lmv-x-levuka_reg/48-2CO.usfm

\id 2CO
\ide UTF-8
\h 2 Korinica
\toc1 2 Korinica
\toc2 2 Korinica
\toc3 2co
\mt 2 Korinica
\c 1
\cl Wase 1
\p
\v 1 Koi au ko Paula, nai apositolo i Jisu Karisito ena lewa ni Kalou, kei Timoci na wekaqu, kivei ira nai soqosoqo lewe ni lotu ni Kalou mai Korinica, kei ira kece sara lia era sa lotu mai Akaia taucoko:
\v 2 Me nomudou na loloma kei na vacegu mai vua na Kalou ko Tamada, kei na Turaga ko Jisu Karisito.
\p
\v 3 Me vavinavinakatakia na Kalou, ko koya na Tama ni noda Turaga ko Jisu Karisito, a Tama ni loloma, kei na Kalou ni vivacegui kece sara lia,
\v 4 ko koya sa vacegui kitou ena nitou rarawa kece sara lia, me kitou vacegui ira rawa era sa rarawa ena dua na ka, ena vivacegui kitou sa vacegui kinia mai vua na Kalou.
\v 5 Ia me vaka sa yaco valevu sara vi kitou na rarawa ena vuku i Karisito, sa vacegui kitou valevu sara vakinia na Karisito.
\v 6 Ia kevaka kitou sa vararawataki, sa ka mo dou vacegui kinia ka vabulai, ka sa yaco koya ni dou sa vosotia voki lia na veika rarawa kitou sa vararawataki kinia; se kitou vacegui, sa ka mo dou vacegui kinia ka vabulai.
\v 7 Ia sa tu dei na nitou nuitaki ikodou, ni kitou sa kila, dou sa votai ena vivararawataki, dou na votai voki lia ena vivacegui.
\p
\v 8 Ni kitou sa yali ni vinakatia, na viwekani, mo dou lecavia na nitou rarawa sa yaco vi kitou mai Esia, ni kitou sa bitaki valevu sara, sa dredre kinia na vosotia, ka kitou sa yali ni dinatia ni kitou na bula:
\v 9 ia kitou sa vaka ni kitou sa lewai me kitou mate, me kitou kakua ni vararavi kinia vi kitou, vua lia na Kalou ko koya sa vaturi ira cake voki na mate:
\v 10 ko koya ka vabulai kitou mai na mate levu ko ya, ka na vabula tiko lia: ko koya voki lia kitou sa vararavi kinia ni na vabula tiko lia;
\v 11 ni dou vivuke voki lia ena masulaki kitou, me lewe levu kinia era vavinavinaka ena vuku i kitou, ena vuku ni ka sa soli vi kitou ena vukudra na lewe levu.
\p
\v 12 Ia koya na ka kitou sa reki kinia, nai tukutuku ni nitou lewa e loma, ni sa ia na nitou i valavala e vuravura koya ena loma e dua loa lia, kei na loma dina vua na Kalou, ka valevu sara vi ikodou, sa yali ena vuku vavuravura, ena loma lia ni Kalou.
\v 13 Ni sa yali na ka tani kitou sa vola vi ikodou, koya lia dou sa wilikia se kila; ia kau sa vadinatia dou na kila ka yacovia nai vataotioti,
\v 14 me vaka na nomudou kilai kitou lia ena ka eso; ni kitou sa nomudou mo dou reki kinia, me vaka dou sa nitou ka ni reki voki lia, ena siga ni Turaga ko Jisu.
\p
\v 15 Ia ka'u a vadinatia koya ka'u a nanumia me'u qai eliu vi ikodou, me yaco kinia varua vi ikodou nai solisoli loloma;
\v 16 ka me'u qai daini ikodou ka qai ki Masitonia ka lesu voki mai Masitonia vi ikodou, mo dou yadi au ena noqu qai vaka ki Jutia.
\v 17 Ia ni ka'u a nanumia me vakoya, au sa qai lomalomarua kinia, se yali? Se na ka ka'u sa nakitia, au sa nakitia vavuravura beka, me tu kinia vi au na io na io, kei na yali na yali?
\v 18 Ia me vaka na nona dina na Kalou, sa vakinia sa yali ni io ka yali ni yali na nitou vosa vi ikodou.
\v 19 Ni sa yali ni io ka yali ni yali na nitou vosa vi ikodou. Ni sa yali ni io ka yali ni yali na nitou vunautakia vi ikodou na Luve ni Kalou, ko Jisu Karisito, koi kitou ki Silivenuse ki Timoci, a sa caka lia ko koya me io:
\v 20 ni sa io na vosa ni yalayala kece lia ni Kalou ena vukuna, era sa vaemeni voki lia ena vukuna, me vacaucautaki na Kalou ena vuku i kitou.
\v 21 Ia sai koya na Kalou sa vataudeitaki kitou kei ikodou me da tu vata kei Karisito, a sa lumuti ita;
\v 22 ko koya voki lia sa dregati ita, a sa solia ki na lomada na Yalo Tabu me kenai sevu.
\p
\v 23 Ia ka'u sa kacivia na Kalou me lewa na yaloqu kevaka ka'u yali ni dina, ni sa noqu lomani ikodou lia kau sa vaberaberatakia kinia na noqu qai ki Korinica.
\v 24 Sa yali ni kitou sa vitaliatakia na nomudou vabautia, kitou sa vivuke lia ena nomudou reki ni dou sa tu dei lia ena vabautia.
\c 2
\cl Wase 2
\p
\v 1 Ia ka'u sa lewa va koya ena lomaqu, me'u kakua ni qai voki vi ikodou ena vivararawataki.
\v 2 Io, kevaka ka'u sa vararawatakia na lomamudou, ko cei sa vamarautaki au, ko koya dua loa lia ka'u sa vararawatakia?
\v 3 Ia ka'u a vola vakinia vi ikodou, de vararawataki na lomaqu, ni'u qai yani, ena vukudra sa dodonu me'u reki kinia; ka'u sa vararavi lia vi kodou kece lia ni sa nomudou kece lia na noqu reki.
\v 4 Ni sa rarawa valevu ka yaluma na lomaqu ni'u a vola vi ikodou, a sa vawai valevu na mataqu; sa yali ni dou rarawa kinia, ia mo dou kila lia ni sa levu sara na noqu loloma vi ikodou.
\p
\v 5 Ia kevaka e dua sa caka na vivararawataki, sa yali ni vararawataki au lia ko koya, ia (me'u kakua ni bitakia valevu) koi ikodou kece voki lia.
\v 6 Sa rauti koya sa vakinia na kenai sau koya, sa yaco vua mai vi ira na lewe levu:
\v 7 ka sa kilikili cake kinia mo dou kua soti ni cudruvia, ka mo dou vaceguya, de luvuci koya sa vakoya na nona rarawa levu sara.
