lmv-x-levuka_reg/45-ACT.usfm

\id ACT
\ide UTF-8
\h Nodra Cakacaka Na I Apositolo
\toc1 Nodra Cakacaka Na I Apositolo
\toc2 Nodra Cakacaka Na I Apositolo
\toc3 act
\mt Nodra Cakacaka Na I Apositolo
\c 1
\cl Wase 1
\p
\v 1 I CEOFILO, au a vola nai vola e liu, kei na ka kece lia sa vatekivu me caka ka vatavuvulitakia ko Jisu:
\v 2 ka yacovia na siga sa kau cake kinia ko koya, ni sa taucia oti ena Yalo Tabu na nonai varo vi ira lia nai apositolo, ko ira ka digitakia ko koya:
\v 3 ka sa varaitaki koya voki lia vi ira, ka sa levu na kenai vadinadina, ni sa bula voki mai na nona mate, ka ni sa daurairai lia vi ira ka bogi vasagavulu, ka vosatakia na veika ni matanitu ni Kalou.
\p
\v 4 Ia ni ratou sa soqoni vata, sa qai varotia vi iratou o koya vakoya: “Dou kakua ni daini Jerusalemi, ia dou warakia tiko lia na i solisoli ka'u a sa tukuna oti vi ikodou, na i solisoli sa yalatakia ko Tamaqu.
\v 5 A sa vipapitaisotaki ena wai ko Joni, ia dou na qai papitaisotaki ena Yalo Tabu ena vica lia na siga koya.”
\p
\v 6 Ni ra sa soqoni vata era sa tarogi koya ka tukunia, ikonu na Turaga, ko ni na vayacori ira na Isireli me ra matanitu voki ena gauna koya se yali?
\v 7 Sa tukunia vi ira o koya, sa yali ni nomudou mo dou kila na kena gauna, se na kena yabaki, sa lewa dua loa lia kinia ko Tamaqu.
\v 8 Ia dou na rawatia na kaukauwa ni sa qai mai vi ikodou na Yalo Tabu, dou na qai dautukuni au mai Jerusalemi, kei Jutia taucoko kei Samaria, ka yacovia nai yalayala kei vuravura.
\v 9 Ia ni tukunia oti na veika koya o koya, sa qai yadi colo, ni ra sa varaicia tiko; a sa dua na lia na o sa tabonakia mai na matadra.
\p
\v 10 Ia ni ra sa rai matua ki lomalagi, ni sa qai yani o koya, raicia, e lewe rua voki na tamata sa tu voleka vi ira, erau vaisulu vulavula;
\v 11 a rau sa tukunia, Ko ikodou na kai Kalili, dou sa tu ka rai matua ki lomalagi, ena qai voki mai vakinia me vaka dou sa raicia koya ni sa qai ki lomalagi.
\p
\v 12 Era sa qai lesu voki ki Jerusalemi mai na ulu-ni-vanua sa vayacani ki na violive, sa voleka ki Jerusalemi me vaka lia na kena yawa sa dau qaivi ena dua na siga ni vacecegu.
\v 13 Ia ni ra sa curu lia ki loma, era sa cabe kina i taba vale e colo, era sa dautiko kinia ko Pita, kei Jemesa, kei Joni, kei Adriu, Ko Filipi kei Tomasi, ko Pacolomiu, kei Maciu ko Jemesa na luvei Alifio kei Saimoni e dua vi ira sa vatokai Na gumatua, kei Jutasa na taci Jemesa.
\v 14 Era sa gumtua kece lia ko ira koya, era sa lomavata ena kerekere kei na dau masu, kei iratou voki lia na yalewa, kei Meri na tinai Jisu, kei iratou na tacina.
\p
\v 15 Ia ena gauna koya, sa tucake kinia ko Pita ena kedra maliwa na veiwekani (ni sa wili vata na yacadra era sa lewe dua beka na drau ka ruasagavulu) a sa tukunia,
\v 16 ko ikodou na viwekani, e dodonu me vayacoria na tiki-ni-Vola Tabu koya, ka vosatakia e liu na Yalo Tabu ena gusui Tevita, ena vukui Jutasa, ko koya ka liutaki ira era sa tauri Jisu:
\v 17 ni sa wili vata kei ita ko koya, a sa lesi ki na cakacaka koya.
\p
\v 18 (Ia na tamata koya sa volia e dua na tiki ni vanua enai voli ni nonai valavala ca; a sa lutu ka saumakidule ki ra, a sa kacabote na boto ni ketena a sa kasabura voki lia na nona wawa:
\v 19 a sa kilai na ka koya vi ira kece lia sa tiko mai Jerusalemi: a sa vatokai kinia na tiki ni vanua koya ena nodra vosa, Akelitama, o koya koya Na vanua ni dra.)
\p
\v 20 Ni sa volai enai vola ni Same, ‘Me lala didi na nona vale, Ia me kakua na tamata me tiko kinia’; ‘ia, me dua tani me tauria na nonai tavi.’
\v 21 O koya sa dodonu kinia me dua mada vi ira na tamata era sa tiko vata kei ita ena gauna voki lia sa tiko kinia vi ita na Turaga ko Jisu,
\v 22 sa vatekivu mai na papitaiso i Joni ka yacovia na siga sa kau cake kinia vi ita ko koya, me lesi ko koya me tukunia vata kei ita na nona tucake voki mai na mate.
\p
\v 23 A ra sa lesia e lewe rua, Ko Josefa sa vatokai ko Parisapa, a yacana voki lia ko Jusitu kei Mataiasa.
\v 24 Era sa qai masu, ka tukunia, Ko ikonu na Turaga, ko ni sa kila na na yalo ni tamata kece lia, mo ni vatakila mai se ko cei vi rau koya ko ni sa digitakia,
\v 25 me nonai tavi na cakacaka vaiapositolo koya, sa sivo tani mai kinia ko Jutasa, me qai kina nona yasana.
\v 26 A ra sa qai vawiri madigi, ena vukudrau, a sa bale vi Mataiasa: a sa wili vata kinia o koya kei ira na i apositolo e lewe tinikadua.
\c 2
\cl Wase 2
\p
\v 1 Ia ni sa yaco na siga ni Penitiko, era sa tiko lomata ko ira kece lia ena dua na tikina.
\v 2 Sa qai vasauri mai lomalagi e dua na rorogo, e vaka lia na cagi vacevaruru kaukauwa, a sa vasinaitia na vale taucoko era a tiko kinia.
\v 3 A sa rairai vi ira na ka e vaka lia na viyameyame ni bukawaqa sa dui visebayaki, a sa tiko yadua vi ira vayadua lia.
\v 4 A ra sa vasinaiti kece lia ena Yalo Tabu, a ra sa vatekivu me vosatakia na vosa tani eso, me vaka lia sa solia vi ira na Yalo Tabu me ra cavutia.
\p
\v 5 Era a tiko mai Jerusalemi eso na kai Jutia, ra tamata lotu mai na vivanua kece lia e rukui lomalagi.
\v 6 Ia ni sa rogovaki yani na ka koya, a ra sa soqoni vata na lewe levu, a ra sa kurabui lia ni ra sa dui rogoci ira na tamata yadua ni ra sa vosatakia na nona vosa.
\v 7 A ra sa kidacalatakia kece lia ka kurabui, ka tukunia vakai ira, Raicia, era sa yali beka li ni kai Kalili ko ira kece lia koya era sa vosa?
\v 8 Ia ka vaevei koya ni da sa rogocia koi ita kece lia ena noda vosa eda sucu kaya?
\v 9 (Ko ira na kai Paricia, kei Mitia, kei Ilama, kei ira sa tiko mai Mesopotemia, kei Jutia kei Kapatosia, mai Ponito, kei Esia,
\v 10 mai Firijia kei Pamifilia, mai Ijipita kei na yasayasa va-Lipea e voleka ki Kirini kei ira na vulagi mai Roma, ko ira na kai Jutia, kei ira sa vuki ki na lotu vaka Jiu,
\v 11 ko ira na kai Kiriti kei Arepea) eda sa rogoci ira ni ra sa tukunia ena noda vosa na nona cakacaka e vivakurabuitaki na Kalou.
\v 12 A ra kurabui kece lia, ka taqaya, ka sa vitukuniyakia vakai ira, A cava nai balebale ni ka koya?
\v 13 A sa valialia ko ira eso tani, ka tukunia, Era sa mateni lia ena waini vou.
\p
\v 14 Sa qai tucake lia ko Pita, kei ira na lewe tinikadua, ka sa tabalakia i colo na domona, ka tukunia vi ira, Oi ikodou na kai Jutia, kei ikodou kece lia sa tiko e Jerusalemi, mo do kila na ka koya ka rogocia na noqu vosa:
\v 15 ni ra yali ni mateni ko ira koya me vaka na ka dou sa nanumia, ni se qai kenai katolu lia ni aua.
\v 16 Ia ni sai koya lia koya sa tukunia na parofita ko Joeli:
\v 17 ‘Sa tukunia na Kalou, ena yaco ena gauna mai muri kau na sovarakia na Yaloqu kivei ira na tamata kece lia: A ra na parofisai kinia ko ira na nomudou gone yalewa, Ia, ena raicia na raivotu eso ko ira na nomudou matua:
\v 18 Io, vi ira voki lia na noqu tamata kei na noqu vada kau na sovarakia na yaloqu ena gauna ko ya, a ra na parofisai kinia:
\v 19 Ia kau na vatakila lia na ka evei vakidacalataki eso mai lomalagi e colo, kei nai vatakilakila eso e vuravura era; A dra, kei na bukawaqa, kei na kubou;
\v 20 Ena vuki lia na matanisiga me butobuto, kei na vula me dra, Ena qai yaco lia e muri na siga i Jiova, sa levu ka rogo tiko:
\v 21 Ia ena yaco, o koya yadua lia ena masutia na yaca i Jiova, ena bula.
\p
\v 22 Ko ikodou na tamata na Isireli, rogocia na vosa koya; ko Jisu na kai Nasareci, a tamata sa vadinadinatakia vi ikodou ni Kalou ena cakacaka mana, kei na ka e vivakurabuitaki eso, kei na vatakilakila lia eso, sa solia na Kalou kivei koya me caka ena ikodou maliwa, me vaka dou sa kila:
\v 23 o koya ni sa soli oti yani vi ikodou, me vaka ka nakitia dina lia na Kalou ka lewa e liu, dou sa tauria ka vakotia ki na kauveilatai ka vamatea ena ligadra na tamata ca;
\v 24 o koya lia sa vatura i colo na Kalou ni sa serekia nai vau ni mate: ni sa yali ni rawa me vauci tiko lia kinia o koya.
\p
\v 25 Ni sa vosataki koya lia ko Tevita, ka tukunia, ‘Au sa raici Jiova tiko lia ni sa tu e mataqu, ni sa tu ko koya ena ligaqu i matau, me'u yali kinia ni yavavala;
\v 26 o koya lia sa reki kinia na yaloqu, a sa marau kinia na yamequ; Ena Vacegu voki lia na lewequ enai nuinui
\v 27 Ni ikonu na yali ni dainia na yaloqu mai etesi, Se dainia na nomu Le dua yalosavasava me vuca mai:
\v 28 Ko ni sa vatakila lia mai vi au na sala ni bula; ko ni na vasinaiti au ena marau mai na matamu.’
\p
\v 29 Oi ikodou na viwekani, dou vosotia me'u doudou lia niu sa tukuni Tevita na matua vi ikodou, ni sa mate lia o koya ka bulu, ka sa tu lia vi ita na nona i bulubulu ka yacovia na siga koya.
\v 30 Ia ni sa parofita lia ko koya, a sa kila ni sa bubului vua na Kalou, ni na tubu mai vua ko ki ra ena vatuburia mai kinia ko koya na Karisito, me vaka na lewena, me tiko lia ena nonai tikotiko vaturaga.
\v 31 Ia ni sa kila e liu, sa tukunia na nona tucake voki mai na mate na Karisito, ni na yali ni dai tu mai etesi, se na vuca mai na lewena.
\p
\v 32 Ko Jisu koya, sa vaturia i colo na Kalou, ka sai vadinadina ni ka koya koi kitou kece lia.
\v 33 Ia ni sa yadi colo ena liga i matau ni Kalou, rawatia o koya mai vi Tamana na Yalo Tabu ka yalataki, sa qai sovarakia mai na ka koya, dou sa qai raicia ka rogocia.
\v 34 Ni sa yali ni yadi ki lomalagi ko Tevita; ia sa tukunia o koya, Sa tukunia lia ko Jiova vua na noqu Turaga, Mo tiko ena ligaqu i matau,
\v 35 Me'u vamalumalumutaki ira mada na nomu meca mei tutu lia ni yavamu.
\p
\v 36 O koya koya me kila sara kinia na mataqali taucoko nei Isireli, ko Jisu koya, o koya dou a vakotia ki na kauveilatai, sa lesia lia na Kalou me Turaga ka Karisito voki lia.
\p
\v 37 Ia ni ra sa rogocia, sa laucoka na yalodra, a ra sa tukunia vi Pita kei ira nai apositolo sa vo, Oi kodou na veiwekani, a cava me kimamu caka?
\p
\v 38 Sa qai tukunia vei ira ko Pita, “Dou vivutuni ka papitaisotaki, koi ikodou yadua, ena yaca i Jisu Karisito me bokoci kinia na nomudou i valavala ca, ka dou rawatia na Yalo Tabu mei solisoli.'
\v 39 Ni na caka vi ikodou na vosa ni yalayala, vi ira voki lia na nomudou gone, kei ira vayadua lia era sa vayawa io, vi ira yadua lia ena kacivi ira vua na Turaga na noda Kalou.
\v 40 Ia sa levu voki li na vosa sa tukunia ko koya ka varotia, ka tukunia, Dou vabulai ikodou mai nai tabatamata takelo koya.
\p
\v 41 Ia ko ira lia sa vabautia na nona vosa, era sa papitaisotaki: ka sa kenai kuri vi ira sa lotu ena siga koya e lewe tolu beka na udolu na tamata.
\v 42 A ra sa qaravia matua na nodrai vavuvuli nai apositolo kei na vilomani, kei na dovi madrai kei na masumasu.
\p
\v 43 A sa kani ira kece lia na rere; a sa levu na ka e vivakurabuitaki kei nai vatakilakila era sa caka ko ira nai apositolo.
\v 44 Ia ko ira kece lia sa vabautia era sa tiko vata, a ra sa dui solia na nonai yau yadua me ra taukena vata;
\v 45 a ra sa volitakia na nodra vanua kei na nodrai yau, a ra sa vota kivei ira kece lia me vaka lia na nodra dui dravudravua.
\v 46 A ra sa gumatua sara lia ena qai ki na valenisoro ena visiga, a ra sa lomavata, a ra sa dovi madrai ena vivale, a ra sa kania na kedra ena marau kei na yalo dina,
\v 47 ni ra sa vavinavinakatakia tiko vua na Kalou, a sa vinakati ira ko ira na tamata vayadua lia. Ia na Turaga sa vaikuritakia kivei ira nai soqosoqo lewe ni lotu, ena visiga, na tamata era sa vabulai tiko.
\c 3
\cl Wase 3
\p
\v 1 Ia erau a qai vata ko Pita kei Joni ki na valenisoro ena aua sa dauia kinia na masumasu, ai kaciwa ni aua.
\v 2 A sa dua na tamata sa lokiloki mai na kete i tinana sa colati voli, o koya era sa vadavoria lia ena visiga ena mata ni darava ni valenisoro, sa vatokai ko Lagilagi, me kere kani loloma vi ira sa curu ki na valenisoro;
\v 3 ni sa raici rau lia ko Pita kei Joni ni rau sa voleka ni curu kina valenisoro, a sa kerekere me dua na kani loloma.
\v 4 A rau sa varaica matua ko Pita kei Joni, ka tukunia, ‘Raici kirau mai.’
\v 5 A sa vakasami rau ko koya, ni sa nanumia ena rawatia mai vi rau e dua lia na ka.
\v 6 Sa qai tukunia ko Pita, “A siliva kei na koula e yali ni tu vi au, ia na ka lia sa tu vi au kau na solia vi iko: Ena yaca i Jisu Karisito na kai Nasareci mo tucake lia ka qai.”
\v 7 Sa qai tauria na ligana i matau, a sa tuberia cake: sa qai vakaukauwataki sara lia na yavana kei na nona qurulasawa.
\v 8 Sa qai rika i colo o koya ka wavu tu, ka qai voli, a sa curu vata kei rau ki na valenisoro, a sa qai, ka rika, ka varokorokotakia na Kalou.
\p
\v 9 A sa raici koya ko ira na tamata kece lia, sa qai voli ka varokorokotakia na Kalou:
\v 10 a ra sa kila ni sai koya ka dautiko ena mata ni darava ko Lagilagi, mai na valenisoro, me kere kani loloma: a ra sa rere ka kurabui sara lia ena vuku ni ka sa qai yaco vua.
\v 11 Ia ni rau sa tuberia na lokiloki sa qai vabulai koya ko Pita kei Joni, a ra sa cici vata kece lia na tamata kivei iratou ki na varada sa vatokai na nei Solomoni, a ra sa kurabui valevu.
\p
\v 12 Ia ni sa raicia ko Pita, sa tukunia vi ira na tamata, “Oi ikodou na tamata na Isireli, dou sa kurabui ena ka koya ena vuku ni cava? Se cava dou sa varaici kirau matua kinia, me vaka sa nirau kaukauwa se yalododonu, kirau sa cakati koya kinia me qai rawa?
\v 13 A Kalou i Eparaama, kei Aisake, kei Jekope, a nodra Kalou na noda qase, sa varokorokotakia na Luvena ko Jisu: ko koya dou a solia yani, ka cakitakia ena matai Pailato, ni sa lewa lia o koya me serekia.
\v 14 Ia dou a cakitaki koya lia na Yalosavasava ka Dodonu, ka masutia me soli vi ikodou e dua lia na daulaba:
\v 15 ka dou a vamatea na Vunibula, o koya a vaturia cake voki mai na mate na Kalou; ka kitou sai vadinadina ena ka koya.
\v 16 Ia na yacana, ena vuku ni sa vabauti na yacana, sa vakaukauwatakia kinia o koya koya, o koya dou sa raicia ka kila: io, ni sa vabauti koya, sa soli lia vua na bula vinaka sara koya ena matamudou vayadua lia.
\p
\v 17 Ia vi ikodou na viwekani, au kila ni ikodou a yali ni kila na ka dou caka, me vaka voki lia vi ira na nomudou Turaga.
\v 18 Ia ena veika sa tukunia e liu na Kalou ena gusudra kece lia na parofita, ni na mate lia na nona Karisito, sa qai vayaicora vakinia o koya.
\v 19 O koya mo dou qai vivutuni ka saumaki lia mai, me bokoci kinia na nomudoui valavala ca, me yaco kinia na gauna ni vacegu mai na mata ni Turaga:
\v 20 ka talai Karisito o koya, io ko Jisu ka vunautaki e liu vi ikodou.
\v 21 O koya e dodonu me tiko mada lia mai lomalagi, me yaco mada lia na gauna ena caka voki vinaka kinia na ka kece lia, ka vosa kinia na Kalou ena gusudra kece na nona parofita yalosavasava, ena gauna makawa.
\v 22 Ni sa dina sa tukunia ko Mosese, ‘Ena vatuburia cake vi ikodou ko Jiova na nomudou Kalou, mai vi ira lia na wekamudou e dua na parofita me vataki au; o koya dou na rogocia ena ka vayadua lia ena vosatakia vi ikodou:
\v 23 ia ena yaco, a tamata yadua sa na yali ni rogocia na parofita koya ena varusai tani lia vi ira na tamata.’
\v 24 Ia ko ira voki na parofita kece lia, sa kenai vatekivu ko Samuela kei ira voki lia sa taravia, ko ira kece lia era sa vosa, era sa tukunia eliu na gauna koya.
\v 25 Oi ikodou sa luvedra na parofita, kei na vosa lia ni viyalayalati sa caka na Kalou vi ira na noda matua, ni sa tukunia vi Eparaama, ‘Ena Kalougata na vimataqali kece lia e vuravura ena vuku ni nomu kawa.’
\v 26 Sa tala na Luvena ko Jisu na Kalou, ka liu vi ikodou, ni sa vaturia cake, me vakalougatataki ikodou, ni sa saumaki ikodou ya dua mai na nomudoui valavala ca.
\c 4
\cl Wase 4
\p
\v 1 Ia ni rau sa vosa tiko vi ira na tamata, sa qai mai vi rau ko ira lia na bete kei na turaga ni valenisoro, kei ra nai tokani i Setoki;
\v 2 ni ra sa cudru ni rau sa vavulici ira na tamata, ka vunautakia na tu cake voki mai na mate ena vuku i Jisu.
\v 3 A ra sa tauri rau ka daini rau ena vale ni veivesu ena raiyavi koya ka yacovia na savulaci voki ni siga taravia.
\v 4 Ia ka lewe levu era sa rogocia na vunau, era sa vabautia; ia na kedrai wiliwili na tagane sa lewe lima beka na udolu.
\p
\v 5 Ia ni savulaci, era sa soqoni vata mai Jerusalemi ko ira na nodra turaga, kei ira na qase, kei ira na vunivola,
\v 6 kei Anasa na bete levu, kei Kaiafa kei Joni, kei Alekisada, kei ira kece lia na mataqali ni bete levu.
\v 7 Ia ni ra sa vaturi rau ena kedra maliwa, era sa tarogia, “A kaukauwa cava se na yaca i cei drau sa caka kinia na ka koya?”
\p
\v 8 Sa qai vasinaiti ena ko Pita ena Yalo Tabu, a sa tukunia vi ira, Oi ikonu na nodra turaga na tamata, kei na nodra matua na Isireli,
\v 9 kevaka kirau sa tarogi ena siga koya ena cakacaka vinaka vua na tamata lokiloki, se cava sa qai bula kinia;
\v 10 mo ni kila kece lia kei ira kece lia na Isireli ni sa yaca i Jisu Karisito na kai Nasareci, o koya ikonu a vakotia ki na kauveilatai, o koya sa vaturia cake voki na Kalou mai na mate, io, ena vukuna lia sa tu kinia koya o koya koya ena matamu ka sa bula vinaka.
\p
\v 11 Ko koya na vatu ikonu a catia sara koi ikonu na matai ni vale, ko ya sa yacovia me kenai vadei lia ni yavu enai tutu ni vale.
\v 12 A sa yali na bula ena vukuna e dua tani: sa yali sara e dua voki na yaca e ruku i lomalagi sa soli kivei ira na tamata, me da bula rawa kinia.
\p
\v 13 Ia ni ra sa raicia na nodrau doudou ko Pita kei Joni, ni ra sa kila voki lia erau sa yali so ni vuku, se tamata vuli, e ra sa kurabui kinia, a ra sa qai vakasami rau, ni ratou a dautiko vata kei Jisu.
\v 14 Ia ni ra sa raicia na tamata ka vabulai, ni sa tu vata kei rau, e ra sa yali ni vatitiqatakia rawa.
\p
\v 15 Ia ni ra sa vatalai rau me rau qai tani ena vale ni bose, era sa qai bose lia vakai ira,
\v 16 ka tukunia, “A cava me da caka vi rau na tamata koya? Ni ra kila ko ira kece lia sa tiko e Jerusalemi ni sa dua na cakacaka mana rogo era sa caka; Ia a eda sa yali ni vatitiqatakia rawa.
\v 17 Ia de tukuni valevu vi ira na tamata, me da tukunia lia, me rau cudruvi sara kevaka e rau vavuvulitakia voki vua e dua na tamata ena yaca koya.”
\v 18 A ra sa kacivi rau ka varotia vi rau me rau kakua sara lia ni vosa se vatavuvulitakia na yaca i Jisu.
\p
\v 19 Sa qai vosa ko Pita kei Joni, a rau sa tukunia vi ira, “Mo ni lewa lia se sa dodonu se yali ena mata ni Kalou me kirau varorogo vi ikonu ka yali vua na Kalou:
\v 20 ni sa mama sara lia vi kirau me kirau kua ni tukunia na veika kirau a raicia ka rogocia.”
\p
\v 21 Ia ni ra sa yali ni raicia e dua na ka me rau cudruvi kinia, era sa vosa vacudrucudru voki vi rau, a ra sa qai serekia me rau qai, ena vukudra lia na tamata ni ra sa varokorokotakia na Kalou ko ira kece lia ena vuku ni ka sa qai caka.
\v 22 Ni sa vasagavulu vacaca na nona yabaki, o koya na tamata sa caka vua na cakacaka mana koya ka bula kinia.
\p
\v 23 Ia ni rau sa sereki, erau sa tukunia vi ira na nodraui tokani na ka kece lia era sa vosatakia vi rau ko ira na bete levu kei ira na qase.
\v 24 Ia ni ra sa rogocia, era sa lomavata ka tabalakia icolo na domodra vua na Kalou, “Ikonu a bulia na lomalagi kei vuravura, kei na waitui kei na ka kece lia sa tu kinia:
\v 25 ena gusui Tevita na nomuni tamata ko ni a tukunia, sa dau cudrutakia na vimatanitu ena vuku ni cava, ka sa vananumia na ka loa ko ira na lewe ni vivanua?”
\q
\v 26 Era sa tuvai valu na tui kei vuravura, A ra sa soqoni vata ko ira na turaga me ra vivala kei Jiova kei na nona Karisito.
\p
\v 27 Ni sa dina era sa soqoni vata lia ena koro koya me ra vivala kaya na Luvemunu savasava ko Jisu, o koya ko ni a lumutia, koi rau o Eroti kei Ponitio Pailato, kei ira na vimatanitu, kei ira na Isireli
\v 28 me ra caka kece lia na ka ko ni a lesia e liu me caka, me vaka na nomuni kaukauwa kei na nomuni i naki.
