lmv-x-levuka_reg/44-JHN.usfm

\id JHN
\ide UTF-8
\h Joni
\toc1 Joni
\toc2 Joni
\toc3 jhn
\mt Joni
\c 1
\cl Wase 1
\p
\v 1 Enai vatekivu sa bula ko koya na Vosa, rau sa tiko voki lia kei na Kalou ko koya na Vosa, a sa Kalou voki lia o koya na Vosa.
\v 2 Enai vatekivu e sa tiko voki lia o koya koya kei na Kalou.
\v 3 Sa caka na ka kece lia ko koya; a sa yali ni dua na ka sa caka, me yali ni caka ko koya.
\v 4 Sa tu voki lia vi koya na bula; ia na rarama ni tamata na bula.
\v 5 A sa cilavia na butobuto na rarama; ia na butobuto sa yali ni raicia.
\p
\v 6 Sa dua na tamata sa yadia mai vua na Kalou, a yacana ko Joni.
\v 7 O koya koya sa qai mai me dautukutuku; me tukunia na Rarama, me ra vabautia na tamata kece lia e na vukuna.
\v 8 Sa yali ni Rarama koya ko koya, ia sa nonai tavi lia me tukunia lia na Rarama.
\v 9 Sai koya lia koya na Rarama dina, sa qai mai ki vuravura ka sa varaitaki vi ira na tamata kece lia.
\p
\v 10 Sa tiko e vuravura ko koya, a sai koya ka caka kinia na vuravura, ia ka yali ni kilai koya na kai vuravura.
\v 11 Sa qai voki lia mai vi ira na kai nona, ka yali ni vabauti koya ko ira na kai nona.
\v 12 Ia ko ira voki lia sa vabauti koya, sa solia voki lia vi ira ko koya me ra yaco me ra luve ni Kalou, vi ira era vabautia na yacana:
\v 13 era sa vasucumia, e yali ena vukudra na qase, se na sucu vayago se na vitalia ni tamata, mai vua lia na Kalou.
\p
\v 14 A sa yaco voki lia me tamata o koya na vosa, ka tiko voki lia ki ita, (ia kitou sa raicia voki lia na nona i ukuuku, sa va voki lia nai ukuuku ni Le dua loa lia sa vatuburia mai vi Tamana) Sa sinai voki lia ena loloma ki na dina.
\p
\v 15 Sa tukunia ko Joni ka kacivakia, ka cavutia, Sai koya koya ka'u a vosatakia, O koya sa muri au sa uasivi cake vi ki rau: ni sa liu vi kirau ko koya.
\v 16 Ia eda sa rawatia kece lia, mai na ka sa sinai tu vua, a loloma sa vaikuritakia.
\v 17 Ia ko Mosese sa solia kinia na vanua; ko Jisu Karisito sa yaco kinia na loloma kei na dina.
\v 18 E yali ni dua na tamata e raicia na Kalou ena dua na gauna; na Luvena lia e dua loa lia, sa vatuburia o koya sa tiko e lomasere i Tamana, sa tukuni koya.
\p
\v 19 Ia sai koya koya nai tukutuku i Joni ni sa vayadia eso na bete ka so na luvei Livai ko ira na kai Jutia mai Jerusalemi me ra tarogi koya, “Ko cei beka o iko?”
\v 20 A sa cavutia ko koya, ka yali ni cakitakia; ka yadia lia, “Au sa yali ni Karisito koi au.”
\v 21 A ra sa tarogi koya, “Ko cei voki? Ko Ilaija beka?” A sa cavutia o koya, “E yali ko iko beka na parofita koya?” A sa cavutia o koya, “E yali.”
\v 22 Era sa tarogia vua, “Ko cei beka o iko, me kitou tukunia vi ira sa talai kitou?” “Ko sa tukuni iko me ko cei?”
\v 23 Sa cavutia o koya, “Koi au na domo ni dua sa kacikaci e loma ni vi co, Vadodonutakia na sala i Jiova me vaka sa tukunia ko Aisea na parofita.”
\p
\v 24 Ia ko ira sa vayadi, ena sa vayadi mai vi ira na Farisi.
\v 25 A ra sa tarogia vua, ka tukunia vua, ko sa qai vipapitaisotakia ena vuku ni cava, ni ko sa yali ni Karisito, se ko Ilaija, se parofita koya?
\v 26 Sa saumia vi ira ko Joni, ka tukunia, Au sa vipapitaisotaki ena wai: ia ka sa tu ena ikodou maliwa e dua loa sa yali ni kila;
\v 27 sai koya koya sa muri au ka sa uasivi cake vi au, ia na wa ni nonai vava mada lia au yali rawa ni serekia.
\p
\v 28 Sa caka na veika koya mai Pecani ena tai kadua ki Joritani, a tikinia sa vipapitaisotaki kinia ko Joni.
\p
\v 29 Ena savulaci sa raici Jisu ko Joni ni sa qai tiko mai vua, a sa tukunia, “Raicia na Lami ni Kalou, ko koya sa yadia tani na nodrai valavala ca na kai vuravura!
\v 30 Sai koya koya ka'u a tukunia, ‘Sa muri au e dua na tamata, sa uasivi cake vi au; ni sa liu vi kirau.’
\v 31 Ia ka'u a sa yali ni kila koya; ia me ra kilai koya voki lia na Isireli, o koya koya kau sa qai mai kinia ka vivakapapitaisotaki ena wai.
\p
\v 32 A sa cavutia ko Joni ka tukunia, “Au a raicia na Yalo Tabu ni sa qai sobu mai lomalagi me vaka sara lia na ruve toka vua:
\v 33 ia kau sa yali ni kilai koya e liu: ia ko koya sa talai au mai meu vipapitaisotaki ena wai, sa tukunia vei au, 'O koya ko na raicia ni sa qai sobu ki na na Yalo Tabu, a sa mai toka vua, sai koya koya sa mai vipapitaisotaki ena Yalo Tabu.'
\v 34 Ia kau a raicia, ka tukunia, ni sai koya koya na Luve ni Kalou.”
\p
\v 35 Ena savulaci sa tu voki ko Joni, ka lewe rua nona tisaipeli;
\v 36 a sa varaici Jisu ni sa qai a sa tukunia, “Raicia na Lami ni Kalou”
\v 37 A sa rogocia na nona vosa koi rau na tisaipeli, ka rau sa muri Jisu.
\v 38 Sa qai vuki ko Jisu ka raici rau voki lia ni rau muri tu mai ka tukunia vi ira, “A cava drau sa vaqara?” E rau sa qai tukunia vua, “Rapai (a kenai balebale, vavuvuli) ko sa tiko mai vi?
\v 39 Sa tukunia vi rau ko koya, “Qai mai ka raicia.” E rau sa qai ka raicia na yasana sa tiko kinia ko koya, ka ratou sa tiko vata kaya ena siga koya; a sa voleka nai katini ni aua.
\p
\v 40 Sa dua vi rau sa rogoci Joni, ka muri Koya, ki Adriu na taci Saimoni Pita.
\v 41 Sa kunea eliu na tuakana ko Saimoni ka tukunia vua, Kitou sa raicia na Mesaia; (a kenai balebale, na Karisito).
\v 42 A sa yadi koya vi Jisu. Ia sa varaici koya ko Jisu, ka tukunia, “O iko ko Saimoni na luvei Jona: ko na vatokai ko Kifa (a kenai balebale ko Pita.)
\p
\v 43 Ena savulaci sa via qai ki Kalili ko Jisu, a sa raici Filipi ka tukunia vua, “Muri Au.”
\v 44 A kai Pecisaita ko Filipi, a nodrau koro ko Adriu ki Pita.
\v 45 Sa kunei Nacanieli ko Filipi, ka tukunia vua “Kitou sa raici koya sa volavola kinia ko Mosese ena vanua, kei ira voki lia na parofita, ko Jisu na kai Nasareci, a luvei Josefa.”
\v 46 A sa tukunia vua ko Nacanieli, “E tubu rawa beka mai Nasareci e dua na ka vinaka? Sa tukunia vua ko Filipi, “Qai mai mo raicia”
\v 47 Sa raici Nacanieli ko Jisu ni sa qai tiko mai vua, a sa tukunia ni sa tukuni koya, “Raicia e dua na luvei i Isireli dina, sa yali vi koya na dauvivakaisini!” Sa tukunia vua ko Nacanieli, “O ni sa kilai au mai vi?”
\v 48 Sa tukunia ko Jisu, ka tukunia vua, “Ni sa bera ni kacivi iko ko Filipi, ni ko a tiko a ruku ni lolo au a raici iko.
\v 49 Sa tukunia ko Nacanieli, ka tukunia vua, “Vavuvuli, ko ikonu na Luve ni Kalou, ko ikonu na nodra tui na Isireli.”
\v 50 Sa vosa ko Jisu ka tukunia vua, “Ni'u sa tukunia vi iko, Au sa raici iko e ruku ni lolo, ko sa vabautia ne? Ko na raicia na veika uasivi koya.”
\v 51 A sa tukunia ko koya, “E dina, e dina au sa tukunia vi ikodou, Ena gauna mai muri dou na raicia na lomalagi ni sa tawase, ki ira na agilose ni Kalou ni ra sa qai cake ka qai sobu vua na Luve ni tamata.”
\c 2
\cl Wase 2
\p
\v 1 Sa bogi tolu sa qai caka e dua na vawati mai Kena e Kalili; a sa tiko kinia na tinai Jisu:
\v 2 a sa sureti ko Jisu, kei iratou voki lia na tisaipeli, ki na soqo ni vawati.
\v 3 Ia ni sa oti na waini, sa tukunia vi Jisu na tinana, “Sa yali vi ira na waini”
\v 4 Sa tukunia vua ko Jisu, “Yalewa a cava vi iko kei au, sa yali ni yaco mai na noqu gauna.”
\v 5 Sa tukunia vi ira na tamata ko tinana, “A ka kece lia sa tukunia vi ikodou ko koya, dou caka.”
\v 6 Ia sa tu mai kinia e ono na saqa vatu ni wai, sa dau vasavasavataki ira kinia na kai Jutia sa tauyarua se tauyatolu nai vakarau.
\v 7 Sa tukunia vi ira ko Jisu, “Vasinaitia na saqa ni wai e na wai.” A ra sa vasinaitia me vuabale sara.
\v 8 A sa tukunia vi ira ko koya, “Dou qai talocia, ka yadia vua sa lewa na magiti,” A ra sa yadia.
\v 9 Ia ni sa tovolea na wai sa vuki me wai ko koya sa lewa na magiti, a sa yali ni kila se sa mai vei: (ia ko ira na tamata sa takivia na wai era sa kila,) ko koya sa lewa na magiti sa kacivia na wati ni yalewa,
\v 10 ka tukunia vua, “A tamata yadua sa dautaucia e lia na waini vinaka: ia ni ra sa somia vakalevu na tamata, sa qai muri na waini sa vinaka valailai lia! Ia ko iko, ko sa maninitakia na waini vinaka ka yacovia na tikini siga koya.”
\v 11 Ai vatekivu koya ni cakacaka mana sa caka o Jisu mai Kena e Kalili, a sa varaitakia kinia na nonai ukuuku: a sa vabauti koya ko iratou na nona tisaipeli.
\p
\v 12 Ni sa oti koya eratou sa qai sobu ki Kapenaumi, ko koya, kei na tinana kei iratou voki lia na tacina, kei iratou voki lia na nona tisaipeli; a ratou sa yali ni bogi levu kinia.
\p
\v 13 A sa voleka na nodra kana vata ni qai sivia na kai Jutia; a sa qai cake ki Jerusalemi ko Jisu;
\v 14 a sa raici ira ena valenisoro era sa volitakia eso na bulumakau kei na sipi, kei na ruve, kei ira voki lia sa visau i lavo era sa tiko voki lia.
\v 15 Ia ni sa caka oti e dua na kuita wa qaliqali, sa vasavi ira kece lia mai na valenisoro, vata kei na sipi, vata kei na pulumakau; a sa sovarakia yani na nodrai lavo era sa visau i lavo, a sa mani vukicia na nodra tepeli;
\v 16 a sa tukunia vi ira sa volitaki ruve, “Yadia tani na veika koya; kakua ni caka na vale nei Tamaqu me vale ni vivoli.”
\v 17 A sa nanumia ko iratou na nona tisaipeli ni sa volai, “Sa kani au na loloma katakata ki nomu vale.
\p
\v 18 Sa qai cavutia ko ira na kai Jutia, ka tukunia vua, “A cava nai vatakilakila ko sa vatakila vi kitou, ni ko sa caka na veika koya?”
\v 19 Sa cavutia ko Jisu ka tukunia vi ira, “Dou talarakia na vale koya, kau na qai tara vaoti ena bogi e tolu.”
\v 20 Era sa qai tukunia na kai Jutia, A vale ni soro koya sa vasagavulu ka mani ono na yabaki ni sa tara tiko: ia ko na tara vaoti li ena bogi e tolu?”
\v 21 Ia na vale sa vosatakia ko koya, na yagona.
\v 22 Ni sa qai tu cake voki mai na mate ko koya, sa nanumia ko ira na nona tisaipeli, ni sa tukunia vi ira ko koya na ka koya; a ra sa vadinadinatakia nai Vola Tabu, kei na vosa sa tukunia ko Jisu.
\p
\v 23 Ia ni sa tiko ko koya mai Jeruisalemi, ni sa caka tiko na kana vata ni qai-sivia, sa lewe levu era sa vadinatia na yacana, ni ra sa raicia na veika-mana sa caka ko koya.
\v 24 A sa yali ni vararavi vi ira ko Jisu, ni sa kilai ira kece lia,
\v 25 a sa yali ni yaga vua me dua me vatakilai ira na tamata: ni sa kila ko koya na ka sa tu voki lia e loma ni tamata.
\c 3
\cl Wase 3
\p
\v 1 Sa dua na tamata vi ira na Farisi ka yacana ko Nikotimo, e dua na nodra turaga na kai Jutia:
\v 2 sa qai mai ko koya koya vi Jisu ena bogi, ka tukunia vua, “Vavuvuli, kitou sa kila ni ikonu sa qai mai vua na Kalou mei vavuvuli ni sa yali e dua na tamata e caka rawa na veika mana koya ko ni sa caka, kevaka e rau sa yali ni tiko kaya na Kalou.”
\v 3 Sa tukunia ko Jisu, ka cavutia vua, E dina, E dina, au sa tukunia vi iko, Kevaka sa yali ni sucu voki na tamata, ena yali ni raicia rawa na matanitu ni Kalou.
\v 4 Sa tukunia vua ko Nikotimo, “sa sucu rawa vaevei na tamata ni sa qai mai ko koya, sa curu rawa varua ki na kete i tinana, me sucu mai?
\v 5 Sa tukunia ko Jisu, E dina, e dina, au sa tukunia vi iko, Kevaka sa yali ni sucu e dua ena wai kei na Yalo Tabu, ena yali ni curu rawa ki na matanitu ni Kalou.
\v 6 Sa vayago ko koya sa sucu ena yago; ia sa vayalo ko koya sa sucu ena yalo.
\v 7 Kakua ni kurabui ni'u sa tukunia vi iko, “e dodonu mo dou sucu voki.”
\v 8 Sa liwa na cagi ki na yasana sa digitakia, ia ko sa rogocia na kena rorogo, ka yali ni kila na yasana sa qai mai kinia; se na yasana sa qai yani kinia: sa va voki lia kinia ko koya yadua sa sucu ena Yalo Tabu.
\v 9 Sa saumia ko Nikotimo ka tukunia vua, “Sa rawa vaevei na veika koya?”
\v 10 Sa cavutia ko Jisu, ka tukunia vua, “O iko na nodrai vavuvuli na Isireli ka yali ni kila na veika koya, ne?”
\v 11 E dina, e dina, au sa tukunia vi iko, kitou sa vosatakia na ka kitou sa kila, ka tukunia na ka kitou sa kila, ka tukunia na ka kitou a raicia, ia dou sa yali ni vabautia na nitoui tukutuku.
\v 12 Kevaka ka'u sa tukunia vi ikodou na veika vavuravura, ikodou sa yali ni vabautia, dou na vabautia vaevei, kevaka kau sa tukunia vei ikodou na veika valomalagi?”
\v 13 A sa yali ni dua na tamata sa qai cake ki lomalagi, a Luve-ni-tamata, ko koya sa tiko mai lomalagi
\v 14 Ia me vaka sa lavetia cake na gata ko Mosese mai na vikau, e dodonu me laveti cake voki lia na luve ni tamata:
\v 15 me kakua kinia ni rusa ko ira yadua sa vabauti koya me ra rawatia lia na bula yali ni mudu.
\p
\v 16 Ni sa lomani ira na kai vuravura va koya na Kalou, me solia kinia na Luvena e dua loa lia sa vatuburia, me kakua ni rusa ko ira yadua era sa vabautia, me ra rawatia lia na bula yali ni mudu.
\v 17 Ni sa yali ni tala mai na Luvena ki vuravura na Kalou me cudruvi ira na kai vuravura; me bula lia ko ira na kai vuravura ena vukuna.
\v 18 O koya sa vabautia sa yali ni na cudruvi: ia ko koya sa yali ni vabautia sa na qai cudruvi, ni sa yali ni vabautia na yaca ni Luve ni Kalou e lewe dua loa lia sa vatuburia o koya.
\v 19 Ia ko koya koya era sa cudruvi kinia, ni sa qai mai na rarama ki vuravura, a ra sa vinakatia na butobuto na tamata, ka catia na rarama, ni sa ca na nodrai valavala.
\v 20 Ni sa catia na rarama o koya yadua sai valavala ca, a sa yali ni qai ma ki na rarama, de raici na nonai valavala.
\v 21 Ia ko koya na muria nai valavala dina sa qai mai ki na rarama, me varaitakia na nonai valavala ni sa vinaka vua na Kalou.
\p
\v 22 Ni sa oti na veika koya, sa qai ko Jisu ki ira voki lia na tisaipeli ki na vanua ko Jutia; a sa tiko mai kinia ki ira, ka vipapitaisotaki.
\p
\v 23 A sa vipapitaisotaki ko Joni voki lia mai Inoni sa voleka ki Selimi ni sa levu mai kinia na wai: a sa qai mai eso ka ra sa papitaisotaki.
\v 24 Ni sa bera ni dai ki vale ni vivesu ko Joni.
\v 25 Sa qai viletitakia ko ira na tisaipeli i Joni ki na dua na kai Jutia ena vuku ni vi vasavasavataki.
\v 26 A ra sa qai mai vi Joni, ka tukunia vua, “Vavuvuli, ko koya drau sa tiko kaya ena tai kadua ni Joritani, ko koya ko a tukunia, raicia, sa vipapitaisotaki tiko ko koya, sa qai mai vua ko ira na tamata kece lia.”
\v 27 Sa vosa ko Joni, ka tukunia, “E yali e dua na tamata sa rawatia e dua na ka, kevaka sa yali ni soli vua mai lomalagi.
\v 28 Dou sa tukuni au niu sa tukunia, ‘Au sa yali ni Karisito koi au, ia ka'u sa vayadi mai me'u liutaki koya.’
\v 29 Sa nei koya na tagane sa qai vakawati ko koya na watina, ia na weka ni tagane, ko koya sa tu ka rogocia na nona vosa sa rekitakia valevu na domo ni tagane: sa qai vayacoria vakinia na noqu reki koya.
\v 30 Sa dodonu me levu cake tiko ko koya, ia me'u lailai sobu tiko lia koi au.
\p
\v 31 O koya sa qai mai cake, sa uasivi vi ira kece lia na tani: ko koya sa tubu lia e vuravura sa vavuravura, a sa vosatakia na ka vavuravura ko koya sa qai mai lomalagi sa uasivi vi ira kece lia na tani.
\v 32 Ia na ka sa raicia ka rogocia ko koya sa tukunia koya; a sa yali e dua na tamata sa vabautia na nonai tukutuku.
\v 33 O koya sa vabautia na nonai tukutuku sa vadinadinatakia koya, ni sa dina na Kalou.
\v 34 O koya sa tala mai na Kalou, sa vosatakia na vosa ni Kalou; ni sa solia vayauyau na Yalo Tabu na Kalou.
\v 35 Sa lomania na Luvena ko Tamana, a sa solia na ka kece lia ki ligana.
\v 36 O koya sa vabautia na Luvena sa rawatia na bula yali ni mudu: ko koya sa yali ni vabautia na Luvena, ena yali ni raicia na bula a sa tiko lia vei koya na cudru ni Kalou.
