lmv-x-levuka_reg/47-1CO.usfm

\id 1CO
\ide UTF-8
\h 1 Korinica
\toc1 1 Korinica
\toc2 1 Korinica
\toc3 1co
\mt 1 Korinica
\c 1
\cl Wase 1
\p
\v 1 Koi au ko Paula, sa kacivi mei apositolo i Jisu Karisito, e na lewa ni Kalou, ki Sosiceni na wekaqu,
\v 2 vi ira nai soqosoqo lewe ni lotu ni Kalou era sa tiko mai Korinica, vi ira sa tu vata voki lia ki Karisito Jisu ka sa va savasavatakia, era sa kacivi me ra yalosavasava, kei ira kece lia e na viyasana kece lia era sa masutia na yaca i Jisu Karisito na noda Turaga, io, na noda ki na nodra voki lia:
\v 3 Me yaco vi ikodou na loloma, ki na va cegu, mai vua na Kalou ko Tamada, kei na Turaga ko Jisu Karisito.
\p
\v 4 Au sa va vinavinaka e na visiga vua na noqu Kalou e na vukumudou, e na vuku ni loloma ni Kalou sa soli vi ikodou e na vuku i Karisito Jisu;
\v 5 ni dou sa va vutuniyautaki e na ka kece lia e na vukuna, e na vosa lowa lia ki na vuku kece lia;
\v 6 me vaka ni sa va dinadinatakia vi ikodou nai tukutuku kei Karisito:
\v 7 ka dou sa yali kinia ni uasivi sobu e na dua nai solisoli va yalo: ni dou sa warakia na kena va rairaitaki ni noda Turaga o Jisu Karisito:
\v 8 o koya ena va taudeitaki ikodou me yaco na kenai va taotioti, mo dou yali cala e na siga ni noda Turaga ko Jisu Karisito.
\v 9 Sa dina na Kalou, o koya sa kacivi ikodou mo dou nonai tokani ni Luvena ko Jisu Karisito na noda Turaga.
\p
\v 10 Ia kau sa va masuti ikodou, na vi wekani, e na yaca ni noda Turaga o Jisu Karisito, mo dou tauvata kece lia e na vosa, ia me kakua vi ikodou na visei; mo dou vei vinakati sara ni dou sa lomavata ka lewa vata.
\v 11 Ni sa tukuni ikodou mai vi au, ikodou na viwekani, ko ira na lewe ni vale i Kiloi, ni dou sa dauveileti vakai ikodou.
\v 12 Ia na ka koya kau sa vosa kinia, ni dou sa tukunia yadua, Oi au sa ni Paula; ia, Oi au sa ni Apolosa, ia, Oi au sa ni Kifa; ia, Oi au sa ni Karisito.
\v 13 Sa tawase beka na Karisito? Sa vakotia beka ki na kauveilatai e na vukumudou ko Paula? Se dou sa papitaisotaki beka e na yaca i Paula?
\v 14 Au sa vavinavinaka vua na Kalou niu sa yali ni papitaisotakia e dua vi ikodou, oi rau lia o Kirisipo ki Keio;
\v 15 de tukunia e dua ni dou sa papitaisotaki e na yacaqu.
\v 16 Au sa papitaisotaki ira voki lia na lewe ni vale i Sitifana: ia kau sa yali ni nanumia ni kau sa papitaisotakia e dua tani voki.
\v 17 Ni sa yali ni talai au na Karisito meu vi papitaisotaki, meu vunautakia lia nai tukutuku-vinaka: ia ka yali lia e na vosa sa vuku, de vatawayagatakia kinia na kauveilatai i Karisito.
\p
\v 18 Ni sa ka lialia vi ira sa rusa na kena vunautaki na kauveilatai, ia sa kena kaukauwa lia ni Kalou vi ita sa vabulai.
\v 19 Ni sa volai, Au na va rusa na nodra vuku era sa dauvuku, Ka vatawayagatakia na nodra yalomatua era sa dauyalomatua.
\p
\v 20 Evei na vuku? Evei na vunivola? Evei na dauvileti ni vuravura koya? Sa yali beka ni va lialiatakia na vuku ni vuravura koya na Kalou?
\v 21 Io, ni sa vuku tu na Kalou, a ra sa yali ni kila na Kalou na kai vuravura e na nodra vuku, sa qai vinakatia na Kalou me vabulai ira era sa vabautia, e na vosa va lialia.
\v 22 Ni ra sa tarogia nai va takilakila ko ira na Jiu, a ra sa vasaqara na vuku ko ira na kai Kirisi:
\v 23 ia itatou sa vunautaki Karisito ni sa lauvako ki na kauveilatai, a ka era sa tarabe kinia o ira na Jiu ka sa ka lialia vi ira na kai Kirisi:
\v 24 ia vi ira lia era sa kacivi, se ra Jiu se ra kai Kirisi, na Karisito na kaukauwa ni Kalou, ki na vuku ni Kalou.
\v 25 Ni sa ka vuku na sesewa ni Kalou ka sa uasivi vi ira na tamata; a sa kaukauwa na malumalumu ni Kalou me uasivi vi ira na tamata.
\p
\v 26 Ni dou sa raicia, na vi wekani, na kenai valavala ni nomudou kacivi, ni sa yali ni lewe vuqa era sa vuku vayago, sa yali ni lewe vuqa era sa kaukauwa, sa yali ni lewe levu era sa turaga me sa kacivi:
\v 27 ia sa digitakia na Kalou na vi ka valialia e vuravura, me va maduataki ira na vuku; ia na veika sa malumalumu e vuravura sa digitakia na Kalou me va maduatakia na vi ka sa kaukauwa;
\v 28 ki na vi ika vakaisi e vuravura, ki na vi ka e beci, sa digitakia na Kalou, ki na vi ka sa yali lowa lia, me varusa na vi ka sa tu dei;
\v 29 me kakua kinia na tamata me dokai koya e mata ni Kalou.
\v 30 Ia maivi koya lia dou sa tu vata kinia ki Karisito Jisu, o koya sa caka na Kalou me vu ni vuku vi ita, ka vu ni vadonui, ka vu ni vasavasavataki, ka vu ni bula;
\v 31 me yaco kinia na ka sa volai, O koya sa vosa doudou, me vosa doudou lia e na vuku ni Turaga.
\c 2
\cl Wase 2
\p
\v 1 Ia koi au, niu sa qai yani vi ikodou, na vi wekani, au sa yali ni qai e na vosa vinaka se na vuku, niu sa vunautakia vi ikodou na vosa sa tukuni kinia na Kalou.
\v 2 Ni sa dei na yaloqu meu kakua ni kila e na ikodou maliwa e dua na ka tani, ko Jisu Karisito duadua lia, ki na nona lauvako kina kauveilatai.
\v 3 Ia kau a tiko vata ki ikodou e na malumalumu, kei na rere, kei na sautaninini levu.
\v 4 Ia na noqu vosa, niu sa vunautakia, sa yali ni ia e na vosa va vitemaki ni vuku va tamata, sa ia lia e na kena va dinadinataki ni Yalo Tabu, kei na kaukauwa-mana:
\v 5 me kakua kinia ni tu na nomudou vabautia e na nodra vuku na tamata, e na kaukauwa lia ni Kalou.
\p
\v 6 Ia kitou sa tukunia na vuku e na kedra maliwa era sa yalomatua sara: a sa yali lia na vuku ni vuravura koya, se na nodra vuku na turaga ni vuravura koya, o koya sa yaco me ka lowa lia:
\v 7 ia na vuku lia ni Kalou itatou sa tukunia e na ka vuni, io, koya ka vunitaki eliu, ka lesia na Kalou ni sa bera ni caka ko vuravura me da vakalougatataki kinia;
\v 8 ia ka sa yali e dua na turaga ni vuravura koya sa kila: ia kevaka era sa kila, era sa yali ni vakotia i na kauveilatai na Turaga vaiukuuku.
\v 9 Ia sa vaka nai vola, Sa yali na mata sa raicia, se na daliga sa rogocia, Ka sa yali ni curu i na loma ni tamata, Na vi ka sa varautakia na Kalou me nodra era sa lomani koya.
\p
\v 10 Ia vi ita lia sa vatakila mai na Kalou e na Yalo Tabu; ni sa dikevia na ka kece lia na Yalo Tabu, io, na vi ka titobu ni Kalou.
\v 11 Io, o cei na tamata sa kila na ka ni tamata, a yalo ni tamata lia sa tiko e lomana? Sa vaka voki lia kinia na vi ka ni Kalou sa yali e dua sa kila, sa kila lia na Yalo ni Kalou.
\v 12 Ia eda sa yali ni rawatia na yalo ni vuravura, na Yalo lia sa mai vua na Kalou; me da kila kinia na vi ka sa solia loa lia mai vi ita na Kalou.
\v 13 A veika koya kitou sa tukunia voki lia, ia ka sa yali lia e na vosa sa va vulicia na vuku ni tamata, o koya lia sa vatavulicia na Yalo Tabu; ni itatou sa vatautauvatatakia na vi ka vayalo kei na vi ka vayalo.
\v 14 Ia na tamata sa vayago sa yali ni vabautia na veika ni Yalo ni Kalou: ni sa ka lialia vua, a sa yali ni kila rawa o koya, ni ra sa kilai vayalo lia.
\v 15 Ia o koya sa vayalo sa kila na ka kece lia, a sa yali e dua sa kilai koya.
\v 16 Io, ko cei sa kila na loma ni Turaga, me vatavulici koya kinia? Ia sa tu vi ita na lomai Karisito.
\c 3
\cl Wase 3
\p
\v 1 Ia koi au, au sa yali ni vosa rawa vi ikodou, na viwekani, me vaka vi ira era sa vayalo, me vaka vi ira era sa vayago vokilia, me vaka vi ira era sa gone lalai e na nodra tu vata kei Karisito.
\v 2 Au sa va somi ikodou e na wai-ni-sucu, ka yali e na kakana dina; ni dou a yali ni rawatia, edaidai voki lia dou sa yali ni rawatia.
\v 3 Ni dou sa vayago tiko lia: dou sa yali ni vayago tu kai valavala vatamata, ni sa tu vi ikodou na vuvu, kei na vileti?
\v 4 Dou sa yali li ni vayago, ni sa tukunia tiko e dua, Oi au sa ni Paula; ka dua tani, Oi au sa ni Apolosa?
\p
\v 5 Ia ko cei ko Apolosa? Se ko cei ko Paula? Ai talatala lowa lia dou sa vabautia e na vukudrau, me vaka sa solia na Turaga ki na tamata yadua.