\p
\v 29 Ia koya, Ikonu na Turaga, mo ni raicia na nodra vosa vacudrucudru, ka solia kivei ira na nomuni talatala me ra doudou valevu ni ra tukunia na nomuni vosa,
\v 30 ni ikonu sa dodoka tiko na ligamuni me caka na vivabulai, me caka voki lia nai vatakilakila eso kei na ka e vivakurabuitaki, ena yaca ni Luvemunu yalosavasava ko Jisu.
\p
\v 31 Ia ni ra sa masu oti, sa vayavalatia na vale era soqoni vata kinia: a ra sa dui vasinaiti kece lia ena Yalo Tabu, a ra sa doudou kinia ni ra sa tukunia na vosa ni Kalou.
\p
\v 32 Ia ko ira na lewe levu era sa vabautia, era sa lomavata ka yalovata; a sa yali e dua e tukunia me nona dua loa lia na ka sa tu vua; a ra sa taukenia vata li na nonai yau yadua.
\v 33 A sa levu na nodra kaukauwa nai apositolo, ni ra sa tukunia ni sa tucake voki mai na mate na Turaga ko Jisu: a sa vinakatia valevu ko ira kece lia.
\v 34 Ni sa yali e dua vi ira sa dravudravua; ko ira kece lia sa taukenia na vanua se na vi vale, era sa volitakia, a ra sa yadia nai voli ni ka era sa volitakia,
\v 35 a ra sa taucia kinia ki yavadra nai apositolo: a sa votai vi ira kece lia me vaka na nodra dui dravudravua.
\p
\v 36 Ko Josese voki lia, o koya era sa vatoka ko ira nai apositolo me Panapasa, (a kenai balebale, A gone ni vacegu) a luvei Livai, a kai Kipiro,
\v 37 o koya sa taukenia e dua na tiki ni vanua, sa volitakia, ka yadia na kenai voli, ka taucia ki na yavadra nai apositolo.
\c 5
\cl Wase 5
\p
\v 1 A sa dua na tamata ko Ananaiasa na yacana, kei Savaira na watina, sa volitakia e dua na vanua,
\v 2 a sa vunia eso ka taucia kina yavadra nai apositolo.
\p
\v 3 A sa tukunia ko Pita, “Ananaiasa e vaevei ni sa vasinaitia na yalomu ko Setani mo lasutakia kinia vua na Yalo Tabu, mo vunia eso nai voli ni vanua?
\v 4 Ni sa tu lia eliu, sa yali ni nomuni lia? Ia ni sa volitakia oti, ko sa yali ni vitalia kinia? “E vaevei ni ko sa vananumia kinia na ka koya ena lomamuni? Ko sa yali ni lasu vi ira na tamata ko sa lasu lia vua na Kalou.”
\v 5 Ia ni sa rogocia na vosa koya ko Ananaiasa, sa bale sobu, ka ciba. A ra sa rere valevu kinia ko ira kece lia sa rogocia na ka koya.
\v 6 A sa tucake ko iratou na cauravou, ka solegi koya, ka colatia ki tuba, ka bulutia.
\p
\v 7 Ia ni sa oti e tolu na aua, sa qai curu mai na watina, a sa yali ni kila na ka sa caka.
\v 8 A tukunia vua ko Pita, Tukunia mai vi au se drau sa volitakia na vanua enai lavo vakoya, se yali? A sa tukunia ko koya, “Io e vaka lia ko ya”
\v 9 Sa qai tukunia vua ko Pita, E vaevei ni drau sa lomavata lia mo drau vatovolea va ca na na Yalo ni Turaga? Raicia, na yavadratou na tamata ratou a bulutia na watimu sa tu koya ena darava, eratou na colati iko voki lia ki tuba.
\v 10 Sa qai bale sobu sara lia ki yavana ko koya, ka ciba: a ratou sa curu mai na cauravou, ka raicia ni sa ciba ko koya, a ratou sa colatia yani, ka bulutia vata lia kei na watina.
\p
\v 11 A ra sa rerevakia valevu kinia ko ira kece nai soqosoqo lewe ni lotu, kei ira vayadua lia era sa rogocia na veika koya.
\p
\v 12 Sa levu nai vatakilakila kei na ka e vivakurabuitaki a vayacoria vi ira na tamata mai na ligadra lia nai apositolo: a ra tiko lomavata kece lia ena varada nei Solomoni;
\v 13 a yali dua vi ira sa vosa doudou me tovata kei ira: a sa varokorokotakia ko ira na tamata:
\v 14 A sa lewe levu voki na turaga kei na marama era vabautia na Turaga ka vaikuritakia lia na kedra levu,
\v 15 a ra sa yadi ira kinia na tauvimate ki na vi gaunisala, a ra sa vadavoria enai mocemoce lelevu kei nai mocemoce lalai, me varurugia eso vi ira na yaloyalo i Pita ni sa qa yani kinia.
\v 16 Era sa lewe levu voki lia sa qai mai na vikoro sa vavolivoliti Jerusalemi, a ra sa yadia mai na tamata eso sa tauvimate, kei ira sa vararawataki ira na yalo velavela eso: a ra sa vabulai vayadua lia.
\p
\v 17 Sa qai tu cake na bete levu, kei ira kece lia era sa dautiko vata kaya, (ko ira lia nai tokani i Setoki,)
\v 18 a ra sa sinai lia ena cudru, a ra sa tauri iratou nai apositolo, ka daini ratou ki na vale ni veivesu.
\v 19 Ia ni sa qai bogi sa dolavia na darava ni vale ni vivesu e dua na agilose ni Turaga, ka yadi ratou mai kinia ka tukunia
\v 20 “Dou qai, ka qai ki tu ena valenisoro, ka tukunia vi ira na tamata na vosa kece lia ni Bula koya.
\v 21 Ia ni ratou sa rogocia, eratou sa curu ki na valenisoro, ni savulaci caca ka vatavuvuli lia. Ia o koya na bete levu kei ira kece lia era sa dau tiko vata, ra soqoni vata na matavilewai, kei ira voki lia na na nodra matua na luvei Isireli, a ra sa tala eso ki na vale ni veivesu me ratou yadi mai.
\v 22 A ratou sa yaco kinia na ovisa, ka raicia ni sa yali dua e tu kinia, a ratou sa lesu voki ka tukunia,
\v 23 ka tukunia “Kitou sa raicia na valenivivesu ni sa sogo kaukauwa tu vata kei ira na kenai vatawa ni ra tucake tu e mata ni darava, ia ni kitou sa dolavia na darava, sa yani ni dua e tu kinia.
\v 24 Ia ni ra sa rogocia na veika ka koya na turaga ni valenisoro kei ira voki lia na bete turaga, era sa kidroa kinia se na tubu beka me vaevei na ka koya.
\p
\v 25 Sa qai qai mai edua, ka tukunia vei ira, Raicia, ko iratou na tamata dou a dainia ki na valenivivesu eratou sa tiko ena valenisoro, ka vavulici ira na tamata.
\v 26 Sa qai qai na turaga kei iratou na ovisa, ka yadi ratou mai, ia eratou a yali ni caka vakaukauwa, ka ni ratou rerevakia de ratou na vavirikia ena vatu mai vi ira lia na tamata ra tu kinia.
\p
\v 27 Ia ni ratou sa yadi ratou mai, eratou sa vaturia ena matadra na matavilewai: a sa tarogi iratou na bete levu,
\v 28 ka tukunia, Kitou a yali beka ni varotia matua vi ikodou mo dou kakua ni vatavuvuli ena yaca koya, oi? Ka raicia, dou sa vasinati Jerusalemi ena nomudoui vavuvuli, dou sa nakitia me kitou tarogia voki lia ena dra ni tamata koya.
\v 29 Sa qai vosa ko Pita kei ratou nai apositolo, ka tukunia, Sa dodonu lia me kitou talairawarawa vua na Kalou, yali ni vi ira na tamata.
\v 30 Na Kalou nodra na noda matua sa vaturi Jisu cake voki lia mai, o koya dou a vamatea ka varubecia ena dua na kau.
\v 31 O koya sa vaceceretakia na Kalou ena ligana i matau me Turaga kai Vabula, me solia kinia na vivutuni kivei ira na Isireli, kei na vabokocia lia ni valavala ca.
\v 32 Kitou sa yaco voki lia mei vadinadinatakia ena veika koya: ka sa vakinia na Yalo Tabu, o koya sa solia na Kalou vi ira sa talairawarawa vua.
\v 33 Ia ni ra sa rogocia, era sa cudru valevu, a ra sa bose mera vamatei iratou.
\p
\v 34 Sa qai tu cake lia e dua ena kedra maliwa na matavilewai, a Farisi, ko Kamelieli na yacana, a vu-ni-vunau, sa rogorogo vinaka vi ira na tamata kece lia, a sa tukunia me yadi valailai lia ki tuba ko iratou nai apositolo;
\v 35 ka sa qai tukunia vi ira, “Oi ikodou na tamata na Isireli, dou lewai ikodou vinaka ena vuku ni ka dou sa nanumia mo dou caka vi iratou na tamata koya.
\v 36 Ni sa tubu cake ena gauna gona ko Cuta, a sa dautukuni koya ka dau nanumia ni sa o koya lia, a ra lewe va na drau na tamata era muri koya. E a qai vamatei kei ira kece lia era dau talairawarawa vua era sa tovoci tani, ka oti yani.
\v 37 Sa oti koya sa qai tubu cake ko Jutasa na kai Kalili ena gauna sa volai kinia na tamata, a ra sa lewe levu sa yadia vatani ko koya me ra muri koya: sa rusa voki lia o koya koya: kei ira vayadua lia era sa talairawarawa vua, era sa tovoci.
\v 38 Ia koya, au sa tukunia vi ikodou, Dou kakua ni torovi iratou ka daini ratou lia: ia kevaka sa i naki se cakacaka vatamata koya ena varusai lia:
\v 39 ia kevaka e sa mai vua na Kalou, dou na yali sara lia ni varusai rawa; dou na laurai voki lia ni dou vivala kei na Kalou.”
\v 40 A ra sa qai yalovata kaya: ia ni ra sa kacivi iratou nai apositolo, ka vakanakuitataki iratou, ka vatulewatakia matua vi iratou me ratou kakua sara ni vosa ena yaca i Jisu, a ra sa qai sereki iratou me ratou qai.
\p
\v 41 Ia ni ratou sa qai tani e matadra na matavilewai, eratou sa reki ni ratou sa yaga me ratou vacacani ena vuku ni yacana.
\v 42 Ia ena visiga kece lia ena valenisoro, kei na vivale kece lia, era sa yali ni mudu ni vatavuvulitakia ka vunautakia ni sai Jisu na Karisito.
\c 6
\cl Wase 6
\p
\v 1 Ia ena gauna koya, ni sa levu na kedrai wiliwili e ra sa lotu, era a kudruvakia ko ira lia vulagi ni vimatanitu tani vi ira na Iperiu, ni ra sa yali ni nanumia na nodra yada ena votai ni yau ena visiga.
\p
\v 2 Sa qai vasoqoni ira vata lia na lewe levu sa lotu ko ira na lewe tinikarua, ka tukunia, “Sa yali ni dodonu me kitou dainia na vosa ni Kalou ka qaravia na tepeli.
\v 3 O koya, koi ikodou na viwekani, mo dou qai raicia lia vi ikodou e lewe vitu na tamata sa dina, sinai ena Yalo Tabu kei na vuku, me kitou lesi iratou ki na cakacaka koya.
\v 4 Ia koi kitou, kitou na gumatuatakia na masu kei na vunautakia na vosa.
\p
\v 5 Era marautakia na lewe levu na vosa koya ka ra digitaki Sitiveni lia e dua na tamata sa sinai ena vabautia kei na Yalo Tabu, Pirokoro, kei Nikanori, kei Taimoni, kei Parimina, kei Filipi, kei Nikola, a tamata lotu va-Jiu mai Anitioki:
\v 6 A ra sa yadia kece lia koya e matadratou na apositolo: ia ni ra sa masu oti, era sa tabaki iratou lia ena ligadra.
\p
\v 7 A sa gumatuatakia na vosa ni Kalou; a sa valevutakia sara na kedrai wiliwili era sa lotu mai Jerusalemi; a sa lewe levu voki lia na bete era sa talairawarawa lia ki na vabautia.
\p
\v 8 Ia ko Sitiveni, vasinaiti tu ena vabautia kei na kaukauwa a sa vayacoria tiko lia eso na ka e vivakurabuitaki kei na cakacaka-mana levu ena kedra maliwa na tamata.
\v 9 Ia sa tucake eso mai na nodra valenilotu a yacadra Ko ira na Sereki, kei na kai Alekisadria eso, kei ira eso mai Silisia, kei Esia, a ra sa viletitakia na ka a tukunia ko Sitiveni.
\v 10 A ra sa yali ni ciqomia rawa na vuku kei na Yalo sa vosa kinia ko koya.
\p
\v 11 E ra a qai vaqumi ira voki eso na tamata me ra tukunia “Kitou sa rogoci koya koya ni sa vosavacacataki Mosese kei na Kalou”
\v 12 A ra sa vauqeti ira na tamata, kei ira na matua, kei ira na vu-ni-vola, a ra sa tauri Sitiveni vakaukauwa ka yadi koya kina matavilewai,
\v 13 a ra sa kacivi ira mai na dau vibeitaki vailasu, ka ratou tukunia, “Sa yali ni mudu na tamata koya ni vosavacacatakia na tikinia tabu koya kei na vunau.
\v 14 Ni kitou a rogocia ni sa tukunia Ena varusa na tikinia koya ko Jisu na kai Nasareci, ka na vukicia sara nai valavala sa soli vi ita ko Mosese.
\p
\v 15 Ko ira kece lia sa tiko ena vale ni vilewai, ni ra sa varaicia matua, era sa raicia na matana ni sa tautauvata kei na mata ni agilose.
\c 7
\cl Wase 7
\p
\v 1 Sa qai tukunia na bete levu “sa va koya na veika koya, se yali?”
\p
\v 2 Sa qai tukunia ko Sitiveni, “oi ikodou na mataviwekani, kei na matua, dou rogocia mada: A Kalou vaiukuuku sa rairai na gauna koya vua na noda matua ko Eparaama ena gauna a tiko kinia mai Mesopotemia, a tiko e muri mai Karana,
\v 3 a sa tukunia vua, Dainia na vanua koya kei ira na wekamu, ka qai ki na vanua ka'u na vatakila vi ikonu.
\p
\v 4 Sa qai dainia na vanua ko Kalitia, a sa qai ka tiko kei Arana mai na vanua koya, ni sa mate ko tamana sa yadi koya na Kalou ki na vanua esa tiko kinia ena gauna koya.
\v 5 E a yali ni soli vua e dua na vanua me taukena, e yali mada lia ni rautia me butukia na yavana: a sa yalayala lia vua ni na solia vei koya e dua na vanua me taukenia, kei ira voki lia na nona kawa, dina ni se yali dua na luvena.
\v 6 A sa tukunia vakoya na Kalou, ni ko ira na nona kawa era na tiko vavulagi lia ena vanua e yali ni nodra; ka ra na vabobulataki ka vararawataki me va na drau na yabaki.
\v 7 A sa tukunia na Kalou, ‘Na matanitu era sa bobula kinia, au na lewa; ka oti, era na qai qai tani mai, ka qaravi au ena vanua koya.’
\v 8 A sa solia vi Eparaama na viyalayalati ni vicili; a sa tamai Aisake ko koya, a sa bogi walu sa qai cilivia ko koya; a sa tamai Jekope ko Aisake; a sa tamadra na matua e lewe tinikarua ko Jekope.
\p
\v 9 Ia ni ra sa vuvutaki Josefa ko ira na matua koya, era sa volitakia ki Ijipita: ia sa tiko vata lia kei koya na Kalou
\v 10 ka sa vabulai koya mai na nona rarawa kece lia, ka solia vua me vinaka ka vuku ena matai Fero na tui Ijipita; a sa lesi voki lia me kovana me lewai Ijipita kei ira kece lia na nona lewe ni vale.
\p
\v 11 Sa qai yaco na dausiga kei na rarawa levu ena vanua taucoko ko Ijipita kei Kenani, a ra sa yali ni kune kakana ko ira na noda matua.
\v 12 Ia ni sa rogocia ko Jekope ni sa tu mai Ijipita na sila, sa qai talai ira na noda matua enai matai ni qaiqai.
\v 13 Ia enai karua ni qai qai, e a vatakilai koya ko Josefa vi ira na tuakana; a sa vatakilai voki lia na mataqaili i Josefa vi Fero
\v 14 Sa qai talai ira na tuakana ko Josefa me qaivi ko Jekope na tamana kei ira kece voki lia na nona mataqali era lewe vitusagavulu ka lima.
\v 15 A sa qai sobu ki Ijipita ko Jekope, a sa mate o koya kei ira na noda matua,
\v 16 a ra sa yadi ki Sikemi, a ra sa bulutia ena i bulubulu ka volia ko Eparaama ena tiki ni siliva e so vei ira na luve i Emori mai Sikemi.
\p
\v 17 Ia ni sa voleka na gauna me vayacoria kinia na vosa ni yalayala, ka bubului kinia na Kalou vi Eparaama, era sa qai tubu ko ira na tamata me ra lewe levu mai Ijipita,
\v 18 ka yacovia na gauna sa buli kinia e dua tani na tui, sa yali ni kilai Josefa.
\v 19 Sa lawakitakia na wekada o koya koya, ka sa vacacani ira na noda qase, me ra sa daini ira kinia na nodra gone ki tuba, me ra kakua ni bula.
\p
\v 20 A sa sucu ko Mosese ena gauna koya, a sa mata vinaka sara ena mata ni Kalou, ka sa susugi vula tolu ena vale nei tamana.
\v 21 Ia ni sa dai ki tuba ko koya, sa roqotia mai na luve i Fero yalewa, a sa susugia me luvena.
\v 22 A sa vakavulici ko Mosese ena nodra vuku kece lia na kai Ijipita, a sa kaukauwa ena nona vosa kei na cakacaka.
\p
\v 23 Ia ni sa yabaki vasagavulu, sa qai tubu ena lomana me via qai ki raici ira na wekana na luve i Isireli.
\v 24 Ia ni sa raicia e dua vi ira sa vacacani, sa totakia, a sa cudruvaki koya lia sa vararawataki, ka sa yavitia na kai Ijipita:
\v 25 ka sa nanumia ko koya era na kila na wekana ni sa ligana ena vabulai ira kinia na Kalou: ka ra sa yali lia ni kila.
\v 26 Ia ena savulaci ni siga taravia, sa rairai ko koya eki na lewe rua erau sa vivala, a sa via vaka vivinakatitaki rau voki, a sa tukunia, ‘Oi kodrau na turaga, drau sa viwekani lia; a cava drau sa vivacacani kodrau kinia?’
\v 27 Ia sa biligi koya tani ko koya sa vacacana na wekana ka tukunia, ‘Ko cei sa lesi iko mo turaga mo mai lewai kimamu?
\v 28 ko sa via vamatei au beka, me vaka lia ko a vamatea na kai Ijipita ena nana?’
\v 29 Sa qai dro ko Mosese ena vuku ni vosa koya, a sa qai ka tiko vulagi tiko ena vanua ko Mitiani, a sa mani sucu kinia e lewe rua na luvena tagane.
\p
\v 30 Ia ni sa oti e vasagavulu na yabaki, sa qai rairai vi koya mai veikau e dua na agilose ni Turaga, ena ulu-ni-vanua ko Saineai, e na yameyame ni buka ena dua na kau.
\v 31 Ia ni sa raicia ko Mosese, sa kidacalatakia na ka sa raicia: ia ni sa torovia me varaicia, sa yaco mai vua na vosa ni Turaga,
\v 32 Oi au na nodra Kalou na nomu matua, na Kalou i Eparaama, kei na Kalou i Aisake, kei na Kalou i Jekope. A sa sautaninini ko Mosese ka sa rerevakia ni varaicia.
\v 33 Sa qai tukunia vi koya na Turaga, ‘Luvatia na nomui vava mai na yavamu: ni sa qele tabu na tikinia ko sa tu kinia.
\v 34 Au a raicia dina sara na nodra rarawa na noqu tamata era sa tiko mai Ijipita, ia ka'u a rogocia na nodra vutugu; ia kau sa qai sobu mai me'u vabulai ira; ia koya, mo ia, au na talai iko ki Ijipita.’
\p
\v 35 Ko Mosese koya, o koya era sa catia, ka tukunia ‘Ko cei sa lesi iko mo turaga ka mo lewa?’ o koya lia koya ka tala na Kalou me turaga kai vabula ena ligana na agilose sa rairai mai vua ena kau.
\v 36 Ko Mosese sa yadi ira tani mai Ijipita ni sa caka oti eso na ka e vivakidacalataki kei nai vatakilakila kei na waitui damudamu kei na veikau, ka yabaki vasagavulu.
\v 37 Ko Mosese koya sai koya ka tukunia vi ira na luve i Isireli, ‘Ko Jiova na nomudou Kalou, ena vatuburia mai vi ira na wekamunu, e dua na parofita me vataki au.’
\v 38 Ko koya koya, sa tiko kei ira nai soqosoqo lewe ni soro ena veikau, kei na agilose sa vosa vua ena ulu-ni-vanua ko Saineai, kei ira na noda qase: a sa rawatia ko koya na vunau bula me solia vi ita:
\v 39 era sa bese ni talairawarawa vua ko ira na noda matua, a ra sa biligi koya tani vi ira a sa suka voki na yalodra ki Ijipita,
\v 40 a ra sa tukunia vi Eroni, ‘Caka eso na noda kalou me ra liutaki ita: ko Mosese koya, o koya ka yadi ita mai na vanua ko Ijipita, eda sa yali ni kila se cava beka sa yaco vua.’
\v 41 A ra sa caka e dua na luve ni bulumakau ena gauna koya, a ra sa vacaboria lia nai soro ki na matakau, a ra sa rekitakia na cakacaka ni ligadra.
\v 42 Sa qai vuki tani na Kalou, ka daini ira tu me ra qaravia na vikalokalo ni lomalagi; me vaka ka a volai ena nodrai vola na parofita, ‘Oi ikodou na mataqali nei Isireli, dou a vacaboria vi au na manumanu sa vamatei, kei nai madrali, ena veikau ka yabaki vasagavulu, se yali?
\v 43 Io, dou a colatia na vale nei Moloke, kei na kalokalo ni nomudou kalou ko Remifani, a matakau dou a caka mo dou soro kinia: Ia ka'u na yadi ikodou yani me sivi ko Papiloni.’
\p
\v 44 Sa tu lia vei ira na noda matua ena veikau na vale ni Kalou sa tu kinia na vunau, me vaka sa vosa kinia o koya, ni sa tukunia vei Mosese, me caka me vaka lia na kenai vatakarakara sa raicia:
\v 45 o koya voki lia era sa tauria emuri na noda matua, era sa qai yadia mai ko ira vi Josua ki na nodra vanua na vimatanitu, ko ira sa tovocia tani na Kalou ena matadra na noda matua, ka yacovia na gauna i Tevita;
\v 46 o koya sa kune loloma mai vua na Kalou, a sa kerea lia me nonai tavi e dua na vale me nei koya na Kalou i Jekope.
\v 47 Ia ko Solomoni lia sa tara na vale me nona.
\p
\v 48 Ia sa yali ni tiko o koya sa cecere sara ena vale sa caka ena liga; me vaka na vosa ni parofita,
\v 49 ‘A noqui tikotiko vaturaga ko lomalagi, Kei nai tutu-ni-yavaqu ko vuravura: A vale cava dou sa tara me noqu? Sa tarogia ko Jiova: Se na tikinia cava me na noqui vavacegu?
\v 50 Sa yali li ni caka na kece lia koya na ligaqu?’
\p
\v 51 Oi ikodou sa yalokaukauwa, ka yali ni cili na yalomudou kei na daligamudou, dou sa dauvoratia tiko lia na Yalo Tabu; ia koi ikodou dou sa caka me vataki ira na nomudou matua.
\v 52 Ko cei vi ira na parofita sa ra yali ni vacacania ko ira na nomudou matua? A ra sa ena vamatei ira era a tukunia ena gauna koya ni na qai mai o koya na Yalododonu; o koya dou sa qai solia yani ka vamatea:
\v 53 ia sa soli vi ikodou na vunau ni sa tukunia eso na agilose, ia dou a yali lia ni vabautia.
\p
\v 54 Ia ni ra sa rogocia na matavilewai na veika koya, sa laucoka na yalodra, a ra sa vasequruquru bati lia vi Sitiveni.
\p
\v 55 Ia ko koya ni sa vasinaiti tu ena Yalo Tabu, sa rai matua ki lomalagi, a sa raicia nai ukuuku ni Kalou, kei Jisu ni sa tucake tu ena liga i matau ni Kalou, a sa tukunia,
\v 56 “Raicia, au sa qai raicia sa wase rua na lomalagi, ka sa wavu tu na Luve ni tamata ena liga i matau ni Kalou.”
\p
\v 57 Era sa qai qoqolou ena domo levu, ka tabonaka na qara ni daligadra, ka cici vakaukauwa vua ni ra sa lomavata,
\v 58 a ra sa dainia ki nai bili ni koro, ka vavirikia ena vatu; ia ko ira era sa beitakia, era sa dainia sobu na nodrai sulu ki na yavana e dua na cauravou, a yacana ko Saula.
\v 59 A ra sa vaviriki Sitiveni ena vatu, ni sa masu tiko lia, ka tukunia “Ikonu na Turaga Jisu, tauria na yaloqu.”
\p
\v 60 A sa tekiduru sobu ko koya a sa kaci ena domo levu, Ikonu na Turaga, kakua ni cudruvi ira enai valavala ca koya. Ia ni sa vosa oti vakoya, sa qai moce.