\c 4
\cl Wase 4
\p
\v 1 Ni sa qai kila na Turaga era sa rogocia ko ira na Farisi ni ra lewe levu sa lotutakia ko Jisu ka papitaisotakia, ka lewe lailai lia ko Joni,
\v 2 (ia ni sa yali ni vipapitasotaki ko Jisu, ko ira lia na nona tisaipeli.)
\v 3 A sa daini Jutia, ka qai voki ki Kalili.
\v 4 A sa koto na nona sala e loma ni vanua ko Samaria.
\v 5 Sa qai yaco ki na dua na koro mai Samaria, a yacana ko Saika, e voleka lia ki na tiki ni vanua sa solia ko Jekope vi Josefa na luvena.
\v 6 A sa tu mai kinia nai keli-wai ni Jekope. Ni sa oca ko Jisu ena nona qai, sa mai tiko sobu ena bati ni keli-wai: ka sa voleka na kenai ka ono ni aua.
\v 7 Sa qai mai e dua na yalewa ni Samaria me taki wai: sa tukunia vua ko Jisu, “Solia mai vi au me'u somi.”
\v 8 Ni ra a qai yani na nona tisaipeli ki na koro me voli kakana.
\v 9 Sa qai tukunia vua na yalewa ni Samaria, “Ni ko sa kai Jutia, ko sa kerea vacava vi au mo somi, ni'u sa yalewa ni Samaria? (Ni ra sa yali ni viriti ko ira na kai Jutia, ki ira na kai Samaria.) Sa vosa ko Jisu ka tukunia vua,
\v 10 “Kevaka ko sa kila nai solisoli ni Kalou, ki koya voki lia sa tukunia vi iko, ‘Solia mai vi au me'u somi;’ ko sa qai kerea vua, ka na solia vi iko ko koya na wai ni bula.”
\v 11 Sa tukunia vi koya na yalewa, “Sa yali beka, na nomui takitaki, a sa titobu nai keli-wai: ko sa rawatia mai vi na wai bula koya?
\v 12 Ko sa uasivi cake beka vi Jekope, a tamai kimamu, ko koya ka solia vi kimamu nai keli-wai, ka somi kinia ko koya, ki iratou na luvena, kei na nona manumanu?”
\v 13 Sa vosa ko Jisu, ka tukunia vua, “O koya yadua sa somia na wai koya ena via somi voki:
\v 14 ia ko koya sa somia na wai ka ka'u na solia vua, ena yali sara ni via somi, ka yali ni mudu: ia na wai ka'u na solia vua, ena tu e na lomana me mata-ni-wai sa tovure ki na bula yali ni mudu.”
\v 15 Sa tukunia vi koya na yalewa, “Solia, beka, mai vi au na wai koya, me'u kakua ni via somi, se qai mai ki na vanua gona me'u taki.”
\p
\v 16 Sa tukunia vua ko Jisu, “Laki kacivia na watimu, ka mo drau qai mai ki na vanua gona.”
\v 17 Sa vosa na yalewa, ka tukunia, Sa yali na watiqu: “Sa tukunia vua ko Jisu, “Ko sa tukunia dina, Sa yali na watimu:
\v 18 ni sa lewe lima na watimu eliu; ia ko koya drau sa tiko vata koya sa yali ni watimu: ko sa vosa dina ena ka ko ya.”
\p
\v 19 Sa tukunia vi koya na yalewa, “Au sa qai kila, beka, sa dua na parofita koi ikonu.
\v 20 Era sa dausoro na nimamu qase ena ulu-ni-vanua koya; ia dou sa tukunia sa tu mai Jerusalemi na tikinia e dodonu me da soro kinia.”
\v 21 Sa tukunia vua ko Jisu, “Yalewa, vadinatakia na noqu vosa: ena qai mai na gauna dou na yali ni lotu kinia vi Tamada, ena ulu-ni-vanua koya, se mai Jerusalemi.
\v 22 Dou sa lotu vi koya dou sa yali ni kila: kimamu sa kilai koya kimamu sa lotu vua: ni sa tubu mai vi ira na kai Jutia nai Vabula.
\v 23 Ia ena qai mai na gauna, a sa qai yaco mai, era na lotu vayalo ka vaidina vi Tamada ko ira sa lotu dina; ni sa qara ko Tamada me va koya ko ira sa lotu vua.
\v 24 A Yalo na Kalou: ia ko ira sa lotu vua, e dodonu me ra lotu vayalo ka vaidina.”
\v 25 Sa tukunia vi koya na yalewa, “Au sa kila ni na qai mai na Mesaia; (Ko koya sa vatokai na Karisito): ni sa tadu mai ko koya, ena tukunia vi ita na ka kece lia.”
\v 26 Sa tukunia vua ko Jisu, “Sai au lia sa qai vosa tiko vi iko.”
\p
\v 27 A sa qai qai mai ko ira na nona tisaipeli, a ra sa kurabuitakia ni rau sa vivosaki ki na yalewa: ia ka yali e dua na tamata sa tarogia, “A cava ko sa vaqara?” se, “Drau vivosaki kaya ena vuku ni cava?”
\p
\v 28 Sa qai dainia na nonai takitaki na yalewa, ka qai yani ki na koro, ka tukunia vi ira na tamata,
\v 29 “Dou qai mai ka qai ki raicia na tamata koya, ko koya sa tukunia mai vi au na ka kece lia ka'u a caka: sai koya koya na Karisito, se yali?”
\v 30 A ra sa qai qai tani yani ena koro, ka qai mai vua.
\p
\v 31 Ia ni sa bera mai, sa qai cikevi koya ko ira na tisaipeli, ka tukunia, “Vavuvuli, mo kana mada.
\v 32 A sa tukunia vi ira ko koya, “Sa tu vi au na kakana me'u kania, dou sa yali ni kila.”
\v 33 Sa qai vitarogi ko ira na tisaipeli, “Sa dua li na tamata e kau kakana mai vi koya”
\v 34 Sa tukunia vi ira ko Jisu, “A qau kakana me'u caka na loma i koya sa talai au mai; ka me'u vaotia lia na nona cakacaka.
\v 35 ‘Dou sa yali ni tukunia, sa vo e va na vula, me qai cava mai na yabaki’? raicia, au sa tukunia vi ikodou, Dou ta cake, ka raicia na viwere, sa voleka ni matua na yabaki.
\v 36 Ia ko koya sa tamusukia sa saumia, ka binia na vuana ki na bula yali ni mudu; me rekitakia vata ko koya sa kaburakia kei koya sa tamusukia.
\v 37 A sa dina kinia na vosa koya, E dua sa kaburakia, ia sa tamusukia e dua tani.
\v 38 Au a talai ikodou mo dou tamusukia na ka dou a yali ni cakacaka kinia: eso tani era a cakacaka, ia dou sa rawatia na vua ni nodra cakacaka.
\p
\v 39 A ra sa lewe levu na kai Samaria ena koro ko ya era sa vabauti koya ena vuku ni nona vosa na yalewa, ko koya sa vatakilatakia, “Sa tukunia mai vi au ko koya na ka kece lia ka'u a caka.”
\v 40 Ia ni ra sa qai mai vua ko ira na kai Samaria, era sa masuti koya me tiko lia ki ira; a sa tiko lia mai na vanua gona ka bogi rua.
\v 41 A ra sa lewe levu voki lia sa vabautia ena vuku ni nona vosa;
\v 42 a ra sa tukunia vua na yalewa, “Koya kimamu sa yali ni vabautia ena vuku ni nomu vosa lia: ni kimamu sa rogocia koi kimamu, ka kila ni sai koya dina koya na nodrai Vabula na kai vuravura.”
\p
\v 43 Sa oti na bogi rua sa qai dainia mai na vanua ko ya, ka yaco ki Kalili.
\v 44 A sa vatakilatakia ko Jisu, ni sa yali e dua na parofita sa dokai e nona vanua.
\v 45 Ni sa qai tadu mai ki Kalili ko koya, sa vacegui koya ko ira na kai Kalili, ena vuku ni ra a raicia na ka kece lia sa caka ko koya mai Jerusalemi ena solevu, ni ra a qai voki lia ko ira ki na solevu.
\v 46 A sa qai voki mai ko Jisu ki Kena e Kalili, a koro sa vukicia kinia na wai me waini. Ka sa dua na turaga sa tauvimate na luvena mai Kapenaumi.
\v 47 Ni sa rogocia ko koya sa qai mai Jutia ko Jisu ki Kalili, sa qai kinia, ka masutia me qai sobu ka vabula na luvena: ni sa varau ciba.
\v 48 Sa qai tukunia vua ko Jisu, “Kevaka dou yali ni raicia eso na ka-mana ki na ka vivakurabuitaki, dou na yali ni vabautia.”
\v 49 Sa tukunia vi koya na turaga, “Qai sobu, saka, mai, de mate mada na luvequ.”
\v 50 Sa tukunia vua ko Jisu, “Qai yani; sa bula na luvemu.” A sa vadinatia na tamata na vosa sa tukunia vua ko Jisu, a sa qai yani ko koya.
\v 51 Ia ni sa qai sobu tiko, eratou sa mai tavaki koya na nona tamata, a ratou sa tukunia vua, “Sa bula na luvemu.”
\v 52 Sa qai tarogia vi iratou ko koya na aua sa vatekivu kinia ko koya me bula cake. A ratou sa tukunia vua, “Sa takali vi koya na katakata ena noa e nai kavitu ni aua.”
\v 53 A sa kila kinia na tamani ni sai koya koya na aua ka tukunia kinia vua ko Jisu, “Sa bula na luvemu;” a sa vabautia ko koya, kei ira kece lia na nona lewe-ni-vale.
\p
\v 54 Koya voki nai karua ni ka-mana sa caka ko Jisu, ni sa qai mai Jutia kei Kalili.
\c 5
\cl Wase 5
\p
\v 1 Sa oti na veika koya sa dua na nodra so levu na kai Jutia; a sa qai cake ki Jerusalemi ko Jisu.
\v 2 Ia sa tu mai Jerusalemi e dua nai silisili e voleka ki na matamata-ni-koro ni sipi, a yacana ena vosa va-Iperiu ko Peceseita, a sa lima na kena vale.
\v 3 Sa lewe levu era tauvi-mate sa davo kinia, ko ira na mataboko, na lokiloki, na wamalai, era sa wawa me vayavalati mada na wai.
\v 4 Ni sa qai sobu mai e dua na agilose ena gauna eso ki nai silisili, ka vayavalatia na wai: ia ko koya sa sobu kinia e liu ni sa vayavalati na wai, sa bula mai na mate kece lia sa tauvi koya.
\v 5 A sa tiko kinia e dua na tamata, sa tauvi mate tu ka yabaki tolusagavulu ka mani walu.
\v 6 Ni sa raicia ko Jisu ni sa davo koto, ka kila sa dede, sa tukunia vua, “Ko sa via bula, se yali?”
\v 7 Sa tukunia vua ko koya sa tauvi mate, “Sa yali, beka, e dua na noqu tamata me yadi au ki nai silisili ni sa vayavalati na wai; ia ni'u sa qai tiko kinia, sa liu sobu vi au e dua tani.”
\v 8 Sa tukunia vua ko Jisu, Tu cake, tauria cake na nomui mocemoce, ka qai.”
\v 9 A sa vasauri lia na nona bula vinaka na na tamata ko ya, ka tauria cake na nonai mocemoce, ka qai: ia na siga ko ya na siga ni vacecegu.
\v 10 O koya koya era sa tukunia kinia na kai Jutia vi koya sa vabulai, “A sa siga ni vacecegu koya: sa yali ni tara vi iko mo colatia nai mocemoce.”
\v 11 Sa tukunia vi ira ko koya, “O koya sa vabulai au, sa tukunia vi au ko koya, ‘Tauria cake na nomui mocemoce, ka qai.’”
\v 12 A ra sa qai tarogia vua, “Ko cei na tamata sa tukunia vi iko, ‘Tauria cake na nomui mocemoce, ka qai’?”
\v 13 Ia ko koya sa vabulai, sa yali ni kila se ko cei ko koya; ni sa yali ni kila se ko cei ko koya ni sa qai lo yani ko Jisu, ka ni ra sa lewe levu ena tikinia ko ya.
\p
\v 14 Sa oti na veika koya sa raici koya ko Jisu ena valenisoro, ka tukunia vua, “Raicia, ko sa qai bula vinaka; kakua ni valavala ca voki, de yaco vi iko e dua na ka e ca valevu cake.
\v 15 Ia ni sa lesu voki na tamata koya, a sa tukunia vi ira na kai Jutia ni sai Jisu ka vabulai koya.
\v 16 Ia ena vuku ni ka koya sa vacacani Jisu ko ira na kai Juta, ni sa caka ko koya na veika koya ena siga ni vacecegu.
\v 17 A sa tukunia vi ira ko Jisu, “Sa cakacaka tiko lia ko Tamaqu, koi au voki lia, au sa cakacaka.”
\v 18 Ena vuku ni ka koya era sa gadrevia valevu kinia na kai Jutia me ra vamatea, ni sa yali ni vacacana loa lia ko koya na siga ni vacecegu, ia ka sa tukunia voki lia sa Tamana dina na Kalou, a sa vatauvatani koya kinia ki na Kalou.
\p
\v 19 Sa qai vosa ko Jisu, ka tukunia vi ira, E dina, e dina, au sa tukunia vi ikodou, E yali ni rawatia vakai koya lia e dua na ka na Luvena, na ka lia sa raicia ni caka ko Tamana; ia na veika sa caka ko koya, sa caka va voki lia kinia na Luvena.
\v 20 Ni sa lomania na Luvena ko Tamana, a sa vatakila vua na ka kece lia sa caka ko koya; ia ena varaitakia vua na cakacaka eso sa uasivi cake e na veika koya, mo dou kurabui kinia.
\v 21 Me vaka sa vaturi ira cake na mate ko Tamana, ka vabula, sa vakinia na Luvena o koya sa vabulai ira sa vinakatia.
\v 22 Ni sa yali ni lewa e dua na tamata ko Tamana, ia sa lesia kinia na Luvena me ia na lewa kece lia;
\v 23 me ra varokorokotakia na Luvena na tamata kece lia, me vaka era sa varokorokotakia na Tamana. O koya sa yali ni varokorotakia na Luvena, sa yali ni varokorokotaki Tamana ka talai koya mai.
\v 24 E dina, e dina, au sa tukunia vi ikodou, O koya sa rogocia na noqu vosa, ka vabauti koya sa talai au mai, sa rawatia na bula yali ni mudu, ena yali voki lia ni cudruvi; ka sa qai mai na mate ki na bula.
\p
\v 25 E dina, e dina, au tukunia vi ikodou, Sa qai mai na gauna, ia sa yaco ni kua, me ra rogocia na domo ni Luve ni Kalou ko ira na mate: ia ko ira sa rogocia era na bula.
\v 26 Me vaka sa bula vakai koya lia ko Tamana; sa solia voki lia vua na Luvena me bula vakai koya lia;
\v 27 a sa lesi koya voki lia me caka na lewa, ena vuku ni sa Luve ni tamata.
\v 28 Dou kakua ni kurabui ena ka koya: ni sa qai mai na gauna era na rogocia kinia na domona ko ira kece lia enai bulubulu,
\v 29 a ra na qai mai kinia; ko ira sai valavala vinaka, era na tu cake voki me ra bula; ia ko ira sai valavala ca, era na tu cake voki me ra cudruvi.
\v 30 Au sa yali ni caka rawa e dua na ka vakai au lia: au sa lewa me vaka na ka ka'u sa rogocia: a sa dodonu na noqu lewa; ni'u sa yali ni muria na lomaqu, a loma i Tamaqu lia ko koya sa talai au mai.
\p
\v 31 Kevaka sai au lia sa tukuni au, sa yali ni dina na noqui tukutuku.
\v 32 Sa dua tani sa tukuni au, ia ka'u sa kila sa dina nai tukutuku sa tukuni au kinia ko koya.
\v 33 Dou a talaki vi Joni, a sa tukunia na ka dina ko koya.
\v 34 Ia ka sa yali ni yaga vi au me ra tukuni au na tamata: ia ka'u sa tukunia lia na veika koya, mo dou bula kinia.
\v 35 Ko koya koya na rarama lia sa caudre tu cila mai, ia dou a vinakatia vadede valailai lia mo dou reki ena kena rarama.
\v 36 Ia nai tukutuku ka'u sa tukuni kinia sa levu, ka lailai nai tukutuku i Joni; a cakacaka sa solia mai vi au ko Tamaqu me'u vaotia, a cakacaka koya ka'u sa caka tiko, sa tukuni au, ni sa talai au mai ko Tamaqu.
\v 37 Ia ko Tamaqu, ko koya sa talai au mai, sa dautukuni au. Dou a yali ni rogocia na domona ena dua na siga, se raicia na nonai tovo.
\v 38 A sa yali ni tiko ena lomamudou na nona vosa; ni dou sa yali ni vabauti koya sa tala mai ko koya.
\v 39 Dou sa vaqara enai Vola Tabu; ni dou sa nanumia dou sa rawatia kinia na bula yali ni mudu: ia nai vola koya sa tukuni au.
\v 40 Ia dou sa yali ni qai mai vi au, mo dou rawatia kinia na bula.
\p
\v 41 Sa yali ni yaga vi au me ra varokorokotaki au ko ira na tamata.
\v 42 Ia ka'u sa kilai ikodou, ni sa yali ni tiko ena lomamudou na loloma vua na Kalou.
\v 43 Au sa qai mai ena yaca i Tamaqu, ia dou a yali ni vakabauti au: kevaka sa qai mai e dua tani ena yacana loa lia, dou na vabauti koya.
\v 44 Dou sa vabautia rawa vaevei, ni dou sa vivarokorokotaki tiko vakai ikodou ka yali ni gadrevia na varokoroko sa qai mai vua na Kalou dua loa lia?
\p
\v 45 Dou kakua ni nanumia ni'u na beitaki ikodou vi Tamaqu; sa dua sa beitaki ikodou tiko, ko Mosese, ko koya dou sa vararavi kinia.
\v 46 Kevaka dou a vabauti Mosese, dou na vabauti au; ni sa volai au ko koya.
\v 47 Ia kevaka dou sa yali ni vadinatia na nonai vola, dou na vadinatia vaevei na noqu vosa?
\c 6
\cl Wase 6
\p
\v 1 Sa oti na veika koya, sa qai qai ko Jisu ki tai kadua ni wasawasa mai Kalili, mai Taiperia.
\v 2 A sa lewe levu sara era sa muri koya, ni ra raicia na veika-mana sa caka ko koya vi ira sa tauvimate.
\v 3 A sa cabetia na ulu-ni-vanua ko Jisu, a sa tiko sobu mai kinia kei ira na nona tisaipeli.
\v 4 A sa voleka na kana vata ni qai-sivia era sa solevu kinia na kai Jutia.
\v 5 Ni sa qai ta cake ko Jisu, ka raicia ni ra sa lewe levu sara sa qai mai vua, sa tukunia vi Filipi, “Eda na volia mai vi na madrai, me ra kana kinia ko ira koya?”
\v 6 Sa tukunia na ka koya me vatovolei koya: ni sa kila ko koya na ka sa nakitia me caka.
\v 7 Sa tukunia vua ko Filipi, “Ena yali ni rautia na madrai sa voli ena pene e rua na drau, me ra tauyadua valailai lia.
\v 8 E dua vi ira na nona tisaipeli, ko Adriu, a taci i Saimoni Pita, sa tukunia vi koya,
\v 9 “Sa tiko koya e dua na gonetagane sa tu vua e lima nai buli madrai parile, ka rua na ika: ia ka yaga vacava koya vi ira na lewe levu vakoya?”
\v 10 A sa tukunia ko Jisu, “Vosa vi ira na tamata me ra tiko sobu.” Ia sa levu na co ena yasana ko ya. A ra sa tiko sobu na tamata, era sa lewe lima beka na udolu.
\v 11 A sa tauria na vibuli madrai ko Jisu, ka vavinavinakatakia, ka vota vi ira na tisaipeli, ia ko ira na tisaipeli, vi ira sa tiko sobu; ka va voki lia kinia na ika me rauti ira.
\v 12 Ia ni ra sa mamau, sa tukunia ko koya vi ira na nona tisaipeli, “Kumunia vata na tikina lalai sa vo, me kakua ni yali e dua na ka.”
\v 13 Era sa qai tomikia vata, ka vasinaitia nai su e tinikarua ena tikinia lalai ni buli madrai parile e lima, sa vo vi ira sa kana.
\p
\v 14 Ia ko ira na tamata, ni ra sa raicia na cakacaka-mana sa caka ko Jisu, era sa tukunia, “Sai koya dina koya na parofita ko ya e dodonu me qai mai ki vuravura.”