\v 6 Au sa tea koi au, sa va suasuatakia o Apolosa; ia na Kalou lia sa va tuburia.
\v 7 Sa qai ka lowa lia kinia o koya sa tea, ki koya sa va suasuatakia; ia sa levu dua loa lia na Kalou, o koya sa vatuburia.
\v 8 Erau sa tautauvata sara ko koya sa tea ki koya sa va suasuatakia: ia na tamata yadua ena rawatia na kenai sau me vaka na nona cakacaka.
\v 9 Ni da sa daucakacaka vata ki koya na Kalou; dou sa were ni Kalou, dou sa vale ni Kalou.
\p
\v 10 Me vaka na loloma ni Kalou sa soli mai vi au, me vaka na matai ni vale sa vuku. Au sa viritakia na yavu, a sa tara kina e dua tani. Ia na tamata yadua me sa lewa vinaka nai valavala ni nona tara kinia.
\v 11 Ni sa yali ni rawatia e dua na tamata me viritakia na yavu tani, ko ya lia sa viritaki tu, ko Jisu Karisito lia.
\v 12 Ia kevaka e dua na tamata sa tara cake e na yavu koya na koula, na siliva, na vatu talei, na kau, na co malai, se na vu-ni-sila;
\v 13 ena vatakilai na cakacaka ni tamata yadua: ni na vatakila mai na siga ko ya, ni na vatakilai e na bukawaqa; ia ena vatovolei e na bukawaqa na cakacaka ni tamata yadua se sa vaevei na kenai valavala.
\v 14 Kevaka sa tu dei na nona cakacaka e dua na tamata, sa tara cake ko koya, ena rawatia na kenai sau.
\v 15 Kevaka ena vakamai na nona cakacaka e dua, ena yali vua na kenai sau; ia ko koya lia ena va bulai; ia sa na vaka lia na bula mai na bukawaqa.
\p
\v 16 Dou sa yali beka ni kila ni dou sa vale ni Kalou, ka sa tiko vi ikodou na Yalo ni Kalou?
\v 17 Kevaka e dua na tamata sa va rusa na vale ni Kalou, ena va rusai koya na Kalou; ni sa savasava na vale ni Kalou, ia sai ikodou koya.
\p
\v 18 Me kakua e dua e vaisini koya vakai koya. Kevaka e dua vi ikodou sa nanumia sa vuku vavuravura, me sesewa mada o koya me vuku mai kinia.
\v 19 Ni sa ka sesewa vua na Kalou na vuku ni vuravura koya. Ni sa volai, Sa rawai ira na vuku o koya e na nodra i lawaki.
\v 20 Ka vaka voki, Sa kila o Jiova na nodra nanumia na vuku, ni sa yali ni yaga.
\p
\v 21 Ko koya koya me kakua kinia e dua me vosa doudou e na vukudra na tamata. Ni sa nomudou na ka kece lia;
\v 22 se o Paula, se o Apolosa, se o Kifa, se o vuravura, se na bula, se na mate, se na vi ka sa tu ni kua, se na vi ka ena yaco emuri; koya kece lia sa nomudou;
\v 23 ia dou sa nei Karisito; ia sa nei koya na Kalou na Karisito.
\c 4
\cl Wase 4
\p
\v 1 Me vasami kitou na tamata yadua, ni itatou sa nona tamata cakacaka na Karisito, ki nai talatala e na vik a vuni ni Kalou.
\v 2 Ia koya sa kilikili ki ira nai talatala, me ra laurai ni ra tamata dina.
\v 3 Ia sa ka lailai sara vii au mo dou lewai au, se me ra lewai au na tamata; io, au sa yali dina ni lewai au vakai au.
\v 4 Niu sa yali ni kila e dua na ka kau sa cala kinia; ia kau sa yali ni vadonui kinia: ia sai koya lia na Turaga ka lewai au.
\v 5 O koya mo dou kakua ni lewa e dua na ka ni sa bera na kena gauna, dou wawa mada me qai mai na Turaga, ko koya ena varaitakia na vi ka ni butobuto sa vuni tu, ena va votuya voki lia na nanumia ni yaloda: ia ena qai dokai na tamata yadua mai vua na Kalou.
\p
\v 6 Ia na vi ka koya kau sa vaibalebaletakia vi kirau ki Apolosa ena vukumudou, na viwekani; mo dou vatavulici kinia mai vi kirau mo dou kakua ni uasivia na ka sa volai tu, mo dou kakua kinia ni doka cake e dua, ka becia e dua.
\v 7 Io, o cei sa qisi iko mo uasivi cake? Se cava sa tu vi iko sa yali ni soli vi iko? Ia kevaka sa soli vi iko, ko sa dokai iko kinia ena vuku ni cava, me vaka sa yali ni soli vi iko?
\p
\v 8 Dou sa qai mamau dou sa qai vutuniyau, dou sa lewa vaka na tui ni itatou sa takali: ia kau sa vinakatia kevaka dou sa lewa dina, me da lewa vata voki lia ki ikodou.
\v 9 Ni kau sa nanumia sa lesi itatou nai apositolo na Kalou me itatou muri sara, me itatou vataki ira era sa lesi me mate: ni itatou sa varaitakia i vuravura, vi ira voki lia na agilose, ki ira na tamata.
\v 10 Itatou sa lialia e na vuku i Karisito, ia koi ikodou dou sa vuku ni dou sa tu vata kei Karisito; itatou sa malumalumu, ia dou sa kaukauwa; dou sa va rokorokotaki, ia itatou sa beci.
\v 11 Ka yacovia na gauna koya itatou sa viakana, ka viasomi, ka televua, ka sa vamavoataki, ka yali na nitou i tikotiko;
\v 12 itatou sa oca, ni itatou sa daucakacaka e na liga i itatou: ni itatou sa vasewasewani, itatou sa vosa vinaka; ni itatou sa vacacani, itatou sa vosotia:
\v 13 ni itatou sa vosa vacacataki, itatou sa va mamasu lia: itatou sa yaco me vaka na soqosoqo ni vuravura koya, io, na duka sa quarakia mai na ka kece lia, ka yacovia na siga nikua.
\p
\v 14 Au sa yali ni vola na vika koya meu vamaduataki ikodou, ia kau sa va tavulici ikodou ni dou sa vataki ira na noqu gone ni toko.
\v 15 Ia kevaka sa udolu vakatini na nomudou i vavuvuli vi Karisito, sa yali ni lewe levu na tamamudou; niu sa va tuburi ikodou mo dou nei Karisito Jisu e nai tukutuku-vinaka.
\v 16 O koya kau sa masuti ikodou kinia, mo dou va vadamurimuri au.
\v 17 Au sa talai Timoci vi ikodou e na vuku ni ka koya, o koya na noqu gone ni toko ka yalodina e na Turaga, ia ena va nanumi ikodou o koya e na noqu i valavala vei Karisito, me vaka na ka kau sa vatavulicia e na viyasana kece lia e na visoqosoqo lewe ni lotu kece lia.
\p
\v 18 Sa viavialevu ko ira eso, me vaka niu na yali ni qai yani vi ikodou.
\v 19 Ia kau na qai va totolo vi ikodou, kevaka sa vinakatia na Turaga, ia kau na yali ni kila na nodra vosa era sa viavialevu, na kena kaukauwa voki lia.
\v 20 Ni sa yali ni ka ni vosa lowa lia na matanitu ni Kalou, sa ka lia ni kaukauwa.
\v 21 A cava dou sa vinakatia? Meu qai vi ikodou niu sa tara na motu, se meu qai e na loloma, kei na yalo malua?
\c 5
\cl Wase 5
\p
\v 1 Sa rogo sara ni sa dua vi ikodou sa dauyalewa, ia na dauyalewa vaka ko ya sa yali ni vosatakia vi ira era sa yali ni lotu, ni sa dua sa tauria na wati i tamana.
\v 2 Ia dou sa viavialevu, ka yali ni tagicakia, me dai tani kinia vei ikodou ko koya sa caka na ka koya.
\v 3 Ia koi au, niu sa yali vayago, ia sa tiko vata kei ikodou na yaloqu, au sa lewai koya sa caka na ka koya, me vaka kau sa tiko kinia,
\v 4 e na yaca ni noda Turaga ko Jisu Karisito, ni dou sa soqoni vata tu, kei na yaloqu, kei na kaukauwa ni noda Turaga ko Jisu,
\v 5 me soli koya sa va koya vi Setani me va rusai kinia na yagona, me vabulai na yalona e na siga ni Turaga ko Jisu.
\p
\v 6 Sa yali ni vinaka na nomudou vosa doudou. Dou sa yali beka ni kila sa dauvalevenitakia nai buli taucoko na leveni lailai?
\v 7 O koya mo dou qai dainia tani na leveni makawa, mo dou yaco rawa kinia mei buli vou, me vaka dou sa yali ni va levenitakia. Ni sa vamatei oti e na vukuda na noda qai-sivia, io na Karisito.
\v 8 O koya meda qai ia na soqoni, me kakua lia e na leveni makawa, se na leveni ni yaloca, kei nai valavala ca; e na yalosavasava lia kei na yalodina sa yali ni va leveni.
\p
\v 9 Au a vola vi ikodou e nai vola mo dou kakua ni dautiko vata kei ira na dauyalewa:
\v 10 ia ka sa yali lia vi ira na dauyalewa ni vuravura koya, se vi ira na daukocokoco, se na daukovekove, se na dausoro ki na matakau, ni sa rawa lia koya kevaka dou qai tani e vuravura.
\v 11 Ia koya lia, kau sa vola vi ikodou, mo dou kakua ni dautiko vata kei na dua sa vatokai me wekada, o koya sa dauyalewa tiko, se daukocokoco, se dausoro ki na matakau, se dauveivasewasewani, se daumateni, se daukovekove: mo dou kakua ni kana vata kaya sa vakinia.
\v 12 Sa noqu i tavi li meu lewai ira era sa yali ni curu? Ia ko ira era sa curu dou sa lewa se yali?
\v 13 Ia ko ira sa yali ni curu sa lewa na Kalou. O koya mo dou qai dainia tani vi ikodou na tamatai valavala ca koya.
\c 6
\cl Wase 6
\p
\v 1 E dua beka vei ikodou sa doudou, ni rau sa veicudruvi kei na dua tani, me rau qai lewai e na matadra na tawa-yalododonu, ka me kakua lia e na matadra na lotu?
\v 2 Dou sa yali beka ni kila ni na lewai ira na kai vuravura ko ira era sa lotu? Ia kevaka dou na lewai ira na kai vuravura, dou sa yali beka ni yaga mo dou lewa na ka lalai sara?