\p
\v 8 Ko koya koya ka'u sa masuti ikodou kinia, mo dou vadinadinatakia na nomudou loloma vi koya.
\v 9 Ni sa ka voki lia koya ka'u vola yani kinia, meu kilai ikodou kinia se dou sa talairawarawa ena ka kece lia, se yali.
\v 10 Ia kevaka dou sa yali ni cudruvia e dua ena dua na ka, au sa va voki lia kinia koi au; ia kevaka kau sa yali ni cudruvakia e dua na ka, sai ikodou lia ka'u sa yali ni cudruvakia e dua na ka, sai ikodou lia kau sa yali ni cudruvakia kinia ena mata i Karisito;
\v 11 me kakua ni rawai ita ko Setani: ni sa yali ni guilecavia na nona daulawaki.
\p
\v 12 Ia ni'u a qai ki Tiroa ena vuku ni tukutuku-vinaka kei Karisito, a sa dolavia vi au na darava na Turaga,
\v 13 sa yali ni cegu na yaloqu, ni'u sa yali ni raici Taito na wekaqu; au sa qai tatau vi ira, ka qai tani ki Masitonia.
\v 14 Me caka na vavinavinaka vua na Kalou, ko koya sa tuberi kitou tiko lia ena reki ena yaca i Karisito, ka sa vatakilatakia vata kei kitou ena yasana kece lia ni sa boi vinaka na kilai koya.
\v 15 Ni sai Karisito kitou sa boi vinaka kinia ena mata ni Kalou, vi ira era sa vabulai tiko, vi ira voki lia era sa varusai tiko:
\v 16 vi ira koya sa boiboi vivamatei me ra mate kinia; vi ira koya sa boiboi vivabulai me ra bula kinia. Ia ko cei sa rawatia na veika koya?
\v 17 Ni kitou sa yali ni dauvatanitakia na vosa ni Kalou, me vataki ira na lewe levu; ia kitou sa vataki ira era sa dina sara, me vaka sa mai vua na Kalou, ena mata ni Kalou, kitou sa vosa ena yaca i Karisito.
\c 3
\cl Wase 3
\p
\v 1 Kitou sa vatekivu voki beka me tukuni kitou? Se sa yaga beka vi kitou me kitou tukunia vi ikodou enai vola eso, me vataki ira eso, se me kitou tukunia vakinia mai vi ikodou?
\v 2 Koi ikodou lia na nitou i vola sa volai ena loma i kitou, era sa kila ka wilikia ko ira na tamata kece lia;
\v 3 sa varaitakia lia ni dou sai vola i Karisito kitou sa caka, sa yali ni volai e na wai ni volavola, sa volai lia ena Yalo ni Kalou bula; sa yali lia ena dela ni vatu, ia ena dela ni yalomudou sa malumu.
\p
\v 4 Ia sa vakoya na nitou vararavi vua na Kalou na vuku i Karisito:
\v 5 ni kitou sa yali ni rawatia vakai kitou me vasamatakia ni rawa vakai kitou e dua na ka; ia sa vu mai vua na Kalou lia sa nitou kaukauwa;
\v 6 ko koya sa varautaki kitou me kitou sai talatala ni viyalayalati vou: a sa yali ni va sa volai, a ka vayalo lia; ni sa ia na vivamatei na ka sa volai, ka sa ia na vivabulai na ka vayalo.
\p
\v 7 Ia kevaka sa yaco vata kei na serau na cakacaka sa caka kinia na vivamatei, sa volai ka ceutia ena vatu, a ra sa yali ni varaicia rawa kinia na mata i Mosese ko ira na luve i Isireli ena vuku ni serau ni matana, ia sa qai qai tani koya:
\v 8 ena yali beka ni uasivi cake kinia na serau ni cakacaka vayalo?
\v 9 Io, kevaka sa dua na serau ni cakacaka ni cudruvi, ena uasivi cake valevu na serau ni cakacaka ni vivadonui.
\v 10 Ia na ka ka serau, sa qai yali so na kena serau ni sa vatauvatanitakia kei na serau sa uasivi cake.
\v 11 Io, kevaka ka serau na ka sa dai tiko yani, ena dina valevu cake ni sa serau tiko na ka sa tu vadua.
\p
\v 12 Ia ni sa tu vi kitou nai nuinui vagona, kitou sa qai vosa vamacala sara:
\v 13 ia kitou sa yali ni vataki Mosese ni sa ubia na matana ena tutuvi, me ra kakua ni varaicia matua ko ira na luve i Isireli ki nai otioti ni ka sa dai tiko yani:
\v 14 ia ka sa valomaqatakia na lomadra: ni sa tu lia na tutuvi gona ka yacovia na siga koya ni sa wili na viyalayalati makawa, sa yali lia ni yadi tani; ni sai Karisito sa yadi tani kinia na tutuvi koya.
\v 15 Ia ka sa yacovia na siga koya, ni sa wili ko Mosese, sa tu lia ena lomadra nai tutuvi.
\v 16 Ia ni sa saumaki koya vua na Turaga, ena qai yadi tani na tutuvi.
\v 17 Ia na Turaga sai koya lia na Yalo Tabu; ia sa sereki ko koya, sa tu vua na Yalo ni Turaga.
\v 18 Ia koi ita kece lia, ni sa yali ni tabonakia tiko na matada, era sa raicia na serau ni Turaga me vaka e nai iloilo, ka sa vamataliatakia meda vataki koya, ni sa tubu cake tiko na serau me uasivi, me vaka na Turaga ko koya na Yalo Tabu.
\c 4
\cl Wase 4
\p
\v 1 Ko koya ni sa soli vi kitou na cakacaka koya, ka me vaka sa yaco vi kitou na loloma, kitou sa yali ni datuvu kinia,
\v 2 ka kitou sa dainia na veika vuni e vivamaduataki, a sa yali ni daulawaki na nitou i valavala, se kitou vatanitakia na vosa ni Kalou; ia ni kitou sa tukunia na ka dina, kitou sa vadonui kitou kinia ki na lomadra na tamata kece lia, ena mata ni Kalou.
\v 3 Ia kevaka sa vuni na nitou i tukutuku-vinaka, sa vuni tu kivei ira lia era sa rusa:
\v 4 vi ira sa vamatabokotakia na lomadra na kalou ni vuravura koya, era sa yali ni vabautia, me kakua kinia ni cilavi ira na rarama ni tukutuku-vinaka ni serau i Karisito, ko koya lia na yaloyalo ni Kalou.
\v 5 Ni kitou sa yali ni vunautaki kitou, ko Jisu Karisito lia na Turaga; kei kitou na nomudou tamata ena vuku i Jisu.
\v 6 Ni sai koya na Kalou, ko koya sa tukunia e liu me cila mai na butobuto na rarama, sa cila mai ki na loma i kitou, me cila yani kinia nai serau ni Kalou, ko koya sa vatakilai rawa ena mata i Jisu Karisito.