\c 8
\cl Wase 8
\p
\v 1 A sa duavata lia na nona mate ko Saula. Ia ena gauna koya era sa vacacania valevu kinia nai soqosoqo lewe ni lotu era sa tiko mai Jerusalemi; a ra sa viseyaki kinia ki na viyasana i Jutia kei Samaria, va vo lia ko ira nai apositolo.
\v 2 A ra sa buluti Sitiveni eso na tamata daulotu, a ra sa caka na somate levu ena vukuna.
\v 3 Ia ko Saula sa vacacani ira valevu lia nai soqosoqo lewe ni lotu, ni sa curu ki na vivale kece lia, ka yaratakia na tagane kei ira voki lia na yalewa, ka daini ira ki na vale ni vivesu.
\p
\v 4 Ia ko ira na tamata vabulai vayalo era sa viseyaki, era sa qai kina viyasana kece lia ka vunautakia na vosa.
\v 5 Sa qai qai sobu ko Filipi ki na koro ko Samaria, a sa vunautakia na Karisito kivei ira.
\v 6 Ia ko ira na tamata era sa lomavata me ra varogocia na ka sa tukunia ko Filipi, ni ra sa rogocia na raicia na veika-mana sa caka ko koya.
\v 7 Ni sa qai tani mai vi ira na lewe levu na yalo velavela sa curumia nodra bula, ni ra sa qoqolou tiko lia ena domo levu; kei ira voki lia era lewe levu sa tauvi ira na mate sautaninini, kei na lokiloki, era sa vabulai.
\v 8 A sa ka levu kinia na marau ena koro koya.
\p
\v 9 A sa dua na tamata, ko Saimoni na yacana, sa daucakai sausau makawa ena koro ko ya, a sa vakidacalataki ira valevu kinia na kai Samaria, ni sa dau tukutukuni koya ni sa uasivi vi ira.
\v 10 Ko ira kece na kai Samaria, mai vi ira na lalai kivei ira sa cecere sara, era varogoci koya, ka tukunia “O koya koya na kaukauwa levu ni Kalou”
\v 11 A ra sa varogocia baletia ni sa vakidacalataki ira vadede ko koya ena nonai sausau.
\v 12 Ia ni ra sa vadinati Filipi ni sa vunautakia na veika ni matanitu ni Kalou, kei na yaca i Jisu Karisito, era sa qai papitaisotaki lia, ko ira na tagane kei ira na yalewa.
\v 13 Sa qai vadinatia voki lia ko Saimoni; ia ni sa papitaisotaki oti, erau dau tiko vata kei Filipi; a sa kidacalatakia ko koya ni sa raicia nai vatakilakila kei na cakacaka mana levu sa caka tiko.
\p
\v 14 Ni ra sa qai rogocia ko ira nai apositolo era sa tiko mai Jerusalemi, era sa vadinatia na vosa ni Kalou ko ira na kai Samaria, era sa talai Pita kei Joni vi ira:
\v 15 ia koi rau, ni rau sa qai sobu, erau sa masulakia me soli vi ira na Yalo Tabu;
\v 16 ni se yali ni yacovia e dua vi ira ko koya: era sa papitaisotakia loa lia ena yaca ni Turaga ko Jisu.
\v 17 A rau sa tabaki ira lia ena ligadrau, a ra sa ciqomia na Yalo Tabu.
\p
\v 18 Ia ni sa raicia ko Saimoni sa soli na Yalo Tabu ena vitabaki ni ligadrau nai apositolo, sa qai via solia vi rau nai lavo,
\v 19 ka tukunia, “Solia voki lia mai vi au na kaukauwa koya, me yaco kinia na Yalo Tabu vi ira yadua ka'u na tabakia ena ligaqu.”
\p
\v 20 A sa tukunia vua ko Pita, Mo drau rusa vata kei na nomu siliva, ena vuku ni ko sa nanumia sa voli rawa nai solisoli ni Kalou enai lavo.
\v 21 Sa yali na nomu tikinia se nomui votavota ena ka koya, ni sa yali ni dodonu na yalomu ena mata ni Kalou.
\v 22 O koya koya mo qai vivutunitakia na nomui valavala ca koya, ka masulakia vua na Kalou, me vosotia na nanumia ni yalomu.
\v 23 Niu sa raicia ko sa tu lia ena ka gaga sara, ko sa vesuki enai valavala ca.
\p
\v 24 Sa qai vosa ko Saimoni, ka tukunia “Drau masulakia vua na Turaga me kakua ni yaco vei au e dua na ka drau sa vosa kinia.”
\p
\v 25 Ia koi rau, ni rau sa tukunia oti ka vunautakia na vosa ni Turaga, erau sa lesu voki ki Jerusalemi, ka rau sa vunautakia nai tukutuku-vinaka ena vi koro lalai e levu mai Samaria.
\p
\v 26 A sa vosatakia vi Filipi e dua na agilose ni Turaga, ka tukunia, “Mo ia ka qai vaka ki na mata ni ceva, e na sala sa qai mai Jerusalemi vaka ki Kesa, ko ya e veikau.
\v 27 Sa qai ia ko koya ka qai: ka raicia, e dua na kai Iciopea, a matanivanua, a tamata levu i Kadasi na nodra ranadi na kai Iciopea, a sa nona dauniyau ko koya, sa qai ki Jerusalemi me soro,
\v 28 sa lesu voki tiko, ena nona qiqi-ni-turaga, ka sa wilikia tiko nai vola i Aisea na parofita.
\p
\v 29 Sa qai tukunia vi Filipi na Yalo Tabu, “Qai, ka mo tiko voleka ki na qiqi-ni-turaga ko ya”
\v 30 Sa qai cici yani ko Filipi, ka sa rogocia ni sa wilikia tiko nai vola i Aisea na parofita; a sa tukunia, “O sa kila na ka ko sa wilikia, se yali?”
\p
\v 31 A sa tukunia ko koya, “Au sa rawatia vaevei, kevaka sa yali e dua me tuberi au?” A sa sureti Filipi me cabe yani kina qiqi-ni-turaga ka me rau dabe vata kinia.
\p
\v 32 O koya na tiki ni Vola Tabu sa wilikia ko koya, “Sa tuberia o koya me vaka na sipi me vamatei; Ia me vaka lami sa galu ena mata i koya sa kotivia, Sa vakinia o koya, ni sa yali ni vosa.
\q
\v 33 Ni sa malumalumi tiko o koya, sa yali ni lewai vadodonu: Ia ko cei ena tukunia na nonai tubutubu? Ni sa yadi tani e vuravura na nona bula.”
\p
\v 34 Sa qai vosatakia vi Filipi na matanivanua, ka tukunia, “Au tarogia mada, se sa vosa tiko vi cei na parofita, vi koya se dua voki?”
\v 35 Sa qai dalaga ko Filipi, ka sa vatekivu ena ni Vola Tabu ko ya, a sa vunautakia na kosipeli baleti Jisu vua.
\p
\v 36 Ia ni rau sa toso tiko ena sala, erau sa yacovia e dua na wai: a sa tukunia na matanivanua, “Raicia, sa tu koya na wai; a cava sa tarovia me'u kua kinia ni papitaisotaki?”
\v 37 A sa tukunia ko Filipi, “Kevaka lia ko sa vadinatia ena yalomu taucoko, sa tara lia.” A sa vosa o koya, ka tukunia, “Au sa vadinatia ni sa Luve ni Kalou ko Jisu Karisito.”
\v 38 Sa qai tukunia o koya me tu vadua mada na qiqi-ni-turaga: a rau sa qai sobu ruarua ki wai, ko Filipi kei na matanivanua, a sa papitaisotaki koya kinia ko Filipi.
\v 39 Ia ni rau sa cabe mai wai, sa yadi Filipi tani na Yalo ni Turaga, a sa yali ni raicia voki na matanivanua: ia sa qai ena nona sala o koya ka reki tiko.
\p
\v 40 A sa kune ko Filipi mai Asoto: a sa qai via na vikoro kece lia ka vunautakia nai tukutuku vinaka, a sa yaco sara ki Sisaria.
\c 9
\cl Wase 9
\p
\v 1 Ia ko Saula sa cavutia tiko na vosa vacudrucudru kei na vivamatei vi ira sa lotu vua na Turaga, ka sa qai vua na bete levu,
\v 2 ka sa tarogia vua nai vola ki na vivale ni lotu mai Tamasiko, kevaka e raicia o koya, se ra tagane se ra yalewa, me vesukia ka yadia ki Jerusalemi.
\p
\v 3 Ia ni sa qai voli, sa voleka lia ki Tamasiko; a sa cila vavolivoliti koya vasauri e dua na rarama mai lomalagi:
\v 4 a sa bale sobu ki na qele, ka sa rogocia e dua na domo sa tukunia vua, I Saula, i Saula, ko sa vacacani au ena vuku ni cava?
\v 5 A sa tukunia o koya, “O cei ko iko, na Turaga?” A sa tukunia ko koya, Oi au ko Jisu, o koya ko sa vacana.
\v 6 A sa sautaninini o koya ka kidacalatia, ka tukunia, “Ikonu na Turaga, a cava ko ni sa vinakatia me'u caka? A sa tukunia vi koya na Turaga, Cavu tu, ka qai ki na koro, ka na tukuni vi iko na ka e dodonu mo caka.
\v 7 Ia ko ira na tamata era qai vata tiko, era sa vagagalu lia; era sa rogocia lia na domo, a ra sa yali ni raicia e dua.
\v 8 A sa tucake mai na soso ko Saula; ia ni sa dolavia na matana, sa yali ni raicia e dua na ka: a ra sa tuberi koya, ka yadia ki Tamasiko.
\v 9 A sa bogi tolu ka yali ni rai rawa, ka sa yali voki lia ni kana se somi.
\p
\v 10 A sa dua na tisaipeli mai Tamasiko, na yacana ko Ananaiasa; a sa tukunia vi koya na Turaga ena raivotu, “I Ananaiasa.” A sa tukunia o koya, “Raicia, koi au, Turaga.”
\v 11 A sa tukunia vi koya na Turaga, “Mo cavu tu ka qai ki na salatu, na yacana ko Dodonu, ena vale nei Jutasa, ka tarogia na kai Tarisu ko Saula na yacana; ia raicia, sa masu o koya:
\v 12 ka sa raicia ena raivotu e dua na tamata, ko Ananaiasa na yacana, sa curu mai ka tabakia na ligana me na rai voki.”
\p
\v 13 Sa qai tukunia ko Ananaiasa, “Ikonu na Turaga, era sa lewe levu ka'u sa rogocia kinia nai tukutuku ni tamata koya, na levu ni ca sa cakaa vi ira na nomuni tamata yalosavasava mai Jerusalemi:
\v 14 gona voki lia sa varotia ko ira na bete levu me vesuki ira kece lia sa masutia na yacamunu.”
\p
\v 15 A sa tukuni vi koya na Turaga, “Mo qai lia; o koya koya na tamata koya au sa digitakia, me yadia na yacaqu ki na matadra na vimatanitu tani, kei ira na tui eso, kei ira na luve i Isireli:
\v 16 ni ka'u na vatakilatakia vua na levu ni ka e na vosotia ena vuku ni yacaqu.”
\p
\v 17 A sa qai ko Ananaiasa, ka curu ki na vale, a sa tabakia e na ligana, ka tukunia, “Na wekaqu Saula, na Turaga ko Jisu o koya ka rairai vei iko ena gaunisala ko a qai mai kinia, sa talai au mai mo rai rawa, ka mo vasinaiti voki lia ena Yalo Tabu.”
\v 18 A sa lutu vasauri mai na matana na ka e vaka lia na vari ni ika: a sa rai rawa sara o koya; a sa tucake, ka sa papitaisotaki.
\v 19 Ia ni sa kana oti lia, sa kaukauwa mai. A sa tiko me vica voki na siga kei ira sa lotu mai Tamasiko.
\p
\v 20 A sa vunautakia sara ena vivalenilotu, ni sa Luve ni Kalou na Karisito.
\v 21 A ra sa kurabuitakia kece lia ni ra sa rogocia, a ra sa tukunia, “Sai koya beka koya se yali ka vacacani ira mai Jerusalemi era sa masutia na yaca koya, a sa qai voki lia mai koya me caka vakina, me yadi ira na vesu tu vi ira na bete levu?”
\v 22 A sa kaukauwa cake mai ko Saula, a sa vataqayataki ira na Jiu era sa tiko mai Tamasiko, ni sa vadinadinatakia ni sai Jisu na Karisito.
\p
\v 23 A sa oti e vica na siga, sa ra qai bosea ko ira lia na Jiu me ra vamatea:
\v 24 a sa kila ko Saula na nodra buki vere. A ra sa vatawa na matamata kece lia ni koro e na siga kei na bogi me ra vakamatea.
\v 25 Sa ra qai yadi koya ko ira na nona tisaipeli ena bogi, ka tukucia sobu ena dua na sova ki daku ni bai.
\p
\v 26 Ia ni sa yaco ki Jerusalemi ko Saula, sa via qai ka tiko vata kei ira sa lotu: a ra sa rerevakia kece lia, ka ra yali ni vadinatakia ni sa lotu ko koya.
\v 27 Sa qai yadi koya ko Panapasa vi ira nai apositolo, ka sa tukunia vi ira na nona raicia Turaga ena gaunisala, o koya sa vosa voki lia vua, kei na nona vunau doudou mai Tamasiko ena yaca i Jisu.
\v 28 A sa tiko vata kei ira ka ra qai vata voli mai Jerusalemi: a sa vosatakia vadoudou na yaca ni Turaga ko Jisu;
\v 29 ka vileti kei ira ka vulagi mai na vimatanitu tani; ia a ra sa tovolea tiko lia me ra vamatei koya.
\v 30 Ia ni sa kila ko ira na viwekani, era sa yadi koya ki Sisaria, a ra sa qai vatala ki Tarisu.
\p
\v 31 Sa qai cegu nai soqosoqo lewe ni lotu mai Jutia taucoko kei Kalili kei Samaria, a ra sa vatataki cake; ka sa dau nodrai valavala lia me ra rerevakia na Turaga, ka sa vacegui ira na Yalo Tabu, ka ra sa tubu kinia me ra lewe levu.
\p
\v 32 Ia ni sa qaivia na viyasana kece lia ko Pita, sa qai sobu voki lia vei ira na tamata lotu era sa tiko mai Lita.
\v 33 A sa raicia kinia e dua na tamata ko Inia na yacana, sa davo lia enai mocemoce ka yabaki walu, ni sa tauvi koya na mate sautaninini.
\v 34 A sa tukunia vua ko Pita, “Inia, sa vabulai iko ko Jisu Karisito, tucake, ka vivirakia na nomunu i mocemoce.” A sa tucake sara lia ko koya.
\v 35 A ra sa raicia ko ira kece lia era sa tiko mai Lita kei Sarona, ia era sa saumaki lia mai vua na Turaga.
\p
\v 36 A sa tiko mai Jopa e dua sa lotu ko Tapaica na yacana, a kenai balebale ko Tokasa: sa dau oga sara na yalewa koya ena cakacaka vinaka kei na cakacaka lia ni loloma sa caka tiko.
\v 37 A sa yaco e na gauna gona, sa tauvimate o koya, ka ciba: ia ni ra sa vasilima oti, era sa vakotoria ena dua lia nai taba loma ni vale icolo.
\p
\v 38 Ia ni sa vivolekati lia ko Jopa kei Lita, ka ra sa rogocia ko ira sa lotu ni sa tiko kinia ko Pita, era sa talai e rua na tagane me rau masuti koya me qai mai vatotolo vi ira.
\v 39 Sa qai qai vata mai kei rau ko Pita. Ia ni sa yaco mai, era sa yadi koya ki nai taba loma ni vale icolo: a ra sa tu kinia ko ira kece lia na yada, a ra sa tagi, ka varaitakia vua nai curucuru e so kei nai sulu voki lia ka cula ko Tokasa, ni se bula vata ki ira.
\v 40 A sa vatalai ira kece yani ki tuba ko Pita, ka sa tekiduru lia, ka masu; ka sa vuki vaka ki na yago, ka tukunia “Tapaica, tucake.” A sa dolavia na matana: ia ni sa raici Pita, sa qai duri cake o koya.
\v 41 A sa dodoka vua na ligana, ka tuberi koya cake; ia ni sa kacivi ira na tamata lotu kei ira na yada, sa varaitakia ni sa bula.
\p
\v 42 A ka koya sa kilai mai Jopa taucoko; a ra sa lewe levu sa vabautia na Turaga.
\v 43 A sa tiko ka siga vica voki mai Jopa vata kei Saimoni, a matai ni kuli-ni-manumanu.
\c 10
\cl Wase 10
\p
\v 1 Sa dua na tamata mai Sisaria ko Konilio na yacana, a nodra turaga na mata sotia sa vayacani va-Itali,
\v 2 a tamata daulotu, a sa rerevakia na Kalou, ko koya, kei ira kece lia na nona lewe ni vale, a sa dausolia valevu na ka-ni-loloma vi ira lia na tamata, a sa daumasu vua na Kalou ena visiga.
\p
\v 3 Sa raicia o koya ena raivotu, enai kaciwa ni aua, e dua na agilose ni Kalou ni sa curu vua, a sa tukunia vua, “I Konilio.”
\p
\v 4 Ia ni sa varaicia, sa rerevakia, ka tukunia, “Sa vaevei noqu Turaga?” A sa tukunia vua o koya, “A nomu masu kei na nomu ka-ni-loloma lia sa qai cake ki na mata ni Kalou mo nanumi kinia:
\v 5 ia mo tala na tamata eso ki Jopa, me yadi Saimoni mai, a yacana voki lia ko Pita:
\v 6 sa tiko vata o koya kei Saimoni na matai ni kuli-ni-manumanu, ka tiko e baravi na nona vale: ena tukunia vei iko o koya na ka e dodonu mo caka”
\v 7 Ia ni sa lesu voki na agilose ka vosa vi Konilio, sa qai kacivia e lewe rua na nona lewe ni vale, ka dua na sotia sa daulotu, e dua vi ira sa dauqaravi koya:
\v 8 ia ni sa tukunia vi iratou na ka kece lia, sa qai talai iratou ki Jopa.
\p
\v 9 Ia ena savulaci lia ni siga taravia, ena i ka ono ni aua, ni ratou sa qai tiko e na gau-ni-sala, ka toro voleka ki na koro, sa cabe cake ki dela ni vale ko Pita me masu enai ka ono ni aua;
\v 10 a sa viakana sara, ka garovia na ka me kania: ia ni ra sa varautakia tiko, sa raicia na raivotu,
\v 11 sa raicia na lomagi ni sa tawase rua, a sa dua na ka sa qai sobu mai vua, sa vaka nai tutuvi levu sa buki na tutuna vava, a sa tukucitakia sobu mai ki vuravura;
\v 12 a sa tiko kinia na manumanu ni vanua e yavai va e dui nodra vi mataqali kece lia, kei na manumanu kila, kei na veika lia sa dauqasi voli kei na manumanu vuka.
\v 13 Sa qai rogocia e dua sa vosa vua ka tukunia “Tu cake Pita; mo vamatea, ka kania.”
\p
\v 14 A sa tukunia ko Pita, “Me'u kua noqu Turaga; ni'u a yali ni kania na ka sa tabu se yali ni savasava.”
\p
\v 15 A sa varuatakia voki vua na vosa, “A ka sa vasavasavatakia na Kalou, mo kakua ni vatatabutakia.”
\v 16 E a yaco vatolu na ka koya: a sa qai yadi voki na ka ki lomalagi.
\p
\v 17 Ia ni se taqayatakia tiko lia o Pita se cava nai balebale ni raivotu, raicia, sa tarogia na vale i Saimoni ko iratou na tamata sa tala ko Konilio, a ratou sa tu e na matamata-ni-koro;
\v 18 a ratou sa kacivia, ka tarogia, se sa tiko gona se yali ko Saimoni, a yacana voki lia ko Pita.
\p
\v 19 Ia ni se vananumia tiko lia na raivotu ko Pita, sa tukunia vi koya na Yalo Tabu, “Raicia, e lewe tolu na tamata sa vaqarai iko.
\v 20 Mo tu cake kinia ka qai sobu, ia mo qai vata kei iratou, ka kakua ni viletitakia na qai vata kei iratou, baletia ni'u sa talai iratou mai.”
\p
\v 21 Sa qai qai sobu ko Pita vi iratou na tamata; ka sa tukunia, “raicia, koi au lia koya dou sa vaqara: a cava na vu ni nomudou qai mai?”
\p
\v 22 A sa tukunia, “Sa dua na agilose yalosavasava sa vatakilatakia vi Konilio, e dua na turaga ni valu, a tamata yalododonu, ka sa rerevakia na Kalou, a sa rogorogo vinaka vi ira kece lia na kai Jutia, me qai vi iko, mo mai qai ki nona vale, me rogocia vi iko na vosa o koya.
\v 23 Sa qai kacivi iratou mai o koya ka vacegui ratou. Ia ena savulaci ka taravia, sa qai qai vata kei iratou ko Pita, kei so voki lia viwekani mai Jopa.
\p
\v 24 Ia, ena siga lia ka taravia, eratou sa curu ki Sisaria. A sa warakia tiko na nodratou yaco yani ko Konilio, a sa vasoqoni ira vata na wekana kei ira na nonai tokani voleka.
\v 25 Ia ni sa curu yani ko Pita, sa tavakia mai ko Konilio, a sa cuva sobu ki yavana, ka varokorokotakia.
\v 26 A sa vaturi koya cake ko Pita, ka tukunia, “Tu cake; au tamata voki lia koi au.”
\p
\v 27 Ia ni rau sa vivosaki tiko, ka curu yani e loma, ka raicia ni ra lewe levu era soqoni tiko kinia.
\v 28 A sa tukunia vi ira o koya, “Dou sa kila ni sa ka tabu vua na kai me vimaliwai, se me sikovia na tamata sa lewe matanitu tani; ia sa vatakilatakia vi au na Kalou me'u kakua ni vatoka e dua na tamata me tabu se yali ni savasava.
\v 29 O koya lia koya ka'u sa qai mai kinia ka yali ni viletitakia, ni'u sa qaivi yani; au sa tarogia kinia se cava dou sa qaivi au yani kinia?”
\p
\v 30 A sa tukunia ko Konilio, “Sa oti koya e va na siga ena gauna vata lia koya, Au a masu tiko kinia ena noqu vale enai ka ciwa ni aua, ka raicia e dua na tamata, tu cake tiko e mataqu ka serau na nonai sulu.
\v 31 A sa tukunia, Konilia, sa rogocia na nomu masu na Kalou kei na nomu ka-ni-loloma voki lia sa nanumia na Kalou.
\v 32 O koya lia koya mo tala e dua ki Jopa me qaivi Saimoni mai, a yacana voki lia ko Pita; sa tiko o koya ena vale nei Saimoni na matai ni kuli-ni-manumanu mai baravi: ia ni sa qai mai o koya, ena vosa vi iko.
\v 33 O koya lia koya ka'u talatala yani kinia vi ikonu, ia ni sa yalovinaka, ka ni sa qai mai. Kimamu sa qai tiko kece lia koya ena mata ni Kalou, me kimamu rogocia na ka kece lia sa varotakia vi ikonu na Kalou.”
\p
\v 34 Sa qai vosa ko Pita, ka tukunia, “E dina, ka'u sa qai kila ni sa yali ni digitakia vailoa na tamata na Kalou:
\v 35 ia ena vivanua kece lia, o koya lia sa rerevakia ka caka dodonu, sa vinaka vua na Kalou.”
\v 36 Ai vavuvuli sa tukunia o koya vi ira na luvei Isireli, ni sa vunautakia na vivinakati ena vuku i Jisu Karisito: (o koya lia sa Turaga vi ira kece lia):
\v 37 ai vavuvuli ko ya, dou sa kila, sa vunautakia mai Jutia taucoko, a sa tekivu mai Kalili, ni sa oti na papitaiso ka vunautakia ko Joni;
\v 38 ni sa lumuti Jisu na kai Nasareci na Kalou ena Yalo Tabu kei na kaukauwa: o koya sa qai voli ka daucaka vinaka, a sa vabulai ira kece lia sa vasaurarataki ira na tevoro; ni sa tiko vata kaya na Kalou.
\p
\v 39 Ia kitou sa yaco mei vadinadina lia ena ka kece lia sa caka ko koya ena nodra vanua na kai Jutia, mai Jerusalemi voki lia; o koya era sa vamatea ni ra sa varubecia ena dua na kau:
\v 40 ka vaturi koya cake na Kalou enai katolu ni siga, a sa vatakilai koya votu;
\v 41 e yali vi ira na tamata kece lia, vi ira lia ka digitakia taumada na Kalou, me ra dautukunia, io vi kitou, koi kitou a kana ka somi ni sa tucake voki mai na mate o koya.
\v 42 A sa varotia vi kitou me kitou vunautakia vi ira na tamata, ka vadinadinatakia ni sai koya lia ka lesia taumada na Kalou me lewai ira na bula kei ira voki lia na mate.
\v 43 O koya era sa dautukunia ko ira kece lia na parofita, ni na bokoci na nodrai valavala ca na tamata kece lia era sa vabautia na yacana.
\p
\v 44 Ni se tukunia tiko lia na vosa koya ko Pita, sa lutu na Yalo Tabu kivei ira kece lia era sa rogocia na vosa.
\v 45 Ko ira sa cili ka tamata vabautia, o ira na qai vata mai kei Pita, era sa kurbauitakia, ni sa sovaraki na Yalo Tabu ka vavoki lia vi ira sa lewe ni matanitu tani.
\v 46 Ni ratou sa rogocia ni ra sa vosatakia na vosa ni vivanua tani, ka varokorokotaka na Kalou. Sa qai tukunia ko Pita,
\v 47 Sa dua beka na tamata e bureitakia na wai me ra kakua ni papitaisotaki ko ira na tamata koya, ni sa lutu voki lia na Yalo Tabu vi ira me vataki ita?