\v 3 Dou sa yali beka ni kila ni da na lewai ira na agilose? Ia ka yali ni valevu cake me da lewa na vi ka vavuravura koya?
\v 4 Ia kevaka dou sa ia na vilewai e na ka vavuravura, dou lesi ira kinia era sa dokai valailai sara e nai soqosoqo lewe ni lotu?
\v 5 Au sa vosa, mo dou madua kinia. E dina beka ni sa yali sara e dua vi ikodou sa vuku, me lewai ira rawa na wekana?
\v 6 A ra sa qai na viwekani me ra vilewai, io, e na matadra era sa yali ni vabautia?
\p
\v 7 Ia sa qai ka ca vaidina vi ikodou koya, ni dou sa dau yadia na ka ki na veilewai. E vaevei ni dou sa yali ni vosotia ni dou sa vacacani? E vaevei ni dou sa yali ni vosotia ni dou kovei?
\v 8 Ia koi ikodou, dou sa dauvivacaca, dou sa daukovekove, io, vi ira na wekamudou.
\p
\v 9 Dou sa yali beka ni kila, ni na yali ni rawatia na matanitu ni Kalou ko ira sa yali ni yalododonu? Dou kakua ni vaisini ikodou: o ira na daudara, ki ira na dausoro ki na matakau, ki ira na dauyalewa, ki ira na viavia vaka na yalewa, kei ira na vimoceri vatagane,
\v 10 ki ira na daubutako, ki ira na daukocokoco, ki ira na daumateni, ki ira na dauveivakasewasewani, ki ira na daukovekove, era na yali ni rawa na matanitu ni Kalou.
\v 11 Ia dou sa vaka kinia eliu koi ikodou eso: ia dou sa sili, dou sa vasavasavataki, dou sa vadonui, e na yaca ni Turaga ko Jisu Karisito, ki na Yalo ni noda Kalou.
\p
\v 12 Sa tara vi au na ka kece lia, ia ka sa yali ni yaga na ka kece lia; sa tara vi au na ka kece lia, ia kau na yali ni dainia me rawai au e dua na ka.
\v 13 Sa ka ni kete na kakana, ka sa ka ni kakana na kete: ia ena varusai rau ruarua na Kalou. Ia na yago sa yali ni ka me daudara, ia me nei koya lia na Turaga; ka sa yaga na Turaga ki na yago.
\v 14 Ia na Kalou ka vaturia cake na Turaga, ena va turi ita cake voki lia, e na nona kaukauwa.
\p
\v 15 Dou sa yali beka ni kila ni sa veitiki i Karisito na yagomudou? Ia meu yadia beka na veitiki i Karisito, ka caka me veitiki i koya na yalewa dautagane? Me kakua sara.
\v 16 E vaevei? Dou sa yali beka ni kila, o koya sa vitau kei na yalewa dautagane erau sa yago e dua bau? Ni sa kaya o koya, Oi rau na lewe rua, erau na yago e dua bau.
\v 17 Ia ko koya sa kabitia na Turaga erau sa yalovata.
\p
\v 18 Dou tuba tani mai na daudara. Sa ka e taudaku ni yago nai valavala ca kece lia sa caka na tamata, ia o koya sa daudara sai valavala ca ki na yagona.
\v 19 E vaevei? Dou sa yali beka ni kila ni sa vale ni Yalo Tabu na yagomudou, o koya sa curumi ikodou, o koya dou sa rawatia mai vua na Kalou, ia dou sa yali ni nomudou?
\v 20 Ni dou sa voli e nai voli; o koya ko ya mo dou qai varokorokotakia na Kalou, e na yagomudou.
\c 7
\cl Wase 7
\p
\v 1 Ia e na vuku ni vika dou sa volavola kinia vi au: Sa vinaka vua na tagane me kakua ni viyacovi kei na yalewa.
\v 2 Ia me kakua ni ia na vibutakoci, me sa bau vawati na tagane yadua, ka me sa bau vawati na yalewa yadua.
\v 3 Me ia vua na yalewa na tagane na ka sa dodonu e na vilomani: me vaka voki lia kinia na yalewa vua na tagane.
\v 4 Sa yali ni vitaliatakia na yagona na yalewa sa vakawati, sa lewa lia na watina: a sa vaka voki lia kinia sa yali ni vitaliatakia na yagona na tagane sa vakawati, sa lewa lia na watina.
\v 5 Dou kakua ni tarovia na viyacovi vakai ikodou, me ia lia ni sa vinakatia ruarua e na gauna lekaleka, mo dou lalaga ki na lolo kei na masu; ia dou qai viyacovi voki, de dauveretaki ikodou o Setani e na vuku ni nomudou dauveidomoni.
\p
\v 6 Ia kau sa tukunia koya, ni sa tara tu e yali ni sa varoti.
\v 7 Ia kau sa vinakatia me vataki au na tamata kece lia: ia sa rawatia mai vua na Kalou na tamata yadua nai solisoli e dui yaga, e dua sa vaka koya, e dua tani sa vaka ko ya.
\p
\v 8 Ia kau sa vosataki ira sa yali ni vawati kei ira na yada, E yaga vi ira me ra tiko vakinia me vataki au:
\v 9 ia kevaka era sa dredre ni tarovi ira, me ra vawati: ni sa vinaka na vawati ka ca me daugagano.
\p
\v 10 Ia kau sa vosataki ira sa vawati tiko, ia ka sa yali ni vakai au, na Turaga lia, Me kakua ni dainia na watina na yalewa sa vawati:
\v 11 (ia kevaka sa tuba, me kakua ni vawati voki ko koya, se me rau vivinakati voki kei na watina;) ia na tagane sa vawati me kakua voki lia ni dainia na watina.
\p
\v 12 Ia vi ira lia sa vo kau sa kaya vakai au, sa yali na Turaga: Kevaka e dua na wekada, sa yali ni lotu na watina, a sa via tiko vata kaya na watina, me kakua ni dainia tani.
\v 13 Kevaka sa loma ni tagane yali ni lotu me rau tiko vata kei na watina, me kakua ni tubataki koya na yalewa.
\v 14 Ni sa vasavasavatakia na tagane yali lotu na watina, a sa vasavasavatakia voki lia na yalewa sa yali ni vabautia ko koya na watina; ia kevaka sa yali ni vaka koya, era sa tawa-savasava na nomudou gone; ia koya, era sa savasava.
\p
\v 15 Ia kevaka sa tuba ko koya sa tawa lotu, me tuba lia. Me qai veitalia lia na tagane se na yalewa sa lotu ni sa vaka koya: ia sa kacivi ita na Kalou me da tiko vacegu lia.
\v 16 Ko sa kila vaevei, o iko na yalewa se ko na vabula na watimu, se yali? Se ko sa kila vaevei, o iko na tagane, se ko na vabula na watimu, se yali?
\p
\v 17 Ia me vaka sa solia yadua vei ira na tamata na Kalou, me vaka na nona tiko ni sa kacivi koya na Turaga, me tiko lia va kinia. Au sa lewa me va kinia e na visoqosoqo lewe ni lotu kece lia.
\p
\v 18 Kevaka e dua sa kacivi ni sa cili me kakua ni dainia na cili. Ke dua sa yali ni cili ni sa kacivi, me kakua ni cilivi.
\v 19 A ka loa lia na cili, a ka lowa lia voki lia na tawa cili, ia sa yali ni vaka kinia na talairawarawa ki nai vakaro ni Kalou.
\v 20 Me tiko lia na tamata yadua me vaka na nona tiko ni sa kacivi.
\v 21 O sa bobula beka ni ko sa kacivi? Kakua ni vuturi kinia: ia kevaka e rawa mo sereki, mo vayagatakia lia.
\v 22 O koya sa bobula ni sa kacivi koya na Turaga sa qai nona tamata sere na Turaga; sa vaka voki lia kinia ko koya sa lalaga ni sa kacivi, sa bobula vi Karisito.
\v 23 Dou sa voli lia e nai voli; dou kakua lia ni nodra bobula na tamata.
\v 24 Na veiwekani, me tiko na tamata yadua kei na Kalou, e nai tutu sa tiko kinia ni sa kacivi.
\p
\v 25 Ia e na vukudra era yali ni vawati, sa yali ni tu vei au nai vakaro ni Turaga: ia kau sa lewa vakai au lia, me vaka e dua sa rawatia na loloma ni Turaga meu dina kinia.
\v 26 A ka koya kau sa nanumia sa yaga e na gauna ni ca koya, me tiko lowa lia na tamata sa va kinia.
\v 27 Sa dua beka na watimu ko sa vauci kinia? Kakua ni va tovolea mo sereki voki. Sa yali beka ni dua na watimu, ko sa vauci kinia? Kakua ni vasaqara e dua me watimu.
\v 28 Ia kevaka ko sa ia na vawati, ko sa yali ni cala kinia; ia kevaka sa ia na vawati e dua na goneyalewa, sa yali ni cala kinia. Ia ko ira sa vaka koya ena va rarawataki na yagodra: ia koi au, au sa lomani ikodou.
\p
\v 29 Ia na ka koya kau sa tukunia, oi ikodou na viwekani, Sa valekalekataki na gauna sa vo: ia koya me ra vataki ira era sa yali ni vawati ko ira na tagane sa vawati:
\v 30 kei ira era sa tagi, me ra vataki ira era sa yali ni tagi: kei ira era sa reki, me ra vataki ira era sa yali ni reki; kei ira era sa veivoli, me ra vakataki ira sa yali na nodrai yau;
\v 31 kei ira era sa vayagatakia na vi ka ni vuravura koya, me ra vakataki ira era sa yali ni vayagatakia vakaca: ni sa qai tani yani nai valavala ni vuravura koya.
\p
\v 32 Ia kau sa vinakatia mo dou kakua ni lomaocaoca. Na tagane sa yali ni vawati sa daunanumia lia na vi ka ni Turaga, se me vinaka vaevei vua na Turaga:
\v 33 ia na tagane sa vawati sa daunanumia ki na vi ka ni vuravura koya, me vayalovinakataki koya vaevei na watina.
\v 34 Sa dua tani na goneyalewa kei na yalewa sa vawati. A yalewa sa yali ni vawati sa daunanumia ki na vi ka ni Turaga, me savasava tiko na yagona kei na yalona voki lia: ia na yalewa sa vawati sa daunanumia ki na vi ka ni vuravura, se na vinakati koya vaevei na watina.
