lky_reg/42-MRK.usfm

\id MRK
\ide UTF-8
\h Marko
\toc1 Marko
\toc2 Marko
\toc3 mrk
\mt Marko
\c 1
\cl Ebwayit 1
\p
\v 1 Aculwe na n’evanjelio no Yesu Kristo, Olonyi l’Ojok.
\p
\v 2 Iring negerorik inyong ohocoroni Isaia: “Otiha, nang lasulak ohifak hindang dihithemi h’ahomong nahoi, inyong loindu de ihuhuhumyo oyihoi lohoi.
\q
\v 3 Omurut l’othulo loikor ditha hofara, dihuhumyo oyihoi l’Ohobu; dihuhumyo oyihothik honyong hobis.”
\p
\v 4 Yoanne aindu, dibuhyo batisimo naburunu karik namiehina n’eyatha ditha hofara.
\v 5 Amiji fodok no Judea karik ohothing bukulung ho Yerusalem afwoi donynong. Abuhok inyong dosong batisimo, ewahai eyatha hasong ditha owor lo Jordano.
\v 6 Iyofo nya Yoanne abongo n’ohofir karik erohit di mukok n’amuhunyong n’akonikoni, karik anyo ebeye karik aiso nalofye ditha hofara.
\p
\v 7 Etyenio oisukaitha hoyyu, thajaran, “oindu de di put honang othulo loko thonang, laang ocohi donang alahyo ahafi h’ahamuha hanyong.
\v 8 Abuhok nang batisimo dothai th’ahari, ti, oindu de le ibuhohina ithai batisimo th’Ohoile thol’Odwa.”
\p
\v 9 Afuhi arami d’operok hule ahana: aindu Yesu tho Nazarete di Galilea ara Yoanne abuhok inyong batisimo ditha h’owor lo Jordano.
\v 10 Ainduna no Yesu adi thath’ahari, atehu inyong paradiso angai karik inyong dang atehu Ohoile ainduna dihap dihu honyong iring ayoro.
\v 11 Omurut aindu thohide, “Iye oitho hindang lamuno nang; amuno nang bebe hohoi.”
\p
\v 12 Thiya Ohoile eringak inyong thoilo ditha h’ohidyefo.
\v 13 Esuka di hidyefo operok athomone arangwan, ahibu Sitan inyong othemyo. Esuka h’ecangi, ahibu anjelohio igyema donyong.
\p
\v 14 Thene, endefa no Yoanne, Yesu aindu di Galilea dinyahina evanjelio n’Ojok.
\v 15 Ajyo, “Acohini omiru karik anyiha ohobye lothohide. Oburunethek ara ithai iruk evanjelio.”
\p
\v 16 Adaha nya nanyong diker h’ahari no Galilea, atehu Yesu Simone karik Andrea, lolai ho Simone, omirye abwoyino dith’ahari; isong hulo nya ohoyapohak h’ohom.
\v 17 Yesu ajyo dosong, “Ifuna, othifunethek nang; esarak nang ithai de thoiwona ara ohoyapohak h’ohothing.”
\v 18 Thiya, edyaharu isong hulo abwoyino kwak, athiforoi inyong.
\v 19 Aden no Yesu ahithemi tiibai, atehu Yacobo, lolonyi ho Zebedeo karik Yoanne olai lonyong; orifiyo nya isong hulo abwoyino dihide h’aroko.
\v 20 Elongo inyong lo isong, edehini omonye losong Zebedeo dith’aroko h’ohoigyemak hadumai, athiforoi inyong.
\p
\v 21 Orii tiibai ahani, afuni di Kapernaum; ofaning le, Oithacofe l’esabit. Yesu ajinga ditha Sinagogue, etyenio.
\v 22 Afalanga ohothing etyenio nanyong, anyo, ityenio inyong lo isong iring othulo lowon h’akolon n’endafaitho n’ohothing, ikara iring ohoigerok.
\v 23 Othulo ditha Sinagogue nasong ne lowon h’ohoile loibot ekor, omorut dihide,
\v 24 ajyo hijaran, “Ainyong ihandyerek ohoi iye, Yesu la Nazareth? Iindu iye dittohoro ohoi? Atek nang iye ngai. Iye Aboithe Lodwa l’Ojok!”
\p
\v 25 Yesu emimingak ohoile lomonyong ajyo, “Odularu, ara iye iindu adi th’othulo lya!”
\v 26 Ohoile loibot amirok othulo lya dihap, alo adi thothonyong; alo adi ahibu inyong ikokororo omurut dihide bebe.
\v 27 Afalanga ohothing bukulung, efifyai ahwandek hijaran, “Ainyong na? Etyenio angejuk th’akolon! Eringyo juk ohoilehio homonyong, eruhi isong hulo arami hanyong.
\v 28 Asayo hanyong afwoi d’amasok fodok ditha h’ahap no Galilea.
\p
\v 29 Ajinguna nasong adi tho Sinagogue, afuni dihang ho Simone karik Andrea, isong ha Yakobo karik Yoanne.
\v 30 D’orii lya ne, orimak nahamone ho Petro oferi, odiha h’ethor n’ahu. Isong hulo anyahini do Yesu adiha nanyong.
\v 31 Thiya inyong lo aindu, eduhu ahinang nanyong, adohu inyong dihide; ethor n’ahu edehi inyong. Inyong na aculuyo alwahyo isong.
\p
\v 32 Athari nya, diholu h’alumon n’oholong, eyanai donyong ohothing fodok honya odiha karik howoni h’ohoilehio homonyori.
\v 33 Asuduha abore fodok dihuthuk h’oyihet.
\v 34 Ethayijyo ohothing holwa hodiha opeceni h’adihathik hama hama, angaterek oho ilehio homonyong adi, ti, kabong ohorik ohoilehio homonyong to camai, anyo, otehi isong hulo inyong.
\p
\v 35 Ahenyu inyong lo berien, hoiriok ahap, alo inden d’amaji n’esuritha, amojyo diya.
\v 36 Simone karik ohothing honya owoni honyong, athifeyo inyong.
\v 37 Arimahini isong hulo inyong, ajyori donyong, “Ohothing fodok, abok abok hothifeyo iye.”
\p
\v 38 Ara inyong ajyo, “Hafatha adi d’amaji naboling, nathatha h’abothok haindek hune, dalo nang inyahina arami hayyu diya; inyong haindunerek nang thenene hini.”
\v 39 Alo atha no Galilea fodok, dinyahina arami hayyu di Synagohio hosong karik dingaterek ohoilehio homonyong adi.
\p
\v 40 Aindu otthulo l’athalulu donyong. Amojyo donyong, arigongo dihap, ajyo donyong, “Ara iwak iye, ocohi dohoi dithaliboryo nang.”
\p
\v 41 Amiehunu nanyong ahani, Yesu athin inyong lo th’ahinang, ajyo donyong, “Awak nang. Oliboro.”
\v 42 Kwak ahani, attalulu edehi inyong, alibo.
\v 43 Yesu ethahongok inyong thaang ocamai, asulak inyong adi.
\v 44 Ajyo donyong, “Oteha tuhudik di aangan inyahina aning nabo d’othulo loboling, ti, ilo ithaithak ahwan nahoi do fadiri, isarak esorio nahoi d’ethaliborio nahoi iring efahak Musa, iring anyahina dosong.”
\v 45 Ti, alo inyong lo dindak; alo ibocoro aculuyo anyahina arami hune dindak, iring owak inyong, ethathurok ocame, lwai Yesu aangan ajingara dith’abore oleyoroi, ti, esuka dith’amasok halama. Ti, orasa ohothing afuna donyong, th’amasok bukulung.
\c 2
\cl Ebwayit 2
\p
\v 1 Anyahuna no Yesu di Kapernaum diholu h’operok tiibai, ethaningunu hijan inyong lo lodi hang.
\v 2 Afuni donyong ohothing olwarai, aangarik amaji, lwai dihuthuk h’oyihet; inyong lo anyahi dosong ocame.
\v 3 Thiya, ohothing arangwan eyanu donyong othulo laye arobokang.
\v 4 Aangan n’elulung ahorihina isong afuna indehai do Yesu, alahanye efithe tholohu ho Yesu, ethacurohini othulo lodiha lya th’ofyel lothoferorik dihithmi ho Yesu dithwa.
\v 5 Atehuna eruhon nasong, Yesu ajyo d’othulo laye arakang lya, “Olonyi, ahohini eyatha hahoi.”
\p
\v 6 Diyan, ohoigerok howoni d’amaji nya, egigiloi dithaja hosong,
\v 7 “Angai ocama othulo lya ahani? Ipitha! Ngai ocohi amiehina eyatha, arahari Ojok hamaring?”
\p
\v 8 Kwak Yesu atek di hoile honyong, ainyong igiglo isong dihwandek hosong. Ajyo dosong, “Anyo igigilo ithai ahani dithaja hothai?
\v 9 Nani ilik, ajaran d’othulo laye arabokang lya, ‘Ahoini eyatha hahoi,’ dia ajaran, ‘Odothoi, iduhu ejoothit nahoi, odahai’?
\v 10 Ti, ditek ithai hijan owon Olonyi l’Othulo h’akolon dihap di hohina eyatha, ajyo inyong lo d’othulo laye arabokang lya,
\v 11 ”Ajyo nang dohoi, odothoi, iduhu ejoothit, ilo di hang hohoi.”
\p
\v 12 Adotho thahide kwak, eduhu ejoothit nanyong, ajinga dingwai dihithemi h’ohothing fodok, afalanga ohothing fodok, ethabolorye Ojok, ara isong ajyo, “Kabong ohoi irimahinerek aning nabo iring ne.”
\p
\v 13 Alo inyong lo ikoti dindak, dikeremet h’ajor. Ara elulung n’ohothing aindu donyong; etyenio isong.
\v 14 Anden nanyong ahani, atehu Levi, lolonyi h’Alifeyo, owoni di moroko h’ohoiduduhani l’enyahwo, ajyo donyong, “Othifunu nang.” Adotho thahide, athiforo inyong.
\p
\v 15 Owon nya Yesu h’anyari dihang ho Levi isong h’ohoiduduhak h’enyahwo karik ohoiyak olwarai, onye honyong karik ohothifok honyong. Aca awoni nya ohothing olwarai hothifoitho inyong.
\v 16 Atehuna nya n’ohoigerok, Ofarisei, Yesu anyo h’ohoiyak karik ohoiduduhak h’enyahwo, ajyori d’ohothifok honyong, “Anyo onyo inyong h’ohoiduduhak karik ohoiyak?”
\p
\v 17 Ethaninguna no Yesu arami hune, ajyo dosong, “Ohothing hoyyu ahwandek hasong, aang howahi oiboni, arahari ohothing hodiha owahi aboithe. Aang nang aindu, dilongo ohothing hobis, ti, ohoiyak.”
\p
\v 18 Thene nya, orimak owoni ohothifok ho Yoanne karik Ofarisei didwa. Afuni ohothing homok ajyori donyong, “Anyo idwa ohothifok ho Yoanne karik h’Ofarisei, ahibu hohoi aang hoidwa?”
\p
\v 19 Yesu ajyo dosong, “Ocohi d’ohoigyemak edwa, ahibu ohomuthani howon hosong? Howon ohomuthani hosong, aang hocohi isong edwa.
\v 20 Ti, ofuni de operok hofuni iyarik ohomuthani adi thosong; d’operok hule, ofuni de idwa.
\v 21 Aang othulo lorifak akerebuse angejuk d’abongo angoroi. Aca, arifiyo ne, oricyo adi thonyong, angejuk th’angoroi, amonyong hathi aritha okalak.
\v 22 Aang othulo loithurak obalu angejuk ditha ehulo nelangoro. Ara leyafutha, ofwada ehulo, ara obalu karik ehulo fodok akari. Kombwo, obalu angejuk, thoithurahini ditha h’ehulo angejuk.”
\p
\v 23 D’Ofaning Oithacofe, alo Yesu tholo amandak hamok h’ohima, ara ohothifok honyong aculuyo akweyo ahosi h’ohima difwan hosong th’oyihoi thole.
\v 24 Ofarisei ajyori donyong, “Otiha, anyo ihandyo isong aning naang obis d’Ofaning Oithacofe?”
\p
\v 25 Inyong ajyo dosong, “Kabong ithai ihena ainyong ihandyo Davide ahibu inyong ahure oleng – inyong karik ohothing howon honyong –
\v 26 angai olo inyong dithwa h’Ojok, orii Abiatar ara ofadiri lohittok, anyo anyari naang obis d’othulo loboling, arahari do fadirihio, juk esarahina d’ohothing homok honya owoni honyong?”
\v 27 Yesu ajyo, “Ihuhumye nya Ofaning Oithacofe d’ohothing, ikara ohothing d’Ofaning Oithacofe.”
\v 28 Inyong na, Olonyi l’Othulo, Ohobu; Ohobu dang l’Ofaning Oithacofe.”
\c 3
\cl Ebwayit 3
\p
\v 1 Yesu koti adaha di Sinagogue; owon nya othulo lobo diya laye ahinang.
\v 2 Ohothing homok engengelyo inyong tuhudik ditihyo ara ithayijyo inyong d’Ofaning Oithacofe dithalyehini epal nanyong.
\v 3 Yesu ajyo d’othulo laye ahinang lya, “Odothoi, ara iye iwetha dini dihiji h’ohothing bukulung.”
\v 4 Thiya, ajyo d’ohothing, “Obis dihandyo ayiji d’Ofaning Oithacofe dia diryafuna? Dilwahuna esu dia dittohoro?” Ti, adularai diing.
\v 5 Amijyo dosong th’engere; ejorya th’akolon thon’othaja hosong, ajyo d’othulo lya, “Odongok ahinang nahoi.” Adongok inyong, ara ahinang anyahak dimaji.
\v 6 Ara Ofarisei afwo dindak dicama h’ohothifok ho Erode dirimahina oyihoi lethayeyerek inyong.
\p
\v 7 Thiya, Yesu h’ohothifok honyong, afwoi d’ahari nahottok, ara elulung n’ohothing tho Galilea, Judea, Yerusalem, Idumea karik thele ho Jordano, Tyre karik Sidone, athiforo.
\v 8 Ethaninguna nasong asang hehandyo inyong, aindu elulung nahittok donyong.
\v 9 Anyahi ohothifok honyong, thoiyanu aroko natti donyong, anyo, tek elulung inyong amiyithak dihiji.
\v 10 Aca ethayijyo ohothing holwa; owahi ohothing holwa afwan iindehai diithin inyong.