\v 48 A sa qai tukunia me ra papitaisotaki ena yaca i Jisu Karisito. A ra sa qai masuti koya me tiko vata mada kei ira ena vica voki na siga.
\c 11
\cl Wase 11
\p
\v 1 A ra sa rogocia ko ira nai apositolo kei ira na viwekani mai Jutia ni ra sa vabautia na vosa ni Kalou ko ira voki lia era sa lewe ni matanitu tani.
\v 2 Ia ni sa qai icolo mai Jerusalemi ko Pita, era sa vileti kaya kei ira sa cili,
\v 3 a ra sa tukunia, “Ko sa curu vi ira na tamata era sa yali ni cili, ka kana vata kei ira!”
\p
\v 4 A sa vatekivu ko Pita, ka vamacalatakia vamatailalai na ka vi ira, ka tukunia,
\v 5 Au a tiko e na koro ko Jopa ka masu: ia ka'u a raicia na raivotu, Sa dua na ka sa qai sobu mai, e vaka nai tutuvi levu, sa tukuci sobu mai lomalagi ena tutuna vava; a sa yaco sara kivei au:
\v 6 ia ni ka'u sa varaicia matua, ka vananumia, au sa raicia kinia na manumanu ni vanua e yavai va, kei na manumanu kila, kei na veika sa dauqasi voli, kei na manumanu vuka.
\v 7 Au sa qai rogocia e dua na vosa sa tukunia vei au, ‘Tu cake, Pita; mo vamatea, ka kania.’
\p
\v 8 Au sa qai tukunia, ‘Kakua noqu Turaga; ni sa yali na ka tabu se na ka yali ni savasava sa curu ki na gusuqu ena dua na siga.’
\p
\v 9 A sa rogo voki vi au na vosa mai lomalagi, ‘A ka sa vasavasavatakia na Kalou, mo kakua ni vatatabutakia.’
\v 10 A sa caka vatolu na ka koya: a sa qai yadi voki kece ki lomalagi.
\p
\v 11 Ka raicia, e lewe tolu na tamata sa tu cake tu ena mata ni vale kitou a tiko kinia, eratou a sa talai mai Sisaria vi au.
\v 12 A sa tukunia vi au na Yalo Tabu, me'u qai vata kei iratou ka me kakua ni vileti na lomaqu. Keitou a qai vata voki lia kei na lewe ono na viwekani, ka kitou sa curu ki nona vale na tamata ko ya,
\v 13 a sa tukunia vi kitou ko koya ni sa raicia na agilose ena nona vale, sa watu tu, ka tukunia vua, ‘mo talatala ki Jopa, me yadi mai ko Saimoni, a yacana voki lia ko Pita;
\v 14 ko koya ena tukunia vi iko na vosa ko na bula kinia, kei ira kece lia na nomu lewe ni vale.’
\v 15 Ia ni ka'u sa vatekivu lia me'u vosa, era a curumi ena Yalo Tabu, me vaka vi ita ena kenai vatekivu.
\v 16 A qai nanumia na vosa ni Turaga, ni a tukunia ko koya, ‘sa dina sa vipapitaisotaki ko Joni ena wai; ia dou na papitaisotaki ena Yalo Tabu.’
\v 17 Ia ni sa qai solia vi ita na Kalou nai solisoli me vaka vi ita, ni da sa vabautia na Turaga ko Jisu Karisito; ko cei koi au me'u tarovia rawa na Kalou?
\p
\v 18 Ia ni ra sa rogocia na veika koya, era sa galu lia, a ra sa varokorokotakia na Kalou, ka tukunia, “Sa dina sa qai solia na Kalou vi ira voki lia na lewe vimatanitu tani na vivutuni me ra bula.”
\p
\v 19 Ia ko ira a viseyaki ena vivakacacani ka tubu e na vuku i Sitiveni, era a qai vaka ki Finaisi kei Kipiro, kei Anitioki, a ra sa tukunia na vosa vi ira dua loa lia na Jiu.
\v 20 A sa so lia vi ira era sa kai Kipiro kei Kirini, ni ra sa yaco ni Anitioki, era sa vosatakia vi ira era sa vulagi mai na vimatanitu tani, a ra sa vunautakia na Turaga ko Jisu,
\v 21 a sa tiko vata kei ira na liga ni Turaga: a ra sa lewe levu era sa vabautia, a ra sa saumaki mai vua na Turaga.
\p
\v 22 Sa qai yaco na kedrai tukutuku kivei ira nai soqosoqo lewe ni lotu mai Jerusalemi: a ra sa talai Panapasa, me lako sara ki Anitioki:
\v 23 ia ni sa tadu ko koya, ka raicia na cakacaka loloma ni Kalou, sa rekitakia, a sa vakrotia vi ira kece lia me ra kabitia matua na Turaga ena loma e gumatua.
\v 24 Ni sa tamata vinaka lia ko koya, a sa sinai e na Yalo Tabu kei na vabautia: a sa lewe levu kinia na tamata sa vaikuritakia vua na turaga.
\p
\v 25 Sa qai qai ko Panapasa ki Tarisu, me vaqarai Saula:
\v 26 ia ni sa raica, sa yadi ko ya ki Anitioki. A sa dua na yabaki taucoko era sa dausoqoni vata kinia kei ira nai soqosoqo lewe ni lotu, ka ra sa lewe levu erau sa vavulicia. Ia mai Anitioki era sa vatokai taumada ko ira sa lotu mei tokani i Karisito.
\p
\v 27 Ia ena gauna ko ya sa qai mai na parofita eso mai Jerusalemi ki Anitioki.
\v 28 A sa tu cake e dua vi ira, ko Akapo na yacana, a sa tukunia, ka sa vavuna na Yalo Tabu, ni na yaco taumada na dausiga levu ena vanua taucoko; a ka koya sa yaco lia ena gauna sa tui kinia ko Kilotiu.
\v 29 Ia era sa lewa ko ira sa lotu me ra solia yadua na nodra ka-ni-loloma, me vaka era sa dui rawatia, vi ira na viwekani era sa tiko mai Jutia:
\v 30 a ra sa caka kinia, ka rau a yadia ko Panapasa kei Saula vi ira na qase.
\c 12
\cl Wase 12
\p
\v 1 Ia ena gauna gona sa caka ko Eroti na tui me vararawatakia eso vi ira nai soqosoqo lewe ni lotu.
\v 2 E a vamatei Jemesa na tuakai Joni enai seleiwau.
\v 3 Ia ni sa raicia ni ra taleitakia ko ira na Jiu, sa qai vesuki Pita voki lia. Ia gona na gauna sara lia ni kana madrai yali ni valeveni.
\v 4 Ka ni sa tauria, ka dainia ki na vale ni veivesu, a sa solia ki na mata-sotia e va eratou dui lewe va, me ratou vatawai koya lia; ni sa nanumia me yadi koya vi ira na tamata, ni sa oti lia na kana vata ni qai-sivia.
\p
\v 5 A sa vatawai kinia ko Pita ena vale ni vivesu, ia era sa masulakia tiko lia ko ira nai soqosoqo lewe ni lotu vua na Kalou na nona bula.
\v 6 Ia ena bogi ni bera ni qai ko Eroti me lai yadi koya ki na matavilewai, ko Pita a moce tiko ena kedrau maliwa e lewe rua na sotia, a sa vesu e na sinucodo e rua; a ra sa tiko voki lia nai vatawa ena mata ni darava, me ra vatawa na vale ni vivesu.
\v 7 Ka raicia, sa dua na agilose ni Turaga sa qai mai, a sa cila yani ena na rarama ki na vale ni vivesu; a sa tavia ko koya na sarisari i Pita, a sa vaduria cake, ka tukunia “Kusa rawa mo tu cake.” A sa lutu tani mai na ligana na nona sinucodo.
\v 8 A sa tukunia vi koya na agilose, “daramakia na nomui sulu, ka daramakia voki lia na nomui vava. A sa cakaa vakinia. A sa tukunia vua, “Mo vaitutuvitaki iko mada ka muri au.”
\v 9 A sa curu yani na agilose ka muri koya ko Pita: a sa yali ni kila ni sa dina na ka sa caka na agilose; a sa nanumia lia ni raicia tiko ena raivotu.
\v 10 Ia ni rau sa sivi nai matai ni vatawa kei nai kenai karua, erau sa yacovia nai sogo kaukaumea, sa basika ki na koro; a sa tadola lia vakai koya vi rau: a rau sa qai sara ki tuba; ka sivia e dua na gau-ni-sala; a sa qai tani vasauri vua na agilose.
\v 11 Ia, ni sa kilai yalona mai ko Pita, a sa tukunia, “Au sa qai kila dina sara lia, ni sa tala mai na nona agilose na Turaga, a sa vabulai au mai na liga i Eroti, vata kei na nodra i naki voki lia na kai Jutia.
\p
\v 12 Ia ni sa vasamatakia tiko lia, sa qai ki na vale nei Meri na tinai Joni, a yacana voki lia ko Marika, era soqoni vata kinia me ra masu.
\v 13 Ni sa tukituki ena sogo ni matamata-ni koro, sa qai mai e dua na yada a yacana ko Rota me rogocia.
\v 14 Ia ni sa kila na domo i Pita, sa yali mada ni dolavia nai sogo ni sa reki, a sa cici voki ki loma ka tukunia ni sa tu ko Pita ena matamata-ni-koro.
\v 15 A ra sa tukunia vua, “Ko sa lialia.” Ia sa vadinadinatakia o koya ni sa vaka lia kinia. A ra sa qai tukunia, “Sa nona agilose.”
\v 16 Sa tukituki tiko lia ko Pita: ia ni ra sa dolavia, era sa raicia, ka ra kidacalatakia.
\v 17 A sa vatabataba vi ira o koya me ra tiko lo; ka sa tukunia vi ira ni sa yadi koya mai na vale ni veivesu na Turaga. A sa tukunia “Laki tukunia na veika koya vei Jemesa, vei ira voki lia na viwekani. A sa qai dai ni ira ka qai voki ki na dua na vanua.
\p
\v 18 Ia ni sa siga mai, sa yali ni lailai na nodra kidroatakia na sotia, se sa qai beka kivei ko Pita.
\v 19 Ia ni sa vaqarai koya ko Eroti ka yali ni raicia, sa tarogi ira lia nai vatawa, a sa tukunia me ra vamatei. A sa qai sobu o koya mai Jutia ki Sisaria, ka tiko kinia.
\p
\v 20 Ko Eroti a sa cudruvi ira valevu sara lia na kai Taia kei Saitoni: a ra sa duavata kinia me ra qai vua: ia ni ra sa rawai Pilasito, o koya sa lewa na vale ni moce nei Eroti, me vukei ira, era sa masulakia na vivinakati; ena vuku ni sa dau yadi mai na kedra mai na nona vanua na tui.
\v 21 Ia ena siga ra sa lokucia, sa vaisulu lia ko Eroti enai sulu vaturaga, a sa dabe enai dabedabe vaturaga, ka sa vosa vi ira.
\v 22 Sa ra qolouvakia ko ira na tamata, “Sa domo ni kalou koya, sa yali ni tamata!”
\v 23 A sa yaviti koya vasauri e dua na agilose ni Turaga, baletia ni yali ni varokorokotakia na Kalou o koya; ka sa kani koya na baca, ka sa ciba o koya.
\p
\v 24 Ia na vosa ni Kalou sa tubu ka levu sara mai.
\p
\v 25 A rau sa lesu voki ki Jerusalemi ko Panapasa kei Saula, ni sa vaoti lia na nodrau cakacaka, ka rau sa yadi Joni, a yacana voki lia ko Marika.
\c 13
\cl Wase 13
\p
\v 1 A sa tiko vei ira nai soqosoqo lewe ni lotu mai Anitioki eso na parofita kei nai vavuvuli: ko iratou ko Panapasa, kei Simioni, na yacana voki lia ko Nikeri, kei Lusiu na kai Kirini, kei Manaini, o koya erau sa susugi vata kei Eroti na turaga, kei Saula.
\v 2 Ia ni ratou sa cakacaka vua na Turaga, ka lolo tiko, sa tukunia na Yalo Tabu, “Lesi rau mai vi au ko Panapasa kei Saula ki na cakacaka ka'u sa kacivi rau kinia.”
\v 3 Ni sa oti lia na nodratou lolo, masu kei na vitabaki ena ligadratou, a ratou sa vatalai rau yani.
\p
\v 4 Ia koi rau koya ni sa vatalai rau na Yalo Tabu, erau sa qai ki Selusia; mai gona, a rau sa soko sara lia ki Saipurusi.
\v 5 Ia ni rau sa tiko mai Salamisa, erau sa vunautakia na vosa ni Kalou ena nodra vivalenilotu na Jiu; ka vukei rau kinia ko Joni.
\p
\v 6 Ia ni ratou sa qaivia taucoko na loma ni yanuyanu ka yaco ki Pafo, eratou sa qai raicia e dua na dauvadraunikau, a parofita vailasu ka kai Jutia, a yacana ko Pari-Jisu:
\v 7 Na dauvadraunikau koya e vimaliwai kei na turaga ni vanua, ko Serikiu Paula, a tamata yalomatua: o koya sa kacivi Panapasa kei Saula, ni sa via rogocia na vosa ni Kalou.
\v 8 A sa tarovia ko Elima na dauvadraunikau, (koya nai balebale ni yacana), ka saqati rau, ka vatovolea me saumakia tani na turaga me kakua ni vabautia.
\v 9 Ia ko Saula, o koya voki lia sa kacivi ko Paula, ni sa sinai e na Yalo Tabu, sa varaici koya matua,
\v 10 ka sa tukunia “Ko iko ka sinai e na dauvivakaisini kece kei na ca kece lia, a luve ni tevoro, a meca ni ka kece lia e dodonu, ena yali beka ni oti na nomu vukicia nai naki dodonu ni Turaga?
\v 11 Ia koya, raicia, sa bikai iko na cudru ni Turaga, ko na mataboko kinia, mo yali ni raicia rawa na mata-ni-siga ena dua na gauna koya.” A sa lutu vasauri lia vi koya na kabukabu kei na butobuto; a sa vayayamotakia voli ni qara eso me ra tuberia.
\v 12 Ni sa raicia na turaga na ka sa caka sa vabautia, ni sa kurabuitakia nai vavuvuli ni Turaga.
\p
\v 13 Ia ko Paula kei iratou sa qai vata kaya, eratou sa soko mai Pafo ki Perika mai Pamifilia; a sa daini rau ko Joni, ka lesu voki ki Jerusalemi. Ko Paula kei na nonai tokani,
\v 14 erau sa qai mai Perika ki Anitioki mai Pisitia, e ra sa curu ki na valenilotu e na siga ni vacecegu, ka tiko sobu.
\v 15 Ia ni sa wilikia oti nai vola ni vunau kei ira na parofita, sa qai talaki vi rau ko ira na turaga ni valenilotu, ka tukunia, “Oi kodrau na viwekani, kevaka e tu vi kodrau e dua na vosa ni vavuvuli vi ira na tamata, drau vosatakia lia mai.”
\p
\v 16 Oi ikonu na Isireli, kei ikonu sa rerevakia na Kalou, ni rogocia koya.
\v 17 A nodra Kalou na tamata koya, io na nodra na Isireli, sa ra digitakia oti na noda matua, a sa valevui ira na tamata, ni ra sa tiko vulagi mai na vanua ko Ijipita, a sa yadi ira mai kinia ena ligana kaukauwa.
\v 18 Ia ni sa vosotia ko koya na nodrai valavala ena veikau ka yabaki vasagavulu;
\v 19 ka sa vakawabokotakia na matanitu e vitu e na vanua ko Kenani: sa qai solia vi ira na nodra vanua me ra taukenia. Na veika kece koya a yaco tiko ena va na drau limasagavulu vacaca na yabaki.
\v 20 Sa oti koya, sa qai lesia eso na turaga ni lewa me yacovia na gauna i Samuela na parofita.
\v 21 Sa oti koya, era sa qai gadrevia me dua na nodra tui; a sa soli Saula vi ira na Kalou, ko koya sa luve i Kisi, a tamata ena yavusa i Penijamini, ka yabaki vasagavulu na nona tui.
\v 22 Ia ni sa yadi koya tani, sa qai vatuburi Tevita me nodra tui; a sa tukunia na ka koya na Kalou me baleti Tevita, “Au sa kunei Tevita na luve i Jese, a tamata sa muria na lomaqu o koya ena caka kece lia na ka au gadrevia.”
\p
\v 23 Mai na nona kawa, me vaka lia na vosa ni yalayala, sa vatuburia na Kalou vi ira na Isireli nai Vabula, ko Jisu:
\v 24 Ni se bera na yaco mai ko Jisu, sa liutakia mai ko Joni na nona vunautakia na papitaiso ni vivutuni kivei ira kece lia na Isireli.
\v 25 Ia ni sa vaotia tiko na nona cakacaka ko Joni, sa tukunia, “Ikonu sa nanumia se ko cei koi au? Au sa yali ni ko koya: ka raicia, e dua sa muri au mai, a nonai vava mada lia au yali ni dodonu me'u serekia.”
\p
\v 26 Oi kemunu na veiwekani, na kawa i Eparaama, kei ira kecelia vei kemunu sa rerevakia na Kalou, sa talai vei ita na vosa bula koya.
\v 27 Ko ira era sa tiko mai Jerusalemi, kei na nodra turaga, ni ra sa yali ni kilai koya, se na nodra vosa na parofita, sa wili e na veisiga ni vakacecegu, era sa vakayacora lia ni ra sa lewai koya me mate.
\v 28 Ka sa dina era sa yali ni raicia e dua na ka sa dodonu me mate kinia, ia era sa masuti Pailato lia me vamatei ko koya.
\v 29 Ia ni ra sa vayacoria oti na ka kece lia sa volai ena vukuna, era sa kevutakia sobu mai na kau, ka bulutia ena dua nai bulubulu.
\v 30 A sa vaturi koya cake voki mai na mate na Kalou;
\v 31 ka levu sara na bogi sa rairai kinia o koya vi ira era a qai vata kaya mai Kalili ki Jerusalemi, a ra sa i vadinadinatakia ko ira gona vi ira na tamata.
\v 32 Ia kirau sa tukunia vi ikonu nai tukutuku vinaka ni yalayala ka caka vi ira na matua,
\v 33 ni sa vayacoria na Kalou vi ita na luvedra, ni sa vatuburi Jisu cake voki ko koya; me vaka na ka sa volai enai karua ni Same, ‘Ko iko na Luvequ, au sa vatuburi iko ena siga koya.’
\p
\v 34 Ia ena vuku ni sa vaturi koya cake mai na mate, me kakua ni vuca voki, sa tukunia vakoya o koya, ‘Au na solia vi ikodou na veika sa yalatakia dina vi Tevita.’
\v 35 Ka sa tukunia voki lia kinia ko koya e na dua na voki Same, O na yali ni dainia na nomu Le dua sa yalosavasava me vuca mai.
\v 36 Ia ko ko Tevita, ni sa qaravia oti na nonai tabatamata me vaka lia na lewa ni Kalou, sa qai moce, a sa bulutia vata kei ira na nona matua, a sa vuca mai:
\v 37 ia ko koya sa vaturia cake voki na Kalou, sa yali ni vuca.
\p
\v 38 O koya gona mo ni kila na viwekani, ni sa vunautakia vi ikonu na vabokoci ni valavala ca ena vukuna koya:
\v 39 ena vukuna voki lia sa vadonui ko ira kece lia, ko ni sa yali ni vadonui rawa kinia e na vunau i Mosese.
\v 40 O koya koya mo ni qai raici ikonu vinaka, de yaco vi ikonu na ka vosa kinia ko ira na parofita:
\v 41 Raicia, koi ikodou sa daubeca, ia mo dou kidacala, ka rusa: Ni'u sa caka e dua na cakacaka e na nomudou gauna, A cakacaka dou na yali sara ni vadinatakia, kevaka sa dua e tukunia vi ikonu.
\p
\v 42 Ni rau sa dainia mai na vanua gona ko Paula kei Panapasa, era sa qai kerea me rau la'ki vunautakia voki vi ira na veika koya ena siga ni vacecegu ka taravia.
\v 43 Ni ra sa dui suka ko ira nai vavakoso, a ra sa lewe levu vi ira na Jiu kei na tamata sa lotu va-Jiu, era sa muri Paula kei Panapasa: a rau sa vosa vi ira, ka vadretakia vi ira, me ra tauria tudei na loloma ni Kalou.
\p
\v 44 Ena siga ni vacecegu ka taravia, e a voleka ni ko ira kece sara lia na lewe ni koro era soqoni vata me ra rogocia na vosa ni Kalou.
\v 45 Ia ni ra sa raicia ko ira na Jiu ni ra sa lewe levu, era sa vuvu valevu, ka ra valasuya na veika sa tukunia ko Paula, ka vosa vacacatakia:
\v 46 A rau sa qai douvakia ko Paula kei Panapasa na vosa, ka tukunia, E dodonu lia me vunautaki eliu vi ikodou na vosa Kalou: ia ni dou sa dainia tani vi ikodou, ka lewai ikodou ni sa yali ni ganiti ikodou na bula yali ni mudu, raicia, kirau sa qai vi ira na kai matanitu tani:
\v 47 ni sa varotia vakinia vi kitou na Turaga, “Au sa vaturi iko mo nodra rarama na vimatanitu, Mo yaco mo vu ni bula ki nai yalayala kei vuravura.
\p
\v 48 Ia ni ra sa rogocia ko ira na kai matanitu tani, era sa reki, ka ra varokorokotakia na vosa ni Turaga: ia era sa vabautia ko ira kece lia era sa varautaki tu ki na bula yali ni mudu.
\v 49 A sa tete na vosa ni Turaga ki na viyasana kece lia koya.
\p
\v 50 Ia ko ira na Jiu era sa vayavalati ira lia na yalewa lotu, kei ira na marama, kei ira na turaga ni koro ka vatuburia lia na vivacacani vi rau ko Paula kei Panapasa, ka vasavi rau tani mai na nodra vanua.
\v 51 A rau sa kuretakia lia vi ira na soso mai na yavadrau, a rau sa qai sara ki Ikoniona.
\v 52 Ia ko ira sa lotu era sa vasinaiti ena marau kei na Yalo Tabu.
\c 14
\cl Wase 14
\p
\v 1 A rau sa yaco ki Ikoniona, ko Paula kei Panapasa ka rau gole vata sara lia ki na nodra valenilotu na Jiu, ka rau sa vosa, ka sa lewe levu na Jiu kei ira na kai matanitu tani era sa vabautia.
\v 2 Ia ko ira na Jiu era vatitiqatakia, era sa vatuburia na lomadra na kai matanitu tani, me ra lomacatakia na wekadra.
\v 3 A rau sa tiko vadede kinia ka vosa doudou e na vuku ni Turaga, ko koya sa vatakila ni sa dina na vosa ni nona loloma, ka solia me caka ena ligadrau ko Paula kei Panapasa eso nai vatakilakila lia kei na veika e vivakurabuitaki.
\p
\v 4 Ia, ko ira na lewe ni koro, a ra sa tawase rua, eso sa totaki ira na Jiu, ka so sa totaki rau nai apositolo.
\v 5 Ia era sa qai nakitia eso na kai matanitu tani kei ira na Jiu vata kei ira voki lia na nodra Turaga me ra vacacani rau ka vaviriki rau ena vatu,
\v 6 ia ena gauna lia rau sa kila kinia, rau sa dro ki na koro ko Lisitira kei Tapi mai Likeonia kei na yasana vavolivolitia:
\v 7 ka rau sa vunautakia voki lia, mai gona nai tukutuku-vinaka.
\p
\v 8 A sa tiko mai Lisitira e dua na tamata ka malumalumu na yavana ni a sucu lokiloki mai na kete i tinana, a sa yali ni qai rawa ena dua na siga:
\v 9 a sa rogocia ni vosa tiko ko Paula; A sa wanonovi koya matua ko Paula ka raicia ni sa tu vua na vabautia me vabulai kinia,
\v 10 a sa vosa e na domo levu, “Tu vadodonu cake.” A sa rika lia ko koya, ka tekivutakia kinia na nona qai.
\p
\v 11 Ia ni ra sa raicia ko ira na tamata na ka sa caka ko Paula, era sa tabalakia icoloi na domodra, ka tukunia “na kalou era sa lia tamata mai ka sa qai sobu mai vi ita.”
\v 12 A ra sa vatokai Panapasa mei Jupita kei Paula mei Makuri, ni sa dau ni vosa ko koya.
\v 13 O koya voki lia na bete i Jupita, ka tiko e mata ni koro na nona bure kalou sa yadia mai ki na matamata-ni-koro e so na bulumakau kei na salusalu, ka vinakatia, vata kei ira na lewe levu me ra vacoboisoro.
\p
\v 14 Ia ni rau sa rogocia koi rau nai apositolo ko Panapasaa kei Paula, erau sa dresulakia na nodrau i sulu, ka cici sara vi ira na tamata, ka qolouvakia
\v 15 ka tukunia “Oi ikonu na turaga, a cava ko ni sa caka kinia na veika koya? Eda sa tamata vata lia kai tovo vata voki lia kei ikonu, ia kirau sa vunau vi ikonu mo ni saumaki tani mai na veika koya ka yali ni yaga, kivei koya na Kalou bula, o koya ka bulia na lomalagi kei na vuravura kei na wasawasa, kei na ka kece lia sa tu kinia:
\v 16 o koya ka vosotia na lewe ni vivanua kece lia ena gauna gona me ra qai lia ena nodra sala.