\v 35 Ia na ka koya kau sa tukunia me yaga vi ikodou; au sa yali ni via vataotaki ikodou, au tukunia lia na ka sa kilikili kei ikodou, mo dou dauqaravia na Turaga ka yali ni lomaocaoca.
\p
\v 36 Ia kevaka e dua na matua sa nanumia sa yali ni lewa vinaka e na vuku ni luvena-yalewa, kevaka sa oti na gauna ni gone, a sa dredre ni tiko loa lia, me vitalia lia; sa yali ni cala ko koya: me ra vawati.
\v 37 Ia ko koya sa dei sara na lomana, a sa yali ni dredre vua me tiko loa lia, a sa rawatia lia na yalona, ka sa lewa lia e na yalona me tauria tiko na luvena-yalewa, sa caka vinaka.
\v 38 Sa qai va koya, o koya sa solia na luvena-yalewa me vawati sa caka vinaka lia; ia ko koya sa yali ni solia me vawati sa caka vinaka cake.
\p
\v 39 Sa vaucia na yalewa na lawa, ni sa bula tiko na watina; ia kevaka sa mate na watina, sa qai tara vua me vawati voki ki na tagane sa vinakatia ko koya; ka me ia lia ki koya sa nona na Turaga.
\v 40 Ia sa noqu lewa sa kalougata cake ko koya kevaka sa tiko lia vaka ko ya: ia kau sa vakasama voki lia ni sa tiko vei au na Yalo ni Kalou.
\c 8
\cl Wase 8
\p
\v 1 Ia e na vuku ni ka sa vacabori i na matakau, ita sa kila sa tu vi ita kece lia na vuku. Na vuku sa vu ni viavialevu, a loloma lia sa vu ni vatataki cake.
\v 2 Ia kevaka e dua sa nanumia sa kila e dua na ka, sa yali ni kila na ka me vaka e dodonu me kila.
\v 3 Ia kevaka e dua sa lomania na Kalou, sa kilai vua ko koya.
\p
\v 4 E na vuku ni kana ka sa vacabori ki na veimatakau, eda sa kila sa ka loa lia duadua lia e vuravura na matakau, a sa dua loa lia na Kalou ka yali voki e dua tani.
\v 5 Io, sa dina sa tu na vi ka sa vatokai me kalou, mai lomalagi se e vuravura, me vaka ni ra sa lewe levu na Kalou, ka lewe levu voki lia na turaga,
\v 6 ia vei ita sa dua lowa lia na Kalou, na Tamada sa vu vi koya na ka kece lia, eda sa nona lia koi ita; a sa dua loa lia na Turaga ko Jisu Karisito, sa caka kinia na ka kece lia, ia koi ita e na vukuna.
\p
\v 7 Ia ka sa yali ni nodra kece lia na tamata na vuku koya: io, sa so era sa nanumia sa dina na matakau, a ra sa kania me vaka sa vacabori ki na matakau, a sa dukadukali kinia na yalodra ni sa malumalumu.
\v 8 Ia na kakana sa yali ni ka ita vinaka kinia vua na Kalou: ia kevaka ita sa kana, ita sa yali kinia ni vinaka cake; kevaka ita sa yali ni kana, ita sa yali kinia ni ca sobu.
\v 9 Ia mo dou raicia vinaka de yaco na nomudou vitalia va koya me ka era tarabe kinia ko ira era sa malumalumu.
\v 10 Ia kevaka e dua sa raici iko sa tamata vuku ni ko sa tiko e na vale ni matakau mo kana, ena qai yali ni doudou cake kinia na loma i koya sa malumalumu me kania na vi ka sa va cabori ki na matakau?
\v 11 Ia na nomu vuku ena vu ni nona rusa na wekada sa malumalumu, sa mate kinia na Karisito.
\v 12 Ia ni dou sa cala va koya, vi ira na veiwekani, ka vacacania na lomadra sa malumalumu, dou sa cala vi Karisito.
\v 13 O koya, kevaka sa tarabe na wekaqu e na kakana, au na yali sara ni kania na lewe ni manumanu ka yali ni mudu, de tarabe e na vukuqu na wekaqu.
\c 9
\cl Wase 9
\p
\v 1 Au sa yali ni lalaga? Au sa yali ni apositolo koi au? Au a yali ni raici Jisu Karisito na noda Turaga? Oi ikodou, dou sa yali li ni noqu cakacaka e na Turaga?
\v 2 Kevaka kau sa yali ni apositolo vi ira eso tani, au sai apositolo dina vi ikodou: ni sai vadinadina niu sai apositolo na nomudou tu vata ki na Turaga.
\p
\v 3 Au sa tukunia va koya vi ira era sa tarogi au,
\v 4 Kitou sa yali beka ni vitalia me kitou kana, se somi?
\v 5 Kitou sa yali beka ni vitalia me kitou yadia tiko e dua na yalewa lotu, sa wati i kitou, me va taki ira nai apositolo tani, ki iratou na taci ni Turaga, kei Kifa?
\v 6 Se kirau lia kei Panapasa, kirau sa yali beka ni veitalia me kirau kua so ni cakacaka?
\v 7 O cei na sotia sa qai valu e na dua na siga, ka sa saumi koya vakai koya? O cei sa tea na were-ni-vaini, ka sa yali ni somia na vuana? Se ko cei sa vakania na qele-ni-sipi, ka sa yali ni somi e na wai-ni-sucu ni qele-ni-sipi?
\p
\v 8 Au sa vosatakia lia na vi ka ko ya me vaka lia na tamata? Sa yali beka ni tukunia vakinia na vunau?
\v 9 Ni sa volai e na vunau i Mosese, Mo kakua ni vaucia na gusu ni pulumokau ni sa buturakia na sila. Sa daunanumia beka na pulumokau na Kalou?
\v 10 Se sa vosa beka ko koya e na vuku i itatou lia? Io, sa volai koya e na vuku i itatou; ni sa dodonu me cuki were e nai nuinui ko koya sa daucuki; ki koya sa buturakia na sila me buturakia e nai nuinui ni na rawatia na ka.
\v 11 Kevaka itatou sa kaburakia oti vi ikodou na vi ka vayalo sa ka levu beka me itatou kumunia na nomudou vi ka vavuravura?
\v 12 Kevaka sa vitaliataki ikodou ko ira na tamata tani eso, e yali beka ni dodonu sara vi itaitou? Ia itatou sa yali ni vitalia va koya; itatou sa vosotia na ka kece lia, de itatou tarovia nai tukutuku vinaka Karisito.
\p
\v 13 Dou sa yali beka ni kila, ni ra sa kana e na ka ni vale-ni-soro ko ira sa dauia na cakacaka tabu? Era sa rawatia na kedra mai nai cabocabo-ni-soro ko ira era sa dauqaravia nai cabocabo-ni-soro?
\v 14 Sa lesia va kinia na Turaga me ra bula e nai tukutuku-vinaka ko ira era sa tukunia nai tukutuku-vinaka
\v 15 Ia kau sa yali ni vayagatakia e dua na ka koya; au sa yali voki lia ni vola na vi ka koya, me sa caka va kinia vi au: ni sa vinaka vei au meu mate, ka ca me dua e tarovia na ka kau sa dokai au kina.
\v 16 Ia kevaka kau sa vunautakia nai tukutuku-vinaka, sa yali na ka meu dokai au kinia: ni kau sa va saurarataki; io sa ca sara vi au, kevaka kau sa yali ni vunautakia nai tukutuku-vinaka!
\v 17 Ia kevaka kau sa caka na ka koya ni sa vinakatia na yaloqu, au sa saumia; ia kevaka ni sa yali ni vinakatia na yaloqu, sa qai soli vei au e dua na cakacaka vakaitalatala.
\v 18 A cava sa qai kenai sau vi au? Na noqu vunautakia nai tukutuku-vinaka meu kakua ni vaivolitakia, meu kakua ni caka me vaka sa dodonu vi au e nai tukutuku-vinaka.
\p
\v 19 Ni sa dina lia niu sa lalaga maivei ira kece lia na tamata, ia kau sa qisi au meu nodra bobula na tamata kece lia, meu rawai ira kinia na lewe vuqa.
\v 20 Ia kau sa yaco meu vaka e dua na Jiu vi ira na Jiu, meu rawai ira kinia na Jiu; vi ira sa vauci e na vunau, meu vaka e dua sa vauci e na vunau, ia kau sa yali ni vauci e na vunau, meu rawai ira kinia era sa vauci e na vunau;
\v 21 vi ira sa yali kinia na vunau, meu vaka e dua sa yali vua na vunau, meu rawai ira kinia sa yali vi ira na vunau, ia ka sa yali ni yali vi au na vunau ni Kalou, au sa muria lia na vunau i Karisito;
\v 22 vi ira era sa malumalumu kau sa yaco meu vaka e dua sa malumalumu, meu rawai ira kinia era sa malumalumu: au sa yaco meu ka kece lia vi ira kece lia na tamata meu va bula eso e na ka kece lia.
\v 23 Ia kau sa caka na ka kece lia e na vuku ni tukutuku-vinaka, meu rawa vata kinia ki ikodou na kenai sau.
\p
\v 24 Dou sa yali beka ni kila ni ra sa cici kece lia ko ira sa cicivia na cere, ia sa dua loa lia sa taucia na cere? Dou cici va kinia, mo dou taucia.
\v 25 Ia ko koya yadua sa via gumatua, sa tiko malua e na ka kece lia; ia era caka ko ira koya, me nodra e dua nai sala sa ca rawarawa; ia koi ita, me dua sa yali ni ca rawa.
\v 26 Au sa cici va kinia, ia sa yali ni vaka e dua e yali ni kila: au sa vacu va kinia, ia ka yali⁹ ni vaka e dua sa vacukia na cagi:
\v 27 ia kau sa va malumalumutakia na yagoqu, ka vabobulatakia, de dua na ka, niu sa vunau vi ira na tamata tani, au sa qai dai lowa lia tu.
\c 10
\cl Wase 10
\p
\v 1 Ia kau sa yali ni vinakatia, oi ikodou na viwekani, mo dou lecavia ni ra a tu e ruku ni o ko ira kece lia na noda matua, a ra sa qai kece lia e loma ni waitui:
\v 2 a ra sa papitaisotaki kece lia vi Mosese e na o ki na waitui;
\v 3 a ra sa kania vata kece lia na kakana vayalo;
\v 4 a ra sa somia vata kece lia na wai ni somi vayalo: ni ra sa somi mai na Vatu vayalo sa muri ira: ia na Vatu koya na Karisito.
\v 5 Ia sa lewe vuqa vi ira sa yali ni vinakati ira na Kalou; ni ra sa dui daidai e loma ni vikau.
