, kevaka sa rawa na vivadonui ena vunau.
\c 3
\cl Wase 3
\p
\v 1 Oi ikodou na kai Kalatia dou sa sesewa, o cei beka sa lawakitaki ikodou, ni sa varaitakia oti ena matamudou ko Jisu Karisito me vaka ni sa vakoti ki na kauveilatai?
\v 2 A ka lia koya kau sa via kila vi ikodou, Dou sa rawatia na Yalo Tabu e na cakacaka ni vunau, se ni dou rogocia na vabautia?
\v 3 Dou sa sesewa vakoya, ne? Ni dou sa vatekivuna e na Yalo Tabu, dou sa qai tinia beka e na ka vayago?
\v 4 Dou a vosotia vakoya e vuqa na ka me yali ni yaga, se yali? Kevaka sa dina lia ni yali ni yaga.
\v 5 Io, ko koya sa dausolia vi ikodou na Yalo Tabu a sa daucaka-mana e na ikodou maliwa, sa rawatia li ko koya e na cakacaka ni vunau, se e na rogocia na vabautia?
\p
\v 6 Me vaka sa vadinatia na Kalou ko Eparaama, a sa okati vua mei valavala dodonu.
\v 7 O koya mo dou kila, ko ira era sa muria na vabautia, sa ira lia era sa luve i Eparaama.
\v 8 Ia nai Vola Tabu voki lia, ni sa kila makawa sa vabautia sa dauvadonui ira kinia na vimatanitu tani na Kalou, sa vunautakia mada e liu ko Eparaama nai tukutuku vinaka, Ena vakalougatatakia na vivanua kece lia e na vukumu.
\v 9 O koya koya era sa vakalougatataki vata kei Eparaama na dau vabautia ko ira sa muria na vabautia.
\v 10 Ni sa lewai me cudruvi, o ira kece lia era sa muria na cakacaka ni vunau; ni sa volai, Ena cudruvi ko ira yadua sa yali ni tudei e na ka kece lia sa volai e nai vola ni vunau me ra caka.
\v 11 Ia sa macala sara sa yali ni vadonui e na vunau e dua e na mata ni Kalou; ni sa volai, Ena bula na tamata dodonu e na vuku ni vabautia.
\v 12 Ia sa yali ni ka ni vabautia na vunau; ia Ko koya lia sa caka na vi ka koya ena bula kinia.
\p
\v 13 Sa voli ita na Karisito mai na vicudruvi ni vunau, ni sa cudruvi lia ko koya e na vukuda, ni sa volai, Sa cudruvi ko ira yadua sa rube e na kau:
\v 14 me yaco kinia na ka ni vivakalougatataki ni Eparaama vi ira na vimatanitu tani e na vuku i Jisu Karisito: me da rawatia kinia na Yalo ka yalataki, ni da sa vabautia.
\p
\v 15 Oi ikodou na viwekani, au sa vosa vatamata lia: Kevaka sa tamata lia sa ia na viyalayalati, ka sa vadinadinatakia, sa qai yali e dua sa vatawayagatakia se vaikuritakia.
\v 16 Ia sa vosatakia vi Eparaama na viyalayalati, vi ira voki lia na nona kawa. Sa yali ni tukunia ko koya. Vi ira na vikawa, me vaka sa vuqa na kawa; ia me vaka ni sa dua bau lia, Vi ira vokilia na nomu kawa, o koya na Karisito.
\v 17 Ia koya kau sa tukunia, a viyalayalati ka vadinadinatakia eliu na Kalou, sa yali ni vatawayagatakia na vunau sa yaco ni sa oti mada e va na drau ka tolusagavulu na yabaki, me yali kinia ni mana na vosa ni yalayala.
\v 18 Io, kevaka sa yaco nai votavota e na vuku lia ni vunau, sa qai yali e na vuku ni yalayala: ia na vosa ni yalayala lia sa solia kinia vei Eparaama na Kalou.
\p
\v 19 Sa qai mei cavai beka na vunau? Sa vaikuritakia koya e na vuku ni talaidredre, me yaco mada na kawa sa vosa kinia na yalayala; a rasa tukunia ko ira na agilose e na gusu ni dua na dautataro.
\v 20 Ia na dautataro sa yali ni yaga ni sa dua baulia; ia na Kalou sa dua baulia.
\p
\v 21 Erau sa qai dua tani sara beka na vunau ki na vosa ni yalayala ni Kalou? E yali sara: ia kevaka sa soli e dua na vunau sa rawa kinia na vivabulai, sa qai dina ena yaco na vivadonui e na vuku ni vunau.
\v 22 Ia nai Vola Tabu sa sogotia kecelia, ka beitakia e na cala, me soli kinia na ka sa yalatakia, e na vuku ni vabauti Jisu Karisito vi ira era sa vabautia.