\v 17 Ia ka yali lia ni dainia me yali na nonai vadinadina ni sa caka vinaka tiko ko koya, a sa solia mai vi ita na uca mai lomalagi, kei na vuata ena kena gauna lia, a sa vamamautakia na lomada e na kakana kei na marau.”
\v 18 Ia na vivosa koya, a yali ni tarovia na nodra via vacaboisoro na lewe levu vi rau.
\p
\v 19 A sa qai mai eso na Jiu mai Anitioki kei Ikoniona, a ra sa vauqeti ira na tamata, ka ra a vaviriki Paula ena vatu, ka yaratakia ki nai bili ni koro, ni ra sa nanumia ni sa mate o koya.
\v 20 Ia ni ra sa tu vavolivoliti koya ko ira sa lotu, sa tu cake ko koya, ka qai ki na koro. Ia ni savulaci caca ka taravia, erau sa qai kei Panapasa ki Tapi.
\v 21 Ia ni rau sa vunautakia oti nai tukutuku-vinaka ena koro ko ya, ka valotutaki ira kinia e lewe levu, erau sa qai lesu voki ki Lisitira, kei Ikoniona, kei Anitioki,
\v 22 a rau sa vadeitakia na yalodra era sa lotu ni rau sa varotia lia vi ira me ra tudei ena vabautia, ka tukunia “ni sa kilikili me da sotavia eso na ka rarawa ni da curumia sa matanitu ni Kalou.”
\v 23 Ia ni rau sa lesia eso me nodra matua enai soqosoqo lewe ni lotu, ni rau sa masulakia ka lolovakia voki lia, erau sa tataunakia vua na Turaga, ko ira era sa vabautia.
\p
\v 24 E rau sa qai qai via na vanua ko Pisitia, ka rau sa yaco ki Pamifilia.
\v 25 Ia ni rau sa vunautakia na vosa mai Perika, erau sa qai ki Atalia:
\v 26 ka rau sa soko mai kea ki Anitioki, erau a vatonaki kinia me nodrau na loloma ni Kalou ena vuku ni cakacaka era sa qai mai vaotia.
\v 27 Ia ni rau sa yaco kinia, ka vasoqoni ira vata nai soqosoqo lewe ni lotu, erau sa tukunia na ka kece lia sa caka na Kalou ni sa vukei rau, ka sa dolavia na darava me ra vabautia na vimatanitu tani.
\v 28 A rau sa tiko vadede kei ira sa lotu.
\c 15
\cl Wase 15
\p
\v 1 Ia sa qai sobu mai Jutia eso, ka vavulici ira na viwekani, kevaka dou sa yali ni cili me vaka nai valavala nei Mosese, dou sa yali ni vabulai rawa.
\v 2 Ia ni ra vileti valevu ka viba kei rau ko Paula kei Panapasa, era sa lesi Paula kei Panapasa, kei iratou voki lia eso mai vi ira, me rato qai cake ki Jeruisalemi vi iratou nai Apositolo, kei iratou na matua, ena vuku ni ka koya.
\p
\v 3 Ara sa talatala vi ira nai soqosoqo lewe ni lotu, a ratou sa gai vi Finiasi kei Samaria, ka tukunia tiko ni sa saumaki mai ko ira na matanitu tani: a ra sa vamaratutaki ira valevu na viwekani kece lia.
\v 4 Ia ni ratou sa yaco ki Jeruisalemi, sa mai vacegui iratou ko ira nai soqosoqo lewe ni Lotu, kei ira na Apositolo, kei ira na matua, a ratou sa tukunia na kece lia sa caka na Kalou ni sa vivuke kei iratou.
\p
\v 5 A sa tucake eso na nodra i tokani na Farisi era sa vabautia, ka tukunia, “sa dodonu mera cilivi koya, Me varoti voki lia vi ira me ra talairawarawa ki na i vunau i Mosese.”
\p
\v 6 A ra sa soqoni vata mai ko ira nai Apositolo, kei ira na matua me ra bosea na ka koya.
\v 7 Ia ni sa levu na vileti, sa tucake ko Pita, ka tukunia vi ira, oi ikonu na viwekani, ikonu sa kila sa digitaki au mai vi ita na Kalou, ena gauna sa oti makawa yani, me na rogocia kinia na vosa ni tukutuku vinaka ko ira na vi matanitu tani me ra vabautia.
\v 8 Ia na Kalou ko koya sa kila na yaloda,
\v 9 sa vadinadinatakia vi ira ni sa solia vi ira na Yalo Tabu, me vaka lia vi ita: a sa yali ni vinakati ita cake vi ira, ia sa vasavasavatakia na yalodra ena vabautia.
\v 10 Ia ka cava ikonu sa qai vatovolea va ca kinia na Kalou mo vataqara nai vua ki na domodra era sa lotu, eda sa yali ni colatia rawa koi ita se ko ira na noda matua?
\v 11 Ia eda sa vadinata ni da na bula ena loloma ni noda Turaga ko Jisu Karisito, me va voki lia kinia ko ira oqori.
\p
\v 12 Sa qai galu ko ira, vayadua lia na lewe levu me ra rogoci Panapasa kei Paula, ni rau sa tukunia na vi vatakilakila kei na veika e vivakurabuitaki sa caka na Kalou ena ligadrau, ena kedra maliwa na vimatanitu tani.
\p
\v 13 Ia ni rau sa tinia na nodrau i tukutuku sa vosa ko Jemesa, ka tukunia, Oi ikonu na veiwekani, ni rogoci au mai.
\v 14 Sa tukunia oti ko Saimoni se na laki yadia vaevei eliu na Kalou eso na tamata mai vi ira na vimatanitu tani, me tiko vi ira na yacana.
\v 15 Ia na ka koya sa bole vata kei na nodra vosa na parofita; me vaka na ka sa volai,
\v 16 Ni sa oti na veika koya ka'u na qai voki mai, ka vaturia voki na vale i Tevita, ko koya sa bale sobu, Ia ka'u na vaturia voki na kena ka sa rusa. Au na vaduria voki mai:
\v 17 Me vaqara na Turaga ko ira na tamata sa vo kei ira kece lia na vimatanitu, era sa vatokai ena yacaqu.
\v 18 Sa tukunia vua na Turaga, ko koya sa vatakilatakia na ka kece lia koya mai nai vatekivu kei vuravura.
\p
\v 19 Ko koya ka'u sa lewa kinia, me da kakua ni vaocataki ira era sa saumaki mai vua na Kalou, mai vi ira na vimatanitu tani:
\v 20 me da volavola lia vi ira, me tabu vi ira na qaravia na matakau, na daudara voki lia kei na ka sa kuna kei na dra.
\v 21 Ni ra sa tiko makawa ena vikoro kece lia ko ira sa vunautaki Mosese, ni ra sa wilikia na vivalenilotu ena visiga ni vacecegu.
\p
\v 22 Sa ra qai vinakatia ko ira nai apositolo kei ira na qase, kei ira kece lia nai soqosoqo lewe ni lotu, me digitakia na tamata eso mai vi ira, ka vatala me ratou qai vata kei Paula kei Panapasa ki Anitioki, ko irau ko Jutasa na yacana voki lia ko Parisapa, kei Sailasa, a tamata erau sa liu vi ira na viwekani.
\v 23 A ra volavola vakoya me ratou yadia: oi kimamu nai apositolo kei na matua kimamu sa loloma yani vi ikonu na viwekani sa matanitu tani mai Anitioki kei Siria kei Silisia.
\v 24 Ni kimamu sa rogocia, era sa qai tani vi ikonu eso era vakidrotaki ikodou ena nodra vosa, a ra sa vukicia tani na lomamudou, ia kimamu sa yali ni talai ira.
\v 25 Sa qai vinaka vi kimamu, ni kimamu sa soqoni vata ka lomavata, me digitakia eso na tamata, ka tala vikonu me ratou qai vata kei rau na daulomani ko Panapasa kei Paula,
\v 26 a tamata erau sa bolea na mate ena vuku ni yacana na noda Turaga ko Jisu Karisito.
\v 27 O koya kimamu sa talai Jutasa kei Sailasa, erau sa tukunia voki lia na veika koya ena gusudrau.
\v 28 Ni sa vinaka vua na Yalo Tabu, vi kimamu voki lia, me kimamu yali ni taucia vi ikodou nai colacola levu, koya lia ni sa ka dodonu.
\q1
\v 29 Me tabu vei ikodou na veika sa cabo, ki na matakau na dra voki lia, kei na ka sa kuna, kei na daudara: ia kevaka dou qarauni ikodou mai na veika koya, dou na caka vinaka. Sa loloma.
\p
\v 30 Ia ni ratou sa talai, eratou sa qai ki Anitioki; ia ni ratou sa vasoqoni ira vata na lewe levu, eratou sa solia nai vola.
\v 31 Ia ni ra sa wilikia oti, era sa reki ena vuku ni vivacegui.
\v 32 Ia ko Jutasa kei Sailasa, koi rau sai vavuvuli voki lia, erau sa vavulici ira na viwekani ena vosa e levu, ka vataudeitakia,
\v 33 Ia ni ratou sa tiko bogi vica, era sa qai vatalai iratou ko ira na viwekani ena vacegu kivei ira nai apositolo.
\v 34 Ia sa vinakatia ko Sailasa me tikotiko lia mai gona.
\v 35 Ia ko Paula kei Panapasa, erau sa tiko mai Anitioki ka rau sa vavuvuli ka vunautakia na vosa ni Turaga, kei ira na tani e lewe levu.
\p
\v 36 Sa bogi vica, sa qai tukunia ko Paula vei Panapasa, Me daru qai voki me raicia se ra sa vaevei ko ira na wekada ena vikoro kece lia e daru a vunautakia kinia na vosa ni Turaga.
\v 37 A sa nanumia ko Panapasa me rau yadi Joni, a yacana voki lia ko Marika.
\v 38 A sa yali ni vinakatia ko Paula me rau yadi koya, ni sa daini rau e liu mai Pamifilia ko koya, ka yali ni qai vata kei rau ki na cakacaka.
\v 39 A sa katakata kinia na vileti, a rau sa dui qai kinia: a sa yadi Marika ko Panapasa, a rau sa soko ki Kipiro:
\v 40 a sa digitaki Sailasa ko Paula, a sa qai yani, ni sa vatonaki rau ki na loloma ni Kalou ko ira na viwekani.
\v 41 A sa qai voli ko koya e Siria kei Sisilia, a sa vataudetaki ira kinia na visoqosoqo lewe ni lotu.
\c 16
\cl Wase 16
\p
\v 1 Sa qai tadu ko koya ki Tapi kei Lisitira: ka raicia sa tiko kinia e dua sa lotu, ko Timoci na yacana, a luveni yalewa ni Jutia sa vabautia; ia sa kai matanitu tani na tamana:
\v 2 a sa rogo vinaka ko koya koya vi ira na viwekani mai Lisitira kei Ikoniona.
\v 3 Sa vinakati koya ko Paula me rau qai kaya: a sa yadia mada ka cilavia, ena vukudra na Jiu era sa tiko ena yasana koya: ni ra sa kila kece lia sa kai matanitu tani na tamana.
\p
\v 4 Ia ni rau sa qai via na vikoro, erau sa tukunia vi ira, me ra vabautia nai va ro ka lesia ko ira nai apositolo kei ira na qase sa tiko mai Jeruisalemi.
\p
\v 5 A sa vataudeitakia vakakinia na visoqosoqo lewe ni lotu ena vabautia, a ra sa tubu voki lia ena visiga me na lewe levu.
\p
\v 6 Ia ni rau sa qaivi Firijia kei na vanua ko Kalatia, a sa tarovi rau na Yalo Tabu me rau kakua ni vunautakia na vosa mai Esia,
\v 7 ni rau sa yaco mada ki Misia, e rau sa vatovolea sara me qai ki Picinia: a sa yali ni daini rau na Yalo i Jisu.
\v 8 A rau sa sivi Misia, ka qai sobu ki Tiroa.
\v 9 A sa rairai na vi Paula ena bogi na raivotu: Sa tu edua na kai Masitonia, ko koya sa vamasutia, ka tukunia, “Qai mai ki Masitonia mo vukei kimamu.”
\v 10 Ia ni sa raicia oti na raivotu ko koya, Kitou sa vatovolea sara me qai ki Masitonia, ni kitou sa vananumia e dina sara sa kacivi kitou na Turaga me kitou vunautakia vi ira nai tukutuku vinaka.
\p
\v 11 Ia ni kitou sa varewa mai Tiroa, kitou sa vue yani ki Samoceresa, ka ia ena savulaci ki Niapoli;
\v 12 ia mai gona ki Filipai, a koro levu ena yasayasa va-Masitonia koya, a koro va-Roma: ka kitou sa tiko ena koro koya ka bogi vica.
\p
\v 13 Ia ena siga ni vacecegu kitou sa qai ki nai bili ni koro ena bati ni uciwai, ki na yasana kitou nanumia sa dau caka kinia na lotu masumasu, ka kitou sa tiko sobu, ka tukunia vi ira na yalewa era sa soqoni vata kinia.
\v 14 A sa varogocia e dua na yalewa ko Litia na yacana, mai na koro ko Ceataira, sa dau volitakia na ka lokaloka ko koya sa daulotu vua na Kalou: a sa dolavia na yalona na Turaga, ka sa vabautia kinia ko koya na veika sa tukunia ko Paula.
\v 15 Ia ni sa papitaisotaki ko koya, kei ira voki lia na nona lewe-ni-vale, sa vamamasu ko koya ka tukunia,” kevaka dou sa lewa niu sa dina vua na Turaga, curu kina noqu vale, ka tiko kinia.” A sa cikevi kitou sara ko koya.
\p
\v 16 A sa yaco, ni kitou sa qai ki na yasana sa ia kinia na masumasu, kitou sa sota kei na dua na vada sa tiko vua na yalo i Paiconi, ko koya sa dauvavutuniyautaki iratou valevu na nona turaga ena nona parofisai vailasu:
\v 17 a sa muri Paula kei kitou ko koya koya. A sa qoqolou, ka tukunia, “Sai talatala ni Kalou cecere sara ko iratou na tamata koya, a ratou sa vatakila vi ikodou na sala ni bula.”
\p
\v 18 A sa bogi vica vata ka caka tiko na ka koya, A sa qai rarawa na lomai Paula, a sa rai vuki, ka tukunia vua na yalo, “Au sa varotakia vi iko ena yacai Jisu Karisito mo qai tani mai vua.” A sa qai tani sara ena tiki-ni-siga ko ya.
\v 19 Ia ni sa raicia ko iratou na nona turaga ni sa takali na ka eratou a vararavi kinia me rawa kinia na nodratou i yau, eratou sa tauri Paula kei Sailasa, ka yaratakia ki na rara ni vivoli vi ira na turaga;
\v 20 ka yadi rau ki na matavilewai, ka tukunia, O irau na tamata la koya, erau ka Jutia, erau sa vakidriotakia na noda koro,
\v 21 ka varotakia nai valavala eso sa yali ni dodonu vi ita me da vabautia, se muria ni sa kai Roma.
\v 22 Era sa qai tucake vata vakaukauwa vi rau ko ira na lewe levu: a ra sa luvatia sara na nodrai sulu ko ira na matavilewai, a ra sa tukunia me rau warolaki.
\v 23 Ia ni ra sa warolaki rau valevu, era sa qai dainia ki na vale ni vivesu, a ra sa varotakia vua nai vatawa me rau tauria matua:
\v 24 ko koya, ni sa varotakia vakoya, sa bilitaki rau ki na tiki ni vale ni vivesu e loma, a sa vesukia matua sara na yavadrau enai vesu kau.
\p
\v 25 Ia ni sa lomaloma ni bogi na vanua, sa masu ko Paula kei Sailasa, ka sere vua na Kalou, a ra sa rogocia ko ira na tamata sa vesu tu.
\v 26 A sa tavuki valevu vasauri na vanua, a sa yavala kinia na yavu ni vale ni vivesu: a sa tadola vasauri kece lia nai sogo ni darava, a sa sereki yadua na kedra i vesu na tamata.
\v 27 A sa yadra mai na moce nai vatawa ni vale ni vivesu; ia ni sa raicia sa tadola tu nai sogo ni darava ni vale ni vivesu, sa ucuna na nonai seleiwau, ka nakitia me vamatei koya, ni sa nanumia era sa dro ko ira na tamata era sa vesu tu.
\v 28 A sa kaci ena domo levu ko Paula, ka tukunia “kakua ni ko vacacani iko: kitou sa tiko kece lia koya.
\v 29 Sa qai kaci ko koya me kau mai na cina, a sa rika ki loma a sa sautaninini mai, a sa cuva sobu vi Paula kei Sailasa,
\v 30 a sa yadi rau ki tuba, ka tukunia, oi kodrau na turaga, a cava me'u caka me'u bula kinia?”
\v 31 A rau sa tukunia, vabautia na Turaga ko Jisu Karisito, ko na bula kinia, kei ira voki lia na nomu lewe ni vale.
\p
\v 32 A rau sa tukunia vua na vosa ni Turaga, vi ira voki lia era sa tiko e nona vale.
\v 33 A sa yadi rau ko koya ena tiki-ni-bogi koya, a sa quarakia na we ni kuita: a sa papitaisotakia sara, ko koya kei ira voki lia na kai nona.
\v 34 Ia ni sa yadi rau ki nona vale sa taucia na kakana e matadrau, a sa reki valevu ni sa vabautia na Kalou, kei ira voki lia na nona lewe ni vale.
\p
\v 35 Ia ni sa siga mai, era sa tala na ovisa ko ira na matavilewai, ka tukunia, sereki rau na tamata koya me rau qai.
\p
\v 36 A sa tukunia vi Paula na vosa koya na i vatawa ni vale ni vivesu, sa talakia mai na matavilewai mo drau sereki: drau qai cavu tu, ka qai ena vacegu.
\p
\v 37 A sa tukunia vi ira ko Paula, Era sa warolaki kirau votu ka ra sa yali ni lewai kirau mada eliu, ia kirau sa kai Roma koi kirau; ka ra sa daini kirau ki na vale ni vivesu; ka ra sa qai daini kirau vuni, oi? Me kakua sara; ia me ra qai lia mai ka yadi kirau yani ki tuba.
\v 38 A ra sa tukunia na vosa koya ko ira na ovisa vi ira na matavilewai; era sa qai rere, ni ra sa rogocia erau sa kai Roma.
\v 39 A ra sa qai mai ka vamasuti rau, ka yadia ki tuba, ka vamamasu me rau qai tani ena koro.
\v 40 A rau sa qai tani ena vale ni vivesu, ka curu ki na vale i Litia; ia ni rau sa raici ira na viwekani, erau sa vacegui ira ka qai yani.
\c 17
\cl Wase 17
\p
\v 1 Ia ni ratou sa qaivi Amifipoli kei Apolonia, eratou sa yaco ki Cesalonaika, a sa tu kinia edua na nodra valenilotu na kai Jutia:
\v 2 a sa curu kinia vi ira ko Paula, me vaka na nonai valavala, ka sa tolu na siga ni vacecegu sa vavulici ira kinia mai nai Vola Tabu,
\v 3 ni sa vatakila ka vadinadina, ni sa kilikili kei na Karisito me vosotia na mate; ka tucake voki mai na mate, ka vaka ni sai koya na Karisito, ko Jisu koya, ko koya ka'u sa vunautakia vi ikodou.
\v 4 A sa vabautia ko ira eso, ka qai ki vitokani kei Paula kei Sailasa; kei ira e lewe levu na ka Kirisi era a lotu va-Jiu, kei ira na marama era sa yali ni lewe lailai.
\p
\v 5 Sa qai vuvu ko ira na Jiu, a ra sa yadia eso vi ira na kaisi botoboto, a ra sa vasoqoni ira vata na lewe levu, ka vatubu ue ena koro; a ra sa cici vakaukauwa ki na valei Jesoni, a ra saga me ra yadi iratou vi ira na lewe ni koro.
\v 6 Ia ni ra sa yali ni raici iratou, era sa yarataki Jesoni kei ira na viwekani eso vi ira na turaga ni koro, ka kaci, “O iratou koya eratou sa vukici vuravura me ca, eratou sa tadu voki lia mai gona;
\v 7 ka sa yadi iratou ko Jesoni ki nona vale; ka ra sa talaidredre ko ira kece lia koya ki nai vunau i Sisa, a ra sa tukunia sa dua voki na tui, ko Jisu.
\v 8 A ra sa vakidroataki ira na lewe ni koro kei ira na kena turaga, ni ra sa rogocia na veika koya.
\v 9 Ia ni ra sa vabautia na yalayala i Jesoni kei ira na tani, era sa sereki ira me ra qai.
\p
\v 10 Ia ko ira na viwekani era sa kusarawa me ra talai Paula kei Sailasa ki Peria ena bogi; ia ni rau sa yaco kinia; erau sa qai ki na nodra valenilotu na kai Jutia.
\v 11 A ra sa uasivi vi ira na kai Cesalonaika ko ira koya ena yalo vaturaga, ni ra sa varogocia na vosa ena loma e vinakatia sara, a ra sa dauvaqaqara enai Vola Tabu ena visiga, se sa vakinia na ka koya, se yali?
\v 12 O koya lia koya era sa lewe levu kinia era sa vabautia, kei ira voki lia na marama ni Kirisi kei ira na tagane, e ra sa yali ni lewe lailai.
\p
\v 13 Ia ni ra sa kila ko ira na Jiu mai Cesalonaika ni sa vunautakia na vosa ni Kalou ko Paula mai Peria, era sa qai vokilia kinia, ka vayavalati ira na lewe levu.
\v 14 A ra sa kusarawa kinia na viwekani me ra talai Paula yani me qai vaka ki na wasawasa: a rau sa tiko laivi lia mai gona ko Sailasa kei Timoci.
\v 15 Ia ko ira sa varaici Paula era sa yadi ki Aceni: ia ni sa tau vi ira nai varo vi Saula kei Timoci me rau qai kusarawa mai vua, era sa qai qai.
\p
\v 16 Ia ni sa waraki rau tiko mai Aceni ko Paula, sa katakata valevu na lomana, ni sa raicia sa oso na koro ena vimatakau.
\v 17 O koya sa vileti kinia ko koya kei ira na kai Jutia ena nodra valenilotu, kei ira voki lia era sa sota kaya ena rara ni vivoli ena visiga.
\p
\v 18 Sa qai vileti kaya, eso na nodra vuku nai tokani i Epikuro, kei ira na Sitoike. Ka sa tukunia eso “A cava mada sa via tukunia ko la na dau vosa koya?” eso tani, “Ko koya koya sa vaka e dua sa vatakila mai eso na kalou vou,” ni sa vunautaki Jisu vi ira ko koya, kei na tu cake voki mai na mate.
\p
\v 19 A ra sa qai tauria ka tubera ki na vanua cecere nei Arisi, ka tukunia, “E rawa beka me kimamu kila se cava nai vakavuvuli vou koya ko sa mai tukunia?
\v 20 Ni ko sa yadia mai eso na veika e veivakurabuitaki ki na daligai kimamu: kimamu sa via kila kinia, se cava nai balebale ni veika koya.”
\v 21 Ni sa yali na ka tani era sa dau kitakia ko ira kecelia na kai Aceni, kei ira na vulagi era sa tiko kinia, me ra veitukutukunitakia lia se rogocia, e dua na ka vou.
\p
\v 22 Sa qai wavu tu ko Paula ena loma ni vanua cecere nei Arisi, ka tukunia Oi ikonu na kai Aceni, au sa raicia ena ka kece lia ni ikonu sa dausoro valevu.
\v 23 Ia, niu sa qai voli, ka raicia na veika ikonu sa soro kinia, au sa raicia voki lia e dua nai cabocabo-ni-soro sa volai kinia VUA NA KALOU E YALI NI KILAI.” Ia ko koya ko nI sa soro kinia ni ikonu sa yali ni kila, au sa qai tukunia vi ikonu.
\p
\v 24 A Kalou ka buli vuravura kei na ka kece lia sa tu kinia, sa Turaga lia ko koya mai lomalagi kei vuravura, a sa yali ni tiko ena vivalenisoro sa caka ena liga;
\v 25 a sa yali voki lia ni qaravia ena liga ni tamata, me vaka e bau yaga vua e dua na ka, ni sa solia lia ko koya vi ita kece lia na bula, kei na cegu, kei na ka kece lia;
\v 26 a sa buli ira era sa dra vata, na lewe ni vivanua kece lia, me ra tiko ena delai vuravura taucoko, a sa lesia na vigauna ka digitakia e liu, kei nai yalayala ni nodra viyasana;
\v 27 me ra vaqara na Kalou, de ra vayayamo beka vua, ka raicia, ia sa yali lia ni yawa ko koya vi ita yadua;
\v 28 ni sa bula vi koya ka yavala, ka rawatia mai vua na noda bula; me va voki lia sa tukunia ko ira na nomunu dau-ni-vucu eso, sa nona kawa voki lia ko ita.
\p
\v 29 Koya ni da sa kawa ni Kalou, e yali ni dodonu me da nanumia sa tautauvata na Kalou kei na koula se na siliva, se na vatu sa ceutia na matai se na tamata vuku.
\v 30 Ia na gauna ni lialia sa vosotia oti na Kalou, a sa varotakia ena gauna ni kua vi ira na tamata kece lia ena vivanua kece lia me ra vivutuni;
\v 31 ni sa lokucia ko koya na siga, ena lewai vuravura kinia e na lewa dodonu, vi koya na tamata sa lesia ko koya; a sa vadinadina kinia vi ira na tamata kece lia, e na nona vaturi koya cake voki mai na mate.
\p
\v 32 Ia ni ra sa rogocia na tucake voki mai na mate, sa valialia ko ira eso; ka so sa tukunia, kitou sa rogoci iko voki ena ka koya.
\v 33 Sa qai qai tani yani ena kedra maliwa ko Paula.