\v 15 Ia ni sa kila ko Jisu era sa nakitia me qai mai ka tauri koya vakaukauwa me ra bulia me tui, sa qai dua loa voki yani ki na ulu-ni-vanua.
\p
\v 16 Ia ni sa raiyavi mai, sa qai sobu ko ira na nona tisaipeli ki matasawa,
\v 17 ka vodokia na waqa, ka sokotia na wasawasa ki Kapenaumi. A sa butobuto mai na vanua a sa yali ni yaco vi ira ko Jisu.
\v 18 A sa liwa na cagi kaukauwa ka voravora na wasawasa.
\v 19 Ia ni sa voce yani e tolu na maile vacaca, era sa raici Jisu ni sa qai voli e dela ni wai, ka torovia na waqa: a ra sa rerevakia.
\v 20 A sa tukunia vi ira ko koya, “Koi au koya; kakua ni rere.
\v 21 Era sa qai vinakatia me vodo ki waqa ko koya: a sa qai udu vasauri na waqa ki na vanua era sa qai kinia.
\p
\v 22 Ena savulaci, ko ira na lewe levu era sa tu ena tai kadua ni wai, ni ra sa raicia sa yali mai na vanua gona e dua tani na waqa, ko ya lia ka vodokia ko ira na nona tisaipeli, a sa yali ni vodo vata ki na waqa kei ira na nona tisaipeli era a soko yani vakai ira lia;
\v 23 (ia ka sa qai mai eso na waqa mai Taiperia, sa voleka ki na yasana era a kana madrai kinia, ni sa vavinavinakatakia oti na Turaga:)
\v 24 ni ra sa raicia na lewe levu sa yali ni tiko mai na vanua gona ko Jisu, se ko iratou na nona tisaipeli, era sa vodo voki lia ki waqa, ka qai yani ki Kapenaumi, me vaqarai Jisu.
\p
\v 25 Ia ni ra sa raici koya mai tai kadua, era sa tukunia vua, “Vavuvuli, ikonu qai mai ki na vanua gona ena gauna cava?”
\v 26 Sa vosa vi ira ko Jisu, ka tukunia, “Edina, e dina, au sa tukunia vi ikodou, Dou sa yali ni vaqarai au ni dou sa raicia na veika-mana, ni dou a kania lia na vibuli madra, ka sa mamau kinia.
\v 27 Dou kakua ni oca me ikodou na kania na kakana e yadia mai na rusa, ia dou kania lia kakana sa tu kinia bula yali ni mudu, o koya ena solia vi ikodou na Luve ni tamata; ni sai koya sa vadinadinatakia na Kalou na Tamana.
\p
\v 28 Era sa qai tukunia vua, “A cava me kimamu caka me rawa ni kimamu caka kinia na cakacaka sa vinaka vua na Kalou?”
\v 29 A saumia ko Jisu ka tukunia vi ira, “Koya na cakacaka ni Kalou: mo dou vabauti koya sa tala mai ko koya.”
\v 30 A ra sa tukunia vua, “A cava nai vatakilakila ko sa caka, me kitou raicia ka vabauti ikonu? A cava ikonu na caka?
\v 31 A noda qase era a kania na mana e na veikau; me vaka sa volai, “Sa solia vi ira ko koya na madrai mai lomalagi me ra kania.”
\p
\v 32 Sa qai saumia voki ko Jisu ka tukunia, “E dina, e dina, e a yali ni solia ko Mosese vi ikodou na madrai mai lomalagi; ko Tamaqu lia sa solia vi ikodou na madrai mai lomalagi.
\v 33 Ni sai koya koya na madrai sa mai vua na Kalou, ka sobu mai lamalagi, sa solia na bula vi ira na kai vuravura.
\p
\v 34 Era sa qai tukunia vua, “Ikonu na Turaga, solia mai vi kimamu na madrai koya ena vigauna.”
\v 35 A sa tukunia vi ira ko Jisu, “Koi au na madrai ni bula; ko koya sa qai mai vi au, ena yali ni viakana; ia ko koya sa vabauti au, ena yali ni via somi voki.
\v 36 Ia ka'u a tukunia vi ikodou, “Dou a raici au, ka yali ni vabautia.
\v 37 Ko ira kece lia sa solia mai vi au ko Tamaqu, era na qai mai vi au: ia ko koya ena qai mai vi au, au na yali sara ni dainia tani.
\v 38 Niu sa yali ni qai sobu mai lomalagi me'u caka na lomaqu, me'u caka lia na loma i koya sa talai au mai.
\v 39 Ia sai koya koya na lomai koya sa talai au mai, me'u kakua ni vayalia e dua vi ira sa solia mai vi au ko koya, ka me'u vaturia cake voki ena siga mai muri.
\v 40 Ia sai koya koya na loma i Tamaqu, mera rawatia yadua na bula yali ni mudu ko ira sa raicia na Luvena, ka vabautia; ia ka'u na vaturi koya cake ena siga mai muri.
\p
\v 41 Era a qai vosa kudrukudrutaki Jisu ko ira na kai Jutia, baletia ni a tukunia, “Koi au na na madrai sa qai sobu mai lomalagi.”
\v 42 A ra sa tukunia, “Sa yali li ni ko Jisu na luvei Josefa, ka da kila vinaka sara lia na tamana kei na tinana? Ia, e sa qai tukunia vacava mai ko koya, ‘Au sa qai sobu mai lomalagi’?”
\v 43 A sa saumia ko Jisu ka tukunia vi ira, “Dou kakua ni vosa kudrukudru.
\v 44 E yali ni dua e rawatia me qai mai vi au vakavo ke sa vayarayaratakia mai ko Tamaqu, o koya ka talai au mai: ia ka'u na vaturi koya cake ena siga mai muri.
\v 45 Era a vola na parofita eso, ‘Na Kalou ena vavulici ita yadua.’ Koi ita yadua sa rogocia ka vuli mai vi Tamaqu ena qai mai vi au.
\v 46 E se yali ni raicia na Tamaqu e dua na tamata, ko koya dua loa lia sa qai mai vua na Kalou, sa raici Tamaqu ko koya.
\v 47 E dina, e dina, au sa tukunia vi ikodou, O koya lia sa vabauti au sa rawatia na bula yali ni mudu.
\v 48 “Koi au na madrai ni bula.
\v 49 Ko ira na nomuni matua a ra a kania na mana mai na veikau, ka ra sa mate.
\v 50 Sai koya koya na madrai, sa qai sobu mai lomalagi, me ra kania na tamata, ka yali ni mate.
\v 51 Koi au na madrai bula sa qai sobu mai lomalagi; kevaka sa dua e kania na madrai koya, ena bula ka yali ni mudu: ia na madrai ka'u na solia sa lewequ, o koya ka'u na solia me ra bula rawa kinia ko ira na kai vuravura.”
\p
\v 52 Era a qai vileti vakai ira na kai Jutia, ka tukunia, “E na solia rawa vacava na tamata koya na lewena me da kania?” Sa qai tukunia vi ira ko Jisu,
\v 53 “E dina, e dina kevaka sa yali ni kania na lewe ni Luve ni tamata ka somia na nona dra, sa yali vi ikodou na bula.
\v 54 O koya sa kania na lewequ ka somia na noqu dra ena rawatia na bula yali ni mudu, ka'u na vaturi koya cake ena siga mai muri.
\v 55 Ni lewequ e kakana dina ki na noqu dra sa wai dina ni somi.
\v 56 O koya e kania na lewequ ka somia na noqu dra sa tu vi au, koi au voki lia sa tu vi koya.
\v 57 Me vaka sa bula tiko ko Tamaqu sa talai au mai, au sa bula voki lia ena vuku i tamaqu; sa vaka voki lia kinia ko koya sa kani au, ena bula ena vukuqu.
\v 58 Sai koya koya na madrai sa qai sobu mai lomalagi: sa yali ni tautauvata kinia kei na mana sa kania ko ira na nomudou matua, a ra sa mate lia: ko koya sa kania na madrai koya, ena bula ka yali ni mudu.”
\v 59 Sa vosatakia na veika koya ko koya ena valenilotu, ni sa vatavuvuli tiko mai Kapenaumi
\v 60 Era sa lewe levu vi ira na nona tisaipeli ni ra rogocia era sa tukunia, “A vosa mama koya: ko cei sa vabautia rawa?”
\v 61 Ko Jisu, baletia ni kila i lomana ni ra sa vosa kudrukudru voki lia na nona tisaipeli ena ka koya, sa tukunia vi ira, “Sa valeqai ikodou na ka koya, ne?”
\v 62 Ena vabeka evei kevaka dou na raicia na Luve ni tamata ni sa qai cake ki na tikinia ka a tiko kinia eliu.
\v 63 Na yalo sa solia na bula: na lewena sa yali ni yaga: a vosa ka'u vosatakia vi ikodou sa vayalo, ka sa vu-ni-bula.
\v 64 Ia ka so vi ikodou sa yali ni vabautia. Ni sa kilai ira mai na i vatekivu ko Jisu era sa ni vabautia, ki koya ena soli koya yani.
\p
\v 65 A sa tukunia, “O koya koya ka'u a tukunia kinia vi ikodou, Sa yali e dua na tamata sa qai rawa mai vi au, kevaka a yali ni solia vua ko Tamaqu.”
\p
\v 66 A ka koya era sa suka tani kinia e lewe levu vi ira na nona tisaipeli, a ra sa yali voki ni qai vata kaya.
\v 67 Sa qai tukunia ko Jisu vi ira na lewe tinikarua, “Dou sa via qai voki lia ko ikodou?”
\v 68 Sa qai tukunia vua ko Saimoni Pita, “Ikonu na Turaga, kitou na qai vi cei? Sa tu lia vi ikonu na vosa ni bula yali ni mudu:
\v 69 ia kitou sa vabautia ka kila, ni sai ikonu na Karisito, na Luve ni Kalou bula.”
\v 70 Sa tukunia vi ira ko Jisu, “Au a yali li ni digitaki ikodou na lewe tinikarua, ia ka sa dua vi ikodou sa nonai to na tevoro?”
\v 71 Sa vosataki Jutasa, na luve i Saimoni Isikarioti, ni sai koya ka na bukiveretaki Jisu, a sa dua vi ira na lewe tinikarua ko koya.
\c 7
\cl Wase 7
\p
\v 1 Ia ni sa oti na veika koya, sa wavoki voli e Kalili, ka ni ra yali ni via qai yani Jutia baletia ni ko ira kai Jutia era via vamatei ira.
\v 2 A sa voleka tiko mai na nodra solevu ni vale vacevaceva na kai Jutia.
\v 3 A ratou sa qai tukunia vua na tacina, “Dainia na vanua koya ka qai ki Jutia, me ra raicia voki lia na nomu tisaipeli na cakacaka ko sa caka.
\v 4 Ni sa yali e dua sa e dau caka vuni tu na ka kevaka e gadrevia tiko me kilai. Kevaka ko ni sa caka na veika koya, varaitaki ikonu kivei ira na kai vuravura.”
\v 5 Ko iratou voki lia na tacina, eratou yali ni vabauti koya.
\v 6 Sa qai tukunia vi iratou ko Jisu, “E se yali ni yaco mai na noqu gauna: ia vi ikodou, sa tautauvata lia na gauna kece lia.
\v 7 O ira na kai vuravura era sa yali ni cati ikodou, ia, era cati au lia baletia niu tukunia tiko na cala ni nodra i valavala.
\v 8 Dou qai cake lia koi ikodou ki na solevu. Au na yali ni qai kinia baletia na noqu gauna e se bera ni yaco.”
\v 9 Ia ni sa vosatakia oti na veika koya, sa tiko voli lia e Kalili.
\p
\v 10 Ni ratou sa qai cake na tacina ki na solevu, sa qai qai voki lia ko koya, yali ena matana levu, ia e vavunivuni lia.
\v 11 Ko ira na kai Jutia era a vasaqarai koya ena vanua ni solevu ka tukunia, “E vi ko koya?”
\v 12 Era a vivosaki lo ko ira na lewe levu baleti koya. Eso era tukunia, “A tamata vinaka ko koya,” ka so voki era tukunia, E yali, e vacalai ira na tamata.”
\v 13 Ia e yali lia ni dua e vosatakia vadoudou na ka e baleti ira, ni ra sa rerevaki ira na kai Jutia.
\p
\v 14 Ia, ni sa vimama na gauna ni solevu, sa qai cake ko Jisu ki na vale ni soro, ka vatekivu me vavuvuli.
\v 15 Era a kurabuitakia na kai Jutia ka tukunia, “E kila vacava na tamata koya e levu na ka?
\v 16 A sa saumia ko Jisu ka tukunia, “Na noqui vavuvuli e yali ni noqu, ia e nona o koya sa talai au mai.
\v 17 Kevaka e dua na tamata sa via caka na loma i koya, ena kila se sa qai mai vua na Kalou nai vavuvuli, se'u vosa vei au lia.
\v 18 O koya sa vosa vakai koya lia, sa vinakatia me dokai; ia ko koya sa vinakatia me dokai ko koya sa talai koya mai, sa tamata dina o koya, a sa yali na cala vua.
\v 19 E a yali ni solia vi ikodou na vunau ko Mosese, a yali ni dua vi ikodou a muria na vunau? Dou sa via vamatei au e vuku ni cava?”
\p
\v 20 Era sa vosa na lewe levu, ka tukunia, “Sa curumi iko e dua na tevoro: ko cei sa via vamatei iko?”
\v 21 Sa vosa ko Jisu, ka tukunia vi ira, “E a dua loa lia na cakacaka ka'u a caka, ia dou sa matalautakia.
\v 22 Ko Mosese a solia vi ikodou na vicili; (ia ka sa yali ni vu vi Mosese, sa vu lia vi ira na qase;) ia dou sa cilivia na tamata ena siga ni vacecegu:
\v 23 Kevaka sa cilivi na tamata ena siga ni vacecegu, me kakua ni vacacani na vunau i Mosese; dou sa cudruvi au beka, ni'u sa vabula taucoko e dua na tamata ena siga ni vacecegu?
\v 24 Kakua ni lewa me vaka nai rairai, ia mo dou lewa vadodonu lia.”
\p
\v 25 Eso vi ira mai Jerusalemi era sa tukunia, “Sa yali li ni koya koya era sa via vamatea?
\v 26 Raicia, sa vosa doudou, ka ra sa yali ni tukunia vua e dua na ka. Era sa kila sara lia na turaga ni sai koya koya dina na Karisito, se yali?
\v 27 Ia eda sa kila na vanua sa qai mai kinia na tamata koya; ia na Karisito, ni sa qai mai, sa yali e dua sa kila se qai mai vi ko koya.”
\p
\v 28 Sa qai kaci ko Jisu ni sa vatavuvuli tiko ena valenisoro, ka tukunia, “Dou sa kilai au, dou sa kila voki lia na vanua ka'u sa qai mai kinia, ia ka'u sa yali ni qai mai vakai au lia, ia sa dina ko koya sa talai au mai, ia dou sa yali ni kilai koya:
\v 29 ia ka'u sa kilai koya koi au: ni'u sa qai mai vi koya, a sa talai au mai ko koya.
\p
\v 30 Era sa qai via vesuki koya: ia sa yali e dua sa tarai koya, ni se bera ni yaco na nona gauna.
\v 31 Ia sa lewe levu vi ira na tamata era sa vabauti koya, ka tukunia, Ni sa qai mai na Karisito, ena caka li na cakacaka-mana e levu cake ena veika koya sa caka ko koya koya?
\v 32 Ko ira na Farisi era sa rogocia ni ra vasolokakanatakia va koya baleti Jisu; ia ko ira na Farisi ki ira na bete levu era sa tala eso sa ovisa me ra vesuki koya.
\p
\v 33 Sa qai tukunia vi ira ko Jisu, “Au sa tiko valailai lia kei ikodou, au na qai qai vua ka talai au mai:
\v 34 dou na vaqarai au, ia dou na yali ni raicia: ia na vanua ka'u sa tiko kinia: dou sa yali ni qai rawa kinia.”
\v 35 Sa ra qai vivosakitakia vaka ira na kai Jutia, “Ena qai beka kivei ko koya, me da yali kinia ni raici koya? Ena qai beka vi ira na noda era sa viseyaki vi ira na kai Kirisi, ka vavulici ira na kai Kirisi?
\v 36 A vosa cava beka koya sa tukunia ko koya, ‘Dou na vaqarai au, ka yali ni raicia; ia na vanua ka'u sa qai kinia, dou na yali ni qai rawa kinia’?”
\p
\v 37 Enai otioti ni siga, siga bibi ni Solevu, sa tu ko Jisu ka kaci, ka tukunia, “Kevaka e dua sa via somi, me qai mai vi au ka somi.
\v 38 O koya sa vabauti au, me vaka sa tukunia nai Vola Tabu, ena dave mai na ketena na viuciwai ni wai bula.”
\v 39 A sa tukunia ko koya na ka koya baletia na Yalo Tabu, ena yaco vi ira era sa vabauti koya; ni sa bera ni soli na Yalo Tabu; ni sa bera ni varokorokotaki ko Jisu.
\p
\v 40 Era lewe levu vi ira na tamata ni ra sa rogocia na vosa koya, era sa tukunia, “Sa dina sai koya koya na Parofita.
\v 41 “Era tukunia eso, “Sai koya koya na Karisito.” Ia eso voki era tukunia, “Oi, ena qai mai Kalili na Karisito?
\v 42 Sa yali li ni tukunia nai Vola Tabu, ni sa na qai mai na Karisito mai na kawa i Tevita, mai Pecilieema, na koro sa tiko kina ko Tevita?”
\v 43 Ea tubu na visei ena kedra maliwa lia na lewe levu baleti koya.
\v 44 A ra sa via vesuki koya e so; ia sa yali e dua sa tarai koya.
\p
\v 45 Era sa qai qai mai na ovisa vi ira na bete levu kei ira na Farisi; a ra sa tukunia vi ira, “Dou sa yali ni yadi koya mai ena vuku ni cava?
\v 46 Sa tukunia ko ira na ovisa, “E yali e dua na tamata sa vosa me vaka na tamata koya.”
\v 47 Era sa qai tukunia na Farisi vi ira, “Dou sa vacalai beka koi ikodou voki lia?
\v 48 Sa vabauti koya li e dua vi ira na turaga se vi ira na Farisi, se yali?
\v 49 Ia ko ira na tamata koya, era yali ni kila nai vunau, ena yaco vi ira na cudru ni Kalou.”
\p
\v 50 Ko Nikotimo (e dua vi ira na Farisi ka a lako ki raici koya eliu) sa tukunia vi ira,
\v 51 “E virikotori beka ena nomuni lawa ni dodonu me da rogocia na tamata beitaki ni bera ni da vatulewatakia na nona cala?”
\v 52 Era sa tukunia vua, “Ko iko voki lia na kai Kalili, ne?” mo vaqara ka kila: ni sa yali e dua na parofita sa tubu mai Kalili.
\p
\v 53 A ra sa dui qai kece lia ki na nodra dui vi vale.
\c 8
\cl Wase 8
\p
\v 1 A sa qai ko Jisu ki na ulu-ni-vanua ni violive.
\v 2 Ia ena savulaci caca sa qai voki mai ko koya ki na valenisoro, a ra sa qai mai vi koya ko ira kece lia na tamata; a sa tiko sobu ko koya, ka vavulici ira.
\v 3 Ia, ko ira na vu-ni-vola kei ira na Farisi era sa yadia mai vi koya e dua na yalewa sa tobo ni sa dautagane; a ra sa vaturi koya ena kedra maliwa,
\v 4 ka tukunia vua, “Vavuvuli, sa tobo na yalewa koya ni sa caka tiko na vibutakoci:
\v 5 a sa varotakia vi ita ko Mosese ena vunau, me ra vaviriki ena vatu ko ira sa va koya: ia ka cava ikonu sa tukunia baletia na yalewa koya?
\v 6 Era sa vosa va koya me veretaki koya kinia, me ra beitaki koya rawa. Ia sa cuvaki sobu lia ko Jisu ka volavola ena buturara ena nodrai qaqalo.
\v 7 Ia ni ra sa tarogi koya tiko lia, sa tu cake ko koya, ka tukunia vi ira, “O koya vi ikodou sa yali ni valavala ca, me viriki koya mada eliu ena vatu.”
\v 8 Sa qai cuva sobu voki ko koya, ka volavola ena qele.
\v 9 Ia ni ra sa rogocia, era qai yadua ki tuba, liutakia ko koya ka matua dua loa lia: ka sa qai vo dua loa lia ko Jisu ki na yalewa e tu e matadra.
\v 10 Ia ni sa tu cake ko Jisu, ka tukunia vua, “Yalewa, sa evei ko ira koya? Sa yali voki li ni dua e vo me lewai iko mo curuvi?”