\v 11 Ara ohoilehio hoibot hatehu inyong, apwaharai dihap dihithemi honyong, ekori hijaran, “Iye Olonyi l’Ojok.”
\v 12 Anyahi isong thanako thaang hoisarak inyong lo thotehi.
\p
\v 13 Adok di donge; ara ohothifok howak inyong, athiforoi inyong.
\v 14 Inyong anyimu ohothifok tomon h’arehai (hoilongo inyong ara ohoifahak) dowoni honyong, inyong alo efahaitho isong difwan inyahina ocame,
\v 15 karik dowoni h’asuhe dingaterek adi ohoilehio homonyong.
\v 16 Inyong anyimu ohoifahak tomon l’arehai: Simone, loisarak inyong ofure Petro,
\v 17 Yakobo, lolonyi ho Zebedeo karik Yoanne lolai ho Yakobo, loisarak inyong ofure Boanerjes, lojyo, olonyirok h’ahila;
\v 18 karik Andrea, Filippo, Bartolomeo, Mateo, Tomaso, Yakobo, lolonyi ho Alfeyo, Taddeo, Simone l’ohoingarak,
\v 19 karik Juda Iskariote, lonya oindu de ithanyangahina Yesu lo.
\p
\v 20 Thiya, alo dihang; elulung ikoti asuduha, ara naang isong ocohinerek anyerek anyari.
\v 21 Ethaninguna n’ahang nanyong ahani, afwoi dindefunu inyong, aca ojyori isong, “Etharohoja ahu nanyong.”
\p
\v 22 Ohoigerok ecuruni tho Yerusalem, ajyori, “Endefa inyong lo ho Beelzebul.” karik, “Th’ohoindefani thol’ohoilehio homonyong, ongaterek inyong ohoilehio homonyong adi.”
\p
\v 23 Yesu elongu isong donyong, ajyo dosong th’aryemarihio, “Angai ocohi inyong do Sitan dingaterek Sitan adi?”
\v 24 Ara ibwa ahabwore, aang ocohi d’ahabwore ne awetha inyong hamaring.
\v 25 Ara ibwa ahang, aang ocohi d’ahang ne diwetha inyong hamaring.
\v 26 Ara adotho Sitan eriborik ahwan nanyong, ebwa, aang ocohi awetha inyong hamaring, ti, edwong ecuhit nanyong.
\v 27 Ti, aang othulo lojinga dihang h’othulo loko, arujoro attitto hanyong bukulung, ara kabong dodo othemyo othulo loko lya, etharohojo hathi ahang nanyong.
\v 28 Anyahina diri dothai, ohohini de ayetha fodok h’olonyirok h’ohothing, juk omotta fodok hoibot hojyori isong,
\v 29 ti, othulo locama omoritha hoibot d’Ohoile Lodwa, aang horimak amiehina, ti, eyau eyau nattohyo.”
\p
\v 30 Ojyo Yesu ahani, anyo, ajyo isong hulo, “Owon inyong lo h’ohoile lolibo.”
\p
\v 31 Thiya, ahathingi nanyong karik olarok honyong, afuni karik awethi dingwai. Elongoi inyong, alihahini inyong lo dihiji.
\v 32 Elulung awoni ara nalihak inyong, ara isong ajyori donyong, “nehathingi, holoilai karik henehani, heririyo iye dindak; hathifeyo iye.
\p
\v 33 Yesu etharangyo isong, “Hongai nanahathingi halalalai?”
\v 34 Inyong lo amijyo d’ohothing howoni d’ekorie nalihak inyong, ajyo, “Otihatha, nanahathingi karik halalalai hulo.”
\v 35 Aca, loihandyo awahan n’Ojok, inyong lya lalalai, nanahani karik nanahathingi.”
\c 4
\cl Ebwayit 4
\p
\v 1 Ikoti, aculuyo inyong lo etyenio dipogo h’ahari nahittok; elulung nahittok asuduha donyong, inyong awoni dihiji honyong. Owon nya elulung nya fodok difohor h’ahari nahittok.
\v 2 Etyenio inyong isong asang olwarai th’aryamarihio; dityenio honyong, aning na najyo inyong dosong,
\v 3 “Ithaningyethek! Alo ohoromoni diyeyo ohinyomo honyong.
\v 4 Diyeyo honyong, adouni homok dihiji h’oyihoi, ara ahwen afuni, alutharai isong.
\v 5 Homok adohi d’ahap nankek ara omorik, namutha aboro diya. Isong abuli kwak, anyo, awangi aboro hafwo dihap.
\v 6 Ti, ajara oholong aindu, enohyo isong, anyo, aang ohode hosong, ayohoji.
\v 7 Homok ohinyomo adoro dith’ehwa. Ehwa abulu, aromye isong, aang hobolori dingidari ara anyari.
\v 8 Ohinyomo homok abuli d’ahap nayyu, isong hulo abolori dihide ara holwari, angidari athomone aunihoi, athomone inde, omiru juk esihe.”
\v 9 Thiya, inyong ajyo, “Lowon h’eyoha, thoithairye.”
\p
\v 10 Awonan nya no Yesu hamaring, efiyo inyong ohoifahak tomon larehai howon honyong arami h’arymarihio.
\v 11 Inyong ajyo dosong, “Dothai, athuhi esarahina amysterio n’ohobye l’Ojok, Ti, d’ohothing hothondak, esarahini ditha h’aryamarihio,
\q
\v 12 Inyong na, ara hamijyo, aa, omijye, ti, aang otehuni, karik, ithairyo isong, aa ithairyo, ti, aang otehi tuhudik, dia ara kodien eloithoi, ira isong Ojok imiehina.”
\p
\v 13 Inyong ajyo dosong, “Aang ithai itek tuhudik aryamara na? Angai de itek ithai tuhudik aryamarihio bukulung?”
\v 14 Oyehi ohoyeni ocame.
\v 15 Isong ocamitha hulo, homok hoth’oyihoi, amaji nayehinerek inyong. Ara isong hethairyo, Sitan kwak aindu eyaru adi ocame lonyahini dthosong.
\v 16 Ohinyomo hoyehini d’amaji nakek ara omorik: Isong ohothing hara, ara hethaningu ocame, obocori kwak efothuna inyong th’amuno.
\v 17 Ti, aang owoni h’ohade hosong. Isuka isong omiru tiibai. Diholu, ara ethathaciana dia ethagyemio n’ocame nawon, isong hulo aboco kwak apwaharu adi.
\v 18 Ikoti, homok ohinyomo hodohi ditha hoihwa. Isong hulo ohothing hoithairyo ocame,
\v 19 ti, awahan n’ahap, ethathadwala n’abara karik awahan n’asang hothohop hamok, aindu, aromyo ocame, aang hongida aning nabo.
\v 20 Ohinyomo hoyehini d’ahap nayyu, isong ohothing hoithairyo karik eruhi ocame longida ahayo, athomone aunihoi, athomone inde dia juk esihe othomone enyahitha olwarai.
\p
\v 21 Yesu ajyo dosong, “Ara inwahyo iye athwa, imuhok iye ahirya dia isarak iye inyong tholohop h’aning naang awulo nanyong otehunu? Ithawejik iye ahirya dihide h’aning natihunu awulo n’ahimang thiya.
\v 22 Aca awang aning nedima, naang ofuni de itehan; karik aang de aning nedima, naang oindu ileyori dindak.
\v 23 Ara lowon h’eyoha, thoitharye!”
\v 24 Ajyo dosong, “Omijyethek tuhudik d’ocame loithairu ithai, anyo, othemit loithairyerek ithai, inyong de ofuni ithai ithemyerek, karik afuni de ifonihinerek dothai.
\v 25 Anyo, lowon h’aning nabo, ofonihini de nabo donyong, karik, ara laang howon h’aning nabo, juk tiibai nawon honyong ne, iduhuni de adi thonyong.”
\p
\v 26 Inyong ajyo ikoti, “Ohobye l’Ojok, ojahitha othulo loyehi ohinyomo dihap.
\v 27 Ojootho th’aharie, amjjyo th’afaning; obuli ara ohinyomo abolori, juk inyong aang hotek angai.
\v 28 Owetha ahap ara ohima hamaring. Abene ehethemok, amimithang h’athurothe karik Ohimai langida.
\v 29 Ara ohima hangidari, ohoromoni kwak atahitha odemi, anyo, edwong engongocio.”
\p
\v 30 Ajyo ikoti, “D’ainyong ecohi etharwangyo ohobye l’Ojok, dia nani aryamara ocohi hothai anyahinerek inyong?
\v 31 Ojahitha ohinyomothi lotti, lara, ara ledulahini, omutha inyong lo bebe th’ohinyomo fodok hothohop.
\v 32 Ti, ara lathuhi edulahina, obu karik abolo th’oyandik bukulung hotho mana, howoni h’athandak hahittwak hafunu ahwen hothohide iduhorik athwahio d’obibile lonyong.”
\p
\v 33 Th’aryamarihio olwarai iring ne, acama ocame dosong iring nera isong iteharik tuhudik
\v 34 karik kabong inyong lo ocama dosong kwong aryamara. Ti, awonan nya nanyong hamaring, enyanyahak asang fodok d’ohothifok honyong.
\p
\v 35 Ofaning le, nya th’athari, ajyo dosong, “Hafatha d’oyirik lothele.”
\v 36 Isong hulo afwo, eyarai Yesu, ara inyng ahani, diroko. Owoni nya arokoni hamok hafwo hosong.
\v 37 Ajara nya ahomwa nako awam, epongaitho ahari ditha h’aroko, lwai aroko aindehi efuthan ara ahari.
\v 38 Ti, ahibu Yesu athauk ajoothoro bebe dihide athehit n’ahu. Ethadocye inyong lo, ajyori, “Ohoityenani, awang iye iwak atehan hijan eindek ohoi aye?”
\p
\v 39 Adotho, eringyo ahomwa, ajyo d’ahari nahittok, “Elik! Owethai amaji aboithe!” Thiya, ahomwa awetha, ara adularu nayyu, abolo, awon.
\v 40 Thiya, ajyo dosong, “Anyo ibang ithai? Kabong ithai iwon heruhon?”
\p
\v 41 Abangi isong bebe, ajyori dihwandek hosong, “Ngai de lya, lara juk ahomwa karik ahari nahittok iruhi arami hanyong.”
\c 5
\cl Ebwayit 5
\p
\v 1 Isong afuni d’oyirik lobo l’ahari nahittok, dihap ho Gerasene.
\v 2 Adohuna no Yesu thoroko, aindu othulo lowon h’ohoilehio homonyong tholame donyong.
\v 3 Omanya othulo lya dilame. Awang othulo lepapahyo inyong; juk th’eririk aang othorunu.
\v 4 Athorye nya inyong operok olwarai th’ebilat thah’ehenie karik h’eririk. Awur karik afut inyong nya asang hune bukulung. Awang othulo l’akolon locohi akoruna inyong.
\v 5 Th’aharie karik th’afaning, dilame karik didongiok, ikor inyong lo bebe, angocyo ahwan nanyong th’omorik thohofi.
\v 6 Atehuna nanyong Yesu olamarai ahanya, angero donyong, adumo ahu adihap dihithemi honyong.
\v 7 Ekor inyong lo bebe omurut dihide, “Ainyong awak nang ehandyo hohoi, Yesu, Olonyi l’Ojok Lobolo Dihide Bebe? Amojyo nang iye th’Ojok olefeng, hoithathacianio nang.”
\v 8 Aca ithabuho nya ajaran donyong, “Iwong adi thoth’othulo lya, iye ohoile loibot.”
\p
\v 9 Inyong efiyo inyong, “Ngai ofure lohoi?” Inyong etharangyo inyong, “Ofure hindang Elulung, aca ilwa ohoi.”
\v 10 Amojyo inyong lo inyong, amojyo inyong ikoti, thaang hongararik isong adi th’ahap nya.
\v 11 Thene, owon nya elulung n’abathaha diya dinyari dihide h’odonge.
\v 12 isong amojyo inyong, ajyori, “Ongararik ohoi ditha h’abathaha; ohoi thojingai ditha hosong.”
\v 13 Inyong ahorik isong; ohoilehio hoibot afuni adi, ajingahini ditha h’abathaha; ara abathaha angerori athan’acundong nadonge, dith’ahari nahittok; ara abathaha esihe arehai apwaharai Karin amathi ditha h’ahari nahittok.
\v 14 Thiya, ohoyohok h’abathaha angerori adi, afwoi inyahina di bore ainyong ofuk dimiji; ohothing afuni didoryo aning nathuk afuhon.
\v 15 Thiya ohothing afuni do Yesu, atehuni honyong othulo lonya endafa h’ohoilehio hoibot lo, iyofo karik awoni dinget honyong; abangi nya ohothing.
\v 16 Ara ohothing hatehu aning nafuk d’othulo loindefa h’ohoilehio hoibot lo anyahi isong tuhudik aning nafuk; inyong dang anyahi isong arami h’abathaha.
\v 17 Thiya isong hulo aculuyo amojyo inyong thoidehi ahap nasong.
\p
\v 18 Athuhon nya no Yesu ecurohina di roko, othulo lonya indefa h’ohoilehio hoibot lo amojyo inyong thomanyai honyong.
\v 19 Kabong Yesu iruhok donyong, ti, ajyo donyong, “Ilo di hang hohoi karik d’ohothing hohoi; ilo inyahi isong aning nathuk Ohobu ehandyo dohoi karik ethaithak iye amiehina.”
\v 20 Ahani ne, alo inyong lo, aculuyo anyahina di Dekapolis asang hahitwwak hanya athuk donyong; afalanga ohothing bukulung.
\p
\v 21 Athuhon nya no Yesu alangitha d’oyirik lobo th’aroko, asuduha elulung nahittok diker honyong, anyo, oindek nya inyong d’ahari nahittok.
\v 22 Thiya, lobo aboithe tho hahong h’Asinagogue, loilongoi ara Jairus lo, aindu; atehuna nanyong inyong, apwaharu di hejek honyong.
\v 23 Amojyo, amonjyo ikoti henyak hijan, “Aindek aitho hindang natti aye. Amojyo nang iye, iwong dithahina dihide honyong ahas hahoi, doyyu inyong nan karik amijyo.”
\v 24 Alo inyong lo honyong, ara elulung nahittok athiforo inyong, ara nekolok inyong dihiji bebe.
\p
\v 25 Owon nyana athulo nawo ahotho nanyong oyingathik tomon larehai.