\p
\v 6 Ia na vi ka koya sai vatakarakara vi ita, me da kakua kinia ni daugadrevia na vi ka ca, me vaka na nodra daugadrevia.
\v 7 Dou kakua voki lia ni qaravia na matakau, me vakataki ira eso; me vaka sa volai, Era sa tiko sobu na tamata me ra kana ka somi, a ra sa qai tu cake voki me ra qito.
\v 8 Me da kakua voki lia ni dauyalewa, me vaka era sa caka eso, a sa bale kinia e na siga e dua bau e lewe ruasagavulu ka mani tolu na udolu.
\v 9 Me da kakua voki lia ni dau vatovolei Karisito, me vaka era sa dau vatovolea eso, a sa kati ira na gata ka ra sa mate.
\v 10 Dou kakua voki lia ni daudidi, me vaka era sa didi eso a ra sa varusai e na dauvivarusai.
\p
\v 11 Ia na ka kece lia koya sa yaco vi ira mei va takarakara: a ra sa volai me da va tavulici kinia, oi ita sa yacovi ita nai va taotioti ni vigauna.
\v 12 O koya me qai varaici koya ko koya sa nanumia sa tu dei, de bale lia mai.
\p
\v 13 Sa yali na vere tani sa yaco vi ikodou, o koya lia sa voratia rawa na tamata: ia sa yalodina na Kalou o koya ena yali ni daini ikodou mo dou dauveretaki valevu cake, me vaka lia na nomudou kaukauwa; ka na caka voki lia kei na vere na sala mo dou tuba kinia, mo dou vosotia rawa.
\p
\v 14 O koya ko ya, koi ikodou sa lomani, mo dou tuba tani mai na qaravia na matakau.
\v 15 Au sa vosa me vaka vi ira na tamata vuku; dou lewa na ka kau sa tukunia.
\v 16 A bilo ni vavinavinaka kitou sa vatonakia, sa yali ni ka sa noda vata kinia na dra i Karisito? Ai buli madrai eda sa dovia, sa yali li ni ka sa noda vata kinia na yago i Karisito?
\v 17 Ni sa dua lowa lia na madrai, sa qai yagona e dua lowa lia koi ita e lewe vuqa, ni sa noda nai votavota ni madrai ko ya e dua lowa lia.
\p
\v 18 Dou raici ira na Isireli vakayago: ko ira era sa kania na vimadrali, sa yali li ni nodra nai votavota vata kei nai cabocabo-ni-soro?
\v 19 A cava na ka kau sa tukunia? Ni sa dua li na ka dina na matakau, se na ka dina na ka sa vacaboria ki na matakau?
\v 20 Ia na vi ka era sa va caboya ko ira era sa yali ni lotu, era sa va caboya vi ira na tevoro, a sa yali lia vua na Kalou: ia kau sa yali ni vinakatia mo dou votai vata kei ira na tevoro.
\v 21 Dou sa yali ni somja rawa na bilo ni Turaga, kei na nodra bilo voki lia na tevoro: dou sa yali ni kana rawa e na tepeli ni Turaga, kei na nodra teveli voki lia na tevoro.
\v 22 Eda vacudruya na Turaga, ne? Eda sa uasivi beka vua e na kaukauwa?
\p
\v 23 Sa tara lia vi au na ka kece lia, ia sa yali ni yaga na ka kece lia: sa tara na ka kece lia, ia sa yali ni ka ni va tataki cake na ka kece lia.
\v 24 Me kakua e dua me qara na ka sa yaga duadua lia vi koya, a ka kece voki lia sa yaga vi koya na tani.
\v 25 A ka kece lia sa volitaki e na rara ni vivoli, mo dou kania, ka kua ni tarogia e dua na ka e na vuku ni lewa-eloma:
\v 26 ni sa nona na Turaga ko vuravura, kei na ka kece lia sa sinai kinia.
\v 27 Kevaka e dua sa yali ni lotu sa sureti ikodou, ka dou sa vinakatia me qai, dou kania lia na ka kece lia sa tauci e matamudou, ka kua ni tarogia e na vuku ni lewa-eloma.
\v 28 Ia kevaka e dua sa tukunia vi ikodou, koya sa vacabori ki na vimatakau, dou kakua ni kania e na vuku i koya sa tukunia, e na vuku ni lewa-eloma voki lia:
\v 29 au sa cavutia na lewa-eloma, ia ka sa yali ni nomu, a nona lia na tani: ni sa lewai vacava na noqu veitalia e na lewa-eloma ni dua tani?
\v 30 Ia kevaka kau sa kana ka vavinavinakatakia kinia, meu sa vosavacacataki e na vuku ni cava e na ka kau sa va vinavinakatakia kinia?
\p
\v 31 O koya lia, se dou kana, se dou somi, se cava na ka dou sa caka, mo dou caka kece lia me varokorokotaki kinia na Kalou.
\v 32 Dou kakua ni vacala e dua, vi ira na Jiu, se vei ira na lewe ni vimatanitu tani, se vei ira nai soqosoqo lewe ni lotu ni Kalou:
\v 33 me vaka kau sa caka na ka kece lia me vinakatia ko ira na tamata kece lia, ia kau sa yali ni qara na ka sa yaga duadua lowa lia vei au, na ka voki lia sa yaga vi ira na lewe levu, me ra va bulai kinia.
\c 11
\cl Wase 11
\p
\v 1 Dou vadamurimuri au, me vaka kau sa muri Karisito.
\p
\v 2 Ia kau sa dokai ikodou, na viwekani, ni dou sa nanumi au e na ka kece lia, ka vabautia nai vavuvuli, me vaka kau a solia vi ikodou.
\v 3 Ia kau sa vinakatia mo dou kila ni sa ulu ni tamata yadua na Karisito; ia na ulu ni yalewa na tagane; ki na ulu i Karisito na Kalou.
\v 4 A tagane yadua, sa masu se parofisai, ni sa ubi na uluna, sa yali ni doka na uluna.
\v 5 Ia na yalewa yadua sa masu se parofisai ni sa yali ni ubi na uluna, sa yali ni doka na uluna: ni sa tautauvata lia ni sa tasi.
\v 6 Ia kevaka sa yali ni ubi na yalewa, me tasi voki lia: ia kevaka sa ka ni vivamaduataki me koti na yalewa se tasi, me qai ubi.
\v 7 Ni sa yali sara ni dodonu vua na tagane me ubia na uluna ni sai yaloyalona ki na kenai ukuuku ni Kalou ko koya: ia na yalewa nai ukuuku ni tagane.
\v 8 Sa yali ni vu mai vua na yalewa na tagane; sa vu mai vua na tagane na yalewa.
\v 9 Ni sa yali ni buli na tagane me nona na yalewa; sa buli lia na yalewa me nona na tagane.
\v 10 O koya ko ya sa dodonu kinia me tu nai ubi e na ulu ni yalewa mei va takilakila ni kena malumalumu, e na vukudra na agilose.
\p
\v 11 Ia sa yali ni tu duadua lia na tagane ka me tu tani na yalewa, se tu duadua lia na yalewa me tu tani na tagane e na Turaga.
\v 12 Ni sa vu mai vua na tagane na yalewa, sa vaka voki lia kinia na tagane e na vuku ni yalewa; ia sa vu mai vua na Kalou na ka kece lia.
\v 13 Dou lewa vakai ikodou: sa kilikili kaya na yalewa li me yali ni ubi ni sa masu vua na Kalou?
\v 14 Sa yali ni vavulici ikodou na nodai tovo va tamata, kevaka sa balavu na drau ni uluna na tagane, sa ka ni vivamaduataki vua?
\v 15 Ia kevaka sa balavu na drau ni uluna na yalewa, sa nonai ukuuku lia: ni sa soli vua na drau ni uluna me kenai ubi?
\p
\v 16 Ia kevaka sa via dauveileti e dua, sa yali ni nitou i valavala koya, se na nodra na visoqosoqo lewe ni lotu ni Kalou.
\p
\v 17 Ia niu sa varotia tiko koya, au sa yali ni dokai ikodou, ni dou sa yali ni vinaka cake ni dou sa soqoni vata, ia dou sa ca sobu kinia.
\v 18 Io, na kenai matai, ni dou sa soqoni vata vaisoqosoqo lewe ni lotu, au sa rogocia ni dou sa dauvisei; ia kau sa vadinatia eso:
\v 19 ni sa dredre me yali ni tubu na dauviba vei ikodou me rairai kinia ko ira vi ikodou era sa vinakatia.
\v 20 Ia ni dou sa soqoni vata e na dua na yasana, dou sa yali ni ia dina nai varaiyavi ni Turaga.
\v 21 Ia ni dou sa kana, dou sa dui kania yadua eliu na kenai varaiyavi: a sa viakana kinia e dua ka mateni e dua.
\v 22 Oi? Sa qai yali beka na nomudou vivale mo dou kana ka somi kinia? Se dou va maduataki ira beka sa yali na nodra, ka becia nai soqosoqo lewe ni lotu ni Kalou? A cava meu tukunia vi ikodou? Meu dokai ikodou li e na ka koya? Au sa yali ni dokai ikodou.
\p
\v 23 Niu a rogocia mai vua na Turaga na ka kau a tukunia voki lia vi ikodou, Ni sa tauria nai buli madrai na Turaga ko Jisu e na bogi sa soli yani kinia ko koya:
\v 24 ia ni sa vavinavinaka oti sa dovia, ka tukunia: koya na yagoqu sa dovi e na vukumudou; caka koya mo dou vananumi au kinia.
\v 25 Sa vaka voki lia kinia na bilo, ni sa kania oti nai varaiyavi ko koya, sa tukunia, Na bilo koya na viyalayalati vou e na noqu dra; e na gauna kece lia dou sa somia kinia, dou caka koya mo dou vananumi au kinia.
\v 26 Io, e na gauna kecelia dou sa kania kinia na madrai koya, ka somia na bilo koya, dou sa vatakila kinia na nona mate na Turaga, ka yacovia na siga ena qai voki mai kinia.
\p
\v 27 Ia ena tarogi kinia e na vuku ni yago ni Turaga ki na nona dra, o koya yadua ena kania na madrai koya, ka somia na bilo ni Turaga, ka yali ni doka.
\v 28 Ia me dikevi koya mada na tamata vakai koya, me qai kania na madrai koya, ka somi e na bilo koya.
\v 29 Ni sa kania ka somia na nona cudruvi ko koya sa kania ka somia ka yali ni doka, ni sa yali ni kila na yago ni Turaga.