\v 23 Ia ni sa yali ni yaco na vabautia, eda sa vatawai me ia tiko na vunau, ni da sogolati tiko me yaco mada na gauna ni vabautia ena varaitakia emuri.
\v 24 Sa qai yaco kinia na vunau mei vavuvuli me tuberi ita vi Karisito, me da vadonui kinia e na vuku ni vabautia.
\v 25 Ia ni sa yaco na vabautia, sa qai yali ni vitaliataki ita tiko nai vavuvuli.
\p
\v 26 Ni dou sa luve ni Kalou ko ikodou kecelia ni dou sa vabauti Karisito Jisu.
\v 27 Ni sai Karisito dou sa vasulumi ikodou kinia, oi ikodou yadua sa papitaisotaki vi Karisito.
\v 28 Sa qai yali na Jiu se na kai matanitu tani, sa yali na bobula se nai taukei, sa yali na tagane se na yalewa: ni dou sa dua baulia koi ikodou kecelia e na vuku i Karisito Jisu.
\v 29 Ia kevaka dou sa nei Karisito, dou sa qai kawa i Eparaama, kei nai taukei me vaka na vosa ni yalayala.
\c 4
\cl Wase 4
\p
\v 1 Ia kau sa tukunia, Ni sa gone tiko nai taukei emuri, sa tauvata kei na tamata lowa lia, ia ka sa nona lia na ka kece lia;
\v 2 a sa lewai koya ko ira nai vavuvuli ki ira na matua, me yaco mada na gauna ka lokucia e liu ko tamana.
\v 3 Sa vakinia koi ita eliu, ni da a gone tiko, sa lewai ita na vivu ni ka sa vavuravura me vaka eda bobula:
\v 4 ia ni sa yaco dina sara na kena gauna, sa qai tala yani na Luvena na Kalou, o koya sa sucu mai na yalewa, sa sucu me lewai koya na vunau,
\v 5 me voli ira kinia sa lewai ira na vunau, me da vabautia kinia me da luvena bau.
\v 6 Ia ni dou sa qai luvena, sa tala na Kalou na Yalo ni Luvena ki na lomada, o koya sa dau kaci, Apa, Tamai keimami.
\v 7 O koya koya ko sa yali kinia ni tamata lowa lia, a luvena lia; ia kevaka ko sa luvena, ko sa qai taukei e na vuku ni Kalou.
\p
\v 8 Ia eliu, ni dou a yali ni kila na Kalou, dou a dauqaravi ira sa yali ni noda i tovo me Kalou.
\v 9 Ia edaidai, ni dou sa qai kila na Kalou, se dina lia ni sa qai kilai ikodou na Kalou, dou sa qai lesu voki vacava ki na vivu ni ka, sa malumalumu ka ka lowa lia, ka dou sa vinakatia mo dou qaravia voki?
\v 10 Dou sa vatabuya na siga eso, ki na vula eso, ki na gauna eso, ki na yabaki eso.
\v 11 Au sa yalolailai e na vukumudou, de yali ni yaga na noqu cakacaka vi ikodou.
\v 12 Oi ikodou na viwekani, au sa masuti ikodou, mo dou vataki au; niu sa vataki ikodou: dou sa yali ni vacacani au valailai.
\p
\v 13 Ia dou sa kila, niu a vunautakia vi ikodou eliu nai tukutuku vinaka, sa malumalumu na yagoqu.
\v 14 Ia e na vuku ni ka ni yagoqu sa vatovolei ikodou, dou sa yali ni beci au se vasisilatakia; ia dou a vacegui au me vaka kau sa agilose ni Kalou, me vataki Karisito Jisu.
\v 15 Sa qai tu evei na nomudou marau eliu? Niu sa vadinadinatakia vi ikodou, kevaka sa rawarawa, dou a leutia tani na matamudou, mo dou solia mai vei au.
\v 16 Au sa qai yaco beka meu nomudou meca, niu sa vosa dina vi ikodou?
\v 17 Era sa gumatua ni lomani ikodou, e yali e nai valavala vinaka, io era sa via tawasei ikodou tani, mo dou gumatua ni lomani ira.
\v 18 Ia sa ka vinaka na gumatua tiko lia e na cakacaka vinaka, me kakua ni ia lowa lia niu sa tiko vata ki ikodou.
\v 19 Na luvequ lalai, oi ikodou kau sa taratara voki kinia, me buli mada na Karisito e na lomamudou!
\v 20 Ia kau sa via tiko vi ikodou edaidai ka me dua tani na domoqu; niu sa nuinuica e na vukumudou.
\p
\v 21 Dou tukunia mai vi au, ikodou sa via vaucia e na vunau, dou sa yali beka ni rogocia na vunau?