\v 26 Aleng ethathaciana th’oiboniok holwa karik aduma th’asang fodok hawon donyong; ti, dihide haduma ahani ne, dirahan ayiji kodien, amomonyorunu hathi.
\v 27 Ethaninguna nanyong assayo ho Yesu, aindu tholohurong honyong dith’elulung, athin abongo nanyong.
\v 28 Aca, inyong na ajyo, “Ara athin nang, juk abongo nanyong ti, ithayijye nang de.”
\v 29 Eithin nanyong inyong, awojon awetha; ara inyong na atek dihwan honyong hijaran ayyu inyong th’ethathaciana nanyong.
\p
\v 30 Yesu kwak atek hijan alo akolon adi thonyong. Eloitho d’elulung, ajyo, “Ngai othin abongoitho hundang?”
\p
\v 31 Ohothifok honyong ajyori donyong, “Itehu iye elulung ne irudaru adohoi, ara iye ijyo, ‘Ngai othin nang?’”
\p
\v 32 Yesu edoryo diya koko ditehuna ngai ihandyo.
\v 33 Atehan ainyong afuk donyong, abang athulo ne, ehihira. Aindu inyong na, apwaharu dihithemi honyong, anyahi inyong arami hadiri.
\v 34 Inyong ajyo d’athulo ne, “Aitho, athuk eruhon nahoi iye ethaijyo. Ilo th’elik dithayijunu th’ethathaciana nahoi.”
\p
\v 35 Hocama inyong ahani, afuni ohothing homok thalahong n’Asynagogue, ajyori, “Aye neengaring, ainyong hoithathacianio iye ohoityeniani?”
\p
\v 36 Ti, Yesu ethaningu ocame lodwo athuhi ajaran le, ajyo da lahong n’Asynagogue, “Hoibang, ti, iruho.”
\v 37 Kabong hoiruhok othulo lobo thoilo honyong, arahari Petro, Yakobo karik Yoanne, lolai ho Yakobo.
\v 38 Afuni isong di hang hala lahong l’Asinagogue; inyong atehu ohothing arya iwawacitha; ikori ahibu isong iwuluhoitho bebe.
\v 39 Ajingara nanyong dithwa, ajyo dosong, “Anyo ijyorya ithai, ara ithai ikor?” Kabong akalifonit oye, ti, nad’ajoo.”
\v 40 Isong ethalubangyo inyong. Ti, inyong anyahi isong fodok thoifwa dingwai; eduhu omonye l’aitho karik ahathingi, afwoi d’amaji nawonderek aitho.
\v 41 Eduhu ahinang n’akalifonit, ajyo donyong, “Thalitha, koum!” Neloicye ara najyo, “Aitho natti, ajyo nang dohoi, odothoi th’ahide.”
\v 42 Akalifonit kwak adotho th’ahide, adaha (ara oyingathik honyong tomon larehai). Afalanga isong afalanga nabolo tholohide abolori. Efahak inyong lo isong th’akolon, lobo thaang oteha arami hune.
\v 43 Thiya, inyong anyahi isong thoisarak akalifonit aning nabo thonye.
\c 6
\cl Ebwayit  6
\p
\v 1 Edyaharu amaji nya, alo d’abore n’ahang nanyong; ohothifok honyong athiforo inyong.
\v 2 Ainduna n’Ofaning Oithacofe, etyenio di Synagogue. Ethaningyo inyong ohothing holwa, elilihai. Isong ajyori, “Thongai aorimak inyong oityenitha hulya? Honi olofioro hoisarahini donyong hulya?” “Aisong hafalangai hehandyo inyong th’ahinang thananyong hune?”
\v 3 Aang hara olonyi l’ohoigyemani l’ahyek lo lya? Lolonyi ho Maria, lolai ho Yakobo, Jose, Juda karik Simone?” Ethamoryo isong Yesu.
\p
\v 4 Thiya Yesu ajyo dosong, “Aang ohocoroni laang howon h’ethahuyo, arahari dibore karik dihang honyong, dihiji h’ahathing hanyong, karik dithatha h’ahang nanyong holefeng.”
\v 5 Aang ocohi donyong dihandyo egyema naboling nako, arahari ethahina nanyong ahas hanyong dihide h’ohothing tiibai hodiha, ethayijyo isong.
\v 6 Afalanga inyong aangan nasong eruhon. Thiya alo ityetyenaru d’amisok haindek.
\p
\v 7 Thiya, inyong elongo ohoifahak tomon larehai hulo, arek, arek, esarak isong akolon n’endafaitho dihide h’ohoilehio hoibot.
\v 8 karik emimingat isong thaang hoiyaru aning nabo d’adaha nasong, arahari ohoigyemani – ikara anyari, olohobon, dia enyahwa ditha h’erohitha hasong –
\v 9 ti, thoifoi ahamuha, thaang hoiyofoi abongo nahittok nalibo bebe.
\v 10 Ajyo dosong, “Ahang nejingarik ithai, isukathik diya, lwai ithai edehina.
\v 11 Ara aang abore nabo ifothu ithai karik dia aang ithaningyo dothai, ara ithai hedehi amaji naya, ithuthuina aturr tho hejek hothai adi, ara nanyahi dosong hijan arami hune diri.
\v 12 Afwoi dinyahina ohothing dindak thoburunu.
\v 13 Angaterek isong ohoilehio homonyong adi, eyelahini ohothing olwarai hodiha elethang karik ethayijye isong.
\p
\v 14 Erode ethaningu arami hune, aca athuk ofure lo Yesu ahujon. ajyori nya homok, “Athuhi ethadothuna Yoanne Batista thoye, inyong negyema asang hafalangai hune dtha honyong.”
\v 15 Homok ajyori, “Inyong Elijah.” Homok ikoti ajyori, “Inyong ohocoroni, iring lobo th’ohocorok ho berien.”
\p
\v 16 Ti, ethaninguna n’Erode arami hune, ajyo, “Athuhi ethadothuna thoye Yoanne, lonya athuk nang abonguna ahu adi lo.”
\p
\v 17 Aca efahak Erode Yoanne thoifithahini, th’arami thahamuthayerek erode Erodias, (afure no Fillippo, olai).
\v 18 Aca anyahi Yoanne Erode, “Aang obis dohoi dimuthayo nafure holoilai.”
\v 19 Ti, eringak Erodias ahwan th’engere, awak attohoro Yoanne, ti, aang orimak ayihoi,
\v 20 anyo, obang Erode Yoanne; otek hijaran inyong lo othulo lobis karin lodwa; esarak inyong thoisukai ara nayyu. Ethaningyo inyong, ethalicye ahu nanyong.
\p
\v 21 Thiya, afuni omiru hoyyu d’amuno n’ofaning loisunerek Erode; Ehuhumyo anyanri olwarai, elongo ohoigyemak, ohithwaha h’ohoremok karik hobolok ho Galilea.
\v 22 Nangaring h’Erodias thahwan aindu, abala dosong; Ethamunoyo inyong na Erode karik ohothing hoilongo inyong bebe bebe. Ohobu ajyo donyong, “Ifiye nang aning newak iye; esarak nang de dohoi.”
\v 23 Erode epitha d’aitho na, ajyo, “Aning nefiyo iye nang, esarak nang de dohoi juk neyaru ohobye hindang adi thoihiji.”
\p
\v 24 Alo adi, alo ijaran d’ahathingi, “Ainyong owak, efiyo nang donyong?” Ahathingi ajyo, “Ohu no Yoanne Batista.”
\p
\v 25 Angaring na anyaha kwak d’ohobu, efiyo inyong ajyo, “Awak nang isarak iye nang thenene ahu no Yoanne Batista dith’attittoni na.”
\v 26 Juk arami hune odiha bebe d’ohobu, aang hocohi donyong didara aning nefiyo inyong ne. th’arami thah’epitha karik th’othohomonok thohonya ilongoi dinyari hulo.
\v 27 Ahani ne, ohobu asulak ohoremoni th’ohoikiyak honyong, anyahi inyong thoilo iyanu ahu no Yoanne. Ohoikiyani alo ibongunu ahu no Yoanne thomaji h’efitha.
\v 28 Eyanu ahu nanyong dittittoni, esarak d’aitho; ara aitho eyaru, alo isarahina d’ahathingi.
\v 29 Ethaninguna n’ohothifok ho Yoanne arami hune, Afuni iyaru ahwan nanyong, afwoi isarahina di hilame.
\p
\v 30 Ohoifahak afuni ara aboithe ho Yesu, anyahini inyong asang fodok hathuk isong ehandyo karik etyenio.
\v 31 Thiya, inyong ajyo dosong, “Ifuna adi, ithai th’ahwandek d’amaji nedyaharai, diyiri tiibai.”
\v 32 Aca, ofuni karik afwoi ohothing olwarai, aang owoni h’omiru honyerek. Isong afwo adi th’ahwandek di roko d’amaji nathuhi edyaharu.
\v 33 Ti, atehu isong, isong ofwoi adi, otehi isong ohothing holwa; ongerori diya amaji aboithe th’ahejeha thobottok, edwongi diya dihithemi hosong.
\v 34 Afuna nasong difohor, atehu inyong elulung nahittok, ara inyong amiehunu isong, anyo, ajahithi akero kwong ohoyhoni. Ahani ne, aculuyo inyong etyenio isong asang olwarai.
\p
\v 35 Nya th’athari, ohothifok honyong afuni donyong, ajyori, “Amaji ne nathuhi edyaharu, karik dang eriok aharie.
\v 36 Othurok isong isong thoifwa dith’amiji karik d’amisok haindek, dofwoi inyanga amonye aning nanyo isong.”
\p
\v 37 Ti, inyong etharangyo, ajyo dosong, “Isarahina isong aning nabo dinyo.” Isong ajyori donyong, “Ocohi dohoi difwan inyangahina isong anyari n’adenario esihe arehai, esarahini isong thonye?”
\p
\v 38 Inyong ajyo dosong, “Iwon ithai h’elolongitha h’anyari baya? Ifwatha otihatha.” Arimahina nasong, ajyori, “Elolongitha h’anyari miyet karik ohom arehai.”
\v 39 Inyong anyahi ohothing bukulung thowoni dihap dihide h’amiyang nail thelulungir.
\v 40 Isong awoniari di hap thelulungir thah’esihe aboithe karik athomonehio miyet.
\v 41 Inyong eduhu elolongitha h’anyari miyet karik ohom arehai, amijyo dihide, aboroyo, apinyong elolongitha, esarak d’ohothifok thohorye d’ohothing. Inyong dang, ebwayo ohom arehai hulo dosong bukulung.
\v 42 Anyo isong, efongi.
\v 43 Esusuduhye apinyupinyu h’anyari, ethafuthahini akatino tomon larehai, h’ohom diya.
\v 44 Arahi nya ohothing honyo alif miyet.
\p
\v 45 Esarak kwak ohothifok honyong thoifwa ahithemi d’oyirik lobo, di Bethsaida, ahibu inyong osulak ohothing thoifwa adi.
\v 46 Diholu h’asara nanyong dosong, inyong lo adok di donge di mojyo.
\v 47 Edwong Athari, arimak aroko di hiji h’ahari nahittok, ahibu inyong hamaring dindak.
\v 48 Atehu inyong isong ithathalihini ekukuryo n’arok, aca, owam ahomwa bebe adosong. Dihiji h’oharie, aindu dosong, ahibu inyong odaha dihide h’ahari nahittok; owak anden tholosong.
\v 49 Ti, atehuna nasong inyong adaha dihide h’ahari nahittok, egigiloi ojyori ngona inyong ohoile; elululwoi,
\v 50 anyo, atehuni inyong, ara isong abangi. Inyong kwak acama, ajyo dosong, “Ithakolyethek ahwandek! Nanga lya! Hoibangatha!”
\v 51 Inyong ecurok di roko hosong; ara ahomwa awetha. Afalanga isong fodok fodok.
\v 52 Aca aang isong otehi tuhudik ainyong ojyori elolongitha h’anyari hune. Kombwo, ako hathi othaja hosong ndor ndor.
\p
\v 53 Athuhon nasong alangitha, edwongi di hap ho Gennasaret, ethawejihini aroko.
\v 54 Adohuna nasong adi tho roko, atehi ohothing inyong kwak,
\v 55 isong angerori athan’ahap nya; aculuye adohoitho th’epeditha ohothing hodiha, d’amaji nateharik isong hijan inyong lodiya.
\v 56 Ajingara nanyong dith’amisok, abottok dia amiji nahittok, elengunai donyong ohodihak di fwata. Omojyo isong, isong thothino eker n’abongo nanyong; ayiji ohothing holwari, ieing hathin eker n’abongo nanyong.
\c 7
\cl Ebwayit 7
\p
\v 1 Asuduha Ofarisei karik ohoigerok homok hofuni tho Yerusalem diker honyong.
\v 2 Atehuni isong homok th’ohothifok ho Yesu onyo anyari th’ahas thahaibot - kaang hofinia.
\v 3 Aca d’Ofarisei karik Ojudei bulung, aang honye th’ahas, ara kabong hofinia tuhudik, anyo, oisukaitha nya hulya h’ohobolok hosong.
\v 4 (Ara Ofarisei hafuni tho maji-enyang-karik ethanyangio, aang onye ara kabong hohuyoroi; indafaithe dodo asang olwarai hathuk isong efothuna, iring: elalayo n’oihutyena, amoco karik attitto bukulung hanyerek isong.)
\v 5 Ofarisei karik ohoigerok efiyo Yesu, “Anyo aang ohothifok hohoi othifoitho oisukaitha h’ohobolok, ti, anye anyari th’ahas thahaibot?”
\p
\v 6 Ti, ara inyong ajyo dosong, “Ocorok Isaia tuhudik thothai, odwalak, iring negerorik inyong, ‘Ithahabuyo nang ohothing hulo th’obiyuha thohosong, ti, olama othaji losong thonang.
\q
\v 7 Ija ahani, omojyo isong donang, hibu isong ityenio efahitha h’ohothing ara etyenitha hasong.’
\v 8 Erwasak ithai efahitha h’Ojok, ara ithai indafaitho rot rot oisukaith h’ohothing.”
\v 9 Inyong dang ajyo dosong, “Angai iyinik ithai edara efahitha h’Ojok, dinfaitherek ithai oisukaitha hothai?
\v 10 Aca, ajyo Musa, ‘ithahabuye lemonye karik nehathingi,’ karik, ‘Locama imonyoroi thomonye karik thahthingi thananyong, aang opwak, ottohori.’