\v 30 E na vuku ni ka koya sa lewe levu kinia vi ikodou sa malumalumu ka tauvi-mate, ka lewe levu sa moce.
\v 31 Ia, kevaka eda sa lewai ita, eda na yali ni lewai.
\v 32 Ia ni da sa lewai, sa qai cudruvi ita na Turaga, me da kakua kinia ni lewai me cudruvi vata kei ira era sa vavuravura.
\p
\v 33 O koya koya ikodou na wekaqu, ni dou sa soqoni vata mo dou kana, dou viwaraki mada.
\v 34 Ia kevaka e dua sa viakana, me kana lia mai vale; mo dou kakua kinia ni soqoni vata mo dou cudruvi. Ia na ka sa vo kau na vadodonutakia niu sa qai yani.
\c 12
\cl Wase 12
\p
\v 1 Ia e na vuku ni vi ka vayalo, oi Ikodou na veiwekani, au sa yali ni vinakatia mo dou yali ni kila.
\v 2 Dou sa kila ni dou a tiko yali lotu, dou sa yadi yani ki na vimatakau galu, me vaka ni dou sa tuberi voli vaka ka vaka.
\v 3 O koya ko ya kau sa vatakila kinia vi ikodou, ni sa yali e dua na tamata sa vosa e na Yalo ni Kalou, me sa vosavacacataki Jisu: a sa yali e dua sa tukunia rawa ni sa Turaga ko Jisu, ke yali ni vuna na Yalo Tabu.
\p
\v 4 Ia sa duidui na ka sa soli, ia sa dua bau lia na Yalo Tabu.
\v 5 Sa duidui voki lia na kena cakacaka, ia sa dua loa lia na Turaga.
\v 6 Sa uidui voki lia nai valavala ni ka sa caka, ia sa dua loa lia na Kalou, o koya sa caka na ka kece lia vi ira kece lia.
\p
\v 7 A sa soli vi ira na tamata yadua nai vatakilakila ni Yalo Tabu me yaga kinia.
\v 8 Sa soli vua e dua e na cakacaka ni Yalo Tabu na vosa ni vuku; vua voki e dua na vosa ni kila ka, e na cakacaka voki lia ni Yalo Tabu;
\v 9 vua voki e dua na vadinatia, e na cakacaka voki ni Yalo Tabu; vua voki e dua nai solisoli me vabulai ira sa tauvi-mate, e na cakacaka voki lia ni Yalo Tabu;
\v 10 vua voki e dua me caka na ka mana; vua voki e dua me parofisai; vua voki e dua me kila na viyalo; vua voki e dua na vosa tani eso; vua viki e dua me lavetia na vosa tani eso:
\v 11 ia na Yalo Tabu e dua bau lia sa caka na ka kecelia koya, ni sa vota vi ira na tamata yadua me vaka sa vinakatia ko koya.
\p
\v 12 Me vaka sa dua bau lia na yago, ka sa vuqa na kena tikinia, ia na tiki ni yago kece lia, sa levu lia, ka sa dua loa lia na yago: sa vaka voki lia kinia na Karisito.
\v 13 Ni da sa papitaisotaki kece lia ki na yago e dua loa lia e na Yalo Tabu e dua bau lia, se da kai Jutia se da kai tani, se da bobula se dai taukei; eda sa va somi voki lia e na Yalo Tabu e dua bau lia.
\p
\v 14 Ni sa yali ni dua lowa lia na tikina e na yago, sa levu lia.
\v 15 Kevaka ena tukunia na yava, Oi au, kau sa yali ni tiki ni yago, niu sa yali ni liga; sa yali ni ka koya sa yali kinia ni tiki ni yago.
\v 16 Ia kevaka ena tukunia na daliga, Oi au, kau sa yali ni tiki ni yago, niu sa yali ni mata; sa yali ni ka koya sa yali kinia ni tiki ni yago.
\v 17 Kevaka sa mata na yago taucoko, ena qai evei na ka me rogo kinia? Kevaka e ka ni rogo na tikina kece, ena qai evei na ka me boi kinia?
\v 18 Ia koya, sa caka na Kalou na vitiki ni yago me tu yadua, me vaka na nona lewa.
\v 19 Ia kevaka sa dua loa lia na tikina kece lia, ena qai evei na yago?
\v 20 Ia koya, sa vuqa na tikina, a sa dua bau lia na yago.
\v 21 A sa yali ni kaya rawa na mata ki na liga, Ko sa yali ni yaga vi au; se na ulu ki na yava, Drau sa yali ni yaga vi au.
\v 22 Ia sa vakalevu cake voki oqori, a vitiki ni yago eda sa nanumia ni ra sa malumalumu, era sa yaga sara:
\v 23 ia na vitiki ni yagoda, eda sa nanumia sa matavinaka valailai, oqori eda sa va iukuukutakia vakalevu cake: ia na vitikida sa yali ni lagilagi sa va lagilagitakia valevu cake.
\v 24 Ni sa yali ni yaga ki na vitikida sa lagilagi vakai ira: ia na Kalou sa caka me virauti na vitiki ni yago, a sa lewa me nanumi valevu cake oqori sa uasivi sobu:
\v 25 me kakua kina ni veisei na yago; ka me veinanumi vatautauvata na veitikina vakai ira.
\v 26 Ia kevaka sa rarawa e dua na tikina, sa rarawa vata na tikina kece lia; se dua na tikina sa dokai, sa reki vata na tikina kece lia.
\p
\v 27 Ia koi ikodou na yago i Karisito, ka dui tikina yadua kinia.
\v 28 A sa lesi ira eso na Kalou e nai soqosoqo lewe ni lotu, a kenai matai ko ira nai apositolo, ai karua na parofita, ai katolu nai vavuvuli, sa qai muri ko ira sa daucaka-mana, ki ira, sa soli vei ira me ra vabula na tauvi-mate, ko ira era vivuke, ko ira era lewa, ko ira era kila na vosa tani eso.
\v 29 Era sai apositolo kece lia? Era sa parofita kece lia? Era sai vavuvuli kece lia? Era sa daucaka-mana kece lia?
\v 30 Era sa rawatia kece lia nai solisoli me ra vabula na tauvi-mate? Era sa vosa kece lia e na vosa tani e vuqa? Era sa lave vosa li ko ira kece lia?
\p
\v 31 Ia dou gadrevia vakalevu na visolisoli vinaka sara: ia kau sa vatakila vi ikodou nai valavala sa uasivi cake na kena vinaka.
\c 13
\cl Wase 13
\p
\v 1 Kevaka kau sa vosatakia na nodra dui vosavosa na tamata ki na vosa ni agilose, ka yali vei au na loloma, au sa vaka lowa lia na kaukamea sa rorogo, se na lali sa tataqiriqiri.
\v 2 Ia kevaka kau sa parofisai rawa, ka kila voki lia na ka kece lia sa vuni, ki na vuku kece lia; ia kevaka sa tu vi au na vakabauta kece lia, meu yadia tani kina na viulu-ni-vanua, ka yali vi au na loloma, au sa ka loa lia.
\v 3 Ia kevaka kau sa vota na noqu ka kece lia, meu vakani ira kinia na dravudravua, ia kevaka kau sa solia na yagoqu meu vayavui, ka sa yali vei au na loloma, sa yali ni yaga vi au.
\p
\v 4 Sa dau vosotia vadede na loloma, sa yalovinaka; sa yali ni vuvu na loloma; sa yali ni vosa doudou na loloma, sa yali ni viavialevu,
\v 5 sa yali ni caka na ka sa yali ni kilikili kaya, sa yali ni qara na ka me nona lia, sa yali ni cudrucudru, sa yali ni daulomaca;
\v 6 sa yali ni rekitakia na ca, ia sa rekitakia na dina;
\v 7 sa ubia na ka kece lia, sa vabautia na ka kece lia, sa vanuinuitakia na ka kece lia, sa vosotia na ka kece lia.
\p
\v 8 Sa yali ni mudu na loloma: ia na parofisai, ena takali lia; na vosa tani e levu, ena mudu lia; na vuku, ena takali lia.
\v 9 Ni da sa kila vatikinia lia, ia eda sa parofisai vatikinia lia.
\v 10 Ia ni sa yaco na ka taucoko, ena qai takali na ka sa vatikinia lia.
\v 11 Niu a gone, au a dau vosa me vaka na gone, au a kila ka me vaka na gone; au a dau vanananu me vaka na gone; ia niu sa yaco me tamata bula, au sa dainia tani na ka vagonegonea.
\v 12 Io, edaidai eda sa raicia me vaka na titiro e nai iloilo buwawa; ia maimuri ena vaka na virai e na matanavotu: edaidai kau sa kila vatikina lia; ia maimuri, kau na kila me vaka kau sa kilai.
\p
\v 13 Ia koya, sa tu na vabautia, nai nuinui, na loloma, a ka tolutolu koya; a sa uasivi cake vi iratou na loloma.
\c 14
\cl Wase 14
\p
\v 1 Dou vasaqara na loloma: dou gadrevia voki lia na vi ka vayalo, ka valevu mo dou parofisai.
\v 2 Ia ko koya sa vosa ena dua na vosa tani, sa yali ni vosa vi ira na tamata, vua lia na Kalou; ni sa yali e dua sa kila; a sa cavutia ko koya na vi ka e vuni ena lomana.
\v 3 Ia ko koya sa parofisai sa vosa vi ira na tamata me vatataki ira, ka vatavulici ira, ka vacegui ira.
\v 4 Ko koya sa vosa ena dua na vosa tani, sa vatataki koya lia; ia ko koya sa parofisai, sa vatataki ira nai soqosoqo lewe ni lotu.
\p
\v 5 Ia kau sa vinakatia mo dou vosa kece lia ena vosa tani e levu, ka valevu cake mo dou parofisai; ni sa uasivi cake ko koya sa parofisai vi koya sa vosa ena vosa tani e levu, kevaka sa yali ni vatakila na kenai balebale ko koya, me vatataki kinia ko ira nai soqosoqo lewe ni lotu.
\p
\v 6 Ia sa vakinia, na viwekani, kevaka kau sa qai vi ikodou ka dauvosa ena vosa tani e levu, au na yaga vacava vi ikodou, kevaka kau sa yali ni vosa voki lia vi ikodou enai vatakilakila, se ena vuku, se ena parofisai, se e nai va vuvuli?
\v 7 Ia na vika sa yali ni bula ka sa daurorogo, se na bitu-ni-vakatagi se na api, kevaka sa yali ni duidui na kena rorogo, ena kilai vaevei se sa cava nai balebale ni ka sa laga ena bitu-ni-vatagi se na api?