\v 22 Ni sa volai, sa lewe rua na luve i Eparaama ka tagane, a tinana e dua na vada, a tinana kadua na marama:
\v 23 ia ko koya sa luve ni vada, sa sucu vatamata; ia ko koya sa luve ni marama, sa sucu e na vosa ni yalayala.
\v 24 Ia na ka koya sa vaibalebale: ni sa viyalayalati e rua koi rau na yalewa koya; e dua mai na ulu-ni-vanua ko Saineai, o koya sa vasucu gone me ra bobula, oqori ko Eka.
\v 25 Ia ko Eka koya na ulu-ni-vanua ko Saineai mai Arepea, a sa tautauvata ki Jerusalemi ka tu edaidai, a sa bobula tiko ki ira na luvena.
\v 26 Ia ko Jerusalemi maicake sai taukei, o koya na tinada kece lia.
\v 27 Ni sa volai, Mo reki, ko iko na yava sa yali ni valuveni: Mo tabalaka na kaci, o iko sa yali ni taratara: Ni sa qai lewe vuqa na luvena ko koya ka biu, ka lewe lailai vua sa vawati.
\p
\v 28 Ia koi ita, na viwekani, eda sa vataki Aisake, ni da sa gone ni vosa ni yalayala.
\v 29 Ia na ka sa caka eliu sa caka voki lia edaidai, sa vacacani koya sa vayalo ko koya sa sucu vatamata.
\v 30 Ia ka cava sa tukunia nai Vola Tabu! Vakaseva tani na vada ki na luvena; ni ra na yali ni taukei vata na luve ni vada ki na luve ni marama.
\v 31 Sa vaka koya, ikodou na viwekani, eda sa yali ni luve ni vada, eda sa luve ni marama.
\c 5
\cl Wase 5
\p
\v 1 O koya mo dou qai tu dei e na lalaga sa vakalalagataki ita kinia na Karisito, ka mo dou kakua ni vataotaki voki e nai vua mo dou bobula kinia.
\v 2 Raicia, oi au ko Paula au sa tukunia vi ikodou, Kevaka dou sa ia tiko na vicilivi, ena vatawayagataki kinia vi ikodou na Karisito.
\v 3 Niu sa vadinadina voki vi ira na tamata yadua sa cilivi, ni ra sa vauci tu me muria na vunau taucoko.
\v 4 Dou sa tawase tu maivi Karisito, oi ikodou kece lia sa vaka mo dou vadonui e na vunau; dou sa qai bale mai na loloma.
\v 5 Sa vabautia eda sa warakia ka vanuinui kinia, e na vivuke ni Yalo Tabu, me da vadonui.
\v 6 Ni da sa tu vata kei Karisito Jisu, sa yali ni yaga me cili, se me yali ni cili; sa yaga lia na vabautia sa daucakacaka yaco e na loloma.
\p
\v 7 Dou a cici vinaka eliu; o cei beka sa tarovi ikodou mo dou kakua ni talairawarawa kinia ki nai vavuvuli dina?
\v 8 A vadinatia koya sa yali ni vu maivi koya sa kacivi ikodou.
\v 9 E dua na tiki ni leveni lailai sa valevenitakia nai buli taucoko.
\v 10 Au sa vararavi lia vi ikodou e na vuku ni Turaga, ni dou na yali ni lomavatani; ia ko koya lia sa vayavalati ikodou, ena rawatia na kenai sau, io ko koya yadua.
\v 11 Ia koi au, na viwekani, kevaka kau sa vunautakia tiko a vicili, a cava kau sa vacacani tiko kinia? Sa qai mudu na vivatarabetaki e na vuku ni kauveilatai.
\v 12 Au sa vinakatia me ra mduki ira tani ko ira era sa vayavalati ikodou.
\p
\v 13 Ni dou sa kacivi, na viwekani, mo dou lalaga; ia dou kakua ni ia na lalaga me tubu kinia na ka vayago ka dou ia tikolia na vivuke ni vilomani vai ikodou.
\v 14 Ni sa caka sara na vunau taucoko e na vosa e dua bau, koya lia: Mo lomana na kai nomu me vataki iko.
\v 15 Ia kevaka dou sa vikata ka vikani vai ikodou, dou raicia vinaka de dou vi varusai vai ikodou.
\p
\v 16 Ia kau sa tukunia, Dou qai voli e na Yalo Tabu, ka dou na yali ni caka kinia na gagadre ca ni tovo vayago.
\v 17 Ni sa vivala na gagadre ni tovo vayago ki na Yalo Tabu, a sa vivala na Yalo Tabu ki nai tovo vayago: ia sa vimecaki koi rau koya; dou sa yali kinia ni caka na vi ka dou sa vinakatia.