\v 11 A sa saumia ko koya, “Sa yali e dua, Turaga.” A sa tukunia vua ko Jisu, “Au sa yali voki lia ni lewai iko mo cudruvi: mo qai, ka mo kakua ni valavala ca voki.”
\p
\v 12 Sa qai vosa voki vi ira ko Jisu, ka tukunia, “Oi au na rarama kei vuravura: ko koya sa muri au ena yali ni qai ena butobuto, ena tu lia vi koya na rarama ni bula.”
\v 13 O ira na Farisi era sa qai tukunia vua, “O ni sa tukuni iko; sa yali ni dina na nomu tukutuku.”
\v 14 Sa saumia ko Jisu ka tukunia vi ira, “Ia, kevaka ka'u sa tukuni au, sa dina na noqui tukutuku: ni'u sa kila na vanua ka'u sa qai mai kinia, ka qai yani kinia, ia dou sa yali ni kila se'u qai mai vi, se'u qai kivei.
\v 15 Dou sa lewa me vaka na ka sa rairai: au sa yali ni lewa e dua na tamata.
\v 16 Ia kevaka ka'u sa lewa, sa dina na noqu lewa, ni'u sa yali ni tiko dua loa lia, ia koi au kei Tamaqu, ko koya sa talai au mai.
\v 17 Sa volai voki lia ena nomudou vunau, ni sa dina nai tukutuku ni tamata e lewe rua.
\v 18 E dua koi au ka'u sa tukuni au, a sa tukuni au ko Tamaqu, ko koya sa talai au mai.”
\p
\v 19 Era sa qai tukunia vi ira, “Evei ko Tamamunu?” Sa tukunia ko Jisu, “Dou sa yali ni kilai au se Tamaqu: kevaka dou sa kilai au, dou sa kilai Tamaqu voki lia.”
\v 20 Sa cavutia na vosa koya ko Jisu ena vale ni yau, ni sa vatavuvuli ena valenisoro: a sa yali ni dua sa vesuki ira: ni se yali ni yaco na nona gauna.
\p
\v 21 Sa qai tukunia voki vi ira ko koya, “Au na qai yani, ka dou na vaqarai au, ka dou na mate ena nomudoui valavala ca: ia na vanua ka'u sa qai kinia, dou sa yali ni qai rawa kinia.”
\v 22 Era sa qai tukunia na kai Jutia, “Ena vamatei koya beka vaikoya? Ni ra sa tukunia, ‘Na vanua ka'u sa qai kinia, dou sa yali ni qai rawa kinia’?”
\v 23 A sa tukunia vi ira ko koya, “Dou sa qai mai ra; au sa qai mai cake: dou sa vavuravura; au sa yali ni vavuravura:
\v 24 O koya koya ka'u a tukunia kinia vi ikodou, Dou na mate ena nomudoui valavala ca; kevaka dou sa yali ni vadinatia ni sai au, dou na mate ena nomudoui valavala ca.”
\p
\v 25 Era sa qai tukunia vua, Ko cei ko ikonu?” A sa tukunia vi ira ko Jisu, Sai koya lia ka'u a tukunia vi ikodou mai nai vatekivu.
\v 26 Sa levu na ka me'u vosatakia ka lewai ikodou kinia; ia sa dina ko koya sa talai au mai: ia ka'u sa tukunia vi ira na kai vuravura na veika ka'u a rogocia mai vi koya.”
\p
\v 27 Era yali ni kila ni sa ra vosatakia tiko vi ira na veika baletia na Tamadra.
\v 28 Sa qai tukunia vi ira ko Jisu, “Ni dou sa lavetia cake oti na Luve ni tamata, dou na qai kila ni sai au, ni'u sa yali voki lia ni caka e dua na ka vakai au; ia na ka lia sa vatavulici au kinia ko Tamaqu, sai koya ka'u sa vosatakia.
\v 29 Ia sa tiko vata ki au ko koya sa talai au mai: sa yali ni daini au ko Tamaqu me'u tiko dua loa lia: ni'u sa caka tiko lia na ka sa vinakatia ko koya.”
\v 30 Ni sa cavutia tiko na vosa koya ko Jisu, era sa lewe levu era sa vabautia.
\p
\v 31 Sa qai tukunia ko Jisu vi ira na kai Jutia era sa vabauti koya, “Kevaka dou sa muria tiko lia na noqu vosa, dou sa qai noqu tisaipeli dina;
\v 32 ia dou na kila na ka dina, ia na ka dina ena sereki ikodou.” Era sa tukunia vua,
\v 33 Oi kimamu na kawa i Eparaama, ka yali e dua kimamu a bobula kinia ena dua na gauna; ko sa tukunia vacava, ‘Dou na sereki’?”
\v 34 Sa qai tukunia vi ira ko Jisu, “E dina, e dina, au sa tukunia vi ikodou, O koya yadua sai valavala ca sa bobula ki nai valavala ca.
\v 35 A sa yali ni tiko vadua e vale na bobula; na luvena lia sa tiko vadua.
\v 36 Ia kevaka ena sereki ikodou na Luvena dou na qai sereki dina kinia.
\v 37 Au sa kila dou sa kawa i Eparaama: ia dou sa via vamatei au, ni sa yali ni tiko ena lomamudou na noqu vosa.
\v 38 Au sa vosatakia na ka ka'u a raicia vi Tamaqu: ia dou sa caka na ka dou a rogocia mai vi koya na tamamudou.”
\p
\v 39 Era sa vosa, ka tukunia vi ira, “A tama i kimamu ko Eparaama.” Sa tukunia vi ira ko Jisu, “Kevaka dou sa luvei i Eparaama, dou na caka nai valavala nei Eparaama.
\v 40 Ia, dou sa qai via vamatei au, a tamata sa tukunia vi ikodou na ka dina, o koya ka'u sa rogocia mai vua na Kalou; sa yali ni caka na ka va koya ko Eparaama.
\v 41 Dou sa caka na nona cakacaka na tamamudou. Era sa qai tukunia vi ira, “Kimamu sa yali ni sucu ena dauyalewa: e dua loa lia na tama i kimamu, na Kalou.”
\v 42 Sa qai tukunia vi ira ko Jisu, “Kevaka sa Tamamudou na Kalou, dou na lomani au: ni'u sa tubu mai vua na Kalou, ka qai mai kinia; au sa yali ni qai lowa lia mai vakai au, ia sai koya sa talai au mai.
\v 43 A cava dou sa yali kinia ni kila na noqu vosa? Ni dou sa yali ni vabautia rawa na noqu vosa.
\v 44 A tamamudou na tevoro, ia dou sa via caka na gagadre ca ni tamamudou. Ko koya na dauvivamatei mai nai vatekivu, a sa yali ni vabautia na ka dina. Ni sa vosa lasu ko koya, sa vosatakia na ka sa tu vua; ni sa daulasulasu ko koya, ena vuku ni'u sa tukunia vi ikodou na ka dina.
\v 45 Ia, koi au ena vuku niu sa tukunia vi ikodou na ka dina, dou sa yali ni vadinati au.
\v 46 Ko cei vi ikodou sa vadinadinatakia ni'u sa cala? Ia kevaka ka'u sa vosa dina, dou sa yali ni vadinatia ni'u sa cala? Ia kevaka ka'u sa vosatakia na dina, dou sa yali ni vadinatia ena vuku ni cava?
\v 47 O koya sa nona na Kalou sa rogocia na vosa ni Kalou: koya dou sa yali ni nona na Kalou.”
\p
\v 48 Era sa qai vosa ko ira na kai Jutia, ka tukunia vua, “Sa yali ni kimamu tukunia dina, ni ko sa kai Samaria, ka sa curumi iko e dua na tevoro?
\v 49 Sa tukunia ko Jisu, “Sa yali ni curumi au e dua na tevoro, ia ka'u sa varokorokotakia na Tamaqu, ia dou sa valialiai au lia”
\v 50 Au sa yali ni ni vaqara me'u varokorokotaki: sa dua sa tiko sa vaqara ka vataulewatakia.
\v 51 E dina, e dina, au sa tukunia vi ikodou, kevaka e dua sa vabautia tiko lia na noqu vosa, ena yali sara ni mate.”
\p
\v 52 Era sa qai tukunia vi ira ko ira na kai Jutia, “Kimamu sa qai kila sa curumi ikonu e dua na tevoro. Ko Eparaama kei ira voki lia na parofita era sa mate, ia, ko sa tukunia ‘Kevaka e dua sa vabautia tiko lia na noqu vosa, ena yali sara ni mate.’
\v 53 Ko sa levu cake beka, ka lailai sobu ko Eparaama na tamada, ko koya sa mate? A ra sa mate voki lia ko ira na parofita: ko sa qisi iko vi cei?”
\v 54 Sa tukunia ko Jisu, “Kevaka ka'u sa varokorokotaki au, sa ka lowa na noqu vivarokorokotaki: sai koya na Tamaqu sa varokorokotaki au: ko koya dou sa tukunia sa nomudou Kalou:
\v 55 ia dou sa yali ni kilai koya, ia ka'u sa kilai koya koi au; ia kevaka ka'u sa tukunia, ‘Au sa yali ni kila koya,’ au na lasutakia lia me vataki ikodou; ia ka'u sa kilai koya lia ka vabautia tiko lia na npna vosa.
\v 56 Sa gadrevia valevu sara ko Eparaama na tamamudou me raicia na noqu gauna: a sa raicia, ka reki.”
\p
\v 57 Era sa qai tukunia vi ira ko ira na kai Jutia, “Sa yali ni limasagavulu na nomu yabaki, ia ko a raici Eparaama, oi?
\v 58 Sa tukunia vi ira ko Jisu, E dina, e dina, au sa tukunia vi ikodou, Ni se bera ni sucu ko Eparaama, au sa bula.
\v 59 Era sa qai tomikia eso na vatu, me ra vaviriki ira kinia: ia sa vunitaki koya ko Jisu, ka sa curu yani mai na valenisoro.
\c 9
\cl Wase 9
\p
\v 1 Ia ni sa qai yani ko Jisu, raicia e dua na tamata sa sucu mataboko.
\v 2 A sa tarogia ko ira na nona tisaipeli, ka tukunia, “Vavuvuli, ko cei sai valavala ca, a tamata koya, se tamana ki tinana, sa sucu mataboko kinia ko koya?”
\v 3 Sa tukunia ko Jisu, “Sa yali ni valavala ca ko koya koya, se tamana se tinana, me vatakilai lia na cakacaka ni Kalou ena vukuna.
\v 4 Sa dodonu me da caka na cakacaka i koya sa talai au mai, ni sa siga toka: sa voleka mai na bogi, sa yali ni cakacaka rawa kinia e dua na tamata.
\v 5 Ni'u sa tiko e vuravura, au sa rarama ki vuravura.”
\p
\v 6 Ni sa vosa va koya ko koya, sa kasuvia na qele, ka ulia vata na soso kei na kasu, a sa boroya kinia na mata ni tamata mataboko,
\v 7 a sa tukunia vua, “Qai ki tavoi enai silisili ko Sailoama,” (a kenai balebale, Sa talaki). A sa qai yani, ka tavoi, ka sa rai rawa na matana ka lesu voki mai ni sa rai na matana.
\v 8 Era sa qai tukunia kinia na lewe ni koro, kei ira sa raici koya e lia ni sa daukerekere, “Sa yali ni koya koya sa dautiko ka daukerekere?”
\v 9 Sa tukunia eso, “Sai koya koya,” ka so tani, “E yaga, isa sa vataki koya,” sa tukunia ko koya, “Sai au lia.”
\v 10 Era sa qai tukunia vua, “Sa rai rawa vaevei na matamu?” Sa tukunia ko koya,
\v 11 “Na tamata sa vatokai ko Jisu sa ulia na soso, ka boroya na mataqu, ka tukunia vei au, “Qai ki Sailoama, ka tavoi: ia ka'u a laki tavoi, ka'u sa qai rawa.
\v 12 Era sa qai tukunia vua, “Evei ko koya?” Sa tukunia ko koya, Au sa yali ni kila.
\p
\v 13 Era sa qai yadi koya ka mataboko eliu vi ira na Farisi.
\v 14 Ia sa siga ni vacecegu sa ulia kinia na soso ko Jisu, ka basukia na matana.
\v 15 Era sa qai tarogi koya voki na Farisi, se sa rai rawa vaevei. A sa tukunia vi ira ko koya, Sa boroya na mataqu ko koya ena soso, kau sa tavoi, kau sa qai rai rawa.
\v 16 Eso vi ira na Farisi era sa qai tukunia, “A tamata koya sa yali ni tamata ni Kalou, ni sa yali ni tamata ni Kalou, ni a yali ni vatabuya na siga ni vacecegu. Eso tani sa tukunia, E caka rawa vaevei na cakacaka-mana va koya e dua na tamatai valavala ca? A ra sa yali ni lomavata kinia. Era sa tukunia voki vua na tamata ka mataboko,
\v 17 “A cava ko sa tukunia ena vukuna, ni sa rai rawa na matamu?” A sa tukunia ko koya, “A parofita ko koya.”
\p
\v 18 Ia ko ira na kai Jutia era sa yali ni vadinatakia, ni sa mataboko eliu ko koya, a sa rai rawa, ka ra sa kacivi rau na nonai tubutubu.
\v 19 A ra sa tarogi rau, ka tukunia, “A luvemudrau koya, drau sa tukunia sa sucu mataboko, ne? Sa qai rai rawa vaevei koya?”
\v 20 E rau sa saumia na nonai tubutubu ka tukunia, “Kirau sa kila ni sa luve i kirau koya, ka sa sucu mataboko:
\v 21 ia kirau sa yali ni kila se sa rai rawa vaevei: se ko cei sa vavuna na nona rai, kirau sa yali kila. Dou tarogia lia ni sa tamata bula ko koya. E rawa ni vamacalatakia lia o koya na nona a vabulai.
\v 22 Erau sa vosa vakoya na nonai tubutubu, ni rau sa rerevaki ira na kai Jutia: ni ra sa qai loma vata na kai Jutia: me vatabui mai na valenilotu ko koya yadua sa vatusa ni sa Karisito ko koya koya.
\v 23 A ka koya e rau sa tukunia kinia koi rau na nonai tubutubu, “Sa tamata bula ko koya: tarogi koya.”
\p
\v 24 Era sa qai kacivia voki na tamata ka mataboko, ka tukunia vua, “Varokorokotakia na Kalou: kitou sa kila sa tamatai valavala ca ko koya,
\v 25 Sa qai saumia na tamata gona ka tukunia, “Au yali ni kila kevaka e tamata i valavala ca, ia, na ka lia ka'u sa kila, ni'u a mataboko e liu, au sa qai rai rawa.”
\v 26 Era sa qai tukunia voki vua, “A cava ka caka vi iko ko koya? Ka rai vaevei na matamu?
\v 27 Sa tukunia vi ira ko koya, Au sa tukunia lowa lia koya vi ikodou, ia dou a yali ni varogocia: dou sa via rogocia voki ena vuku ni cava? Dou sa vinakatia beka mo dou yaco voki lia mo dou nona tisaipeli?
\v 28 Era sa qai valialiai koya, ka tukunia, “O iko sa nona tisaipeli: ia koi kimamu kimamu sa tisaipeli i Mosese.
\v 29 Kimamu sa kila ni sa vosa vei Mosese na Kalou; ia na tamata koya, kimamu yali ni kila se sa qai mai vi ko koya.”
\v 30 Sa vosa na tamata, ka tukunia vei ira, “Sa qai dua na ka vakurabui koya, ni dou a yali ni kila se sa qai mai vi ko koya, ia sa vavunia ko koya na rai ni mataqu.
\v 31 Eda kila ni Kalou e yali ni rogoci ira na tamatai valavala ca, ia, kevaka sa daulotu vua na Kalou e dua na tamata, ka caka na nona lewa, sa rogoci ko koya.
\v 32 Sa yali ni rogo mai nai vatekivu kei vuravura, ni sa dua sa vavunia na rai ni dua na tamata ka sucu mataboko mai.
\v 33 Kevaka sa yali ni qai mai vua na Kalou ko koya koya, sa yali ni rawatia e dua na ka.
\v 34 Era sa vosa, ka tukunia vua, “O iko a sucu mataboko mai enai valavalaca, ka ko sa vatavulici kimamu?” A ra sa vatabui koya.
\p
\v 35 Sa rogocia ko Jisu ni ra sa vatabui koya: ia ni sa kunei koya, sa tukunia vua, “O sa vabautia na Luve ni Kalou ne?
\v 36 Sa saumia o koya, ka tukunia, O cei ko koya, Turaga, me'u vabautia?”
\v 37 A sa tukunia vua ko Jisu, “O sa raicia oti, ia sai koya drau sa vivosaki tiko.”
\v 38 Sa qai tukunia ko koya, Noqu Turaga, au sa vabautia.” A sa cuva vua.
\p
\v 39 A sa tukunia ko Jisu, Au sa qai mai ki vuravura koya me'u lewa, me ra rai rawa ko ira sa yali ni rai rawa, ia me ra mataboko ko ira sa rai.
\v 40 Ko ira na Farisi ka tiko kinia ni ra sa rogocia na veika koya, a ra sa tukunia vua, “Sa mataboko beka koi kitou voki lia?”
\v 41 Sa tukunia vi ira ko Jisu, “Kevaka dou sa mataboko, sa yali na nomudou cala; ia dou sa qai tukunia, ‘Kitou sa rai,’ o koya sa tu lia kinia na nomudou cala.”
\c 10
\cl Wase 10
\p
\v 1 E dina, e dina, au sa tukunia vi ikodou, O koya sa yali ni curu e darava ni ba ni sipi, ia sa kaba cake ena tikinia tani, sai koya koya na daubutako ka dau kovekove.
\v 2 Ia ko koya sa curu e darava, ko koya koya nai vatawa ni sipi.
\v 3 Sa dolavia koya nai vatawa ni darava; a sa varogocia na domona ko ira na sipi: a sa kacivi ira na nona sipi ena yacadra ko koya, ka tuberi ira ki tautuba.
\v 4 Ia ni sa yadi ira na nona sipi ki tautuba sa liutaki ira, a sa muri koya ko ira na sipi ni ra sa kila na domona.
\v 5 Ia era na yali ni muria na vulagi, era na tuba tani lia vi koya: ni ra sa yali ni kila na domo ni vulagi.
\p
\v 6 Sa vosatakia vi ira na vosa vatautauvata koya ko Jisu: a ra sa yali ni kila na veika sa vosatakia vi ira ko koya.
\v 7 Sa qai tukunia voki vei ira ko Jisu, E dina, e dina, au sa tukunia vi ikodou, “Oi au na darava ni sipi.
\v 8 Ko ira kece sa liu mai vi au era sa daubutako ka daukovekove: a sa yali ni varogocia na nodra vosa na sipi.
\v 9 Oi au na darava: kevaka sa curu kinia e dua na tamata ena vukuqu, ena vabulai, ka na daucuru mai ka daucuru yani, ka na kune kakana.
\v 10 Sa yali ni qai loa lia mai na daubutako, me butako lia, ka ravuravu ka va rusa: au sa qai mai me rawa vi ira na bula, ia me rawa valevu sara.
\p
\v 11 Oi au nai vatawa vinaka: sa solia na nona bula nai vatawa vinaka ena vukudra na sipi.
\v 12 Ia ko koya sa voli na nona cakacaka, ka yali ni koya nai vatawa, ka sa yali ni taukeni ira na sipi, sa raicia na wolifa ni sa qai tiko mai, ka sa daini ira na sipi ka tuba ko koya: a sa kati ira na wolifa, a sa toqovi ira ka tovoci ira:
\v 13 sa tuba ko koya sa voli na nona cakacaka, ka ni sa yali ni daunanumi ira na sipi.
\v 14 Oi au nai vatawa vinaka: ia ka'u sa kilai ira sa noqu, ia ko ira sa noqu era sa kilai au:
\v 15 me vaka sa kilai au ko Tamaqu, ka me vaka ka'u sa kilai Tamaqu: ka'u sa solia voki lia na noqu bula ena vukudra na sipi.
\v 16 Eso tani voki na noqu sipi, era sa yali ni tiko ena bai koya: sa kilikili me'u yadi ira voki lia mai, a ra na rogocia na domoqu: ena qai dua loa na qele ni sipi, ka dua bau nai vatawa.
\v 17 A ka koya sa lomani au kinia ko Tamaqu, ni'u sa solia na noqu bula, me'u yadia voki.
\v 18 Sa yali e dua sa kovea koya vi au, ia ka'u sa solia vakai au lia. Au sa rawatia me'u yadia voki. Ai vunau koya sa solia mai vi au ko Tamaqu.