\v 11 Ti, ijyo ithai, ‘Ara othulo ojyo d’omonye dia d’ahathingi, “Alwahio nefothu iye thonang, inyong Korban (Corban).’” (‘Esorio’),
\v 12 thiya ithai aang hoihorik inyong thoihandye aning nabo d’omonye karik d’ahathingi.
\v 13 Ethuk ithai elulucyo ocame l’Ojok thoisukaitha thohoifuthu ithai, ara ithai ithafothok d’oper lotho holu. Karik asang alwarai hehelaru hehandyo ithai.”
\v 14 Elongo inyong lo ikoti elulung, ajyo dosong, “Ithaningyethek nang, ara ithei itek nang tuhudik.
\v 15 Awang aning nabo nothondak h’othulo nethabocyo inyong, ara ojingak ditha honyong. Aning naindu thothwa h’othulo, inyong ithabocyo inyong.”
\v 16 Tha hamok amaninihio angoro aang ocamitha: Ti, kwak}
\v 17 Thiya, edehina no Yesu elulung n’ohothing, ajinga di hang, efiyo inyong ohothifok honyong arami h’aryamara.
\v 18 Yesu ajyo, “Hoirasa ithai esuka kwong atehan tuhudik? Aang ithai itek hijan ara ojinga aning nabo ditha h’othulo thondak aang ithabocyo inyong,
\v 19 anyo, aang olo dithaji honyong, ti, olo di hohye honyong; thiya alo dingwai?” Th’ocame tholya, anyahi Yesu hijan anyatha bukulung, olibori.
\v 20 Inyong ajyo, “Aning naindu thoth’othulo, inyong ithabocyo inyong.
\v 21 Aca tholothwa h’othulo, tholondak h’othaji, ofuni egigilitha hamonyong, eleru, ahoholio, attohio,
\v 22 aferorik afure no loboling, awahan asang h’ohothing dia h’ahathing hamok, awahan netharohojo, ethadwalio, amuno n’asang hawak ahwan, ahaini, amorio, etharohojo n’ofure, ethadara karik ananga dia adudufo.
\v 23 Asang fodok hamonyori hune ofuni thothwa; isong ithabocyo othulo.”
\p
\v 24 Yesu adotho adi thiya, alo dihap ho Tyre karik Sidone. Thiya alo di hang. Aang howak othulo loboling thoteha hijan inyong lodingai, ti, aang nya ocohi donyong edimunu.
\v 25 Ti, kwak ahani, athulo, nawon angering nanyong natti h’ohoile lomonyong, ethairu, aindu, apwaharu dihejek honyong.
\v 26 Athulo ne nya, n’Agriki, n’amukok no Syrophoenicia. Amojyo donyong, thongaterek ohoile lomonyong adi th’angaring nanyong.
\v 27 Yesu ajyo donyong na, “Okalifinok thoithanye ahithemi. Aca, aang ocohi diduhuna anyari n’okalifinok abirohini d’ongohe.”
\p
\v 28 Ti, inyong na, etharangyo, ajyo, “Aa, Hobu, aca juk ongohe, onye tholohop h’ ethawejit n’anyerek, anyari dedodoitha th’okalifinok.”
\p
\v 29 Yesu ajyo donyong na, “Th’arami thah’ecama iye, ahohini iye, ilo. Athuk ohoile lomonyong anden adi th’enengaring.”
\v 30 Alo inyong na. alo irimahina angering oferi dijoothik, ahibu ohoile lomonyong athuk anden adi.
\p
\v 31 Thiya, inyong lo koti alo adi th’ahap no Tyre, alo tholo Sidone d’ahari nahittok no Galilea lwai ditha h’ahap no Dekapolis.
\v 32 Isong eyau donyong othulo lothuho, loko acama donyong, Efiye inyong thoithahi dihide honyong ahinang nayong.
\v 33 Thiya eyaru inyong adi th’elulung; esarak ohifala honyong ditha h’eyoha hanyong, amithu ahamilak, athin ongadiep
\v 34 lonyong, ajyo donyong, “Ephphatha,” najyo, “Onga!”
\v 35 Eyoha hanyong anga, afothoho h’ongadiep lonyong alahai, aculuyo acama iliboroi.
\p
\v 36 Ti, Yesu anyahi isong thaang honyahi d’othulo loboling. Ti, dihide hedara nanyong arami hune thonyahini, anyahini hathi okalak.
\v 37 Afalanga isong bebe, ajyori, “Athuk ehandyo asang bukulung ara nayyu. Esarak othuhok thoithairye, ara haang ocohi acama, thocamai.”
\c 8
\cl Ebwayit 8
\p
\v 1 D’operok hule, owon nya ikoti elulung n’ohothing nahittok; aang howoni h’aning nabo dinyo. Yesu elongo ohothifok, ajyo dosong,
\v 2 “Amiehunu nang elulung n’ohothing, anyo, esukai honang operok aunihoi, aang aning nanyo isong.
\v 3 Ara asulak nang isong dimiji kwong anyo, ofwoi de ipwaharu diyihoi. Ofuni homok hosong th’amaji nalama.”
\p
\v 4 Ohothifok honyong etharangyo inyong, “Dingai de irimak ohoi anyari d’amaji nalama ahani nefong ohothing hulya?”
\p
\v 5 Inyong efiyo isong, “Baya owoni elolongitha h’angiryang?”
\v 6 Isong ajyori “cofa.” Anyahi elulung thowoni dihap. Eduhu elolongitha h’anyari cofa. amijyo dihide, afurak ahinwarang, apinyo, esarak d’ohothifok honyong thebwabwahi dosong.
\v 7 Owoni nya isong h’ohom hottik tiibai; athuhon nafurahina ahinwarang thosong, anyahi dang ohothifok thoibwabwahi isong.
\v 8 Isong anyo, efongi; ehuhuruni apinyu, pinyu hafithoro, isong ethafuthahini akatino hahitwak cofa.
\v 9 Owoni nya ohothing indehai esihe arangwan. Thiya, inyong asulak isong thoifwa.
\v 10 Kwak ahani, inyong ecurok di roko h’ohothifok honyong, afwoi ditha h’ahap no Dalmanutha.
\p
\v 11 Thiya Ofarisei afuni dindak dilafere honyong; othifeyo isong thonyong ethamijani thohide, dithemyo inyong.
\v 12 Inyong ayiritha bebe, ditha h’ohoile lonyong, ajyo, “Ainyong owak oper lya athifeyo d’ethamijani?” Diri, ajyo nang dothai, aang ethamijani de nesarahini d’oper lya.”
\v 13 Thiya inyong edyaharu isong, ecurok di roko ikoti, alo d’oyirik lobo.
\p
\v 14 Thene, athuhi ohothifok honyong akworo eyaru anyari hosong. Aang isong owoni h’elolonge n’anyari nakalu aboithe dith’aroko.
\v 15 Inyong ethathaithak isong, thajaran, “Omijyethek tuhudik, karik idaratha omundo h’Ofarisei karik h’Erode.”
\p
\v 16 Ithabuho ohothifok elafere dihiji hosong arami haangan n’anyari.
\p
\v 17 Atehan nanyong arami hune tuhudik, ifiyo inyong isong, “Ainyong ilafere ithai aangan n’anyari? Kabong ithai itehu dia itek tuhudik? Iwon ithai h’othaja hoko?
\v 18 Iwon ithai h’ahonde, ithai aang hoitehu? Ithai iwon h’eyoha, ithai aang hoithairu? Aang ithai hoiyu?
\v 19 Epipinyahina nya hindang elolongitha miyet h’anyari d’ohothing esihe miyet, baya akatino hefut th’epipinyitha h’anyari nafithoro irimak ithai? Isong ajyo donyong, “tomon larehai.”
\p
\v 20 “Epipinyahina nya hindang elolongitha cofa h’anyari d’ohothing esihe arangwan, baya akatino hefut th’epipinyitha h’anyari nafithoro irimak ithai?” Isong ajyori donyong, “Cofa.”
\p
\v 21 Inyong ajyo, “Kabong ithai itek tuhudik?”
\p
\v 22 Isong ahuni di Bethsaida. Ohothing hothiya eyanai donyong othulo longodo; amojyo Yesu thothino inyong.
\v 23 Yesu endep ongodoni lya th’ahinang, eyaru inyong adi thath’amiji. Athuhon nanyong amithahina ahamilak di honde honyong, ethahi ahas hanyong dihide honyong, efiyo inyong, ajyo, “Itehu iye aning nabo?”
\p
\v 24 Inyong amijyo adihide, ajyo, “Atehu nang ohothing hojak oyandik hodaha.”
\p
\v 25 Thiya, inyong ikoti ethahi ahas hanyong dihide h’ahonde hanyong; ara ongodoni abucyo ahonde hanyong, ara atehuna nanyong anyahak dimaji, ara inyong atehu asang fodok ara halibo.
\v 26 Yesu asulak inyong di hang honyong, ajyo, “Hoijinga di miji.”
\p
\v 27 Yesu alo dindak isong h’ohothifok honyong d’amisok Caesarea Philippi. Diyihoi, efiyo ohothifok honyong, “Ngai ojyori ohothing, nang?”
\p
\v 28 Isong etharangyo inyong ajyori, “Yoanne Batista.” Homok ajyori, “Elija,’ ara homok ajyori, “Lobo l’ohocorok.”
\p
\v 29 Inyong efiyo isong, “Ti, ngai ijyo ithai nang?” Petro ajyo donyong, “Iye Kristo.”
\v 30 Yesu anyahi isong thaang honyahi lobo othulo ngai inyong.
\p
\v 31 Inyong aculuyo etyenio isong hijan owak Olonyi l’Othulo thoithahtacianie d’asang olwarai, karik ohobolok, ofadirihio hohitwak karik ohoigerok oifuni de idara inyong; ofuni de itohoro inyong, ara inyong ebuhu diholu h’operok aunihoi.
\v 32 Inyong anyahi arami hune oleyoroi. Thiya Petro eyaru inyong arakang, aculuyo eringyo inyong.
\v 33 Ti, Yesu eloithok inyong ahurong, amijyo d’ohothifok; thiya, eringyo Petro, ajyo, “Ilo thlohurong honang, Sitan! Iye laang hoihuhumak ahu nahoi d’arami h’Ojok, ti, d’asang h’ohothing.”
\v 34 Thiya, Yesu elongu ohothifok honyong karik elulung n’ohothing amaji aboithe, ajyo dosong, “Ara owak loboling athifoitho nang, doidara ahwan nanyong, thoithai akruce nanyong, athifunu nang.
\v 35 Aca, lowak athalwahuna esu nanyong, ithalithok de; ara lethalithok esu nanyong thonang karik th’evanjelio, ethalwahu de inyong.
\v 36 Ainyong ayiji orimak othulo diwonan h’ahap fodok, ti, ethalithok esu nanyong?
\v 37 Ainyong ocohi d’othulo ebobolohina h’esu nanyong?
\v 38 Lojwu ahu thonang karik thocamitha thohundang ditha oper l’eleru karik l’eyau lya, oindu de dang ahu n’Olonyi l’Othulo ijwuon, ara laindu ditha h’abolori n’Omonye lonyong h’anjelohio hodwa.
\c 9
\cl Ebwayit 9
\p
\v 1 Inyong ajyo dosong, “Diri ajyo nang dothai, owoni homok hothai howetha dini, haang de opil aye dihitheni h’atehuna ohobye l’Ojok ainduna th’akolon.”
\p
\v 2 Diholu operok inde, eyaru Yesu Petro, Yakobo karik Yoanne dihide hodonge lohodo, isong hamaring diya. Thiya, eloitho inyong dihithemi hosong.
\v 3 Awuloi, abongoitho hanyong, awilang ara abongi pang pang; obwori tholohide hanera oilalayit adi l’opeceni ilalayerek.
\v 4 Thiya Elijah ho Musa aleyori dosong; isong acama ho Yesu.
\v 5 Petro etharangyo, ajyo do Yesu, “Ohoityenani, oyyu dohothai disuka dine. Ohoi thoduhoi athwahio aunihoi: aboithe dohoi, aboithe do Musa karik aboithe do Elijah.”
\v 6 (Aca aang isong otek, ainyong ira isong icama. Abangi nya isong.)
\p
\v 7 Adiko aindu, emuhok isong. Thiya, oilolonge aindu thath’adiko, “Olonyi hindang lo lamuno nang. Ithaningyethe donyong.”
\v 8 Kwak ahani, amijyo nasong eker karik ehiji nasong, aang horimahini othulo loboling hosong, arahari Yesu.
\p
\v 9 Ecuruna nya nasong thodonge, anyahi inyong isong thaang othulo lobo ainyong atehu isong tok Olonyi l’Othulo ebuhuna th’ohoyak.
\v 10 Ahani ne, edehini arami hua dosong hamaring, ti, elafereji dihiji hosong, ainyong ojyo, “Ebuhuna th’ohoyak?”
\v 11 Isong efiyo inyong, “Anyo ojyo ohoigerok hijan Elijah de icak ainduna ahithemi?”
\p
\v 12 Inyong ajyo dosong, “Oindu Elijah ahithemi, doindu inyahahina asang fodok dimaji hosong. Anyo hathi igero inyong hijan owak Olonyi l’Othulo thoithathacianai asang olwarai karik alauni inyong?
\v 13 Ti, ajyo nang dothai hijan athuk Elijah ainduna; ehandyo isong ainyong owak isong thonyong, iring nathuhi egerorik thonyong.
\p
\v 14 Afuna nasong d’ohothifok, atehuni elulung nahittok n’ohothing, olihak isong, ahibu ohoigerok ilafereji hosong.
\v 15 Atehuna nasong Yesu, afalangai, angerori donyong karik emandaye inyong.
\v 16 Inyong efiyo ohothifok honyong, “Ainyong ilafere isong hosong?”
\p
\v 17 Lobo othulo thath’elulung etharangyo inyong, “Ohoityenani, eyanu nang oitho hindang dohoi. Owon h’ohoile laang ohorik inyong accama.
\v 18 Indafaitho amirok inyong dihap, okofutok eyafutha dihuthuk karik erocyo ohala, eronghodoro. Efiyo nang ohothifok hohoi thongaterek inyong adi, ti, aang ocohini angaterek.
\p
\v 19 Inyong etharangyo isong, “Oper laang iruk lo; lwai kanu iwak ithai nang thoisukai hothai? Lwai kanu de angongyo nang hothai? Iyanethek inyong donang.”
\v 20 Isong eyanu oitho donyong. Atehuna n’ohoile Yesu, amirok kwak inyong ditha h’ehihira. Apwaharu oitho kwak dihap ara ahuthuk eyafutha ara okofuthot.