\p
\v 7 Ia sa waqa qele sa tu kinia vi kitou nai yau koya, me sa qai mai vua na Kalou na kaukauwa mana levu, ka me yali mai vi kitou.
\v 8 Sa buku na druadrua, ia kitou sa yali ni drigiti; kitou sa lomaocaoca lia ia kitou sa yali ni yalo lailai;
\v 9 kitou sa vacacani, ia itatou sa yali ni dai laivi; kitou sa vabalei sobu, ia kitou sa yali i varusai;
\v 10 kitou sa colatia e na yago i kitou ena visiga kece lia na mate i Jisu, me varaitaki voki lia kinia na bula i Jisu ena yago i kitou.
\v 11 Ni kitou sa soli tiko ena visiga, koi kitou sa bula voli, me kitou mate ena vuku i Jisu, me varaitaki voki lia kinia na bula i Jisu, ena yago i kitou sa mate rawa.
\v 12 A sa vakinia, sa daucakacaka vi kitou na mate, ia na bula lia vi ikodou.
\p
\v 13 Ia ni sa tiko vi kitou na yalo vabautia koya, me vaka na ka sa volai, Au sa vabautia, ko koya kau sa vosa kinia; kitou sa vabautia voki lia, ko koya kitou sa vosa kinia;
\v 14 ni da sa kila, ko koya ka vaturia cake voki na Turaga ko Jisu ena vaturi kitou cake vata voki lia kei Jisu, ka varaitaki ita kei ikodou.
\v 15 Ni sa yaco ena vukumudou na ka kece lia me varokorokotakia valevu cake na Kalou ena loloma sa levu sara, ni sa vavinavinakatakia ko ira na lewe levu.
\p
\v 16 Ena vuku ni ka koya kitou sa yali ni datuvu kinia; ia kevaka sa rusa mai na yagoda esau, sa vavoui na tamata e loma ena vi siga kece lia.
\v 17 Ia na noda rarawa mamada, sa dede valailai sara lia, sa vayacoria vi ita na serau levu sa uasivi cake valevu sara, ka yali ni mudu,
\v 18 ni da sa yali ni vananumia tiko na vi ka sa rairai mai, na veika lia sa yali ni rairai mai; ni sa dede valailai lia na veika sa rairai mai; ia sa yali ni mudu na veika sa yali ni rairai mai.
\c 5
\cl Wase 5
\p
\v 1 Ni kitou sa kila, kevaka sa rusa na nitou vale vavuravura ko koya sa vacevaceva, sa dua na nitou mai vua na Kalou, a vale sa yali ni caka ena liga, sa yali ni rusa rawa, mai lomalagi.
\v 2 Io kitou sa vutugu ena yago koya, ni kitou sa gadrevia sara tiko vaisulutakia ena nitou vale mai lomalagi:
\v 3 ke sa vaka ni kitou sa vaisulu, kitou sa yali ni laurai me kitou televua.
\p
\v 4 Ni kitou sa vutugu, koi kitou sa tiko ena vale vacevaceva, ni kitou sa bitaki: ni kitou sa yali ni via luvatia koya, me kitou vaisulu mai, me tilomia na ka sa mate rawa na bula.
\v 5 Ia sai koya na Kalou sa varautaki kitou ki na ka koya, ko koya sa solia voki lia vi kitou na Yalo Tabu me kenai sevu.
\p
\v 6 Ko koya koya kitou sa doudou tiko lia kinia, ni kitou sa kila, ni kitou sa tiko ena yago, kitou sa tawase kei na Turaga:
\v 7 Kitou sa qai voli ena vabautia, ka yali lia ena raicia:)
\v 8 kitou sa doudou tiko, ka kitou sa vinakatia cake me kitou tawase kei na yago, ka tiko vata kei na Turaga.
\v 9 Ko koya koya kitou sa dauvatovolea kinia se kitou tiko vata, se tawase tani, me kitou vinaka lia vua.
\v 10 Ni da na rairai koi ita kece lia ena mata ni tikotiko ni vilewai ni Karisito; me da rawatia yadua nai sau ni veika sa caka ena yagona, me vaka na veika sa caka ko koya, se vinaka se ca.
\p
\v 11 Ia ni kitou sa kila na vivarerei ni Turaga, kitou sa vamasuti ira na tamata; ia kitou sa varaitaki vua na Kalou; au sa dinatia voki lia ni kitou sa varaitaki ena nomudou lewa-eloma.
\v 12 Ia kitou sa yali ni tukuni kitou voki vi ikodou, ia kitou sa solia lia vi ikodou na ka mo dou rekitaki kitou kinia, me so kinia na ka mo dou tukunia vi ira sa dokai ira ena ka vaka rairai lowa lia ka sa yali ena ka ni yalo.
\v 13 Ia kevaka kitou sa sesewa, sa ka lia vua na Kalou; kevaka kitou sa yalomatua, sa ka lia ena vukumudou.
\v 14 Ni sa rawai kitou sara na loloma i Karisito: ni kitou sa lewa vakoya, kevaka sa mate e dua ena vuku ni tamata kece lia, era sa mate kece lia;
\v 15 ka sa mate ko koya e na vuku ni tamata kece lia, me ra kakua ni bula tiko me yaga vi ira lia, ko ira era sa bula, me ra yaga lia vua sa mate ena vukudra ka tu cake voki.
\p
\v 16 Ko koya koya kitou sa qai yali voki ni doka e dua na tamata ena vuku ni ka vayago; e dina lia kitou sa dokai Karisito ena vuku ni ka vayago, ia kitou sa qai yali voki ni dokai koya kinia.
\v 17 Ia kevaka sa tu vata kei Karisito e dua na tamata, sa qai buli vou: sa qai tani na veika makawa; raicia, sa yaco me vou na ka kece lia.
\v 18 A sa vu mai vua na Kalou na ka kece lia, ko koya sa va vivinakatitaki ita kei koya ena vuku i Karisito, a sa solia vi kitou me kitou vunautakia na vivinakati;
\v 19 me vakoya, sa caka na Kalou, me va vivinakatitakia na vuravura vi koya lia ena vuku i Karisito, ka sa yali ni wilikia vi ira na nodra i valavala ca; ka sa solia vi kitou nai tukutuku ni vivinakati.
\v 20 Kitou sa yaco kinia mei talatalai Karisito, me vaka sa vamasuti ikodou na Kalou ena gusu i kitou: kitou nai sosomi ki Karisito, kitou sa vamamasu, mo dou vivinakati kei na Kalou.
\v 21 Ko koya sa yali vua na cala sa qisia ko koya mei soro lia ni nodai valavala ca; me vayacori kinia vi ita na vivadonui ni Kalou ena vukuna.
\c 6
\cl Wase 6
\p
\v 1 Ia koi kitou ni kitou sa cakacaka vata kaya, kitou sa cikevi ikodou mo dou kakua ni vatawayagatakia na loloma ni Kalou.