\p
\v 19 Era sa qai viletitakia voki na kai Jutia ena vuku ni vosa koya.
\v 20 A sa lewe levu vi ira sa tukunia, “Sa curumi koya e dua na tevoro, a sa lialia: dou sa rogoci koya ena vuku ni cava?”
\v 21 Eso tani era sa tukunia, “Sa yali ni vakoya na vosa ni tamata sa curumi koya e dua na tevoro: sa rawatia beka e dua na tevoro me rai na mata ni mataboko”
\v 22 Sa qai caka mai Jerusalemi na solevu ni vasavasavataki ni valenisoro, a sa vulai liliwa.
\v 23 A sa qai voli ko Jisu ena valenisoro, ena varada nei Solomoni.
\v 24 Era sa qai vavolivoliti koya na kai Jutia, ka tukunia vua, “A cava so na kena dede ko sa yali ni vataudeitakia kinia na loma i kimamu? Kevaka ko sai koya na Karisito, tukunia vadodonu mai vi kimamu.”
\v 25 Sa saumia vi ira ko Jisu, “Au a tukunia vi Ikodou, ia dou sa yali ni vabautia: a cakacaka ka'u sa caka ena yaca i Tamaqu, o koya koya sa vadinadina vi au.
\v 26 Ia dou sa yali ni vadinatia, ni dou sa yali ni noqu sipi.
\v 27 Sa rogocia na noqu vosa ko ira na noqu sipi, ia ka'u sa kilai ira, ka ra sa muri au:
\v 28 ia ka'u sa solia vi ira na bula yali ni mudu, ia era na yali sara ni rusa, se dua e kaliraki ira mai na ligaqu.
\v 29 A tamaqu, ko koya sa soli ira vi au, sa uasivi na ka kece lia: a sa yali e dua sa rawatia me kaliraki ira mai na liga i Tamaqu.
\v 30 Kirau sa dua loa lia ki Tamaqu.
\p
\v 31 Sa qai tomikia voki na vatu ko ira na kai Jutia, me ra vaviriki koya kinia.
\v 32 Sa qai tukunia vi ira ko Jisu, “E levu na cakacaka vinaka ka'u a vatakila vi ikodou mai vi Tamaqu; a cava na cakacaka vi ira koya dou sa vaviriki au kinia?
\v 33 Sa tukunia vua ko ira na kai Jutia, Sa yali ena vuku ni cakacaka vinaka kimamu sa vaviriki iko kinia; ena vuku lia ni ko vosa vacacatakia na Kalou; ena vuku voki lia ni ko sa tamata lia, ka sa qisi iko mo Kalou
\v 34 Sa tukunia vi ira ko Jisu, “Sa yali li ni volai ena nomudou vunau, ‘Au a tukunia, “Dou sa kalou”’?
\v 35 Kevaka sa vatokai ira me kalou ko koya, ni sa yaco vi ira na vosa ni Kalou, (a sa yali ni dai loa rawa nai Vola Tabu;)
\v 36 dou sa tukunia li vua sa lesia na Tamaqu ka tala ki vuravura, ‘Ko sa vosavacacatakia,’ baletia ni'u sa tukunia, ‘Oi au na Luve ni Kalou’?
\v 37 Kevaka ka'u sa yali ni caka na cakacaka i Tamaqu, kakua ni vabauti au:
\v 38 ia kevaka ka'u sa caka, dou vabautia na cakacaka, kevaka dou sa yali ni vabauti au; mo dou kila kinia, ka vadinatatakia, ni sa tiko vi au ko Tamaqu, ka'u sa tiko vi ira koi au.”
\p
\v 39 Era sa qai via tauri koya voki: a sa qai tani ko koya mai na ligadra.
\p
\v 40 A sa qai voki yani ko koya ki tai kadua ni Joritani, ki na yasana sa vipapitaisotaki kinia e liu ko Joni: a sa tiko kinia.
\v 41 Era sa lewe levu era sa qai vua, ka ra tukunia, “Sa yali ni caka e dua na ka-mana ko Joni: ia sa dina lia na ka kece lia sa vosatakia ko Joni ena vuku ni tamata koya.”
\v 42 E ra sa lewe levu sa vabauti koya mai na vanua gona.
\c 11
\cl Wase 11
\p
\v 1 Sa dua na tamata sa tauvimate, ko Lasarusa na kai Pecani, na nodrau koro ko Meri kei Marica na tuakana.
\v 2 Sai Meri koya sa lumutia na Turaga e na waiwai, ka quwarakia na yavana ena drau ni uluna, a sa tauvi-mate na ganena ko Lasarusa.
\v 3 E rau sa talatala vi Jisu koi rau na ganena, ka tukunia, “Ikonu na Turaga, raicia, ko koya ko sa lomana sa tauvi-mate.”
\v 4 Ia ni sa rogocia ko Jisu, sa tukunia, Ena yali ni ciba ena mate koya ko koya, ia ena varokorokotaki kinia na Kalou, ena varokorotaki voki lia kinia na Luve ni Kalou.”
\v 5 A sa daulomani Marica ko Jisu, vata kei tacina, vata kei Lasarusa.
\v 6 Ni sa qai rogocia ko koya ni sa tauvi-mate, sa tiko bogi rua voki ena tikinia gona.
\p
\v 7 Sa oti koya sa qai tukunia vi ira na tisaipeli, “Me datou qai voki mada ki Jutia.”
\v 8 Sa ratou tukunia vi ira na tisaipeli, “Vavuvuli, era via vaviriki iko ni kua lowa lia ena vatu ko ira na kai Jutia; ia iko sa baci via qai voki kinia.”
\v 9 Sa saumia ko Jisu, “Sa yali li ni tinikarua na aua e na dua na siga? Kevaka sa qai e dua ena siga, sa yali ni tarabe ko koya, baletia ni sa raicia na rarama ki vuravura koya:
\v 10 Ia, kevaka sa qai e dua ena bogi, sa tarabe ko koya ni sa yali ni tu vua na rarama.”
\p
\v 11 Sa vosatakia na ka koya ko koya: ia ka oti sa qai tukunia vi ira, “Sa moce na wekada ko Lasarusa; ia, ka'u sa na qai lia me'u vayadrati koya.”
\v 12 Sa qai tukunia ko ira na nona tisaipeli, Ikonu na Turaga, kevaka sa moce lia ko koya ena bula.”
\v 13 Ia sa vosatakia na nona mate ko Jisu: ka ra sa nanumia sa vosatakia ko koya na vacegu ni moce.
\v 14 Sa qai tukunia vadodonu vi ira ko Jisu, “Sa mate ko Lasarusa:
\v 15 ia, ka'u sa rekitakia ena vukumudou ni'u a yali ni tiko kinia, mo dou vabautia; ia me da qai lia vua.”
\v 16 Sa qai tukunia ko Tomasi, o koya sa vatokai ko Titimo, vi ira na nonai caba na tisaipeli, “Me da qai voki lia, me da mate vata kei Jisu.”
\p
\v 17 Ni sa qai mai ko Jisu, sa qai kila kinia ni sa bogi va oti ko Lasarusa enai bulubulu.
\v 18 A sa voleka ki Jerusalemi ko Pecani, a kena yawa e rua beka na maile,
\v 19 Ia sa lewe levu na kai Jutia era a qai mai kivei Marica vata ki Meri, me ra vacegui rau ena vuku ni ganedrau.
\v 20 Ni sa qai rogocia ko Marica sa qai mai ko Jisu, sa qai ki tavaki ira: ia sa tiko lia e vale ko Meri.
\v 21 Sa qai tukunia vi Jisu ko Marica, “Ikonu na Turaga, kevaka ko a tiko ena vanua gona, ke a yali ni mate na ganequ:
\v 22 ia ka'u sa kila ena solia vi ikonu ni kua na Kalou na ka kece lia ko sa kerea vua.”
\v 23 Sa tukunia vua ko Jisu, “Ena tu cake voki na ganemu.”
\v 24 Sa tukunia vua ko Marica, “Au sa kila ena tu cake voki ko koya e na siga mai muri era na tu cake voki kinia na mate.
\v 25 Sa tukunia vua ko Jisu, “Oi au na vu ni tu-cake-voki, ki na vu-ni-bula: ko koya sa vabauti au, kevaka sa mate, ena bula lia:
\v 26 ia ko koya yadua sa bula ka vabauti au, ena yali sara ni mate. Ko sa vadinatakia na ka koya, se yali?”
\v 27 Sa tukunia vua ko koya, Io, na Turaga: au sa vadinatia ni sa Karisito koi ikonu, na Luve ni Kalou, ko koya sa dodonu me qai mai ki vuravura.”
\p
\v 28 Ia ni sa vosa vakoya ko koya, sa qai yani, ka kacivia lo na tacina ko Meri, ka tukunia, “Sa qai mai nai Vavuvuli, a sa tarogi iko tiko.”
\v 29 Ni sa qai rogocia ko koya, sa tu cake ka qai yani vi ira.
\v 30 (A sa bera ni curu ki na koro ko Jisu, sa tiko lia ena vanua erau sa vitata kinia kei Marica.)
\v 31 Ko ira na kai Jutia era sa tiko vata ki Meri e vale ka vacegui koya, ni ra sa raicia sa tu cake sara ko koya, ka qai yani, era sa muri koya, ni ra sa nanumia, sa qai ki nai bulubulu ko koya me tagi kinia.
\p
\v 32 Ni sa qai yaco ko Meri ki na vanua sa tiko kinia ko Jisu, ka raici koya, sa cuva sobu ki na yavana, ka tukunia vi ira, “Ikonu na Turaga, kevaka ko a tiko ena vanua gona, ke yali ni mate na ganequ.”
\v 33 Ni sa qai raicia ko Jisu na nona tagi, kei na nodra tagi voki lia na kai Jutia era qai vata tiko mai, sa vutugu ko koya ena yalona, a sa rarawa na lomadra,
\v 34 ka tukunia, “Evei na vanua dou a bulutia kinia?” Era sa tukunia vi ira, “Turaga ni qai mai mo ni raicia.”
\v 35 Sa tagi ko Jisu.
\v 36 Era sa qai tukunia na kai Jutia, Raicia na kena levu ni nona lomani Lasarusa!”
\v 37 Ia, ka so vi ira sa tukunia, “Sa yali beka ni rawatia ko koya koya, ko koya sa vavunia na rai ni mata ni mataboko, me lewa voki lia me kakua ni mate na tamata koya”
\v 38 Sa vutugu voki e na yalona ko Jisu, ka qai mai ki nai bulubulu. Ia sa dua na qaravatu, ka sa kenai sogo e dua na vatu.
\v 39 Sa tukunia ko Jisu, “Dou yadia tani na vatu.” Sa tukunia vua o Marica, a gane i koya sa mate, “Ikonu na Turaga, sa na bona ko koya: ni sa qai bogi va na nona mate.”
\v 40 Sa tukunia vua ko Jisu, “Au a yali li ni tukunia vi iko, ni ko na raicia na kaukauwa ni Kalou, kevaka ko sa vabautia?”
\p
\v 41 Era sa qai yadia tani na vatu. A sa ta cake ko Jisu, ka tukunia, “Na Tamaqu, au sa vavinavinakatakia vi iko ni ko a rogoci au mai:
\v 42 ia ka'u sa kila ni ko sa rogoci au tiko lia, ia kau sa vosa ena vukudra na tamata sa tiko koya, me ra vabautia ni ko sa talai au mai.”
\v 43 Ia ni sa vosa oti vakoya, sa kaci ena domo levu, “Lasarusa, qai mai.”
\v 44 Ia ko koya ka mate sa qai mai, ka viviraki tu na ligana ki na yavana enai sole ni mate: ka vivirakia na uluna ena dua nai tavoi. Sa tukunia vi ira ko Jisu, “Dou serekia, ka dainia me qai.”
\p
\v 45 Era lewe levu vi ira na kai Jutia sa qai mai vi Meri, ni ra sa raicia na ka sa caka ko Jisu, era sa vabautia.
\v 46 Ia ko ira eso sa qai yani vi ira na Farisi, ka tukunia vi ira na ka sa caka ko Jisu.
\v 47 Sa qai soqoni vata ko ira na bete levu vata kei ira na Farisi me ra bose, a ra sa tukunia, “A cava mada me da caka? Ni sa caka na cakacaka-mana e levu na tamata koya.
\v 48 Kevaka eda sa daini koya dua loa vakoya, era na vabauti koya kece lia na tamata: era na qai qai mai na kai Roma, ka kovea na noda koro kei na noda matanitu.”
\p
\v 49 A sa dua vi ira, ko Kaiafa, ko koya sa bete levu ena yabaki ko ya, sa tukunia vi ira, “Dou sa yali ni kila e dua na ka,
\v 50 se vananumia ni sa yaga vi ita me mate e dua na tamata ena vukudra na tamata, ka me kakua ni rusa na matanitu taucoko.”
\v 51 A sa yali ni vosatakia na ka koya ko koya vataki koya: ia ni sa bete levu ena yabaki ko ya, sa parofisai ko koya ni na mate ko Jisu ena vuku ni matanitu ko ya;
\v 52 ka yali ena vuku ni matanitu dua loa lia, ko ya me vasoqoni ira vata voki lia na luve ni Kalou era sa dui viseyaki me ra dua loa.
\v 53 Mai na siga gona era sa qai tuvalakia se me vamatei vacava ko Jisu.
\p
\v 54 O koya koya sa yali kinia ni viqaiyaki e matana votu ena kedra maliwa na kai Jutia, a sa qai yani mai na vanua gona ki na vanua sa voleka ki na vikau, ki na dua na koro na yacana ko Ifireimi, a sa tiko kinia kei ira na nona tisaipeli.
\p
\v 55 A sa voleka na nodra solevu ni qai-sivia na kai Jutia: a ra sa lewe levu sa qai cake ki Jerusalemi, mai vanua, ni se bera na solevu ni qai-sivia, me ra vasavasavataki ira.
\v 56 Era sa qai vaqarai Jisu, ka vivosaki lia vakai ira, ni ra sa tu ena vale ni soro, “A cava dou sa vananumia? Ena qai mai ko koya ki na solevu se yali?”
\v 57 Ia sa varotakia ko ira na bete levu kei ira na Farisi, kevaka e dua sa kila na vanua sa tiko kinia ko Jisu, me tukunia mai, me ra qai ki vesukia mai.
\c 12
\cl Wase 12
\p
\v 1 Sa vo e ono na bogi me qai caka na kana vata ni qai-sivia, sa qai mai ko Jisu ki Pecani, sa tiko kinia ko Lasarusa, ka mate eliu ko koya ka sa vakatura cake voki mai na mate ko koya.
\v 2 A ra sa caka kinia na kena varaiyavi; a sa qaravia ko Marica, a sa dua voki vi ira na kana vata ka ko Lasarusa.
\v 3 Sa qai yadia mai ko Meri e dua na paudi waiwai ka lumutia na yavai Jisu, ka quwarakia na yavana ena drau ni uluna: ka curuoso kinia na kena i boi ena loma ni vale.
\p
\v 4 Sa qai tukunia e dua vi ira na tisaipeli, ko Jutasa Isikarioti, ko koya ena soli koya yani,
\v 5 E na cava na vuna sa yali ni volitakia na waiwai koya e na pene e tolu na drau, ka yadi vi ira na dravudravua?
\v 6 Sa yali ni nona nanumi ira na dravudravua, sa vosa kinia vakoya ko koya; ena vuku lia ni sa daubutako, ka tauria na taga i lavo, sa yadia ka sa biu kinia.
\v 7 Sa qai tukunia ko Jisu, “Daini koya lia sa maroroya na ka koya ko koya ki na siga ka'u na bulu kinia:
\v 8 ka sa tiko vadua kei ikodou ko ira na dravudravua; ia ko i au, ka'u sa yali ni tiko vadua kei ikodou:
\v 9 Ia sa lewe levu sara vi ira na kai Jutia, ni ra sa kila sa tiko mai kinia ko koya; era sa qai mai ka yali ena vukui Jisu lia; ka me raici Lasarusa voki lia, ko koya ka vaturia cake voki mai na mate ko koya.
\v 10 Ia ko ira na bete levu era sa bose vata me ra vamatei Lasarusa voki lia:
\v 11 ni ra sa lewe levu na kai Jutia sa qai yani ena vukuna, ka vabauti Jisu.
\p
\v 12 Ena savulaci e lewe levu sara era sa qai mai ki na kana vata, ni ra sa rogocia sa qai mai ki Jerusalemi ko Jisu,
\v 13 era sa yadia na drau ni niu, a ra sa qai yani me vitavaki kaya na kacivakia, Osana! Sa kalougata na nodra Tui na Isireli, ko koya sa qai mai ena yaca ni Turaga.
\v 14 Ia ko Jisu, ni sa raicia e dua na luveni asa sa vodokia me vaka lia na ka sa volai,
\v 15 “Oi ikonu sa toka mai Saioni, kakua ni rerevakia: raicia, sa qai mai na nomuni Tui, ka vodo tu ena dua na luveni asa.”
\p
\v 16 Ia na veika koya era sa yali mada ni kila ko ira na nona tisaipeli: ia ni sa varokorokotaki oti ko Jisu, era sa qai nanumia ni sa volai ko koya ena veika koya, a ra sa caka vua na veika koya.
\p
\v 17 Ko ira na lewe levu era sa tiko kaya ni sa kacivi Lasarusa mai na i bulubulu, ka vaturi koya cake voki mai na mate, era sa tukunia.
\v 18 Ena vuku ni ka koya sa vitavaki kaya voki lia na lewe levu, ni ra sa rogocia sa caka na ka-mana koya.
\v 19 O ira na Farisi era sa qai tukunia vaka ira, “Dou sa kila beka ni dou yali ni rawatia e dua na ka? Raicia, sa muri koya na kai vuravura kece lia.”
\p
\v 20 Isa sa so mai na vimatanitu tani era sa qai cake mai ki na solevu me ra soro:
\v 21 ko ira koya era sa qai mai vi Filipi, a kai Peciseita e Kalili, ka tarogi koya, ka tukunia, “Kitou via raici Jisu saka.”
\v 22 Sa qai ko Filipi, ka tukunia vi Adriu ia koi rau ko Adriu vata kei Filipi, era a sa tukunia vi Jisu.
\v 23 A sa vosa vi rau ko Jisu, ka tukunia, “Sa qai yaco mai na gauna me varokorokotakia kinia na Luve ni tamata,
\v 24 E dina, e dina, au sa tukunia vi ikodou, Kevaka ena yali ni mate na vua ni sila ni sa lutu ki na qele, sa tiko dua loa lia; ia kevaka sa mate, sa vua valevu.
\v 25 O koya sa lomania voki lia na nona bula, ena vayalia, ia ko koya sa catia na nona bula e vuravura koya, ena maroroya ki na bula yali ni mudu.
\v 26 Kevaka sa qaravi au e dua, me muri au lia; ia na vanua ka'u sa tiko kinia, ena tiko voki lia kinia ko koya sa qaravi au: ia kevaka sa qaravi au e dua, ena varokorokotaki koya ko Tamaqu.
\p
\v 27 Sa qai rarawa na lomaqu, ia a cava me'u tukunia? Na Tamaqu, vabulai au mai na gauna koya; ia na ka koya ka'u sa qai mai kinia ki na gauna koya.
\v 28 Na Tamaqu, varokorokotakia na yacamuni. Sa qai rogo mai e dua na vosa mai lomalagi, Au sa varokorokotakia voki.
\v 29 Ko ira na lewe levu ka tiko ka rogocia, era sa tukunia sa kurukuru: sa tukunia eso tani, Sa dua na agilose sa vosa vi koya.
\v 30 Sa vosa ko Jisu, ka tukunia, sa yali ni qai mai na vosa koya ena vukuqu, ena vukumudou lia.
\v 31 Sa qai lewai ko ira na kai vuravura koya: sa qai dai ki tuba na turaga ni vuravura koya.
\v 32 Ia ni'u sa laveti cake mai vuravura, au sa vayarayarataki ira na tamata kece lia kivei au.”
\v 33 Ia sa vosatakia na ka koya ko koya, me voki lia na mate ena mate kinia ko koya.
\p
\v 34 Sa tukunia vua na lewe levu, “Kimamu sa rogocia mai nai vunau ni sa tiko vadua na Karisito; ia ko sa tukunia vacava, Ena laveti cake na luve ni tamata? “Ko cei na Luve ni tamata koya?”
\v 35 Sa qai tukunia vi ira ko Jisu, sa tiko valailai lia vi ikodou na rarama: dou qai ni sa tu vi ikodou na rarama, de yacovi ikodou na butobuto, ia ko koya sa qai ena butobuto, sa yali ni kila se sa qai kivei.