\v 18 Ia kevaka sa tuberi ikodou na Yalo Tabu, dou na yali ni lewai e na vunau.
\p
\v 19 Ia sa votu na cakacaka ni tovo vayago, ka sa vakoya: A dauvibutakoci, na daudara, nai valavala tawa-savasava, na daugarogaro,
\v 20 na dausoro ki na vimatakau, na daucakaisausau, na dauvicati, na dauvileti, na viqati, na daucudrucudru, na dauviba, na visei vavuravura, na visei ni lotu,
\v 21 na dauvuvu, na daumateni, na daumarau valialia ki na vi ka sa vakinia: a vi ka koya au sa tukunia vei ikodou, me vaka kau a tukunia makawa voki lia ni na yali ni rawatia na matanitu ni Kalou ko ira era sa caka na vi ka vakoya.
\v 22 Ia na vua ni Yalo Tabu na loloma, na reki, na vacegu, na vosotia vadede, na yalomalua, na yalololoma, na vabautia,
\v 23 na yalomalumalumu, nai valavala malua: sa yali na vunau sa cudruvi kinia na vi ka koya.
\v 24 Ia ko ira era nei Karisito era sa vakotia ki na kauveilatai nai tovo vayago ki na kena dodomo ca ki na kena gagadre ca.
\p
\v 25 Kevaka eda sa bula e na Yalo Tabu, tou qai voki lia e na Yalo Tabu.
\v 26 Me da kakua ni gadrevia me da dokai lowa lia, se vicudruvi, se vivuvutaki.
\c 6
\cl Wase 6
\p
\v 1 Oi ikodou na viwekani, kevaka sa vakidacalataki e dua na tamata mei valavala ca, mo dou vavinavinakataki koya e na yalo malumalumu, oi ikodou sa vayalo; ka mo varaici iko, de ko sa dauvevetakia voki lia.
\v 2 Dou vivuke ni colatia na nomudou i colacola, ka mo dou vayacora kinia na vunau i Karisito.
\v 3 Kevaka e dua sa nanumi koya me ka levu, ia sa ka lowa lia, sa qai vakaisini koya vai koya.
\v 4 Ia me lewa deivaka na nona cakacaka na tamata yadua, ena qai rekitaki koya e na vuku i koya lia ka yali e na vukuna na tani:
\v 5 ni na colatia na nonai colacola na tamata yadua.
\p
\v 6 Ia ko koya sa vatavulici e na Vosa, me solia nai votavota ni ka kecelia e vinaka vi koya sa vatavulicia.
\v 7 Mo dou kakua ni vakaisini ikodou; a Kalou ena yali ni valialiai; na ka kecelia sa kaburakia na tamata ena tamusukia voki lia ko ya.
\v 8 Ko koya sa kaburakia na ka ni nonai tovo vayago, ena tamusukia na rusa mai nai tovo vayago; ia ko koya sa kaburakia na ka ni Yalo Tabu, ena tamusukia na bula tawa mudu mai na Yalo Tabu.
\v 9 Ia me da kakua ni ceguoca e na caka vinaka, ni da na tamusukia e na kena yabaki, kevaka eda sa yali ni oca.
\v 10 O koya koya, ni sa rawa, me da caka vinaka vi ira na tamata kecelia, ka valevu vi ira era vitokani e na vabautia.
\p
\v 11 Dou raicia na mata ni vola lelevu kau sa volavola kinia vi ikodou e na ligaqu dina.
\v 12 O ira era sa via rairai vinaka vayago, era sa vasaurarataki ikodou mo dou cilivi; me ra kakua lia ni vacacani e na vuku ni kauveilatai nei Karisito.
\v 13 Ia ko ira era sa cilivi era sa yali ni talairawarawa ki na vunau; era gadrevia lia mo dou cilivi me ra rekitakia na lewemudou.
\v 14 Ia koi au, me kakua sara na ka tani meu rekitakia, na kauveilatai lia ni noda Turaga ko Jisu Karisito, o koya sa lauvako kinia vi au e na kauveilatai na vi ka vavuravura, koi au voki lia ki na vi ka vavuravura.
\v 15 Ni sa yali ni yaga me cili, se me yali ni cili, sa yaga lia me tamata yalovou.
\v 16 Ia me yaco na vacegu ki na loloma, kivi ira kece lia era sai valavala tiko me vaka nai varau koya, vi ira voki lia na Isireli ni Kalou.
\p
\v 17 Me kakua e dua me vararawataki au e na gauna emuri: ni sa tu lia e na yagoqu na we ni noqu mavoa e na vuku i Jisu.
\p
\v 18 Me tiko kei na yalomudou, na viwekani, na loloma ni noda Turaga ko Jisu Karisito. Emeni.