\v 2 (Ni sa tukunia ko koya, “Au a rogoci iko ena gauna ni vinakati, Ia ena gauna ni bula kau a vukei iko: raicia, ko ya na gauna ni vinakati; raicia, na siga ni bula ni kua koya.”)
\p
\v 3 Kitou sa yali ni vatarabetakia e dua ena dua na ka, me kakua ni beitaki kinia na cakacaka vaitalatala:
\v 4 ia ena ka kece lia kitou sa vadinadinatakia ni kitou sai talatala ni Kalou, ena dauvosotia sara, ena ka rarawa, ena vivasaurarataki, ena yaluma,
\v 5 ena vakanakuitaki, ena dai ki na vivalenivivesu, ena ue, ena daucakacaka, ena dauyadra, ena daulolo;
\v 6 enai valavala savasava, ena vuku, ena vosotia vadede, e na yaloloma, ena Yalo Tabu, ena loloma sa yali ni vivakaisini,
\v 7 enai vavuvuli dina, ena kaukauwa ni Kalou, enai yaragi ni valavala dodonu ena liga i matau kei nai mawi,
\v 8 ni kitou sa varokorokotakia tiko se kitou yali ni dokai, ni kitou sa rogo vinaka tiko se rogo vaca: ni kitou sa vaka na dauvivacalai, ia kitou sa dina lia:
\v 9 sa vaka kitou sa yali ni kilai, ia ka sa kilai vinaka; sa vataki ira sa mate, ia ka raicia, kitou sa bula tiko; kitou sa vataki ira sa cudruvi, ia ka yali ni vamatei;
\v 10 kitou sa vaka kitou sa daurarawa, ia kitou sa reki tiko lia; sa vaka kitou sa dravudravua, ia kitou sa vavutuniyautaki ira na lewe levu; sa vaka ni sa yali vi kitou e dua na ka, ia ka sa tu vi kitou na ka kece lia.
\p
\v 11 Koi ikodou na kai Korinica, sa dalaga na gusu i kitou vi ikodou, sa valevutakia na yalo i kitou.
\v 12 Dou sa yali ni leqa ena vuku i kitou, dou sa leqa lia ena lomamudou.
\v 13 Ia me vaisautaki na ka koya, (Au sa qai vosa me vaka vi ira na luvequ.) Dou yalolevu voki lia koi ikodou.
\p
\v 14 Dou kakua ni vitokani vata vatani kei ira era sa yali ni vabautia: sa vitokani vaevei na yalododonu kei na yali ni yalododonu? Se rau sa viwekani vaevei na rarama kei na butobuto?
\v 15 Se rau sa vivinakati vaevei na Karisito kei Piliali? Se rau sa vaitavi vata vaevei ko koya sa vabautia kei koya sa yali ni vabautia?
\v 16 Se rau na to vata vaevei na vale ni Kalou kei na vimatakau? Ni da sa vale ni Kalou bula; me vaka sa tukunia na Kalou, “Au na tiko ena lomadra, ka qai voli kinia; ia kau na nodra Kalou ka ra na noqu tamata.”
\p
\v 17 Ko koya koya Mo dou qai qai tani mai vi ira, ia dou tawasei tu,” sa tukunia na Turaga, “Ka dou kakua ni tara na ka sa yali ni savasava; Au na qai vabauti ikodou.
\v 18 Ia kau na yaco me Tamamudou, Ka dou na yaco me luvequ tagane kei na luvequ yalewa,” sa tukunia na Turaga Kaukauwa sara.
\c 7
\cl Wase 7
\p
\v 1 Ko koya koya, ikodou sa daulomani, ni sa qai tu vi ita na vosa ni yalayala koya, me da vasavasavataki ita mai na dukadukali kece lia ni yago ki na yalo, meda caka sara lia na ka savasava ena rerevakia na Kalou.
\p
\v 2 Mo dou dolavia na yalomudou vi kitou; kitou sa yali ni vacala e dua, kitou sa yali ni vacacania e dua kitou sa yali ni kovea na nonai yau e dua.
\v 3 Sa yali ni vosa ni vi beitaki na noqu vosa koya: niu sa tukunia oti e liu, dou sa tiko ena yalo i kitou me da bula vata ka mate vata.
\v 4 Sa levu na noqu doudou niu sa vosa vi ikodou, au sa rekitaki ikodou valevu; au sa sinai sara ena vacegu, au sa marau valevu sara e na nitou rarawa kece lia.
\p
\v 5 Ia ni kitou sa yaco ki Masitonia, sa yali ni cegu na yago i kitou, ia. Itatou sa vararawataki lia ena ka kece lia; esau sa ia na vivala, e loma sa tiko na rerevakia.
\v 6 Ia na Kalou, ko koya sa vacegui ira era sa vabalei sobu, sa vacegui kitou ni sa qai mai ko Taito;
\v 7 a sa yali loa lia ena nona qai mai, ena vivacegui kinia ko koya ena vukumudou, ni sa tukunia vi kitou na nomudou gagadre, na nomudou tagi, na nomudou loloma katakata vi au; ka'u sa reki valevu cake kinia.
\p
\v 8 E dina lia ka'u a vararawataki ikodou e nai vola, ia kau sa yali ni vivutuni kinia, ia kau a vivutuni lia eliu; niu sa qai raicia sa vararawataki ikodou nai vola ko ya, ia ka sa dede valailai lia.
\v 9 Au sa qai reki, ka yali lia ni dou a vararawataki, ni dou sa rarawa lia ki na vivutuni: ni dou sa vararawataki me vaka na loma ni Kalou, me kakua ni yali vi ikodou e dua na ka e na vuku i itatou.
\v 10 Ia na rarawa sa vaka na loma ni Kalou sa vayacoria na vivutuni ki na bula o koya sa yali ni vivutunitakia voki: ia na rarawa vavuravura sa vayacoria na mate.
\v 11 Ia ka raicia, na ka lia koya, io, na nomudou vararawataki vaka na loma ni Kalou, ni sa vatuburi vi ikodou na gugumatua! Io, na vasavasavataki ikodou, io, na cudrucudru, io, ka rerevakia, io, na gagadre valevu, io, na lomakatakata, io, na via saumia na ca! Ena ka kece lia dou sa vadinadinatakia ni dou sa yali ni cala ena ka ko ya.
\v 12 Ko koya koya, niu sa volavola vi ikodou, au sa yali ni volavola ena vukuna sa caka na ka ca koya, se na vukuna loa lia sa vacacani, me varaitaki lia vi ikodou na nitou daunanumi ikodou ena mata ni Kalou.
\v 13 Ko koya koya kitou sa vacegui kinia; ia ena nitou vivacegui voki lia kitou sa reki valevu cake ena vuku ni reki i Taito, ni sa vacegui na yalona ena vukumudou kece lia.