\v 21 Yesu efiyo omonye, “Eyaru omiru baya dijahitha honyong ahani?”
\v 22 Omonye ajyo, “Gee howon ara okalifonit, Omiryecyo nya inyong ditha h’ahimang, ahari dia karik athemyo engohina inyong adi. Ara ocohi iye ehandyo aning naboling, omiehunu ohoi karik olwaha ohoi.
\p
\v 23 Jesu ajyo donyong, “Ara ocohi dohoi?” Acohohini asang bukulung dihandyo, d’othulo leruk.
\p
\v 24 Kwak ahani, omonye l’okalifonit elulwo bebe, ajyo, “Eruk nang! Olwaha aangan hindang eruho!”
\p
\v 25 Atehuna no Yesu elulung angeruna dosong, eringyo ohoile loibot, ajyo, “Iye ohoile lodularu karik lothuho, anyahi nang dohoi, iindu adi thothnyong; hoinyak ajingahina ditha honyong ikoti.”
\p
\v 26 Inyong lo ekor dindak, ethahihiryo okalifonit bebe karik thiya, aindu adi. Ajahitha oitho lathuk aye, ojararik ohothing holwa, “Aye inyong.”
\v 27 Ti, Yesu endefu inyong th’ahinang, adohu inyong dihide, ethawejik oitho thahide.
\p
\v 28 Ainduna no Yesu dihang, efiyo inyong ohothifok honyong hamaring, “Anyo aang ohoi icohi angararik inyong adi?”
\p
\v 29 Inyong ajyo dosong, “Opecen lya aang ocohi angararik dindak, arahari th’omojit.”
\p
\v 30 Isong afwo dingwai thiya tholo Galilea. Aang howak othulo loboling thoteha dingai ofwo isong.
\v 31 anyo, inyong nya lodityenio ohothifok honyong. Inyong ajyo dosong, “Ofuni de isarahina Olonyi l’Othul dihas h’ohothing, hofuni de ithayeyo inyong. Operok aunihoi diholu ethayeyo nanyong, oindu de ibuhuna thoye.
\v 32 Ti, kabong isong otek tuhudik ocame lya. Abangi isong efiyo inyong.
\p
\v 33 Thiya isong afuni di Kapernaum. Diholu h’ajingara nanyong dihang, efiyo inyong isong, “Ainyong dwo ilafere ithai diyihoi?”
\v 34 Ti, adularu isong. Aca ilafere isong nya arami ho ngai thosong lahong bebe.
\v 35 Awaniara nanyong dihap, elongu tomon larehai ara aboithe, ajyo dosong, “Ara owak lobo awonan ahithemi, thoiwona diholu, karik awon ara ohoigyemani losong fodok.”
\v 36 Eduhu okalifonit lotti, esarak dihiji hosong. Inyong adohu inyong dihinasik honyong, ajyo dosong,
\v 37 “loifothu okalifonit iring lya thofure tholohindang, ifothu nang; loifothu nang, ikara nang ifothu, ti, ifothu le, losulu nang.”
\p
\v 38 Yoanne ajyo donyong, “Ohoityenani, etehu ohoi othulo loboling ongaterek ohoilehio homonyong th’ofure tholohoi; ethawejyo ohohi inyong, anyo, aang othifoitho ohothai.”
\p
\v 39 Ti, Yesu ajyo, “Hoithwejyethek inyong, anyo, awang othulo loihandyo egyemathik hafalangai th’ofure tholohindang, diholu, acama thonang arami hamonyong.
\v 40 Laang ida ohothai, inyong lo lohothai.
\v 41 Loisarak iye oibithi l’ahari thomathai th’ofure tholo hindang, anyo, iye lo Kristo, ajyo nang dohoi diri, aang ithalithok esorio nanyong.
\v 42 Loisarak aboithe th’okalifinok hoiruhi donang hulo, thoibosoi, ira nya iyiji donyong efithahina omorwong dimurut honyong, amirohini ditha h’ahari nahittok.
\v 43 Ara isarak iye ahinang nahoi eboso, obongu adi. Oyyu dohoi dijingahina ditha hesu ara lopala, th’awonan h’ahas arehai, ara iye ilo ditha h’ahimang, naang odunya,
\v 44 
\v 45 Ara isarak iye aheju nahoi eboso, obongu adi. Oyyu dohoi dijingara disu ara longura thawonan h’ahejek arehai, amirohini ditha ahimang.
\v 46 
\v 47 Ara isarak iye ahonyek eboso, ikolouthu adi. Oyyu dohoi dijingara d’ohobye l’Ojok h’ahonyek aboithe, th’awonan h’ahonde arehai, amirohini iye dinferno.
\v 48 Amaji naang ohoteng lonyong oye. karik ahimang naang ithadunyunu.
\v 49 Aca ofuni de ithasilihyo ohothing fodok th’ahimang.
\v 50 Oyyu ahipere. Ti, ara athuk adwaran n’ahipere alitho, angai de horimahini adwaran n’ahipere ikoti? Owonatha h’ahiere dihiji hothai, karik isukathik h’elik dihwandek hothai.
\c 10
\cl Ebwayit 10
\p
\v 1 Yesu edyaharu amaji nya, alo dihap ho Judea karik d’oyirik thele h’Owor lo Jordano; ara elulungir h’ohothing afuni donyong ikoti. Etyenio inyong nya ikoti iring nanya ihandyecerek inyong.
\v 2 Thiya Ofarisei afuni ithemyo inyong, efiye, “Obis d’onde didara afure nanyong?”
\p
\v 3 Inyong etharangyo, “Ainyong nya onyahi Musa ithai thoihandye?”
\p
\v 4 Isong ajyori, “Ahorik Musa othulo thoigerye amanini nedararik afure, asulak inyong na adi.”
\p
\v 5 “Othaja hothai hoko ahani hulya isarak Musa egerohina ithai oyalu lojak ahani lya,” Yesu ajyo dosong.
\v 6 “Ti, thoculwe h’ayeyo, ‘Ayeyo Ojok isong ara lobusuha karik nangorwo.’
\q
\v 7 ‘Th’ahu thone, idehi de othulo omonye karik ahathingi, aindu imorihunu h’afure,
\q
\v 8 ara arehai afuni irahan ara ahwan aboithe. Aang harahi arehai, ti, ahwan aboithe.
\v 9 Inyong nara, aning nathuk Ojok enuthahina aboithe, othulo lobo thaang horitha.
\p
\v 10 Omiru isong dihang, efiyo inyong ohothifok arami hune ikoti.
\v 11 Inyong ajyo dosong, “Longaterek afure, amuthayo athulo nabo, iyau h’athulo ne.
\v 12 Nedehi onde, amuthayo othulo loboling, iyau h’othulo lya.
\p
\v 13 Thiya isong eyanu okalifinot hosong hottik donyong, doindu inyong iyithin isong, ti, ohothifok eringyo isong.
\v 14 Ti, edoruna no Yesu, engere, ajyo dosong, “Oburahina okalifinok hottik thoifunu donang, hoilwathik isong, aca ohobye l’Ojok losong, karik l’ohothing hojahitha isong.
\v 15 Diri ajyo nang dothai, laang ifothu ohobye l’Ojok iring okalifonit lotti lo, aang de do ti hojinga ditha honyong.”
\v 16 Thiya eduhu okalifinok dihinasik honyong, aboroyo isong ahibu inyong athuk esarahina isong dihinasik honyong.
\p
\v 17 Aculuyo nanyong adaha nanyong, othulo lobo angeru donyong, arigongo dihithemi honyong, efiyo inyong, “Ohoityenani loyyu, ainyong owak ehandyo nang, dirimahina ohobye lomanya mak?”
\p
\v 18 Yesu ajyo, “Anyo ilongo iye nang loyyu? Aang lobo loyyu, arahari Ojok hamaring.
\v 19 Itek iye efahitha: Hoittoho, Hoiferorik afure dia onde lanabo, Hoihoholyo, Hoimangyo, Hoidwala karik Ithahabuye loimonye karik nehathingi.”
\p
\v 20 Othulo lya ajyo, “Ohoityenani, athifoitho nang asang hune fodok hawon nang ara ottwathi.
\p
\v 21 Yesu amijyo donyong, amuno inyong. Inyong ajyo donyong, “Owon aning aboithe naang thohoi, ithanyangak attitto hahoi fodok ara iye isarak d’ohoicanak, ara iye de iwon h’ebarithi dihide. Thiya, iwong, othifunu nang.”
\v 22 Ti, th’ocame tholya, amukutha, alo adi ara lejyorya, anyo, owon inyong lo h’asang olwarai.
\p
\v 23 Yesu amijyo indehai arani, ajyo d’ohothifok honyong, “Angai oko d’ohobarak dijingahina d’ohobye l’Ojok!”
\v 24 Afalanga ohothifok ocamitha honyong. Ti, Yesu ajyo dosong ikoti, “Okalifinok, angai oko inyong dijingahina ditha h’ohobye l’Ojok!”
\v 25 Ilik d’akonkoni dijingara th’ohuthuk hoihwai, th’ajingara n’othulo lobara ditha h’ohobye l’Ojok.
\p
\v 26 Afalanga nya isong bebe, acamai dihiji hosong, “Ara ahani, ngai ocohi ethalwahunu?”
\p
\v 27 Yesu amijyo dosong, ajyo, “D’ohothing, aang ocohi, ti, ikara d’Ojok. D’Ojok aang aning naang ocohi!”
\p
\v 28 Petro aculuyo acama donyong, “Ottiha, edehi ohoi asang fodok, karik ethuk ohoi athiforo Iye.”
\p
\v 29 Yesu ajyo, “Diri, ajyo nang dothai, aang lobo ledehi ahang, olarok, ahanerok, ahathingi, omonye, okalifinok dia ahap thonang karik th’evanjelio,
\v 30 aang hoifothu esihe enyahitha olwarai thene d’oper lo: Ahangithek karik olarok, akalifinok karik ahap, h’ethagyemitha, karik ditha h’ahap naindu karik esu namanya mak.31
\v 31 Ti, ohothing holwarai howoni de ara ohoithemo, ofuni de dihholu, ara hothoholu, afuni ara ohoithemok.”
\p
\v 32 Isong nya d’oyihoi lolo di Yerusalem, ahibu Yesu ahithemi nasong. Afalanga ohothifok. ara ohothing hothiforo isong abangi. Thiya, Yesu ikoti eyaru tomon larehai, aculuyo anyahina isong ainyong nalo ifuhon donyong.
\v 33 “Idorotho, ohothai hoifwo di Yerusalem; Olonyi l’Othulo, lofwoi ithafothohini da fadiri hohittwak karik ohoigerok; obongok isong de inyong lo ara lottohori, ethafothohini d’ohothing hoikela th’Ojudei.
\v 34 Ithalubangyo isong de inyong, amicye ahamilak donyong, abahye inyong karik athayeye inyong. Ti, diholu h’operok aunihoi, oindu de ibuhuna.”
\p
\v 35 Olonyirok ho Zebedeo, Yakobo karik Yoanne, afuni donyong, ajyori, “Ohoityenani, iwak ohoi ihandye dohoi aning nefiyo ohoi dohoi.
\p
\v 36 Inyong ajyo dosong, “Ainyong iwak ithai ehandyo nang dothai?”
\p
\v 37 Ara isong ajyori, “Ohorik ohoi thowoni hohoi di bolori hohoi, aboithe d’ahinang nenget karik loboling d’ahinang noihothong.”
\p
\v 38 Ti, Yesu etharangyo isong, “Aang ithai itek ainyong ifiyo ithai. Icohi ithai de amatha oihutye lamatha nang de, dia efothuna batisimo, thanabuhohini de donang.
\p
\v 39 Isong ajyori donyong, “Icohi ohoi,” Yesu ajyo dosong, “Oihutye lamatha de nang, imatha ithai de. karik batisimo nabuhohini de donang, obuhohini de dang dothai.
\v 40 Ti, ngai owoni dinget dia dihothong honang, ikara hindang disarahina, ti, n’ohothing, honya athuhi ehuhumahina ara nasong.
\v 41 Ethaninguna n’ohothifok tomon hulo arami hune, aculuye engere bebe ho Yakobo karik Yoanne.
\v 42 Yesu elongu isong donyong, ajyo, “Itek ithai ohothing hoiruhuni ara ohoindefak h’ohothing hoikela th’Ojudei, indafaithe isong ara nako, karik ohoigyemak hosong hohittwak, endafaithe ohigyemak hosong th’elahong.
\v 43 Ti, ikara ahani dihiji hothai. Lowak ainduna ara lahong lothai, thoiwona ara ohoigyemani lothai,
\v 44 karik lowak awonan dihithemi dihiji hothai, thoiwona ara ongaca lothai bukulung.
\v 45 Aca aang Olonyi l’Othulo oindu nya dithagyemayo, ti, digyema karik disarahina esu nanyong didumunerek ohothing holwa.”
\p
\v 46 Isong afuni di Jeriko. Edehina nanyong Jeriko h’ohothifok honyong karik elulung nahottok, orimak ahibu lolonyi ho Timaeus, Bartimaeus, ohomojoni ongodoni, owoni diker h’oyihoi.
\v 47 Ethaninguna nanyong nya hijan Yesu la Nazarete le, aculuyo erwaha, ajyo, “Yesu, Lolonyi ho Davide, omiehi nang!”
\p
\v 48 Ohothing olwarai eringyo othulo longodo lya, anyahini inyong thodularu. Ti, inyong lo ekor hathi bebe, “Lolonyi ho Davide, omiehi nang!”
\p
\v 49 Yesu awetha, anyahi inyong thoilonguni. Isong elonguni othulo longodo, ajyori, “Ithangerejye ahwan! Odothoi thahide! Inyong lo, lethalongo iye.”
\v 50 Amirok abongo nanyong nauk arakan, awaa dihide, alo do Yesu.
\p
\v 51 Yesu etharangyo inyong ajyo, “Ainyong iwak iye ehandyo nang dohoi?” Othulo ongodoni ajyo, “Ojok hindang, awak nang efothuna atehuna hindang.”
\p
\v 52 Thiya Yesu ajyo donyong, “Ilo, ethayijyo iye eruhon nahoi.” Kwak ahani, acohi inyong atehuna ikoti. Inyong, athiforo inyong diyihoi.
\c 11
\cl Ebwayit 11
\p
\v 1 Thene, afuna nasong di Yersalem, aindek isong di Bethphage karik Bethany di Donge h’Olives; Yesu asulak arehai ohothifok honyong,
\v 2 ajyori dosong, “Ifwatha d’amiji nothele hohothai nya. Ajingara nathai diya, irimak ithai de angaring n’ababut nakabong odohohini dihide honyong. Ohouna, ara ithai iyanu donang.