\v 36 Ni sa tu vi ikodou na rarama, dou vabautia na rarama, me dou yaco me luve ni rarama. Sa vosatakia na veika koya ko Jisu, ka qai qai yani, ka vunitaki koya vi ira.
\v 37 Ia e dina lia sa caka ko koya e matadra e levu na ka mana, a ra sa yali ni vabautia:
\v 38 me vayacoria kinia na ka sa vosatakia ko Aisea na parofita, ka vaka, “I jiova, ko cei sa vabautia na nitoui tukutuku? A sa vatakilai vi cei na liga i Jiova?”
\v 39 A ka koya era sa yali kinia ni vabautia rawa; ni sa tukunia voki ko Aisea,
\v 40 “Sa vamatabokotakia na matadra, ka vakaukauwatakia na lomadra ko koya: Me kakua ni rai na matadra se kila na lomadra, Ka saumaki mai, Ka me'u vabulai ira.”
\p
\v 41 Sa vosatakia na veika koya ko Aisea, ni ra sa raicia na nona serau, ka tukunia ko koya.
\p
\v 42 Ia sa lewe levu vi ira voki lia na turaga era sa vabauti koya, ia, ena vukudra na Farisi, era sa yali ni tukunia, de ra sa vatatabui mai na valenilotu:
\v 43 ni ra sa vinakatia valevu me varokorokotaki ira ko ira na tamata, ka valailai lia me varokorotaki ira na Kalou.
\p
\v 44 Sa qai kaci ko Jisu, ka tukunia, “O koya sa vabauti au, sa yali ni vabauti au lia, sa vabauti koya voki lia sa talai au mai:
\v 45 ia ko koya sa raici au, sa raici koya sa talai au mai.
\v 46 Au sa qai ki vuravura me'u kena rarama, me kakua ni tiko ena butobuto ko koya yadua sa vabauti au.
\p
\v 47 Ia kevaka e dua sa rogocia na noqu vosa, ka yali ni vabautia, au sa yali ni lewai koya: ni'u sa yali ni qai mai me'u lewai ira lia na kai vuravura, me'u vabulai ira lia na kai vuravura.
\v 48 Sa dua sa lewai koya sa daini au, ka yali ni vabautia na noqu vosa: a vosa ka'u sa vosatakia, sai koya koya ena lewai koya ena siga mai muri.
\v 49 Ni'u sa yali ni vosa vataki au; ia ko Tamaqu sa talai au mai, sa varotakia vi au na ka me'u tukunia.
\v 50 Ia ka'u sa kila sa vu ni bula yali ni mudu na nonai varo: o koya lia, ena ka kece lia ka'u sa vosatakia, au sa vosa me vaka na ka sa tukunia vi au ko Tamaqu.”
\c 13
\cl Wase 13
\p
\v 1 Ia ni sa bera na kana vata ni qai-sivia, ka sa kila ko Jisu sa yaco mai na nona gauna me qai tani yani e vuravura koya vua na Tamana, ka ni sa lomani ira na nona era sa tiko e vuravura, sa lomani ira ki nai otioti.
\v 2 Ia ni ra sa varaiyavi tiko, ni vatuburia oti na tevoro ena loma i Jutasa Isikarioti, na luvei Saimoni, me soli koya yani:
\v 3 a sa kila ko Jisu ni sa solia ko Tamana na ka kece lia ki na ligana, ka ni sa qai mai vua na Kalou ko koya, a sa qai voki yani vua na Kalou;
\v 4 sa tucake mai na varaiyavi ka luvatia na nona i sulu, ka yadia mai e dua nai sulu, ka vaucia ki tolona.
\v 5 Ni sa oti koya sa livi na wai ki na dari, vatekivu me vuya na yavadra na tisaipeli, ka quwarakia enai sulu sa vau ki tolona.
\p
\v 6 Sa qai mai ko koya vi Saimoni Pita: a sa tukunia vua ko koya, “Noqu Turaga, ko ni sa vuya li na yavaqu”
\v 7 Sa vosa ko Jisu, ka tukunia vua, “A ka ka'u sa caka ko sa yali ni kila ni kua; ia mai muri lia ko na kila.
\v 8 “Sa tukunia vua ko Pita, “Ikonu na yali sara ni vuya na yavaqu.” Sa tukunia vua ko Jisu, “Kevaka ka'u sa yali ni vui iko, ko sa yali ni rawatia e dua na ka vi au.”
\v 9 Sa tukunia vua ko Saimoni Pita, “Noqu Turaga, me yali loa lia na yavaqu, a ligaqu voki lia ki na uluqu.”
\v 10 Sa tukunia vua ko Jisu, “Ko koya sa sili oti, sa yaga vua me vuya na yavana lia, a sa savasava, ka dou sa yali kece,"
\v 11 ni sa kilai koya ena soli koya yani: a ka koya sa tukunia kinia ko koya, “Dou sa yali ni savasava kece”
\v 12 Ni sa qai vuya oti na yavadra, ka sulumakia voki na nonai sulu, sa tiko sobu voki, ka tukunia vi ira. “Dou sa kila na ka'u sa caka vi ikodou, se yali?
\v 13 Dou sa vatokai au me'u i ‘Vavuvuli,’ me'u ‘Turaga’ voki lia: ia dou sa vosa dina; ni'u sa vakinia.
\v 14 Ia kevaka ka'u sa vuya na yavamudou, koi au na Turaga kei nai Vavuvuli, sa dodonu voki lia mo dou vivui yava:
\v 15 ni'u sa solia e dua nai varau vi ikodou, mo dou caka me vaka ka'u sa caka vi ikodou.
\v 16 E dina, e dina, au sa tukunia vi ikodou, Sa yali ni levu na tamata ka lailai na nona turaga; se levu ko koya sa talai ka lailai ko koya sa talai koya.
\v 17 Kevaka dou sa kila na veika koya, dou sa kalougata kevaka dou sa caka.
\v 18 Au sa yali ni vosataki ikodou kece lia: au sa kilai ira ka'u sa digitakia; ia me vayacoria kinia nai Vola Tabu, 'O koya kirau sa kana madrai vata kaya, sa leqeti au enai bukubuku-ni-yavana.'
\p
\v 19 Au sa qai tukunia vi ikodou ni sa bera ni yaco mai; mo dou vabautia ni sai au, ni sa yaco mai.
\v 20 E dina, e dina, au sa tukunia vi ikodou, O koya sa vacegui ira yadua ka'u sa tala, sa vacegui ira yadua ka'u sa tala, sa vacegui au; ia ko koya sa vacegui au, sa vacegui koya sa talai au mai.”
\p
\v 21 Ni sa vosa oti vakoya ko Jisu, sa rarawa na lomana, a sa vatakilataki, ka tukunia, “E dina, e dina au sa tukunia vi ikodou, sa dua vi ikodou ena soli au yani.”
\v 22 Era sa qai viraici na tisaipeli, ni ra sa lecavia se vosataki cei ko koya.
\v 23 A sa vararavi ena lomasere i Jisu e dua vi ira na nona tisaipeli, ko koya sa loma ko Jisu.
\v 24 Sa qai deguvacutaki koya ko Saimoni Pita, me tarogia se vosataki cei ko koya.
\v 25 Ia ko koya sa vararavi ena lomasere i Jisu, sa tukunia vua, “Ikonu na Turaga, ko cei beka ko ya?”
\v 26 Sa tukunia ko Jisu, “Sai koya ka'u na solia vua na tiki ni madrai ni'u sa tokocia.” Ia ni sa tokocia oti na tiki ni madrai, sa soli vi Jutasa Isikarioti, na luve i Saimoni.
\v 27 Ia ni sa oti na tiki madrai, sa qai curumi koya ko Setani. Sa qai tukunia vua ko Jisu, “A ka ko sa caka, caka vatotolo.”
\v 28 Sa yali ni kila e dua vi ira sa tiko me kana, sa cava sa vosa kinia vakoya vua ko koya.
\v 29 Era vakasama eso, ni sa tauria na taga i lavo ko Jutasa, sa tukunia vua ko Jisu, “Volia na veika ena yaga vi ita ena kana vata; se me solia na ka eso vi ira era dravudravua.”
\v 30 Ni sa qai tauria oti na tiki ni madrai ko koya, sa qai sara ki tautuba; a sa bogi.
\p
\v 31 Ni sa qai curu yani ko koya, sa tukunia ko Jisu, “Sa qai varokorokotaki na Luve ni tamata, a sa varokorokotakia na Kalou ena vukuna:
\v 32 ka na varokorokotaki koya voki lia na Kalou vakai koya, ia ena varokorotaki koya sara.
\p
\v 33 Na luvequ lomani, au na tiko valailai lia kei ikodou. Dou na vaqarai au: ia me vaka ka'u a tukunia vi ira na kai Jutia, ‘Dou sa yali ni qai rawa ki na vanua ka'u sa qai yani kinia;’ au sa tukunia va voki lia kinia vi ikodou.
\v 34 E dua na vunau vou ka'u sa solia vi ikodou, Mo dou vilomani; me vaka ka'u sa lomani ikodou, mo dou vilomani voki lia vakinia.
\v 35 A ka koya era na kila kinia na tamata kece lia ni dou sa noqu tisaipeli, kevaka dou sa vilomani.
\p
\v 36 Sa tukunia vua ko Saimoni Pita, “Ikonu na Turaga, ko ni sa qai kivei?” Sa tukunia vua ko Jisu, “A vanua ka'u sa qai kinia, ko sa yali ni muri au rawa kinia ni kua; ia mai muri lia, ko na muri au.
\v 37 Sa tukunia vua ko Pita, “Ikonu na Turaga, au sa yali ni muri ikonu rawa ni kua ena vuku ni cava? Au na solia na noqu bula ena vukumuni.”
\v 38 “O na solia li na nomu bula ena vukuqu? E dina, e dina, au sa tukunia vi iko, ni sa bera ni tagi na toa, ko na cakitaki au vatolu.”
\c 14
\cl Wase 14
\p
\v 1 “Me kakua ni rarawa na lomamudou: dou sa vabautia na Kalou; dou vabauti au voki lia.
\v 2 Sa levu na tikinia ena vale ni Tamaqu; kevaka sa yali, au sa tukunia vi ikodou. Ni ka'u sa qai me'u varautakia na tikinia me nomudou.
\v 3 Ia kevaka ka'u sa qai ka varautakia na tikinia me nomudou, au na qai voki mai, ka yadi ikodou vi au: mo dou tiko voki lia ena vanua ka'u sa tiko kinia.
\v 4 Ia dou sa kila na vanua ka'u sa qai kinia, dou sa kila voki lia na kena sala.”
\p
\v 5 Sa tukunia vua ko Tomasi, Ikonu na Turaga, kitou sa yali ni kila se ko ni sa qai kivei; ia kitou kila rawa vavei na sala?”
\v 6 Sa tukunia vua ko Jisu, “Oi au na sala, kei na vu-ni-dina, kei na vu-ni-bula; sa yali ni torovi Tamaqu loa lia e dua na tamata, ena vukuqu lia.
\v 7 Kevaka dou sa kilai au, dou sa kilai Tamaqu voki lia; ia mai na siga koya dou sa kilai koya ka raici koya.”
\p
\v 8 Sa tukunia vua ko Filipi, “Turaga, vatakilai Tamamunu vi kitou; kitou na qai vacegu”
\v 9 Sa tukunia vua ko Jisu, “Ni'u sa tiko dede vakoya vi ikodou, ko sa yali li ni kilai au, Filipi?” ko koya sa raici au, sa raici Tamaqu: ia ko sa tukunia vacava, ‘Vatakilai Tamamu vi kitou’?
\v 10 O sa yali li ni vadinatakia ni'u sa duavata kei Tamaqu, a sa duavata kei au ko Tamaqu? A vosa ka'u sa vosatakia vi ikodou, ka'u sa yali ni vosatakia vakai au lia; ia ko Tamaqu kirau sa dua vata kaya, sa caka na cakacaka.
\v 11 Dou vadinati au ni'u sa duavata kei Tamaqu, a sa duavata kei au ko Tamaqu, se vadinati au ena vuku ni cakacaka lia.
\v 12 E dina, e dina, au sa tukunia vi ikodou, O koya lia sa vabauti au, ena caka voki lia na cakacaka ka'u sa caka, ia ena caka na cakacaka e uasivi cake ena ka koya, ena vuku ni'u sa qai vi Tamaqu.
\v 13 Ia na ka kece lia dou sa kerea ena yacaqu, au na caka, me varokorokotakitakia na Tamaqu ena vuku ni Luvena.
\v 14 A ka kece lia dou na kerea ena yacaqu, au na caka.
\p
\v 15 Kevaka dou sa lomani au, dou talairawarawa ki na noqu vunau.
\v 16 Ia ka'u na masuti Tamaqu, ena qai solia vi ikodou e dua voki na Dauvivacegui, me tiko lia kei ikodou ka yali ni mudu;
\v 17 a Yalo Tabu sa vu ni ka dina, ko koya era sa yali ni vabautia rawa na kai vuravura, ni ra sa yali ni raici koya se kila koya: ia sai ikodou lia sa kilai koya: ni sa tiko vata kei ikodou ko koya, ka na curumi ikodou.
\v 18 Au na yali ni laivi ikodou mo dou luveniyali: au na qai mai vi ikodou.
\v 19 Malua mada valailai, era na qai yali ni raici au voki na kai vuravura: ia dou sa raici au: ni'u sa bula, dou na bula voki lia.
\v 20 Ena siga ko ya dou na kila ni'u sa duavata kei Tamaqu, ka dou sa duavata ki au, ka'u sa duavata kei ikodou.
\v 21 Ko koya sa nanumia na noqu vunau ka talairawarawa kinia, sai koya koya sa lomani au; ia ko koya sa lomani au ena lomani koya ko Tamaqu, ia ka'u na lomani koya, ka vatakilai au vua.
\p
\v 22 Sa tukunia vua ko Jutasa, (e dua tani ko Isikarioti,) “Ikonu na turaga, ko ni na vatakilai ikonu vi kitou e na vuku ni cava, ka yali vi ira na kai vuravura?
\v 23 Sa vosa ko Jisu, ka tukunia vua, “Kevaka sa lomani au e dua, ena talairawarawa ki na noqu vosa; ena qai lomani koya ko Tamaqu, ia kirau na qai mai kivei koya ka tiko lia vua.
\v 24 O koya sa yali ni lomani au, sa yali ni talairawarawa ki na noqu vosa: ia na vosa dou sa rogocia, sa yali ni noqu loa lia, sa nei Tamaqu sa talai au mai.
\v 25 Au sa vosatakia na veika koya vi ikodou, ni'u sa tiko vata kei ikodou.
\v 26 Ia na Dauvivacegui, na Yalo Tabu, ko koya ena tala mai ko Tamaqu ena yacaqu, ena vavulici ikodou ena ka kece lia ka'u a vosatakia vi ikodou.
\v 27 Au sa dainia vi ikodou na vacegu, au sa solia vi ikodou na noqu vacegu; au sa yali ni solia vi ikodou, me vaka sa solia ko vuravura. Me kakua ni rarawa na yalomudou, se rerevakia.
\p
\v 28 Dou a rogocia ni'u a tukunia vi ikodou, Au sa qai yani, ka qai voki mai vi ikodou. Kevaka dou sa lomani au, dou na reki ni'u sa qai vi Tamaqu: ni sa uasivi cake vi au ko Tamaqu.
\v 29 Au sa qai tukunia e liu vi ikodou ni sa bera ni yaco mai, mo dou vadinatia ena gauna sa yaco kinia.
\v 30 Ena visiga emuri au na yali ni vivosaki valevu kei ikodou: ni sa qai mai na turaga ni vuravura koya, a sa yali ni raicia e dua na ka vi au. Ia me kila lia ko ira na kai vuravura ni'u sa lomani Tamaqu,
\v 31 ia me vaka sa vosa vi au ko Tamaqu, au sa caka vakinia. Tu cake tou qai yani.
\c 15
\cl Wase 15
\p
\v 1 Koi au na vaini dina, ka sai vatau-ni-were ko Tamaqu.
\v 2 A tabaqu kece lia sa yali ni vua, sa yadia laivi yani ko koya: ia na tabaqu kece lia sa vua, sa samakia ko koya, me vua valevu sara lia.
\v 3 Dou sa qai samaki ena vuku ni vosa ka'u a vosatakia vi ikodou.
\v 4 Dou tu vi au, ka'u na tu vi ikodou. Me vaka sa yali ni vua rawa na tabana vaikoya, kevaka sa yali ni tu vata ki na vaini; ena va voki lia kinia koi ikodou, kevaka dou sa yali ni tu vi au.
\p
\v 5 Oi au na vaini, koi ikodou na tabaqu: ko koya sa tu vi au, koi au voki lia vi koya, sa vua valevu: ke dou sa tawase tani vi au, dou sa yali ni rawatia e dua na ka.
\v 6 Kevaka sa yali ni tu vi au e dua, sa dai laivi me vaka na taba ni vaini, sa malai; a ra sa tomikia, ka dainia ki na buka waqa, ka visa.
\v 7 Kevaka dou sa tu vi au, ka sa tu vi ikodou na noqu vosa, dou na kerea na ka dou sa vinakatia, ia ena yaco vi ikodou.
\v 8 A ka koya sa varokorokotakia kinia ko Tamaqu, ni dou sa vua valevu: ka dou na qai noqu tisaipeli.
\p
\v 9 Me vaka sa lomani au ko Tamaqu, au sa lomani ikodou vavoki lia kinia: dou tiko lia ena noqu loloma.
\v 10 Kevaka dou sa talairawarawa ki na noqui vunau, dou na tiko lia ena noqu loloma; me vaka ka'u sa talairawarawa ki na vunau ni Tamaqu ka tiko lia ena nona loloma.
\v 11 Au sa vosatakia na veika koya vi ikodou, me'u sa marau tiko lia ena vukumudou; ka me sinai na nomudou marau.
\v 12 Sa noqu vunau koya, Mo dou vilomani me vaka ka'u sa lomani ikodou.
\v 13 Sa yali na nona loloma e dua na tamata me uasivi cake ena ka koya, me solia na nona bula ena vukudra na wekana.
\v 14 Dou sa wekaqu, kevaka dou sa caka na ka kece lia ka'u sa varotakia vi ikodou.
\v 15 Au sa yali ni vatokai ikodou voki me noqu tamata: ni sa yali ni kila na tamata na ka sa caka na nona turaga; ia ka'u sa vatokai ikodou me wekaqu; ni'u sa vatakila vi ikodou na ka kece lia ka'u a rogocia mai vi Tamaqu.
\v 16 Dou sa yali ni digitaki au, ia ka'u sa digitaki ikodou, ka lesi ikodou, mo dou qai ka vua, ka me tiko voki lia na vuamudou; me solia kinia vi ikodou ko Tamaqu na ka kece lia dou na kerea vua e na yacaqu.
\v 17 A veika koya ka'u sa varotakia vi ikodou, mo dou vilomani.
\p
\v 18 Kevaka sa cati kodou ko vuravura, dou sa kila ni ra sa cati au eliu, era sa cati ikodou emuri.
\v 19 Kevaka dou sa vavuravura, ka ni'u sa digitaki ikodou mai vuravura, sai koya koya sa cati ikodou kinia ko vuravura.
\v 20 Dou nanumia na vosa ka'u sa vosatakia vi ikodou, Sa yali ni levu na tamata ka lailai na nona turaga. Kevaka era a vacacani au, era na vacacani ikodou voki lia; kevaka era sa talairawarawa ki na noqu vosa, era na talairawarawa voki lia ki na nomudou vosa.
\v 21 Ia na ka kece lia koya era na caka vi ikodou ena vuku ni yacaqu, ni ra sa yali ni kilai koya ka talai au mai.
\v 22 Kevaka ka'u a yali ni qai mai ka vosa vi ira, sa qai yali na nodrai valavala ca: ia sa qai yali na nodra ulubale ena nodrai valavala ca.
\v 23 O koya sa cati au, sa cati Tamaqu voki lia.
\v 24 Kevaka ka'u a yali ni caka vi ira na cakacaka ka yali ni caka e dua na tamata tani, sa yali na nodrai valavala ca: ia era sa qai raicia, ka cati au kei Tamaqu voki lia;
\v 25 me vayacoria kinia na vosa ka volai e na nodra vunau, ‘Era sa cati au loa lia.’
\p
\v 26 Ia ni sa qai mai na Dauvivacegui, ko koya ka'u na tala vi ikodou mai vi Tamaqu, a Yalo Tabu sa vu ni ka dina, ko koya sa qai mai vi Tamaqu, ena tukuni au ko koya.
\v 27 Ia dou na dautukutukunia voki lia koi ikodou, ni dou sa tiko vata kei au mai nai vatekivu.