\v 14 Ia kevaka ka'u a vacaucautaki ikodou vua ena ka eso, au sa qai yali ni madua kinia; ia me vaka sa dina na ka kece lia kitou a tukunia vi ikodou, sa rairai va voki lia kinia me dina na nitou vivacaucautaki ena mata i Taito.
\v 15 Ia sa ka levu sara na nona loloma vi ikodou, ni sa nanumia ko koya na nomudou talairawarawa kece lia, ni dou sa vacegui koya ena rere kei na sautaninini.
\v 16 Au sa reki niu sa qai vararavi vi ikodou ena ka kece lia.
\c 8
\cl Wase 8
\p
\v 1 Ia kitou sa vatakilatakia vi ikodou, na viwekani, na loloma ni Kalou sa soli vi ira na visoqosoqo lewe ni lotu mai Masitonia,
\v 2 ni ra sa vatovolei tiko e na ka rarawa sara sa levu sara na nodra reki, ka sa ka tani na nodra dravudravua, ia sa uasivi cake valevu kinia na nodra lomasoli.
\v 3 Niu sa vadinadinatakia ni ra solia, me vaka na ka era rawatia, io sa uasivi cake e na ka era rawatia, ka ni sa yalodra kinia;
\v 4 a ra sa vamamasu ka cikevi kitou valevu me kitou yadia na ka-ni-loloma, ka vitokani kei ira ena cakacaka loloma vi ira era sa lotu.
\v 5 Ka sa yali ni vaka na nitou vasama, ia era sa soli ira mada vua na Turaga, vi kitou voki lia me vaka na loma ni Kalou;
\v 6 ia itatou sa masuti Taito kinia, me vaka sa tekivutakia ko koya, me tinia va voki lia kinia vi ikodou na cakacaka voki lia koya.
\v 7 Ia me vaka sa levu sara vi ikodou na ka kece lia, na vabautia, kei na vosa, kei na vuku, kei na gugumatua kece lia, kei na nomudou loloma vi kitou, me levu sara vi ikodou na cakacaka loloma voki lia koya.
\p
\v 8 Au sa yali ni cavutia nai varo, au vosa lia ena vukudra eso era sa gumatua cake, meu vatovolea voki lia na kena dina ni nomudou loloma.
\v 9 Ni dou sa kila na loloma ni noda Turaga ko Jisu Karisito, ni sa vutuniyau ko koya, ia sa yaco me dravudravua ena vukumudou, mo dou vutuniyau mai ena vuku ni nona dravudravua.
\v 10 Ia kau sa vatavuvuli lia na ka koya: ni sa kilikili vi ikodou na ka koya, dou a tekivutakia e liu, ia dou a yali ni caka lowa lia, dou a gumatua cake voki lia kina ka sa oti yani e dua na yabaki.
\v 11 Ia koya, mo dou qai vayacoria sara; me vaka dou a gumatua ena via caka, me qai tini vakinia me vaka na ka sa rawa.
\v 12 Kevaka sa tu na via caka, ena vinakati me vaka na ka sa tu vua e dua, ka yali ni vaka na ka sa yali ni tu vua.
\v 13 E yali me ra vacegui ko ira na tamata tani, ka vabibitaki koi ikodou:
\v 14 me vatautauvatatakia lia, me rautia na nodra dravudravua na nomudou i yau levu ena gauna koya, me na rautia na nomudou dravudravua voki lia na nodra i yau levu: me rawa kinia na vatautauvatataki:
\v 15 me vaka na ka sa volai, “Ko koya sa kumunia valevu sa yali na ka e vo vua; kei koya sa kumunia valailai sa yali na ka e yali vua.
\p
\v 16 Ia me caka na vavinavinaka vua na Kalou, o koya sa vatuburia ena loma i Taito na daunanumi ikodou va koya.
\v 17 E dina lia sa vabautia na nitou vamamasu; ia ni sa gumatua sara vakai koya lia, sa qai kinia vi ikodou.
\v 18 Ia itatou sa tala vata kaya na wekada, ko koya sa rogo vinaka vi ira kece lia na visoqosoqo lewe ni lotu ena vuku ni tukutuku-vinaka,
\v 19 ia ka sa yali ni koya loa lia koya, sa digitaki koya voki lia ko ira na visoqosoqo lewe ni lotu me qai vata kei kitou ni kitou sa caka na cakacaka loloma koya, me varokorokotaki kinia na Turaga, ka me rairai kinia na noda gumatua voki lia;
\v 20 ia kitou sa via tarovia koya, me kakua e dua me beitaki kitou ena vuku ni yau levu koya kitou sa oga kinia:
\v 21 ni kitou sa nanumia na ka e dodonu, e yali loa lia ena mata ni Turaga, ena matadra voki lia na tamata.
\v 22 Kitou sa tala na wekada voki lia ki rau, ko koya itatou sa raicia wasoma ni sa gumatua ena ka e levu, ia ka sa qai gumatua valevu cake, ni sa vadinati ikodou valevu.
\v 23 Ke tarogi ko Taito, sa noqu i tokani ko koya, a sa vukei au ena cakacaka ena vukumudou: ko irau voki lia na wekada, erau sai talatala ni visoqosoqo lewe ni lotu, koi rau sa varokorokotaki kinia na Karisito.
\v 24 Ko koya koya mo dou qai vatakila vi iratou, ena matadra voki lia na visoqosoqo lewe ni lotu, nai vadinadina ni nomudou loloma, kei na nitou vacaucautaki ikodou.
\c 9
\cl Wase 9
\p
\v 1 Ena vuku ni cakacaka loloma. Vi ira era sa lotu, sa yali ni yaga meu volavola kinia vi ikodou:
\v 2 niu sa kila na nomudou gumatua, kau a vacaucautaki ikodou kinia vi ira na kai Masitonia, io, ni sa varau oti tu ko Akaia ka yabaki dua; a sa vakatakatataki ira kinia na lewe levu na nomudou lomakatakata.
\v 3 Ia kau sa talai iratou yani na viwekani, de vawaletakia na nitou vacaucautaki ikodou ena vuku ni ka koya: io, me vaka lia na ka kau a tukunia, mo dou sa varau sara tu lia:
\v 4 de qai vata kei au eso vi ira na kai Masitonia, ka raici ikodou ni dou sa yali ni varau, ia kitou (me kakua sara lia ni cavuti ikodou,) kitou na madua kinia ena vuku ni vivacaucautaki doudou koya.
\v 5 Ko koya koya kau sa vaka ni sa dodonu meu masuti iratou na viwekani, me ratou liu yani vi ikodou, me ratou varautakia mada e liu na nomudou i loloma sa vosatakia eliu, me varau tu mada lia ko ya, me vaka sa ka ni loloma, ka me kakua ni vaka na ka ni domo-ni-koco.