\v 3 Ara ajyo othulo lobo dothai, ‘Anyo ihandyo ithai ahani?’ ijaratha, “Ohobu owak inyong na, inyahunu ohoi de kwak hine''.
\p
\v 4 Afwoi isong, afwoi irimahina angaring n’aluhumar ne oyena dihuthuk h’oyihet dipogo h’oyihoi lohittok, alahunai.
\v 5 Ohothing homok honya owetha diya, ajyori dosong, “Ainyong ihandyo ithai, ilaharu ithai angaring n’aluhumar?”
\v 6 Acama isong dosong, iring nadwo onyahinerek isong Yesu; ara ohothing hulya edehini isong thoifwa oyihoi losong.
\v 7 Eyanu isong angaring n’aluhumar, amirohini abongoitho dihide honyong, inyong lo awoni dihide honyong.
\v 8 Ohothing holwa afecyo abongoitho hasong diyihoi, homok afecyo athandak hayefunu isong thomandak.
\v 9 Ohothing hofwo ahithemi karik hothiforo isong, elolongoi omurut dihide, “Hosanna! Loindu th’ofure thol’Ohobu, thomunoi.
\q
\v 10 Ohobye l’omonye lohothai Davide loindu thoborye! Hosanna dihide bebe!”
\p
\v 11 Thiya, Yesu ajinga di Yerusalem, alo ditha a Tempolo didoryo asang fodok hothiya. Aangan n’orii, alo di Bethany h’ohothifok honyong tomon larehai.
\v 12 Nya moithe, afwan nasong adi tho Bethany, aleng inyong ahure.
\v 13 Atehuna nanyong olamarai ohiyani l’ahayo loli abene, alo itihyo inyong ara owon h’ahayo dihide honyong; ainduna nayong d’ohiyani lya, aang orimak aning naboling, arahari abene hamaring. Ikara omiru hule h’oyandik h’ahayo.
\v 14 Inyong acama d’ohiyani, “Aang othulo lolo inyo ahayocong thohoi ikoti.” Ara ohothifok honyong ethaningu arami hune.
\p
\v 15 Isong afuni di Yerusalem, ajingari di Templo, aculuye angaterek ohoithanyangak karik ohoinyangak adi tho Templo, alafuhyo obeleha h’ohoiloyithok h’enyahwo karik okani h’ohithanyangak h’amami.
\v 16 Alwo ohothing bukulung eyaru asang hafwoi ithanyangyo athana Templo.
\v 17 Etyenio isong, ajyo, “Aang hoigero, ‘Aang de ofuni ilongo athwa hindang, ara athwa n’amojo n’amisok bukulung’? Ti, awon dothai ara athwa n’ohohorok.”
\p
\v 18 Ethairuna no fadirihio hohittwak karik ohoigerok arami hacama inyong hune, athifeye oyihoi lowaharik etharohijyerek inyong. Aca obangi isong inyong, anyo, elulung bukulung n’ohothing ofalangai etyenio nanyong.
\v 19 Edwongon n’athari, edyaharai abore.
\p
\v 20 Adaha nasong nya thamoithe berien, atehuni olamarai ohjyani l’ahayo lo, ayoho adi tok dihade honyong.
\v 21 Petro eyuu, ajyo donyong, “Ohoityenani, Idoro! Ohiyani l’ahayo, lefyethak iye lo, ayoho.”
\p
\v 22 Yesu ethangyo isong, “Owonatha h’eruhon d’Ojok.
\v 23 Diri ajyo nang dothai hijan ara ojyo loboling d’odonge lo, ‘Odothoi th’ahide, omirok ahwan nahoi dithah’ahari nahittok,’ ara aang hoiririhitha dithaji honyong, ti, eruk hijan aning nacamai ne, ofuk de, inyong ne aning de nehandyo Ojok.
\v 24 Iring ahani ne, ajyo nang dothai: Asang bukulung hemojyo ithai ara ithai ifiyo, ara ithai iruhu hijan efothu ithai, owon de aning nya ara nathai.
\v 25 Ara iwetha iye thahide, ara iye imojyo, omiehi asang fodok hedararik iye othulo loboling, domiehi iye dang lee Monye lowon dihide ohothing hoihandyo iye ara namonyong.”
\v 26 
\p
\v 27 Dihide h’adaha nya no Yesu ditha Templo, afuni h’ofadiri hohittwak, ohoigerok karik ohobolok donyong,
\v 28 Isong ajyori donyong, “Th’akolon thanangai ihandye asang hune, karik ngai isarak iye akolon nehandterek iye ne?”
\p
\v 29 Yesu ajyo dosong, “Efiyo nang ithai efiet aboithe. Inyahina nang, anyahi nang de ithai th’akolon thanangai ehandyo nang asang hune.
\v 30 Abatisimo no Yoanne, inyong na thohide dia th’ohothing?”
\v 31 Isong hulo elafereji dihiji hosong, anyahini ajyori, “Ara ejyo, ‘Thohide,’ ojyo de, “Anyo naang ithai iruk donyong?’
\v 32 Ti, ara ejyo, ‘Th’ohothing,’ Obangi nya isong ohothing, anyo. otehi isong nya tuhudik hijan Yoanne nya ohcoroni.
\v 33 Thiya, isong etharang Yesu ajyor, “Aang ohoi itek.”Thiya, Yesu ajyo dosong, “Aang nang dang anyahi ithai th’akolon thanangai ehandyo nang asang hune.”
\c 12
\cl Ebwayit 12
\p
\v 1 Thiya Yesu aculuyo etyenio isong th’aryamarihio. Inyong ajyo, “Owon othulo loidula amana n’ahayo. Aduho oilyethe, abohyo angulume namoyerek ahayo, abohok oilyethe loikeyerek karik ethanyangak d’ohoinyangak karik ohoithanyangak h’ahayo. Alo dipoco.
\v 2 D’omiru hocohini ahani, efahak ohoigyemani thoiyahak inyong ahayo hamok thomana.
\v 3 Ti, isong eduhu inyong, abahye kark angararik inyong adi kwong aning nabo thohinang.
\v 4 Koti, inyong asulak donyong ohoigyenai loboling. Isong ikoti dang eryafuni lya dihu. Ethajuhini ahu.
\v 5 Inyong ikoti asulak hoigyemnani loboling. Isong attohori lya. Isong hulo ehandyo ahani dohomok, abahye homok ara homok attohori.
\v 6 Afithoro othulo aboithe donyong disulahina, olonyi lomunoi. Ara inyong aboithe tong, osulalak inyong dosong. Inyong ajyo, “Obangi de isong olonyi hindang.”
\p
\v 7 “Ti, ohoromok h’ahayo h’obalu acama amonye, ‘Inyong lya ohoruthani. Ifuna, hattohoro inyong, dowon aruthahina ara nahothai.’
\v 8 Isong endefuni, attohori, amiroroi inyong adi thomana.
\v 9 Ahani ne, ainyong de ihandyo lomonye amana? Oindu de, etharohojyo ohoromok hulya adi, esarak amana dohomok.
\v 10 Kabong ithai ihena dith’amanini nagwa na? ‘Omorwong lonya edari ohoduhok lo, awon ara omorwong l’asihothe.
\q
\v 11 Asang hune nya th’Ohobu, hamuji nya bwaya dihinde hohoi.”
\p
\v 12 Diholu h’arami hune, ohithwaha h’Ojudei athifyo oyiho loindefunerek Yesu, anyo, atehi isong tuhudik hijan ocama aryamara ne ara namknyong thosong. Ti, obangi nya isong elulung n’ohothing. Inyong na, edyaharai inyong, afwoi adi.
\p
\v 13 Thiya efahak isong Ofarisei homok karik ohothifok ho Erode donyong, dilohuna inyong thocamitha.
\v 14 Afuna nasong, ajyori donyong, “Ohoityenani, arami haang oyiji hegigilo ohothing, ikara hahoi, anyo, aang iye ikelyo. Ityenio iye diri oyihoi l’Ojok. Obis diduma Cesare enyahwa dia ipal? Owak iduma ohoi dia aang ohi iduma?”
\p
\v 15 Ti, otek Yesu adwala nasong, ajyo dosong, “Anyo ithemyo ithai nang? Iyanethek sede adenario ne atihyo nang.”
\v 16 Eyanai aboithe do Yesu. Ara inyong ajyo dosong, “Hangai arijori karik oigeritha hothonyong huna?” Isong ajyori, “Ho Cesare.”
\p
\v 17 Yesu ajyo, “Isarahina do Cesare, asang ho Cesare, ara ithai isarak d’Ojok asang h’Ojok.” Afalangai thannayyu donyong.
\p
\v 18 Ara Osaduccees, hojyo awang ebuhuna, afuni donyong. Isong efiyo inyong, ajyori,
\v 19 Ohoityenani, egero musa thohoi, “Ara othulo oye, edyaharu afure kwong oitho, ocohi d’olai l’ohayani aruthahina afure, ayisok inyong oduring.
\v 20 Owon nya olarok cofa; amuthayo ohoithemoni afure, thiya, aye kwong oitho.
\v 21 Thiya, oitharehe aruthak, aye kwong oitho, oithaunihoi dang ahani.
\v 22 Oithacofe dang, kaang hoidyaharu oitho. Dicuhit hosong fodok, athulo ne aye.
\v 23 Dibuhuna, ara ohothing hadotho ikoti, ara nafre hongai oindu inyong iwonan? Aca awon nya inyong ara afure n’olarok cofa hulya bukulung.”
\p
\v 24 Yesu ajyo, “Ikara arami hune hesarak ithai epalan huna hune, anyo, aang ithai itek amaninihio hadwa dia akolon n’Ojok?
\v 25 Aca ara isong hadotho th’ohoyak, aang homuthaye dia ithamuthahini isong, ti, afuni isong iwonan ara anjelohio dihide.
\v 26 Ti, ara th’arami thoh’ohothing hoibuhu, kabong ithai ihena amanini no Musa, d’arami h’omiyang, angai ocama Ojok donyong, ajyo, “Nang Ojok l’Abramo, lo Isako karik lo Yakobo’?
\v 27 Ikara inyong Ojok l’ohoyak, ti, Ojok l’ohoiswok. Epal ithai do ti.”
\p
\v 28 Aboithe l’ohoigerok aindu, ethaningyo ofere losong; atehu inyong lo etharang isong Yesu tuhudik. Efiyo inyong, “Nani efahit nako, okalak isong fodok?”
\p
\v 29 Yesu ethangyo, “Nako okalak bebe inyong na, “Ithairye, Israele, Ohobu, Ojok lohothai, Ohobu aboithe.
\v 30 Omunoi Ohobu, Ojok lohoi th’othaji tholohoi bukulung, th’ohoile tholohoi bukulung, th’ahu thanahoibukulung karik th’akolon thanahoi fodok.
\v 31 Efahit etharehe inyong na, ‘Omunoi othulo dia athulo naindek dohoi iring ahwan nahoi.’ Aang naboling efahit nakalu hune.”
\p
\v 32 Ohoigeroni ajyo, “Oyyu. Ohoityenani! Ethuk iye ajaran tuhudik hijan Ojok aboithe, karik awang lobo arahari inyong.
\v 33 Thomunoi inyong th’othaji fodok, th’ahu fodok karik th’akolon fodok karik thomunoi othulo dia athul naindek donyong iring ahwan nanyong. okalu fodok adi esoritha karik ehumaitha hamudye.”
\p
\v 34 Atehan no Yesu hijan athuk inyong lo esarahina etharangio nabis, ajyo donyong, “Aang iye ilama th’ohobye l’Ojok.” Diholu h’arami hua, aang lobo lefifiliyo efiyo Yesu.
\p
\v 35 35 Ahibu nya Yesu ityenio dimaji h’oyalu la Templo, ajyo, “Angai ojyori ohoigerok hijan Kristo, olonyi lo Davide?
\v 36 Daivide thahwa, ajyo ditha h’Ohoile Lodwa, “Ohobu ajyo d’Ohobu hindang, owoni dinget honang, tok nang esarahina omerok hohoi thohop h’ahejek hahoi.”
\v 37 Davide thahwan elongo inyong, ‘Hobu.’ inyong na, angai ocohi Kristo awonan ara olonyi lo Daivide?”Ethaningyo elulung anhittok donyong th’amuno.
\p
\v 38 Dityenio honyong, Yesy ajyo, “Omijyethek tuhudik ohoigerok, howak adaha dith’abongoitho ahodorak karik emandaye isong d’amasok h’elulung,
\v 39 karik awoni h’okani h’abolori di synagogues karik d’amasok habolori h’amuno.
\v 40 Odilyo isong dang athwahio h’aharathak, amojyoi omojitha ohodorak dotehuni isong ohothing. Orimahini de ohothing hulya edara n’ohothing isong nahittok.
\p
\v 41 Yesu awoni dihithemi h’amaji namiryerek esoritha di templo; engengelyo ohothing homiryo enyahwo ditha epi. Omiryo ohobarak holwa enyahwo halwa.
\v 42 Thiya, aharathani ehecanani aindu, amirok diya ebilat arehai, orijoroi iring agirisi arehai.
\v 43 Inyong elongu ohothifok honyong, ajyo dosong, “Diri, ajyo nang dothai, esarak aharathani ehecanani enyahwo hakalu h’ohothing fodok hamirok enyahwo dipi.
\v 44 Omirohini isong hulo thahalwa hasong; ti, aharathani ehecanani ne, eduhu th’eacan nanyong, esarak bukulung hahera inyong isworik''.
\c 13
\cl Ebwayit 13
\p
\v 1 Aden nya no Yesu adi tho Templo, aindu aboithe th’ohothifok honyong, ajyo donyong, “Ohoityenani, otiha alibori n’omorik karik athwahio hathuhi aduho!”
\p
\v 2 Yesu ajyo donyong, “Itehu iye athwahio hahittwak hune? Aang de juk aboithe loindu isuka dihide holobo, kwong alafuhohina adihap.”
\p
\v 3 Awoni nanyong d’adonge n’Olives namijyo ada Templo, efiye inyong hamaring Petro, Yakobo, Yoanne karing Andrea,
\v 4 “Inyahi ohoi, kanu de ofuni asang hune ifuhon? Aisong de ethaithitha hanyahi hijan aindek asang hune afuhon?
\p
\v 5 Yesu aculuyo ajaran dosong, “Omijyethek tuhudik, othulo lobo thaang hoithapnyaru ithai adi th’oyihoi lobis.