\v 34 A sa kabiti koya eso na tamata, a ra sa vabautia, e dua vi ira ko Taionisio mai na matavilewai mai na vanua cecere nei Arisi, kei na yalewa sa vatokai ko Tamarisi, koi rau kei ira voki eso.
\c 18
\cl Wase 18
\p
\v 1 Sa oti na veika koya, sa qai tani e Aceni ko Paula, ka yaco ki Korinica;
\v 2 a sa raicia kinia e dua na kai Jiutia a yacana ko Akuila, sa sucu mai Ponito, a sa qai loa lia mai Itali, kei na watina ko Pirisila; ni sa varotia ko Kilotiu me qai tani e Roma na kai Jutia kece lia; a sa qai vi rau ko koya.
\v 3 Ka ni ratou sa matai vata, sa tiko vata kei rau ko koya, ka cakacaka: ni ratou sa matai ni vale-laca.
\v 4 A sa vunau ena valenilotu ena visiga ni vacecegu kece lia, a sa rawai ira na kai Jutia kei ira na kai Kirisi.
\p
\v 5 Ia ni sa qai mai Masitonia ko Sailasa kei Timoci, sa vauqeti ko Paula, a sa dua tukunia vi ira na kai Jutia ni sa Karisito lia ko Jisu.
\v 6 Ni ra sa qai voratia ka vosa vacaca sa kureitakia na nonai sulu ko koya ka tukunia vi ira, “Ena baleti ikodou lia na nomudou rusa; au sa yali ni cala kinia: kau sa qai qai vi ira na vimatanitu tani.”
\v 7 A sa qai tani eke, ka curu ki na nona vale e dua a yacana ko Taito Jusitu, a tamata sa lotu tiku vua na Kalou, a sa voleka ki na vale ni lotu na nona vale.
\v 8 A sa vakabautia na Turaga ko Kirisipo, na turaga ni vale ni lotu, kei ira vokilia na nona lewe ni vale; a sa lewe vuqa na kai Koronica ni ra sa rogocia, e ra sa vakabautia, ka ra sa papitaisotaki.
\p
\v 9 Sa qai tukunia vi Paula na Turaga ena bogi ena raivotu, kakua ni rere, mo tukunia lia, kakua ni ko galu;
\v 10 ni kau sa tiko vata kei iko, ka na yali e dua me sagai iko me vacacani iko: ni sa lewe levu na noqu tamata ena koro koya.
\v 11 A sa tiko mai kea ko koya ka yabaki dua ka vula ono, ka dau vavulici ira ena vosa ni Kalou.
\p
\v 12 Ia ni sa turaga mai Akaia ko Kalio, era sa lomavata na Jiu me ra tauri Paula vakaukauwa, a ra sa yadia ki na mata ni tikotiko ni vilewai,
\v 13 ka tukunia, ko koya koya sa vavulici ira na tamata me ra masu vatani vua na Kalou ka yali ni vaka na vunau.
\p
\v 14 Ia ni sa varau vosa ko Paula, sa tukuia vi ira na Jiu ko Kalio, “Oi ikodou na Jiu, kevaka sa dua na ka e kovei, se dua na ca levu, e dodonu me'u vosoti ikodou:
\v 15 ia kevaka e viletitaki nai vavuvuli, kei na yaca eso, kei na nomudou vunau, dou lewa lia; ni ka'u sa yali ni via lewa na veika vakoya.”
\v 16 A sa tovoci ira tani ena mata ni tikotiko ni vilewai.
\v 17 A ra sa qai tauri Sosiceni na turaga ni valenilotu, ka vaculakia ena mata ni tikotiko ni vilewai. A sa weletakia na ka kece lia koya ko Kalio.
\p
\v 18 Sa oti koya sa tiko lia ko Paula ka dede, a sa qai tatau vi ira na viwekani, ka soko ki Siria, ko iratou voki lia ko Pirisila, kei Akuila; a sa tasia mada na uluna mai Kenikiria ni sa bubului eliu ko koya.
\v 19 A sa yaco ki Epeso ka daini rau kinia: a sa curu ko koya ki na valenilotu, ka vavulici ira na Jiu.
\v 20 Ia ni ra sa masuta me tiko dede vi ira, sa yali ni vinakatia ko koya;
\v 21 ia sa tatau lia vi ira ka tukunia, Au na lesu voki mai vi ikodou, kevaka e vinakatia na Kalou, a sa soko tani e Efeso ko koya.
\p
\v 22 Ia ni sa sobu ki Sisaria, ka qai cake, ka vikidavaki kei ira nai soqosoqo lewe ni lotu, sa qai qai sobu ki Anitioki.
\p
\v 23 Ia ni sa tiko dede valailai, sa qai qai tani, a sa qai via vadodonu voli ena vanua ko Kalatia kei Firijia, a sa vataudeitaki ira voki lia era sa lotu.
\p
\v 24 A sa dua na Jiu na yacana ko Apolosa, sa sucu mai Alekisadria, a tamata sa dauvosa vavuku, a sa rawatia sara me tukunia nai Vola Tabu ko koya, sa tadu ki Efeso.
\v 25 Sa vavulici ko koya koya enai vavuvuli ni Turaga, ia sa katakata na yalona, a sa tukunia ko koya ka vunautakia vagumatua na veika ni Turaga, ia sa kila lia na papitaisoi Joni.
\v 26 A sa vatekivu me vosa doudou ena valenilotu: ia ni rau sa rogocia ko Akuila kei Pirisila, erau sa yadia vi rau, a rau sa tukunia vadodonu cake vi koya nai vavuvuli ni Kalou.
\p
\v 27 Ia ni sa via qai yani ki Akaia ko koya, era sa vauqeti koya kinia ko ira na viwekani ka ra sa volavola, ka masuti ira sa lotu me ra vacegui koya: ia ni sa yaco kinia ko koya, sa vukei ira valevu era sa vabautia ena loloma:
\v 28 ni sa ka gumatua sara na nona rawai ira votu na Jiu, ena vileti kei ira, ka sa vatakila mai nai Vola Tabu ni sa Karisito ko Jisu.
\c 19
\cl Wase 19
\p
\v 1 Ia ni sa tiko mai Koronica ko Apolosi, sa qai ko Paula ki na yasana vaka ki colo ka yaco ki Efeso: a sa raica eso sa lotu,
\v 2 a sa tukunia vi ira, “sa yaco vi ikodou na Yalo Tabu ni dou sa qai vabautia, se yali?” A ra sa tukunia vua kitou sa yali mada ni rogocia se sa soli na Yalo Tabu se yali?
\p
\v 3 A sa tukunia vi ira ko koya, “Dou sa papitaisotaki beka ena cava?” A ra sa tukunia, “E na papitaiso i Joni.”
\p
\v 4 Sa qai tukunia ko Paula, “E dina lia sa dau vipapitaisotaki ko Joni ena papitaiso ni vivutuni, ka tukunia vi ira na tamata, me ra vabauti koya ena muri koya mai, ko koya koya ko Jisu.”
\v 5 Ia ni ra sa rogocia era sa papitaisotaki ena yaca ni Turaga ko Jisu.
\v 6 Ia ni sa tabaki ira ko Paula ena ligana, sa yaco kivei ira na Yalo Tabu: a ra sa vosatakia na vosa ni vivanua tani, ka dau vatavuvuli.
\v 7 Ko ira kece lia na tagane era sa lewe tnikarua beka.
\p
\v 8 Ia ni ra sa vaka sa qai ko koya ki na valenilotu, a sa vosa doudou tiko lia ka vula tolu, a sa vavuvuli ka vadinadinatakia na veika ni matanitu ni Kalou.
\v 9 Ia ni ra sa valomaqatakia eso, ka yali ni vabautia, ka sa vosavacacatakia na Lotu ena matadra na lewe levu, sa qai qai tani mai vi ira ko koya, ka tawasei ira tani era sa lotu, a sa dauvatavuvuli tiko ena visiga ena vale ni wilivola nei Tirano.
\v 10 A sa caka vakinia na vosa ni Turaga ko Jisu ko ira voki lia era sa tiko mai Esia, ko ira na kai Jutia, kei ira voki lia na kai Kirisi.
\p
\v 11 A sa caka na Kalou na ka-mana vaidina eso ena liga i Paula:
\v 12 a ra sa yadia tani mai na yagona nai tavoi eso kei nai sulu eso vi ira era tauvimate, a sa takali kinia na nodra mate, a sa qai tani mai vi ira ko ira na yalo ca.
\p
\v 13 Ia ka so na kai Jutia era sa dau viqaiyaki, ka dau caka me tovoci ira na tevoro, eratou sa bolea me ratou cavutia na yaca ni Turaga ko Jisu vi ira ka curumi ira na yalo ca, a ratou sa tukunia, “kitou sa vatalai ikodou tani ena yacai Jisu, ko koya sa vunautakia ko Paula.”
\v 14 A ratou sa lewe vitu na luvei Siva na kai Jutia, ka bete levu, eratou sa caka vakinia.
\p
\v 15 Sa qai vosa na yalo ca, ka tukunia, “ko Jisu ka'u sa kila, ko Paula voki lia ka'u sa kila, ia ko cei koi ikodou?”
\v 16 A sa rika vi iratou na tamata sa tiko vua na yalo ca, a sa rawai iratou, ka sa aukauwa vei iratou, a ratou sa dro tani kinia mai na vale koya, a ratou sa luvawale ka mavoa.
\v 17 A sa kila na ka koya ko ira kece lia na kai Jutia kei na kai Kirisi voki lia, era sa tiko mai Epeso, a sa kani ira kece lia na rere, a ra sa varokorokotakia na yaca ni Turaga ko Jisu.
\p
\v 18 A sa lewe levu voki lia vi ira sa vabautia era sa qai mai, ka vatusa ka vatakila na nodrai valavala.
\v 19 A ra sa lewe levu voki lia vi ira era dau caka e liu na lawaki vatevoro eso, era sa kumunia vata na nodrai vola, ka visa ena matadra kece lia; a ra sa wilikia vata na kedrai voli, a ra sa raicia ni sa limasagavulu na udolu nai lavo siliva.
\p
\v 20 Sa tubu vakaukauwa vakoya na vosa ni Turaga, ka sa gumatua.
\p
\v 21 Ia ni sa oti na veika koya, sa nakitia ko Paula e lomana, me qai vi Masitonia mada kei Akaia, ka qai qai ki Jerusalemi, a sa tukunia, “Ni kau sa tiko mada ki gona, e dodonu me'u qai raici Roma voki lia.”
\v 22 A sa qai tala ki Masitonia e lewe rua vi ira sa dauqaravi koya, ko Timoci kei Irasito; a sa tiko vadede valailai ko koya mai Esia.
\p
\v 23 Ia ena gauna koya sa tubu valevu na ue e na vuku ni Lotu.
\v 24 Ni sa dua, na yacana ko Timitirio; a matai ni siliva, sa dau caka ena siliva nai vakatakarakara ni bure Kalou nei Taiana, a sa valevutakia kinia na nodrai yau na matai;
\v 25 ni sa kacivi ira vata, kei ira na tamata era sa dau cakacaka vakinia, sa tukunia ko koya, “Oi ikodou na turaga, dou sa kila sa cakacaka koya e da sa vaiyau kinia.
\v 26 Ia dou sa qai raicia ka rogocia, ni sa yali e Efeso dua loa lia, sa vo e lailai lia me otivi Esia taucoko, ko Paula koya, ka sa lewe levu sara sa rawa, ka sa saumaki tani, ni sa tukunia, sa yali ni Kalou na ka sa caka ena liga:
\v 27 ni sa voleka ni beci kinia na noda cakacaka koya, ka yali ni koya dua loa lia koya, sa voleka voki lia me valoatakia na bure i Taiana na Kalou yalewa levu, ka me lutu mai na nonai tutu lagilagi, ko koya sa soro vua ko Esia taucoko kei vuravura.”
\p
\v 28 Ia ni sa rogocia, sa ka tani sara na nona cudru, a ra sa qoqolou, ka tukunia sa levu lia ko Taiana na kalou ni kai Efeso.
\v 29 A sa ka levu na ue ena koro taucoko; a ra sa tauri Keio vakaukauwa kei Arisitako, erau sa kai Masitonia, erau sa dau qai kei Paula, a ra sa curu vakaukauwa vata ki na bure levu.
\v 30 Ia ni sa via curu ko Paula, vi ira na tamata, era sa tarovia ko ira era sa lotu.
\v 31 O ira voki lia eso era sa turaga mai Esia, era sa nonai to, era sa talakia vua, ka masutia me kakua ni doudou me curu ki na burelevu.
\p
\v 32 A ra sa dui qoqolou: ni ra sa ue nai soqosoqo era lewe levu; ia s lewe levu vi ira era yali kila se cava era a soqoni vata kinia.
\v 33 Ia eso vi ira na lewe levu era sa vaturi Alekisada, cake ni sa cikevia koya ko ira na Jiu. A sa vatabataba ko Alekisada, a sa via tusanaki koya vi ira na tamata.
\v 34 Ia ni ra sa kila e kai Jutia ko koya, sa sosoraki vata na domodra ka oti e rua na aua, ka qoqolou vaka, “Sa levu lia ko Taiana na nodra kalou na kai Efeso.”
\p
\v 35 Ia ni sa tarovi ira na lewe levu na vunivola ni koro, sa tukunia, “oi ikodou na kai Efeso, ko cei na tamata sa yali ni kila ni sa vatau ki na lewe ni koro ko Efeso na bure kalou ni kalou yalewa levu ko Taiana, kei na matakau sa lutu sobu mai vi Jupita:
\v 36 Ia ni sa yali ni vatitiqatakia rawa na vi koya, sa dodonu mo dou tiko malua, ka kua ni caka vailoa e dua na ka:
\v 37 ni dou sa yali ni daubutako mai na valenisoro, se vosavacacatakia na noda kalou yalewa.
\v 38 Ia kevaka sa via vitakia e dua ko Timitirio, kei ira na matai era sa nonai to, sa ia na veilewai, a sa tiko na Turaga ni lewa: me ra qai veibeitaki.
\v 39 Ia kevaka sa dua tani na ka dou sa tarogia, ena lewai ena dua na soqoni me vaka na vunau.
\v 40 Ni na beitakia beka vi ita na ue, ena vuku ni ka sa yaco ni kua, ka ni da sa yali ni tukunia rawa e dua na ka e vuna na soqoni vata koya. Ia ni sa vosa oti vakoya, sa qai vasukai ira nai soqosoqo.
\c 20
\cl Wase 20
\p
\v 1 Ia ni sa yali na ue, sa kacivi ira era sa lotu ko Paula, a sa tatau, ka qai tani yani me qai ki Masitonia.
\v 2 Ia ni sa qaivia oti na yasana ko ya ko koya, ka vavulici ira valevu, sa qai qai ki Kirisi.
\v 3 A sa tiko mada kinia ka vula tolu. Ia ni ra sa buki kena vere ko ira na Jiu, ni sa varau soko ki Siria, sa qai nakitia ko koya me gai vi Masitonia ena nona lesu voki.
\v 4 A ratou sa qai vata kaya ki Esia ko Sopatero na kai Peria; kei Arisitako kei Sekudu, koi rau na kai Cesalonaika; kei Keio na kai Tapi, kei Timoci; kei Tikiko kei Tirofimo ko ira na kai Esia.
\v 5 O iratou koya eratou sa qai eliu ka waraki kitou mai Tiroa.
\v 6 Ia ni sa oti mada na gauna ni kana madrai yali ni leveni, kitou sa qai soko tani ki Filipai, ka bogi lima kitou sa qai vauci ira mai Tiroa, kitou sa tiko mada kinia ka bogi vitu.
\p
\v 7 Ia enai matai ni siga ni wiki, ni sa soqoni vata ko ira sa lotu me ra dovi madrai, sa vunau vi ira ko Paula, ni sa varau qai ena savulaci, a sa vunau tiko ka lomaloma ni bogi na vanua.
\v 8 A sa levu na cina enai taba loma ni vale e colo, kimamu sa soqoni vata kinia.
\v 9 A sa dua na cauravou na yacana ko Utiko, sa tiko voleka ki na darava icolo, a sa moce lutu sara; ia ni sa vunau vadede ko Paula, sa yacovi koya na moce, a sa lutu sobu mai nai ka tolu ni taba loma ni vale, ia ni ra sa lavetia cake sa mate tu.
\v 10 A sa qai sobu ko Paula, a sa davo ki delana ka mokotia, ka tukunia “Dou kakua ni kidroatakia ni sa tiko vua na yalona.”
\v 11 Ia ni sa qai cake ko koya, ka dovi madrai, ka kana, a ra sa vivosaki vadede, ka kida na savulaci, sa qai qai tani ko koya.
\v 12 A ra sa yadia mai na cauravou ni sa bula, a ra sa vacegui valevu.
\p
\v 13 Ia kitou sa liu yani ka vodokia na waqa, ka soko ki Aso, ni kitou sa nanumia me vavodoki Paula kinia, sa vakoya na nona lewa, ni sa via taubale ko koya.
\v 14 Ia ni kitou sa sota kaya mai Aso, kitou sa vavodokia ka yaco ki Mtilini.
\v 15 Ia kitou sa soko tani yani na vinua gona, ka yaco me donui Kio ena siga sa taravia, ka bogi dua kitou sa yaco kinia ki Samo; ka bogi dua voki, kitou sa yaco ki Milito.
\v 16 Ni sa lewa oti ko Paula me soko baleti Efeso, me yali ni tiko vadede mai Esia, ni sa variri, kevaka e rawa vua me tiko mada mai Jeruisalemi ka qai yaco na siga ni Penitiko.
\p
\v 17 A sa talaki mai Milito ki Efeso me qai vi ira na nodra qa nai soqosoqo lewe ni lotu.
\p
\v 18 Ia ni ra sa yaco vua, sa tukunia vi ira ko koya: “Dou sa kila na noqui valavala ena visiga voki lia ka'u tiko kinia kei ikodou, sa vatekivu enai mata ni siga ka'u a qai mai kinia ki Esia;
\v 19 niu a qaravia na Turaga ena yalo e malumalumu sara, ka levu na wai ni mataqu, kei na dauvere sa yaco vi au ni ra sa buki qau vere ko ira na Jiu:
\v 20 ni ka'u a yali ni rerevakia me'u kua kinia ni kau vavulici ikodou, ni dou sa soqoni vata, ena vivale voki lia,
\v 21 ni'u a varotakia tiko vi ira na Jiu, vi ira voki lia na vimatanitu tani, na vivutuni vua na Kalou, kei na vabautia na noda Turaga ko Jisu Karisito.
\p
\v 22 Ka raicia au sa qai ki Jeruisalemi ka ni sa uqeti au na yaloqu, ka'u sa yali ni kila se cava ena yaco kinia vei a;
\v 23 koya lia ni sa vatakilatakia vi au na Yalo Tabu ena vikoro kece lia, ka tukunia sa waraki au nai vesu kei na rarawa.
\v 24 Ia ni ka'u sa yali sara ni nanumia na noqu bula me ka talei vi au ka me'u vaotia lia na noqu cakacaka kei nai tavi sa solia mai vi au na Turaga ko Jisu, me'u vatakila nai tukutuku-vinaka ni loloma ni Kalou.
\v 25 Ka raicia, au sa kila dou na yali ni raicia voki na mataqau, ko ikodou kece lia au a qai voli ena ikodou maliwa, ka vunautakia na matanitu.
\v 26 O koya lia ka'u sa vadinadinatakia kinia vi ikodou ena siga koya, ni'u sa yali ni cala ena vukuna e dua sa na cudruvi:
\v 27 ni'u sa yali ni rerevakia ni tukunia vi ikodou na loma ni Kalou taucoko.
\v 28 O koya lia mo dou varaici ikodou kei ira voki lia na qele ni sipi, sa lesi ikodou kinia na Yalo Tabu mo dou nodrai vatawa, mo dou vakania nai soqosoqo.
\v 29 Ni'u sa kila koya, ni'u sa qai tani gona ena qai cudru mai vi ikodou eso na wolifa ca sara; era na yali ni lomani ira na qele ni sipi.
\v 30 E na tubu cake voki lia eso na tamata vi ikodou, era na vosatakia na ka e vivacalai, me mari ira kinia era sa lotu me ra muri ira.
\v 31 O koya mo dou qai vatawa, ka nanumia ni sa tolu na yabaki ka'u a yali ni mudu kinia ni vunauci ikodou kece lia ena savulaci kei na bogi, ka vawai tiko na mataqu.
\p
\v 32 Oi ikodou na viwekani, au sa qai tataunaki ikodou vua na Kalou, kei na vosa ni nona loloma o koya sa rawatia me vatataki ikodou ka soli vi ikodou mo dou i votavota vata kei ira voki lia sa vasavasavataki.
\p
\v 33 Au sa yali ni kocovia na siliva se na koula, se nai sulu ni tamata e dua.
\v 34 Dou sa kila voki lia, ni sa daucakacaka na ligaqu koya me so na ka e yaga vi au vi iratou voki lia eratou sa tiko.
\v 35 Ena ka voki lia au sa vatakilatakia vi ikodou, ni sa kilikili mo dou dau cakacaka vakoya mo dou vukei ira sa malumalumu, mo dou nanumia voki lia na vosa ni Turaga ko Jisu ni sa tukunia ko koya, A ka ni vivakalougatataki valevu me soli ka, ka valailai lia me tauria na ka.”
\p
\v 36 Ia ni sa vosa oti vakoya ko koya sa tekiduru, ka masu vata kei ira vayadua:
\v 37 a ra sa tagi sara kece lia, ka mokoti Paula, ka reguci koya.
\v 38 A sa rarawa valevu na lomadra ena vuku ni vosa ka tukunia ko koya, ni ra sa na yali ni raici koya voki. A ra sa talatala vua ki waqa.
\c 21
\cl Wase 21
\p
\v 1 Ia ni kitou sa daini ira, kitou sa varewa ka vue yani ki Kosa, ka ena savulaci ki Roti: ka mai kea ki Patara.
\v 2 Ia ni kitou sa raicia e dua na waqa, sa soko yani ki Finiasi, kitou sa vodokia, ka soko yani.
\v 3 Ia ni kitou sa kunei Kipiro, kitou sa soko baletia na nitou i mawi, ka kitou sa soko ki Siria, ka uru ki Taia; ni sa sobu kinia nai usana ki waqa.
\p
\v 4 Ia ni kitou sa raici ira sa lotu, kitou sa tiko kinia ka bogi vitu: ia ni sa vavuna na Yalo Tabu, era sa tukunia vi Paula, me kakua ni qai cake ko koya ki Jerusalemi.
\v 5 Ia ni kitou sa vaotia na visiga koya, kitou sa qai cavu tu ka qai yani: a sa talatala vikitou ko ira kece lia kei ira na watidra, kei ira na luvedra, kitou sa yaco mada ki nai bili ni koro, kitou sa qai tekiduru e matasawa ka masu.
\v 6 Ia ni kitou sa vitatau, kitou sa vodo ki waqa, a ra sa suka voki ki nodratou.
\p
\v 7 Ia ni kitou sa soko mai Taia, kitou sa yaco ki Tolemo, ka vikidavaki kei ira na viwekani, ka tiko vata kei ira ka bogi dua.
\v 8 Ena savulaci cake kitou sa qai yani koi kitou sa qai vata kei Paula, ka yaco ki Sisaria: ia kitou sa curu ki na vale i Filipi nai vavuvuli, ko koya sa dina vi ira na lewe vitu, ka kitou sa tiko vata kaya.
\v 9 A sa lewe va na luvena, eratou sa gone yalewa, a ratou sa dau parofisai.
\p
\v 10 Ia ni kitou sa bogi vica mai gona, sa qai sobu mai Jutia e dua na parofita, ko Akapo na yacana.
\v 11 Ia ni sa curu mai vi kitou ko koya, sa tauria nai vau-ni-sulu nei Paula a sa vesukia na ligana kei na yavana, ka tukunia, “sa vakoya na vosa ni Yalo Tabu, Era na vesukia vakoya nai taukei ni vau-n-sulu koya ko ira na kai Jutia era sa tiko mai Jeruisalemi, a ra na solia ki na ligadra era sa yali ni Lotu.”
\p
\v 12 Ia ni keitou sa rogocia na veika koya, koi kitou kei ira voki lia nai taukei, kitou a vamasuti koya me kakua ni qai cake ki Jeruisalemi.
\p
\v 13 Sa qai tukunia ko Paula, “a cava dou sa caka ni dou sa tagi ka vadatuvutakia na lomaqu? Ni'u sa yali ni varau me'u vesu loa lia me'u mate voki lia mai Jeruisalemi ena vuku ni yaca ko Jisu.”
\p
\v 14 Ia ni sa bese ni varogocia ko koya, kitou sa kua soti, ka tukunia, “me yaco lia na nona lewa na turaga.”
\p
\v 15 Ia ni sa oti na visiga koya, kitou sa vasosolo na nitou veika, ka qai cake ki Jeruisalemi.
\v 16 Eso voki lia era sa lotu mai Sisaria, era sa qai vata kei kitou, a ra sa yadia e dua sa lotu makawa, ko Nasoni, na kai Kipiro, me kitou moce e nona vale.
\p
\v 17 Ia ni kitou sa yaco ki Jeruisalemi, era sa vacegui kitou ena reki ko ira na viwekani.
\v 18 Ia ni savulaci cake sa qai vata kei kitou ko Paula kei Jemesa; a ra tiko kinia ko ira kece lia na qase.
\v 19 Ia ni sa vikidavaki kei ira ko koya sa qai tukunia yadua na ka kece sa caka na Kalou ena kedra maliwa na vimatanitu ena nona vunau tiko.