\p
\v 6 Ia koya, ko koya sa kaburakia valailai, ena tamusukia voki lia valailai; ia ko koya sa kaburakia valevu, ena tamusukia voki lia valevu.
\v 7 Me ra dui solia me vaka na ka sa vinakatia ko koya yadua ena yalona; me kakua ena voraki, se ni sa vasauraratakia: ia ko koya sa solia ena marau sa vinakatia na Kalou.
\v 8 A sa rawarawa vua na Kalou me valevutakia vi ikodou na ka-ni-loloma kece lia: me tu vi ikodou e na visiga nai yau kece lia e yaga e na ka kece lia, ka mo dou uasivi cake kinia e na cakacaka vinaka kece lia:
\v 9 me vaka na ka sa volai, “Sa dui daidai ko koya; sa dau soli ka vi ira na dravudravua: Sa tu dei ka yali ni mudu na nonai valavala dodonu.”
\p
\v 10 Ia ko koya sa dausolia na sila vua na dauvikaburaki kei na madrai me kakana, ena solia mada na sila vi ikodou me levu, ka valevutakia na vua ni nomudou i valavala dodonu;
\v 11 mo dou vavutuniyautaki ena ka kece lia, mo dou caka kinia nai loloma kece lia, sa vayacori kinia vi kitou na vavinavinaka vua na Kalou.
\p
\v 12 Ni sa caka na cakacaka koya sa yali ni varauti loa lia na nodra dravudravua era sa lotu, ia sa tubu cake valevu voki lia kinia na vavinavinaka valevu vua na Kalou;
\v 13 ni dou sa vatovolei ena cakacaka koya, era sa varokorokotakia na Kalou ni dou sa tukunia kinia na nomudou talairawarawa ki nai tukutuku-vinaka voki lia ki Karisito, ena vuku voki lia ni cakacaka loloma levu koya kivei ira, vi ira voki lia na tamata kece lia;
\v 14 ia ko ira voki lia era sa masulaki ikodou, ka daulomani ikodou ena vuku ni loloma levu ni Kalou sa tu vi ikodou.
\v 15 Me caka na vavinavinaka vua na Kalou ena vuku ni nonai solisoli sa yali ni tukuni rawa.
\c 10
\cl Wase 10
\p
\v 1 Ia koi au ko Paula, kau sa masuti ikodou e na yalomalumalumu ki na yalomalua i Karisito, oi au sa malumalumu niu sa tiko vi ikodou, ia kau sa doudou vi ikodou niu sa tiko tani;
\v 2 io, kau sa vamasuti ikodou meu kakua ni doudou niu sa tiko vata e na kaukauwa, kau sa nanumia meu doudou kinia vi ikodou eso, o ira sa vasami itatou ni itatou sai valavala me vaka na ka vayago.
\v 3 Sa dina lia sa vayago na nitou bula, ia itatou sa yali ni vala me vaka na ka vayago:
\v 4 (ni sa yali ni ka vayago na nitou i yaragi, ia sa kaukauwa lia e na vuku ni Kalou me talaraki kinia na bai ni valu kaukauwa:)
\v 5 sa talarakia sobu kinia ka vinanuyakia, ki na ka cecere kece lia sa valevulevui me voratia na vuku ni Kalou, ka sa vamalumalumutakia na nanuma kece lia me talairawarawa kinia vi Karisito;
\v 6 ia kitou sa varau tu me saumia kece lia na talaidredre, ni na vayacoria dina na nomudou talairawarawa.
\p
\v 7 Dou sa lewa beka me vaka sara lia na ka sa rairai? Kevaka e dua sa vadinatia ni sa ni Karisito ko koya, me nanumia voki lia koya ko koya, me vaka sa ni Karisito ko koya, kitou sa ni Karisito vaka voki lia kinia.
\v 8 Ia kevaka kau sa dokai au valevu cake sara lia ena vuku ni lewa (sa solia mai vi kitou na Turaga, mo dou vatataki cake kinia, ia ka yali lia mo dou varusai kinia,) au na yali ni vamaduataki.
\v 9 Meu kakua ni vaka ni kau sa via varerei ikodou e na noqu i vola;
\v 10 ni ra sa tukunia, Sa bibi ka kaukauwa na nonai vola; ia sa malumalumu lia ni sa tiko vi ita, ka sa ka loa lia na nona vosa;
\v 11 me qai nanumia na ka koya, ko koya sa vakinia, ni rau na tautauvata lia, na nitou itukutuku enai vola ni kitou sa tiko tani, kei na nitou i valavala ni da sa tiko vata lia.
\p
\v 12 Ni kitou sa yali ni doudou me wiliki kitou vata kei ira eso, se vatautauvatataki kitou kei ira era sa dautukuni ira vakai ira; ia ko ira ni ra sa varauti ira vakai ira, ka vatautauvatatakia vakai ira, era sa yali ni vuku.
\v 13 Ia koi kitou, kitou sa yali ni valevulevui kitou ena veika sa uasivitia nai varau, me vaka lia nai varau ni yalayala sa vota vi kitou na Kalou, ai varau me kitou yaco dina vi ikodou.
\v 14 Ni kitou sa yali ni uasivitia na nitou i yalayala, me vaka kitou sa yali ni yacovi ikodou: ni kitou sa yacovi ikodou voki lia enai tukutuku-vinaka kei Karisito:
\v 15 kitou sa yali ni dokai kitou ena veika sa uasivitia nai varau, ena vuku ni nodra cakacaka na tamata tani; ia kitou sa nuinui lia, ni sa valevutakia tiko na nomudou vabautia, kitou na valevulevui kinia vi ikodou me vaka na nitou i yalayala me kitou uasivi,
\v 16 me kitou vunautakia nai tukutuku-vinaka ena yasana sa uasiviti ikodou, me kitou kakua ni valevulevui kitou ena vuku ni yalayala ni tamata tani, ena veika sa varau tu vi kitou.
\v 17 Ia ko koya sa vosa doudou, me vosa doudou e na vuku ni Turaga.
\p
\v 18 Ni sa yali ni vabau ko koya sa tukuni koya, sa vabau lia ko koya sa tukunia na Turaga.
\c 11
\cl Wase 11
\p
\v 1 Au sa vaka mo dou vosoti au mada lia niu lialia valailai; io, dou vosoti au mada lia.
\v 2 Niu sa lomani ikodou sara me vaka na loloma ni Kalou: niu a musuki ikodou vua e dua me watimudou, meu varaitaki ikodou vi Karisito e dua lia na goneyalewa savasava.
\v 3 Ia kau sa rere, de dua na ka ena vacalai kinia na lomamudou mai na kena dina kei na kena savasava vi Karisito, me vaka ka vacalai Ivi kinia eliu na gata e na nonai lawaki ca.