\v 6 Ofuni de holwari th’ofure tholo hindang, ajyori, ‘Nang, inyong.’ afuni ithai de ithapanyaru th’oyihoi lobis.
\v 7 Ara ethaningu ithai aremon dia olodok l’aremon, hoibangatha, ofuhi de asang hune, ti, kabong ecuhit hoindu.
\v 8 Oindu de amiji idotho, aremorik amiji nabo, ara ahabwore eriborik ahabwore. Owon de arithirithihio karik ahure d’amasok olwarai. Isong hune aculwetha h’adihari n’athamana.
\p
\v 9 “Iwona ara abuhu nahwan nahoi. Iyarai ithai de d’elulungir h’ohithwaha karik abahye ithai de ditha synagogues. Iwetha ithai de dihithemi h’ohoindefak h’abottok karik h’ohobusi, thonang, ara nanyahinerek isong.
\v 10 Ti, evanjelio thoilolongohini d’amisok bukulung ahithemi.
\v 11 Ara endafaithe, eyarai iye, hoihaya ainyong de ilo iye icama, anyo th’orii le, isarahini iye ainyong de ilo iye icama; ikara iye de ilo icama, ti, Ohoile Lodwa.
\v 12 Oindu de olai isarahina olai thottohori, oindu de omonye isarahina okalifonit thottohori. Ofuni de okalifinok iriborik omonye karik ahathingi, afuni isarahina isong thottohori
\v 13 Ofuni de ohothing fodok imanan ithai, anyo, th’ofure tholo hindang. Ti, longongok tok dicuhit, oindu de ithalwahunu.
\p
\v 14 “Ara etehu ithai amana n’amiehunu owetha d’amaji naang inyong ira iwetherek” (Ohoihenani thoteha tuhudik) “ohothing ho Judea thoingero di dongiok,
\v 15 Lowon dihide h’athwa, thaang hoicuru dihap dijingara ditha dia diduhuna aning nabo thothwa.
\v 16 Lowon dimana, thaang honyahu dihang diyaru abongo nauk thomiji.
\v 17 Omonyong de bebe d’ahathing hemoho karik ahathingie hethanahyo.
\v 18 Omojyothik ecuhit nahap thaang hofuho th’ohomio.
\v 19 Operok hule hethathaciana, hakang owonderek gee thoculwe h’ayeyo, nthuk Ojok ayeuna lwai hongorna, awang, aang hoindu iwonan.
\v 20 Ara kabong Ohobu hoindu ithasuhyo operok, awang mwai othulo loindu ithalwahunu. Ti, th’arami thoh’othulo logweluni, lathuk inyong anyimuna, obongyo operok honyong ara hosuk.
\v 21 Thiya, ara ojyo lobo dohoi, ‘Otiha, Kristo lo!’ dia ‘Idoro, inyong lo lo!’ hoiruk.’
\v 22 Aca ofuni de ho Kristo karik ohocorok hoikela ileyori; ofuni de isarahina ethaithitha hafalangai, dithadwalyerek, ara ocohi, juk lanyimni lo.
\v 23 Omijyethek tuhudik! athuk nang anyahina ithai asang hune bukulung dihithemi h’omiru.
\p
\v 24 Ti, diholu h’ethathacianitha h’operok hulo, oindu de oholong iriohon, aang de oyefa iinduna ifangan,
\q
\v 25 ofuni de ohilyefi idoitha thohide, karik akolon nothohide, oindu de ithathanianga.’
\v 26 Thiya ofuni de itehuna Olonyi l’Othulo oindu dith’adikolo, thakolon karik th’ablori thanahittok.
\v 27 Thiya oindu de isulahina anjelohio honyong disuduhun ohothing honyong hanyimuni th’ahomwathik arangwan th’ecuhitha h’ahap karik ecuhitha h’ahide.
\p
\v 28 Iyeyenathik th’ohiyani l’ahayo. Ara athandak habunyu, aliji, otiha hijan aindek Ohiribo.
\v 29 Inyong nara dang, ara ithai hetehu asang hune afuhon, otihatha hijan aindek inyong, dipogo hoyihethik.
\v 30 Diri, anyahi nang dothai, awang de oper lya holing adi, lwai asang hune fodok afuhon.
\v 31 Ofwoi de ahap karik ahide adi, ti, aangi de ocamitha hundang ofwo adi kwong.
\v 32 Ti, operok dia omiru hule, aang othulo lotek, juk anjelohio hothohide, dia Olonyi, arahari Omonye.
\p
\v 33 Otihatha tuhudik! Omijyethek, anyo aang ithai itek orii le.
\v 34 Ojahitha othulo lolo d’amaji nabo – idyaharu ahang nayong, esarak ohoigyemak honyong thoindefaithe, ngai h’egyema nanyong, anyahi ohoigyemani loindafaitho oyihet thomijye tuhudik.
\v 35 Ahana na, orathik, anyo, aang ithai itek kanu oindu lomonye h’ahang; thathari, dihiji oharie, disiret h’ohohorong dia thamoithe berien.
\v 36 Ara oindu nyurubut, hoisarahina thorimak ithai d’ajoo.
\v 37 Arami hajyo nang dothai hune, ajyo nang d’ohothing bukulung. Iririyethek!''
\c 14
\cl Ebwayit 14
\p
\v 1 Afithoro nya operok arehai dihithemi ofaning lodwa lonya ongerunerek Ojudei tho Egypto karik Amuno n’ofaning l’anyari naang otufo. Orimak nya ahibu ho fadiri hohittwak karik ohoigerok iduhumya arimahina oyihoi loindefunerek karik attohori Yesu ihoholai.
\v 2 Aca ithabuho nya isong ajaran, “Ikara th’ofaning thamuno, tek elulungir h’ohothing adothoi dingalafa.”
\p
\v 3 Yesu di Bethany dihang ho Simone l’atalulu, dinyari, aindu athulo naboling donyong, iyanu h’elethang nangwo kudarr dihulo nako enyanga nanyong. Abut inyong na ehulo, abuhok elethang dihu honyong.
\v 4 Ti, owoni nya ohothing homok diya hengere bebe. Acama isong hamaring ajyori, “Aisong arami hetharohojerek elethang ne ahani?
\v 5 Irahi ithanyangahina tha denario hakalu esihe aunihoi, esarahini d’ohoicanak.” Arai song eringyo athulo ne.
\p
\v 6 Ti, Yesu ajyo, “Idehina inyong na hamaring. Anyo ithathacianio ithai inyong? Athuk ehandyo aning nalibo donang.
\v 7 Iwon ithai juui h’ohoicanak; ara iwak ithai, ocohi dothai dihandyo ara nayyu dosong, ti, aang ithai de iwon honang juui.
\v 8 Athuk inyong na ehandyo aning nacohi inyong ehandyo. Athuk eyelyo ahwan hindang dinuhahinerek
\v 9 Diri anyahi nang dothai, ara evanjelio nafuni inyahina dihap, ofuni de icama aning nathuk athulo ne ehandyo, diyuhinerek inyong na.”
\p
\v 10 Thiya, Juda Eskariote, aboithe tho tomon larehai, alo do fadirihio hohittwak, dithafothok inyong inyong dosong.
\v 11 Ethaninguna na fadiri arami hune, amunoi bebe, eruhohini esarahina inyong enyahwo. Inyong hathi atahitha oyihoi lethafothohinerek inyong inyong dosong.
\p
\v 12 D’ofaning ohoithemoni l’Anyari Naang Otufo, athuhon nasong amudyo oker l’ofaning lohittok l’Ojudei, ajyori ohothifok honyong, “Dingai iwak iye ofwoi ihuhumyo amaji nefwo inyerek anyari n’ofaning lohittok l’Ojudei?”
\p
\v 13 Asulak inyong lo arehai h’ohothifok honyong, ajyo dosong, “Ifwatha ditha h’abore, irwangarik ithai de othulo loindafaitho oibithi l’ahari. Othifothik inyong.
\v 14 Amaji najingahinerek inyong dihang, othifothik inyong, ara ithai ijyo do lomonye ahang, “Najang athwa hindang n’othohomononi, nanderek nang inyerek anyari d’ofaning loittok l’amuno l’Ojudei h’ohothifok hundang?”
\v 15 Ithaithak ithai de athwa nalat nathuk ehuhuma dihide. Ihuhumahina dohothai amaji diya.
\v 16 Ohothifok afwoi dibore. Arimak isong asang fodok iring nathuk inyong anyahinerek isong, ara isong ehuhumyo dosong anyari n’ofaning lohittok le diya.
\p
\v 17 Nya thathari, aindu h’ohothifahak honyong tomon lareha.
\v 18 Diyokongi nya hosong dinyari, Yesu ajyo dosong, “Diri ajyo nang dothai, aboithe lothai, lonyo honang, ithangathak nang de adi.
\p
\v 19 Adihari nya othaja hosong bebeb, ara isong abok abok ajori donyong, “Paat acut, ikara nang?”
\p
\v 20 Yesu etharangyo ajyo dosong, “Inyong lo aboithe tho tomon larehai, lya, letuhi ahinang honang ditha hoibithi l’anyari lya.
\v 21 Aca olo de Olonyi l’Othulo, iring nathuhi egerorik thonyong. Ti, ara afuro, d’othulo loindu de ithafothohina Olonyi l’Othulo adi le! Ira nya iyiji, ara kabong nya kodien oyisuni inyong.”
\p
\v 22 Dihide nya hanyari nasong, eduhu Yesu elolonge n’anyari, amijyo dihide, aboroyo, apinyo, ethafothok inyong dosong karik ajyo, “Iyatttik na, ahwan hindang ne.”
\v 23 Eduhu oihutye, afurak ahinywarang, esarak inyong dosong, ara isong bukulung amatha thothonyong.
\v 24 Ara inyong ajyo dosong, “Ahotho hindang na, nemora angejuk, ahotho nabuhohini th’ohothing olwarai.
\v 25 Diri ajyo nang dothai, aang nang de amatha ikoti n’ahayocong na, tok d’ofaning le, ara nang lamatha angejuk dith’Ohobye l’Ojok.”
\p
\v 26 Athuhon nasong edolo oyele, afwoi d’adonge n’Olives,
\v 27 Yesu ajyo dosong, “Ipwaharu ithai de fodok adi; aca igero, ‘Abak nang de ohoyohoni, ara akero athurohunu.’
\v 28 Ti, diholu h’ethadothuna nang dihide, alo nang de ahithemi nathai di Galilea.”
\p
\v 29 Petro ajyo donyong, “Juk apwaharu isong fodok adi, awang nang.”
\p
\v 30 Yesu ajyo donyong, “Diri ajyo nang dohoi, ahanana – aa, oharie l’ahanana lya, dihithem h’esir n’ohohrong operok arehai, irisa iye nang de operok aunihoi.”
\p
\v 31 Ti, Petro enginyo, ajyo, “Ara awon ara aye hohoi, awang nang iye arisa.” Isong fodok eruhohini ahani donyong.
\p
\v 32 Isong afuni d’amaji nelongoi ara Gethsemane; ara Yesu ajyo d’ohothifok honyong, “Owoniera dini, ahibu nang amojyo.”
\v 33 Inyong eyaru Petro, Yakobo karik Yoanne honyong, aculuyo ejyoria bebe.
\v 34 Inyong anyahi isong, “Odiha othaji hindang bebe tok diye. Opwahatha dini, karik omijyethek tuhudik.”
\v 35 Aden nanyong tiibai ahani, Yesu apwaharu dihap; Inyong amojyo hijan ara dwo kodien ocahi, irahi omiru hulya ifwan adi thonyong.
\v 36 Inyong ajyo, “Abba, Monye, dohoi, ocohini asang bukulung awonan.” Iyaru oihutye lya adi thonang. Ti, ikara awahan hindang, ti, nahoi.”
\v 37 Inyong anyahu, orimak isong hojoothoi, inyong ajyo do Petro, “Simone, iye lohoijootho? Awang ocohi dohoi eririhina nang juk orii aboithe?
\v 38 Omijye tuhudik karik ara iye imojyo, daang iye ijingak ditha esusuitha. Owak kodien ohoile, ti, ilik ahwan.
\v 39 Koti alo dimojyo th’ocamitha thohodwo omojyorik inyong thohulo.
\v 40 Anyahuna nanyong dosong, oindu irimahina hoferori, ara houk ahonde. Awang isong hulo otehi, ainyong ojyo isong donyong.
\v 41 Inyong aindu dosong operohothi oithaunihoi, ajyo dosong, “Ithai hohoijootho karik ithai hohoiyiri? Acohi! Edwongi omiru. Omijyethe! Athuhi ethafothohina Olonyi l’Othulo dihas h’ohoiyak.
\v 42 Odothothik. Hafatha. Anyiha othulo loithafothok nang adi lo.”
\p
\v 43 Hocama Yesu ahani, edwong Juda, aboithe tho tomon larehai, Oindu helulung ohothing nabolo h’odemio karik otheleho, tha fadiri hohittwak, ohoigerok karik ohobolok.
\v 44 Thene, onde lethafothok inyong adi lo, aithak, ajyo, “Aboithe lamandayo nang lya, inyong othulo. Indefuna inyong ara ithai ikiyaru inyong adi.”
\v 45 Edwong no Juda, aindu do Yesu, ajyo, “Ohoityenani,” emandayo inyong.
\v 46 Thiya, abahye karik endefuni inyong.
\v 47 Ti, aboithe losong lowetha indehai, ahethu ademi, esalu ehiok n’ohoigyemani lo fadiri lohittok.
\p
\v 48 Yesu ajyo dosong, “Ifunu ithai iring hofuni d’ohoholani th’odemio karik otheleho dindafaitho nang?
\v 49 Omiru hawonderek nang nya juui hothai karik nang etyenio di Templo, kabong ithai nang hoindafaitho. Ti, owon inya ahani dofuni arami hotho maninihio ifuhon.”
\v 50 Ohothing honya owoni ho Yesu bukulung, edyaharai inyong. angerori adi.
\p
\v 51 Owon nya diya othulo ottwathi lothifoitho Yesu; iyofo abongo narere hamaring dimuhohinerek ahwan nanyong. Endafaitho nya n’ohothing Yesu, edyaharu abongo, angero iluluyai.
\v 52 Ethaitharai Yesu do fadiri lohittok.
\p
\v 53 Osuduhai nya honyong, ofadirihio fodok hohittwak, ohobolok karik ohoigerok.