\c 16
\cl Wase 16
\p
\v 1 “Au sa vosataki voki vi ikodou mo dou kakua ni vatarabetaki.
\v 2 Era na vatabui ikodou mai na vi valenilotu: ia ena yaco voki mai na gauna era na nanumia kinia ko ira yadua sa vamatei ikodou ni ra sa qaravia kinia na Kalou.
\v 3 Ia na veika koya era na caka vi ikodou, ni ra sa yali ni kilai Tamaqu se koi au.
\v 4 Ia na veika koya ka'u sa tukunia vi ikodou, ka ni sa yacovia mai na gauna, dou na nanumia kinia ni'u a tukunia vi ikodou. Ka'u a yali ni tukunia e liu vi ikodou na veika koya, ena vuku ni'u a tiko vata kei ikodou.
\p
\v 5 Ia ka'u sa qai qai yani vi koya sa talai au mai; a sa yali mada ni tarogi au e dua vi ikodou, “o sa qai kivei?”
\v 6 Ia ni'u sa tukunia vi ikodou na veika koya, sa luvu ena rarawa na lomamdou.
\v 7 Ia ka'u sa tukunia vi ikodou na ka dina: E yaga vi ikodou me'u qai yani: ni na yali ni qai mai vi ikodou na Daunivivacegui; kevaka ka'u sa yali ni qai yani, ka'u na talai koya kivei ikodou.
\v 8 Ia ni sa qai mai ko koya, ena vatakilai voki vi ira na kai vuravura nai valavala ca, vata kei na ka dodonu, vata kei na lewa:
\v 9 Ai valavala ca, ni ra sa yali ni vabauti au:
\v 10 ki na ka dodonu, ni sa qai vi Tamaqu, ka dou sa yali ni raici au voki;
\v 11 kei na lewa, ni sa lewai na turaga ni vuravura koya.
\p
\v 12 Sa levu na ka sa vo me'u tukunia vi ikodou, ia dou sa yali ni rawatia ni kua.
\v 13 Ia ni sa qai mai ko koya na Yalo Tabu na vuni ka dina, ena tuberi ikodou kei na ka kece lia e dina: ni sa yali ni vosa vataki koya: ia na ka kece lia ena rogocia, ena vosatakia: ka na vatakilai vi kodou na veika ena yaco mai muri.
\v 14 Ena varokorokotaki au ko koya baletia ni na yadia na ka mai vi au na ka e noqu kei na nona tukunia vi ikodou.
\v 15 Sa noqu na ka kece lia sa nei Tamaqu: a ka koya ka'u a tukunia kinia ni na yadia ko koya na ka e noqu ka vatakilai vi ikodou.
\p
\v 16 Sa vo e lailai, dou na qai yali ni raici au; ka vo voki e lailai, dou na qai raici au; ka ni'u sa qai vi Tamaqu.”
\v 17 Ka so voki vi ira na nona tisaipeli era sa tukunia kinia vakai ira, A cava na ka koya sa tukunia vi ita ko koya, ‘Sa vo lia valailai na gauna, dou na qai yali ni raici au: ia ni oti valailai voki na gauna, dou na qai raici au, baletia ni'u sa qai vi Tamaqu’?”
\v 18 A ka koya era sa tukunia kinia, A cava na ka koya sa tukunia ko koya, ‘sa vo valailai na gauna?’ Eda sa yali ni kila na ka sa tukunia ko koya.
\p
\v 19 A sa kila ko Jisu ni ra sa via tarogi koya, sa qai tukunia vi ira,” “Dou sa vitarogi li ena ka'u sa tukunia, ‘Sa vo valailai na gauna, dou na qai yali ni raici au: ka vo voki valailai na gauna, dou na qai raici au’?
\v 20 E dina, e dina, au sa tukunia vi ikodou, Dou na tagi ka tagiyaso, ia ko vuravura ena reki: ena rarawa na lomamudou, ia na rarawa ni lomamudou ena vuki me reki.
\v 21 Ni sa taratara na yalewa sa rarawa, ena vuku ni sa yaco na nona siga: ia ni sa sucu na gone, sa yali ni nanumia voki na rarawa, e na vuku ni marau ni sa sucu mai edua na tamata ki vuravura.
\v 22 Ia sa qai rarawa na lomamudou: ia ka'u na raici ikodou voki, ena qai reki na lomamudou, a sa yali e dua na kovea na nomudou marau.
\v 23 Ia ena siga gona dou na yali ni tarogia vi au e dua na ka. E dina, e dina, au sa tukunia vi ikodou, A ka kece lia dou na kerea vi Tamaqu ena yacaqu, ena solia vi ikodou ko koya.
\v 24 Dou a yali ni kerea eliu e dua na ka ena yacaqu: dou kerekere lia, dou na qai rawatia, me levu sara na nomudou marau.
\p
\v 25 “Au a tukunia vi ikodou na veika koya e na vosa vatautauvata: ia sa na qai mai na gauna ka'u na yali voki ni vosa vi ikodou ena vosa vatautauvata, ka'u na vatakilai vamatata vi ikodou na veika nei Tamaqu.
\v 26 Ena siga gona dou na kerekere e na yacaqu; ia sa yali ni yaga me'u tukunia vi ikodou, ni'u na masuti Tamaqu ena vukumudou;
\v 27 baletia ni sa lomani ikodou na Tamaqu, ni dou sa lomani au, ka vadinatakia ni'u sa qai mai vua na Tamaqu.
\v 28 Au sa qai mai vi Tamaqu, ka qai mai ki vuravura: au sa daini vuravura voki, ka qai vi Tamaqu.
\p
\v 29 Sa tukunia vua ko ira na nona tisaipeli, “Raicia, ko sa qai vosa vamatata, ka yali ni vosatakia na vosa vatautauvata.
\v 30 Kitou sa qai kila koya ni ko nu sa kila na ka kece lia, ka yali ni yaga vua e dua na tamata me tarogi iko: na ka koya kitou sa vadinatia kinia ni ko sa qai mai vua na Kalou.”
\p
\v 31 Sa tukunia vi ira ko Jisu, Dou sa qai vabautia ne?”
\v 32 Raicia, sa qai mai na gauna, io, sa yaco mai, dou na dui tovoci kinia, a tamata yadua ki nona dui vale, ka dou na daini au me'u tiko dua loa lia: ia ka'u yali ni tiko dua loa lia, baletia ni kirau sa tiko vata ki Tamaqu.
\v 33 A veika koya ka'u sa tukunia vi ikodou, mo dou rawatia na vacegu ena vukuqu. Dou na kunea e vuravura na rarawa; ia mo dou vacegu; au sa vamalumalutakia na vuravura.”
\c 17
\cl Wase 17
\p
\v 1 Sa vosatakia na vosa koya ko Jisu, ka ta cake ki lomalagi, ka tukunia, I Tamaqu, sa yaco mai na gauna: varokorokotakia na Luvemu me varokorokotaki ikonu voki lia na Luvemu,
\v 2 me vaka ko ni sa solia vua me lewa vi ira na tamata kece lia, me solia ko koya na bula yali ni mudu vi ira yadua ko ni sa solia vua.
\v 3 Ia sai koya koya na bula yali ni mudu, me ra kilai ikonu na Kalou dina dua loa lia, ki Jisu Karisito ko koya ko ni a tala mai.
\v 4 Au sa varokorokotaki ikonu e vuravura: niu sa vaotia na cakacaka ko ni a solia mai vi au meu caka.
\v 5 Ia koya, Tamaqu, ni varokorokotaki au me daru tiko vata, ena varokoroko sa tu vi au ni daru a tiko vata ni sa yali ni caka ko vuravura.
\p
\v 6 Au sa vatakila na yacamuni vi ira na tamata ko ni sa solia mai vi au mai vuravura: era sa nomuni, ia ko ni sa soli ira mai vi au: a ra sa talairawarawa ki na nomuni vosa.
\v 7 Era sa qai kila sa qai mai vi ikonu na ka kece lia ko sa solia mai vi au:
\v 8 niu sa solia vi ira na vosa ko ni a solia mai vi au; a ra sa vabautia, ka kila dina niu sa qai mai vi ikonu, ka ra sa vadinatia ni ikonu a talai au mai.
\v 9 Au sa masulaki ira: au sa yali ni masulaki vuravura, ko ira lia ko sa solia mai vi au; ni ra sa nomuni.
\v 10 A sa nomuni na noqu ka kece, a sa noqu na nomuni ka kece; ia kau sa varokorokotaki ena vukudra.
\v 11 Ia kau na yali ni tiko e vuravura, ia ko ira koya, era sa tiko e vuravura, ia koi au, kau sa qai yani vi ikonu. Tamaqu yalododonu, maroroi ira ena yacamuni, ko ira ko ni a solia mai vi au, me ra dua loa lia me vataki kodrau.
\v 12 Niu a tiko vata ki ira e vuravura, au a daumaroroi ira ena yacamuni: ko ira ko ni sa solia mai vi au kau sa maroroya, a sa yali e dua vi ira, ko koya lia sa dodonu me rusa; me vayacori kinia nai Vola Tabu.
\p
\v 13 Au sa qai qai yani vi ikonu: ia na veika koya kau sa vosatakia e vuravura, me levu sara na nodra marau ena vukuqu.
\v 14 Au sa solia vi ira na nomuni vosa; a sa cati ira ko vuravura, ni ra sa yali ni vavuravura, me vaka kau sa yali ni vavuravura.
\v 15 Au sa yali ni masu mo ni yadi ira tani e vuravura, mo ni maroroi ira lia mai na vu-ni-ca.
\v 16 Era sa yali ni vavuravura, me vaka kau sa yali ni vavuravura.
\v 17 Vatabui ira ena nomuni vavuvuli dina: sa ka dina na nomuni vosa.
\v 18 Me vaka ko ni a talai au ki vuravura, au sa talai ira vaka voki lia kina ki vuravura,
\v 19 Ia kau sa vatabui au ena vukudra, me ra vatabui voki lia enai vavuvuli dina.
\p
\v 20 A kau sa yali ni masu ena vukudra lowa lia koya, ia e na vukudra voki lia era na vabauti au ena vuku ni nodra vosa:
\v 21 me ra dua loa kece lia; me vaka edaru sa dua loa, Tamaqu, me ra dua loa ki kodrau: me vadinatia ko vuravura ni ikonu sa talai au mai.
\v 22 Ia na varokoroko ko ni a solia mai vi au, kau sa solia vi ira; me ra dua loa, me vaka edaru sa dua loa:
\v 23 meu tu vi ira, ka mo ni tu vi au, me ra vayacoria sara me ra dua loa lia; ia me kila kinia ko vuravura ni ikonu sa talai au mai, ka ni ikonu sa lomani ira me vaka ko ni sa lomani au.
\p
\v 24 I Tamaqu, au sa vinakatia me ra tiko voki lia ki au ena vanua kau sa tiko kinia, ko ira ko ni sa solia vi au; me ra raicia na noqui ukuuku ko ni a solia mai vi au: ni ikonu a lomani au ni sa yali ni tekivu ko vuravura.
\p
\v 25 I Tamaqu yalododonu, sa yali ni kilai ikonu ko vuravura: ia kau sa kilai ikonu, a ra sa kila ko ira koya ni ikonu sa talai au mai.
\v 26 Ia kau sa vatakila vi ira na yacamuni, ia kau na vatakila tiko: me tu vi ira na loloma ko ni a lomani au kinia, meu tiko voki lia ki ira.
\c 18
\cl Wase 18
\p
\v 1 Ni sa vosatakia oti na veika koya ko Jisu, sa qai yani ko koya ki ira na nona tisaipeli ki tai kadua ni soniwai ko Kitironi, a sa dua kinia na were, a sa curu kinia ko koya vata ki ira na nona tisaipeli.
\p
\v 2 Ia ko Jutasa, ko koya sa soli koya yani, sa kila na tikinia: ni sa qai wasoma kinia ko Jisu vata ki ira na nona tisaipeli.
\v 3 Ia ni sa rawatia ko Jutasa na mata sotia ki na ovisa eso, mai vi ira na bete levu, ki ira na Farisi, sa yaco kinia, a ra sa yadia eso na tabucagi ki na cina ki na yaragi ni valu.
\v 4 Ia ni sa kila ko Jisu na ka kece lia ena yaco vi koya, sa qai yani, ka tukunia vi ira, Dou sa vaqarai cei?
\v 5 Era sa tukunia vua, “Ko Jisu na kai Nasareci.” Sa tukunia vi ira ko Jisu, “Koi au.” A sa tu vata kei ira na sotia ko Jutasa, ko koya sa soli koya yani.
\v 6 Ni sa qai tukunia vi ira ko koya, “Sai au,” era sa suka vanadaku, ka bale sobu ki na qele.
\v 7 Sa qai tarogia voki ko koya, “Dou sa vaqarai cei?” A ra sa tukunia, “Ko Jisu na kai Nasareci.”
\v 8 Sa tukunia ko Jisu, “Au sa tukunia oti vi ikodou ni sai au: ia kevaka dou sa vaqarai au, daini ira koya me ra qai tani.”
\v 9 Me vayacoria kinia na vosa sa tukunia ko koya, “Au sa yali ni vayalia e dua vi ira ko a solia mai vi au.”
\p
\v 10 Sa qai ucunia mai ko Saimoni Pita nai seleiwau sa tu vua, ka yavitia kinia na tamata ni bete levu, ka takia dai na daligana i matau. Na yaca ni tamata ko Maliko.
\v 11 Sa qai tukunia vi Pita ko Jisu, “Daramakia voki na nomui seleiwau ki na kena taga: a bilo sa solia mai vi au o Tamqu, ka'u na yali beka ni somia?”
\p
\v 12 Ko ira na matai valu, ki na kena turaga vata ki ira na nodra ovisa na kai Jutia, era sa qai tauri Jisu, ka vesukia,
\v 13 ka ra sa tuberia mada e liu vi Anasa; ni sa vugo i Kaiafa, ko koya sa bete levu e na yabaki gona.
\v 14 Ia ko Kaiafa koya, sai koya ka vavulici ira na kai Jutia, ni sa yaga me mate e dua na tamata ena vukudra na tamata.
\p
\v 15 A rau sa muri Jisu, ko Saimoni Pita ka dua voki na tisaipeli: a sa kilai na tisaipeli ko ya vua na bete levu, a rau sa curu vata kei Jisu ki na vale ni bete levu.
\v 16 A sa tu etautuba ko Pita ka voleka ki na darava. Sa qai curu yani na tisaipeli ka dua, ko koya sa kilai vua na bete levu, a sa vosa vua na yalewa sa vatawa na darava, a sa vacurumi Pita.
\v 17 Sa qai tukunia vi Pita na vada sa vatawa na darava, “Ko iko voki lia na tisaipeli ni tamata koya?” Sa tukunia ko koya, “Oi au e segai.”
\v 18 A sa tu mai kinia ko ira sa dauviqaravi ki ira na ovisa, a ra sa vawaqa na buka; ni sa liliwa: a ra sa vakatakata; a sa tu vata ki ira ko Pita, ka vakatakatari koya tiko.
\p
\v 19 Sa qai tarogi Jisu na bete levu ena vukudra na nona tisaipeli, ena nonai vavuvuli voki lia.
\v 20 Sa tukunia vua ko Jisu, Au a vosa votu ki vuravura; au a vavuvuli tiko lia ena vivalenilotu vata ki na vale ni soro, era sa dau qai kinia ko ira kece na kai Jutia; ia kau sa yali ni tukunia vuni e dua na ka.
\v 21 A cava ko sa tarogi au kinia? Tarogi ira era sa daurogocia, se cava kau a tukunia vi ira: raicia, era sa kila na ka kau a dautukunia.
\v 22 A ni sa vosa oti vakoya ko koya, e dua vi ira na ovisa sa tu voleka, sa sabici Jisu ena ligana, ka tukunia, Ko sa vosa vacava vakoya vua na bete levu?
\v 23 Sa tukunia vua ko Jisu, Kevaka kau sa vosa vaca, vatakila na kena ca: ia kevaka e vinaka, ko sa sabici au ena vuku ni cava?
\v 24 Ia ko Anasa sa talai koya, ni sa vesu tu, vi Kaiafa na bete levu.
\p
\v 25 Ia sa tu ko Saimoni Pita, ka tatalai. Era sa qai tukunia vua, Ko iko beka voki lia sa dua vi ira na nona tisaipeli? Sa cakitakia ko koya, ka tukunia, Oi au e yali.
\v 26 E dua vi ira na tamata ni bete levu, a weka i koya sa takia dai na daligana ko Pita, sa tukunia, Au a yali beka ni raici kodrau vata kaya e na were?
\v 27 Sa qai cakitakia voki ko Pita; a sa tagi sara na toa.
\p
\v 28 Era sa qai yadii Jisu tani mai vi Kaiafa ki na vale ni vilewai; a sa savulaci caca; ia ko ira era sa yali ni curu ki na vale ni vilewai, me ra kakua ni vadukadukalitakia, ka me ra caka na kana vata ni qa-sivia.
\v 29 Sa qai curu yani vi ira ko Pailato, ka tukunia, A cava na ka ca dou sa bitaka vua na tamata koya?
\v 30 Era sa vosa ka tukunia vua, Kevaka sa yali ni tamata ca ko koya koya, kitou sa yali ni soli koya yani vi iko.
\v 31 Sa qai tukunia vi ira ko Pailato, Dou yadi koya, ka lewai koya me vaka na nomudou lawa. O koya era sa tukunia kinia vua ko ira na kai Jutia, E yali ni tara vi kimamu me vamatea e dua na tamata:
\v 32 me vayacoria kinia na vosa ka tukunia ko Jisu, ni sa vatakila nai valavala ni mate ena mate kinia.
\p
\v 33 Sa qai curu voki ki na vale ni vilewai ko Pailato, ka kacivi Jisu, ka tukunia vua, O iko na nodra Tui na kai Jutia, se yali?
\v 34 Sa tukunia vua ko Jisu, Ko sa vosatakia li na ka koya vataki iko, se sa tukuni au vakoya vi iko ko ira na tani?
\v 35 Sa tukunia ko Pailato, Oi au beka na kai Jutia? Ko ira na kai nomu ki ira na bete levu, era sa soli iko mai vi au: a cava ko a caka?
\v 36 Sa tukunia ko Jisu, Sa yali ni vavuravura na noqu matanitu: kevaka sa vavuravura na noqu matanitu, era na qai vala na noqu tamata, meu kakua ni soli yani vi ira na kai Jutia: ia koya, sa yali ni vu eke na noqu matanitu.
\v 37 Sa qai tukunia vua ko Pailato, Ko iko bagi na tui? Sa tukunia ko Jisu, Ko sa tukunia niu sa tui. A ka koya kau sa sucu mai kinia, ia na ka koya kau sa qai mai kinia ki vuravura koya, meu dau tukunia na ka dina. O koya yadua sa vabautia na ka dina, sa rogocia na noqu vosa.
\v 38 Sa tukunia vua ko Pailato, A cava na ka dina? Ia ni sa vosa oti vakoya, sa curu voki yani vi ira na kai Jutia, ka tukunia vi ira, Au sa yali ni raicia vua e dua nai valavala ca:
\v 39 ia sa dua na nomudoui valavala, meu serekia e dua vi ikodou ena kana vata ni qai-sivia: dou sa vinakatia kinia, se yali, meu serekia vi ikodou na nodra Tui na kai Jutia?
\v 40 Era sa qai qoqolou voki, ka tukunia, Me kakua lia na tamata koya, ko Parapa lia. Ia na daubutako ko Parapa.
\c 19
\cl Wase 19
\p
\v 1 A sa yadi Jisu ko Pailato ka vakanakuitatakia.
\v 2 A sa talia e dua nai sala wa-vavotona ko ira na sotia, ka vaisalataki koya kinia, a ra sa vasulumi ira ena dua nai sulu lokaloka,
\v 3 ka tukunia, “Sa loloma, na nodra Tui na kai Jutia,” ka sabici ira ena ligadra.
\p
\v 4 Sa qai curu voki yani ko Pailato, ka tukunia vi ira, “Raicia, au sa yadi koya mai vi ikodou, mo dou kila ni'u sa yali ni raicia e dua nai valavala ca vi ira.
\v 5 Sa qai curu yani ko Jisu, sa vaisala tu enai sala wa-vavotona, ka vaisulu enai sulu lokaloka. A sa tukunia vi ira ko Pailato, “Raicia, Sa tu koya o koya.”
\p
\v 6 Ni ra sa qai raici Jisu ko ira na bete levu ki ira na ovisa, era sa qoqolou ka tukunia, “Vakotia ki na kauveilatai, vakotia ki na kauveilatai. Sa tukunia vi ira ko Pailato, “Dou yadi koya ka vakotia ki na kauveilatai: ni'u sa yali ni raicia vi ira e dua nai valavala ca.”