\v 4 Ia sa dodonu lia mo dou vosoti koya sa qai qai mai, kevaka sa vunautakia e dua tani na Jisu, o koya kitou sa yali ni vunautakia eliu, se sa yaco vi ikodou e dua tani na Yalo, o koya sa yali ni yaco vi ikodou eliu, se dua tani nai tukutuku-vinaka, dou a yali ni vabautia eliu.
\v 5 Niu sa vasama niu sa yali sara ni uasivi sobu vi iratou nai apositolo eratou sa uasivi cake.
\v 6 Ia kevaka kau sa yali ni matai ni vosa, sa tu lia vi au na vuku; ia kitou a varaitakia sara vi ikodou ena ka kece lia.
\p
\v 7 Au sa qai cala beka niu sa vamalumalumutaki au mo dou valevutaki kinia, niu sa vunautakia vi ikodou nai tukutuku-vinaka ni Kalou ka yali ni voli kinia?
\v 8 Au a vadravudravutaki ira nai soqosoqo lewe ni lotu tani eso, niu sa voli vi ira, meu caka kinia na cakacaka vi ikodou.
\v 9 Ia niu a tiko vadravudravua vi ikodou, au a yali ni vaogai koya e dua: ni ra sa soli ka me rauti au ena noqu dravudravua ko ira na viwekani era a qai mai Masitonia: ia ena ka kece lia au a varaici au meu kakua ni vaogai ikodou, kau na vatiko lia kinia.
\v 10 Me vaka kau sa dina ena mata i Karisito, ena yali sara ni tarovi na noqu vosa doudou ena ka koya ena yasayasa va-Akaia.
\v 11 Ena vuku ni cava? Niu sa yali li ni lomani ikodou? Sa kila lia na Kalou.
\p
\v 12 Ia na ka kau a caka, au na caka tiko lia, meu mudukia tani kinia na vuna mai vi ira era gadrevia na vuna: me ra laurai lia me ra vataki kitou ena ka era sa valevulevui ira kinia.
\v 13 Ni ra sai apositolo vailasu ko ira sa va koya, era sa tamata daucakacaka vavivakaisini, era sa vamataliataki ira me rai apositolo ki Karisito.
\v 14 Ia ka sa yali ni ka e vivakurabuitaki koya; ni sa vamataliataki koya ko Setani me agilose ni rarama.
\v 15 Ko koya koya sa yali kinia ni ka levu me vamataliataki voki lia ko ira na nonai talatala me ra vataki ira nai talatala ni valavala dodonu: ia na kedrai tinitini ena vaka na nodra cakacaka.
\p
\v 16 Au sa tukunia voki, Me kakua na tamata me nanumia kau sa lialia; ia kevaka sa nanumia vakinia e dua, mo dou vosotia lia na noqu lialia, meu valevulevui au voki lia valailai.
\v 17 A ka kau sa tukunia, au sa yali ni tukunia me vaka na ka ni Turaga, me vaka lia na ka lialia, niu sa valevulevui au ena vosa doudou koya.
\v 18 Ni ra sa lewe levu era valevulevui ira vayago lia, koi au voki lia kau na valevulevui au.
\v 19 Ni dou sa reki mo dou vosoti ira era sa lialia, ni dou sa vuku.
\v 20 Ni dou sa vosotia lia, kevaka sa vabobulataki ikodou e dua, kevaka sa vadravudravuataki ikodou e dua, kevaka sa lawakitaki ikodou e dua, kevaka e dua sa valevulevui koya, kevaka sa sabicia na matamudou e dua.
\v 21 Au sa vosa, me vaka kau sa beci, me vaka itatou a malumalumu sara lia. Ia kevaka e dua sa doudou ena dua na ka, (au sa vosa valialia,) au sa doudou va voki lia kinia.
\v 22 Ko ira beka era sa Iperiu? Au sa vakinia. Era sa luve i Isireli? Au sa vakinia. Era sa kawa i Eparaama? Au sa vakinia.
\v 23 Era sai talatala i Karisito? (Au sa vosa me vaka na lialia,) au sa uasivi cake; au a daucakacaka valevu cake, au a yaviti valevu sara, au a tiko valevu cake, au a yaviti valevu sara, au a tiko valevu cake ena vale ni vivesu, au a voleka ni mate valevu.
\v 24 Sa yaviti au valima ko ira na Jiu a sa tau na kuita vayatolusagavulu ka ciwa.
\v 25 Au a warolaki vatolu, au a vaviriki vadua e na vatu, e na noqu visokoyaki au a mate vatolu, au a tiko e na wai titobu ka bogi dua ka siga dua;
\v 26 au a viqaiyaki voli valevu, au a ca ena vi uciwai, au a ca mai vi ira na daubutako, au a ca mai vi ira na kai noqu, au a ca mai vi ira na viwekani vailasu;
\v 27 au a dauoca ka daurarawa, au a dauyadra valevu, au a dauviakana ka dauviasomi, au a daulolo valevu, au a liliwa ka televua.
\v 28 Ia ka sa yali ni wili na vi ka sa vo koya voki lia sa bitaki au e na visiga, na daunanumi ira kece lia na visoqosoqo lewe ni lotu.
\v 29 O cei beka sa malumalumu kau sa yali ni malumalumu? Ko cei sa vacalai, kau sa yali ni lomakatakata kinia?
\p
\v 30 Kevaka e dodonu meu valevulevui au, au na valevulevui au ena vuku ni noqu malumalumu.
\v 31 A Kalou na Tama ni noda Turaga ko Jisu, ko koya sa varokorokotakia ka yali ni mudu, sa kila niu sa yali ni vosa lasu.
\p
\v 32 Mai Tamasiko, na Kovana ni Arita na tui sa vatawa na koro ko Tamasiko, ni sa via tauri au;
\v 33 ia kau sa tukucia sobu e loma ni dua na sova, mai na darava e colo e taudaku ni bai, ka bula kinia mai na ligana.
\c 12
\cl Wase 12
\p
\v 1 E dina lia meu valevulevui au, ia sa yali beka ni yaga; ia kua na cavutia na viraivotu ki na vi varairai ni Turaga.
\v 2 Au sa kila e dua na tamata ko koya sa tu vata kei Karisito, ni sa yadi cake mada ko koya koya ki nai katolu ni lomalagi, a sa qai oti na yabaki e tinikava (se vayago beka, se yali, au sa yali ni kila; sa yali beka ni vayago, au sa yali ni kila; sa kila lia na Kalou;)
\v 3 io, au sa kila voki lia na tamata sa vakoya, (se vayago lia, se yali ni vayago, au sa yali ni kila; sa kila lia na Kalou;)
\v 4 ni sa yadi cake ki Parataisi, a sa rogocia na vosa sa yali ni tukuni rawa, sa yali ni tara me tukunia na tamata.
\v 5 Au na valevulevui au ena vukuna sa va koya; ia ena vukuqu lia, kau na yali ni valevulevui au; ena vuku lia ni noqu malumalumu.