\v 8 Ia kevaka ena rorogo na davui-ni-valu ka yali ni kilai na kena rorogo, o cei ena varautaki koya me qai valu?
\v 9 Sa vakinia koi ikodou, kevaka dou sa yali ni cavutia na vosa sa kilai rawa, ena kilai vaevei na ka sa vosatakia? Dou na vosa lowa lia ki na cagi.
\v 10 E dina beka, ni sa levu na vosa sa duidui e vuravura, a sa yali e dua sa yali ni vaibalebale.
\v 11 Ia kevaka kau sa yali ni kila nai balebale ni vosa, au na kai tani vua sa vosa, ena kai tani voki lia vei au ko koya sa vosa.
\v 12 Sa vakinia koi ikodou, ni dou sa gadrevia na vi ka vayalo, dou vasaqara voki lia mo dou uasivi cake ena ka sa vatataki kinia ko ira nai soqosoqo lewe ni lotu.
\p
\v 13 Ia ko koya sa vosa ena dua na vosa tani, me masu voki lia me vatakila rawa na kenai balebale.
\v 14 Io, kevaka kau sa masu ena dua na vosa tani, sa masu na yaloqu lia, ka sa yali ni vavuana na noqu nanumia.
\v 15 Sa qai vaevei? Au na masu ena yaloqu, au na masu ena noqu kila voki lia; au na sere e na yaloqu, au na sere e na noqu kila voki lia.
\v 16 Kevaka sa yali ni vakinia, ni ko sa vavinavinaka e na yalomu lia, ena vaemeni va evei e na nomu vavinavinaka ko koya sa tiko e na nodra tikina na tamata sa yali ni vuku, ni sa yali ni kila na ka ko sa tukunia?
\v 17 Sa dina lia ko sa va vinavinaka vadodonu, ia sa yali ni vatataki kinia ko koya.
\v 18 Au sa vavinavinaka vua na Kalou, niu sa uasivi cake vei ikodou kece lia e na vosatakia na vosa tani e levu:
\v 19 ia kau sa vinakatia valevu meu vosatakia e na noqu kila e lima lowa lia na vosa e na kedra maliwa nai soqosoqo lewe ni lotu, meu vavulici ira voki lia kinia na tani, ia kau yali ni vinakatia meu cavutia na vosa e tini na udolu e na vosa tani.
\p
\v 20 Oi ikodou na viwekani, dou kakua ni gone lalai e na vuku; e na lomaca lia mo dou gone lalai, ia e na vuku mo dou tamata bula.
\v 21 Sa volai e na vunau, Au na vosa vi ira na tamata koya e na gusu ni kai tani, ki na tebenigusu ni vulagi; ia ni sa vakinia era na qai yali ni rogoci au, sa tukunia na Turaga.
\p
\v 22 O koya koya sai vatakilakila vi ira sa yali ni va bautia na vosa tani e vuqa, ia ka sa yali vi ira sa vabautia; ia na parofisai sa yali ni ka vi ira sa yali ni vabautia, vi ira lia sa vabautia.
\v 23 Ia kevaka sa soqoni vata e na dua na yasana nai soqosoqo lewe ni lotu taucoko, a ra sa dui vosa kece lia e na vosa e vuqa, a sa qai mai eso sa yali ni vuku, se ra yali ni vabautia, era na yali ni tukunia dou sa lialia?
\v 24 Ia kevaka era sa parofisai kece lia, a sa qai mai e dua sa yali ni vabautia, se sa yali ni vuku, sa vacalai kinia ko koya vi ira kece lia, sa lewai ko koya vi ira kece lia:
\v 25 ka sa varaitakia va koya na vi ka e vuni e na yalona; ena cuva vatoboicu ko koya, ka masu vua na Kalou, ka na tukunia ni sa dina sa tiko vei ikodou na Kalou.
\p
\v 26 Sa qai vaevei, ikodou na viwekani? Ni dou sa soqoni vata, dou sa dui tauria yadua na sere, ai vavuvuli, ai vatakilakila, a vosa tani, na lave vosa. Me caka na ka kece lia mo dou vatataki kinia.
\v 27 Kevaka e dua sa vosa e na vosa tani, me lewe rua, se lewe tolu lia, me ra vitaravi yadua lia; ia me dua e lave vosa.
\v 28 Ia kevaka sa yali e dua me lave vosa, me galu lia e nai soqosoqo lewe ni lotu; me vosa vi koya lia vakai koya, vua voki lia na Kalou.
\p
\v 29 Ia me lewe rua se lewe tolu na parofita me vosa, ka me lewa lia ko ira sa vo.
\v 30 Ia kevaka sa vatakilai e dua na ka vua e dua sa tiko voleka, me galu mada ko koya sa liu.
\v 31 Ni sa rawa mo dou parofisai kece lia, ia dou ia yadua lia, me vatavulici kece lia, ka vacegui kece lia.
\v 32 Ia sa dui rawa na yalo ni parofita ko ira na parofita.
\v 33 Ni sa yali ni vu ni visei na Kalou, sa vu ni vacegu lia, me vaka sa yaco e na nodra i soqosoqo kece lia era sa lotu.
\v 34 Me ra galu lia ko ira na nomudou yalewa e na visoqosoqo lewe ni lotu: ni sa yali ni tara vei ira me ra vosa; ia me ra yalomalumalumu lia, me vaka na vosa ni vunau.
\v 35 Ia kevaka era sa via kila e dua na ka, me ra dui tarogia na watina mai nodratou; ni sa ka ni vivamaduataki me ra vosa na yalewa e nai soqosoqo lewe ni lotu.
\v 36 Koi ikodou beka sa taka mai kinia na vosa ni Kalou? Se sa yaco vi ikodou duadua lia?
\v 37 Kevaka e dua sa nanumi koya ni sa parofita, se tamata vayalo, me kila mada ni sai vakaro ni Turaga na vi ka kau sa vola vi ikodou.
\v 38 Ia kevaka e dua sa yali ni kila, ia me kakua lia ni kila.
\p
\v 39 O koya ko ya, na viwekani, mo dou qai gadrevia mo dou parofisai, kakua voki lia ni tarovia na vosatakia na vosa tani e levu.
\v 40 Ia me caka me rairai vinaka na ka kece lia, ka vadodonu voki lia.
\c 15
\cl Wase 15
\p
\v 1 Ia kau sa vatakila vei ikodou, na viwekani, nai tukutuku-vinaka kau a vunautakia vi ikodou, o koya dou a vabautia voki lia, dou sa tu dei voki lia kinia;
\v 2 o koya voki lia dou sa bula kinia, kevaka dou sa tauria tiko na ka kau a vunautakia vi ikodou, kevaka sa yali ni ka lowa lia na nomudou vabautia.
\p
\v 3 Niu a tukunia taumada vi ikodou na ka kau a rawatia, ni sa mate na Karisito e na vuku ni nodai valavala ca me vaka nai Vola Tabu:
\v 4 ni sa bulu voki lia, ka ni sa tu cake voki lia e nai katolu ni siga me vaka nai Vola Tabu;
\v 5 ni sa rairai voki lia vi Kifa, vi ira emuri na le tinikarua;
\v 6 ka rairai emuri vi ira vata na viwekani era lewe lima na drau ka vacaca; e lewe vuqa vi ira era sa bula ka yacovia na siga koya, a sa moce tu eso.
\v 7 Sa rairai emuri ko koya vi Jemesa; sa qai rairai vi ira kece lia nai apositolo.
\v 8 Sa rairai emuri sara vi au voki lia, me vaka vua e dua sa lutu dole.
\v 9 Niu sa uasivi sobu vi ira kece lia nai apositolo, kau sa yali ni yaga meu vatokai mei apositolo, niu a vacacania nai soqosoqo lewe ni lotu ni Kalou.
\v 10 Ia na loloma lia ni Kalou kau sa yaco kinia ki na noqu tiko ni kua: ia na nona lomani au sa yali ni tawa yaga; ia kau sa uasivi cake vi ira kece lia e na cakacaka; ia ka sa yali ni koi au lowa lia, na loloma lia ni Kalou sa tiko vi au.
\v 11 Ia kevaka koi au, se ko ira, keitou sa vunau vakinia, ia dou sa vabautia voki lia vakakinia.
\p
\v 12 Ia kevaka sa vunautaki na Karisito ni sa vakaturi cake voki mai na mate, era sa tukunia vakacava eso vei ikodou ni sa yali na tu cake voki mai na mate?
\v 13 Ia kevaka sa yali ni tu cake voki ko ira na mate, sa qai yali ni tu cake voki mai na Karisito:
\v 14 ia kevaka sa yali ni tu cake voki mai na Karisito, sa qai ka lowa lia na nitou vunau, a ka lowa voki lia na nomudou vabautia.
\v 15 Ia kitou sa raicia kinia me daulasulasu ni kitou sa tukunia na Kalou; ni kitou sa tukuni koya na Kalou ni sa vaturi Karisito cake mai; ia ka sa yali ni vaturi koya cake voki, kevaka sa yali ni tu cake voki ko ira na mate.
\v 16 Io, kevaka sa yali ni tu cake voki ko ira na mate, sa qai yali ni vaturi cake voki na Karisito:
\v 17 ia kevaka sa yali ni vakaturi cake voki na Karisito, sa yali ni yaga na nomudou vabautia; sa tu vi ikodou ni kua na nomudou i valavala ca:
\v 18 era sa rusa voki lia ko ira era sa nei Karisito, ka sa moce tu.
\v 19 Kevaka ita sa vanuinui me yaga vei ita na Karisito e na bula lia koya, ita sa qai valoloma valevu cake vi ira kece lia na tamata.
\p
\v 20 Ia ka sa qai tu cake voki mai na mate na Karisito, a sa yaco me kedrai sevu era sa moce tu.
\v 21 Ni sa qai vu ni mate na tamata, sa qai vuni tu cake voki mai na mate na tamata voki lia.
\v 22 Ni sa qai mate kece lia e na vuku i Atama, ena vabulai kece voki lia e na vuku i Karisito.
\v 23 Ia na tamata yadua me vaka sa lesi vua: na Karisito nai sevu; ka qai muri ko ira era sa nei Karisito, ni sa qai voki mai ko koya.
\v 24 Sa qai muri na kenai vataotioti, ni sa solia ko koya na lewa vua na Kalou, ko Tamana; ni sa vaotia ko koya na lewa kece lia ki na vitalia kece lia, kei na kaukauwa.
\v 25 Sa na lewa tiko lia ko koya me vamalumalumutaki sobu mada na meca kece lia e ruku ni yavana.