\v 7 Ko ira na kai Jutia era sa tukunia vua, “Sa dua na nimamu vunau, me mate ko koya, ni sa tukunia ni sa Luve ni Kalou.”
\p
\v 8 Ni sa qai rogocia na vosa koya ko Pailato, sa levu cake kinia na nona rerevakia;
\v 9 a sa curu voki ki na vale ni vilewai, ka tukunia vi Jisu, “O sa qai mai vi?” Ia sa yali ni saumia ko Jisu.
\v 10 Sa qai tukunia vua ko Pailato, O sa yali li ni vosa mai vi au? Ko sa yali beka ni kila ni'u sa rawatia me'u vakoti iko ki na kauveilatai, ka'u sa rawatia voki lia me'u sereki iko?”
\q
\v 11 Sa tukunia ko Jisu, “Ko sa yali ni rawatia e dua na ka vi au, kevaka sa yali ni soli vi iko mai cake: a ka koya sa levu cake kinia na nonai valavala ca sa soli au yani vi iko.”
\p
\v 12 Sa qai vatovolea tiko ko Pailato me sereki Jisu, ia ko ira na kai Jutia, era sa qoqolou, ka tukunia, “Kevaka ko sa sereki koya, ko sa yali ni totaki Sisa: ko koya yadua sa tukunia me tui, sa vosa saqati Sisa.”
\p
\v 13 Ni sa qai rogocia na vosa koya ko Pailato, sa yadi Jisu yani, ka tiko sobu e nai tikotiko ni vilewai ena tikinia sa vatokai Na Raravatu, ia ena vosa va-Iperiu, ko Kapaca.”
\p
\v 14 A siga koya nai Varau ki na kana vata ni qai-sivia, ia sa kenai ka ono ni aua: a sa tukunia vi ira na kai Jutia ko koya, “Raicia, koya na nomudou Tui!”
\p
\v 15 A ra sa qoqolou, “Yadia tani, yadia tani, vakotia ki na kauveilatai.” Sa tukunia vi ira ko Pailato, “Me'u vakotia li ki na kauveilatai na nomudou Tui?” Ko ira na bete levu era sa tukunia, “Sa yali ni nimamu tui, ko Sisa dua loa lia.
\p
\v 16 Sa qai soli koya yani vi ira ko koya me vakoti ki na kauveilatai.
\p
\v 17 A sa colatia na nona kauveilatai ko koya, ka qai yani ki na tikinia sa vatokai “Na vanua ni qavokavoka,” sa vatokai ena vosa va-Iperiu, ko “Kolikoca.”
\v 18 A ra sa vakoti koya mai kinia ki na kauveilatai, ka lewe rua voki lia, e dua vaka, ka dua vaka, ki Jisu ena kodrau maliwa.
\p
\v 19 A sa dua nai vatakilakila sa vola ko Pailato, ka sa toka e cake ena kauveilatai. Sai koya koya na kenai vola, KO JISU NA KAI NASARECI NA NODRA TUI NA KAI JUTIA.
\v 20 A ra sa lewe levu na kai Jutia era sa wilikia nai vatakilakila koya: ni sa voleka ki na koro na tikinia sa vakoti kinia ki na kauveilatai ko Jisu: a sa volai tu ena vosa va-Iperiu, vata ki na vosa va-Kirisi vata ki na vosa va-Roma.
\p
\v 21 Era sa qai tukunia vi Pailato ko ira na nodra bete levu na kai Jutia, “Kakua ni vola, ‘A nodra Tui na kai Jutia;’ ia ni sa tukunia ko koya, ‘Oi au na nodra Tui na kai Jutia.’”
\p
\v 22 Sa tukunia ko Pailato, A ka ka'u sa vola, ka'u sa vola.
\p
\v 23 Ia ko ira na sotia, ni ra sa vakoti Jisu ki na kauveilatai, era sa yadia na nonai sulu, ka wasea vava, me ra tauyadua na tikina ko ira na sotia; nai tutuvi voki lia; ia ka sa yali ni bau cula na nonai tutuvi, sa tali taucoko mai na tikinia e colo ka yadia ki ra.
\v 24 O koya era sa vitukuniakia kinia, “Me da kakua ni dresukia, ia me da vawiri madigitakia se na nei cei: me vayacoria kinia nai Vola Tabu, o koya sa tukunia, “Era sa vota na noqui sulu, Ia na noqui tutuvi era vawiri madigi kinia. Ko ira na sotia, era sa caka na veika koya.”
\p
\v 25 Ia sa tu voleka ki na kauveilatai i Jisu na tinana vata ki na taci i tinana, ko Meri na wati Kilopa vata ki Meri na yalewa ni Makitala.
\v 26 Ni sa qai raici rau ko Jisu, na tinana vata ki na tisaipeli ka tu volekatia, ko koya sa lomana ko koya, sa tukunia vi tinana, “Yalewa, raicia na luvemu!”
\q
\v 27 Sa qai tukunia vua na tisaipeli, “Raicia na tinamu!” Ia mai na tiki-ni-siga ko ya sa yadi ko ya na tisaipeli ko ya ki nona vale.
\p
\v 28 Ni sa oti koya, ka sa kila ko Jisu sa oti na ka kece lia, me vayacoria kinia nai Vola Tabu, sa tukunia, “Au sa via somi.”
\v 29 Ia ka tu e dua na bilo sa sinai ena wai wiwi; a ra sa vasuasuatakia e dua na vutovuto ena wai wiwi ka ciqiria kinia e dua na taba ni isopi, ka vayadia ki na gusuna.
\v 30 Ni sa qai somia na wai wiwi ko Jisu, sa tukunia, “Sa oti.” A sa vacuva na uluna ka solia yani na yalona.
\p
\v 31 Ia ko ira na kai Jutia, era sa masuti Pailato me musuki na yavadratou ka me ratou yadi tani, e na vuku ni sa siga Varau, me kakua ni rube tu na yagodratou ena kauveilatai ena siga ni vacecegu, (ni sa uasivi na siga ni vacecegu ko ya.)
\v 32 Sa qai qai ko ira na sotia, ka musukia na yavana nai kadua, a yavana voki lia na kenai karua, eratou a vakoti vata kaya ki na kauveilatai.
\v 33 Ia ni ratou sa qai mai vi Jisu, ka raicia sa mate tu, era sa yali ni musukia na yavadra
\v 34 Ia, sa suakia na sarisarina e dua na sotia ena dua na moto, a sa dave sara mai kinia na dra ki na wai.
\v 35 Ia ko koya ka raicia sa tukunia, a sa dina na nonai tukutuku: a sa kila ko koya ni sa vosa dina, mo dou vabautia.
\p
\v 36 Ni sa caka na veika koya, me vayacoria kinia nai Vola Tabu, Me kakua ni musuki e dua na suina.
\v 37 Ia e dua voki na tiki ni Vola Tabu, sa tukunia, “Era na raici koya era sa suakia.”
\p
\v 38 Ia ni sa oti na veika koya, sa masuti Pailato ko Josefa, na kai Arimacea, a tisaipeli i Jisu, ia ka vuni lia ni sa rerevaki ira na kai Jutia, me yadia tani ko koya na yago i Jisu: a sa vatara ko Pailato. Sa qai qai ko koya, ka yadia tani na yago i Jisu.
\v 39 A sa qai vokilia mai ko Nikotimo, ko koya sa qai eliu vei Jisu e na bogi, a sa yadia mai na mura sa viwaki vata kei na yasiyasi, e dua na drauni paudi.
\v 40 Erau sa qai yadia na yago i Jisu, ka solega vata enai sole lineni eso kei na ka boi vinaka, me vaka nai valavala ni nodra veibulu na kai Jutia.
\v 41 Ia ena vanua sa vakoti kinia ko koya; sa tiko volekatia e dua na were, na were koya sa tiko kinia e dua nai bulubulu vou ka se yali ni dua na tamata e bulu kinia.
\v 42 Erau sa qai buluti Jisu kinia, ni sa nodra siga Vakarau na kai Jutia; (ka ni sa volekatia nai bulubulu.)
\c 20
\cl Wase 20
\p
\v 1 Ia enai matai ni siga ni wiki, sa qai mai ko Meri na yalewa ni Makitala e na savulaci caca, ni sa butobuto tu, ki nai bulubulu, ka raicia ni sa yadi tani na vatu mai nai bulubulu.
\v 2 Sa qai cici ko koya sa lomana ko Jisu ka tukunia vi rau, “Era sa yadia tani na Turaga mai nai bulubulu, ia kitou sa yali ni kila na tikinia era sa vakotori koya kinia.”
\p
\v 3 Erau sa qai qai yani ko Pita, ki na tisaipeli kadua, a rau sa qai ki nai bulubulu.
\v 4 A rau sa cici vata ruarua: a sa sivi Pita na tisaipeli kadua, ka sa liu ki nai bulubulu.
\v 5 A sa cuva sobu ko koya, ka sa rai ki loma; ka raicia nai sole lineni sa no: ia a yali curu ki loma ko koya.
\p
\v 6 Sa qai muri mai ko Saimoni Pita, ka curu ki nai bulubulu, ka raicia nai sole lineni sa koto,
\v 7 ki nai tavoi sa viviraki ena uluna, ia sa yali ni koto vata ki nai sole lineni, sa lobi dua loa lia koto ena dua na tikinia vaikoya.
\v 8 A sa qai curu voki lia na tisaipeli kadua, ko koya sa liu ki nai bulubulu, a sa raicia ko koya, ka vabautia.
\v 9 A rau sa yali lia ni kila nai Vola Tabu, ni sa dodonu me tu cake voki mai na mate ko koya,
\v 10 Oi rau na tisaipeli erau sa qai qai voki ki nodrau vale.
\v 11 Ia sa tu ko Meri e tautuba ni bulubulu, ka tagi: ia ni sa tagi tiko, sa cuva sobu ka rai ki loma ni bulubulu:
\v 12 a sa raicia e lewe rua na agilose enai sulu vulavula, a rau sa tiko, e dua ki uluna, ka dua ki yavana, ena tikinia ka koto kinia na yago i Jisu. A rau sa tukunia vua,
\v 13 “Yalewa, ko sa tagi ena vukuni cava?” Sa tukunia vi rau ko koya, “Ena vuku ni ra sa yadia tani na noqu Turaga, ia kau sa yali ni kila na tikinia era sa vakotori koya kinia.”
\v 14 Ni sa qai vosa vakoya, sa vuki vanadaku, ka raici Jisu ni sa tu, ia sa yali ni kila ni sai Jisu.
\q
\v 15 Sa tukunia vua ko Jisu, “Yalewa, ko sa tagi ena vuku ni cava? Ko ci ko sa vaqara? Sa nanumia ko koya ni sai vatau-ni-were, a sa tukunia vua, Kevaka ko sa yadi koya tani, tukunuia beka vi au na tikinia ko sa vakotori koya kinia, ka'u na qai laki yadi koya tani.”
\p
\v 16 Sa tukunia vua ko Jisu, “I Meri!” Sa vuki ko koya, ka tukunia ua, Raponai! (A kenai balebale, Vavuvuli)
\v 17 Sa tukunia vua ko Jisu, “Kakua ni tarai au; ni'u se bera ni qai cake vi Tamaqu; ia mo qai vi ira na wekaqu, ka tukunia vi ira, Au sa qai cake vi koya sa Tamaqu, ka Tamamudou; vi koya sa noqu Kalou, ka nomudou Kalou.”
\q
\v 18 Sa qai yani ko Meri na yalewa ni Makitala, ka tukunia vi ira na tisaipeli “Au sa raicia na Turaga,” ka sa tukunia vi koya na ka kece koya.
\p
\v 19 Ena raiyavi ni siga gona, enai matai ni siga ni wiki, sa sogo tu na darava ni vale, era a soqoni vata tiko kinia na tisaipeli, ni ra sa rerevaki ira na na kai Jutia, sa curu mai ko Jisu ka tu ena kedra maliwa, ka tukunia vi ira, “Dou vacegu.”
\v 20 Ia ni sa vosatakia vakoya, sa varaitakia vi ira na ligana ki na sarisarina. A ra sa rekitakia na tisaipeli, ni ra sa raicia na Turaga.
\p
\v 21 Sa qai tukunia voki vi ira ko Jisu, “Dou vacegu: me vaka sa talai au mai ko Tamaqu, au sa talai ikodou vaka voki lia kinia.
\v 22 Ia ni sa vosa vakoya ko koya, sa ceguvi ira, ka tukunia, “Me curumi ikodou na Yalo Tabu:
\v 23 nai valavala ca ni tamata yadua dou sa bokocia, ena bokoci: nai valavala ca ni tamata yadua dou sa yali ni serekia, ena yali ni sereki.”
\p
\v 24 A sa dua vi ira na lewe tinikarua, ko Tomasi, sa vatokai ko Titimo, sa yali ni tiko vata ki ira ni sa qai mai ko Jisu:
\v 25 Ko iratou na tisaipeli sa tukunia vua, “Kitou a raicia na Turaga.” A sa tukunia vi ira ko koya, “Kevaka ka'u na yali ni raicia na we ni vako, ka daramakia na ligaqu ki na sarisarina, au na yali ni vabautia.
\p
\v 26 Ni oti e bogi walu, eratou sa tiko voki e loma ni vale na tisaipeli vata ki Tomasi, ka sa curu mai ko Jisu ni a sogo tu na darava, ka tu e na kedra maliwa, ka tukunia, “Dou vacegu.”
\q
\v 27 Sa qai tukunia vi Tomasi, “Dodokia mai na nomui qaqalo, ka raicia na ligaqu: ia dodokia na ligamu ka daramakia ki na sarisariqu: ia mo kakua ni vatitiqatakia, mo vabautia lia.
\q
\v 28 A sa vosa ko Tomasi, ka tukunia vi ira, “Noqu Turaga, ka noqu Kalou!”
\q
\v 29 Sa tukunia vua ko Jisu, “Ni ko sa raici au, Tomasi, ko sa vabautia: sa kalougata ko ira era sa yali ni raicia, ka ra sa vabautia.”
\p
\v 30 A sa levu voki na cakacaka-mana sa caka dina ko Jisu ena matadra na nona tisaipeli, a ra sa yali ni volai enai vola koya:
\v 31 ia sai koya, mo dou vabautia ni sa Karisito ko Jisu, na Luve ni Kalou; ia mo dou rawatia na bula ena yacana, ni dou sa vabautia.
\c 21
\cl Wase 21
\p
\v 1 Sa oti na veika koya, sa varaitaki koya voki ko Jisu vi iratou na tisaipeli mai na wai mai Taiperia: ia ka varaitaki koya vakoya:
\v 2 Eratou sa tiko vata ko Saimoni Pita vata ki Tomasi, sa vatokai ko Titimo, vata kei Nacanieli na kai Kena e Kalili vata ki rau na luvei Sepete, ka lewe rua voki na nona tisaipeli.
\v 3 Sa tukunia vi iratou ko Saimoni Pita, “Au sa qai ki qoli.” Eratou sa tukunia kece vua, “Kitou na qai ki voki lia ki iko.” Eratou sa qai yani, ka vodokia sara na waqa; a sa yali rawa e dua ena bogi gona.
\p
\v 4 Ia ni savulaci mai, sa tu mai matasawa ko Jisu; ia sa yali ni kila ko ira na tisaipeli ni sai Jisu.
\q
\v 5 Sa qai tukunia vi ira ko Jisu, Ragone, “sa tu vi ikodou na kakana, se yali?” Era sa tukunia vi ira, “Sa yali.”
\q
\v 6 A sa tukunia vi ira ko koya, “Dou kolotakia na lawa ki nai matau ni waqa, ka dou na kunea kinia.” Era sa qai kolotakia, a ra sa yali ni yavitia rawa, ni sa ka levu sara na ika.
\v 7 A ka koya sa tukunia kinia vi Pita na tisaipeli koya ka lomana ko Jisu, “Na Turaga bagi koya.” Ni sa rogocia ko Saimoni Pita ni sai koya na Turaga, sa vasulumi koya ena nonai curucuru vagonedau, (ni sa luvawale,) a sa rika ki wai.
\v 8 Ia ko ira na tisaipeli tani, era sa soko ena waqa lailai; (ni sa yali ni yawa na vanua, me vaka lia na katu limasagavulu,) a ra sa yaratakia na lawa sa sinai e na ika.
\v 9 Ia, ni ra sa qai sobu ki vanua, era sa raicia sa tu na qilaiso sa waqa tu, ki na ika sa tu kinia vata ki na madrai.
\p
\v 10 Sa tukunia vi ira ko Jisu, “Yadia mai eso na ika dou sa qai rawatia.
\v 11 Sa qai cake ko Saimoni Pita ka yavitia na lawa ki vanua sa sinai ena ika lelevu, e dua na drau limasagavulu ka mani tolu; ia ni sa ka levu vakoya, sa yali ni kabasu na lawa.
\p
\v 12 Sa tukunia vi ira ko Jisu, “Dou mai katalau.” Ia sa yali e dua vi ira na tisaipeli sa doudou me tarogia, “O cei koi ikonu?” ni ra sa kila sai koya na Turaga.
\v 13 Sa qai qai mai ko Jisu, ka tauria na madrai ki na ika voki lia, ka solia vi ira.
\v 14 Sai koya koya na kenai ka tolu ni gauna sa varaitaki ira kinia ko Jisu vi ira na nona tisaipeli, ni sa tucake voki mai na mate.
\p
\v 15 Ni ra sa katalau oti, sa tukunia vi Saimoni Pita ko Jisu, Saimoni, na luvei Jona, ko sa lomani au valevu, ka valailai ko iratou koya, se yali?” Sa tukunia vua ko koya, “Io na Turaga; ko nu sa kila ni'u sa lomani ikonu. Sa tukunia vua ko ira, “Vakani ira na noqu lami.
\p
\v 16 Sa tukunia voki varua vi koya, Saimoni, na luve i Jona, ko sa lomani au, se yali? Sa tukunia vi ira ko koya, “Io na Turaga; ko ni sa kila ni'u sa lomani ikonu. Sa tukunia vua ko ira, “Vatawana na noqu sipi.”
\p
\v 17 A sa tukunia vatolu vua, “Saimoni, na luve i Jona, ko sa lomani au, se yali? Sa rarawa na loma i Pita ni sa tukunia vatolu vua ko koya, “O sa lomani au, se yali?” A sa tukunia vi ira, “Ikonu na Turaga, ko nu sa kila na ka kece lia; ko ni sa kila ni'u sa lomani ikonu.” Sa tukunia vua ko Jisu, “Vakani ira na noqu sipi.”
\p
\v 18 E dina, e dina, au sa tukunia vi iko, Ni ko a gone, ko a dauvauci iko, ka qai vavitalia voli lia; ia ni ko sa qase mai, ko na dodokia na ligamu, ka na vauci iko e dua tani, ka yadi iko ki na tikinia ko na yali ni vinakatia.”
\v 19 Ia sa vosa vakoya ko koya, me vatakila na mate ena varokorokotakia kinia na Kalou ko koya. Ia ni sa vosa oti vakoya, a ra sa tukunia vi Pita, “Muri au.”
\p
\v 20 Sa qai vuki ko Pita, ka raicia na tisaipeli sa lomana ko Jisu, ni sa muri tiko, ko koya sa vararavi voki lia ki na lomaserena enai varaiyavi, ka tukunia, “Ikonu na Turaga, ko cei ko koya ena soli iko yani?”
\v 21 Ni sa raici koya ko Pita, sa tukunia vi Jisu, “Na Turaga, na cava ena caka na tamata koya?”
\p
\v 22 Sa tukunia vua ko Jisu, “Kevaka ka'u na vinakatia me bula tiko lia me yacovia na gauna ka'u na qai voki mai kinia, a cava koya vi iko? Ko iko, mo muri au.”
\v 23 Sa qai rogo yani vi ira na viwekani na vosa koya, ni na yali ni mate na tisaipeli ko ya: ia ka yali ni tukunia vua ko Jisu vi Pita, ni na yali ni mate na tisaipeli gona, ia sa tukunia lia, “Kevaka ka'u vinakatia me bula tiko lia ko koya ka yacovia na siga ka'u na qai voki mai kinia, a cava koya vi iko?”
\p
\v 24 Sai koya koya na tisaipeli sa tukunia na ka kece koya, ka vola na veika koya: ia eda sa kila sa dina na nonai tukutuku.
\p
\v 25 Sa levu voki lia na ka sa caka ko Jisu, ia kevaka sa volai kece lia, au sa vabautia ni na oso ko vuravura ena vivola e volai. Emeni.