\v 6 Ia kevaka kau sa vinakatia meu dokai au, au na yali ni lialia kinia; niu na tukunia lia na ka e dina: ia kau sa kua so lia, de dua sa vasami au niu sa uasivi cake ena ka sa raicia vi au, se rogocia vi au.
\v 7 Ia deu valevulevui sara ni sa levu sara na vivarairai, sa dua na voto ni kau sa valauti kinia na lewequ, e dua nai talaki i Setani me vararawataki au, deu valevulevui sara.
\v 8 Ena vuku ni ka koya, kau a masu vatolu vua na Turaga, me yadi tani vi au.
\v 9 A sa tukunia vi au ko koya, Sa rauti iko na noqu loloma: ni sa valevui na noqu kaukauwa, ni sa malumalumu e dua. Ko koya koya sa yaloqu sara kinia meu rekitakia na noqu malumalumu, me tiko kinia vi au na kaukauwa i Karisito.
\v 10 Ko koya koya, kau sa vinakatia kinia na malumalumu, na vasewasewani, na vadravudravuataki, na vivacacani, na vivararawataki, ena vuku i Karisito: ia niu sa malumalumu, au sa qai kaukauwa.
\p
\v 11 Au sa yaco meu lialia; koi ikodou lia sa vavuna; ni ka dodonu mo dou vosavavinakataki au kinia; niu sa yali ni uasivi sobu vi ira nai apositolo era sa uasivi cake; ia sa dina lia niu sa ka loa lia.
\v 12 E dina sa vayacori ena ikodou maliwa na vivatakilakila ni apositolo ena dauvosotia kece lia, ena veika mana, kei na veika e vivakurabuitaki, kei na cakacaka mana.
\v 13 A cava beka dou sa uasivi sobu kinia vi ira na visoqosoqo lewe ni lotu tani, ena vuku lia ni ka koya, niu sa yali ni vaogai ikodou? Ia mo dou kakua ni cudruvi au ena vuku ni ka ca koya.
\p
\v 14 Raicia, au sa varau meu qai vatolu yani vi ikodou; ia kau na yali ni vaogai ikodou: ni kau sa yali ni vasaqara na nomudou ka, koi ikodou lia: ni sa yali ni kilikili kei ira na gone me ra binia nai yau me nodra na qase, ko ira lia na qase, me nodra na gone.
\v 15 Ia sa yaloqu sara meu soli au ki na ka sa tu vi au ena vuku ni yalomudou; io kevaka sa ka levu na noqu loloma vi ikodou kau na lomani kinia valailai beka?
\p
\v 16 Ia me vaka lia koya, au sa yali ni beitaki ikodou: ia niu a yaloqaseqase, kau sa rawai ikodou enai lawaki.
\v 17 Au sa vaiyau mai vi ikodou li vi ira kau a tala vi ikodou?
\v 18 Au a masuti Taito, ka tala vata kaya e dua vi ira na viwekani. Sa vaiyau mai vi ikodou li ko Taito? Kei rau a yali li ni valavala ena yalovata? Keirau a yali li ni muria e dua loa lia nai varau?
\p
\v 19 Dou sa vasama tiko beka ni kitou sa vosavinakataki kitou vi ikodou? Kitou sa vosa ena mata ni Kalou, ni kitou sa tu vata kei Karisito: ia na ka kece lia, ikodou sa daulomani, mo dou vatataki cake kinia.
\v 20 Niu sa rere, deu qai yani ka yali ni raici ikodou me vaka kau sa vinakatia, ia kau na qai laurai vi ikodou me vaka dou sa yali ni vinakatia: de sa tiko na vileti, kei na vuvu, kei na cudrucudru, kei na viba, kei na kakase, kei na vasolokakana, kei na viavialevu, kei na ue:
\v 21 de vamalumalumutaki au ena matamudou na noqu Kalou, niu sa qai voki yani, ka deu tagicaki ira kinia era lewe levu era sai valavala ca oti, ka yali ni vivutunitakia na dukadukali kei na dauyalewa, kei na daudara, era a caka.
\c 13
\cl Wase 13
\p
\v 1 Koya nai katolu ni noqu qai yani vi ikodou. Ena vadinadinataki na vosa kece lia ena gusu ni vadinadina e lewe rua, se lewe tolu.
\v 2 Au a vasalatakia eliu, kau sa qai vasalatakia, ia koya, niu me vaka enai karua ni noqu tiko vi ikodou; ia koya, niu sa tiko tani, au tukunia vi ira sai valavala ca eliu, kei ira kece lia na tani, kevaka kau na qai voki yani, kau na yali ni vosotia:
\v 3 ni dou sa qara e dua nai vadinadina ni sai Karisito kau sa vosa kinia, ko koya sa yali ni malumalumu vi ikodou, ia sa kaukauwa lia vi ikodou:
\v 4 ni sa vakoti ki na kauveilatai ko koya ni sa malumalumu, ia sa qai bula ena kaukauwa ni Kalou. Kitou voki lia, kitou sa malumalumu vata kaya, ia kitou na bula vata kaya ena kaukauwa ni Kalou vi ikodou.
\p
\v 5 Dou dikevi ikodou, se dou tu e na vabautia, se yali; vatovolei ikodou. Dou sa yali beka ni kila ikodou, ni sa tiko vi ikodou ko Jisu Karisito? De dou sa yali dina ni vabau.
\v 6 Ia kau sa dinatia ni dou na kila ni kitou sa yali voki lia ni wili.
\v 7 Ia kitou sa masu vua na Kalou, mo dou kakua sara lia ni valavala ca; e yali me kitou rairai kinia ni kitou sa vinakati kinia, mo dou caka lia na ka e dodonu, io, kevaka kitou sa yali ni wili.
\v 8 Ni kitou sa yali ni rawatia e dua na ka me tarovi kinia na dina, me totakia lia na dina.
\v 9 Ni itatou sa reki, ni itatou sa malumalumu voki lia, ka kaukauwa koi ikodou; ia na ka voki lia koya itatou sa masulakia mo dou vinaka sara.
\v 10 O koya koya, kau sa vola kinia na vi ka koya niu sa tiko tani, deu ia na lewa rarawa ni da sa tiko vata, me vaka na kaukauwa sa solia mai vi au na Turaga me ia kinia na vivatataki, me kakua lia na vivarusai.
\p
\v 11 Meu tinia, koi ikodou na viwekani, mo dou vinaka! Mo dou vinaka taucoko, mo dou vacegui sara, mo dou lomavata, mo dou vivinakati tiko lia; ia ena tiko vata kei ikodou na Kalou ni loloma kei na vacegu.
\v 12 Dou vilomani ka vireguci ena yalosavasava.
\v 13 Sa loloma yani vi ikodou ko ira kece lia era sa lotu. Me tiko vi ikodou kece lia na yaloloma ni Turaga ko Jisu Karisito, kei na loloma ni Kalou, kei na vilomani ni Yalo Tabu. Emeni.