\p
\v 26 Na meca ena vakaoti emuri sara ko mate.
\v 27 Ni sa vamalumalumutakia na ka kece lia ko koya e ruku ni yavana. Ia ni sa kainaki sa vamalumalumutakia na ka kece lia, sa macala sara sa yali ni cavutia ko koya sa vamalumalumutakia vua na ka kece lia.
\v 28 Ia ni sa vamalumalumutakia oti vua na ka kece lia, ena qai vamalumalumutakia voki lia na Luvena vi koya sa vamalumalumutakia na ka kece lia vi koya, me sa lewa duadua lia na Kalou e na ka kece lia.
\p
\v 29 Kevaka sa yali ni va koya, era na va evei ko ira sa papitaisotaki e na vukudra na mate? Kevaka sa yali sara ni tu cake voki ko ira na mate, a cava era sa papitaisotaki kinia e na vukudra na mate?
\v 30 Ka cava me itatou bolea voki lia kinia na mate e na tiki-ni-siga kece lia?
\v 31 Au sa tukunia dina sara na noqu rekitaki ikodou na viwekani e na vuku i Karisito Jisu na noda Turaga, au sa mate tiko e na visiga.
\v 32 Kevaka sa vatamata lia na noqu vivala kei na manumanu daukata mai Efeso, a cava na betena vi au? Kevaka sa yali ni tu cake voki ko ira na mate, me da kana lia ka somi, ni da na mate ni vulaci.
\v 33 Dou kakua ni vaisini ikodou vataki ikodou: sa vacala nai valavala vinaka na dautiko vata kei ira era sa ca.
\v 34 Dou yadra mai me vaka sa dodonu, ka mo dou kakua ni valavala ca; ni sa tiko eso era sa yali ni kila na Kalou; au sa vosa va koya mo dou madua kinia.
\p
\v 35 Ia ena tukunia e dua, Ena vaturi cake voki vaevei ko ira na mate? Ia na yago cava era na qai kaya mai?
\v 36 O iko ko sa yali ni vuku, na ka ko sa tea sa yali ni bula cake, kevaka sa yali mada ni mate:
\v 37 ia na ka ko sa tea, ko sa yali ni tea na yago ena tubu cake mai, a sila lowa lia, se witi beka, se dua na sila tani:
\v 38 ka sa solia na yagona na Kalou me vaka sa vinaka vua, ki na sila yadua na yagona vakai koya.
\v 39 Sa yali ni tautauvata na lewe ni ka kece lia: sa dua na lewe ni tamata, ka dua tani na lewe ni manumanu e yavai va, ka dua tani na lewe ni ika, ka dua tani na lewe ni manumanu vuka.
\v 40 Sa valomalagi na yago eso, ka sa vavuravura na yago eso; ka sa dua tani nai ukuuku ni yago valomalagi, ka sa dua tani nai ukuuku ni yago sa vavuravura.
\v 41 Sa dua tani nai ukuuku ni mata-ni-siga, ka sa dua tani nai ukuuku ni vula, ka sa dua tani nai ukuuku ni vikalokalo: ni sa uasivi cake na serau ni kalokalo e dua e na kena serau na kalokalo e dua tani.
\p
\v 42 Sa vaka voki lia kinia na tu cake voki mai na mate. Ni sa tei, sa vuca; ni sa vakaturi cake voki, sa yali ni vuca:
\v 43 ni sa tei, sa vasisilatakia; ni sa vakaturi cake voki, sa vaiukuukutakia: ni sa tei, sa malumalumu; ni sa vakaturi cake voki sa kaukauwa:
\v 44 ni sa tei, sa yago dina ni tamata; ni sa vakaturi cake voki, sa qai yago vayalo. Kevaka sa dua na yago sa vaka na bula vatamata, sa dua voki lia na yago sa vaka na bula vayalo.
\p
\v 45 Me vaka na ka sa volai, Ko Atama sa taumada sa caka me tamata bula; Ko Atama sa muri, sa caka me yalo sa vu ni bula.
\v 46 Ia ka sa yali ni taumada ko ko ya sa vakayalo, ko ya lia sa bula vatamata; ka sa qai muri na ka sa vaka na bula vayalo.
\v 47 Na tamata sa taumada sa mai vuravura, ka sa vavuravura; ia sa mai lomalagi na tamata sa kenai karua, na Turaga.
\v 48 Sa ra vataki koya sa vavuravura ko ira era sa vavuravura: sa ra vataki koya voki lia sa valomalagi ko ira era sa valomalagi.
\v 49 Ia me vaka ni da sa vataki koya sa vakavuravura, eda na vataki koya voki lia sa valomalagi.
\p
\v 50 Ia kau sa kaya koya, oi ikodou na viwekani, ni sa dredre ni rawata na matanitu ni Kalou na yago sa valewe ka vadra; ena yali voki lia ni yaco me yali vuca rawa na ka sa vuca rawarawa.
\v 51 Raicia, au sa vatakila vei ikodou e dua na ka vuni: Eda na yali ni moce kece, ia eda na vamataliatakia kece lia,
\v 52 ena vasauri sara, ena va na sauriva ni matada, ni sa uvu na davui sa muri sara: ena uvuci na davui, ena qai vaturi cake voki ko ira na mate me yali ni vuca voki, ia koi ita eda na vamataliataki voki lia.
\v 53 Sa na vaisulu na yago vuca koya me kakua voki ni vuca rawa, ka sa na vaisulu na yago sa mate koya me kakua voki ni mate rawa.
\v 54 Ia ni sa vaisulu oti na yago vuca koya me kakua voki ni vuca rawa, ka sa vaisulu oti na yago mate koya me kakua voki ni mate rawa, ena qai vayacori kinia na vosa sa volai, Sa gu ce ko mate, a sa muduki sara.
\q1
\v 55 Ko iko mate, sa evei na nomu bati gaga? Ko iko bulubulu, sa evei na nomu gumatua?
\p
\v 56 Sa kena bati gaga ni mate nai valavala ca: ka sa kena kaukauwa ni valavala ca na vunau.
\v 57 Ia me da vavinavinaka vua na Kalou, o koya sa solia vei ita me da gumatua sara e na vuku ni noda Turaga ko Jisu Karisito.
\p
\v 58 O koya lia koya, oi ikodou na wekaqu lomani, mo dou qai tu dei sara, mo dou kakua ni yavala, mo dou uasivi cake e na cakacaka ni Turaga e na gauna kece lia, ni dou sa kila sa yali ni ka lowa lia na nomudou cakacaka e na vuku ni Turaga.
\c 16
\cl Wase 16
\p
\v 1 Ia e na vuku ni soli me nodra era sa lotu, me vaka kau sa varotia vi ira na viisoqosoqo lewe ni lotu mai Kalatia dou caka vakinia koi ikodou voki lia.
\v 2 E nai matai ni siga ni wiki, mo dou dui maroroya nai yau eso me tu, me vaka sa vakalougatataki kinia ko koya, me kakua kinia ni caka na soli ni kau sa qai yani.
\v 3 Ia ni kau sa tadu yani, o iratou dou na vinakatia kau na talai iratou me ratou yadia nai vola eso ki na nomudou i loloma voki lia ki Jerusalemi.
\v 4 Ia kevaka sa yaga meu qai voki lia koi au, eratou na qai vata kei au.
\p
\v 5 Ia kau na qai vi ikodou, niu sa qai ki Masitonia: ni kau na qai ki Masitonia.
\v 6 Ia kau na tiko beka vi ikodou, io, kau na tiko beka kei ikodou e na veivula i liliwa, mo dou yadi au kinia e na noqu qai tu ki na vanua kau na qai kinia.
\v 7 Niu sa yali ni via tiko vi ikodou e na noqu qai tu koya; ia kau sa nakitia meu tikotiko mada kei ikodou, kevaka sa vinakatia na Turaga.
\v 8 Ia kau na tiko lia mai Efeso me yaco mada na siga ni Penitiko.
\v 9 Ni sa dola tu vi au na darava levu ka yaga, a ra sa lewe levu voki lia na dauvivorati.
\p
\v 10 Ia kevaka sa tadu ko Timoci, dou raicia me tiko tawa rere vi ikodou; ni sa kitaka ko koya na cakacaka ni Turaga, me vataki au voki lia.
\v 11 O koya me kakua kinia na tamata me beci koya: ia mo dou yadi koya e na nona qai tu e na vacegu, me qai mai kinia vi au: niu sa waraki koya ki iratou na viwekani.
\p
\v 12 Ia e na vuku i Apolosa na wekada, au sa masuti koya valevu me qai yani vi ikodou ki iratou na viwekani: a sa yali sara ni lomana me qai vi ikodou e na gauna koya; ia ni dua na gauna vinaka vua, ena qai qai yani.
\p
\v 13 Dou vatawa, dou tu dei e na vabautia, dou tamata qaqa, dou gumatua.
\v 14 Me caka na ka kece lia dou caka e na yalololoma.
\p
\v 15 Ia kau sa masuti ikodou, na viwekani, (dou sa kila na lewe ni vale i Sitifana, ni sai sevu mai Akaia, a ratou sa soli iratou me ratou qaravi ira era sa lotu:)
\v 16 mo dou vamalumalumutaki ikodou vi ira sa va koya, vi ira yadua voki lia era sa vivuke, ka daucakacaka.
\v 17 Ia kau sa reki e na nodratou qai mai ko Sitifana kei Forituneto kei Akaiko: ni ratou sa caka na ka sa yali ni rawa vi ikodou.
\v 18 Ni ratou sa vaceguya na yaloqu ki na yalomudou voki lia; o koya mo dou qai kilai ira era sa va koya.
\p
\v 19 Sa loloma yani vi ikodou na visoqosoqo lewe ni lotu mai Esia. Sa loloma vakalevu yani vei ikodou ko Akuila kei Pirisila e na Turaga, ki ira nai soqosoqo lewe ni lotu e na nodrau vale.
\v 20 Era sa loloma yani vei ikodou na viwekani kece lia. Dou dui vireguci yadua vai ikodou e na yalosavasava.
\p
\v 21 Oi au ko Paula, au sa vola e na ligaqu dina na noqu loloma yani.
\v 22 Kevaka sa dua sa yali ni lomania na Turaga ko Jisu Karisito, me cudruvi ko koya. Sa qai mai na Turaga.
\v 23 Me tiko ki ikodou na loloma ni Turaga ko Jisu Karisito.
\v 24 Me tiko ki ikodou kece lia na noqu loloma e na vuku i Karisito Jisu. Emeni.