\v 54 Thene, Petro athiforo inyong; odaha ti, olamarai, lwai dipar ho fadiri lohittok. Inyong awoni dihiji h’ohoigyemak, asuja ahimang.
\v 55 Thene, ottahithi nya ho fadiri hohittwak karik elulung nahittok n’Ojudei aning nepal nehandyo Yesu, dottohorik inyong. Ti, kabong horimahini naboling.
\v 56 Aca ohothing holwa emangahini hijan epal Yesu, ti, emangio nasong aang hoiruhohunu.
\v 57 Ara homok adotho, emangahini hijan epal Yesu, ajyori,
\v 58 “Ethaningu ohoi inyong ajaran, ‘Etharohojo nang de a templo naduhoi th’ahas ne adi,
\v 59 Diholu h’operok aunihoi, aduhu nang de naboling naang ahas thiya.’”
\p
\v 60 Fadiri lohittok adotho dihiji hosong, efiyo Yesu, “Aang etharangio nahoi?” Ainyong ojyori ohothing hulya nepal icama iye?”
\v 61 Ti, inyong adularu, aang ocama. Koti, fadiri lohittok efiyo inyong, ajyo, “Iye Kristo, Loboithe Laborwa lo?”
\p
\v 62 Yesu ajyo,”Nang inyong; itehu ithai de Olonyi l’Othulo ara lawoni dinget h’akolon, aindu ditha h’adikolo hothohide.”
\p
\v 63 Ara fadiri lohittok aricyo abongoitho hanyong, ajyo, “Hoiwak ohothai ohothing homok hotihak?”
\v 64 Ethuk ithai ethaninguna omorit l’asang hadwa. Ainyong iwak ithai ihandye? Edari isong fodok inyon, awahi hijan inyong thottohori.
\p
\v 65 Aculuyo homok amicyo ahamilak donyong, emuhohini ahomong nanyong, anduhye inyong, ajyori donyong, “Ecorit!” Ohogyemak hohong h’ohoremok eyarai, afwoi ibahyo inyong.
\p
\v 66 Orii ho Petro difwatha h’oyalu nothohop, aboithe n’aduring h’egyema do fadiri lohittok aindu donyong.
\v 67 Inyong na atehu Petro osuja ahimang. Amijyo donyong na iindehai, ajyo, “Iwon iye nya do ho Nazarene, Yesu,”
\p
\v 68 Ti, eda arami hune, ajyo, “Aang nang atek dia aang nang atek tuhudik aisong arami icama iye. Thiya, aindu dindak, d’oyihet lohittok. Ara ohohorong esir.
\p
\v 69 Ti, inyong eda arami hune ikoti. Ti, aitho ehegyemani ne atehu inyong, ajyo ikoti d’ohothing honya owetha diya iindehai, Othulo lya, lobo thosong.
\p
\v 70 Ti, inyong arisa ikoti. Omiru tiibai ahani, ohothing honya awetha dini hulo, ajyori do Petro, “Aang opwak, iye aboithe losong. aca iye othulo lo Galilea.”
\p
\v 71 Ti, aculuyo esarak ahwan nanyong ditha epithathik karik dipitha. “Aang nang atek loni othulo lecamai iye thonyong lya.
\p
\v 72 Ohohorong esir operohothi oitharehe. Thiya Petro eyuu ocamitha hathuk Yesu anyahina donyong: “Dihithemi h’esir n’ohohorong operok arehai, irisa iye nang de operok aunihoi.” Ara inyong apwaharu dihap, abuhyo ehiyo.
\c 15
\cl Ebwayit 15
\p
\v 1 Nya th’amoithe berien, efefenai amaji aboithe ho fadiri hohittwak, ohobolok, ohoigerok karik elulung nahittok n’Ojudei. Thiya, athoryo isong Yesu, eyarai adi; afwoi ithafothohini inyong do Ponsio Pilato.
\v 2 Pilato efiyo inyong lo, “Iye Ohobu l’Ojudei?” Inyong lo etharangyo inyong, “Iye ijyo ahani.”
\v 3 Ara ho fadiri hohittwaak elalodohyo inyong th’asang olwarai.
\p
\v 4 Pilato efiyo inyong, “Aang iye itharangyo? Idoro, baya asang helalodohok isong dohoi!”
\v 5 Ti, kaang Yesu oindu itharangyo inyong; kombwo, ethafalangyo inyong.
\p
\v 6 Thene, d’omiru hule, d’ofaning l’amuno, ohohinda nya Pilato d’ohothing othulo lefitha aboithe lefiyu isong.
\v 7 Owon nya othulo lefitha h’oimingejak ohottohok loilongoi ara Barabbas d’orii h’ edara athifoitho n’oyalu.
\v 8 Elulung n’ohothing aindu do Pilato, aculuye efiyo inyong thoihandye iring nehandyecerek inyong.
\v 9 Pilato etharangyo isong ajyo, “Iwak ithai ahohi nang ithai Ohobu l’Ojudei?”
\v 10 Otek nya Pilato hijan ahaini isarak ho fadiri hohittwak ethafothohina Yesu donyong.
\v 11 Ti, ho fadiri hohittwak esusuhini elulung n’ohothing thoiikoro bebe hijaran Barabbas thohohini kombwo.
\v 12 Pilato etharang isong ikoti ajyo, “Ainyong iwak ithai ehandyo nang d’Ohobu l’Ojudei?”
\p
\v 13 Isong ekor bebe, “ Obehok inyong di kruce.”
\p
\v 14 Pilato ajyo dosong, “Ainyong namonyong ehandyo inyong?” Ti, isong ekor bebe, tholohide h’ekor, “Obehok inyong di kruce.”
\v 15 Difong elulung n’Ojudei, Pilato ahohi Barabbas. Ethafodohyo Yesu, ethafothok inyong dosong dibehohina di kruce.
\p
\v 16 Ohoremok eyaru Yesu difwata h’oyalu (Amaji Nahittok n’Endafaitho Ahap), isong elongu asuduhe n’ohoremok nahittok amaji aboithe.
\v 17 Ara isong ethayofok Yesu abongo anaporong, ehuhumye ehithang n’oyihwa abehohini dihu honyong.
\v 18 Isong aculuyo emandayo inyong and ajyori, “Koruk kaa, Ohobu l’Ojudei!”
\v 19 Ethabuho nya isong abahyo ahu nanyong th’amukok thon’othelek karik amicyo ahamilak donyong. Arigongoi karik adulai isong hulo dihithemi honyong.
\v 20 Athuhon nasong ethalubangyo inyong, ahouni adi thonyong abongo anaporong na, ethayofohini inyong abongo nanyong, eyarai inyong dibehohina di kruce.
\v 21 Owon nya othulo lobo, Simone lo Cyrene, loindu tho miji, (Lomonye ho Alexander karik Rufus); eringahini inyong th’odohoro akruce.
\p
\v 22 Ohoremok eyanu Yesu, lwai d’amaji nelongoi ara Golgotha (Neloicye ara “Amaji n’Ahu”).
\v 23 Isong esarak donyong obalu loiharwo h’angenge n’ohiyani nangwuo kudarr, ti kabong homatha.
\v 24 Abehohini di kruce, ebwaye abongoitho hanyong th’arwasyo otenge dinyahina nani abongo olo ohoremoni dia loni iyaru.
\v 25 Orii oihaunihoi obehok isong inyong di kruce.
\v 26 Dihide ethaithit, isong negero a pal, “Ohobu l’Ojudei.”
\v 27 Honyong, isong abehok ohoholak areha, aboithe dinget honyong, aboithe dihothong.
\v 28  \f + \ft Amaninihio angoro hayyu ho Marko 15:28: Aindu amanini iwonan najyo, “Eherahini inyong h’ohothing haang obis,’  \f*
\v 29 Ohothing hodaha thole, amorye inyong, eniningye ahosi hasong, ajyori, “Oco, aca ijyo iye itharohojo iye de ara iye iduhon a Templo ditha operok aunihoi,
\v 30 olwaha ahwan, icuru dihap tho kruce.”
\p
\v 31 Ahani dang, ethalubangyo inyong ho fadiri hohittwak, isong h’ohoigerok, ajyori, “Olwahyo homok, ti, aang ithalwahu ahwan nanyong.
\v 32 Kristo, Ohobu lo Israele, icuru dihap tho kruce, ditehu ohoi ara ohoi iruk.” Ara ohothing hobehohini honyong hulo emomoryo inyong dang.
\p
\v 33 Oriihio inde, ajyo ahap fodok risik tok d’orii oithasahale. D’orii oithahale, ekor Yesu, omurut dihide, “Eloi, Eloi, lama sabachthani?”
\v 34 Nawetha dimaji hajaran, “Ojok hindang, Ojok hindang, anyo irwasaru iye nang?”
\v 35 Ohothing howetha diya koko, ethaninguna arami hune, ajyori, “Idorotho, inyong lo lelongo Elijah.”
\p
\v 36 Othulo aboithe lobo, angero, anywahu obalu lerwarwathanga, ahisak dibahandi, esarak inyong thomathai. Othulo lya ajyo, “Hedoryethek ara oindu Elijah idohuna dihap.”
\v 37 Thiya, Yesu ekor omurut dihide, aye.
\p
\v 38 Ara emuhet na Templo aritha thoihiji, thohide lwai dihap.
\v 39 Atehuna na lahong l’ohoikyak, lowetha dihomong ho Yesu, hijan athuk inyong aye th’oyihoi tholya, ajyo inyong, “Diri othulo lya nya Olonyi l”Ojok.”
\v 40 Owoni nya dang angorwo hengengelyo olamarai. Owoni nya dihiji hosong, Maria magdalina, Maria (nahathingi ho Yakobo attwatti karik Joses) karik Salome.
\v 41 Omiru inyong di Galilea, athifoithe karik egyemai donyong. Maria karik angorwo hamok nya dang afuni honyong di Yerusalem.
\p
\v 42 Athuhon nya athari ainduna, anyo, ofaning nya le loihuhumarik, ofaning lothohithemi h’ofaning Oithacofe,
\v 43 aindu Yoesfo lo Arimathea diya. Inyong lo nya othulo lobangi. Owon nya ara l’asuduhe n’ohothing hoithilayo ohobye l’Ojok. Ethakolyo inyong lo ahu, alo do Pilato difiyo ahwan no Yesu.
\v 44 Afalanga Pilato hijan athuk Yesu aye; elongo inyong lahong l’ohoremok hoikeyo ohothing hoifitha; efiyo, ara aye Yesu.
\v 45 Ethaninguna no Pilato th’ohoremok h’ohoikeyak h’ohoifithak, esarak ahwan no Yesu do Yosefo. Athuk Yosefo enyanguna abongo narere nemuhyerek ohoyak.
\v 46 Ethacuru inyong dihap tho kruce, emuhok th’abongo, ethaferik inyong dihilame, nanya obohohini ditha h’amorwong. Thiya, ara inyong eyafulangak amorwong dihuthuk h’ahilame.
\v 47 Maria Madalina karik Maria nahathingi ho Joses atehuni amaji namuhahinerek Yesu.
\c 16
\cl Ebwayit16
\p
\v 1 Engohunu nya n’Ofaning Oithacofe, enyanguni Maria Madalina, Maria nahathingi ho Yakobo, karik Salome elethang nafuni isong eyelyerek ahwan no Yesu.
\v 2 Nya th’amoithe berien n’ofaning ohoithemoni l’esabit, afwoi dihilame ahibu oholong athuk ettoruna.
\v 3 Acamai isong huna dihiji hosong, ajyori, “Ngai de olo iyafulanguna omorwong adi thohuthuk h’ahilame?”
\v 4 Amijyo nasong adihide, atehuni omorwong athuhi eyafulanguna adi; obolo nya omorwong le bebe.
\v 5 Isong ajingari dihilame, atehuni ottwathi loiyofo abongo abong, owoni d’oyirik l’enget; abangi isong huna.
\p
\v 6 Inyong lo ajyo dosong, “Hoibangatha. Ithai hethifeyo Yesu lo Nazarete, lonya obehohini di kruce lo. Ebuhu! Awang thene. Ottihatha amaji nethaferihinerek isong inyong.
\v 7 Ti, ifwatha onyahina ohothifok honyong karik Petro, “Inyong lalo ahithemi nathai di Galilea. Itehu ithai de inyong diya, iring nanya arhuk inyong anyahinerek ithai.
\p
\v 8 Ajinguni isong dindak angerori adi thohilame; ehihirai karik abangi. Kabong onyahini aning nabo d’othulo kwong, anyo, abangi nya isong bebe.
\v 9 [Nya th’amoithe berien d’ofaning ohoithemoni l’esabit, diholu h’ebuhuna nanyong, ecak inyong aleyori do Maria Madalina, nanya ongararik inyong ohoilehio cofa homonyong adi thonyong na.
\v 10 Alo inyong na alo inyahina ohothing honya owoni honyong hulo ahibu isong ikori karik ethangerye ehiyo.
\v 11 Ethaningu isong hijan omijyo inyong karik atehu inyong na inyong, ti, kabong iruhi.
\p
\v 12 Diholu h’asang hune, aleyo inyong thoyaitha hamaring d’arehai hosong, di daha hosong dith’amiji.
\v 13 Isong anyaha, afwoi inyahina homok, ti, kabong iruhi dosong.
\p
\v 14 Nya diholu, Yesu aleyo d’ohothifok honyong ahibu isong dinyari; ara inyong eringyo isong, thaangan than’eruhon nasong karik akolon n’othaji, anyo, kabong hoiruhi d’ohothing holeyo inyong dosong diholu h’ebuhuna nanyong th’ohoyak.
\v 15 Ara inyong ajyo dosong, “Ifwatha dihap fodok dityenio evanjelio d’ayeuna bukulung.
\v 16 Loiruk abuhohini batisimo, ithalwahunu de; ara laang hoiruk, idari de dang inyong.
\v 17 Ofwoi de ethaithitha hune h’ohothing hoiruk: th’ofure tholo hindang, ongaterek de isong ohoilehio omonyorok adi. Ocama de isong th’ahuthuhye angejuho.
\v 18 Ohuro de isong amunuok th’ahas thahasong, karik juk amathai ehweri nethayeyo, aang de iryafu isong. Ithaye de ahas dihide h’ohodihak, ayiji.”
\p
\v 19 Athuhon n’Ohobu Yesu acama dosong, eyarai inyong dihide, awoni dinget h’Ojok.
\v 20 Ohothifok afwoi inyahina evanjelio dihap bukulung, ahibu Ohobu igyema hosong, ethakolyo ocame losong, thethaithitha thahafwo honyong.]