\v 20 Ia ni ra sa rogocia, era sa vavinavinakatakia vua na Kalou, a ra sa tukunia vua, “o iko na wekai kitou, ko sa raicia, era sa lewe vica na udolu na Jiu era sa vabautia; a ra sa gumatua kece lia me ra muria na vunau:
\v 21 ia ka so sa tukuni iko vi ira, ni ko sa vavulici ira kece lia na Jiu, era sa tiko ena kedra maliwa na vimatanitu tani, me ra daini Mosese, ni ko sa tukunia me ra kakua ni cilivi ira na gone, se muria nai valavala eliu.
\v 22 Ena vabeka evei koya? Ni ra na rogocia dina ko sa tadu mai.
\v 23 O koya mo qai caka na ka koya, kitou sa tukunia vi iko: E le va na tamata sa tiko vata kei kitou eratou a bubului;
\v 24 mo yadia iratou, ka vasavasavataki iko vata kei iratou, ka volia na nodratou madrali, me ratou tasia na uludratou; me ra kila voki kinia ni sa yali ni dina na ka kece lia ko sa tukunia kinia vi ira, ka ni ko sa muria voki lia na vunau ena nomui valavala.
\v 25 Ia ena vukudra na vimatanitu tani era sa vabautia, era sa vola oti kinia ka lewa me ra maroroi ira lia mai na ka sa cabo ki na vimatakau mai na dra voki lia kei na ka sa kuna kei na daudara.
\v 26 Sa qai yadi iratou na tamata ko Paula, ia ni sa vasavasavataki koya vata kei iratou ena savulaci, sa curi ki na valenisoro, me tukunia na siga ena oti kinia na vacavacavataki, ka me cabori nai madrai ena vukudratou yadua.
\p
\v 27 Ia ni sa varau oti na bogi vitu, ni ra sa raici koya ena valenisoro ko ira na Jiu mai Esia, era sa vauqeti ira na tamata kece lia, ka tauri koya,
\v 28 a ra sa qoqolou: “Oi ikodou na Isireli, dou vivuke mai: ko koya koya na tamata sa dau vavulici ira na tamata kece, ena viyasana kece lia, me ra cati ira na kai noda, kei na vunau, kei na tikina koya: sa yadia voki lia eso era sa matanitu tani ki na valenisoro, a sa vadukadukalitakia na tikinia tabu koya.
\v 29 Ni ra a raicia e liu sa tiko vata kaya ena koro ko Tirofimo na kai Efeso, a ra sa nanumia sa yadia ko Paula ki na valenisoro.
\v 30 A ra sa ue kece lia na lewe ni koro, a ra sa cici vata ko ira na tamata: a ra sa tauri Paula, ka yaratakia mai na valenisoro ki tuba: a sa sogo sara na darava.
\p
\v 31 Ia ni ra sa saga me vamatei koya, sa yaco vua na turaga levu i mata sotia nai tukutuku, ni sa ue ko Jeruisalemi taucoko.
\v 32 A sa yadia sara ko koya eso na sotia, ka so na turaga lalai, ka cici sobu vi ira: ni ra sa raicia na turaga levu kei ira na sotia era sa mudu ni vaculaki Paula.
\p
\v 33 Sa qai qai voleka na turaga levu, ka tauri koya, a sa tukunia me vesuki ena sinucodo erua; a sa tarogia se ko cei ko koya, ka cava voki lia ka caka.
\v 34 A ra sa dui kacivakia na ka tani ko ira na lewe levu; ia ni sa yali ni kila ko koya na kena dina ena vuku ni ue, sa qai tukunia me kau ko koya ki na bure ni valu.
\v 35 Ia ni sa yaco ko koya kinai kabakaba, sa yaco ni ra sa vibiliyaki koya yani ko ira na sotia ena vuku ni nodrai valavala vakakukauwa na lewe levu:
\v 36 ni sa lewe levu na tamata sa muria, ka qoqolou, “Yadia tani yani.”
\p
\v 37 Ia ni sa tuberi tiko ko Paula ki na bure ni valu, sa tukunia ko koya vua na turaga levu ni valu, E tara me'u vosa mada vi ikonu? Sa qai tukunia ko koya, ko sa kila li na vosa va-kirisi?
\v 38 Ko sa yali li ni koya na kai Ijipita, ko koya ka vere ena gauna sa oti, ka yadi ira ki na veikau e lewe va na udolu na Daulaba?
\p
\v 39 Sa qai tukunia ko Paula, oi au na Jiu, na kai Tarisu mai Sisilia, sa yali ni koro kaisi na noqu koro; ia kau sa masuti ikonu mo ni laivi au mada me'u vosa vi ira na tamata.
\v 40 Ia ni sa vatara ko koya, sa tu cake ko Paula enai kabakaba, ka vatabataba vi ira na tamata. Ia ni ra sa tiko lo sara, sa vosa vi ira ko koya ena vosa va-Iperiu, ka tukunia,
\c 22
\cl Wase 22
\nb
\v 1 “Oi ikonu na viwekani, kei na matua, ni varorogo mai ni ka'u sa tukuni au vi ikonu.'
\v 2 Ia ni sa rogocia sa tukunia ko koya vi ira ena vosa va-Iperiu, era sa tiko lo sara, a sa tukunia ko koya:
\v 3 “Oi au dina na Jiu, au a sucu mai Tarisu mai Sisilia, ia ka'u a susugi ena koro koya, ka sa vatavulici au vadodonu ko Kamalieli me vaka na nodra vunau na matua, ia ka'u a gumatua ena vuku ni Kalou, me vataki ikonu kece lia ena siga koya:
\v 4 ia ka'u a vacacani ira sa Lotu vakoya me ra mate, ia ka'u a vesukia ka dainia ki na vale ni vivesu na tagane eso ka so na yalewa.
\v 5 A sa noqui vadinadina na bete levu, kei ira kece lia na matua: ni ka'u a tauria na nodrai vola vi ira na viwekani, ka qai ki Tamasiko, me'u yadi ira era sa tiko kinia ki Jerusalemi, ni ra sa vesuki me ra cudruvi.
\p
\v 6 Ia sa yaco, ni ka'u sa qai yani ka toro voleka ki Tamasiko ena siga levu tutu, sa dua na rarama levu sa cila vasauri mai lomalagi ka vavolivoliti au.
\v 7 Au sa qai bale ki na qele, ka rogocia e dua na vosa sa tukunia vi au, ‘I Saula, i Saula, ko sa vacacani au ena vuku ni cava?’
\p
\v 8 Au sa qai tarogia, ‘O cei beka koi ikonu na Turaga?’ A sa tukunia vi au ko koya, ‘oi au ko Jisu na kai Nasareci, ko koya ko sa vacacana.’
\p
\v 9 A ra sa raicia dina na rarama ko ira sa qai vata kei au, a ra se yali ni rogocia na vosa i koya sa vosa mai vi au.
\v 10 Au sa qai tarogia, A cava me'u caka noqu Turaga? Cavu tu, ka qai ki Tamasiko: ia ena tukuni kinia vi iko na ka kece lia sa lesi vi iko mo caka.
\v 11 Ia ni ka'u sa yali ni rai rawa ena vuku ni kena remoremo na rarama koya, era sa tuberi au ko ira sa qai vata kei au, kau sa yaco kinia ki Tamasiko.
\v 12 A sa dua ko Ananaiasa, a tamata lotu dina, me vaka na vunau, a sa rogo vinaka vi ira kece lia na Jiu era sa tiko mai kinia,
\v 13 sa qai mai vi au, a sa tu, ka tukunia vi au, ‘Na wekaqu Saula, mo rai vinaka mai.’ Ia, ena tiki-ni-siga koya, ka'u sa rai cake vua.
\v 14 A sa tukunia ko koya, ‘Sa digitaki iko na nodra Kalou na noda qase, mo kila na lomana, ka raici koya na Yalododonu, ka rogocia na vosa ni gusuna:
\v 15 ni ko na dautukuni koya vi ira na tamata kece lia ena ka ko sa raicia ka rogocia.
\v 16 Ko sa qai vaberabera voki ena vuni cava? Tu cake, mo papitaisotaki, ka vuya laivi na nomui valavala ca, ni ko sa masutia na yaca ni turaga.’
\p
\v 17 Ia ka yacovia, ni kau sa lesu voki mai ki Jeruisalemi: ni kau sa masu tiko ena vale-ni-soro, au sa raicia na raivotu:
\v 18 ia ka'u sa raici koya ni sa tukunia vi au ‘kusarawa mo qai tani e Jeruisalemi: ni ra na yali ni vabautia na nomui tukutuku ena vukuqu.’
\v 19 Au sa qai tukunia ‘Ikonu na Turaga, era sa kila ni ka'u a daini ira ki na vale ni vivesu era sa vabauti ikonu ka vakanakuitataki ira ena valenilotu kece lia:
\v 20 ia ni sa vadavei na dra kei Sitiveni ko koya sa dau tukuni ikonu, au a tu voleka voki lia kinia, ka vinakatia na nona mate, ka maroroya na nodrai sulu era sa vamatea.’
\v 21 Sa qai tukunia vi au ko koya, ‘Qai tani yani: ni ka'u na talai iko vayawa vi ira na vimatanitu tani.’”
\p
\v 22 Ia era sa rogoci koya ka yacovia mada na vosa koya, era sa qai tabalakia cake na domodra, ka tukunia, ‘Me yadi tani e vuravura na tamata sa vakoya: ni sa yali ni dodonu me bula.’
\p
\v 23 Ia ni sa qoqolou ka vibiuyakia na nodraisulu, ka dainia na kuvu-ni-soso ki na cagi.
\v 24 Sa tukunia na turaga levu ni vale me ra yadi koya ki na bure ni valu, a sa tukunia me tarogi ni sa vakanakuitataki, me kila ko koya se cava era sa qolouvaki koya kinia vakoya.
\p
\v 25 Ia ni ra sa vesukia tiko ena wa, sa tarogia ko Paula vua na turaga sa tu kinia, “E tara beka vi ikodou mo dou vakanakuitatakia na kai Roma, ka yali mada ni lewai?'
\p
\v 26 Ia ni sa rogocia na turaga ko ya, sa laki tukunia vua na turaga levu ni valu, ka tukunia, “mo lewai iko vinaka ena ka ko caka: ni sa kai Roma na tamata koya.”
\p
\v 27 Sa qai qai mai na turaga levu ni valu ka tukunia vua, Tukunia mai vi au, se ko sa kai Roma se yali?” Sa tukunia ko koya, “Io.”
\p
\v 28 Sa qai tukunia ko Paula, “ia koi au, ka'u a sucu kinia.”
\v 29 Era sa qai qai tani sara ko ira sa lesi me ra tarogi koya; a sa rerevakia voki lia na turaga levu, ni sa kila e kai Roma ko koya, ena vuku voki lia ni nona vesuki koya.
\p
\v 30 Ia ena savulaci ni sa via kila ko koya na kena dina ni ka era sa beitaki koya kinia ko ira na kai Jiu, sa serekia na kenai vesu ko koya, a sa tukunia vi ira na bete levu kei na nodra matavilewai kece lia me ra qai mai; a sa qai yadi Paula sobu, ka vaturia e matadra.
\c 23
\cl Wase 23
\p
\v 1 A sa varaici ira matua na matavilewai ko Paula, ka tukunia, “Oi ikonu na viwekani, au sa muria ka yacovia na siga koya na ka ka'u a nanumia sa dodonu ena mata ni Kalou.”
\v 2 A sa tukunia ko Ananaiasa na bete levu vi ira sa tu voleka vua me ra tavia na gusuna.
\p
\v 3 Sa qai tukunia vua ko Paula, “Ena tavi iko na Kalou, ko iko na lalaga sa boro vulavula: ko sa tiko beka mo lewai au me vaka na vunau ka sa tukunia me'u tavi, ia ka sa yali ni vaka na vunau?”
\p
\v 4 Sa qai tarogia ko ira sa tu voleka, “O sa vosavacacatakia li na bete levu ni Kalou?”
\p
\v 5 Sa qai tukunia ko Paula, Au sa yali ni kila, koi ikonu lia na viwekani ni sa bete levu ko koya: ni sa volai, “Mo kakua ni vosavacacataki koya sa lewai ira na kai nomu.”
\p
\v 6 Ia ni sa raicia ko Paula, ni sai tokani i Setoki eso vi ira, ka so voki lia era Farisi, sa kaci ko koya ena matadra na matavilewai, “Oi ikonu na viwekani koi au na Farisi, a luve ni Farisi: ena vuku ni'u sa vadinatia ni na tu cake voki na mate ka'u sa tarogia kinia.”
\v 7 Ia ni sa vosa oti vakoya ko koya, sa tubu na vileti vi ira na Farisi, kei ira nai tokani i Setoki; a sa tawase rua kinia na lewe levu.
\v 8 Ni sa dau tukunia ko ira nai tokani i Setoki sa yali na tucake voki mai na mate, se agilose, se yalo: a sa dau tukunia ko ira na Farisi sa dina ruarua.
\p
\v 9 A sa levu na qoqolou, a sa qai tucake ko ira na vu-ni-vola era nodrai tokani na Farisi; a ra sa gumatua, ka tukunia, Kitou sa yali ni raicia e dua na ka ca vua na tamata koya; ia ka vaevei kevaka sa vosa vua e dua na agilose se na yalo?
\v 10 Ni sa qai tubu na vileti levu, sa rere na turaga levu ni valu, de ra basuraki Paula, a sa tukunia vi ira na sotia, me ra qai sobu, me ra kalirakia vakaukauwa mai vi ira ka me ra yadia ki na bure ni valu.
\p
\v 11 Ia ena bogi sa muri sa tu voleka vua ko koya na Turaga, ka tukunia, “Mo vacegu lia, Paula: ni sa kilikili sara lia mo tukuni au mai Roma voki lia, me vaka ko sa tukuni au e Jeruisalemi.”
\p
\v 12 Ia ni sa savulaci mai, sa buki veretakia ko ira na Jiu eso, a ra sa vivadreti ena bubului, ka tukunia me ra kakua ni kana se gunu me rawa mada na nodra vamatei Paula.
\v 13 A ra lewe vasagavulu ka mani vacaca era sa bukia na vere koya.
\v 14 A ra sa qai mai vi ira na bete levu kei ira na matua, ka tukunia, “Kitou sa vivadreti ena bubului levu, me kitou kakua ni kania e dua na ka, me sa rawa mada na nitou vamatei Paula.
\v 15 Ia koi ikodou kei ira voki lia na matavilewai, dou tukunia vua na turaga levu ni valu me yadi koya sobu mai vi ikodou, me vaka dou sa via tarogia vadodonu ena vukuna, ia koi kitou, ni sa bera ni yaco ko koya, kitou sa varau tu me vamatea.”
\p
\v 16 Ia ni sa rogocia na vere koya na luvena tagane na ganei Paula, ka sa qai ka curu ki na bure ni valu, ka tukunia vei Paula.
\v 17 Sa qai kacivia e dua vi ira na turaga ni valu ko Paula, ka tukunia, “Yadia na cauravou koya vua na turaga levu ni valu; sa dua na ka sa tu vua me tukunia vi koya.”
\v 18 Sa qai yadia me rau qai vua na turaga levu-ni-valu, a sa tukunia, “Sa kacivi au ko Paula na tamata ka vesu tu, ka tukunia me'u yadia mai vi iko na cauravou koya, ni sa dua na ka sa tu vua me tukunia vi iko.”
\v 19 Sa qai tauria na ligana na turaga levu ni valu a rau sa qai vatikitiki vairau; a sa tarogia, “A cava beka, na ka sa tu vi iko ko sa via tukunia vi au?”
\v 20 Sa qai tukunia ko koya, sa lomavata ko ira na Jiu me ra masuti iko mo yadi Paula sobu ena savulaci vi ira na matavilewai, me vaka ko sa via tarogia vadodonu eso na ka ena vukuna:
\v 21 ia mo kakua ni varogocia na nodra vamamasu; ni ra sa lewe vasagavulu ka mani vacaca era sa lawakitakia, a ra sa vivadreti vakai ira ena bubului, me ra kakua ni kana se gunu me ra vamatei koya mada e liu: a ra sa qai varau tu, a ra sa warakia lia mo yalatakia vi ira.”
\v 22 Sa qai dainia na cauravou na turaga levu ni valu me qai yani, a sa varotia, “Mo kakua ni tukunia vua e dua ni ko sa mai vatakila vi au na ka koya.”
\p
\v 23 A sa kacivi rau e lewe rua na turaga ni valu ko koya ka tukunia, varautakia na sotia e lewe rua na drau, kei na tamata e lewe vitusagavulu era vodo ose, kei na tamata e lewe rua na drau sa vaiyaragi ena moto, me ra qai ki Sisaria ka tolu na tiki ni bogi;
\v 24 ka varautakia voki lia eso na ose, me vodo kinia ko Paula, me kau vavinaka ki Sisaria vi Filikesa na Kovana.
\v 25 A sa volai nai vola ko koya ka vakoya:
\v 26 “Koi au ko Kilotiu Laisiasa vua na turaga vinaka sara ko Filikesa sa loloma.
\v 27 A tamata koya era a tauria na Jiu, a sa voleka ni ra vamatea; au sa qai yadi ira na sotia, ka vabulai koya, ni ka'u sa kila e kai Roma ko koya.
\v 28 Ia ni'u sa via kila se cava era sa beitaki koya kinia, au sa yadia ki na nodra matavilewai:
\v 29 ia ka'u sa raicia ni sa beitaki ko koya ena ka eso e viletitakia ena nodra vunau, ia ka yali na ka sa beitaki vua sa dodonu me mate kinia se me vesu.
\v 30 Ia ni sa tukuni mai vei au era sa lawavaki koya ko ira na Jiu, au sa variri me'u vatala yani vi iko au sa vosa voki lia vi ira era beitakia me ra tukunia e matamu na veika sa beitaki kinia ko koya sa loloma.
\p
\v 31 Sa qai yadi Paula ko ira na sotia, me vaka sa varotia vi ira, a ra sa yadia ena bogi ki Adipatiri.
\v 32 Ia ena savulaci era sa daini ira sa vodo ose me ra qai vata kaya, a ra sa lesu voki ki na bure ni valu.
\v 33 Ia ni sa yaco ki Sisaria ko ira koya, era sa solia nai vola vua na turaga, ka varaitaki Paula voki lia vua:
\v 34 ia ni sa wiliki oti na turaga, sa tarogia se ko cei na nona vanua. Ni sa qai kila sa kai Sisilia,
\v 35 sa tukunia “Au na rogoci iko ni ra sa yaco mai ko ira era sa beitaki iko. A sa varotakia me vatawa ena vale ni veilewai nei Eroti.
\c 24
\cl Wase 24
\p
\v 1 Sa bogi lima sa qai qai sobu ko Ananaiasa na bete levu kei ira na qase, ka dua na tamata sa vuku ena vosa, ko Teritulu, era sa beitaki Paula vua na turaga.
\v 2 Ia ni sa kacivi mai ko koya, sa vatekivu ko Teritulu me beitakia, ka tukunia, “Kitou sa vacegu valevu ena vukumuni, a sa yaco me vinaka na matanitu koya ena nomunu lewa vavuku.
\v 3 Kitou sa vavinavinakatakia kinia ena visiga kece lia kei na viyasana kece lia, I Filikesa vaturaga sara, ni kitou sa rekitakia.
\v 4 Ia de balavu loa lia vi ikonu na noqu vosa, au sa masuti ikonu mo ni yalovinaka mo ni rogoci kitou mada valailai.
\v 5 Ni kitou sa raicia na tamata la koya e dau vivacalai, a sa dauvatubu ca ko koya vi ira kece lia na Jiu e vuravura, a sa liu vi ira nai tokani na kai Nasareci:
\v 6 ka sa caka me vacacana voki lia na valenisoro; ka kitou a tauria, ka via lewa me vaka na nitou vunau.
\v 7 Ia ko Laisiasa na turaga levu ni valu sa qai vakaukauwa mai ka kalirakia mai na ligai kitou,
\v 8 a sa vosa vi ira era sa beitaki koya me ra qai mai vi ikonu: ia ni ikonu sa tarogi koya, ko ni sa kila rawa na ka kece lia kitou sa beitakia vua.”
\v 9 A ra sa vadinadina ko ira na Jiu, ka tukunia, sa dina na veika koya.
\p
\v 10 Ia ni sa deguvacu na turaga vi Paula me vosa, sa qai tukunia ko koya, “Ni'u sa kila sa levu na yabaki ko ni sa turaga ni lewa kinia ena vanua koya, au sa vinakatia valevu me'u tukuni au.
\v 11 O ni sa kila, sa qai oti loa lia e tinikarua na bogi ni ka'u a qai cake kinia ki Jeruisalemi me'u lotu.
\v 12 A ra sa yali ni raici au ni kirau sa vileti kaya e dua na ena valenisoro, se niu sa vatubu ca vi ira na lewe levu, sa yali lia ena vivalenilotu, se ena koro;
\v 13 a ra sa yali voki lia ni vatakilakilatakia rawa ni sa dina na veika era sa beitaki au kinia.
\v 14 Ia na ka koya ka'u sa vatusa vi ikonu, ai valavala era sa vatoka mei vavuvuli vatani, au sa lotu vakinia vua na nodra Kalou na noqu matua, ka vadinatia na ka kece lia sa volai ena vunau kei ira na parofita:
\v 15 ia ka'u sa vanuinui vua na Kalou, ni na tu cake voki ko ira na mate, ko ira na yalododonu, kei ira na yali ni yalododonu, o koya era sa nuitakia voki lia ko ira.
\v 16 Ia na ka koya ka'u sa gumatua kinia, me kakua e dua na siga e cala kinia na lewa-ni-lomaqu vua na Kalou, se vi ira na tamata.
\v 17 Ia ni sa oti e levu na yabaki, ka'u sa qai mai me'u yadia na ka-ni-loloma ki na noqu vanua, kei nai madrali eso.
\v 18 Ia ka so na Jiu mai Esia era sa raici au ni'u sa vasavasavataki ena vale ni soro, ia kitou sa yali ni lewe levu, se kitou ue.
\v 19 E dodonu voki lia me ra mai tu e matamunu gona, ka tukunia, kevaka era sa kila e dua na ka ca vi au.
\v 20 Se me ra tukunia ko ira koya, kevaka era sa raicia e dua na ka ca vi au, ni'u sa tu ena matadra na matavilewai,
\v 21 ena vuku lia ni vosa e dua bau lia sa vakoya, ni'u sa tu ena kedra maliwa, ka kaci, ‘Ena vuku ni nodra tu cake voki mai na mate dou sa qai tarogi au kinia ena siga koya.’”
\p
\v 22 Ia ni sa rogocia na veika koya ko Filikesa a sa kila vinaka na Lotu, sa vasukai ira, a sa tukunia, “Ni sa qai sobu mai ko Laisiasa na turaga levu ni valu, kau na qai lewa na ka dou sa viletitakia.”
\v 23 A sa tukunia ko koya vua e dua na turaga ni valu me vatawai Paula, me dainia lia me qai voli, ka me kakua ni vatatabuya e dua na wekana sa qaravi koya, se qai mai vua.
\p
\v 24 Ia sa bogi vica, sa qai mai ko Filikesa kei na watina ko Tarusila, na yalewa ni Jutia, ka sa talakia me qai mai ko Paula, ka sa varogoci koya ni sa vosatakia na vabauti Karisito Jisu.
\v 25 Ia ni sa vunautakia tiko ko koya nai valavala dodonu, nai valavala malua, kei na vilewai sa bera mai, sa sautaninini ko Filikesa, ka tukunia, “Qai tani mada ni kua; ia ni'u sa lalaga ena dua na gauna ka'u na kacivi iko mai.”
\v 26 Sa nuitakia voki lia ni na soli lavo vua ko Paula: o koya koya sa talakitaki valevu kinia, me rau vivosaki kaya.
\p
\v 27 Ia ni sa oti e rua na yabaki, sa qai mai ko Porisiu Fesito mei sosomi kei Filikesa: ka ni sa vinakatia ko Filikesa me vayalovinakataki ira na Jiu vua, sa daini Paula me vesu tu lia.
\c 25
\cl Wase 25
\p
\v 1 Ni sa qai mai ki na vanua ko Fesito, ka oti e tolu na bogi, sa qai cavu tu e Sisaria me qai cake ki Jeruisalemi.
\v 2 Sa qai beitaki Paula vua ko ira na bete levu kei ira na nodra turaga na Jiu, a ra sa vamasutia,
\v 3 ka kerekere vua me lomani ira ena vukuna, me talakitaki, me qai mai ki Jeruisalemi ko koya, a ra sa lawavakia me na vamatea ena gaunisala.
\v 4 Ia sa tukunia ko Fesito, ni sa vatawai tiko mai Sisaria ko Paula, a sa varau me qai yani kinia ko koya.
\v 5 A sa tukunia, “Oi ikodou na turaga, me da qai sobu vata, ia gona dua na ka sa tu vua na tamata ko ya, mo dou qai beitaki koya kinia.”
\p
\v 6 A sa tiko vata lia kei ira ko koya ka bogi walu se bogi tini sa qai qai sobu ki Sisaria, ena savulaci cake sa tiko ko koya enai tikotiko ni vilewai, a sa tukunia me yadi mai ko Paula.
\v 7 Ia ni sa yaco mai ko koya, era sa tu vavolivolita ko ira na Jiu era a qai sobu mai Jeruisalemi, a ra sa beitaki Paula ena ka ca sara e levu, ia era sa yali ni vadinadinatakia rawa.
\p
\v 8 Ia sa tukuni koya ko Paula, Au sa yali ni caka e dua na ka ca, ki na nodra i vunau na Jiu, se ki na vale ni soro se kivei Sisa.
\p
\v 9 Ia ni sa vinakatia ko Fesito me vayalovinakataki ira na Jiu, sa vosa vi Paula, ka tukunia, “O ni sa vinakatia mo qai cake ki Jeruisalemi, mo lewai kinia e mataqu ena veika koya se yali?”
\p
\v 10 Sa qai tukunia ko Paula, “Au sa tu ena mata ni tikotiko ni vilewai nei Sisa, a tikinia e dodonu me'u lewai kinia, au a yali ni caka e dua na ka ca vi ira na Jiu, koya ko sa kila vinaka sara.”
\v 11 Kevaka ka'u sa tamata i valavala ca, se'u caka e dua na ka e dodonu me'u mate kinia, au sa yali ni bese ni mate: ia kevaka e yali na veika koya era sa beitaki au kinia, sa yali e dua e rawatia me soli au vi ira. Au sa cavuti Sisa me lewai au.
\p
\v 12 Ia ko fesito, ni sa vivosaki oti kei ira na matavilewai, sa tukunia, “O sa qai cavuti Sisa, ia ko na yadi vi Sisa.
\p
\v 13 Sa bogi vica, erau sa qai qai mai ko Akaripa na tui kei Perinaise ki Sisaria, me rau vikidavaki kei Fesito.
\v 14 Ia ni rau sa bogi vica kinia, sa tukuni Paula ko Fesito vi koya na tui, ka tukunia, “Sa dua na tamata sa vesu tu, ko koya ka dainia voki tu ko Filikesa:
\v 15 ia ni'u a tiko mai Jeruisalemi, era sa beitaki koya ko ira na bete levu kei ira na nodra matua na Jiu, a ra sa tukunia me'u lewai koya me cudruvi.
\v 16 Au sa qai tukunia vi ira, e yali ni nodrai valavala na kai Roma me solia loa lia e dua na tamata me vamatei, ka malua me veirai mada kei ira sa beitakia, me sa rawa voki lia na nona tukuni koya ena vuku ni ka ca era sa beitakia vua.
\v 17 Ia ni rau sa yaco mai ki na vanua koya, au sa yali ni vaberaberatakia, ia ena savulaci cake ka'u sa tiko enai tikotiko ni vilewai, ka tukunia me yadi mai na tamata koya.
\v 18 Ia ni ra sa tucake ko ira era sa beitakia, era sa yali ni beitaki koya ena ka ca, me vaka na ka ka'u nanumia:
\v 19 ia ka so lia na ka sa viletitaki kaya ena nodra lotu, kei na dua na tamata ko Jisu, ko koya sa mate, ia ka tukunia ko Paula sa bula tiko ko koya.
\v 20 Ia ni ka'u sa yali ni kila vinaka me'u lewa na veika koya, au sa tarogia se via qai cake ki Jeruisalemi ko koya, me lewai kinia e na veika koya se yali?
\v 21 Ia ni sa vaka ko Paula, me tiko mada me lewai koya ko Akusito, au sa qai tukunia me vatawai tiko ka malua me vatalai ko ya yani vei Sisa.”
\v 22 Sa qai tukunia vi Fesito ko Akaripa, “Oi au voki lia ka'u sa via rogocia na tamata koya,” “E na savulaci ko na rogoci koya”
\v 23 Ena savulaci ni rau sa qai mai ko Akaripa, kei Perinaise, erau ukucavu mai, a rau curu ki na vale ni vitarogi, kei ira vata na turaga levu ni valu, kei ira na turaga ni koro, ia ni sa varotia ko Fesito, sa yadi mai ko Paula.
\v 24 A sa tukunia ko Fesito, “Ikonu Akaripa na tui, kei ikodou kece lia na tamata sa tiko kei kitou gona, dou sa raicia na tamata koya, ena vuku i koya era sa cikevi au ko ira na Jiu e lewe levu, mai Jeruisalemi gona voki lia, ka ra sa tukunia e yali ni dodonu me bula ko koya.
\v 25 Ia ni ka'u sa raicia sa yali ni caka ko koya e dua na ka ca sa dodonu me mate kinia, a sa cavuti Akusito ko koya me lewai koya, au sa qai lewa me'u vatalai koya kinia.
\v 26 Ia ka yali na ka e macala me'u volai koya kinia vua na noqu turaga. O koya lia koya ka'u sa yadra mai kinia ki na matamudou, ia ka vaidina vi ikonu, Akaripa na tui, me tarogi mada me macala kinia na ka me'u vola.
\v 27 Ni sa rairai vi au me ka lialia me tala e dua sa vesu, ka yali vatakilatakia voki lia na ka ca era sa beitakia vua.
\c 26
\cl Wase 26
\p
\v 1 Sa qai tukunia vi Paula ko Akaripa, “sa qai tara mo vatusai iko mai.” Sa qai dodokia na ligana ko Paula ka tukuni koya:
\v 2 “Au sa nanumia ka'u sa kalougata, ikonu Akaripa, na tui, ni'u na tukuni au ni kua e matamuni, ena vuku ni ka kece lia era sa beitaki au kinia na Jiu:
\v 3 io, ni ikonu sa kila kece lia na nodrai valavala na Jiu kei na veika era sa dauviletitakia; o koya koya ka'u sa masuti ikonu kinia mo ni vosotia mada lia mo ni rogoci au.
\p
\v 4 A noqui valavala ni'u a gone ka yacovia na siga ko ya, ni'u a tiko kei ira na kai noqu mai Jeruisalemi, era sa kila kece lia na Jiu.
\v 5 Ko ira era sa kilai au e liu, kevaka era sa via tukunia mai, ni'u sai valavala va-Farisi me vataki ira era sa daumuria vamatailalai sara na noda lotu.
\p
\v 6 Au sa qai tu voki lia me'u lewai ena vuku ni ka ka'u sa vanuinuitakia na vosa ni yalayala ka solia na Kalou kivei ira na nimamu matua:
\v 7 ia sai koya na ka koya, era sa vakasama me na rawatia ko ira na nimamu yavusa e tinikarua, era dausoro vagumatua ena siga kei na bogi. Ia ena vuku ni nuinui koya i Akaripa na tui, era sa beitaki au kinia ko ira na Jiu.
\v 8 E vaevei, dou sa nanumia beka ni sa ka e dau vivatitiqataki, me vaturi ira cake voki na mate ni Kalou?
\p
\v 9 Oi au vokil ia ka'u a nanumia e lomaqu ni sa dodonu me'u vimecaki ena ka e levu kei na yacai Jisu na kai Nasareci.
\v 10 Ia na ka voki lia koya ka'u a caka mai Jeruisalemi: a ra sa lewe levu era sa lotu ka'u a sogolati ira ena vivale ni vivesu, ni ra sa lesi au kinia na bete levu, ia ni ra sa vamatei ka'u sa tukunia me vaka kinia.
\v 11 Ia ka'u a cudruvi ira valevu ena vivale ni lotu kece lia, ka vasaurarataki ira me ra dainia na lotu, ia niu sa cudru valevu sara vi ira; au a vacacania voki lia ki na vi koro tani.
\p
\v 12 Ia, ka'u a qai tiko kinia ki Tamasiko ni ra lesi au ka talai au na bete levu,
\v 13 ni sa siga levu toka lia, na tui, au a raicia ena sala e dua na rarama mai lomalagi, sa uasivia na kena remoremo na mata-ni-siga, a sa cila vavolivoliti au kei ira voki lia era qai vata kei au.
\v 14 Ia ni kitou sa bale kece lia ki na qele, au sa rogocia e dua na domo sa vosa vi au ena vosa va Iperiu, ka tukunia, I Saula, I Saula, o sa vacacani au ena vuku ni cava? E ca vi iko mo caqetia na mata ni moto.
\p
\v 15 Au sa qai tukunia, O cei koi ikonu na Turaga? A sa tukunia na Turaga, Oi au ko Jisu o koya ko sa vacacania:
\v 16 ia mo tu cake lia, ka tu e yavamu: ni'u sa rairai vi iko ena vuku ni ka koya me'u lesi iko mei talatala kei na dautukutuku voki lia ena veika ko sa raici au kinia vei iko:
\v 17 ni'u na vabulai iko mai vi ira na tamata na Isireli, kei ira na veimatanitu tani, o ira ka'u sa qai talai iko kinia,
\v 18 mo laki basukia na matadra, me ra saumaki mai na butobuto ki na rarama, mai na kaukauwa voki lia nei Setani ki vua na Kalou me ra kakua ni cudruvi enai valavala ca, me rai taukei vata voki lia e muri kei ira era yalosavasava, ni ra sa vabauti au.
\p
\v 19 Ia ni sa oti koya, i Akaripa na tui au sa yali ni talaidredre ki na rai votu valomalagi;
\v 20 ia ka'u sa tukunia mada e liu vi ira mai Tamasiko kei Jeruisalemi kei na yasayasa kece vaka Jutia vi ira voki lia na vimatanitu tani, me ra vivutuni ka saumaki mai k ivua na Kalou, ka caka nai valavala e kilikili sara lia kei na vivutuni.
\p
\v 21 O koya koya era sa tauri au kinia na Jiu, ena valenisoro ka saga me ra vamatei au.
\v 22 Ia ni sa vukei au na Kalou, au sa bula kinia ka yacovia na siga koya, ia kau sa tukunia tiko vi ira era lalai kei ira voki lia era lelevu ka sa yali na ka tani ka'u sa tukunia, koya lia e a tukunia na parofita kei Mosese ena yaco mai:
\v 23 ni na mate na Karisito, ni na kedrai matai era na tucake voki mai na mate ka na vatakila na rarama vi ira na tamata na Isireli, vi ira voki lia na vimatanitu tani.”
\p
\v 24 Ia ni sa tukuni koya tiko vakoya ko koya, sa vosa ena domolevu ko Fesito, “I Paula, o sa lialia sa valialiai iko na vuku levu”
\v 25 A sa tukunia ko koya, “Fesito vaturaga sara, au sa yali ni lialia: au sa cavutia lia na vosa sa dina ka vuku;
\v 26 ni sa kila na veika koya na tui, ia ka'u sa vosa doudou kinia ni'u sa kila e yali ni vuni vi koya e dua na ka koya, ni sa yali ni caka na ka ena dua na yasana vuni.
\v 27 I Akaripa na tui, ko ni sa vadinati ira na parofita, se yali? Au sa kila ikonu sa vakadinata lia.”
\v 28 Sa qai tukunia vei Paula ko Akaripa, “sa vo e lailai mo rawai au me'u lotu va-Karisito”
\v 29 Sa qai tukunia ko Paula, au sa masu vua na Kalou, e yali ena vukumuni dua loa lia, ena vukudra kece voki lia era sa rogoci au ni kua, se me vo e lailai, se me kakua lia ni vo, mo dou vataki au; ia me kakua lia ena sinucodo koya.
\v 30 Sa qai tucake na tui, kei na kovana, kei Penaise, kei ira era sa tiko vata kei iratou:
\v 31 ia ni ra sa vatikitiki tani, era sa vivosaki vakai ira, ka tukunia, A tamata koya sa yali ni caka e dua na ka sa dodonu me mate kinia se me vesu.
\p
\v 32 Sa qai tukunia vi Fesito ko Akaripa, “Na tamata koya kevaka sa yali ni cavuti Sisa me lewai koya, e dodonu lia me sereki.”
\c 27
\cl Wase 27
\p
\v 1 Ia ni sa lewai oti me kitou soko ki Itali, era sa soli Paula, ka so voki na tamata sa vesu, vua e dua na turaga ni mata sotia nei Akusito, na yacana ko Juliase.
\v 2 Ia ni kimamu sa vodokia edua na waqa ni Atiramitio, kimamu sa varewatakia, ka nakitia me kimamu sokoravitia na baravi kei Esia; a sa dua na kai Masitonia mai Cesalonaika, o Arisitako, sa qai vata kei kimamu.
\v 3 Ia ena savulaci kimamu sauru ki Saitoni, A sa lomavinaka vi Paula ko Juliase, a sa sereki koya me qai vi ira na wekana me vacegui kinia.
\v 4 Kimamu sa qai soko tani yani gona, ka sokoraviti Kipiro, ni sa ca na cagi.
\v 5 Ia kimamu sa sokotia na wasawasa kei Sisilia kei Pamifilia, ka yaco sara ki Maira mai Lisia.
\v 6 A sa raicia kinia na turaga ni valu e dua na waqa ni Alekisadria, sa soko ki Itali; a sa vavodoki kimamu kinia.
\v 7 Ia ni kimamu sa soko malua lia ka bogi vica, ka yaco vamama me donui Nito, ni sa tarovi kimamu na cagi, kimamu sa sokoraviti Kiriti, ka donui Salimoni:
\v 8 a sa vo e lailai me dredre ni sivia, kimamu sa yacovia e dua na yasana na yacana na Toba Vinaka; a sa voleka kinia e dua na koro ko Lasea.
\p
\v 9 Ia ni sa qai bogi vuqa, a sa mani mama na soko, ka ni sa qai oti na gauna ni lolo, sa qai vasalataki ira ko Paula,
\v 10 ka tukunia vi ira, “O ikonu na turaga, au sa kila ena levu na ka e ca kei na ka eda na dainia ena soko koya, ena yali ni ca loa lia nai usana kei na waqa, oi ita voki lia.”
\v 11 Ia na turaga ni valu sa vabauti rau na turaga ni waqa kei na kenai taukei, ka yali na veika sa tukunia ko Paula.
\v 12 Ia ni sa yali ni vinaka na toba koya me kele kinia ena vula i liliwa, era sa lewe levu vi ira sa lewa me ra soko tani yani, ni ra nanumia de sa rawa ki Finiasi me ra kele kinia ena vula i liliwa; ko ya na toba ki Kiriti, a sa donua na ceva era kei na tokalau vualiku.
\v 13 Ni sa qai liwa vamalua na ceva, era sa vakasama ni ra sa rawatia na ka era a nakitia, era sa cavui kelekele, ka sokoraviti Kiriti.
\v 14 A sa yali mada ni dede, sa qai laba na cava levu, a yacana ko Urokilitoni.
\v 15 Ia ni sa lebuka na laca ni waqa, ka yali kinia ni tau rawa ki na mata ni cagi, kimamu sa dainia lia me savu yani.
\v 16 A sa savu kinia ka volekatia e dua na yanuyanu na yacana ko Kilota, a sa vo e lailai sara me kimamu yali ni rawatia na velovelo:
\v 17 Ia ni sa varewatakia cake mai koya, era sa caka nai vatukawalu, a ra sa vatukawalutakia kinia na waqa, sa serekia na gacagaca, ka savu yani.
\v 18 Ia ni kimamu sa suaigelegele valevu sara ena cava, ena savulaci era sa dainia nai usana:
\v 19 ia ena bogi tolu kimamu sa dainia ena ligaimamu na gacagaca ni waqa.
\v 20 Ni sa qai bogi vica, ka yali ni rairai na matanisiga se na vikalokalo, a sa laba na cava levu, sa qai takali sara vi kimamu na nuitakia na bula.
\p
\v 21 Ia ni sa dede na nodra yali ni kana, sa tucake ko Paula ena kedra maliwa ka tukunia, “Oi ikonu na turaga sa dodonu mo ni varogoci au e liu, ka kakua ni cavui kelekele mai Kiriti, sa yaco kinia na ca koya kei na biu.
\v 22 Ia koya, au sa masuti ikonu mo ni kua ni yalo lailai: ni na yali e dua vi ikonu ena yali na nona bula ena ca lia na waqa:
\v 23 ni sa tu voleka vi au ena bogi koya e dua na agilose ni Kalou, o koya ka'u sa nona, o koya voki lia ka'u sa qaravia,
\v 24 a sa tukunia ‘Kakua ni rere, Paula; o na yadi lia kivei Sisa: ka raicia, sa soli ira kece lia vi iko na Kalou o iratou dou sa soko vata.’
\v 25 O koya koya, koi ikonu na turaga, mo ni vacegu ni'u sa vadinatia na Kalou, ni na yaco lia me vaka sa tukunia mai vei au.
\v 26 Ia, sa da na dai lia ki na dua na yanuyanu.”
\p
\v 27 Ia ni sa yaco mai nai ka tinikava ni bogi, ni kitou sa visavuyakia tiko ena wasawasa ko Atiria, ni sa lomaloma ni bogi, era sa nanumia na lewe ni waqa era sa volekatia e dua na vanua:
\v 28 a ra sa varautakia na wai, a ra sa kila sa katu ruasagavulu: ia ni ra sa savu yani valailai, ka varautakia voki na wai, era sa kila sa katu tinikalima.
\v 29 Ia ni ra sa rere de kimamu kasa kina vivatu, era sa dainia nai kelekele e va mai na mua ni turaga, a ra sa gadrevia tu me siga na vanua.
\v 30 Ia ni ra sa varau me dro tani ena waqa ko ira na kai mua, ni ra sa tukucia na velovelo ki wai, me vaka era sa ia me dainia nai kelekele mai na mua ki liu
\v 31 a sa tukunia ko Paula vua na turaga ni valu, vi ira voki lia na sotia, “kevaka era sa yali ni tiko lia ena waqa ko ira koya, ikonu na yali ni bula rawa.”
\v 32 Era sa qai seledrutia nai noka ni velovelo o ira na sotia, a ra sa dainia me ciri yani.
\p
\v 33 Ia ni sa voleka mai na siga, sa cikevi ira kece lia ko Paula me ra kana, ka tukunia, “Koya na kenai katinikava ni bogi ikonu sa wawa lia ka lolo, ka yali ni kania e dua na ka:
\v 34 o koya koya ka'u sa masuti ikonu kinia mo ni kana mada: ena yaga mo ni bula kinia: ni sa yali e dua vi ikonu ena lutu mai e dua na drau na uluna.”
\v 35 Ia ni sa vosa oti vakoya, sa tauria na madrai, a sa vavinavinakatakia vua na Kalou ena matadra kece lia; ia ni sa dovia, sa vatekivu me kania.
\v 36 A ra sa vacegui kece lia ka ra kana voki lia ko ira.
\v 37 Ia koi kimamu kece lia sa tiko e waqa, kimamu sa lewe rua na drau ka vitusagavulu ka ono.
\v 38 Ia ni ra sa kana oti ka mamau, era sa vamamadatakia na waqa, ka dainia na sila ki wai.
\p
\v 39 Ni sa qai siga mai, era sa yali ni kila na vanua: a ra sa raicia e dua na toba sa vamatasawa, a ra sa bosea me ra vakasa kinia na waqa, kevaka e rawa.
\v 40 Ia ni ra sa drutia laivi nai kelekele ni waqa, era sa dainia tu mai wai, ka serekia nai noka ni uli, ka varewatakia na laca levu ki na cagi, ka soko vaka ki vanua.
\v 41 A ra sa ciri kina yasana e sota vata kinia e rua na drodro, a ra sa vakasatakia na waqa, a sa coba sara na mua ki liu, ka yali ni yavala rawa, a sa kasere na mua turaga ena kaukau ni biau.
\p
\v 42 A ra sa bose ko ira na sotia me ra vamatei ira na tamata era sa vesu tu, de ra qalo dro eso, ka bula.
\v 43 Ia sa vinakatia na turaga ni valu me vabulai Paula, a sa taro ira kinia mai na ka era sa nanumia, a sa tukunia me rika e liu ko ira sa qalo rawa; me ra liu ki vanua;
\v 44 ia ko ira na kena vo, eso ena rara eso, ka so ena ka tani ni waqa. A sa va koya, era sa cabe bula kece lia ki vanua.
\c 28
\cl Wase 28
\p
\v 1 Ia ni kimamu sa cabe bula, kimamu sa qai kila sa yaca ni yanuyanu gona ko Melita.
\v 2 A ra sa lomani kimamu valevu ko ira nai taukei; ni ra sa vawaqa nai binibini buka, a ra sa yadi kimamu yadua ki vale, ena vuku ni uca sa qai tau kei na liliwa.
\v 3 Ia ni sa kumunia mai e dua nai vesu buka ko Paula, a sa laki tuva ki na buka sa waqa tu, sa dolo mai na katakata e dua na gata, ka vivigia na ligana.
\v 4 Ia ni ra sa raicia ko ira nai taukei, ni sa lili tiko lia e ligana na gata, era sa tukunia vakai ira, “E dina sa tamata daulaba o koya koya, ka sa cabe bula mai na waitui, ia na Lewa Dodonu e yali lia ni vatara me bula.”
\v 5 A sa qai kuretakia na gata ki na buka waqa ko koya, ka yali ni dua na leqa e yacovia nona bula.
\v 6 Ia era sa nanumia ena vuce mai na yagona, se bale sobu vasauri ka ciba: ia ni ra sa warakia vadede, ka yali ni raicia e dua na ka ca sa yacovia vua, sa qai visautakia na lomadra ka ra tukunia sa dua na kalou ko koya.
\p
\v 7 Ia sa tiko ena yasana gona eso na tiki ni vanua lia sa nona na turaga ni yanuyanu, o Pupiliu na yacana; a sa vacegui kitou ko koya, ka vakani kitou vinaka ka siga tolu.
\v 8 Ia sa tauvi-mate na tamai Pupiliu, a sa katakata ka cokadra; a sa curu ki na vanua e davo koto kinia ko Paula, ka masu ka sa tabakia e na ligana, ka vabula.
\v 9 Ia ni sa yaco na ka koya, sa qai voki lia mai ko ira era sa tauvi-mate ena yanuyanu, a ra sa vabulai:
\v 10 a sa levu na ka era varokorokotaki kitou kinia: ia ni kitou sa soko tani, era sa yadia mai ki waqa na veika e yaga vi kitou.
\p
\v 11 Sa oti e tolu na vula, kimamu sa soko ena dua na waqa ni Alekisadria, ka kele ena yanuyanu gona ena vula i liliwa, a kena matakau na drua tagane.
\v 12 A kimamu sa sobu ki Sarakuse, ka tiko kinia ka siga tolu.
\v 13 Mai na vanua gona kimamu sa soko, ka yacovia na vanua ko Rijio; ia sa bogi dua, sa qai liwa na ceva, ka oti e siga rua, kimamu sa yacovia na vanua ko Putioli:
\v 14 ia kitou sa raicia na viwekani eso, a ra sa masuti ikeitou me kitou tiko lia ka bogi vitu: kitou sa qai qai ki Roma.
\p
\v 15 A ra sa rogocia mai kinia na kitoui tukutuku ko ira na viwekani, ka ra sa qai mai ki na Makete i Apio kei na Bure e Tolu, me ra mai tavaki kitou kinia: ia ni sa raici ira ko Paula, sa vavinavinakatakia vua na Kalou, a sa vayaloqaqataki o koya.
\v 16 Ia ni kimamu sa yaco yani ki Roma, a sa vadonui ko Paula me tiko dua loa lia kei na dua na sotia sa vatawai koya.
\p
\v 17 Ia ni sa oti e tolu na siga, sa qai vasoqoni ira vata na nodra turaga na Jiu ko koya: ia ni ra sa soqoni vata mai, sa tukunia ko koya vi ira, Oi ikodou na viwekani, au sa yali ni caka e dua na ka ca vi ira na kai noda, se ki na nodrai valavala na noda matua, ia ka'u a vesuki lia ka soli yani ki na ligadra na kai Roma mai Jerusalemi.
\v 18 Ia ko ira, ni ra sa lewai au, era sa vinakata me ra sereki au, ni sa yali na ka vi au me'u mate kinia.
\v 19 Ia ni ra sa tukunia ko ira na Jiu me kakua, sa uqeti au na lomaqu me'u cavuti Sisa me lewai au; yali ni dua na ka me'u beitaki ira kinia na kai noqu.
\v 20 O koya koya kau sa vasoqoni ira vata kinia vi au ni'u sa vesu ena sinucodo koya ena vuku ni nodrai nuinui na Isireli.”
\p
\v 21 A ra sa tukunia vua, “sa yali e dua mai Jutia sa volai iko vi kitou, e yali voki lia e dua vi ira na viwekani sa qai mai sa vatakila se tukunia e dua na ka ca ena vukumu;
\v 22 ia kitou sa via rogoci iko se cava ko sa nanumia: ni kitou sa kila sa vosavacacatakia na lotu tani koya ena vivanua kece lia.
\p
\v 23 A ra sa lokucia vua e dua na siga, a ra lewe levu sa qai mai ki na nona vale, a sa serekia vi ira ko koya ka tukunia na matanitu ni Kalou, ka vadinadinataki Jisu vi ira mai na vunau i Mosese, kei ira na parofita, sa vatekivu ena savulaci, ka yacovia na raiyavi.
\v 24 Ia sa vadinatia ko ira eso na veika sa vosatakia, ka so sa yali ni vadinatia.
\v 25 Ia ni ra sa yali ni lomavata vaka i ira, era sa qai tani, ni sa vosatakia oti ko Paula e dua na vosa. Sa vosa dina na Yalo Tabu ni sa tukunia ko Aisea na Parofita vi ira na nomudou matua,
\v 26 ka tukunia, Dou na dau rogocia tiko lia, ka lecavia tu. Ia dou na dau raicia tiko lia ka yali ni raicia:
\v 27 Ni sa uro mai na lomadra na tamata koya, A sa didivara na daligadra, A sa bobo na matadra, De dua na siga ena rai na matadra, ka rogo na daligadra, ka kila na lomadra, A ra saumaki mai, Ia kau na vabulai ira.
\p
\v 28 O koya koya mo dou qai kila, ni sa yadi mai na bula mai vua na Kalou vi ira na vimatanitu tani; ia era na varogocia.
\v 29 Ia ni sa vosatakia oti ko koya na veika koya, era sa qai tani ko ira na Jiu, a ra sa vileti valevu vakai ira.
\p
\v 30 A sa tiko ko Paula ka yabaki rua taucoko ena vale sa volia tiko ko koya, ka sa vacegui ira kece lia era sa qai vua:
\v 31 ka sa vunautakia na matanitu ni Kalou, ka sa vatavuvulitakia vadoudou sara na ka kei Jisu Karisito na Turaga, ka sa yali na tamata sa tarovia.